عم سميح فى المصيف
-أبو سميح قوم معايا نجهز الشنط
أبوسميح : أنت بقالك يومين بتجهزى فيهم ..فيه أيه تانى
أم سميح : الكام كرتونه دهمت عايزاك تربطهم معايا
أبوسميح : كل دوول هو أحنا مهاجرين ..أيه أللى عملاه ده ياحاجه( للله الأمر من قبل ومن بعد) وربنا يعدى يومين المصيف على خير فيها أيه الكارتين دى كلها
أم سميح : الكارتونة دى فيها التموين الشاى والسكر والزيت
ودى للصابون والرابسو والبطاس ودى فيها كارتونة لحمه متلجه
ودى فيها كارتونة فراخ ودى فيها قراقيش وشوية قرص ودى فيها عدة الشاى والكنكه والكبايات ودى فيها البوتجاز الصغير وأالأنبوبه ودى فيها ملايات وأكياس مخدات وكبرتيات ودى فيها لعب ولاد أبنك سميح والعجلة والبوته والأتارى
أبو سميح : ما تلفى المطبخ معاكى وأودة السفرة
أم سميح : أبن حلال فكرتنى آخد الهون والخلاط ومخرطة الملوخيه والمنخل والعصارة والفتاحه والمشابك
أبو سميح: وأيه الكارتونه أللى هناك دى
أم سميح : دى فيها العوامات وفردتين كاوتش جايبهم سميح من حوده السواق علشان ينزلوا بيهم البحر
أبو سميح : تعالى نحسب عدد الناس أللى جايه معانا
أم سميح : مفيش هم همه بتوع السنة أللى فاتت ويزيد عليهم أختى جمالات وعيالها
أبو سميح : أف ..ملينى يا أم سميح علشان نعرف ندبر لهم مكان للنوم والمواصلة أللى حتودينا ..قولى وخلصينا
أم سميح: أكتب ياسيدى .. بنتك عائشة وعيالها وجوزها 7 .. بنتك صفيه 8
وحيد وعياله ومراته 5 ..أختى جمالات وعيالها 3 مش حتاخد غير العيال الصغيرة بس وتسيب الباقى مع أبوهم
أبو سميح : أحسن برضة.. كده يبقى 23 مش ناسيه حد تانى
أم سميح : مفيش غير أنا وأنت وسميح ومراته وعياله 7
أبو سميح : حلو قوى قفلنا الـ 30 نفر ..أحنا كنا عاملين حسابنا فى مينى بص 24 نفر تقدرى تقوليلى حنعمل أيه فى العدد الزيادة
أم سميح : بسيطه ياخويا تبقى كل واحدة من ولادك تاخد العيال الصغيرة على رجليها
أبو سميح: ده أنتم عايزين لورى وكمان بمقطورة
أم سميح : ماتحبكهاش قوى كده كله تتدبر
أبو سميح : الشقة ياوليه ثلاث أوض بست سراير تقدرى تقوليلى الناس دى كلها حتنام أزاى
أم سميح : السنه أللى فاتت كنا 27 وقضيناها.. ناس كانت بتنام بالنهارفى الشقه وناس بالليل وناس نايمه على البحر سيبها هى الأمور بتمشى لوحدها وعلى رأى المثل حصيرة الصيف واسعة
أبو سميح : واسعة واسعة لحد ما بهوأت يا أم سميح
أم سميح : المرة دى عملين نظام جديد للأكل ..أحنا كده خمس عائلات فى عين العدو كل عيله عليها الأكل فطار وغداء وعشاء لمدة يومين ..وكل واحدة من بناتك وستات ولادك عارفه كدة وواخده معاها أكل نص سوا علشان تعرف تمشى أمورها فى اليومين بتوعها
بنتك عائشة عامله حلتين كفته أرز باللحمه الجملى وثلاث صوانى مكرونه فرن وبنتك صفيةعامله دكرين بط وعشر تجواز حمام وحلتين محشى..ومرات سميح قالت أن عليهم السمك فى اليومين بتوعهم
ومرات وحيد مجهزه عجينة طعمية وعليها الطبيخ والرز وعاملة ثلاث صوانى بسبوسه وكيك
وأحنا بقى معانا كرتونة الفراخ واللحمه وحنجيب الملوخية من هناك ومنبهه عليهم أنهم ياساعدوا بعض واحدة للطبيخ وواحدة للتجهيز وواحدة لغسيل المواعين وواحدة لنظافة الشقة
ماتشلش هم يا أبو سميح هو فيه أحلى وأجمل من اللمه مع أولادك وأحفادك ربنا يخليك ليهم
أبو سميح : ويخليكى ياختى
-2-
يوم السفر
- يا بو سميح أنا كده شايف أن العدد كبير على العربيه أنا كلمت شريكى قالى خد الأتوبيس المرشيدس أللى لسه طالع من العمره يقضيكم وفى نفس الوقت يلين فى المشوار ده
أبو سميح : كويس قوى يا أسطى بيومى أهو نعرف نقعد براحتنا بدل الخنقه
بيومى : أنا قلت بالمرة أخد جماعتنا والعيال معانا يقضوا يومين من نفسهم
أبو ساميح : حتنزلوا فين فى أسكندرية
بيومى : الحقيقة أحنا ما عندناش مكان ننزل فيه قلت يعنى ننزل معاكم
أبو سميح : كان على عينى يابيومى ياخويا المطرح ضيق والعدد ماشاء الله كتير وحيرانين حنبيتهم أزاى
بيومى : مش قصدى أن أحنا نبيت معاكم أنا والعيال حنبيت فى الأتوبيس تحت العمارة أللى أنتم نازلين فيها وأحنا بس حنتاقل عليكم شويه فى أستخدام الحمام بتاعكم
أبو سميح : أن كان كده يبقى مفيش مانع وآديك حتنفعنا فى مشاوير البلاج ونص البلد
بيومى : أنت تأمر يا خويا ..بس أنا حبقى أضرب لى كام دور نحمل فيه بالنفر على الأقل نجيب مصاريف المصيف
أبو سميح : وماله ياحبيبى أهو كله فايده والأيد البطالة نجسة
بيومى : خلاص ياعم أستبينا بكرة من بعد صلاة الفجر حقف فى الميدان وانتم أتجمعوا ونتكل على الله بدرى قبل مالشمس ما تشد
زقه للنبى
بيومى : خلاص ياجماعه الكل وصل مافيش حد ناقص
- مفيش يا أسطى سمى كده وأتكل على الله
بيومى : العربيه مش راضية تدور ..عايزين زقة ياجماعة
_ ييه من أولها كده ربنا يستر... الكل ينزل يزق
_ صوت حريمى : الرجاله بس أللى تنزل تزق !!
- مش حينفع ده كل واحده فيكم وزنها فوق الـ120 كيلو أنزلو زوقوا معانا حرام عليكم
- هيلا هوب ..هيلا هوب ..ألله أكبر ما يجبهاش ألا ستتها
رجاله ورق
_ ألحقوا أركبوا ياجماعه
بيومى : سمعونا الفاتحه والصلاة على النبى أن ربنا يوصلنا بالسلامه
- ولا ضالين آمين
- أفتح لنا الكاسيت ياعم بيومى
- الكاسيت عطلان
- أفتح الكاسيت بتاعك ياشيكو..هاتى الشرايط اللى عندك يا نعناعه
- عايزين أغانى خفيفه ع الصبح لأن فيه ناس نايمه..حاضر
- شغل منير ياشيكو..ماشى
- أم فاروق قومى وزعى سندوتشات الفطار
- انا عايز جبنه رومى ومربى..مفيش ياروح تانت غير فول وطعميه وحلاوة ..أيدك ياواد ياطفس ..أنا مالى أنا عايز حلاوة..خد أكتم ..عيال معجونه بمية عفاريت..لا وأنت الصادقة معجونه بميه معدنيه ..قهقه قهقهقه
- أيه ياعم بيومى ماشى على مهلك ليه ..الطريق مقفول يظهر أن واحد من البهوات طالع مارينا وقفلين له السكه..ربنا يستر ..بطلوا المواكب فى القاهره ورجعوها على الطريق السريع ناس غاويه منظره..ربنا يخلصنا منهم ( الكل فى صوت واحد: آميييين)
- ( بوكس للشرطة ومجموعة من الضباط والأمناء يشاورون للأتوبيس بالوقوف على جانب الطريق )
- بيومى : لجنه يا جماعه إللى معاه بطاقه يطلعها
- ( يصعد إلى الأتوبيس ضابط شاب ومعه مخبر ويتجولون ويطلعون على البطاقات )
- الضابط أنت ياجدع ياللى نايم بطاقتك
- بابا ..بابا أصحى بوليس
- بوليس هوفيه أنا ماشفتش حاجه ياباشا دى عايشه وعايلها أللى كانوا معليين الكاسيت
- الضابط : عايشة أيه وكاسيت أيه ..بطاقتك يا خفيف
- رقم قومى ولا كارتون
- هات أى زفت خلصنا
- خد بطاقتك ياعم محروس ونام
- محروس : هو فيه أيه ..مفيش حاجه نام ..شوفيلى يا عايشه سندوتش أحسن أنا جعت قوى
عائشة : مفيش يامحروس أنت مش لسه واكل من ساعة لحقت تجوع..خلاص قربنا نوصل الرست
- ماما عايز أعمل ببى ..وأنا كمان ..وأنا كمان
- بت ياسحر خدى العيال دى خليهم يعملوا ببى فى الحفرة المداريه هناك
- سحر: قدامى كل العيال اللى عايزة تعمل ببى
- ( ينزل عشرة أطفال من مختلف الأعمار وينتشرون بجوار الأتوبيس ليلبوا نداء الطبيعة )
- سحر : أف أف تتكم القرف أنتم واكلين أيه ..تجرىوهى تقول أللى يخلص يطلع الأتوبيس ويقعد فى الآخر
- الضابط يتنبه للريحة ..طلع الأتوبيس ده من هنا بسرعه
- بيومى : أمشى أزاى ياباشا والعيال لسه ماخلصتش
- الضا بط أمشى أنا ياسيدى ..أجمع القوة بسرعة وحصلونى على نقطة المرور
- الأتوبيس بالكامل يضج بالضحك وهم يشاهدون الضابط وهو يمسك أنفه ويهرب باللجنه
- أطلع ياواد أنت وهو خلاص مشييوا..كفايه أحسن حنموت أحنا ....... قهقهقه..... قهقهقه
- ياخرب بيت عقلك ياعايشه ..كل ماتقابلنا لجنه ..تسيبى عليهم العيال..قهقه قهقه
- ييومى : خلاص ياجماعه أحنا داخلين على الرست ..نريح ساعه ونتكل على الله ومش عايزين تأخير
3-

تعالوا نقرأ الفاتحه
عماد يختلى بأبيه الأسطى بيومى
عماد : فرصه يابه تكلم عم أبوسميح وعم محروس وخلانها فى موضوعى أنا ونعناعه وهمه قاعدين مبسوطين وبيضحكوا
بيومى : وقته ده ياعمده مايصحش أستنى لحد ما نوصل أسكندريه
عماد : عشان خاطرى يابه الله يخليك
بيومى : خلاص ربنا يسهل خليك قريب منى علشان لما أناديلك وخلى أمك تفتح الكلام مع ستها وخالتها
******
تعالى أقعد ياسطى بيومى هنا فى الظل ..قعد ياراجل
بيومى : شوف ياأيبو سميح يا خويا أحنا نعرف بعض من كام سنه
- يجيى كده من أربعين سنه وعشرة عمر على الغالى
- أنا كده بتشجع وأقولك أنا عايز بنت بنتك نعناعه لعماد أبنى
- والله يابيومى أنا سبق وقولت لك أن ما عنديش مانع بس الموضوع يرجع لأبوها وأمها
- يا أبو سميح أهم موجودين وآدى الجمل وآدى الجمال
أبو سميح : أيه رأيك يامحروس أنت وعايشه
محروس : هو أبنك يابيومى يقدر على مصاريف الجواز
بيومى : العمده واد جدع وكسيب وأسطى خراط مفيش أخوه
بياخد فى الجمعة 300 جنيه وعنده شقه بنيها فوق بيتنا ملكنا
وفوق كده أبنى معاه دبلون الصنايع ..ومستعدين للمهر والشبكه وكافة مستلزمات الجواز..قولت أيه ؟؟
محروس : أستنى لما شاور البنت وأمها
(يغيب محروس ويختلى قليلا بنعناعه وأمها ..تقوله كده زى مافهمتك )
محروس : شوف يا أسطى بيومى أحنا موافقين مبدأيا بس لينا شوية طلبات
بيومى: أشرط يا أبو العروسه
محروس: مفيش خطوبه قبل ماتطلع نتيجة دبلوم التجارة وتنجح نعناعة
تانى حاجة مفيش كتب كتاب قبل ماتجهزوا الشقة بالعفش
ونكتب القايمه
تالت حاجه شبكه بخمس تلاف جنيه ومؤخر خمس تاشر ألف
وأحنا علينا التنجيد والمطبخ
بيومى: حيلك ياعم محروس كله أنا موافق عليه بس موضوع المؤخر مش كتير شويه
محروس : البنت متعلمه وحيبقى معاها دبلوم وكمان أنت حتدفع حاجة أهو مبلغ مكتوب على الورق تأمن به حياتها
بيومى : الواد والبت بيعزو بعض من زمان ورايدين بعض
محروس : لو بيعزها صحيح يكتبلها مية ألف
(يتدخل عماد فى الحديث )
عماد : خلاص يابه أللى عايز عم محروس يكتبه..أنا حلاقى أحسن من نعناعة وعم محروس
محروس : عداك العيب ياعمده وكلمتك دى تمنها خمسة آلاف جنيه..وعلشان خاطر بيومى يبقى المؤخر عشره بس
بيومى : زغرطى يا أم عماد زغرطوا يا ولاد
أبو سميح : حطى أيدك يابيومى فى أيد محروس وأقروا فاتحة عماد على نعناعة
شيكو : الحفلة فى الأتوبيس ياجماعه
( قام الجميع بتبادل التهانى والقبلات وأمسك العمده لأول مره يد نعناعه جهارا أمام أهلها )
تقوم أم عماد وبيومى بتوزيع المشروبات الغازيه على الجميع وقد عم عليهم الفرح والسرور وقاموا بزفهما ألى الأتوبيس لبجلسا سويا على المقعد الأخير ليلتف حولهما الأهل ويبدأ الحفل بالرقص والأغانى والتصفيق لبدخل بهم الأتوبيس الأسكندربه وهم لآيحسون بالوقت وقد ملئت الفرحة القلوب الصافية

عزه الأرهابيه
- آلو..السلام عليكم ورحمة الله وبركاته
- وعليكم السلام ورحمة الله وبركاته..أهلا أزيك ياعزه
عزه : الحمد لله ونشكر فضله أزيك ياخالى حسن
حسن : فينك يابنتى من زمان ماسمعناش صوتك ..خير
عزه : ياعنى أنت أللى بتسأل ولا حتقولى الشغل والمشاغل..بس ده مايمنعش أنك تسأل على أختك وبنت أختك
حسن : أعذرينى ياعزة على تقصيرى أنا بأرجع متأخر يادوبك آكل اللقمه وأنا نايم
عزه : أنا خايفه عليك ياخالى من عذاب الآخره فقاطع الرحم لا يشم رائحة الجنة
حسن: بس أنا مش قاطع رحم أنا الوحيد من خلانك وأعمامك أللى بزوركم
عزه : مره ولا مرتين فى الشهر
حسن : أوعدك ياستى أن كل أسبوع أكون عندكم
عزه : هل صليت الفجر النهارده ياخالى
حسن : فى الحقيقة أنا راحت عليا نومه لأنى رجعت من شغلى متأخر
عزه : ولو ..هل قرأت صورة الكهف قبل صلاة الجمعة
حسن : أنا لسه صاحى وربنا يقدرنى على قرآتها قبل الصلاة
عزه :أولادك البنات لسه برضه ماتحجبوش ياخالى
حسن : بناتى لسه صغيرين يا عزه خمس سنين وسبع سنين لسه بدرى عليهم
عزه : ياخالى ربنا حيحاسبك عليهم أنت وأمهم وأنت أكتر فكل راعى مسؤل عن رعيته اللهم ما أنى بلغت اللهم فأشهد
حسن : بارك الله فيكى
عزه : عيزاك تشرفنا بعد صلاة العشاء النهارده
حسن : خير يا عزه
عزه : خير طبعا فيه واحد من الأخوة يريد التقدم للزواج منى ..ياريتك تيجى لوحدك وبلاش المدام ولا البنات ومش أوصيك متتأخرش زى المرات أللى فاتت
حسن: حاضر ياستى والف مبروك مقدما
عزه: السلام عليكم ورحمة الله وبركاته
(حسن يضرب كفا بكف )
زوجة حسن : مين كان على التليفون ياحسن
حسن: دى عزه ياعفاف..عايزانى أروح عندهم النهارده
جايلها عريس ياستى من الأخوة
عفاف : تانى ياحسن أنت ماحرمتش آخر مره لما قعدت العريس يسمع أجزاء القرآن أللى قال أنه حفظها فسقطت منه بعض الآيات فقامت بطرده..شر طرده وأحرجتكم أنت وأعمامها..ماتوبتش ياحسن
حسن : المره دى العريس من الأخوه حيعرف يتفاهم معاها
عفاف : من الأخوه وغير الأخوه البنت دى أحوالها أتغيرت بعد مصرع أبوها بين أيديها ..مين كان يصدق أن عزه أحلى وأجمل بنات العيله تعمل فى نفسها كده ..بعد المينى جيب والميكرو والشعر الحرير والمكياج الصارخ
تتنقب وتعتزل الناس وتواظب على حلقات الدرس والصلاة جماعة فى المسجد..تتحول 180 درجة
حسن : الله يهدى من يشاء..حادثة أبوها هزتها من جواها هزه عنيفة..كان الله فى عونها
عفاف : لسه مخاصمه أمها ومابتكلمهاش
حسن : لسه ياستى لأنها بتعتبر أن أمها هى السبب فى مصرع أبيها ..لأنه خرج من البيت وهو غضبان أثر خناقه عادية من أللى بتحصل فى البيوت فضربته عربيه وهو بيعدى الشارع أمام البيت وتصادف وقوف عزه فى البلكونه وشاهدت المنظر والحادث بكل تفاصيله
عفاف: خناقه عاديه.. دى أختك نكديه وتعكنن على مديريه
حسن : أتلمى ياعفاف يوم الجمعة فيه ساعة نحس ما تخلهاش الساعة دى
عفاف : يا خويا ..قولنا مليون مره خلى دكتور نفسانى يعالج البنت وأنتم مابتسمعوش الكلام..عيلة دماغها ناشفه وأمخاخ طقه
حسن : أنت بتبرطمى تقولى أيه.. الموضوع بقاله أكتر من سبع سنين حاولنا كتير ومفيش فايده..ربنا الشافى
قومى حضرى الفطار علشان الصلاة قربت
-2-
مقابلة العريس
عزه: العريس عندك فى الصالون أدخل أتعرف بيه وبلاش الأسئلة الدنيويه بتاعتك... ده راجل من الملتزمين ومايعرفش الكلام بتاعكم ده
حسن: لما نشوف..يامسهل يارب
( حسن يدخل الصالون فيجد رجل مسن يبلغ من العمر 55سنه ملتحى ويلبس بدله أكل عليها الزمن وشرب)
حسن : السلام عليكم ورحمة الله وبركاته..حسن سليم
مدير بشركة السلام للأدويه..خال العروسه
العريس: وعليكم السلام ورحمة الله وبركاته ..محمود المرجوشى صاحب ومدير سلسلة محلات المرجوشى للملابس
حسن : أهلا وسهلا ..تشرفنا بمعرفتك..تحب قهوتك أيه
محمود : أنا لا أشرب القهوة ولا الشاى..لو كان فيه جنزبيل يكون أحسن
حسن : مشاء الله ..جنزبيل ياحاجه ..أهلا وسهلا
( ويستمر الحديث بين حسن والحاج محمود وهو يظن أنه أبو العريس وأخيرا بعد فتره طويله يقلق حسن )
حسن : هو أبنك بيشتغل أيه
محمود : أبنى مين فيهم
حسن : أبنك أللى عايز يتقدم للآنسه عزه
محمود ( يرد فى غضب ) : أنا العريس ياأستاذ حسن
حسن ( يبلع ريقه وهو ينظر فى وجهه بأستغراب)
:أنا آسف جدا ياحاج محمود أستأذنك فى دقيقه وأحدة على ماتخلص الجنزبيل )
حسن يختلى بأخته وعزه فى غرفه مجاورة ويدور بينهم الحديث همسا )
حسن : هو ده العريس ..واحد أكبر من أبوكى عايز تتجوزيه ..أكيد متجوز قبل كده
عزه : أيوه متجوز ثلاثة وعلى ذمته وأنا حاكون الرابعه
حسن (يوجه كلامه لأخته ): أنت موافقه على الكلام ده يانعمه ..إذا كنتى موافقه يبقى مخك ضرب أنت كمان زيها
نعمة : أنا أعمل أيه غلبت معاها و مفيش فايده
حسن : أنتى موافقه تتجوزى الراجل المزواج ده
عزه : أيوه موافقه..الرسول والصحابه تزوجوا مثنى وثلاث ورباع..ولكم فى رسول الله أسوة حسنه
حسن : مش وقت مناقشات قولى أعمل معاه أيه
عزه : ما تقولش ولا تعيد ياخالى وكمان شويه حارفع النقاب وأقلع الجوانتى وأدخل أتكلم معاه..بدل ماتبوظ لى الجوازة ..أنا عارفاك
حسن : جوازة الشوم ..أنتى بتسمى دى جوازه..ده جنان رسمى..لو كنت أعرف ما كنتش جيت من أساسه
-3-
حوار الشيخ مع الصبيه
حسن : أهلا وسهلا منورنا ياحاج محمود..أنت عرفت عزه أزاى
محمود : عن طريق الأخت أم حسين رئيسة لجنة زواج الأخوة بمسجد الصابرين والحقيقة أنا لم أرى الأخت عزة
حتى الأن وأناجاى على الوصف لأخلاقها وتدينها وعائلتها الطيبه
( تدخل عزه وهى تحمل صنيه عليها كبايات عصير المانجو وقد خلعت نقابها والجوانتى وهى ترتدى العباية السوداء..وتضع الصنية بعد أن تلقى السلام وتجلس على أقرب كرسى فوتيه وهى تنظر إلى الأرض
محمود( وقد سال لعابه وهوينظر أليها نظرة تاجر المواشى)
- سبحان الله فيما خلق..يا أرض أحرسى ماعليكى
- أستبينا يا أستاذ حسن ..على خيرة الله
حسن : برضه نسأل صاحبة الشأن رأيها أيه
عزة : مش حأقدر أقول رأيى قبل ما أصلى صلاة الأستخارة
محمود: صلى يا أخت و أنشاء الله خير
( تخرج عزة وتترك محمود وخالها )
محمود: يا أستاذ حسن أنا جاهز من كله فلها شقه مخصوص بفرشها فى عمارتى الخاصة مع باقى زوجاتى وسأدفع لها مهر 25000 مقدم ومثلهم مؤخر ولن أكلفكم بأى ألتزمات أنا عايزها بالهدمه أللى عليها وردوا عليا بالموافقة أو الرفض فى خلال يومان
حسن : حيلك يا حاج محمود أنت راجل مقتدر وهذا المهر والمؤخر لا يناسب عروستنا مع العلم بأنها بنت بنوت لم يسبق لها الزواج
محمود : ومن قال لك بأنى أتزوج المطلقات أو الأرامل
فكل زيجاتى لبنات لم يسبق لهن الزواج ..وعلى كلن لن نختلف فنجعل مهرها 30 و 30 مؤخر علشا ن خاطرك
وخاطر عروستنا وهذا لم يحدث من قبل فى زيجاتى السابقة
حسن: بالمناسبه كم بنت تزوجتها حتى الأن ؟
(محمود يسكت ولم يرد)
حسن يعيد عليه السؤال مرة ثانية
محمود : جئنا للأسئله أللى ملهاش لازمه ..وهذالا يهم فى شيئ طالما وافق كلا الطرفين
حسن : أنا بسأل لأطمأن على بنت أختى ياحاج
محمود : أطمأن فكل شيئ يضمن مستقبلها
حسن : كم عندك من أولاد يا عم الحاج ؟
محمود : الحمد والشكر لله أنعم عليى ب17 ولد وبنت
حسن : كم تبلغ ثروتك ياحاج ؟
محمود ينتفض واقفا ..هذا كثير ..عندى مايكفى ويسترنى أنا وزوجاتى وأولادى وهو سر بينى وبين ربى ولم يسألنى أحد مثل هذه الأسئله من قبل ..أنا أستأذن وأريد أن أعرف الرد بعد صلاة الأستخارة للأخت عزة عن طريق الأخت أم حسين كما أتفقنا ..سلام عليكم
-وعليكم السلام
-4-
ام حسين أون لين
عزه: خذ ياخالى التليفون أم حسين عايزة تكلمك
حسن : مين أم حسين دى ؟؟
عزه: الأخت أللى ماسكة لجنة الزواج للأخوة أللى عن طريقها الحاج محمود العريس
حسن: آهه..آلو وعليكم السلام ورحمة الله وبركاته أهلا ياحاجه ..خير أنشاء الله
أم حسين : أيه أللى مش عاجبك ياأستاذ حسن فى الحاج
هوعلشان كبير شويه ..ماشاء الله ولا حول ولاقوة ألا بالله
الراجل فيه صحة أحسن من عشرين شاب..ولا علشان متجوز ثلاثة وهى الرابعه ..الدين يسمح له بكده طالما سيعدل مابينهم وكل واحده فى سكن منفصل لوحدها
حسن : مش هو ده موضوع الأعتراض ..الراجل ده مش بيجوز للجواز ده بيستمتع بولاد الناس لفترة ويرميهم يعنى جواز مفيش فيه أستقرار وبياخد الدين ستار لأفعله
ياحاجه أنت تقبلى أن بنتك تتجوز راجل بالشكل ده
أم حسين : ياريت بنتى كانت كبيره شويه كنت جوزتهاله
ده باب السعد أتفتح لها ولو لاقدر الله طلقها ماتشلش هم ليها ألف عريس عندى بعد العده
حسن :يأم حسين أنت تقبلى أن جوزك يتزوج عليكى واحدة وأتنين وثلاثة
أم حسين : أقبل هو أحنا حنحرم شرع ربنا وفيها أيه يعنى لما كل واحدة تسيب جوزها يتجوز وتسيبها من الأنانيه والطمع.. وتطبق شرع الله كده عمرنا مانقول أن فيه بنت بارت أوست أترملت
حسن : يعنى هو ده هدف الجمعيه ..أى واحد عايز يتجوز ييجى عندكم تجوزوه
أم حسين :أيوه وحياتك ما يعديش عليه أسبوع ألا وتكون مراته فى بيته..وعندنا الأخوات مشاء الله يرضوا بأللى قسم لهم بيهم ربنا ولا مطالب لهم غير أن يكون العريس متدين وملتحى وملتزم بالكتاب والسنه
لامهر ولا شبكه ولا الكلام الفارغ أللى بيطلبوه بنات اليومين دول ويقبلن بالسكن مع الضرائر ومفيش مشاكل
حسن : يعنى الواحد يربى دقنه ويجيلك تجوزيه
أم حسين : وشرفك عندى لك بدل العروسه عشره
حسن : كتر خيرك ياستى..موضوع عزة ما أقدرش أفيدك فيه ألا لما تصلى الأستخارة وناخد رأى أخوها وعمها
أم حسين : هى الأخت عزه صغيره دى عدت ال 37 سنه
عايزها تقعد أيه أكثر من كده حرام عليكم ياناس البنيه صعبانه عليا ما تميلوش بختها
حسن: حيلك حيلك يا حاجه أحنا جبنلها بدل العريس عشرة وهى بترفض
أم حسين : بس مش حييجوا فى غنى الحاج محمود
حسن : بلا محمود بلا مقرود أسمع ياست أنتى مالكيش دعوة ببنت أختى وألا والله أبلغ عنك
(أم حسين تنقلب إلى أسد جسور ويكيل السباب والعوات على رأس حسن فما كان منه ألا أن أغلق السكه طرررخ)

الحكم الديوانيه للوظائف الأميرية

الحكم الديوانية
سألنى شاب ربنا أكرمه بوظيفه حكوميه فى الأداره المحليه برئاسة أحد أحياء القاهرة الكبرى..كيف يصبح موظف محترم لايقع فى مشاكل قد تقوده إلى أرميدان
وبما أنى خبير فى هذا الشأن فكانت نصائحى له فى شكل حكم ديوانيه متوارثه من أيام جدنا الأعظم الكاتب المصرى
نام وأتغطى بالبطانيه.. فستحصل على الأقدميه
خليك فى حالك.. يروق بالك
أكل ريسك الحلاوة.. علشان يفتكرك فى العلاوة
أجعل أمضتك عزيزه.. لحد ماتشوف البريزه
درج مكتبك ماتقفلوش.. ده رزق ما تضيعوش
لاتقبل هدايا عينية ..مفيش أحسن من النقديه
خلى القانون سترك وغطاك.. للى يحب يعصلج معاك
أرسم التكشيرة على محياك.. علشان الكل يخشاك
لا تبع نفسك رخيص* لتتكعبل وتروح فطيس..يعنى مش بسيجارة وكباية شاى أوحتى خمساية كبيره وشوب عصير
لا تثق فى صنف الحريم من موظفات ومدنيين
لو مره الكل عادوك ارقع زنبه ولو فى أبوك
خلى لسانك عسل مع رؤسائك وجزمه قديمه مع مرؤوسيك
ولو أخذت بكل هذه النصائح فأمامك طريقين لا ثالث لهم
الأول مفروش بالورود لتصبح من رواد البنوك
والثانى مبدور مسامير وتشرف فى أزبل الزنازين
وعجبى

زيزو يقدم أستجواب

نجح زيزو زكريا فى أنتخابات قهوة كتكوت ليكون عضوا بمجلس الشعب عن دائرة رطلين مخ
وفى أول أنعقاد للمجلس قام بتقديم عدة أستجوابات ناريه للحكومه تعالوا نشوف زيزو عمل أيه فى المجلس والمجلس عمل فيه أيه..شارك معنا فى أعداد هذه الأستجوابات زملائى
أصحاب الأمخاخ ذات الأوزان التى تزيدعن رطلين فأكثر
فتحت الجلسه
رئيس المجلس : بسم الله الرحمن الرحيم فتحت الجلسة
نرحب أولا بالعضو الجديد زيزو زكريا الممثل لدائرة رطلين مخ الذىقام بتقديم عدة أستجوابات للحكومه..ممثل الحكومه موجود
الوكيل : ماجاش النهارده ياريس
الرئيس: يؤجل الأستجواب ويخطر ممثل الحكومه بالحضور
ننتقل لجدول الأعمال
زيزو : ياريس ده عاشر تأجيل
الرئيس: حنعملك أيه ياسى زيزو ماأنت داخلى المجلس سخن قوى ..خلاص ياسيدى هانت كلها يومين والحكومه كلها حتكون فى المجلس لمناقشة ميزانية الدولة..أبقى أعرض أستجوابك
زيزو : أنا أعترض
الرئيس: من أولها بتعترض..أحنا لسه قولنا حاجه علشان تعترض..ولآ أنت عايز تعترض وخلاص
زيزو: أنا باعترض على عدم حضور ممثل الحكومه وأريد أن أسجل أعتراضى فى المضبطه
الرئيس: سجل له أعتراضه ياسيدى أما نشوف أخرتها أيه
بعد الأنتقال لجدول الأعمال وتسجيل ملاحظات الأعضاء
بالموافقه..رفعت الجلسه

الجلسة رقم (2)
الرئيس:فتحت الجلسة نبدأ اليوم بنظر الأستجواب الأول من العضو المحترم زيزو زكريا..أتفضل يا سيدى قول أستجوابك
زيزو : أستجوابى اليوم عن موضوع العبارة السلام أللى غرقت وعليها أكثر من ألفين مصرى وهروب المتهم الأول ممدوح أسماعيل إلى أنجلترا ..السؤال كيف هرب هذا الرجل
والحكومه تعلم أنه المسؤل الأول ..كيف خرج من البلاد عبر مطار القاهرة..ولماذا لم يتم تبليغ الأنتربول حتى الأن للقبض عليه..السؤال الثانى فى نفس الموضوع لماذا لم يتم محاسبة المسؤلين فى مركز البحث والأنقاذ الذين لم يتلقوا أشارة الأستغاثة وظلوا نائمين ولم تخرج دوريات البحث إلا بعد 9ساعات من الأستغاثة ..كفايه كده النهاردة !!
الرئيس : ممثل الحكومة
ممثل الحكومة : سيتم عرض الأستجواب على الجهات المختصة وسنوافى المجلس بالأجابة على الأستجواب فى غضون أيام
الرئيس : ننتقل إلى جدول الأعمال..موافقة ..رفعت الجلسة

الجلسة رقم (3)
الرئيس : فتحت الجلسة نبدأ اليوم بنظر الأستجواب الثانى من العضو المحترم زيزو زكريا..أتفضل يا سيدى قول أستجوابك
زيزو: أستجوابى اليوم عن قضية القمح وأزمة رغيف العيش لماذا لم يتم أستكمال الأحتياطى الأستراتيجى من القمح قبل نفاذه من ستة أشهر لتحقيق الأمن الغذائى للأنسان المصرى أنا أشير بأصبع الأتهام إلى الحكومه فهى السبب الرئيسى وراء هذه الأزمه نتيجة ضعف أدائها وعدم وجود بعد نظرلأبعاد المشكله مما أدى إلى تهديد السلام الأجتماعى
أين القمح المصرى أين أنتاج الأراضى الجديدة أين أنتاج أراضى مشروع توشكا الذى صرفنا عليه المليارات من دم هذا الشعب البائس وأنى من موقعى هذا أطالب بأقالة كل من وزير الزراعة ووزير التموين..كفايه كده النهارده
الرئيس : ممثل الحكومه أ تفضل رد على أتهامات العضو
ممثل الحكومة : سيتم أعداد الرد والبيانات اللازمة فى غضون أيام
الرئيس : ننتقل إلى جدول الأعمال..موافقة ..رفعت الجلسة

الجلسة رقم (4)
الرئيس : فتحت الجلسة نبدأ اليوم بنظر الأستجواب الثالث من العضو المحترم زيزو زكريا..أتفضل يا سيدى قول أستجوابك
زيزو:سيدى الرئيس أستجوابى اليوم عن تمديد العمل بقانون الطوارئ..نحن الدولة الوحيدة التى حكمت بقانون أستثنائ لمدة 27 عاما وسنكمل بالتمديد إلى ماشاءالله
الرئيس : خش فى الموضوع يازيزو وما تخبطش أمامك أقل من نصف دقيقه
زيزو : أعطينى وقتى ياريس
الرئيس : ماعدش فيه وقت القانون أتعرض ووافقت عليه الأغلبيه عايز تقول أيه
زيزو : عايز أقول لماذا لم يتم أستخدام هذا القانون فى أعتقال ممدوح أسماعيل ولصوص أراضى الدوله وقروض البنوك أين هذا القانون للمتاجرين بأقوات الشعب ومحتكرى السلع الأساسية( كفايه كده يازيزو النهارده .ممثل الحكومه)
ممثل الحكومة : سيتم أعداد الرد والبيانات اللازمة فى غضون أيام.
الرئيس : ننتقل إلى جدول الأعمال..موافقة ..رفعت الجلسة.
الجلسه رقم (5)
الرئيس : فتحت الجلسه..أيه ده ..أيه أللى أنت عامله ده يازيزو..شيلوا الكرسى أللى قاعدعليه العضو المحترم من الكوردور وطلعوه بره وأقعد حضرتك مع المعارضه
زيزو : آسف ياريس أنا مش مع المعارضه ولا مع الأغلبيه
أنا بأمثل الرأى الشعبى
الرئيس : قوم يازيزو وألا سأضطر بتطبيق لائحة الأنضباط
وأطردك خارج القاعة
زيزو: أنا مش قايم ياريس ألا لما ممثل الحكومه ييجى ويرد
على الثلاثين أستجواب أللى مقدمهم ومافيش رد عليهم
الرئيس قوم يازيزو أحسنلك
زيزو : أنا معتصم فى مكانى ومش حتحرك ألا لما يتم الرد على أستجواباتى
الرئيس : شلوه بره
( يتم رفع زيزو بالكرسى على الأعناق بواسطة بعض أعضاء الغالبيه والمعارضة ويغلق باب القاعة ليجلس يجوار الفراشين)
يحس بيد تربت على كتفه ..مساء الخير يا أستاذ زيزو..أقدم لك نفسى..على عوض الله مندوب محطة التوهان الفضائية
تسمح حضرتك أنى أعزمك على واحد ليمون متلج تروق بيه دمك ونكلم
زيزو : هو أنتم بتوع محطة التوهان الفضائيه أهلا ..أهى كملت مش كفايه التوهان أللى معيشنا فيه ليل ونهار
عوض الله: أهدى بس يأستاذ زيزو ده أنا بقالى شهر بادور عليك علشان ناخد منك حديث للمحطه
زيزو :( بعد أن يهدأ ويشرب الليمون ) ينفع تاخد الحديث هنا
عوض الله : لا طبعا ماينفعش حضرتك حنستضيفك عندنا فى المحطة لمدة ساعه تتكلم فيها براحتك فى برنامجنا الجماهيرى ..الأردغانه اليوم
زيزو : عارفه البرنامج ده ..مش هو أللى بيقدمه الأستاذ مصطفى فكرى زعيم المعارضة
عوض الله : بالظبط
زيزو : حتدفعوا كام ؟
عوضالله : أعلى سعر وأنشاء الله مش حا نختلف
زيزو : على خبرة الله. بينا ..ماتنساش تحاسب على الليمون

الجلسه رقم (6)
الرئيس : فتحت الجلسة السيد العضو المحترم زيزو زكريا
يتفضل .. أصح يازيزو ..حد يصحيه ياجماعة التليفزيون بيصور..القاعه بالكامل تنادى على زيزو ..وهو فى ثبات عميق..زيزو..زيزو..زيزو
الرئيس : OK ..Cancel ننتقل إلى جدول الأعمال
موافقــــة ...رفعت الجلســــــــــــة

لقاء السحاب /قنبلة الموسم

لقاء تليفزيونى مع فنانة لبنانية
المذيعة : سيداتي وسادتي ضيفة حلقتنا اليوم الفنانه صاحبه الصوت الدافئ الذى سحر الجماهير من الشيوخ والشباب والأطفال ..صاحبة الأغانى الهادفة التى حيرت ورائها النقاد
مطربة جميع الأزمنة والأوقات..مطربة اليوم وكل يوم التى حققت شرائطها أكبر معدل توزيع فى العالم الثالث والرابع والخامس..معنا اليوم الفنانه( توتى عجروهبى)
تصفيق حاد + فاصل أعلامى
الكاميرا تسلط على توتى وهى ترسل قبلات هوائيه لجمهور المشاهدين فى الأستديو والمنازل..وتستعرض الكاميرا ملابسها وأكسسوارتها الغريبه ووتسريحة شعرها بعد أن أخذت بوز للتصوير واضعة رجل على رجل وهى تبربش وتضغط بأسنانها البيضاء على شفتها السفلى فى مشهد مثير لكافة الغرائز
المذيعة: ونستضيف معها اليوم الناقد الفنى وأكبرمكتشف للنجوم ومؤلف الأغانى وصاحب أكبر شركة فيديو كاسيت الأستاذ زيزووو زكرياااااااا
تصفيق حاد + فاصل أعلامى
المذيعة: لو سمحتى يا مدام توتى تحكى لجمهور المشاهدين مشوارك الفنى أللى وصلك لهذه النجومية
توتى : آنسه لو سمحتى ..يرجع الفضل فى أللى أنا فيه لمكتشفى وأبى الروحى الأستاذ الكبير زيزو ..فأنا كنت بأغنى فى فرح بنت أختى فى بعلبك شافنى الأستاذ وأعجب بصوتى وشكلى فأتفق مع خيى على أن أحضر إلى القاهرة ليعمل لى تست ..الحقيقة كانت فرصة لأخراج كل مواهبى
المدفونه لأبدأ مشوارى الطويل وأترك حبيب قلبى زيزو يشرح لكم المجهود الكبير أللى عمله معايا
زيزو (تركز عليه الكاميرا وهو يعبث فى كرافتته الحمراء )
: فى الواقع توتى فنانه موهوبه عبارة عن كوكتيل من عدد كبير من الفنانين اللبنانين والمصريين المعروفين على الساحة الفنيه فهى تجمع فى شكلها بين نانسى عجرم وهيفاء وأليسا وحركات روبى ونيللى ونعيمه مختار وصوت شيرين وعفاف راضى وصباح..وهى عباره عن خليط جميل يجمع كل هذه المواهب
المذيعة : معانا أتصال على الهواء من فريال من الشرابيه
فريال : آلو أحب أكلم الفنانه توتى لوسمحتى ..معاكى توتى
أنا بحبك قوى ياتوتى وبحب صوتك وحركاتك..كلك كده حلوه
خاصة فى آخر كليب أللى بتغنى فيه( سخست... سخسخت ياحبيى أنا سخست) الله عليكى يا توتى وأنت مسخسخه
توتى :مرسيه حبيبة جلبى
المذيعه : شكرا يافريال ومعانا أتصال من أم عبده من المنوفيه..أتفضلى يا أم عبده معاكى توتى
أم عبده : ألو ..ألو أزيك ياتوتى أنا بتفائل بيكى قوى يوم بتيجى أغانيكى فى التليفزيون بأبيع كل الفجل والجرجير أللى فى المشنه..ربنا يخليكى لشبابك ودايما كده تسعدى الغلابه
توتى : مرسيه خالص خالص يأم عبده..تحبى تسمعى حاجه معينه
أم عبده : أيوه ياحبيبتى أغنية القطر أللى بتقول فيها ( أتهز ياقطر أتهز) جميله قوى وأنت بتقلدى القطر وهو بيتهز
المذيعة: فاصل ونواصل
-2-
وراء الكواليس
زيزو يجتمع مع كاست التصوير والأخراج
زيزو للمذيعه : مش عايزين الأسئله المحرجه ألتزمى بالأسئلة أللى عندك فى الورقه
وأنت يا مبدع الأخراج بلاش الكلوزات على وجه توتى علشان عملية التجميل ماتبنش
أنا شايف أن فيه ناس غريبه فى الأستديو غير الشباب أللى متفقين معاهم
مساعد المخرج : الناس بتوعك نصهم لم يحضر فأضطررنا ندخل ناس تانيه كانوا جايين للأستاذ عمرو خالد وأعتذر.. نعمل أيه العدد كان قليل قوى
زيزو : يا نهار أسود ..ربنا يستر ..يعنى مفيش غيرهم بنات محجبات وشباب بذقون
المساعد : لأ مفيش..ماتخفش يا أستاذ زيزو حنتصرف
زيزو : خلاص ياجماعة حنصور وماتنسوش تيجو الحفله الليله دى ..كله حنشوفه والكل حنبسطــه
-3-
المذيعة : آنسه توتى أيه آخر أعمالك الفنيه أحنا سمعنا أنك بتجهزى لألبوم جديد ممكن نعرف جمهورك على أهم الأغانى أللى فيه؟
توتى :( تضع يدها على وجهها لتبدى أندهاشها)
ياى أنت عرفت أزاى ..ده مفاجأة الصيف أللى بأجهزها ولم يتم الأنتهاء منها..على كل حال أنا حخلى برنامجمكم له السبق فى معرفة محتويات الألبوم
الألبوم فيه سبعة أغنيات نصهم من تأليف الأستاذ زيزو
الأغنيه الأولى :( أنا شوفت الويل تحت الكوبرى)
هادى من تأليف الأستاذ
المذيعه : لكن ليكى أغنيه أسمها أنا شوفت الويل فوق الكوبرى السنه أللى فاتت
زيزو : الحقيقة هى أمتداد للأغنيه السابقه لكن برؤية
مختلفة ..وتفرق كتير عن فوق الكوبرى عن تحت الكوبرى لما تشوفيها حتعرفى
المذيعه أيه الحكمه من عملية الأمتداد لنفس الأغنية
زيزو : الأغنية السابقة لما نزلت علمت قوى مع الناس والكل كان بيغنيها فوق كوبرى 6 أكتوبر
وبناء على طلب الجمهور وأدارة المرور أضطرينا أن نعمل هذا الأمتداد للناس أللى بتزوغ من فوق الكوبرى..وبعدين مافيهاش حاجه لم نعمل جزء تانى للأغنيه ماهو عندك ليالى الحلمية أتعملت سبع أجزاء وما حدش أكلم
تصفيق حاد ( طبعا تصفيق مسجل )
-4-
المذيعة : ومعانا إتصال من أبو حيدر من لبنان..آلو
أبوحيدر: آلو بدى أحكى مع الأستاذ/زيزو..معاك
أستاذ زيزو: الست أللى معك وبتقول أنها
توتى تبقى مرتى وجايب منها أربع عيال أكبرهم شحط واقف على عربة شوارمه فى الروشه
زيزو : آلو..آلو يظهر أن الخط أتقطع..هؤلاء هم أعداء النجاح بعد ما أكتسحت توتى كل المنافسين فى بلدها مازالوا يطاردوها بالأشاعات..نعمل أيه هذه هى ضريبة النجاح ..تصفيق حاد
المذيعه: ممكن توتى تغنى مقطع من أغنيتها (سخسخت أنا سخسخت ياحبيبى أنا سخسخت )
توتى: فى الواقع أنا مش عامله حسابى ياجماعه
المذيعة : علشان خاطرى وخاطر جماهيرك فى الأستديو والملايين أمام الشاشة الصغيرة
( يميل زيزو على أذن توتى ويهمس لها : ماتخفيش حنشغل الكاسيت وحنفقل الصوت ..حركى شفتاكى مع الكلمات زى ما علمتك وماتفتحيش بقك قوى لأحسن لحام العمليات يفك..وأتحركى بحساب من غير تنطيط أحسن السليكون أللى فى صدرك وظهرك ينزل فى رجليكى..أتكلى
تتمايل توتى مع كلمات الأغنيه وتتقصع وتقدم مختلف فنون الأثاره..وزيزو يضع أيده على قلبه خشية أن تنسى نفسها و تتنطط ..شاميه ومجنونه وتعملها
وتمر هذه الفقرة على خير مع صفافير الأولاد وصريخ البنات
-5-
المخرج : أستوب مين الناس أللى دخلت الأستوديو بدون أذن
الضابط : الرائد صلاح من وحدة تنفيذ الأحكام جايين نقبض على الأتنين المحتالين دول ( سعيد فبريكه منتحل شخصية زيزو زكريا وفوزيه صاغ سليم الشهيرة بتوتى)
سعيد فبريكه : طيب ممكن ياباشا نكمل الحلقة
الضابط : قوم يامتهم أنت وهى.. حط فى أيديهم الحديد ياعسكرى
توتى : الله يخرب بيتك يافبريكه ضيعت مستقبلى الفنى
فبريكه: أنا عايز المحامى بتاعى ..أنا عارف مين أللى بلغ عنى ..هو مفيش غيره زيزو زكريا علشان يخلص المشهد
النهايه

فتحية المفتريه

فتحيه المفتريه
وكيل النيابه: سيبها ياعسكرى وأتفضل بره
أسمك وسنك وعنوانك ؟
فتحيه : أسمى فتحيه أبو سريع العسكرى ..عندى تقول كده خمسه وثلاثين سبعه وثلاثين سنه ..ساكنه فى (3) حارة البرجاوى فى
باب الشعريه
وكيل النيابه : أنت متهمه بالتعدى بالضرب على كل من المخبر السرى محفوظ الضبع وزوجته شربات النمر الشهيره( بشربات أوعى وشك) وأحدثت بهما الأصابت الوارده بالتقرير الطبى المرفق
وأحداث عاهه مستديمه فى أذن محفوظ الضبع أثر عضة أدت إلى قطع صرصور أذنه اليسرى فما هو قولك ؟
فتحيه : ما حصلش وعندى من الشهود عشرة يشهدوا أن هو أللى أتعدى عليا بالضرب والأهانه أمام فرن العيش ..ليه وليه أقول له أقف فى دورك لأن أحنا واقفين من بعد صلاة الفجر ..شتمنى يابيه
شتيمه ما أقدرش أقولها أسم الله على مقامك
قلت له عيب ياحضرة الصول محفوظ مايصحش ولا أنت بتتحامى فى لبس البوليس ده البلد فيها قانون ..نزل فيه شتيمه وضربنى وقطع هدومى أمام الخلق والناس تحوش فيه مفيش فايده وأنا أصوت أتلمت رجالة وشبان الحته علشان يعرفوا يخلصونى منه
مفيش فايده فنزلوا فيه ضرب علشان يسبنى
وكيل النيابه : تعرفى مين أللى ضربه يافتحيه
فتحيه : ما عرفش يابيه أنا من كتر الضرب وقعت فى الأرض وأغمى عليا وما شفتش حاجه
وكيل النيابه : الأصابات الموجوده فى شربات من السبب فيها ؟
فتحيه : أنا ماشفتش شربات فى الخناقه تلقيها يابيه جوزها هو أللى عمل فيها كده علشان تتبلى عليا ما هو واخد على شغل الأقسام والمحاضر ..أحمونا منه يابيه ده راجل مفترى
وكيل النيابه : عايزه أصدق أن كل الأصابات والعض والجروح الموجوده بجسم شربات أن محفوظ هو أللى عملها علشان يوديكى فى داهيه
فتحيه : صدق يابيه أنت ماتعرفش نسوان المخبرين قد أيه جتتهم منحسه وواخدين على ضرب القايش والكرباج السودانى أللى فيها ده يعتبر منجهه قصد أى علقة تأخذها من محفوظ الضبع
وكيل النيابه : طيب أركنى أنت على جنب ونادى على محفوظ الضبع
**********
وكيل النيابه : أيه أللى حصل يا محفوظ ؟
محفوظ : أنا كنت رايح أجيب عيش من الفرن وكنت واقف فى الطابور..لقيت فتحيه عماله تزاحم فى طابور الستات وعايزه تدخل قدام ..قولت لها عيب ياست فتحيه أرجعى وراه وأقفى فى دورك ..سابت الطابور ومسكت فى خناقى وهاتك يا شتيمه وضرب ..الست دى معروفه فى الحته أنها مجرمه وشلق يابيه..سمعت مراتى صوت الخنا قه حاكم أنا ساكن جنب الفرن نزلت تحوش عنى شبشب فتحيه نزلت فيها ضرب هى كمان ,اديك شايف سيادتك أللى عملته فى ودنى ..أكلت ودنى المتوحشه بأسنانها
وكيل النيابه : جاء بشهادة صاحب الفرن وشهود آخرين بأنك دائم التردد على الفرن أنت وعيالك ومراتك وبتأخد ما يقرب من 200 جنيه عيش يوميا ..فما هو قولك ؟
محفوظ ( وهو متردد ومتلعثم فى الرد ) : ممكن سيادتك كلمه على أنفراد
وكيل النيابه: ( وهو يصرخ فيه) أتكلم ياراجل أنت وألا سأحبسك
محفوظ :( بصوت منخفض لايسمع من عباراته شئ )
وكيل النيابه ( يصرخ فيه مرة أخرى ) : عليى صوتك مش سامع
محفوظ : ياعنى أأقول !!
وكيل النيابه : قول وماتخفش ..قول وخلصنا
محفوظ : أأقول وأمرى لله ..أنا مكلف من سيادة البيه المأمور أنى أجيب العيش لسيادته وللساده الضباط والأمناء كل يوم وصاحب الفرن عارف الكلام ده وعنده تعليمات بكده أنه يجهز كل يوم بـ 150 جنيه عيش للقسم وأنا بروح أستلمه وأوزعه على المكاتب
وكيل النيابه : كلكلم أطلعوا بره ..يضغط على زر الجرس ليدخل عسكرى المكتب
يسأله بعصبيه : شنطة العيش أللى بتجبهالى كل يوم ..بتجبها منين
العسكرى : باجبها من القسم من عند الصول محفوظ !!
وكيل النيابه :( يملى الأتى على الكاتب)
أكتب .. أغلق المحضر فى ساعته وتاريخه وتحول القضيه للعرض على السيد رئيس النيابه ومرفق تقرير عن أسباب التنحى عن نظر القضيه
مع قبول وافر التحية
التوقيع (00000000)

أصوات للبيع
سحر وخالد زميلان فى كلية الخدمة الأجتماعية جمع بينهم الحب طوال فترة الدراسة وأتفقا على الزواج بعد التخرج والحصول على عمل مناسب
وتعاهدا على ذلك وهم يعلمان تمام العلم بأن فرصة العمل التى تناسب مؤهلهما منعدمة بالمرة فى ظل أزمة البطالة ..وباركت أسرتهما فكرةالزواج وقرؤا الفاتحة على ذلك
تخرجا منذ ثلاث سنوات لطشت معهم الحياة للحصول على أى وظيفه فلم يجدا غير غول القطاع الخاص بكل مساوئه فى أنتظارهما
فعملت سحر سكرتيره لبعض الوقت فى مكاتب المحامين والمقاولين ومندوبة للمبيعات فى شركة أدوات منزليه ثم فى جريده حزبيه لتسويق الأعلانات وأخيرا رسى بها المطاف لتعمل سكرتيرة لسمسار شقق وعقارات
أما خالد لم يكن أحسن حظا منها فعمل مندوب مبيعات لشركة محلية لصناعة أدوات التجميل يقضى نهاره وجزء من الليل يحمل شنطة بها منتجات الشركة ويدور بها على محلات المكياج فى القاهرة والأقاليم القريبة
رأى الأهوال للبحث عن لقمة العيش وفى آخر الشهر لايقبض مرتبه ويقوم بجمعه من متحصلات البيع
وأخيرا رسى به المطاف فى شركة يقال أنها سياحية تقوم بالتسويق للتايم شير 90% من أعمالها نصب وأحتيال
لم يجدا غير يوم واحد فى الأسبوع ليتقابلا يشكيان لبعضهما البعض ماصادفهما من مواقف ومشاكل خلال الأسبوع نسيا كلمات الحب والغرام التى كانا يتبادلنها وقت الدراسة ودخلا دوامة الحياة
كلاهما فى أشد الحاجة للعمل فسحر البنت الكبرى لأب يعمل فراش
فى أحدى المصالح الحكوميه ولها من الأخوة والأخوات خمسة غيرها وهى تعمل جاهدة للحصول على أى وظيفة لتساعد بها والدها المكافح ولتجهزنفسها لمشروع الزواج
أما خالد فهو رجل لابد أن يعمل ليحقق هدفه للزواج من حبيبته سحر
وهو من عائلة فقيره تصارع الحاجة والعوز والفقر
يعنى الحال من بعضه
يتبع/ حديث الشجون


-2-
حديث الشجون

خالد : وحشانى قوى ياسحر .. أنا بأعد الأيام علشان أشوفك
سحر : وانت كمان واحشنى ياخالد .. عامل أيه فى شركة السياحة
خالد : قصدك فى شركة الصياعة ..أهو كل يوم يحدفونا فى حته شكل مرة فى نادى ومره فى فندق ومره فى المطار ومره فى الملاهى وساعات كتير فى شوارع مصر الجديده والمهندسين والهرم ومدينة نصر
سحر : وبتعملوا أيه فى الشارع
خالد : شوفى ياستى بنتقسم ثلاثات واحد للأنتقاء وواحد للحديث وثالث سنيد
بمعنى أن واحد يقوم باللف فى الشارع لأختيار الزبائن المريشين والذين يبدون من نوعية الملابس والعربات التى يركبونها وغالبا مايكون الزبائن رجل وزوجته ..ثم يقوم بأعطائنا الأشارة للدخول على الزبون ويكون الحديث كالأتى
مساء الخير ..فلان الفلانى من شركة كذا السياحية ..الشركة عامله سحب على التذاكر المجانيه لرحلتى الحج والعمرة أوالأقامة الكاملة فىأحدمنتجعاتنا فى شرم الشيخ أوالغردقة أوالساحل الشمالى
وسنسألكم ثلاثة أسألة لو أجبتم عليها ستكون من نصيبكم هذه التذاكر السؤال الأول : كم عدد الأديان السماويه002أو1 ..أو 3
السؤال الثانى : كم عدد مرات الطواف حول الكعبة المشرفة 4 أو 10 أو 7
السؤال الثالث : من الذى قام بفتح مصر عمرو خالد أوعمرو بن العاص أوعمرو زكى
برافو سيادتك معلوماتك هايله أنت كدة كسبت معانا وهديتك هى تليفزيون 20 بوصة أوكمبيوتر أوغسالة فول أوتوماتيك
وسيادتك مدعو لحفلة تسليم الجوايز أنت والمدام فى نادى الـ... ..الساعة السابعة مساء
لوسمحت أملء بيانات الأستمارة وأدفع مبلغ ثلاثون جنيها سترد لك يوم الحضور بموجب كعب الأستمارة وذلك لجدية الحضور وعمل حسابك فى حفل التكريم
بعد كده أنا ماليش دعوه بنظام الحفلة فهذا من أختصاص موظفين آخرين على مستوى عالى من التدريب00قصدى النصب
المهم أن 50% من دخل بيع الأستمارات يوزع على ثلاثتنا والخمسين الأخرى للشركة والمرتب 150جنيه فى الشهر يمكن أن يصل إلى 700أو 900 وأنت وشطارتك فى بيع الأستمارات
المهم أننا لا ننزل ألا مره واحدة فى المنطقة الواحدة كل أربعة
شهور ونستمر نعمل بها حتى ميعاد الحفلة الذى يكون بعد عشرة أيام من تاريخ تحرير الأستمارة
سحر( تضرب صدرها بيدها ) وتقول: يانهار أسود يا خالد ده نصب
خالد يضحك بمرارة ويقول : ماهو أنا عارف أن كله نصب فى نصب أهو حاجه مؤقته لحد ما لاقى شغلانه ثانيه .
قول لى أنت عامله أيه فى شركة الأستثمار العقارى
سحر تتنهد فى أسى
أهو الحال من بعضه
-3-
يتبع / الحاج محروس بتاع كله





شوف ياسيدى أنا أبدأ العمل فى الساعة العاشرة صباحا وينتهى فى الساعة العاشرة مساء وساعة للغداء نقضيها فى أى محل كشرى أو فول وطعمية ..أبدأ بتصفح الجرايد اليومية على صفحة الأعلانات
وأقوم بتسجيل كافة أعلانات البيع والشراء للعقارات والشقق والأراضى وأقوم بتصنيفها على الكمبيوتر ثم أقوم بالأتصال بالمعلنين وأقوم بتسجيل طلباتهم وأرقام تليفوناتهم دون أن يعرفوا بأننا مكتب عقارات
فى الساعة الثانية عشرة يصل الحاج محروس وبعد أن يشرب الشيشة والقهوة يجلس أمامى على الكنبة ممدا كرشه للأمام ليستمع منى عن آخر أخبار الأعلانات وآخر التطورات ..وهو يصدر أوامره لصبيانه ومساعديه
بالمناسبة الحاج راجل أمى كان فى الأصل مكوجى..ومازال محل المكوجى يقف فيه أحد أبنائه وهو مصدر من مصادر المعلومات الهامة
ثم يدخل الحاج إلى مكتبه الشيك الذى يفتح على مكتبى ويمنع منعا باتا دخول أى مخلوق ألا بعد العرض عليه عدا سائق عربته المرسيدس (الخنزية ) وأنا فالدخول بدون أذن
يتولى أبن الحاج الأكبر أمور المناديب والبوابين ومقابلة الزباين
عالم غريب كله أونطه فى أونطه ولبس طاقية ده لده.. وفلوس بالهبل .. وكل شيئ موجود لمختلف الزباين مفيش حاجة عندنا أسمها مفيش.. شقق مفروشه لمدة ليله ماشى.. قانون جديد ماشى.. تنازل ماشى.. أراضى للبناء00 مدن جديده.. منتجعات و مصايف.. سيارات.. أجهزه..ألخ
المهم أى حاجه بتتباع وتشترى وعبارتنا الشهيرة هى طلبك عندنا
ولولا المرتب المرتفع ..لقعدت فى البيت لأوفر على نفسى مشقة التعامل مع هذه النوعية من البشر وعدم سماع ألفاظهم السوقية وسباب الحاج وجليطته ولا يمنع أن تسمعه وهو يتفشخر أمام المعارف والزباين بأنه يعمل عنده خريجى جامعات وأنه يدفع لهم
مرتبات لايحلمون بها لوعملوا فى الحكومة مائة سنه ..ذل مابعده ذل

لحظات طويله من الصمت وكأن كل منهم يستعرض حاله ويلعن أيام الفقر والبهدله
خالد: كفايه ياسحر قومى أوصلك
يتبع / الفرصــــــــــة

-4-
الفرصـــــــــــــــــــــــة

سحر: ألو ..خالد ..قابلنى النهارده ضرورى فى المكان أياه عندى لك خبر بمليون جنيه
خالد : قولى ياسحر الله يخليكى أنا مش ناقص قلق وياحياة أبوكى
سحر : ماينفعش فى التليفون..قابلنى الساعة سابعة وحتعرف كل حاجة
خالد: أنت مش عندك شغل
سحر : سيبت الشغل أمبارح بعد خناقة كبيره مع أولاد الحاج وزوجاته..تضع سحر سماعة التليفون

الحزب الوطنى حل المشكلة
سحر : معاك قلم
خالد : نعم معايه قلم
سحر : خد الأستماره دى أملئها
خالد : أستمارات تانى بعد ربنا مارحمنا منها وقبضوا على صاحب الشركة ..على كلن هاتى ياستى
(يقرأ خالد الأستمارة وهو يفتح فمه فى تعجب )
خالد : أيه ده يابنتى جايبالى أستمارة عضويه فى الحزب الوطنى
أحنا لقيين ناكل لما حنشتغل فى السياسة..وتعالالى بسرعة وعملالك مفاجأه
ترسى فى الآخر على أستمارة عضوية..أنت باين عليكى مخك طق
سحر ( بجدية ) : أملء الأستمارة وبلاش لك..وأنا سأحكى لك على التفاصيل
سحر : أمبارح بعد ماسبت الشغل بعد الخناقة مع أبن الحاج محروس وزوجتيه ( تفيده وجمالات ) قال أيه أننى برسم على الحاج ليجوزنى وأنه عمره ماكان بيهتم بحد قبل كده
شدونى من على المكتب وطردونى بره فى غيبة الحاج عن الشركة ورموا لى ماهية الشهر..بينى وبينك أنا خفت منهم ليبهدلونى وأخدت القرشين وقلت يا فكيك وحمدت ربنا على الستر
المهم وأنا مروحه قابلت بنت صاحبتى أعرفها من أيام ثانوى خريجة آداب مش عارفه قسم أيه
الكلام بيجيب بعضه حكيت لها على مشكلتنا أنا وأنت فقامت قالت لى أيه رأيك فى أللى يعينك فى الحكومه أنت وخطيبك ..تقعدى على مكتب وتنجعصى وشغل فى البلاله لمدة ساعتين وتروحى الساعة واحده أو أتنين بالكتير وكمان تصرفى حوافز وعلاوات طبيعة العمل.. قلت لها أيدى على كتفك ..قامت أدتنى أستمارتين ليه وليك نملاهم ونسلمهم لمندوب الحزب فى العباسية ومعاهم أربع صور
شخصيه ..حيسلمنا جواب للقسم لأستخراج بطاقة أنتخابية فورية
خالد :فهمت كده الموضوع تجميع أصوات علشان الأنتخابات
سحر : أنا قلت زيك كده ..لكن صاحبتى حلفت ليه ستين يمين أن بمجرد تسليم البطاقة الأنتخابيه فى الحزب سيقومون بتسليمنا جوابات التعيين ..تعالى نجرب أحنا خسرانين حاجه أدينى أنا وأنت قاعدين مفيش ولا شغله ولامشغله يمكن يكون الكلام ده بجد
خالد : ماشى ياسحر على رأيك قالوا ضربوا الأعور على عينه؟؟؟

-5-
أحنا ولاد الحزب
خالد : ايه الزحمه دى كلها على مقر الحزب يظهر أن الموضوع بجد
سحر: من بقك لباب السما
خالد : تعالى نزاحم لنوصل لشباك التقديم ..معاكى البطاقة الأنتخابية والأستمارة
سحر : معايا كل حاجة ..خالد: توكلنا على الله
( وبعدساعتين من الأقتتال على شبايك التقديم وأستلام جوابات التعيين )
سحر : هيه يا خالد أخدت جوابك على فين ؟؟
خالد : على الهيئة العامة للصرف الصحى ..وأنت على فين ؟؟
سحر: بصره يا جميل أنا معاك ..ورينى جوابك كده
خالد : أهو مثل جوابك
إلى السيد مدير شئون العاملين /قادم لكم السيد .. لأستلام الوظيفة المعلن عنها بالجريدة الرسمية وطبقا للقرار الوزارى رقم .. بتاريخ وظائف مؤقته ..بمكافئة شاملة أعتبارا من اليوم../../
التوقيع (00000) أمين عام الحزب
خالد وسحر يطيران من الفرح وهما لايصدقان ما يحدث
خالد : أنا مش مصدق نفسى..أقرصينى ياسحر يمكن أكون بأحلم
سحر : نبهوا علينا بالحضور كل جمعة أجتماع لجان الحزب ..فيه ناس بتقول ..أن الأمين العام بيوزع شقق على المتزوجين حديثا والنشطاء من الأعضاء الجدد وبونات مجانية لشراء ملابس
خالد : شقق كمان وملابس ..تبقى ظاطت
يغنيان سويا ( شبكنا الحكومة ..تن ..تن ..وبقينا قرايب ..تن..تن)
-6-

يتبع /الأنتخابات والمظاهرات المضاده
يستلم خالد وسحر عملهما فى الهيئة هو فى قسم الصادر والوارد وهى فى قسم المقاولات والمشروعات
خالد يسأل رئيسه عن أسلوب التدوين فى الدفاتر ودورة العمل
أبتسم رئيسه وقال : أنت مستعجل ليه كل حاجه حتعرفها فى وقتها المهم أنك تعرف أسلوب التعامل مع رؤسائك
فالمدير دفعة أنتخابات 86 والوكيل دفعة أنتخابات 92 والمراقب دفعة 98 ورئيس القسم دفعة 2004 وأنت بقى آخر دفعة أدعى ربنا أن تحصل أنتخابات قريبه لتترقى وأهم من ده كله أنك تنفذ اوامر الحزب بحزفيرها علشان تتثبت فى الوظيفه وتزيد علاواتك
يهزخالد رأسه بالأيجاب وأنه فاهم كل شيئ بثمنه
وفى أول أجتماع بمقر الحزب طلبوا منهم الأستعداد لخوض مظاهرة مضادة لأحزاب المعارضه ومكان التجمع بجوار جامع عمر مكرم بميدان التحريرالسعة الثامنة صباحا
لم يذهبا إلى المصلحة وتوجها إلى مكان التجمع أستلما كل واحد اليافطه التى تؤيد النظام والمبايعة بالروح والدم وقام الهتيفه (تخصص هتافات وطنيه ) بتشكيل مجموعات الهتاف وتلقينهم بكافة التفاصيل كان كل شيئ منظم بدقه ..أهو كده الشغل وألا فلا0
وأنطلقت المظاهرة وأشتعل الحماس وأصطدمت بمظاهرة المعارضة ويخرج من بين صفوفنا مجموعات غريبة الأشكال من فتوات على بلطجية لتفترس أعضاء المعارضة وقوات الأمن تحيط بهم من كل جانب لتمنع هروبهم قبل أن يأخذوا العلقة السخنه على أيدى فتوات الحزب
فى اليوم التالى وصل كشف الحوافز ليحصل كل واحد منا على 200 جنيه بالتمام والكمال
خالد : قبضتى الحافز يا سحر
سحر : أنا قبضته فى نفس اليوم ..أنت ما كنتش شايف المظاهره النسائية كانت مولعة أزاى
خالد : فعلا كان صوتكم مغطى علينا قوى ..( وأضاف وهو يأخذ يدها بين راحتيه ) عايزك تكلمى الوالد علشان عايز أقابله للأتفاق
على تفاصيل عقد القران ..علشان نقدم قسيمة الجواز لنحصل على شقه فى أسكان الشباب وأهى فرصة قبل ما الأنتخبات تبتدى .
قولتى أيه يا عروسه
سحر : أللى تشوفه يا حبيبى
خالد : تحبى تخلفى لنا أيه فى الأول ولد ولا بنت
سحر L تضحك فى دلال) أنا عايزه بنت
خالد : أنا لو ربنا رزقنى بولد رايح أسميه وطنى ..وأن كانت بنت حا سميها وطنيه
يضحكا سويا حتى أغرورقت عيونهما بالدموع وهم يغنيان
( نسيبنا الحكومة 00 وبقينا قرايب.. تررم )
النهايه