قطعا هناك فرق

فى عام 2017

قالت أم لابنتها ليلة زفافها  وهي تودعها

أسمعى يانيله من النهارده حتغورى وتفارقينا.. وتتركى المزبله اللى كنتى عايشه فيها
وحياخدك واحد نطع مادفعش فيكى ولا مليم ..ظبطيه من أول يوم أدبحى له القطه

ونفذى العشر وصايا ليصبح كالخاتم فى صباعك

الغى من قاموس حياتك كلمة حاضر وطيب خليكى زى الشريك المخالف

لا تجعليه يفوء أبدا وألخميه بالطلبات ولو مانفذش أجعلى حياته أسود من قرن الخروب

وكفايه تخلفى منه عيل واحد بس

ولو تعدى عليك بالسب والضرب نادى على أقرب جاره لك وشهديها وشهدى الجيران وأتصلى ببوليس النجده وأعملى محضر أثبات حالة وكل ما محاضرك فى النيابه تزيد كل ما بردتى بوزه أكثر وأرفعى عليه قضية نفقة فى السر من باب الأحتياط..حتستفيدى منها بعدين ليمشى على العجين ما يلخبطوش

اشتري الاكل جاهز يعني انتي خدامة ابوه علشان تطبخيله؟

خليكى هاديه ونادية وشغلى على قلبك مرواح وأوعى تنخنخى فالرجال صنف نمرود لو ركبوا على أكتافك ماينزلوش وخديها منى نصيحة ...علميه يطبخ ويغسل وينظف الشقة حتوفرى أجرة شغالة فالرجالة أحسن من الستات مائة مره فى تنفيض السجاد ومسح البلاط

حووشى طول ماعايشه معاه حتنفعك الفلوس فى خرجته يوم ماتلاقيه معلق نفسه بالكرافته فى شنكل النجفه ..  وأشوفك قريب فى صفحة الحوادث.. ياله باى

فى عام 1017م

قالت أم لابنتها ليلة زفافها وهي تودعها  

أي بنيّــة إنك قد فارقت بيتك .. الذي منه خرجت .. ووكرك الذي فيه نشأت .. إلى وكر لم تألفيه وقرين لم تعرفيه فكوني له أمة .. يكن لك عبدا واحفظي له عشر خصال .. يكن لك ذخرا أما الأولى والثانية فالصحبة بالقناعة والمعاشرة بحسن السمع والطاعة أما الثالثة والرابعة .. فالتعهد لموقع عينيه .. والتفقد لموضع أنفه .. فلا تقع عيناه منك على قبيح ولا يشمن منك إلا أطيب ريح والكحل أحسن الحسن الموصوف والماء والصابون أطيب الطيب المعروف وأما الخامسة والسادسة .. فالتفقد لوقت طعامه .. والهدوء عند منامه .. فإن حرارة الجوع ملهبة .. وتنغيص النوم مكربة .. وأما السابعة والثامنة فالعناية ببيته وماله .. والرعاية لنفسه وعياله .. أما التاسعة والعاشرة .. فلا تعصين له أمرا ولا تفشين له سرا .. فإنك أن عصيت أمره أوغرت صدره وإن أفشيت سره لم تأمني غدره .. ثم بعد ذلك .. إياك والفرح حين اكتئابه والاكتئاب حين فرحه .. فإن الأولى من التقصير والثانية من التكدير .. وأشد ما تكونين له إعظاما .. أشد ما يكون لك إكراما .. ولن تصلي إلى ذلك حتى تؤثري رضاه على رضاكي .. وهواه على هواكي .. فيما أحببت أو كرهت .. والله يصنع لك الخير واستودعتك الله

قطعا هناك فرق

سيدى أبو خطوه

على الطريق الزراعى وعلى مسافة 10 كيلو من طنطا لاحظت وجود مقام صغير مطلى باللون الأخضر الزاهى يقف حوله العشرات من القرويين فى طوابير طويله وبمجرد مرورنا أمامه أنتفض ركاب الميكروباس من على مقاعدهم وهم يرفعون أيديهم فى أتجاه المقام وهم يقولون وعليكم السلام ورحمة الله وبركاته مدد ياسيدى فسألت سواق الميكروباص : ايه اللى بيحصل ده .. قالى: انت باين عليك مش من النواحيدى .. قلت له بس أنا بأمر من هنا من زمان وبقالى بتاع 6 سنين ماروحتش فيهم البلد

 هذا مقام سيدى أبو خطوه حبيب السواقين مبنى من حوالى سنه ونصف ويعتبر حارس طريق مصر أسكندرية الزراعى فبمجرد أن يقول أسم أبو خطوه يصرخ الركاب مرة اخرى فى صوت واحد ( وعليكم السلام ورحمة الله وبركاته) فأستغربت وقلت له أسمه أبو خطوه فأسمع نفس الهتاف ( وعليكم السلام ورحمة الله وبركاته) من جميع الركاب فقلت ياواد اشتغلهم دى لعبه حلوه وظللت أكرر أسم أبو خطوه عشرات المرات خلال حديثى مع السواق والركاب وهم يرددون من خلفى بدون ملل ( وعليكم السلام ورحمة الله وبركاته)  السواق همس فى أذنى بأن أقلل من ذكر أسم الشيخ  لأن بيحضر ويلقى علينا السلام عند ذكر أسمه وكده حيزعل منك لأنك بتتعبه.. شويه وعينك ماتشوف الا النور بدأ الميكروباس يتطوح بنا يمينا ويسارا ويرقص على واحده ونص وهوعلى وشك الأنقلاب ..النصيبه الركاب غير خائفين وهم يصيحون الله أكبر الله أكبر ظهر الحق.. بركاتك ياسيدى وأنا أغمض عينى وأغطس فى الكرسى  وأردد الشهادتين والسواق اللى طالع عليه بركاتك ياسيدى اعفى عنه ده غريب وجاهل وحمار وأبن كلب.. وحينزل من العربية .. اعفى عنه.. اعفى عنه.. اعفى عنه..تهدأ حركة المرجحة رويدا رويدا ويقف السائق بجوار الطريق ونحن جميعا نتشاهد ..بعد مافوقت لنفسى أوجه العتاب للسائق .. - مين ياجدع اللى جاهل وحمار وأبن كلب

السائق وقد أحمرت عيناه وأنتفخت أوداجه وبصوت مثل خوار البقرة المذبوحة وهو يشير بأصبعه نحو الباب : بتهرج  مع سيدنا ياحيلتها أتفضل أنزل .. أنزل فين مايصحش كده .. والركاب من ورائه أنزل.. أنزل.. أنزل ونزولا على رغبة الجماهير الغاضبة نزلت وأنا حانق عليهم وللأنتقام منهم وتعذيبهم أقفز على كل شباك فى الميكروباس وأنا أصيح أبو خطوه.. أبو خطوه ..والركاب يضحكون بهستريا وهم  يرددون خلفى( وعليكم السلام ورحمة الله وبركاته) وبعد أن ألتقطت أنفاسى وقفت  متعجبا الناس دى بتضحك على أيه ظللت أشاور للسيارات  فلم يتوقف ولا حتى توروسيكل ليلتقطنى وبدأت الشمس فى المغيب فتسرب إلى نفسى شعور بأن سيدى أبو خطوة غير راضى عنى فأنتقلت على الجانب الأخر من الطريق وأنا أحمل شنطتى وقررت أن اعود إلى مقام الشيخ لأقدم أعتذارى وأستسمحه بأن يسهل لى طريقى فبمجرد أن شاورت وأنا أقول سيدى أبو خطوه واحد.. اسمع زمجرة فرامل عشرات السيارات وهم يتنافسون ويتعاركون لتوصيلى وقد فاز بى أحدهم بما وهبه الله من بسطة فى الجسم وغباوة فى العقل

وقد حملنى بذراع وشنطتى بالذراع الأخر وهبدنى داخل كابينة اللورى الذى يقوده وأنطلق بى فأتعظت من تجربة الميكروباس وامتنعت عن الكلام حتى وصلنا لمقام الشيخ فنزل وفتح لى الباب وهو يترجانى أن اقرأ له الفاتحة وأقول للشيخ دحروج صديق الجن بيقولك ( أم العيال أتعشت).. فقلت له مين هى أم العيال .. مالكش دعوه انت بس قوله الكلمتين الشيخ عارف كل حاجة.. أستنى يا جن الشنطه دى مش بتاعتى ولكنه طار على الطريق

 دخلت على مقام سيدى أبو خطوه وأنا شايل الشنطة الغريبه فوق كتفى فوجدت من أرشدنى لمكان الأكل  وهو يحترمنى آخر أحترام وسألتى : أيه اخبار أم العيال فقلت له أم العيال أتعشت .. حمدلله على السلامه مولانا منتظرك ووصانى أعشيك على مايخلص حلقة الدرس.. بس أنااا .. مفيش بس.. تعالى..باين عليك على لحم بطنك مشوار الجبل هد حيلك.. جبل أيه .. خلاص ياسيدى أقعد كل وخلى بالك من الشنطه النشالين حواليك من كل حته

المكان به يعج بأعداد كبيرة من السيارات الأجرة والملاكى والخيام والمراجيح وحلقتين من البشر حلقة للدرس وحلقة للأكل وناس واقفه تتمسح فى باب وشباك المقام .. دخلت على حلقة الأكل فوضعوا امامى رغيفين وطبق لوبيا بيضاء وحتة لحمة وطبق رز قولت رضا فسألتهم مفيش معالق زغر لى أحدهم وقال لى : سيدوه يا أفندى ولف أمامى ربع رغيف على شكل ودن قطه وتناول به الرز مع الطبيخ فقلت سيدوه سيدوه بعد ما أنتهيت جلست فى حلقة الدرس فسألت جارى عن أسم الشيخ المهيب أللى بيلقى الدرس ولابس عباية خضراء وعمامه خضراء ويلف حول رقبته سبحة مترين فقال لى ده الشيخ دحروج خادم سيدنا ابو خطوه وده من الناس الواصلين .. هو ده الشيخ دحروج ..فجلست وأستمعت له بأهتمام وهو يحكى كرامات سيدنا أبو خطوه حبيب السواقين فقال بصوت جهورى: كل العّجَل (الميكروباسات والسيارات الملاكى والأجرة والنقل بأنواعه) كلتها فى حماية سيدنا حتى البقر اللى بيعبروا الطريق ...سمعونا الصلاة على النبى اقربها امبارح اخوكم ابراهيم الطاير سواق التريلا بطاريته اتفرتكت وماعدش فيه نور يشوف به السكه على السريع وكان ممكن يعمل كارثة فنادى بعزم مافيه :الغوث الغوث ياسيدى أبو خطوه الغوث.. الطريق بقى ظهر ببركة ونور سيدنا الولى.. الجالسون يكبرون الله أكبر..  الله أكبر

الشيخ دحروج يأخذ رشفة من كوب القرفه : زيدوا النبى الصلاة .. تكبير .. من قيمة أسبوع الأسطى على أبو الفوقان كلكم عارفينه اللى مابيفوقش أبدا ربنا يعافينا ويعافيه ماكنش يعرف أن الحكومه عامله حفره كبيرة أمام شبرا بلوله دخل عليها وهو سايق على 160 كم/ساعة .. أبو الفوقان طار فى الجو وعربيته فيها أكثر من 20 نفر وأتقلب 5 قلبات.. الناس صرخت وهى بتتقلب فى الجو نادت : الغوث يا أبو خطوه يا صاحب المكان الغوث .. العربية أتعدلت بقدرة لا أله الا الله ولا مخلوق أتخدش والعربية طلعت  سليمه .. الله أكبر الله أكبر..على ابوفوقان دبح عجل فدوى ووزعه على حبايب سيدى أبو خطوه بعد ما ربنا نجاه .. عجل واحد بس يا أبو الفوقان أنا لو منك أدبح 3 عجول  هو ابو الفوقان حاضر معانا يا ولاد  أيوه ياسيدنا .. – قوم ياواد افرد طولك خليهم يشوفوك

دحروج : الواجب اللى أتعمل معاك كبير قوى قوى ياوله مايكفهوش عجول ولا حمير البلد كولتها.. بمناسبة الحمير فيه جزار من السنطة الله يسامحه من قيمة كام شهر قام بتوزيع لحمه هنا على زوار سيدى أبو خطوه يدوبك وصل بلدهم لقى الحكومه واقفه فى أنتظاره على باب بيته وأخدوه من الدار للنار علشان وزع لحمة حمير على الغلابه .. سيدى أبو خطوه طيب وبيحب الطيب وزواره لازم ياكلوا الطيب مش حمير ياوله يابتاع السنطه عاملى مفتح ياخويا فاكر شيخنا مابيعرفش فى اللحمه .. نكمل بعد حلقة الذكر وماتنسوش بكره الليله الكبيره لسيدنا .. الله حى الله حى مدد بدون عدد ياسيدى أبو خطوه مداااااد على طول المدددددااااد حى وأنا واقف بأتفرج على حلقة الذكر شعرت بيد تربت على كتفى فوجدت الرجل الذى رحب بى فى الأول يطلب منى أن أسير خلفه لمقابلة الشيخ دحروج فحمل عنى الشنطة ودخل خيمة صغيرة يفترشها الشيخ ووضع الشنطه امامه .. يأمرنى بالجلوس وسألنى: صديق الجن قالك ايه قال لى اقرأ الفاتحة وأوهبها لأسمه وأخد شنطتى وأعطانى الشنطة أللى قدامك دى وقالى أقولك أم العيال أتعشت هى مين أم العيال.. مالكش دعوهالشيخ ينادى : يازغلول رجع للأفندى شنطته واعطيه وهبته -زغلول يعطينى شنطتى وأستيك به رزمة فلوس : ياله يا أخ ورينا عرض أكتافك فيه عربية مستنياك طالعة أسكندرية أركب فيها من غير كلام أنظر إلى الفلوس وأنا مندهش : أيه ده ياعم زغلول.. أيه مش عاجبينك .. تاخد وهبتك بضاعة ولا فلوس أحسن أخطف منه الفلوس وأجرى وأنا بقول: مدد ياسيدى أبو خطوه مداااددددد مدد بدون عداادادد

تمت

حمار ورفسك

 شاب جامعى حديث التخرج وجد إعلاناً على الإنترنت عن وظيفة براتب مجز فى مجال السوشيال ميديا، وعندما ذهب لمكان العمل أعطوه قائمة بعدة أسماء على الفيس بوك وقالوا له ستبحث عن أى خبر عن هؤلاء أو مقالات لهم، وتقوم بالتعليق عليها بشكل سلبى تحقر فيه من أفكارهم وأشخاصهم وتهاجمهم بشدة، وتلعن سلسفين أبوهم وأخرج ما بداخلك من كافة القذورات وكلما زادت وساختك زادت فرصة حصولك على الوظيفة وعندما سألهم عن هويتهم ومن يتبعون؟ تهربوا من الإجابة وقالوا له لا تتدخل فيما لا يعنيك ستنفذ المطلوب مقابل الراتب الذى سندفعه لك.
 كنا نسخر أيام مبارك من اللجنة الإلكترونية للحزب الوطنى وأمن الدولة، ولكن ما نراه اليوم تجاوز ذلك، هناك صفحات إخبارية الكترونية وشبكات جديدة يتم تمويلها من مصادر مجهولة وتقوم بممارسة كل فنون الدعاية السوداء بدءاً من إنشاء حسابات مزيفة للمشاهير والرموز على فيس بوك وتويتر، ونسب تصريحات كاذبة لهم عبر هذه الحسابات. فماذا تفعل لو تعرضت لمثل هذه الأفات البشعة
 فهل اذا رفسك حمار منهم ترفسه تخيلو اخوتي انك تطارد حمار لترفسه امام الملا ولكن هناك من يرفس وير كل الحمار.. واذا نبح عليك كلب هل تنبح عليه انه الجهل بعينه اذا بادلتن النباح بنباح ..فهؤلاء الناس لا يرفسون كلبا ميتا , ولكنهم يحاربونك إذا تفوقت عليهم علما وخلقا وفنا
حدثت مشاجرة بين الأحنف بن قيس المشهور بالحلم وبين رجل شتمه من العامة فلم يرد عليه ومشى فى طريقه فلما اقترب من قبيلته ،قال للرجل إن كان بقى فى نفسك شئ فقله حتى لا يسمعك أحد فيؤذيك فقال له الرجل لو قلت لى كلمة قلت لك عشرة ،فقال الأحنف لو قلت لى عشرة ما قلت لك كلمة!!
 جرب ولو مره أن تكتب تعليقا تستحسن فيه أحد معارضى الحكومة فى المواقع الألكترونية للصحف أو فى اليوتيوب وستشاهد وتسمع مالم يخطر على بالك من بذاءات وقذورات من أناس لا تعرفهم يشتمونك بالأب والأم ويتهمونك بأنك أرهابى ومن الأخوان.. والاغتيال المعنوى سهل رده وممارسته بشكل عكسى على من يفعلونه، ولكن فى النهاية سنعيش فى مجتمع من الحمير ترفس بعضها بعضا ..ممزق فاقد الثقة فى كل شىء وسيدفع الكل الثمن، فأفيقوا لما تفعلون لأنكم لا تكسرون أشخاصا بل تهدمون وطنا وتقتلون كل القيم.

لحم حمير

سألته أيه رأيك فى لحمة المعلم كرشه الجزار

قال بثقة وهو سعيد : بصراحة بصراحة لحمته لحم حمير على كلاب لكن كده اوعى ..فهى على الأقل طازه وزى الفل ومفيهاش حتة دهن أو شغته والرجل بيقطع لك منها كباب حله وبفتيك وياسلام على العرق التريبيانكو بتاع الحمار تحب تتفرج علية العيال والمودام بيحبوه قوى وله ريق حلو فى الأكل وزى السكر والناس خدت عليها خلاص وماعدش حد يسأل وماتصدقش اللى بيقلوه فى التلفزيون كلها أوشاعات ولا العيال هوهوت ولا النسوان نهقت

والا الحوواشى وجماله الرغيف قد كده يأكل شحطين بـ 10 جنيه ده أرخص من الفول والطعمية

لحمة المعلم كرشه ( ربنا يبارك له ) بيبيع الكيلو بـ 40 جنيه احسن مليون مره من اللحمة البرازيلى المستوردة الفاسده والمدوده اللى فى الجمعيات بـ 80 جنيه وريحتها جايبه لأخر الشارع.. ربنا يزيد ويبارك فى حمير وكلاب البلد ويخلى المسؤلين اللى مش حرمنا من حاجة وتحيا مسررر تحيا مسررر

وكلمه فى سرك البلد فى أزمه ولازم نكون جدعان ونقف جنب ريسنا ونور عنينا

وعلى رأى المثل حمارتك العارجه وكلبك الجربان تغنيك عن سؤال التموين

كيف تفلس دوله

اللى ماعندوش عيد يعمله عيد.. واللى عاجبه من الكحل يتكحل و اللى مش عاجبه ياخد باسبوره من البلد ويرحل .. لو مافيش مناسبه نعمل أحنا المناسبة مبدأ معروف فى سياسة الدول ذات الأعلام الموجه بيفكرنى بناس بتعمل عيد ميلادها 5 مرات فى السنه

والحكومه من 60 سنه بتخترع وتتفنن فى المناسبات عن طريق عمل الأعياد بداية من عيد الأم والعلم وعيد المرأة وعيد الطفل وعيد القمح وعيد الفلاح وعيد العمال وعيد الشرطة وعيد الكتاب غير يوم المهندس والطبيب والمحامى ويوم الشهيد  والمئويات وأعياد ميلاد الموجودين والراحلين كانت أسرة مبارك تحتفل بأعياد ميلاد الأبناء والسيده الأولى على المستوى البرلمانى والوزارى أما مبارك الكبير فعيد ميلاده يكون على المستوى الدولى  تخطر به الدول الصديقة أما فى عهد السيسى المشرق كانت هناك أفتكاسات جديدة وهى المؤتمرات والمؤيات مثلما فعل أسامه هيكل وزير الأعلام السابق وعضو مجلس الشعب الحالى ورئيس لجنة الأعلام بتنظيم أكبر أحتفالية بمناسبة مرور 150 سنه على أنشاء البرلمان وأقام هذه الأحتفالية فين ؟؟ فى شرم الشيخ تحت رعاية وأدارة على عبد العال  دعى إليها 650 عضو من الحاليين 300 عضو من السابقين ووفود من برلمانات الدول العربية والأوروبية والكنيست الأسرائيلى والكونجرس الأمريكى وأستمرت الأحتفالية لمدة 3 أيام وغادرت الوفود فى اليوم الرابع وكله كله على حساب صاحب المحل أقامه وأكل وشرب ونوم وتذاكر طيران

وكانت أكثر المؤتمرات فُجراً هو المؤتمر الأقتصادى الأول فى عام 2015   

وأنت يا مواطن مازلت تسأل عن أسباب الأزمه الأفتصادية ياعم قول ياباسط

العملية مش فقر ولكنه أنعدام ضمير وغباوة مخ  

عيدك يا أمى أجمل أعيادى

وبما أننا قد بلغنا من العمر عتيا كما يقولون وأمى وأمك قد هلكا من عقود مضت وشبعوا موت كما يقولون ولا يجوز عليهما غير الرحمة وقدمنا جزء ضئيل من العرفان بجمايلهم علينا فى طفولتنا وشبابنا فأننا لم نوافيهم حقهما فقد ماتت أمى وأمك فى نهاية العقد الرابع من عمرهما فلم يلحقا بجنى ثمار جهودهما وتعبهما ولم يسعدا بورودهما التى تفتحت بعد رحيلهما.. امهات زمان كن قصيرات الأجل كثيرات الخلف أوفياء العهد لو رحل عنهم الزوج صامدات أما المحن وهبات العمر والصحة والراحة من أجل أبنائهن .. دموعهن قريبه تسيل فى الفرح وفى الفراق .. قلوبهما بيضاء وضحكاتهم من القلب على أبسط الأشياء فكانت أعينهم تتغرغر بالدمع على قفشات أسماعيل ياسين والكسار وشرفنطح والريحانى ..

 أبنائى وأحفادى يتعجبون عندما أقول لهم بأن هؤلاء كانوا نجوم الكوميديا فى الزمن القديم سمعت رد صدمنى وأحزننى : بأنه يا أما الناس دى عبط يا أما أجدادنا وجداتنا كانوا سذج أو طيبيين قوى..لم يكونوا سذج ولكنهم كانوا طيبين قووى ليتكم تكونوا طيبيين مثلهم

رحمة الله عليك يا أمى ويا كل أم راحلة أمس أو من عشرات السنين    

مهاجر من الفيس بوك

-أيه يابنى اللى أنت بتقوله ده .. عايز تقفل حسابك على الفيس وكمان تويتر

-      تعبت قوى يا عم زيزو من الجماعة أللى بيلطعوا صور وفيديوهات بتوع الصباح المشرق والغد الجميل  من عينة صباحكم أبيض وليلتكم حمرا وفيها كتكوت وأحنا بنمسى 100مسا على الناس الكويسه وألا الجماعة بتوع الجمعه المباركة تلاقى خمس ست بوستات شغاله عليك من ليلة الخميس لحد الصبح جمعة مباركه جمعه مباركة والرد جمعه مباركة علينا كلنا وعقبالك يا أم فاروق وحركات من دى غير بقى المناسبات وأعياد الميلاد والذكرى السنويه للوفاه والمغرمين والمغرمات والمصدومين والمصدومات وكلمات الحب والهيام ولاعنى سلسفين أم الحكومه بالألفاظ القبيحة والصداقات الوهمية والليكات الهبله ودول كوم والناس المتخصصه فى عمل بوستات تطلب فى نهايتها ثلاث طلبات لا رابع لهم تطالبك بقول سبحان الله أو الحمد لله أو الصلاة على رسول الله غير أعلانات النصب العقارى والتجارى قرفت يا عم زيزو قرفت وألا الجدع اللى شغال تغيير صورة البورفيل لشخصه المعجبانى كل ساعه والتانيه وفى الأخر حط صورة كلب مكان صورته الشخصية وياخد ردود من أمثال زينة الشباب وأيه الحلاوه دى يانجم ..ألخ

-      كلب .. ايوه كلب ياعم زيزو .. وألا الأسامى الكوديه لفرافير وخناشير الفيس بوك من عينة.. سامحنى النهارده .. ياقاتل يامقتول .. وعاشقة البامبرز .. أخييه ويع ( دولت حسابين لواحده أسمها أخييه والأنتيم بتاعها واد أسمه يع)

-      المهم فيه حد من العالم دى تعرفهم ..

-      معرفش غير أصحابى وأخواتى وقرايبى وهم للأسف موجودين على الفيس بوك وما بيشتركوش خالص من أساسه

-      فيه ناس بتقول أن الفيس بوك ده عامل زى اللب والسودانى

-      لب وسودانى أيه ياعم زيزو ده فيه ناس بتروح فى حديد وبيتمسح بكرامتها الأرض لو خرج عن الخطوط الحمراء لو مش عارفها أقولك أنا عليها علشان تاخد بالك .. أول حاجة أوعى تطلب من الناس الخروج فى مظاهرة وأياك تطلب بعمل تمرد أو أضراب وأياك تشتم حكام السعودية ودول الخليج .. يعنى لو شتمت حكامنا مفيش مشكله فهم عارفين أنهم بيتشتموا من غير حاجه

مصيرك ترجع تانى.. فيه ناس كثير زيك قرفت وقفلت حسابها ورجعت تانى وعايشين معانا زى الفل .. مفيش حاجه.. ده أدمان يا أدمن  admn

البزرميط

هل تعرف ما معنى كلمة بزرميط..كانت تطلق على الأبناء الذين ينتمون لأبوين أحدهما من طبقة فقيرة والثانى من طبقة غنية تحول ذلك الوصف إلى سب ولعنة. فلو قالها فرد لآخر، زمان أيام ماكاتن الدنيا دنيا لقامت معركة عنيفة وربما حدث قتيل وأكثر.ونحن فى القرن الواحد والعشرين نعيش فى قمة البزرميط ولا أحد يهتم أن كان بزرميط أو حتى قرنبيط

فى عام 1920 تناول المجتمع المصرى حكاية الصراع بين الشيخ علي يوسف – من جهة – وأسرة الشيخ السادات ، لأن الشيخ علي يوسف الذي ينحدر من أصول فقيرة، قد تجرأ وخطب ابنة الشيخ السادات الذي ينتمي لأسرة عريقة ذات جاه قديم.

وفرق القاضي الشيخ أبو خطوة بين الزوجين لأن علي يوسف كان فقيرا، وغناه الحالي لا يمحو عار فقره القديم (هذا ما قاله الشيخ أبو خطوة في أحد أسباب رفض الزواج) وقصة أخرى مشهوره قصة زواج فاطمه سرى العالمه المتصيته التى وقع فى غرامها محمد باشا شعراوى أبن محررة المرأة صفية شعراوى وأنجب منها بنت أسمها ليلى ورفضت الأم عندما علمت بالكارثة التي حلت بالأسرة العريقة، فحاولت رشوة الزوجة التي تمسكت بزوجها وضغطت على أبنها برفض أبوته لأبنته وهى قصة فاطمة التى مثلتها أم كلثوم وأنور وجدى ولكن مع تغيير فى الوظائف والأسماء ما علينا... ست فاطمه سرى كانت لها طقاطيق يتغنى بها العوالم فى هذا الزمان منها على سبيل المثال

أنا بس ساكتالك/ حايجيلك يوم طاول بالك /لما يروق عقلي وبالي/ حايجيلك يوم تترجاني

وأشوف أنا إزاي تنساني /وأتقل عليك طاول بالك/ بكره فؤادك يتلوع وأجيلك أنا واتدلع

وتطلب الوصل، أتمنع /واتقل عليك طول بالك.

بدال ما تسهر على قهوة/ تعالى نشوي أبو فروة/ بيتك مع عيلتك أولى من لعب الطاولة

أحتجاج

  بحثت عن معنى كلمة هَذَيان فى قاموس اللغة فوجدت أنها تعنى الكَلاَم المُفكّك والغير مَعْقُول، أى أنه كلام لا يُفْهَم ولا مَعْنى له في اللّاَوعي أى النفر منا يَتكلَّم بأشياء غير معقولة. وهذيان بالمعنى الطبى الموثق  هو مرض عقلي مؤقت يتميز باختلاط أحوال الوعي واضطرابها ، ويحدث نتيجة لمجموعة من العوامل ، أهمها إدمان المخدرات والعقاقير.

يا نهار أبيض يعنى المطلوب من الواحد فى هذا المنتدى يضرب بكيتتين بانجو أو حجرين هوبهوب معمرين على الشيشة ويكتب أحلى كلام فى الهذيان أو يتشعوذ ويكتب بلغة الهسهس واللى ييجى فى دماغه يطخه وكله أدب يامواطن وبما أننا كلنا مساطيل وعاملين دماغ حلوه ومجانين وناكشين شعرنا وبنهيس وبنطلع أحلى كلام سوف أضرب لكم مثال من هذا الهذيان

منظومة (أصبع الكفته الضانى)

حبيبتى  ذات الرداء الأرجوانى والعبير الأنثوى كقنينة عطرأنسكبت فى ليل سرمدى ثقفتك بلوع القلب والقشعمى منبطحة فوق شعاع الشمس وسنا القمر فناديت عليك فى وقت الضحى حتى بح صوتى وأتحشرجا  فجائنى صداه متجزمى من بين شجر السوسن والعلقمى  فهل نسيتى ما ألتهمناه من كباب وكفتة وأم على .. يخونك العهد يا دلوعتى فهزيانى فى غرامك جلجلِ

وعندى مقطوعات بطعم البولوبيف وأخرى بالسمك القاروص والسلطات

أصدقائى فى الهذيان عقدوا مسابقة فى الأبداع الأدبى والقصصى والمقطوعات الشعرية والطقاطيق وخلافه والدعوه كانت عامه أشترك فيها حريفة الأدب فى المنتدى وظهرت النتيجة وأحتفلوا بالفائزين والفائزات وخرجت التفاريح ودقت الطبول والتباريك تمدح فيهم ونسونى وعندما سألتهم أسمى فيهم كان رد كبيرهم الذى علمهم الهذيان بأننى الكبير وصادقت على كلامه الأدمونه العسوله بأن الكبير ليس له جائزة أو لأننى أكتب كلام مفهوم .. ماشى يا بتوع الهذيان أن ما..هريتكم هذيان من عينة صباع الكفته الضانى مابقاش أنا زيزو .. ههههه مبروك للفائزين من كل قلبى   

صفحة من يوميات أتخن تخين

قرأت كتاب أسمه الكرش المنفوخ والمؤخرة السمينه لطبيب لبنانى اسمه ابو عمار الزلمه.. الله يسامحه ..شرح فيه وصفه سحرية للقضاء على الكرش المنفوخ وتقليل حجم المؤخرة السمينة وهى عبارة عن2 معلقة بذور الفجل + 2 معلقة بذور الشمر + عصير الليمون وتقوم بغليهم وأشرب 4 كوبايات فى اليوم بعد الأكل حتنزل 5 كيلو من دهون الكرش + 3 كيلو من دهون الليه( وهى مؤخرة الخروف ) عملت بمشورته أصيبت بعدها بأسهال حاد كاد أن يقضى علىّ لولا أن لحقونى بمحاليل الجفاف أزداد بعدها كرشى أنتفاخا وظلت الليه على ماهى عليه ..مشكلة المشاكل لمن يقومون بعمل الرجيم هى القضاء على الكرش وتقليل حجم الهانش أعرف ناس كثيرين جدا يعانون من مشكلة الكرش فقط أو الهانش فقط وآخرين كان الله فى العون  يشكون من كلاهما فهو منتفخ فى الأتجاهين الأمامى والخلفى

هذه المشكلة ليست فى مصر فقط ولكنها موجوده فى جميع أنحاء العالم ويوجد دول مشهورة بالكروش وأخرى مشهورة بالهنوش( جمع هانش )  .. لا تقولى دول متقدمه ولا دول متخلفه فالكل سواء بل تزيد فى أفريقيا وزنوج أمريكا على الأخص وتزداد حده فى الشعب الأسترالى ويليه الروسى والنيجيرى

ولو قارنا بين الكروش المصرية على المستوى الدولى ستجدنا فى مرتبه متأخرة ولكن الهنوش لنا فيها مركز متقدم وتمثيل مشرف كماً وحجماً .. قمت بمحاولات عديده لتظبيط نفسى من أجل بنت الحلال ولم أجد بغيتى فيما  أقل من 130 كيلو وكانت القسمة والنصيب هى طوق النجاة فى مشكلتى لأرتبط  بدودو حبيبة قلبى ورمانة ميزانى

تعرفت عليها فى حفل زفاف أحد أصدقائى ولم أبذل أى مجهود فى التعارف عليها فكلانا نعرف مسبقا بهذا اللقاء وأصدقائنا مهدوا له ووجدوا بأنى أنسب شخص طولاً وعرضاً ووزناً لها فبمجرد أن تلاقينا أرتسمت على وجهينا أبتسامة الرضا والقبول وأهتزت مشاعرنا من تحت سابع طبقة من اللحم والشحم المتراكم لدينا.. ومن الأن لن نخجل من بدانتنا أو نعاير بعضنا بعضا فنحن فى الهوا.. سوا ..هى لا تزيد كثيرا عن وزنى وحجمى ولكنها تتمتع بوجه طفولى جميل وخفة دم ونشاط وحركة أكثر بكثير من النحيفات وبعد أن أتفقنا على كافة التفاصيل سكتت برهة وقالت : نحن الأثنين لا ينفعنا سرير خشبى فسوف يتحطم من أول يوم فقد نصحتنى صديقتى كابوزا أن نزورها فى بيتها ونشاهد تجربتها فى تأثيث شقتها لتناسب مع حالتها وحالة زوجها المشابهة

لنا

 استحسنت الفكره وقمنا بزيارتها لنستفيد من تجربتها الثرية فى تأثيث عش الزوجية وأصطحبتنا فى جوله داخل شقتها بداية من غرفة النوم قالت : السرير ده رقم 3 فقد أنكسر سريران قبله من الخشب فأحضرنا حداد وقام بتفصيل هذا السرير المصنوع من الكريتال بمقاييس خاصة فعرضه 2متر وطوله 2.30  والمراتب زى ما أنتم شايفيين من القطن بعد أن باظت المراتب اليانسن وأرتخت سوستها وخرجت من الكسوة والسرير مجهز بعجل ليسهل تحريكه .. ويتحمل وزن حتى 2.5 طن

باقى الغرف عندى معظمها مصنوعة من الحديد وخاصة الكراسى والسفرة والصالون

الشغالة بتجد صعوبه فى تحريك قطع الأثاث والكراسى فأضطريت أن أركب عجل لكل حاجة مصنوعه من الحديد فى البيت ..غيرت كل قطع الحمام وأحضرت طاقم حديد زهر مطلى بالصينى ورميت القديم أزلت حوائط كثيره وقمت بتوسيع الأبواب حتى نتحرك بحرية دون أن نصطدم ببعض

حتقابلك مشكلة يادودو فى فستان الفرح  فلن تجدى مقاسك لو حبيتى تأجرى وسيكلفك كثيراً لو حبيتى تفصلى حقولك أنا عملت أيه أشتريت 15 متر قماش شيفون بتاع الستائر وفصلت منه فستان أخفى  كل المسائل وخلانى سمبتيك وبعد الفرح قمت بفكه وعملت منه الستائر أللى قدامك دى .. ماتشليش هم هاتى القماش وسيبى الباقى عليا ..الحقيقة تجربة كابوزا فى الجواز أفادتنا كثيرا وفتحت أعيننا على أشياء فنية ومساحية ووزنية لم تخطر على بالنا

أستطيع أن أقول الأن بأننى من أسعد الأزواج وربنا أكرمنا أنا ودودو وخلفنا ولدين وبنت وكنا نتمنى ألا يصابوا بالبدانه مثلنا ولكن عامل الوراثة هدم كل أحلامنا فثلاثتهم كبوتظات بيضاء تتدحرج على الأرض .. فمن رابع المستحيلات ان تلد أنثى الفيل غزالا                           

القفا

 تحدثنا فى الحلقة السابقة عن الشلاليت وأنواعها وفى حلقتنا اليوم سنتحدث عن ضربة القفا وهو فى عرف المصريين قمة الأهانة وذروة المهانة
 والقفا هو الموضع المحبب فى بعثرة كرامة المواطن لدى ضباط وأمناء ومخبرى الشرطة وأهانة القفا السبب الرئيسى لحالات الوفاة داخل الأقسام والسجون فبمجرد ضرب المتهم أو المشتبه فيه على قفاه فأنه يثور ثورة عارمة ويحطم أى شيئ أمامه ويصبح كالثور الهائج وينتهى فى النهاية بجريمة ضرب أفضى للموت فى داخل الأقسام ..ولو ان الداخلية حذرت أفرادها من عدم الأقتراب من قفا المواطن المصرى لكنا تلافينا جميع هذه المأسى لكلا الطرفين وعلى رأى المثل : اصبر علي الجوع والجفا، لكن كله إلا ضرب القفا"، وهذا المثل يعني أن القفا يرمز للكرامة، والضرب عليه يعني أن هذا المرء لا يمتلك شيئًا من الكرامة.
والقفا عند الرجل يمثل كرامته أما عند الستات مايفرقش
وفى المقابل يوجد ناس وصوليين لا يؤثر فيها ضرب القفا  وماشيين بمبدأ الشيخ سيد درويش فى أغنيته الشهيرة : (علشان مانعلى ونعلى لازم نطاطى نطاااطى) ويقولون "ضرب القفا أحسن من الجفا"، هو مثل مصري أيضا يعنى أن الضرب على القفا من المحبوب أو ولى النعم او من مديرك في العمل أهون بكثير من ابتعاده عنك،
 ومعنى كلمة " قفا" يختلف عند المصريين منه عند الشوام ف"القفا" عند المصريين هو المنطقة خلف الرقبة الواصلة من الرأس للجسد ، أما " القفا" عند الشوام فهي مؤخرة الإنسان أي "مقعدته"
 ويحظى القفا فى سيرتنا الشعبية على حظ كبير من الأهمية ويرد فى العديد من الأمثال الشعبية مثل خدنا أيه من وشك عشان تدينا قفاك، في الوش مراية وفى القفا سلاية، الراجل ده قفا، شايفني مختوم على قفايا، على قفا مين يشيل
والضرب على "القفا" يرتبط في كثير من الأحيان برمزية  عند المصريين وليس بالضرورة تنفيذ الشىء عمليا فيقال "ضربونا على قفانا" بمعني "خدعنا" وتم " غبننا" أي أنه لا يضرب على قفاه سوى الإنسان "عديم الخبرة" و" البصيرة" وهى اهانة أيضا، أما إذا وصل الأمر إلى الفعل المادي فهى عند الطبقات الشعبية والريفية "إهانة كبرى" ربما لا يغسلها سوى "الدم"
 ومن أشهر ما ضرب بالقفا "السيد البدوي، رئيس حزب "الوفد"، والإعلامي أحمد موسي،ويوسف الحسينى ومرتضي منصور رئيس نادي الزمالك، والذين أصبحوا مواد للسخرية والتندر من جانب المصريون، حيث يفقد الشخص شخصيته وكرامته بمجرد أن يُضرب على قفاه. وأترككم مع رائعة محمود عبد العزيز وهو يغنى للقفا 

مصر هى أمى ولا هى بتشتغلنى

هانى صبى عوضين السباك شاب صغير لا يتعدى عمره الثامنة عشر جاء مع معلمه لشغل فى منزلى لاحظت أنه كلما طلب منه شيئا كان رده دائما : حاضر مصر هى أمى.. أفتح الحنفيه ياهانى: حاضر مصر هى أمى.. أمسك قصادى حاضر مصر هى أمى .. تشرب شاى ياهانى.. حاضر مصر هى أمى
أنفرد بالأسطى عوضين جانبا : هو أيه حكايته الجدع ده حاضر مصر هى أمى
حاضر مصر هى أمى.. هو فيه أيه ؟؟
عوضين يهز رأسه فى أسى : الواد ده هو كان فيه زيه ربنا يلطف به .. فى يوم ماطلعتلوش شمس كنا فى شغل فى شبرا وأرسلته لشراء ماسوره حديد طولها متر وياريتنى مابعته .. وهو راجع مسكته الدوريه الراكبه وهاتك ياضرب فيه لحد ماضحضحته وهو يقولهم أنا هانى صبى عوضين السباك مصر دى أمى ..ومين يسمع ومين يفهم وكانت الماسوره هى السبب وراح المعتقل وقعدت أنا وأهله ندور عليه لمدة 5 شهور لحد ما عرفنا أنه فى معتقل الفيوم وأحضرنا له محامى فقال أنه متهما بالأنضمام إلى الجماعة الأرهابية والأشتراك فى المظاهرات المؤيده لها وكان يحمل ماسوره من الحديد طولها متر قام بالأعتداء بها على العقيد / سيد بيومى والمقدم على شلبى و7 جنود مما أدى إلى أصابتهم أصابات بالغة كما هو موضح بالأوراق.. والماسورة ضمن الأحراز ...ها وبعدين
- الواد أنضرب لما أتعمى فى مباحث أمن الدوله وفى المعتقل لحد ما مخه فوت زى ما أنت شايف وبالرغم من هذا لم يرحمه القاضى وحكم عليه بسنتين سجن وهو يغنى فى القفص أمامه مصر هى أمى ولا هى بتشتغلنى.. لما حالته سائت وتأكد لدى إدارة السجن أن مخه أتلحس أرسلت لأهله لأستلامه .. هيه أحنا فين وبقينا فين ده حالته أتحسنت كثير عن الأول.. كان أى واحد يقول قدامه كلمة مصر .. عاديك يقوم يقلع كل هدومه ويقف سلابيته
- نسمع هانى وهو يغنى بصوت مرتفع وقد أغلق الحمام عليه
مصر هى امى نيلها هو دمى
شمسها فى سمارى شكلها فى ملامحى
حتى لونى قمحى لون نيلك يا مصر
مصر ... مصر
ماتلاقيش مثالها ست كل عصر
ضله جنب نيلها تسوى الف قصر
ولا ورده بلدى فيها عطر مصر ولا جو مصر ولا سحر مصر
مصر ... مصر
يخرب بيتك يامصر ... يالهوتى
يحاول الأسطى عوضين فتح باب الحمام ليمنع هانى من خلع ملابسه فيستحلفنى لنحضر أكبر عدد من الموجودين والجيران لنغنى مع هانى حتى يفتح الباب
- نقف جميعا أمام الباب ونمثل دور الكورس ونردد من خلفه كلمات الأغنيه حتى هدأ وفتح باب الحمام وخرج وهو يبصق علينا وهو يقول : خونه مجرمين أخوان مسلمين مصر هى أمى ياكلاب

شلاليت

تبدأ حياتنا بشلوت وتنتهى بشلوت وبين الشلوت الأول والشلوت الأخير تمر بنا مواقف كلها شلاليت فى شلاليت.. والشلاليت أنواع....فعندك مثلا

1-شلوت أهانه وغدر بالإنجليزية A Kick in The Butt

وهو المعروف الذى يمكن أن تتلقاه فى خناقة أو فى مظاهرة أو قسم بوليس أو من صاحب العمل للتعبير عن قرفه منك.. والمكان الطبيعى للشلوت يكون على المؤخرة Butt وللحفاظ على هذه المنطقة الأستراتيجية لا تعطى ظهرك لأحد فى أى مشاده أو خلاف حتى لو كان من أشد المقربين اليك فالشلاليت غالبا ما تأتى من الأقرباء والأصدقاء قبل الغرباء أثناء الهزار السخيف ولو كنت بتدخل فى صراعات وخناقات مستمرة أنصحك أن تلبس الواقى الأمامى والخلفى المضاد للشلاليت للحفاظ هلى حياتك وكرامتك ومن أشهر هذه الشلاليت شلوت أحمد موسى فى باريس

2- الشلوت الأولمبى: الأسيويين ربنا يسامحهم أخترعوا لعبه رياضيه تعتمد أساسا على

الشلاليت (كيك بوكس)  يلبس كلا اللاعبين واقى لمنطقة الحوض والمؤخرة وواقى للوجه والأسنان ويلف مشط القدم برباط ضاغط للحفاظ عليه أثناء ضرب الشلاليت وأصبحت الشلاليت لعبه أوليمبية ترصد لها الجوائز والكؤس

3- شلوت معنوى ..شلوت لفوق ويستخدم عادة فى- ترقية موظف لمنصب اعلى
وهوماي دفع الموظفيين للعمل بجد فى شركاتهم عند طلب زيادة فى المرتب
ويستخدم عند الاستغناء عن مسؤل كبير وتعيينة فى وظيفة اقل
هذا النوع من الشلاليت بيطلب فى الشركات وتولى المناصب الوزاريه مثال صحفى شهير بيناكف فى الحكومه يتم تعيينه وزير للأعلام ليمكن أسكاته للأبد وفى أقرب تغيير وزارى ياخد شلوت بره

الشلوت القومى : وهو الشلوت الذى تلقاه الشعب المصرى بعد 25 يناير وهو شلوت طويل المفعول متعدد المراحل وأصبحنا للأسف معتادين عليه مدمنين له لا يعدى يوم بدون شلوت من الحكومه بداية من شلوت الأسعار ثم شلوت تعويم الجنيه ثم شلوت الأرهاب وياما فى الجراب شلاليت

أزياء نعيمه

نعيمه بنت زى القمر تبارك الله فيما خلق تفط الزكاوه من عينيها اللامعتان ..وهبها الله عقل راجح وحكمه مبكرة.. فبعد حصولها على دبلومة صناعة الملابس بتفوق أستغلت ذكائها فى تفصيل الملابس الحريمى..ماشاء الله عليها تقع عينها على الشيئ مره واحده تحفظه عن ظهر قلب كأنها عدسة مصور تلتقط وتسجل ..هذه الموهبة أستفادت منها فى سفرها إلى  البندر والقاهرة وأثناء تجوالها على المولات والمحلات التى تعرض آخر خطوط الموضه و فى شنطتها نوته وقلم رصاص ترسم فيه الموديل الذى يعجبها وترجع البلد وتجلس على ماكينة خياطتها وتقوم بتفيذ الموديل كما شاهدته بل تضيف عليه من ذوقها وفنها الكثير وأخرجت أجمل الفساتين والعبايات وفى نفس الوقت كانت تبتكر الموديلات التى تناسب الريفيات وبنات الجامعة.. شهرتها زادت فى البلد وزبائنها أصبحوا بالعشرات.. سبعاوى ابن عمها أكبر منها بشهور حصل على دبلوم الزراعة يقوم بالأشراف على أرض أبيه العمده وهو مغرم صبابه بأبنة عمه ويتقرب منها بشتى الطرق ليخطبها وهى لا تستجيب أو تبل ريقه لو بكلمه فدماغها كله فن ولا يوجد فى قلبها مكان لغراميات سبعاوى وهم الجواز وخلفة العيال فساق عليها أبوها وأمها وطوب الأرض لتوافق على زواجها منه حتى لانت عريكتها ولتحقق حلمها الذى طالما حلمت به - ولكنها وافقت بشرط أن يكون مهرها 3 قراريط أرض يتبنى عليهم ورشة لتصنيع الملابس فى البلد

أم نعيمه : عرضت طلبك على سبعاوى ووافق ياست البنات ..الجدع بيحبك وشاريكى

نعيمه : على خيرة الله يوم مايجهز المصنع بكافة مستلزماته نكتبوا الكتاب ونعلوا الجواب

ولم تمر ثلاثة أشهر حتى أكتمل بناء المصنع وتم التجهيز بالمعدات والمكينات سبعاوى: المصنع جاهز يانعيمه فرجينى حتشغليه أزاى وحتجيب صنايعية منين؟؟

نعيمه : أنا عامله حسابى ياسبعاوى من بكره حنفتح فيه مدرسة تفصيل وحعدى على بيت بيت فى البلد والبلاد أللى حوالينا وأشجع البنات والستات على تعلم الخياطة والتعيين فى المصنع وواحده وحده العجله حتدور المهم أنك تساعدنى بالمال لحد ما أقف على رجليا

-      من العين دى قبل العين دى.. بس نفسى أعرف تاعبه نفسك ليه وأحنا ربنا مدينا من وسع وعايشين فى خير أبويا

-      خير ابوك أنت مش عايش فيه لوحدك ياسبعاوى والعمر الطويل ليه بص لقدام ماتبصش تحت رجليك

-      أنا سمعت كلامك وعملت لك المصنع ده غصب عن أبويا وأخواتى يانعيمه علشان بحبك قوى قوى يابت

-      المصنع ده مستقبلى ومستقبلك ومستقبل عيالنا أللى لسه ما جوش ويوم ما نتجوز  مالى حيبقى مالك وكل قرش صرفته حتعرف قيمته بعدين

-      مش قصدى يانعيمه ده مهرك يانعنع أنتى حره فيه

تمر السنه الأولى بصعوبات البداية وتعمل نعيمة ليل نهار رغم تعب الحمل والولاده ولا تفتر عزيمتها وسبعاوى يقف بجانبها يشجعها بالرغم من المكسب الضعيف مقابل الجهد الكبير الذى تبذله لتحقق حلمها الكبير وفى النهاية جائت الفرصة لمن يستحقها فتعاقدت مع المدارس فى البندر لعمل الزى المدرسى ثم ملابس عمال مصنع الزجاج ثم مهمات المستشفيات وأنطلقت عجلة الأنتاج ففى خلال ثلاث سنوات أستطاعت أن تبنى مصنع جديد أكبر من القديم وبالرغم من هذا لم تنسى واجبها كزوجه وأم وهوايتها فى تصميم الأزياء وخصصت جزء فى مصنعها القديم لعمل الأزياء الحريمى ودرست فن أستخدام الكمبيوتر فى التصميم وعمل الباترونات وأشترت أغلى الماكينات ودربت عمالها وأنتجت أجمل خطوط الموضه للمحجبات وعرضت فى المحلات الكبرى وأشترطت على العارضين أن يكتبوا على منتجاتها بأنها صناعة مصرية من أزياء نعيمه وأصبح السفر إلى القاهرة شبه يومى للتعاقدات والتسويق فقررت أن تفتح لها معرض خاص بها ومكتب للتسويق وتركت سبعاوى يدير لها مصانعها فى البلد وتركت تربية ورعاية الأولاد لأمها وأصبحت زيارتها لهم أسبوعية ومع كثرة الشغل والسفر للخارج أصبحت شهرية وأطلق على نعيمه أسم المرأة الحديدية وأستضافتها قنوات التليفزيون وتعامل معها الفنانين ونجوم المجتمع وكسبت شهره ومال يدعمهما جمالها وذكائها فأنشأت أكبر مصنعين فى مصر وتعاقدت مع أكبرمصانع النسيج لأنتاج قماش خاص بها ولأزيائها

وجاء من همس فى أذنها بأن سبعاوى تزوج سرا ويقيم هو وعروسته فى المركز فتمالكت أعصابها وسافرت البلد وأرسلت فى طلب سبعاوى

-      صحيح الكلام أللى سمعته أنك أتجوزت وقاعد فى المركز

-      (سبعاوى يرتبك ولا يعرف كيف يرد ) فتشخط فيه نعيم : صحيح أو مش صحيح رد

-      سبعاوى ينظر إلى الأرض فى خجل : أيوه صحيح أنا أتجوزت علشان عايز واحده ست جانبى تدفى فرشتى وتطبخ لقمتى أسألى نفسك يا نعيمه كم مره جيتى البلد أنت بقالك 3 اشهر ماشوفتكيش طب قوليلى أعمل أيه

-      طلقنى ياسبعاوى من غير شوشره وأنا حاخد أمى والعيال مصر وعندك المصنعين أللى فى البلد اللى أتعملوا من مهرى حلال عليك ونبقى خالصين يا أبن عمى

وبعد مرور عامين

تزداد شهرة نعيمه وتفتح لها فروع فى المدن الكبرى وهى رافضة الزواج لمن تقدم لها من الأثرياء ورجال الأعمال وصبت أهتمامها على أولادها وعملها

تدخل السكرتيره على نعيمه فى مكتبها : فيه واحد بره أسمه سبعاوى بيقول أنه كان جوز حضرتك وعايز يقابلك يامدام

-      خليه يدخل

-      صباح الخير يا نعيمه يابنت عمى

-      خير يا سبعاوى

-      العيال وحشونى جيت أشوفهم

-      أخيرا أفتكرت أن لك عيال

-      أعذرينى يابنت عمى .. من بعد ما مشيتى أنت والعيال ..والنصايب نازله ترف على دماغى قفلت المصنعين وأديانت وأبويا رفض يساعدنى وقال لى أنت أخدت حقك وما أقدرش أديك حق أخواتك و طلقت الوليه لأنها وش نحس

-      سيبك من الكلام ده أنت أخذت جزائك علشان طفاستك وغبائك

-      فعلا ده ذنيك يا نعيمه وربنا بيخلصه منى .. ياريتك يا غاليه تسامحينى

-      أنا سامحتك من زمان يا سبعاوى

-      طب مانرجع لبعض علشان خاطر العيال والعيشرة اللى بينا

-      أنت ما عملتش خاطر للعيال والعشرة ياسبعاوى انا قفلت الصفحة دى من زمان خد الباب وراك وأنت خارج حقاالسعيد في العمل تعيس في الحب وسبحان موزع الأرزاق