الوزير طين وتابعه قطران

السلطان :مين باقى عندك ياتختروان

-       مفيش غير الوزير طين والوزير قطران يامولاى

-       دّخل الوزير قطران الأول .. الحاجب ينادى : الوزير قطران يتفضل

-       ( بعد ان قدم فروض الطاعة والولاء )

-        أوامر مولانا المعظم محطم الدولار وقاهر القلوب  وكايد العزال ومقطرن عيشتنا ومطين ليالينا .. هاى هيئ

-       عندى تقرير مش تمام فى حقك ياقطران بيقول أنك مش شايف شغلك والناس لسه بتضحك وماليين القهاوى والكفيهات

-       نقفل القهاوى والكافيهات يا مولاى

-       أحنا مش كنا قفلناها قبل كده يا قطران

-       أيوه حصل يامولاى لكن الناس قعدت ع الفيس بوك وتويتر وشدت السلخ على عظمتك فقفلنا فيس بوك وتويتر واعتقلنا أللى قدرنا عليه لكن السجون مفيهاش مكان للوقوف فأقترح مجلسكم الموقر بفتح القهاوى وأستمرار غلق الفيس بوك وتويتر

-       طب والعمل يا قطران..أنا غلبت فى الشعب ده قوللى نعمل أيه

         (يهرش قطران فى رأسه وهو يفكر ثم يبتسم أبتسامته الخبيثة )

-       تاهت ولقيناها يامولاى .. عظمتك عايز تعكنن على الشعب ده وتخليه يمشى تحت طوعك ويسمع الكلام ويسبح بحمدك ويبطل كلام

-       قول ياقطران

-       عظمتك تصدر فرمان بقطع الكهرباء من بعد المغرب وتعمل حظر تجوال وأللى يتظبط  بره بيته ياخد أعدام

     ( وبعد كام شهر يطلب وزير الطين مقابلة السلطان فى أمر عاجل وهام )

-       ( وبعد ان قدم فروض الطاعة والولاء ) مولانا المعظم محطم الدولار وقاهر القلوب  وكايد العزال ومقطرن عيشتنا ومطين ليالينا .. هاى هيئ

-       عايز أيه ياوزير الطين

-       النهارده  يامولاى وأنا بأمر على المستشفيات الطين لقيت طوابير طويله لا تنتهى لستات حبالى وعلى أخرهم  وبسؤال أطباء الطين قالوا أنهم يوميا بيكشفوا على 20 ألف ست فى اليوم وكلهم حبالى فى توائم وده نتيجة غلق القهاوى والكفيهات وقطع الكهرباء بقرار الوزير قطران.. يعنى شهرين ثلاثة حيزيد شعب مولانا من 5-6 مليون عيل محتاجين أدويه وألبان وحضانات وحضرتك عارف مستشفياتنا الطين وأمكانياتها القطران

يدخل وزير الفكه وهو يصرخ : الخزانه مافيهاش ولا مليم ياجناب السلطان

السلطان ينتفض واقفا ويصرخ بأعلى صوته : يا تختروان أعلن عن أجتماع المجلس الأعلى لأمن الوسية فورا

2-القرارات  المصيرية

تختروان : المجلس جاهز يامولاى .. عدا مدام عفونه موجوده فى لبنان بتشد وتنفخ كأومر عظمتكم واللواء حزقان خارج البلاد للتعاقد على قنابل الأختناق وموجود بدلا منهما الوزيران طين وتابعه قطران

السلطان : أفتتحت الجلسة.. أقرأ القرارات الأقتصادية الجديدة يارئيس الوزراء

تختروان :نظرا للظروف الأقتصادية المؤلمة التى تمر بها البلاد وبعد الأطلاع على دستور الوسية والقرارات السلطانية المكملة له قررت أنا سلطان المنهوبة الأتى:

1-الغاء الجنيه وأصدار عمله جديده تسمى الجندولار مطبوع عليها من الأمام صورة الجنيه القديم ومن الخلف صورة الدولار

2-الغاء المعونه السلطانية لكافة الفئات الفقرية لكل أسرة يزيد عدد أفرادها عن 4 أفراد

3- الغاء مجانية التعليم وقصره على الطبقات القادرة

4- تسريح 50 % من موظفين الوسيىة

5- فرض ضريبة متعة شرعية على المتزوجين حديثا تتناقص بعد الخمس سنوات الأولى وضريبة متعة غير شرعية على العزاب والمطلقين والأرامل والمراهقين

6- فرض ضريبة (عايش ومالوش لزمه) على كل من بلغ سن 65 سنه فما فوق

7-فرض ضريبة أستهلاك على كافة المرافق من طرق وشبكة مياه وكهرباء وصرف صحى

8- فرض ضريبة بدل أقامة على أهالى نزلاء السجون والمعتقلات

والله الموفق التوقيع

 السلطان                            بقصرالخرابية

    خربها وقاعد على تلها                            سلطنة الوسية الكبرى

قراءة فى صحف اليوم

المشروعات العملاقة

الهيئة العامة للأستحمار تخصص 10آلاف متر مربع لمشروعات عملاقة فى بورسعيد أى مايعاد 2فدان ونصف لمشروع عملاق .. عندما أسمع كلمة مشروعات عملاقة أشعر بغثيان والفأر يلعب فى عبى وأشعر بأن نصيبه أو نصباية قادمه فى الطريق ..أبوس أيد اللى خلفوكم بلاش كلمة عملاقة

وتحت شعار «تبول من أجل العلم» عرض فريق بحث آله جديده في مهرجان للموسيقى والمسرح في وسط جينت ببلجيكا وتمكنوا بواسطتها من استخلاص ألف لتر من ماء الشرب من بول المحتفلين الذين قاموا بتذوقه وأثنوا عليه وأخذوا عشرات الزجاجات من هذا الماء كهدية وتذكار

هذا الأختراع فيه من الرفاهية الكثير.. فنحن فى مصر نشرب الماء المخلوط بشتى انواع البلاوى دون الحاجة لهذا الجهاز.... ده لو وجدنا الماء أصلا

خبر من جريدة المصرى اليوم

وردت معلومات لمحافظ بورسعيد، بقيام إحدى الشركات باستيراد أجهزة تكييف من المملكة العربية السعودية، تؤثر على الكهرباء وتضر الأمن القومي . فقام بتحويل المستورد للنيابة الأدارية بعد فحصها بواسطة لجنة فنية أثبتت عدم مطابقتها للمواصفات وأستهلاكها العالى للكهرباء .. مش عارف أيه دخل أستهلاك الكهرباء بالأمن القومى ألا إذا كان الأمن القومى المصرى شغال بالكهرباء

مسحوق الغباوه

ألتف الناس حول رجل يقف فوق كرسى فى السوق وبجواره ترابيزه عليها علب مكتوب عليها مسحوق الغباوه الأصلى ..وهو ينادى

- ياناس ياعسل غباشى أبو الغباوه وصل

- بكم عبوة الغباوة ياريس

- كل غباوه وليها سعر وحسب البلد أللى جيا منها
- سعر الغباوه المحلى بيختلف عن سعر الغباوه المستورد.. عندى غباوه مصرى طازه وأول قطفه وارد الصعيد الجوانى وفيه غباوه سورى وعراقى ويمنى وسعودى وليبى لكن أغلاهم الغباوه الأمريكانى والخليجى
- الا قولى ياريس هى الغباوه اللى معاك بتتاكل ولا بتتشرب ولا بتتلبس
- الغباوه عامله زى البيض ممكن تتقلى وتتسلق وتتشرب على الريق أما الغباوه اللى يتتلبس معايا آخر حته من الصين ..والغباوه أللى معانا النهارده على شكل عبوات تحتوى على مسحوق الغباوه الأصلى هيه مين قال هات .. شجع المنتج المحلى الغباوة المصرى العلبة بعشره جنيه شامله الضريبه ومصرح بها من وزارة الصحة ..علبه واحده تدوبها فى نص كوباية مياه وأشربها ع الريق أو حط منها ع الشوربه أو رشها على الكوارع وحتدعيلى .. يالله ياستات يالله رجاله قدمى لجوزك مشروب الغباوه حطيها فى سندوتشات المدرسه لعيالك مش حقولك على النتيجه حتلمسيها بنفسك وحتعيشى أسعد أيام حياتك مع جوزك وولادك حتحسى بأن الأسعار رخصيييت ومفيش حاجة نقصاك وحتشرب الشاى من غير سكر ومش حيهمك من الديون أللى ماتسددتش حتى لودخلت السجن حتخش وأنت سعيد ومبسوط مين قال هات ياعم غباشى
- ( صوت يصرخ من وسط الجموع ) : أمسكوا الراجل النصاب ده ..الناس : فيه أيه ياعم أيه اللى حصل
- أنا أشتريت 10 عبوات من الراجل ده من قيمة أسبوع ليه وللعيال ولأمى وأبويا .. بقالنا أسبوع بنشرب فى المدعوق ده ومفيش حاجة حصلت من اللى بيقول عليه ده
عم غباشى :تعال هنا ياراجل ياطيب .. أسم الكريم أيه .. عليش .. ممكن تفتح بؤك ياعم عليش .. أهه .. بربش بعنيك .. بربشت .. شد ودنك الشمال لفوق جامد.. شديت.. شد ودنك اليمين جامد .. جامد قوى ..فتح عنيك ممكن تقول للناس شايف أيه دلوقتى.. شايف قدامى قناة السويس الجديده والدولارات نازله ترخ على دماغنا زى المطر .. وشايف أيه تانى العاصمه الجديده ملعلطه بالنور والمليون ونص فدان مزروعة بانجو والناس كلها راكبه عربيات مرسيدس .. و.. و..
غباشى :كفايه ياعم عليش ..أخر سؤال أيه رأيك فى السيسى ؟
عليش : السيسى عمنا وسيدنا وتاج رأسنا وهو الدكر الوحيد فى مصر ماجبتوش ولاده وحنخش الجنه بسببه
غباشى : كده العبوه أشتغلت ..السبب ياجماعة أن عم عليش لم ينفذ التعليمات الموجود جوه العلبه .. مش حتحس بمفعول عبوة الغباوه ألا لما تشد ودانك وتبربش بعنيك وتفتح بؤك كده أهه
قررررب قرب قرب أشترى مسحوق الغباوة وعيش غبى تموت مستور

صواريخ

لحم رخيص

من علامات لحم الحمير ظهور بقع زيتية منفصلة على سطح الشوربة لتصبح الشوربة أكثر كثافة ولزوجة عن المعتاد.. بص كويس فى الشوربه قبل ماتشفط يا مواطن فليس كل ما يلمع ذهبا.. وليس كل ماعند الجزار بقراَ

الصيت ولا الغنى

إنشاء وكالة الفضاء المصرية.. لتتبع رئاسة الجمهورية ومقرها الرئيسى بالقاهرة.. تهدف لنقل وتوطين تكنولوجيا الفضاء وإطلاق الأقمار الصناعية وتخصص لها موازنة مستقلة.. بالرغم من أزمتنا الأقتصادية الطاحنة ولم نقم حتى الأن بتصنيع طائرة شراعية فأننا لا نغيب عن التقدم التكنولوجى .. العالم يقول علينا أيه ما عندناش وكالة فضاء .. ياشماتة ابله ظاظا فينا

أعلامى معرص

عرض الإعلامي محمد الغيطي، صورًا جنسية للإعلامية الإخوانية آيات عرابي، قائلًا :"الجيش الإلكتروني أرسل لي فيديوهات حقيقية لآيات عرابي، وليست مفبكرة تظهر فيها في أوضاع عارية ومخلة". هل هذه مهمة الجيش الألكترونى دى شغلانه حلوه جوى ولذيذه جوى

الموضه هى البنطلون الممزق

لقد سئمت من حياة النكد التى تعيشها معه، وكانت تظن أنه الزوج المناسب، ولكن وجدته شخصا كئيبا لا يطاق، فقد حول حياتها إلي جحيم بسبب مطالبه الغريبة».. وقالت «كل البنات يلبسن البنطلون المقطع.. ايه المشكلة فى كده». موضحة أنها منذ صغرها وهى معتادة على طريقة حياة معينة، وأن ما أزعجها هو أنه كان يعلم منذ ارتباطه بها أن هذه هى طبيعة حياتها، ولكنه بعد الزواج حاول فرض شخصيته عليها، قائلة: يريد أن يجسد شخصية «سى السيد». وفشلت كل السبل لإتمام الصلح بينهما وطلبت منه الانفصال، ولكنه رفض فاضطرت اللجوء للمحكمة للخلع ،لإنهاء معاناتها التى بدأتها مع هذا الزوج السوفاج المتخلف يععععع

ضرب الأزواج

وضع مركز بحوث الجرائم التابع للأمم المتحدة المرأة المصرية فى صدارة القائمة العالمية للنساء اللاتى يضربن أزواجهن بنسبة 28%، كما جاءت إحصائية محكمة الأسرة لتؤكد تفشى هذه الظاهرة فى المجتمع المصرى حيث نسبة الزوجات اللاتى يضربن أزواجهن، ويلجأن للخلع أو الطلاق تصل إلى 66% من إجمالى دعاوى الخلع والطلاق، فى نفس الوقت هناك 6 آلاف زوج مصرى أكدوا تعرضهم للضرب على أيدى زوجاتهم وأثبتوا هذا بدعاوى نشوز الزوجات.

الإحصائية ذاتها أكدتها دراسة لـ«مركز الأقصر للدراسات والحوار والتنمية» حيث كشفت أن أكثر من نصف الرجال المتزوجين فى مصر معرضون للضرب من زوجاتهم، وأن العنف يزيد بين الزوجات الأميات بنسبة 87% بالمقارنة بالمتعلمات وأن 5.63% منهن يستخدمن آلات حادة، وأن ثلث النساء لا يشعرن بالندم لتصرفاتهن تجاه أزواجهن

. فنحن جميعا على الضرب نسير

( أعلان ) محطة الحونين للمطلقات

تحت شعار "بناء جسور بين من مروا بتجربة الطلاق ومجتمعهم"..

انطلاق أول راديو للمطلقات على الإنترنت بتقنية البث عبر الهاتف لدعمهن نفسيا وتضميد جراحهم ..أتصل الأن سواء كنت رجلا أو سيده ستنعم بيد حانيه تربت على كتفك وتخفف آلامك سعر الدقيقة 50 قرش على رقم 0099999999  

هل فى العجله الندامه

هل فى العجله الندامه

قررت أن أتخلى عن السياره بعد المعاناة الرهيبة التى أعانيها من زحمة المرور وحرق الأعصاب

طلبت من أحفادى تدريبى على ركوب العجل تمهيدا لشراء عجله أقضى بها المشاوير القريبه وبعد كام شقبلاظ على هُدرّ على سَحل أستعدت ذاكرة سواقة العجل التى فقدتها من سنين طويله.. الفكره جائتنى من عدة سنوات قبل أن يركب السيسى عجلته المشهوره وحوله ماشاء الله حرسه المتغذى باللحمه والفراخ والتفاح  وتبدو الصحة المتفجره واضحة من حجم العضلات والمجانص التى تكاد تطرشق من التشيرتات .. ماعلينا نسيب الخلق للخالق .. فأنا سأركب العجله وسأسير بها فى شوارع القاهرة يامولاى كما خلقتنى لا حرس ولا كاميرات ولا مروحيات ولا منع لمرور السيارات ولا غلق للشوارع

وتسللت فى أحدى الأمسيات ونزلت أشتريت العجله وربطتها خلف شنطه السيارة بحامل شيك ورجعت وأنا سعيد ودخلت بها  وأنا ضرب كلاكستها الرائعة على أم العيال ففتحت فمها دهشةَ وضربت بيدها على صدرها : عملتها برضه يعنى أللى فى دماغك نفذته طب فرجنى حتركبها أمتى وفين

-       حتشوفى أننى بفكر صح وحتطلبى منى قريبا تتعلمى العجل

-       يا عم الحاج ماتقلش بقيمتك وتركب عجله زى العيال الصغيره

-       عيال عيال أنا بقى عيل وحركب العجله

-       يا حبيبى ربنا يهديك روح رجعها أحسنلك وبلاش جنان العواجيز ده

-       مين اللى عجوز ده حفرجك على الصحة والنشاط بعد ركوب العجله

-       مفيش فايده يعنى أنا بقى حبعت أجيب عيالك ونعمل مجلس عيله ونشوف رأيهم فى النصيبه دى

-       مجلس عيله مجلس أمن لن أتخلى عن عجلتى .. على جثتى هههههه

أصدقائى وحبايبى أكتب إليكم الأن وأنا متربط أيد ورجل بعد أول مشوار للعجله لدفع فاتورة التليفون وراحت العجله وأدغدغت ولم يتبقى منها غير الكلاكس الذى أصريت أن يكون بجانبى حتى أشفى  من جروحى ومن نظرات التشفى لأم العيال وضحكات الأبناء والأحفاد

 وفى العجله الندامه وكل عام وأنتم بخير   

الكمبيوتر الملبوس

الكمبيوتر الملبوس

-       1 -

صحوت قرب الفجر على أصوات تصدر من غرفة مكتبى فمشيت على أطراف أصابعى دون أن أنير المصباح وأنا يخالطنى كثير من الخوف الغريزى الذى جعلنى أتوقع أن يكون بداخل شقتى لصاً أو ربما فأراً أو قطه وسألت نفسى من أين يأتون وجميع نوافذى وأبوابى مغلقة فترددت قبل أن أفتح باب الغرفة فقفلت راجعا إلى المطبخ لأتسلح بسكين أو عصى أو حتى أيد هون لأن الأمر جل خطير لم يسبق أن تعرضت له .. فتحت باب الغرفة بهدوء وأنا أرفع أكبرسكين مطبخ وجدته ( غالبا كانت سكين التورته الغير مسنونه) وبدأت مستعداً للنزال كفارس من فرسان العصور الوسطى الذين أشاهدهم فى التلفاز وضغطت على زر الكهرباء لأبدد ظلام الغرفة فلم أجد غير الكمبيوتر مفتوح وصوت الطابعة يعلن عن أنتهاء طبع أوراق ولايوجد أحد بالغرفة .. لبست نظارتى وظللت أبحث فى الغرفة وبين الكتب والأدراج فلم أجد شيئا فهدأت قليلا وجلست على مكتبى لألتقط أنفاسى وصوت الطابعة لفت نظرى بأن أنطفأ مفتاح تشغيلها والكمبيوتر بدأ فى الأغلاق وعاد الخوف يتملكنى مرة أخرى فمددت يدى وسحبت الأوراق التى بالطابعة لأقرأها ولكن صدرت منى شهقة رعب فهى مكتوبه بلغة غريبه مثل الموجوده بكتب السحر والأحجبه التى يكتبها السحرة والمشعوذين وأللى طلع عليا هو : لالا مش ممكن ..لالا مش ممكن .. أسمع صوت زوجتى الحاجة وهو تنادى عليا من غرفة النوم : فيه أيه يازيزو ؟؟

-        وأرد عليها وأنا أبلع ريقى مفيش مفيش نامى أنا جاااى ..

 أهم بالقيام ولكن الكمبيوتر فتح من جديد ودارت ماكينة الطباعة لتطبع أوراق جديده فأنتظرت حتى أنتهت من الطبع وألتقطت الأوراق فوجدتها مكتوبه بنفس اللغة ولكنها تختلف فى ترتيبها عن سابقتها أى أنها أستكمال لما سبق.. بينى وبينكم  شعر رأسى وقف وطقطق.. فقررت أن أطفئى الكمبيوتر ولكنه لا يستجيب فقمت بسحب فيشة الكهرباء من الحائط بعصبية وفتحت درج الطابعة لأفرغه من الورق .. وخرجت من الغرفة مسرعا وأغلقتها بالمفتاح وأدخل فى الفراش الدافئ وأنا أقرأ آية الكرسى والمعوذتين حتى هدأت وقلت الصباح رباح.. وذهبت فى نوم عميق على غير العاده

-        فتهزنى زوجتى : أصحى ياعم الحاج أول مره تتأخر فى نومك كده.. حاضر حاضر .. بقولك أيه أنت سايب الكمبيوتر بتاعك شغال فى المكتب .. آه لأ .. آه آه فيه أيه

-       أصلى من الصبح سامعه دربكة فى أوضة مكتبك وصوت الكمبيوتر شغال والطابعة دايره حاولت أفتح أشوف أيه لقيت الباب مقفول بالمفتاح.. هو فيه حاجة!! ...

-       مفيش مفيش أنا قايم أهه .. أرمى الغطاء وأقوم مسرعا لأفتح غرفة المكتب فأجد الكمبيوتر شغال ومتصل بالكهرباء والطابعة تعمل ورساله على الشاشة تقول (ضع ورق بالطابعة)

أضع الورق فى الطابعة فتبدأ فى الدوران لتطبع أوراق جديده ولكن فى هذه المره يعلن الكمبيوتر عن أنتهاء عملية الطبع .. أجمع الأوراق بالترتيب وأحاول أن أفهم مافيها ولكن هيهات فقررت أن أقوم بتصوير بعضها بالأسكانر وأعرضها على النت لأترجمه فى جوجل .. وقد كان.. نسختها وأنتظرت نتيجة الترجمه وكانت المفاجأة

جائتنى رساله من جوجل تقول بأن هذه اللغة غير موجوده فى العالم برجاء أفادتنا عن مصدرها فوضعت أيدى على خدى وقلت فى نفسى جيبتك يا عبد المعين تعنّى لقيتك ياعبد المعين تتعان ..لابد أن الكمبيوتر ده فيه حاجة مش مظبوطه وفيه ناس بتشتغلنى وتعمل له ريبوت من بره وأنا مش عارف فقررت أن أتصل بصديقى وجارى المهندس عادل وشرحت له ماحدث فقال لى عشرة دقائق وسأكون عندك .. فتح الكمبيوتر وهاتك يا فحص فى البرامج وجميع التنزيلات وقام بمراجعتها وفتح مصارين الجهاز والطابعة وفى النهاية وضع الورق المطبوع جانباً وهو يائس : الجهاز والطابعة سليمة هارد وير وسوفت وير الكمبيوتر بتاعك ده لابسه عفريت وقام وتركنى وأنا أجرى وراءه : طب والعمل ياباشمهندس

قال وهو يبدو عليه علامات الأشفاق : الكمبيوتر ده قديم وعفى عليه الزمن مش عارف متمسك به ليه .. ياعم زيزو بيعه وكمان مش حتلاقى حد يشتريه .. أقولك على حاجه أتبرع به لجمعية رسالة على الأقل تكسب ثوب ..هززت رأسى وأنا قلبى يقطر دماً على هذا الكمبيوتر الأصيل وعلى ماوصل إليه وفى أول وعكة أتخلى عنه ولكننى لن أخذله أو أبيعه قبلما أعرف ما أصابه وسر هذه الرسائل المكتوبه بهذا الخط الغريب

 طب والعمل مفيش غير الشيخ مختار بتاع السحر والزار الذى يطلق عليه شيخ مجازاً رغم أنى لم أشاهده يركعها منذ أن عرفته فطلبته على الموبايل وشرحت له ماحدث فحدد لى ميعاد فى المساء فحملت أوراقى إليه فى غرفته التى يقطنها فى أسطح أحد العمارات المجاوره حيث خلوته ووكر تحضير أعماله السفلية والعلويه.. نظر الشيخ مختار فى الورق وهو يهز رأسه وهو يقول : معقول الجن الأمريكى يعمل كده

-       هو الجن دلوقتى جنسيات ياعم مختار

-       اومال الجن ده شعوب وقبائل يا زيزو ياخويا فيهم المتقدم والمتخلف وفيهم المؤمن والكافر وألعنهم الجن الصهيونى لعنة الله عليه

-       طب الورق ده فيه أيه

-       الورق ده تسيبه وتيجى بكره وتجيب معاك الورق أللى حينطبع

-       أيه هو لسه فيه ورق حينطبع تانى ..- أيون أنت فاكر العمليه سهله ولا أيه

-       أشمعنى يعنى الجن مالاقاش ألا الكمبيوتر بتاعى.يرسل عليه الرسائل بتاعته

-       ده من حظك يازيزو يظهر فيه منهم معجبين بك أبسط ياعم..

-       بقولك أيه يا عم مختار ماتاخد الكمبيوتر ده تطلع منه العفاريت بمعرفتك

-       ما أقدرش يا حبيبى ده ممكن يؤذونى وأيش ضمنك أنى لو أخدت منك الكمبيوتر يظهروا لك فى الثلاجة أو التكييف أو الكيتشن ماشين

-       يانهار أزرق  ألا الكيتشن ماشين بتاع الحاجه هما واخدين توكيل الأجهزة الكهربائية

-       العفاريت أطورت ومابقتش زى زمان تلبس البنى آدين لأن البشر دلوقتى ألعن من الشياطين فتلبس فى كمبيوتر أو سياره أو قطار أو باخره أى جهاز بيستخدمه بنى البشر

-       معقول .. وأكثر من كده حقولك على آخر نشره  طلعت من الهيئة العامة للعفاريت بتقول ممنوع منعاً باتاً أى عفريت أو جن أن يلبس أى بنى آدم وخاصة الستات وبنات اليومين دولت .. -- أشمعنى بقى .. لأنهم مش محتاجين عفريت يلبسهم حقولك على حاجه غريبه مش حتصدقها فيه بنت رقاصه عينيها زرقاء طالعه اليومين دولت مش فاكر أسمها بدل ما العفريت يلبسها هى أللى لبسته وأهله العفريت ياحرام  دايخين بيه على المشايخ .. ياسلاااام .. أنت مش مصدق ولا أيه .. العفاريت دلوقتى مش فاضيه تلبس البنى آدمين دول  بيخافوا يقربوا منهم  ويستعيذوا بالله منهم وأى واحد أو واحده يقولك أن لابسه عفريت ماتصدقوش ده بيستهبل أو مخه ضارب أضربه بالجزمه على دماغه وهو يفوء

-       اومال أيه الناس أللى رايحه جايه عليك دى والزار أللى أنت بتعمله كل يوم والتانى ده - يازيزو ياخويا رزق الهبل على المجانين     

-       ما علينا خلينا فى الكمبيوتر بتاعك ده تصدق أنى بفكر بجد أفتح ورشة لعلاج الأجهزة الملبوسه بدل من النصب على خلق الله  والمشاكل مع الأوباش ما تيجى تدخل معايا شركة .. أفكر ياعم مختار.. فوتك بعافية

-        ماتنساش تجيب الورق الجديد

-        حاضر سلام  

الجزء الثانى

أمر على الشيخ مختار فى اليوم التالى ومعى مجموعة جديدة من الأوراق وجدتها فى الصباح على مكتبى فنظر إليها وأبتسم ضاحكا ليظهر فمه المهجور من الأسنان : مبروك ياعم زيزو الجماعة بيبعتولك كثير السلام وبيشكروك على توصيلك للرسائل

-       جماعة مين .. حبايبك العفاريت .. أنا لى حبايب من العفاريت .. أيوه ياسيدى يا بختك ياعم ..أرزقنا يارب .. يرزقك بنصيبه يابعيد .. وبعدين أيه لزمته الغلط ده .. حتخليهم يزعلوا منك وزعلهم وحش حيخلوك تلف حولين نفسك ( أشعر بالقلق وأحاول أن أظهر تماسكى أمام هذا الدجال )

-       قوللى عرفت أيه أللى مكتوب فى الورق ده ؟؟

-       عرفت ومش حقولك إلا لما تمضى هنا بدمك

-       لما أعرف الأول حمضى على أيه

-       أمضى وبعدين تعرف .. – لأ مش حمضى ألا لما أعرف

-       ماتخافش شكه بسيطه بالدبوس وتبصم بالدم هنا

-       تتك شكه .. أنت أتهبلت ياراجل أنا الحق عليا أنى لجأت لواحد نصاب زيك .. أنا ماشى وطز فى عفاريتك أنا مروح أرمى الكمبيوتر ده بره

-       توء توء توء.. ماشى ياعم زيزو براحتك مصيرك حتجيلى تانى وحتندم على أللى قولته   

العايط فى الفايت نقصان عقل

العايط فى الفايت نقصان عقل

-       أيه رأيك فى حكم البراءة لمبارك وأولاده والعادلى وقياداته السته ؟؟

هو : عادى المقدمات تدل على النتائج فجاء الحكم نتيجة منطقية جداً وأللى يقول غير كده يبقى أهبل وعبيط وبذيل

-       معنى كده بتأيد الحكم وبتعتبره حكم عادل

هو : أنا ماقولتش كده .. أنا بأتكلم على قضية منطقية ولكننا للأسف لا نستخدم عقولنا لتحليل هذه القضية بالرغم من وجود عشرات الشواهد التى تقود للبراءة المخططه والمتفبركه هذه ودليل على كده أن مبارك وأسرته لم يهربوا خارج مصر

-       وهل رضوا بالحبس والعرض على شاشات التلفاز وحضور الجلسات ليعرضوا  أنفسهم لحكم الأعدام غير الفضيحة العالمية ؟

-       أولا لم يحبسوا بل كانوا مطلقين السراح .. ثانيا لم تمس أموالهم التى نهبوها من الشعب .. ثالثا كل عملاء مبارك ظلوا فى مراكزهم القيادية بما فيهم قيادات الشرطة والجيش والقضاء.. رابعا أُسُتخدِم المال المنهوب فى أفساد القضية.. ولهذا لم  يهرب أو يسافر خارج البلاد بل قالها واضحة بأنه قاعد على قلبكم  وسيموت على أرض مصر.. كلام الواثق من نفسه ومن رجالته الموجودين فى الجيش والشرطة والأعلام والقضاء

-       لماذا لم يتم محاكمته فى زمن مرسى ؟

هو : لم تكن خطة مبارك وأعوانه أن يصل مرسى والأخوان للحكم بل كان التخطيط وصول أحمد شفيق أخلص رجال مبارك وتلميذه النجيب ولو أصبح رئيسا لما أستغرقت هذه القضية كل هذا الوقت .. ولولا خوف طنطاوى من وقوع البلاد فى دوامة الأرهاب والحرب الأهلية لقام بتزوير الأنتخابات لصالح شفيق أى أنه وضع وجه الشعب المصرى فى الحيطه  وتركه يختار بين أسوء الوحشين .. وبما أن الشعب كاره لنظام مبارك ورافض للتوريث فقد أنتخب مرسى على أمل أن نخرج من مستنقع مبارك والفلول

-       السيسى يقول أنه لا يتدخل فى أحكام القضاء هل هذا صحيح ؟؟

هو : للأسف هذا كلام لا يصدقه ألا السفهاء .. فالقضاء بعد الأنقلاب مُسٍيَسّ وأقرب مثال أحكام البراءات على الفسده والقتله والمجرمين فى مقابل أحكام بالسجن والأعدامات بالجمله للثوار والمعارضين

-       يقال أن نظام مبارك سيعاود الظهور وسيصطدم بنظام السيسى وتدور بينهم معارك تكسير العظام

هو: هذا مايريد أعلام السيسى أن يوصله لرجل الشارع ..النظامين ينبعان من بوتقة واحده والطينه من الطينه واللته من العجينه والكلب لا يعض فى ذيل أخيه ومن يقول غير ذلك فهو واهم وبلع الطُعم.. فالسيسى رجل مبارك ومبارك رئيس السيسى ولو خان الجميع فلن يخون بابا ..ففى عز أزمه مصر الأقتصادية حكم لهم بالبراءة وهو يعلم بأن هذا الحكم سيحرمه من مليارات مبارك وحسين سالم المهربة فى بنوك الخارج التى تنتظر حكم الأدانه

-       أنا دماغى لفت ومش قادر أتخيل مايفعله هؤلاء الملاعين فى شعب مصر

هو : يستاهل المصريين ماحدث وما سيحدث لهم لأنهم رضوا بالفتنة وتأثروا بحملات الكراهية الأعلامية ولم يفيقوا ألا بعد هذه الكارثة.. خُلاصة القول إن مبارك قد أعيانا عندما كان رئيساً مستبداً، وأعيانا عندما صار رئيساً مخلوعاً، وأعيانا عندما أصبح متهماً، وأعيانا أيضاً عندما أصبح بريئاً

ويتبقى سؤال أخير: من الذى سيدفع فاتورة براءة مبارك التى تكلفت المليارات من علاج وأنتقالات ومكافئات وتعويضات ومعاشات يدفعها الشعب من قوت يومه للشهداء والمصابين ؟؟

هو : أنسى فلن يحصل الشعب على مليم من أموال مبارك ورموز نظامه المهربه للخارج ولن تدفع دول الخليج فلساً مرة أخرى ...وأنسى وخد البنسه

وتسلم الأيادى .. تسلم يا جيش بلادى