الفيل فى المنديل

عندما عاد من جولته المكوكيه فى أوروبا ودول شرق أسيا أحضر الياور فى المساء جميع الهدايا والتحف ليستعرضها وهو سعيد فقال ماهذا الصندوق المزين بالصدف

أننا لا نعرف من الذى أهداه لجلالتك فلا توجد عليه أى بيانات تدل على أسم صاحبه وحاولنا فتحه وأستعصى علينا فقلنا ربما يكون مفتاحه معك .. قال لا يوجد معى مفتاحه ومنظر الصندوق تقيل ومحترم أكيد به ذهب وجواهر من أصدقائى فى الخليج  على كولن هاتوا نجار ليقوم بفتحه.. فحاول معه حتى فشل فقال أحضروا كل من له خبره فى فتح الأبواب المغلقه بشرط ألا يفسدوا النقش الموجود على الصندوق ففشل الجميع

-         أذن فلنسأل الآصدقاء الذين زرتهم لربما يكون عندهم المفتاح فأنكروا جميعا بأنهم أهدوه أى صندوق فتعجب وأصبح موضوع الصندوق هو الشغل الشاغل لعظمته فأمر بعقد اجتماع مصغر للمجموعه الأمنيه ليأخذ منهم المشوره فقال مدير الأمن ربما يكون به قنبله تنفجر  فى وش سعادتك ( وفى سره ..ونرتاح منك ) فلابد الأستعانه بخبراءالمفرقعات .. فحضر الخبراء وكشفوا على الصندوق بأحدث الأجهزة والكلاب المدربه وقرروا أنه لا يوجد بداخله أى مواد صلبه   

فأشار عليه وزير الداخليه أن يحضر له سارقى الخزن  المسجلين خطر فلهم خبره فى هذا المجال وفشلوا أيضا فقرر الملك أن يتم كسر الصندوق لمعرفة ما بداخله فأخذوا الصندوق لحديقة القصر وقام النجار بكسر الغطاء بالبلطه فوجدوا بداخله صندوق أصغر فأمر الملك بكسره فوجدوا صندوق ثالث فكسروه فصندوق رابع فكسروه حتى وصلوا لأخر صنوق وكان فى حجم علبة الكبريت ففتحه الملك بنفسه فوجد به ورقه مكتوب فيها بضعة سطور عرف منها من الذى أرسلها فصرخ فى الجميع وأمرهم بالأنصراف فسأل وزير الداخلية مدير المخابرات : تفتكر من الذى أرسل هذه الورقة ومكتوب فيها أيه خلاه يتزربن كده ..

-        أنت حتستهبل  هو فيه غيره

قصدك اللى بالى بالك .. يا أبن التيت هههههه

المصقفاتى

سأله بعد أن حضر مؤتمر الزعيم : أيه رأيك مبسوط من الزعيم .. يسكت ولم يرد فيعيد عليه السؤال بصيغه أخرى : الخطاب لا يعجبك .. يشيح بوجهه بعيدا ولا يرد ويرفع أصابعه الخمسة فى وجهه ( خمسه وخميسه )  

-        جرى أيه ياجدع أنت أقولك عاجبك الخطاب مابتردش مش عاجبك الخطاب مابتردش  وعمال تخمس فى وجهى كنت بتعمل أيه فى المؤتمر بالظبط

-        الحقيقة انا كنت مش متابع الخطاب أنت عارف ماليش فى السياسة كانت عينى على مشرف التصفيق

-        كنت مصقفاتى من بتوع علبة الكنتاكى والـ 200 جنيه

-        ايوه كنت مصقفاتى وأخدت وجبة كنتاكى وقبضت 300 جنيه كمان وأخدت تشيرت هديه وعقد عمل فى التربية والتعليم بمرتب 1200 جنيه فى الشهر لمدة 6 شهور تعرف تقول تحيا مصر تحيا مسرر.. زييى

بواسير نابليون وأنف كليوبترا

أشياء غريبة غيرت مجرى التاريخ مثل بواسير نابليون وأنف كليوبترا وعبط الأخوان المسلمين

يحكي في كتب التاريخ ان القائد الداهية نابليون بونابرت قد خسر معركة واترلو بسبب اصابته بالبواسير وعدم قدرته علي قيادة جيشه من فوق حصانه وأدى ذلك لعزله ونفيه خارج فرنسا

ولو كانت انف كليوباترا أقصر طولا لتغير وجه العالم كله” ما كان ليعطى انطباع قوة الشخصية الجذابة ليوليوس قيصر او مارك انتونى و بالتالى ما كانا وقعا فى حبها و خضعا لسحرها و ما كانت وقعت الحرب الاهلية بين الرومان و بالتالى ما تحولت الدولة الرومانية الى النظام الامبراطورى و حكم الفرد الذى ادى لانهيارها ولولا عبط الأخوان وقبولهم تقديم مرشح لرئاسة الجمهورية ما وصل السيسى وأعوانه لكرسى الحكم

.

غرام المهابيل

واحد أهبل أحب واحده هابله عزمها على فسحه فى مركب شراعى فى النيل بمناسبة عيد الحب الهبله دماغها والف برطوشه أنها ترقص على واحده ونص فى المركب

-        يابنت الهبله اهمدى بعدين المركبه تنقلب بينا

-        خليك فرفوش بقى يا هبلاوى النهارده الفلانتين .. تيت .. تيت ... ترا بتا تيت

الهبله كانت تخينه شويتين

وهما هزتين مفيش غيرهم انقلب هبلاوى فى الميه

فضل يقب ويغطس ويقب ويغطس ويبقلل وهو يطلب النجده فهو لا يعرف السباحة فظلت الهبلة تضحك وهى تغنى وترقص على اغنية نانسى عجرم ..مافيش حاجة تيجي كده ... اهدا حبيبي كده وارجع زي زمان
يابني اسمعني هتدلعني ...تاخد عيني كمان
حبيبي قرب  بص وبص بص
زعلان ازعل , ازعل نص نص
لاحسن هبعد, ابعد اه ونص وهتبقى انت اكيد خسران
ويرد عليها : يخرب بيت أهلك.. مش وقت دلعنى شوفى حد يطلعنى

صباع محشى تحت المطر

الآسطى سعيد المتضايق وهو أسم على مسمى وأثناء عودته ومعه مراته فكيهه وعياله سوكه وميزو من بيت حماته فى مصر عتيقه بسيارته المتهالكه 128 أنفتحت عليهم أبواب السماء بماء منهمرودخلت مياه المطر إلى المحرك من الكبوت المخروم فتوقفت السيارة تحت نفق الملك الصالح ولم تمر غير ساعة ألا والمياه قد غمرت نصف السيارة من الداخل وحوصرت بمياه المطر بأرتفاع متر ونصف وقاربت المياه على تغطية سقف السيارة فنزلوا جميعا يسبحون ويخوضون فى الماء خارجها

سعيد : امسكى العيال يا فكه كه على ما أغطس أجيب الحبل من شنطة العربية

-        بسرعه ياسعيد الميه بتعلى كل مادى وأنا قصيره وماليش طول

-        عومى يافكيهه عومه كلابى زى ماعلمتك فى جمصة وخدى العيال على ضهرك

-        بسرعة شويه ياسعيد العيال قافشين فيه ولا عارفه أعوم كلابى ولا معيزى

يعود سعيد بالحبل ويربط به العيال والمدام ويقوم بسحبهم خارج النفق ويظلوا طوال الليل فى أنتظار سيارات الآنقاذ لأخراج سيارتهم التى خرجت من داخل النفق وهى مدمره

فكيهه : تفتكر يا سعيد العربية دى حترجع تمشى تانى

سعيد : طبعا ..عيب عليكى جوزك أجدع سمكرى في بر مصر  ..انتى ناسيه لما نزلنا بيها الترعه السنه اللى فاتت وأحنا رايحين القناطر وأشتغلت بعديها وسافرنا بيها عند اختك فى الدلنجات ولما نزلنا طريق المقطم من غير فرامل لولا عربية الزباله اللى دخلنا فيها منعتنا ننقلب ووش العربية بقى فى قفاها ورجعتها أحسن من الأول

-        فاكره يا خويا العربية دى شافت مننا بلاوى ..

-        عشان فلوسها حلال ومعاكى أسطى محترم.. أنا بفكر من زمان أركب فيها ماتور لنش علشان المطر والمجارى والمواسير اللى بتضرب

ميزو : بابا بابا ..أنا حنزل أعوم شويه أنا وسوكه على ما تخلصوا

فكيهه : ماتروحش فى الغريق ياميزو وخلى بالك من أختك

سعيد : ايدى بأيدك يا فكيهه نطلع فرش العربية وننشره بره على ما أنشف الماتور

-        تصدق يا سعيد ان حلة المحشى بتاعة امى موجوده فى العربية وماحصلهاش حاجة نادى على العيال علشان ياكلوا معانا

-        يعيش محشى ام فكيهة ولتسقط حكومة الأونطه والزفلطه والزروطه

الأسطى عبده أحسن سواق فى العالم

الأسطى عبده سائق أتوبيس من نوع عجيب فحجمه وضئالة جسمه لا تؤهله لسواقة أتوبيس بهذه الضخامه ولكنه تغلب على هذه المشكلة بوضع أكثر من شلته على كرسى القياده وأستعان بثلاثة من الفتوات مقابل نصف دخل الآتوبيس. حيث كان الاسطى عبده لا يهتم كثيرا بالرد على الناس سواء المؤيدين لقيادته أو المعارضين ويتولى الفتوات مثل هذه الأمور ويتفرغ هو للنظر من النافذه او مناغشة السنيوره الواقفه بجواره ويرسل التنهدات والأهات والتسبيلات للنساء العابرين وبالتالى يفاجأ بالكثير من مشاكل الطريق ولا يملك غير أن يدوس فرامل بعنف أو يصعد فوق الرصيف أو يقتحم قهوة بلدى ويطارد روادها بسرعة الصاروخ ، واذا بالركاب الذين في مؤخرة الاتوبيس بقدرة قادر تكون خلف الاسطى عبده مباشرة ، ولم يتكلم الناس ظنا منهم بأن هناك عارض في الطريق جعله يقوم بتلك الفرملة المفاجئة .

تكرر الموقف مرة ثانية ، ثم مرة ثالثة فرابعة  ، بخلاف كام حادثة على الماشي ، فتكلم احد الركاب للاسطى عبده قائلا :

ايه يا اسطى هو فيه كده عضامنا اتفشفشت ، مرة وقلنا ماشي لكن تلات اربع مرات نجيب صحة منين للقرف ده ، هو انت جي توصلنا لشغلنا ولا للحانوتي .

تطوع الفتوة الاول للرد : ايه يله انت بتقول ايه ؟ الاسطى عبده احسن سواق ..سواقين العالم بتاخد دروس منه ..وهوبا قام جايبه من قفاه وسحله وضربه وراميه من شباك الاتوبيس  . قام راكب اخر منزعجا : ايه هو ده عشان الرجل بيقول رأيه يتعمل فيه كده ؟!

تطوع الفتوة الثاني  بالرد ولكن بشكل اكثر احتراما من الفتوة الاول :

حضرتك هو الراكب اللي غلطان ، لولا الفرملة دي كان الاتوبيس كله راح في داهية ، تعالى حضرتك هنا بهدوء ، حضرتك عشان اتكلمت من غير إذن محكوم عليك بالحبس لغاية نهاية الخط ، وقام بالنداء على الفتوة الاول ليحضر الكلابشات ويقوم بتنفيذ الحكم .

اما الفتوة الثالث : وبعد ان لاحظ انزعاج باقي ركاب الاتوبيس ، قام بتوضيح وتهدئة الركاب : ياجماعة الراكب الاول خاين وعميل وأخوان وكان يهدد سلامة وامن الاتوبيس ولذا وجب قتله .. يصرخ صبيان الفتوات : الله أكبر.. الله أكبر.. تسلم الأيادى

اما الراكب الثاني فقد تعدى القانون ولذلك وجب عقابة ، ثم ايه المشكلة اننا نضحي بكام واحد فيكم عشان الاتوبيس يعيش والركاب توصل . ومن حنية تلك الكلمات والسهوكة التي قام بها الفتوة الثالث قام  بضع أفراد من الاتوبيس بالنزول اعتراضا منهم على رعونة الاسطى عبده ، أما نصف الاتوبيس قاموا بتحية الاسطى عبده والدعاء له ولفتواته متناسيين حجم الكوارث التي حدثت والتي ستحدث بفضل قيادته الحكيمة ، اما النصف الاخر فقد اعتذروا للاسطى عبده قائلين : هات ايديك نبوسها معلش احنا اللي مبنعرفش نركب ياريس !! طريق الندامه ياعسل

العطش قادم

كابوس العطش يؤرق المصريين
فى عام 2021 الناس واقفه فى ميدان التحرير وكل واحد شايل جركن او حله او بلاص وبيهتفوا فى نفس واحد ..
الأرض لوعطشانه نرويها بدمائنا ..
عهد وعلينا أمانه..حتصبح بالخير مليانه ..
ياأرض الجدود ياسبب الوجود
يسقط يسقط سد النهضة

https://youtu.be/DegA81vQvT4

الــورطــه

قال عبده موته : نقتله ياريس ونخلص منه

-        ما ينفعش يافالح حتفتح علينا أبواب جهنم واللى عملناه فى سنين حيروح فى ثوانى

قال سعدون السماوى : نفضحه زى ماهو فضحنا ونقول عليه كلام أبيح ونطلعه كداب وحرامى ونصاب وشمام وأبن كلب وبتاع نسوان

-        الناس عارفه كده وهو بيعترف بكده وأحنا عملنا أكثر من كده ومفيش فايده.. الواد شغال شتيمه فينا ليل ونهار وبيقول كل أسرارنا وأنتم قاعدين بتتفرجوا

قال سيد بغدده : نبغدده ياريس نلم له قرشين حلوين ونسد بهم بؤه ونجيبه لحد عندك يبوس القدم ويبدى الندم على غلطته ..

-        كمل يابغدده .. ويبدى الندم على غلطته فى حق الغنم .. قديمه عملناها ومفيش فايده الواد لا يثق فى كلامنا

-        ماهو ياريس لما أيديه تمسك الفلوس حيتغير .. وحضرتك عارف سحر الفلوس على النفوس

-        ده يافالح بمجرد ما حيتلم فى الفلوس حيفضحنا أكثر وأكثر

أبو جعوره : نقفل اليوتيوب ونقفل الفيس بوك ونقفل النايل سات ونمنع الصحف لمدة شهرين يكون الناس نسيوا الموضوع ونرجع الحجات دى واحده واحده

-        اللى انت بتقوله ده كلام عبيط الأن توجد  برامج يعرفها اى عيل صغير يفتح بها الفيس بوك واليوتيوب وكافة المواقع المحظوره

-        خلاص نقطع الآنترنت كمان

-        قوم تتك قطع رقبتك

أحمد المتعاص : رأىى ياريس أنه يتم القبض على اى واحد بيسمع الواد ده ونفتش تفتيش عشوائى على موبايلات الناس فى الشوارع.. القبض على كافة الناشطين على الفيس بوك وتويتر مع اشغال الناس بمواضيع أخرى زى الكوره والحفلات والرقص وكأن شيئا لم يكن

-        بقالنا شهر شغالين فى الكلام ده ومفيش فايده انت بتستهبل يا متعاص وبالمناسبه شغل العيال اللى بتعمله والكلام العبيط والشتيمه بتزود غضب الناس مننا ياحمار

الدهنون : أنا من رأيي سيبنا من الواد ده خالص واللعب يكون على الناس .. نضحك عليهم بشوية سكر وشوية زيت وشوية كلام معسول وأبعاد التهمة عنك ياريس يا أبو قلب كبير يا حنين على شعبك ونرجع خطة أنتم نور عنينا

-        برافو يادهنون يتم تنفيذ خطة أنت نور عنينا وأحنا ولاد كلب .. رفعت الجلسة

الحب الابدى

الحب حتى نهاية العمر شيئا جميل ورائع بين زوجين وصلا سويا لمرحلة متقدمه من العمر..فكلما كبرا فى السن يزداد ألتصاقهما ببعض وهو ما يبعد عنهما الكثير من الامراض وخاصة الزهايمر .. فالحب فى هذه السن المتقدمه تجعلهما أشد سعادة وأرتباط وحميمية أكثر من أى وقت مضى حتى النهاية  وهذه النوعية من كبار السن يطلق عليهم وراور.. ليست وراور الفراخ فى طراوتها ونعومتها ولكنهم لا يستطيعون العيش بعد فقد الرفيق ورحيله عن الدنيا وبالتالى تأتى النهاية للطرف الأخر ورائه .. عرفت يعنى أيه وراور يا وراور أنتى.. عفوا سأقوم لأتناول دواء الكحه والزبادى ههههه