الفشر والفشارين

الفشر والفشارين

من منا فى حياته لم يفشر فشره واحده

 (من الأقوال المأثوره لأبو لمعه )

نصادف فى حياتنا الكثير من الفشارين من الرجال والستات والأطفال أصحاب الخيال الواسع والهجص المتقن.. فنقابل رجل أو شاب فشار يدعى أشياء غريبه ومضحكه بأنه من المقربين لصناع القرار وأنهم يستشاروه فى أدق الأمور وكذلك الستات التى تعيش الدور وتتخيل نفسها صاحبة العصمة والسعادة ودادى الباشا ومامى الهانم  هذا مع الكبار والبالغين أما الأطفال فحدث ولا حرج فالطفل بطبيعته فشار نمره واحد لما يتمتع به من خيال واسع  وأحلام طفوليه .. وليس كل طفل فشار فالموهوب منهم يمتلك هذه الميزه - لو أعتبرناها ميزه - ولو تركناه يفشر سيصبح مع مرور الوقت فنان موهوب أو كاتب كبير أو مخترع عظيم أو سياسى محنك .. الفشر والنتش مرتبط دائما بالخيال الواسع ويشعر الفشار كلما أخرج من تلافيف دماغه فشره جديده بنشوه عجيبه تجعله يحلق فى عالم وردى

سيقول البعض مالك تمجد فى الفشر والفشارين هكذا أنه كذب وضلال .. سأقول لك مهلا يا صديقى فنحن نصبح ونمسى على فشر الفشارين ونستمتع به ونباركه ونهلل لفشرهم عبر وسائل الأعلام المقرؤة والمرئيه والمسموعة.. سأقول لك كيف !!  من منا لم يستمتع بقصص عقلة الأصبع وأفلام الخيال العلمى وألف ليلة وليلة وغيرها من قصص الجان والعفاريت جميعها وغيرها كانت من نتاج أفكار الفشارين على مر التاريخ فشهر زاد كانت أكبر فشاره وتشارلز ديكنز والجاحظ وأبن المقفع كانوا فشارين على مستوى عال من الفشر المحبوك والمحبب لدينا ونهج على آثارهم آلاف الكتاب والمبدعين وهناك شعوب بأكملها عاشت حياتها وعصرها بالكامل تحت تأثير فشره كبيره أثرت فى حياتها ومصائر أبنائها عبر التاريخ وأعتبرت هذه الفشرة من تراثها المقدس فعندك مثلا هتلر أطلق فشره عظمى بأن الجنس الآرى من أفضل الأجناس واليهود أعتبروا أنفسهم شعب الله المختار لفشرة أطلقها بعض الحاخامات وكثير من الملوك فشروا على شعوبهم بأنهم من جنس غير جنس البشر وأن دمائهم الزرقاء مقدسه وأباطرة اليابان أعتبروا أنفسهم أبناء للشمس حتى هزموا فى الحرب العالمية الثانية وخرج الأمبراطور تحت ضغط المحتلين ليعلن على شعبه بأنه ليس أبنا للشمس ولا يقرب لها بصلة وأنه متبرىء منها ليوم القيامه !! ولو أستعرضنا كمية الفشر فى التاريخ القديم والحديث لذهلنا  ووقفنا حائرين لحجم الفشر الذى يملء كتب التاريخ

 وكان أكبر فشار فى المنطقة العربية هو صدام حسين عندما أعلن أنه يمتلك قنبلة ذريه وكانت هذه الفشرة وبالا وخيما عليه وعلى شعبه بالرغم من علم الأمريكان بأنه يفشر ويهجص ولكنها تركته ولتتخذ من هذه الفشره ذريعة لغزو العراق وكذلك أسرائيل عندما أطلقت على جيشها بأنه الجيش الذى لا يقهر وجائت حرب1973 لتكشف بأن هذا وهم كاذب بعد أن تحطم تحت أقدام الجندى المصرى

والبشر يصدقون الخرافات المقدسه التى يطلقها رجال الدين ويعتبروها جزأ لا يتجزأ من معتقداتهم حتى جاء الأسلام ليكون كالأعصار الهادر الذى مجد قيمة العقل والمنطق وهذا هو السر فى نقاء العقيدة الأسلاميه من الخزعبلات والوهم والفشر الذى يملء جميع الديانات الأخرى سواء سماويه أو وضعيه من صنع البشر   

يوجد فرق كبير بين الكذب والفشر ونحن نظلم الفشار بأن نقول عليه كذاب وهذا ظلم كبير يمكن أن يؤدى إلى أجهاض خيال المبدع فإذا كان لديك طفل أو طفله فشاره فأفرح وأنبسط وقل بكل فخر بأن عندى طفل فشار فقد أكرمك الله بموهبه فحافظ عليها ولا تقتلها بل قم بتوجيهها التوجيه الصحيح فأطلب من أبنك الفشار أو أبنتك أن يرسم هذه الفشره أو يكتبها فى قصة وشاهد بعد ذلك قمة الفن الأدبى أو السريالى وشجعه على المزيد من الفشر

شكت لى سيده من فشر طفلها الصغير وأنه يسبب لها الأحراج وتخاف أن تستمر معه هذه الخصلة السيئة (على حد قولها ) فطلبت منها أن أجلس معه وأستمع إلى فشره البريء وبعد تمهيد وملاطفه له أطمئن لى وبدأ فى سرد فشره ونتشه اللذيذ

حكاية ميزو وكيمو

- سمعت ياميزو أنك بتحكى حكايات جميله ومسلية عن الديك أللى عندكم  ليتك تحكى لى بعض منها

ميزو وقد أطمئن إليا ففتح صنبور النتش على الأخر وهو يتكلم بثقة وكأنه يقرأ من كتاب مفتوح : أقربها أمبارح ياعمو زيزو ماما طلبت منى أن أقوم بتأكيل الطيور الموجوده فوق السطوح .. أخدت بقية الأكل وقعدت أأكلها .. البط والوز والفراخ كانوا بياكلوا ألا الديك الشركسى كان واقف ياعمو ومش عايز ياكل .. حطيت قدامه الطبق ضربه برجله ودخل جوه العشه فقلت له أنت مش عاجبك الأكل ده هز لى راسه

فقلت له طب تحب تاكل أيه أجيب لك حتت جبنه رومى أدانى ظهره ومشى قعدت أقوله على جميع أنواع الأكل وهو مابيردش عليا لحد ماقولت له تحب تاكل بيتزا بالخضروات والمشروم لقيته ياعمو فرح وقعد يتنطط جوه العشه وفضل يأدن ويجرى حوليا وهو مبسوط .. نزلت لماما وقولت لها على أللى حصل وطلبت منها أشترى بيتزا للديك ضحكت وماصدقتنيش وقالت لى قول يالئيم أنك عايز تاكل بيتزا مش الديك بكره حعملك بيتزا .. تانى يوم أخدت نصيبى ونصيبه من البيتزا وطلعت فوق السطوح أول ماشاف الديك البيتزا فى أيدى هجم عليا وخطفها وأكلها كلها

- أكلها كلها ياميزو ماسابش لك ولا حته وبقية الطيور مازعلتش

- هو فيه حد يقدر على كيمو .. مين كيمو ده .. ده أسم الديك ياعمو .. هه كمل ياميزو

- بقيت كل ما ماما تعمل بيتزا لآزم أحجز نصيب كيمو وأطلع أدهوله

- هو كيمو ده مابيكلش ألا البيتزا بس ياميزو

- لأ ياعمو ده بيحب الشيكولاته والكرانشى والأيس كريم واللبان

- واللبان !! مابتشربوش حاجة صاقعة زى البيبسى والعصير

- هو بيحب عصير المنجه والفراوله والشيكولاته باللبن

- لأ ده ديك حكاية .. خد ياميزو الفلوس دى أشترى الحاجات أللى بيحبها كيمو ياعم

أخد ميزو الفلوس وجرى إلى الشارع وهو يقول : شكرا ياعمو ده كيمو حيحبك قوى

ضحكت أمه وهى تقول : الواد سرح بك ياعم زيزو وصدقته أهو حيشترى الحاجات دى ويطلع يأكلها فوق السطوح وحينزلك تانى بطلبات جديده لكيمو بتاعه

- هههههههه طب ما أنا عارف ؟؟

والأن  يا أصدقائى وأبنائى الأعزاء هذا موضوع مفتوح لكتابة أظرف فشرة سمعتها أو فشرتها  فى حياتك ولنا  بعد ذلك لقاء

الحلقة رقم 2

صفاء فشاره قوى

الخناقة تبدأ بعودة لطفى من عمله

- داخلى كل يوم أيد ورا ء وأيد قدام لا بطيخه أو كيس جوافه أو حتى كيلو بلح أمهات

- منين ياصفاء المصروف أللى معايا مايكفيش لآخر الشهر

صفاء وهى تبرطم: الله يرحمك يابابا .. كان بيدخل علينا بالفاكهه أقفاص أقفاص

- عارفين ياستى وبالمكسرات كراتين كراتين والسمن البلدى صفايح صفايح أما أنت بنت عز ومن بيت شبعان أيه أللى خلاكى تتجوزينى

- مخى الوسخ خلانى سبت عرسان بالزوفه أيش الدكتور والضابط والتاجر والسفير وصعبت عليا قولت أتجوزك .. جوازة الندامه

- بتقولى عليا يا صفاء أنك أتجوزتى جوازة الندامه

- أيوه يا لطفى جوازة الندامه

- طب أسكتى وما تخلنيش أتكلم خلينى كاتم فى نفسى وساكت

- لأ ياحبيبى أتكلم

- مابلاش ..لأ أتكلم أنا حيهمنى .. الفاكهة أللى بتقولى عليها كانت بتدخل بيتكم أقفاص أقفاص كان أغلى حاجه فيها البرتقال وكانت الوالده بتعملها مربى وتبيعها فى جمعية الأسر المنتجه وأنا أراهنك لو عرفتى الفرق بين البندق والفستق فبلاش فشر

- طب والعرسان أللى كانوا واقفين قدام بيتنا بالطوابير

- يا صفاء بطلى سرح ده أنا لولا أتقدمت لك كان زمانك قاعده فى بيت أبوك لحد دلوقتى

- طبعا زى عوايدك مش مصدقنى أهو أخويا حسونه جاى كمان شويه أسئله يامفترى ياظالم وتبدأ فى البكاء وهى تقول ياميلة بختك ياصفاء وعلى أللى نابك

يدخل حسونه : أيه ياجماعة مالكم مكشرين ليه .. أكيد أتخانقتم زى عادتكم

صفاء : أنا ححلفك برحمة أمك تقول الحق أحنا مش كانت الفاكهه بتدخل بيتنا أقفاص أقفاص والمكسرات كراتين كراتين

حسونه : أيوه والسمنه البلدى صفايح صفايح وكمان ما قولتلوش على الخرفان أللى كانت بتدبح كل يوم ولا التفاح الأمريكانى أللى كان مابيتقطعش من البيت ولا ..

لطفى تنفقع مرارته ويصرخ : عندك.. أنت بتستهبل أنت كمان

- أعمل أيه يالطفى يا خويا مراتك حلفتنى براس المرحومه ما أقدرش أكدب

- يظهر أنى وقعت فى عيلة فشارين .. طب تحب تاخد كريم كراميل ولا تاكل تورته الأول ولا أقولك تاكل تفاح .. تحب تاكل تفاح أحمر ولا أصفر ولا أقولك باين عليك على لحم باطنك طلعى ياصفاء الديك الرومى من الفرن وفخدة الخروف وجهزى السفرة لأخوكى حسونه .. قومى ماتبصليش كده أعملى الواجب ده أنت من بيت كرم

- منين ده كله ياسبعى

- ده من فضلة خير أبوكى كتر خيره جه أمبارح وأنت بره وملء التلاجه لحمه وفراخ وديك رومى وعندك الفاكهه جوه أقفاص أقفاص والسمنه صفايح صفايح والمكسرات كراتين كراتين

- يا حبيبى يا بابا.. طول عمرك مغرقنا بخيرك

يصرخ لطفى ويقوم بخنق صفاء : مش حتبطلى فشر وعنطزه فاضيه أرحمينى

حسونه : صلوا ع النبى ياجماعة .. أنت حطه التفاح الأحمر فين ياصفاء

صفاء : عندك جوه فى الثلاجة جنب التفاح الأصفر فى الرف أللى تحت التورته وعلبة البطارخ وأنا قايمه أشوف الديك الرومى زمانه أستوى ما تستنى تاكل من الديك وبعدين حلى بالتورته والتفاح يكون أحسن

ينظر لطفى لكليهما وهو يكاد ينفجر من الغيظ  ويقوم من مكانه ويتجه لباب الشقه

حسونه : على فين يا أبو نسب مش تستنى تاكل من الديك وتحلى بالتورته والتفاح

- كولهم أنت وأختك يافالح

 يغلق الباب بقوة ويجرى على السلم وتخرج صفاء ورائه وهى تنادى عليه : لطفى لطفى .. عايزه أيه .. ما تتأخرش مش حناكل الديك ألا لما تيجى ..

يزمجر لطفى وهو يقفز فوق درجات السلم : حسبى الله ونعمه الوكيل منك ومن أخوكى يا عيلة فشارين يا حووشش

بعد أن ينزل لطفى وتغلق صفاء الباب يفرك حسونه فى يديه : أحسن أنه مشى قومى بقى هاتى الديك والفخده من الفرن أحسن جعان قوى

تصرخ صفاء : يالهوتى أنت صدقت ..أنت كمان يا متعوس قوم ورينى عرض أكتافك أنا مش ناقصاك

- برضه أحسن على الأقل ألحق أتغدى مع أم العيال زمانها خلصت حشو الأتناشر جوز حمام والأرز المعمر وبرام الباميه باللحمه الضانى

- أمشى يا فشار

- أنا برضه أللى فشار يابتاعة الفاكهه أقفاص أقفاص والمكسرات كراتين كراتين والسمنه البلدى صفايح صفايح

ههههههههه

الأيدى الخفيه فى حياتنا اليوميه ( مقالة ساخره )

الأيدى الخفيه فى حياتنا اليوميه

عودة أبو التفانين الرايق

أحيانا ًما تقول أنى أشعر بأن أيدً خفيه تعبث فى الظلام وهذا مايحدث غالبا عندما تأخذ زمبه أو مهموز يغير مسار حياتك ويقلبك كفردة الشراب وفى قرارة نفسك عارف الفاعل الحقيقى ولكنك لا تستطيع أن توجه له الأتهام أو حتى تعاتبه على فعلته.. وأبو التفانين الرايق لجأ هذه المره إلى أسلوب جديد فى التخلص من معارضى الحكومه وبطريقة جديده أضرب المربوط يخاف السايب والحقيقة يوجد العديد من الكتاب والصحفيين والنشطاء السياسيين متسيبيين ولكن بمزاج الحكومه طبعا أتفاق الخطوط المعروف هذا خط أحمر وذاك أخضر وذلك زهزهى وحان الوقت لوقفهم وتلجيم ألسنتهم لفتره محدده ولحين أنتهاء الأنتخابات ثم يعودون مرة أخرى لسيرك الصحافه وكان الضحية هذه المرة الصحفى والكاتب المشاغب أبراهيم عيسى رئيس تحرير الدستور وبدأت بالأستعانه بأبو التفانين الرايق وبعد أن ولع المحميتين وشد النفسين قال قولته الشهيره..

أللى ماتعرفش تسكته شدى الكرسى من تحتيه وأقلبه

فقال له مندوب الحكومه : حنرجع تانى لحكاية الكراسى مش كفاية شلنا الكرسى بتاع مصطفى بكرى

حفهمك ياحمار : البلد دى بتحكمها مجموعة من الكراسى وحكومتكم ماشاء الله ربنا يكتر من كراسيها توسعت قوى فى عمل الكراسى وكمان مصنع الكراسى عندكم شغال الله ينور بيعمل جميع المقاسات وجميع الموديلات حريمى ورجالى وأطفال  

- مش دى كانت شورتك يا أبو التفانين أننا نتوسع فى مصنع الكراسى

- الكراسى الحكوميه ماشى ولكن فيه ناس ماعرفتش تحصل عليها فعملت كراسى عموله وأخذت صفة الشرعيه وبدون ترخيص من المصنع

- زى مين يا أبو التفانين

- زى كراسى الصحافه الأهليه والفضائيات وكراسى رجال الأعمال والأحزاب والتجار والفنانين كل ده ومش دريانين

- أزاى يا أبو التفانين ما هو أحنا أشترينا كراسى كتير من الصحافة وبعض الفاضائيات والقمر قمرنا وأللى مش عاجبه نلغيه أو نشوشر عليه ورجال الأعمال أنت أللى أشرت علينا ندخلهم فى الحكومه علشان ماحدش يلعب بديله ويساعد المعارضه والناس ماشيه زى الفل وأشترينا 3 أحزاب لحد دلوقتى

- لسه ياعمونا فيه كراسى كتير سايبه وبتعمل أللى هى عايزاه وده خطر عليكم فى الفتره أللى جايه .. قولى عايز أيه المره دى

- أبراهيم عيسى

- ماله سى أبراهيم ده كمان .. ماهو كان فى أديكم وكان ممكن ينطس 5 سنين زى أيمن نور وتخلصوا منه .. أديكم سيبتوه لحد ما أكتسب شعبيه على قفاكم أشربوا بقى

- يعنى أيه مش حتعرف تشيله من سكتنا بطريقتك ولا نتصرف أحنا ونصفيه قضاء وقدر ..- حنرجع تانى لشغل البلطجيه ماتنضفوا بقى .. جميع حركاتكم مفقوسه ولو عملتم كده حيتحول لشهيد وبطل قومى وقليل لو الشعب حط له تمثال فى ميدان التحرير.. أنا عندى خطه ماتخرش الميه

- قول يا أبو التفانين الجماعة مستعجلين

- ولع محميتين وأرمى بياضك وسيبنى أفكر وأرد عليك  

- الخطه ياسيدى تشتروا الجريده أللى الأفندى ده بيكتب فيه

- نشتريها أزاى يعنى ونحولها جريده قوميه

- هى الجبانه ناقصة ميتين ماكفاية الكام جريده والكام مجله أللى ماحدش بيقراهم

حتأجروا 3 أراجوزات من محاسيب الحكومه يتقدموا بعرض لشراء الجريده وتصبح لهم الحرية المطلقه فى أختيار رئيس التحرير أللى على مزاجهم وقانون الصحافة فى صفهم  وأللى مش عاجبه الباب يفوت جمل فى الحالة دى العمليه نظيفه مبه فى الميه وأنتم واقفين بعيد وبتتفرجوا وماحدش يقدر يجيب سيرتكم لا بالطيب ولا بالردى.. قولت أيه ولا نشوف حاجة تانيه

- لا خطة حلوة وأهو كمان نخلص بالمره من الشلة بتاعته أللى جوه الجريده

- وتبقوا قفلتم الجريده دى بالضبه والمفتاح وماحدش من الشعب حيبص فيها تانى

وخليه يقول حمراا تانى

- كان قصده أيه الجدع ده من كلمة حمراا

- أقولك وماتزعلش

أشطههههههههههههه

الطول والقصرفى بنيان البشر(دراسة فى السكلانس )

الطول والقصرفى بنيان البشر

دراسة فى السكلانس

سمعت من أبى رحمة الله عليه بأن الطول قيمه وأن الرجل الطويل له هيبه وأحترام وكانت أمى الله يرحم الجميع ترد عليه بأن الست الطويله شجره مفرعة لها جمالها وسحرها وبالرغم من أمتداحهما للطول والطوال فقد كانا يعدان من متوسطى الطول يقولون ربعة بمعنى أنهما متوسطى القامه لا طويل قوى ولا قصير قوى

تعجبت وأنا أسير فى الطريق من رجل فارع الطول يتأبط زراع زوجته القصيرة بالرغم من محاولاتها المسكينه فى لبس حذاء كعب عالى يصل إلى 12 سم ولكنها لم تصل إلى منتصف جسمه ..  ولكن ما أدهشنى أكثر وشد انتباهى أن تتزوج أمرأة طويله من رجل أقل منها فى الطول بشكل واضح  ومن أعاجيب البشر أن الرجل الطويل يعشق النساء القصيرات والمرأة الطويله ترغب أن يكون شريك حياتها مقارب لها فى الطول وترفض ان يكون أقصر منها ومن غرائب هذه الزيجات التى يكون فيها الرجل أقصر من زوجته بشكل ملحوظ ..فيعتقد البعض أن تكون القياده والسيطره للمرأة بحكم أنها طويله وفرعه ولكن كان العكس فهذا الرجل القصير غالبا مايكون ذو شخصيه قويه جباره ومقدره غير عاديه فى السيطره والتحكم فى أمرأته الطويله وهى تخشاه وتعمل له الف حساب

والطول والقصر صفات وراثيه تنتقل من الوالدين للأولاد وقد تظهر بعض الطفرات فى النسل مثل الطول الغير عادى أو القصر الشديد وسبحان الله القادر على أن يخلق من الطويل القصير ومن القصير الطويل بصرف النظر عن قوانين مندل للوراثه

والطول صفة يتميز بها سكان الجبال وبعض السلالات من الجنس الأبيض والجنس الزنجى وليست كلها والشعوب الأسيويه يغلب على سكانها القصر الواضح ومن الغريب أنك تجد الشعوب القصيره يسكن بجاوارها الشعوب التى تتصف بالطول

بالمقارنه نجد أن كلا النوعين مكملين لبعض فى جميع الخواص وهذه حكمة ثانيه من الخالق

أما متوسطى الطول فبداخلهما صفات وراثية قديمه تحمل الطول المتناهى والقصر المتناهى

ملاحظاتى بالنسبه لطوال القامه والقصيرين  :

غالبا مايكون طوال القامه من طيبى القلب والسذج ويطلق عليهم العامه من القصيرين طبعا ( أبو طويله أو أبو هبيله أو طويل وأهبل ) ونفس الكلام ينطبق على الستات الطويله وأرتباط الهبل والهطل بصفة الطول  فنقول دى ست طويله وهبله وهكذا

أما القصيريين فهم حكاية أخرى .. فهم يمتازون بالمكر والدهاء والذكاء الشديد ويطلق عليهم العامة من الطوال عادة بأن نحترس من كل من قرب من الأرض والحكمة الشائعة التى تقول كل قصير مكير

- مقاييس الجمال تبدوا واضحة فى القصيرين أكثر من الطوال (ماتبقاش العمليه قصر ووحاشه كمان)

- زعماء العصابات غالبا مايكونون من الرجال قصيرى القامه

- زوجات العظماء من السيدات قصيرات القامه

- معظم الجرائم تقع من سيدات قصيرات ويحبس فيها سيدات طويلات ومن الطريف أنه لم يتم القبض على نشاله طويله طوال الخمسين سنه الماضيه بل كانوا معظمهم من القصيرات أو متوسطات الطول

- السيده القصيرة أكثر خصوبه من الطويله ليه مش قادر أعرف

- غالبا ماتتكون صداقات رائعة بين القصيرين والطوال بعكس ماتكون بين القصيرين والقصيرين والطوال والطوال .. حاجة غريبه .. يظهر بيكملوا بعض

قراءات

يقولون الطول عز والقصر مهونه ويقولون الطول في الخشب والقصر في الذهب يعني كل ناس لهم وجهة نظر بس اكيد الوسطيه زينه حتى في الصفات الجسمانيه الطول بزياده او القصر بزياده كلها تشد نظر المحيطين من الفضوليين وتحرج الشخص بس الواحد يفكر بالعقل فهو لم يفصل نفسه ولا إختار مواصفاته

يعني لا يقعد يركز على القشور ويحطها تحت المجهر ثم يتعقد ويقول انا قصير بزياده او العكس بالنسبه للبس المرأه للكعب احيانا لإضافة كم سنتيمتر لطولها واحيان أخرى مجرد برستيج وضرورة الموضه النسائيه

المرأة القصيره أكثر أنوثة أكد الباحثون بريطانيون أن الرجال طوال القامة أكثر جاذبية للمرأة في حين أن المرأة القصيرة تعد الأكثر أنوثة. وقال الباحثون أن الرجل الطويل اكثر تأثيرا وجذبا للنساء وبالتالي تزداد فرصته في العثور على شريكة مناسبة له في حين يبحث عن علامات الخصوبة والإنجاب عند المرأة التي يرغب في أن تكون شريكة حياته. وقد كشفت دراسة بريطانية سابقة أن النساء قصيرات القامة أكثر جذبا للرجال ولديهن القدرة على إقامة علاقة زواج ناجحة، حيث وجد الباحثون أن السيدات اللاتي تترواح أطوالهن بين1.51 و1.55سم أكثر ميلا للزواج والإنجاب. ويرجع ذلك الى أن التكوين الجسماني للمرأة القصيرة يعكس للرجل شعورا بالقوة والقدرة على احتواء المرأة وعدم منافسته في الطول، بالإضافة إلى أن المرأة قصيرة القامة لا يبدو عمرها الحقيقي وتكون دائما في حالة نشاط. ووجد فريق البحث بعد دراسة طبيعة الحياة والصحة والتطور الاجتماعي خلال مراحل العمر المختلفة لحوالي 10 آلاف رجل ولدوا في بريطانيا منذ عام 1958 إن الرجل الطويل والمرأة القصيرة مفضلان في عملية تطور الإنسان عبر الزمان بل وحتى في العصر الحديث
لذلك فمن غير المحتمل ان يختفي الفارق في الطول بين الرجل والمرأة

أعلن باحثون مؤخرا انه طالما ان المرأة تفضل الرجل طويل القامة فانه ليس أمام الرجل قصير القامة أية حيلة سوى ان يصبح غنيا. او صاحب جاه وسلطان او شخصية مشهورة مثل أحمد عز ملك الحديد  

فحسب الاحصائيات التي أجراها الباحثون وجد ان طول قامة الرجل يجذب انتباه المرأة التي عندما تقابل الرجل طويل القامة تنظر اليه وكأنه يمتلك كل شيء، وحتى الأسماك تنجذب الانثى فيها الى الذكر الطويل ذي الزعانف والذيل الطويل، فالطول عند السمكة يعني الصحة الجيدة والقدرة على الانجاب.وتؤكد الدراسة ان الرجل طويل القامة تكون فرص إنجابه للأطفال اكثر من الرجل قصير القامة، كما ان فرص زواج الرجال طوال القامة اكبر من فرص زواج الرجال قصار القامة، وذلك بعد ملاحظة ان معظم الرجال الذين لم يتزوجوا حتى سن متأخرة هم من الرجال قصار القامة.

تصدر نجم هوليوود توم كروز قائمة "أكثر الرجال قصيري القامة جاذبية بالعالم" في استفتاء أجري على شبكة الإنترنت

 والطريف أن الاستفتاء قد ذكر أن توم كروز - الذي يبلغ طوله 170 سم وهو ما يعد قليلا مقارنة بغيره من نجوم هوليوود - لطالما ارتبط بسيدات يفوقنه طولا فزوجته الحالية كاتي هولمز أطول منه طولها 180 سم كذلك الحال لزوجته السابقة النجمة الشقراء نيكول كيدمان التي سبق أن علقت على الأمر عقب طلاقها منه قائلة إن أفضل شيء في طلاقهما أنها ستتمكن من ارتداء أحذية ذات كعب عال مرة أخرى.

وبعد اريد اراء الرجال هل تفضل زوجة اقصر منك او تحب تكون بطولك او اطول منك والسؤال للبنات كذاك
قال يعنى من كثرة الزواج بنتشرط

ههههههههههه

من رضى بحاله نام مرتاح البال

روحيه تخنت شويه ( كوميدى أجتماعى)

روحيه تخنت شويه

حامد وهو مستاء : أنا خلاص يا أمى مش قادر أستحمل مفيش فايده غلبت فيها أنا بفكر أطلقها وأخلص من الغلب اللى أنا فيه ده

الأم وهى منزعجه : أيه الكلام الخايب ده.. أنت أتجننت ياحامد وعيالك مين يربيهم .. أللى كان يشوفك وأنت رايح تخطبها مايشوفكش دلوقتى.. خلاص حبك طار فى الهواء .. أيه يعنى وزنها زاد حبتين .. الدنيا خربت ماهو أنت كمان طلع لك كرش أهه وشعرك أبتدى يصلع أنت مابتشوفش نفسك ياواد

- عماله تدافعى عنها علشان قريبتك ويولع أبنك .. يا أمى حرام عليكى أنا ما بعرفش أنام فى سريرى مش سايبه غير 30 سم يادوبك بحط جنبى عليهم وغير مزيكه القرب أللى طالعه من صدرها وصوت شخيرها أللى يصحى الأموات وكله كوم ولسانها أللى متبرى منها لو حاولت أكلمها فى الحكاية دى

- الحق عليك أنت ..- تانى بتقولى الحق عليا أعمل أيه أكثر من أللى عملته .. الجيم وودتها مشى ومشيتها أشتراك مع دكتورة رجيم وبأدفع .. الثلاجة عملت لها قفل علشان تبطل أكل ومفيش فايده عملت طفاشه وفتحتها ..ومش عليها هى وبس الواد والبنت ضربوا كمان وكل واحد فيهم بقى عامل زى العجل الأسترالى

- يابنى مراتك دى أول ماتجوزتها كان شكلها كده

- لأ طبعا هى لو كانت شكلها كده كنت أتجوزتها  ماتفكرنيش يا أمى وسط أيه وقوام أيه  كانت زى المانيكان .. كل ده ضاع وأنفجر من التخن مش عارف أيه أللى حصل  نفشت من كل حته.. أخدتها لدكتور متخصص فى الغدد الصماء وبعد الكشف والتحليلات قال لى الله يكون فى عونك غدد مراتك خرجت من تحت السيطره .. لو شربت شوية ميه برضه حتتخن .. قولت له والعمل يادكتور .. قال لى سلم أمرك لله والمهم أنك تحافظ على الأولاد من هذا المرض وألا حيبقوا أفظع من أمهم .. وكتب لها دواء يثبت الحاله

الأم : يا أبنى أرضى بنصيبك وزى ما قال لك الدكتور أنه مرض وربنا يشفيها وما تطلعش قليل الأصل وتسيبها دى برضه من لحمنا ومن دمنا .. أستهدى بالله وأستعيذ بالله من الشيطان أللى راكبك .

- حاضر يا أمى ..أستغفرك وأتوب إليك يارب .. بس أنا لو فطست وطقيت من جنابى  وحصلى حاجة حتكون الست دى هى السبب وذنبى فى رقبتكم أنتم الأتنين .

- أستهدى بالله وأنا ليه قاعده معها .. خلى عندك طولة بال ياحامد .. وبعدين يا أبنى مش مراتك أول ولا آخر واحده تخينه فيه رجاله كثير عايشين ومراتتهم أتخن من مراتك وما بيعملوش أللى أنت عامله ده

- أهى عندك يا أمى أتصرفى معاها وألا حسيب لكم البيت وأطفش

- طب أسكت خالص مراتك جايه ومش عايزه مشاكل الشويه أللى قعداهم معاكم

( تدخل زوجة حامد وهى ضاربه بوز ومكشره عن أنيابها  ويترك حامد المكان وهو يحدث نفسه)

الأم : تعالى يا روحيه أقعدى جانبى هنا عايزاكى فى كلمتين

روحيه تجلس بجوار حماتها وهى تجهش بالبكاء : أنا سمعت كل حاجة يانانتى .. دلوقتى بقيت كخه علشان وزنى زاد وسببه الحمل والولاده وده شيئ طبيعى بيحصل لأى ست أكيد البيه شايف له شوفه ومش طايقنا وبيطلع فينا القطط الفاطسه .. دى آخرتها لأنى شايفه كل طلباته هو وعياله ده  مش لاقى حاجة يتخانق عليها وأللى فى بوءه أنت تخينه أنت بتشخرى أنا ما بعرفش أنام وعلى كده فى الرايحه والجايه بذمتك أنا تخينه

تنظر حماتها لجسمها وهى تجاملها : لا يابنتى أنت زى الفل ..

- أومال أبنك شغال عليا رزاله ليه وسايق عليا  العوج ليه

- ده حب ياعبيطه ومناغشه هو حيلاقى أعز منك

الحلقة رقم (2)

أخبط راسك فى الحيط

- دافعى عنه ما هو أبنك لازم تقولى كده .. رجيم وعملت ونزلت 15 كيلو ..الدكتور ورحت .. بطلت آكل غير واجبه واحده بس وأفضل جعانه طول النهار وأتفرج عليه هو وولاده نازلين لغ كأنهم بياكلوا فى آخر زادهم .. أعمل أيه أكثر من كده

( يخرج حامد مندفعا من الداخل وهو ثائر : ما قولتيش وزنك بقى كام ياهانم

- ماله وزنى  ياخويا مناسب مع طولى غيرش 20 كيلو زياده

- عشرين أيه قولى 40 ولا خمسين الست وزنها وصل 150 كيلو ياماما

روحيه بغيظ : ميه وخمسين  ميه وخمسين.. لو كان عاجبك أنا كده وحفضل كده وأخبط راسك فى الحيط

- شايفه ياماما طولة لسانها علشان مستتخنه نفسها

روحيه تهب واقفه وتشمر زراعيها : لأ بقى مش حسكت لك ما تفتكرش أن بتتحامى فى أمك .. أتلم ياحامد وخلى يومك يعدى

الأم وهى تقف بينهما : صلوا على النبى ياولاد .. أدخل جوه يا حامد وأقصر الشر

- حاضر ياماما علشان تعرفى أنه مش تخن وبس ده أستقوى  وطولة لسان ..والتخين عليه ربنا يا مفتريه .. متجوز وحش أنا ( يدخل وهو ذليل لغرفة نومه )

- أقعدى يا روحيه فيه كلمتين عايزه أقولهم لك فتحى ودانك وسيبك من شغل الفتونه ده مابينفعش مع الرجاله

- حاضر يانانتى أما نشوف نهايتكم أيه.. صبرنى يارب

تبدأ أم حامد الكلام بهدوء وهى تربت على كتف روحيه لتهدأ من ثورتها : أنت مش عايزه جوزك يشوفك فى أحسن منظر .. أنت مش عايزاه يحبك زى الأول .. ولا أنت غاويه النكد أللى عايشه فيه ليل ونهار ده ..

- فيه حد بيحب النكد يا حماتى أنما تقولى أيه فى عمايل أبنك .. ماهو ليه حق ياروحيه يابنتى .. فيه حد يسيب نفسه لما جسمه يبوظ كده ويضرب من كل ناحيه .. اعمل أيه يانانتى بعد ماخلفت الواد المقروص أستخدمت حبوب منع الحمل وهى أللى ملئت جسمى ميه ..بطلتها لكن الميه فضلت فى جسمى اخدت أدويه كتير علشان تنزل الميه مفيش فايده

- مفيش حاجة أسمها مفيش فايده .. أنت ياروحيه أنا عارفاكى بتكسلى ومش حطه الموضوع ده فى دماغك .. ترضى أن جوزك يسيب البيت ويتجوز واحده تانيه .. طب

يعملها يبقى ده آخر يوم فى عمره !!

- الله ده أحنا لا بنرحم ولا نسيب رحمة ربنا تنزل.. يابنتى يا حبيبتى سيبك من العند والكسل وأنتبهى لجوزك وكمان تنتبهى لصحتك يعنى تفتكرى التخن ده حاجة كويسه ده بيجيب الأمراض الله ما أحفظنا القلب والضغط والسكر غير أمراض المفاصل عارفه البت بنت عمك بسطويسى أيه أللى جرى لها نتيجة التخنت قعدت على عجلة وولادها بيزقوها ماعدتش تقدر تمشى على رجليها..عايزه يوصل بيك الحال كده وتخسرى صحتك أولا وجوزك وبيتك .. الموضوع ده حطيه قدام عنيكى وفكرى وحاولى وصممى على أنك تخسى وسيبك من كلام الدكتور الخايب أللى بيقولك الغدد بتاعتك ضربت ده هو أللى مخه أللى ضرب

- طب العمل يا نانتى

- تبدأى من بكره الرجوع لدكتورة الرجيم وأمشى معاها صح وطبقى أللى بتقول عليه

- آخر مره قالت لى أنت ما ينفعش معاك الرجيم أنت لازم تعملى عمليه لشفط الدهون وتدبيس للمعده

- وماله ياروحيه نعمل العمليه ونظبط نفسينا وجوزك معاه وربنا فاتح عليه من وسع

- هو موافق بس أنا خايفه ومابحبش المستشفيات وأللى شوفته فيها أيام الولاده

- نستحمل فى سبيل أن أحنا نحافظ على صحتك ويبقى حامد ماعندوش حجه

- أللى تشوفيه يا نانتى

- هو ده عين العقل .. قومى صالحى جوزك وقولى له أنك حتعملى العمليه وربنا يبعد عنكم العين ويهدى لك راجلك

الحلقة رقم (3)

روحيه فى مركز التجميل

فى عيادة مركز التجميل يجلس حامد وروحيه للأستماع بكل أهتمام لتوجيهات الدكتور طاهر وهو يتحدث عن حالة روحيه

الدكتور طاهر : زى ماقولت قبل كده أن حالة المدام سهله ولكنها ستظل معنا هنا فى المستشفى لمدة شهر على الأقل

حامد : شهر مش كتير يادكتور

- لأ مش كتير ويمكن أكثر لأنه حيتعمل للمدام ست عمليات شفط وتدبيس وأربع عمليات تحسين قوام وتجميل بعدها أتفرج على المدام حتبقى زى نجمات هوليود

لو موافق أتفضل أنت وهى أمضوا على الأقرارات دى وتقوم بدفع نصف الأتعاب دلوقتى لو عايز تدفعها كلها مفيش مانع

ينظر حامد لروحيه : قولتى أيه ياروحيه موافقه ولا حترجعى فى كلامك

تتذكر كلام حامتها وترد عليه وهى حائرة : أنت شايف أيه ياحامد العمليات دى مفيهاش خطر عليا

- مش حقولك أنا يرد عليكى الدكتور .. العمليات دى فيها خطر عليها يادكتور

- الخطر الحقيقى أللى أنت فيه دلوقتى يامدام لأن جسمك فى زياده مستمره حييجى عليكى وقت مش حتقدرى تقومى من السرير والعمليات دى أنقاذ لك من المأساة أللى حتحصل بعد كده .. هيه لسه متردده

- ردى ياروحيه .. أنا من ناحيتى موافق فاضل موافقتك ردى على الدكتور

- موافقه وأمرى لله أنما وصيتك العيال ياحامد ولو حصلى حاجه حتكون أنت السبب

- أتكلى على الله وتقومى لنا بالسلامه

يدفع حامد المصاريف وتحجز روحيه بالمستشفى الخاص وتبدا على الفور أجراء كافة التحاليل والأشاعات اللازمه وهى مستسلمه تماما لأوامر الفريق الطبى .. وتدخل روحيه غرفة العمليات عدة مرات والجراحين يقوموا بأزالة كيلوجرامات من الشحم المتراكم فى كافة أجزاء جسمها وتبدا فى التعافى لتبدأ عمليات التجميل فى الوجه لأزالة الأنتفاخات الموجوده فى الخدود والرقبه وغيرها من أجزاء الجسم

ويمر شهر وتبدأ روحيه فى التحرك داخل المستشفى وتبدأ تمرينات العلاج الطبيعى وحمامات البخار وغيرها من الأجهزة حتى تبدوا كأنها عادت لسابق عهدها وأكثر وعندما تقف أمام المرآة تصاب بذعر فقد شاهدت صوره مختلفه تماما عن شكلها المعتاد وتبدأ جلسات العلاج النفسى لتتوافق مع شكلها الجديد وتكتسب الثقة بنفسها

كل هذا وحامد يزورها ويشجعها على الأستمرار فى مراحل العلاج

ويغيب عنها أسبوع بأومر الأطباء ليعود بعدها ليصحبها للبيت.. وهنا تقع المفاجأة فيدخل خامد غرفة روحيه بالمستشفى فيجد أمرأة أخرى ممشوقة القوام وهى ترتدى بنطلون وبلوزه ضيقه وشعر أصفر وعيون زرقاء ولكنها تشبه إلى حد ما زوجته يوم خطبها ولكن هذه أحلى وأشيك ورشيقه عنها .. يقف مترددا وهو لا يصدق عينيه ومن خلفه الدكتور طاهر والمساعدين لمشاهدة أنطباعات حامد عند رؤيه روحيه بعد التعديلات وهو واقف مبلم ولا يستطيع أن يتقدم خطوه واحده داخل الغرفه

الدكتور طاهر : أدخل ياحامد بارك لمدام روحيه مالك واقف كده ليه

- متأكد يادكتور أن دى روحيه مراتى .. أيوه ياسيدى

يدخل حامد وهو متهيب ويدور حول روحيه وهو غير مصدق نفسه وهى تنظر له بكبرياء وخيلاء بعد ان عادت لها الثقة بنفسها .. أنت روحيه .. مش ممكن ده أعجاز

لالا أنا مش مصدق أنك روحيه .. أنت بقيتى حلوه قوى أكثر من الأول هم عملوا فيكى أيه .. روحيه وهى غاضبة :أخلص ياحامد خلينى اروح أشوف العيال وبطل أستهبال

- أستهبال .. أيوه ده صوت مراتى روحيه أللى لسانها المتبرى منها .. حمد لله على السلامه..( يأخذ زوجته بالأحضان ويبكيان سويا )

تهمس روحيه فى أذن حامد : فرصة يا حامد تتفق مع الدكتور طاهر يزرع لك قرعتك ويشيل كرشك أللى دلدل ده .. بقى شكلك فظييع أنا مش عارفه ساكت على نفسك ليه

- أنا ياستى عاجبنى شكلى كده

- حامد .. أسمع الكلام وألا حخلعك

يضحك حامد بهستيريا ويتركها ويخرج وهو يضرب كف بكف فبعد أن كان يهددها بالطلاق أصبحت تهدده هى بالخلع .. وعجبت لك يازمن

ههههههههه

تمت

أجسادنا باترينات نستعرض بها جمال الخالق العظيم فلا تهملها حتى لا تكون مصدر أزعاج لك وللآخرين.. فكن باترينه منسقه ورشيقه لتبعث البهجة والثقة والجمال قبل أن يزيلها بلدوزر الحياة لخروجها عن التنظيم

من أقوال واحد بيلف على البترينات

هههههههههه

عروسه فوول أوبشن

عروسه فول أوبشن

غاب عشر سنوات فى أوروبا وأمريكا وعاد يبحث عن عروسه لها مواصفات خاصة

وبحكم القرابه جاء يزورنى وهو يحلم بأنى سأجد له طلبه الذى يتمناه وبعد السلامات وتقديم الساخن والصاقع فتح لى قلبه وبدأ يحكى عن معاناته فى دول الغرب وأنه قرر أن يكمل نصف دينه من بلده أم الدنيا مصر

- خير ما فكرت يا منير يا أبنى .. مفيش أحسن من بنت بلدك تصونها وتصونك

- لكن ياعم زيزو لى مواصفات وشروط  خاصة جدا فى العروسه !!

- أكيد عايزها جميله ومثقفه ومتدينه وبنت ناس وتقبل أن تعيش معك فى الخارج .. طلبك موجود ومتوفر بكثرة فى ظل أزمة الجواز

- لو على الجمال مايفرقش معايا كتير مفيش أجمل من بنات شمال أوروبا .. مللت العيون الزرقاء والشعر الأصفر والبياض الشاهق والقوام الفرنساوى

- كويس أنك حنيت لأصلك وتبحث عن القمحية ذات الشعر والعيون السوداء والدم الخفيف .. ده أمره سهل وموجود على قفا مين يشيل

- برضه ده مش كل حاجة

- ولو على  الثقافة والتعليم والتدين.. متوفرين برضه

- مايفرقش معايا برضه ثقافه أو تعليم ..والتدين ده شيئ طبيعى ومفروغ منه وموجود فى مصر أنا عايز حاجة تانيه خالص .. عايز واحده تتمتع بأنوثه طاغيه

- مش فاهم قصدك أيه لا مؤاخذه تكونش ياواد عايز تتجوز رقاصة

- مش رقاصة رقاصة يا عم زيزو ..- أومال أيه حيرتنى معاك .. أتكلم بصراحة أنا زى والدك فضفض يا ابنى فلا حياء فى الدين

وبعد تردد وصمت : بالعربى ياعم زيزو أنا عايزها بتتهز

- عايز عروسه فيبريشن يعنى .. أنت يا أبنى عايز تتجوز ولا تشترى موبايل

- ياعم زيزو أبوس أيدك أسمعنى للآخر

- يا أبنى ما تتكلم كلام معقول أيه عروسه بتتهز دى نجيبهالك منين

- شوف ياعم زيزو أنا حشرح لك وجهة نظرى وبعدين أحكم فى الأخر .. قول ياسيدى

- البنات والستات فى أوروبا وأمريكا بيمشوا زى لوح الخشب الطلكزانه لا تعرف الست من الراجل لكن عندنا هنا فى مصر الستات لهم ماشيه تانيه خالص أنثويه تحس كده أن الست بتترجرج زى الجيلى

وأنا جاى وكل أمل أنك تساعدنى وتدلنى على المكان السليم لأبحث فيه عن طلبى

- ههههه يخيبك يامنير .. هو ده طلبك بس ونصرف نظر عن باقى الشروط

يقول بكل ثقه : أيوه هو ده طلبى ياعم زيزو شوف حتشور عليا بأيه

أهرش فى رأسى وأنا أفكر فى طلبه الغريب الذى لم أسمع عنه من قبل : شوف يامنير يا أبنى أحنا عندنا فى مصر الستات كلهن خصوبه وأنوثه كماركة مسجله فى كل الدنيا

 

ولكن كل منطقة فى المحروسه  لها نظامها فى المشى فعندك مثلا فى وجه بحرى الستات بتهز الجزأ العلوى بيمشوا يهزوا أكتافهم يمين وشمال معجبانية بنفسها وتشعر كأن مروحة معديه من قدامك وفى قبلى بيمشوا يهزوا الرقبه والذراعين زى بندول الساعة نوع من أنواع الحشمة والدلال وفى المناطق الصحراويه مفيش هز متثبتين على وضع السايلنت أما بنت البلد فى المناطق الشعبيه والعشوائيات فحدث ولا حرج فكله بيتحرك بما فيهم الحواجب والضوافر والزعانف  فوول أوبشن يعنى

- ينصر دينك يا عم زيزو أنا عايز الفول أوبشن ده

- يخرب عقلك أنت يا أبنى مش قدهم وعلى كولن ميعادنا بكره نزور منطقة شعبيه وأختار ياسيدى الفول أوبشن بتاعك هههههههههه بس على الله ماتنضربش

- ياه وبيضربوا كمان ده كده تبقى نعمه أموت فى الصنف المتوحش أحبك ياعمو

- يابنى حيرتنى معاك عايزها بتتهز فوول أوبشن زى الجيلى ولا عايزها متوحشه وشرسه  - عايز الأتنين متوحشه وشرسه وبتتهز

- يظهر مخك أتلحس فى أوروبا  ميعادنا بكره أما نشوف حكايتك أيه

الحلقة رقم (2)

شربات

يحضر منير فى الميعاد ويصطحبنى بعربيته الفاخره ويسألنى إلى أى مكان نتجه فقد نسى الشوارع بعد أن تغيرت القاهرة وكثرت بها الكبارى وأزداد زحام الناس والسيارات

- تحب نروح الحسين أو تحت الربع أو الدرب الأحمر أو تل العقارب ولا دار السلام الصين الشعبية بتاعة القاهرة

- أنا من أيدك دى لأيدك دى ياعم زيزو أنا نسيت معالم القاهرة

- طب خلاص حوديك معقل الرجرجه والستات المتوحشه وصحصح معايا ولا أسوق أنا شايفك محتاس فى وسط العربيات مش عارف تمشى

- أنا فعلا مش عارف أمشى سواقين دولت ولا بهلونات سوق أنت ياعم زيزو

- أنا بقى حوديك قاع المدينه حيث البشر من كل صنف ونوع حوديك عشوائيات دار السلام ( وبعد رحله مرهقة نصل دار السلام وندخل فى حواريها وأركن العربية بالعافيه وننزل لنقعد عل أحد المقاهى فى شارع يعج بالناس تتلاصق فيه الأكتاف

ينزل وهو مبهور من هذا الزحام وهو يتلفت يمينا ويسارا وهو يفتح فمه على مصراعيه من الدهشة

- تحب تشرب أيه .. أى حاجة ..نجلس على ترابيزه تشاهد العابرين أمامنا بكل وضوح

- حسيبك تتفرج على ما أرد على التليفون.. وأتفرج وقولى أنهى نوع يعجبك وعلى الله التساهيل ( أنشغل بالمكالمه وأقوم بعيدا عن صوت التليفزيون  ودوشة القهوة حتى يمكنى التحدث وأرجع إلى الترابيزه فلم أجد منير فأنادى على الجرسون

- الجدع أللى كان قاعد هنا ماشفتوش

- أيوه ياباشا قام مشى فى الأتجاه ده وقالى قول للحج انا راجع

أجلس فى أنتظاره وغاب أكثر من نص ساعة ولم يظهر فبدأت الهواجس تهاجمنى ياترى يا هل ترى الواد ه أيه أللى جرى له ..ده ممكن يتخطف أو حد يثبته وأنا لن أسامح نفسى فقد أدخلته هذا المكان ولا أريد أن أكون سببا فى أذيته

وتمر الساعة وأشاهده وهو يتلفت  من بعيد ليبحث عن القهوة ورأسه ملفوفه بالقطن والشاش أقوم وانا منزعج وأجلسه : توء توء أيه أللى عمل فيك كده

يبتسم وهو سعيد : وجدتها وجدتها يا عم زيزو

- هى مين أللى وجدتها يامجنون انت.. قولى الأول أيه اللى عمل فيك كده

-.. لقيت البنت اللى بحلم بيها مش شايف عربون المحبه

- ده مش عربون محبه دى علقة سخنه أحكى لى يخرب عقلك أنا عارف حكايتك دى مش حترسى على خير .

- لقطتها ياعم زيزو من وسط الآلاف أللى ماشيه كل حاجة فيها بتتهز طبيعى سمراء ومكحله عنيها ولابسه عباية سوداء وأيشارب بيلمع وشايله زى شنطه مليانه خضار

لقيت نفسى زى مايكون مغناطيس شدنى وساحبنى  ومشيت وراها .. أخدت بالها منى أبتسمت ليها ردت عليا :أنت عبيط ياض .. ياه ياعم زيزو طالعة من بؤها زى السكر .. هه كمل البنت ماكدبتش .. بس قولت لها: أنا معجب ممكن نتعرف .. ضحكت وقالت وماله خليك ماشى ورايا .. قلبى كان حيفط من الفرحة قولت لها أنا أسمى منير وعايش فى أوروبا وجاى مصر مخصوص عشان أتجوز وأقدر أدفع مهر وشبكه أللى تطلبيها وعندى شقة فى مصر وبيت فى بلجيكا.. بصيت لى تانى وضحكت وظهرت سنانها كأنهم صفين لولى فيهم سنتين طايرين لكن مش مهم البركة فى الباقى فضلت أحكى لها ظروفى وأمكانياتى الماديه ورغبتى فى التقدم لأهلها لو ماكنتش متجوزه أو مخطوبه .. هيه وبعدين ده أنت طلعت دون جوان جريئ ..كمل

 - كل ما أسألها سؤال ماكنتش بترد عليا  تضحك وتتهز أكثر وتشاور لى بأيدها يعنى أستنى صبرك عليا شويه .. المهم دخلت حاره من جوه حاره وأنا أمسك مناخيرى من ريحة الزباله والقرف أللى فى الشارع لحد ما وقفت قدام بيت قديم ونادت بصوت زى الجاعوره ما سمعتش زيه قبل كده : واد ياحمو ..حمووو ..هيما هيماااا فيطل من الشباك اتنين شباب ماشاء الله زى السبوعه  لابسين جلاليب : أيه ياشربات عايزه ايه .. أنزلوا عيزاكم .. وأنا من سذاجتى فرحت وقولت لها :دولت اخواتك برضه فرصة أتعرف عليهم وأطلب أيدك منهم .. قالت لى : هم حيتفقوا معاك على كل حاجة وحيرحوك على الآخر .. صحيح يامودمازيل شربات .. أصبر على رزقك .. نزلوا أخواتها الأتنين السيد حمو والسيد هيما ووشوشتهم وقامت سيبانا وطلعت وعينك ماتشوف ألا النور على الضرب أللى أخدته منهم ومن سكان الحارة لحد ما نجدنى رجل طيب وخلصنى من أيديهم وأخدنى الأجزاخانه وآدينى قدامك أهه

- يعنى أتفرجت على التوحش  والفيبريشن بصوره واقعية لسه برضه عا يز تتجوز الفول اوبشن

- ماهو انا ما قولتلكش .. قول وفرحنى .. الراجل اللى خلصنى من أيديهم طلع قريب شربات ولما عرف انى غرضى شريف طلب منى آجى بكره  وأقابل أبوها وأدانى رقم تليفونه حتيجى معايا ياعم أكيد زيزو

- قوم يامنير نروح وسامحنى يا ابنى أنا ماليش فى المواضيع دى شوف أخواتك ولا قرايبك يروحوا معاك المشوار ده

- بس انا ما اعرفش آجى هنا تانى..وأخواتى وقرايبى مش حيوافقوا عليها  

- قول دار السلام وأسأل على قهوة بعره ألف مين يدلك

- أبوس ايدك ياعم زيزو كمل جميلك وتيجى معايا  بكره وأعتبرنى زى أبنك

- حاضر ياسى منير بيقولوا فى المثل أمشى فى جنازه ولا تمشى فى جوازه ..نهايته

الحلقة رقم (3)

للناس مشاربٌٌُ وأذواقٌُ 

فى اليوم التالى يحضر منير ليصطحبنى لمقابلة أبو شربات ونركب السيارة فأجد على المقعد الخلفى بوكيه ورد فأنظر إليه وأستعجب

- أيه رأيك فى البوكيه ده ياعم زيزو

- بوكيه أيه وورد أيه يا أبنى ماينفعش مع الناس دى .. أومال أجيب أيه معايا .. عدى على أقرب حلوانى وهات منه كام دستة جاتوه وتورتايه علشان تدخل وعليك القيمه وأطعم الفم تستحى العين .. ماشى ياعمو وحسيبك أنت تتفاهم معاهم .. المهم تخلص لى الموضوع بأسرع مايمكن يومين تلاته بالكتير وآخدها وأسافر بره ..ماشى يامنير

نصل إلى بيت العروسه بصحبة خالها المعلم فرحات الذى أنقذ منير من أخواتها بعد علقة أمس وكلما نظرت إلى وجه منير أشعر بالخوف وأسأله : هما أخوتها أديهم تقيله كده .. يضحك وهو يهز رأسه : مش مهم فى سبيل شربات

نركن السيارة أسفل البيت ونصعد على سلم متهالك فتفتح أبواب الشقق ونستقبل بالزغاريط من جيرانها وأقربائها حتى نصل إلى شقة شربات فى أخر دور ونجد أبوها واخواتها فى استقبالنا على الباب ويرحبوا بنا أحسن ترحيب ونجلس فى صالة الشقة البسيطه ومنير يكاد يطير من الفرح

وبعد السلامات والترحيبات وشرب المياه الغازيه حانت ساعة الجد ويتحدث خالها : قبل أى كلام يا أسطى أبراهيم : سمعونا الفاتحة بالصلاة على النبى (يقرأ الجميع الفاتحة ) ولا ضالين آمين .. ربنا قال فى كتابه الكريم وفى السماء رزقكم وماتعدون

وده رزق شربات وجالها لحد عندها والرسول عليه الصلاة والسلام قال من رضيتم دينه فزوجوه والشاب الأمير ده شاف بنتك شربات أمبارح وهى راجعة من السوق وطالب القرب منك يا أسطى قولت أيه

يسكت الأسطى أبراهيم وينظر إلى أم شربات الواقفه بعيدا على أستحياء وتهز له رأسها بالموافقه فيلحظ ذلك المعلم فرحات فينادى عليها : تعالى يا نظيمه سلمى على عريس بنتك ( تدخل نظيمه على أستحياء وكل شئ فيها يترج كالجيلى فجينات الوراثه ظهرت جليه فى شربات) .. تُسلم عليا وعلى منير وهى تعتذر عما حدث له البارحة

- معلش يا أبنى أللى مايعرفكش يجهلك واحنا ناس بلدى ودمنا حر وأفتكرناك بتعاكسها لكن مجيتك النهارده ومعاك والدك عندنا بالدنيا كلها

منير: ده عمى زيزو فى منزلة والدى المتوفى

- منير ده زى أبنى وأكثر والراجل بيطلب أيد بنتكم الأنسة شربات على سنة الله ورسوله (وبدأت أتحدث عن أخلاق منير وعائلته وظروفه الماديه وأستعداده لدفع المهر والشبكة وعلى أتم استعداد لتنفيذ كل طلباتهم وبعد أن انتهيت : طلباتكم أيه يا أسطى أبراهيم ( تتدخل حفيظه وهى تقول : طلباتنا عاديه خالص زى أى عروسه فى الحته شبكة بعشره ومؤخر عشره والعفش والشقه على العريس

الأسطى أبراهيم : أدونا فرصة نسأل على العريس قبل مانقرأ الفاتحة

- من حقك برضه أسأل براحتك وآدى عنوانه وأرقام التليفونات فى الكارت ده ومن حقنا أحنا كمان لو مافيهاش زعل نسأل أحنا كمان عنكم

منير : المهم تكون شربات من نصيبى كل الحاجات دى ماتفرقش معايا طلباتكم  من العين دى قبل العين دى

المعلم فرحات : عداك العيب وقزح يا منير يا أبنى .. قولت أيه يا أبو العروسه

- قولت على خيرة الله نقرأ الفاتحة ونسأل براحتنا .. تنطلق الزغاريد ويقوم أبو العروسه وخالها وحمو وهيما بتقبيل العريس ومنير يكاد يبكى من الفرح وتدخل شربات وهى تحمل صنيه عليها كوبايات الشربات وهى ترتدى ثوب أحمر مشغول بالترتر وتقدم لمنير الشربات وهى تبتسم وسعيده وهى تقول حقك عليا يا أستاذ منير

أنا فاكراك بتعاكسنى .. وبعد أن تقدم المشروبات تخرج وعيون منير تلاحقها وهو منتشى برجرجه حلة الجيلى التى تهتز أمامه .. حقا للناس مشاربٌ وأذواقٌ

الحلقة الأخيره

بعد ان تقابلنا مع أهل شربات تم الأتفاق أن نحضر بعد ثلاثة أيام  فى بيت العروسه وبالتحديد يوم الخميس لتقديم الشبكة على أن يتم العقد والزواج بعدها بأسبوعين وهو وقت مناسب لأعداد وتجهيز شربات للسفر معه إلى أوروبا وفى طريق العوده يظل منير يتحدث عن ترتيب نفسه ودعوة الأهل والأصدقاء لحفل الخطوبه فقلت له بلاش أهلك وأصحابك فى الخطوبه خليهم فى الجواز مش بتقول حتعمل الفرح فى أوتيل يكون أفضل بدل مشوار دار السلام فوافق وهو يكاد يطير من الفرح

وبعد ثلاثة أيام يحضر منير وهو يرتدى بدله جديده وهو يبدو فى أجمل صوره وأنا من داخلى غير مرتاح لهذه الزيجه العجيبه ولكن كنت أطمأن نفسى بأنه سيأخذ عروسته ويسافر بها بعيدا عن حمو وهيما وباقى العائلة الكريمه

نصل إلى دار السلام وندخل الحارة التى تسكن بها شربات فنجد آلاف من البشر حول البيت وبمجرد وصولنا تفتح أبواب السياره وأيدى غليظه تتلقفنا خارجها وهم يفتحون علينا الخناجر والسنج ونحن لا نفهم ماذا يحدث

- فيه أيه ياجماعة أحنا عملنا حاجة

- مش عارفين عملتم أيه .. جايين تخطبوا عروسة عبده .. عبده مين أحنا مانعرفش انها مخطوبه للأستاذ عبده

- سيبهم يا سامبو الحق مش عليهم .. الحق على أبوها وأخواتها الأندال

- سيب بقى يا سمبو عندكم العروسه أشبعوا بيها ياعم  

رمزى :بس أحنا ياجماعة قرينا الفاتحة مع أبوها وخالها وأخوتها

أنا أسحب رمزى وأغلق فمه : أخرس خالص ماتتكلمش ولا كلمه خلينا نخرج من هنا بخيروألا حنتقطع

- خلاص ياجماعة حقكم علينا مانعرفش أنها مخطوبه لو سمحتم طلعونا من هنا وحقكم علينا وده موضوعكم مع أهل العروسه

- تطلعوا من هنا على بره عدل ومانشوفكمش هنا تانى وألا مش حنخلى الدبان الأزرق يعرف طريق جتتكم

- شكرا يا أخ عبدو شكرا يا أخ سامبو .. أجرى ياواد منير وأركب العربيه وهات بظهرك وأطلع بره الحاره وأنا ححصلك - لم تمضى دقائق بعد وصولنا لأول الحارة ألا وبدات المعركة بين العائلتين عائلة شربات وعائلة عبده خطيبها السابق أستخدم فيها الطرفين كافة أنواع الأسلحة

لم ننظر خلفنا ماذا يحدث ولكن الأصوات وصريخ النساء وأنفجارات الزجاجات كانت تنبئ بشدة المعركة .. وأنا أحفز منير بأن يجرى بالسيارة بأقصى سرعة قبل أن نصاب

بالحجارة والزجاجات التى يتقاذفها الطرفان وعندما خرجنا إلى بر الأمان  خارج دار السلام يركن منير على جاني الطريق وهو لا يصدق بأنه قد نجا من هذه المعركة بأعجوبه

منير : معقول أللى بيحصل ده ..ياه ياعم زيزو أحنا أنكتب لنا عمر جديد

- لسه عايز عروسه بتتهز ياسى منير

جسمه ينتفض ويديه ورجليه يهتزان  :توبه ياعم زيزو المنظر أللى شوفته والسنج والمطاوى والضرب خلانى أنا بتهز ومش عارف اتلم على نفسى بعد الهزه دى وحعرف أتجوز ولا ..لأ

- تعيش وتتهز يابنى

- يا خساره ياشربات ضاع الحلم فى غمضة عين

-  تانى أسمع يابنى أنت تاخد بعضك من هنا على المطار عدل وأرجع ماطرح ماكنت وأنسى خالص حكاية الفيبريشن والفوول أوبشن ودور على واحده  فى البلد أللى أنت فيها تتهز ولا مابتتهزش دى مشكلتك مش ناقصين بلاوى أركب خلينا نروح

هههههههههههه

تمت

غطينى ياصفيه وصوتى ( مقال )

غطينى يا صفية وصوتى

وبما أننى مواطن صالح من الدرجة الأولى أعلم حقوقى وواجباتى وأأديها راضيا أو مجبرا تأثرت بالدعاية التى بثها التليفزيون على مدى شهر بضرورة مشاركة المصريين فى الأنتخابات .. فقلت أنا لها أنا لها ..وجاء يوم العزة والكرامة لأنتخب من يوصل صوتى تحت القبه  من أجل مستقبل أفضل لى وللأجيال القادمه

وهلت البشاير وأمتلء صندوق بريدى عن آخره بخطابات ودعاوى السادة المرشحين للمجلس الموقر ..كيف حصلوا على عنوانى وعرفوا بأنى لديا بطاقة أنتخابيه فهذا مازال لغز محيرنى فطوال الفتره التى لم يكن عندى فيها بطاقة لم يعبرنى مخلوق

وجاء يوم الأنتخاب الذى يكرم فيه المواطن أو يهان فقمت فى الصباح  وأرتديت بدله شيك وذقن حليق ونظارة المناسبات السعيده مع قليل من الجيل والبرفان الذى أحضره الأولاد فى عيد ميلادى وتوجهت إلى اللجنه سيرا على الأقدام فوجدت حولها خلق غفير يبدوا على سيماهم البلطجة والأجرام وتلقفونى مثل المناديين والسماسره بمحطة مصر فهذا مندوب أخوانى ذو لحيه وطاقيه ويمسك فى يده ميكروفون وهو يخطب خطبة عصماء تلين قلب الحجر الأصم ويجعلك تشعر بأن مرشح الأخوان يحمل معه مفاتيح الجنه  والنار وذاك من الوفد وآخر من التجمع وسيده جميله لابسه شيك من الغد وهى تسرسع  بالنداء على مرشحة الكوته وهؤلاء جميعا يبعدون مئات الأمتار عن مقر اللجنه ويحتلون المداخل والمخارج إليها أما مناديب الحزب الوطنى الأشاوس فقد وقفوا على باب اللجنه الرئيسى ومعهم كتيبه من الأمن المركزى وهم يهتفون ويطبلون ويرقصون فقلت فى نفسى هل النتيحة ظهرت مقدما قبل أن ندلى بأصواتنا فقلت لا بأس فالحزب الوطنى تعودنا منه الفوز منذ عشرات السنين

أقتربت من اللجنه وقبل أن أصل للباب شعرت بيد قويه تقبض على يدى

- على فين يابيه

- داخل أنتخب .. لو سمحت تعالى خد الواجب بتاعك الأول ( وغمز لى بعينه الشمال )

لم يعطنى فرصة للرد وسحبنى للسرادق المقام أمام اللجنه .. وترررك ( ده صوت فتح زجاجة الحاجة الصاقعة) أتفضل ياباشا .. شعرت بعمق الكرم الحاتمى فأخذت منه الزجاجة ووقفت أبرقعها بأنتعاش وقرب نهايتها تقدمت فتاه صغيره  وهى تحمل صينيه عليها شيكولاته فأخذت كام واحده  لي ولأحفادى أصلكم ماتعرفوش طعم وحلاوة شيكولاتة الحزب الوطنى وجائت فتاه أخرى وهى تحمل صنيه عليها جاتوه وسندوتشات مغلفه فلم أكسفها هى الأخرى وأكلت أحلى سندوتشات ومعها قطعة جاتوه محترمه من أم 10 جنيه ومسحت فمى ويداى بمنديل معطر وحمدت الله على نعمته على هذا الأفطار الراقص والأستقبال الحافل من مناديب الحزب الوطنى وبدأت بالدوران للخلف لأذهب للجنه وجدت اليد القويه تقبض على يدى مره أخرى فقال لى : رايح فين يابيه .. رايح أنتخب بقى .. تنتخب مين .. أنتخب أللى أنتخبه أنا حر .. سكت قليلا أنت معاك بطاقة أنتخابيه فقلت له أيوه معايا بطاقه سكت قليلا وهو يحدق فى ويبتسم أبتسامه بايخه وقال مانفسكش تقابل سيادة الوزير وتسلم عليه وتقول له طلباتك .. فقلت هو سيادة الوزير فاضى يسمع طلبات دلوقتى .. مالكش دعوه تعال بس معايا .. فحسبتها فى دماغى بسرعة .. لو قلت لأ وعملت فيها رجل حر سيرمونى للعيال البلطجيه والنسوان الشلق يقطعونى أربا تحت سمع وبصر البوليس وماليش ديه ..وعلى أيه البهدله وقلة القيمه وأنا لابس بدله ونظاره وحاطط جيل وبرفان ما هم ناجحين ناجحين

 فقلت أسوق الأستهبال لما نشوف نهايتها أيه معاهم وسيرت معه لأجد نفسى وجها لوجه أمام السيد الوزير وتحيط به كوكبه من البهوات والباشاوت الذين نراهم فى التليفزيون ودفعنى ذو اليد قويه لأجد يد الوزير ممدوده لى فأصافحه وأحتضنه لأنه أحتضننى هو الآخر فلابد أن أجامل الرجل لأن طعم السندوتشات والجاتوه والشيكولاته والحاجه الصاقعة لم تستقر بعد فى جوفى وعملت بالحكمة التى تقول من أكل طعام المعز ضرب بسيفه  تعددت الأسباب والموت واحدٌ ولن أخرج من هنا سالما و بما أننى مواطن صالح أعرف حقوقى وواجباتى صرخت بأعلى صوتى ومن ورائى الجماهير وطنننننى وطننى هوووم هوووم

الوزير وقد أرتسمت على وجهه الصبوح أبتسامه رضا وقال : مالكش أى طلبات

فقلت متزلفا ( أعذرونى  فى الحته دى فأنا فى داخل عش الدبابير ) : نفسى يامعالى الوزير أن أنضم للحزب الوطنى ودلوقتى .. ينظر لى وهو يبتسم أبتسامه لا أنساها ويعلو صوته : أديله أستماره  يالطفى ..ويردد ورائه باقى الكوكبة نفس النداء : أديله أستماره يالطفى .. أديله أستماره يالطفى.

- أملئها الأن معاليك

- أملئها على مهلك وقدمها بنفسك لمقر الحزب

- ممكن توصيه من سيادتك .. هات ياسيدى وآدى أمضى .. يعيش سيادة الوزير حبيب الملايين .. أروح أنتخب بقى يا جماعة

- أتفضل وأرجع هنا تانى عشان تاخد هديتك .. ربنا يخليك ياباشا يا مغرقنا بخيرك -    ماتقولش كده ياراجل.. يازناتى دخل البيه اللجنه  

أسمع صوت فى الميكرفون وهو يقول : المواطن الشريف زيزو زكريا فليتقدمممم سررر على بركة الله وأعطى صوتك لمن يستحقه إلى الأمام يازيزووو فى رعاية الله

- أدخل اللجنه معززا مكرما بصحبة عم زناتى ويبدو من منظره أنه مخبر قديم وأقدم بطاقتى العزيزه فيقول : زيزو زكريا .. أيوه ياجناب المستشار .. لو سمحت نشوف صوابعك .. حط الصباع ده هنا فى الحبر الفسفورى ..أتفضل ياباشا الأستماره سودها وراء الستاره وضعها فى الصندوق .. أدخل وراء الستاره وأفتح الأستماره فأجدها متسوده جاهزه قولت ياولاد الحراميه والله لأبوظها وطلعت القلم وقمت مسود على كل المرشحين وطالع بسرعة البرق ووضعها فى الصندوق وقمت خارج من باب اللجنه وأنا أهتف وطننننى وطننى هوم هوم هوم وأخدت ديلى فى سنانى ويافكيك

دون أن ألتفت خلفى أو أرد على نداء عم زناتى الذى يلاحقنى  ولكنى أختفيت فى الزحام وفى الطريق قمت بتمزيق أستمارة الحزب والبطاقه الأنتخابيه فشعرت بعدها بأرتياح غريب وأنا أردد مقولة سعد باشا : غطينى ياصفيه وصوتى مفيش فايده

ههههههههه