أنتفاضة أم بدوى

أنتفاضة أم بدوى

تمهيد

أنتفاضة كلمة على وزن أفتعالة مشتقة من الفعل نَفَضََّ ينفُضُ تنفضيًا وفى قواميس اللغة نفض الثوب، أي ضربه فى الهواء بعنف لإخراج الغبار منه، ونفض الموقع أي بمعنى نظفه، ونفض الطريق، بمعنى أستكشفه وحرره من اللصوص وقطاع الطرق، وهناك معاني أخرى بمعنى الزيادة والأبعاد فيقال نفض عنه الخجل أو نفض عنه الهموم، بمعنى أزالها أو تركها، وكذلك (انتفض قائلاً) بمعنى التحول من السكون إلى الحركة وفى قاموس الشباب لصاحبه كمبوره فتح الباب فعل نفض بمعنى طنَّش وأعطى له الطرشه وكبر دماغك أى أهمله ولم يعره أهتمام.. وأم بدوى عندما أنتفضت لم تقم بتنفيض ثوبها أو أثواب أبنائها أو زوجها أو شقتها كما هو معتاد كل يوم أحد موعد أجازة أبو بدوى ولكن أنتفاضتها كانت من نوع آخر يعلمها النساء ويحس بوطئتها الرجال فقد قامت  بعمل وقفات أحتجاجية  كل يوم أحد فلم يسأل فيها أبو بدوى فقررت أن تزيد مدة الوقفة مما جعلها  أن تقوم بسحب كرسى وتجلس فى منتصف الصاله لأن القاعدة حتطول وخاصة بأن زوجها من النوع البارد  الذى يقولون عليه بأن قلبه قاعد وأعلنت جزء من مطالبها جهارا ثم الباقى همسا فى أذن أبو بدوى فأبتسم أبتسامة لها مغزى وقال لها وهو يغلق باب الغرفة التى ينام فيها منذ بداية الوقفات الأحتجاجية : أحمدى ربنا ياوليه

وقد كان التليفزيون له كل الفضل فى تثقيف أم بدوى سياسيا وأجتماعيا وتعلمت من نشرات الأخبار والتسعين دقيقة والعاشرة مساءً والمسلسلات أسلوب الأحتجاج المنظم والأضراب الغير مُعلن والمُعلن وهو ما أتبعته فى التعامل مع أبو بدوى الذى يمثل أمامها دور الحكومة  المستبده وهى الشعب المقهور الذى يبحث عن حقوقه والظاهر والله أعلم  بأن أبو بدوى يعلم أصول اللعبة جيدا فدائما ما ينفض أو يعد ولا ينفذ أو يستخدم القوة الغاشمه فى ألجام أم بدوى عندما ترتفع عقيرتها بالهتاف الغير مهذب ضد أفعاله وتصرفاته ومن خلال هذه الحلقات سنتابع الطريق الثورى الذى خطته أم بدوى لتغيير حياتها بالكامل فهل ستكون أنتفاضة أم بدوى مثال يحتذى به لباقى السيدات !!

الحلقة الأولى

حديث الأحد

الأسطى حُصَرِىّ رجل كسيب صاحب ورشة سمكرة ودوكو لعبت معاه البلية فبعد أن كان صنايعى باليومية أصبح أسطى يقبض كل أسبوع وتمكن أن ينفصل وينشأ ورشة صغيرة خاصة به فى الهواء الطلق تحت الكوبرى والورشه كبرت ووسعت الشغلانه فأجر ورشه فى الحرفيين وأصبح الزبائن عنده بالحجز لما أشتهر به من فن السمكرة والدوكو فعليه دقة شاكوش مافيش أخوه

ورافقته فى مشوار كفاحه زوجته أم بدوى (فكيهه معاطى أبو ترباس) منذ أن كان يعمل باليوميه وهو سعيد بها ودائما ما يدللها لما تمتاز به من شاسيه حريمى سليم على حد قوله بأنه خبير شاسيهات وأتخذ لها مسكن فى العزبة القريبه عبارة عن غرفتين ضيقتين بمنافعهما فوق السطوح وبالرغم من أرتفاع نجمه فى عالم السمكره وزيادة دخله ألا أنه لم يفكر أن يغير من مسكنه أو يرتفع بأهل بيته بما يتناسب مع غناه المستمر وفى جلسة صفا يوم الأحد وهو اليوم الوحيد الذى يجلس فيه فى البيت فاجئته أم بدوى بهذا الحديث

أم بدوى : بقولك أيه يا أسطى حصرى خلص سيجارة البنجو دى وأسمعنى كويس أنا شايفه كده أن ربنا فاتحة عليك من وسع .. فوسعها علينا ربنا يوسعها عليك

- قصدك أيه ياوليه .. أنت ناقصك حاجة

- أيوه ناقصنى .. وناقصنى كتير قوى وساكته وبقول يمكن تيجى منك أنما يظهر أنك مش دريان بأللى أحنا فيه وسايق الهبالة على الشيطنه

- فيه أيه يافكيهه؟؟ أكل وبتاكلى أنت وعيالك.. لحمة وبتجيلك يوماتى أللى ماحدش بيدوقها حواليكى ألا فى عيد الضحية وعندك تليفزيون50 بوصة ودش وغسالة فول أوتوماتيك غير جميع الأجهزة أللى عمر أهلك ما شوفوها

- يا أسطى أنت مش شايف المطرح مش مساعينا أنا وأنت والعيال ياراجل ولادك منيماهم على سراير ثلاث أدوار والمكان أللى بناكل فيه هو أللى بنقعد وننام فيه ونطبخ فيه غير السقف أللى زى المصفاه وبيخر علينا فى الشتاء وكفاية الحته المعفنه أللى عايشين فيها خناقات وصريخ وصويت غير الحرامية وبتوع الحشيش أللى ساكنين حوالينا

- هيه وأيه كمان .. النغمة دى جديده يا أم بدوى قصدك أيه عايزه تعزلى من هنا

عايزه تسكنى بقى بسلامتك فى الزمالك ولا المهندزين ولا مصر الجديده الله يرحم عزبة القرود أللى أتولدتى وعيشتى فيها أحمدى ربنا وبلاش أفترى يظهر أنك أتسطلتى على الريحة ولا أيه..ههههه

- من غير تريأه وحياة أبوك أنا حمداه وشاكره فاضله.. ودماغى عمر مالهباب بتاعك ده بيسطلها .. بقى ياراجل لما ربنا يفتحها عليك مستخسر تسكن فى شقة برّحة يدخلها الشمس والهواء وتسكن جنب ناس محترمة بدل تُجار الحشيش والعالم اللمامه وتقب بينا على وش الدنيا ده حتى بيقولوا من جاور السعيد يسعد

 – ماهو أحنا مش حنخلص من طلباتك ..النهارده شقة بكره تقولى نشترى عربيه وبعده ياعالم تطلع فى دماغك نسافر نتفسح فى أوروبا

- وماله ينعل أبو القرش أللى ما ينزهش صاحبه يعنى أللى عايشين فى الزمالك ولا المهندزين أحسن مننا فى أيه ولا أللى راكبين عربيات تسعة متر يزيدوا عننا أيد ولا رجل .. ناس بتعرف تنزه نفسيها مش تضيع فلوسها على الأكل والمنظره على القهوة وقعدات الكيف ..يا أسطى فوء متع نفسك وأبسط بيتك وعيالك وسيبك من شغل الكُحيتى أللى معيشنا فيه

- أهو شغل الكحيتى ده هو أللى خلانا يبقى عندنا بدل الورشه أتنين وفاتح لك البيت أنت وعيالك ومعيشنا مستورين

- بلا نيله أحنا مازادش علينا حاجة غير الأكل والشرب من غير نزاهة ولا حتت هدمة حلوة ولا فستان جديد ولا بدله تترسم بيها أنا مش عارفة الفلوس أللى أنت بتجمعها دى كله حتوديها فين وعلى رأى المثل أمشى بقمشك ولا تمشى بكرشك والنزاهة ليها أصحبها والعفانه على قفا من يشيل

يفرد أصابعة الخمسة ف وجهها : قل أعوذ برب الفلق ربنا يستر من أرّك عاملة زى القطط تاكل وتنكر أنا قايم أقعد على القهوة بدل من قاعدتك النكد دى طيرتى من دماغى الأصطباحة

- آدى أللى أخدناه منك .. ماشى ياحصرى يا أبن عديله أن ماكنتش حتعقل وتسمع الكلام وتفوء وتسيبك من حركات السمكرية دى أنا بقى ليه تصريف تانى معاك

الحلقة رقم (2)

أم بدوى فى الكاركون

يفاجئ حصرى بأبنه بدوى الصبى ذو العاشرة وهو يدلف إلى القهوة باحثا عنه فيهب واقفا : أيه ياواد فيه .. ألحق يابابا أمى حجزينها فى القسم

يجرى وهو يستفسر منه: وأيه أللى أمك عملته ياض أنطق ..النهار باين من أوله ...نقت فيها بنت معاطى السباك

بدوى : أتخانقت مع دمله أم الواد سوكه الحرامى وبطحوا بعض

- أتخانقوا ليه ياض أنطق ..- مش عارف بيقولوا أن أمى بلغت عنهم الحكومه فجه البوليس وخده فمسكوا فى خناق بعض.. بس أمى ظبطتها على الأخر

- الله يخرب بيتك يا أم بدوى ما لقتيش ألا دمله تتخانقى معاها أستر يارب.. روح ياواد على البيت وأنا رايح أشوف أيه الحكاية

يدخل حصرى قسم البوليس ويسأل عن زوجته فيجدها تجلس فى الحجز وهى تربط رأسها بالشاش ومعها دمله وهى ملفوف معظم وجهها وذراعيها بالشاش وهى تبدو كأن تريله دهستها

حُصَرِى : أيه يا أم بدوى أيه أللى حصل وأيه أللى عمل فيكى كده

أم بدوى: عشان يعجبك.. كله من الحته الزباله المعفنه أللى معيشنا فيها

دمله من تحت الضمادات التى تلفها على وجهها : الحته أللى مش عجباكى دى كفايه أنها لماكى أنت وعيالك.. أن ماوريتك.. مستتخنه نفسك ياوليه

يشخط الشاويش : أكتمى يا وليه أنت وهى خلينا نشوف شغلنا

حصرى وهو يميل على الشاويش ويظهر له ورقة بخمسين جنيه يطويها فى يده : ياحضرة الصول دى خناقة عادية بين الجيران ودلوقتى يتصالحوا ونفضها سيره والبركة فيك بقى ( يلمح الشاويش الورقة النقدية فلم يقتنع بها ويستمر فى كتابة المحضروهو يقول : دولت نسوان لبط مرتكبين مش خمسين جناية قول ميه أو متين ولازم يتحولوا على النيابه ( أشاره من الشاويش يعنى أفهم الخمسين ماتنفعش ) يخرج حصرى خمسين أخرى ويقبض عليها باليد الأخرى :أحنا حيجلنا أعز منك ده أنت بمية باشا وبيه فى القسم.. ياله أعمل محضر الصلح ربنا يكرمك وبعد أن يسقط له فى الدرج المائة جنيه: أنت جوز أنهى واحده فيهم يامحترم

- الست أللى فى اليمين أللى رابطه راسها

- يوه يوه ياسنة سوخه.. الله يكون فى عونك أنت متجوز محمد على كلاى .. دى شرفطت الوليه أللى زى البورص دى ماخلتش فيها حته سليمه .. على كولن شوف لو المجنى عليها موافقه على الصلح نقفل المحضر وتاخدهم من هنا مش ناقصين وجع دماغ لو موافقتش مقدمناش غير أن أحنا نحولهم على النيابه وهى تتصرف معاهم – طب عن أذنك ياحصول أكلمها .. أهى عندك

حصرى : خلاص بقى يا أم سوكه الصلح خير وافقى على الصلح بدل ماتروحى النيابه وتبقى قضيه

أم سوكه : نروح النيابه أحسن.. خلى مراتك تتربى

حصرى : النيابه يا أم سوكة مش من مصلحتك وأنت عارفه قصدى أيه

- أيه يعنى قصدك على السوابق مايهمنيش أنا واخده على كده

- ياوليه بطلى عند وغباوة وأتلمى صدق مين سماكى دمله.. أنا عارف أنت عايزه أيه - خمسمائة جنيه مايقلوش مليم

- كتيرقوى - خدى أدى ثلثمائة دلوقتى والباقى فى خناقة تانيه أن شاء الله

تبصم أم سوكة على محضر الصلح ويخرج حصرى من القسم ومعه أم بدوى وهو يعاتب فيها

حصرى : عاجبك كده 400 جنيه على الصبح نغرمهم من تحت راسك وقايل لك بدل المره الف مالكيش دعوه بجيرانك ..مالِك أنت يكون أبنها حرامى ولا شيخ منصر ناقصين أحنا بلاوى ودمامل

- ماهو كله منك ريقى نشف معاك .. نعزل من الحته اللبط دى وأنت ولا على بالك

حرام عليك لو مش خايف عليا خاف على ولادك يتعلموا منهم ويطلعوا حراميه

- بعد أللى حصل ده أن شاء الله حدور لكم على مطرح تانى .. قدامى ياوش السعد

تضربى الوليه لحد ماطحنتيها عامله فيها كلاى على رأى الشاويش

- أعمل أيه إذا كانت بتتهجم عليا هى وولادها أسكت ولا أسكت

- لا ما تسكتيش .. كسرى ودغدغى وأدفع ياحصرى

- أيه مستخسر فيه ال400 جنيه ياراجل ماهو كله من مخك المصدى أللى البارومه وكلاه

- أمشى أمشى أنت أللى دماغك عايزه تستعدل بكام شاكوش عشان تفوئى

الحلقة رقم (3)

الشقة الجديده فى مصر الجديده

يدخل حصرى على أم بدوى وهو سعيد : أفرحى ياستى لقيت لك مطرح تانى ..شقة فى الدور الأرضى مش حتتعبى لا فى طلوع ولا فى نزول

أم بدوى : صحيح ..سمعنى كده وفرحنى وفين حته بقى

يرتبك حصرى : قريبه من هنا مش بعيد ..- فين يعنى ..قريبه فى أول الشارع

أم بدوى : أيه.. يعوضنى عوض الصابرين .. بقولك ياراجل عايزه أطلع من الحته كولتها تقولى أول الشارع يا أخى أرحمنا وخلينا نطلع من هنا على خير

- اعملك أيه أهو ده أللى موجود قدامى دلوقتى أصبرى بقى شويه على مايرد عليا السمسار يكون شاف لنا حاجة مناسبه

- قول كده مش عايز تغرم ولا مليم .. بقولك أيه أنا بقى أللى حدور بنفسى على الشقة وأن شاء الله فى خلال أسبوع حنكون ناقلين من هنا .. بقرشك ياحبيبى تاخد قصر مش شقة بس أنت فك الكيس وبلاش تقريط

- عايزه تحطى القرشين أللى شقيت بيهم فى شقة أنت أتجننت ولا أتجننت

- لا ما أتجننتش يا أسطى القرش أللى أنت خايف عليه ده وربطه على وسطك كل يوم قيمته بتنزل أنما لو أشتريت شقة قيمتها فيها وبتزيد يوم عن يوم ولا أنت فرحان بالميات والخمسينات أللى بتأستيكهم وترصهم جنب بعض فى الشنطة

-الله الله أنت ياوليه بقى مراقبانى وعينك على الشنطة

- أياك فاكرنى عبيطه ولا هبله يا أسطى أنا باكلها بمزاجى .. خليك شايلهم كده لحد ما الحراميه أللى فى الحته يخشوا يدبحونا وياخدوهم

- طب بس أكتمى.. وطى صوتك حتودينا فى داهيه الله يخرب عقلك ماشوفهمش وهم بيحوشوا شافوهم وهم بيتحاسبوا .. وبعدين تعالى هنا القرش أللى أنا شايله ده أهو لك أنت وعيالك تبقى تاخديه بعد ما أتكل على الله وأرتاح منكم

- ياخويا بعد الشر .. طلع قرشين نشترى بيهم شقة فى حته نظيفه وبلاش العمايل بتاعتك دى خلينا نتمتع بيهم قبل مانروح التوربه

- ماشى يا أم بدوى دورى على شقة بمعرفتك ماتزيدش عن خمسين ألف فاهمه

- دى مش حتبقى شقة يا أسطى دى تبقى زريبه... خمسين ألف مايجبوش حاجة

- هو ده أللى أقدر عليه عاجبك ولا مش عاجبك

- عاجبنى يا اسطى لما أشوف آخرتها معاك

تقوم أم بدوى بالبحث عن شقة فى منطقة النزهة الجديده القريبه من الحرفيين وتوصى السماسرة والبوابين على أن يجدوا لها شقة فى حدود الخمسين ألف ولكن كان الرد دائما بأستحالة تحقيق طلبها بهذا المبلغ الصغير وأقترح عليها السمسار أن تدفع هذا المبلغ كمقدم فى شقة تمليك بعمارة جديده تقوم بتسديد أقساطها على سبع سنوات فتوافق ويذهب معها لمعاينة الشقة فتعجب بها ومن نظامها ومدخل العمارة المغطى بالرخام والبلكونات التى تطل على الشارع والتواليت الأفرنجى والسيراميك والدهانات وتوافق على الفور وتأخذ ميعاد مع صاحب العمارة لأحضار أبو بدوى لكتابة العقد

أبو بدوى : بتقولى تقسيط ياوليه أنت أتهفيتى فى نافوخك أدفع كل شهر ألف جنيه لمدة سبع سنين بعد ماكنت ساكن بأربعة جنيه فى الشهر

- أيه أللى بتقوله ده هى الشقة أللى حناخدها تيجى أيه جنب المخروبه أللى عايشين فيها دى أم أربعة جنيه تعال أتفرج الأول وشوف الناس المحترمه والعيشه النظيفه وبعدين ياسيدى حناخد قرشين من الشقة دى خلو نحطهم على مقدم الشقة الجديده ده كفاية الحمام والقاعدة الأفرنجى والسيراميك والروايح الحلوة حاجة تسر القلب الحزين.. ياراجل دى فرصة ماتضيعهاش مننا بعاميلك

يهدأ قليلا أبو بدوى وهى تحكى وتشكر له فى الشقة الجديده وهو يعارض تارة ويصمت تارة أخرى حتى أنفجرت أم بدوى بالبكاء والصريخ فى وجهه مع التهديد والوعيد وفى النهاية يوافق على طلبها على مضض ويذهب معها لصاحب المِلك ويشاهد الشقة فيراجع نفسه ويقتنع بها ويدفع المقدم ويستلم العقد ويعودان سويا وهى تدعو له بالصحة وطولة العمر وتبدأ على الفور بالأستعداد للجلاء من فوق السطوح

أبو بدوى : أيه رأيك بقى أحنا مش حنسيب الشقة دى حنقفلها على كام حتة عفش أهى تنفع لعيل من العيال

- أللى تشوفه ياخويا بس كان قصدى ناخد منها قرشين ينفعوا ويقللوا القسط علينا - مش مهم أهى تنفع أنشالله أعملها مخزن للورشه ..ماشى يا ابو بدوى

الحلقة رقم (4)

ليلتنا عنب

تنتقل أم بدوى لشقتها الجديده وهى سعيده بتحقيق حلمها وخروجها من العزبة لتلحق بركب المدنية والتحضر وأبو بدوى راضى على هذه النقله النوعية التى جعلته فى مصاف الأفندية والبهوات ولكن فى يوم الأحد راحة أبو بدوى ترتب أم بدوى كالعاده لهذا الحديث وهى تقدم له الشاى

- أيه رأيك فى النقلة دى يا أبو بدوى ده أحنا ياراجل ماكناش عايشين

- كويسه بس الأقساط أللى تقطم الوسط

- ياخويا هو أنت بتكسب شويه أعتبرها ياسيدى مرمة فى عربية من أللى بيجولك

سيبك أنت مش حاسس أن الشقة دى ناقصها حاجة

- ناقصة أيه يا أم بدوى قولى وأشجينى أنا عارف طلباتك أللى مابتخلص

- بذمتك الشقة دى ينفع فيها الكراكيب أللى كنا عايشين بيها فوق السطوح .. عارف يا أبو بدوى أنا نفسى فى أيه

- نفسك فى أيه ربنا يستر

- نفسى أبيع الكراكيب دى وأشترى أوضة نوم محترمه بشوفنيره وتسريحة وسرير بمراتب سوست بدل السرير المخلع أللى كل شوية يقع بينا ودولاب بلكار وأشترى أوضه للعيال وسفرة ونيش وكام سجاده وستائر ومطبخ زان و..و...

- حيلك حيلك يكونش عايزة تتجهزى جهاز عروسة أياك .أنسى.. كويس كده قوى

- أبو بدوى شغل دماغك وبلاش الزرجينه أللى بتربطها دى خليك راجل مودرن

- ههههه وسمعتى مودرن دى فين ياوليه ولسه حنشوف كان فى جره وطلع لبره

- جرة أيه وبره أيه أنا عيزاك تعيش وتودع أيام الفقر والضنك وطالما ربنا فاتحها علينا.. ليه نقرطها على نفسينا

- حنرجع للنغمة القديمة تانى .. أتلمى ياوليه يظهر أنك ناويه تفرقعى القرشين

- ولا حنفرقع ولا حنولع كل الحكاية حنعمل جمعية مع أختى نفوسه وحقبضها الأول ونشترى أوضة النوم وباقى الطلبات ولو أتبقى حاجة نبقى نقسطها

- جمعية وتقسيط تانى مش كفاية قسط الشقة

- ياخويا العالم كلتها عايشه بالأقساط ومش حنقرب ياسيدى على الأساتيك بتاعتك

- من الأخر حتدفعى كام فى الجمعية

- كل حاجة أنا عامله حسابها وشوفت أوضة النوم وباقى الطلبات حندفع متين جنيه فى الجمعية ومية وخمسين جنية قسط للعفش الجديد

- سبينى أفكر وأردعليكى

- لا العملية مش محتاجة تفكير أهرش كده وطلع 350 جنيه

- موعود أنا كل أحد تعكننى عليا بحكاية الفلوس والطلبات

- ربنا يخليك لينا ولعيالك بكره لما تيجى أوضة النوم الجديده وتتفرش الشقة

حرجعك عريس من تانى

- ههههه قومى ياوليه يا أم مخ طاقق خدى من جيب البنطلون الفلوس أللى أنت عيزاها .. آل عريس أل.. يعنى ما ينفعش عريس من غير المصاريف أللى ملهاش لازمه دى

- بكره تعرف أن هى ليها لازمه ولا لأ  وتدعيلى   

ويمضى أسبوع ويعود حصرى من الورشه فى أخر الليل ويفتح باب شقته ويقف وهو مذهول فتخيل بأنها ليست شقته فرجع للخلف لينظر لرقم الشقة ويدخل وهو يستعجب فتشعر به ام بدوى فتخرج عليه وهى ترتدى قميص نوم جديد وتفوح منها رائحة البرفان وهى تدهن وجهها بكافة المساحيق وفكت شعرها الذى قامت بكييه عند الكوافير

أبو بدوى وهو يستعجب : أنت مين ياست أنتى

تضحك أم بدوى وتأخذه من يده لتدخل به غرفة النوم الجديده فيصفر وهو سعيد

- والله براوه عليكى يا أم بدوى أوضه ولا فى الأفلام يابنت الأيه أنما قول لى أيه أللى عملاه فى نفسك ده ريحة وقميص شوفتيشى وروج وشعر مكويى أيه المناسبه

تشير بيدها ناحية السرير وهى تقول بدلع :ده بمناسبة الأفتتاح والشيئ لزوم الشيئ يا أسطى

- يظهر أن  ليلتنا عنب... يامنجى من المهالك يارب هيلا هوب هههههه..هئ هئ

الحلقة رقم (5)

بدله وعربيه

يحضر حصرى مجموعة من الأوراق وينادى على أم بدوى للتوقيع عليها

- أمضى هنا يا أم بدوى على ورق الضرايب

- وماله يا خويا هات .. حتعمل أيه بعد كده

- خلاص دخلتك شريك فى الورشه الكبيرة والورشه الصغيره أهى بأسمك ولسه ماجلهاش ضرايب .. أمضى هنا لما أستريح شوية وبعدين أنزل أودى الورق للمحاسب..- طب ياخويا ما تنامش أستنى لما تاكل لقمة الأكل جاهز خمس دقايق والسفرة تكون جاهزة قوم أغسل أيديك

(يجلس حصرى وأم بدوى على السفرة والأولاد وهو يشكر فى طبيخ أم بدوى )

أم بدوى : بقولك أيه يا أبو بدوى ماتشترى ياخويا بدلتين تلاته كده عليهم القيمة الناس ياخويا بتاخد بالمناظر .. يبقى النفر من دول مفيش فى جيبه ربع جنيه مخروم وأللى يشوفه يقول ياما هنا يماهناك والناس تقوله يابيه وياباشا وواحد تانى زى حلاتك عنده شيئ وشويات ماحدش بيعبره علشان مش لابس قد كده

بدوى : والنبى يابه نفسى أشوفك لابس بدله

أبو بدوى : وأروح الشغل بالبدله يا أم بدوى

- وماله ماطروح بالبدله هو أنت بتشتغل بأيدك ده أنت المدير قاعد على كرسيك توجه وتهندز وتقبض ..على الأقل الزبون يفهم أنه بيتعامل مع مهندس مش أسطى سمكرى وينادولك يابيه ويابشمهندس والبدل ياما بتلم

- ماشى يا أم بدوى عشان خاطر الواد بدوى من بكرة نشترى كام بدله على كام كرافته وقمصان وجزم ونبقى آخر ألاجه بس حتبقى فيه حاجة ناقصة فمش عقول ألبس بدله وكرافته وأروح الورشه وأناراكب ميكروباز ينفع

بدوى : أشترى عربيه يابه

حصرى : برافو عليك ياواد طالع فقيق زى أمك أهو ده أللى كنت بفكر فيه فقدامى عربية مرشييدس  بتاعة زبون عامله حادثة مرميه قدام الورشه صاحبها عايز يبيعها أشتريها منه وأشدها بمعرفتى

أم بدوى : مرشيدس حته واحده ياحصرى ده أحنا دخلنا فى العليوى قوى

- مش ده رأيك يا أم بدوى عايزانى أبقى بيه .. أهو كده أبقى بيه على حق

- أوعى يا أبو بدوى تسوق فيها وتتكبر علينا وتنسى بيتك وعيالك وتعمل فيها بيه بحق وحقيقى ولاعينك تزوغ كده ولا كده يبقى حتكون نهايتك على أيديا دول

- أحنا حنقاطع من دلوقتى يا أم بدوى بلاها البدله والعربيه وخلينى زى ما أنا الأسطى حصرى السمكرى وبلاها بهويه ونريح دماغنا

- لا ياخويا الأيامة والمنظره مطلوبه ألبس وأتأمع وأركب عربيه حلوة أهو كله حيبقى فى وشنا وترفع راسنا قدام جيرانا الجداد

يعود حصرى فى اليوم التالى وهو يحمل البدل والكرافتات الجديده ويبدأ فى قياسها وتقف أم بدوى والعيال وهى تزغرط كلما لبس بدله وسار أمامهم يتمخطر

بدوى : أبويا بقى شكله حلو قوى يامه خليه يجيب لى أنا كمان بدله

أم بدوى : أصبر ياواد دى بقى الخطوة التانيه نتأيم أنا وأخواتك

ترن الكلمه فى دماغ حصرى: أيه بتقولى أيه ياوليه .. ده أنت بقى بتدحرجينى زى البرميل واحده واحده فهمت المخطط أللى فى دماغك

- فيها أيه ياخويا تبقى أنت لابس بدله وعامل فيها بيه وأنا والعيال نمشى جانبك زى الشحاتين .. البيه لزمن يكون جانبه هانم وعياله حواليه لابسين ومتشيكين

أيدك بقى نكسيى العيال وأجيب لى كام فستان على كام عباية محترمين من الوكالة

- ياه دى العملية زادت وغطت قوى .. ولسه العربيه قدامها أسبوع وتخلص دى سحبت منى فلوس كتير أجيب منين يافالحة

- فك الكيس ياحصرى مش لحد عندنا تقوللى نجيب منين

- طب واحده واحده عليا لما الناس تشوفنا كده أتغيرنا مره واحده يقولوا أيه سرقنا ولا نهبنا ولا بنتاجر فى الصنف وأنت عارفه السمكرية ونأهم

- مالنا أحنا ومال السمكرية الوضع ده كان المفروض يكون من زمان غير أنت أللى قارص علينا وكل ما كلمك تقولى الحسنه المدارية من نصيب السمكريه .. كفايه فضلت مدارى ومنشف ريقنا طول السنين أللى فاتت

بدوى : ماليش دعوة أنا عايز بدله زى أبويا هيه

حصرى : خلاص ياوش الفقر بطل زن خدى القرشين دول أتكسى أنت والعيال

أم بدوى : أيه دول ماينفعش يا أسطى هات زيهم وبحبح أيدك شويه

حصرى وهو يخرج مبلغ آخر وهو يهدد : مفيش غير دول مش عايز أسمع ولا كلمة كفياكم حتفلسونى ياولاد الـ ...

الحلقة رقم (6)

كباب وكفته

فى الورشه يجلس حصرى على بابها وهو لابس البدله ويضع رجل على رجل ويشد فى الشيشه وهو معجب بنفسه بعد هذا التعديل وتغيرت لغة التعامل معه فبدأ الزباين والعمال ينادونه بكلمة بيه أو يابشمهندس وهو سعيد بهذا التغيير ويقول فى نفسه: الوليه أم بدوى عندها حق.. الناس بتاخد بالمناظر ينعل أبو الفقر شقة وعربيه وبدله وكرافته وجزمه بتلمع وكولونيا بتفحفح مفيش بعد كده نزاهة ربنا يستر من عنين الناس .. وهو فى نشوته وأندماجه يمر عليه الأسطى حوده جاره فى البيت القديم فيقف أمامه وهو مشدوه

حوده : أيه ياعم حصرى أللى أعطاك يعطينا.. أنت عندك فرح النهارده ولا أيه

يرد حصرى عليه وهو يتمتم فى سره : الله أكبر خمسه فى عينك ياوش الفقر أهو ده عيبه اللبس والمنظر الجديد ده حيلم عليا نقاقين الحرفيين وعنيهم أللى تفلق الحجر يارب أستر ..أتفضل يا أسطى حوده هات كرسى ياض من جوه

- لا أنا ماشى مش فاضى أنا قولت أصبح بس .. عجبت لك يازمن يبقى الكلام أللى بيقولوه الأسطوات صح

- كلام أيه لامؤاخذه  أللى بيقلوه الأسطوات

- بيقولوا أن ربنا كرمك من وسع وبتصلح عربيات شركات التأمين

- ياعم حوده هذا من فضل ربى وربنا يبعد عننا العين.. النهارده الخميس

- طب ياعم باصى لينا كام حته أحسن السوق نايم وكله بثوابه ونفع وأستنفع

- أن شاء الله يا أسطى نهارك أبيض

يمشى الأسطى حوده ويفكر حصرى فى الكلام ..عربيات التأمين والله فكره بس أوصل ليها أزاى دى.. الجدع بتاع شركة التأمين بيعدى من هنا لما أشوفه وأترسم عليه يمكن نقدر ندخل فى اللعبه دى زى مابيقولوا الأسطوات يظهر البدله عامله شغل بركاتك يا أم بدوى يظهر حتضرب معانا فى العليوى وينادى على صبى بالورشه: واد يابليه الجدع بتاع التأمين ماعداش النهارده

- لسه يا أسطى حصرى بيه

- طب لما يعدى نادهولى أنا عايزه وتعال أغسل العربية بتاعتى عايزها تبقى زى المراية – حاضر يا أسطى حصرى بيه

- ياض ياجزمه مش عايز أسمع كلمة أسطى دى تانى ونبه على كل أللى جوه

- أومال أقول أيه يا أسطى حصرى بيه..قول يابشمهندز فاهم ياحمار

وبعد الظهر يترك حصرى الورشه ويركب عربته ويذهب للورشه الثانية لتفقد العمل بها ثم يطلب أم بدوى على الموبايل : جهزتى الغداء أنا جاى

يدخل حصرى من باب العمارة وهو يحمل أكياس الفاكهة فيجرى عليه البواب ويحملها عنه وهو يضرب تعظيم سلام : عنك أنت ياباشمهندز أطلعهم أنا

يتعجب فهذه أول مره الراجل يعمل كده : نضف العربية ياعم عبده على ما أنزل المغربيه .. من عنيا ياباشا ..خد دول علشانك .. ياخد عدوك ياباشا .. مش عايز أجيب لك الجرايد كل يوم والعيش واللبن زى بقية السكان .. وماله يا عم عبده وتبقى تشوف طلبات الست كل يوم .. أحنا نخدمك بعنينا ياباشا أنت تأمر .. طب خد دول كمان ياعم عبده .. كثير كده ياباشا

يدخل حصرى شقته ويأمر البواب بوضع الأكياس وهو يلهج لسانه بالدعاء وهو يركز على كلمة باشا ويابشمهندز فتسعد أم بدوى

أم بدوى : شايف يا باشا الأحترامات أللى نازله بترف كان فين الكلام ده من شهرين الراجل ده كان مش طايقنا وما بيعبرناش أكننا عايشين فى بيت أبوه علشان تعرف أن مراتك بتفهم يا أسطى باشا

حصرى : كله بالفلوس ياحلوه.. غدينى بسرعة علشان أنا نازل لأنى عندى مقابلة مهمة وتدعيلى أن ربنا يوفقتى فيها

- من غير حاجة أنا بدعيلك.. مقابلة ايه بقى أللى عايزنى أدعيلك ليها

- رايح أعمل مقابلة وعقد مع شركة التأمين علشان نصلح العربيات المتأمن عليها فى ورشتنا

- يا الف نهار ابيض يارب يكرمك ويفتح عليك كمان وكمان يا حصرى باشا يا ابن عديله .. لو ربنا كرمك فيها ياحصورتى تاخدنى أنا والعيال وتعشينا كباب وكفته

- بس كده أنا حهيصكم .. ده كله بفضل مخك النوير وتكتيكاتك يا فكهوتى

الحلقة رقم (7)

الأنفتاح الكبير..حصرى موتورز

يحصل الأسطى حصرى على توكيل شركة التأمين لأصلاح السيارات وتزداد الورشة نشاطا ويتوسع أكثر بضم ورش مجاوره له ويزداد ثراءا وأم بدوى من خلفه تشجعه على التوسع أكثر وأكثر حتى أصبحت الورشة مركز للصيانه لأشهر ماركات السيارات وينشأ له مكتب بداخله بسكرتاريه وحسابات

وعرف طريقه للبنك لأول مره وأصبح يملك دفتر شيكات وحساب ضخم يمول به أعماله وصفقاته من قطع الغيار وغير أسم المركز ليكون حصرى موتورز

وعم الرخاء على أهل بيته فنقلت أم بدوى أولادها لمدارس أجنبية وأشترى لها حصرى سيارة آخر موديل وفيلا جديده وألغت من حياتها أسم أم بدوى وأصبحت مدام فيكى بدلا من أسمها المكتوب فى البطاقة فكيهه معاطى أبو ترباس وأصبح لديها شغالين وسفرجى وطباخ وأختلطت بسيدات المجتمع والنادى الأجتماعى الشهير الذى أشتركت فيه وفى خلال سنوات قليله أصبح أسم حصرى موتورز من أشهر رجال الأعمال فى مجال السيارات

وفى حديقة الفيلا التى أشتراها حصرى فى التجمع الخامس وفى يوم الأحد موعد راحة حصرى يجلس وهو يستجم وبجانبه فيكى أم بدوى سابقا يقدم لهما السفرجى الشاى وبعد أن ينسحب تبدأ فيكى فى الترتيب لحديث الأحد المعتاد

فيكى: أنت دلوقتى يا باشا صيتك وشهرتك ماليه الجرايد والتليفزيون أيه رأيك ترشح نفسك لمجلس الشعب علشان تكمل الوجاهه ويبقى شغلنا على ميه بيضا

حصرى وهو يتثائب : فيه ناس كتير قالوا لى الكلام ده بس أنا مش عايز

- ومش عايز ليه ياحصورتى .. دى فرصة عمرك تبقى نائب وحبايبك كتير غير الأبهة والعظمة والحصانه والتسهيلات أللى حتخدها فى شغلك وتقدر تأخد أكبر توكيل سيارات فى البلد

- أنا مش عايز ألمع قوى لأن العين حتبقى علينا وخدى عندك كل يوم أستجوابات ومشاكل مع المعارضة والكلام اللى يسد النفس أنا بقول أن كده كويس وبارك الله فيما رزق ونبعد عن الشر ونغني له

- أنت دايما كده خايف من العين والحسد والكلام الفارغ بتاع زمان .. أحنا الثروة أللى عملناها دى مش من الحلال ولا من الحرام بعد الشر.. تبقى تخاف ليه ؟؟ وطول ما سكتك خضراء دوس يا أسطى ولا يهمك  

- الشغلانه دى عايزه مصاريف ورش على الناس أللى فوق وحتكلفنا كتير قوى

- ماهو لو أنت عرفت مكاسبها أللى حتبقى بالملايين مش حتقول كده.. القرش أللى حترميه دلوقتى حيرجع ومعاه عشرة ويمكن ميه أسمع كلامى وفك الزرجينة بتاعة السمكرى أللى ربطها على دماغك وتعرف أن عندى حق

- ماشى يا أم بدوى نعمل أللى أنت شايفاه

- سوفاج أيه أم بدوى دى. أنت مش حتترقى أبدا أنا مدام فيكى يا أسطى ماتنساش

- هههههه يخرب عقلك يافكيهه من نسى قديمه تاه لحقت تنسى العزبه والسقف أللى بيخر ميه والكاركون والوليه أم الواد سوكه الحرامى

- لأ مانسيتش أيام ماكنت بتسمكر العربيات تحت الكوبرى

- بس بس أسكتى الواد السفرجى جاى ماتفضحناش

- ما هو أنت أللى قاعد بتسيح يا أسطى .. شوف الجماعة بتوع الحزب الوطنى وخلص معاهم ورشح نفسك وبلاش تنبله وأنا قايمه علشان عندى زيارة مع الهانم الكبيره أكتب لى شيك محترم نتبرع به لملجأ الأيتام

- أنت باين عليك بتلعبى على كبير يا فيكى.. الهانم الكبيرة حته واحده وصلت ليها أزاى دى ..- هنا فيه مخ مش مهلبيه بكره تسمع عنى يا أسطى مش بعيد يعينونى رئيسة مؤسسة أو عضوة فى مجلس الشورى وممكن وزيرة .. بقرشك تقدر توصل ..وسلم لى على رجال الأعمال وسيدات المجتمع

- خدى الشيك أهه وماتتأخريش عشان أفتتاح المعرض الجديد أبقى أعزمى القرشنات المخلعين بتوعك على حفلة الأفتتاح الساعة ثمانية النهارده

- أوكيه باى حص

الحلقة رقم (8)

توتى الرقاصة

   تبدأ حفلة أفتتاح المعرض الجديد  بحضور المحافظ ولفيف من رجال الأعمال والممثلين والممثلات وسيدات المجتمع صديقات فيكى وتطلق الألعاب النارية وتصدح الموسيقى  وكاميرات الفيديو تصور هذا الحدث الهام لعمل أكبر دعاية

لتذاع فى الفضائيات .. ويتم قص الشريط بواسطة المحافظ وعن يمينه حصرى موتورز وعلى يساره فيكى وباقى الجمع الغفير وهم يصفقون ويباركون وقد رصت عشرات البوكيهات من الورود على الجانبين ومدير الدعايه (كاميلو) يأخذ لقطات بالفيديو لحصرى وفيكى بالقرب من السيارات الجديده التى أصطفت بطول وعرض المعرض وتنتهى حفلة الأفتتاح بتوزيع الهدايا التذكارية على المدعوين مع شعارحصرى موتورز المطبوع على التيشرتات والكوفيات والأيشاربات يقف حصرى على المنصة الصغيرة ليعلن عن تخفيض 50 % لأول الحاجزين اليوم والأسعار التى لاتنافس فى البيع النقدى لمده أسبوع

ينتهى الحفل ويعود حصرى وتقوم فيكى بتشغيل شريط الفيديو أثناء تناولهما العشاء فتصرخ فيكى : يانهار أسود أيه أللى بيحصل ده ياحصرى البت توتى الرقاصة لزقه فيك كده ليه .. يالهوى دى حضناك من رقبتك .. ياوقعة مطينه بطين البت بتتمرقع كده ليه دى شويه شوسه حتنام على كتفك وأنت سعيد قوى وفاشخ لى بوءك على الأخر

حصرى : أيه يافيكى فيه أيه سودتيها ونيلتيها ليه فيها أيه ياعنى هم الفنانين كده ده شيئ عادى بالنسبه لهم دعاية يامودام دعايه

- دعاية.. دى مسخرة وقلة حيا دى شويه شويه حتبوسك

- هههه ماهى باستنى بس فى آخر الشريط .. وفيها أيه يعنى خليكى أسبور

- ورحمة أمى ما حسبها.. أطلب لى الجدع المخنفس بتاع الدعايه لما أشوف شغلى معاه وخليه يشيل المسخره دى من الشريط

- خدى أهه معاكى وبراحة وواحده عليه من غير تشليق مش عايزين فضايح أحسن الجدع ده فافى قوى مش حمل تجرمتك

- هات الموبايل هو فيه أكتر من كده فضايح أنت ياراجل مش عارف أيه أللى ممكن يحصلك لو رشحت نفسك فى الأنتخابات.. الناس أللى حينزلوا قدامك حيوزعوا خيبتك فى سديهات على القهاوى . غير المنافسين لك فى السوق أللى حيضربوك فى مقتل .. جرس ومفيش حد بيرد.. أطلبه تانى الواد الممرقع ده

يرد الموبايل : كابيلو سبيك مين معايا

فيكى : أيه المسخرة أللى مصورها دى ومين عزم الوليه الرقاصة على الأفتتاح

أكيد أنت مفيش حد غيرك

كابيلو : مسخرة أيه يامدام أحنا بنعمل أرقى أنواع الدعاية فى مصر

- البوس والمرقعة وقلة الحيا دى بتسميها دعاية روح يشفى الكلاب ويضرك يابعيد أنت مش عارف أن حصرى بيه مرشح نفسه للبرلمان

- عارف يامدام ودى بداية الدعاية للبرلمان

- بقولك أيه تيجى دلوقتى ومعاك الشريط الماستر وألا ورحمة أمى لأجيلك وأطربق عليك الأستوديو وشركة المسخرة بتاعتك .. أدينى نمرة الرقاصة

حصرى : حتعملى أيه يامجنونه مع الرقاصة

فيكى : حتشوف دلوقتى أن ماكنتش أرقصها على الشناكل وأخليها تبطل رقص مابقاش أنا فكيهه بنت معاطى أبو ترباس  ( تطلب نمرة توتى الرقاصة )

- ألو مساء الفل ياست الكل أنا مدام فيكى مرات حصرى موتورز أزيك يا حبيبتى كنت منوره حفل الأفتتاح ومشيتى من غير ماسلم عليكى ولا أشكرك

توتى على الموبايل : مرسيه ياحبيبتى أصل كنت مستعجله لأنى كان عندى وصله فى الأوتيل سورى يامدام فيكى كلك ذوق

- لأ ما ينفعش كده أنت لازمن تيجى تشرفينا عشان أشكرك بنفسى وأسلم عليكى  وتشربى معايا القهوة علشان محضرالك مفاجأة حتعجبك قوى

- مفاجأة أيه يامدام فيكى

- ماينفعش أقولك عليها مش حتبقى مفاجأة شوفى أنت فاضيه أمتى عشان أستناكى .. أوكيه بكره الساعة خمسة مساءً كويس .. حستناكى متتأخريش باى أممممه أممممه (قبلات متبادله عبر الأثير )

حصرى وهو قلق : ناويه على أيه ياوش النصايب

- بكره تشوف يا أسطى

الحلقة رقم (9)

عش الغرام

يتصل حصرى بتوتى فى اليوم التالى عندما يصل للمكتب : صباح الفل ياجميل

أفتحى لى ودانك .. أوعى تيجى النهارده فى ميعاد فكيهه أحسن نويالك على نصيبه بعد ماشافتك معايا فى شريط الفيديو

- حتعمل أيه يعنى ..- لالا أعقلى أنت ماتعرفيش فكيهه دى وليه أديها طرشه ولسانها متبرى منها أنصحك ماتجيش مش ناقصين مشاكل لأحسن ينكشف موضوعنا

توتى : أنت باين عليك بتخاف منها قوى يا حوحو

- مش العبارة أللى أنتى ماتعرفهوش أن فكيهه لها النص فى الشركة  وكل حاجة ولو أكتشفت علاقتى بيكى حتهد الدنيا على راسى خلي علاقتنا زى ماهى فى السر- وحتفضل لأمتى فى السر يا باشا

- شويه كده حبقى أفهمك لما نتقابل فى عش الغرام بعد ساعة

- مستنياك على نار أممممه خد دول من تحت الحساب

فى فيلا حصرى موتورز يرن جرس التليفون فترد فيكى : ألووو مين توتى أيه المفاجأة الجميلة دى

توتى : أنا آسفه خالص يامدام فيكى مش حقدر آجى فى الميعاد لأنى مسافره حالا

لأنى عندى أوردر فى أسكندريه لفيلمى الجديد ولما أرجع أن شاء الله تحددى ليا ميعاد علشان أزورك فيه والأيام جاية كتير

فيكى : وماله ياحبيبتى تروحى وتيجى بالسلامه

تضع سماعة التليفون وتسرح وهى تتذكر شريط الفيديو فتقوم من السرير وتقوم بتشغيل الشريط وتعيد فى اللقطات مرة وأثنين وثلاثه وتقف عند لقطة عابرة وتثبتها وفيها حصرى وتوتى وهى تقترب من أذنه وهى تهمس له وهو يسمع لها بأهتمام وفى نهاية الشريط وهى تطبع على وجهه قبلة حارة فيفور الدم فى عروقها وتأخذها الشكوك والظنون لأبعد مدى وهى تسأل نفسها لابد أنه توجد علاقة ما بينهما فأهتمامه بها والسعادة التى تبدو فى عينيه والحركات التى تصدر منها تدل على سابق معرفة وليست هذه المرة الأولى التى يشاهدها فيها .. وتقول : آه لو ظنى ده فى محله تبقى جنيت على نفسك ياحصرى الكلب أنت والملعونه أللى معاك أم وسط سايب.. أكيد البت دى بتضحك عليه أنا عارفه حصرى بيعز الصنف والشاسيهات .. يارب تكون نزوه وتصرفات عبيطه زى كل الرجاله .. لالا مش ممكن منظرهم واخدين على بعض قوى .. لا أنا حتجنن من كتر التفكير وبعدين أيه أللى خلاها تعتذر عن الميعاد رغم أنها هى أللى حددت ميعاد حضورها

فيه فى الأمر شيئ أنا قلبى حاسس أن حصرى بيلعب بديله مع البت الرقاصة دى

تأخذ التليفون وتطلب حصرى فى الشركة فترد عليها السكرتاريه بأنه قد خرج منذ ساعة ولم يقول أين ذهب .. تغلق سماعة التليفون وتطلبه على الموبايل فتجد أن الموبايل مغلق فيزداد قلقها أكثر .. فتقوم على الفور وترتدى ملابسها وتركب سيارتها وتنطلق إلى شركة الدعاية لمقابلة كابيلو مدير الدعاية فتدخل مكتبه وتنتظره لحين الأنتهاء من المونتاج فى الأستوديو ويدخل وهو يرحب بها ويطبع قبله على يدها ويطلب عمال البوفيه لتقديم واجب الضيافة لمدام فيكى ويبدأ كابيلو بالكلام : خلاص يامدام حذفت كل المناظر أللى فيها توتى من الفيلم أى خدمه

فيكى : ألا قولى يا كاميلو أنت أللى عزمت توتى الرقاصة لحفلة الأفتتاح

يفاجأ كابيلو بالسؤال فيحاول أن يتهرب بعرض بعض الصور على فيكى ولكنها تنحيها جانبا وتتحدث له بجديه وبدت على ملامحها الغضب : ماجوبتش على سؤالى أنت أللى عزم توتى الرقاصة على الحفلة أسمع كلمه واحده أه أو لأ

يرتبك أكثر : مش أنا يامدام

فيكى: سؤال تانى وجاوبنى بصراحة : تعرف أيه عن علاقة توتى بحصرى بيه

- بصراحة ما عرفش حاجة

- أنت عارف بس مش عايز تتكلم حضطر أفسخ العقد أللى مابينا وأدور على شركة تانيه تقوم بحملتنا الدعائيه طالما مش عايز تتكلم

- أعفينى يامدام وبلاش تحرجينى مع حصرى بيه

- ما حدش حيعرف أنك أنت أللى قولت لى ..هيه حتتكلم ولا أشوف حد غيرك

- خلاص يامدام أنا حقولك على كل حاجة بس أرجوكى ما تجبيش سيرتى فى الموضوع – أتكلم ياكاميلو سرك فى بير

الحلقة رقم (10)

أكتشاف السر والكارثة

كابيلو : أنا سمعت فى الوسط الفنى أن حصرى بيه متجوز مدام توتى فى السر وعايش معاها فى فيلا فى الهرم

فيكى : ماتعرفش فى أنهى حته فى الهرم

- لا ماعرفش ..طب لو عرفت لى مكان الفيلا ليك عندى هديه ومكافأة كبيره قوى

يسيل لعاب كابيلو : أحنا أتفقنا ياهانم مايجيش أسمى فى الموضوع ده

تخرج فيكى دفتر الشيكات لأغرائه بالكلام : ها حتقول ولا أقوم وأعرف أنا من حد تانى ويكون الشيك من نصيبه

- لالا يامدام أتفضلى العنوان أهه أحنا حيجلنا أعز منك ومن شيكاتك

تأخذ العنوان وتكتب له الشيك وتقوم لتخرج فينادى عليها كابيلو : خدى بالك يامدام من كلاب الحراسة أللى فى الفيلا

- كلاب بتحرس كلاب .. سلام

تخرج فيكى من شركة الدعاية وتركب سيارتها وتتجه إلى العنوان فى الهرم وتحوم بسيارتها حول الفيلا حتى تشاهد سيارة حصرى وهى تخرج منها فتقف فى مكان مستتر حتى لا يراها وتقفل راجعة إلى فيلاتها فى التجمع وهى تزداد عصبية وغضب صبتهما على الشغالين والخدم وأبنائها وكل من يقابلها

تسمع رنين الموبايل فتجد نمرة حصرى أمامها

حصرى : أيه يا حبيبتى كنت فين أنت سألتى عليا ..خير كنت عايزه حاجة

فيكى تتصنع الدلع : أبدا ياحصورتى وحشتنى قولت أسأل عليك

حصرى ينظر للموبايل بتعجب : جديده دى يا أم بدوى .. مش عوايدك تكونى عايزه فلوس ولاحاجة للجمعية الخيريه

تستمر فيكى فى تصنع دور الغرام : مستغرب ليه فيها حاجة لما أطمن على حبيبى

الغالى وروح قلبى حصورتى

يتكلم حصرى بجديه وقد أنتابه القلق : ماشى يافيكى أسيبك دلوقتى لأنى عندى أجتماع مهم ونبقى نشوف موضوع الحب والغرام أللى نزل عليكى مره واحده ده

ماتعمليش حسابى على الغداء يمكن أتأخر باى

- طب مش حتيجى على العشا ياروحى  .. حسب ظروف الأجتماع .. براحتك ياحصورتى وخلى بالك من نفسك ماترهقش نفسك فى الشغل عشان صحتك

- ما تخفيش أنا صحتى زى البومب .. سلام

تجلس فكيهه وهى تخطط لكيفية الخروج من هذا المأزق والعواقب التى ستتبع هذا الزواج السرى وتشرب عدة فناجين من القهوة ولا تنقطع من أشعال السجائر

ثم تطرأ على رأسها فكره فتقوم على الفور بالأتصال بالشركة وتسأل عن حصرى

فتبلغها السكرترية بأنه قد خرج مرة أخرى فتطلب الأستاذ/ عبد المجيد مدير الحسابات ليكلمها على التليفون

عبد المجيد : مساء الخير ياست هانم حضرتك طلبتينى أى خدمه

فيكى : أنا عيزاك دلوقتى حالا فى البيت تيجى وتجيب أخر موقف مالى للشركة

- خير يا أفندم فيه حاجة

- أسمع الكلام أللى بقولك عليه وبلاش مناقشه

- حاضر يافندم بس أستأذن من حصرى بيه

- حصرى بيه عندك فى الشركة

- لا يامدام .. طب تعالى هو حيكون موجود فى البيت كمان نص ساعة أشهل بسرعة يا عبد المجيد وبلاش لك كتير

يغلق عبد المجيد السكة وهو يحدث نفسه : حاجة غريبه عمرها ماحصلت أيش فهم الست دى فى الحسابات والأرقام .. الموضوع ده فيه أننه ربنا يستر

يدخل عبد المجيد غرفة المكتب بالفيلا فى أنتظر حضور فيكى هانم ويجلس وهو يقلب فى أوراقه

تدخل فكيهه وهى تسلم عليه وترحب به : مالك قلقان ليه يا أستاذ عبد المجيد

الشركة دى أنا مش ليه فيها النص

- أيوه يامدام لك أكثر من النص كمان يبقى مش من حقى أعرف الدنيا ماشيه معاكم أزاى .. حقك ياهانم بس دى أول مره .. ومش حتكون آخر مره .. قولى أيه أخبار الشركة المكاسب والأرباح والمديونيات وأللى موجود فى البنك والسداد والعملاء والمبيعات قد أيه من الأخر حطنى فى الصوره من موقف الشركة

- الحقيقة ياست هانم الحال مايسرش بقالنا بتاع سنه عمالين نلبس طاقية ده لده – يعنى أيه بنكسب ولا بنخسر

- مانقدرش نقول أننا بنكسب ولا بنخسر لأن أللى جاى قد أللى رايح والديون مابتتحركش زى ماهيه

- ديون أيه أحنا علينا ديون يا عبد المجيد

- أيوه ياست هانم أحنا مديونين للبنوك ب10 مليون جنيه وتوقفنا عن السداد بقالنا سنه وغلبت مع حصرى بيه أن أحنا نضغط المصاريف شويه علشان نعرف نسدد وهو يقولى مالكش دعوه بكره لما ناخد التوكيل الجديد حنسدد كل ديونا

قولت له حيسألوا عن ديونك فى البنوك والسيوله أللى موجوده ولما يعرفوا الحقيقة مش ممكن تاخد التوكيل.. قال لى مالكش دعوه مدير البنك صاحبى وأنا متفق معاه .. أنا مش عارف نعمل أيه أنا خايف قوى ياهانم

- طب يا أستاذ عبد المجيد حتعبك معايا شويه وفهمنى واحده واحده الحسابات دى وسبب الدين وقوللى نعمل أيه علشان نخرج من الكارثة دى

- أنا ريقى نشف مع حصرى بيه أن يقعد معايا نظبط الحسابت ونحل المشكله لكن دايما بيقولى أنه مش فاضى وكويس قوى أنك ياهانم فتحتى الموضوع لأنقاذ مايمكن أنقاذه ..

تحدث نفسها : حيفضالك منين طول ماوراه الرقاصة.. آه ياحصرى الكلب أن ماوريتك أكيد الرقاصة شفطت فلوسك 

عبد المجيد : بتقولى حاجة ياست هانم

- لا أبد .. قولى يا عبد المجيد الفلوس أللى فى البنوك بتاعة الشركة محطوطه بأسم مين .. بأسمك أنت ياست هانم والقروض كلها مصروفه بأسمك بحكم التوكيل العام أللى مع حصرى بيه

- طب أتفضل أنت دلوقتى وجهز لى كل الأوراق والمديونيات بتاعة الشركة وكافة المستندات وتشرفنى بكره الساعة ثمانية الصبح قبل ماحصرى بيه يخرج .. سلام

الحلقة رقم (11)

التنازل

يخرج عبد المجيد مدير الحسابات وتتصل فيكى بمحامى الشركة : ألوو أستاذ سمير أبو قفه المحامى .. تحت أمرك يافندم .. أنا مدام فيكى ..أهلا وسهلا .. عيزاك تيجى بكره الفيلا الساعة 8 صباحا ومعاك كل عقود وأملاك الشركة والقضايا المرفوعة علينا.. حاضر يامدام أستأذن من حصرى بيه وأجى لحضرتك

فى صباح اليوم التالى ينتظر كل من المحامى ومدير الحسابات فى غرفة المكتب

وتدخل فيكى المكتب وهو يبدو عليها الأعياء من كثرة التفكير فى الكارثة التى ستدمر حياتها وحياة أبنائها والتصرفات المريبه لحصرى

فيكى : صباح الخير ياجماعة أنا آسفة قوى أنى طلبتكم بدرى بالشكل ده لأن الموقف ما يستحملش أنتظار وأنتم أدرى طبعا بالموقف أكثر منى .. حندردش معاكم شويه لحد ماحصرى بيه يلبس وينزل .. هيه يا أستاذ سمير جيبت معك أللى قولت لك عليه

سمير : أيوه يا فندم آدى عقد الشراكة أللى بينك وبين حصرى بيه مسجل فى الشهر العقارى وآدى عقود التمليك لمقر الشركة والمعارض والفيلا وكلها بأسم حضرتك وآدى قضيتين واحده رافعها البنك لعدم السداد عليكى وعلى حصرى بك وأولاده القصر وقضيه من الضرايب وأوراق التنازل

فيكى : هات لى الأوراق دى كلها هنا .. عندك صورة التوكيل أللى عملاه لحصرى بك .. وآدى صورة التوكيل وكمان توكيل القضايا .. خير ياست هانم فيه أيه

- مفيش حاجة.. دلوقتى تعرف

 تنادى على الشغالة : يا سمر تعالى شوفى البهوات يشربوا أيه وأطلعى شوفى حصرى بيه خليه ينزل علشان مستنيينه

يدخل حصرى وهو منزعج من هذا الأجتماع الغريب : صباح الخير ياجماعة .. فيه أيه يافيكى جايبه الناس دى ليه وعشان أيه من بدرى كده

فيكى بكل هدوء : أقعد يا حصرى خلينا نعرف نتكلم

- وآدى قاعده يا صباح يا عليم يارزاق يا كريم خير

فيكى : كل المشاكل والديون والقضايا دى..وأنا مش دريانه بأللى بيحصل

- مالك انت يا حبيبتى بوجع الدماغ ده مش كفايه عليكى الجمعيات الخيرية وزيارات الهانم الكبيره تشغلى نفسك ليه

فيكى بأنفعال: يعنى عايزنى أستنى لما أشرف فى السجن أنا وأنت ويتخرب بيتنا وتقولى أشغل نفسى ليه .. أيه الديون دى كلها وبتسحبها بأسمى وأيه القضايا دى كلها أستنى لما آخد فيها حكم .. الكلام ده ماينفعش أنت تقعد كده وترسى لحد مانشوف لنا حل

- البهوات بيشتغلوا وحيخلصوا كل المشاكل دى ماهو كل واحد فيهم بياخد مرتب قد كده علشان الشغل ده

- البهوات دولت حيسددوا القروض منين ياحصرى .. مستنى لما تشرف فى ابو زعبل يا ابو بدوى وتقولى البهوات

حصرى بتحدى : بلاش البهوات حليها أنت يا ست الكل فرجينى حتعملى أيه

- يعنى موافق أنى أتصرف بمعرفتى وترفع أيدك من الشغل

- أيوه موافق

فيكى تشير لسمير المحامى : أعمل أجراءاتك يا أستاذ سمير لتنازل حصرى بيه عن نصيبه فى الشركة بالكامل

سمير وهو مستغرب : بس يامدام كده حتشيلى الليله كلها وحتبقى مطالبات البنوك والضرايب والقضايا حتبقى عليكى لوحدك

فيكى : أنا عارفه كده ولا كده كنت حشرف فى السجن

حصرى وهو يهدد : حتندمى يافكيهه

فكيهه : مش حندم ياحوحو.. ماهو أنا يا أنت يتنازل للتانى تحب أتنازلك أنا وتشيل الجمل بما حمل ولا تمضى وتخلصنى خلينى أشوف حل فى النصيبه دى

حصرى يفكر قليلا : موافق هات الورق يا استاذ

بعد أن يوقع حصرى على أوراق التنازل يترك المكان ويركب سيارته وينطلق بها

فيكى : شوف يا أستاذ سمير تاخد الأوراق والتنازل وتسجلهم فى الشهر العقارى

ومفيش ورقة تخرج من مكتبك لحصرى ألا بمعرفتى وتبلغ البنوك والضرايب بخروجه من الشركة والنهاردة أجتماع فى الشركة مع جميع المديرين مفهوم يا أستاذ عبد المجيد ..أتفضلوا الأجتماع النهارده الساعة خمسة ..سلام

الحلقة رقم (12)

المواجهه

  فى أول أجتمع لمجلس الأدارة والمديرين تعلن مدام فيكى بأنها أصبحت المسؤله الوحيده عن جميع أعمال الشركة وأن أى أوراق أو تعاملات لا تتم ألا من خلالها وأن حصرى بيه هو مجرد عضو شرفى ومستشار فى مجلس الأداره وأنه سيتم ضغط المصروفات والدعاية وأغلاق الفروع التى لا تحقق أرباح وأنه سيتم جدولة الديون للبنك والضرائب

عبد المجيد : حضرتك حتجيبى فلوس منين علشان نسدد جزأ من الدين حتى يمكن أجراء الجدوله للديانه

فيكى : حنبيع الفيلا والمزرعة والشاليه أللى موجود فى الساحل الشمالى أستهيألى ده حيجيب أكثر من نص الدين وأنت وشاطرتك يا عبد المجيد تحاول تجيب فيهم سعر كويس .. وحنحاول بقدر الأمكان زيادة الموارد وضغط المصاريف .. يعنى حالة تقشف لحد ماتعدى الأزمة .. حد عنده أعتراض أتفضلوا

شوفوا شغلكم وأى مشكله أنا قاعده هنا مش حتحرك وكل واحد من المديرين يعرض عليا موقفه أول بأول

ينفض الأجتماع وتجلس فيكى فى مكتب حصرى وتبدأ فى تخطيط أول الطريق لأنقاذ الشركة من الأفلاس

وفى الصباح اليوم التالى يدخل حصرى على فيكى المكتب وهو ثائر

حصرى : أيه أللى بيحصل ده أقدر أفهم لما تبيعى الفيلا والمزرعة والشاليه حتعيشينا فين وتفتكرى أنك بالطريقة دى حتقدرى تحلى المشكله

- أهدى يا حصرى سيبنى أنا حتصرف من بكرة حنرجع نعيش تانى فى مصر الجديده فى الشقة بتاعة زمان

- تفتكرى ولادك حيوافقوا على الكلام ده

- يوافقوا.. مايوفقوش ليه!! وأللى مش عاجبه يشرب من البحر

- أنا كده بقيت طرطور وماليش رأى يافيكى

- بعد الشر عنك مقامك محفوظ يا حصرى بيه ودى مجرد أجراءات علشان المركب تمشى بدل ماتغرق بينا

- أنا مش طايق أشوف الكلام ده بيحصل قدامى أنا سايب لك البلد كلها ومسافر كام يوم لحد ما أعصابى تهدأ

- سلامة أعصابك سافر ومتنساش تسلم لى على توتى

- توتى مين .. ماتستهبلش أنا عرفت كل حاجة ياحوحو وورينا بقى حتصرف عليها منين ولا خليها تمسكك مدير أعمالها .. تشيل لها الشنطة وتسرح وراها فى الكازينوهات والأفراح ياراجل ياندل بعد ماوقفت معاك وعملت منك بيه قد الدنيا وعرفتك سكة الملايين والشهرة تقوم تخونى وتتجوز الرقاصة خليها تنفعك

- الفلوس والشهرة دى أنا أللى عملتها بمجهودى وشطارتى

- لو على مجهودك وشطارتك يا أسطى كان زمانك لسه قاعد بتسمكر عربيات تحت الكوبرى وعايش فى أوضتين فوق السطوح

- ياريتنى أرجع زى الأول على الأقل ماكنتش شايل هم وبحط دماغى على مخدتى وأنام وأنا مبسوط لا عليا دين ولا مسؤليه

-ماهى دى مشكلتك أنك لا بتحب تتحمل مسؤليه وعايز تعيش محلك سر ويوم ماسيبتك تتحمل المسؤليه عملت نصيبه سودا كان ممكن تودينا ورا الشمس

- أنت زعلانه علشان أتجوزت عليكى

- ههههه ضحكتنى جواز أيه أللى أتجوزته .. جواز الندامه أنت بتعتبر ده جواز .. ده أسمه هلس وطفاسه وخيابه طب أتجوز واحده محترمه مش كل يوم تعرض جسمها قدام الناس بالذمه أنت راجل أنت وأنا أللى كنت عايزه أعمل منك حاجة عليها القيمة وأدخلك البرلمان وأخلى عيالك تفتخر بك تقوم تعمل كده طب خلى ست توتى بتاعتك تنفعك أصل ديل الكلب عمره مايتعدل

- فكيهه ماتطوليش لسانك أحسن لك أنا حر أعمل أللى أنا عايز أعمله

- بقولك أيه أنا مش فضيالك ورايا شغل خلينى أدور على حل من النصيبه أللى وقعتنا فيها ياسمكرى الغرام ويريتك تلم حاجتك وماشوف وشك هنا تانى

- يعنى الحق عليا أنى أتنازلت لك عن الشركة وكل أموالى

- شركة أيه وأموال أيه يا أبو شركة قالوا لو كان فيه الخير ماكان رماه الطير أنا  أنا أنقذتك من نفسك ومستعده أرجع لك مخروبتك أللى بتقول عليها شركة ومستعده أجيب لك عيش وحلاوة كل يوم فى السجن

- يظهر أن أحنا مش حنتفاهم أبدا أنا ماشى ومش حتشوفى وشى هنا تانى

يخرج حصرى من المكتب ويغلق خلفه الباب بعنف ويقذف فى وجهها مفاتيح السيارة التى يركبها فتجلس فكيهه وهى تضع يدها فوق رأسها وهى تبكى بعد أن تحطمت أحلامها بعد أن خسرت كل شيئ

الحلقة رقم (13) والأخيرة

النجاح والندم

تبدأ أم بدوى خطتها فى الخروج من هذه الأزمة بأن قامت ببيع معظم ممتلكاتها وأغلقت العديد من الفروع وأوقفت حملة الأعلانات وعادت هى وأولادها إلى شقتها القديمه فى مصر الجديده وطوال فترة التقشف لم يغب عن بالها حصرى فكانت أخباره وتحركاته على علم بها يوميا فقد أستغنت عنه توتى وطلقته وعاد مرة أخرى للحرفيين وقام بفتح ورشته القديمه ولكن الحال كان غير الحال فقد نسيه الزبائن وأصبح يعمل على الزبون الطيارى فيوم عمل وعشره يجلس أمام الورشه ينتظر الفرج وفى آخر الليل يعود لشقته القديمه فوق السطوح ليبيت فيها

ولكن النوم جفاه بعد أن تدهورت أحواله ويعض على أصابعه ندما على خيانته وغبائه الذى أرجعه للضياع ...ويحدث نفسه بالساعات والدموع تملء عيناه وغصة الحزن التى ملئت كل جوراحه بعد أن تدهورت صحته

- ياخسارتك ياحصرى كل شيئ ضاع وراح من غباوتك.. فينك يا أم بدوى ياوش السعد مش حشوف يوم من أيامك يا فكيهه أللى ضفرك بمية واحده زى توتى عيشتى معايا على الحلوة والمره وأنا ما أقدرتش تعبك ومجهودك معايا ...هيه

الله جاب.. الله أخد ..الله عليه العوض .. ياترى ياولادى عاملين أيه .. أنتى فين يا أم بدوى وحشتنى خناقاتك وأنتفاضاتك

وبعد سنه وعدة شهور وهو يجلس أمام الورشه يحضر الأسطى عوض والأسطى ماهر جيرانه القدامى فى الحى - صباح الخير ياحصرى باشا

- صباح النور يا أسطوات أتفضلوا نشرب الشاى

عوض : شوف يا أسطى حصرى.. سلامه فى خير.. وخير فى سلامه أحنا كده بالعربى جايين نشترى

- تشتروا أيه أنا عندى حاجة أبيعها ياجدعان

- نشترى الورشه بتاعتك .. هو حد قال لكم أنى عايز أبيع يا أسطوات

- أحنا قولنا طالما ربنا فتحها عليك ورجع أسمك فى السوق قلنا أكيد أنت حتقفل الورشه زى زمان وترجع تدور شركتك من تانى وأحنا أولى من الغريب

- شركة أيه وسوق أيه ماهو أنا قدامكم أهه قاعد على مصطبة يُرزق ..وحياة أبوكم مش عايز تريأه على الصبح لأنى روحى فى مناخيرى مش طايق ولا كلمه

- يا أسطى حصرى ماعاش أللى يتريأ عليك ده أنت سيدى الأسطوات أحنا لما شوفنا الأعلانات فى التليفزيون وصورك فى أعلانات الجرايد قولنا ان ربنا فرجها عليك من تانى وطلعت من الأزمه أللى كنت فيها وده سبب مجيتنا .. مش دى صورك أللى ماليه الجرايد وده أسمك حصرى موتورز وبالأمارة حتقوم بأفتتاح فرع جديد فى الدقى بكره

حصرى وهو مندهش : أنا .. أيوه أنت وبلاش الحركات بتاعتك دى عايز تخزى العين عنك ولا أيه ياباشا

يضحك وهو يضرب كف بكف : لولا أللى أنا شايفه فى الجرايد ما كنتش صدقت أهى عملت أللى ما أقدرتش أعمله

- هى مين يا أسطى ؟؟ قولت أيه حتبيع

- بعدين بعدين نبقى نتكلم فى الموضوع ده بعدين بس أدونى الجورنان دة

يغادر الأسطوات وهم يتعجبون من تصرفات حصرى ورد فعله الغريب الذى ليس له تفسير ويجلس وهو سعيد بنجاح أم بدوى فى أن تعبر هذه الأزمة ولا أجدعها رجل ولولا كرامته لقام من فوره يهنئها على شطارتها وأنقاذ الشركة من الأفلاس

وأكثر من هذا لم ترفع أسمه من الشركة ويقول لنفسه : أخص عليا وعلى قلة أصلى.. طلعتى أصيله يا أم بدوى بجد ..وهو فى سرحانه يسمع صوت كلاكس وعربة أم بدوى تقف أمام الورشه وتنزل منها وتتقدم نحوه وهى فاتحة زراعيها وهى تقول : قوم يا أسطى ربنا فرجها من عنده .. المفاجأة ألجمته فيرتمى على صدرها وهو يبكى كالطفل الصغير وهى تمسح على رأسه بحنان

- حقك عليا يا أم بدوى أنا غلطت فى حقك وأستاهل كل أللى حصلى

- ماتقولش كده يا أسطى أنت حبيبى وجوزى وأبو عيالى وماتهونش العشرة ألا على أبن الحرام أحنا ولاد النهارده قوم بينا علشان محضرالك مفاجأة فى البيت

يضحك أبو بدوى ويتذكر سابق عهده مع أم بدوى : يظهر أن ليلتنا عنب

- طب أقفل الورشه وتعال أركب هنا جنبى لما نشوف حتبقى عنب ولا مشمش...

ههههههه هئ هئ هئ

تمت