جمعية الخيال الخصيب وصل عدد أعضائها لأكثر
من 1500 عضو وعضوه يجتمعون فى ناديهم على النيل مرتان فى الأسبوع ليمارسوا جلسات
التخيل تحت أشراف الدكتور عبد الحليم النعسان رئيس الجمعيه والأستماع إلى تجارب
الأعضاء فى ممارسة التخيل خذ عندك تجربة أحد الآعضاء وهو يتقمص شخصية سى السيد
وأحدى العضوات تتخيل نفسها فيفى عبده وتقدم وصلة رقص ساخنه ومنهم من يتخيل نفسه
انور السادات او كوز مخروم او صرصار يتيم او بلحه فى صباطة ويعيش معه باقى الأعضاء جو
التخيل وأتفق الأصدقاء أن أقوم بأداء دور العريس المُضّرب عن الزواج ورسمنا سويا
سيناريو التخيل وبدأنا التنفيذ ..فقمت بأرسال الدعوات لكافة الأصدقاء وأعضاء
الجمعية وحجزت قاعة فخمه فى نادى معروف وأشتريت بدلة الزفاف وتعاقدت مع فرقة للرقص
الشعبى للسير أمام الزفه
بيسو : أصبر يا أستاذ ما تتحركش علشان حنرش
مثبت الشعر.. خلاص نعيما أتفضل قوم ألبس بدلتك فى الداخل ولو محتاجنى نادى عليا
صوت الأصدقاء وأبواق السيارات خارج مركز
التجميل وصيحات الشله وغنائهم على الدفوف
أخرج فى أبهى صوره تفوح منى رائحة البرفان
فأنظر إلى المرآة قبل أن أركب السيارة المكشوفه المزينه بالورود فلم اصدق نفسى وأنا
أقف أرسل القبلات للمصطافين الذين يقومون بنثر الورود والرياحين
وصلت للكوشه يحيط بى لفيف ضخم من الأصحاب
وأجلس فى كرسى العريس والمعازيم تقوم بتهنئتى وتقبيلى ثم تتجه لكرسى العروسه لتهنئتها وتقبيلها
طفله تجذب أمها من ذيل الفستان
-
مامى مامى أنا مس سايفه العروسه يامامى
-
اخرسى يا مقصوفة الرقبه العروسه امامك اهه
سلمى عليها
-
يامامى الكرسى فاضى ومفيس عروسه
-
تخيلى ان فيه عروسه بوسيها وسلمى عليها
-
هئ هئ هئ حلوه اللعبه دى مامى
يتدخل احد الشباب ويؤكد على كلام الطفله
الصغيره : آه صحيح فين العروسه.. الكرسى فاضى
- اشير لصديقى فتحى ليسحب هذا الشاب الغلس
الغير مسجل بالجمعية بعيدا حتى لا يفسد الليله
اقوم لأراقص العروس على موسيقى تايتنك وألف
بها الصالة وتنتهى الرقصة بقبله طويله مع تصفيق وتصفير المرافقين ويبدأ الشباب
بالرقص على الDG لمدة ساعتين ويعلن عن افتتاح البوفيه ويتسابق
المعازيم لصالة الطعام
الطفله : انت بتاكلى ايه يامامى الأطباق
فاضيه
الأم :كلى وأنت ساكته خدى طبق الجاتوه ده
الطفله وهى تبكى : أنا عايسه جاتوه ماليس
دعوه
بعد ان ينتهى العشاء اقف على باب قاعة الطعام
وأنا اسلم على المعازيم
-
ياريت العشاء يكون عجبك يا محسن بيه
-
الحقيقه انا ماشوفتش انظف وأروع من البوفيه
ده من حلاوته احنا مسحنا الأطباق مسح بالرفاء والبنين
-
مبسوطه يا هانم من الحفله والعشاء
-
كلها على بعضها فانتستيك خالص آخر جنان وربنا
.. ولا فستان عروستك ياجماله وياذوقها العالى
-
عقبال اولادك يا مدام
أفاجئ بحضور عمى العمده وأبنائه سعيد وسعدون وفرحانه
وبهانه من البلد ويدخل عليا مهرولا ويحتضنى ثم يسلمنى لسعيد ليفعصنى أكثر ومن بعده
سعدون ليفعصنى أكثر وأكثر ويقول معاتبا
-
أخيرا ربنا رضى عنك وحتتجوز يا مانت كريم
يارب فين العروسه علشان بنات عمك يسلموا عليها
-
مفيش عروسه ياعمى
-
يعنى أيه ..تكون بعافيه .. لأ مش بعافيه ...مفيش
عروسه ...يعنى مفيش عروسه
-
اومال أيه اللى بيحصل ده ياجدع أنت حتجننى
-
أولا أنت عرفت أزاى أنى عامل فرح
-
جانى تلغراف بيقول ان جوازة ابن اخوك
النهارده اخدت الولاد وجئت ..فهمنى ايه اللى بيحصل ده فرح ومن غير عروسه قولى أزاى
؟؟
-
أفهمك يا عمى الحكاية ومافيها أنت عارف أنى
مضرب عن الجواز أتفقت أنا وأصحابى المضروبين مثلى
أن أتخيل أنى أتجوزت وعملت فرح وتخيلت شكل العروسه والعشاء الرائع اللى
الناس أستمتعت به
-
هو فين العشا ده شوية أطباق فاضيه وناس
بتستهبل وبتعمل نفسها بتاكل والله العظيم ده جنان
-
أهدى بس ياعمى حنعمل لك سفره مخصوص أتفضل
معايا ياشيف جهز سفره هنا لعمى العمده وأولاده
الشيف : أتفضل ياحاج ويشاور للسفرجية لتنزيل
الأطباق على السفره
العمده : أستنى ياجدع أنت فين الأكل ده
-
الأكل قدامك ياعمده كُل كُل بالهنا والشفا (
يضرب عمى السفره بقدمه ويهب واقفا وهو يسب ويلعن )
-
اياك تكون فاكرنى اهبل ولا دماغى ضاربه زي
الناس المجانين دولت
-
اهدى ياعمى وبلاش فضايح .. نفسى أعرف أبن كلب
مين أللى بعتلك
-
اللى بعتللى ولد ماجبتوش ولاده علشان أشوف
الخيبه التقيله بتاعة أبن أخويا .. مش عايز تتجوز عنك ما أتجوزت يا أخى أنما تتخيل
أنك عريس وتعمل فرح قليل ما أتخيلت أن مراتك ولدت وحتخلف 5 فى بطن واحده وتعمل لها سبوع تدعى فيه صحابك
الملاحيس ماتنساش تعزمنا عليه يا خلف الحبايب
-
بجد ازعل منك ياعمى لو ماجتش ..
-
سلام يا مجنون يا أبن المجنونه ال تخيل
آل
أيه رأيكم فى التخيل ؟؟ انتظرونا الحلقه الثانية
ليست هناك تعليقات:
إرسال تعليق