أنا الرئيس

الرئيس الجديد لجمهورية منهوبيا العظمى

مارشات عسكريه ويظهر المذيع ليعلن عن الأنتقال لأذاعة خارجية من مجلس الشعب لحضور حفل تنصيب رئيس دولة منهوبيا  الجديد وحلفانه اليمين القانونيه أمام أعضاء المجلس فإلى هناك

المذيع الداخلى بالقاعة : السيد رئيس الجمهوريه ( يقوم الأعضاء من مقاعدهم ويصفقون لمدة خمس دقائق ويدخل الرئيس الجديد وهو يلوح لجميع الأعضاء وينحنى أمامهم أكثر من مره وهو يرتدى الجلباب والعمه الصعيدى ويرفع يده بالشومه تحية للجميع ثم يتجه للمنصة لألقاء كلمته التاريخيه  

أيها المواطنون والمواطنات أبناء مصر الأوفياء أشكركم جميعا لمن قال نعم ومن قال لا ومن لم يقل شيئا على الأطلاق فعنه ماجال (تصفيق حاد )

هتافات : يعيش الرئيس زيزو زكريا يا ااعيش يااا عيش ياعيش

- دعونا من الهتافات ونريد أن نعمل فى صمت فنحن فى مرحلة عصيبه نريد فيها أن نبنى أنفسنا ونستعيد مجدنا ونحطم كل السلبيات التى عيشنها فى الماضى وعلى مدى خمسين عاما أكلت منا الأخضر واليابس ولكن بتصميمكم وعزيمتكم سننهض وسنقف على أقدامنا من جديد ونتخطى الحواجز والأسوار

هتافات : يعيش محطم الأسوار يا ااعيش يااا عيش ياعيش

- شكرا شكرا وقبل أن أكمل خطابى أريد أن أسألكم ماهى أمانيكم بصفتكم ممثلى الشعب وأنتم الأقرب منى لهم حتى نضع أطار شامل وعقد أجتماعى بينى وبينكم

أى بينى وبين شعبنا العظيم وسنستمع لثلاثة منكم الأول يمثل المعارضه عن الحزب السابق والثانى عن حزب الأغلبيه والثالث عن اليمين

زعيم المعارضه عن الحزب السابق : سيادة الرئيس نريد أن نبدأ صفحة جديده فى عصركم الجديد ونطلب من فخامتكم بأصدار عفو شامل عن جميع الأخطاء السياسية التى تمت فى الماضى  ( يسمع صوت همهمات فى حزب الأغلبيه واليمين الأسلامى فيدق رئيس المجلس ويطلب من الأعضاء عدم التكلم حتى ينتهى زعيم المعارضه من طلباته .. أكمل بقية طلباتك

- أطلب من سيادة الرئيس وراعى الديمقراطيه بأن يترك لنا مقارات الحزب الموجوده فى جميع المحافظات والأحياء كما أطلب أستمرار الأمتيازات التى كان يتمتع بها الحزب فى السنوات السابقة من علاج وسفر ومصروفات

ترتفع أصوات الأحتجاجات ومطالبته بمغادرة القاعة يتدخل الرئيس ويضرب بشومته بقوة على المنصة فتهدأ القاعة وينفعل مخاطبا أعضاء المجلس : جرى أيه يارداله

مهما حصل أحنا مش حنعمل عمايلهم أحنا أكبر من كده بكتير( ثم يوجه كلامه لزعيم المعارضه )..أيه ياولد الكلام الماسخ أللى بتجوله .. العزبه أللى كنتم بتبرطعوا فيها خلاص فنيتو كفاكم بقالكم خمسين سنه بتمصوا فى دم الشعب الغلبان ولولا أنى متمسك بالقانون لحسابتكم عن كل قرش أخدتوه

زعيم المعارضه : بس ياريس ..

- مفيش بس أقعد دلوقيتى وحرد عليك فى آخر القاعده

- زعيم اليمين أتفضل قول طلباتك

- أنا ليا مطلبين المطلب الأول الأفراج عن جميع المعتقلين من الأسلاميين الذين أعتقلوا ظلما وعدوانا فى السابق والمطلب الثانى تطبيق الشريعه الأسلاميه والله الموفق والسلام عليكم ورحمة الله .. الرد فى آخر القاعده

- زعيم الأغلبيه أتفضل قول طلباتك

- طلباتنا سيادتك عارفها ياريس

الرئيس : جول طلباتك يا أفندى زيك زى أى حزب وأياك تكون فاكر أن حنحاز لحزبك

لع وبقولها وبصوت عالى لع لع لع .. أنا رئيس كل الشعب .. أنا ماليش حزب أنا الحكم والقاضى أللى بينكم يبقى ما عملناش حاجة ومشينا على نهج أللى سبقونا ورجعت ريما لعادتها القديمه.. الرئيس رئيس والحزب حزب والكل متساوى قدام القانون وماعنديش لا خيار ولا فقوس أللى حيشتغل بذمه وأخلاص لصالح البلد حشيله على راسى من فوج وأللى حيلعب بديله أو يفكر وبقول وأكرر يفكررر يعمل زى زمان سامع يابتاع المعارضه حضربه بالبولغه الجديمه على قفاه وأللى حيمد أيده وينهب ويسرق ويبلطج حقطع أيده زى ما الشرع بيقول .. كمل ياخويا كمل

هتافات : تعيش بولغة الرئيس تا ااعيش تااا عيش تاعيش

زعيم الأغلبيه : عايزين ننقى الدستور .. ننقى ياخويا ما نقيش ليه

عايزين نسترد كل المصانع والأراضى أللى أتباعت بتراب الفلوس .. معاك حق فى دى لازم يرجع الحق لأصحابه..وعايزين مزيد من الحريه والعداله

- أتفضل  .. السيد الرئيس سيحلف اليمين ويلقى ببيانه بعد الأستراحة يرد فيه على زعماء الأحزاب

الحلقة رقم (2)

البيان الأول والأخير

يقف الرئيس ويعدل العمه ويسوى الجلباب ليلقى بيانه الأول على نواب الشعب

بسم الله الرحمن الرحيم

أسمحوا لى يا أخونا أن أتحدث أليكم بلهجتى ولغتى أللى يفهمها الناس كولتها بعيد عن المصطلحات والكلام المزوق أللى طول عمركم بتسمعوه وحنبدأ بعد أن تسمعونى الصلاة على النبى .. عليه الصلاة والسلام

شوفوا بجى .. أحوالنا الزفت والعيشة الجطران أللى بنعيشها دلوقيتى كلكم عارفين أسبابها مش حنقعد ننوح عليها ونشق هدومنا ونلطم على خدودنا زى الولايا أللى فات مات وأحنا ولاد النهارده وأللى سرج وأللى نهب حيرجع كول أللى خده بالذوق وألا حيشوف أللى عمره ماشافه وأللى أكله وز.. وز زمان حيطلع على جتته بط بط  بالقانون

ده أول هام (تصفيق حاد وهتافات وز .. وز .. بط .. بط )العضو أللى عمال يكاكى أللى فى الصف الرابع شمال أنكتم ياخويا أحنا مش قاعدين فى عشة فراخ

- ثانى هام أعلن من مكانى هذا بأنتهاء فترة الأنفتاح وحنرجع كل ممتلكات الشعب لأصلها لنبدأ فترة الأنغلاق ( هتافات يعيش الأنغلاق ) وأللى مش عاجبه يشرب من البحر .. نريد أن نعيد بناء نفسينا من الأول نقفل باب دارنا علينا ونعلق يافطة مغلق للتحسينات فبناء أنفسنا من الداخل هو الأهم والأخطر فى المرحلة دى حيطلع لى واحد فلعوص من بتوع التخطيط الأقتصادى مش عاجبه الكلام ويقول لى حنرجع للنظام الأشتراكى تانى حقوله أتلهى على عينك هو كان النظام الرأسمالى نفع معانا ما هو أنتم عارفين أللى حصل والخراب المستعجل أللى شوفناه على أدين الرأسماليين ورجال الأعمال أياهم وأحنا أحرار نختار النظام أللى يعجبنا ولن يفرض علينا نظام بعد اليوم ( تصفيق حاد وهتافات يعيش الأنغلاق )

- تانى هام سيتم اليوم أقالة جميع المحافظين ورؤساء المدن والأحياء بعد فحص ذمتهم الماليه وألغاء وزارة الحكم المحلى لتكون أدارة فدراليه لجميع المحافظات وسيكون المحافظ ورئيس المدينه والحى بالأنتخاب العام وليس بالتعيين زى عمنول للحبايب والجرايب والمطبلاتيه وحيتشكل برلمان منتخب من أبناء المحافظه ليراقب عمل المحافظ المنتخب وله سلطة أقالته فى أى وقت لتكون المحافظات وحدات مستقله مسؤله عن شعبها وتدير شؤنها الماليه بنفسها من تعليم وصحة وأمن وأسكان وبناء وتطوير.. وتسن لنفسها القوانين التى لا تخرج عن روح الدستور أللى سيتم تغييره وتصفية القوانين المشبوهة التى تم تفصيلها فى العهد البائد ( تصفيق وهتافات مختلفه وزغاريط )

- نيجى لمرحلة البناء وهى أخطر مرحلة عايزه رداله ولاد رداله وناس عندها ذمه وضمير .. كل محافظه بمجلسها وولادها مسؤله على بناء نفسيها بمجهودها وتوفر طعامها وأسكانها وتشغل ولادها وتدير مشاريعها ومسؤله عن الأمن الداخلى حيطلع لى واحد من بتوع زمان ويقول لى ياريس زيزو المشاريع والبناء محتاجين فلوس حقوله مين قالك يامغفل أن بلدنا مفلسه الأموال أللى أتنهبت بالمليارات حترجع ودى تكفى وتزيد لبرامج التنميه وسيعاد توزيع الدخل القومى من قناة السويس والبترول والسياحة والضرائب بطريقة عادلة على كل المحافظات بلدنا فيها خير يكفينا ويزيد

وأللى كان بيستمتع بالخير ده ناس أنتم عارفينها ولولا أن خيرها كتير كان زماننا أتشطبنا من خريطة الكون .. فنحن بتنسرق عينى عينك من ألف سنه أو أكثر وجه الوقت علشان نفوج ونصحى ونبطل طناش وأستهبال قالوا يا فرعون أيه فرعنك قال -- الراجل كتر خيره - مالقتش حد يقولى لأ .. من الأن فصاعدا أنتم المسؤلين عن بلدكم لو شفت غلط جول ولا يهمك ولا تخاف من معتقل أو غيره أحنا فى زمن الحرية الكامله

الحرية المحترمه أللى بتحترم الناس وعقليتهم وده بيتوقف على الأعلام والصحافة

من الأن سنقول لا لكل سيئ وقبيح يعرض على شاشات التليفزيون ولا للأفلام السافله أللى بتدعوا للرزيله والفحشاء فنحن شعب متدين وعلى خلق ويجب أن نحافظ على ولادنا من موجات الأنحلال والعرى والفسق والكفر ونحترم كافة الأديان والمعتقدات

فهذه هى طبيعتنا ورقينا نفخر بها بين الأمم

- هتافات الله أكبر الله أكبر

يتبع

الحلقة رقم (3)

دور المرأة

- المرأة يا أخوان ليها دور كبير فى مسيرتنا القادمه فهى تشكل نصف المجتمع ويجب أن تمثل فى مجلسكم هذا بنفس النسبه ومع حرية الأنتخابات وتعديل القانون حنشوف الستات حتعمل أيه .. صحيح الفترات أللى فاتت كان فيه ستات فى المجلس  قاعدين ومتزوقين وعاملين زى عرايس المولد ولكن للأسف كانوا ديكور ولا بيهشوا ولا بينشوا وده يرجع لنظام الأنتخاب وأسلوب التعيين

للحشاكيل والبلاوى المعروفه ( صوت يعلو من داخل القاعة وسيدة منهوبيا الأولى ياريس ) أتلهى على عينك أنا راجل صعيدى ماعنديش سيده أولى ولا تانيه ولا تالته

أنتم لما أنتخبتونى أنتخبتم معايا المودام والعيال .. لا دخل لأسرتى من بعيد أو قريب فى أدارة هذه البلد لما ربنا دعى سيدنا موسى دعاه لواحده ولا هو وقومه ( تصفيق حاد وهتافات ) نكمل .. الست فى أى بلد فى الدنيا هى الأساس لنهضة أى دوله ولو متخلفه أو جاهله حيفضل البلد متخلف وجاهل فلا بد من تشجيع المرأة على العمل السياسى الجاد وبدونها حنفضل مكاننا محلك سر ( زغاريط من القاعة ) أيوه زغرطى ياللى مش غرمانه (صوت من القاعة : الأسعاروالبطاله ياريس زيزو )

 قبل ما نتكلم عن الأسعار نسأل الأول مين السبب فى رفع الأسعار هل هم التجار هل الفلاحين هل رجال الأعمال هل هى أزمه عالميه كما يشاع هل الأدارة الخاطئة

حاجات كثير نضع أمامها علامات أستفهام .. يا ساده ياكرام بلدنا بلد زراعية وأى دوله كبرى بدايتها كانت الزراعة والدمار أللى حصل فى مجال الزراعة هو السبب الرئيسى فى هذه الأزمه.. ناتج من رفع الدوله لأسعار الأسمده والتقاوى المشكوك فى أمرها أنا راجل فلاح وعارف النصيبه السوداء أللى وقعنا فيها من تحت راس واحد أجرم فى حق هذا البلد بأسم التطوير بأستخدام التكنولوجيا الحديثه فى أستباط بذور وتقاوى جديده عن طريق الهندسة الوراثيه ولم تستخدم بحكمه أو دراسه أدت إلى دمار المحصولات الرئيسيه مثل القطن والأرز وقصب السكر والخضر والفاكهة فكانت وبالا على المزارعين والمستهلكين أضف عليها المبيدات المسرطنه الى تسببت فى أمراض لم نسمع عنها من قبل أصابت أبناء شعبنا .. سنعيد زراعة بذورنا القديمه وسنزيد الأنتاج فمساحة الأرض المنزرعة تكفى لأطعام الجميع والأجيال القادمة وسنستعيد كل الأراضى التى بيعت للمغامرين الأجانب ومدعى الأستثمار ليزرعها أبنائنا فأرض بلدنا ليست للبيع وسنصدر قانون بذلك ( تصفيق حاد )

أيها السيدات والساده الزراعة هى أساس هذا البلد وبدونها سنموت فهى الغذاء والكساء والمستقبل لبلدنا المحبوب وسنتكلم عن الصناعة والبطاله والروتين والأسراف الحكومى  والسياسة الخارجية كالتالى ( يخرج أحد الأعضاء من بين المدرجات ويتجه للمنصه وفى يده ورقه فيمنعه الحرس من الأ قتراب فيأمرهم الرئيس بتركه ليقوم بتقديم مابيده من أوراق

- سبوه يارداله لما نشوفه عايز أيه .. تعال قررب  أبقوا أتعلموا النظام تك داهية فيك وفى أللى أنتخبوك ( يخرج مسدس من جاكيتته ) أيه أللى فى أيدك ده يا أبن المجنونه .. أمسكوه ..طاخ طاخ طاخ

- آى آى آى..دمممم آخخخخخخخ قتلتنى ياجبان آه آه آه

يشعر بيد تهزه برفق وتطبع قبله على جبينه وتقدم له كوباية ميه : أشرب ياحبيبى

أنت كل يوم يجيلك الكابوس ده أنت بقت حالتك صعبه قوى

- أشهد ألا آله ألا الله .. أنتم قبضتم عليه

- هو مين أللى قبضنا عليه .. أللى ضرب عليا بالفرفر وأنا بخطب فى المجلس

- فرفر أيه ومجلس أيه أنت كنت بتحلم يازيزو .. قوم علشان تلحق الشغل

- خخخخخخخخخ... ييه أنت نمت تانى أصحى حتتأخر ..سبينى شويه أكمل البيان وأشوف الواد أبن الدزمه أللى ضربنى بالفرفر  أعلقه من رجليه خخخخخ

- قولت لك ألف مره ماتقراش الجرايد قبل ماتنام يازيزو وآدى النتيجه كل يوم تصوت وتصرخ وتقلقنا من النوم

- صباح الخير ياسيدة منهوبيا الأولى..

- منهوبيا .. أنت دماغك أللى بقت مناخوليا

ههههههههه