سر مصرع قهوة كتكوت
على حين غرة أختفت قهوة كتكوت من خريطة المنتديات وكأنها فص ملح وداب بعد أن كانت ملء السمع والبصر تتباهى بنفسها بين المنتديات وتفخر بأن زبائنها من كافة بقاع الأرض بها عباقرة فى كافة المجالات الأدب والفن والعلم أضرب على لينك القهوة فيأتى جوجل بالخبر اليقين رقم 404 الذى يؤكد فيه بأنه لا يعرف أحد بالأسم ده ..غريبه أيه أللى حصل لا أحد يعلم
صمت يتبعه همهمات وتأوهات ليفتح المجال للقيل والقال وبالتالى أصبح المجال متسع لأطلاق الشائعات فى الفيس بوك فقال البعض : بأن السيرفر أنفجر..وآخرين قالوا لا.. سيرفر أيه أللى بينفجر ده هو هريدى بيهمه سيرفرات ولا دياوله.. الموضوع وما فيه أن صاحب المنتدى كان واخده نظام قانون جديد وأصحابه خدوه منه لأنه لم يسدد الأيجار وجاء الشامتين وقالوا : سيرفر أيه وقانون جديد أيه أحنا عارفين هريدى كويس وهو بلدياتنا .. الحكاية ومافيها أن الراجل ده غاوى نزاهة كل كام شهر يغير فى القهوة ويدخل عليها تعديلات شويه يبيضها وشويه يسودها وشويه يدلعها بالصور والشات والفيس بوك الحقيقة الراجل مش حِرمنَا من حاجة بينزل فيها أحدث التكنولوجيا .. لكن المره دى حب يوسع المصطبه ويعمل قاعده للتيلفزيون ومكان لترابيزة بنج بونج وقسم للعائلات وقسم للغراميات ويحط كام ترابيزه للحبيبه عليهم شمعدانات ومعاهم مشروب السعاده ( فخفخينا )ويشاركهم باند غربى يعزف أحلى الألحان .. راجل قلبه كبير فقام مشكورا بإزالة 3 أو 4 عمدان خرسانه مالهُمش لازمه زاحمين المصطبه فأنهارت القهوة فى لحظة حتى الزباين مالحقتش تخرج منها وفى ناس مدفونه تحت الأنقاض لحد دلوقتى وشغالين على الشات ومش دريانين بأللى حصل ووقف مزهولا وكل ما حد يسأله أيه أللى حصل ياريس مانحاول نطلع الناس أللى جوه ..يقول كلمته الشهيره : أيكش تولع خليهم تحت عنهم ماطلعوا
- لكن أنا سمعت حكايات غير كده يا جماعة .. بيقولوا أن هريدى يابوى زنووا على دماغه جماعة مستثمرين وطلبوا منه أن يشتروا القهوة ويحولوها معرض للجزم الحريمى والشباشب الرجالى
لأن موقعها ماسك ناصيتين وكمان فى منطقة تجاريه .. الراجل رفض فى الأول ولكن مع الزنّ والفلوس والأغراءات ورزالة الزبائن والمباحث أللى بتنط كل شويه فى القهوة ..الراجل وافق وسلمهم القهوة وآخد االقرشين وفلسع على بره وفتح منهم البوفيه المتواضع ده إللى أنتم قاعدين فيه
- ويتقال والله أعلم أن فيه ناضورجيه ومعاهم زباين أصحاب مراكز كبيرة فخخوا القهوة وهربوا دليل على كده الموقع الجديد لا يوجد به أى ناضورجى من أللى أحنا عارفينهم
- طب مواضيعنا وصورنا وأبحاثنا وبريدنا الألكترونى وكلمات المرور وذكرياتنا القديمه فى القهوة راحت فين .. تضيع كلها فى غمضة عين.. بجد حرام
- يقال والعهدة على القائل بأن القهوة أصابها الوبا .. وأنضربت بفيروس جامد قوى من قبل مباحث أمن الدوله لأخراج المعارضين الأنتيخ من أمثالى والمتشددين من أصحاب العمم والنقاب وبيقولوا أن القهوة لمت قوى وكفايه عليها كده وكان لابد من تدميرها خاصة فى أيام الأنتخابات
ولو لاحظتم أن القهوة فى آخر أيامها ظهرت معاناتها واضحة من تأثير الفيروس فأنحنى ظهرها وبدأت تزوك على رجل واحده وأصبحت لا تقوى على الحركة أو فتح الباب للزائرين وأهل البيت وجائت نهايتها يانضرى مفاجئة فقد خطفها الموت وهى لم تصل لسن التاسعة أتحرقت الشمعة دون أن ندرى
ولكنها ستبقى فى ذاكراتنا بلونها القاتم الكئيب الذى يذكرنا بسكان الكهوف ولننعى فيها كنوزنا الفكريه والأدبيه والعلميه التى وضعها أبناء القهوة بها.. ولله الأمر من قبل ومن بعد وأن لله وأنا إليه لراجعون
وأنا من موقعى هذا أطلب من هريدى يابواى أن يقوم بعمل حفل تأبين للقهوة الزرقاء الفقيده ويعتبر يوم وفاتها ذكرى سنويه نتوقف فيها دقيقة حداد عن الكتابه
كل هذا ولا نعرف السبب الحقيقى وراء مصرع قهوة كتكوت الزرقاء ومعها كنوز من اللك والعجن والأعتراضات والشطحات والغراميات
ياخسارتك ياللى فى بالى ياليتنى كنت أحتفظت بعنوان بريدك الألكترونى
هئ هئ هئ ..آههههههه
ليست هناك تعليقات:
إرسال تعليق