البلحه الحمرا (1)

تقدم لخطبتها وكان شرط ابيها الأساسى هو ان يحضر لها اكبر بلحه حمرا فى العالم وتكون فى حجم البنى آدم مقابل ذلك لا يريد منه لا مهر ولا شبكه ولا شقه ولا نيش ولا فرح ولا عوالم ولا مؤخر ولا أيصالات امانه فتعجب العريس وأهله من هذا الطلب الغريب وسأله مستعجبا هل توجد بلحة على كوكب الأرض فى حجم الأنسان وكمان حمرا فرد عليه والدها وهو محتدا : ايوه حمرا وتكون حمرا قوى فأبنتى لا تقل عن أبنة خالتها التى كان مهرها أكبر بطيخه وأبنة عمها التى كان مهرها أكبر كوسايه

أم العريس تهمس فى أذنه : أيه يابنى العيله الغريبه دى أللى مهر بناتها أكبر بلحه وتكون حمرا قوم يا أبنى بلاش همّ

ينظر العريس لأمه وفى عينيه الدموع ويقول لها متوسلا : فى عرضك ياماما وافقى وأنا حتصرف.. بحبها مش عارفه يعنى أيه بحبها وحجيب اللى أبوها بيقول عليه حتى لو كان لبن العصفور

أمه : أتوكس يا موكوس اللى يشيل قربه مخرومه حتخر على رقبته ( ثم تقف وتقول خلاص ياحاج بلحه.. ابنى حيجيب اللى أنت عايزه

- وتكون حمرا قوى .. نقرأ الفاتحه لينتهى أرتباطنا بعد 3 شهور إذا لم يحضرها

يجلس العريس مع أصدقائه ويحكى لهم عن طلب ابو العروسه وتنفجر الشله فى الضحك والألش على البلحه الحمرا ويأمر أعقلهم الجمع بالسكوت ليسمعوا له فقد وجد الحل .. فقالوا له قول يا فالح .. قال : إذا كانت بنت خالتها كان مهرها أكبر بطيخه وبنت عمها كان مهرها أكبر كوسايه .. تبقى تاهت ولقيناها

-نسأل بنت خالتها أو بنت عمها من أين احضروا اكبر بطيخه وأكبر كوسايه

يقوم العريس ويحتضن صديقه ويترك أصدقائه ليذهب إلى أبنة خالة العروس ويسألها من اين احضر خطيبها اكبر بطيخه فقالت له بعد تردد : خطيبى محلفنى أنى ماقولش لحد ..كلام فى سرك الحقيقة هو جابها من مصر فموجود بها اكبر بطيخ واكبر كوسه وأكبر مصيبه  أكيد موجود فيها أكبر بلحايه

يصرخ بأعلى صوته وهو يجرى ليلحق بأول طائره تتجه لمصر : جايلك يا أم الدنيا جايلك يا أم العجايب .. جاى لبطيخك وبلحك وكوستك ....تتر النهاية

لطفى الفرعون ونبيل العنتيل

شيماء اصطحبت زوجها لطفى للعياده لتكشف عليه بعد أن أمتنع عن الأكل والشرب والكلام لمدة 5 أيام فحكت للطبيب ما ألم بزوجها فقالت هذه الحالة لم تصبه فى يوم وليله بل جائت بالتدريج حتى قطع كل شيئ وهو دائم النوم والسرحان فأمره الطبيب أن يخلع ملابسه وينام تحت جهاز الأشعة ويقوم بتوصيل كابل كهربائى بظهره ويخرج إلى زوجته القلقة وبادرها بقوله : ساعتين وحيبقى كويس جوزك ده مش أصلى يامدام د ه كوبى 3

-        يعنى أيه يادكتور .. بعدين أبقى افهمك هو كان مسافر بره.- أيوه كان جاله عقد عمل فى السويد ولسه راجع من 6 اشهر - مفيش ولا مره حطتيه على الشاحن - شاحن ايه هو موبايل - جوزك اللى قدامك ده مستنسخ من جوزك الأصلى وفيه نسخ كثيره بره بأسم لطفى الفرعون ماركه مسجله والنسخة الأصلية اصبحت خميرة لعمليات الأستنساخ .. يعنى اللى معايا ده مايبقاش جوزى.. قولت لك ده نسخة منه وهاى كوبى كمان تقفيل بره وبذاكره اضافيه .. وهل العيشه معاه تبقى حلال ولا حرام .. اسألى دار الأفتاء هى تجاوبك وماتنساش تيجى هنا كل 4 شهور نشحنه ولعلمك ذاكرته صغيره فما تقعديش ترغى كثير قدامه بلاش اللوك لوك بتاع الست المصرية لأنه حيفصل منك وتبقى حالته اسوء من كده يعنى كلمه ورد غطاها تعود شيماء بلطفى للبيت بعد ان تحسن تماماً وأقبل على الأكل بشراهة حتى سقط فى مكانه نائما

تبحث شيماء عن نمرة دار الأفتاء فيرد عليها الشيخ حسن وتحكى له المشكله ..

- المشكله دى صادفتنا كثيرا فى هذه الأيام وأتفق العلماء بأن الضرورات تبيح المحظورات وطالما لم تستطيعى الوصول لزوجك الأصلى فعيشى مع البديل وأمرك لله وخاصة انه محتاج لرعايتك وشحنك له وعموما النوعية دى من المستنسخين عمرهم قصير والأعمار بيد الله

-قررت شيماء ان تنشر صورة لطفى على الفيس بوك وتكتب نداء للعالم بمن عنده النسخة الأصلية من لطفى الفرعون فبرجاء استبدلها بالنسخة الموجوده عندها

لم يمر سوى 48 ساعة على نشر النداء الا وبريدها الألكترونى أمتلء بمئات الرسائل بها صور للطفى مع ستات من مختلف جنسيات العالم وهم يشتكون من نسخة لطفى التى معهم ويقولون بأنه ماطلعش فرعون ولا حاجة وانهم قد وقعوا ضحية نصب من مؤسسات عالمية والكثير اعلنوا بأنه نتيجة الأعطال المستمرة والمصاريف الباهظة للعلاج والأصلاح تخلصوا من تلك النسخ بالطرد خارج البيوت أو تركها بدون شحن أو التبرع بها لمراكز البحث ونقل الأعضاء وهم على استعداد لأرسال مالديهم من نسخ لطفى الفرعون بدون مقابل بعد ان ظهر فى السوق نسخ جديده لنبيل العنتيل تعمل باللمس

زوزه واخده زمبه

البنت عندما تأخذ زمبه جامده من البوى فريند بتاعها تظهر اثارها واضحه فى نوعية البوستات التى تنشرها على الفيس بوك من شعر ومرسيات وبكائيات وهى أما بكائيه على الحبيب الذى أخذ عقلها وطار وماطمرش فيه سندوتشات الشاورمه

أو مرثيه على الأيام الخوالى التى قضوها سويا فى ضيى القناديل

 أو ترسل على الخاص كلمتين فى العضم تسم بهم بدن اللى خلفوه

وتجد صحباتها مندهشين  وهم يردون على بوستاتها رغم أنهم عارفين بنصيبتها السوده.. مالك يازوزه .. أيه اللى مزعلك ويأتى الرد فى الغالب .. أبدا مفيش حاجه أصل أنا مخنوقه شويه ..تظل زوزه ترسل فى بوستات عاطفيه وهى تتشحتف على حبيب القلب  

فالهزات العاطفية توقظ عفريت الشعر النائم داخلنا وكل واحد له عفريته الخاص فهو اما مثقف ورومانسى يستخدم أرق الكلمات أو عفريت وقح يخرج الشتائم والبذاءات او عفريت مطنش  وضارب الدنيا جزمه ومنفض ومكبر دماغه وخراب يادنيا وعمار ياعقلى