حدث فى ليلة رأس السنه

 جائتنى دعوة لحضور حفلة رأس السنة التى أقامتها قنوات النيل المتخصصة والمذاعة تليفزيونيا .. أرتديت بدلة المناسبات السينيه الكحلى والبابيون ورشيت نفسى برائحة القرنفل ودلكت وجهى بكريم اساس لتغطية اثار الزمن ونظرت لنفسى فى المرآه وقلت مشجعا : مش معقول حلاوتك دى وفى تمام الحادية عشرة ذهبت إلى الحفل لأجد أعداد غفيرة من الأمن المركزى والمدرعات فأطمئن قلبى بأننا لن ننفجر فى هذا الحفل فوجدت فى مدخل القاعة رئيس التليفزيون ووزير الثقافة وكبار المذيعين والمذيعات وهم يستقبلونى فى حفاوة بالغة فأسقط فى يدى وأنا أقول كل الناس دى عرفانى أزاى !!
 دخلت الصالة ورسمت على وجهى أبتسامة الواثق من نفسه وهجم عليا عدد من الممثلين المبتدأين وهاتك يابوس ويا ترحيب وكأنهم يعرفوننى حق المعرفة وقصوا شريط المبّوسه وأتهريت بوس وأحضان دافئة ونظرات حالمة من قدامى وعواجيز الفنانات ونادت بوسى على أحدى المدعوات .. تعالى سلمى على الباشا ياسوزى ده أكبر منتج فى مصر .. ثم قالت مداعبة أنت شكلك أتغير كثير ياباشا .. للأحسن ولا للأسوء.. للأجمل ياباشا ..قمر يا أخواتى ..لعلمك رقصة رأس السنه تكون من نصيبى .. أصوات نسائية من حولى أنا أنا أنا .. خلاص خليكوا حواليا وأول ماينطفئ النور هى ونصيبها أللى حترقص معايا .. وطوال الحفل سلمت على طوب الأرض وبوست جميع الممثلات والكومبارس والمخرجات والكوافيرات والبودى جاردات ومنظمين الحفلة .. ماخلتش حد ألا لما بوسته ..البوس هناك كان للروكب
مذيعة الحفل بدأت فى العد التنازلى ..3..2..1..00 هوبا وأنطفأ النور وضعت بين فساتين السهرة وأقدام النساء وظل النور مغلقا فترة طويله والنساء تصرخ ولعوا النور فيه حاجات مش تمام وأنا أقاوم بكل ما أوتيت من قوة لأتخلص من هذا الكم الهائل من الأحضان والقبلات وكأنى غريق أصارع من أجل الحياة وكنت أأن بأنين خافت وظل يرتفع ويرتفع حتى صرخت بأهلى صوتى .. أرحمونى ياولاد الكلب
يد تربت عليا : زيزو هم مين ولاد الكلب أللى عايزهم يرحموك ياحبيبى
- مين..أمتى ..و فين.. أشهد الا اله الا الله .. ياساتر اللهم ما أجعله خير وتكون سنه جميلة كلها حب وبوس
هى : بوس؟؟ ..
- أنا قلت بوس ..
– أيوه قلت .بوس
- يظهر أنا بخرف
 – طب قوم أشرب الينسون وكل الزبادى لما أشوف أيه حكايتك الصبح خخخخخخخخ

حوارات بائسة (4)

مع مذيع الغبراء
 - أنا مع السيسى قلباً وقالبا فى كل أللى بيعمله.. كفاية أنه وفر لنا الأمن الأستقرار وحمانا من الجماعة الأرهابية مش أحسن ما نبقى زى سوريا والعراق
- ماشى مش حرد عليك وأنت عارف ليه ..وأيه رأيك بقى فى الغلاء 
 - شعبنا بيدلع والوقت ده مش وقت دلع ماهى الناس أهه ماشيه قدامك وماليين القهاوى والكافيهات والأسواق شغاله والبيع والشراء على ودنه .. غلاء أيه أللى بيقولوا عليه.. قصدك على سعر اللحمة بلاها لحمة.. الجيش مالى الجمعيات باللحمة عايز تاكل لحمة بلدى أدفع.. مش قد ثمنها عندك اللحمه البرازيلى والسودانى والهندى والصومالى .. حتقولى فراخ مش لازم تجيب فرخة حية وتدبحها أشترى نصف فرخة مثلجة كفاية .. شعبنا مش واخد على أقتصاد الحرب.. أوروبا فى الحرب العالمية الثانية كان نصيب الفرد بيضه واحده فى الأسبوع
- ماشى مش حرد عليك وأنت عارف ليه ..وأيه رأيك بقى فى أزمة السكر
-لأزمة دى مفتعله ورائها الأخوان والتجار الجشعين والحكومه وراهم بتقبض عليهم
- لكن بالرغم من كده السكر الحر مش موجود فى السوق ياحمؤه
 - ياراجل ماتقولش كده عربيات التموين والجيش فى الشوارع والميادين بتوزع السكر ..عايز سكر حر أيدك على 100 جنيه وحيوصلك منى بكره 5 كيلو
 - ماشى مش حرد عليك وأنت عارف ليه ..لماذا لم يتم القضاء على الأرهاب حتى الأن شوفت حادثة تفجير البطرسية
 - أسألك أنا لماذا لم يتم القضاء على الأرهاب فى سوريا والعراق وليبيا وأوروبا وأمريكا وروسيا الأرهاب أصبح ظاهرة عالمية
 - لا تجاوب على سؤالى بسؤال فكل دوله لها ظروفها ونوعية الأرهاب فيها فلا تتحاور وتهرب من السؤال
- وماتعرفش أن الأرهاب هو من أهم الأسباب التى أدت لأرتفاع الأسعار
- أخيرا يا أستاذ أحمد أنت بتقبض مرتبك بالدولار ولا بالجنيه
- شويه بالدولار والباقى بالجنيه
- هل صحيح أنك بتقبض 300 ألف جنيه فى الشهر
- أيوه صحيح وده أقل مرتب لو قارناه بمرتبات المذيعين فى أمريكا وأوروبا
- أستاذ أحمد روح منك لله الشتيمه خساره فيك من أخذ من ذهب المعز ضرب بسيفه
 - زيزو أنا عارف طريقة ردك لوسمحت أبعد عن قفايه لأنه ملتهب أضرب فى أى حته تانيه لوسمحت

السيمون فاميه

- كل حاجة غليت الشيكولاه والكفيار والسيمون فميه
-  ألا قوليلى يا شيرى أنا بأسمع عن السيمون فميه ولا عمرى شوفته ولا عمرى دوقته ده صتف حلو ولا حادق ولا دهان للركبه ولا علاج للكحة 
 السيمون فيميه ياعمو هى شرائح السلمون الفرنساوى المدخنه طعمها اكثر من رائع تستخدم بشكل عام لفتح النفس على الأكل وممكن تدخل فى بعض الاطباق كالمكرونه بالسيمون فيميه ..فيه سلطه فظيعة انا شخصيا بأموت فيها تتكون من شرائح السيمون فيميه و الخس الافرنجى و حلقات البصل مع التوابل الهندى ..ياياى.. لعلمك السيمون فميه مفيد قوى لكبار السن.. جميع عواجيز أوروبا بيأكلوه فى الثلاث وجبات
- ألاقيه السيمون ده فى أنهى أجزاخانة ياشيرى
 - ياسلام عليك ياعم زيزو لعلمك لو روحت أي هايبر كبير ... هاتلاقي السيمون فيمية موجود ناحية التلاجة اللي فيها الكافيار والأجبان الغريبة اللي بتسمع عنها بس وماتعرفش تنطق أسمائها ... ودايماً بتلاقيه مُغلف في عبوات بلاستيكية شفافة لونها مغري ... وهو مميز بلونه وتعرفه من بين مليون سمكه .. السيمون فيميه علشان ماتهش لونه برتقالي ... بس بعيد عنك ممكن تضرب لك بتاع 5 كيلو منه وما تشبعش
- وده الكيلو منه بكام ياشيرى ولا بيتباع بالجرام
- الفرنساوى الفرنساوى قبل ما الدولار مايشد كانت العبوه الكيلو بـ 300 جنيه دلوقتى بقت بـ  540 جنيه شوفت الأفترى يا أونكل
- فعلا أفتراء ياشيرى
- بس في سيمون فميه مصرى الكيلو بـ 3100 موجود فى كارفور ومترو بس مش حييجى حاجة جنب المستورد..حعزمك على كيكه بالسيمون فميه حتحبها قوى
- وأنا حرد العزومة بأكلة رنجة وبصل أخضر وتشوفى مين يكسب سيمون فماهيك ولا رنجتنا...
- للى عايز يجرب.. الاسم الفرنسى Saumon fumé بـ 540 جنيه
نداء أنسانى
 مش لاقيين السيمون فميه ياسيسى ولا المحلى ولا المستورد أبنتنا شيرى مصابه بأكتائب شديد بعد أختفائه

حوارات بائسة (2)
بيع نفسك شوف الشارى مين؟
- أنتى مابترديش على التليفون ليه يابت
- أنا حره أرد ما ردش 
- أحنا مش مخطوبين ولا مش مخطوبين
- أيوه متزفتين .. سألت نفسك أحنا مخطوبين بقالنا كام سنه .. بقالنا 77 سنين ياسيد وأنت محلك سر مفيش خطوه لقدام
 - ماهو أنتى شايفه الظروف الهباب أللى بتمر بيها البلد حالها واقف ومفيش شغل طيب أعمل أيه أنا لو ينفع أبيع نفسى كنت بعت نفسى أقولك أيه أكثر من كده
 - الكلام بتاع السيسى مايمشيش معايا ياسيد تبيع نفسك ترهن كليتك وتسبلى فى عنيك وتقولى أنتى نور عنيا خلاص الكلام مابقاش يأكل معايا .. أنا بالعربى أتقدم لى عريس أمبارح وجاهز من مجاميعه وعنده شقه فى مساكن الزلزال هواها يرد الروح ومش حيخلى أبويا يدفع أبيض ولا أسود
- (يقبض على رقبتها حتى كادت أن تختنق) سيب رقبتى ياسيد وبلاش غباوه
- مين يابت الواد بتاع مساكن الزلزال ده قولى ولا أخلص عليكى
- سعيد حمامات
- السباك مالقتيش غير الحمار ده .. متجوز قبلك 33 نسوان بعتينى برخص التراب يابنت القرندلى علشان شقه فى المساكن بكره يشد عليكى السفون.. عقابا ليكى روحى أتجوزيه ياكلبه وأنا جاى النهارده أقابل أبوكى ياريت تجهزى حجاتى وفلوس الجمعية والعباية الفستقى أللى جبتها لأمك
 - جاهزين ياخويا فلوسك ودباديبك وعبايتك ..بس والنبى ماتزعل نفسك مصيرك تلاقى بنت الحلال أللى أحسن منى .. أنا كبرت ياسيد وعايزه أخلف لى عيلين وحالك حيطول ياحبيبى
- ماتقوليش الكلمه دى لوكنت حبيبك صحيح  ماكنتيش عملتى كده.. خطوبه وجواز تانى من غيرك أستحاله.. أنا حسيب البلد كلها وأسافر على مراكب المهاجرين لأيطاليا
- بلاش ياسيد..السكه خطره
 - قال أيه رماك على المر قال أللى أمر منه .. ورضينا بالغلب والغلب مارضاش يابلد .. ميعادى مع أبوكى الساعه خامسه سلام

حوارات بائسة (1)
طعميتك سكر
- هى الطعمية غليت ولا أيه ..أمبارح كنت واخد 4 طعميات بجنيه وأكبر من دى النهارده مفيش ألا 33 بس وصغيرين ومكعبرين وكلها عيش ومفيهاش ريحة الخضرة
- أيوه ياسيدى غليت شوف الدولار كان أمبارح بكام والنهارده بكام .. الدولار بـ 20 جنيه ياحاج
- الله ..يعنى لما الدولار يبقى بـ 30 جنيه تقف الطعميايه بكام يا أسطى 
- أقولك ( يفتح الأله الحاسبه ويكتب عليها عدة أرقام ) تبقى بالصلاة على النبى بحوالى 4.999 جنيه يعنى 5 جنيه لأن القروش أتلغت
 - ألا قولى يا أخ مال الطعميه ومال الدولار يطلع ولا ينزل هو أنت بتستوردها لا مؤاخذه الفول مصرى والزيت مصرى والخضره مصريه
- أنت فاهم غلط يا أستاذ.. الزيت اللى بنستورده زاد أمبارح بس 44 جنيه مره واحده فى الكيلو يعنى الطن زاد 4000 آلاف جنيه والفول البلدى زاد 3جنيه فى الكيلو وحزمة الشبت والبقدونس والكُرات أصبحت بجنيه والكهرباء والميه زادت النص وأسطوانات البوتجاز زادت 3 أضعاف وبنشتريها من السوق السوداء وأهى أيام سوداء علينا وعلى الجميع
- وأيه ياعم اليافطه دى كاتب فيها علبة عدس أصفر ورغيف عيش وبصلايه خضراء بـ 99 جنيه العلبه دى شكلها أيه
- أهه قدامك أهه
- دى ..بجد حرام العلبه أللى قد علبة الزبادى بـ 9 جنيه دى ما تأكلش عيل صغير
- آه فيه أللى أكبر بـ 12 جنيه وتاخد بصلتين .. شوف كيلو العدس وصل 300 جنيه حنعمل أيه يعنى حنقطع من جتتنا ونأكل الشعب .. روحوا للى عوم الجنيه ورفع أسعار الميه والكهرباء والغاز وزود الضرائب على كل حاجة .. من قيمة شهرين كنا بنبيع بنصف الأسعار دى أو أقل والناس كانت راضيه بعيشتها مش عارف أيه أللى طق فى دماغ أم الحكومه تستلف من البنك الدولى وتخرب بيوت 70 مليون فقير : الخشب قال للمسمار فلقتنى ..قاله ماشوفتش الدق أللى على دماغى .. ياباشا روحوا للى ماسك شاكوش الأسعار وقولوا له يبطل دق علشان الناس تعيش ومايجيش اليوم ألا تبقى فيه الطعميايه بـ 5 جنيه

سهرة فى مقهى العوالم ( 3 )العوالم
 كن مسئولات عن إحياء الأفراح والليالي الملاح.. ويتميزن بمكانة خاصة بين الأغنياء والغلابة.. ينثر لهن الذهب تحت أقدامهن، إنهن "العوالم" في شارع محمد علي.
 و"العالمة" مهنة كانت من أشهر المهن منذ سنوات بعيدة ولكنها توارت الآن بسبب الفضائيات ونجمات الاستعراض، وفيما يلي سنعرض أشهر عوالم مصر بداية من شفيقة القبطية حتى نهاية النصف الأول من القرن العشرين، لن نعرض لأولئك اللاتي حققن شهرة واسعة، وانتقلن إلى مهنة التمثيل؛ وأصبحن راقصات الدرجة الأولى أمثال "تحية كاريوكا، سامية جمال، زيزي مصطفي، سهير ذكي، نعيمة عاكف، نجوى فؤاد، زينات علوي" ... وغيرهن.
ولكنا سنذهب في رحلة إلى شارع محمد علي وعوالمه.
شفيقة القبطية
 رغم انتمائها لأسرة قبطية محافظة، لكنها واحدة من أشهر راقصات مصر وأكثرهن ثراء، حتى أنها كانت تسقي خيولها شامبانيا، رقصت أمام الأمراء، بل ذهبت إلى باريس لترقص هناك، واستطاعت شفيقة أن تخلب عقل الجميع، ليتنافس عليها المتنافسون، يبذلون أغلى ما لديهم للتقرب منها، وفي عام 1963 أخرج حسن الإمام فيلم يحكي قصتها وهو "شفيقة القبطية" الذي قامت ببطولته هند رستم.

أمينة شخلع
 وهي إحدى عوالم شارع محمد علي، حيث ولدت لأب سوداني وأم مصرية، واشتهرت باسم "شخلع" وكانت إحدى أشهر العوالم بمصر في بدايات القرن الماضي وسكنت بـ حي الحلمية القديمة وتوفيت عام 1924.
"ومن أشهر أغانيها"
قولوا لعين الشمس ما تحماشي .. أحسن غزال البر صابح ماشي
سنية حسنين
ولدت سنية حسنين عام 19088 بمدينة أسيوط، وبدأت حياتها الفنية صغيرة السن بقهوة إبراهيم عيسى بأسيوط، ثم انتقلت إلى الإسكندرية وبعد ذلك إلى القاهرة، حيث عملت بملهى بروض الفرج، ووصفها البعض بأنها صورة مصغرة من الفنانة أم كلثوم، حيث امتازت بصوت طرب عذب ووضعت أقدامها في الصفوف الأولى بين معاصريها من المطربات في ذلك الوقت، وتركت سنية حسنين الغناء وهي في بداية حياتها الفنية.
"أشهر أغانيها"
على قد شوقى وتعذيبى
فضيلة رشدي
 مطربة مصرية اشتهرت في عشرينيات وثلاثينيات القرن الماضي، لم تسجل إلا القليل من الاسطوانات ولايوجد لها أعمال خاصة بها كثيرة ولكن لها أعمال مشتركة كثيره منها: ديالوج الضرتين مع الفنان أحمد شريف، وديالوج الحب له دولة مع الشيخ زكريا أحمد، وديالوج القلب ويا اللي يعزه مع المطرب الكبير صالح عبدالحي .
"أشهر أغانيها"
في هواك القلب شاكي
راحوا الحبايب وين
 سرينا المصرية

مطربة وممثلة مسرحية مصرية من أصول يهودية ولدت عام 1888، وبدأت حياتها الفنية منذ 1905، وكانت مطربة بفرقة "إسكندر فرح" وتألقت بعد ثلاثينات القرن العشرين؛ وهي الأخت الكبيرة للممثلة نجمة إبراهيم.
"من أشهر أغانيها"
قصيدة أفديه إن حفظ الهوى
 شاركت في الثلاثينات في الكثير من المسرحيات التي عرضت في ذلك الزمان مثل "مسرحية شهداء الغرام - غادة الكاميليا - ضحية الغاوية - أحدب نوتردام - الجبابرة - السلطان عبدالحميد - أولاد الفقراء - يوم القيامة - أهل الكهف".
 كما شاركت سرينا بالتمثيل في فرق "سليم عطا الله - جورج أبيض - فرقة سلامة حجازي - فرقة فاطمة رشدي - فرقة يوسف وهبي - فرقة مصر - فرقة أمين عطا الله - فرقة إتحاد الممثلين - الفرقة المصرية".
 نعيمة المصرية

الست نعيمة المصرية هي زينب محمد إدريس ولدت عام 1894 م، وهي مصرية اشتهرت في أوائل العشرينيات وكان لها مسرحها الخاص "مسرح الهامبرا " وتوفيت الست نعيمة المصرية سنة 1976 عن عمر 82 عاما.
"أشهر أغانيها"
يا بلح زغلول ، إن كنت شاريني ، معلوم يا هانم
 قوم يا حبيبي بقينا الصبح ، والنبي لآيس وياك يا غزال ، يابو الشريط الأحمر ، دور يا قلبي تستاهل « سجل عام 1923 م»
 يا عزيز عيني ، غالي والطلب رخيص ، حكواتي ومغنواتي ، ما تخافش علي ، سيد الغزلان «الحان داود حسني ».
 نرجس المهدية

هي مطربة وعالمة وأسطى من أسطوات المغنى في مصر، ظهرت في بدايات القرن العشرين وسجلت العديد من الأغاني ومعظم ما سجلته من إسطوانات كان لصالح تسجيلات ميشيان.
"أشهر أغانيها"
خايف أموت قبل ما أنظرك - إيه العبارة - لو كنت شاريني
نبوية غزال
 كانت عالمة ومطربة أيضاً ولكنها لم تحقق شهرة إلا في بداية الثلاثينات من القرن العشرين وكانت في العشرينات من عمرها.
"أشهر أغانيها"
طقطوقة كلام في سرك ماحد يدرى وطقطوقة إندهلي أنا روحي عليك .
نعمت مختار
 أم كلثوم اعتبرتها "سيمفونية" والأطرش طلبها لكل حفلاته، تخصصت في إحياء حفلات العائلة المالكة والمشاهير وأثبتت أنها فنانة متعددة المواهب فهي راقصة ومطربة وممثلة ومنتجة، حيث عملت في بداية حياتها راقصة ثم انتقلت إلى السينما.
 استطاعت نعمت مختار أن تنحي الرقص جانبا وتتفرغ للتمثيل حيث جسدت بعض الأدوار الصغيرة إلى أن أنتجت فيلم "المرأة التي غلبت الشيطان" وقامت ببطولته؛ ثم قررت اعتزال الفن والتفرغ لحياتها الخاصة ولابنها الوحيد محمد.
سونيا فتحي
راقصة شابة لكنها مثقفة على طريقة سعاد حسني في فيلم "خللي بالك من زوزو" .
أسماء الكمسارية
 مطربة مصرية تعتبر من العوالم وأسطوات المغنى في مصر خلال الربع الأول من القرن العشرين، سجلت العديد من الأسطوانات تزيد عن 23 إسطوانة .
"أشهر أغانيها"
 أنت فريد في الحسن - أصل الغرام نظرة - فريد المحاسن بان - القلب في ودك مشتاق - أنا يابدر - على روحي أنا الجاني - ليلة وصال تسوى الدنيا - أعشق الخالص لحبك - قولي رأيت إيه في دلالك - متع حياتك بالأحباب - ياقلبي مين قالك تعشق - الكمال في الملاح صدف - من يوم عرفت الحب - الحسن أنا عشقته - ياناس خايف أقول أحبه - العشق كله نواح - جمال خدك بيتعاجب - الفؤاد حبك - أنا الغرام وأنت الجمال - فؤادي أمره عجيب - يامن أسرني بالجمال - ياشمعة العز قيدي - الوى الوى .
أمينة الصرفية
 ولدت بالقاهرة بحي الدرب الاحمر، وكانت بمبة كشر منافستها على زعامة عالم العوالم الذي إزدهر في مصر بين عامي 1900-1927 .
 ولكن أمينه الصرفية تفوقت عليها وسيطرت على هذا الوسط من العوالم نظرا لكونها صاحبة صوت جميل للغاية.
"أشهر أغانيها"
يا نخلتين في العلالي يا بلحهم دوا
الجدع الأسمر يا حليوة ... عالجدع الأسمر هيلا هيلا
الآنسة سمحة المصرية
 مطربة مصرية برزت واشتهرت خلال العشرينيات والثلاثينيات من القرن العشرين، اشتركت مع محمد عبدالوهاب بتمثيل مسرحية " أنت وبختك" سنة 1923م . كذلك شاركت عبدالوهاب في بعض طقاطيقة القديمة مثل: نوبة على كوبري قصر النيل - والله زمان ياخفافي - يامين يحكم بيني وبينك - الله يجازيك ياوذنية - كذلك غنت بالأشتراك مع محمود رحمي طقطوقة - على بلدي - هذا بالإضافة لطقطوقتي - والله تستاهل ياقلبي - يافرحتي بجواب محبوبي - التي غنتهما منفردة.
"أشهر أغانيها"
والله تستاهل يا قلبى
على بلدي مع محمود رحمى
 يا فرحتي بجواب محبوبي

سكينة حسن
ولدت بإحدى قرى محافظة أسيوط عام 18966، كان يطلق عليها صاحبة "الصوت العاطفي" وأشتهرت في بداية القرن العشرين.
"أشهر أغانيها"
حيرتني في جمالك
سهام عيونك
 كما سجلت لشركة اسطوانات أوديون، اغنيتها الشهيرة "الافندي يا نينة أنا حبيته، حياني بوردة وحييته، حبيته من أول نظرة،
الحب يا نينة أحواله مرة ".
 فاطمة سري

مطربة مسرحية مصرية ولدت عام 1904 وتعتبر من أشهر المطربات في زمانها، بدأت حياتها الفنية مغنية مسرحية مع فرقة الجزايرلي، وشاركت في مسرحيات غنائية كثيرة.
 وهي أول مطربة مصرية غنت أوبرا كاملة وهي أوبرا "شمشون ودليلة" وظلت تعمل في المجال الفني حتى تزوجت وبطلت الغناء بناء على طلب زوجها لكنها بعد فترة من الزواج إنفصلت عن زوجها وعادت للمجال الفني مرة أخرى بسبب الظروف المادية التي عانتها بعد الانفصال .
"أشهر أغانيها"
بدال ما تسهر على قهوة تعالى نشوى أبو فروة
كفايه إللى شفته
أهى توبة يا ناس من دى النوبة
أنا انتهيت
شكرا لله
يا اللى بعادك
طقطوقة أنا بس ساكتالك
ناس لها بخت فى الحب (طقطوقة)
مونولوج ما بين حشايه
 فريدة مخيش

مطربة مصرية وأسطى ومن عوالم الأفراح "المتصيتة" أو المشهورة في ذلك الوقت، اشتهرت في العشرينات والثلاثينات من القرن العشرين.
"أشهر أغانيها"
إديني ميعاد نتقابل سوى
وما أحلاك ياعروسة لما تخطري
فاطمة قدري
مطربة مصرية اشتهرت وبرزت خلال عشرينات وثلاثينات القرن العشرين الماضي، كذلك استعان بها المسرحي القديم فوزي الجزايرلي لأداء بعض الأدوار والأغاني في العديد من مسرحياته التي قام بأدائها في ذلك الوقت.
"أشهر أغانيها"
رنة خلخالي
يمه في التلفون الحلو بيشاغلني
خفه يا الاسمر خفه
موال طبقت إيدي على فله وياسمينه
طقطوقة واجب على الحلو يدلع.
بمبة كشر
راقصة من سلسلة الراقصات اللاتي حققن شهرة كبيرة جداً وسط هذا الكم الكبير من العوالم في ذلك الوقت، يوحي اسمها أنه اسم طبخة شعبية خصوصاً أن "كشر" قريب من "كشري"، مثلت عنها ناديا الجندي فيلماً وكُتبت عنها مسرحيات.
تربعت "كشر" على عرش الرقص الشرقي أكثر من نصف قرن، تحديداً في العشرين عاماً الأخيرة من القرن التاسع عشر والعشرين عاماً الأولى في القرن العشرين. ولدت عام 1860 وسط أسرة من أشهر العائلات في مصر، فجدها لأبيها هو السلطان مصطفي كشر أحد أعيان مصر في القرن الثامن عشر، ووالدها الشيخ أحمد مصطفى، أحد قارئي القرآن في مصر، ولذا تعد الراقصة المصرية الوحيدة التي خرجت من أسرة غنية.
بدأت بمبة حياتها الفنية في سن مبكرة وهي بنت الـ 13 عاما بطموح لم يتوقف منذ طفولتها وحتى وفاتها، في بداية حياتها الفنية كانت تذهب لإحياء حفلاتها في الأفراح راكبةً على ظهر حمار .
ومن أشهر عوالم شارع محمد علي أيضا
العالمة مريم
الجدة الكبرى للفنانة سميحة توفيق، وتعتبر أولى عوالم شارع محمد على.
سيدة حسين
صاحبة أشهر زفة عروسة.
العالمة "أنوس"
أغلى عالمة في هذا الوقت، فقد كانت نقطتها تصل إلى خمسة وثلاثين جنيهًا.

سهرة فى مقهى العوالم ( 2 )
الغازية
 وكما وعدنى صديقى ليوضح لى الفرق بين الغازية والعالمة والراقصة تقابلنا فى مقهى العوالم ليحكى لى هذا الفرق 
الغوازى عموما هم ما يطلق عليهم بالغجر او النوار ويوحد رأيان فى أصل الغجر  الرأى الأول يقول أنهم قبائل من بلاد السند (شمال الهند و باكستان حاليا) و هم قبائل رحل (يرتحلوا من مكان لآخر) و مروا علي العراق و كردستان و بلاد الشام و مصر و شمال أفريقيا (بلاد المغرب) و الاندلس لغاية لما وصلوا هنجاريا (المجر) و تشيكوسلوفاكيا و اجزاء كثيرة من اوربا و تأثروا بالايقاعات و المقامات الموسيقية  للبلاد اللي مروا عليها و تميزوا بالعزف السريع علي الجيتار ( و من قبله العود ) و الايقاعات السريعة (الفلامنكو) و من المقامات الشهيرة لديهم مقام الكرد ، ألا أنهم يستخدمون مقامات أخري مثل الحجاز و النكريز!!! و النوآثر !!! غريبة أنك تسمع الحان علي هذه المقامات في أوربا. أسمع مالاجينيا و لا دانس دي أسبانيول (الاندالس) و اسمع سلسلة من الاعمال تحت اسم رقصات هنجرية
 أما الرأى الثانى فيقول بأن بالغجر او النوار ينحدرون الي قبيله مازن من المغرب العربي و انتشروا في كل البلاد العربيه و تفرع منهم العديد من البطون مثل الهنجرانيه ( نشل و سرقه ) و ايضا ضاربي الودع و اعمال السحر و الرقص وهم متواجدون في مصر في بلده اسمها سنباط بمحافظه الغربيه و في منطقه عرب المحمدي بالقاهره و بعض مناطق سيناء مثل القنطره شرق و الطائفه الهنجرانيه موجوده في بلده اسمها طهواج بالقرب من السنبلاوين محافظه الدقهليه و نيجي للراقصات منهم عادتا ما يلبسون توب من الحرير مفتوح من الجانبين و من الاقمشه اللميعه و شعرهم اسود طويل ومصبوغ بصبغات لونية مختلفة و يتميزون بالاجسام النحيفه و الطويله و ترتدي الغازية الكثير من الحلي الذهبيه مع ضروره وجود سنه ( من الاسنان ) بها طربوش من الذهب و هي تعتمد في عملها علي الرقص امام المطربين و التمايل امامهم بحركات لشد انتباه المشاهد و لاترتدي اي غازيه بدله رقص علي الاطلاق و دائما لاتوجد غازيه واحده بمفردها لابد ان بكونا علي الاقل ثلاثه لعمل تابلوهات راقصه و يصح ان تكون واحده ابدا و اجورهم عادتا معقوله لان الاتفاق بيبقي علي الثلاثه من واحده وقد برعت الفنانة الراحلة نعيمة عاكف فى دور الغازية وأجاد مخرج فيلم تمر حنه فى تجسيد طبيعة الغجر والغوازى وغيره كثير من الأفلام مثل الغجرية لهدى سلطان وغازية من سنباط لشريفة فاضل
 وكانت " عشش الترجمان " مستوطنة معروفة للغجر وعندما تم التفكير في إنشاء مبنى التلفزيون المصري اتخذ القرار بإزالة عشش الترجمان. وعلي اية حال فإن الغجر كانوا يعملون ايضاً في مجال الترفيه كحواة وقرداتية وغوازي . وقد احترفوا إنشاد الغناء الشعبي المصري فحافظوا عليه من الاندثار ‏،‏ كما برعوا في الربابة والمزمار ‏،‏ ومن النادر ان تجد عازف مزمار او راوي سيرة شعبية او مداحا ليس منهم ‏،‏ ومن اكثرهم شهرة الريس متقال القناوي وابن عمه شمندي ‏،‏ وسيد الضو وخضرة محمد خضر ‏،‏ وعائلات كاملة اخرى.
 لقد ألفت كتب كثيرة عن الغوازى والغجر بمختلف لغات العالم دليل على أنتشارهم وتميزهم