شمروخى يا أمه
كلنا طبعا عارفين الشماريخ التى أنتشرت فى ملاعبنا بعد ثورة 25 يناير وما قبلها بقليل مما جعل الأتحاد الدولى لكرة القدم وبالتالى الأتحادات المحلية والقارية بتحريمها فى الملاعب وتوقيع عقوبات مالية وحرمان للجماهير من حضور المباريات وبالرغم من هذا دخلت الشماريخ وهاتك يا شمرخه فى الملاعب ووقع يا أتحاد عقوبات زى ما أنت عايز .. دعونا نسأل عدة أسئلة ونترككم تجيبون عليها بنعم أو لا وستعرفون الحل فى النهاية بأن أصحاب الشماريخ مظلومين
س1:الشماريخ دى هل هى صناعة مصرية
ج1 : لا بل هى صناعة صينية
س2 : من يقوم بأستيرادها من الخارج
ج2 : تجار مصريين وتدخل عبر المنافذ البرية والبحرية والجوية لجمهورية مصر العربية بالرغم من صدور العديد من المنشورات بحظر أستيرادها ودخولها البلاد
س3:هل الشماريخ الموجوده فى السوق حاليا وفى أيد شباب الألتراس بضاعة مهربه ج3 : نعم هى بضاعة مهربة وتبلغ قيمة المهرب منها والموجود فى مخازن التجار ما قيمته 125 مليون جنيه مصرى أى أننا نحرق 125 مليون جنيه أبتهاجا وأحتفالا بتسجيل أهداف خايبه ومشكوك فى شرعيتها من تسللات ومن عمى حيسى متعمد أو غير متعمد من الحكام وحاملى الرايات فى مرمى الخصم وولع شمروخ يا جدع وفرّح العيال وخوف الحكم
هل أدارات الأندية والأستادات مشتركة فى الجريمه : نعم لأنها لم تقم بالتفتيش الجيد والدقيق وتطبيق القانون بمنع دخول الشماريخ للنوادى ويشترك معها فى نفس الجريمه الأمن المسؤل على النظام فلماذا أذن لا توقع عقوبه على الأمن الذى سمح بدخول هذه الشماريخ التى فى حجم كوز الذره الصيفى الهجين مقاس 46 دون أن يلحظ وجودها .. ويقال والعهدة على الراوى أن الشماريخ تباع فى المدرجات عينى عينك أى أن المشجع يدخل الأستاد طاهر ونقى ومتوضئ وهو لا يحمل أى شمروخ وينتظر مرور بياع الشماريخ الذى يحمل كرتونه على ظهره ويسير بين المدرجات وهو ينادى : الشماريخ العال ياشماريخ.. خدلك شمروخ للعيل .. شمروخ للمدام .. شمروخ لحماتك وجدد حياتك
دعك من الأمن فى هذه الليله..فالأمن مقموص اليومين دولت وواخد على خاطره ونفسه ومنى عينه أن الملاعب تولع بأللى فيها عشان يرتاحوا من قرفهم وطولة لسانهم ( بالعربى ثأر بايت ) ولن ينعدل الأمن ألا بعد أن يقوم الشعب المصرى بمسيرة مليونية يطوف بها على جميع اقسام الشرطة المهجوره لتقديم الأعتذار الواجب حتى تعود المياه لمجاريها ويترك بيت أبوه ويعود لرزالته المعتاده لأننا بالعربى وحشتنا شلاليته والصفع على القفا والتعليق والنفخ والألفاظ القبيحة
نشوف وجهة نظر المتشمرخين
فيقول كبير المتشمرخين : وفيها أيه يعنى لو أباحنا دخول الشماريخ والمفرقعات والألعاب النارية إلى ملاعبنا هل الدنيا حتخرب أو سيؤثر هذا فى سير المبارة .. بالطبع لأ .. بل بالعكس بتعمل جو فرايحى لذيذ وبتسخن المشجعين وعلى رأى المثل :أللى معاه قرش محيره يجيب شمروخ ويولعه ....وبعدين واحد وفرحان ومولع شمروخ مال أهلك أنت بقى !!
لحمة السنى
دخل أبو محفوظ على أم السعد مهرولا وهو يحمل لفافة كبيره وينادى عليها بأسم الدلع الذى نسيه من زمان: صوصو .. صوصو.. شوفى أنا جايب لك أيه يا وليه أفرحى وزغرطى
- لولولولى.. لحمه يا مانت كريم يارب.. نورت بيتنا ومطبخنا وحلتنا ياغاليه
- ومش أى لحمه دى لحمة السنى أللى الناس كولتهم بيشكروا فيها ..
- حلوه يا أبو محفوظ يارب دومها نعمة ويكتر فى أنتخابتهم ( تأخذ منه الكيس وتزنه بيدها وتقوم بفتحه وتمصمص بشفتيها ) الراجل ده حيفضل طول عمره أيحه مش حيتنزه أبدا .. بص حاطط لك أيه فى الكيس حتتين دهن على شغته على عضمه على حتة فشه والأسم بيوزع لحمه وحاطط صورته على الكيس ورافع حواجبه لفوق عامل زى شرفنطح ( ينظر محفوظ للحمه وصورة السنى وهو يتعجب ) - هى دى حتة اللحمة أللى هانت عليك ياسنى والأسم دابح عجول وخرفان وعامل لى شادر فى وسط البلد صدعتم فيه دماغنا بالكلام الفارغ عن الديمقراطية والحلال والحرام علشان ننتخبكم يا حرامية يا أوباش دوروا بقى على أللى يديكم صوته
- أيه أيه يا خويا روح أرمى له اللحمه فى وشه وتعالى أفرجك على لحمة سعيد الغتت .. لحمه شكلها يفرح تتاكل نيه .. هو غتت صحيح لكن أنزه من السنى بتاعك .. رجالته عدت على بيت بيت فى البلد توزع اللحمه بكل أدب وأحترام
( يقلب محفوظ فى كيس لحمة سعيد الغتت وهو يستغرب ) – بس لون اللحمه دى غريب قوى يا أم السعد ..حمراء قوى أنا عمرى ماشوفت لحمه بالشكل ده
- هو أنت من أمتى بتشوف أو بتاكل أو بتشم اللحمه ياراجل
- ماشى بس أرمى الكيس أللى عليه صورة الجدع الغتت ده بينرفزنى أسم على مسمى صدق من سماك الغتت
- لأ لأ لأ .. يا أبو محفوظ .. الكيس المعفن أللى مش عاجبك ده ثمنه 100 جنيه
نسلم لهم الكيس فى لجنة الأنتخابات تتلايم على 100 لحلوح
يسمع صوت ضجة وهيصة فى الشارع فيطل من الشباك لأستطلاع الأمر
- فيه أيه يا واد مجاهد
- بيقولوا أن الحكومة قبضت على سعيد الغتت لأنه بيدبح حمير وبيوزع لحمتها لأجل الأنتخابات
- هههههههههه يا ولاد الحرامية ولا سنى نافع ولا غتت نافع
كوسه
يجذبه من قفاه بعنف وهو يقول : أنت ياض كل مليونية تشرف هنا ..دى خامس مره تدخل السجن الحربى ..أنت لا تتوب ..أسمك أيه ياض
- أسمى عفارم عبد المجيد يا حضرة الصول
- أفتكرت أسمك .. أخد الطريحة يا نصحى
- أخدها ياريس بدون أى علامات أو أصابات ..أسلمه هدومه خليه يغور من هنا
- أستنى يا نصحى لما نعرف حكاية الجدع ده أيه..( يزنقه فى الجدار بعنف) .. قوللى ياض أنت كل مره تتحبس هنا وتطلع بكوسه وكل كوسه أنقح من الكوسه أللى قبلها مره مدير الشرطه العسكرية ومره قائد المنطقة ومره رئيس الوزراء والمره أللى فاتت كان المشير بنفسه ..المره دى مين ياض أتكلم
- الريس أبو علاء
- أبو علاء مين ياض يكونش قصدك الرئيس المخلوع
- ماتقولش عليه المخلوع لو سمحت أسمه الرئيس المتنحى
- نمشيها المتنحى بس أنت بتشتغل أيه ياض
- أنا ما بشتغلش
- أبوك بيشتغل أيه ياض
يسكت ويهمس للصول وهو يرتجف : أبويا تا تا تا جررر
- تاجر أيه ياض
- أستيراد وتصدير وتحف وأنتيكات
- قول بقى كده بزنس يعنى .. وأيش لمه على الناس الجامده دى..
- أبويا مالوش دعوه بالحكاية دى .. مامى تبقى صاحبة الهانم
- سيبنا من أمك وأبوك أنت أيه أللى بينزلك المظاهرات وفى كل مره تتمسك وأنت معتصم فى ميدان التحرير وتبيت يومين ثلاثة فى السجن ويفرج عنك فيه أيه ياض أنطق
( يهمس العسكرى نصحى فى أذن الصول فيضحك بصوت عالى ويضرب عفارم على ظهره وهو يطرده خارج المكتب )
- يخيبك شاب سيس بصحيح .. مالقتش ألا المكان ده .. روح لعنة الله عليك
ليست هناك تعليقات:
إرسال تعليق