سلطانية الطرشى

العجل المشترك

سعيد أفندى فى العام الماضى ربنا فتح عليه واشترى عجل للأضحية اشترك فيه أخوه وأخته وحماته وعمته وجوز خالته .. وفى صباحية عيد الأضحى تم الذبح وتقسيم الأنصبه على المشتركين وتبقت مخلفات الذبح جعلته فى حيره كيف سيتصرف فيها بعد أن سمع مناشدات الهيئات والجمعيات فى هذا الشأن
• الهيئة العامة للمياه والصرف الصحى تناشد المواطنين بعدم القاء مخلفات الذبح فى شبكة الصرف الصحى.. ماشى بلاش الصرف الصحى كفايه اللى فيه مكفيه
• الهيئة العامة للنظافة تناشد السادة المواطنين بعدم القاء مخلفات الذبح بصناديق القمامه
ماشى وأين هى صناديق القمامه أصلا ؟؟
• الهيئة العامه للسياحة والحفاظ على البيئة تناشد الساده المواطنين بعدم الذبح فى الشوارع .. أين سيكون الذبح هل سيكون فى المدبح أو فى الصحراء
• الهيئة العامه للأوقاف تناشد المواطنين بشراء صكوك الأضحية ( اشتروا الصك لمنع الريبه والشك ) بعد فضيحة 57357 فقدنا الثقة فى جميع الجمعيات الخيرية والأوقاف
• فخرج من بيته وهو يبحث عن طريقة آمنه يتخلص بها من هذه المخلفات فزكمت أنفه رائحة قذره تنبعث من صناديق القمامة الموجوده بالشوارع الرئيسية والميادين والبلوعات المسدوده وبقايا الذبائح والدماء عليها جيوش من الذباب على الأرصفه.. ولم تنفع المناشدات فى الراديو والتليفزيون فقرر ان يقوم بدفن هذه المخلفات فى الجنينه الموجوده فى منتصف الشارع الرئيسى ويبقى كده تخلص منها ويقوم فى نفس الوقت بزيادة خصوبة التربة.. لم تمضى على فعلته هذه سوى دقائق ألا وجد فوق رأسه فرقة مكافحة الأرهاب وهم طرحينه أرضا ويحملونه معصوب العينين إلى سيارة مصفحة أنطلقت به إلى المجهول وقام سعيد أفندى بقضاء عيد الأضحى فى جهة غير معلومه تم الأفراج عنه قبل العيد الحالى بيومين وجائت أخته وحماته وأقاربه لتهنئته بمناسبة الأفراج عنه فهمس فى أذنه أبن عمه برغبته أن يشترك معهم فى عجل كأضحيه فقال : لو شوفت اللى شوفته ماكنتش قولت اللى قولته ماااااء مااااااء مااااااء خلاص ياسعيد خلاص خلاص وظل سعيد يمئ ماااء حتى أدركت شهر زاد الصباح فسكتت عن النباح المباح كل عام وأنتم بخير

نار ياحبيبى نار

-       فيه ايه ياوليه اللى حصل.. بتخبطى كده ليه على باب الحمام

-       أطلع يامرسى حريقه فى العماره اللى جنبينا

-       حريقه وفى العماره اللى جنبينا حاضر حاضر أستر نفسى وأطلع

-       بقولك أيه أنا لبست العيال ونازله تبقى تحصلنى عايزه أشوف الحريقه لايف من اولها

-       يا نهار أبوكى أسود بعتينى يا جبانه

-       العمر مش بعزقه ..بقالك ساعتين تحت الدش وعمال تغنى نار يا حبيبى نار مش شامم ريحة الشياط ..ده الدخان مالى الحمام

-       بقولك أيه ناولينى البوكسر الأحمر المنقط  بتاع المناسبات

-       وقته أنا نازله عايزه أحضر الحريقه من أولها وعيش مع بوكسراتك لحد ما تتشوى جوه الحمام ياله ياولاد

-       جماااالات استنى ياجبانه .. طراااخ ( أغلقت الباب بعنف ونزلت بسرعه لتشاهد الحريقه لايف )

خرج مرسى من الحمام وهو يتلفت يمينا ويسارا ويرتدى ملابسه ويرش نفسه بالبرفان ويسمع خبط شديد على باب الشقه فيفتح فيجد جارته الست زوزو  ( الراقصة الأستعراضية ) وهى ترتدى الروب اأحمر الشفاف وهى تستعجله ياله يامرسى أحسن الحريقه ممكن توصل لحد هنا.. ماهى وصلت ياست زوزو .. أتفضلى أشربى عناب.. جمالات نزلت ومعاها العيال تتفرج على الحريقه فرصه يارب الشارع كله يولع علشان اشوفك كل يوم

-       مرسى.. دى حريقه يامرسى مش لعب عيال خلص ياراجل

-       أستنى ياست زوزو ماتنزليش لوحدك انا جاى معاكى الأمر مايسلمش تتكعبلى كده ولا كده تلاقى حد تتسندى عليه

-       طب ياله بسرعه أحسن ريحة الدخان خنقتنى أفففف

-       ******************

-       واد يا حماده مش أبوك اللى متسند على كتف زوزو الرقاصه

-       ايوه هو بس باين عليه تعبان قوى ياماما

-       خلى بالك  ياواد من الكرسى بتاعى لحد ما أجيلك

-       مرسى مرسى  مرررسى .. سيبهولى ياست زوزو

-       برضه يكون أحسن ده خلع كتفى خدى ياختى بلا هم رجاله مخلعه

-       تعالى على كتفى أنا ياسبع البورمبه

-       خلاص أنا بقيت كويس متشكرين يازوزو.. يوجه كلامه لجمالات .. تصدقى ياجوجو الست زوزو دى جدعه بشكل ماسبتنيش وأنا مخنوق وخدتنى فى حضنها قصدى على كتفها لحد ماخرجت من العماره .. أحكى لى أيه اللى حصل علشان أتابع معاكم الحريقه ..  

جمالات وهى تجز على أسنانها  : قدامى .. أنا حجزالك كرسى هناك على الرصيف

-       ياااه القعده دى بتفكرنى بالقعدات اللى كنا بنروح نتفرج فيها على القنابل بدائية الصنع.. الكراسى دى تبع مين .. دى تبع الواد (عفونه) البواب .. لحق يجيب الكراسى دى امتى .. هى الحريقه بقالها قد أيه .. من ساعتين والمطافى لسه ماجتش ..عندك اهو اللواء فؤاد أبو االسلالم بيهزء فيهم روح شوف ايه الحكاية دى الحريقه بتزيد

مرسى : نهارك سعيد ياسادة اللواء

-       حتيجى منين السعاده يامرسى افندى والمطافى نايمه لحد دلوقتى

يتدخل قائد المطافى : لو سمحت ياحضرة ما تتريقش على المطافى

-       انت ماتعرفش انا مين .. مين يعنى .. انا اللواء فؤاد سليم مدير مطافى العاصمة الأسبق والشهير بأبو السلالم

-       أهلا وسهلا يافندم ما يعرفك الا مايجهلك .. والله العظيم ياباشا غصب عننا جميع الطرق مقفوله لأن الزعيم رايح مجلس الشعب ليحلف اليمين.. الأمن قفل البلد ومفيش مخلوق فى الشوارع حتى منعوا العصافير تطير فى الجو  وأطلقوا عليها النار .. حظكم كده نعمل أيه

-       ياسيادة العقيد  اشهلوا شويه ..قولتى أسمك أيه

-       العقيد شراره ابو لهب يافندم قائد مطافى العتبه ..  10 دقائق ونطفيها ياباشا

مرسى وهو يحتج : على مهلك يا سيادة العقيد أحنا ملحقناش نتفرج ده فيه ناس دافعه فلوس ولسه ناس تانيه حتيجى من الشوارع اللى حولينا

-       شكلك مش غريب عليا ياجدع انت  .. شوفتك فين قبل كده .. أفتكرت انت كنت بتحضر قعدات القنابل صح

-       ماشاء الله على ذاكرتك ياباشا الا معدش فيه قنابل دلوقتى ليه

-       كلمه فى سرك العيال بتوع القنابل نقلوا نشاطهم فى سيناء احسن أرتاحنا من قرفهم .. ايه اللمه اللى تحت العماره اللى بتتحرق

-       لا ماتخدش فى بالك دى الست منيره (تعيش انت) النار فى الشقه اللى تحتيها وبتسأل الناس ريحة الشياط والدخان جايه منين

( أولادها وأحفادها واقفين فى الشارع وبينادوا عليها )

-       يا تيته يا تيته أنزلى ياتيته .. أنزل ليه .. فيه حريقه فى الشقه اللى تحتيكى .. طب وأحنا مالنا كل واحد حر فى شقته

-        ياتيته النار حتوصل عندك .. استنوا ياولاد لما ألبس الشبشب أحسن بلاط الشقه سخن قوى

-       اى حد يطلع ينزلها انتم مش معاكم سلالم علشان تنزلوها

-       للأسف العربية محجوزه لحين عبور الساده الوزراء

( مرسى يشاهدالست زوزو وهى تجرى فى الشارع بالروب الأحمر الشفاف وتصفيق حاد من الجالسين على الرصيف وتعليقاتهم.. قشطه يازوزو ياجامد .. الماظيه .. مهلبيه .. وهى ترد عليهم التحية)

-       فيه ايه يازوزو بتجرى ليه

-       عايز اشوف البت شكيره صاحبتى واخده شقة مفروشه فى العماره اللى فيها الحريقة ياعينى عليكى ياشكيره يا حبيبتى

بين ماذا ولماذا

بين ماذا ولماذا

لماذا أتركك تعيش وفى أمكانى قتلك ...منطق أمنى أسرائيلى

ولماذا تقول أنقلاب وفى أمكانك أن تقول ثوره... منطق أعلامى لم يتحقق

ولماذا تنزل المسيرات وأنت تعلم بأنه سيتم قنصك أو أعتقالك... منطق أخوانى مجنون

لماذا تدفع أكثر برغم بأمكانك أن تدفع أقل... الأوكازيون الوهمى الفسيخ قبل العيد

ولماذا تقول بأنك مصرى ..؟؟وبأمكانك شراء جنسيه أو أكتسابها بالزواج بأوروبيه أو أمريكيه

ما الذى يجبرك أن تستمع لأنسان بارد ولزج ورخم .. وبأمكانك الحفاظ على ضغطك بأغلاق التليفزيون

لماذا فقدت الثقه فى انجازات المسؤلين .. هل لأكتشافك لحجم الوعود الكاذبة أو لغلاء الأسعار ..أو كلا الأمرين معاً

لماذا أنت تعيس وقلق وعصبى ويلهج لسانك دائما بالدعاء .." بحسبى الله ونعمه الوكيل "؟؟؟؟

فى مسألة الميراث

فى مسألة الميراث

المرأة عندما يموت عنها زوجها وليس لها معاش فمن المسؤل عن الصرف عليها .. لو اِشتكت للمحكمه الشرعية أو المدنيه سيكون الأب أولا ثم الأخ ثانيا ثم العم ثالثا .. أذن للذكر مثل حظ الأنثيين شرع سماوى عادل يريد الأغبياء أن أن يهدموه وجاء من قال بأنه من أصول تجديد الخطاب الدينى أن يتم تعطيل أيات المواريث فى القرآن ومنع آيات الجهاد فى المدارس والطلاق المكتوب هو الذى يؤخذ به حتى لو قام الرجل بتطليق زوجته مائة طلقه وان يعيش معها فى الحرام طالما لم يسجل الطلاق فى السجل المدنى بالأمس تراجع محمد الباز عن كلامه وفشل بالونة الأختبار لشعب مصر المسلم بتعطيل آيات المواريث فنال ماناله من شتيمه وتهزيء مما دفعه ليعلن أعتذاره على الشاشه واليوم يخرج علينا أبو حامد الأزهرى النصرانى بمنطق غريب يقول بأن المرأه فى صدر الأسلام ليست هى المرأة اليوم فظروفها تختلف وقال أن المرأة تعمل وتكسب وتصرف على أسرتها ونسى هذا الغبى بأن السيده خديجة زوجة رسول الله عليه وسلم كانت تعمل فى التجارة وغيرها كثير من السيدات فى ذلك الوقت فهو كذاب أشر يريد أن يفرغ الدين الأسلامى من أحكامه ليصبح كدين النصارى بدون تشريع ليتك تعرض على البابا تاودرس وأنت قاعد فى مكانك المفضل فى الكنيسه أن يغير من أحكام الطلاق فى المسيحية شوف حيحصلك أيه ياااا أبن التيييت

بشرة خير

- ألو .. أنت الأستاذ صابر عبد الصبور الغلبان

- أيوه أنا - أنت حاصل على بكالوريوس تجاره فى عام 2015 - أيوه أنا - أنت مقدم طلب على عرض حال دمغه لوظيفه فى وزارة الماليه + شهادة الجامعة + شهادة ميلاد + شهاده صحيه أنك خالى من الأمراض- أيوه أيوه .. قبلت فى الوظيفه قول فرحنى - الورق بتاعك كنت حطه فى دوسيه بلاستيك أحمر - أيوه صح - أنت ساكن فى حارة أبو جاموس - أيوه فى حارة أبو جاموس نمره 7 - طيب ياسيدى أحنا هيئة النظافه لقينا ورقك فى صندوق الزباله ياريتك تيجى تاخده ومتنساش الحلاوه

كلام موزون

كلام موزون 
لوسمحت الحكومه المصرية بتعديل قانون المخدرات كطلب رئيس رابطة بائعى السجائر وعملت بكلامه أللى زى العسل الذى صرح به لوسائل الأعلام (إن نصف سكان مصر يدخنون الحشيش أى مايقارب ٤٥ مليون مواطن ومواطنه) ستحل جميع مشاكلنا الأقتصادية والعائلية والسياسية ولن نسمع عن أى خناقات زوجية أو طلاق أو خلع لأن الجميع سيصبح فى البلاله ومية فل وعشره وستتحول مواقع التواصل الأجتماعى إلى قعدة مزاج وأنس وفرح وسرور ولن يزعجوا الحكومه بأى مواضيع بعدها مطلقا و ستكون الأعتصامات لها النصيب الأكبر حول قعدات الكيف والمزاج العالى ولن نسمع بعدها عن الشرعية لأننا سنسبح جميعا فى حلة الملوخية 
أمريكا فى المركز الاول فى تعاطى الحشيش ومفيش مشاكل أى واللهى وافغانستان فى المركز الاول لانتاجه والجنيه الأفغانى فى العلالى والمغرب تانى منتج ومورد على مستوى العالم بحجم تجارة يتجاوز ال 12 مليار دولار اى ضعف دخلها من السياحة ومفيش أنظف وأشيك من الحشيش المغربى بجد بجد حاجة تفرح وتسطل فى نفس الوقت وتفوق عربى محصلش 
اعلى نسب تدخين الحشيش فى الوطن العربى فى لبنان مهلبية بالذبيب ثم يليها مصر أشطه يامعلم والغريب ان هولندا اللى الحشيش مسموح فيها تماماً هى اقل الدول اوروبيا تعاطياً
للحشيش 
فى ولاية متشيجان الامريكية القت الشرطة القبض على احد راكبى الدراجات لتجاوزة السرعة المقررة فى احد المناطق وهى 90كم بينما كان يقود دراجته بسرعة تتجاوز 130 كم وتوقيع كشف تعاطى المخدرات عليه وجد ان جسمة يحتوى على اثار من مخدر الحشيش (القنب) او الماريجوانا بنسبة 10 نانوجرام وفقاً لمعيار HTC الا ان قاضى المحكمة برأه على اعتبار ان النسبه المسموح بها تصل حتى 50 نانوجرام وان القيادة مشروعة تحت تاثير المخدر مالم تتجاوز هذه الحد 
واعتبر هذه الحكم هاماً جداً للكثير من الناس فى ولاية متشيجان يتعاطون مادة القنب لاغراض علاجية او دوائية او ما يطلق عليه ماريجوانا طبية medical marijuana
طبعاً عندنا سواقين الميكروباص والتكاتك كل واحد فيهم لو مشربش عشرتاشر سجارة حشيش على بانجو وضرب شريطين برشام على الصبح ميقدرش ينزل يسوق ويقلب التوكتوك خمس ست مرات
أحنا في مصر مش محتاجين ترخيص لتعاطي المخدرات بعد 25 يناير و 30 سونيا
الناس بتشرب مخدرات عيني عينك دلوقتي فى أى مكان وكثير منا مسطول بالأيحاء وبالتالى لا يحتاج أن يشترى مخدرات فيكفى أن يجلس أمام التليفزيون بعد العشاء ليغرق فى عالم من الهلوسات والخزعبلات تغنيه عن أوقية حشيش مغربى مفتخر ... أيام سووووده 
ســـــــــــــرررررررررر خيــــــــــــررررررررر