فشخره كدابه
مقدمه
كلنا يعرف يعنى أيه فشخره وعارفين الفرق بين الفشخره أللى على حق والفشخره الكدابه .. فالذى يتفشخر على حق يكون عنده الشيئ الوشويات من مال أو جمال أو عيله أو نسب أما أصحاب الفشخره الكدابه فغالبا مايكون السلك ضاربهم ويتظاهرون بأشياء بعيده كل البعد عن واقعهم الحقيقى مثال القرعة التى تتباهى بشعر بنت أختها أو الذى يقوم بالسلف ليقيم حفله أو مأدبة غداء أو عشاء لضيوفه أو نسايبه فى أرقى الفنادق والمطاعم أو يستلف من طوب الأرض ليقضى أسبوع فى شرم مثلا أو الذى يقول بأن جده كان قائد طابيه أو من عيله كلها باشاوات وبكوات
ولو مسكنا كلمة فشخره وحذفنا منها حرف الخاء لأصبحت فشره وهذا هو الأصل فى الكلمه ولو رفعنا الشين والهاء لأصبحت فخر ومع دمج كلمتى فخر وفشره تصبح لدينا
الفشخره التى هى مزيج من الفخر والفشر وكلا الأمرين بغيض الطعم سيئ السمعه ولكنه ينفع فى بعض الأحوال فأن فى بعض السموم دواءٌٌ
فعندما تقابل أنسان مغرور سواء رجل أو سيده وواخد فى نفسه قلم أو شلوت ومش طايق نفسه.. فعلاجه شيئ من أتنين لا ثالث لهما أن تتجنبه ولا تعطيه أدنى أهتمام وهذا يقتله ويجعله يطق منك أو تتفشحر وتتقنعرعليه والعين بالعين والسن بالسن والبادى أظلم وتسمى هذه بالفشخره الوقائيه أما الفشخره المرضيه والهبله فهى موضوعنا الذى سنتكلم عنه فى موضوعنا الحالى فى حكايتين خفاف لطاف
1- مدام نجفه بتتفشخر
تظهر نتيجة الثانويه العامه وتقوم مدام نجفه بتوزيع الشيكولاه والمياه الغازيه على زملاء العمل وتتلقى منهم التبريكات والتهانى ودوام النجاح للمحروس وتستفزها مدام رقيه وهى توزع هى الأخرى حلاوة نجاح أبنتها
رقيه بطريقة أستفزازيه : أبنك جاب مجموع كام على كده يانجفه
نجفه تشمر عن ساعديها وتنتابها موجه شفخره للرد على رقيه : أبنى يا حبيبتى قفل الدرجات كلها وكان باقى له نص درجه لياخد 100% واد عبقرى طالع لمامته
- وناويه تدخليه طب ولا هندسه يانجفه
- الواد مش غاوى ياحبيبتى لا طب ولا هندسه ..
- أومال غاوى أيه تجاره هئ هئ زى أمه برضه..
- لا ياحبيبتى أبنى حيدخل الجامعة الأمريكانيه
- دى مصاريفها كثير قوى يانجفه أنتم حمل مصاريفها
- أيه يعنى ألف ولا ألفين جنيه مش خساره فيه
- ههههه دى مصاريفها بالأربعين ألف أو أكثر
نجفه تشهق ثم تستعيد توازنها : ولو 100 ألف مش خساره فيه وأحنا قدها وقدود ياماما الدور والباقى على بنتك لو طالت معهد أم لالوو بتاع الروضه ولا معهد بنجنى بنج بتاع عبده باشا ..رقيه : بنتى حبيبتى رفعت راسنا وجايبه 98 % على كلية الهندسه عدل
نجفه : تعليم حكومى يعنى ..ياااى أنا ولادى كلتهم من حضانه للجامعة تعليم أجنبى مالناش فى التعليم الحكومى أبو قرش وقرشين أللى لامم العالم البيئة
يتدخل الأستاذ حسن المسؤل عن الكمبيوتر لفض الأشتباك بينهما : أرقام جلوس ولادكم موجوده عندى تحبوا تعرفوا الولاد حتقبل فى أى كليه وتتأكدوا من المجموع
نجفه بسرعة : مفيش داعى ياحسن أحنا ماتفرقش معانا الواد حنوديه الجامعة الأمريكانيه خلاص أبوه راح يسحب الورق ويقدم له فيها
رقيه :أحنا واثقين أن البنت هندسه عين شمس أنشاء الله
حسن : أنتم خسرانين حاجة الكمبيوتر ومفتوح والنتيجه أهه قدامى حنشوف ولادكم جايبين مجموع كام
نجفه : ما قولنالك خلاص ياحسن أنت غاوى تتعب نفسك ليه
رقيه : مش عارفه الجدع ده حشرى قوى يانجفه يا أختتشى
حسن : خلاص ياستى النتيجه أهه ( يعلى صوته ليسمع جميع الموظفين بالأدارة ) أبنك يانجفه جايب 52 % وأنتى ياست رقيه البنت جايبه 51 % يعنى الأتنين أخيب من ستى ألا سيدى وفالحين بس فى الفشخره الكدابه و بتوزعوا شربات وشيكولاته على أيه.. ربنا يهدكوا يابوعدى حتى الفشخره فى دى كمان
نجفه : مالك بتعلى فى صوتك كده ليه تك داهيه وأنت فٌُضحيّى..بس برضه أبنى حيدخل الجامعة الأمريكانيه وخساره فيك الشيكولاته والحاجة الصاقعة بالسم الهارى
رقيه : وبنتى حتدخل هندسة عين شمس بالعند فيكم
تضج الأدارة بضحكات الموظفين والتعليقات اللاذعة على نجفه ورقيه فتسحبها الأخيره وهما يخرجان من الأدارة : ماتزعليش ياحبيبتى دى ناس حكوده مابيتمرش فيها..نجفه : بس الواد حدخله الجامعة الأمريكانيه بقى بالعند فيهم
- ياختى أتلهى ماتعشيش الدور ما أنا عارفه البير وغطاه ..دول عيال معفنه حرقوا دمنا طول السنه دروس ومجموعات وكتب خارجيه ومفيش فايده
الحلقة رقم 2
فرّح منال فرط الُرٌمَان
- يا منال يابنتى مفيش داعى للتكاليف دى كلها نعمل الفرح فى أى قاعة أفراح والحكاية كلها ساعتين ثلاثة وكل حى يروح لحاله .. أيه لازمته نعمل الفرح فى فيلا فى المريوطيه أو التجمع الخامس أحنا مش حمل المصاريف دى كلها نوفرها ونكمل بيها بقية جهازك
- ما ينفعش ياماما أنا قولت حعمله فى فيلا يعنى حعمله فى فيلا .. أنا منال أبو شوشه يتعمل فرحى فى دار ولا قاعة أفراح أو أوتيل ..لا وألف لا ..برستيجى ياماما يتهز قدام صحباتى والمديرين فى الشغل
- برستيجك برستيجك الله يخرب بيت برستيجك فلقتينا ببرستيجك أنت يابت طالعه فيها قوى كده ليه تكونيش فاكره أبوكى مليونير الراجل باع أرضه علشان يجوزك أنت وأختك والقرشين بتوعك حنجهزك بيهم
- مش مهم الجهاز والعفش والكلام الفارغ ده .. أنت يا أمى دقه قديمه عملتى فرحك فوق السطوح وزفوكى فى الحاره مش قادره تستوعبى أللى بيحصل دلوقتى
- فيها أيه يا حبيبتى لو تعملى فرحك فى النادى مش حيكلفنا 10 آلاف جنيه ..وكمان كتير وتوفرى الباقى تشترى بيه حاجة تنفعك فى بيتك
منال تتشعوز وتصرخ : قولت لك ياماما ماتجبيش سيرة النوادى وألا مش متجوزه
- عنك ما أتجوزتى ولا أتقندلتى قوم يابت من قدامى لما ييجى أبوكى له صرفه معاكى
- بابا ده حبيبى عمره ما حيأخرى طلب.. أطلعى منها أنت يافيكى ماتولعهاش
( ترن ترررن يدق جرس الباب ) قومى يا منال أفتحى .. ده عمرو ياماما .. خليه يتفضل فى الصالون على ما أغير هدومى وجيالكم
منال : هيه عملت أيه ياعموره ياحبيبى سألت عن الفيلل أللى بيتعمل فيها الأفراح
عمرو وهو ينفخ : سألت ياستى كله ضارب فى العلالى روحت التجمع والشروق والمريوطيه والبيفرى هيلز ماخلتش مفيش أقل من 70 ألف جنيه أيجار فى اليوم
منال : هى عادتك ولا حتشتريها أنت كده مفيش حاجة أطلبها منك وتعملها صح
عمرو : شوفى يامنال أحنا أتفقنا من الأول أن تكاليف الفرح بالنص وأنا ماعنديش غير خمس تلاف جنيه أول عن آخر تاخديهم وتريحينى وأعملى فرحك فى فيلا فى نادى أو على الرصيف أنشالله تعمليه فى مترو الأنفاق أنا ماليش دعوة
- بدأنا النداله بدرى قووى.. خمس تلاف جنيه بس ياعمرو ماهو لو أنت بتحبنى بصحيح كنت عملت المستحيل علشان تحقق حلمى وتعملى فرح محترم يليق بينا
- أنا بحبك يامنال ولكن ما باليد حيله
- ما باليد حيله.. شوف مامتك ولا باباك يساعدوك شويه
- بابا وماما ماعدش حليتهم حاجة ..الشقة وأشتروها وأنت عارفه ثمنها كام والألتزامات أللى عليا جابوها والديكورات أللى طلبتيها عملوها مفيش بقى غير أنى آخدهم هما الأتنين أبيعهم فى سوق الكانتو وأجيب لك ثمنهم علشان ترتاحى
- ماهو أختك وأخوك كل واحد على قلبه فلوس قد كده أطلب منهم يا أخى
- ما أقدرش يامنال أخويا وأختى سالف منهم زى ما أنتى عارفه وما سددتش ليهم ولا مليم لحد دلوقتى فما أقدرش أطلب منهم حاجه أو حتى أوريهم وشى
- أعمل سلفه من الشغل.. ماينفعش يامنال السلفه بتاعة الخطوبه لسه ماخلصتش
- يعنى سددتها من كل ناحيه .. طيب ياعمرو .. أنا بقى حتصرف ولعلمك أنا مش حتجوز ولا حدخل شقتك أللى طالع بيها السما ألا لما يتعمل الفرح فى فيلا
يعلو صوت عمرو لتبدأ خناقتهم المعتاده : أنت حره يامنال أعملى أللى عايزه تعمليه
أحنا لسه على البر كل واحد يروح لحاله
- آه ياغشاش يا إيحه يابخيل ياجلده جاى دلوقتى تقوللى كل واحد يروح لحاله طب أتفضل آدى دبلتك أهه ومش عايزه أشوف وشك تانى
- ماشى يامنال هاتى الدبله ودورى بقى على أللى يعملك فرح فى المريوطيه قرفتينى بقنعرتك وفشخرتك تتك القرف
- أنا تتنى القرف طب خود (تقذفه بالشلته فيردها مرة أخرى )
تخرج مدام فيكى مهروله على صوت الخناقة وكل منهما يقذف الأخر بشلت الصالون وطفايات السجائر فتأخذ عمرو من يده وتهدأ فيه وتدخل به غرفة المعيشة
- صلى على النبى ياعمرو قل أعوذ برب الفلق عين وصابتكم يا حبيبى أهدى يا أبنى أحنا يجيلنا أعز منك ..دى بتحبك وده دلع البنات
- دلع ماسخ ورخم .. بنتك مجنونه ياتانت وأنا ماعدتش أستحمل جنانها سبينى أمشى
مش هى قلعت الدبله واللهى يا.. ( تضع فيكى يدها على فم عمرو حتى لا يكمل الحلفان
تدخل الشغاله وهى تصرخ ): ألحقى ياستى ألحقى ياستى .. ست منال مغمى عليها ومرميه فى الصالون
الحلقة رقم (3)
عم شوشه بيفهم
يجرى عمرو ومدام فيكى لأنقاذ منال التى تمددت على الأرض بعد أن أنفعلت وتوترت بعد خناقة عمرو
- أيدى بأيدك ياعمرو نشيلها جوه على السرير وهاتى التليفون ياسعديه أكلم الدكتور بتاعها ييجى يشوفها
- على أيه ياتنت هى ناقصة ..دلوقتى تفوء سبينى بس أنا حفوئها بطريقتى
- أهى عندك أهيه أتصرف أنت معاها (تخرج وتتركهما )
عمرو يدلك يدها ويطبع قبله حانيه على خدها وهو يحلف لها بأنه لا يملك غير خمس تلاف جنيه وأنه يحبها وكان نفسه يحقق لها كل أحلامها ولكن العين بصيره والأيد قصيره.. تفتح عينيها وتغلقهم مرة أخرى وهى تقول : لو مت ياعمرو حتكون أنت السبب
- بعد الشر ياحبيبتى لكن أعمل أيه غصب عنى خلصنا الفلوس على ديكورات الشقه أللى كل شويه تغيرى فيها
- ماهو أنت لو جايب مهندس ديكور محترم ماكنش ده حصل
- يامنال ماهو أنت جننتيه تقولى على الحاجه وترجعى فيها أهو فى الأخر حلف أنه مايشتغلش فيها تانى ورفض أنه ياخد بقية أجرته وكل المهرجان ده بفلوس وكلفه جديده لحد ماخلصتى على القرشين أللى أخدتهم من بابا وماما
- أنت فاكرك أن الشقه هى كل حاجة ياعمرو .. أنا بقى عندى الزفاف أهم .. يرضيك ألبس الفستان أللى جايبه من أوروبا بالشيئ الفلانى وعلى أحدث موضه علشان أحضر بيه فى نادى أو صالة أفراح ..ده لايمكن ولو هو آخر يوم فى حياتنا مع بعض
- أتصرفى أنت يامنال أنا فى ورطه
- حتصرف ياعمرو وحتشوف منال حتعمل ايه ( يسمع صوت والد منال بعد أن حضر من الخارج وحكت له فيكى ماحدث)
منال : أتعدل بابا جاى .. أيه يابنتى مش مكتوب كتابنا يعنى فى حكم المتجوزين
الأب : هى فين البنت الكتكوته دى مزعلنها ليه
فيكى : أيوه ياخويا أهو دلعك ده أللى مش مخلى حد يعرف يكلمها
الأب وهو يلوم عمرو : مزعلها ليه ياعمرو
عمرو : أنا مزعلتهاش ياعمو هى أللى متمسكه برأيها وعايزه تعمل الفرح فى فيلا
وأحنا ماعناش المبلغ المطلوب
الأب : عايزين كام يعنى ..
- عايزين سبعين ألف ياعمى بخلاف أجرة منظمة الحفله عايزه 8 آلاف جنيه لوحدها
منال : بالذمه يادادى خساره في ليلة العمر مبلغ تافه بالشكل ده
يسكت الأب وهو حائر : ربنا يسهل يامنال حنحاول نتصرف
الأم فيكى وهى منفعله : تتصرف أزاى يا شوشه الفلوس أللى معاك ماتكفيش ربع أللى هى طلباه ..الأب فى حزم : أسكتى يافيكى أنا حيجيلى أعز من لولو حبيبتى
الأم وهى مستائه تغادر الغرفه : مفيش حد مبوظ البت دى ألا دلعك فيها
الأب : سبونا لوحدينا لو سمحتم ( بعد أن يخرج عمرو وفيكى ) بقولك أيه يامنال أنا أقدر أدبر 40 ألف أول عن آخر 20 ألف كنت سايبهم لتكملة جهازك وأقدر أستلف 20 ألف من عمتك هو ده أللى أقدر عليه
منال تحتضن أباها : الله ينور ياعم شوشه أهو كده الأبهات التمام أنا بقى حكمل الباقى
حقدم على سلفه من الشغل بالمبلغ أللى باقى أتفقنا هات بوسه بقى
يدخل عم شوشه غرفة نومه لينام فيجد فيكى تجلس فى السرير ويبدو عليها الغضب
فيكى : حتستلف ياشوشه عشرين ألف علشان تحقق كلام بنتك الدلوعه
شوشه : ده أنا لو طلت أستلف أكثر لأستلفت ..كمان .. بنتك يافيكى يتحط عليها فلوس وتتجوز وتنكشح من هنا ولو ما أتجوزتش الواد الغلبان ده مش حتتجوز عمرها وحتقعد ترازى فينا بقية عمرنا .. أشترى دماغك يافيكى بنتك ماحدش يقدر يستحملها
- يعنى تفتكر لما تحقق لها طلبها يبقى كده المشكله خلصت مش حترجع تقرفنا
- يافيكى لما تتجوز وتشيل المسؤليه حتعرف أن الله حق ومش حيبقى ليها عين تطلب
مننا حاجه أنما طول ماهى قاعده فى أربيزنا حتورينا الويل
- لك حق ياشوشه بنتك يتفات لها بلاد وربنا يعدى الفرح ده على خير ماتجننش الولد
الحلقة رقم ( 4)
نهاية الزفاف الأسطوره
يحضر المعازيم الزفاف فى احدى الفيلات الموجوده بالمريوطيه ويصطف المعازيم صفين كتعليمان منظمة الحفلة والعروسه والعريس يدخلان بعربة مكشوفه وتقوم بأحضار أطفال من الجنسين يرتدون الفساتين والبدل البيضاء وهم ينثرون الورود على موكب العروس وتقوم الفرقة الموسيقية ومعها المزمار والطبل البلدى بزفهما فى حديقة الفيلا وتصرخ منال فى منظمة الحفله : يامدام ساميه رجعى الزفه البلدى ماتخلهاش تمشى ورايا أنا أتفقت معاكى على كده أن ماوريتك ..حاضر ياعروسه
يجلس المدعوين على الترابيزات والعروسه والعريس فى الكوشه وتنادى العروسه على ساميه مرة أخرى .. أيه أللى بيحصل ده ياساميه الفرح مليان عيال صغيره أزاى سمحتى بدخولهم وأيه الرجاله أللى جايه بتيشرتات وقمصان دى أنا مش قولت لك تمنعى أى واحد معاه عيال أو مش لابس بدله أو سواريه
- يامنال ياحبيبتى حاولت وماقدرتش كلهم قرايبك وقرايب العريس ده فيهم ستات متوحشات زقونى وكانوا حيعضونى .. دى مسؤليتك أنك ما نبهتيش عليهم
تنفخ منال من الغيظ : أفففف حاجة تقرف .. أهدى يامنال .. شايف أخوك ياسى عمرو .. ماله يامنال ده كمان شايف جايب شلة عيال صايعة وعمالين يرقصوا بطريقه أستفزازيه فى الجنينه قصدهم يغيظونى ويبوظوا لى الفرح
- دول زمايله فى الكليه يامنال وهم دول أللى حيهصوا الفرح ماتاخديش فى بالك.. أفف
- تبدأ الفرقة الموسيقية فى عزف ألحان وأغنيات غربيه ويبدأ رقص التانجو ويشارك فيها عدد قليل من المدعوين الذين لم يعتادوا على مثل هذه الأفراح الغريبه وهم يرون العروسه وهى تصرخ كل شويه فى منظمة الحفله التى أختفت فى النهاية وغادرت الفرح وتستمر الفرقة تعزف غربى والمعازيم لا تتجاوب وفجأة تبدأ الفرقة فى عزف الأغانى الشعبيه مثل العنب العنب والغمازات وياحضرة العمده فينفجر الفرح بالتهليل والصريخ ويبدأ الرقص البلدى من الكبير والصغير كأن الفرح أبتدأ من جديد وتقف منال فى الوسط وهى مذهوله فيتركها عمرو ويرقص مع أصحابه ويلفوا حولها ويدورون وهى تكاد تبكى على ما يحدث وتدخل بنات العائلتين ويتمايلون ويتراقصون حولها ويشدونها لترقص معهم ولم تجد حل سوى أن تجاملهم وترقص بلدى على واحده ونص والجميع يشجعونها ويصفقون وأندمجت مع الطبل والزمر وأخرجت المدفون من مواهبها الموروثه وعندما توقفت الموسيقى لفتح البوفيه تترك يد عمرو وتذهب فى أتجاه الفرقة الموسيقية بعد أن فشلت فى الوصول لمنظمة الحفلة التى قبضت حسابها وهربت
تكلم قائد الفرقة الموسيقية بعصبيه : أحنا أتفقنا يا أستاذ أن فرقتك بتعزف غربى أيه أللى خلاك تعزف شرقى وأيه الأغانى البيئة دى
- ياعروسه أنا نفذت كلام مدام ساميه منظمة الحفله قالت لى قبل ماتخرج أعزف أغانى شرقيه وكفايه كده غربى
- عملتها الجبانه الندله حتروح منى فين .. لو سمحت أعزف غربى
- ياعروسه مفيش حد بيعرف يرقص غربى غير أتنين ثلاثه والناس مش فاهمه حاجة والفرح نايم والشرقى هو أللى خلى الناس تهيص وتفرح
- زى مابقولك تعزف غربى ومالكش دعوة بالناس أعمل أللى بقولك عليه لو سمحت !
وبعد أنتهاء العشاء تبدأ الموسيقى فى العزف الغربى ومطرب ومطربه يغنون بالأنجليزى والفرنساوى فيبدأ المدعوين بالأستئذان وترك الفرح
عمرو : عاجبك كده يامنال المعازيم أبتدت تمشى والناس قعدت على الترابيزات وشغالين رغى .. الشرقى بيصحصح الفرح يابنتى خلينا نفرح ونهيص
- أيوه ماهو أنت واخد على شغل البيئه والرقص البلدى وأهلك هم أللى بوظوا الفرح
- ماتجبيش سيرة أهلى يامنال ده أهلك هم أللى فضيحة شايفه هاجمين أزاى على البوفيه ..لأ ده أهلك ياحبيبى .. أهلك .. لأ أهلك .. طب لو سمحتى .. رايح فين ياعمرو رايح أوقف الموسيقى الجنائزيه أللى أنتى قرفانه بيها بلاش فشخره كدابه
تعزف الموسيقى شرقى وأغانى شعبيه وتبأ الهيصة من جديد والرقص البلدى من الشباب والشابات والعواجيز ولا تجد منال غير أن تترك حلقة الرقص وتجلس بعيدا وهى تبكى بكاءً مريراً ولا يسأل فيها أحد فالكل مشغول بأظهار براعته فى الهز
وتتنبه صديقاتها لأبتعاد منال وجلوسها بعيدا فيجرون عليها لتقوم لترقص معهم
- قاعده بعيد ليه ياعروسه .. تعبت .. فيه حد يتعب يوم فرحه وأيه الدموع دى.. أنت كنتى بتعيطى !! .. أبدا دى دموع الفرح .. قومى .. قومى ياشيخة أرقصى معانا
ترقص منال على مضض حتى يبدأ الأستعداد للرحيل لعش الزوجيه وتركب العروس العربه المكشوفه ويتم البحث عن عمرو الذى أختفى من الفرح وترتفع النداءات بحثا عن العريس ياعمرو يا عمرو ويجرى جرسون ومعه ظرف مغلق به رسالة ودبلة الزواج ويسلمه لمنال وتسأله أين ذهب فيقول لها بأنه ركب سيارة أحد أصدقائه وأوصانى بتسليم هذه الرساله فتفتحها وتقرأ ما فيها فيغمى عليها وتقع داخل السيارة فيأخذ والدها الجواب من يدها ويقرأها : منال أنا آسف لا أستطيع أن أكمل هذه الجوازة فلم أتحمل الفشخرة الكاذبه التى غلبت على جميع تصرفاتك أتمنى لك حظ أحسن مع أنسان آخر والخسارة القريبه أحسن من المكسب البعيد
زوجك سابقا
التوقيع ( عمرو )
يطوي الأب الرسالة ويضعها فى جيبه ويعلن للجميع بأن العريس شعر بوعكه ونقله أحد أصدقائه للمستشفى ويشكر الجميع على الحضور وعقبال أولادهم ويركب السيارة بجوار أبنته ويغادر المكان بسرعة والكل ينظرلبعض فى أستغراب ويتسألون عما حدث
تـــمـــت
