قصص فصيره جدا ( فتافيت )

- قصص قصيرة جدا
غش عرفى
خلعت فستانها والباروكه والرموش وطاقم الأسنان وأخرجت حشو الصدريه
والعدسات الزرقاء وأغلقت الأنوار وتمددت بجواره فى أستسلام وفى الصباح
ألقى نظرة أستياء وترك بجوارها الورقة العرفية وعليها كلمة وداع إلى الأبد
عنتر
سأل مدرب الوحوش عن عنتر قالوا ضربناه وحبسناه ومن غير زاد بقاله يومين.. طرقع الكرباج فى الهوا وغرز فى جسمه الشوكه مالان ولانفذ الكلام قال: ده يرجع يتحبس فى قفص عبله يمكن مزاجه ينعدل وأللى مايقدرش عليه المدرب.. الأنثى حتعالجه.. أكل عنتر عبله فى دقيقتين.. والمتفرجين أنقسموا ناس بتهتف لعنتر المسكين والباقى مستاء لأن العرض ماكملش 
شروطى
شرطى للرجوع أنك تطلقها وتكتب لى شيك بكل أموالك غير كده لن تشوف أولادك.. أستحملت كتير.. ماعدش لك أمان وفرجنى حتلعب بديلك أزاى..خرج وأغلق الباب فبكت على الماضى أللى فات
المرحوم كان راجل طيب
الله يرحمه كان طيب وأبن حلال لكن كان بخيل جلده بيقولوا حرص وخوف من الفقر وأن عمره ما أستدان وترك وراه شيئ وشويات ومال الكنزى للنزهى وياسلام على الأيام
وراء القضبان
الغيره هى سبب وجودى وراء القضبان قتلته مره واحده ولكنه قتلنى مئات المرات يا حضرة القاضى أحكم بالعدل ..شهودى كل بنات جنسى وحيشهدوا معايا..آه لو كنت أنثى حتعرف مين أللى عليه الحق
بلا عوده
أنزل ياحضرة محطتتك دى ..معاك تذكرة ذهاب بلا عوده ..ممكن أدفع الفرق من فضلك وأكمل للآخر ..ماينفعش قطارنا ذهاب ومش راجع ..ممكن تساعدنى أنزل شنطى ..مفيش شيالين عندنا أعتمد على نفسك ..طيب ماتزوقش كده أنا نازل بالذوق ..بلاش تناحه ماتقفش قدام الباب ماتعطلش اللى طالع واللى نازل
يظهر أنك مش ناوى تجيبها البر أيدكم يا جماعة نرمى الراجل ده بره
من الأقوى
أنا صوتى أعلى من صوتك ولسانى أطول من لسانك ماتسمعش الجيران بينا
كل مرة تعتذر وترجع تعلى صوتك وتطول لسانك أنا راجعة بيت بابا ماتنساش
تنشر الغسيل وتغير الأنبوبه وتحط أكل للعصافير وتسقى الزرع فى البلكونه
مواطن فى السليم
عندى25 ولي بطاقة رقم قومى وبطاقة أنتخابيه وبطاقة دعم كلى وأبونيه فى مترو الأنفاق وحسن السير والسلوك ولا أشترك فى مظاهرات أو أعتصامات
وليس لى توجه حزبى أو سياسى ومعافى من الجيش لم يصبه الدور ممكن أروح علشان ألحق الماتش.. طاااخ ..أخرس ياض
اليتيم
بابا هو أنت مابتضحكش ليه ؟؟ ماما بتضحك وأنت لأ!!تحب أغير لك المحطه
مابتردش ليه ..باصص قدامك ومكشر ..المفروض تفرح أنا طلعت الأول على المدرسه والشهادة أهه..تامر سيب صورة المرحوم وقوم ذاكر..حاضر يامامى
عقد
نظر كثيرا لعقد زواجه فطواه وهو يتحسر فلم يجد فيه تاريخ الأنتهاء بالرغم من وجود تاريخ الأبتداء محدد بالحروف والأرقام
الرصيف
توقف فى منتصف الطريق وجلس على الرصيف ليستريح فنهره الكناس ليكمل المشوار فالرصيف للكنس وليس لراحة الفاشلين
كفايه
وقف ضمن الصفوف المتراصة فى الميدان الفسيح و يرفع لا فتة كفايه وهو يهتف مع الواقفين وكلما أشتد عليه الضرب يصرخ من الألم وهو يردد
كفايه ..كفايه ..كفايه حرام.. حموت يا ولاد الكلب
القرد والمجنون
ركب المينى باص قطع التذكرة جلس خلف السائق تفحص الوجوه فوجد الجميع ينظرون إليه ويضحكون فأبتسم لهم ونزل فى المحطه ودخل من باب المصلحة فقبض عليه الحارس وأستدعى الشرطه فأمر وكيل النيابه أيداعه فى المصحة فهرب وأختبئ داخل حديقة ..سمع صوت يأتى من خلفه فوجد قرد فى أعلى الشجرة ينادى عليه بأن يصعد لأعلى ليختفى معه.. أنا هربان من
مستشفى المجانين وأنت ..أنا هربان من الضرايب هسسسس
14- بكاء
بكى عندما قابلها وبكوا عليه عندما فارقها وبين البكائين ضحك ولعب وجد وحب وبكاء
15- شخير
فتح عيناه فوجدها بجواره فأغمضهما بسرعة ولم يستطع أن يعود لحلمه ..غسل وجهه وأرتدى ملابسه وهم بالخروج فتقطع شخيرها وتأمره أن يحضر مبكرا وأن يترك مصروف للبيت لا يرد عليها ويصفع الباب خلفه بشده
16 – الباروكه
جذبت صغيرته شعر الراكبه التى أمامه وأسقطت الباروكه من شباك الأتوبيس
تنبه على صراخها وضحكات الركاب أخرج فوطه من حقيبته ووضعها على رأسها فقذفتها فى وجهه ونزلت فى المحطه وركبت تاكسى
17- عدوى الضحك
جلس فى المأتم يضحك وكلما نظر إليه أحد تزداد ضحكاته بعد عشر دقائق ضحك كل المعزيين وتوقف المقرأ عن التلاوة فقد غلبه الضحك فدخل أبناء وأقارب المتوفى السرادق وأنفجروا فى الضحك أكمل المقرأ التلاوة فتوقف الجميع ورسموا على وجوههم العبوس والحزن مرة أخرى قام فى هدوء
ووقار وسلم على الجميع وأنصرف وهم يضحكون
18 – وحشنى يا جماعة
زار زملائه فى العمل بعد أن هاجر إلى أمريكا منذ عشرة سنوات وأخذ الجميع بالقبل والأحضان دون أن يفرق بين الرجال والسيدات المحجبات منهم والمنقبات ولم يتنبهوا ألا بعد أن قبلهم جميعا فجلست السيدات يضحكن على فعلته ويعطينه العذر فقد يبدوا أنه أتهبل هئ هئ وغلب عليه الطبع الغربى

أنت عفريت أنت

عنفته امه وهو يدخل عليها وش الفجر : انت عرة العفاريت وأفشل عفريت فى العيله مافى شيئ كلفت به الا نتج عنه نصيبه او كارثة انا مصدومه فيك ولا استطيع ان اواجه صحباتى العفريتات فاكرالولد الفسدان اللى سلمناه لك وقلنا ده صيد سهل وحتاكل عليه عيش يبطل معاصى ويصبح من الصالحين وتفر بعيدا عنه العفاريت.. فيه عفريت فى الدنيا يوسوس لواحد انه يدخل الجامع ويصلى الفجر بدل ماهو قاعد فاضى اهه انصلح حاله من تحت رأسك ..أنا بأشك انى خلفتك

- انا اسلمت يا أمى .. دخلت الدين الجديد وا خيبتاه وا حسرتاه.. لاتقولى ذلك وتنثرين التراب على رأسك يل استغفرى لذنبك وتوبى إلى الله وأشهدى بأن لا أله ألا الله وأن محمد عبده ورسوله .. اخرج من بيتى وأبحث لك عن متاهة غير هذه لو علم أهلك وأخوالك وأعمامك لقتلوك .. اهرب الأن

( مقطع من فيلم العفريت التائب)

   

   

• 
  

الزيارة السنويه
على أيدك يا أسطى..أنزلوا ياولاد .أستنوا هنا لما أشوف عم( رضوان) التوربى يفتح لنا المدفن
> هى تيته وجدو مدفونين هنا ياماما
> أيوه ياروح ماما ومعاهم بقية عيلتنا يحضر عم رضوان ومعه مفاتيح المدفن
رضوان : كل سنه وأنت طيبه ياست لواحظ ..كل عيد أم وأنت طيبه ..أتفضلوا خشوا يا عيال..والله ياست مستنيكى من الصبح لأن عارف أنك ما بتفوتيش عيد أم ألا لما تيجى تزورى المرحومه والدتك ..والله فيكى الخير
> متشكرين يا عم رضوان المهم تكون واخد بالك من التربه أللى فيها أمى
> شوفى بنفسك أهه زارع لها الصبار وكل يوم أسقى وأرش وأقرأ عليها الفاتحة
> ما هو أنت عارف معزتها عندى أد أيه يا عم رضوان ..خود دول علشانك
> يدوم العز وتعيشى وتفتكرى ياهانم
> ياله يابنت وياواد أنت وهى أأقفو قدام توربة تيته وأقروا الفاتحه
ميزو : مامى أنا مابعرفس الفاتحة أنا حقول ربنا يخليكى يا تيته
> ماشى بس تعال هنا قدام أخواتك عشان تيته تشوفك
ميزو يضحك ويضرب بكفيه الصغيرين : هى فين تيته دى أنا مش شايف حاجه هئ هئ هئ ..أنت فين ياتيته أنا ميزو
أخو ميزو هشام ينهره ويشده بجانبه : عيب ياميزو أحسن تيته تزعل منك
ميزو : هى فين تيته دى ياهسام ..مستحبيه جوه ليه
هشام : تيته عند ربنا بس هى مدفونه هنا
ميزو : خلاس فهمت تيته ميته يعنى ..أه ..
يجرى ميزو حول المقبرة وهو يغنى ويتنطط وهو يقول : تيته ماتت هيه ..تيته ماتت هيه
لواحظ : أمسكى يابت ياسومه الواد مقصوف الرقبه ده وخليه يكتم أحسن له
سومه : سبيه يا ماما ده صغير ومش فاهم حاجه
> لواحظ بعد أن تقرأ الفاتحه على أمها تقوم بوضع الورد على مقبرتها وهى تقول: كل سنه وأنتى طيبه يا أمى ..أنت من السابقين ونحن من اللاحقين وتفترش الأرض أمام المقبرة وحولها أولادها وتفتح شنطة الأكل وتخرج السندوتشات وتوزعها على أبنائها الذين يتخاطفونها ويلعبون فى حوش المقبرة ثم تضع يده على خدها وتسرح بعيدا وهى تتذكر أمها وحنيتها والأيام الجميله التى عاشتها فى ظلها قبل أن تتزوج فتتراقص فى عينيها الدموع فتبدأ فى البكاء بحرقة ويعلوا صوتها فيتوقف الأولاد عن اللعب وويتجمعون حولها أما ميزو عندما شاهد أمه تبكى أنفتح فى البكاء والصريخ وظل يشد فى أمه لتقوم وتخرج من هذا المكان ولم يتوقف عن البكاء ألا عندما قامت وخرجت من حوش المقبرة لتعود إلى بيتها
وفى داخل التاكسى يحتضن ميزو أمه بقوة وهو يرتجف
ميزو : مامى ..تيته وحسه
لواحظ : ما تقولش كده عيب لتزعل منك
ميزو يبدأ فى البكاء : تيته وحسه ..تيته وحسه
لواحظ تحاول أن ترضيه وتسكته ولكنه أستمر فى البكاء وهو يردد نفس العبارة
> خلاص ياميزو ماتزعلش ..أسكت بقى تيته وحشه.. تيته وحشه
كل سنه وأنت طيبه ياكل أم وياكل زوجه والفاتحة على أرواح الراحلات منهن
 تمت

حكايات من الزمن أللى جاى

حكايات من الزمن أللى جاى
مقدمه: هذه الحكايات خياليه تقع أحداثها فى عام 2099 ممتزجه بضحكات الشعب المصرى وهمومه وعاداته وتقاليده بالرغم من التقدم التكنولوجى وأرتفاع مستوى المعيشة فى ذلك الوقت فمازال هو ذلك الشعب الجميل أبو ضحكه جنان
ولو مرعليهآلاف السنين تعالوا نشوف هل تأثرت جينات شعب مصر بهذا التقدم وكيفية تفاعله معه وذلك من واقع حياتنا اليومية.. من رأيى نعتبرها هرشة مخ لأصحاب الرطلين مخ فهيا بنا
الحلقة الأولى
حكاية عويضه أوتوماتيك ومسعدة أستاند باى
فى جلسة رومانسيه بين عويضه ومسعدة فى الحديقة الدوليه لقرية صفط اللبن جلسا يتناجيان وقد ركن عويضة الموتوسيكل الرهوان بجوار أحدى الأشجار وأفترشا النجيلة الخضراء وأخرجا سندوتشات الهمبورجر والسوسيس ولفة الفجل والجرجير ليأكلا سويا لقمه على ما قوسوم
> عارفه يابت يا مسعدة..أنا بحبك جوى.. جوى.. ورحمة دادى العمدة
مسعده: مصدقاك يا عويضة من غير ماتحلف برحمة باباتك العمده ..بس أنت مبلط فى الخط ومش عايز تاخد خطوة لقدام ونتجوز أحنا بجالنا خمس سنين مخطوبين وأنت محلك سر
عويضه: مين قال كده ..تفى من خشمك يابت.. ده أنا بأعد الأيام والليالى علشان أشوف اليوم أللى يجمعنا سوا فى بيت واحد ..خدى حتت المخلل دى
> يا خويا عليك.. أسمع كلامك أصدقك أشوف أمورك أستعجب..
> أصبرى يابت دى كلتها سنه وتعدى قوام.. ونطول المراد من رب العباد أيكش أن أمك مصربعاكى وعماله تزن فى ودانك ..ون ون ون.. حتقوليلى على أمك
> ما تجبش سيرة أمى أنا بقولك أهه يا عويضه ..أنا أللى بكلمك..الدار أللى حنسكن فيها وخلصت وأتحط فيها العفش كمان مش عارفه أيه أللى مأخرك وعمال تماطل فى الميعاد تكنش رجعت فى كلامك ياوله
> أرجع فى كلامى أزاى يعنى ..هو العبارة أن فيه شوية حاجات ضروريه ولزما أجيبها قبل مانتجوز
> أنا شايفه أن البيت مش ناقصه حاجة ياعويضه
> أزاى بجاه ..ناقص الديش الطاير والرسيفر أبو ساعة والبلاى أشتيشن الأمريكانى والديب فريزرأبو كاتينه والميكرويف لتحميص البتاوى والأوتومبيل أبو ست عجلات ومقطورة ..عايزه تتجوزى من غير أتومبيل يا مسعده علشان الناس تاكل وشى ومن غير تليفزيون فلاتن 70 بوصة ياخى لع وألف لع مش عويضه أبن الحاج محروس أوتوماتيك أللى يبقى مجلته فى البلد كولتها.. ده كان زمان ياشاطره أيام ستى وستك سنة 2009 فى الأيام الفقر أللى كانوا عايشينها ورضيين بحالهم ويكملوا عشاهم مسلسلات وشتيمه فى الحكومه
> طب عندى فكرة ماطروح تشترى أللى ناقصك بالقسط وسدد على مهلك
> أنا أشترى بالقسط مش حيتبجى حاجة نعيش بيها يا فالحة
> أنا بالعربى كده مش لادد عليا الحال ده أحنا كبرنا يا عويضه أنت داخل على خمسين وأنا قربت أكمل الأربعين عايزه ألحق أخلف لى حتت عيل أفرح بيه
>هو كل همك على الخلفه ما تخفيش ياختى على نفسك الحقن الجديده فى مركز تفسيح الأسرة دلوقتى بتخلى الستات تخلف على الستين وأقربها مراة خليفه أخويا أهى لسه مخلفه على 67 سنه
> بس بيقولوا أن الحقن دى بتجيب العته والعبط والجنان يا عويضه بعد سن التسعين مفيش أحسن أن الواحده تخلف طبيعى
> همك كله على الخلف ماتقلقيش نبجى نعملك أستنساخ عند الدكتور( أبو الحسن كربونه) فى البندر أحسن من الحقن ..هو الأستنساخ مكلف شويه أنما بجى عشان خاطرك كله يهون ماتشليش هم ..هو حيجى أعز منك يا مضروبه..هههههه
> لا بجه أنا مابحبش الأستنساخ أنا عايزه أخلف زى أجدادنا وطبيعى زى ماربنا خلقنا ولا عايزه حقن العبط ولا الجنان أيه رأيك بجى
> يابت أنت مخك راكب شمال ليه ..أكيد ما بتخديش حبوب الزكاوه وتكبير المخ
> مابخدش حبوب القطران أللى بتقول عليها دى.. آخر حبايه أخدتها من شهرين
> عشان كده مزرجنه ومخك قافش معايا.. طب ما قولتيش ليه كنت جيبتلك شريط من السوق السودا على كولن خدى حبايه من بتوعى دلوقتى وأستهدى بالله
( تأخذ مسعدة حباية من عوضين وتجلس وهى مبلمه )
> مالك يابت مابترديش ليه ..(يضربها على ظهرها ) أنطقى يابت أيه أللى جرالك
>مافيش أنا حاسه أن نفسى غمه عليا يا عوضين قوم بينا روحنى دارنا
> حتعرفى تركبى ورايا على الموتوسيكل الرهوان
> أعرف بس ماتجريش ورحمة أبوك العمدة
> مانتى عارفة السرعة الأولانيه على 120 والتانيه على 180 والتالته على 240 أسوق بيكى على 120 وأمرى لله أمسكى فيه كويس يابت ..فوووم.. فوووم

الحلقة رقم ( 2)
الخرطوش الليزر
ينطلق عويضه بالموتوسيكل وتتشبس مسعدة بجاكيتته الجلد وهى ترتدى الخوذه الواقيه ونظارة الضباب وفجأة تصرخ مسعدة ألحقنى ياعويييييييضه
ينظر عويضه خلفه فلم يجد مسعده فيدور بالموتوسيكل ويعود للبحث عنها وهو ينادى: مسعده أنتى رحتى فين يابت ..ردى عليا يافجريه
يسمع صوت قادم من الترعة..أنا هنا يا عويضة ألحقنى
عويضه : ما أقدرش أنزل فى الترعة لآخد بلهارسيا وكمان أنت عارفه مابعرفش أعوم
مسعده : آه ياندل بس لما أطلعلك حوريك
تخرج مسعدة من الترعة وهى ترتعش من البرد وتلبد فى عويضه ..فيبتعد عنها
عويضه : أبعدى يابت بلتينى تتك الهم..فين فردة البوت ضيعتيها فى الترعة يابت
> وآدى الفرده التانيه عشان تستريح ياعويضه يا بن نفوسه ( تخلع الفرده التانيه وتطيح بها فى الترعه) أستريحت ياسيدى خلينى حافيه أحسن..ياله أطلع بينا على دارنا عشان آخد شاور
> بترمى البوت يابت أللى أنا جايبه ودافع فيه دم قلبى ..أنت أكيد أتجننتى أركبى ياوش الفقر ليه حساب معاكى بعدين
يصل عويضه ومسعدة إلى دارهم وتدخل وهى حافية القدمين وماء الترعة يتساقط منها وهى تبكى.. فتقابلها أمها فرحانه فتضرب بيدها على صدرها
فرحانه : أيه أللى جرالك يابت وماشيه حافيه حد شافك من أهل البلد
مسعده : أسكتى يامامى كفايه أللى حصلى ..فيه حد فى الحمام
> أستنى أحسن أخوكى شعلان بياخد شاور..يا حبيبتى يابنتى..عملت فيها أيه يامدهول..هى كل ماتخرج معاك ترجع بنصيبه
عويضه : بنتك عندك أهه ياخاله فرحانه لما تعجل وتاخد حبوب الزكاوة وتكشف عند الدكتور ونتأكد أن هى سليمه وما خدتش وباء من الترعة أبجى بلغينى ..وما تنسيش تشترى لها بوت بدل أللى رمته فى الترعة
> ألا البوت ..البوت ياروح خالتك.. على العريس زى أتفقنا
> ماهو أنا جيبت البوت وبنتك أللى ضيعته
> مش أنت أللى وقعتها فى الترعة تبجى مسؤل عن علاجها وتشترى ليها بوت تانى بدل أللى ضاع عاجبك ولا مش عاجبك
يصيح عويضه فيخرج شعلان أخو مسعده على صوته وهو يقول : لع مش جايب حاجة أنتم من سكه وأنا من سكه وكل حى يروح لحاله
شعلان : أنت بتزعق لأمى يا عويضه ناولينى يامه البلاك جاك من المندره عشان نؤدبوا الواد السافل ده
عويضه : عايز تكهربنى بالبلاك جاك ياشعلان يا أبن فرحانه ..ياخى دا أهه ده أنت مش عارف أنا أبنى مين ياوله ..أنا عويضه أبن الحاج محروس أوتوماتيك أجدعها أوتوماتيك فى القطر كله ..أعملها كده وشوف أن مانسفتش لكم البيت ده على أللى فيه بالخرطوش الليزر بتاعى.. مابجاش أنا عويضه
تحضرفرحانه عصا البلاك جاك لشعلان من المندره : أدب الواد ده ياشعلان خليه يفوء لنفسه ويعرف مقامه وإذا كان هو من عيلة أوتو ماتيك فأحنا من عيلة أستاند باى على سن ورمح أللى أصغرها عيل فى عيلتنا يقدر يلعب بعيلتهم أتارى
> ورينى كده حتعملوا أيه
يوجه شعلان البلاك جاك فى أتجاه عويضه فينتفض فى مكانه من الموجات الكهربائيه ويصرخ ..آه أاااه آيييي ..اوووه ..ألحقينى يامااااه
> دى حاجة كده ع الماشى عشان تفوج لعلقك وتعرف بتكلم مين ياجعر
ينطلق عويضه للخارج وهو يمسك قفاه وهو يقول : الحرب ..الحرب ..الدمار الدمار ..آه ياكلاب أن ماوريتكم ياعيلة أستاند باى أن ماخليتكم تبقوا ست داون وتلبسوا طورح من الصين ما بجاش أنا عويضه أوتوماتيك
( وتشتعل الحرب بين العائلتين ويسقط الضحايا من الجانبين وتصل أخبار المعارك الدائرة إلى الحكومة الفدراليه فترسل لهم قوات الأمن المحموله جوا لتفض الأشتباك بينهم وتجتمع الأطراف المتنازعة فى مكتب المحافظ لعقد جلسة صلح وتعويض المتضررين)


الحلقة رقم ( 3 )
الحضانه الفول أتوماتيك
ينظر هيثم فى الجريده الألكترونيه وهو مندهش وينادى على زوجته مديحة ..
هيثم : شوفتى يامديحة مكتوب أيه أشتعال الحرب بين عيلتنا وعيلة أستاند باى بمختلف أنواع الأسلحة المحرمه دوليا ومحليا ..والحكومة الفيدراليه بعتت لهم الأمن المركزى المحمول جوا والدنيا مقلوبه فى البلد
مديحة : أحسن خليهم يخلصوا على بعض دى مش اول ولا آخر حرب مابينهم
مش ابن عمك عويضه كان خاطب منهم بت متخلفه أسمها مسعده وقلنا خلاص النسب ده حيصلح الجو وحيبقوا كويسيين يظهر أنه مافيش فايده عالم فاضيه
هيثم : الحكومه بتحاول تصلح مابينهم والمحافظ أتبرع بشراء بوت لمسعدة علشان تهدى النفوس أنما عيلة أستاند باى مصرين على أن عويضه ييجى شايل البوت على أكتافه ويقدمه بنفسه لكبيرة عيلتهم الست فرحانه
مديحة : ده تشدد مالوش لازمه.. الست دى أنا عارفاها ليبراليه متعفنه.. كفاية يبعت ماسيج يعتذر فيه.. أيه لازمته الرخامه دى.
هيثم : ما تنسيش أن وقع منهم عدد كبير من الضحايا وراقدين فى الورش الألكترونيه ومش لقيين لهم قطع غيار...ماعلينا أهم طول عمرهم يتخانقوا من أيام مبارك الأول
> ياه من أيام مبارك الأول ده أنا فاكره من أيام مبارك الثالث أو الرابع
(واء واء واء أغغغغغغ ...صوت بكاء طفل رضيع)
> أنا سامع صوت شيكابالا بيعيط قومى يامديحه شوفى أبنك ماله
> الحضانه الألكترونيه باين عليها باظت يا هيثومتى
> لأ بقى ..أنا كل شويه أجيب الشركة تصلحها أنا معييش فلوس للهم ده أنا قولت لك نوديه الحضانه العموميه مارضتيش
> شيكا أبنى يروح حضانه عموميه ..مع ولاد البودى جاردات والسيرفنت وعامة الشعب نو نو نو أيمبيسبول ..نفر أفر
> وماله ماهو أنا وأنتى أتخرجنا منها نسينا ولا نسينا ياستى مديحه أيمبيسبول
> الحضانه أللى أنت جايبها موديل قديم مش بتهشتك الواد ولا بتغير له ..صحباتى عندهم حضانات فول أتوماتيك تحط فيها العيل وتظبط البرنامج لمدة أسبوع وتحط فيها الكادليس والرضعات وتشغلها وهى عليها الباقى تأكل وتشرب وتغير وتغنى وتهشتك وتعرض أفلام وتمرجح وتقول حواديت كمان وعلى الأم تيجى كل أسبوع تشقر على العيل وتحط طلباته فى دولاب الحضانه ..أنا ماليش دعوة لازم تجيب لى واحده جديدة ولا تشوفلك صرفة تاخد له أجازة بنص مرتب وتقعد بيه
> نعم يا ختى ..طب ونعيش أزاى أبعتى هاتى أمك تقعد جانبه
> ماما مش فاضيه انت عارف أنها بتشتغل فى مشروع المرأة المدهوله وواخد كل وقتها
> بلا نيله ياريت طلعت بنتيجه غيرش هى عامله فيها المصلحة الأجتماعيه تيجى تشوف خيبة بنتها التقيله ودهولتها مش عارفه تربى حتت عيل
> بقول أيه يا هيثم أتوماتيك ما تخلنيش أتعفرت وأخليك تلف حولين نفسك
> حتعملى أيه يعنى كل أللى حيلتك أنك حتشغلى برنامج الشوشره وتحطيه تحت المخده .. قديمه ألعبى غيرها خلاص أنا أشتريت برنامج مضاد للشوشرة وأللى حيشوشرنى.. حشوشره وأشوشر للى خلفوه
> آه يا لئيم ياساهى عشان كده مش همك ..طب أيدك على 50 دخدوخ عشان أجيب طلبات لشيكا
> عندك شوية دخاديخ فكه فى جيب البنطلون ..وكملى من معاكى
> منين ياحسره ..كل المرتب ضايع على بيتك ومصاريف الحضانه النص لبه أللى أنت بالينى بيها ..ياريتنى كنت أتجوزت عبده تليفريك أبن خالتى كان هنانى وستتنى وماكنش خلانى أحتاج أيتها حاجه.. فينك يا تليفريك يا أبن خالتى
> عبده تليفريك .. عبده تليفريك.. قرفتينى بسيرته ..يطلع مين ده سى تليفريك
> راجل مبسوط وغنى وعنده تليفريك ملك مشغله على خط العتبه – أم المصريين
والدخاديخ عنده مالهاش حساب غيرش أن مخى الوسخ أللى خلانى أخترتك من دون الرجاله وأخدت مقلب فى أسم عيلتك وسرحت بيا وفهمتنى أنك من عيلة الأوتوماتيك العالميه.. يا عدمان يا صدمان
( تقوم تقلب فى هدومه فتجد خمس دخاديخ وورقة ماليه شكلها غريب مكتوب عليها واحد جنيه مصرى صادر من البنك المركزى بتاريخ 2001)
مديحة : أيه ده ياسبعى أللى حطه فى جيبك
> سبيه مكانه ..ده الجنيه الأب الروحى للدخدوخ ودى كانت العمله الرسميه أيام زمان وأنا وارثه جدا عن جد ..ماتعرفيش دلوقتى قيمته لو أتباع لمحلات الأنتيكات
حيجيب بتاع 200 دخدوخ
> بيعه يا خويا وفك زنقتنا بدل ما أنت حطه فى جيبك جايبلنا الفقر
> على جثتى يا مديحة ..الجنيه ده ليه قصة وملحمه كبيرة فى عيلتنا ووارثه عن أبويا وجد جدى وما أقدرش أفرط فيه لحد مايكبر شيكابالا وياخده
> يا خويا بلا نيله قطع وقطعت أيامه ..أحكى لى قصة الجنيه ده لما أشوف يستاهل كل أللى أنت عامله ولا حركة توماتيكى من بتوعك ماهو أنا عرفاك
الحلقة الرابعة
اللحلوح جنيه الحكومه
هيثم : أحكيلك ياستى حكاية الجنيه أللى مش عاجبك ده ..زمان قووى كانت مصر ما تعرفش غير العملات الذهب والفضه فحب المستعمرين الأنجليز يلموا الدهب من الشعب فأقترحوا على الملك بأن يعملوا الجنيه الورق وكانت قيمته أغلى من الجنيه الدهب علشان يشجعوا الناس على أستخدامه وكان الجنيه المصرى فى الوقت ده محترم وعليه القيمه..لحد ما جم أخوانه بتوع الثورة وأستلموا البلد وضيعوا الدهب كله فى مغامراتهم السياسية الفاشله غير أللى أتسرق وأللى أتهرب وأللى أتسيح وأتعمل منه الغاويش والأسوار للهوانم وفضل الجنيه يتدحدر لحد ما بقاش له قيمه فى الدنيا كلها وأخوانه بتوع الخزانه شغالين طباعة ورق ويوزعوه على الناس
البلد أداينت وبقى الحال أسود من قرن الخروب وكان الشحات فى الزمن ده لو أدتيه ورقه بـ 100 جنيه يرميها فى وشك ..أيام الله مايرجعها
مديحة : برضه ما قولتش جدك محتفظ بالجنيه ده بالذات ليه رغم أنه مالوش قيمه أنتوا كده عيله أيحه
> بلاش تلبيخ ..أأقولك ياستى ..عليتنا فى الكفر كانوا ناس غلابه بيزرعوا كل حاجه وكانوا عايشين مبسوطين كافيين خيرهم شرهم ..جات الحكومه وفرضت عليهم أنهم ما يزرعوش غير القطن وقالوا ليهم مالكمش دعوة أحنا حنديكم التقاوى والسماد والمبيدات شكك وعلى النوته ولما يطلع المحصول ناخده منكم ونخصم حق الحاجات دى منه ..الناس فرحت أول سنه فل الفل وتانى سنه الغيطان أتصابت بالدوده وهاتك يارش بالمبيدات من الطيارات وضاع نص المحصول وفضلنا على الحال ده ييجى عشرين سنه لحد ما عدش ينفع نزرع قطن ولا كتان ..والناس أتملت أمراض وسرطانات وبقى الحال زفت
لحد ما فى يوم جدى الكبير رايح يحاسب على المحصول بتاعه فى بنك التسليف الزراعى قالوا له ..أنت مديون يا حاج والبنك عايز حقه وحجزوا على كل حاجه للراجل وأتباعت الأرض والبهايم والدار والدوار وقعد يا مولاى كما خلقتنى
وبعد سنه ..مدير البنك بعت لجدى وقاله أحنا راجعنا حسابك ومديونياتك لقينا أنك داين البنك بجنيه ..جدى فرح وقاله طب أيدك على الجنيه يا سعادة البيه ..قال لآ ياحاج أنت لازم تقدم طلب وعليه ورقة دمغة بـ 3 جنيه عشان نصرفهولك ..قال له طب مش عايز الجنيه أنا متبرع بيه من أجل ديون مصر ..قاله : ماينفعش يا حاج لازم تكتب طلب بالكلام ده وعليه ورقة دمغة بـ3 جنيه برضه..طب مش متبرع بيه خده أنت مش عايزه ..قاله : ماينفعش ياحاج أنا موظف عمومى ودى تعتبر رشوة أبلغ عنك النيابه وتنطس فيها 3 سنين
مديحة : هيه وبعدين
> جدى أتعقدت من العيشه وأللى عيشينها فقام واخد بعضه وجاب أتنين لتر بنزين 80 وولع فى نفسه قدام البنك ..الحكومه ماسبتش الورثة فى حالهم أصر مدير البنك عن طريق الشرطه أن يقوموا الورثة بأستلام الجنيه بعد تقديم أعلام وراثة فى المحكمه..المهم الورثة خافوا من البهدله فى الأقسام والمحاكم لموا من بعضيهم وعملوا أعلام الوراثه أللى كلفهم أكتر من 100 جنيه بمصاريف المحامى والمحكمه والذى منه وفى الأخر سلموهم الجنيه وعلشان نحيى ذكرى جدنا الكبير فتوارثنا الجنيه العجيب أللى أنتى شايفاه ده تمجيدا للذكرى الخالدة لجدنا الشهيد..يبقى لى حق أنى أحتفظ بيه ولا لأ
> ده أنت تبروزه وتكتب حكايته تحتيه بمية الذهب وتعمل ليه ذكرى سنويه ..الله يرحمه جدك ويرحم أهلنا كلهم أللى عاشوا فى الزمن ده
سيبك من السيرة الغم دى وشيل الجنيه الفقرى ده من قدامى وقوم شوف لك حل فى حضانة أبنك أحسن الواد أتفلق من العياط لأنى مش فاضيه زى ما أنت شايف فضلى عشر دقائق وأخلص شحن بطاريتى عشان أروح الشغل
> طب ماتطلعيه من الحضانه وسكتيه على ما أتصل بالصيانه تيجى تصلحها
> سورى .. أنا مش فاضيه ميعاد الشغل قرب وأنا نازله أتصرف أنت..باى
> يعنى شغلك أبدى من الواد..مديحة أستنى..أستنى ألهى يارب بطاريتك تولع وأخلص منك ومن قرفك
(تخرج مديحة وتغلق الباب ورائها ويجلس هيثم فى حيرة وأخيرا خطرت له فكرة رائعة تخرجه من هذا الموقف )
الحلقة رقم (5)
حضانه فوزى بروحين
يقوم هيثم بأخراج أبنه شيكا من الحضانه ويضعه على حجره ويتصل بصديقه فوزى على التليفون المرئى
هيثم : ألحقنى يا فوزى أنا فى ورطه ومفيش غيرك يطلعنى منها ياصاحبى
فوزى : خير يا هيثم ..شايفك قاعد وحاطط شيكا فى حجرك أنت طلعته من الحضانه يا مجنون مش خايف الواد يسود منك وشعره يكرت وعنيه تحوول
> أعمل أيه يا خويا الحضانه بتاعتنا باظت والواد أتخنق جوه وعمال يعيط ومبهدل الدنيا وريحته معبئه الجو لأن الصرف الصحى بتاع الحضانه أتسد.. فقلت مافيش غير صاحبى وحبيبى فوزى ياخده عنده فى حضانته مع بنتك زوكه..وأنا عارف أن حضانتكم آخر موديل وبروحين تقدر تاخد الواد معاها
> ما أقدرش أرد عليك فى الموضوع ده ألا لما نستأذن من بسنت مراتى ..دقيقه واحده أدخل أسألها وأرد عليك
(يعود فوزى بعد فتره وهو فى حالة أسى )
فوزى : مش موافقه يا هيثم بتقول أن البنت بنتها وأبنك يعنى بعد عمر طويل لما يكبروا ما ينفعش يتجوزوا بعض.. لأنه حيبقى أخوها فى الرضاعة لأنهم رضعوا من حضانه واحده وحرام نقضى على مستقبلهم وتقف الحكاية دى عقبه فى حياتهم
هيثم : عشان خاطرى يافوزى أنا حسيبه لمدة شهر واحد بس وهو المسموح بيه حسب فتوى علماء (الفير بابى- والوايلد وومن) لحد ماشوف حل
فوزى : حاضر حقولها وأرد عليك خليك على المرئى لما أجيلك
يعود فوزى بعد فتره ومعه زوجته بسنت وهى فى حالة غضب وقرف
بسنت : أسمع يا هيثم أنا موافقه بس بشرط أنك تجيب كل طلباته من أكل وشرب وفيتامينات وغيارات وتدفع كل يوم 3 دخاديخ أيجار للحضانه
هيثم : 3 دخاديخ حرام عليكى يابسنت خليهم دخدوخين الحضانه العموميه بتاخد نص دخدوخ فى اليوم
> خلاص وديه الحضانه العموميه وريحنا ياسيدى ما أنتم معاكم دخاديخ قد كده راقده على قلبكم دى مراتك كل 10 أيام بتاخد حوافز شوفها بتوديهم فين
> بتاخد كام هه.. هه..أصلها مش معرفانى حاجه
> ما أقدرش أأقول أسرار الشغل على التليفون المرئى ياهيثم..ما أنت عارف أن أحنا على الهوا ومش عايزه مشاكل مع مراتك
> خلاص يابسنت أنا موافق على طلباتك
يقفل السكه وهو فى حالة ذهول بعد أن عرف أن مديحة تحصل على حوافز ولم تخبره بها وسايقه عليه الفقر والطناش ..يابنت اللئيمه
يحمل هيثم طفله شيكا ويتجه إلى محطة التليفريك ليركب إلى بيت فوزى فيقوم ضابط فى الطريق بأيقافه
الضابط : شايل الواد ده ورايح فين يا مواطن هات بطاقتك الألكترونيه..
هيثم :أتفضل أفضل أهه ..والكارت الألكترونى بتاع الواد أللى بيثبت أنى أبوه
يضع الضابط الكارتين فى جهاز يحمله فيعطى نور أحمر وصفاره متقطعة
الضابط : أنت مقبوض عليك يا حضرة المواطن لأنك تحمل طفل غير طفلك ومن حقك أن تمتنع عن الأدلاء بأقوالك ألا فى حضور محاميك وسأقرأ عليك حقوقك
هيثم : يا نهار أسود ..شيكا ما يبقاش أبنى ..ربى ..آه يا مديحه يا خاينه
الضابط : مين أم الواد ده أنطق قول يا لص الأطفال
> أحلفلك بأيه أن الواد ده أبنى وأمه أسمها مديحه عصفور وبتشتغل فى المحطه الفضائيه رقم 5 فى ميدان رمسيس
يقوم الضابط بالأتصال بوحدة الأمن بميدان رمسيس بضبط وأحضار المدعوة مديحة عصفور لمركز الشرطه للتعرف على أبنها وأستلامه
> هى مراتك بتشتغل أيه فى المحطه الفضائيه
> الحقيقه ياباشا هى ماسكه منصب كبير شويه فى المحطه بتقطع تذاكر للركاب
الضابط يهز راسه متعجبا : ده مركزها كبير قوى.. وأنت بقى بتشتغل أيه ؟؟
> أنا حياله با شتغل موظف فى (المشروع القومى لقطع الخلف)
> عماله زايده يعنى
> عماله زايده عماله ناقصة أهى شغلانه والسلام بدل مانشحت
يقوم الضابط بأستعجال حضور مديحه : بسرعة يا كابتن عصمت أشحن لى مديحة عصفور فى أول تليفريك شرطه ..سلام
الحلقة رقم 6 والأخيرة
نهاية المرأة الألكترونيه
تدخل مديحة قسم الشرطة وهى فى حالة هلع وتقابل هيثم فى الحجز وهو يحمل شيكا بين ذراعيه
مديحة وهى مضطربه : أيه اللى حصل يا هيثم قابضين عليك ليه ؟؟
هيثم : أسألى حضرة الضابط ..بيقول أن شيكا مش أبنى
مديحة : ياه هم عارفوا أزاى ؟؟
> من الكارت الألكترونى بتاع الواد يا هانم ..أنطقى يا مجرمه الواد ده مين أبوه
قولى يا سافله يا خاينه ..عايش فى خدعة وملبسانى السلطانيه أستلقى وعدك يا جبانه من السلطات
> عايز تعرف الحقيقة يا هيثومتى..بس ما تزعلش
> لا مش حزعل قولى ..وخدى شيلى طفل الخطيئه مش عايز أشوفه ولا أعرفه
> حرام عليك ماتقولش على شيكا كده لزعل منك
> ازعلى ولا أتفلقى شرفى وكرامتى يا هانم أللى مرمطى بيهم الأرض ومش عيزانى أزعل دا قليل أنى أموتك وأخلص منك
> الحقيقة يا هيثومتى أن الواد ده مش أبنى ..أنا أستلمته من واحده صاحبتى بعد أن تنازلت عنه قانونى وخدت لها 100 دخدوخ وسافرت فى رحله فضائيه حتغيب فبها بتاع 200 سنه حسب التوقيت الفضائى لكوكب الأرض ..وورقه كله سليم وموثق فى وكالة الفضاء المصريه (فيصا ) ما تخافش ياحبيبى حيفرجوا عنك
> طب ما قولتيش ليه بدل ما تخدعينى وتوهمينى أن الواد أبنى ..قولى بتاخدى كام فى الشهر مقابل الشغلانه دى
> أنا با خد معونه شهريه 300 دخدوخ من الوكاله مقابل تربيتى للواد
> يامجرمه ومخبيه ومستنزفانى وعمال أنا أكع فى فلوس وفاكر أن الواد أبنى
شوفى بقى أنت لو عايزه ترجعى البيت قدامك حل من أتنين يا تسلمى الواد ده للوكاله أو تجيبى معاكى الواد وآخد منك كل شهر 200 دخدوخ
> ما تبقاش مفترى يا هيثومه خليها ففتى ففتى
> ماشى ففتى ففتى بس أكله وشربه وكافة طلباته عليكى
> ماشى أتفقنا ..تعال نخلص المحضر ونروح عشان أنا عملالك غدوه حتاكل صوابعك وراها
يخرج كل من هيثم ومديحة من قسم الشرطه ويتجهان لمنزل فوزى وبسنت لأيداع شيكا فى حضانتهم الألكترونيه أم روحين... بسنت تتفحص الولد قبل أيداعه فى الحضانه
بسنت : الواد ده عايز تعقيم قبل ما دخله فى الحضانه الواد ريحته وحشه قوى
مديحه : طب ما تعقميه هو حد حايشك
بسنت : أيدك يا حبيبتى على مصاريف التعقيم 20 دخدوخ قبل ما حطه فى دولاب التعقيم موافقه ولا تاخدى الواد وجوزك وتورونا عرض قفاكم
هيثم : ياسلام عليكى يابسنت ..موافقين ياستى عايزه حاجة تانيه
بسنت : فلوس الحضانه شهر مقدم وشهرين تأمين
مديحة : وآدى الفلوس أهه عايزه حاجة تانى
بسنت : تجيبوا الطلبات دى من المحل أللى تحت البيت
هيثم : حاضر فيه أيه تانى
بسنت : تمضوا أنتوا الأتنين على الأقرار ده بأنى غير مسؤله عن حدوث أى أضرار لطفلكم لو أنقطع التيار الكهربائى أو فاضيت البطارية الشمسيه للجهاز
هيثم : موافقين ( هو يقول لنفسه أنشالله يولع يعنى هو كان أبننا بصحيح لولا ال300 دخدوخ لكنت سيبته قدام باب الجامع)
يعود هيثم ومديحة إلى بيتهما وقد بدت عليهم أمارات الأرتياح بعد تسليم شيكا لبسنت لتربيته
هيثم : هيه طبخلنا أيه على الغداء
مديحة : أسكت ياهيثومتى مش حتصدق أنا جايبالك أقراص السالمون ومعاها بودرة البطارخ وعصير الفواكه الأستوائيه المجففه
هيثم : ياه دى أكله جامده قوى ..دى عايزه كوبيتين شاى بعديها نحبس بيهم
وبعد تناول الغداء يجلس هيثومه مع مديحه وهو يسلك فى أسنانه وفى لحظات من الغزل والأنسجام يفضى أليها هيثم برغبته فى أن تخلف له طفل من صلبه
هيثم : كان نفسى يكون عندى طفل من صلبى ويحمل أسمى وأسم عيلتى بدل ما نربى أطفال غيرنا قولتى أيه يا مديحه
مديحه : طلبك على عينى يا هيثومتى بس أنا مش مجهزه للحمل والولاده
> ليه بقى أنت مش موديل Zfttn3
> يا عينى عليك يا هيثومه ضحكوا عليك فى الأجنس علشان أنت أسترخصت أنا ياروحى موديل Zfttn1 وما عنديش دوائر ألكترونيه للولاده
> يانهار أبوكى أسود وأنا أللى فاكرك Zfttn3 أيه الحظ المقندل ده أعمل أيه أنا دلوقتى
> بسيطه رجعنى الأجنس وأدفع الفرق وهات واحده أحدث
يجذب كابلها الشاحن من الفيشه فى عصبيه ويرمى به من الشباك
: قومى خسارة فيكى الكهربا ..وخليكى كده لحد ما بيعك لبتاع الروبايكيا
مديحة وهى تتحشرج ويتغير لونها وتظهر رساله ألكترونيه تحذيريه على وجهها
يور وومن أن ريسك ..ريسك !!.. ريسك!! إذا أردت أن تتخلص منها فأضغط على زر التشغيل مرتين الموجود فى لوحة التشغيل فى قفاها لنرسلها إلى ريسكل بن ..حظ سعيد مع منتج جديد من منتجات شركة( المرأة الألكترونيه أوفر )
> هاتى قفاكى أنا ما شوفتش معاكى يوم عدل طولة لسان وغش وكمان عدم خلفه
> حرااام عليك ياااهيييثمممم يخونك أكلة السلمون..مون مون مون أخخخخخخ
يضغط هيثم الزر مرتين ويقوم إلى سلة المهملات ليفرغها ويجلس وهو سعيد بما فعله وهو يقول: أه يازمن العجايب ياريتنى كنت عايش أيام أجدادى فى عام
2009
تمت

تزوج وعيش سعيدا

تزوج وعيش سعيدا

الأستاذ نوفل الحدق فتح مكتب للزواج وأطلق عليه أسم( تزوج وعيش سعيدا) ولكنه ليس مثل مكاتب الزواج الأخرى فهيهات.. فهو يتبع أسلوب عصرى حديث فى المعامله مع الزبائن الراغبين فى الزواج .............فقد نشر فى الصحف اليوميه والمحطات التليفزيونيه الفضائية منها والمحلية.. أعلان ملفت للنظر وغريب جعل مكتبه يعج بطالبى الزواج من الجنسين ولمختلف الأعمار فكان نص الأعلان كالأتى

تزوج وعش سعيدا

لك ياسيدى ولك ياسيدتى مفاجأة سارة من مؤسسة نوفل الحدق

أسلوب جديد للأرتباط بشريك العمر..الزواج بالتقسيط وشهادات الضمان

إذا كنت تعانى من ضائقة ماليه وغير قادر على مصاريف الزواج فمكتبنا قادر على حل هذه المشكلة فيقدم لكم القروض الميسرة طويلة الأجل من البنوك الوطنية

وإذا كانت الشقة تقف عقبه فى طريقك فعمارات العرسان بمشروعنا السكنى الجديد توفر لكم المكان المناسب

لدينا خبراء نفسيين وأجتماعيين ومركز طبى متكامل ومول به كافة متطلبات الزواج..فريق عمل متكامل لخدمتكم ( مأذون/ أطباء / صالة أفراح / زفة /كوافير ومركز تجميل..ألخ)

زيارة واحدة لنا وستقول وداعا للعزوبيه..وداعا للوحدة ..وداعا للألم

ترخيص رقم 666/2009 وزارة الشؤون الأجتماعيه /مؤسسة نوفل العالميه للزواج الحديث ت29999990 عشرة خطوط فاكس 27777770المركز الرئيسى القاهرة 8أ ..الدرب الأحمر بجوار المطافى

سارع وأشترك معنا ولا تنسى هدية زواجك من نوفل للأدوات الصحية 10 متر بلاط سيراميك فرز أول+ صبانه + سلاكة حوض

أحصل على أستمارة التقديم بمشروعنا العظيم مع تمنياتنا لكم بحياة زوجيه سعيده

(وخلقنا لكم من أنفسكم أزواجا لتسكنوا إليها )

صدق الله العظيم

الحلقة الأولى

معصلجه ورفضاهم

الآنسة معصلجه فاتها قطار الزواج من زمن بعيد فأصبحت أسم على مسمى وهى لاتعرف سبب واضح لنفور العرسان منها (وقت أن كان فيه عرسان يتقدموا لها) فهىعلى قدر معقول من الجمال ومعها دبلوم تجارة قديم قوى وتعمل فى وزارة الصحة وفكرت أن تغير أسمها ولكنها فشلت بعد أن أتضح أن أسم والدها مكتوب خطأ فى شهادة الميلاد وداخت السبع دوخات فى السجل المدنى والمحاكم وبدون جدوى.. لها زميله فى نفس القسم فاتها أيضا نفس القطار أسمها هانم ولكنها كانت ترفض العرسان المتقدمين لها بأحساسها بأن العريس المناسب لم يظهر حتى الأن (هانم بقى وبتتشرط !!) وتمر عليها السنوات سريعا وهى ترفض العرسان فهذا تخين وذاك رفيع وآخر بيئه وغيرهم كثير حتى كبرت فى السن ولم يعد يتقدم إليها أحد وأشتهرت بأسم هانم رفضاهم وبالرغم من تقديمها الكثير من التنازلات بعد ذلك ولكن النصيب لم يصيب ومكثت تتحسر على شبابها الذى يهرب من بين أصابعها وسنين عمرها التى قضتها فى الرفض والنفور

هيه ..الله يرحم أيام زمان كان قطار الزواج قشاش وسائقه يأخذ تعسيله فى جميع المحطات وأللى كان بيشاور له بيقف له ..فكان بيلم الحلوة والوحشه والتخينه والرفيعة والمجنونه والهبله مابيخليش ..دنيا مابتخليش أللى راكب راكب ولا أللى ماشى ماشى حتى ظهرت القطارات الحديثة والمكيفه واللى معاه يركب واللى معهوش مايلزموش ..وتكدس الركاب الغلابه على الأرصفة وهم يتحسرون على زمن القشاش الذى ولى وفات

وتوطدت الصداقه بين رفضاهم وزميلتها معصلجة وأصبحا يشكلان ثنائى متميز فى الوزارة ومثل أعلى لجميع العوانس

( وبعد أن فطرت معصلجة ورفضاهم سندوتشات الفول أبو زيت حار وفحل البصل وحبسوا بالشاى المغلى من البوفيه جلسا سويا يتحدثان فى أمور الدنيا والعيشه المقندله وحياة العنوسة الكئيبه وآخر الأوشعات قبل أن ينصرفا إلى مكاتبهم )

رفضاهم : قرأتى الأعلان بتاع مؤسسة نوفل للزواج

معصلجة : عمرك أطول من عمرى كنت حقولك عليه..ألا يكون نصاب يابت وبيضحك على الناس قال أيه الجواز بالتقسيط وبالضمان هئ هئ هئ

> قالوا ضربوا الأعور على عينه قال أيه خربانه خربانه ..ماتيجى يابت نروح نشوف أيه الحكايه أنشا لله نطلع بالعشرة متر سيراميك

> سيراميك أيه يا هبله ده بكتيره ناخد السلاكه هئ هئ هئ ..أنا سمعت من واحده صاحبتى أن الأستمارة بـ50 جنيه وصورتين

> وماله يمكن تضرب يابت معانا ونلاقى أبن الحلال أللى مش عايز ييجى ده

> أأقولك تعالى نتقابل آخر النهار ونروح المكتب وأحنا وحظنا

> ماشى يا حبيبتى لما أقوم بقى أشوف العالم المقرفه أللى بايتين قدام المكتب باى يا عصلوجه ماتنسيش.. آمييه... ألبسى الطقم الأحمر وأعملى شعرك عند الكوافير عايزين نروح على سنجة عشرة الناس بتاخد بالمظاهر

> وأنتى ماتنسيش تلبسى حتتين الصيغة والمصحف الدهب بتاع الست دى أمى

هئ هئ هئ خخخخخخخ ..كفك ..قشطه 

الحلقة رقم ( 2 )

وفى المساء تلتقى معصلجة مع رفضاهم وتركبا المكيروباس المتجه إلى الدرب الأحمر للتقديم فى مؤسسة نوفل للزواج الحديث

رفضاهم : عينى بارده عليكى يا معصلجه يا ختى بالطقم الأحمر أللى ملعلط ده يعنى كان العرسان أنطسوا فى نظرهم مش شايفين الحلاوة دى ولا الجسم الملفوف والشعر الأصفر الحرير أللى عل الخدود يهفهف ويرجع يطير يتيييررر

معصلجه : أنا حاجى جنبك حاجه يا رفضاهم ياختى ده كفايه كيلو الدهب أللى أنت لبساه يزغلل عينين أجدعها راجل ولا الحسنه الجميله أللى على خدك دى هى طلعتلك أمتى يابت

> آمييه يا أوخه ..دى عيره عملتهالى البت سونه بنت أختى بقلم الحواجب ..والدهب أللى شايفاه ده تلات تربعه قشره وشرفك.. آدينا بنعمل أللى علينا والباقى على ربنا... هييه دنيا مفيش حظ يا روحى

> ليكى حق يا حبيبتى مفيش حظ ..عارفه البت حفيظه أللى لسه متعينه جديد

عندنا أتخطبت أول أمبارح وحتتجوز الشهر الجاى الواد هشام المعفن

> عارفاها البت المصديه المقلحفه دى تتجوز ..عجبت لك يازمن العفشين ليهم حظ والقمرات أللى زينا يروحوا مكتب نوفل للتنسيق هئ هئ هئ

> تتك أيه يارفضاهم آل مكتب تنسيق آل ..تفتكرى يابت كلام الأعلانات ده بجد

ولا بيشتغلونا وتطلع نصبايه كبيره ..حاكم النصب ماشى فى البلد اليومين دول زى الحلاوه

> أدينا قربنا نوصل ويا خبر بفلوس بكره يبقى ببلاش أحنا خسرانين حاجه غيرشى الخمسين لحلوح يالله آدينا بنتسلى

( تصل معصلجه ورفضاهم لمؤسسة نوفل فتجدا طوابير طويله أمام الباب ويجلس موظف على مكتب أمام باب العرسان وموظفة أمام باب العرايس لتوزيع الأستمارات وتحصيل ثمنها قبل الدخول إلى المؤسسه وفى صف الرجال يقف كل من طلعت الصدمان وشريف ملقاط ليحصلا على أستمارات الزواج )

طلعت : شايف ياواد ياشريف الموزتين أللى واقفين فى صف الحريم أللى هناك

شريف: أنهى فيهم يا صدمان أنا مش شايف موزز كلهم سكه عايزين يتولع فيهم

> ياض الحتة أللى لابسة فستان أحمر وشنطه وجزمه حمراء وكلها أحمر فى أحمر وعامله فيها سندريلا وصاحبتها أللى معاها أللى لابسة باترينة دهب فى أديها وصدرها وعمالين بيبصوا نا حيتنا

> يادين النبى دول باين عليهم عدى القطر فوقيهم من 30 سنه.. بس متريشين ..بقولك أيه خد أنت الحته الحمراء الطريه وسيبلى الناشفه المأسده.. دى محل صاغة متنقل.. بركاتك يا سرجانى

> يخرب بيتك يا ملقاط مش حتسيبك من الداء المنيل ده عينك ماتجيبش ألا الدهب

> مش قادر يا صدمان يا خويا الدهب بيجننى

> أأقف ياض هنا الله يخرب بيتك رايح فين ماتودناش فى داهيه

> حاخد بصه من قريب وأملى عينى منه.. وأرجعلك على ماييجى علينا الدور

(يقترب شريف ملقاط من طابور الحريم ويقف أمام رفضاهم وهو فاتح فمه ويحسب فى عقله كمية الدهب وكم يساوى ثمنها ويصعد بنظره من أسفل إلى أعلى وهو فى حالة أندهاش فتتنبه رفضاهم لنظرات شريف المتفحصة بعد أن زغدتها معصلجه فى ظهرها وهى تقول ( أميييه السنارة غمزت يا اوخه شوفى شغلك )

ترفع رفضاهم يدها وتهزها لتشخلل بالغاويش وتقوم بتعديل وضع السلاسل الذهبيه والسبيكه الدهب والمصحف والمشاءالله على صدرها فيزداد أقتراب شريف منها وهو يقول : أيه الجمال ده يامودام

رفضاهم : موزمازيله من فضلك

شريف : جولدى يا خواتى جولدى

> جولدى أنت بتشتغل فى شركة جولدى ..لا

معصلجه : يمكن جولده بيوجعه هئ هئ هئ..أهرش بعيد يابنى مش ناقصين جرب

تتنبه موظفة الأستمارات للحديث بينهم فتهب واقفه وهى تشير بأصبعها ناحية صف الرجال : أتفضل هناك مع الرجاله يا جدع أنت.. هنا طابور الصبايا..(تتك نيله مستعجل على رزقك حتطلع فوق وحتقعد معاهم لما تزهق)

رفضاهم : شوفتى يا معصلجه الدهب عامل شغل أزاى ..بس يارب يكون بفايده

(يعود شريف بظهره وهو لا يرفع نظره عن رفضاهم حتى يصل إلى صف الرجال)

طلعت : أأقف فى الصف يا ملقاط ما تفرجش علينا الناس

شريف : مش قادر يا صدمان يا خويا قدام عيار 18 و21 و24

> أهو طمعك ده أللى موديك فى داهيه ..أهدى ..أهدى حنقابلهم فوق وأبقى عبر عن مشاعرك براحتك

( تصل معصلجة ورفضاهم أمام موظفة الأستمارات لشراء الأستمارة )

الموظفة : عايزه أستماره سوبر ولا عاده السوبر بـ80 والعاده بـ 50 جنيه

معصلجه : وأيه ياختى الفرق مابينهم

الموظفه : الأستماره السوبر تتعرض على العرسان لمدة شهروتنزل بيانتها بالصورة على النت والأستماره العاده تتعرض لمدة 15 يوم وبدون صوره وجميع المقابلات هنا تحت أشراف المتخصصين ..خلصونا سوبر ولا عاده

> هاتى أتنين سوبر ومشط كبريت ..هئ هئ هئ

> بتهرجى يا ختى ..خشى أنت وصحبتك من الباب ده أول أوضه على أيدك اليمين عند مدام سوكه (تتكم الهم )

الحلقة رقم (3)

التنسيق

المنظر : غرفه كبيرة مليئه بالسيدات والبنات وهن يقمن بملء بيانات الأستمارة كأنها لجنة أمتحانات وتجلس مدام سوكه على مكتب وتراجع البيانات وترد على الأستفسارات وتدخل معصلجة ورفضاهم وبيد كل منهن الأستمارة

سوكه: أتفضلوا أملئوا البيانات وتعالوا نراجعها وأى أسئله أنا تحت أمركم

رفضاهم : ألا قوليلى ياختى هو أحنا حنقابل عرسان النهارده

سوكه: على حسب طلباتك فى مواصفات العريس لو موجود حتقابليه لو مش موجود حنتصل بيكى بالتليفون تيجى تشوفيه ولك حق تقابلى 7 عرسان فقط لو معجبوكيش تشترى أستماره تانيه بـ 50 حنيه ونجدد لك الأعلان

معصلجه : أنا شايفه فيه خانة السن فى الأستماره نملاها ولا أيه رأيك

سوكه : الخانه دى أختيارى بالنسبه للستات أكتبى فيها السن أللى يناسبك أما فىخانة السن بتاعة العريس المطلوب لازم تكتبيها علشان نقدر نجيب لك العريس المناسب

( تأخذ الأستمارة من معصلجة وتقف وهى ترفع صوتها للتنبيه على السيدات )

> خليكوا معايا ياعرايس أللى مش عايزه تكتب سنها هى حرة بس لازم تكتب سن العريس وأللى تخلص تيجى هنا علشان تراجع وتاخد لها رقم وتسحب أستمارة التقسيط أأقول تانى ..(تكرر التنبيه مرتين ) خدى صاحبتك وأقعدى أملى الأستمارة علشان قدامنا ساعة وتبدأ المحاضرة

(تجلس معصلجة ورفضاهم لتكتبا الأستمارات ويتناقشان فى كل بند قبل كتابته )

معصلجه: أنا مش حكتب سنى خالص..أحسن نلاقى كل العرسان عواجيز ومكحكحين والعالم الواقعه أللى عايزين ممرضه مش عروسه ونصوم نصوم ونفطر على بصله من دار المسنين هئ هئ هئ

رفضاهم : تتك أيه عصلوجه ..يعنى عايزه عريس فرفور ومطقطق من شباب اليومين دول

> مش قوى كده ..بس يكون ماسك نفسه مش واحد رجله والقبر وأهى جوازه وأتحسبت علينا ونقضى بقية عمرنا بين المستشفيات وزيارة القرافه

> أنا حكتب العريس يكون مابين 35 – 45 سنه ..كويس

> كويس ..عندك أهى مواصفات العريس أكتبى يارفضاهم كل أللى نفسك فيه

> أنا كتبت أنه يكون رياضى وسمباتيك وشعره أصفر وعنيه زرقا ومن غير كرش وشيك وعنده عربيه وطوله 175سم وعنده شقة وعنده دخل لايقل عن 4000 جنيه فى الشهر ويقدس الحياة الزوجيه

> يخرب عقلك يارفضاهم ماتكتبى أحسن حسين فهمى أو أحمد عز بتاع السيما

منظرك كده حتبقى زبونه مستديمه فى مكتب نوفل حطيها تحت شويه عشان نلاقى العرسان أللى يخلصونا من العنوسيه وأيامها الطين شوفى أنا كاتبه أيه

رجل متدين مرتاح ماديا لم يسبق له الجواز عنده شقه وشكله مقبول متوسط الطول ولا يدخن ومستعده للمشاركة فى الجهاز

> عايزه راجل متدين يا معصلجه ..بكره يجولك كل أومات دقون وجلاليب من الأخوة ويتجوزوكى على 3 نسوان وتكونى أنت الرابعه

> وماله يا ختى أهو بس ييجى..تعال نسلم الأستمارات للوليه الحيزبونه علشان تراجعها

(سوكه تراجع أستمارة معصلجه بأهتمام وتنظر إليه بأستغراب )

معصلجة : أيه فيه حاجه

سوكه : أسمك معصلجه ..أيوه أسمى معصلجه فيها حاجه دى ..بس يامدام أسمك ده يطفش العرسان ..أنا رأيى نغيره نخليه أسم دلع كده وبعدين لما ربنا يسهلك أبقى غيريه فى السجل المدنى وأنتى حره

> تفتكرى أسمى نفسى أيه

> نخليه هويدا ..يسرا ..نيفين..ريهام ..شيرين..سحر..غاده.. أختارى أنتى أللى يريحك

> أأقولك خليه يسرا ولا شيرين ..خلاص خليه شيرين أحسن..على خيرة الله

سوكه: هاتى أستمارتك ياحلوة ..أيه ده ياست هانم... المواصفات أللى طلباها دى ما بتجيش مكاتب الجواز ..دوكهم سوقهم ماشى لوحده بره ..أكتبى كلام معقول عشان نعرف نوفقلك عريس يناسبك وأنت حره ما على الرسول ألا البلاغ

> طب شوفى أنتى يامدام سوكه أيه المناسب

> مودموزيل من فضلك.....

> أهلا.. بصره

> سيبك من العينين الزرقا والشعر الأصفر والفيلا والعربيه والوهم أللى أنت عايشه فيه ده ..نكتب راجل محترم يقدس الحياة الزوجيه من 40 – 50 سنه

ماشى يا عروسه

> ماشى يا أبلتى لما نشوف آخرة التنسيق بتاعكم ده

سوكه : أتفضلوا أستمارات التقسيط لما ربنا يوفق يا تستخدميها أو.. لا.. حسب حالة العريس الماديه

> طب والعشرة متر سيراميك والصبانه والشطافه

> شطافة أيه يا دلعادى ..سلاااكه ..مش لم تتجوزى الأول تبقى تفكرى فى الهديه

> مش باين ..كنت أتجوزتى أنت

> بتقولى حاجة ..على كولن أتفضلوا قى الصالة أللى جانبى علشان تحضروا محاضرة الدكتور فؤاد أبو عقدة وتقابلوا.. مستر نوفل

الحلقة رقم ( 4 )

أحنا من عيله محافظه

تدخل شيرين ( معصلجه سابقا ) ورفضاهم قاعة كبيرة مجهزه كقاعات السينما موجود بها الرجال والصبايا المتقدمين للزواج فيهرع إليهما شريف ملقاط وصديقه طلعت صدمان وهما يرحبان بهما

شريف: أتفضلوا يا هوانم أحنا حجزين لكم جنبنا

رفضاهم وهى تسوق الدلال والدلع :ما نقدرششى..نقعد جنب ششبان أصل أحنا من عيله محافظه خالص

يضحك شريف : وماله يا أنسه ما حنا برضوه من عيله محافظه وحنحافظ عليكم من الديابه أللى ماليين القاعة..ينظر إلى الدهب الذى فى صدرها بتمعن

شيرين وهى تدلع رفضاهم : خلاص يا نانا أهم زى أخواتنا ما حصلش حاجه

شريف يوسع لهما الطريق ويجلسا سويا فى أحد الصفوف ويجلس بجوار نانا.. وطلعت بجوار شيرين فى أنتظار المحاضرة

شريف وهو يقدم نفسه وصديقه: أعرفك بنفسى ..شريف أشرف أستيراد وتصدير

رجل أعمال والشهير بشريف ملقاط وشريكى الأستاذ طلعت صدمان عزاب ما دخلناش دنيا ونفسنا نتأهل

نانا وهى تضحك وتميل على شيرين وتهمس لها :صدمان وملقاط آدى آخرة صبرنا هئ هئ هئ

شيرين : أصبرى لما نشوف أيه حكايتهم ولاد الصايعه دول

صدمان : فى حاجة بتضحك ..طب ضحكونا معاكم 

نانا : لأ مفيش ..ألا قولى يا أستاذ شريف أنتم ما جوزتوش لحد دلوقتى ليه

شريف : مشاغل وسفر هو أللى أخرنا ..ماتعرفناش على الأنسات

نانا: شيرين صاحبتى وأختى الأنتيم وأنا نانا بنشتغل فى وزارة الصحة آنسات

صدمان : ونعمه الأنسات ..وأحلى آنسات فى القاعة..وأجدعها صحة

شيرين :مرسيه يا طلعت بيه ..أنتم بتشتغلوا فى مكتب واحد أنت وصاحبك

طلعت صدمان : أحنا أصحاب المكتب وبنديره سوا

نانا : وبتصدروا أيه وبتستوردوا أيه أنشاء الله ؟؟

شريف ملقاط : كل حاجة تخطر على بالك وخاصة الدهب والألمظات

نانا (رفضاهم) وهى تضع يدها بحركة لا شعوريه على الدهب الذى تملء به صدرها : أنتوا بقا بتشتغلوا مع الصاغة ومحلات الجواهرجيه

شريف: مش أى محلات أحنا بنشتغل على كبير قوى مع التجار الكبار فى السوق

عندك مثلا أنا وصديقى لسه جايين من رحلة فى جنوب أفريقيا كنا بنتفق على صفقة ألماظ بـ 10 مليون جنيه وأحنا عندنا خبرة عاليه فى معرفة الماس الصناعى من الماس الطبيعى ..أنت بتحبى الألماظ ولا الدهب

> أنا بحب الدهب أكتر من الألماظ

> لالا يا أنسه نانا الدهب بقى موضه قديمه وبلدى ..أما الألماظ ده بتاع الناس الهاى قوى ..يعنى ما تأخذنيش حتت ألماظ 10 قيراط زى دى تساوى تمن كل الدهب أللى معاكى ولو عايزه تغيرى أنا تحت أمرك أنت وصحبتك أتفضلى الكارت أهه بتاعى ياريتك تشرفينا أنت وصحبتك أفرجك على أكبر مجموعة ألمظات لسه مانزلتش السوق

نانا وهى منبهره : أنشاء الله حفكر وأرد عليك

صدمان : أنتم ساكنين فين أومال

شيرين : فى دوران شبرا ..عارف شبرا ..آخر التروماى القديم وصاحبتى ساكنه قريب منى

شريف : أنتم فى طريقنا ..أحنا طالعين شبرا المظلات تقدروا تركبوا معانا بعد مانخلص هنا ونتعرف على بعض أكتر

نانا : أومال مكتبكم فين يا أستاذ شريف

شريف: مكتبنا فى مدينة نصر فى أخر شارع الطيران ..ياريت تشرفونا قريب حنعمل معاكم واجب كبير قوى العنوان والتليفون عندك فى الكارت بتاعى ..أسمع منكم ألو قريب

تضاء القاعة ويطلب من جميع الحضور بالجلوس فى أماكنهم ويفصل الرجال عن السيدات ويجلس الجميع فى أنتظار محاضرة الدكتور فؤاد أبو عقدة الذى يدخل القاعة ومعه الأستاذ نوفل الحدق صاحب ومدير مؤسسة نوفل للزواج الحديث..ويتقدم نوفل من المكيرفون ويرحب بالحاضرين ويطلب منهم مشاهدة فيلم عن أنجازات ومشاريع المؤسسه ويطفئ النور ويبدأ عرض الفيلم

شيرين : يظهر يابت الكلام طلع بجد

نانا : وأنا حاسه أن الفار بيلعب فى عبى وحيطلع نقبنا على شونه

شيرين : ضربوا الأعور على عينه قال أيه ؟؟

خسرانه ..خسرانه

هههههههههههه

الحلقة رقم (5)

دكتور فؤاد أبو عقده

يبدأ عرض الفيلم الدعائى عن مؤسسة نوفل وأحصائيات الزيجات التى تمت والمشاريع المستقبليه والحاليه ومدينة نوفل للعرايس ومنتجع شهر العسل والمول وطاقم العمل بالمؤسسه وينتهى الفيلم بزفة لعروسين بواسطة فرقة نوفل للفنون الشعبية ويضاء النور ويتقدم الدكتور فؤاد أبو عقدة للميكرفون لألقاء المحاضرة

أعزائى وعزيزاتى

أهلا بكم ومرحبا فى مؤسسة نوفل للزواج الحديث ..فالمجتمع المصرى فى ظل الظروف الأقتصادية والتقدم الحضارى والعولمه حال دون أن يتم التوافق بين المقبلين على الزواج وهذا يرجع لعدة أسباب أهمها حالة البطاله وزيادة أعباء الزواج وأزمة الأسكان والعديد من الأزمات وأرتفاع الأسعار ودخول مفاهيم جديدة للأرتباط بين الزوجين وعوامل أخرى كثيرة أدت ألى أرتفاع نسبة العنوسه فى المجتمع ولو أستمر هذا الوضع ولم يتغير سيتحول المجتمع المصرى إلى مجتمع كهل عجوز وهو المشهور عنه فى العالم بأنه مجتمع متجدد ونسبة الشباب والأطفال فيه 65 % و..و..و..و...

وأصبح هدف المؤسسه هو القضاء على ظاهرة العنوسه فى المجتمع بأتباع الأساليب العلميه فى التوفيق بين راغبى الزواح عن طريق أستخدام برامج الكمبيوتر والأنترنت فى هذا المجال ..فجميع بيانات المشترك تدرس بدقة شديدة وتحلل بأسلوب علمى متطور لتنتقى نوعية العريس والعروسه المناسبه وهذا يتوقف على دقة وسلامة المعلومات التى يسجلها العضو فى الأستمارة والمواصفات المطلوبه لشريك العمر فالمدخلات الخاطئة تعطى نتائج خاطئه.. بالأضافة بأننا نضمن للعريس والعروسه بأن يكون الطرف الأخر على صحة جيده نفسيا وعضويا تأهله للزواج السعيد

كما أننا نقوم بعمل فحوصات طبيه دقيقة على المتقدمين والمتقدمات للتأكد من خلوهما من الأمراض المعديه والقدرة على الأنجاب ونقدم الشهادات الطبيه التى نؤكد هذا ولن يتوقف دورنا عند هذا الحد بل نقوم بعلاج المرضى بمستشفى نوفل التخصصى وتحت أشراف طبى عالى المستوى .

.أعزائى عزيزاتى

لقد شطبنا من قموسنا كلمة مستحيل فلا يوجد مستحيل تحت الشمس ..فإذا كنت عزيزى الشاب والشابه قد فشلت فى الأرتباط فى داخل جمهورية مصر العربيه فنحن باتصالتنا من خلال الشبكة العنكبوتيه نستطيع أن نوفق لكم الزوجة والزوج الصالح من أى مكان فى العالم .. وأختار يا أخى ويا أختى ما تشائين من مشارق الأرض ومغاربها..وبالتالى قبل أن أختم كلامى معكم ستوزع عليكم بطاقات صحية ستقومون بملئها بمعرفتكم وبأمانه وسيوقع عليكم الكشف الطبى العام بعدها لجميع الأقسام قبل الموافقة على أجراء التنسيق اللازم للحصول على شريك العمر وقيمة هذه الفحوصات والكشف 30 جنيه فقط وهو سعر أقتصادى وخاص لكم جميعا وبدونه نرفض نشر بشده أستمارة العضو وهذا الكشف لو تم خارج المؤسسة سيكلفكم المئات بالجنيهات ففرصة لكم جميعا للأطمئنان على صحتكم (شيك أب ) قبل الزواج والمركز يمنحكم شهادة معتمدة بأن الفرد خالى من الأمراض المعدية التى تمنعه من الزواج لتقديمها للمأذون قبل العقد

أعزائى وعزيزاتى أنا خلصت محاضرتى وأى أسئلة أنا جاهز للرد عليها

سؤال من عريس كهل: يادكتور يعنى لو الواحد مش عايز يكشف طبى فيها حاجة

الدكتور : مفيهاش حاجة لكن العروسة سترفض أن ترتبط بشخص لم يتم توقيع الكشف الطبى عليه ولا تقوم المؤسسة بتسجيلك ومقابلة العرايس

وعموما نحن نكتب عنك تقرير بالنسبه المؤيه لصلاحيتك للجواز فلابد أن تحصل على أكثر من 40% حتى يمكننا السماح لك بالجواز وبنراعى فى ذلك السن

سؤال من سيده عجوزة : يعنى يابنى ماينفعش أقل من 20 % للجواز

الدكتور : بنقول يا حجه أكتر من 40% مش 20 % أقل من 40 % يبقى الشخص مصاب بأمراض مستديمه مثل السكر وضغط الدم المرتفع والقلب والروماتيزم وألتهابات الأعصاب وأمراض الكلى والكبد والمفاصل

السيده ترد عليه : كل أللى أنت قولته ده عندى بس الشباب يابنى شباب القلب مالوش دخل بالعيا ولا المرض

الدكتور :فعلا كلامك مظبوط بنراعى ذلك عند الكشف النفسى والعصبى فممكن يكون الشخص سليم بدنيا وصحته زى الحديد ولكنه مريض نفسى أومصاب بالجنون فهذا لا يقبل بالمرة..فنحن مهمتنا أن نساعد الناس بالزواج السعيد المبنى على أسس علميه دقيقه

أنتهت الأسئله سيبدأ الكشف الطبى من باكر وستعلق كشوف بالمواعيد والأسما ء بمدخل الأدارة حظ موفق للجميع

شيرين : أحنا يابت حنتجوز ولا حيخدونا الجيش

نانا : يظهر أن اللعب حيبقى على كبير قوى وبيجرجرونا واحده واحده.. قومى بينا

شريف : مش ممكن تروحوا لوحديكم الوقت أتأخر...تعالوا نوصلكم

شيرين : أنسى يا ملقاط بيه أحنا بنعرف نروح لوحدينا زى ما جينا لوحدينا

صدمان : مايصحش ياجماعة أنتم زى أخواتنا وتعالوا أنتوا فى سكتنا

( تتهامس نانا وشيرين وتترددان قبل أن يركبا مع شريف وطلعت وفى النهاية تركبان معهما السيارة لتوصيلهما إلى ميدان شبرا فقط وعدم الدخول بهما فى الشارع منعا للقيل والقال ..وتجلسان فى المقعد الخلفى وملقاط وطلعت فى المقعد الأمامى )

الحلقة رقم (6 )

تنطلق السيارة فى أتجاه حى شبرا ويظل شريف ونانا يتحدثان فى شتى المواضيع فقد مالت له وأستظرفته وتمنت فى قرارة نفسها أن توفق معه وتدخل معه القفص الذهبى أوحتى القفص الحديد المهم أن تتلم عليه)

شريف: عارفه يا آنسه نانا أنا من ساعة ما شوفتك مش عارف أيه أللى حصلى لقيت نفسى منجذب ليكى زى ماتكونى مغناطيس

نانا: كلامك ده بيخوفنى منك لتطلع شاب من أياهم أللى حافظ له كلمتين بيقولهم لكل واحده شوية

شريف : أنشا لله تعدمينى لو الكلام ده مش صدق وطالع من قلبى

نانا : بعد الشر.. لكن الواحده مننا لازم تاخد حذرها خاصة من شباب اليومين دول

شريف : مش حتلاقى أصدق ولا أشرف منى يانانا ..أسمحيلى أنى أندهلك بـ نانا بدون ألقاب

نانا : وماله ياشريف أحنا شباب زى بعض وماتفرقش الألقاب

(شريف فى سره ..شباب زى بعض دا أنتى من دور أمى الله يخرب بيتك )

شريف : بالمناسبه السعيده دى أسمحولنا أن نعزمكم على حاجة ساقعة رغم أن مقامكم عشوة محترمه فى أبو شقرة ولا أيه ياطلعت باشا يا خويا

طلعت وهو يسبل عيناه لشيرين : دى أقل حاجه يا آنسه شيرين ..ربنا يجعل لنا نصيب فيكم ويكون مكتب نوفل وش السعد علينا كلنا...يارب

شريف : خوش على محل العصير أللى جاى ياطلعت ...تحبوا تشربوا أيه يا هوانم

نانا : أللى حتشرب منه يا شريف

شيرين : أنا حشرب زى نانا ..طلعت وأنا كمان

شريف : يبقى كده كلنا حنشرب عصير قصب ..لما أنزل أوصى على الطلبات الراجل ده عصيره كده يخبل ..عن أذنكم خليكم قاعدين مستريحين

يعود شريف وهو يحمل كوبايتين لنانا وشيرين وهو يقدمهما وعلى وجهه أبتسامة عريضه : بالهنا والشفا يا حلوين..أصبر ياطلعت حجيب الباقى

بعد أن يشربوا العصير تنطلق بهم السيارة فى طريق شبرا لتدخل أول الطريق الزراعى

طلعت : أيه الأخبار

شريف : أتقلبوا وبقوا فى التمام أركن فى الحته الهادية دى

طلعت : شايف الأتنين رايحين فى سابع نومه أوعى تكون تقلت العيار ليفطسوا مننا يا مجنون ..ما أنا عارفك أنت فقرى

شريف عيب ياصدمان هو أنا لسه تلميذ ..بلاش رغى وتعالى معايا ننفضهم ونسلت باترينة الدهب بتاعة ست نانا ..آل أيه أحنا شباب زى بعض ..هههههه

طلعت : خف شويه يا ملقاط مفيش وقت ..أنت بتقلعهم الجزم كمان

شريف : أهو كله بينفع ..أيدك معايا ننيمهم تحت الشجرة دى

طلعت : أركب بقى الله يخرب بيتك

شريف : استنى يظهر الست شيرين ربطه حاجه على وسطها حجيبها وأجيلك ..بسرعة

ينطلق شريف وطلعت بالسيارة بعد أن أستوليا على كل ما مع شيرين ونانا وتركهما ممدتين تحت شجرة بالطريق السريع

طلعت : ايه أخبار الغلة ..تمام

شريف : تمام التمام ..أتعشت وظاطت ..يطلع بتاع كيلو دهب من الأتنين وشنط أديهم فيها بتاع 200 جنيه أول عن آخر

طلعت : أطلع يا ملقاط بالكيس أللى كان مربوط على وسط شيرين ماتستهبلش يابن القرعة..أنت فاكرنى مش واخد بالى ..طلع الكيس ياض لشرحك

شريف : ياه عليك يا صدمان ما أنا لسه ما فتحتوش ..أفتح كده وفرجنى

صدمان : يظهر دى تحويشة العمر ..ربطاها على وسطها ..يابنت الأروبه ..بنك متحرك ..عشرين ألف جنيه من الورق أبو ميه يامعلم

طلع كده فرجنى فلوس العوانس ..قششششششطه..صيده أنما أللى هى .. مش قولت لك مؤسسة نوفل دى أحسن مكان تصطاد منه الزباين الصوقع

شريف : أركن يا خفيف هنا فى العمار وسيب العربيه المسروقه دى هنا وبينا ناخد تاكسى

طلعت : تاكس ..تاكسى..أطلع على تل العقارب يا أسسطى

فى الأنعاش

تفتح شيرين عينيها ببطء ورأسها يكاد ينفجر من الصداع وتحاول أن تحرك يدها ولكنها تسمع صوت رجل يكلمها ..بلاش تحركى أيدك علشان المحلول ..حمدلله ع السلامه

شيرين : أنا فين ؟؟ وأيه أللى جابنى هنا ؟؟ وفين صاحبتى

الرجل : أهدى وأستريحى ..صاحبتك أهى نايمه جانبك ..وأنتى فى مستشفى قليوب العام وأنا الدكتور مصطفى رئيس العناية المركزه

شيرين تعود للنوم مرة أخرى وهى تشعر بأنها فى حلم طويل تسمع وترى الناس ولكن لسانها مربوط عن الكلام ولا يصدر منها غير التأوهات المبهمه

ويأمر الطبيب الممرضات بالعناية بالنزيلتين وأخطاره بحالتهما أول بأول بعد أن زال عنهما الخطر ويخرج إلى مكتبه فيجد أمامه ضابط الشرطه لأخذ أقوالهما

الدكتور مصطفى : للأسف لن تستطيع أخذ أقوالهما حاليا بكرة الصبح تقدر تتكلم معاهم لحد ما ينسحب المخدر من أجسامهم لأن الجرعة كانت كبيرة ولولا عناية الله لماتوا قبل أنقاذهما

الضابط : حنسيب حراسة على الأوضه لحد ما تيجى النيابه بكره تستجوابهم

مصطفى : مافيش داعى مش حيفوؤا قبل 8ساعات وربنا يستر مايسبش المخدر أثر عليهم

الضابط : شكرا يادكتور ..تصبح على خير

الحلقة رقم ( 7)

المعلمه شخلعة

يجلس شريف ملقاط وطلعت صدمان فى الوكر بتل العقارب وهم يتفحصون الذهب والنقديه التى حصلوا عليها من شيرين ونانا وهم يدخنون المخدرات فى منتهى السعادة والأنسجام ويقومون بتقسيم المسروقات فتدخل عليهم المعلمه( شخلعة) صاحبة الوكر. كالقضاء المستعجل بعد أن كسر لها الباب صبيها الواد زقلط المدب

فمن هول المفاجأة يحتضنا المسروقات ويحاولان تخبئتها من المعلمه

شخلعة : الله الله أيه أللى معاكم ده ياواد أنت وهو..دهب وفلوس ..وداخلين ولا تحية ولا مسا ولا قاعدة كويسه ..تكنش ياض أنت وهو فاكرنها تكية أللى خلفوكوا ياحراميه يازباله ..هات أللى معاهم ياد يازقلط

ملقاط : والله يامعلمه كنا حنجيب نصيبك لحد عندك ..مش كده يا صدمان

شخلعه : الكلام ده تقولوا لوحدة تانيه ياروح أمك ..أنا شخلعة ياض أم الحراميه وأللى بيخرج عن طوعى بفرمه ..حصلونى على أوضة الأصلاح والتأديب

ملقاط : بلاش أوضة التأديب يامعلمه خدى أللى أنت عايزاه ولا أقولك خدى كله

أحنا مش عايزين حاجة

شخلعة : أنا نصيبى الربع وبما أنكم طلعتم أندال وولاد كلب نصيبى يبقى النص علشان ماتعملوش الحركة دى تانى أنت عارفين أنا حقانيه قد أيه !!

طلعت : أتفضلى الحاجه قدامك أهيه يا معلمه خدى أللى أنت عيزاه وسماح المره دى..المهم رضاكى ياست المعلمين

شخلعة : ورينى الدهب ده ياض ..(تتفحص الدهب وترميه فى وجهيهما ) بالذمة أنتوا حراميه أنتم مش عارفين الدهب الفلصو من الحقيقى ياجزم ياخسارة تربيتى

ملقاط وصدمان فى ذهول : فلصو

شخلعة: فلصو وقشرة يا جعر أنت وهو ..تتكم نيله عليكم وعلى خبيتكم ..لم يا زقلط النقديه من قدامهم وعدها وأديهم النص ..والعمليه دى نظيفه ولا فيها دم يا حمار أنت وهو

ملقاط : نظيفه والله يامعلمة..تذكرة هبو فى السلاميكه مع كوباية عصير

المعلمه : أوعى تكون تقلت العيار ليروحوا فيها وعلى كولن خد صاحبك وأخفوا من هنا مش عايزه أشوفكم لحد ما نشمشم على الموضوع روحوا أتاوا فى الفرع بتاعنا فى شق الثعبان عند المعلم( مرتاح) وسلمولى عليه وما تطلعوش شغل لمدة جمعتين.. مفهوم.. أنتم عملتم الشغلانه دى فين

صدمان :على الطريق الزراعى قورب قليوب

> حد شافكم غير البنات

> موظفين وموظفات مؤسسة نوفل للجواز السريع

> فالحين ياولاد الخايبه ..قولنا ستين مرة مش عايزين الشغل فى الأماكن العامة

أوصافكم دلوقتىعند البوليس وقليل لما يهاجمنا النهارده قوموا فزوا وغوروا حالا من هنا ..موعودة أنا ياربى بالحراميه الأغبياء

فى المستشفى

يجلس الدكتور مصطفى بجوار شيرين بعد أن فاقت ويهدأ فيها بعد أن أنخرطت فى البكاء على ما فقدته من تحويشة العمر

مصطفى : كفايه ما تعيطيش أنشاء الله البوليس حيرجعلك فلوسك

شيرين : دى فلوس يادكتور مابترجعش

> أستعوضى ربنا فيهم ..أحكى لى حكايتك بصراحة يمكن أأقدر أساعدك

> حكايتى حقولك أيه ولا أيه يادكتور أللى فيه مكفينى

> قولى كل حاجة فضفضى عن نفسك يا مدام شيرين

> أولا أنا مش أسمى شيرين وآنسة مش مدام وأسمى معصلجه

(الدكتور يكتم ضحكته) : كملى يا آنسه معصلجه

> أضحك براحتك.. شوف أسمى ده هو سبب غلبى وشقائى الله يرحمك يابه هو السبب فى الغولب أللى أنا فيه ..لما أمى كانت حامل فيه تعبت جدا لما جت تولدنى فضلت تتوجع فيه لمدة شهر وأنا مش عايزه أنزل من بطنها وكانت حالتها الصحيه ما تسمحش بعمل عمليه لحد ما أراد ربنا وشرفت على وش الدنيا لكن بعد أيه بعد ما ماتت وهى بتولدنى فصمم أبويا يسمينى معصلجه وكتب الأسم فى شهادة الميلاد وأصبح أسمى موضع سخريه من الولاد فى الشارع وفى المدرسه

ولما كبرت ودخلت فى سن الجواز أصبح أسمى عقبه ونذير شؤم لدى العرسان وأهاليهم ودوخت علشان أعرف أغيره ولكن شهادة الميلاد مكتوب أسم أبويا غلط فكان لازم أصحح أسمه الأول علشان أعرف أغير أسمى المهم زهقت وتعبت من اللف وحتى لو غيرت أسمى ما خلاص الناس فى المنطقة والشارع والشغل حفظوا الأسم ( تسكت وقد نزلت دمعة من عينها )

> وبعدين أيه أللى لمك على الحراميه دول

> لما سنين عمرى جريت ودخلت على أربعين سنه ومفيش حد عايز يتقدم لقيت أعلان مؤسسة نوفل للجواز الحديث قولت أجرب حظى يمكن ربنا يرزقنى بعريس

فأخدت معايا زميلتى هانم أللى نايمه دى وظروفها برضه قريبه من ظروفى وأتشيكنا وروحنا المؤسسة يمكن نلاقى ولاد الحلال أللى يسترونا ..فوقع فى سكتنا أتنين رجاله ولاد حرام أتعرفوا علينا ووعدونا بالجواز وطلبوا يوصلونا معاهم لشبرا فركبنا وحصل اللى حصل وشربونا عصير قصب ما دريناش بأيه اللىحصلنا ألا وأحنا فى المستشفى بعد ماسرقوا القرشين تحويشة العمر والدهب القشرة بتاع هانم وجزمنا وشنطنا ورمونا فى الشارع وهربوا

(يتأثر الدكتور مصطفى بقصة معصلجه ويربت على كتفها بحنان)

> خير يامعصلجة رب ضارة نا فعة وما تعرفيش نصيبك فين ..ماتمشيش من المستشفى قبل ماتعدى عليا عايزك فى حاجة ضروريه..سلام

الحلقة رقم ( 8 )

بعد أن أنتهى تحقيق البوليس والنيابه تأمرهم بالأنصراف وتعدهم بالبحث عن الجناة ..ويتطوع ولاد الحلال بأعطائهم مصاريف المواصلات وشباشب تفى الغرض لتعودا إلى منزلهما

معصلجة : شوفتى يا هانم شورتك المهببه عملت فينا أيه ولا باترينة الدهب القشرة أللى لمت علينا الحراميه روحى منك لله ياشيخه أهى ضاعت تحويشة العمر من تحت راسك

رفضاهم تضرب أيده على صدرها : وأيه أللى جاب معاكى تحويشة العمر يا مجنونه يابت المجانين يطلعوا كام يعنى

معصلجة: أنا دايما ربطاهم حولين وسطى أهم بيدفوا الواحده وبيقوا قلبى ..يبقى دلوقتى ولا راجل ولا فلوس يامولاى كما خلقتنى..راحوا العشرين ألف من أللى محواشه وأللى ورثاه وبقية المرتب

> نقول أيه الحمد لله أن هى جت على كده ..كان ممكن يضيعونا أو يموتونا ..أطمنتى على نفسك يابت

> أتلهى أحنا فى أيه ولا أيه ..أطمنى يافقريه..أستنينى هنا أنا داخله للدكتور مصطفى أشوفه عايز منى أيه

> أيه يا عصلوجه السنارة غمزت ولا أيه ..شايفاه سعيد بيكى قوى وبيشربك الدوا بأيديه

> أتنيلى وأسكتى الله يخرب بيتك وبيت سنارتك أللى بتشبك فى النصايب..هو دكتور كبير زى ده حيبص لوحده زيى ..ده تلاقيه مجوز برنسيسه وعنده عيال

وصعبنا عليه الراجل وأعتبرنى زى أخته

>زى أخته ..أنا أقطع دراعى أن الجدع ده واقع لشوشته.. ماهو الحب بيجى من السكه دى يا عبيطه شوية عطف على شوية حنيه هوب الجدع أتشنكل

> حب أيه يامجنونه أنت يظهر المخدر ماطلعش من جتتك وعماله تخرفى

> لعلمك الهباب أللى شربناه ده عامل معايا أحلى دماغ ومخلينى شايفه الدنيا بمبى وأللى طالع عليا بالضحك كل ما أفتكر أللى حصلنا

> ماهو أنتى لوكان أتسرق منك تحويشة العمر كان زمانك شوفتيها ضلمه وسودا وكحلى زى ما أنا شايفاها ..أترزعى هنا لحد ما أرجعلك

تدخل معصلجه غرفة الدكتور مصطفى فيرحب بها على الفور ويجلسها أمامه وهو يكتب فى بعض التقارير

مصطفى : ثوانى وأفضالك ..أخلص تقرير النوبتجيه ونمشى سوا

( ينتهى من كتابة التقرير وينظر إلى معصلجة بود )

مصطفى : أنت فطرتى ولا أبعت أجيب فطار ..الحمد لله

> بقول أيه قبل ما أتكلم معاكى وأحكيلك على ظروفى تقبلى تتجوزينى يامعصلجة

معصلجة تطرق إلى الأرض فى خجل حقيقى وتتسارع ضربات قلبها وتلجم لسانها المفاجأة فتتساقط دموعها بغزارة ويناولها مصطفى منديل لتمسح به دموعها ويلح عليها بنفس السؤال

معصلجة تتدارك الموقف : هو أنا قد المقام يادكتور ..ولا هو جواز شفقه

مصطفى ينفى بشده : لا لا الموضوع مش كده خالص ..أنا معجب بيكى من ساعة ماشوفتك وأرجوكى ما تفهمنيش غلط

معصلجة : عايز تتجوزنى على أم العيال ..وأهى جوازه رخيصة وبنت حلال..لالا أنا مش موافقة أنى أكون سبب فى خراب بيوت

> خراب بيوت أيه يابنتى وأم عيال أيه ..أنا عازب ماتجوزتش قبل كده 

> يانهارك أبيض وساكت على نفسك ليه ماروحتش مؤسسة نوفل للجواز الحديث

أوعى تقولى ظروف وأنشغال والكلام أللى بيقلوه الرجاله العزاب

> أبدا مش كده خالص ..أنا كنت فى بعثة وأشتغلت بره 10 سنين ولما فكرت أتجوز قولت لآزم أتجوز من بنت مصريه من بلدى ولسه راجع من سنه ولم أجد فى طريقى أطيب وأحلى وأهدأ منك ..قولتى أيه ماتعصلجيش معايا( وهو يشخط فيها ويخرج شيك من جيبه ) تتجوزينى ومهرك أهه عشرين الف جنيه

(تنظر معصلجة إليه فى ذهول وترمى برأسها للخلف من هول الصدمة فينزعج مصطفى ويدق الجرس بشدة فتدخل الممرضه مسرعة )

مصطفى : بسرعة هاتى كرسى بعجل وأنقليها معايا لغرفة الأنعاش

معصلجة تفتح عينيها وهى تقول : بلاش الكرسى أبو عجل ومفيش داعى لغرفة الأنعاش..أبعت هات المأذون

يقبلها مصطفى فى رأسها وهو سعيد : وقعتى قلبى ياشيرين

معصلجة: أنا معصلجه مش شيرين

مصطفى : خلاص مفيش عصلجه بعد النهارده فلتسقط العزوبيه بعد اليوم

(الممرضه تزغرط وهى تخرج من الباب فتدخل رفضاهم وهى تجرى)

رفضاهم : عملتيها وأتفك نحسك عقبالى يارب

رفضاهم تزغرط وهى تحتتضن معصلجة وتبكيان سويا ..ثم تمسح دموعها وهى تقول : بقول أيه يادكتور مصطفى ماتشوفلى كده دكتور صاحبك أوحتى دكتور أمتياز أنشا لله حتى تمرجى عايز أتجوز ياناس..أتجوززززززز

يضحك الجميع حتى تدمع أعينهم

هههههههههههه

تمت

وإلى اللقاء فى عمل جديد

الرجل الذى فقد أنفه

زغلول ومدام أف
الحلقة رقم (1)
نعمة الشم
زغلول مهندس زراعى ويعمل فى أحدى مديريات الزراعه خارج القاهرة أصيب فى حادثة سير أثناء ذهابه لعمله نتيجة تصادم ميكروباص بعربه كارو وبعد العديد من العمليات الجراحيه فى منطقة الأنف والرأس شفى منها ولكن تركت له أثرا صحيا ..وهى فقدانه لحاسة الشم ..فحمد الله على نجاته من بين الحطام وأعتبره الجميع بأنه كتب له عمر جديد..ولم يفلح معه أى علاج فى أستعادة ما فقده فى هذا الحادث
الآنسة عفاف : تعمل مدرسه أشغال وتدبير منزلى فى مدرسه أعدادى بالقرب من عمل زغلول ويتصادف ركوبها بأستمرار المواصلات والميكروباص مع زغلول فى الذهاب والعوده ودائما مايجد مكان بجوارها ليجلس فيه دون أن يعرف السبب... فنشأت بينهم علاقه حب وأستلطاف ومقابلات إلى أن أنتهت عند المأذون
يعيش الزوجان حياة سعيده فى شقة بالقرب من محل عملهما فى عمارة جديده دفع فيها زغلول دم قلبه للحصول عليها
ولكن كان شيئ ما يؤرقه وهونظرات الجيران له فى الطالعه والنازله بالرغم من تودده إليهم لأنهم كانوا يرمقونه بنظرات عدائيه ومنهم لايرد عليه السلام وآخرين ينظرون إليه بأشفاق فيحدث زوجته بما يعانيه
> ما تخدش فى بالك يازغلول ياحبيبى دول ناس معقده
> العماره والناس أللى فى الشارع كلهم معقدين لأ.. لأ ..فيه حاجة مش مظبوطه والأدهى والأمر الجدع البواب مابيردش عليا هو أنا فييا حاجه وحشه.. شكلى مش عاجبهم يمكن
> يا حبيبى دا أنت زى القمر وشكلك فل الفل
> أومال فيه أيه يا عفاف أنا حتجنن
> ماتخدش فى بالك.. أللى ينشغل بأحوال الناس يتعب ياروحى
> أنا فكرت أنى أبيع الشقه دى وأسكن فى حته تانيه
> هو أنت حتلاقى شقة تانى زى دى وقريبه من شغلى وشغلك على الأقل أترحمنا من المواصلات.. أهدى بس وقوم غير هدومك وتعال ناكل لقمه
> لقمه أيه أنا من ساعة ما فقدت الشم بقيت لا عارف للأكل طعم ولا ريحه ..أى حاجة تملء البطن والسلام
> احمد ربنا أنها جت على كده
> أنتى مقفله الشبابيك والبلكونه ليه والدنيا حر ..لما أقوم أفتح الشباك
( يفتح زغلول الشباك على مصراعيه فيسمع صوت أحد الجيران وهو يصرخ بأعلى صوته : أفففففففف أقفل الشباك يا حمار
> مين ده يا عفاف يقصدنى أنا الجدع ده
> مش بقولك دول عالم معقده ماتخدش فى بالك
( وبعد قليل يسمع هبد الشبابيك وهى تغلق فى باقى أدوار العماره وأصوات أصحابها وهى تقول أفففففف الله يخرب بيوتكم
> هو فيه أيه يا عفاف أنا مش شامم حاجه
> معلش يا حبيبى أنت معذور أنت ما بتشمش
> أنتى شامه حاجه
> أستهيألى كده ريحة عرق أو حاجه معفنه
> طب أقفلى الشباك ياروحى
( تقوم عفاف لغلق الشباك فيسمع زغلول صوت وهو يقول :خشى ياوليه جوه كفايه كده )
زغلول : هو الكلام ده ليكى
> لا يا حبيبى قصده مراته هو حد يقدر يشتمنى ولا يبص ناحيتى دا أنا كنت آكله بسنانى
> بحسب .. لما أقوم أشوف مين بيخبط على الباب
( يفتح زغلول الباب فلم يجد أحد ويسمع صوت من الدور العلوى وهو ينادى : كهرباء..35 جنيه يا أستاذ زغلول
زغلول : طب أنزل خدهم
> معلش أطلع أنت ..أنا فى أيدى شغل ..عايز تدفع أهلا وسهلا ..مش عايز تدفع ..أبقى روح الشركه أدفع هناك
> ياعم أنزل خد الفلوس أهه ..لأ مش نازل ..حشتكيك فى الشركه ..أشتكينى..يعنى مش عايز تنزل ..لأ مش نازل
> هو فيه أيه ياعفاف
> مش عارفه يا حبيبى ما تشغلش نفسك
> لأ لأ لأ فيه حاجه أنا مش فاهمها
الحلقة رقم ( 2 )
عم عبده البواب
زغلول يصعد الدور العلوى ليدفع فاتورة الكهرباء وهو غاضب
> فيه أيه ياعم الريس مش عايز تنزل تاخد الفلوس ليه ؟
ينظر إليه المحصل ويهز رأسه فى أسى ويعطيه الفاتورة وبقية الفلوس ولا يرد عليه..ويعاود زغلول ألقاء عليه نفس السؤال
المحصل : عايز تعرف السبب وما تزعلش
> قول مش حزعل
> بالعربى الدور بتاعكم ريحته وحشه وأنا ما بستحملش الريحه وأنا راجل فى أديا فلوس وعند حساسيه على صدرى
> بس أنا مش شامم حاجه
> ماهو ياحاجه من أتنين يا أنت ما بتشمش..يا أنت واخد على الريحه دى
> من ناحية أنى ما بشمش فعلا أنا ما بشمش
> نعمه ياراجل أحمد ربنا عليها وبوس أيدك وش وضهر...بس ياريت تبقى تكتب لنا قرائة العداد على باب الشقة ينوبك ثواب
ينزل زغلول بعد أن دفع الكهرباء وهو يفكر فيما قاله المحصل ويحكى لعفاف ماحدث
> الحقيقه ياوفاء حكاية ما يتسكتش عليها أبدا أنا لازم أجيب البواب يمسح الدور بتاعنا بالمطهرات ويخليه زى الفل
>بس أنا مش شايفه أن فى ريحه فى الدور بتاعنا
> يعنى المحصل ده بيكدب
> مش الجدع الطويل الأهبل أبو نظاره ..آه ..سيبك منه ده فرفور وبيدلع
>لأ ..لازم أجيب البواب يمسح الدور...أنت حر
(ينزل زغلول لينادى على البواب ليقوم بمسح الطابق والسلم المؤدى لشقته ..فينظر له البواب بأستغراب )
> أمسح أيه يأستاذ زغلول ..الدور بتاعكم أنتم بالذات مسحته خمسين مره
ومفيش فايده ..شوفوا الريحه طالعه من أنهى شقه عنديكم
> ياعم عبده الدور مفهوش غير شقتين ..شقتى وشقة الأستاذ (عمر) ودى مقفوله من ساعة ماسكنت فى العماره تكون الريحه جايه منها
> لع يابيه الأستاذ عمر عارض شقته للبيع ومعايا مفتاحها وبنظفها كل أسبوع عشان الزباين تشوفها والريحه مش من جواها الريحه من برتها
لدرجة أن الشقة مش عايزه تتباع..أعمل أيه أنا عاد
> يمكن الصرف الصحى بيسرب
> جولت كده برضه ..جيبت السباك وكشف على كل المواسير قال سليمه مليون الميه وقال أن دى مش ريحة مجارى
> أومال ريحة أيه يا عم عبده
> قال دى ريحة لا مؤاخذه عرق معفن بيلزق فى الهدوم والحيطان بيطلع من شقه من الشقق أللى فى الدور بتاعكم
> قصدك أيه ياراجل أنت ..مفيش غير شقتى أللى فى الدور
> أنا ماقولتش حاجه..قولتها بنفسك أنت مابتشمش ياولدى
> لأ ما بشمش لأن الحادثه أثرت على حاسة الشم عندى
> نعمه ياولدى بوس أيدك وش وضهر
( يقف زغلول وهو يتعجب هو كل واحد يقولى بوس أيدك وش وظهر ويفكر ويستعيد بذاكرته ماحدث عندما حضر بعض الأصدقاء لزيارته بعد الزواج وأبدوا ملاحظتهم على وجود رائحه غريبه فى شقته فلم يعطهم بال بأنها قد تكون رائحة تهب من الشباك المطل على المنور فقام بغلقه ولكن أصدقائه قاموا بسرعة وسلموا عليه وجروا على السلم ولم يركبوا المصعد..فقال فى نفسه يمكن تكون الرائحة من داخل شقته وهو لا يدرى لعدم مقرته على الشم ..يجوز وهذا هو الأحتمال الأخير ..إذن مفيش غير عم عبده هو الذى سيحكم فى هذا الموضوع )
> بقول أيه ياعم عبده ما تيجى معايا نطلع فوق عندى فى الشقه عايز آخد رأيك فى حاجه كده
> عايزنى فى أيه ياولدى أنا راجل كبير ومش أقدر أستحمل الريحة يمكن أموت منك وتجيب لنفسك نصيبه
(يقول فى نفسه حتى أنت ياعبده الكلب مش طايق الريحه )
> تعال بس عشان نخلص الموضوع ده ...أمرى لله
( يصعد زغلول وعم عبده فى المصعد وهو يضع يده على أنفه ويقوم بفتح باب الشقه وينادى على البواب ليدخل )
> أدخل يا عم عبده تعال ..( يدخل البواب لمنتصف الصاله فتدخل عليهم عفاف ثم يقوم الرجل فجأة برفع جلبابه وتغطية رأسه وأنفه )
عفاف : ماله الراجل ده عامل كده
عبده من تحت ديل الجلباب :..حموت ..حموت يا عالم سيبونى عايز أخرج بره
(يقوم زغلول بشد ديل الجلباب من على وجه عم عبده وهو متنرفز )
> فيه أيه ياراجل أنت.. قولى دلوقتى أحسن ححبسك هنا
(عم عبده يشاور فى أتجاه عفاف وهو يتراجع للخلف فيصطدم بالكرسى فيقع على الأرض وينهض مسرعا على السلم
الحلقة رقم ( 3 )
لا خاب من أستشار
ينظر زغلول إلى عفاف وهو يتعجب : هو فيه أيه فى شقتنا يا عفاف
> حيكون فيه أيه يعنى..قصدك أن شقتنا ريحتها معفنه ..مفيش غيرى ألا أنا وأنت أللى عايشين فيها
> مش قصدى ..أنتى مش شمه ريحة مش تمام فى الشقه
> لأ مش شامه حاجه
> أومال الناس دى بتعمل كده ليه ..وأشمعنى شقتنا أحنا بالذات لأ لأ لأ أنا مش مصدقك ولا عشان أنا ما بشمش..أنا فى الحالة دى زى الأعمى وأنتى عكازى أللى بمشى بيه ودلوقتى أنتى مناخيرى أللى بشم بيها أكيد فيه حاجه معفنه جوه الشقة دى ومش عايزه تقولى
> أهى عندك الشقه أقلبها من فوقها لتحتيها وشوف لو لقيت حاجه معفنه يبقى ليك حق يازغلول
> أنا من بكره حجيب شغاله تقلب الشقه دى وتمسحها بالجاز والفنيك والديتول وأشوف الناس حتتكلم ولا لأ
> أعمل أللى عايز تعمله أنا بكره حروح عند ماما أزورها وبعد ما تخلص تبقى تعدى تاخدنى نتغدى بره
المنظر: فى مديرية الزراعة يجلس زغلول على مكتبه وهو سارح فى مشكلته وهو مهموم .. وتمر من أمامه المهندسه رجاء والكل يتابعها بنظرات ملتهبه عدا زغلول الغارق فى تفكيره .. يلحظ ذلك زميله (المهندس عارف السيسى)
عارف : أيه ياباشمهندس زرعتها قطن كلتها الدوده ولا زرعتها بطيخ طلعت خيار قاعد ولا أنت هنا ..رجاء دى أحلى موزه فى الأداره عدت من قدامك ووقفت تصبح عليك وسابت لك الملف على المكتب ومشيت ولا بصيت عليها ماشمتش ياراجل ريحة البرفان أللى حطاه النهارده أللى مفحفح فى الأدارة كلها
زغلول يفوق بعد أن هزه عارف : أيه برفان رجاء هو فين ده..ما أنت عارف أنى ما بشمش..ده أنا نسيت ريحة الكولونيا الخمس خمسات أللى بحطها على دقنى لما أحلق تقولى برفان رجاء.. أسكت يا عارف ياخويا أحسن أنا فى مشكله مش عارف لها حل ما بتخلنيش أنام الليل
عارف: قولى أحكيلى دا أحنا أصحاب وأخوات يمكن نقدر نشوفلها حل
> أحكيلك أيه ولا أيه ( ويحكى زغلول لعارف مشكلته مع سكان العماره والسمعة السيئة التى نالت الدور والشقة التى يعيشون فيها )
> مش جيبت شغاله نظفت الشقه وطهرتها أيه تانى أللى حصل
> هو يوم والتانى وبرضه السكان بتشتكى جيبت الراجل عم عبده وطلعته فى الدور وقعد يشمش زى الكلب الأرمنت قال أيه لسه فيه ريحه طايله العفش..أنا خلاص طهقت عايز أولع فى نفسى وفى الوليه والعفش والشقه
آلاقى بقى عندك حل ياعارف ياسيد العارفين
(عارف يتأثر من كلام زغلول ويربض على كتفه ويواسيه) :شوف يازغلول يا خويا كل مشكله وليها حل وماتزعلش منى المشكله مش فى الشقه ولا فى الدور ولا فى العفش..المشكله فيكم أنت ومراتك
> قصدك أيه يعنى أن أحنا أللى ريحتنا وحشه
> مش قصدى أن ريحتكم وحشه وبس أنتم الأتنين معفنين
> أحترم نفسك يا عارف لولا أن أحنا صحاب كنت ضربتك بوكس فى وشك أللى عامل زى الكوره الكفر..وعلى كولن فهمنى يعنى أحنا معفنين أزاى أنت بتشم لى ريحه وحشه
( عارف يهز راسه بالأيجاب ويبتعد عن زغلول حتى لا ينفذ تهديده )
زغلول : أنا ريحتى وحشه يا عارف
عارف : عايز الصراحه أيوه يا زغلول ( يفتح عارف درج مكتبه ويخرج له عبوة معطر للجو ) شوف كل واحد من الزملاء عنده واحده من دى فبمجرد ما تقوم من مكتبك نقوم برشه فى الأوضه ولو ما قمتش نحاول نشغلك بأى طلب ونبعتك عند المدير
زغلول يضع يديه على رأسه وهو فى حالة أحباط تام ...ثم يرفع رأسه وعيناه أغرورقت بالدموع : ياه حتى ريحتنا وصلت للشغل مش الشارع والبيت للدرجة دى أحنا معفنين .. الواحد يروح يموت أحسن
> لايأس مع الحياة يا عزيزى أنا عندى لك الحل
> قول ياسيدى يجعل حلها على أديك
> شوف ياسيدى أنا ححجزلك أنت والمدام عند دكتور صديقى تخصص أنف وأذن وحنجره بيشتغل فى سنتر طبى كبير يكشف عليكم ويشوف لكم حل فى المشكله دى
> موافق ياريت النهارده قبل بكره يا عارف ياخويا أحسن أنا مش طايق نفسى من أللى بيحصلى
> ولا حنا وحياتك ..هههههههههه
الحلقة رقم ( 4)
الدكتور شملول الناصح
يدخل زغلول وعفاف عيادة الدكتور /شملول الناصح رجل فى الخمسين من عمره أصلع وله كرش ضخم ...مستدير الجسم مثل البالونه وعلى وجهه أبتسامه عريضه وهو يستقبلهما سرعان ماتزول ويكشر عن أنيابه ويطلب من الممرضه كمامه فتناوله واحده ثم تخرج مسرعة وهى تمسك أنفها فينادى عليها بأن تحضر واحدة ثانيه ..يرتدى كمامتين ويشاور لزغلول ليجلس على كرسى الكشف
د. شملول : أفتح بؤك يا أخ ( يوجه الكشاف الكهربى ناحية فمه وهو يقول أقفل البلاعه دى ..ورينى مناخيرك ..ياه ياساتر يارب ..يمرر ورقه أمام أنفه ويسأله شامم أيه..يهز رأسه زغلول بأنه لا يشم شيئ بالمرة
> دى نعمه تبوس أيدك وش وظهر أنك مش شامم
> حتى أنت كمان يادكتور بتقولى بوس أيدك وش وظهر .. أنا عندى أيه وحياة أبوك طمننى
> عندك بلاوى متلتله أنا مش عارف أنت عايش لحد دلوقتى أزاى قوم تعال لما أكتبلك الروشته..يظل يكتب شملول الروشته وهو ينظر إليه بين لحظة وأخرى ويهز رأسه
> أنا حالتى خطيره للدرجه دى
> أسكت خالص من فضلك وما تفتحش بؤك لأنه بيتعبنى
ينتهى من كتابة الروشته : أول حاجه حتعمل التحليلات دى فى المعمل أللى فى الدور الأول وحتاخد الأدويه والمطهرات دى بأنتظام وتنفذ الكلام المكتوب فى آخر الروشته سامع..أنت مابتردش ليه
> مش انت أللى قولت ما تكلمش
> أحسن برضه أتفضل أنت أعمل أللى قولتلك عليه ..تعالى أنت يامدام أأقعدى على كرسى الكشف أفتحى بؤك ..بس بس خلاص أاقفلى تتكم القرف..فعلا حلة ولقت غطاها..أنت متجوزه بقالك قد أيه يا أفاف
> عفاف يادكتور مش أفاف.. بقالى سنتين بالظبط
> أنا مش قولت تقفلى بؤك ماتعرفيش تشاورى بصوابعك ..هى نفس الحاله أللى عند جوزك ونسبة الشم عندك 20 % وأنتى مش دريانه عشان كده حالتك أتدهورت أنتى وبسلامته فبعد مانخلص هنا حتطلعى على دكتور السنان أللى جنبينا يشوف البلاوى أللى عندك
> يعنى حنخف أنا وزغلول وحنبقى كويسين
> ده بيتوقف على تنفيذ خطوات العلاج والمتابعه ..وبالمره عدوا على دكتور الغدد عشان يشوف كمية العرق أللى بتشر منكم أنتم الأتنين وبعدين دكتور الجلديه ..شوفى أنا من رأيى تقعدى أنت وهو هنا يتعمل لكم كونسلتو من جميع التخصصات لأن العفونه طالعه من كل حته فيكم
> ده كتير علينا يادكتور حنجيب مصاريفه منين
> ما تخافيش حنساعدكم بقدر الأمكان وحبلغ عنكم جمعية أصدقاء العفونه حتتحمل جزء كبير من مصاريف العلاج أنتم يا بنتى حالة خاصة جدا تدرس فى كليات الطب..وأنا من عندى مش عايز أتعاب
> كتر خيرك يادكتور ربنا ما يعفنلك حبيب ولا غالى
> خدى الروشته أهه وتيجى بكره أنتى وجوزك علشان الكونسلتو يشوفكم وأكون جهزت لكم العلاج المجانى مع جمعية أصدقاء العفونه أللى حيحضر مندوبها بكره لمعاينة الحالة..سلام مش عايز ولا كلمه وأبعتيلى الممرضه الندله أللى بره
الحلقة رقم (5) والأخيرة
جمعية أصدقاء العفونه
يجلس مندوب جمعية أصدقاء العفونه مع زغلول وعفاف فى المستشفى ويعرض عليهم خدمات الجمعية
> شوفوا يا حضرات أحنا مستعدين بتحمل كافة مصاريف المستشفى والعلاج والأدويه لكن لنا شرط واحد فقط لو توافقوا عليه أمضى الشيك للمستشفى والعقد معاكم
زغلول : عقد أيه لا مؤاخذه يا أستاذ قولتلى أسمك أيه
> أنا( ريحان حسب الله) نائب المدير للدعايه..والعقد حيكون بينكم وبين الجمعيه لعمل أعلانات عن مزيلات العرق والصابون الطبى والبرفانات
وبعض منتجات شركة( النظافه سر الجمال)
> عارفها الشركة دى ..هريانه أعلانات فى التليفزيون..وحتدونا فلوس على كده
ريحان : فلوس أيه ياسيد زغلول مش كفايه أن أحنا حنعالجكم على حسابنا لو وافقت نبدأ التصوير من بكره
زغلول : حنصور قبل ما نتعالج أزاى
ريحان: أحنا حنصور مراحل العلاج كلها ومنه أعلان للمركز الطبى أللى بتتعالجوا فيه
عفاف : أنتم بتستغلوا عفونتنا لعمل أعلانات للمستشفى ولمنتجات الشركه وتلموا فلوس من ورانا من غير ماتدفعوا ولا مليم لينا..أفتح الله
> أفكرك يا مدام أن العلاج حياخد فلوس كتير يعنى فيد وأستفيد وعلى كل حال حندفعلكم مبلغ رمزى وبعض الهدايا من منتجات الشركه المنتجه أسيبكم تفكروا علشان أنا خلاص حفطس من ريحتكم... أففف
يجلس كل من زغلول يتشاوروا فى هذا العرض وينتهى الأمر بالأتفاق بشرط زيادة مبلغ المكافأة )
ريحان : أتفقنا على خيرة الله وقعوا أنتوا الأتنين هنا
(وتبدأ مراحل العلاج والتصوير فى نفس الوقت فى المركز الطبى حتى أنتهت تماما وبدأت الشركه تقوم بعمل أفلام الدعاية لمنتجات شركة النظافة سر الجمال ويعود كل من زغلول وعفاف لبيتهم بعد شهر وهم فى منتهى السعادة ويجلسا سويا لمشاهدة أعلانتهم فى التليفزيون )
الأعلان الأول
مركز شملول الطبى
المنظر: الدكتور شملول الناصح وهو يقوم بالكشف عليهما وهو يرتدى كمامه على أنفه ثم يخلعها ويقول :دى من الحالات الميؤوس منها فنسبة العفونه لديهم تعدت النسب العالميه بمراحل ولكن فى مركز شملول الطبى أنت فى أيد أمينه (Cut)
ينتقل المشهد لمراحل العلاج المختلفه فى المركز فى عيادة الباطنه والأسنان والجلديه والصدر والقلب ..باقى العيادات
ينتهى المشهد بوقوف كل من زغلول وعفاف وحولهم أطباء المستشقى وهم يقولون أنتم مع مركز شملول الطبى فى أيد أمينه..وداعا للعفونه وعش سعيدا وينتهى المشهد بأبتسامه رائعة على وجه زغلول وعفاف
ثم صوت المذيع وهو يقول : أتصل بنا على هذه الأرقام الظاهرة على الشاشه..سنصل أليك فورا وقل وداعا للعفونه وأبدأ معنا حياة جديده
تم.. ترراارم.. تم.. تم
الأعلان الثانى
لشركة النظافه سر الجمال
المشهد : زغلول وعفاف وهم يركبان فى أتوبيس نقل عام مزدحم فيمسك
الركاب أنوفهم ويهرعون بالنزول من الأتوبيس بما فيهم السائق والكمسارى فيتقدم منهم مندوب شركة الدعايه ويهمس فى أذن كل واحد منهم ويخرج لهما عبوتين من مزيل العرق ماركة( شور براحتك)
(Cut)
المنظر مرة أخرى فى الأتوبيس بعد أن أستخدما مزيل العرق الجديد والركاب وهم يلتصقون بهم ويتنعمون برائحتهم وتقوم أحدى الركاب بطبع قبلة على وجه زغلول وعفاف فيقوما بأخراج عبوة العرق ورفعها عاليا مع هتاف ركاب الأتوبيس : شور براحتك هيههههههههههههه
تم.. ترراارم.. تم.. تم
يقوم المذيع بالتعليق: مزيل العرق شور براحتك يبعث فيك الثقه والحيويه
وشور براحتك وبراحة راحتك ..أتصلوا بنا على التليفونات الظاهرة على الشاشة يصل لك مندوبنا فى الحال..لدينا عبوات سوبر سوبر عائلى للمدارس والجامعات والمواصلات العامه ومترو الأنفاق خلى الشعب يشور براحته.. تم.. ترراارم.. تم.. تم
******
عفاف : أحنا بقيت فضيحتنا بجلاجل يازغلول ..حتبقى سيرتنا على
كل لسان وأللى ماشفتش شوف زغلول وحرمه المعفنين
زغلول : أحنا أصلا كانت سيرتنا على كل لسان ..لكن دلوقتى الناس عرفت أن أحنا أتعالجنا من القرف أللى كنا عايشين فيه ومش دريانين
> أنا مش عارفه حقابل الناس أزاى المدرسين والمدرسات والطالبات
> عادى يا فوفو أنا عرفت أنه كانوا بيقولوا عليكى أبله أففف..شوفى بقى حيعرفوا أنك كنتى مريضه وربنا شفاكى وحيتكلموا فى وشك بدل ما كانوا يتكلموا من وراكى وأستغلى الحكاية دى فى بيع وتوزيع الكراتين أللى خدناها من شركة التجميل وحتعملى قرشين كويسين
> فكره برضه يازغلول ..وأنت برضه وزع فى شغلك وكله فايده
> قومى بقى أفتحى الشبايك والبلكونات براحتنا ماحدش بقى زينا
( تقوم عفاف بفتح الشبابيك والبلكونات وهى مطمئنه فتسمع صوت أحد الجيران وهو يغلق نافذته بقوة ويقول : أففف أقفلوا يا عالم يا معفنه )
يسقط زغلول وهو مغشى عليه
تم.. ترراارم.. تم.. تم

أنتهت