عندما رفعت أم تفيدة سماعة التليفون لتطلب صديقتها وحبيبة قلبها أم صديق لم تسمع صوت الحرارة فى السماعة فقالت أكيد أبو تفيده وقع منه التليفون فى الأرض أو يكون سلك السماعة أو الفيشه فصلت فقامت تنادى من الشباك على شحاتة الكهربائى الموجود تحت البيت
وبعد الفحص والكشف والتمحيص وتجربة أكثر من عدة على الخط جاء تشخيص شحاته بأن العطل فى الخط العمومى ويلزم أن تقوم بالأبلاغ عن العطل الأن وبدون تأخير فقامت على الفور بالطرق على جارتها أم هلال ففتحت لها
- خير يا أم تفيده
- خير يا حبيبتى من بعد أذنك ولو فيها رزالة تقدرى تتصلى بأعطال التليفونات وتبلغيهم عن تليفونى أللى أصابته السكته
- وماله يا ختى أتفضللى .. (وتنادى على أبنها ) واد يا هلال تعالى كلم الأعطال وبلغ عن تليفون أم تفيده
صوت من الداخل : حاضر يامه خمس دقايق وأجيلك حالا
أم هلال : أجيب قهوة ولا شاى ولا شربات ده أحنا زرنا النبى يعنى ما نشوفيك ألا علشان التليفون .. يارب يعطل بأستمرار علشان تطلى علينا
- يا ختى أنا تحت النظر بس من غير أعطال أنت ماتعرفيش التليفون اللى من غير حرارة بيبقى فى البيت زى الطبخة أللى من غير لحمة والست أللى من غير راجل أو الحلة المخرومه .. بيسبب لى أرباك وبيوظ سيستم حياتى
- أيه يا حبيبتى سمسم حياتك ده يا م تفيده
- تتك أيه يا أم هلال.. يعنى نظام حياتى .. ما تشوفى المحروس أبنك خليه يتصل وبعد كده يرجع يشوف أللى وراه .
- الواد يختى عامل فيها مخترع وجايب شوية عِدّد على أبصر حديد على سلك وطول النهار شغال يفك ويربط قال أيه بيعمل جهاز حيكلم بيه الناس اللى عايشه فى الفضاء
- والنبى ده أبنك فايق ورايق قوى .. ناديله خليه يخلصنا وبعدين يرجع تانى
- واد يا هلال انت يامنيل تعال وابقى أرجع تانى
هلال يحضر : أزيك يا خالتى أم تفيده .. حاضر حبلغ الأعطال حالا
أم هلال : أومال ياختى الواد دماغة كومبوروتر ..أسم الله عليه
تعود أم تفيده إلى شقتها بعد أن شكرت أم هلال وأبنها على هذه الخدمة الجليلة وتنشغل فى المطبخ وكل فترة تذهب لترفع السماعة لتتأكد بأن الحرارة عادت ولكنها تجده جثة هامدة فيزداد قلقها وتمر ساعتين وتسمع صوت رنين التليفون وهو يصلصل فتسعد وتجرى لترفع السماعة فتسمع صوت عامل التليفونات
- ألو معاك مصلحة التليفونات أحنا صلحنا العطل يا مودام
- متشكرين يا خويا كتر خيرك
تغلق السكة وتذهب للمطبخ وبعد نصف ساعة تسمع جرس التليفون فتسعد بصوته وهى تقول أيوه كده أملء البيت رن يا حبيبى .. ترفع السماعة
- ألو ده رقم 34555678 بأسم الحاجة أم تفيده
- أيوه مظبوط .. العطل أتصلح والحرارة رجعت
- متشكرين مين حضرتك .. أنا رئيس مصلحة التليفونات يا أم تفيده وبنتأكد من الأصلاح ..
- مدير مصلحة التليفونات بنفسه ما شاء الله
- أومال أحنا حيجلنا أعز منك يا أم تفيده
- متشكرين ياباشا ربنا مايحرمنا منكم
تغلق السماعة وبعد ساعة تسمع رنين التليفون مرة أخرى فترفع السماعة وهى سعيدة
- ألو ده رقم 34555678 بأسم الحاجة أم تفيده
- أيوه مظبوط .. العطل أتصلح والحرارة رجعت
- متشكرين مين حضرتك.. أنا وزير المواصلات يا ام تفيده وبنتأكد من الأصلاح
- وزير المواصلات بنفسه لا ده كتير قوى .. أومال أحنا حيجلنا أعز منك يا أم تفيده .. متشكرين ياباشا ربنا مايحرمنا منكم
تغلق السماعة وبعد ساعة تسمع رنين التليفون مرة أخرى فترفع السماعة وهى قلقة وهى تقول أيه اللى جرى هو التليفون جاله أسهال ولا أيه
- ألو ده رقم 34555678 بأسم الحاجة أم تفيده
- أيوه مظبوط .. العطل أتصلح والحرارة رجعت
- متشكرين مين حضرتك..أنا الدكتور أحمد نظيف يا أم تفيده وبنتأكد من الأصلاح
-سيادة رئيس الوزراء بنفسه لا ده كتير قوى قوى أنا كده حعيط من الفرحة
- لا تعيطى ولا حاجة .. أحنا حيجلنا أعز منك يا أم تفيده .. متشكرين ياباشا ربنا مايحرمنا منكم
الحلقة رقم (2)
فخامة الرئيس
تقوم أم تفيده وهى تحدث نفسها .. معقول رئيس مصلحة التليفونات ووزير المواصلات ورئيس مجلس الوزراء بيتأكدوا من أصلاح الخط بتاعى هو جرى أيه
فى الدنيا يا خواتى .. تمر ساعة أخرى وتسمع رنين التليفون فترفع السماعة
وتسمع صوت محترم به وقار وأدب جم : - ألو ده رقم 34555678 بأسم الحاجة أم تفيده
- أيوه يا خويا أنا أم تفيده خير حضرتك مين
- أنا اللواء عبد المهيمن من رئاسة الجمهورية لو سمحتى خليك على الخط حيكلمك فخامة رئيس الجمهورية حالا
تسمع صوت موسيقى وهى تتعجب من الذى يحدث وتتوقف الموسيقى وتسمع صوت :أزيك يا أم تفيده أنا رئيس الجمهورية .. أخبارك ايه وعامله أيه مبسوطه
الحرارة رجعت والخط أشتغل
تنفعل أم تفيده : أنت مين حضرتك
الصوت بأنفعال وشخط : أنا سبق وقولت لك أنا رئيس الجمهورية أنت مش مصدقة ولا أيه ياست أنت .. الحرارة رجعت والتليفون أتصلح ولا لأ..ردى
- أتصلح معاليك وبقى زى الفل
- قولى كده ولا لازم تلوكى أيه مش مصدقة أن الرئيس بنفسه بيدور على راحة المواطنين
- أبدا ياريس بس المفاجأة خلتنى مش مصدقة نفسى لأن رئيس الوزراء مكلمنى من قيمة ساعة وقبله وزير المواصلات وقبله رئيس مصلحة التليفونات .. مش عارفه ياريس أيه الأهتمام ده كله
- أحنا حيجلنا أعز منك يا أم تفيده
- ربنا يخليك ياريس وينصرك على مين يعاديك وسلامى للست العظيمة أم جمال
- شكرا يا أم تفيده لو كانت موجوده كانت كلمتك بنفسها
- تيجى بالسلامة ياريس
- مش عايزه أى حاجة تانيه يا أم تفيده قبل ما تقفلى
- العفو ياريس أنت مخلينا عايزين حاجة أقفل حضرتك الأول
- قولت أقفلى يا أم تفيده وألا حنسحب منك الخط وأبعتهم يشيلوا لك العدة
- حاضر حاضر ياريس
تغلق أم تفيده وهى تكلم نفسها : يرفعوا الخط ويشيلوا العده .. ألا العدة ده أبو تفيده دافع فيها الشيئ الفلانى
(وتظل تقلب الكلام فى رأسها وهى تتحدث بصوت مرتفع فى دخلة أبو تفيده فيشاهدها على هذا الحال )
أبو تفيده : مالك يا أم تفيده أنت بتكلمى نفسك فيه أيه ..أيه أللى حصل
( تحكى له أم تفيده من أول ما التليفون انقطعت حرارته وحتى آخر مكالمه من السيد الرئيس ) يضحك أبو تفيده ويضرب كف بكف :أنت عايزانى أصدق التخاريف أللى بتقوليها دى .. ياه ده أنت حالتك صعبه خالص أكيد فيه حد بيشتغلك وبيتسلى بك يا أم تفيده ..قومى جهزى العشا وبلاش الهطل ده .. آل رئيس الجمهورية بيطمن على رجوع الحرارة أل .. ده أنت أتلعب بك جامد قوى
- ورئيس الوزراء ووزير المواصلات ورئيس مصلحة التليفونات
- قومى ياوليه وبلاش عبط أنت عايزه تجننينى
ولم تمضى لحظات ألا والتليفون رن مرة أخرى فيأخذ أبو تفيده السماعة فيسمع صوت يتكلم باللغة الأنجليزية فلم يفهم ما يقال .. ويسكت الصوت ليتكلم صوت آخر باللغة العربية الفصحى : ألو هل هذا الرقم 34555678 بأسم الحاجة أم تفيده من فضلك
- أيوه مين حضرتك
- معك المتحدث الرسمى للبيت الأبيض الأمريكى وموجود على الخط الأن فخامة الرئيس الأمريكى باراك أوباما ويريد أن يتحدث إلى أم تفيده شخصيا هل هى موجوده وهل تستطيع أن تتحدث باللغة الأنجليزية
- أيوه موجوده بس هى ما بتعرفش ولا كلمة أنجليزى دقيقة واحده أجابها ترد عليك حالا
- لا بأس من فضلك بسرعة لأن فخامة الرئيس ورائه مشاغل كثيرة
ينادى أبو تفيده على زوجته : تعالى كلمى باراك أوباما بيتصل بك من أمريكا شوفيه عايز أيه ده كمان .. التليفون بقى دولى
الحلقة الثالثة
أوباما على الخط
تأخذ ام تفيده السماعة من زوجها وهى تتسائل : مين أوباما ده يا أبو تفيده
- مش وقته دلوقتى حا أبقى أفهمك بعدين
أم تفيده : ألو معاك أم تفيده
المترجم ستستمعين إلى سيادة الرئيس باللغة الأنجيلزيه وسأقوم بالترجمة فلا تردى ألا عندما أطلب منك ذلك
- تسمع أم تفيده صوت باللغة الأنجيلزية وهو يقول : Hallo lady your telphone is OK now
المترجم: فخامة رئيس الولايات المتحدة الأمريكية يسألك : العطل أتصلح والحرارة رجعت
- أيوه يا خويا وقله متشكرين ربنا يخلى أمريكا ورئيس أمريكا
أوباما بلغة الخواجات (عربى مكسر ) : أخنا هيجيلنا أأز منك يا أم كفيده يا آليه
- متشكرين يا خواجة ( تضع السماعة وتعقد زراعيها وهى تقف بتحدى أمام أبو تفيده : صدقت وسمعت بودنك أهُم الخواجات بتوع أمريكا بيسألوا عن التليفون بتاعنا علشان تصدق أللى بقوله
- أنت عارفه أنت كنت بتكلمى مين .. مين يعنى واحد خواجة
- أللى بتكلميه ده الرئيس باراك أوباما رئيس الولايات المتحده الأمريكية
- ربنا مايحرمك من العبط هاتى التليفون علشان أكلم واحد صاحبى
يرفع سماعة التليفون فلم يسمع صوت الحرارة وأصبح التليفون جثة هامده
- الحرارة راحت من التليفون يا أم تفيده
- مش قولت لك اللماضة واللك بتاعنا ده ممكن يسحبوا مننا الخط ويشيلوا العدة
- بلاش جنان وقومى هاتى الكشاف لما أشوف الخط ده فيه أيه
يتتبع ابو تفيده السلك الموصل للتليفون وينزل إلى المنور حيث البوكس فيجد السلك متصل به سلك آخر..يقوم بتتبع السلك الدخيل فيجده يدخل فى شباك أم هلال جارتهم فيطرق الباب عليهم فيفتح أبو هلال
أبو تفيده : مساء الخير يا أبو هلال ماتآخذنيش أن خبطت عليكم فى الوقت ده
أبو هلال : لا ابدا أحنا جيران والبيت واحد يا بو تفيده أتفضل أدخل
- عدم المؤاخذه يا أبو هلال هى الأوضه أللى شباكها بيطل على المنور مين أللى قاعد فيها
- دى أوضة هلال قاعد فيها ومعاه صحابه جوه بيذاكروا
- أن كان فيها أسائة أدب ممكن أدخل الأوضة دى لو سمحت
- هو فيه أيه يا أبو تفيده
- حتعرف دلوقتى
يدخل أبو تفيده وأبو هلال غرفة هلال فيجده هو وأصدقائه غارقين فى الضحك
يدخل أبو تفيده ويمسك هلال من قفاه : يرضيك اللى بيحصل ده يا ابو هلال فى الحركات أللى بيعملها أبنك .. سارق خط التليفون بتاعنا هو وأصحابه وقاعدين يشتغلوا أم تفيده من الصبح مره يعملها وزير ومره رئيس وزراء ومره رئيس الجمهورية وأخير عمل فيها باراك أوباما
أبو هلال يؤنب ابنه بعنف ويكاد يضربه هو وأصحابه ويجذبه من أذنه : باراك أوباما يا نتن ياعديم الضمير يا معفن أنت أتجننت ياواد .. رئيس أمريكا حته واحده أنت عايز تروح فى داهية .. طب خليها القذافى أو البشير أهم جيراننا ومش حيقولوا حاجة
أبو تفيده يضرب كف بكف وهو ينسحب : الحق مش عليك يا هلال
أبو هلال : أومال على مين يا ابو تفيده
أبو تفيده : عايز تعرف الحق على ميين يا أبو هلال .. الحق على الأمم المتحده أللى مش عارفه تأدب قراصنة التليفونات فى الصومال
محمود الدرملى خرج معاش مبكر ضمن هوجة بيع القطاع العام وترك العمل وهو يبلغ من العمر 45 عاما وقبض معاش بسيط ومبلغ تعويض يصل إلى 42 الف جنيه وفكر أن يفتح به مشروع بسيط يدر عليه ربح يساعد مع المعاش
وداخ السبع دوخات ليجد محل أو حتى خون صغير فى أى مكان ليفتح به دكان لبيع الخردوات أو الحاجة الصاقعة
مسكين عم محمود ندم أشد الندم بعد خروجه مبكرا من وظيفته ووقف فى مهب الريح وأرتفاع الأسعار أنها مؤامرة كبرى لتصفية العاملين لتباع هذه المواقع بكل بساطة ويسر لمن يدفع الثمن .. مؤامرة أشتركت فيها الحكومة والبنك الدولى والرأسمالية الدوليه
لم يجد محمود الدرمللى طريق غير أن يضع كل مكافئته فى البنك ليحصل على عائد شهرى هزيل يتناقص بأستمرار تحت ضربات الغلاء وتخفيض البنوك لأسعار الفائدة على الودائع ذات العائد الشهرى
وأصبح دخل الأسرة لا يفى بألتزامات الحياة اليومية من مواصلات ومصاريف وأكل وشرب وفواتير الكهرباء والمياة بعد أن ألغى من قاموس حياته الكساء والترفيه والمجاملات ولم يجد وسيله غير أن يبحث عن عمل فى القطاع الخاص وأنضم إلى طابور العاطلين الذين يبحثون عن شغل ويطرقون جميع الأبواب وليتحكم فيهم أصحاب الأعمال لتوظيفهم بأقل المرتبات وبدون أى ضمانات.. ولم يجد الرجل وسيلة غير أن يعمل فى شركات الأمن بمرتب هزيل مقابل خدمة أكثر من 12 ساعة فى اليوم يمكن أن يبيت فيها خارج منزله بالأيام .. ويمر بمطبات الحياة ويتخطاها أما قفزا أو زحفا المهم أن يعبرها سواء رضى أو أبى
وبدأت مكافأة عم محمود تتناقص شهرا بعد شهر لحاجة الأولاد لمصاريف الجامعة والمدارس حتى تم أبتلاعها تماما عندما قام بتجهيز أبنته الأولى للزواج
ولم يمر سوى ثلاث سنوات ألا وتبخرت المكافئة ولم يتبقى منها شيئ غير المعاش ومرتب شركة الأمن اللذان لا يكفيان أسرة مكونه من خمسة أفراد زوج وزوجة وثلاثة أبناء وضغوط الحياة تزداد يوما بعد يوم فماذا يفعل أمام قطار الحياة الذى يحتاج إلى وقود من أموال ليتحرك على قضبان الشقاء
وفى طريقه لعمله فى المساء وهو يسير فى الطريق يسمع من خلفه صوت ألة تنبيه سيارة تلاحقه بأستمرار فوقف ليوسع لها الطريق ويصعد فوق الرصيف فيسمع صوت صاحبها وهو ينادى عليه : محمود.. محمود يادرملى
فيقترب منها فيجد زميله السابق فى الشركة دسوقى الذى خرج معه معاش مبكر
فينزل من السيارة الفاخرة ويحتضن محمود بشوق ويطلب منه الركوب بجواره لتوصيله والتحدث فى الطريق
دسوقى : والله سلامات يا أبو حنفى عاش مين شافك ياراجل .. كده ما تسألش على صاحبك وحبيبك دسوقى
محمود : والله مشاغل يا دسوقى يا خويا
- قوللى عامل أيه شايفك ماشى مهموم وشايل الدنيا على دماغك أيه ياراجل فين أيامك أللى كنا ما بنبطلش فيها ضحك
- كانت أيام وراحتياريتها كانت دامت .. مفيش حاجة بتفضل على حالها
- ياه ده باين الدنيا ملطشه معاك قوى
- هى ملطشه بعقل .. أديك شايف خلصت المكافأة على مصاريف البيت وتجهيز البنت ووقفت يامولاى كما خلقتنى وأدينى بعافر فى الدنيا وباشتغل فى شركة أمن بقرشين يساعدوا على المعايش .. أنا شايف كده الحال من بعضه وأديك أهه بتشتغل سواق خصوصى
يضحك دسوقى بصوت مرتفع حتى تدمع عيناه : سواق أيه يا عم محمود العربية دى بتاعتى
محمود وهو مندهش : ماشاء الله ..العربية الفخمة دى بتاعتك يادسوقى .. اللهم لا حسد .. هو أنت قبضت مكافأة كام
- ياااسلام بقى تعب وعرق ورزق من عند الله بتعمل كده .. أوعى تكون بتلعب فى الممنوع ولا كده ولا كده
يضحك دسوقى : ممنوع أيه ومسموح أيه أللى بتتكلم عليه .. كله بالحلال وشرفك
محمود : حلال ..حلال أيه ده أللى يركبك عربية بالشكل ده واللبس أللى لابسه ولا الخواتم الدهب ومش عارف أيه أللى معلقة فى صدرك
- وكمان الساعة الدهب والبدلة المستورده .. مش واخد بالك ولا أيه
- أدينى أخدت بالى ياسيدى .. أموت وأعرف أنت بتشتغل أيه ووصلت للى أنت فيه ده أزاى
- معاك وقت تسمع ولا مستعجل ..
- أحنا قربنا نوصل الشغل أركن هنا قدام العمارة دى .. أنا بشتغل هنا أنزل نشرب كوبايتين شاى وأحكيلك حكايتى
يجلس محمود ودسوقى على كرسيين أمام العمارة التى يعمل بها كحارس للأمن بعد أن يغير ملابسه ويرتدى ملابس العمل ويسجل حضوره بالدفاتر ويودع زميله
فى الورديه ويرسل فى طلب الشاى من القهوة القريبه
الحلقة رقم (2)
مدام أولجا
دسوقى : أنا خرجت من هنا ووقفت محتاس أعمل أيه ياواد يادسوقى والقرشين على الأقد قولت بلاش تغامر بيهم وقمت حططهم فى البنك وقولت أجرب حظى فى القطاع الخاص لفيت لما دابت كعوب رجليا وفى مره أخدت بعضى وطلعت على مدينة العاشر من رمضان وأبتديت أسأل على شغل فى الحسابات لحد ماربنا كرمنى بمصنع ملابس صغير قدمت أوراقى فيه
قالوا لى تعال بكره الصبح علشان تقابل صاحبة المصنع .. روحت قابلتها أسمها مدام أولجا من رومانيا بتتكلم زى الخواجات شويه عربى على شويه رومانى المهم قدرت أفهم منها أن هى محتاجة واحد يفهم فى الضرايب وعمل الميزانية وبيفهم فى شغل المخازن وأنت عارف أن دى الخبرة أللى كسبناها من شغل الشركة أللى كنا فيها ..القصد أستلمت الشغل وأبتديت أنظم الدفاتر وعملت أول ميزانية وعرضتها عليها .. أتبسطت منى قوى وأبتديت أتعامل مع هيئة الأستثمار ومصلحة الضرايب والجمارك ودخلت جامد فى التصدير والأستيراد وحفظت كل كبيرة وصغيرة فى الشغل لدرجة أنى ماكنتش أروح بيتى ألا كل أسبوع.. هلكت فى أول ثلاث شهور لحد ما ظبط الشغل .. الست الحقيقة كانت بتقدر ورقتنى ومسكتنى مديرعام للحسابات.. لحد كده كويس
- كويس قوى ماهو كنا بنشتغل فى الشركة ليل ونهار ماكنش حد بيقدر .هيه كمل
- عدت أول سنه حققنا فيها أرباح ضعف أرباح السنه أللى قبلها .. الست أتبسطت أكثر وأعتبرتنى أيدها اليمين ووثقت في أكثر وعملت لى توكيلات رسميه بكل أعمالها عدا البنوك طبعا وأصبحت المدير التنفيذى للمصنع وأدير كافة أختصاصات أولجا أللى كانت بأستمرار تسافر أوروبا خصيصا لإحضار الأقمشة والموديلات الحديثة وتغيب بره بالشهر وترجع تلاقى الشغل ماشى زى الفل ولا يوجد عليها ديون وضرايبها متسدده والأنتاج بيزيد .. لحد مارجعت مره من السفر وهى يبدو عليها المرض وطلبتنى فى مكتبها
أولجا : أيه الأخبار يا مسيو دسوقى
- كله تمام يامدام الشغل ماشى على مايرام وأصبح لينا أسم كبير فى السوق المحلى والسوق الخارجى والبركة فى مجهودك معانا
- أسمعى يادسوقى أنا عايزه أرجع بلدى وأبيع المصنع
- خسارة يامدام المصنع من بعدك مش حتقوم له قائمة وكفايه أن أسمك على على المنتج بتاعنا .. حرام يا مدام أحنا عندنا أكثر من 250 عامل وفنى بياكلوا عيش هنا ويا عالم حيحصل لهم أيه لو بعتى المصنع
- أنا عيانه يا مسيو دسوقى ولازم أرجع بلدى أتعالج أو أموت هناك
- بعد الشر يا مدام أن شاء الله حتشفى وحتبقى كويسه
- ما ينفعش يا دسوقى أنا نهايتى قربت وحعمل عملية كبيرة نسبة نجاحها 20 %
- أن شاء الله حتنجح وتقومى بالسلامه
- أسمع يادسوقى ما حدش يعرف من العمال والموظفين بمرضى خلى الأمور تمشى زى ماهى لو مت خد المصنع حلال عليك ولو ربنا كرمنى ورجعت حعيش معاكم هنا فى مصر على طول
محمود : دى ست كويسه قوى هيه كمل
دسوقى : الست الحقيقة عملت لى توكيل عام بالتصرف فى جميع أموالها وممتلكاتها فى مصر وسلمته لى وسافرت بلادها من سنتين ولا أعرف عنها أى شيئ فنقلت الملكيه بأسمى وأحتفظت بأسمها على المصنع والمنتجات وأنا منتظر أعرف عنها أى حاجة
محمود : ياه يادسوقى رزقك يابنى ربنا يبارك لك
دسوقى : نيجى للكلام الجد .. تيجى تشتغل معايا يا أبو حنفى لأنى مش حلاقى أخلص ولا أشطر منك يا أبو الزومل والمرتب أللى أنت عايزه وحوفر لك سكن فى المدينه تجيب فيه مراتك وعيالك قولت أيه
محمود تطفر عيناه بالدموع ويقوم يقبل صديقه دسوقى وهو يدعو الله بالحمد والشكر والدعاء لصديقة الذى أرسلته له السماء بعد طول عذاب ومعاناة وهو يردد الأية الكريمة " وفى السماء رزقكم وما توعدون "
تأملت فى عجائب خلق الله عندما نظرت لطفل رضيع على صدر أمه وتابعت مسيرته الطفولية وتعجبت من طول مدة الطفولة التى يقضيها الأنسان من عمره بالمقارنة لباقى أعضاء المملكة الحيوانية فبنظرة سريعة على طفولة الحيوانات الأليفة والقريبه منا نتعجب فنجد الحمار.. مثلا بعد سنتين يصبح جحش ويكون مكلفا ببعض المهام مع صاحبة حتى يشتد عوده ليكون حمار شاب قوى بعد أربع سنوات وعنما يبلغ الخامسة من عمره يكون قد بلغ مبلغ شباب الحمير ومعدا للزواج والتناسل وتكوين أسرة حميرية محترمه وغير الحمير ننظر للقطط والكلاب والبقر والجواميس وغيرها من حيوانات الغابه فنجدها جميعا تنتهى فترة طفولتها مابين عامين إلى ثلاث أعوام .. فلو أفترضنا إن زوجتك أنجبت لك ولد أو بنت فى نفس اليوم الذى أنجبت فيه أنثى الحمار وأخذت الموضوع بنظرة العالم المتفحص وبدأت ترصد التطورات التى تلحق بطفلك وطفل أنثى الحمار سوف تتعجب قطعا وتصل فى النهاية إلى أن أبنك مازال عيل حتى يبلغ 18 عاما هذا فى عرف القانون ومن الممكن أن تمتد فترة طفولته لأكثر من ذلك ليصل على 25 عاما تكون فيها أنثى الحمار قد أنجبت فيها عشرات الحمير وأصبح لها مئات الأحفاد من الحمير البالغين المكلفين ومازال أبنك طفلا يعتمد عليك وعلى والدته من مأكل ومشرب وكسوة وتعليم وترفيه هذا بخلاف الرزالة والبجاحة وطولة اللسان طوال 21 عاما منذ مولده.. هذا إذا كان ولد سالك ومتربى صح ويمكن أن يظل مدة أطول معلق فى رقبتك إلى ماشاء الله
فترة الطفولة للأنسان تعتبر أطول فترة لهذا المخلوق على سطح الأرض وبدون مسؤلية وهذا فيه أرهاق شديد على الأب والأم وتبديد لثرواتهما المادية والذهنية والعصبية حتى يصبح أنسان واعى يتحمل المسؤلية هذا فى مجتمعنا الشرقى والمصرى على وجه الخصوص
ولكن توجد مجتمعات أخرى تؤهل أطفالها مبكرا على تحمل المسؤلية مبكرا جدا وتختصر فترة الطفولة والأعتماد على الوالدين لتكون عشر سنوات لينطلق فيها الطفل فى الحياة معتمدا على نفسه مع رقابة مستمرة من الوالدين فيخرج إلى سوق العمل ليكسب ويصرف على نفسه ويستطيع أن يجهز طعامه ومشربه وينظم فراشه ويشترى مايحلو له من لعب ومسليات دون أن يرهق أسرته ويكافح ليحصل على مجانية فى التعليم ويسافر ألاف الأميال للدرس والعمل وعمره لا يتجاوز الـ16 عاما ومن هنا يتولد عنده الشعور بالمسؤليه الملقاة على عاتقه
فإذا أردت أن تعلم طفل السباحة فألقيه فى الماء وراقبه ولا تخاف من صراخه ومع مرور الوقت سيدافع عن بقائه وسيتعلم فن العوم
أذن المشكلة هنا فى داخل الأسرة المصرية التى تحتضن أولادها وأولاد أولادها ولا تتركهم يواجهوا مصيرهم ليعوموا فى تيار الحياة كما ينبغى
فراقب البط أو الأوز وهو يربى فراخه وبمجرد أن يستطيع الوقوف والحركة تجرى بهم الأم إلى الماء ليسبحوا خلفها ليلتقطوا طعامهم كما تفعل ومن يتأخر تدفعه بقوة أمامها ليفعل مثل أقرانه أما نحن فى داخل العائلة المصريه لا نفعل ذلك بل نخاف أن يعمل أولادنا فى الأجازات الصيفية أو بعد الظهر .. هذا يحدث فى الأسر الميسورة أما الأسر الفقيرة فتدفع أولادها مجبرين لمواجهة متطلبات الحياة .. ولو عملت مقارنة بين طفل الأتارى وهو الذى يقضى أجازته ليلعب ويلهو وبين الطفل الذى يعمل فى الأجازات ستجد فارق شاسع بينهما من حيث الرجوله والذكاء والخبرة والأعتماد على النفس.. سيقول البعض المدرسة والتعليم والخوف من الأختلاط بأناس معدومى الضمير .. بالنسبه للدراسة لا تخف فالعمل يفتح مدارك الطفل ويضيف الجديد لخبراته ولكم أمثلة كثيرة فمعظم - أن لم يكن الكل - المتفوقين من المدارس الحكومية ومن الأقاليم ومعظمهم يساعدون أبائهم فى الحقول أو فى الورش ولم يأخذوا درس خصوصى واحد
ويأتى دور الأسرة فى التربية الصحيحة المبنية على الأخلاق والضمير والدين وهذا هو الدرع الذى يحمية لو أختلط بمعدومى الضمير
الأم هى مفتاح هذه المشكلة أن تتخلى ولو قليلا عن حنيتها الزائده وتدليلها لأطفالها هذا سيجعل منهم رجال عظام وسيدات فاضلات فى المجتمع
ما الدُنيا ألا مسرحٌٌ كبير .. فكلٌ منا له دور يؤديه ويرحل سواء كان هذا الأداء جيدا أو سيئا فهذه هى الحياة وقد يغيب بعض الممثلين عن خشبة هذا المسرح سواء متعمدين أو مع سبق الأصرار والترصد أو مُجبرين أو محبطين
والعرض مستمر لا يتوقف ولا ينتهى فقد يقوم البعض بأداء الأدوار الشاغرة ويصبح ممثل متعدد الأدوار والممثلين الجدد يحلون مكان القدامى والذين رحلوا وأحيانا يمل البعض من أداء دوره لعدم أقتناعه به أو الفشل فى أدائه على الوجه الأكمل ويبحث لنفسه عن دور جديد يؤديه فى نفس المسرحية يتناسب مع أمكانياته ومواهبه لربما ينجح أو يسقط ..وقد يتبادل الممثلين أدوار وشخوص اللعبه حتى يستمر العرض بدون توقف إلى أن تنزل ستارة النهاية ويحضر الكل لينال الأجر فمن أجاد فله الثواب والتصفيق ومن أساء فله العقاب والتعذيب
ونحن على مسرح الحياة نقوم بدور الممثلين والمتفرجين والنقاد فى نفس الوقت والقدر هو المُخّرج والمنتج وواضع السيناريو ومحرك الأحداث ولا أحد منا يعلم متى ينتهى دوره أو ينتهى العرض وما ستفسر عنه باقى الفصول
ولنا الحق فى تبادل الأدوار ولكن بما يتناسب مع النص وأى خروج عنه قد يؤدى بصاحبه أن يكون مسخ شاذ على خشبة الحياة .. فهل فكرنا يوما أو تمنينا أن نتبادل أدوارنا على مسرح الحياة .. فدعونا نتخيل وأقول نتخيل بأننا تبادلنا أدوارنا وبعد هذه المقدمه الفلسفيه وهذا الكلام المجعلص سواء هضمنا معانيه أو كبرنا مُخّنا
يدور موضوع هذه الحلقات عن تبادل الأدوار فى الحياة فسنرى كيف تقوم المرأة بدور الرجل والرجل يقوم بدور الزوجه والأم.. والطالب يصبح أستاذ أحيانا والأستاذ يجلس فى مقاعد الدرس والمجنون يناقش العاقلين.. والحكماء يستقون حكمتهم من المجانين ورجل البوليس يصبح المتهم وغيرها وغيرها من خلال حكايات قصيرة خياليه وواقعية فى أكثر الأحوال تعالوا بنا نشاهد هذه اللقطات المقلوبه
اللقطة الأولى
حكاية فوزى وألفت
جرس الباب يرن فيجرى فوزى ويفتح وهو يلبس مريلة المطبخ فتدخل زوجته فوزيه وهى تحمل بطيخة وتحت أبطها الجورنان وترتدى بدله وكرافته وقصت شعرها قريبه من قصت الرجال .. فيتناول منها البطيخة بيد ويحمل أبنه الرضيع باليد الأخرى
ألفت : هيه طابخ لنا أيه يافوزى على الغدا
فوزى وهو يضع البطيخة على السفرة : طابخ لك فضلة خيرك دقية باميه باللحمة الضانى ورز وغير السلاطات.. بس أرضع ميمى وأجيلك حالا
ألفت بعصبية : قدامك قد أيه وتغرف الأكل
فوزى : الأكل بيستوى على النار ..نص ساعة وكله يبقى تمام
- أومال قاعد طول النهار بتعمل أيه أكيد قاعد بترغى فى التليفون مع أصحابك
- ده أنا من الصبح مش عارف أتلم على نفسى أرضع فى الواد وأغيرله وشيلته ونزلت بيه السوق وأشتريت الطلبات .. الأسعار بقت نار يا حبيبتى ورجعت قمعت الباميه ونيمت الواد ونقيت الرز ونفضت السجاجيد وغسلت الكوافيل أتهديت
صوت بكاء ميمى واء وااء واااء ..ألفت وهى تنادى بعصبيه : يا فوزى يافوزى سكت الواد ده شوفه جعان ولا مبلول تغير له
فوزى يجرى على غرفة الطفل وهو يحمله : بس سد سد ماتعيطش ياميمى الرضعة جاهزه أهه ياننوس عين أبوك هززززز غيييي
ألفت : يا فوزى فين الميه السخنه
- حاضر حاضر أنا برضع ميمى وحجبها حالا
- فوزى يا فوزى أنت فين يا زفت شامه ريحة شياط
- مش من عندنا يا حبيبتى ريحة الشياط دى جايه من عند الأستاذ أدهم المخلوع
- الله يحرقكم بجاز رجاله خايبه مابتعرفوش تعملوا حاجة سليمه على بعضها
فوزى وهو يدعك قدم ألفت بالماء المملح وينشفها : وحياتك يا الفت ما تتعصبيش وتضايقى نفسك صحتك ياست الستات ماحدش حينفعك
- ماهو أنت قاعد بتاكل فى قته محلوله مش مقدر الشقىّ والتعب ألا أنا فيه....
وده بالذمه شكل تقابلنى بيه دقنك طويله وشعرك منكوش وريحة هدومك طبيخ على بى بى أففففففف قوم ياراجل أنت من قدامى شكلك بيعصبنى أنا حنام شويه ولما أصحى نبقى نتغدى .. هش الدبان وأقفل الباب وأياك تعلى صوت التليفزيون
فوزى : هش هش هشششش هششش ده دبان رزل بشكل
ألفت بعد أن أرتدت البيجامه : أنا قولت لك تقفل البلكونه أنما بسلامتك قاعد فيها وعمال ترغى مع الراجل الفاشل أللى مراته خلعته الشهر أللى فات .. قُرّيب أن شاء الله حتحصله .. مش سبق قبل كده قولت لك ما تتعرفش على رجالة من النوعية دى
- مافيهاش حاجة يا ألفت لما نقعد نتفك مع بعض بكلمتين ماهو غلبان ووحيد
- أنت قاعد ترغى والكلبه الحمارة الشقيانه ترجع من شغلها تلاقى الدنيا تضرب تقلب وما خلصتش الأكل أنا خلاص طهقت منك ومن عمايلك أنت مرهون يافوزى على طلقة واحده ومالكش رده أرمى عليك اليمين الثالثة روح وأنت!!!
يصرخ فوزى وهو يستعطفها : أرجوكى أنا فى عرضك يا ألفت ما تكمليش
- أنا خلاص فاض بيا ياعالم ومش نافع فيك نُصّح.. أطلقك ومن الصبح أتجوز سيد سيدك راجل لهلوبه يشوف راحتى ويحافظ على البيت ويسمع الكلام
- خلاص يا ألفت ماتزعليش نفسك
- قوم هات علبه السجاير من جيب الجاكته بتاعتى وولع لى سيجاره تتكم القرف محسوبين غلط على الرجاله .. بس فالح تقولى هاتى هاتى لما خلتنى شحت عليكم
( يقوم فوزى من أمامها وهو غضبان بعد أن أحس أخيرا بأن كبريائه وبرستيجه أهتز وأصبح ملطشه لألفت فيفتح الدولاب ويحضر الشنطه ليجمع فيها ملابسه )
ألفت : أنت بتعمل أيه ياض
فوزى : حسيب لك البيت وماشى عشان تستريحى وأقعدى بقى ببوزك الفقرى ربى أنت الواد وشوفى مين أللى يعبرك وأنا راجع بيت ماما وأياكى تيجى تصالحينى وأيه رأيك بقى أنا حرفع عليكى قضية طلاق ونفقة متعة وحضانه وحدوخك فى المحاكم .. وشوفى مين أللى حيغرف لك الباميه وكشفت راسى ودعيت عليكى دعوة راجل فى ساعة عصريه أن ربنا ينتقم منك يا ألفت يامفتريه خدى من قلبى وسُوريّى
ألفت : روح بس سرح شعرك وألبس بيجامه نظيفه وحط كولونيا وتعال أنا عايزاك فى كلمتين .. فوزى : طب مش تستنى لما ناكل الأول
ألفت : أنت حتستهبل ياراجل أنت أنا قولت دلوقتى يعنى دلوقتى ما طلعش زرابينى..
فوزى : دلوقتى.. دلوقتى.. أنت متأكده ...حماااامه
اللقطة الثانية
مين أبو مين ؟؟
يدخل حماده من باب الشقه فيجد والده الحاج مدبولى يرتدى البيجامه المخططه وعليها طاقية من نفس النوع.. ويجلس فى الصاله وهو يقرأ الجورنان فيبادره بالقول : أنت لسه لابس البيجامه العجيبه دى وقاعد تقرأ فى الجورنان ولا على بالك .. قوم ياعم الحاج بسرعة غيّر أللى لابسه .. خطيبتى زمانها جايه
مدبولى : ياأبنى لسه بدرى مش بتقول جايه الساعة سابعة ولسه الساعة سته
أنشراح زوجة مدبولى : ما تقوم بلاش مقاوحة مع الجدع غير هدومك ما تفضحناش .. حماده : لازم كده كل مره يدوخنا على مايسمع الكلام .. أبهَات آخر زمن .. وبعدين أسمعوا أنتم الأثنين تسلموا على صفاء وتتفضلوا من غير مطرود تسبونا لوحدنا .. مش عايزك يا عم مدبولى تنط هنا كل شويه ..ههه أنا فاهم حركاتك القرعة وكلامك أللى زى الدبش أللى بيودى فى داهية
يسمع الكلام عم مدبولى ويقوم صاغرا ليرتدى قميص مخطط وبنطلون مخطط ويقف أمام حماده ليشاهد منظره
حماده : تانى القميص والبنطلون المخططين هو أيه حكايتك غاوى حاجات مخططه ليه بيجامه مخططه بنطلون مخطط قميص مخطط .. ألبس القميص أللى أنا شاريه يا أخى
مدبولى : ياحماده ده لونه برتقانى فاقع لما بلبسه ببقى عامل زى اليوسف أفندى
- هى دى الموضه ياعم الحاج أسمع الكلام وبلاش مناكفه .. وبعدين تعال هنا أنت وديت مرتبك فين أنا شايف فى محفظتك غير خمسه جنيه
- أسأل أمك .. أخدت كل الفلوس وماسبتش ألا دول
- أحلق دقنك وبلاش تحط ريحة من بتاعتك لأنها بتقلب ريحة البيت وصفاء خطيبتى بيجيلها حساسية منها .. وبلاش ريحة ولا أى بلاوى من أللى بتحطها
- يا أبنى أنا حقعد جوه ولا له لازمه من الحلاقة ولا اللبس ولا الريحة
ينفعل حماده وينادى على أمه : ياماما يا أم حماده تعالى شوفى جوزك وأللى بيعمله ( يضع مدبولى يده على فم حماده ليمنعه من النداء على أمه : بس خلاص
بلاش فضايح هو أنا حلاقيها منك ولا منها حعمل أللى أنت عايزه أسكت بقى
- فين مفاتيح عربيتك أنا مش قولت ماتخدش المفاتيح ألا لما تقولى
- أنا نازل عندى كشف على دكتور الأسنان
- خد تاكسى يا أخى أو أتمشاها .. المشى كويس عشانك
- أمشى من شبرا لحد العتبه ياحماده
- أومال أنا أفسح خطيبتى بالميكروباس ولا التوك توك.. بلاش تروح النهارده
(يرن جرس الباب فيفتح حماده ليستقبل خطيبته وتمسك أنشراح مدبولى حتى لا يتحرك ليفتح الباب : أقعد هنا مش أبنك منبه عليك أن أحنا مانطلعش ألا لما ينادى علينا ولا غاوى مشاكل معاه وحاطط نقرك من نقره
- مش عارف مين حاطط نقره من نقر التانى ماشى يا أم حماده آدى أخرة دلعك فى المحروس أبنك حبسنا أنا وأنت فى الأوضه وقاعد لوحده بره هو والبت المايصة بتاعته الله أعلم بيعملوا أيه.. بنات آخر زمن أنا مش عارف الدنيا أتشقلبت البنت تروح تزور خطيبها فى بيته .. فين أهلها مش خايفين عليها
أنشراح تنفعل : حيعملوا أيه يعنى ياسى مدبولى واحد وخطيبته..ماتبقاش نيتك وحشه وحسك عينك تقول الكلام ده قدامه مش حنخلص ..
- حاضر حسكت وأحط فى بوئى جزمه قديمه لما نشوف آخرتها مع بوبى الحبوب بتاعك ( حماده ينادى من الصالون فتسرع أنشراح ومدبولى فى تلبية النداء وخرج كل منهما يحمل صنيه عليها فاكهة ومرطبات وشاى ويضعاها أمامهما ويقوما بالتسليم على صفاء والترحيب بها .. فتنظر إلى عم مدبولى وتكتم ضحكتها )
مدبولى : بتضحكى على أيه يا صفاء أكيد مش عاجبك القميص
صفاء : مش قصدى يا عمى بس لونه فاقع قوى ومليان دباديب وو..وو
- قولى ماتكسفيش ..مش مناسب لسنى ..نقاوة خطيبك ..حكم القوى على الضعيف
- بس دى الموضه يا عمى
- ينعل أبو الموضه وأللى ماشيين على الموضه أللى تخلى الواحد يبقى بالشكل ده
- أنا خارج رايح لدكتور السنان وواخد العربية ورميت قميصك البرتقانى من الشباك ومش راجع ألا آخر الليل خدوا راحتكم وأمك نامت كمان..nice time
صفاء : هئ هئ هئ يا حلاوة أبوك بيتكلم لغات ياحماده
حمادة : طب سيب مفاتيح العربية علشان أحنا خارجين
مدبولى :أبقى خد تاكسى ولاميكروباس أو توك توك أو أتمشى المشى مفيد للى فى سنكم تتكم القرف فيكم وفى أللى مربينكم ( يفتح باب الشقة ويصفعه بشده وهو خارج فيجرى ورائه حماده ولم يحصله وهو ينادى : حاج مدبولى بابا بابا)
مدبولى يرد عليه من بئر السلم : بابا مين ده أنت أللى بابا
يعود حماده ليجلس بجوار صفاء وهو يكاد يطق من الغيظ .. تضحك صفاء وهى تقبله فى جبينه: ما تزعلش يا مودى ..كويس أنه خرج
هههههههههه
اللقطة الثالثة
أسماعيل بيه الفراش
يقولون سواق المدير ..مدير.. وزوجة اللواء لواء وزوجة الرئيس سيدة مصر الأولى وزوجة الفقير ..يععععع.. والناس مقامات ومن عرف مقامه فى الهنا بات
يدخل عم أسماعيل الفراش وهو يحمل صنية المشروبات ويضع على كل مكتب طلبه حتى يصل إلى مكتب وليد الموظف الجديد فيضع أمامه كوباية شاى فينادى عليه : أنت ياريس شيل الشاى من هنا أنا مابشربش الشاى
أسماعيل : هنا يا أستاذ المشاريب مش بالكيف .. وبعدين أنت لسه مستجد يعنى ماهيتك على قدك كفايه عليك الشاى لما تترقى تشرب حاجة صاقعة ولما تزيد شويه تبقى الحاجة الصاقعة ومعها سندوتش ولما تكبر شويه كمان تجيلك القهوة
ما حد يفهمه يا جدعان ( ويتركه ويمشى فينادى عليه وليد : أنت ياريس أنت يا جدع أنت.. أنت يابنى آدم خد...
صفوت (موظف قديم يجلس بجواره) يضحك وهو يقول : نادى وقول يا أسماعيل بيه وهو يرد عليك غير كده مش حيعبرك وأنصحك أشرب الشاى وبلاش مشاكل أنت مش قدها وكده حيتخصم حق 30 كوباية شاى من مرتبك آخر الشهر نصيحة من أخوك الكبير أشرب الشاى من سوكات
وليد يتشعوز ويتزربن من هذا الكلام : لا ده تهريج وقلة أدب أنا حدخل للمدير أشتكيه هات ورقه يا صفوت أكتب فيه تقرير على قلة أدبه
( بعد ثلاثة أيام من تقديم الشكوى يصدر قرار بنقله للأرشيف )
وليد وهو ساخط ويتكلم مع صفوت : كلامك طلع مظبوط وجواب النقل صدر زى ماقلت.. قول لى وفهمنى أيه أللى بيحصل فى المصلحة دى
صفوت: نصحتك وأنت ما بتسمعش الكلام .. - طب والعمل
- أقولك أنا تعمل أيه هات ودنك ( يظل صفوت يهمس فى أذن وليد بالطريقة المثلى التى تجعله يمشى حاله ووليد يسمع له وهو صامتا وعيناه تزداد أتساعا وفى النهاية يقتنع وليد بنصيحة صفوت وهويقول : أجرب أللى بتقول عليه وأشوف النتيجة
وفى صباح اليوم التالى يمر عم أسماعيل على المكاتب ولا يضع الشاى على مكتب وليد فينادى عليه : أسماعيل بيه أسماعيل بيه من فضلك ولو سمحت تنزل لى شاى هنا .. يبتسم أسماعيل ويضع أمامه الشاى : حاضر ياسى وليد
وليد وهو يستسمح أسماعيل الفراش : حقك عليا يا أسماعيل بيه أللى مايعرفك يجهلك سامحنى ودى أول وآخر مره .. عيل وغلط
أسماعيل : خلاص يا وليد أفندى آخر النهار حتسمع أخبار سعيده
وفى أخر النهار يحضر عم أسماعيل وفى يده جواب بألغاء النقل ويخرج له جواب آخر بأسمه به شهادة شكر وتقدير على أدائه المتميز وتقرر الأدارة فى نهايته بمنحه علاوة أستثنائيه وحوافز ثلاثة شهور فيطير من الفرح ويقبل عم أسماعيل ويقف وهو يهتف بأعلى صوته : يعيش أسماعيل بيه ياااعيش وطز فى المدير
طز.. طز.. طززززز
اللقطة الرابعة
حاميها حراميها
فى داخل غرفة معاون المباحث يجرى أجتماع على مستوى عالى يضم أثنان من الأمناء وشلضم وبازوكا وهم من المسجلين خطر فى سرقة المساكن
أمين بيه معاون المباحث : الشغل ده ماينفعش الغلة نزلت قوى 3 شقق فى أسبوع واحد أنتم حراميه أنتم فين الباقى يا رمم .. المعلومات عندكم بالتفصيل المداخل والمخارج والتوقيتات .. غير ما احنا مأمنين لكم المكان بالدوريه ما فضلش غير نطلع أحنا نسرق مكانكم
شلضم : ياباشا شقتين منهم لاقينا أصحابهم قاعدين جوة وسهرانين وشقة صاحبها ضرب علينا نار وشقة لقينها على البلاط يظهر حد تانى سبقنا وقشطها
أمين بيه : أنت بتشكك فى معلومتنا ..إذا كان أصحابها مبلغين عليها أنهم مسافرين وآدى البيانات عندى
بازوكا : ياباشا الناس بتبلغ وبتنسى تقول لكم أنهم رجعوا من السفر
أمين : خلاص أتكتم حراميه فشله .. أسمعوا بقى تفاصيل العمليه الجديده .. فيلا واحد من المهمين قوى فى البلد ودى كل بيانتها وأنا عاينتها بنفسى .. الفيلا مليانه تحف وفيها خزنة سريه ما حدش يعرف مكانها غيرى مليانه من خيرات ربنا لأن صاحبها حرامى حكومى كبير يملك المليارات .. العمليه دى حتخلينا نعدى بس عايزه مفهوميه ومخ نظيف
شلضم : مفيش أنضف من مخك ياباشا ياريت تكون معانا فى العمليه دى كمان
أمين : أنا شايف كده برضه لأنكم بهايم ومش واخدين على الشغل النظيف
( توضع الخطة ويرتدى الجميع زى الشرطه ويتحرك الجميع فى الميعاد ويدخلوا الفيلا بعد منتصف الليل ويتم القبض على الغفير ويوضع فى البدروم ويدخلوا من أبواب الفيلا بعد فتحها بطريقتهم ويبدؤا فى تحميل المسروقات فى البوكس وفجأة تصل عربة أخرى للبوليس وبها ضابط ومجموعة من الأمناء والجنود وينزل الضابط ويشاهد المسروقات المنهوبة فى بوكس أمين بيه فيدخل الفيلا ويترك باقى القوة فى الخارج فيجد أمين ومن معه يحاولون فتح الخزينه على ضوء الكاشفات اليدويه .. فيضيئ نور الغرفة ويقف وهو عاقد زراعيه
- الله الله .. كده برضه يا أمين تعملها
- مين ...ثروت أنت جيت أمتى ياجدع
- هو ده أتفاقنا تسبق وتعمل العمليه لحسابك .. أنا ورجالتى لينا النص
- نص أيه يا أبو نص تاخد الربع وتتكل على الله
- بقولك يا أمين النص وألا حقبض عليك أنت وأللى معاك وأضيعك
- ما تقدرش ياثروت لأنك لو عملت كده حأعترف على أللى عملته كله خد الربع وأتكل على الله وبسرعة وماتضيعش وقتنا
( فى هذه اللحظة يصل بوكس آخر ويقف بجوار البوكسين السابقين وينزل منه ضابط برتبه عقيد وهو يشهر مسدسه ويدخل الفيلا ومعه قوة من الأمناء والمخبرين ويفاجأ كل من أمين وثروت وهم يحاولون فتح الخزينه
العقيد : أرفع أيدك فوق أنت وهو .. أقبضوا عليهم ولاد الكلب الحراميه دول
يتم القبض على ثروت وأمين والذين معهم ويقتادوهم إلى خارج الفيلا وفى أيديهم الكلبشات ويوجه الكلام لكلا الضابطين
العقيد : أنتم وصمة عار فى جبين الشرطة لابد من أستأصالكم ..شوية لمامه الناس تقول أيه ؟؟ حاميها حراميها أنا حعملكم عبرة لكل من تسول له نفسه يعمل مثلكم ..قدامى يا جبان أنت وهوه..
يركب الجميع وتسير الثلاث عربات خلف بعضها تتقدمها عربة العقيد ثم عربة المسروقات وبها الخزنه ثم عربة بها جميع المتهمين وينطلق هذا الركب على الطريق الصحراوى
وهم لا يعرفون إلى أين يذهبون وتدخل العربات إلى داخل الصحراء لمسافة كبيرة
ثم تتوقف وينزل سائق عربة المتهمين وفرغ أطارتها الأربعة ثم تعود عربة العقيد وعربة المسروقات من حيث أتت... ينزل أمين وثروت للحاق بالعربات التى هربت بأقصى سرعة
شلضم وبوزكا ينظر كلاهما للآخر وهما يضحكان فيقوم أمين وثروت بضربهما من الغيظ
- بتضحك على أيه ياحرامى يانتن أنت وهوه
- بنضحك على خيبتنا ياباشا
الحلقة رقم (5)
التقدير الجزافى
جابر 3 فاز.. كهربائى عبقرى له من الأختراعات مايجعل الجميع يقف له أحتراما
وتقديرا يعمل فى أحدى شركات توزيع الكهرباء ويعتبر المستشار الأول والعقل المفكر لكبير المهندسين فى الشركة قام بعمل أختراع يلحق بعدادات الكهرباء يزيد من عدد لفات العداد إلى الضعف وهذا يزيد من الأيرادات والحوافز والأرباح للشركة وقام بعرضه على المهندس وائل كبير المهندسين فأشاد به
وائل :أنت متأكد يا أسطى جابر بأن القطعة الألكترونيه دى حتخلى السرعة تزيد
جابر : ياباشمهندس جرب قدامك وشوف ( يركب القطعة على عداد أمامه ويفتح الكهرباء فيلف العداد على آخر سرعة كالصاروخ
وائل :هايل يا جابر أدينى القطعة دى علشان نعرضها على مجلس الأدارة فى أجتماعة ليمكن تصنيعها وتركيبها فى العدادات ..القطعة دى تتكلف كام
جابر: تتكلف 15 جنيه بس لى شرط أنا أللى أصنعها
- موافق بشرط تدخلنى معاك شريك بالنص.. هات بقى بيانات الأختراع علشان أعرضها على المجلس
- ما أقدرش ياباشمهندس ده أختراعى أنا ومش حفرط فيه
- تقدر تجهز كام قطعة فى الشهر يا أسطى جابر
- حوالى 15 ألف قطعة ودى أقصى طاقة ليه
(يجتمع مجلس الأدارة ويقرر أعتماد الأختراع والميزانية اللازمه لتصنيعه وتركيبه بعدادات المنازل ويتم تسليم أول طلبيه ويتقاسم وائل وجابر الأرباح وهم فى منتهى السعادة والأنبساط
وعند تقديم الطلبية الثانية ترفض لجنة العروض أستلامها بحجة أنها مكلفة الثمن وغير مطابقة للمواصفات القياسية وقد تم التعاقد على مثيلتها وأستيرادها من الصين بربع الثمن ..يسقط فى يد جابر ووائل ويجلسان يتناقشان فيما حدث
وائل : وأيه العمل يا أسطى جابر
جابر: ولا يهمك بس أنت هات لى القطعة بتاعتهم أللى جايبنها من الصين وسيبنى أنا حتصرف
يعكف جابر على دراستها حتى يتوصل لطريقة يوقف تشغيلها وتقلل من سرعة العدادات للنصف بأضافة مقاومة داخليه لها ويسلمها لوائل
وائل : تفتكر يا أسطى جابر أن المقاومة دى حتغير فى نظامها
جابر : جرب يابشمهندس ألزقها داخل القطعة وشوف بنفسك..
يتم تركيب القطع الجديده بعد تعديلها فتنزل أيرادات الشركة للربع ويجتمع مجلس الأدارة على عجل لبحث هذه المشكله بعد أن حرمت الشركة من الأرباح والحوافز وأرجع وائل بأن السبب هى القطع الصينية التى أستوردتها الشركة من الصين وتكلفه الشركة برفعها من العدادات وتركيب القطع المصريه يهرع وائل إلى جابر وهو سعيد بهذا النجاح
وائل : مبروك يا جبور حنرجع ننتج تانى وآدى أمر التكليف
جابر فى أسى مصطنع : كان على عينى يا باشمهندس أنا بعت برائة الأختراع للشركة الصينى
- بتقول أيه مش ممكن ده يحصل حنرجع نستوردها تانى أنا لازم أوقف المهزله دى وعليا وعلى أعدائى أنا حوقف أستيراد القطع دى
- أنت حر ياباشمهندس أنا أخدت حقى وريحت دماغى
ترفع كافة القطع القديمه والجديده من العدادات وترجع الأمور كما كانت وأتباع أسلوب رفع الأسعار فى الخفاء .. وكانت المفاجأة فقد تم ضبط كميات من هذه القطع تباع للجمهور فى العتبه على شكل ريموت بالضغط عليه يوقف حركة العداد والتحكم بسرعته ليكون على أقل مستوى .. وتفشل الشركة فى جمع هذه القطع التى وصلت للجمهور وأخير تتوصل لحل مصرى فهلوى وهو التقدير الجزافى بدون الرجوع للعدادات حسب عدد اللأجهزة الكهربائية وعدد اللمبات التى يستخدمها المشترك وتخلع الشركة كافة العدادات من المنازل وتصدرها لأفريقيا ويعيش المهندس جابر ويسقط الأسطى وائل
وربنا يخلى التقدير الجزافى نتاج العبقرية المصرية
الحلقة رقم (6)
كذبه دوليه
يعقد مجلس الوزراء أجتماعا طارئا لبحث مشكلة أنفلونزا الخنازير التى ظهرت فى الولايات المتحده والمكسيك وتهدد بفناء 25 مليون نسمة من سكان الكرة الأرضيه .. بعد عرض التقرير الوارد من منظمة الصحة العالميه ينظر رئيس المجلس لوزير الصحة ليقوم بالتعليق
وزير الصحة : نفهم من هذا التقرير بأننا فى حرب وصراع مع الزمن لأن الفيروس سينتشر فى العالم وسيصل إلينا فى خلال شهر أو أتنين فلا بد أن نتخذ من الأجراءات والترتيبات اللازمة لوقف أجتياح المرض وخاصة فى المدن المزدحمة كالقاهرة وغيرها وأقترح على سيادتكم أن نقوم فورا بأعدام الخنازير الموجوده فى مصر كلها حتى لو دخل عندنا الفيروس لا يجد فيها أى خنزير
وبكده نبقى حمينا مصر من هذا الوباء الخطير
رئيس المجلس : هل أحد من السادة الوزراء لديه أعتراض ..موافقة
تقوم الحكومة عن بكرة أبيها بأعدام نصف مليون خنزير أحياء فى مقابر جماعية تحت سطح الأرض فى حفر بها جير حى
وفى أجتماع المحافظين الذى يرأسه رئيس الوزراء يتم التأكد من تنفيذ خطة الأعدام فيقف كل محافظ وهو يعلن عن تمام التنفيذ وبعدها يتم عمل حفل غداء لهذا العمل الجليل وأقترح البعض أعتبار هذا اليوم عيد قومى وعطله رسميه
وفى المساء يتصل وزير الصحة برئيس المجلس :خبر سيئ يا معالى دولة الباشا
مستشفيات الحميات أكتظت بالمرضى وتوفى حتى الأن 75 حالة
- أجتماع عاجل الأسبوع القادم بعد العوده من الجولة الأوروبيه
وبعد أسبوع يعقد الأجتماع العاجل ويتم فتح الموضوع من جديد وتصدر قرارات جديده بضرورة الكشف على القادمين من الخارج وعزلهم وتأجيل بداية الدراسة
يتم تنفيذ كافة القرارات فى الأسبوع الأول بكل دقة وكما هو معروف فى مصر تتراخى الأمور وتصبح هذه القرارات عاديه أو كأن لم يكن
وتظل هذه الأزمه محلقة فوق رأس المحروسة لعدة شهور وفى جلسة وديه يصرح وزير التعليم مع بعض الوزراء المقربين بقوله : عليا النعمة حكاية أنفلونزا الخنازير لعبة لعبتها شركات الأدويه الأمريكيه وأحنا أكلناها زى الهُبل ودبحنا الخنازير وأجلنا الدراسة ولبسنا الكمامات وكل ده هجص فى هجص وده دور أنفلونزا عادى شوية راحة على مسكنات و3 أيام وتروح لحالها
تنقل كلمات وزير التعليم لوزير الصحة بحذافيرها والتى تصل لأعلى مستوى فيخرج بتصريحات جديده يؤكد فيها على خطورة الموقف يتصل برئيس الوزراء ويحكى له ماحدث من وزير التعليم وعدم تعاونه وتشكيكه فى عمل وأداء الوزارة ونشره دعاية بأننا لنا سبوبه فى هذه الشغلانه وماينفعش كده يادولة الباشا وأحنا لسه حنبدأ التطعيم من باكر لتلاميذ المدارس وباقى فئات الشعب والحجاج
الرئيس : أنا عندى تقارير بأن الطعم ده بيسبب حاجات مش كويسه
- ياباشا لو أنتشر المرض بشكل وبائى الناس مش حتسكت والمعارضه حتبهدلنا غير الصحافة وبعدين الطعم أحنا واخدينه مجانا من الصين وجزأ كبير من معونة منظمة الصحة العالميه والمعونة الأمريكية ومش غرمانين حاجة وحيتباع هنا بسعر ممتاز يزود خزينة الدوله بدخل محترم
- قرار فورى بقيام جميع الوزراء والقيادات التنفيذية بأخذ الطعم إمام مرؤسيهم للقضاء على هذه الأشاعة وعلى شاشات التليفزيون حتى يطمأن الشعب
وفى الصباح يقف وزير التعليم أمام كاميرات التليفزيون وهو يشمر زراعة ليأخذ التطعيم وسط تهليل وتشجيع المحيطين ولكن كان فى أنتظاره قرار بأقالته من الوزارة وجواب شكر من دولة رئيس الوزراء وأصبحت نكته فى جميع الصحف
وبعد أن ثبت فشل الطُعم وضرره على المواطنين توقفت الحكومه عن أستيراده وتركت أنفلونزا الخنازير بدون خنازير وبدون تطعيم وبدون أجراءات ورجعت التلاميذ للمداس والجو ربيع وقفللى على كل المواضيع وضاع وزير التعليم لأنه خرج عن النص وأختفى وزير الصحة وبياناته اليوميه بعدد المرضى والوفيات بعد أن أنتهى دوره الذى لعبه بعناية فائقة وتبين للجميع فى النهاية بأنها كذبة عالميه ونصباية كبيرة على دول العالم الثالث
الحلقة رقم (7)
حسونه العبقرى
الواد حسونه تلميذ عبقرى فى الصف الأول الثانوى رهيب فى حل كل المسائل الرياضيه ينظر إلى المسألة وخلال نصف دقيقة يكون قد أوجد الحل ويستطيع أن يوجد حاصل ضرب خمس أرقام × خمس أرقام أسرع من الألة الحاسبة غير باقى المواد المتفوق فيها ليس فقط على أقرانه بل فاق مدرسين هذه المواد وترتيبه الأول بدون منازع .. وحدثت مشكله فى المدرسة وهو وجود عجز فى مدرسّى الرياضيات والموجودين لا يستطيعون تغطية باقى الفصول فأقترح أحد المدرسين
على ناظر المدرسة بتعيين حسونه مدرسا للرياضيات فى المدرسه مع منحة مكافأة تشجيعية لحل هذه المشكلة لحين وصول مدرسين من الوزارة .. الناظر أستحسن الفكرة ووجد أنه لا مانع من أستغلال هذه العبقرية الفذه وعلى الفور عمل مجلس المدرسين ليعرض عليهم الأمر ويأخذ مشورتهم
الأستاذ سعدون مدرس أول اللغة العربية : أنا أعترض ياسيادة المدير على هذا التصرف..فكيف لعيل مفعوص كهذا أن يقوم بالتدريس سوف تذهب هيبتنا فى وسط التلاميذ وسنجلس فى أماكن الدرس والتلاميذ يدرسون لنا.. هذا هراء
وأنقسم المدرسين بين مؤيد وبين معارض وفى النهاية يأخذ تصويت على الموافقة أو عدم الموافقة فتغلب أصوات الموافقين على المعترضين ويعين الواد حسونه مدرسا لمادة الرياضيات وأثبت كفائة منقطعة النظير وأستطاع أن يدرس لطلبة الثانوية العامة الرياضيات والطبيعة والكيمياء وأرتفع صيته فى داخل المدرسه وخارجها وبدأت أعداد غفيرة من الطلبه تطلب أن تأخذ عنده دروس خصوصيه وتركت مدرسيها وأتجهوا إلى الواد حسونه العبقرى الذى كتب الكثير من الملازم والمذكرات والتى بيعت بمبالغ هائله وتعاقدت معه دور النشر لتأليف الكتب وحل الأمتحانات
وأصبح الواد حسونه فى خلال سنه من الأثرياء فركب عربية بسواق
وفتح سنتر مخصوص للدروس الخصوصيه وأصبح أباطرة الدروس الخصوصية لا يجدون درس خصوصى واحد ألا من خلال سنتر الواد حسونه
ويجتمع المدرسين فى مجلس نميمه لبحث هذه المصيبة التى لحقت بهم
سعدون : أنا قولت من الأول ما يتعينش ما حدش سمع كلامى
الأستاذ بتانونى : مفيش غير نبلغ عنه الضرائب
الأستاذ مرزوق : ضرايب أيه يا مجنون أنت.. ده الواد قاصر ويعتبر تلميذ ومفيش حد يقدر يقول أنه محترف أو بيتكسب من وظيفته الله يجازيه حضرة الناظر ويخرب بيته زى ماخرب بيتنا
الأستاذ ممتاز : أنا بقى عندى الحل .. بدل ما أنتم قاعدين تعبوا الهم وتدلقوه قوموا بينا نروح سنتر حسونه نتفاهم معاه يشغلنا عنده بدل قعدتنا دى
يتفق الجميع على الذهاب للسنتر لمقابلة حسونه للتفاهم معه
سعدون : أسمع يا حسونه يا بنى أحنا ناس كبار وعندنا بيوت فتحينها وعندنا أولاد من سنك وأكبر منك عايزين أكل ولبس ومصاريف وأللى أنت عاملته ده وقف حالنا وخلانا شحتنا
حسونه بكل أدب : طلباتك يامستر
بتانونى : بالعربى ياحسونه شوف لنا شغل معاك ندرس هنا فى السنتر
حسونه : ما عنديش مانع يامستر بس الأول تجتازوا أمتحان القبول
ممتاز : وأيه هو أمتحان القبول ده يا حسونه
حسونه : أمتحان فى الماده أللى حتدرسها .. أللى حينجح حيتعين وأللى حيسقط يدخل السنتر كتلميذ لرفع مستواه أيه رأيكم يا أساتذه
الجميع فى نفس واحد : موافقين
- سأعطيكم فرصة تراجعوا المواد بتاعتكم وحنعقد الأمتحان بعد أسبوع
يحتج المدرسين فبعضهم يطلب عمل الأمتحان باكر والبعض أن يتم عمل الأمتحان فورا ..وفى النهاية يتفقوا على عمل الأمتحان باكر وينصرفوا ويحضروا فى اليوم التالى فيجدوا لجنة قد أنعقدت لهم ووزعت عليهم كراريس الأجابة وورق الأمتحان وبدأ المدرسين يحلون الأمتحان وبعد ربع ساعة يقوم أثنين منهم بتقطيع الورق والأنصراف من اللجنه وهم يسبون ويلعنون فى أللى خلفوا حسونه وأنقلبت اللجنه بين صراخ ونحيب مطالبين بحضور حسونه فورا اللجنه ..
- فيه أيه يامستر ...
- ما ينفعش الكلام ده أمتحان تعجيز
- يامستر الطلبه فى السنتر هنا أمتحنوا نفس الأمتحان ونسبة النجاح 95%
فشل المدرسين فى حل الأمتحانات وسقطوا جميعا وأضطر معظمهم للألتحاق بمركز العبقرى الصغير .. أدارة الواد حسونه..
هههههههههه
الحلقة رقم (8)
الدكتور فذلكه
أشتهر وعلّىَ صِيته فى الأوساط الشعبيه والعيادة يقف عليها طوابير المرضى بالمئات وهو لا يكل ولايمل من الكشف ووصف العلاج بالأعشاب لكافة الأمراض وخاصة المستعصى منها مثل أمراض الكبد والأورام وضعف المناعة والعقم والعنه عند الرجل والتبول اللاأرادى للكبار والصغار ويخرج المريض وهو يحمل أكياس صغيرة بها الأعشاب الشافية من كل مرض
ويقوم مندوب لأحدى الفضائيات بعمل لقاء معه على الهواء ويصوره وأمامه العشرات من المرضى ويجرى معه حديث على الهواء وعندما شاهده الملايين على الشاشه طلب العديد من المشاهدين أعادة اللقاء فيأمر مدير المحطة بسرعة التعاقد معه لتقديم برنامج للطب البديل فى المحطة يذاع ثلاث مرات فى الأسبوع
وأرتفعت نسبة المشاهدة لهذا البرنامج وزادت حصيلة الأعلانات وتسابقت عليه الفضائيات لأستضافته لتقديم فقرات مطوله بها وبدأت ملحمة الصيت والشهرة تنتشر فى داخل مصر وفى الخارج وخاصة فى دول الخليج التى تؤمن بالطب البديل والعلاج بالأعشاب
وتفتح الأمل أمام ملايين المرضى لهذا العلاج القديم الجديد وهذا العلم المتدفق من لسان الدكتور فذلكة وعقدت الندوات فى المحافظات وأنشئت السرادقات لأستيعاب
آلاف المرضى وذويهم والكل يحمل ورقة وقلم ويقوم بكتابة الوصفات السحرية التى يقولها بكل بساطة ويسر لشفاء المرضى ووقف الناس مذهولين أمام هذه العبقرية العلمية المتفجرة التى أستوعبت كل هذا العلم من كتب القدماء
وجاءت دور النشر لتصدر له العديد من الكتب التى بها الوصفات العلاجية لكل الأمراض التى عرفها الأنسان طوال تاريخه البشرى على سطح الأرض
كل هذا وجميع الدوائر الطبيه ونقابة الأطباء نائمة فى العسل حتى بدأت تظهر نتائج العلاج على المرضى بعد أن تركوا أدوية الأجزاخانات وأتجهوا إلى دكاكين العطارة لشراء الأعشاب التى كتبها الدكتور فذلكة فتراجعت صحة العديد ومات البعض بعد أن أزداد عليه المرض وبدأت الشكاوى ومحاضر البوليس ورفع القضايا وأخيرا تنبهت نقابة الأطباء والصيادلة على هذه الكارثة وكانت النتيجة كالأتى بأن الدكتور فذلكة ليس بطبيب ولم يتخرج من كلية الطب أو الصيدله بل هو أخصائى علاج طبيعى وأن هذه الأعشاب يوجد بها أعشاب سامه ومخدرة ومهلوسه تجعل المريض لا يشعر بآلام المرض الذى ينتشر بجسده وكان أول السيل قطره وهو نشر الحقائق عن حياة وتعليم الدكتور فذلكة ثم بلاغ للنائب العام
ضده بممارسة الطب والعلاج بدون ترخيص أو تأهيل ثم ضبطه وأحضاره بمجرد وصوله لأرض المطار بعد جوله فى الدول العربيه
ويقف خلفه عدد لا بأس به من فطاحل المحامين فيخرج من سرايا النيابه بكفاله كبيره ويركب أول طياره للعوده إلى بلاد الغربة ليمارس فنونه الطبيه والعلاجيه بعيدا عن القضاء وحقد الأطباء والصيادله
ولو أدرت التليفزيون على المحطات العربيه ستجد الدكتور فذلكة وأنصاره ومقلديه فهذا ببدله وذاك بعقل وآخر بعمامه ..بدعة موطنها الأصلى مصر وأنتشرت بسرعة بين العرب على الفضائيات تباركها وتؤازرها بعض الحكومات وكله من تحت رأس الدكتور فذلكه
ولم تتوقف هذه الظاهرة فكل فترة نشاهد أعلان على شاشات التليفزيون بدواء مستحضر من الأعشاب الطبيعيه لعلاج الصلع وأخر لعلاج العقم وثالث لعلاج الخصوبه ولم يبقى غير أن يظهر دواء لعلاج هطل الجماهير وجنان النساوين
ويعيش ياعيششش.. الدكتور فذلكه الذى صنع الملايين من هطل الجماهير
الحلقة رقم (9)
قهوة عنبه
أنشأتها المعلمه عنبه فى ميدان التحرير حيث يوجد أكبر تجمع من النساء العاملات فى المجمع والوزارات القريبه وشركات السياحة وغيرها وكتبت على بابها مخصصة للنساء فقط..ويتردد عليها العشرات منهن أثناء أوقات العمل الرسمية أو بعد الظهر ليقضين بها أوقات فراغهن ليلعبوا الطاوله والدومنو والكوتشينه على المشاريب
ريهام وهى تشد نفس من الشيشة : ايه أخبار الشملول جوزك يا مى لسه بيترازل عليكى كل ليله وأنت راجعة من القهوة
مى : أنا غلبت فى الراجل ده ما بيبطلش خناقات معايا كل ليله غير كشف الطلبات أللى ما بينتهيش .. آخر مره قولت له أسمع لو مابطلتش الغاغة أللى بتعملها كل ليله مش حيحصلك طيب أنا حره يا أخى أقعد ع القهوة على الأقل أرتاح من وشك أنت والعيال يبقى قرف بره وجوه
ريهام : هيه وعمل أيه
- قعد يبرطم ويهلل ويقولى أن العيال نمرها ضعيفه فى المدرسة وفيه جواب لولى الأمر ليحضر يقابل المديره .. قولت له ماروحتش ليه يا فالح .. قالى روحت والمديره مصره على حضور ولية الأمر أللى هو أنت
- دى مديرة غلسه بجد
- أمبارح أستأذنت من الشغل وروحت لها فقالت لى أن أهتم بالعيال وألا حيسقطوا
قولت لها أذاى يسقطوا يا مدام وأنا بدفع دم قلبى فى المخروبه بتاعتكم دى قالت لى شوفيلك حل تذاكريلهم أو تديهم دروس خصوصيه أو أبوهم أللى قاعد فى البيت يا خد باله منهم وبلاش أهمل ..هيه وبعدين .. ماكدبتش خبر وقمت مولعه معاه خناقة لرب السما .. يقوم الراجل يقولى أن مستواه فى اللغة مايسمحش بمتابعتهم لو عيزانى أشوفهم حوليهم من مدارس اللغات لمدارس عربى أو أعطيهم درس خصوصى .. قولت له حجيبلكم منين أديك شايف الماهية ضايعة كلها على بيتك وعيالك .. قال لى خلاص أنزل أدور على شغل والنواية تسند الزير فوافقته
- هيه وبعدين كملى
- الراجل فضل يلف على شغل لحد ملقى شغلانه بـ 650 جنيه فى الشهر ويشتغل من الساعة 8 صباحا لحد الساعة 8 مساءً
- طب حتعملوا أيه فى العيال ومين أللى حيطبخ ويغسل ويشوف طلبات البيت
قاللى هاتيلك شغاله .. دورت لما دخت على شغاله مالقيتش غير شغالين من الرجاله فأتفقت مع واحد فيهم ييجى يقعد بالعيال ويشوف طلبات البيت
- شاطره يابت يامى ده بيقولوا أن الرجاله غسيلهم فل أجدع من أى غسالة فول أتوماتيك ..أديهم ناشفه وبيدعكوا الغسيل دعك .. هيه وبعدين
- الراجل أللى أنا جيبته طلب 500 جنيه قولت نجربه طلع راجل لهلوبه حمدت ربنا جالى أول الشهر قام أيه مقدم أستقالته لأنه لقى شغل فى بيت تانى بـ 800 جنيه قولت لأ بقى جوزى أولى وبناقص الـ 650 جنيه أللى بيقبضهم ويقعد أحسن فى البيت ..الراجل أتنمرد بعد ما أقعد وكل يوم يعملى مشكله شكل وأنا خلاص فاض بيه يا حبيبتى
- ولا يهمك كبرى مخك أحنا يامه شوفنا منهم ومن عمايلهم حتى أسألى أمك ولا ستك حتحكيلك تاريخهم الأسود من أول سى السيد لحد دلوقتى
- أللى خايفه منه اليومين دول أنه منضم لجمعية أسمها تحرير الرجل وكل يوم أشوف نشرات وكتب وأتصالات مع الجمعية مش عارفه أعمل أيه
- برضه بقولك كبرى مخك .. المرأة عشان تحصل على حريتها من الراجل شوفى قعدت كام ألف سنه علشان توصل للى أحنا فيه دلوقتى .. أطمنى لسه بدرى عليهم قوى علشان يقدروا يرفعوا راسهم من تانى.. المهم أجمدى وخليكى قويه ده صنف مابيمشيش ألا بالعين الحمرا.. ويوم مايقرفك أقلبيه وشوفى واحد تانى وخلى الجمعيات تنفعه
- قصدك أطلقه ياريهام
- أيويه طلقيه وطلعيه بالهدوم أللى عليه وأتجوزى تانى.. الرجاله على قفى مين يشيل ..العشرة بقرش.. ولا توجعى دماغك أنا مطلقة جوزى الخامس لسه أمبارح وواخده فترة نقاهة من قرفهم
- طب والعيال عملتى فيهم أيه
- ماعنديش يامه أرحمينى ياخد عياله فى أيد وفى أيده التانيه ورقة طلاقه أحنا حنقعد نربى ونشيل الهم مش كفاية أن أحنا خلفناهم
