قهوة الحراميه

 

ألتف الحرامية حول المعلم فيشه شيخ المنصر وهم فى حالة تزمر وأنزعاج بعد أن أعلن عن نيته فى التوبه والأعداد لرحلة الحج فقال له مقص الحرامى : ماينفعش الحج يا معلم من الفلوس الحرام

فيشه : جيبت الكلام ده منين ياض

- بيقولوا كده فى التليفزيون

- أنا مش قلت 100 مره محدش يتفرج على التليفزيون أو يدخل الفيس بوك واليوتيوب وكلنا حلفنا مع بعض على كده أنتم نسيتوا ولا أيه

فتوح النشال : انت توبت وحتطلع تحج والرجاله دى حتعمل أيه

- تشتغل عادى والأيد البطاله نجسه

- مش ممكن تأجل التوبه للسنه الجاية يكون كل واحد فينا رتب أموره ونطلع الحج صحبه والتوبة تطول الكل

- خلاص أنا قررت التوبه واللى عايز يتوب هو حر وده آخر كلام

- يا معلم أحنا فى أيدينا عملية سوقع اليومين دولت حنطلع منها بمليار ولا أتنين

- محدش قال لى عليها ياولاد الكلب أنتوا بتسرقوا من ورايا

- يا معلم حقك محفوظ وحيوصل لحد عندك وبما أنك توبت وأنابت وحتطلع تحج يبقى مش حينفع تاخد حقك لأن حجتك حتبوظ وتوبتك مش حتنفع

يضع فيشه يديه فوق رأسه ويسرح بنظره فى سقف القهوة ثم يهب واقفا

وهو يقول : تؤجل التوبه والحج للعام القادم رفعت الجلسه

يهتف الحراميه فتهتز أركان القهوة: يحيا العدل .. يعيش المعلم فيشه راعى الحرامية

كلام فى الصميم

أنا اللي لابس تهمة،، وذنبي اني حلمت في يوم
بأكله ترم البدن
هما يجيلهم تخمة،، وانا نص عشايا نوم
انا يصعب شرحه،،
اللي بيضحك علي جرحه،،
واللي بيقلق من فرحه،،
عيان زي الفل
انا المواطن مصري،،
كاره عيشة الذل

الخبر السعيد

 

بعد أن أشرب قهوة الصباح أتصفح كافة المواقع الألكترونية والأخبارية لعل وعسى أن أجد الخبر الذى أنتظره من سنوات..ولم أيأس فسيأتى هذا الخبر أن آجلا أو عاجلا فهذه حال الدنيا
وأردد بعدها قول الشاعر:
دع المقاديرَ تجري في أعَنّتها
ولا تبيتنّ إلا خاليَ البالِ
ما بين غَمضةِ عَين وانتباهتها
يغيّر الله من حالٍ إلى حالِ

يارا فى التخشيبه

فى ليلة رأس السنه البعض من كبار السن أمثالى قام بقضاء الليله فى السرير وتحمل غلاسة التليفزيون وبرامجه المعاده والمكرره اما الشباب واللى على قدهم قرروا أن يحتفلوا بالكريسماس فى الكوفى شوبات ( جمع كوفى شوب) فهم لا يتحملوا المبالغ ذات 3 أصفار التى فرضتها الفنادق والملاهى الليليه السياحية

لفت نظرى فى جريدة الصباح خبر القبض على المطربه يارا وهى تغنى بدون تصريح فى كافيه بمدينة نصر ليلة رأس السنه

بحثت عن المطربه يارا محمد على اليوتيوب فوجدت لها عشرات الفيديوهات فهى مغنية أفراح شعبية ومهرجانات .. الست يارا ربنا يبارك فى شبابها تولع أجدعها فرح شكلها مش بطال وصوتها حلو وشقى قصدى وشجى وممكن تغنى لصباح وشاديه وورده وأم كلثوم وشكوكو فى وصله واحده موهبه عشوائية لم تجد من يأخذ بيدها لتصعد سلم المجد

ياعينى عليكى يارارا.. وهى واقفه بتغنى ومصهلله فى الكوفى شوب والشباب حولها بيرقصوا ويتطوحوا ودخان الشيشه والبانجو معبأ المكان يدخل عليها العقيد رستم الدباح كالقضى المستعجل ومعه لفيف من الساده الضباط والعسكر والمخبرين

وتم القبض على مطربة الأفراح يارا محمد بفرقتها وسلاطتها وبابا غنوجها والقهوجى وصاحب الكافيه والواد بيسو منادى السيارات الكل تم شحنهم بربطة المعلم فى البوكس وأطلع يا دباح على قسم مدينة نصر وأتستف لهم قضية أزعاج سكان والغناء بدون تصريح والوقوف فى الممنوع ومخالفة الأمر الوزارى لعم مدبولى بمنع الشيشه وبالتالى مصادرة الشيش والطبول والدى جى اللى مازالت يارا تسدد فى أقساطه وخرج رواد الكافيه ليجدوا جميع سيارتهم قد تم كلبشتها لتكتمل ليلة رأس النكد .. وعلى رأى المثل

للى عاجبه من الكحل يتكحل و اللى مش عاجبه من البلد يرحل