قهوة الحراميه

 

ألتف الحرامية حول المعلم فيشه شيخ المنصر وهم فى حالة تزمر وأنزعاج بعد أن أعلن عن نيته فى التوبه والأعداد لرحلة الحج فقال له مقص الحرامى : ماينفعش الحج يا معلم من الفلوس الحرام

فيشه : جيبت الكلام ده منين ياض

- بيقولوا كده فى التليفزيون

- أنا مش قلت 100 مره محدش يتفرج على التليفزيون أو يدخل الفيس بوك واليوتيوب وكلنا حلفنا مع بعض على كده أنتم نسيتوا ولا أيه

فتوح النشال : انت توبت وحتطلع تحج والرجاله دى حتعمل أيه

- تشتغل عادى والأيد البطاله نجسه

- مش ممكن تأجل التوبه للسنه الجاية يكون كل واحد فينا رتب أموره ونطلع الحج صحبه والتوبة تطول الكل

- خلاص أنا قررت التوبه واللى عايز يتوب هو حر وده آخر كلام

- يا معلم أحنا فى أيدينا عملية سوقع اليومين دولت حنطلع منها بمليار ولا أتنين

- محدش قال لى عليها ياولاد الكلب أنتوا بتسرقوا من ورايا

- يا معلم حقك محفوظ وحيوصل لحد عندك وبما أنك توبت وأنابت وحتطلع تحج يبقى مش حينفع تاخد حقك لأن حجتك حتبوظ وتوبتك مش حتنفع

يضع فيشه يديه فوق رأسه ويسرح بنظره فى سقف القهوة ثم يهب واقفا

وهو يقول : تؤجل التوبه والحج للعام القادم رفعت الجلسه

يهتف الحراميه فتهتز أركان القهوة: يحيا العدل .. يعيش المعلم فيشه راعى الحرامية

كلام فى الصميم

أنا اللي لابس تهمة،، وذنبي اني حلمت في يوم
بأكله ترم البدن
هما يجيلهم تخمة،، وانا نص عشايا نوم
انا يصعب شرحه،،
اللي بيضحك علي جرحه،،
واللي بيقلق من فرحه،،
عيان زي الفل
انا المواطن مصري،،
كاره عيشة الذل

الخبر السعيد

 

بعد أن أشرب قهوة الصباح أتصفح كافة المواقع الألكترونية والأخبارية لعل وعسى أن أجد الخبر الذى أنتظره من سنوات..ولم أيأس فسيأتى هذا الخبر أن آجلا أو عاجلا فهذه حال الدنيا
وأردد بعدها قول الشاعر:
دع المقاديرَ تجري في أعَنّتها
ولا تبيتنّ إلا خاليَ البالِ
ما بين غَمضةِ عَين وانتباهتها
يغيّر الله من حالٍ إلى حالِ

يارا فى التخشيبه

فى ليلة رأس السنه البعض من كبار السن أمثالى قام بقضاء الليله فى السرير وتحمل غلاسة التليفزيون وبرامجه المعاده والمكرره اما الشباب واللى على قدهم قرروا أن يحتفلوا بالكريسماس فى الكوفى شوبات ( جمع كوفى شوب) فهم لا يتحملوا المبالغ ذات 3 أصفار التى فرضتها الفنادق والملاهى الليليه السياحية

لفت نظرى فى جريدة الصباح خبر القبض على المطربه يارا وهى تغنى بدون تصريح فى كافيه بمدينة نصر ليلة رأس السنه

بحثت عن المطربه يارا محمد على اليوتيوب فوجدت لها عشرات الفيديوهات فهى مغنية أفراح شعبية ومهرجانات .. الست يارا ربنا يبارك فى شبابها تولع أجدعها فرح شكلها مش بطال وصوتها حلو وشقى قصدى وشجى وممكن تغنى لصباح وشاديه وورده وأم كلثوم وشكوكو فى وصله واحده موهبه عشوائية لم تجد من يأخذ بيدها لتصعد سلم المجد

ياعينى عليكى يارارا.. وهى واقفه بتغنى ومصهلله فى الكوفى شوب والشباب حولها بيرقصوا ويتطوحوا ودخان الشيشه والبانجو معبأ المكان يدخل عليها العقيد رستم الدباح كالقضى المستعجل ومعه لفيف من الساده الضباط والعسكر والمخبرين

وتم القبض على مطربة الأفراح يارا محمد بفرقتها وسلاطتها وبابا غنوجها والقهوجى وصاحب الكافيه والواد بيسو منادى السيارات الكل تم شحنهم بربطة المعلم فى البوكس وأطلع يا دباح على قسم مدينة نصر وأتستف لهم قضية أزعاج سكان والغناء بدون تصريح والوقوف فى الممنوع ومخالفة الأمر الوزارى لعم مدبولى بمنع الشيشه وبالتالى مصادرة الشيش والطبول والدى جى اللى مازالت يارا تسدد فى أقساطه وخرج رواد الكافيه ليجدوا جميع سيارتهم قد تم كلبشتها لتكتمل ليلة رأس النكد .. وعلى رأى المثل

للى عاجبه من الكحل يتكحل و اللى مش عاجبه من البلد يرحل

 

احلام سيادتك اوامر

شخبطه سعادتك تخطيط لمستقبلنا

شالوت جنابك دفعه للامام

في جمهورية نفاقستان يمكن ان تكون نجما في ظرف عدة أيام، المهم ان تمتلك ادوات النفاق وجمله المشهورة من اول «أحلام سيادتك أوامر» وحتى «شخبطة سيادتك خطط، لمستقبلنا الزاهر» في هذا الزمان اذا اردت ان تحقق ما تتمناه فاختصر الطريق واحفظ «كام» درسا من دروس النفاق لأولى الأمر وبعدها تفتح لك كل الطرق المغلقة وتصل الى المطلوب والمراد، وليس مهما في هذه الحالة موهبتك او عملك او قدراتك بقدر ما هو مهم ان تجيد فن النفاق، او فن التطبيل والتزمير والتهليل والرقص على كل الحبال حتى تنقطع فتبدأ الرقص على حبال اخرى موصولة. هو المنافق.. رجل لديه القدرة على ان يكتم ما بداخله ليظهر على وجهه ولسانه شيء عكس ما يشعر به فيقول شيء وهو يعني شيئا آخر. ولكن اخطر المنافقين هم الصحافيون والاعلاميون ذلك ان الناس في مجملهم تأخذ كلامهم على انه مصدر ثقة لذا فإن آفة الامة العربية ان معظم كتابها ومثقفيها هم من أصحاب موهبة الطبل والزمر وتلعيب الحواجب والرقص بموسيقى وبدون موسيقى وعلى حسب هوى ومزاج فخامة الزعيم.. فإذا شخبط الزعيم في ورقة قالوا في افتتاحيات اليوم التالي ان شخبطة فخامته وضعت البلاد على الطريق الصحيح وأن المستقبل العظيم ينتظر البلاد والعباد.. وعندما يشخط فيه احدهم يقول له على الفور.. ماتزعلش حضرتك.. أنا اصغر مسمار في جزمة سعادتك

الكفته تتحدى نوة المكنسه

الآسطى جابر المتضايق وهو أسم على مسمى وأثناء عودته ومعه مراته فكيهه العايقه وعياله سوكه وميزو من بيت حماته فى بحرى بسيارته المتهالكه 128 أنفتحت عليهم أبواب السماء بماء منهمر وخرجت أمواج البحر من سور الكورنيش ولتكتمل المأساة لتحاصرهم من فوق ومن تحت دخلت مياه المطر إلى المحرك من الكبوت المخروم فتوقفت السيارة تحت نفق كليوبترا ولم تمر غير دقائق ألا والمياه قد غمرت السيارة من الداخل بأرتفاع متر ونصف وقاربت المياه على تغطية سقف السيارة فنزلوا جميعا يسبحون ويخوضون فى الماء خارجها

سعيد : امسكى يا فكه كه على ما أغطس أجيب الحبل من شنطة العربية

-  أحيييه بسرعه يا جابر الميه بتعلى كل مادى وأنا قصيره وماليش طول

- عومى يافكيهه عومه كلابى زى ماعلمتك فى ابو قير وخدى العيال على ضهرك

- بسرعة شويه ياسعيد العيال قافشين فيه ولا عارفه أعوم كلابى ولا معيزى

يعود جابر بالحبل ويربط به العيال والمدام ويقوم بسحبهم خارج النفق ويظلوا طوال الليل فى أنتظار سيارات الآنقاذ لأخراج سيارتهم التى خرجت من داخل النفق وهى مدمره

فكيهه : تفتكر يا سعيد العربية دى حترجع تمشى تانى

سعيد : أيوه .. عيب عليكى جوزك أجدع سمكرى في أسكندرية ..انتى ناسيه لما نزلنا بيها الترعه السنه اللى فاتت وأحنا رايحين الدلنجات عند اختك وأشتغلت بعديها

- فاكره يا خويا ..العربية دى شافت مننا بلاوى ..

- عشان فلوسها حلال ومعاكى أسطى محترم.. أنا بفكر من زمان أركب فيها ماتور لنش علشان المطر والمجارى والمواسير اللى بتضرب فى أسكندرية كل سنه

ميزو : بابا بابا ..أنا حنزل أعوم شويه أنا وسوكه على ما تخلصوا

فكيهه : ماتروحش فى الغريق ياميزو وخلى بالك من أختك

سعيد : ايدى بأيدك يا فكيهه نطلع فرش العربية وننشره بره على ما أنشف الماتور

- تصدق يا سعيد ان حلة الكفته بتاعة امى موجوده فى العربية وماحصلهاش حاجة نادى على العيال علشان ياكلوا معانا

- تعيش كفتة ام فكيهة.. وليسقط محافظ الأونطه والزروطه ونوة المكنسه

 أنا لا بتشال ولا بتحضن ولا بتباس

صرحت الفنانه اللامعه بعد أن تزوجت وربنا هدأ سرها بأنها لا بتتشال ولا بتتحضن ولا بتباس !

وفى لقاء مع مذيعه معروفه بطول لسانها قالت لها : ده أنتى فى فيلم الصعلوكة تتحدى شمشون نص الفيلم البطل شايلك على ذراعه ولما تعب شالك على ظهرة ولما فييص شالك على أكتافه

أما البوس والأحضان فقد ضربت الرقم القياس فى فيلم المرأه المسترجله بأحصائية مثبته بأنك أتباست فوق 200 بوسه

-        أيوه حصل أنا مابنكرش .. زمان كان حاجه ودلوقت بعد الجواز حاجة تانيه والبوس كان هادف وماشى مع أحداث الفيلم

-        بأمارة المشهد اللى كنتى راكبه فيه الأتوبيس والسواق فرمل فوقعتى على كتفه فقام واخدك بوسه .. أيه بقى لزمتها البوسه دى يا مدام

-        دى بوسه جدعنه وتقدير مش كان أحسن مايعمل حادثه هئ هئ هئ