زائر الفجر الجديد

زائر الفجر الجديد

- كابتن ..كابتن ممكن أعمل مكالمة من موبايلك لمدة دقيقة

- آسف ماعنديش رصيد

- هات الموبايل ده ياض لأشرحك .. الموبايل ده يلزمنى

- خد ياعم الموبايل ولا تشرحنى ولا أشرحك .. بس ممكن طلب صغير

- عايز أيه أنطق

- أبعد بس المطوه لا السلاح يطول .. ممكن تدينى الشريحة لأن عليها أرقام أصحابى وصور أخواتى البنات وصورى أنا وخطيبتى

( ينظر له شزرا وهو يفتح غطاء الموبايل ويخرج الشريحة ويرميها على الأرض بقرف فيجرى صاحبنا ويلتقطتها ويكمل سيره خلف البلطجى وهو ينادى عليه)

- كابتن ...كابتن ....كابتن

- عايز أيه يالوح

- ممكن ترجع لى الموبايل لأنى شاريه بالقسط وأنا مستعد أديك كل أللى معايا

- معاك كام

- عشره جنيه

- هات ياض العشرة جنيه ومفيش موبايل

- خد العشره.. بس أبعد المطوه لا السلاح يطول

- كابتن ..كابتن.. كابتن

- فيه أيه تانى .. أنت ياض أبتديت تعصبنى

- مفيش حاجة خلاص ..ما تعصبش نفسك

- أنا سمعك ياض بتبرطم بتقول أيه سمعنى وألا حنقرشك زى كحك العيد

- كنت بألعن اليوم ألا خلانى أشتغل الشغلانه دى

- أنت بتشتغل أيه ياض

- أنا يا كابتن خريج تجاره خارجية وأبويا ميت وبأشتغل فى محل للبيتزا علشان أساعد أمى فى المعيشة وورديتى بتنتهى الساعة أربعة الصبح وبأضطر أنى أمشى على رجليا لحد بيتنا علشان مفيش مواصلات فى الوقت ده

- بتشتغل فين حته ياض

- فى ميدان رمسيس وبيتنا فى أمبابه

- ياه ده مشوار جامد قوى

- صعبت عليك .. طب هات الموبايل بقى ربنا يخليك

- أمشى ياض لأقطعك