العضو الخشبى
الحاصل على وسام الديدبان
بمنتديات أبو قردان
زيزو :أنا زعلان قوى يا تكاوى يا خويا
تيكاوى : زعلان ليه كفانا الشر ..
- لأنى لم أكرم من أصدقائى وحبايبى فى التكية
تيكاوى : قووول لهم الكلام ده وأيه أللى حايشك
- الحقيقة مش عارف اقول لهم أيه.. ما هو أللى مايشفش من الغربال يبقى أعمى ياجدع .. تتوزع الألقاب والأوسمه على الحبايب والخلان وأنا كأنى لم أكن فهذا عضو ذهبى وآخر فضى وثالت برونزى ورابع حديدى وخامس صفيحى .. وأنا ياولداه لم أنل شيئا من هذه المعادن لتقترن بعضويتى طب أن شالله أكون عضو خشبى أو كرتونى المهم يبقى فيه حاجة الواحد يفتخر بيها بدل العضوية الحاف القرعة دى
- أزاى الكلام ده يحصل
- أهو حصل يا عم الحاج .. وأللى حازز فى نفسى قوى أن الألقاب والأوسمه أتوزعت والمخزن فضى ما عدش فيه ولا سنتوفة لقب أو وسام
- طب والعمل يا عم زيزو
- العمل عمل ربنا .. أنا جائت لى فكره كويسه أهو الواحد يقلب عيشه برضه ويطلع بحق الدخان .. حتعمل أيه ؟؟
- حفتح مركز لتوزيع الأوسمه والألقاب فى التكية .. وأللى حيرمى بياضه ياخد اللقب والوسام أللى يعجبه صوت وصوره
- يعنى بقت العمليه بيع وشراء
- وماله يا خويا مش زمان كان الأغنياء بيشتروا البهاويه
- آه دى البهاوية مش لقب أو وسام فى منتديات النت
- عندك يا أخ ..وهى البهاوية تفرق أيه عن وسام الأنتماء أو وسام البتنجان أو وسام البكلويز أهى كلها ألقاب وفشخره فاضيه بس كفايه لما تدخل على ناس وتقول لهم أنا العضو الخشبى الحاصل على وسام الديدبان بمنتديات أبو قردان .. حاجة تفرح كده وتملء العين .. مش أقرع كده بدون ألقاب أو حتى غطاء كوكا كولا صاروخ يتعلق على صدرك
- يا عم زيزو أنت يهمك الألقاب والحاجات دى ده أنت ياما شبعت ألقاب وشهادات شكر وتقدير
- أهو القر.. ده أللى جايبنا ورا .. أهم حاجة التقدير يامواطن وألا نفضها سيرة من التقديرات والأوسمه والألقاب ويبقى الكل سواسيه عضو حاف بدون غموس أو طبل أو زمر أو زينه أقرع يعنى علشان ماحدش يزعل وكلنا ولاد تسعة أو سبعة ماتفرقش
- يعنى أنت بتطالب بألغاء الألقاب
- عليك نور .. أشمعنى الثورة قامت بألغاء الألقاب وماعدش فيه باشا اوبيه
- أو دولة الهانم
- بس الألقاب رجعت تانى يازيزو
- هى رجعت فى حتت .. وحتت لأ .. رجعت فى البوليس ومجلس الوزراء
ورجال الأعمال ويستخدمها العامة فى المغازلة الحريمى .. ياباشا ياباشا
- طب تحب نكلملك حد من اللجنة العليا
- عايز أسئلك سؤال هم ليه سموها لجنة عليا
- مش عارف واللهى يازيزو ..
- بس أسمها فخم وعليه القيمه يعطيك أحساس بأن اللجنة دى قاعدة فى المغارة أللى فوق الجبل واعضائها كلهم يلبسون النظارات السوداء والرجال منهم يدخنون السيجار الكوبى والسيدات من النوع الحديدى الذى يبتسم فى توقيتات محدده
- بلاش ياعم اللجنه العليا وحياة أبوك .. أحنا مش حمل لجان .. أحنا أتهرينا لجان .. بقولك أيه يا تكاوى ياخويا طالما بنتكلم بقى فى سياسة عليا تقدر تقولى الواحد يبقى عضو أزاى فى اللجنه العليا أو أى لجنه سفلى حتى أو متوسطه
- ما أعرفش واللهى يا عم زيزو .. أفتكر كده والله أعلم أن اللجنه دى عبارة عن شركة وهى أللى مأجره المنتدى بالبوفيه وصالة الأفراح أللى فى السطوح ووخداه قانون جديد وكل واحد فيها بيساهم فى الأيجار
- أممممه عشان كده سموها اللجنه العليا .. أكيد مقرها فوق السطوح للسيطرة على صالة الفراح.. أتفهمت كده .. وعرفت مخزن الألقاب والأوسمه مين أللى فضاه .. أنا عرفته ومش حقول أسمه .. حسيبكم تعرفوه بنفسيكم ومن يقول الأسم الصح سأقوم بمنحه وسام أبو جلمبو نايم على جانبو للرجال وأم الخلول بتاكل فول للآنسات والسيدات
- أنت رجعت فى كلامك ولا أيه يا عم زيزو مش عايز اكلمهم يشوفوا لك لقب أو وسام أستعمال طبيب
- لا ياعم الطيب احسن ولكننى أحب أن أنكش الأدارة كل فترة كنوع من الدعابة والغزل والحوار المتبادل
كل سنه وأنتم طيبين
يا اعضاء التكية الكرام
رمضان كريم
ليست هناك تعليقات:
إرسال تعليق