المرأة الحديديه

المرأة الحديديه

بعد أن سمعت ( زينات ) عن فتوى مفتى السعوديه بأن من حق المرأة الدفاع عن نفسها ضد عدوان الرجل ومن حقها أن تضربه كما يضربها
باتت تفكر فى وسيله تجعلها قادرة على رد العدوان والأيذاء الذى يمارسه معها زوجها( حموده المفش)
فمنذ أن تزوجت هذا الرجل وهو يصبحها بعلقة ويمسيها بعلقة بسبب وبدون سبب فعاشت كسيرة مذلوله فى بيته ويعايرها نساء العيله والجيران بضعفها وقلة حيلتها مع هذا الرجل الباغى الظالم........... وفى جلسه حريمى بين زينات وجارتها (فتكات) دار بينهما هذا الحديث
الحلقة الأولى
فتكات : ما ينفعش الكلام ده يازينات يا حبيبتى كل يوم تتضربى علقه وننام ونصحى على صريخك.. طب بلاش كل يوم... خليها ياختى كل شهر ده أنتى صحتك على قدك مش حمل الضرب ده كله
زينات : ما أنتى شايفه يا فتكات حموده عامل زى الوحش الخبطه من أيده بتكومنى على الأرض ..أعمل أيه ؟؟ ومعايا تلات عيال ومقطوعه من شجرة فكرت كتير أنى أطلق منه.. تصعب عليا العيال.. وحروح فين وآجى منين ولا حلتى مال ولا جمال ومأعرفش حد فى البلد دى
فتكات : مالكيش قرايب ولا أعمام ولا خلان يقفوا للراجل المفترى ده
زينات : ولو فيه.. يقدر حد على (حموده المفش) وأجرامه وطولة لسانه منه للله البعيد ربنا على المفترى قادر يهده
فتكات : آمين ..حطى الكمدات دى على عينك أللى ما بلتحقش تفش تورم تانى ..ربنا يصبرك... يقدر( أبو صابر) يبص ناحيتى أو يعمل زى حموده بتاعك ده ... ده أنا كنت أكلته بسنانى
زينات : أنتى يا فتكات صحتك مسعداكى وماشاء الله عليكى طول بعرض وجسمك مليان تقدرى تضربى عشرة من أبو صابر أنما أنا ياحسره عليا مفييش زى العصفورة حموده بيطوحنى فى أخر الشقه زى الورقه
فتكات تخمس فى وجهها : النهارده الخميس يا حبيبتى ..بس أنتى اللى خايبه الحكايه مش بالجسم يا عبيطه شوفى القطه والكلب لما بيتخانقوا القطه أصغر من الكلب بكتير أنما بتبهدله وتخليه يدلدل ودانه ويجرى
الحكايه مش بالجسم والعضلات ..عايزه شخصيه وشجاعه وأنتى شخصيتك أتمسحت مع الراجل ده وجبانه على طول وخايفه تواجهيه
زينات : أواجه ثور زى ده أزاى قوليلى..ده ممكن يموتنى
فتكات : تتك خيبه ما أنتى ميته هو أنتى فاكره نفسك عايشه..شوفى الستات وهى بتتبغد وتتشرط وتتقنعر على رجالتها ويتمنوا ليهم الرضا يرضوا
..عارفه يابت يا زينات أنا سمعت فى التليفزيون أن الشيخ بيقول أنى من حقك تضربى جوزك لو ضربك يعنى تدافعى عن نفسك بدل ماأنتى واقفه قدامه زى العبيطه يلطش فيكى فى الرايحه والجايه ..مش قادره خوفيه هدديه أتغدى بيه قبل ما يتعشى بيكى ورى له العين الحمرا زينات : طب لو ضربنى
فتكات: ماهو بيضربك من غير حاجه ..بس حسسيه أنك ممكن تأذيه زى ما بيأذيكى..وبعدين يابت كلى وأتخنى وأملى هدومك ..بدل ماهو مستهيفك كده
زينات : هى الواحده بيبقى عندها نفس تاكل بعد البهدله دى أنا نفسى بتتسد وأقعد باليومين ما حطش لقمه فى بقى
فتكات : بسيطه كلى يا حبيبتى قبل العلقه حتى تقدرى تستحملى التلطيش وقلة الحيا بتاعته وزودى فى الأكل كأنك بتاكلى فى جتته.. عيزاكى تاكلى كأنه آخر زادك و تبقى زى البطه ودراعتك ورجليكى تملا ووشك يتنفخ كده بدل الأنيميا أللى أنتى عايشه فيها وبعد كده حعلمك القهر على أصوله
زينات : طب فيه حاجه تخلينى أتخن بسرعة
فتكات : فيه يا حبيبتى عند العطار ..الكيس المحوج ومربة خرز البقر والمفتقه ..وتكترى قوى فى أكل السمك والرز والعيش وماتهديش نفسك فى البيت وريحى على الآخر ده راجل مايستهلش غير ضرب البرطوشه
زينات فى أستسلام: خلاص يا أبله فتكات
فتكات : أبله أيه يابت ده أنا أكبر منك بشهور أبقا أبلتك منين يا دلعدى
ده ليه حق حموده يروقك كل شويه ههههههههه
عايزاكى تصحى وتفوقى لنفسك وكل يوم حاجى أقعد معاكى أديكى درس حريمى معتبر وعايزه أشوف النتيجه أول بأول..فوتك بعافيه حجيلك بكره وأجيبلك كل الطلبات من عند العطار
الحلقة رقم(2)
الدرس الأول

فتكات: يعنى ما سمعناش صوتك النهارده ..قولت آجى أشوفك ليكون المخفى خلص عليكى
زينات :رجع أمبارح متأخر دخل نام زى الشوال ماحطش منطق يظهر كان مونون ومتقل فى العيار ... وخرج من بدرى من غير ما يصحينى دخل على المطبخ وفتح التلاجه وقعد يلوغ وقام رازع الباب وقام فاتحه تانى..... وجه وقف فوق راسى وأنا عامله نفسى نايمه وقال لى: حسابنا لما أرجعلك يازينات يا بنت أمبابى..أفتكر المفترى أنه ما ضربنيش أمبارح وقام خارج آلهى ما يرجعه
فتكات : خدى الحاجه أهه خبيها منه ليلغوها هى كمان ويزيد فى أفتراه
وزى ما فهمتك عيزاكى تاكلى كويس وأنا شايفه خير ربنا كتير عندك
زينات: هو ماعندوش أهم من الأكل ..همه على بطنه داخل محمل من مجاميعه لحمه وفراخ وفاكهه ..بس فين النفس أللى تاكل
فتكات : عيزاكى تاكلى فى آخر زادك لحد ماتردى.. وتربربى ..عارفه الكلبه أللى عند أورمه الجزار مابتقدرش تمشى من كتر الأكل أزاىوما بتخليش أتخنها كلب يهوب ناحية الشارع
زينات :عيزانى أبقى زى الكلبه يا فتكات
فتكات : مع الجعر جوزك ده عيزاكى تبقى زى الوحش علشان يعملك ألف مليون حساب..المهم فى الفتره دى ما تتعرضيش ليه وكل حاجه قولى حاضر لحد ما تبقى تمام التمام
زينات: هو أنا بقدر أقول لأ ..ماشى يا فتكات حعمل أللى بتقولى عليه
فتكات: شوفى بقى بعد كده لما جسمك يملا وتشدى كده حاخدك لمدام (فوزيه) أللى فى الدور الأرضى بتاعة الرياضه حتخليها تظبطك أنا كلمتها أمبارح قالت لى خلينى أشوفها المسكينه دى ..
زينات: عايزانى فى أيه مدام فوزيه
فتكات: أنا لما حكيت لها حكايتك ..نزلت الدمعه من عينها وحلفت براس أبوها لتمرنك مجانا ولوجه الله
زينات : حتمرنى على أيه دى كمان
فتكات : حتمرنك كوندوفو..ومصارعه حره..وكيك بوكس وكارتيه وكل أللى يساعدك علشان تعرفى تدافعى عن نفسك
زينات وهى تضرب بيدها على صدرها : يالهوى يا فتكات عايزانى أضرب الثور ده طب أزاى.. ينفع ؟؟
فتكات : ينفع وينفع ونص بس سيبك من الجبن أللى أنتى فيه ده أنا عايزه أعملك كرامه.... ده كل ستات الحته لما عارفوا بحكايتك نفسهم ومنى عينهم يسووه على الجنبين بالشباشب
أسمعى الكلام أللى بقولك عليه وخطوه خطوه حنعرف أزاى نربيه ونكسر مناخيره المفش الجبان أللى مستتخن نفسه ..آه لو أطول زمارة رقبته
الكابتن فوزيه
فوزيه : أطلعى على الميزان ..لسه وزنك أقل ..عايشه على المفتقه ومربة خرز البقر ما ينفعش خدى الورقه دى فيها نظام غذائى ممتاز
بياخدوه بتوع الحديد وكمال الأجسام أمشى عليه لمدة شهر وأرمى الكلام الفارغ بتاع الستات أللى غاويه كلبظه وتربى لهاليط ..وخدى العلبه الكبيره دى تاخدى منها مرتين فى اليوم معلقة على كوباية لبن أو عصير..دى هديه من عندى وأمشى على البرنامج وتعالى أشوفك كل أسبوع لحد ما توصلى للوزن المناسب حنبدأ بالحقن وبعدين التمرينات بدون الحديد ثم بالحديد و بعدين حركات القتال
زينات : بلاش والنبى ياست فوزيه
فوزيه تتعصب وتجذبها من صدرها وهى تشخط فيها : بلاش ..بلاش أيه ياوليه يامغفله مش كفايه فضحانا فى وسط الناس ..خليتى الرجاله يطمعوا فينا ..أصحى يازينات لحنزلك صف أسناك أنتى عارفه أنا ما بحبش سهوكة النسوان والدلع أللى يفور الدم حتمشى على الكلام بتاعى أحسن والله أطلع أضربك أنتى وحموده المفش بتاعك ده ..سامعه
زينات وهى خائفة : حاضر حاضر ياكابتن فوزيه حعمل أللى حتقولى عليه بالحرف
فوزيه : تابعيها كل يوم يا فتكات وبلغينى على طول ..تتك القرف ست خرعه ما عندكيش دم... مش عارفه تخبطيه خبطه تشل حركته
زينات: هو أنا بقدر أقرب جنبه
فوزيه :..بكره حعرفك أزاى تصارعى الثور ده وتكسرى قرنه... بس واحده واحده معايا وتنفذى ألى بقولك عليه
زينات : بس أنا خايفه قوى ياكابتن
فوزيه : طلعوا الست دى بره قبل ما كعورها على السلم..ست جبانه على رأى المثل يافرعون أيه فرعنك قال مالقتش أللى يلمنى ..حتنفذى ولا لأ
زينات وهى خائفه : حاضر.. حاضر بس سيبى أيدى حتكسريها
فوزيه : حنشوف..أن ماخليتك تفصصيه بسنانك وتربى له الخفيف ما بقاش أنا الكابتن فوزيه عدوة الرجاله ..

الحلقة رقم (3)
العلقة
( وبعد شهرين حموده بعد الغداء يتمطع ويمدد على الكنبه وزينات تمر من أمامه وهى تحمل كوب الشاى وتذهب فى أتجاه المطبخ وهو يتابعها بنظره وهو مستغرب
حموده : ماشاء الله ما شاء الله.. تخنا وكلبظنا أهه وبقينا علينا القيمه والجلابيه حتتفترك من عليكى ليكى حق ما أنتى بتاكلى فى قته محلوله... تكمل زينات السير دون أن تلتفت لكلامه
حموده :أنتى مابترديش عليا يا بت أمبابى..أنا سمعك بتبرطمى وأنت ماشيه بتدعى عليا يابت الـ....تعالى هنا ورينى شكلك كده ؟؟
(زينات لاترد عليه وتدخل المطبخ وتقوم بغسل الصحون دون أن تعيره أهتمام ..يدخل ورائها حموده ويهم بضربها فتسحب سكين من أمامها وتشهرها فى وجهه وهى ترتعش)
زينات :عارف لو مديت أيدك تانى مفيش غير السكينه دى حدبها فى كرشك
حموده يفاجأ بهذا الموقف الجديد من زينات: فيهجم عليها ويخطف منها السكين ويضعها على رقبتها وهو يخنقها ..أتعلمتى تمسكى سكينه ياروح أمك ..أدبحك دلوقتى ..أنطقى وألا حخلص عليكى ( تعض يده التى تقبض عليها فيصرخ حموده من ألم العضه.. آى.. آى يابنت العضاضه ويبتعدعنها بعد أن ضربها بقبضة يده فتتحامل على نفسها وتغرز أظافرها فى وجهه فيزداد عنفا معها فتهرب إلى غرفة النوم وتغلق على نفسها الباب بالمفتاح وهى تشعر لأول مره فى حياتها بأنها حققت حلم طالما تمنته.. أن تراه وهو يتألم مثلها
حموده وهو يضرب على الباب بعنف: أفتحى يازينات وألا حكسر الباب وأدخلك حشوف أنا أزاى أتجرأتى وترفعى السكينه فى وشى وتعضينى وتخربشينى كل ده علشان تخنتى شويه يابنت الـ....
زينات من الداخل بعد أن أستجمعت شجاعتها : عارف أن ما كنتش تحترم نفسك معايا حعمل فيك أيه ؟؟ ..حتعملى أيه يا بنت أمبابى
زينات من الداخل : حدبحك يا حموده وأرميك لكلاب السكك
حموده : يا نهار أسود يا نهار أسود ..اللغه دى جديدة عليكى ..أن ماوريتك ..أن ماكسرت عضمك ..حتروحى منى فين ؟؟
تنتهى الخناقه ويلبس حموده ملابسه ويخرج من البيت ليذهب إلى القهوه ليجلس مع أصحابه فيلاحظوا الجروح التى فى وجهه
فى القهوة
عبده كاجوال : أيه أللى فى وشك ده ياحموده هههههههههه حموده أتضرب يامنز أوعى تقول القطه خربشتك ياحوحو ههههههه
حموده : أتلم ياعبده ما تخليناش نخسر بعض
عبده : بكلمك جد أيه أللى عورك فى وشك كده صحيح
حموده : دخلت فى لوح أزاز فى الشغل
عبده : لوح أزاااز ..ده أنا كنت فاكرها خرابيش ياراجل
حموده : خرابيش أزاى يعنى ؟؟
عبده : سيبك من الكدب يا حموده ..قولت لك ميت مره بلاش أفترى وبطل ضرب فى مراتك وخليك بن آدم كويس ولسه ياما حتشوف
حموده وهو يتحسس وجهه : هى الخرابيش جامده ياعبده
عبده : أيوه جامده أكيد أترازلت عليها زى عوايدك ..يا جدع أتقى الله دى مراتك غلبانه ما تستهلش أللى أنت بتعمله فيها
حموده وهو يزداد غيظا ويحاول أن يغير مجرى الحديث : تشرب أيه ياعبده ..حلبه حصى وأنا قهوة مظبوطه
الجرسون : حلبه حصى وقهوة مظبوط للأسطى عبده... وحموده المخربش
حموده : مخربش.. أمشى يابن الـ....أنا قايم من هنا تعالى نقعد على قهوة تانيه
عبده : أحسن برضه لحد ماوشك يخف ...ههههههههههه

الحلقة رقم(4)
مرحلة المقاومه
فتكات: ضربك برضه الجبان ..بس ولا يهمك أصبرى وأحتسبى.. يومه قرب ومصيرنا نكسره وربنا حينصرنا عليه
زينات : أنا تعبت يا فتكات مع الراجل ده ..كل بوكس وكل كل شلوت بيهد من جوايه حاجات كتيره قوى.. ويطلع مكانها حيطه جديده من الكراهيه ..قتل مشاعرى و دمر أحساسى مسح بكرامتى الأرض
فتكات: خدى العلبه دى فيها دواء بعتاه لكى الكابتن فوزيه عايزاكى تحطى منه حبيتين بس فى أكل المفترى جوزك
زينات : أيه ده سم ..لأ يا ختى عايزانى أروح فى داهيه وعيالى يتشردوا
فتكات: حيلك حيلك سم أيه يا هبله أنتى ..ده ملين جامد جدا حيخلى صاحبنا يهر على نفسه.. بيدوه للحمير والجمال والبقر لما تكون مكتومه ياخد منه البنى آدم نص حبايه أنما فى حالة جوزك ياخد له حبيتين ثلاثة علشان يحوقوا في جتته
زينات على ضمانتك يا فتكات..ماتخفيش أنا والعيال بناخد منه ماتنسيش تحطيه فى الشوربه أو فى الملوخيه ..فوتك بعافيه

المغص
يتمطع حموده بعد الغداء : أكله جامده قوى بس طعم الملوخيه غريب شويه حاسس أن بطنى بتكركب
زينات : أنت خليت فيها ده أنت مسحت الطبق مسح
حموده وهو يتألم: عندى مغص جامد قوى... الأكل بتاعك ده فيه حاجه
زينات : ما أنا واكله أهو معاك أنا والعيال حصلنا حاجه ..يمكن من الرمرمه بره البيت ....قوللى أكلت أيه بسلامتك النهارده؟؟
حموده: أبدا زيى كل يوم... أربع سندوتشات فول وسندوتشين طعميه على بتنجان وبطاطس مهروسه
حموده وهو يتوجع يجرى إلى الحمام :آه أه..ويدخل الحمام ويغيب بالداخل فتقللق عليه زينات فتخبط على الباب..سى حموده ..سى حموددده
يرد من الداخل بصوت واهن ضعيف : عايزه أيه ياوش النصايب ..أنا مصارينى كلها نزلت
تبتسم زينات وهى تقول فى سرها أحسن أنشالله ينزل كرشك كله ..أجيب لك دكتور ..أمشى ياوليه أنتى وسيبينى فى حالى آه آه آيييييييي
يخرج حموده من الحمام ويعاود الدخول عشرات المرات حتى يهمد تماما ويتساند على الحائط بيد ويمسك بطنه بيد أخرى ويرتمى كالشوال على السرير ويغط فى نوم عميق يقطعه المغص ليجرى مرة أخرى إلى الحمام وزينات سعيدة وهى تعد على أصابعها مرات دخوله وتنتهز الفرصة وتخبط على جارتها فتكات
فتكات : أيه الأخبار يازيزى
زينات : فل يا فيفى ..دى المره ال45 أللى يدخل فيها الحمام
فنكات : قشطه ..مش قولت لك أن مفعوله أكيد دواء الحمير والبهايم
زينات: أسكتى ياختى الراجل كرشه نزل النص
فتكات : ولسه لما تكرريه معاه كل أسبوع مره ..حيخلى حموده المفش يفش وينزل النص وكده تتساوى الكفتين وتعرفى تديله على قرعته وتمشيه على العجين ما يلغبطوش
زينات بس صعبان عليا خالص وشه أصفر وصوته وطيييي خالص ومش قادر يفتح بؤه
فتكات : ما يصعبش عليكى غالى ..من بكره الصبح تنزلى التمرين عند الكابتن فوزى قصدى فوزيه
زينات : تتك أيه يا فتكات ..بس هى جايبه على فوزى خالص ههههه خخخخخخخخ
..المنيل جوزى يروح الشغل والعيال تنزل مدارسهم ..وأنا حمامه على التمرين
فتكات تمسك بيد زينات ويهتفوا سويا بنشوةالنصر : فليحيا الأتحاد النسائى..بالطول بالعرض حنجيب حموده الأرض ..يايايايعيش يعيششش

الحلقة رقم (5)
الحرب النفسيه
(فى صالة الجيم التى تعمل بها الكابتن فوزيه )
فوزيه: كفايه كده النهارده ..كل يوم حنزود ربع ساعه وحنركز على تمارين الدراعات والأرجل وبعد كده حنخش على التمرينات بالحديد لحد ما نقوى عضلاتك
زينات وهى سعيده : حاضر ياكابتن
فوزيه : حنبدأ مرحلة الحرب النفسيه من النهارده ..فتحى ودانك وأعملى أللى بقول عليه ..حاضر ياكابتن ..حتاخدى شوية الكتب دى والمجلات والجرايد أللى قدامك
زينات : أنا ما عنديش وقت أقرأهم
فوزيه : أنا مش عايزاكى تقرأيهم ..أنا عايزاكى تبعتريهم عندك فى الشقه وفى كل حته بيقعد فيها بسلامته جوزك ..ده كتاب كيف تقتلين زوجك ..وده كتاب أنواع السموم لأزالة الهموم ..وده كتاب أغرب الجرائم النسائيه للقضاء على الرجاله المفتريه ..ودى مجلة الحوادث تفتحيها على صفحه رقم4 فيها صورة الست أللى قطعت جوزها فى الهرم ..ودى شوية جرايد قديمه فيها حوادث من النوع ده
زينات : طب لو سألنى عن الكتب والمجلات دى أقوله أيه
فوزيه:تردى عليه بكل برود..لقيت نفسى فاضيه قولت أتثقف ومش عايزه نخنخه
ولا خوف خليكى بارده وأرسمى على وشك أبتسامه هادئه ...لو هلل أو قل أدبه أزغريله وبرقى وأمشى من قدامه وأقعدى أقرأى قى أى مجله أو كتاب ..فاهمه ولا أعيد تانى ؟؟
زينات : لو ضربنى أعمل أيه ؟؟
فوزيه : أقفى قدامه وماتهربيش وما تصرخيش وبصى جامد فى عينيه وأياكى دموعك تنزل أوتعيطى يبقى باظ التخطيط حتى لو تألمتى تعالى على نفسك شويه...وتجيلى بكره أعرف أيه اللى حصل وما تنسيش تشترى نص كيلو أكياس سوده... حقول لك بكره لما تجبيهم حتعملى بيهم أيه ..سلام

بداية الرعب
يعود( حموده المفش) من عمله فيفتح باب الشقه فيجد زينات تجلس فى الصاله وهى تتظاهر بأنها منهمكه فى القرايه ولا تلتفت إليه
حموده : الله الله ..أيه الثقافة أللى واخده حدها يابنت أمبابى قاعدة بتقرى ومش مجهزه الأكل مش عارفه أنى جاى دلوقتى قومى تتك داهيه تاخدك .
( تضع زينات الكتاب جانبا ولا ترد عليه وتقوم من مكانها لتعد له الغداء )
حموده: الوليه دى أتجننت ولا أيه.. أحوالك مش عجبانى اليومين دول يظهر عايزه تتلطشى عشان تفوقى (يلتقط الكتاب الذى تركته زينات ويقرأ عنوان الكتاب ..كيف تقتلين زوجك ) يانهار أبوكى أسود عايزه تقتلينى يابنت المجنونه ..لا دى زادت قوى يظهر أن حيكون النهارده آخر يوم من عمرك خدى تعالى هنا
( لا ترد عليه وتستمر فى وضع الأطباق على السفره..فيقبض عليها من قفاها ويستديرها لتكون فى مواجهته وجها لوجه
حموده :أنتى جيبتى الكتاب ده منين ..ومين أللى أدهولك ..عايزه تقتلينى يابنت الرفضى ده أنا حقطع من لحمك لو ما تكلمتيش ..ردى يابت ..أنت بتبرقى كده ليه
طب خدى ويضربها بالقلم فيألمها ولكنها تذكرت كلام الكابتن فوزيه فتتماسك ويضربها قلم آخر وهو مازال يمسك بها فتمسك يده وهى مركزه نظرها فى عينه
فيضطرب ..مالك يابت فيه أيه الله يخرب بيتك ما بتعيطيش ليه ..لالا فيه حاجه بتحصل من ورايا..أنطقى يابت وألا ح موتك. .مين أللى أداكى الكتاب ده ..أنطقى وما تبصليش بالطريقه دى ..تقوم زينات بدفع يد حموده بقوه لم يعهدها من قبل
وتتركه وهى تقول بصوت محشرج مخيف: الأكل عندك على الترابيزه
يقف حموده فى وسط الغرفه وهو يحدث نفسه ويتعجب من تصرفاتها ويقع نظره على باقى الكتب والمجلات والجرايد فيتصفحها وهو يصرخ كلما قرأ صفحه ويتخيل نفسه وهى تقطع فيه او تضع له السم فى الطعام
فيدخل عليها الغرفه ويجرها من يدها ويجلسها على السفره عنوه
حموده : كلى من الأكل ده يابت أمبابى علشان لو فيه حاجه تموتى وأخلص منك
زينات وهى تتلاعب به : أنا كلت وماليش نفس
حموده: عليا الطلاق ... حتاكلى حتاكلى وغصب عنك حتاكلى وألا حموتك
زينات تحدق فى عينه فتلاحظ أن الخوف بدأ يدخل فى قلبه : أنت خايف ياحموده
فتأكل لقمتين وتقول : آدينى آكلت أهه حصلى حاجه
حموده :لا ياروح مامتك ..دانتى حتاكلى الأكل كله وتشربى الميه أللى حطاها
زينات تنظرأليه فى برود وتستمر فى الأكل لتنهى على جميع الأطباق وتشرب
زينات : لسه خايف يا حموده
حموده : حشوف حيحصلك أيه كمان ساعة قومى من قدامى دلوقتى
تدخل زينات غرفتها وتجلس على السرير وتقوم بشغل التريكو ولا تعيره أدنى أهتمام ويظل يتابعها بعينيه وهى صامته وتحرك أبر التريكو بهدوء وهى ترسم على وجهها أبتسامة الأنتصار فقد أدخلت الرعب فى قلبه
يقوم حموده بلم الكتب والمجلات ويأخذها ويترك البيت وخرج وهو لايلوى على شيئ ليجلس على القهوة فى أنتظار مجيء صديقه عبده كجوال

الحلقة رقم( 6)
(يجلس حموده على القهوة وهو يتصفح الكتب والمجلات فى أنتظار مجيء عبده )
عبده: مش عوايدك تيجى بدرى ..وأيه الكتب والمجلات دى أنت بتتثقف من ورانا
حموده : شوفت الوليه مراتى بتقرأ أيه بنت المجنونه
عبده ينظر فى المجلات والكتب ويضحك: هههههه قول على نفسك يارحمن يارحيم القطه فتحت يا سطى وقليل لو خدنا عزاك اليومين أللى جايين
حموده : دى بت غلبانه ومخها طاقق ..بس نفسى أعرف مين أللى ورا الموضوع ده ..آه يا نارى ..لو أعرفه لكنت مسحته أسمه من الدنيا
عبده : مش هو ده المهم ياحدق ..المهم أن مراتك فتحت عنيها خلاص وقليل لو دبحتك وأنت نايم زى النسوان ما بتعمل اليومين دول ..نصحتك كتير يا صاحبى وأنت مابتسمعش الكلام ..غيرش الكلام الخايب بتاعك أكسر للست ضلع يطلع لها عشرين ضلع ..أشرب بقى يامعلم وأستلقى وعدك
حموده يتحسس رقبته وهو مرعوب من كلام عبده : تفتكر ياعبده أن زينات ممكن تعملها ..لا..لا.. ياراجل قول كلام غير ده
عبده : الست فاض بيها وممكن تعمل فيك أى حاجه ..وقولت لك بلاش تمد أيدك وتطول لسانك وخليك محترم ما فيش فايده..أنت قاعد على قنبله ممكن تنفجر فيك فى أى وقت وتعملك حوواشى
حموده : طب والعمل ياصاحبى ..أخلص عليها قبل ما تخلص عليا يعنى
عبده : مفيش فايده فيك ..خلصت عليها وبعدين حتروح من الحكومه فين ومن ربنا فين حيشنقوك أو تتسجن بقية عمرك وتتشرد عيالك ويتخرب بيتك
حموده : عايزنى أطلقها..بس أنا بحبها وما أقدرش أستغنى عنها
عبده : تطلقها أيه ياراجل ياتعبان أنت ..حتتطرد بره البيت وتقعد هى وعيالها فى الشقه..وحتاخد نفقه ومؤخر وعفشها وعليهم نفقة متعه كمان ..فووء ياحموده أنت عايش فى القرون الوسطى ..الحكومه دلوقتى واقفه فى صف النسوان ..حتاخد حقها منك حتاخده ولولا أنها ست غلبانه ومقطوعه من شجره لكانت طلقتك أو خلعتك يا خفيف
حموده : كركبت على دماغى كل البلاوى وأنا جايلك تشوف لى حل سديت السكك فى وشى ..قولى يا عبده يا خويا أعمل أيه
عبده : الأول نشوف النصيبه أللى مستنياك فى البيت أللى ممكن تخرطك زى الملوخيه ..لازم تهدى اللعب ياحموده وتسحب ناعم معاها وجرب تعاملها بحنيه وبذوق وشوف النتيجه ..لو ما أتعدلتش شوف لك أى حته أتاوى فيها لحد ما الست دى تهدأ شويه وبعدين صالحها وقول لها كلام حلو من بتاع زمان
حموده : بس أنا ما عرفش أقول كلام حلو يا عبده ..بأحس أنى روجلتى راحت
عبده : وهى رجولتك أنك تضربها وتهينها وتلعن سلسفين أبوها ..تبقى غلطان وما تعرفش أيه هى الرجوله ..الرجوله مش عافيه وفتونه وظلم الضعيف ..الرجوله أدب وأخلاق وعطف على الضعيف ومراعية أهل بيتك بالود والحنيه..فيها أيه لو قلت لمراتك كلمه حلوة ودلعتها وتشوف طلباتها وتريحها على الأخر
حموده : عايزنى أدلعها يا عبده ..النسوان لما بتتدلع بتركب على الراجل وتدلدل رجليها ..عايزنى أبقى حمار وخرونج على آخر الزمن
عبده : ييه مش عايز تفهم برضه ..الست أللى بتركب وتدلدل دى ست معذوره لأنها معاها راحل مالوش شخصيه وهى بتبقى ما عندهاش أصل ..أنما مراتك غلبانه وأصيله وأستحملتك السنين دى كلها.. وبتطبخلك وبتربى فى عيالك وصيناك ومنضفاك وواخده بالها من بيتها ..أيه بقى لزمته الضرب والأهانه وطولة اللسان..جرب أللى قولت لك عليه ومالكش دعوه وماتركبش دماغك أحسن تبقى أيه؟؟
حموده : عارف ..حوواشى ..أجرب وأشوف ..عليك نور
الحلقة رقم(7)
الأكياس السوده
فتكات : أيه الأخبار يازيزى
زينات وهى تتهلل فرحا : فل الفل يا فيفى ..كابتن فوزيه ميه/ ميه تصدقى أول مره أشوف حموده وهو مرعوب.. الجبان الندل
فتكات : كده كويس ..خلى بالك أنه حيسحب ناعم معاكى ..ما تدهوش الفرصة دى وتنامى النهارده فى أوضة العيال مش عايزاكى تحنى ويضحك عليكى حتى لوباس أديكى ورجليكى خليه يتربى شويه
زينات : دى الحكايه دى بياخدها بالعافيه وبالغصب ولو منعت نفسى ده ممكن يجنن أو يموتنى..لالالا..أنا خايفه
فتكات : يا خايبه ده السلاح السرى للمرأه.. الست الناصحه بتعرف تستخدمه صح تقدر تحقق بيه كل طلباتها بالمنع والقبول طالما معاها واحد ما عندوش دم..عارفه يابت حكاية العصايا والموزه..ما عرفش قولى..الراجل القرداتى لما ييجى يمرن القرد بتاعه يطلب منه يعمل عجين الفلاحه أو نوم العازب يقوم القرد يغلط أو يزرجن يقوم القرداتى ملسوعه بالخرزانه لحد مايعمل الحركه صح يقوم يديله الموزه فيعرف الفرق..يعنى أيه..يعنى مافيش موز لحموده لحين أشعار آخر
فهمتى ياموزه ياكلبوظه أنتى..فخمتو هههههههههه

فى صالة فوزيه للألعاب الرياضيه
فوزيه: أنتى بتتقدمى بسرعة يازينات أنا مبسوطه منك ..والنتيجه واضحه على وشك قدرتى ترعبى المفش ..جيبتى الأكياس معاكى ...أيوه أهه
شوفى ياستى خلى جوزك يشوفك وأنتى بتخبيهم فى أى حته ولما يسألك أعملى نفسك هبله وماتريحهوش وردى عليه ببرود وما يهمكيش منه هو كده أبتدى يستوى وعايزاكى تتقلى على الرز لما يتفلفل وحقولك بعد كده تعملى فيه أيه
ميعادنا بعد بكره وقتك أنتهى ياشابه
( تدخل زينات غرفة النوم وتخبئ خلفها لفة الأكياس وتقوم بوضعها فى الدولاب بين الهدوم فيتنبه حموده لهذه الحركه المريبه فيتركها تخرج ويقوم من السرير ويفتح الدولاب ويستخرج لفة الأكياس ويفتحها فيصرخ
حموده : زينات ..زينااات تعالى هنا بسرعة ..أيه الأكياس الكتير دى حطاها ليه هنا فيه أيه يابت أمبابى
زينات ببرود : كنت فى السوق النهارده لقتهم روخاص فاشترتهم
حموده : وحتعملى بيهم أيه يافالحه
زينات : أهم ينفعوا نحط فيه شندوتشات العيال نحطى فيهم لحمه جوه التلاجه الأمر مايسلمش أهم مايخسروش..ومخبياهم بعيد عن أيدين العيال فيها حاجه دى تخليك تصرخ وأنت مرعوب كده أيه أللى جرى لك يا سبعى..أنت خايف من أيه
حموده : حخاف من أيه أنا يهمنى من الحركات دى
زينات: حركات أيه هو أنا بعرف أعمل حركات ..نام نام ولا تحب أعمللك كوباية شاى تقيله تظبط بيها دماغك
حموده : مش عايز زفت ..مش عايز منك حاجه أخرجى وأقفلى الباب وراكى تتك الهم ( ثم يقوم حموده بأغلاق الباب بالمفتاح خلفها وهى تبتسم عند سماعها صوت المفتاح وهو يدور فى الكالون ..وتقول : رجاله تخاف ما تختشيش )
الحلقة رقم (8)
مرحلة الردع
يمر شهر وحموده فى حاله من الخوف والحذر ويحاول أن يتقرب من زينات ولكنها تتبع تعليمات فوزيه وفتكات وتنفذها بكل دقه مع مداومتها على التمارين فى صالة الألعاب وتأخذ الحقن التى وصفتها لها فوزيه فبدأت تظهر عليها علامات الصلابه وتتشكل العضلات وأحست بالقوة والعافية مع النظام الغذاء الصارم الذى تتبعه
فوزيه : تلات تشهر كمان يازينات وتقدرى تنافسى على بطولة كمال الأجسام الحريمى ..من النهارده نبتدى نتعلم على حركات المصارعة والأشتباك وحنبدأ بتعليمك الضربات المعجزه أللى تقدرى تشلى بيها حركة الخصم ..جاهزه ردى جوه
الحركه الأولى: الضرب بالقدم تحت الحزام ..كده بقوة يازينات..ده لو الخصم بعيد عنك بخطوات وتكون مفاجأة وبسرعة
الحركة التانيه : الضرب بالركبه تحت الحزام ..كده ..نشنى كويس ..وتتعمل فى حالة ألتحامك بالخصم
الحركة التالته تكون بالضغط على مفاصل القدم أو أحد الزراعين فى عكس أتجاه حركتهم الطبيعيه وكل ماتكون بقوة تجعل الخصم يقوم بالأستسلام كده ..برافو زينات أستمرى فى التمرين مع زميلتك وبكره نكمل حركات الرقبه والوجه والساقين
( تعود زينات يوما بعد التمرين وهى تشعر بأنها قد بدأت المشوار الصحيح لردع حموده المفش وتتحسس عضلاتها التى نمت وأستدارت وأنتفخت كعضلات الرجال وهى تمشى بقوة وخفه ورشاقه ولا أجدعها شاب..وتفتح باب الشقة فتجد حموده يجلس فى أنتظارها وهو يتطاير من عينه الشر)
حموده : كنتى فين ياهانم
زينات بتحدى: كنت بأقضى شوية مشواير وزيارات..فيها حاجه دى
حموده : ردى كويس يابنت الـ...
زينات : لم لسانك الزفر ده لأقطعهولك
حموده: أنتى بتردى عليا يابت طب تعالى بقى
زينات : خليك عندك ياحموده أحسن مش حيحصلك طيب
حموده : فرجينى كده حتعملى أيه ؟؟
زينات : طب أستنى عليا لما أقلع وأجيلك
حموده يضحك : ماتلعبيش بعداد عمرك يابنت المجنونه
زينات بعد أن خلعت ملابسها وأرتدت فانله نصف كم وبنطلون ترننج وقفت فى أمامه فى وضع الأستعداد وهى تلف يدها يمينا ويسارا أمام وجهها كلاعبى الكارتيه
حموده : يانهار أسود أيه ياوليه العضلات دى طلعت لك أمتى ..عامله فيها راجل
زينات : جاهز ياحموده ..جاهز ياروح أمك
زينات تباغت حموده بضربه بكل قوتها بالشالوت تحت الحزام فيصرخ من شدة الألم ثم تهجم عليه وتأخذ ذراعه فى حركة قيادة وتضغط على مفصل الكوع بقوة وهو يتوجع ولا يستطيع القيام من الأرض ..حتحترم نفسك ولا لأ ..أكسر دراعك
حمودة يتلوى من الألم ..ويرفع ذراعه مستسلما..خلاص خلاص حتكسرى دراعى يابنت الكـ...............لـــــــب
ثم تقوم بضربه بالبوكس فى وجهه لتطرحه أرضا وتتركه وهى تنفض يدها منه ..البوكس ده علشان طولة لسانك (طاخ ..أآى)
زينات : من هنا ورايح مش عايزه أسمع صوتك وألا حتكون نهايتك أنت وعداد عمرك على أيدى..ولو حاولت تترازل وشيطانك لعب فى مخك وتمد أيدك حخلص عليك
عايز تعيش بأحترامك أهلا وسهلا ..مش عايز فكل يوم منده ..بس دى حاجه كده على ما قسم يا مفش
حموده وهو ينظر إليها بذهول : أنتى مين ياست أنتى ..زينات راحت فين
زينات : زينات ماتت خلاص وأنت أللى موتها وأنا باخد بتارها..باخد تار سنين الذل والبهدله أللى شوفتهم على أديك لحد ماتتوب وتحترم نفسك سامع ولا تحب تشوف
حموده يجلس مذهول وهو لا يصدق ما حدث ويخبط وجهه بيده ليتأكد بانه صاحى ولا يحلم وهو يردد: زينات أتقلبت راجل . .زينات أتقلبت راجل. زينات أتقلبت راجل
يا نهار أسود يا نهار أسود أنا فى حلم ولا علم يا فضحيتك يا حموده
زينات : قوم ياراجل وبطل لطم على وشك زى الستات أغسل وشك وأدخل جوه عشان أحطلك السم الهارى ...مش عايز آكل ..أحسن وفرت
الحلقه رقم (9)
ثورة التصحيح

تستمر زينات فى متابعة التمارين والتعلم على فنون القتال على يد الكابتن فوزيه وتستطيع أن تردع حموده كلما أراد أن تسول له نفسه بمد يده عليها
فتنكسر نفسه ويتحول من وحش هائج إلى حمل وديع ينفذ ما تأمر به زينات بدون تردد
وبعد سنه من أخضاع حموده المفش ترتدى زينات ملابسها وتستعد للخروج زينات : حموده ..نعم يازينات أأمرى ياحبيبتى هو أنتى خارجه ..أنا مش قلت لك أوعى تسأل السؤال ده تأنى ..حاضر يازينات ..أنا خارجه عند ماتش كوندفو على البطوله ..عايزاك تذاكر للعيال وتراجع دروسهم وبعد كده تحميهم وتعشيهم وبعد ماتنيمهم عندك فى الحمام حتتين غسيل أتسلى فيهم
حموده : حاضر يازينات مش حتتعشى معايا
زينات: لأ..أتعشى أنت وعايزه آجى ألاقيك نايم مش عايز أشوف وشك( ثم تقوم بضربه على بطنه) ..ألعب شوية رياضه علشان تنزل القرف ده أصلك بتاكل فى قته محلوله ..ما تنساش تنزل تشترى لبن وبيض وعيش للفطار والعشا..ثم تخرج وتعود مره أخرى.. ما تنساش تغسل المواعين وتنشر الغسيل وتغسل رجليك قبل ماتنام
حموده : حاضر يازينات تروحى وتيجى بالسلامه ومعاكى الكاس ياحبيبتى
زينات : أف أف مش عايزه أسمع كلمة حبيبتى دى تانى بتجيبلى العصبى
حموده : حاضر يا حبيبتى ...أف غبى أنا مش عارفه مستحملاك أزاى.. غور من قدامى الساعه دى..صدق من سماك المفش


الذكرى الثانية لثورة التصحيح
تدعو زينات فتكات وفوزيه للأحتفال بذكرى الأنتصار على حموده المفش فيجتمعوا جميعا حول تورته بها شمعتان وهم يتسامرون ويضحكون ويخرج عليهم حموده بعد أن قام بأرتداء ملابس حريمى وعمل مكياج صارخ وباروكه وهو يحمل صنيه عليها فناجبن القهوه ويمشى يتمخطر أمامهن ويهز فى نفسه كحال النساء ويمضغ لبانه فى فمه ثم يضع الفناجين أمامهن
حموده : القهوة يابهوات
فوزيه وهى تشهق : مين دى!!
حموده : خدامتك حميده ...حموده سابقا قهوتك أيه ياكابتن( فوزى) !!
فتكات : أيه أللى عامله الراجل ده فى نفسه
حموده: عيب كده ياكابتن( فتك )..أنا راجل برضه دا أنتم الرجاله وستين رجاله قهوتك أيه يا جميل يامتختخ أنت!!
زينات : حموده أيه أللى جرى لك أنت أتجننت
حموده : أنا بعقلى أهه ياكابتن (زين )يا جوزى يا حبيبى..خد راحتك أنت وأصحابك على ما أرضع العيال وأجهز لكم العشا..والله ياجماعة منورين بس مالكمش حق تيجوا كده من غير ستاتكم .. كانوا على الأقل ألاقى حد من الحريم أرغى معاه هئ هئ هئ (ضحكه رقيعه )
زينات وهى تصرخ : أتعدل ياحموده وبطل حركات الجنان دى وألا ..
حموده : وألا أيه ؟؟ تضربنى قدام صحابك ياكابتن ..ضرب الحبيب زى أكل الزبيب
زينات يصعب عليها حال حموده فتبكى وهى تقول : أنتم السبب فى ضياع الراجل ده منى أنتوا السبب أتفضلوا من غير مطرود ..أطلعوا بره... بره
فوزيه وهى خارجه ومعها فتكات : الحق علينا أن أحنا ساعدناكى أنك تكسرى شوكته ونخليكى بنى آدمه
زينات : بره بره ياريتنى ماكنت سمعت كلامكم ياريتنى مامشيت وراكم ضيعتوا الراجل ياظلمه
زينات تحتضن حموده وهى تقول : أللى أكسر يتصلح ياحبيبى
حموده : كل حاجه يازينات ممكن تتصلح ألا الراجل لو كسرته مراته
النــهــايــه