الحلقة رقم (6 )
رسالة شوشو
وصلتنى رساله من عائشه المتضايقه الشهيرة بشوشو لما تشوفه ردا على رسالة سيد زعبلة التى يحكى ويتحاكى فيها عن عروسته الصينيه
صباحك نادى ياعم زيزو يا بتاع الفوانيس
عايزاك تقول لسيد زعبله أنه لو كان فيك الخير ماكان رماك الطير والطيور على أشكالها تقع .. وقوله كمان ياعم زيزو بنات مصر تتاقل بالذهب حلاوه وطعامه وخفة دم أحسن من الكوبه أللى أتجوزتها أللى مالهاش لا طعم ولا ريحة ولاشكل ولا كسم وقوله كمان الناس خبيتها السبت والحد وأنت خيبتك مش على حد والجدعنه أحنا أللى بدعنها أنت فاكر يا أهبل أن الصينيه دى حتعشش أبقى قابلنى دى عملاك قنطره عشان تاخد الأقامه وحفكرك ياسيد أن الصينية بتاعتك أن ماكنتش تدخلك أبو زعبل لأبقى ماعرفش حاجة ويوم ماتفكر تسيبها راح ترفع عليك قواضى من كل نوع ولو خلفت منها حترمى لك العيال وترجع بلدها .. قال رضينا بالغلب والغلب مش راضى بنات اليومين دول ياسيد بترضى بأى حاجة أن شالله غويشه فلصو من بتوع الصين وأهلها بيقفوا جانبها فى الحلوة والمره المهم يكون راجل جدع ويامه ياسيد ستات بتشيل بيوت وبتنحت فى الصخر علشان تربى عيالها
ولو ربنا طسك بمرض يلهفك.. هل الصينيه حتمرضك وتأكلك وتشربك وعمرها ما حتقل بأصلها وتقول ده جوزى سيد الرجاله مش ممكن أفرط فيها
بتعايب علينا أن جسمنا بيفشول بعد الجواز مش كله ياسيد.. الست المصريه أى لقمه بتبان عليها مش زى السحالى أللى تاكل وتزرب .. غير البلاوى أللى بيكلوها فى بلدهم صراصير على سحالى على كلاب على بلاوى وقرف لكن أحنا فى مصر متربيين على الغالى والأكل النضيف
ياسيد الراجل أللى يستنى مراته تتخانق وتضرب سواق الميكروباص علشانه ماتأخذنيش ما يبقاش راجل والراجل أللى يشقى مراته وياخد عرقها مايلزمناش .. الدنيا غاليه نار صحيح وفيه بنات أتجوزت من غير شبكه ولا مهر ولا فرح حتى بفستان أيجار ما سمعتش أبوك ولا ولاد حتتك أن البنت أللى تتجوز بتراب الفلوس مايبقاش ليها غلاوه عند جوزها
أنت تعرف البنات أللى جايه من بره دى فيها أيه ياسيد وكانت عايشه أزاى وكانت ماشيه أزاى وخط سيرها أيه.. أزاى تقارنها بالبنت المصريه أللى محافظه على شرفها وكرامتها ورافعة رأس أبوها وأخوها لفوق لأنها بنت رجاله مش مروحه ياسيد.. عارف يعنى أيه مروحه ولا الفقر مسح معاه الغيره والشهامه
عيالك ياسيد حيطلعوا مايعرفوش لاجد ولا جده ولا خال ولا خاله زى الزرع الشيطانى
أللى ماعندوش أصل .. ياسيد العروسه الصينى أللى أنت أتجوزتها زى العروسه الكاوتش مافيش أحساس ولا حب ..نظام مصلحة مش عارف تقبل تعيش مع واحده مفيش بينك وبينها أى لغة للحوار والمناكفه ولا تعرف هل هى تحبك ولا بتمثل عليك
ياسيد السوق مليان تفاح صينى شكله يهبل وجانبيه التفاح المصرى التفاحة منها طعمها بطعم عشرة كيلو تفاح صينى
البلدى يوكل ياوله .. والخيبه أللى أنت فيها ما تفتكرش أنك فى أمله وقاعد عما تمعر وتقولى العروسه الصينى ياجمالها ياحلاوتها ..سم كده .. الست المصريه مافيش زيها ولو أتجوزت كل يوم عروسه صينى.. حتجيب الفراخ البلدى زى العرس الصفراء والنبى وأللى نبى النبى أن ماكنت تتلم وتتخرس وماتجبش سيرة الخيبه التقيله أللى أنت وقعت فيها وماتجرجرش وراك الشباب أللى بيسترخص لأكون فرماك
ياواد ياأهبل بيقولوا أللى ماتجوزش من مصر يبقى ماتجوزش عامل زى القرع بتمد لبره.. لما أنت ياسيد أنت وغيرك تتجوزوا من الصين دناوه وأسترخاص أومال أختك وأختى وبنات مصر يتجوزوا مين يسافروا بقى الخليج والبلاد أللى حولينا أو يمشوا مشى بطال ماهو أنت بسلامتك أنت وأللى معاك راحت منكم الوطنيه والأنتماء لبلدك أللى أنت عشت فيها ولحم كتافك من خيرها هو ده رد الجميل
مش كفايه عليك الشويه دول ياسيد سيكمومى زعبله سابقا رجعالك
أوجزت فأنجزت يا أخت شوشو لما تشوفه ..لمى الملايه ولنا عوده لبقية الحكاية