حكاية حماده ومرمر الواد حماده أبن أختى عمره 11 سنه شقى جدا كحال أبناء هذا الجيل التليفزيونى ولكن شقاوة بذكاء وهذه عينه من هذه الشقاوةالمخلوطه باللماضه تجعلنا نتذكر طفولتنا البريئه شوفت يا أونكل الأعلان المتعلق على باب العماره أنا : شوفته ..مين أللى معلقه يا حماده حماده: (مرمر) أللى فى شقه 10 فى الدور التانى أنا : مين مرمر دى ياحماده حماده : البنت الحلوه المدلعة بنت أونكل (محب) أللى عامله شعرها ديل حصان وواخده فى نفسها قلم وما بتلعبش مع حد أنا :عرفتها بس البنت دى حلوة قوى ياحماده حماده : حلوة بس أليطه ولو حد كلمها ماتردش عليه تستاهل أهى قطتها ضاعت وحتموت نفسها عليها وأيه معلقه أعلان فى كل حته أللى حيلاقى القطه حياخد 500 جنيه وموزعة صورة القطه شوف يا أونكل أنا : دى قطه شيرازى وشكلها جميل قوى بس 500 جنيه كتير قوى ده الواحد يروح يشترى أختها ب300 جنيه ويكسب 200 جنيه حماده : قولنا لها كده ..قال أيه هى عارفه قطتها كويس ومدرابها على حاجات معينه مفيش قطه تانيه تعرف تعملها بتقول أن بوسى ليها شخصيه ما فيش قطه زيها أنا : أكيد مرمر زعلانه عليها قوى حماده :دى مموته نفسها من العياط وأول مرة تقف معانا وتتحايل علينا أن ندور معاها على القطه ...قولت لها أنا عارف هى فين القطه بس مش حقولك إلا لما تتحايلى عليا شويه ..زقتنى فى صدرى ومشيت أنا : هو أنت تعرف مكان قطتها صحيح حماده : يعنى عندى معلومات تفيد أنا : طب وساكت ليه ياميدو حماده : مش قولت لك يا أونكل زيزو أن البنت زقتنى فى صدرى ومشيت وما عبرتنيش ....لالا مالهاش حق (جرس الباب ..قوم شوف مين ؟؟) ده أونكل محب وبنته مرمر ياعمو أهلا وسهلا أتفضلوا محب : أنا آسف للأزعاج ..بس حماده عايز اشتكيلك منه أنا : خير عمل أيه ..أكيد بخصوص قطة مرمر ..لسه كان بيحكيلى دلوقتى محب يوجه الكلام لحماده : بقى تعرف مكان القطه ومش عايز تقولنا حماده :مش حقول ألا لما مرمر تتأسف على ألا عملته فيه مرمربألاطه وهى تنفخ : أف آسفه حماده : شايف ياعمو بتقول آسفه أزاى طب مش قايل أنا: وبعدين معاك ياحماده خلاص مرمر قالت لك هى آسفه عايز أيه تانى حماده : تبوس على راسى وتلعب معانا زى كل الولاد مرمر : ما بلعبش مع صبيان حماده : أنتى أصلا مابتلعبيش ولا مع صبيان ولا بنات محب : خلاص حخليها تلعب معاكم وقومى بوسى على راسه خلينا نشوف القطه فين مرمر وهى تتأفف : وآدى راسك أهه خلصنا (تسحب رأسه بعنف وتلطع عليها قبله بارده وهى تدارى غيظها منه ) حماده يجلس ويضع رجل على رجل وتبدو عليه علامات الفخر والأنتصار وينظر بتشفى إلى مرمر شوف يا أونكل فيه أحتمالين ..الأحتمال الأول أن هى هربت مع كلبظ والأحتمال التانى يكون حد أخدها وباعها أنا : مين كلبظ ده أللى هربت معاه بوسى حماده : كلبظ ده أكبر قط فى المنطقة كل القطط بتخاف منه حتى الكلاب قط مجرم أول مايمشى فى الشارع كل القطط تجرى وتستخبى وياويله أللى يتلكع تلاقيه هجم عليه وقفشه من رقبته ومطيره فى الهواء وأى قطه نتايه ما تقدرش تأخرله طلب ..مش قطتك نتايه برضه تلاقيها ماشيه ورا كلبظ مرمر : فشر أنا قطتى متربيه محب : طب كلبظ ده نلاقيه فين ياسى حماده حماده : مفيش مكان محدد بيقعد فيه بس كل القطط النتايات تلاقيهم قاعدين حواليه ما يمشوش ألا لما ينام ولما يصحى يعوى زى الديب تلاقيهم جم جرى يقعدوا حواليه تلاقى بوسى أكيد قاعده عنده مرمر : المجرمه بس لما أشوفها محب : طب ما تقدرش أنت وصحابك تدوروا عليها وتشوفوا مكانها فين مع سى كلبظ ده حماده يشعر بالأهميه : شوف ياعمو القط ده وحش وشرانى وماحدش يقدر يقرب ناحيته ده مره الولاد حبوا يعاكسوه جرى ورانا لحد مالواد (بيسو) أتكعبل ووقع على الأرض وهو بيصرخ يقوم كلبظ يقعد يشمشم فيه ويقوم عامل عليه ببى ومن ساعتها بنخاف منه ليعملها علينا أنا أضحك على حكاية حماده : ده قط أبن كلب قوى مرمر وهى قرفانه :يععععععع..عارف ياحماده لو عرفت تجيب بوسى حنبقى أصحاب وألعب معاكم حماده : أنا ما ضمنش كلبظ حيعمل فينا أيه ..بس اوعدك ياعمو أن حجيبها حجيبها حتى لو عمل فينا أيه ينطق ثلاثتنا (أنا ومرمر ومحب ) يعععععععع قوم الله يقرفك وبعد اسبوع شوفت يا أونكل زيزو أخيرا قدرنا نجيب بوسى من عند كلبظ أنا : برافو أزاى حماده : أول ماشفناها ماشيه وراء كلبظ جرينا وراه بالطوب فهرب فقمت شايل بوسى ..زى ماتكون ما صدقت وجريت بيها على مرمر وكلبظ طار ورايا فقفلت باب العماره وطلعت أجرى على السلم وسلمتها لمرمر وأنا نازل لقيت كلبظ فى وشى وهو بيزمجر وقام ناطط عليا وأنت عارف الباقى أنا: يععععععععع قوم ياواد من قدامى راحية الببى بتفحفح منك حماده: ست مرمر مارضيتش تدينى غير خمسين جنيه بس قال أيه قطتها طلعت حامل ..طب وأنا مالى أنا : صحيح وأنت مالك ..الحق على قطتها قليلة الأدب ..قوم ياض أحسن راحتك لا تطاق ههههههههه هههههههههه هههههههههه
المعلم (كفته) يرث الفتونه عن معلمه السابق (كرشه ) عقب مصرعه فى أحدى الأفراح ..يعترض أهل الحارة فى بداية الأمر وخشية أن يفتك بهم كفته ورجالته آثروا السكات وأنشغل كل واحد منهم بأحوال معيشته وتركوهم يعيثون فى الحارة الفساد حتى أصبح كفته ورجالته وعياله هم المتصرفين فى شئون الحارة بأكملها فأستولوا على جميع المحلات والأحواش والتكيات وطردوا أصحابهاخارجها..وفرضوا عليهم الأتاوات
وفى قاعدة صفا بين المعلم وزوجته المصون (غندوره ) دار هذا الحديث
غندوره : بقول أيه يامعلم أحنا كبرنا فى السن والواحد منا ما يضمنش الموت من الحيا..آديك شوفت أللى حصل لمعلمك كرشه قتلوه الأوباش فى الفرح وراح فيها
كفته : عشان كده أنا لا بروح ولا أفراح ولا موالد ورجالتى حواليه فى كل خطوه وبعدين أنا ماكبرتش أنا واخد بالى من صحتى كويس
غندوره : يامعلم مصيرنا كلنا نموت وحنسيب اليغمه دى لمين..دول حيعلقونا أنا وولادك من رجلينا من بعدك .
كفته يسرح قليلا :لك حق يا غندوره..بس أنا سايب لكم قرشين حلوين يكفوكى ويكفوا سابع حفيد تعيشكوا خمسمائة سنه قدام عايزين أكتر من كده أيه !!
غندوره : خلى( جعلص) بعد عمر طويل يمسك مكانك الفتونه
كفته : أشمعنى يعنى جعلص ما يمسكهاش ليه (الهباش) وهو الكبير ولا علشان أبن ضرتك
غندوره: هو الهباش حد طايقه ومش فاضى غير للهبش والأفترى على خلق الله.. أنما جعلص أنا أللى مربياه على أيدى ولا.. ولاد الذوات ..لو مسك الهباش حيكون مصيره زى مصير كرشه الله يرحمه
كفته : بس جعلص مش وش فتونه ومالوش فيها والواد طرى وما تمرمطش يا غندر
غندوره: يعنى كنت أنت يعنى كان ليك في الفتونه لولا المعلم كرشه خدك فى آخر أيامه دراعه اليمين علشان كان مستأمنك ولما مات وافق المعلمين والصبيان بتوعه أنك تقعد على كرسى الفتونه علشان ياخدوا راحتهم فى النهب والسلب بعد ما كان شكمهم كرشه حننسى ولا أيه
كفته : بس أنا شربت الشغلانه على أصولها من المعلمين
غندوره : خلاص تخلى جعلص يتعلم على أيديهم ولما يأذن ربنا الواد يبقى جاهز يمسك مكانك
كفته:ماشى ياغندوره بس أياك ما يكسفناش
غندوره : خلى بس أبو عرام وهيصه وأبوجعوره وأبو جبل يعلموه ويفنطوه وحتشوف النتيجه
كفته : طب نعملوا أيه مع الهباش لو زعل
غندوره: يزعل ولا يتفلق مش كفايه أللى عامله فى الناس وكل يوم يجبلنا نصيبه ..جوزه بدل السرمحه وقلة الحيا ينشغل شويه بعروسته
كفته: ماشى كلامك يا غندورتى ياللى كل يوم بيعدى بتصغرى سنه
غندوره: كوفتتى بلاش كده أحنا كبرنا على الكلام ده
الحلقة رقم (2)
كفته: أيه الأخبار يا جعلص المعلمين عاملين أيه معاك
جعلص: فل الفل يااا به ..بنزل معاهم على القهوة وحفظونى كلامهم وعلمونى أزاى أزغر للناس وأوريهم العين الحمراء وحفظت الشغلانه عن ظهر قلب وبقيت أحسن منهم كمان
كفته : عال عال
جعلص : بس ليه طلب ياسيد الرجاله..قول
..أنا شايف أأن المعلمين فاردين قلوعهم وممكن يبوظوا الشغلانه وكاسرين عينا ونازلين نهب فى الخلق لحسابهم ..أنا بقول كفايه عليهم كده ونقلبهم ونخلص منهم وأنا مجهز شوية صبيان يقدروا يقوموا بشغلهم على أحسن وجه ويبقى ضربنا عصفورين بحجر..نخلص من بلطجتهم ونجيب ناس نعرف نمشيهم على مزاجنا
كفته:أنت وشاطرتك بقى ده أول أمتحان ليك فرجنى حتبيع الباقى أزاى
جعلص: أمتحان صعب بس بعون الله حفرجك أزاى حبيعهم وبأحسن سعر من غير ماحد يزعل..نشوف
الأجتماع
يستطيع جعلص أن يتخلص من المعلمين الأربعه بعد أن دس لهم مسروقات ومخدرات ويفضحهم أمام أهل الحارة فيطلب منهم الجلوس فى بيوتهم حتى تمر هذه الأزمه ومع مرور الوقت يفقدوا سلطاتهم وسطوتهم بعد أن وضع على رقابهم سيف السجن أو الطرد من الحارة
ويعقد جعلص أجتماع مع الطاقم الجديد الذى أختاره ليبحث معهم طريقة لبيع باقى الكراكيب بأحسن سعر
الفوريجى : سيبنى يامعلم جعلص أنا والقفاص نفكر فى الموضوع ده ونرد عليك بكره بعد ما نظبط الطاسه ونمخمخ
جعلص: ماشى يارجاله نشوفكم بكره
يعكف الفوريجى والقفاص على المخمخه فى قاعدة الكيف ليخرجوا بحل يبسط جعلص ويرضى عنهم المعلم كفته
القفاص: بقالنا ساعتين بنشد ونكركر ومفيش ولا فكره نحل بيها الموضوع أنا دماغى تقلت ومش قادر أفكر..فكر أنت لوحدك
الفوريجى يصرخ بأعلى صوته : وجدتها وجدتها
القفاص وهو مندهش : أيه هى أللى وجدتها يا أبن المجنونه..يظهر الحشيش لطشك أنت كمان
الفوريجى يهب واقفا ويرفع يده لأعلى : مافيش غير الشخرمون
يقع باقى الحشاشين من كثرة الضحك ويغنون : الشخرمون الشخرمون
أصفر..أحمر ..أزرق..الشخرموووون
بعد أنتهاء قاعدة الأنس يتساند القفاص على الفوريجى ليعودوا لبيوتهم
على وش الفجر
القفاص:بقول أيه يا فوريجى برضه ما لقناش حل لموضوع جعلص فى البيع حنقوله أيه
الفوريجى :ماهو أنا قولت لك الحل ..أنت أتسطلت ولا أيه
حل أيه أنت قولت حاجه ..الشخرمون هو الحل
..شخرمون أيه ألا أنت جاى تقول عليه ..مش تفهمنا معنى الشخرمون
.. بكره تعرف نام ما تقلقش ..أنا الفوريجى ملك الشخرمه
القفاص: ياخوفى لنتشخرم كلنا..تصبح علىشخرمونك
الحلقة رقم (3)
الخطـــــة
جعلص: عملتوا أيه يا معلمين؟؟
الفوريجى : كل خير بعون الله ..شوف يا سيدى سمعت حكاية النصاب ..أللى قاله السلطان عايزك تفصلى بدله يشوفها أبن الحلال وما يشوفهاش أبن الحرام..غاب كام يوم ورجع ومعاه أتنين مدين أيديهم لقدام بيمثلو أنهم شيلين البدله عليها..وقال له البدله جاهزه يامولاى يشوفها أبن الحلال وما يشوفهاش أبن الحرام ومر بها أمام الوزراء والحاشيه ويسألهم رأيهم فيمدحون فى صنعها وجمال ألوانها وخافوا أن يقولوا الحقيقه لأتهامهم بأنهم ولاد حرام والسلطان يتعجب ويشك فى نسبه ولكنه يساير الجميع ويلبس الوهم والأونطه
فكرة الحدوته أوحت لى بالحل
طب أزاى ..شوف ياسيدىخلى النجارين من بكره يعملو لينا صندوق كبير قوى ونحطه فى وسط الحارة ومقفول من كل حته ونكتب عليه الشخرمون للبيع وسيبوا الباقى عليى أنا
جعلص : مش فاهم عايز أيه
الفوريجى : لما يكون عندك حاجه ومش عارف تبيعها بسعر كويس تعمل أيه ؟؟ القفاص: نعمل لها أعلان وبروبوجنده فى كل حته وفى كل ساعه.. الفوريجى :طيب عايز تزود من قيمتها وترفع من سعرها
...نخلق لها منافسين عشان يعلوا السعر زى ما بنعمل فى أى مزاد
طب لو البضاعه أتهرشت ومالهاش سوق
...يبقى نغير أسمها وندلل عليها تانى
جعلص: أنا مش فاهم حاجه يا نصابين..عايزين تبيعوا البضاعه ولا الشخرمون أللى بتقولوا عليه ده
الفوريجى: يامعلم جعلص صبرك علينا شويه وولع لنا فحميتين البضاعه الراكده أللى عندك أسمها من النهارده الشخرمون وحتفضل موجوده عندك لحد ما نخلص البروبوجنده وبعدين حتشوف أللى حيحصل
جعلص : عليى النعمه ما فاهم حاجه ؟؟
...معلش بكره تفهم ..والدك كان كده برضه أول ما قعد على كرسى المعلمه ..ودلوقتى بقى مدرسه لوحده
حنبدأ من بكرة الشغل ..حينزل القفاص يطبع شوية أعلانات ويوزعهم ويلزق شويه على الحيطان وأنا حجيب عربيات نقل وألم فيها الصبيانبتوعنا والهبيشه والحراميه ومعاهم مزيكة حسب الله ونلف الحته والحتت أللى جنبنا لنبدأ حملة الدعاية للشخرمون
جعلص: طب أنا أعمل أيه
الفوريجى : أنت بقى تلبس وتتشيك وتقعد على القهوة وتستنى الناس أللى حبعتهملك للتهنئه بحصولك على الشخرمون
جعلص: لو الناس سألونى أيه هو الشخرمون أرد أقول أيه
الفوريجى : بسيطه عليك بس تبتسم وترد ..الشخرمون هو الشخرمون
عمرك فى حياتك شوفت شخرمون ..بكرة تعرفوا قيمته لما تجربوه ..بس ..وحيوقف جنبك ( الأكسلنس) حيرد على كل الأسئله وأنا حرسيه على الدور ..وأوعى حد يعرف أن الشخرمون هو البضاعة الراكده فى المخزن..أستبينا..بالأذن عشان ورانا شغل كتير قوى
اليوم الأول للدعايه
تصحو الحارة على صوت زفة الشخرمون ومكبرات الصوت بالنداء على الشخرمون الذى سيصل بعد ثلاثة أيام
عدلات: شوفتى ياأم حسين الشخرمون ماحدش عارف أيه هوه.. الدلعدى أبو حسين بيقول ده علاج جاى من بره للرجاله
أم حسين : ياختى من بؤك لباب السما..خلينا نشوف لنا يومين قبل ما الراجل يودع
جاره أخرى تطل من الشباك : لأ ياختى أسمالله عليكى ده بيقولوا أنه علاج للستات أللى ما بتخلفش.. بلا نيله هى الحاره ناقصه عيال
..وفيه ناس بيقولوا أن دى معونة أمريكانى ..لبن بودره وزبده صفراء حيوزعوها على أهالى الحارة
..أنا سامعه الواد دقدق أمبارح بيقول أن دى صفقة توكتوك جايه من بره حيوزعوها على الشباب بالتقسيط المريح
يرتفع صوت الميكروفون والفرويجى ينادى : ياله ياشابه ياله يا صبيه الشخرمون وصل ياناس ياعسل ..ورقصنى ياجدع
وتظل الحارة فى حيص بيص ولم ترسى على ماهية الشخرمون الموجود طرف المعلم جعلص وينادى منادى بأن جعلص أبن المعلم يقوم بتوزيع الشربات والحلوى على القهوة بمناسبة حصوله
على توكيل الشخرمون
وتخرج الحارة عن بكرة أبيها لتشرب الشربات ويهنئون جعلص ويسألوه عن الشخرمون وهو واقف يبتسم ويسلم على أهالى الحاره بحراره ويقبلهم ويقبلوه والأكسلنس يتولى الرد على الأهالى
يطل المعلم كفته من الشباك وهو يتعجب : هو فيه أيه ؟؟..مبروك يا معلم كفته على الشخرمون ..الله يبارك فيكم ..شخرمون أيه الناس أتجننت ولا أيه ..أبعتوا هاتوا جعلص من على القهوة
بيقولك حيخلص أللى فى أيده ويجيلك يامعلم أستريح أنت بس
هى فين غندوره ؟؟ غندوره بتلف على البيوت وبتسلم على الستات
يا نهار أسود تكونش الوليه أتجننت وعايزه تتجوز الشخرمون وتقلبنى هى وأبنها..يصرخ كفته ولا أحد يسأل فيه ويتلقى التهانى بقرب وصول الشخرمون وهو فى حالة توهان
الحلقه رقم (4)
المعلم كفته يعرف الغرض من هذه الخطه ويباركها وغندوره تشارك فى الدعايه وبعد ثلاثة أيام يصل الصندوق الضخم فى الليل والحارة نائمه ويوضع أما بيت جعلص وفى الصباح يلف الناس حول الصندوق وهم يتعجبون وحوله صبيان المعلم يحرسوه ويمنعوا الناس من الأقتراب منه ولكن التجار كان لهم رأى آخر
أجتماع التجار
شيخ التجار: أحنا النهارده مجتمعين عشان نشوف حل فى موضوع الشخرمون أللى عايز يبيعه المعلم ..الراجل بعت لى وطلب منى أن كان لكم رغبه فى الشراء فأهلا وسهلا ..مش عايزين نرد عليه وهو حيبيعه بمعرفته
زغلول الملحلح :ياشيخنا أحنا مش عارفين أيه هو الشخرمون ده
هل هو أكل ولا شرب ولا لبس ولا دواء ولا بلاء أزرق..فيه حد يشترى حاجه وما يشوفهاش يا ناس؟؟
شيخ التجار: الشرط الأساسى للبيع الموافقه الأول على الشراء وأللى حيرسى عليه الشخرمون حيدفع رسم معاينه وتأمين 1000 دينار وأللى عايز يخش يسجل أسمه عند الكاتب ويدفع التأمين
(همهمه بين التجاروتنتهى برفضهم الصفقه قبل المعاينه وبدون تأمين )
ويصل رد التجار لجعلص ويطلب حضور الفوريجى والقفاص لبحث الأمر معهم
الفوريجى : أنا عارف يا معلم أن التجار حيرفضوا بكرة تشوف أن ماكنوش ييجوا يتحايلوا عليك ما بقاش أنا الفوريجى
جعلص:حتعمل أيه يا فالح
..بكره حنعلن عن المزاد العلنى لبيع الشخرمون وحينزل راجالتنا لشعللة المزاد وحنبعت نجيب تجار من بره الحارة لينافسوا فى المزاد من غير ما يشتروا ونأبجهم بعد ما نبيعه..ماشى يا فوريجى
مزاد الشخرمون
يقوم الفوريحى ورجالة المعلم بالدعايه للمزاد ونشر الشائعات بأن أللى يشترى الشخرمون ياسعده ويا هناه..حيكسب من وراه الملايين وفيه تجار كبار بينافسوا بعض على شرائه ..وتنعقد جلسة المزاد وتزدحم الحارة بالتجار من كل ناحية وصوب ويصل الخبر لشيخ التجار فى الحاره فيجمع التجار ويحضر المزاد
أبو دومه يدلل على المزاد : آلا أونه آلادوه آلا ترى ..مين يزود حنفتح المزاد 10آلاف دينار ..20 ألف ..50 ألف المعلم برطوشه 100ألف
شيخ التجار: شايفين يا تجار الحته الشخرمون حيطلع بره وأنتم واقفين تتفرجوا ..طب والعمل يا شيخنا ..من حقنا نوقف المزاد فجحا أولى بلحم توره ولا أيه يا معلمين ..أوقف المزاد يا شيخنا ونتفاهم مع جعلص ربنا يهديه
شيخ التجار باعلى صوته : أوقف المزاد.. أوقف المزاد
أبو دومه يستمر ولا يعيه أى أهتمام ..مين يزود 700 ألف عند المعلم أبو خطوه
شيخ التجار يقترب من جعلص : أوقف المزاد يامعلم أحنا ما أتفقناش على كده ..أى مزاد لازم يكون تحت أشرافى أنا ولازم تجار الحته يشتركوا فيه أنا بأعترض وحبلغ المعلم كفته ليبقى الحكم والفصل بينا
جعلص: أوقف المزاد يا أبو دومه
الفوريجى : ما ينفعش يا معلم لازم نكمل لحد ما نشوف الشخرمون حيجيب كام
الأكسلنس : حنقف عند المليون دينار ونستنى لبكره لنفتح المزاد على أعلى سعر
شيخ التجار : أوقف ونروح للمعلم كفته يحكم ما بينا
الحلقة رقم (5)
قاعدة الترضيه
فى منزل المعلم كفته يجتمع مع التجار وشيخهم لبحث شكواهم فى عدم قانونية المزاد لبيع الشخرمون دون موافقاتهم
المعلم كفته يفتتح الجلسه: بسم الله الرحمن الرحيم سمعونا الفاتحة بالصلى على النبى..نسمع شيخ التجار
شيخ التجار: بالنيابه عن نفسى وعن باقى طايفة التجار بنقدم لمعلمنا كل الحب والتقدير وندعوا له بطول العمر والصحة والعافيه ..
الموضوع بيتلخص فى كلمتين على أحقية تجار الحارة فىالمشاركة فى المزاد ويكون لهم الأولويه فى عقده بدون دخول تجار من بره وأللى حصل يا معلمنا أن المزاد أتعمل من غير رغبتنا ودخلوا فيه ناس من بره عشان كده أحنا بنعترض على أللى بيحصل والأمر ليك يامعلم يا كبيرنا
يتدخل شيخ التجار : قلنا أن أحنا لازم نشوف ونعاين البضاعة وأعترضنا على رسم المعاينه الـ1000 دينار وقلنا نشوف الأول ونقدر الثمن وبعدين نشترى
الفوريجى : العرف أللى سايد فى حتتنا أن لازم يدفع رسم معاينه وجدية الحجز أومال حنجيب ثمن الدعايه ومصاريف الرجاله منين
شيخ التجار : أيوه ده عرف حارتنا بس فى حالة الشخرمون أللى مش عارف حد فى الحته أيه هو؟؟.. يبقى لازم نعترض ويعرفنا البايع أيه هو الأول
كفته : ليهم حق يا فوريجى يعرفوا أيه هو الشخرمون ..أتفضل فهمهم
الفوريجى : ده سر يا معلم ما أقدرش أقوله ألا لما يسمحلى المعلم جعلص ولازم نتأكد من عدم أذاعة السر ده بره
جعلص: ما نقدرش يا معلم نقول سر الشخرمون ألا ما بعد التجار مايحلفوا بأنهم ما يذيعوش السر وكمان يدفعوا ضمانه ماليه عن كل واحد يدخل ويطلع عليه.. وكمان عايزين تعويض على المزاد أللى باظوالتجار همه السبب فيه
كفته : كلام معقول برضه ..قولت أيه يا شيخ بندر التجار
شيخ التجار : أدينى فرصه يا معلم أتكلم مع التجار وأشوف رأيهم أيه
كفته : رفعت الجلسه على أن تعقد بعد ساعه ..نزلوا الشاى للرجاله
( يلتف التجار حول شيخهم ويتهامسون ويتنا قشون حول هذا الوضع العجيب فمنهم من غامر بالدخول للمعاينه ومنهم من رفض دفع تعويض المزاد والأنسحاب من القاعده ويغور الشخرمون وبناقص هذه الصفقه الغامضه وفى النهايه أتفقوا على رأى وسط يقرب بين وجهات النظر المختلفه )
كفته : فتحت الجلسه أتفضل يا شيخ بندر
شيخ التجار : من بعد أذن المعلم أن يتسع صدره لينا لأننا أولاد حته واحده وما يرضيش حضرتك الأذيه والخساره أحنا بنعرض حل وسط
أحنا مستعدين ندفع رسم المعاينه ليكون 500 دينار من كل تاجر وندفع تعويض10 آلاف دينار عن وقف المزاد أونشترى الشخرمون كله على بعضه أوكشه واحده وبدون معاينه بـ 40 ألف دينار ويابختك يا أبو بخيت..ده طلب التجار وعشمنا كبير فى المعلم وابن المعلم
الفوريجى :ماينفعش يامعلم العرض ده المزاد وقف عند مليون دينار ييجى الشيخ بندر يعرض 100 ألف دينار بس ده ما جابش همه يا معلمى..حرام كده بجد
الشيخ بندر : أنا ما جيبتش سيرة 100 ألف
كفته : وأنا قولت70 ألف بس ويتشال أوكشه واحده وبدون معاينه ..وخليها علينا المرة دى يا فوريجى
جعلص : أمرك يا معلمى كله عشان خاطر تجار حارتنا وولاد حتتنا
التجاريهتفون يعيش المعلم جعلص أبن المعلم كفته
الحلقة رقم (6)
الفراخ والبيض الهندى
جعلص: شوفت ياابه بعنا الكراكيب أللى باقيه بـ70 ألف دينار وتجار الروبابكيا كانوا عايزينهم ب2000 بس
كفته: شاطر يا جعلص بس ربنا يستر لما التجار يكتشفوا المقلب أللى شربوه حيعملوا أيه
جعلص : ما تخافش ياابه عليهم.. دول ولاد حنت بكره يبيعوه بضعف تمنه وحفكرك
( وتمر سنه ولم يتمكن التجار ببيع كراكيب الشخرمون وعرفوا بأنهم وقعوا ضحيه لعملية نصب على أعلى مستوى حاك خيوطها المعلم وصبيانه وعلى رأسهم الفوريجى فقرروا فى مجلسهم رد القلم قلمين ليذوق المعلم من نفس الكأس التى شربوا منها والعين بالعين والبادى أظلم فدعوا (الهباش) أبن المعلم الأكبر لمجلسهم وأغدقوا عليه الهدايا
والأموال ليستميلوه لجانبهم ويشعلوا فيه روح الطمع والجشع التى يتمتع بها
الهباش: أيه الفلوس والهدايا دى كلها يا معلمين
شيخ التجار : ده نصيبك يا معلم من أرباح الشخرمون..لأن أحنا عارفين أنك ماخدتش حاجه من المعلم جعلص فى البيعه
الهباش ينتشى ويفرح بالفلوس : فيكوا الخير يارجاله ..بس أول مرة تعملوها ..تدفعوا كده برضاكم ومن غير مناكفه..مش غريبه دى
شيخ التجار : ما غريب ألا الشيطان..حقك دايما محفوظ وفى أى وقت
..صفقة أيه..صفقه كبيره حنستوردها من بلاد بره بس طالبه فلوس كتير قوى لمينا الفلوس أللى معانا كلها ومش مكفيه قولنا نستلف الباقى من (رحومه) المرابى ..الراجل الندل لما عرف بحكاية الصفقه رفع سعر القرض وقال أيه ياخد على الدينار ..دينار ونص والمليون دينار يرجعوله عشره مليون ..راجل جشع وما عندوش ضمير حاولنا معاه كتير وراكب دماغه..آه صحيح حنكسب من وراها كتير بس بينى وبينك
كتير قوى وأستغلال ما بعده أستغلال
الهباش : صفقة أيه أللى تدفعوا فيها الفلوس الكتير دى
شيخ التجار يقترب من الهباش ويهمس فى أذنه:الفراخ والبيض الهندى
فى عرضك ما تجيبش سيره لحد..ده سر مستأمننى عليه التجار بعدين أخوك جعلص يسبقنا وياخده لحسابه
الهباش: سرك فى بير ياشيخنا..أنما قولى حتكسبوا منها كام
..حنكسب الطاق عشرين ومضمون ميه الميه وفاضل عشر تيام وتضيع مننا الصفقه كلها
يسكت الهباش وتتنازعه روح الطمع والجشع : عايزين كام
..بفلوسنا نحتاج مليون ..ومن غير فلوسنا الصفقه تتكلف 4مليون
لجعلص من غير ماخد حاجه يبقى مش كتير لما آخد مليون دينار أشتغل بيهم وأرجعهم ليكم الضعف
غندوره : وأيه ضمنا أنك حترجعهم
الهباش : عندكم أطيانى والوكاله والبيت ثمنهم أكتر من 3مليون
غندوره : هات ورقهم وتنازل عنهم وخد المليون أللى أنت عايزها ولما ترد الفلوس تعالى خد ورقك وحالك ومحتالك
الهباش : كنت عارف أللى حتقوليه يا مرات أبويا وعملت حسابى والورق أهه أيدكم على المليون
كفته يصعب عليه الهباش : خلى ورقك معاك وأديله أللى هو عايزه يا غندوره وأنا أللى ضامنه ..بس يامعلم ..مفيش بس أللى قولته يتنفذ
( يحصل الهباش على المليون دينار ويسارع بدفعهم لشيخ التجار )
شيخ التجار : أنت كده معانا بالنص على المكسب والخساره ..موافق على خيرة الله كلها شهر والمركب توصل بالفراخ والبيض الهندى
ويمر الشهر ولم تصل الصفقه ويقلق الهباش
الهباش : أيه أخبار الصفقه يا شيخنا
..والله أنا مش عارف أقول لك أيه يا هباش يا خويا نصيبه وحلت علينا
المركب غرقت فى البحر وراحت فلوسنا وفلوسك أستعوض ربنا
الهباش : نقبض التأمين
..ما كناش مأمنين عليها ودى النصيبه الأكبر مش عارف التجار حيعملوا أيه بعد ماراحت فلوسهم وبقوا شحاتين لنا رب أسمه الكريم
الهباش : يانهار أسود فلوسى وفلوس المعلم راحت أقول لهم أيه دلوقتى ..قول لهم قضى ربنا والتجاره مكسب وخساره
(يخرج الهباش وهو يضرب كف بكف ويدخل بيته ويغلق بابه عليه وعكف فى غرفته حزين على تلك الخساره الفادحه ..ويعلم المعلم كفته بما ألم بالهباش فيحزن هو الأخر على ماله وعلى ولده الذى أكتئب ولا يتحدث مع أحد ..يزداد المرض على كفته ويخفى سبب مرضه عن أهل الحاره حتى يتوفاه الله فتقوم غندوره وجعلص بدفنه سرا فى مقابر الصدقه ويجمعوا أموالهم وكل ماغلى ثمنه وخف وزنه ويهربون من الحارة تحت جناح الليل ولا من شاف ولا من درى )
وتمر الأيام ولم يظهر جعلص ولا غندوره فيذهب الفوريجى إلى بيت معلمه ولم يجد أحد ويعلم من الخدم بأنهم هربوا من يومين بعد وفاة المعلم كفته ..ينطلق الفوريجى ألى بيوت أصحابه القفاص والأ كسلنس وأبو دومه ويعلمهم بالخبر فيقوموا بلم عزالهم ويهربوا هم الأخرين من الحارة ..ينتشر الخبر كالنار فى الهشيم فيخرج الغوغاء ورجال الحارة ونسائها ليهجموا على مخازن التجار فيجدوها خاويه على عروشها فيكسروا مخزن شيخ بندر التجار فيجدوا صندوق الشخرمون وبه البقيه الباقيه من بضاعة راكده وكراكيب لا تسمن ولا تغنى من جوع فيحملوه ويخرجوا به إلى الساحه وهم يهتفون الشخرمون الشخرمون
الواد الروش تحقيق صحفى الواد الروش هو موضة هذا العصر والعصور القادمه ..هو هدف كل البنات الروشه وغير الروشه يتفاخرون بمعرفته فى قعداتهن ويحسدن بعضهن البعض على مانالته صحباتهن من الروشنه قعدت أسأل نفسى ما معنى كلمة روش فلم أجد لها معنى فى قواميس اللغه المتعارف عليها ولكن وجدتها فى المعجم الوجيز الصادر لطلبة المدارس بجمهورية مصر العربيه روش :(روشا )بمعنى خف عقله..وهى روشاء والجمع روش بضم الراء والشين يعنى الولد الروش والبنت الروشاء ..عيال مخها طاقق وشبه مجانين ..فقمت بمواجهة بعض الشباب والشابات بهذا المعنى الوارد فى القاموس فقاموا بتصحيح معلوماتى الأكاديميه ويضعونى على الطريق الصحيح للروشنه وسنعرض عليكم حديث ومناقشه روشه مع واد روش وبنت روشاء ونشوف ردودكم الروشه الحلقة الأولى حمــــاده الروش أنا: مساء الخير يا أستاذ حماده هو: مساء العندليب على زيزو العجيب أنا: سألت فى الجامعة على أروش واحد يعرفوه..الكل أجمع على أنك أكبر روش هنا هو بثقه: ده شيئ طبيعى أنا : عايزك تفتح لى قلبك وتقولى بصراحه أزاى وصلت لهذه المرتبه العاليه من الروشنه هو :أنت عايز تبقى روش أنا : ياريت ..نجرب هو أحنا خسرانين حاجه هو : بس الكلام ده حيكلفك شويه أنا : وماله أنا معاك من جنيه لعشره هو: تعالى نقعد بعيد عن الجامعه فى القهوة أللى ورا بتاعة الروشين أنا : قشطه برضه هو : قشطه !! أنت حتبتدى روشنه من قبل ما تتعلم .. كويس أنى عندك مبادئ ..أطلب لنا أتنين شاى وتفاحه أنا بسذاجه : تفاحه واحده بس ..ده أنت مقامك 2كيلو تفاح هو وهو يضحك : ههههههه ده أنت زبون سوقع ..شيشه تفاح ياعم زيزو ما ضحكش علينا الروشين مش شامم ريحة التفاح مفحفحه أزاى فى القهوة أنا : ما علينا نرجع لموضوعنا ..أزاى بقيت الواد الروش بتاع الجامعه بدون منافس هو : شوف ياسيدى الموضوع عايز شوية فقدنه على شوية طناش وشوية منظره يعنى تسوق الجنان ع الشيطنه أنا : الفقدنه والطناش موجودين مش محتاجين لدروس أيه بقى المنظره هو : شكلك ..لبسك ..عربيتك ..طريقة كلامك ..عدد البنات والولاد حوليك يعنى تبقى الواد القرن أنا : واحده واحده ياروش وفسر لى كل واحده من دول الشكل الروش هو : بص كده لشكلى وأنت تعرف..شوف أولا شعرى عامل أزاى أنا : منظرك ما حلقتش بقالك سنه وموقف شعرك بالجيل زى القنفذ هو : دى موضه ياجاهل ..أنت مابتشوفش تليفزيون ..ده شكل الشباب المتحرر فى أوروبا وأمريكا أنا :و دقنك مربيى حته منها تحت شفتك ..لا مؤاخذه عامله زى بتاعة الجدى أللى عندنا فى البلد هو : دى العلامه المميزه لفريق الجديان الفرنساوى الغنائى أنا : يعنى أنا مش غلطان ..طب وفردة الحلق الوحيده أللى فى ودنك الشمال ليه ما تبقاش فى ودنك اليمين هو : ملحوظه ذكيه يازيزو ..فى الشمال روشنه..لو فى اليمين بتدل على حاجه قليلة الأدب أنا : فهمت على الله القراء يفهموها ..طب والسلسله الحديد وفى آخرها حتت صفيحه مصديه دى بتاعة أيه؟؟ هو :دى بتدل على الفقدنه والتهور ماشفتش مشاة البحريه (المارينز ) وهما معلقينها فى صدرهم أنا: شوفت يا خويا .. داهيه تاخدهم كلهم ..نيجى بقى للبس الحلقة رقم (2) اللبس الروش هو : شايف البنطلون الجينز أللى أنا لابسه ده بكام أنا : ده بكتيره بجوز جنيهات أنا شايفه مقطع ومهلهل وجربان وكمان فيه رقعه هو : ده أنا شاريه بـ 300 جنيه أللى مش عاجبك ده جاى من بره أنا:جربان و برقعه والتقطيع أللى فيه ب300 جنيه أومال لوكان جديد وسليم يبقى بكام ؟؟ هو: ما أشترهوش بـ 10 جنيه ..الرقع والتقطيع والجربان أللى فيه هو ده الروشنه وبعدين ده تانى لابسه ليه يعنى لسه جديد أنا أتعجب : يا سلااااااااام ..وأنا أللى فاكره أنك شاريه من بتاع الروبابيكيا .... والكوتشى المخروم ده أكيد بـ 500 جنبه هو : لا ده كوتشى عادى بس أنا مبهدله مخصوص وبكعبه وأمرمطه فى التراب زى مانت شايف..البنات الأستايل بتحب الحركات دى وبتموت فيها يعنى حضرتك لابس بدله وقميص وكرافته وجزمه بتلمع وحاطط برفان وحالق دقنك ومسرح شعرك وعاملى فيها عمر الشريف فى زمانه..... فيه حد عبرك من البنات وبصلك أنا : فى الحقيقه لأ .. تفتكر ليه ياحماده بيه هو: شكلك عادى مفهوش حاجه تلفت النظر وبيدل على أنك لا مؤاخذه ما تزعلش ..قفل ومعقد ودقه قديمه أنا أتعجب للمرة الثانيه :يا سلااااام وأنا أللى فاكر أنى لابس آخر شياكه بالحته أللى على الحبل.. لو كنت أعرف كنت ألبس أوسخ لبس عندى بعد ما أقطعه ومرمط بيه الأرض فعلا الروشنه ليها ناسها..يدخل شاب حالق شعره بالموس ويمسى على الموجودين هاى شله ..هاى طيفه أنا : الجدع الأقرع ده برضه من طائفة الروشين تبعكم يعنى هو :( طيفه) ده الأنتيم بتاعى بيقود الشله فى غيابى أنا : أقرع وروش طب أزاى هو : دى مش قرعه دى أسمها حلقة رونالدو بتاع الكوره أنا : أنا كنت فاكر أنه فى الجيش ولا دماغه فيها قرع ولا وباء ياه ..حتى القرعه من الروشنه بينى وبينك أحسن من الكنيش هو : تعالى أفرجك على عربيتى أهى راكنه هناك أههه أنا : دى فيات 128 كابورليه بس مشفتش زيها قبل كده وماسورة الشكمان بتاعتها غريبه عامله زى ما سورة الصرف الصحى وكمان أربع ألوان دى أنتيكه يا جدع هو : الشاب الروش لازم يركب عربيه روشه لما بمشى بيها صوتها بيرج الحيطان غير الكلاكسات والأنوار والكاسيت تتمنى أى بنت تركب جانبى وأطير بيها فى شوارع القاهره ..كان عندى موتسيكل تيجر وبيعته بعد ما عملت بيه حادثة بس كان يهبل البنت أللى كانت راكبه ورايا أتنطرت أتعلقت فى شجره محدش عرف ينزلها ألا المطافى أنا : ولسه عايشه ..عايشه وقاعده هناك زى الجن وبتشرب شيشه ..بت ياجدع بسبع ترواح..ركبت تانى مع واحد صاحبنا نزل بيها فى الترعه تطلع هى والواد يغرق ..تحب أكلمها لك تاخدها فى عربيتك ..لا على أيه مره شجره ومره ترعه نا قص تولع فينا وحياتك يازيزو حصلت..بتولع سيجارة لواحد صاحبنا تقوم نار الولاعة تشيل وش الواد بشنبه وحواجبه وشعره بت نصيبه قولت لى أسمها أيه ..سوسو كوارث آداب عين شمس..دى غير سوسو كوارث تجاره أنجليش هو : طبعا ماتعرفش قاموس الروشنه ..لا ماعنديش فكره طب خد الكتاب ده أقرأه وذاكره كويس وأبقى سمعهولى قشطه ..قشطه أنا : ممكن ياكابتن تاخد لى ميعاد بكره مع ست سوسو كوارث آداب عين شمس هو :بسيطه تعالى بكره هنا حتلاقيها قاعده بتشيش قولها أنا من طرف البووس ..بس وحياة أبوك يازيزو ما تجيش بالبدله دى تانى شوف لك أى حاجه من النظام بتاعنا أنت كده حيقولوا أنك شاب البرومه مادستش لك على رفرف يعنى خام أنا :خلاص بكره حتشوفنى بأعفن لبس عندى ولو عايزنى ببنطلون بيجامه وشبشب مافيش مانع... هو :أخلع دلوقتى.. الشخرمون طاخ في الترللى.. يعنى أيه ياكابتن أدعك الفانوس وأختفى ميعادك خلص أخدت قاموس الروشنه وأقعدت أتصفح فيه وأذاكره علشان أعرف أتفاهم مع سوسو كوارث ألله يحفظنا..ياه فعلا الصياعه أدب مش هز أكتاف على رأى الأستاذ (اللنبى)..ده علم بحوره واسعه قوى الحلقة رقم (3) قاموس الروشنه قعدت فى البيت أقرأ فى قاموس الروشنه وأحفظ المصطلحات أستمورننج لفظ يقال في الصباح بغرض تناول الطعام أو التدخين ، أو شرب الشاى حتى يفيق الشاب من نعاسه ، مثل " هاروح اعمل أستمورننج علي القهوة وجاى " الأبلتين لدع في دهاليز الحياة عبارة تدل علي الخواء أو الفوضى في الحياة ، وغالباً ما تأتى بقصد الفلس أعمل دماغ عبارة مشهورة لدى المدخنين ويقصد بها ضبط الحاله المزاجية عند المدخن أديها جاز عبارة تقال في مواقف المشاحنات بين الأصدقاء لزيادة حدة المشاجرة ، مثل " أدى الخناقة جاز علشان تولع أو شعللها " سواء بالكلمات أو توجية اللوم لأحد المتشاجرين لكى يثور علي الاخر أختفى شوية أى لا تجعل أحد يراك هنا أو أبعد الآن أو أمشى من هنا ، مثل " عاوزك تختفى شوية لحد ما الحياة تعدى " أى لا تظهر نفسك حتى تنتهى المشاكل . أو " أختفى من أمامى الأن .. أى أمشى وأترك المكان لأنى لا أريد رؤيتك أيه النظام عبارة بمعنى أيه الموضوع ، ولقد أستغلت الكلمة في أحد إعلانات الموبيل فى نظام كروت الشحن و العبارة تدخل في العديد من الأحداث التى يتسائل فيه الشاب عن الأحداث الجديدة ، مثل " أيه النظام .. النظام في العظام " والعبارة الاخيرة تفيد الأعتراض علي الإجابة بإسلوب فيه عبط وإستهبال أليط لفظ بمعنى المتكبر ، الذى يتعامل مع الأخرين بأسلوب فيه تعالى او ينظر الى الاخرين نظره دونية متعجرفة أتشبح مصطلح بمعنى الضرب لدرجة التعذيب ، وتقال "شبحته " أى أعتديت علية بالضرب المبرح إتم والأتامه حسب تعريف الروشنه تعنى الغلاسه والرخامه والتناحه ، وجميع الصفات السيئة التى قد يتصف بها شاب معين .. ويقولون " الإتم جه " أى استعدو لتحمل السماجه التى سوف تظهر من هذا الشاب أزبهل لفظ يدل علي الزهول الشديد ويقال " انت مزبهل كده ليه " أى مندهش لدرجة العبط إحلق وهو لفظ لا يعنى الذهاب الى الحلاق لقص الشعر ولكنه يفيد تجاهل الغير مثل " أحلق له " أى لا تفكر فيما يقول فهو لا يستحق أتوبيس راجع بضهره عبارة يقولها الشباب علي الفتاه الغير جميلة ولها لدى الشباب اسماء اخرى ، مثل " زى الكره الكفر " أو " صب حته واحده " أعلمه وهذا مصطلح يعنى التشوية في جزء من الوجه بآله حاده ، مثلما أراد الفنان محمد سعد في فيلم الناظر مع النجم علاء ولى الدين " أعلمك بمطوه يا ابو صلاح ده ختم الصياعه " أنش لفظ مختصر لاسم " انشراح الخباثة " وهى شخصية خيالية تعنى الشخصية الساذجة الى درجه الهبل أملئ التنكعبارة بمعنى اريد ان اكل لان معدتى خاوية والتنك هنا بمعنى المعده ، أما البنزين او السولار الذى يملأ التنك هنا فهو الطعام أمبلايز مصطلح بمعنى " في القشوش " اى ان الموضوع الذى سعيت من أجله لم يتم ، او تعبت علي الفاضى ، وتقال " الحياة في الامبلايز " اى ان الحياة خربانة وفاشلة أشاعاتى الشخص القادر علي اصدار الشائعات بمعدل 50 أشاعه / ثانية ، رغبة في التشهير بالاخرين وايهام الغير بالسوء أبجنى تجدنى عبارة تعنى " انا يمكن شرائى بالمال " او اعطنى المال لكى انفذ كل ما تطلبة ، وغالباً ما يقولها الموظفين المرتشين او الشاب الذى لا يهمه إلا مصلحته دون الأخرين أنجز بالونجز كل المشاكل التى تقابلها لها حل سريع وحاسم ما دمت تدفع المقابل ، والونجز يقولون انها كانت نوع من انواع السجائر قديماً ، لكنها تطلق هنا علي النقود لانها حلالة العقد وسريعة التأثير في انهاء المصالح المتوقفهأخلع دلوقتى عبارة تقال كأعلان لرغبتك في رحيل شخصاً ما ، أنهيت الحديث معه ، مثل " أخلع دلوقتى ورايا شغل " أى امشى الان ونتكلم مره اخرى فلدى ما اهتم به غيرك بس كفايه كده النهارده أحفظ دول وأمشى نفسى بيهم مع سوسو كوارثالحلقة رقم (4) سوسو كوارث فى اليوم التالى أرتديت البنطلون الجينز والكوتشى وقميص مشجر كان واحد صاحبى جايبه لى هديه من هاواى ولم أرتديه لعدم أقتناعى بلونه وشكله والأن جائت المناسبه لأرتدائه وقمت ضارب شوية جيل فى شعرى ومرجعه للخلف وفاتح فيه طريق فى المنتصف ونزلت فى الشارع لأجد بأن كل من فى الشارع ينظرون ناحيتى ويبتسمون أبتسمات غريبه فأقابلها بأبتسمات بلهاء ..فعلا الواد حماده الروش ليه حق أنا كل يوم ألبس بدله شكل وعلى الموضه ما حدش عبرنى ولا حتى أبتسم فى وشى وركبت عربيتى وأنطلقت وأنا أفتح الكاسيت على الآخر على البرنامج الأوربى لأسمع موسيقى البوب والجاز وأنا أتمايل معها وأنا مش فاهم حاجة من كلامها ..أتوقف فى أحدى أشارات المرور فأجد كتكوته روشه بتشاور لى ..هاى ..هاى ورحمة الله وبركاته... وأقوم بعمل غرز يمين وشمال وأعدى من طوب الأرض لحد ما توقفت فى أشارة تانيه فأجد رجال المرور الأشاوس فى أنتظارى ويطلبون الرخص الضابط : رخصك يا حبوب أنا : أنا عملت حاجه عندك خمس مخالفات مرة واحدة ..حزام وسرعه وأزعاج بالكاسيت وعدم مراعاة شروط الأمن والسلامه فانوس أشارتك مشروخ وشكلك مش عاجبنى لك حق فى الباقى أيه بقى أللى مش عاجبك فى شكلى هو فيه ماده فى القانون بتقول كده. ...لأ مافيش بس ممكن تبقى التحدث بوجه غير لائق مع رجال المرور ...ياعم أنا غلطت معاك ...كد تبقى غلطت خد الوصل ووسع السكه واصلت السير وأنا متعكنن فقد ظهرت كرامات (سوسو كوارث) من قبل ما أقابلها ولكن زادنى ذلك أصرارا على مقابلتها فى قهوة الروشين
فى قهوة الروشين أنا : هاى سوسو ..أنا زيزو أللى كلمك عنى حماده سوسو بلا مبالاه : أقعد يا أخ زيزو هو أنت أللى كنت متقمع أمبارح ولابس لى بدله ..أيوه أنا ..ومالك عملت فى نفسك كده ليه.. أنا : عشان يمشى مع جو القهوة هى : عارف عاملتك بتاعة أمبارح عكننت على الشله وسابوا القهوة وأفتكروك مباحث وطيرت منى الدماغ أللى عملاها..حماده ده ما يجيش من وراه ألا النصايب..ما تقعد واقف ليه أنا : الحقيقه ياسوسو عايز أدردش معاكى شويه هى : دردش يا خويا حد ماسكك أنا : أنتم معاكم كام بنت روشه فى الشله هى:( تسرح وهى تعد على أصابعها) حوالى عشرين منتظمين و150 أنتساب أنا : المنتسبين دول منتسبين فى الجامعه . هى : منتسبين فى الشله والقهوة يازيزو خليك معايا أطلب لى قهوة دوبل فى كوبايه ..حاضر... المنتسبات هى بنات روشه وأروش من المنتظمات بس ما بيجوش القهوة ولو جم بييجوا طيارى أنا : وأنا أعرفهم أزاى سوسو: البنات دى تلاقيها لابسه طورح وبنطولنات جينز محزئه وعامله خريطه فى وشها ونص شعرها طالع بره .. وبتمشى مع طوب الأرض ودول عاملين زى اللى رقصوا على السلم ولا طايلين يبقوا روشين ولا محجبات ..عين فى الجنه وعين فى النار.. تاخد سيجاره.. لا ما بدخنش أحسن وفرت ههههههه أنا : أيه سبب تسميتك بـ سوسو كوارث هى : دى أوشاعه مطلعنها حماده والشله..وأنا ماليش دخل فيها واحد غرق وأنا مالى واحد ولع وأنا مالى واحد أتقفش ببنجو وأنا معاه ذنبى أنا أيه..واحد أتراهنت معاه أنه يقلع هدومه فى المدرج أترفد أيه دخلى أنا : لا لا مالهمش حق..بس أنا ملاحظ أنك عامله( تاتوه) فى حته غريبه قوى أيه الحكمه؟؟ هى :علشان راسماه على رقبتى وقفايه ..فيها أيه دى.. أمال أبقى روشه أزاى... ماشفتش شنطتى شكلها أيه أنا : هى فين الشنطه دى ..أهه ياجدع ..الخورج ده بتقولى عليه شنطه يا خرب عقلك هى : أنت مش حتيجى معانا الرحله يازيزو .. أنا : حتروحوا القناطر ولا جنينة الحيوانات ولا الهرم هى تضحك بصوت عالى وهى تضرب كفها بكفى : ما أنت بتعرف تنكت أهه..وهى دى نكته ..طبعا نكته..أحنا طالعين طريق السويس أنا : غريبه فيه أيه طريق السويس الواحد يتفسح فيه صحراء يمين وشمال ومعسكرات وغرز وكافتريات أيه أللى عجبكم فى المشوار المهبب ده هى: قوم بينا توصلنى لأقرب مواصلة وجدعنه منك يكون لحد البيت ونكمل كلام فى السكه .. أنا:
أتزرع هنابمعنى أنتظر هنا ولا تتحرك مثل أى جماد أو شجره وتقال " إتزرع هنا لحد ماجى تانى " أى لا تترك مكانك أو موقعك حتى أعود إليك مهما كانت الأسباب أعلن فرارى عبارة بمعنى انوى الإنسحاب من الجلسه او الموقف الذى اعاصره ، وتقال " اسف " انا هأعلن فرارى اى انا ماشى او لن انضم اليكم في الحديث أتارى مصطلح يطلق علي السيارات الخفيفة ، لانها تشبه السيارات في العاب الفيديو جيم او الاتارى ، مثل " سياره الشرطه " ويقولوها المدمنين " اجرى يالا عربية الاتارى جاية " أيه الحياة ؟ سؤال بمعنى ماذا حدث اليوم ، ما هو الجديد في الدنيا .. ما هى اخر الاخبار وكل الاسئلة علي الوضع الحالى أحنا اللى بهيظنا الفهايص عباره يطلقها قائد شله الفساد افتخارا بنفسه ومعناها " انا اللى جعلت الجميع يغيب عن الوعى " أبو الغضب اسم يفيد معنى الشر او ان هناك نية مبيته بالايذاء ، ويقال اسم ابو الغضب في وشه اى ناوى علي الشر ، اما " ابو الغضب " نفسه فهو شخصية كارتونية شريرة ظهرت في حلقات ( مازنجر ) وعلي غرار المعنى يقال شبية أبو لهب او شبية أبرهه الاشرم وكلها شخصيات شريره أوزى لفظ يطلق علي الفتيات الصغيرات الجميلات في المدارس الثانوية والإعدادية وشابه ذلك أدعك الفانوس عبارة بمعنى أختفى الان ، انصرف ، لقد اتممت مهمتك او قلت ما تريد .. مثال " ادعك الفانوس دلوقتى " اى احل بدون ان يراك احد أ(30) نزل من ع المسرح يا نجم عبارة تقال لشخص يتدخل فيما لا يعنية ويقصد بها " ده مش دورك " اى ليس لك دخل بالموضوع (31)منخر الشخص المتكبر المغرور الذى لا يتعامل ببساطه مع الاخرين ، بل ينظر اليهم نظره دونية(32) أهرش لفظ يفيد " طلع اللى في جيبك " او ادفع لى حتى اقوم بما تريد من خدمه وتقال ايضاً " اهرشنى " اى اعطنى نقوداً في السر او في العلانية(33) أنزل من علي ودنى عبارة بمعنى " ابتعد عنى " او انك انسان ثرثار كثير الكلام او " ارحم دماغى " صدعتنى (34)أوكشه وهى الفتاه الباهره الجمال او التى تستحق ان يطلق عليها كلمه " أنثى " (36) أشتغله اى اكله البلوظه او اكذب عليه او اخدعه او استهبل عليه وتقال " انت بتشتغلنى " أوجو مصطلح يطلق علي الفتاه التى تخضع لتأثير الشباب بسهوله ، او ذات العلاقات المتعدده مع الجنس الاخر أيحه لفظ يطلق علي شخصاً ما هو التركيبة السرية لماده البخل او الذى لا يهون عليه صرف مليم أفتكس كلمه تعنى القدرة علي الاختراع او التأليف في مجالات الحياه المتعدده التى تتسم بطابع العبط والاستظراف مثل " ايه اخر افتكاساتك يا عم ،، اى ما هى اخر اختراعاتك في الحياه أستكانيس لفظ يدل علي الراحه والرفاهيه والمتعه وتقال " انا مستكانيس كده " اى انا مرتاح جداً بهذه الطريقه بيرمى ودنه عبارة بمعنى انه يتصنت علي شئون غيره بتوجيه الردار بالأذن ، لاثنين يتحدثون سراً لكى يفسر الكلام الهامس بخ تأتى بمعنى أن شئ ما أنتهى وغالباً ما تأتى في جمله " بخ خلاص كان موجود وخلص " اى ان ما ترغب فيه لم يعد متاح الان أبعته لفظ بمعنى " اخدعة " او اكذب عليه حتى تضحك من تصرفاته مثل " روح يا شيخ .... وتعالى بسرعه " ببخظه وعرانيسة عبارة تدل علي جوده النبات ( المخدراتبشلة علامة على الوجه ، ناتجة عن المشاجرات واحياناً تدل علي ان الشخص الذى تشوه وجهه " بلطجى أرارى " اى معتاد علي اعمال البلطجه بونتى نداء يوجه لشخص ، يقصد منه " فرد العضلات " او الاستهزاء بقدراته واحياناً يقال لصديق او رفيق حديث العهد بالشلة باكس مصطلح بمعنى الخايب ... العبيط .... الذى يمكن خداعه بسهوله " يا باكس " نداء بغرض الاستهزاء بالشخص الموجه اليه النداء ويجهله الجميعباشكا مصطلح بمعنى ألعب بأوراق مكشوفه ، او بطريقه واضحه وغالباً ما يستخدم اللفظ في الكوتشينه ويقال العب باشكا اى العب ع المكشوف باترينا لفظ يطلق علي الشاب او الفتاة التى ترتدى نضاره بلبع لفظ يطلق علي الشخص الساهى والغير ثابت وموزون في تصرفاته فيقال انت مبلبع ايه ، ويقصد انه مدمن مخدرات لعدم اتزانهبتهوبص او بتهجس لفظ بمعنى " يستعبط " اى تتظاهر بالغباء وانت اعلم الناس وتقال " انت بتهوبص علينا " اى بتكذب او عامل فيها عبيط ) بتخبط في الحلل عبارة بمعنى " انك تفضح سرى وذلك يسبب لى اهانه " وتقال العباره عندما يسب شاب صديقه فيرد عليه ويقول له " لاء متلعبش معايا الدنيئة ومنخبطش في الحلل مع بعض " بنت في الزيف عبارة تطلق علي الفتاة الجميلة وفى الزيف تعنى في الجون اى ذات جمال خارق تستحق عليه كلمات الثناء والاعجاب برطعه او بروطه لفظ بمعنى " أكل ومرعى وقله صنعه " اى يسير في الحياه بدون هدف او غايه وتقال " ماشى في الحياة بيبرطع " اى بلا افكرا محددة بشكل منظم او يعيش بعشوائية او يعيش عاله علي الاخرين بؤله لفظ بمعنى الموضوع وتقال " البؤلة دي بتاعتى " اى ان هذا الموضوع اهتم به فهو شخصى ده لما تحب تخلص مصلحه بنفسك من غير حدتسالى يالوز نداء خاص ببائع اللب والسودانى في الشوارع ولكن استخدمه الشباب للدلاله علي ان العلاقه الغرامية التى تعيش فيها مجرد قضاء وقت تسليه ، وان حاله الحب التى يتظاهر بها ليس في موضعهاتعبان موله عبارة بمعنى ان الشاب " ليس له في التور او الطحين " اى لا يعرف اى شئ واحيانا ما يقولها الشاب الذى يمر بحالة من الفلاسه ، وتقال " انت تعبان مووله أي تعبان خالص وتنفعنيش او تعبان مودك" تشريد لفظ بمعنى لا تنقل الاخبار ، او لا تنشر الاخبار او " ما تسيحش" او يقال " بلاش تشريد " اى ماتفضحنيشجالى جرب في ودانى عبارة بمعنى .. لا اريد سماعك مره اخرى .. انت رغاى ... صدعتنى .. ابعد عنى ... وكلها عبارات تفيد طلب الكف عن الثرثرة من الشخص الرغاىحطيت ايدى علي البلف اى لمست جوهر الحقيقة داخل شئ ما ..خدوده أنش عبارة تطلق علي الفتاة الجميلة التى تمتاز بالرقه والنعومة والممتزجه بالخجلدايس عليها قطار عباره تطلق علي الفتاه قبيحه المنظر لدرجة مبالغ فيها وتقال .. البنت دي دايس عليها قطار ..او يقول دي بنت ماتت قبل كده تلاتمرات اى لا تظهر ملامحها .. وحشه قوى .. دباليمو مصطلح بمعنى ان هذا الشاب او هذه الفتاه حاصله علي دبلوم صنايع او تجارى " دبلوماتك برجالاتك دبلة دهب في صياعتك ، وهذا يعنى ان الدبلوم طريق سريع للشاب ليدخل الى معترك الحياة والعمل باعتبار ان الحاصل علي الدبلوم قد يجد مهنه قبل الجامعى ، كما ان الفتاة الحاصلة علي دبلوم تتزوج قبل الجامعية ويقولون ايضاً " دبلوم العدل " دبلوم الزواجدبلج المسائل عبارة بمعنى " صلح المواضيع " حاول ان تخفف اخطائى او ظبط الامور او خفف حده التوتر الذى سببته او لما حد يقولك حوار مش مفهوم فاتقوله دبلج والنبي لحسن تيستسكح مراجيح ع الديق اى ان الحياه كلها مشاكل ومتاعب وقرفسكاموزه لفظ بمعنى .. هذه فتاتى .. صديقتى ، مثل " ايه يا سكاموزه " عايزه ايه يا صديقتى وللرجال جزانوفه وده لما يكون بيحب مصلحهسلعوه عندها بواسير عباره تطلق علي الفتاه القبيحه والتى تمتاز بالنحافه وجسدها لا يتماشى مع الجزء الاخر بمعنى متنافره الاجزاء او القوامسكامونس الرقيق .. مقبول الشكل وغالباً ما يطلق اللفظ علي الفتاه الجميلة ذات الملامح الطفولية ، مثل " بنت سكامونس خالص " اى لذيذة جداً ... جداًالشخرمون طاخ في الترللى عبارة بمعنى ان الموضوع ضاع علي الفاضى لاداعى من البحث عن شئ اختفى .. كل ما تم تخطيطه فسد ... وهكذاشاب البرومة ما دستلوش علي رفرف عباره بمعنى الشرف ، النزاهه ، الاصول ، وتأتى غالباً للدلاله علي كل الصفات الحسنه التى يمكن ان يتصف بها شاب
المرأة الحديديه
بعد أن سمعت ( زينات ) عن فتوى مفتى السعوديه بأن من حق المرأة الدفاع عن نفسها ضد عدوان الرجل ومن حقها أن تضربه كما يضربها
باتت تفكر فى وسيله تجعلها قادرة على رد العدوان والأيذاء الذى يمارسه معها زوجها( حموده المفش)
فمنذ أن تزوجت هذا الرجل وهو يصبحها بعلقة ويمسيها بعلقة بسبب وبدون سبب فعاشت كسيرة مذلوله فى بيته ويعايرها نساء العيله والجيران بضعفها وقلة حيلتها مع هذا الرجل الباغى الظالم........... وفى جلسه حريمى بين زينات وجارتها (فتكات) دار بينهما هذا الحديث
الحلقة الأولى
فتكات : ما ينفعش الكلام ده يازينات يا حبيبتى كل يوم تتضربى علقه وننام ونصحى على صريخك.. طب بلاش كل يوم... خليها ياختى كل شهر ده أنتى صحتك على قدك مش حمل الضرب ده كله
زينات : ما أنتى شايفه يا فتكات حموده عامل زى الوحش الخبطه من أيده بتكومنى على الأرض ..أعمل أيه ؟؟ ومعايا تلات عيال ومقطوعه من شجرة فكرت كتير أنى أطلق منه.. تصعب عليا العيال.. وحروح فين وآجى منين ولا حلتى مال ولا جمال ومأعرفش حد فى البلد دى
فتكات : مالكيش قرايب ولا أعمام ولا خلان يقفوا للراجل المفترى ده
زينات : ولو فيه.. يقدر حد على (حموده المفش) وأجرامه وطولة لسانه منه للله البعيد ربنا على المفترى قادر يهده
فتكات : آمين ..حطى الكمدات دى على عينك أللى ما بلتحقش تفش تورم تانى ..ربنا يصبرك... يقدر( أبو صابر) يبص ناحيتى أو يعمل زى حموده بتاعك ده ... ده أنا كنت أكلته بسنانى
زينات : أنتى يا فتكات صحتك مسعداكى وماشاء الله عليكى طول بعرض وجسمك مليان تقدرى تضربى عشرة من أبو صابر أنما أنا ياحسره عليا مفييش زى العصفورة حموده بيطوحنى فى أخر الشقه زى الورقه
فتكات تخمس فى وجهها : النهارده الخميس يا حبيبتى ..بس أنتى اللى خايبه الحكايه مش بالجسم يا عبيطه شوفى القطه والكلب لما بيتخانقوا القطه أصغر من الكلب بكتير أنما بتبهدله وتخليه يدلدل ودانه ويجرى
الحكايه مش بالجسم والعضلات ..عايزه شخصيه وشجاعه وأنتى شخصيتك أتمسحت مع الراجل ده وجبانه على طول وخايفه تواجهيه
زينات : أواجه ثور زى ده أزاى قوليلى..ده ممكن يموتنى
فتكات : تتك خيبه ما أنتى ميته هو أنتى فاكره نفسك عايشه..شوفى الستات وهى بتتبغد وتتشرط وتتقنعر على رجالتها ويتمنوا ليهم الرضا يرضوا
..عارفه يابت يا زينات أنا سمعت فى التليفزيون أن الشيخ بيقول أنى من حقك تضربى جوزك لو ضربك يعنى تدافعى عن نفسك بدل ماأنتى واقفه قدامه زى العبيطه يلطش فيكى فى الرايحه والجايه ..مش قادره خوفيه هدديه أتغدى بيه قبل ما يتعشى بيكى ورى له العين الحمرا زينات : طب لو ضربنى
فتكات: ماهو بيضربك من غير حاجه ..بس حسسيه أنك ممكن تأذيه زى ما بيأذيكى..وبعدين يابت كلى وأتخنى وأملى هدومك ..بدل ماهو مستهيفك كده
زينات : هى الواحده بيبقى عندها نفس تاكل بعد البهدله دى أنا نفسى بتتسد وأقعد باليومين ما حطش لقمه فى بقى
فتكات : بسيطه كلى يا حبيبتى قبل العلقه حتى تقدرى تستحملى التلطيش وقلة الحيا بتاعته وزودى فى الأكل كأنك بتاكلى فى جتته.. عيزاكى تاكلى كأنه آخر زادك و تبقى زى البطه ودراعتك ورجليكى تملا ووشك يتنفخ كده بدل الأنيميا أللى أنتى عايشه فيها وبعد كده حعلمك القهر على أصوله
زينات : طب فيه حاجه تخلينى أتخن بسرعة
فتكات : فيه يا حبيبتى عند العطار ..الكيس المحوج ومربة خرز البقر والمفتقه ..وتكترى قوى فى أكل السمك والرز والعيش وماتهديش نفسك فى البيت وريحى على الآخر ده راجل مايستهلش غير ضرب البرطوشه
زينات فى أستسلام: خلاص يا أبله فتكات
فتكات : أبله أيه يابت ده أنا أكبر منك بشهور أبقا أبلتك منين يا دلعدى
ده ليه حق حموده يروقك كل شويه ههههههههه
عايزاكى تصحى وتفوقى لنفسك وكل يوم حاجى أقعد معاكى أديكى درس حريمى معتبر وعايزه أشوف النتيجه أول بأول..فوتك بعافيه حجيلك بكره وأجيبلك كل الطلبات من عند العطار
الحلقة رقم(2)
الدرس الأول فتكات: يعنى ما سمعناش صوتك النهارده ..قولت آجى أشوفك ليكون المخفى خلص عليكى
زينات :رجع أمبارح متأخر دخل نام زى الشوال ماحطش منطق يظهر كان مونون ومتقل فى العيار ... وخرج من بدرى من غير ما يصحينى دخل على المطبخ وفتح التلاجه وقعد يلوغ وقام رازع الباب وقام فاتحه تانى..... وجه وقف فوق راسى وأنا عامله نفسى نايمه وقال لى: حسابنا لما أرجعلك يازينات يا بنت أمبابى..أفتكر المفترى أنه ما ضربنيش أمبارح وقام خارج آلهى ما يرجعه
فتكات : خدى الحاجه أهه خبيها منه ليلغوها هى كمان ويزيد فى أفتراه
وزى ما فهمتك عيزاكى تاكلى كويس وأنا شايفه خير ربنا كتير عندك
زينات: هو ماعندوش أهم من الأكل ..همه على بطنه داخل محمل من مجاميعه لحمه وفراخ وفاكهه ..بس فين النفس أللى تاكل
فتكات : عيزاكى تاكلى فى آخر زادك لحد ماتردى.. وتربربى ..عارفه الكلبه أللى عند أورمه الجزار مابتقدرش تمشى من كتر الأكل أزاىوما بتخليش أتخنها كلب يهوب ناحية الشارع
زينات :عيزانى أبقى زى الكلبه يا فتكات
فتكات : مع الجعر جوزك ده عيزاكى تبقى زى الوحش علشان يعملك ألف مليون حساب..المهم فى الفتره دى ما تتعرضيش ليه وكل حاجه قولى حاضر لحد ما تبقى تمام التمام
زينات: هو أنا بقدر أقول لأ ..ماشى يا فتكات حعمل أللى بتقولى عليه
فتكات: شوفى بقى بعد كده لما جسمك يملا وتشدى كده حاخدك لمدام (فوزيه) أللى فى الدور الأرضى بتاعة الرياضه حتخليها تظبطك أنا كلمتها أمبارح قالت لى خلينى أشوفها المسكينه دى ..
زينات: عايزانى فى أيه مدام فوزيه
فتكات: أنا لما حكيت لها حكايتك ..نزلت الدمعه من عينها وحلفت براس أبوها لتمرنك مجانا ولوجه الله
زينات : حتمرنى على أيه دى كمان
فتكات : حتمرنك كوندوفو..ومصارعه حره..وكيك بوكس وكارتيه وكل أللى يساعدك علشان تعرفى تدافعى عن نفسك
زينات وهى تضرب بيدها على صدرها : يالهوى يا فتكات عايزانى أضرب الثور ده طب أزاى.. ينفع ؟؟
فتكات : ينفع وينفع ونص بس سيبك من الجبن أللى أنتى فيه ده أنا عايزه أعملك كرامه.... ده كل ستات الحته لما عارفوا بحكايتك نفسهم ومنى عينهم يسووه على الجنبين بالشباشب
أسمعى الكلام أللى بقولك عليه وخطوه خطوه حنعرف أزاى نربيه ونكسر مناخيره المفش الجبان أللى مستتخن نفسه ..آه لو أطول زمارة رقبته
الكابتن فوزيه
فوزيه : أطلعى على الميزان ..لسه وزنك أقل ..عايشه على المفتقه ومربة خرز البقر ما ينفعش خدى الورقه دى فيها نظام غذائى ممتاز
بياخدوه بتوع الحديد وكمال الأجسام أمشى عليه لمدة شهر وأرمى الكلام الفارغ بتاع الستات أللى غاويه كلبظه وتربى لهاليط ..وخدى العلبه الكبيره دى تاخدى منها مرتين فى اليوم معلقة على كوباية لبن أو عصير..دى هديه من عندى وأمشى على البرنامج وتعالى أشوفك كل أسبوع لحد ما توصلى للوزن المناسب حنبدأ بالحقن وبعدين التمرينات بدون الحديد ثم بالحديد و بعدين حركات القتال
زينات : بلاش والنبى ياست فوزيه
فوزيه تتعصب وتجذبها من صدرها وهى تشخط فيها : بلاش ..بلاش أيه ياوليه يامغفله مش كفايه فضحانا فى وسط الناس ..خليتى الرجاله يطمعوا فينا ..أصحى يازينات لحنزلك صف أسناك أنتى عارفه أنا ما بحبش سهوكة النسوان والدلع أللى يفور الدم حتمشى على الكلام بتاعى أحسن والله أطلع أضربك أنتى وحموده المفش بتاعك ده ..سامعه
زينات وهى خائفة : حاضر حاضر ياكابتن فوزيه حعمل أللى حتقولى عليه بالحرف
فوزيه : تابعيها كل يوم يا فتكات وبلغينى على طول ..تتك القرف ست خرعه ما عندكيش دم... مش عارفه تخبطيه خبطه تشل حركته
زينات: هو أنا بقدر أقرب جنبه
فوزيه :..بكره حعرفك أزاى تصارعى الثور ده وتكسرى قرنه... بس واحده واحده معايا وتنفذى ألى بقولك عليه
زينات : بس أنا خايفه قوى ياكابتن
فوزيه : طلعوا الست دى بره قبل ما كعورها على السلم..ست جبانه على رأى المثل يافرعون أيه فرعنك قال مالقتش أللى يلمنى ..حتنفذى ولا لأ
زينات وهى خائفه : حاضر.. حاضر بس سيبى أيدى حتكسريها
فوزيه : حنشوف..أن ماخليتك تفصصيه بسنانك وتربى له الخفيف ما بقاش أنا الكابتن فوزيه عدوة الرجاله ..
الحلقة رقم (3)
العلقة
( وبعد شهرين حموده بعد الغداء يتمطع ويمدد على الكنبه وزينات تمر من أمامه وهى تحمل كوب الشاى وتذهب فى أتجاه المطبخ وهو يتابعها بنظره وهو مستغرب
حموده : ماشاء الله ما شاء الله.. تخنا وكلبظنا أهه وبقينا علينا القيمه والجلابيه حتتفترك من عليكى ليكى حق ما أنتى بتاكلى فى قته محلوله... تكمل زينات السير دون أن تلتفت لكلامه
حموده :أنتى مابترديش عليا يا بت أمبابى..أنا سمعك بتبرطمى وأنت ماشيه بتدعى عليا يابت الـ....تعالى هنا ورينى شكلك كده ؟؟
(زينات لاترد عليه وتدخل المطبخ وتقوم بغسل الصحون دون أن تعيره أهتمام ..يدخل ورائها حموده ويهم بضربها فتسحب سكين من أمامها وتشهرها فى وجهه وهى ترتعش)
زينات :عارف لو مديت أيدك تانى مفيش غير السكينه دى حدبها فى كرشك
حموده يفاجأ بهذا الموقف الجديد من زينات: فيهجم عليها ويخطف منها السكين ويضعها على رقبتها وهو يخنقها ..أتعلمتى تمسكى سكينه ياروح أمك ..أدبحك دلوقتى ..أنطقى وألا حخلص عليكى ( تعض يده التى تقبض عليها فيصرخ حموده من ألم العضه.. آى.. آى يابنت العضاضه ويبتعدعنها بعد أن ضربها بقبضة يده فتتحامل على نفسها وتغرز أظافرها فى وجهه فيزداد عنفا معها فتهرب إلى غرفة النوم وتغلق على نفسها الباب بالمفتاح وهى تشعر لأول مره فى حياتها بأنها حققت حلم طالما تمنته.. أن تراه وهو يتألم مثلها
حموده وهو يضرب على الباب بعنف: أفتحى يازينات وألا حكسر الباب وأدخلك حشوف أنا أزاى أتجرأتى وترفعى السكينه فى وشى وتعضينى وتخربشينى كل ده علشان تخنتى شويه يابنت الـ....
زينات من الداخل بعد أن أستجمعت شجاعتها : عارف أن ما كنتش تحترم نفسك معايا حعمل فيك أيه ؟؟ ..حتعملى أيه يا بنت أمبابى
زينات من الداخل : حدبحك يا حموده وأرميك لكلاب السكك
حموده : يا نهار أسود يا نهار أسود ..اللغه دى جديدة عليكى ..أن ماوريتك ..أن ماكسرت عضمك ..حتروحى منى فين ؟؟
تنتهى الخناقه ويلبس حموده ملابسه ويخرج من البيت ليذهب إلى القهوه ليجلس مع أصحابه فيلاحظوا الجروح التى فى وجهه
فى القهوة
عبده كاجوال : أيه أللى فى وشك ده ياحموده هههههههههه حموده أتضرب يامنز أوعى تقول القطه خربشتك ياحوحو ههههههه
حموده : أتلم ياعبده ما تخليناش نخسر بعض
عبده : بكلمك جد أيه أللى عورك فى وشك كده صحيح
حموده : دخلت فى لوح أزاز فى الشغل
عبده : لوح أزاااز ..ده أنا كنت فاكرها خرابيش ياراجل
حموده : خرابيش أزاى يعنى ؟؟
عبده : سيبك من الكدب يا حموده ..قولت لك ميت مره بلاش أفترى وبطل ضرب فى مراتك وخليك بن آدم كويس ولسه ياما حتشوف
حموده وهو يتحسس وجهه : هى الخرابيش جامده ياعبده
عبده : أيوه جامده أكيد أترازلت عليها زى عوايدك ..يا جدع أتقى الله دى مراتك غلبانه ما تستهلش أللى أنت بتعمله فيها
حموده وهو يزداد غيظا ويحاول أن يغير مجرى الحديث : تشرب أيه ياعبده ..حلبه حصى وأنا قهوة مظبوطه
الجرسون : حلبه حصى وقهوة مظبوط للأسطى عبده... وحموده المخربش
حموده : مخربش.. أمشى يابن الـ....أنا قايم من هنا تعالى نقعد على قهوة تانيه
عبده : أحسن برضه لحد ماوشك يخف ...ههههههههههه
الحلقة رقم(4)
مرحلة المقاومه
فتكات: ضربك برضه الجبان ..بس ولا يهمك أصبرى وأحتسبى.. يومه قرب ومصيرنا نكسره وربنا حينصرنا عليه
زينات : أنا تعبت يا فتكات مع الراجل ده ..كل بوكس وكل كل شلوت بيهد من جوايه حاجات كتيره قوى.. ويطلع مكانها حيطه جديده من الكراهيه ..قتل مشاعرى و دمر أحساسى مسح بكرامتى الأرض
فتكات: خدى العلبه دى فيها دواء بعتاه لكى الكابتن فوزيه عايزاكى تحطى منه حبيتين بس فى أكل المفترى جوزك
زينات : أيه ده سم ..لأ يا ختى عايزانى أروح فى داهيه وعيالى يتشردوا
فتكات: حيلك حيلك سم أيه يا هبله أنتى ..ده ملين جامد جدا حيخلى صاحبنا يهر على نفسه.. بيدوه للحمير والجمال والبقر لما تكون مكتومه ياخد منه البنى آدم نص حبايه أنما فى حالة جوزك ياخد له حبيتين ثلاثة علشان يحوقوا في جتته
زينات على ضمانتك يا فتكات..ماتخفيش أنا والعيال بناخد منه ماتنسيش تحطيه فى الشوربه أو فى الملوخيه ..فوتك بعافيه
المغص
يتمطع حموده بعد الغداء : أكله جامده قوى بس طعم الملوخيه غريب شويه حاسس أن بطنى بتكركب
زينات : أنت خليت فيها ده أنت مسحت الطبق مسح
حموده وهو يتألم: عندى مغص جامد قوى... الأكل بتاعك ده فيه حاجه
زينات : ما أنا واكله أهو معاك أنا والعيال حصلنا حاجه ..يمكن من الرمرمه بره البيت ....قوللى أكلت أيه بسلامتك النهارده؟؟
حموده: أبدا زيى كل يوم... أربع سندوتشات فول وسندوتشين طعميه على بتنجان وبطاطس مهروسه
حموده وهو يتوجع يجرى إلى الحمام :آه أه..ويدخل الحمام ويغيب بالداخل فتقللق عليه زينات فتخبط على الباب..سى حموده ..سى حموددده
يرد من الداخل بصوت واهن ضعيف : عايزه أيه ياوش النصايب ..أنا مصارينى كلها نزلت
تبتسم زينات وهى تقول فى سرها أحسن أنشالله ينزل كرشك كله ..أجيب لك دكتور ..أمشى ياوليه أنتى وسيبينى فى حالى آه آه آيييييييي
يخرج حموده من الحمام ويعاود الدخول عشرات المرات حتى يهمد تماما ويتساند على الحائط بيد ويمسك بطنه بيد أخرى ويرتمى كالشوال على السرير ويغط فى نوم عميق يقطعه المغص ليجرى مرة أخرى إلى الحمام وزينات سعيدة وهى تعد على أصابعها مرات دخوله وتنتهز الفرصة وتخبط على جارتها فتكات
فتكات : أيه الأخبار يازيزى
زينات : فل يا فيفى ..دى المره ال45 أللى يدخل فيها الحمام
فنكات : قشطه ..مش قولت لك أن مفعوله أكيد دواء الحمير والبهايم
زينات: أسكتى ياختى الراجل كرشه نزل النص
فتكات : ولسه لما تكرريه معاه كل أسبوع مره ..حيخلى حموده المفش يفش وينزل النص وكده تتساوى الكفتين وتعرفى تديله على قرعته وتمشيه على العجين ما يلغبطوش
زينات بس صعبان عليا خالص وشه أصفر وصوته وطيييي خالص ومش قادر يفتح بؤه
فتكات : ما يصعبش عليكى غالى ..من بكره الصبح تنزلى التمرين عند الكابتن فوزى قصدى فوزيه
زينات : تتك أيه يا فتكات ..بس هى جايبه على فوزى خالص ههههه خخخخخخخخ
..المنيل جوزى يروح الشغل والعيال تنزل مدارسهم ..وأنا حمامه على التمرين
فتكات تمسك بيد زينات ويهتفوا سويا بنشوةالنصر : فليحيا الأتحاد النسائى..بالطول بالعرض حنجيب حموده الأرض ..يايايايعيش يعيششش
الحلقة رقم (5)
الحرب النفسيه
(فى صالة الجيم التى تعمل بها الكابتن فوزيه )
فوزيه: كفايه كده النهارده ..كل يوم حنزود ربع ساعه وحنركز على تمارين الدراعات والأرجل وبعد كده حنخش على التمرينات بالحديد لحد ما نقوى عضلاتك
زينات وهى سعيده : حاضر ياكابتن
فوزيه : حنبدأ مرحلة الحرب النفسيه من النهارده ..فتحى ودانك وأعملى أللى بقول عليه ..حاضر ياكابتن ..حتاخدى شوية الكتب دى والمجلات والجرايد أللى قدامك
زينات : أنا ما عنديش وقت أقرأهم
فوزيه : أنا مش عايزاكى تقرأيهم ..أنا عايزاكى تبعتريهم عندك فى الشقه وفى كل حته بيقعد فيها بسلامته جوزك ..ده كتاب كيف تقتلين زوجك ..وده كتاب أنواع السموم لأزالة الهموم ..وده كتاب أغرب الجرائم النسائيه للقضاء على الرجاله المفتريه ..ودى مجلة الحوادث تفتحيها على صفحه رقم4 فيها صورة الست أللى قطعت جوزها فى الهرم ..ودى شوية جرايد قديمه فيها حوادث من النوع ده
زينات : طب لو سألنى عن الكتب والمجلات دى أقوله أيه
فوزيه:تردى عليه بكل برود..لقيت نفسى فاضيه قولت أتثقف ومش عايزه نخنخه
ولا خوف خليكى بارده وأرسمى على وشك أبتسامه هادئه ...لو هلل أو قل أدبه أزغريله وبرقى وأمشى من قدامه وأقعدى أقرأى قى أى مجله أو كتاب ..فاهمه ولا أعيد تانى ؟؟
زينات : لو ضربنى أعمل أيه ؟؟
فوزيه : أقفى قدامه وماتهربيش وما تصرخيش وبصى جامد فى عينيه وأياكى دموعك تنزل أوتعيطى يبقى باظ التخطيط حتى لو تألمتى تعالى على نفسك شويه...وتجيلى بكره أعرف أيه اللى حصل وما تنسيش تشترى نص كيلو أكياس سوده... حقول لك بكره لما تجبيهم حتعملى بيهم أيه ..سلام
بداية الرعب
يعود( حموده المفش) من عمله فيفتح باب الشقه فيجد زينات تجلس فى الصاله وهى تتظاهر بأنها منهمكه فى القرايه ولا تلتفت إليه
حموده : الله الله ..أيه الثقافة أللى واخده حدها يابنت أمبابى قاعدة بتقرى ومش مجهزه الأكل مش عارفه أنى جاى دلوقتى قومى تتك داهيه تاخدك .
( تضع زينات الكتاب جانبا ولا ترد عليه وتقوم من مكانها لتعد له الغداء )
حموده: الوليه دى أتجننت ولا أيه.. أحوالك مش عجبانى اليومين دول يظهر عايزه تتلطشى عشان تفوقى (يلتقط الكتاب الذى تركته زينات ويقرأ عنوان الكتاب ..كيف تقتلين زوجك ) يانهار أبوكى أسود عايزه تقتلينى يابنت المجنونه ..لا دى زادت قوى يظهر أن حيكون النهارده آخر يوم من عمرك خدى تعالى هنا
( لا ترد عليه وتستمر فى وضع الأطباق على السفره..فيقبض عليها من قفاها ويستديرها لتكون فى مواجهته وجها لوجه
حموده :أنتى جيبتى الكتاب ده منين ..ومين أللى أدهولك ..عايزه تقتلينى يابنت الرفضى ده أنا حقطع من لحمك لو ما تكلمتيش ..ردى يابت ..أنت بتبرقى كده ليه
طب خدى ويضربها بالقلم فيألمها ولكنها تذكرت كلام الكابتن فوزيه فتتماسك ويضربها قلم آخر وهو مازال يمسك بها فتمسك يده وهى مركزه نظرها فى عينه
فيضطرب ..مالك يابت فيه أيه الله يخرب بيتك ما بتعيطيش ليه ..لالا فيه حاجه بتحصل من ورايا..أنطقى يابت وألا ح موتك. .مين أللى أداكى الكتاب ده ..أنطقى وما تبصليش بالطريقه دى ..تقوم زينات بدفع يد حموده بقوه لم يعهدها من قبل
وتتركه وهى تقول بصوت محشرج مخيف: الأكل عندك على الترابيزه
يقف حموده فى وسط الغرفه وهو يحدث نفسه ويتعجب من تصرفاتها ويقع نظره على باقى الكتب والمجلات والجرايد فيتصفحها وهو يصرخ كلما قرأ صفحه ويتخيل نفسه وهى تقطع فيه او تضع له السم فى الطعام
فيدخل عليها الغرفه ويجرها من يدها ويجلسها على السفره عنوه
حموده : كلى من الأكل ده يابت أمبابى علشان لو فيه حاجه تموتى وأخلص منك
زينات وهى تتلاعب به : أنا كلت وماليش نفس
حموده: عليا الطلاق ... حتاكلى حتاكلى وغصب عنك حتاكلى وألا حموتك
زينات تحدق فى عينه فتلاحظ أن الخوف بدأ يدخل فى قلبه : أنت خايف ياحموده
فتأكل لقمتين وتقول : آدينى آكلت أهه حصلى حاجه
حموده :لا ياروح مامتك ..دانتى حتاكلى الأكل كله وتشربى الميه أللى حطاها
زينات تنظرأليه فى برود وتستمر فى الأكل لتنهى على جميع الأطباق وتشرب
زينات : لسه خايف يا حموده
حموده : حشوف حيحصلك أيه كمان ساعة قومى من قدامى دلوقتى
تدخل زينات غرفتها وتجلس على السرير وتقوم بشغل التريكو ولا تعيره أدنى أهتمام ويظل يتابعها بعينيه وهى صامته وتحرك أبر التريكو بهدوء وهى ترسم على وجهها أبتسامة الأنتصار فقد أدخلت الرعب فى قلبه
يقوم حموده بلم الكتب والمجلات ويأخذها ويترك البيت وخرج وهو لايلوى على شيئ ليجلس على القهوة فى أنتظار مجيء صديقه عبده كجوال
الحلقة رقم( 6)
(يجلس حموده على القهوة وهو يتصفح الكتب والمجلات فى أنتظار مجيء عبده )
عبده: مش عوايدك تيجى بدرى ..وأيه الكتب والمجلات دى أنت بتتثقف من ورانا
حموده : شوفت الوليه مراتى بتقرأ أيه بنت المجنونه
عبده ينظر فى المجلات والكتب ويضحك: هههههه قول على نفسك يارحمن يارحيم القطه فتحت يا سطى وقليل لو خدنا عزاك اليومين أللى جايين
حموده : دى بت غلبانه ومخها طاقق ..بس نفسى أعرف مين أللى ورا الموضوع ده ..آه يا نارى ..لو أعرفه لكنت مسحته أسمه من الدنيا
عبده : مش هو ده المهم ياحدق ..المهم أن مراتك فتحت عنيها خلاص وقليل لو دبحتك وأنت نايم زى النسوان ما بتعمل اليومين دول ..نصحتك كتير يا صاحبى وأنت مابتسمعش الكلام ..غيرش الكلام الخايب بتاعك أكسر للست ضلع يطلع لها عشرين ضلع ..أشرب بقى يامعلم وأستلقى وعدك
حموده يتحسس رقبته وهو مرعوب من كلام عبده : تفتكر ياعبده أن زينات ممكن تعملها ..لا..لا.. ياراجل قول كلام غير ده
عبده : الست فاض بيها وممكن تعمل فيك أى حاجه ..وقولت لك بلاش تمد أيدك وتطول لسانك وخليك محترم ما فيش فايده..أنت قاعد على قنبله ممكن تنفجر فيك فى أى وقت وتعملك حوواشى
حموده : طب والعمل ياصاحبى ..أخلص عليها قبل ما تخلص عليا يعنى
عبده : مفيش فايده فيك ..خلصت عليها وبعدين حتروح من الحكومه فين ومن ربنا فين حيشنقوك أو تتسجن بقية عمرك وتتشرد عيالك ويتخرب بيتك
حموده : عايزنى أطلقها..بس أنا بحبها وما أقدرش أستغنى عنها
عبده : تطلقها أيه ياراجل ياتعبان أنت ..حتتطرد بره البيت وتقعد هى وعيالها فى الشقه..وحتاخد نفقه ومؤخر وعفشها وعليهم نفقة متعه كمان ..فووء ياحموده أنت عايش فى القرون الوسطى ..الحكومه دلوقتى واقفه فى صف النسوان ..حتاخد حقها منك حتاخده ولولا أنها ست غلبانه ومقطوعه من شجره لكانت طلقتك أو خلعتك يا خفيف
حموده : كركبت على دماغى كل البلاوى وأنا جايلك تشوف لى حل سديت السكك فى وشى ..قولى يا عبده يا خويا أعمل أيه
عبده : الأول نشوف النصيبه أللى مستنياك فى البيت أللى ممكن تخرطك زى الملوخيه ..لازم تهدى اللعب ياحموده وتسحب ناعم معاها وجرب تعاملها بحنيه وبذوق وشوف النتيجه ..لو ما أتعدلتش شوف لك أى حته أتاوى فيها لحد ما الست دى تهدأ شويه وبعدين صالحها وقول لها كلام حلو من بتاع زمان
حموده : بس أنا ما عرفش أقول كلام حلو يا عبده ..بأحس أنى روجلتى راحت
عبده : وهى رجولتك أنك تضربها وتهينها وتلعن سلسفين أبوها ..تبقى غلطان وما تعرفش أيه هى الرجوله ..الرجوله مش عافيه وفتونه وظلم الضعيف ..الرجوله أدب وأخلاق وعطف على الضعيف ومراعية أهل بيتك بالود والحنيه..فيها أيه لو قلت لمراتك كلمه حلوة ودلعتها وتشوف طلباتها وتريحها على الأخر
حموده : عايزنى أدلعها يا عبده ..النسوان لما بتتدلع بتركب على الراجل وتدلدل رجليها ..عايزنى أبقى حمار وخرونج على آخر الزمن
عبده : ييه مش عايز تفهم برضه ..الست أللى بتركب وتدلدل دى ست معذوره لأنها معاها راحل مالوش شخصيه وهى بتبقى ما عندهاش أصل ..أنما مراتك غلبانه وأصيله وأستحملتك السنين دى كلها.. وبتطبخلك وبتربى فى عيالك وصيناك ومنضفاك وواخده بالها من بيتها ..أيه بقى لزمته الضرب والأهانه وطولة اللسان..جرب أللى قولت لك عليه ومالكش دعوه وماتركبش دماغك أحسن تبقى أيه؟؟
حموده : عارف ..حوواشى ..أجرب وأشوف ..عليك نور
الحلقة رقم(7)
الأكياس السوده
فتكات : أيه الأخبار يازيزى
زينات وهى تتهلل فرحا : فل الفل يا فيفى ..كابتن فوزيه ميه/ ميه تصدقى أول مره أشوف حموده وهو مرعوب.. الجبان الندل
فتكات : كده كويس ..خلى بالك أنه حيسحب ناعم معاكى ..ما تدهوش الفرصة دى وتنامى النهارده فى أوضة العيال مش عايزاكى تحنى ويضحك عليكى حتى لوباس أديكى ورجليكى خليه يتربى شويه
زينات : دى الحكايه دى بياخدها بالعافيه وبالغصب ولو منعت نفسى ده ممكن يجنن أو يموتنى..لالالا..أنا خايفه
فتكات : يا خايبه ده السلاح السرى للمرأه.. الست الناصحه بتعرف تستخدمه صح تقدر تحقق بيه كل طلباتها بالمنع والقبول طالما معاها واحد ما عندوش دم..عارفه يابت حكاية العصايا والموزه..ما عرفش قولى..الراجل القرداتى لما ييجى يمرن القرد بتاعه يطلب منه يعمل عجين الفلاحه أو نوم العازب يقوم القرد يغلط أو يزرجن يقوم القرداتى ملسوعه بالخرزانه لحد مايعمل الحركه صح يقوم يديله الموزه فيعرف الفرق..يعنى أيه..يعنى مافيش موز لحموده لحين أشعار آخر
فهمتى ياموزه ياكلبوظه أنتى..فخمتو هههههههههه
فى صالة فوزيه للألعاب الرياضيه
فوزيه: أنتى بتتقدمى بسرعة يازينات أنا مبسوطه منك ..والنتيجه واضحه على وشك قدرتى ترعبى المفش ..جيبتى الأكياس معاكى ...أيوه أهه
شوفى ياستى خلى جوزك يشوفك وأنتى بتخبيهم فى أى حته ولما يسألك أعملى نفسك هبله وماتريحهوش وردى عليه ببرود وما يهمكيش منه هو كده أبتدى يستوى وعايزاكى تتقلى على الرز لما يتفلفل وحقولك بعد كده تعملى فيه أيه
ميعادنا بعد بكره وقتك أنتهى ياشابه
( تدخل زينات غرفة النوم وتخبئ خلفها لفة الأكياس وتقوم بوضعها فى الدولاب بين الهدوم فيتنبه حموده لهذه الحركه المريبه فيتركها تخرج ويقوم من السرير ويفتح الدولاب ويستخرج لفة الأكياس ويفتحها فيصرخ
حموده : زينات ..زينااات تعالى هنا بسرعة ..أيه الأكياس الكتير دى حطاها ليه هنا فيه أيه يابت أمبابى
زينات ببرود : كنت فى السوق النهارده لقتهم روخاص فاشترتهم
حموده : وحتعملى بيهم أيه يافالحه
زينات : أهم ينفعوا نحط فيه شندوتشات العيال نحطى فيهم لحمه جوه التلاجه الأمر مايسلمش أهم مايخسروش..ومخبياهم بعيد عن أيدين العيال فيها حاجه دى تخليك تصرخ وأنت مرعوب كده أيه أللى جرى لك يا سبعى..أنت خايف من أيه
حموده : حخاف من أيه أنا يهمنى من الحركات دى
زينات: حركات أيه هو أنا بعرف أعمل حركات ..نام نام ولا تحب أعمللك كوباية شاى تقيله تظبط بيها دماغك
حموده : مش عايز زفت ..مش عايز منك حاجه أخرجى وأقفلى الباب وراكى تتك الهم ( ثم يقوم حموده بأغلاق الباب بالمفتاح خلفها وهى تبتسم عند سماعها صوت المفتاح وهو يدور فى الكالون ..وتقول : رجاله تخاف ما تختشيش )
الحلقة رقم (8)
مرحلة الردع
يمر شهر وحموده فى حاله من الخوف والحذر ويحاول أن يتقرب من زينات ولكنها تتبع تعليمات فوزيه وفتكات وتنفذها بكل دقه مع مداومتها على التمارين فى صالة الألعاب وتأخذ الحقن التى وصفتها لها فوزيه فبدأت تظهر عليها علامات الصلابه وتتشكل العضلات وأحست بالقوة والعافية مع النظام الغذاء الصارم الذى تتبعه
فوزيه : تلات تشهر كمان يازينات وتقدرى تنافسى على بطولة كمال الأجسام الحريمى ..من النهارده نبتدى نتعلم على حركات المصارعة والأشتباك وحنبدأ بتعليمك الضربات المعجزه أللى تقدرى تشلى بيها حركة الخصم ..جاهزه ردى جوه
الحركه الأولى: الضرب بالقدم تحت الحزام ..كده بقوة يازينات..ده لو الخصم بعيد عنك بخطوات وتكون مفاجأة وبسرعة
الحركة التانيه : الضرب بالركبه تحت الحزام ..كده ..نشنى كويس ..وتتعمل فى حالة ألتحامك بالخصم
الحركة التالته تكون بالضغط على مفاصل القدم أو أحد الزراعين فى عكس أتجاه حركتهم الطبيعيه وكل ماتكون بقوة تجعل الخصم يقوم بالأستسلام كده ..برافو زينات أستمرى فى التمرين مع زميلتك وبكره نكمل حركات الرقبه والوجه والساقين
( تعود زينات يوما بعد التمرين وهى تشعر بأنها قد بدأت المشوار الصحيح لردع حموده المفش وتتحسس عضلاتها التى نمت وأستدارت وأنتفخت كعضلات الرجال وهى تمشى بقوة وخفه ورشاقه ولا أجدعها شاب..وتفتح باب الشقة فتجد حموده يجلس فى أنتظارها وهو يتطاير من عينه الشر)
حموده : كنتى فين ياهانم
زينات بتحدى: كنت بأقضى شوية مشواير وزيارات..فيها حاجه دى
حموده : ردى كويس يابنت الـ...
زينات : لم لسانك الزفر ده لأقطعهولك
حموده: أنتى بتردى عليا يابت طب تعالى بقى
زينات : خليك عندك ياحموده أحسن مش حيحصلك طيب
حموده : فرجينى كده حتعملى أيه ؟؟
زينات : طب أستنى عليا لما أقلع وأجيلك
حموده يضحك : ماتلعبيش بعداد عمرك يابنت المجنونه
زينات بعد أن خلعت ملابسها وأرتدت فانله نصف كم وبنطلون ترننج وقفت فى أمامه فى وضع الأستعداد وهى تلف يدها يمينا ويسارا أمام وجهها كلاعبى الكارتيه
حموده : يانهار أسود أيه ياوليه العضلات دى طلعت لك أمتى ..عامله فيها راجل
زينات : جاهز ياحموده ..جاهز ياروح أمك
زينات تباغت حموده بضربه بكل قوتها بالشالوت تحت الحزام فيصرخ من شدة الألم ثم تهجم عليه وتأخذ ذراعه فى حركة قيادة وتضغط على مفصل الكوع بقوة وهو يتوجع ولا يستطيع القيام من الأرض ..حتحترم نفسك ولا لأ ..أكسر دراعك
حمودة يتلوى من الألم ..ويرفع ذراعه مستسلما..خلاص خلاص حتكسرى دراعى يابنت الكـ...............لـــــــب
ثم تقوم بضربه بالبوكس فى وجهه لتطرحه أرضا وتتركه وهى تنفض يدها منه ..البوكس ده علشان طولة لسانك (طاخ ..أآى)
زينات : من هنا ورايح مش عايزه أسمع صوتك وألا حتكون نهايتك أنت وعداد عمرك على أيدى..ولو حاولت تترازل وشيطانك لعب فى مخك وتمد أيدك حخلص عليك
عايز تعيش بأحترامك أهلا وسهلا ..مش عايز فكل يوم منده ..بس دى حاجه كده على ما قسم يا مفش
حموده وهو ينظر إليها بذهول : أنتى مين ياست أنتى ..زينات راحت فين
زينات : زينات ماتت خلاص وأنت أللى موتها وأنا باخد بتارها..باخد تار سنين الذل والبهدله أللى شوفتهم على أديك لحد ماتتوب وتحترم نفسك سامع ولا تحب تشوف
حموده يجلس مذهول وهو لا يصدق ما حدث ويخبط وجهه بيده ليتأكد بانه صاحى ولا يحلم وهو يردد: زينات أتقلبت راجل . .زينات أتقلبت راجل. زينات أتقلبت راجل
يا نهار أسود يا نهار أسود أنا فى حلم ولا علم يا فضحيتك يا حموده
زينات : قوم ياراجل وبطل لطم على وشك زى الستات أغسل وشك وأدخل جوه عشان أحطلك السم الهارى ...مش عايز آكل ..أحسن وفرت
الحلقه رقم (9)
ثورة التصحيح
تستمر زينات فى متابعة التمارين والتعلم على فنون القتال على يد الكابتن فوزيه وتستطيع أن تردع حموده كلما أراد أن تسول له نفسه بمد يده عليها
فتنكسر نفسه ويتحول من وحش هائج إلى حمل وديع ينفذ ما تأمر به زينات بدون تردد
وبعد سنه من أخضاع حموده المفش ترتدى زينات ملابسها وتستعد للخروج زينات : حموده ..نعم يازينات أأمرى ياحبيبتى هو أنتى خارجه ..أنا مش قلت لك أوعى تسأل السؤال ده تأنى ..حاضر يازينات ..أنا خارجه عند ماتش كوندفو على البطوله ..عايزاك تذاكر للعيال وتراجع دروسهم وبعد كده تحميهم وتعشيهم وبعد ماتنيمهم عندك فى الحمام حتتين غسيل أتسلى فيهم
حموده : حاضر يازينات مش حتتعشى معايا
زينات: لأ..أتعشى أنت وعايزه آجى ألاقيك نايم مش عايز أشوف وشك( ثم تقوم بضربه على بطنه) ..ألعب شوية رياضه علشان تنزل القرف ده أصلك بتاكل فى قته محلوله ..ما تنساش تنزل تشترى لبن وبيض وعيش للفطار والعشا..ثم تخرج وتعود مره أخرى.. ما تنساش تغسل المواعين وتنشر الغسيل وتغسل رجليك قبل ماتنام
حموده : حاضر يازينات تروحى وتيجى بالسلامه ومعاكى الكاس ياحبيبتى
زينات : أف أف مش عايزه أسمع كلمة حبيبتى دى تانى بتجيبلى العصبى
حموده : حاضر يا حبيبتى ...أف غبى أنا مش عارفه مستحملاك أزاى.. غور من قدامى الساعه دى..صدق من سماك المفش
الذكرى الثانية لثورة التصحيح
تدعو زينات فتكات وفوزيه للأحتفال بذكرى الأنتصار على حموده المفش فيجتمعوا جميعا حول تورته بها شمعتان وهم يتسامرون ويضحكون ويخرج عليهم حموده بعد أن قام بأرتداء ملابس حريمى وعمل مكياج صارخ وباروكه وهو يحمل صنيه عليها فناجبن القهوه ويمشى يتمخطر أمامهن ويهز فى نفسه كحال النساء ويمضغ لبانه فى فمه ثم يضع الفناجين أمامهن
حموده : القهوة يابهوات
فوزيه وهى تشهق : مين دى!!
حموده : خدامتك حميده ...حموده سابقا قهوتك أيه ياكابتن( فوزى) !!
فتكات : أيه أللى عامله الراجل ده فى نفسه
حموده: عيب كده ياكابتن( فتك )..أنا راجل برضه دا أنتم الرجاله وستين رجاله قهوتك أيه يا جميل يامتختخ أنت!!
زينات : حموده أيه أللى جرى لك أنت أتجننت
حموده : أنا بعقلى أهه ياكابتن (زين )يا جوزى يا حبيبى..خد راحتك أنت وأصحابك على ما أرضع العيال وأجهز لكم العشا..والله ياجماعة منورين بس مالكمش حق تيجوا كده من غير ستاتكم .. كانوا على الأقل ألاقى حد من الحريم أرغى معاه هئ هئ هئ (ضحكه رقيعه )
زينات وهى تصرخ : أتعدل ياحموده وبطل حركات الجنان دى وألا ..
حموده : وألا أيه ؟؟ تضربنى قدام صحابك ياكابتن ..ضرب الحبيب زى أكل الزبيب
زينات يصعب عليها حال حموده فتبكى وهى تقول : أنتم السبب فى ضياع الراجل ده منى أنتوا السبب أتفضلوا من غير مطرود ..أطلعوا بره... بره
فوزيه وهى خارجه ومعها فتكات : الحق علينا أن أحنا ساعدناكى أنك تكسرى شوكته ونخليكى بنى آدمه
زينات : بره بره ياريتنى ماكنت سمعت كلامكم ياريتنى مامشيت وراكم ضيعتوا الراجل ياظلمه
زينات تحتضن حموده وهى تقول : أللى أكسر يتصلح ياحبيبى
حموده : كل حاجه يازينات ممكن تتصلح ألا الراجل لو كسرته مراته
النــهــايــه
المقدمه : التضحيه هى دليل الحب ..فعندما يحب الأنسان حب كبيرتكون تضحيته أكبر بحجم ومقاس هذا الحب ولا يتوانى أن يقدم أعز ما يملك من أجل حبيبه أنها قصة منخار حبيبى التى أبكت وأضحكت ملايين العشاق..وكانت مشروع التخرج للعبد لله من معهد السينما عام 2008..ولكنها لم ترى النور فقد رفضت اللجنه عرضها لأنها تسخر بطريقة مباشرة غير مباشرة من بعض أعضاء اللجنه الموقره واللجنه الأولمبيه المصريه..ولكنى قررت عرضها فى رطلين مخ بقهوة كتكوت بالرغم من أنوفهم جميعا ..طفى النور ياجابر ووزع اللب والسودانى وماتنساش تسيب لى شويه وأعمل حساب الناضورجيه الحلقة رقم (1 )
المشهد الأول منزل شعبى متواضع تجلس هدى على الكنبه وهى تبكى وتغطى مناخيرها بمنديل كلينكس الأب (الحاج سيد ) يدخل من باب الشقه وهو مهموم ويجلس بجوار هدى هدى : عملت أيه يابابا اللجنه.. وافقت؟؟ سيد: وافقت من حيث المبدأ بتعيينك مذيعة فى الأذاعة ولم توافق على تتعيينك فى التليفزيون ألا بعد ما تعملى العمليه ياهدى يابنتى هدى : علشا ن مناخيرى برضه (الأب يهز رأسه فى أسى ) الأب وهو يطيب خاطرها : ماتزعليش يابنتى ..دى حاجة بتاعة ربنا ومالناش دخل فيها..وبعدين دى حاجة وراثيه فى العيله..وأحنا مشهورين بيها عيلة أبو منخر أكبر عيله فى الصعيد زى عيلة أبو العينين وعيلة أبو ودان وعيلة أبوشنب وعيلة شعراوى وأبو الروس والقفا وبؤوه وأبو سنه وأبو أصبع وأبو مصران وأبوكف وأبو ضهر وغيرهم كتير يابنتى هدى : يعنى مستقبلى يضيع علشان عيلة أبو منخر وكان لازم حضرتك تتجوزلى من نفس العيله ومين من بنت عمك.. (منخر السوهاجى) مش قادر كنت تتجوز واحده مارخرها قد النبقه ولا حتى قد البلحه الأم وهى غاضبه : أختشى ياهدى وخلى عندك دم هو كان أبوكى حترضى بيه أى واحده بمارخيره أللى قد كوز الدره ألا واحده من العيله الأب : ماتعيبيش يا صفيه يابنت منخر السوهاجى علشان مناخيرك قد البطاطسيه يعنى.. شايفه نفسك.. وأنتى كنتى تطولى تتجوزى واحد زيى صفيه : أسكت ما تقلبش المواجع العيال كلها طالعه شكلك ياسيد كل عيل مناخيره بتخبط فى اللى جنبه سيد : سبونا من الكلام ده دلوقتى لازم نشوف حل (لهدى) لازم نعملها عملية تجميل عشان مستقبلها هدى : أنا قرأت النهارده فى الجرنان أفتتاح أكبر مستشفى للتجميل فى مصر وفيها تخصص جديد لتصليح عيوب الأنف سيد : من بكره ياهدى نروح المستشقى ونشوف الدكتور بتاع التخصص ده يمكن ربنا يكرمك على أيديه قولى يارب ********* الدكتور نادر بؤوه أخصائى جراحة تجميل الأنف والشفتين المنظر الثانى فى مستشفى التجميل وفى غرفة الكشف دكتور نادر: أوه فانتستيك ميسز هدى مراخيرك من النوع المروحى النادر عايزه مجهود كبير لتصليحها سيد : يعنى فيه أمل يادكتور نادر : ربنا يسهل ..لأننا محتاجين نشيل المنخار بالكامل وتصليح عضمة الوجه لتناسب المراخير الجديده وياريت تلاقوا متبرعين بأنوفهم لوفشلت العمليه سيد : ماتشلش هم يادكتور عيلتنا كلها مافيهاش غير منخار وكمان منخار محترم.. حضرتك ما سمعتش عن عيلة منخر فى الصعيد نادر :فانتستيك عيله منخر ده الواحد كده يقدر ياخد دكتوراه من عندكم وعلى كل حال الأسبوع ده حناخده تحليلات للأنسجه أللى تتناسب مع أنسجة هدى سيد : أنا مناخيرى ومناخير أمها وأخوتها تحت أمرك يادكتور ولو عايز أبعت أجيب 30 أو40 شحط من عيلتنا فى البلد أنت تأمر المهم هدى تعمل العمليه و تخش التليفزيون نادر : حنبدأ من العيله أولا ..تيجى بكره أنت والمدام والأولاد لأخذ العينات منكم وتتحجز هدى عندنا لعمل الرسومات اللازمه ومطابقتها مع وجهها أنت نفسك ياحاج سيد عايز تتصلح مناخيرك سيد : أنا خلاص يادكتور الناس خدت عليها ومش مضيقانى فى حاجه والله حسن الختام نادر : ماتيجى أنت وولادك ومراتك أخدكم شروه واحده حعملكم تخفيض هايل حتحس بتغيير كبير فى حياتك صدقنى سيد : خلص بس المارخير أللى قدامك ونشوف النتيجه
الأعداد والتصميم يقوم الدكتور نادر ومساعديه بتصوير هدى ووضع صورتها على الكمبيوتر وتجربة المنخار المناسب لوجهها حتى تم الأتفاق على المنخار وبموافقة هدى بعد أن أستعرضت كتالوجات الأنوف الجميله وأختارت المنخار السمبتيك لنجمة هوليود مارلين مانرو نادر : فين نتيجة تحاليل الأنسجه لعيلة هدى يادكتور دكتور المعمل : للأسف الأنسجه مش مطابقه لأنها من النوع النادر.. نادر : وبعدين هاتوا أبوها يشوف لنا حل أبوها موجود بره يادكتور سيد : خير يادكتور نادر : أنسجتكم مش مطابقه لأنسجة هدى ..أتصرف ياحاج( سيد) مش بتقول أنكم من عيلة منخر فى الصعيد هات لنا أكبر عدد من العيله نشوفهم ونختار المناخير المناسبه وفرصة للمتبرع نصلح له مناخيره سيد : أدينى مهلة تلات أربع تيام أسافر البلد أجيب لك شويه من قرايبنا نادر :ما تتأخرش ياعم سيد عن كده...ربنا يسهل فى الصعيد المنظر الرابع قطار الصعيد والحاج سيد يودع عائلته ثم الأنتقال لمنزل ريفى فى دوار العمده يسافر عم سيد إلى بلدهم فى الصعيد كفر أبو منخار ويقابل أبن عمه العمده ويشرح له الموضوع.. العمده : بسيطه ياحاج سيد أحنا علينا ننشر الخبر فى العيله ونشوف مين عايز يتبرع بجزء من مناخيره لبنتك وعلى الله التساهيل ياواد عمى يمر يوم وأتنين ولم يتقدم أى متبرع..يقلق عم سيد سيد : وبعدين ياعمده أنا أللى كنت فاكر أن بلديتنا كلهم حييجوا معايا ده مفيش ولا واحد أو واحده راضى يقرب من الدوار هو فيه أيه ياعيلة منخر السوهاجى.. فرحانين بمناخيركم قوى بلا نيله العمده : كل حى حر فى مناخيره ياسيد ياخويا..وعلى كل حال بكره الجمعة حنخلى سيدنا يكلم الناس بعد الصلاة يمكن تلاقى حد ييجى معاك مصر يتبع
الحلقة رقم(2 )
المنظر الخامس فى ساحة مسجد القريه بعد أنتهاء الصلاة وقف سيدنا وطلب من المصلين بعدم مغادرة المسجد وطلب منهم الوقوف بجانب بنت عم سيد قريبهم فى محنتها والتبرع بجزء صغير من المنخار لتكتمل العمليه الشيخ: كان الله فى عون العبد مادام العبد فى عون أخيه وأنا شايف قدامى ماشاء الله مفيش ولا أكبر ولا أضخم من مناخيركم يابنى منخر الكرام فمدوا يد العون لأخيكم سيد وأبنته جازاكم الله خيرا يوسف المنخراوى :أيش ضمنى ياعم الشيخ أن مناخيرى حتفضل سليمه بعد العمليه مش ممكن مناخيرى تروح خالص وأعيش مشوه بقية عمرى همهمه بين الحضور ومؤيدين لكلامه..أيوه صوح..أيش يضمنا يامولانا صادق المنخراوى : فيها أيه يعنى بنتك لوفضلت بمناخيرها ياحاج سيد زى ماهيه..ماهو بناتنا وستتنا كل واحده مناخيرها قد فردة المداس ومبسوطين وعايشين تمام التمام ما حدش منهم أشتكى من مناخيره صوت آخر : ده حرام ياسيدنا تغيير خلقة ربنا الشيخ : يعنى مش موافقين ... (فى نفس واحد )..مش موافقين يعود عم سيد من الصعيد وهو حزين بعد أن خذلوه أبناء بلده وعمومته فلم يجد متطوع واحد ولو بالفلوس ليحضر معه إلى القاهره
المنظر السادس فى المستشفى ..فى مكتب الدكتور نادر ويذهب عم سيد إلى المستشفى لمقابلة الدكتور نادر ويحكى له قصة فشله فى البلد نادر : العمليه بتاعة بنتك دى مهمه جدا بالنسبه لى هى تحدى بالنسبه لى فى أجراء جراحه على هذا النوع من الأنوف ولا يوجد أمامنا غير المسابقه السنويه أللى بتنظمها جمعية الأنف أللولبى سيد : مسابقة ؟؟ .. نادر : مسابقة أكبر مراخير فى مصر وحتكون جوايزها 20 ألف جنيه جايزه أولى وحنعلن عن هذه المسابقة فى جميع وسائل الأعلام وسنأكد بأننا سنقوم بأجراء جراحة تجميل للفائز وبالمجان.. وفرصة نجرى فيها تحليلات لأكبر عدد من المتقدمين لنختار الشخص المناسب لأجراء عملية هدى سيد: فكره جهنميه وأنا عليا كل مصاريف المسابقه يادكتور ..توكلنا على الله..ربنا يجعلك فى كل خطوه مارخير يوم المسابقه المنظر السابع تدور الكاميرا لتصور الأعداد الحاشده من المتسابقين داخل وخارج المستشفى ويتم أخذ مناظر (كلوز أب ) على وجوه وأنوف المتسابقين نادر : ياه أنا ماكنتش متخيل العدد الكبير ده من المتقدمين للمسابقة ستات وبنات ورجاله وشباب وشيوخ وأطفال كمان.. القاعه مش مكفياهم دول محاصرين المستشفى وفارشين فى الشوارع أللى حولينا ومعطلين المرور د. نعمان (نائب المدير ): والعمل يادكتور نادر نادر :أحنا نقسمهم على خمس تيام وبعدين نعمل تصفيات لنصل للفائز نعمان :أوكي حخليهم يعلنوا الكلام ده فى الميكروفون ويمشوا الناس الزياده ونشتغل على الموجودين فى القاعه دلوقتى..شوفولى مدير الأمن
وبعد ساعه يحضر مدير أمن المستشفى ممزق الثياب ومحمول على نقاله فوزى مدير الأمن وهو يتوجع : قطعونى يادكتور لما حاولت أمشيهم عجنونى بين مناخيرهم.. عمرك شوفت حد يضربك بالبوكس بمارخيره فى عينك ...أتصل بالبوليس أحسن حيكسروا المستشفى نادر : ألوه بوليس النجده لوسمحتم ألحقونا المستشفى محاصره وفيه خطر على حياتنا ..يا تلحقونا يا متلحقوناش ..أنا مين ..أنا الدكتور نادر بؤوه مدير المستشفى..بؤوه ..أيوه بؤوه ياسيدى فيها حاجه دى..حالا حنكون عندك أستطاع البوليس تفريق الحشود الغاضبه بعد أن تم تعليق يافطه على باب المستشفى بالأحرف الأبجديه موزعه على مدار الأيام الخمسه عملية الفرز النظر الثامن قاعة مسرح وعلى المنصة تجلس هيئة التحكيم والدكتور نادر فى الصدارة وأمامه الميكرفون نادر : اللجنه جاهزه ..المحكمين فى أماكنهم..جاهزين يادكتور لو سمحتم الأخوة مندوبى وكالات الأنباء والتليفزيون فى أماكنكم .... بسم الله الرحمن الرحيم سنبدأ المسابقه بصعود عشره عشره من المتسابقين الذين تم نجاحهم فى الأدوار التمهيديه والدور الستاشرعلى خشبة المسرح والمرور أولا أمام لجنة التحكيم لمراجعة مقاييس الأنف وسنبدأ بالمقاييس المتوسطه 30 سم مكعب ثم 60 ثم 100 ثم السوبر ثم الأعلى فالأعلى مع أستعراض مواهب كل منهم لمنحه درجه من ميه ..موسيقى يبدأ العرض الأن هدوء من فضلكم يقف المتسابقين طابور خلف مقياس الأنف الألكترونى ويدخل المتسابق مناخيره فيه فتظهر قرائة العداد بالحجم والمقاسات..ويعلن المذيع الداخلى أسم ورقم المتسابق وحجم أنفه والطول والعرض ..مع تصفيق الحضور ويدخل أحد المتسابقين أنفه فيتوقف العداد الألكترونى عن العد مع صمت تام فى القاعة مع همهمه صامته لتوقف المسابقه نادر : شوف المشكله دى يابشمهندس حسين شوف الجهاز ماله لوسمحت صلحه بسرعه عندنا لسه ناس كتير التليفزيون بيصور أحنا على الهوا يا جماعه حسين يلف خلف الجهاز فيجد مناخير ضخمه محشوره فى الجهاز مين صاحب المناخير دى ..صاحبها واقف هناك عند الباب..ده يادوبك دخل أولها ولسه باقى 2متر حسين : مناخير الراجل أتحشرت ومش عايزه تطلع يادكتور شدوا معايا يارجاله يفشل الحاضرين فى تخليص مناخير المتسابق من الجهاز وهو يقف يضحك وكلما زاد الضحك يهتز الجهاز فوق الأرض حسين : أنت أسمك أيه ياجدع أنت ..محسوبك( منخار شان) بطل العالم فى رفعة النطر بالمناخير والحاصل على الميداليه الذهبيه الوحيده لمصر فى دورة بكين الأوليمبيكيه منخار شان :أبعد أنت وأللى معاك بعيد وفضوا القاعة من الناس عشان الجهاز بتاعكم ده حطيره دلوقتى حعد من واحد لعشره ماشوفش مخلوق هنا تخلى القاعه ويتعازم (منخار شان) فيرفع الجهاز من الأرض ويلف به كام لفه ويطلقه كالطلقه فينزل على الأرض ستين حته وسط دهشة الحاضرين نادر: الله أكبر أخيرا وجدنا الفائز بالجائزة تصفيق حاد ..ينطلق صوت جهورى ..لا أوقف المسابقه لقد وصل الأقوى والأعظم فينفتح شباك فى القاعة على مصراعيه لتدخل مناخير طويله ومعلق عليها يافطه مكتوب عليها صاحب هذة المناخير سيصل بعد ساعة التوقيع المنخار الأعظم
الحلقة رقم (3 ) المنظر التاسع فى الصاله المغلقة بأستاد القاهره نادر :وبما أنه قد ظهر منافس جديد( لمنخار شان) فلزما ولابد من عمل تصفيه بين المتسابقين لمنح الفائز قيمة الجائزه وستكون حلبة المصارعة هى الفيصل بينهم ومن يستطيع أن يضع مناخير منافسه الأرض لمدة دقيقة يعتبر هو الفائز ...تصفيق حاد يقف المتصارعين وجها لوجه على بساط الحلبه وبينهم الحكم ويقوما بالتصافح بالمناخير ويقف الحكم بينهم يذكرهم بشروط المسابقه بعدم أستخدام الأيدى أو الأرجل أو العض أو شد الشعر وتستخدم المناخير فقط فى الصراع والفائز هو من يستطيع تثبيت مناخير منافسه على البساط لمدة دقيقه ..والمبارة من تلات جولات كل جوله 3 دقائق مستعدين موافقين على الشروط ردى جو..الجوله الأولى تتشابك المناخير فى قوة ويرتفع صوت المشجعين لكلا الطرفين (بالطول بالعرض حنجيب مناخيره الأرض) وتفوق المنخار الأعظم على منافسه فى الجوله الأولى والثانيه ولكن( منخار شان) كان خفيف الحركة وسريع ويقوم بحركات بهلوانيه رشيقه بمنخاره وجائت الجوله الثالثه والأخيره فينقض( منخار شان )على (المنخار الأعظم) وبحركة بهلونيه سريعه يلف منخاره على منخار( المنخار الأعظم) ويضغط بقوة ويرفعه فى حركة نطر تتطرحه أرضا ويقوم بتثبيت المنخار لمدة دقيقة مع صيحات المشجعين (منخار شان يا أبهه.... أيه العظمه دى كلها ) ويقف حكم المبارة فى منتصف البساط ويمسك منخارهما بيديه ثم يرفع منخار ( منخار شان) عاليا ليعلن فوزه الساحق بتثبيت المنخار باللفه الفنيه ويجرى منخار شان حول التراك ليحيى الجماهير ويتلقى القبلات على منخاره الجبار ويتقدم للمنصة للتويج وأستلام الجائزه والميداليه التذكاريه من رئيس الأتحاد المصرى للمصارعة بالمناخير التى تعلق فى منخاره تكريما له وتقوم هدى بوضع الميداليه بمنخار ( منخارشاه ) وهى تنظر إليه نظرة حب وأعجاب فيرفرف كيوبيد بينهم وتقع نظرة الحب فى قلب( منخار شان) فيهز لها منخاره تعبيرا عن أعجابه وحبه لها فيهتز منخار (هدى) طربا ردا على تحية الأعجاب تضحية منخار شان
(عندما يجمع الحب بين منخارين تهون المصاعب فى سبيل هذا الحب) المنظر العاشر فى أحد الكازينوهات على ضفاف النيل ساعة مغربيه منخار شان : أنا مستعد أضحى بمناخيرى كلها من أجل أسعادك ياهدى هدى : لا ياحبيبى فمنخارك عزيز عليا قوى ويكفينى فخرا أنى أرتبط بمنخار عالمى مثلك... يغور الشغل فى التليفزيون يا حبى من أجلك منخار : أنا سعيد أن أقدم لك جزء عزيز عليا عربونا لحبنا هدى : منخارك تحتاجه مصر فى الألعاب الأولمبيه بعد الفشل فى جميع اللعبات الفرديه والجماعيه.. أنت بطل قومى أوليمبيكى فلا يجوز أن أحرمك من البطوله ومشجعينك ومعجبينك منخار: كله يهون من أجلك يا حبيبتى هدى : أنت أنسان رقيق المشاعر ورومانسى يامنخر ..أنا خلاص مش عايزه أعمل العمليه وكفايه أن أرتبط بأنسان عظيم زيك منخار : أرجوكى ياهدى أقبلى تضحيتى عربونا صادقا لحبنا فقطعة صغيرة منها لم تؤثر فيه أطلاقا أنشالله ياخدوا نص متر منها.. أريد أن أترك الساحة الرياضيه وأنا فى قمة مجدى وأفتح الطريق لمناخير شابه تكمل المشوار وسأنضم لعالم التدريب أو التعليق وسأرشح نفسى فى الأتحاد المصرى لمصارعة المناخير هدى : يا حبيبى يامنخورى ..ياحبيبتى يامنخورتى.. وتتلاقى مناخرهما فى لحظة حب رائعه والشمس فى لحظة الغروب وهى تسقط شعاعها الأحمر القانى على صفحة النيل مع تغريد الكروان وزقزقة العصافير المنظر الحادى عشر فى مستشفى الدكتور نادر بوؤه وهو يقوم بفك الشاش والضمادات من على وجه هدى وتقف عائلتها من حوله ومعهم( منخار شان) وهو يربط مناخيره بالشاش بعد أستئصال جزء كبير منها..والكل فى لحظة ترقب ليشاهد منظرها الجديد والكل يدعو لها بالشفاء والنجاح..وتترقرق الدموع على وجه منخار شان وهو يشاهد هدى بوجهها الجديد جميلة كالبدر ويحضر الدكتور نادر المرآه لترى هدى شكلها بعد العمليه ..وينسحب منخار شان بهدوء من الغرفه قبل أن تفتح هدى عينيها نادر : فتحى عينيكى ياهدى وقولى أيه رأيك !! تفتح هدى عينبها ببطأ ثم تغلقها مرة أخرى ثم تفتحها ثانيه وهى تصرخ صرخات الفرح والكل من حولها يبكون ويقبولونها ويباركون ويحمدون الله على نجاح العمليه ووسط هذه الفرحة والهرج والمرج تبحث هدى بعينيها عن منخار شان الذى أختفى هدى : فين منخار شان ..فين حبيبى فين منخار ..كان موجود هنا دلوقتى دوروا عليه هاتولى منخار شان هاتولى حبيبى ..أنا ماكنتش عايزه العمليه أنا عايزه حبيبى ..وهى تبكى بحرقة المنظر الثانى عشر هدى تقف بظهرها للكاميرا وهى تنظر من خلف زجاج نافذة غرفتها بالمستشفى وتتعلق بالستاره وهى تشاور بيدها لوداع منخار شان الخارج من باب المستشفى وتظل الكاميرا متابعاه حتى يتضائل ويختفى وهى تتحامل على نفسها وتمسك منخارها الجديد وهى تبكى .....الوداع ياحبيبى ...الوداع يامنخارى المنقذ....الوداع ياتوأم روحى ثم تسقط مغشيا عليها وتخرج النهايه من تحت السرير ويتبعها أسماء الكاست( العاملين والممثلين والمصورين والديكور والمكياج والملابس وكل من عدى من أمام الأستوديو أوشرب كوباية شاى ) النـــــــــهـــــــــــــايـــــــة
أسرة الفيلم تقدم الشكر والتقدير لكل من عوانها فى أتمام هذا العمل الفنى المتواضع وتخص بالشكر كل من مدير أمن القاهرة وأدارة الأستاد وأتحاد مصارعة المناخير ومستشفى الدكتور بؤوه مدير وهيئة تمريض وعمال البوفيه كما تخص بالشكر عائلة سيد منخر السوهاجى فرد فرد مناخير مناخير والمعلم عصفور صاحب المقلاه وإلى اللقاء فى عمل فنى جديد
ملحوظه هامه جدا جدا : أنا مش خريج معهد السينما ولا المسرح ولا التليفزيون وليس لى علاقة بهما من قريب أو بعيد... اللهم سوى الجلوس فى مقاعد المتفرجين نور النور ياجابر
بمارخيره أللى قد كوز الدره ألا واحده من العيله
تخصص ده يمكن ربنا يكرمك على أيديه قولى يارب
