الضرب تحت الحزام( كوميدى)

أحكى لى يابنتى سبب الخناقة لأعرف مين فيكم الغلطان
 حسنيه وهى تمسح دموعها : أنت عارف ياحاج أن( شوقى )خريج تربيه الرياضيه وبيشتغل معايا فى نفس المدرسة مدرس ألعاب ماهيته صغيرة بالمقارنه بباقى المدرسين فبيشتغل بعد المدرسه فى نادى الزمالك بيدرب فرق الناشئين تحت 16 سنه لكرة اليد ..وفشل أنه يعمل فرقة تقدر تنافس فى الدورى فأقالوه وخيروه بين الطرد أو يعمل كأدارى....- لحد كده كويس الراجل بيجرى على أكل عيشه
 حسنيه :حمدنا ربنا وبارك الله فيما رزق .. وكام درس من هنا على مجموعات تقويه وأهى كانت ماشيه لحد مافى يوم واحد صاحبه فى النادى الله يسامحه فى فريق الملاكمه كبرها فى دماغه وقاله أنه ممكن يتدرب معاهم وينضم لفريق البوكس لأنه جسمه جامد ووزنه مطلوب ..وتسكت حسنيه وهى تمسح الدم الذى سال من أنفها.....- كويس وبعدين فين سبب الخناقة
 حسنيه : ما أنا جيالك أهه ياحاج..فضل شوقى يتدرب مع الفريق وكل ليله أشتغله ممرضه أفضل أعالج فى جروحه وكدماته ومش كده وبس يقوم كل يوم الصبح يشرب لبن العيال ويأكل فطارنا قال أيه بيغذى نفسه ..قلت يا بنت سيبيه ياريت يكون بفايده ولما جائت أجازة الصيف كل يوم يأخذنا أنا والعيال معاه النادى وهو بيتدرب ومنها فرصة العيال تلعب وتتهوى وكنت شايفه المدرب دايخ معاه وهو بيوجهه أن يسمع تعليماته لكن مافيش فايده..لحد ما دخل الدورة الصيفيه للأقاليم وقعدنا نتفرج عليه كل ليله وهو بينضرب ويخسر ونرجع نربط فى وشه ودماغه من الأصابات وعيناه اللى دايما وارمه كل ماتخف ينضرب فيها الحقيقه كان صعبان عليا أللى بيعمله فى نفسه أنما تقول أيه مخه زى الجزمه القديمه لحد أمبارح كان عنده ماتش مع بطل المنوفيه ..جدع أيده زى المرزبه يظهر بيشرب عصير برسيم هاراه ضرب والمدرب عمال يصرخ فيه أرفع أيديك ياشوقى ..أبعد عنه ياشوقى ..أحمى وشك ..يمين شمال ومفيش فايده الواد المنوفى بهدله..ماطقتش والدم ضرب فى نفوخى من أللى بيحصل والماتش شغال نطيت جوه الحلقه وقعدت أشجعه غطى وشك ياشوقى أضرب ياشوقى أرفع أيدك زى مالمدرب كان بيقوله المتفرجين قعدوا يضحكوا وينادوا عليه أسمع كلام مراتك ياشوقى ..شوقى ساب الماتش وقعد يشتم فيه وفى المتفرجين وهوب الواد المنوفى أستغل الفرصة وقام مكيله كام ضربه فى وشه على نوك أوت على خطافيه شمال على مستقيمه يمين لبست فى وشه ..وألاقى شوقى جوزى ده اللى زى الحيطه بيلف حولين نفسه ويسقط على أرضية الحلقة مغمى عليه قمت راقعه بالصوت..المهم فوقوه وجه المدرب وطبطب عليه وقاله شوف لك يابنى لعبه غير دى يكون أحسن لو مسكت غرفةالملابس - لو الحال كده يابنتى يبقى المدرب له حق ..كملى .. سندته ومعايا العيال ووقفنا تاكسى من قدام النادى علشان نروح..يقوم سواق التاكسى يزود الطين بله لما شاف وش شوقى شوارع كلها مقبات.. سائق التاكسى :الله الله خير ياأستاذ أيه أللى عمل فى وشك كده ..حسنيه : حادثه يا خويا حادثة..سوق وسيب الجدع فى حاله ..سائق التاكسى (يسكت قليلا ثم يعاود النظر إليه وهو غير مصدق) حادثه مش ممكن تكون حادثه منظرها خناقه ...بس حالتك وحشه قوى..اللى ضربك باين عليه واد ابن مفتريه
 شوقى : سوق يا أسطى وخليك فى حالك.. سائق التاكسى يعاود النظر لشوقى وهو يقول لوعايز أطلع على القسم أو المستشفى أنا تحت أمرك منظرك كده واخد علقه موت.. شوقى يصرخ فى السائق : أقف هنا يا جزمه قلت لك مالكش دعوة طب خد..وبعزم مافيه من غضب وغيظ يضرب سائق التاكسى بوكس يرميه بره التاكسى يقوم السائق ابن اللئيمه ويفتح شنطه العربية ويسحب حديدة الخناقات بتاعة السواقين ويضرب شوقى واحده مفيش غيرها على دماغه فيطب ساكت على الأرض ..أصوت والعيال تصرخ أتلمت الناس وخدونا على القسم ..الضابط كان أبن حلال وأصطلحنا وروحنا أنا وهو والعيال فى البوكس لحد البيت لأن الضابط طلع زملكاوى
 - : شر البليه ما يضحك وبعدين ياحسنيه أيه أللى هيجه تانى بالليل حسنية وهى تبتسم فى خبث : أبدا والله ياعمى .. طلب العشا فحطيت الأكل على السفرة
فبص مالقاش غير حتت لحمه صغيره وشوية شوربة خضار
 فقال لى فين الكبده والكلاوى والأكل المخصوص بتاعى ..فقلت له خلاص ياشوقى كل أللى قدامك لحد ماصحتك تتحسن..قال لى قصدك أيه ياحسنيه ..قلت له فضها سيرة يا شوقى من الملاكمه خلينا نربى العيال بدل البهدله وقلة القيمه وكل يوم علقة ..أنا قلت كده ياعم الحاج وقام زى الثور الهايج قلب علينا السفره وجرى ورايا يضرب فيه بالبونيات لحد ماكسرنى ولولا أنا كنت بارفع أيدى وأحمى وشى كان زمانه موتنى لحد ما قربت على باب الشقه قمت فتحاه وضرباه شلوت تحت الحزام ونفذت بجلدى.. يخرب عقلك ده ممكن يموت فيها يا مجنونه.. لالالا انا يامه ضربته تحت الحزام ومابيحصلوش حاجه وبيقوم يكمل ضرب ده جوزى وأنا عارفاه
- فرضا جائت الطوبه فى المعطوبه وراح فيها حيقبضوا عليكى ويسجنوكى
 قلبك أبيض ياحاج ( يرن جرس الباب ويدخل شوقى وهو يرسم على وجهه ابتسامة مجهولة المعالم) وهو يقول : تعبناك معانا ياحاج قومى ياحسنية قبل ما الكفته تبرد نتعشى مع العيال ( تقوم حسنية وهى تضحك بخبث كعادتها ) حاضر ياسى شوقى .. تصبح على خير ياحاج

سماح هاردلك

يدخل العسكرى مكتب النقيب أشرف ليخبره بوجود سيده تطلب مقابلته ضرورى وعلى وجه السرعة فيسمح لها بالدخول..فتدخل وهى ترتدى ملابس خليعه كبنات الليل وهى تمضغ لبانه
>مساء الخير ياكابتن
> مساء النور عايزه أيه يامدام
> عايزه أأقدم بلاغ مستعجل خالص خالص
> خالص خالص.. قولى مش فاضيلك وبلاش مرقعه وحياة مامتك
> بررراحه عليه يا كابتن ماتلخبطنيش ضيعت الكلام من دماغى وأنا مكلفاها
 > قولى ياوليه فى ليلتك المقندله دى أنا ورايا هم مايتلم وعلى كولن قولى يا فرفوره حتقدمى البلاغ فى مين ويسحب ورقه ويبدأ الكتابه
أسمك وسنك وساكنه فى أنهى نصيبه
> أسمى ( سامحنى هاردلك) وبيدلعونى بيقولولى سموحه
> ياوليه قولى أسمك الثلاثى أللى موجود فى البطاقه ..معاكى بطاقه
> يوووه يقطعنى نسيتها فى المحل
> أسمك أيه ياسموحه ..أسمى سماح عباس
> حتقدمى بلاغ فى مين يا هاردلك
> فى أللى ما يتسماش طليقى ماشيست الجبار
> أسمه أيه زفت ماشيست الجبار بتاعك ده
 > أسمه( حسن حسونه أبو لمونه) ..كل يوم ياكابتن وأنا راجعه من الشغل يضربنى وياخد كل الفلوس أللى معاياه
> هل بك أصابات
> عن أذنك أقلع الشال ..شوف ضهرى شوف رقبتى ..شوف رجلى
> غطى ياوليه حتودينا فى داهيه
> عاين كويس ياكابتن وأثبت كل حاجه عندك فى المحضر
> أأقعدى فى مكانك الله يخرب بيتك
 يفتح الباب فجأة ويدخل ماشيست الجبار ..شاب طوله مترين وأقرع ومفتول (العضلات فتجرى سماح وتختبئ بالنقيب أشرف وهى تحتمى به )
 ماشيست: بتبلغى عنى الحكومه يابت ويسحبها من شعرها ويطرحها أرضا ويخرج مسدس ويطلق عليها طلقتين فتسيح فى دمها والنقيب أشرف يقف فى ذهول
 وهو ينادى يا عسكرى .. يا متولى ..يا سمير..ياحمار ياللى بره (ولا أحد يرد عليه) ويقترب ماشيست من أشرف ويضع فوهة المسدس فى رأسه
أشرف : أوعى تعملها يامجنون أبعد المسدس ده بعيد ..ياولاد الكلب يالى بره
 يبتسم ماشيست ويحتضن أشرف وهو يقول قومى ياسماح من الأرض خلاص.. ويشاور فى أتجاه الكاميرا ويخرج طاقم التصوير والمخرج ليسأل أشرف
> لو تحب نذيع قول ذيع لو مش عايز نمسح الشريط وكأن لم يكن
> ذيع بس المأمور يوافق خلى الناس تفرح
 هههههههههه طم طم طم طمطااا ....تشتشتشششش

الواحة التى أكلت الحلاوه

احداث هذه القصة وقعت فى ستينات  القرن الماضى..أستدعانى قائد الألاى الثانى سيارات حدود على وجه السرعة لأمر هام وعاجل

تمام يافندم ..تجهز شنطتك يا حضرة اليوزباشى وتطلع فى التو اللحظة تستلم كتيبة حمدون فى سيوة ..الأهالى بيشتكوا من سوء المعامله ودى شكاوى ومحاضر اللى أرسلوها لرئيس الجمهورية ووزير الحربية ومجلس الأمه خدها معاك وأنت مسافر اقرأها كويس وحقق فيها وحاول تتجنب المشاكل الوارده بها

لم يعطنى فرصة للنقاش وفى خلال ساعتين كنت على طريق مطروح سيوه وفتحت الشكاوى لكسر الملل وطول الطريق .. وكل ما أقرأ شكوى اضعها جانبا وانا اضرب كف بكف وأقول الله يكون فى عونك ياحمدون يا خويا وهذه عينه من الشكاوى ..وعليها تأشيرة مدير الحدود بحظر استخدام السيارات داخل الواحة فقد ورد بها ان الأهالى فى خوف ورعب على اولادهم من حركة السيارات التى تجرى بسرعة فائقة لتهدد حياتهم للخطر.. الشكوى التى تليها بان الضباط والجنود يجوبون الشوارع ليل نهار سيرا على الأقدام وهو يعرض نسائهم وبناتهم للفتنه .. ياولاد الـ .. طلبتم منع السيارات فساروا على الأقدام وتطلبون منعهم من السير .. لالالا ده أخرة الأستهبال وشكوى ثانية بأن المعسكر بيستخدم ميكرو فون صوته يقلق راحتهم فتم رفعه وعشرات الشكاوى التى تطالب برحيل 55 ضابط وجندى خارج الواحة بسب الأضطهاد والسير فى الطريق والفسق والفجور .. والغريب أن كل شكوى بها كشوفات بأسماء الشاكين وارقام بطاقتهم وعدد لا حصر له من التلغرافات لجميع الجهات وبعد خمس ساعات وصلت لمدخل الواحة فوجدت حمدون لامم عفشه ومنتظر وصولى فحضننى وهو يدعو لى بالتوفيق وقال لى ان وراء هذه الشكاوى هو العمده لأن المعسكر مقام بالقرب من بيته وبيدعى أن الأرض ملكه .. أعطانى مفاتيح مكتبه والأستراحة وقالى عندك قائد ثانى ماضى على العهدة.. سلام وركب سيارته وأنطلق بأقصى سرعة زى ماتقول ماصدق وخلع.. فى الثلاثة أيام الأولى حققت فى الشكاوى فوجدتها جميعها كيدية فقال لى احد المساعدين الذين عاشوا فى الواحة مده طويله: سكان الواحة ياباشا كييفة شكاوى لو شافوا واحد راكب حمارة ورايح ناحية البوسته يسألوه رايح البوستة ليه يا فلان يقوله العمده باعتنى علشان يبعث شكوى .. فى مين يافلان يقول ماعرفش فى اى حد وخلاص .. خد آدى نص ريال وحط اسمى معاهم

-      عقدت مؤتمر لكل العاملين لوقف سيل الشكاوى فكانت عدة مقترحات منها أن احنا نكتب شكاوى مضاده وآخر قال نقبض على العمده لأنه أصل البلاء وأخر قال نعمل قاعدة صلح مع الأهالى وأستقر الرأى فى النهاية أن نقوم بعمل عزومه للعمدة ورؤساء العشائر.. فقال رأى معارض أهل الواحة شبعانين أكل خضار ولحمة وطيور قال مفيش غيرالجاتوه وهذا الصنف لا يعرفونه بالمرة.. أمرتهم بأحضار شيف المطبخ وسألته : تعرف تعمل تورته وجاتوه وحلويات شامية

-      أيوه ياباشا أحسن من أى حلوانى فى مصر

-      أكتب كشف بطلباتك لتوفيرها ..كل حاجة موجوده عندنا غير شوية حاجات بسيطة

تقدر تعمل 500 قطعة جاتوه و10 تورتات فى قد أيه.. 3 أيام ويمكن أقل .. على البركة وأرسلت فى طلب العمده فحضر ومعه لفيف من أكابر البلد ودار الحوار على سيل الشكاوى فقلت له : اسمع ياعمده جميع شكواكم قدامى اهم يعنى الشكوى حتلف تلف وحتيجى عندى .. مانختصر الأمور ولو فيه أى شكوى مفيش داعى تطلع بره ومانشرش غسيلنا الوسخ .. المسؤلين أصبح عندهم يقين بأن شكياكم كلها كيدية تضعكم تحت طائلة القانون وأنا مش حقبل كده .. نحط أيدينا فى أيدين بعض ونعمل حفلة صلح بكره أنشاء الله أدعى فيها كل ناسك ياعمده.. ولاقت التورتات والجاتوه أستحسان الجميع  ومنحنا الكبار التورتات وكمية من الجاتوه ليذوقها أهل بيتهم وأصبح الجاتوه والتورة مطلب ملح من مطالب أهالى الواحة هذه الفكرة جائتنى من كتاب وصف واحات مصر للبرنس أحمد حسنين باشا عندما زار الواحات الداخله عام 1922 فوجد أهلها يحتسون الخمر (عرق البلح) فقدموا له الخمر فرفض وقام بعمل الشاى وكان أول مره يشرب سكان الواحات الشاى فأتفق مع أهلها أن يرسل لهم قافلة كل 3 شهور من الشاى والسكر مقابل أن يمتنعوا عن الخمر وكتب تقرير للملك فؤاد فوافق على الفور وأرسل مع القوافل شيوخ من الأزهر لتعليمهم أصول دينهم ..فعندنا واحة أمتنعت عن الشكاوى بقوة الجاتوه وواحة أخرى أستبدلت الخمر بالشاى

هذا درس لمن يعاملون سكان الحدود بغباء وقسوه وعنف    

النبطشى

فيه ناس كثيرين تفتكر أن النبطشى هو ضابط نابطشى أو الدكتور النبطشى أو السباك النابطشى الحقيقة انا جاى المره دى لأحكى عن نباطشى من نوع تانى هو نابطشى الأفراح الشعبية اللى بيشيل الليلة من أولها لأخرها وبيستقبل فيها المدعوين بتصييتهم من خلال الميكروفون الذى لا يتركه من يده مطلقاً يسميه ولاد الكار (الحديده )ويقاس نجاح النبطشى بجمعه أكبر نقوط للعروسين ويقف بجانب النبطشى مندوب عن العروسه ومندوب عن العريس ليسجلا النقوط وتسلم الكراستين فى آخر الليلة لأبو العروسه وأبو العريس  لجرد النقطة
""إحنا نبطشية بس صنايعية.. عبارة ترددت فى أحد المشاهد السينمائية ورددها العديد ولكنها فى الحقيقة تعبر عن مهنة حقيقية موجودة ولا يمكن الاستغناء عنها فى الأفراح الشعبية ويتوقف عليها نجاح الفرح والمهرجان من عدمه .
"النبطشى " أو" ركن الاستقبال" هو من يقوم باستقبال الضيوف أو المعازيم ممسكا الحديدة "المايك" " لتنبيه زملاءه على المسرح بحضور ضيف مهم .
الأهمية تكون فى هذه الأفراح ليست بالوظيفة مهما بلغت وإنما بالثقل المادى بمعنى"أن الضيف ده دفّيع وهايرمى نقطة كثير ". عمل" النبطشى" يكون فى أرض الفرح ولا يقوم بالصعود على المسرح إلا نادرا وهم كباقى المهن تتفاوت درجاتهم ويكون المقياس هو القدرة على استخراج أكبر تحية من الضيوف يتم ترجمتها فى صورة "نقطة"
تتطلب هذه المهنة معرفة كاملة بأهالى الحى ورموز العائلات به "فلكل منطقة أصحاب ورجالة " على حد وصفة إلى جانب حفظ مجموعة من الجمل لزوم التحية، وكلما كانت الجمل جديدة وغير متداولة دل ذلك على تمكن النبطشى وتميزه.
الاصطباحة أو الافتتاحية وهو ما يبدأ بها النبطشى حديثه وهى تختلف باختلاف المناسبات
أيضا ثم يبدأ فى توجيه التحية أو السلام لمن قام بدفع النقود التى يطلق عليها "شمعة .
تختلف تحية النبطشى من مهنة لأخرى حيث لكل صاحب عمل عبارات وجمل تختلف من شخص لآخر والنبطشى الفهلوى هو الذى يؤلف مصطلحات جديده وأفيهات وسرعة بديهة وصوت جهورى وقدرة على الغناء المنفرد والنبطشى زمان كان واحد من الفرقة أو عالمه من العوالم وينحصرردها على حرفين ثلاثة من آخر كلمه اللى بيقولها المنقطاتى مثل : العريس أيس العروسه أوسه المعلم عبد السلام سلام وسمعنى أجدع سلام صعيدى شحط محط..أما نبطشى اليومين دولت لا يحتاج سوى دى جى وبنت رقاصة مقشفه درجة خامسة ويستطيع أن يجمع بهم نقطة قد تصل فى بعض الأحيان إل أكثر من مليون جنيه وسنضرب

مثال لفرح مقام فى مجموعة ابو مروان (هذيان ) ماذا سيقول النبطشى : شكرا للتحية و صاحب التحية يعني عم محمد رشاد و صحبته الست ناديه رشاد والست نونا والأستاذه رشا وعم صالح وأبوصلاح والشباب اللى لعبتهم اللايكات.. وأنسخله وأطبعله.. وأديله وعبيله ورجالة وستات وشباب الهذيان ربنا يدومها عليكم.. رابع وخامس منطقة الهذيان ودوران

الهذيان وعشش الهذيان  وهذيان البلد وهذيان المحطة أجدع ناس اجدع ناس
و إللي يحب يفرحنا ما يضربش نار عشان العروسة حامل والعريس مجنون
و الواد إللي واقف فوق العربية ينزل عشان دي فلوس ناس وفلوس الدوكو لسه مابردتش

و اسمع سلام أمنت بالله و شكرا لتحية عم محمد و أنا و انت ..أبو مروان اول وثانى وثالث ربنا يزيده ويوسع صحبته ليصلوا للمليون ومروان ومروان ربنا يخلي مروان وفرح أبوه سمعنى : السح الدح أمبوه

لم يقتصر دور النبطشى على الرجال فقد أقتحمت النساء هذا المجال وأشهرهم صيت وسمعة سوسو المقتمه ..وعسوله المهروشه .. و منى حوارات.... النبطشية لم يقف نشاطهم على الأفراح بل دخل فى مجال الدعاية والأعلان خاصة فى أفتتاح المحلات والسيرك او الأراجوز فى الموالد او للأعلان عن بضاعة على طريقة اتنين ونص وتعالى بص قررررب قررررب

وأزدادت وأرتفعت أسهم النبطشى ليظهر فى أعلانات التليفزيون  مثل أعلان( لو كنت راجل كُلّ)وفرصة العمر والثلاجة الشقية والمفتاح السحرى وصبح على مصر ولو بجنيه أعلان يمتد لأكثر من نصف ساعة بطله الحقيقى هو النبطشى

الأعلاميين المصريين تعدوا أختصاصهم وأصبحوا نبطشية للنظام لتسويق القوانين وتخدير الشعب وأشهرهم عمرو أديب وأحمد موسى ومصطفى بكرى هؤلاء أمام الشاشة ويوجد نبطشى مساعد بيعمل مداخله لاتقل عن شغل موسى وأديب والبقرى ربنا يحرقهم كلهم بجاز

مهمة النبطشى جمع فلوس أو ترويج سلعة أو خداع جماهير وكله بالحب بالحب بالحب

صفحة من مذكرات أم زكى أون لاين

جوزى الثالث كان واد غلبان قوووى أتجوزنى تخليص حق كان كل مايتزنق فى قرشين يجينى أسلفه .. الواد لما تقليت عليه الديون طلب يتجوزنى فقلت له عايز تتجوزنى تتجوزنى ولا تخليص حق قالى اللى تشوفيه قلت على خيرة الله وفى يوم ماطلعتلوش شمس دخلت الحمام الصبح أغسل وشى.. طلعت لقيته لامم هدومه فى بؤجه ورمى عليا يمين الطلاق وطلع يجرى فى الشارع رقعت بالصوت وجريت وراه.. شبان الحته أفتكروه حرامى ونزلوا ضرب فيه لما عموه وسيبتهم لحد ما أستكفى قلت لهم سيبهولى بقا ..قلت له حترجع معايا البيت ولا تدفع اللى عليك..قالى فى طولك وعرضك يام زكى حدفعلك الدين اللى عليا الطاق طاقين بس خليهم يسيبونى ..وأخد ديله فى سنانه ويافكيك
-   والباقى عملوا فيكى أيه... قصدى عملتى فيهم أيه ؟
- واحد فيهم كل يوم يرجع لى وش الفجر سكران طينه وينقلب ينام زى الشوال 
خدى على الحال ده بتاع شهر قمت مسكاه من رقبته ونفضاه..قولتله أنت ياراجل أيه أللى بيخليك تسكر كده كل ليله ..قالى علشان أنسى !! قولتله تنسى أيه؟ قالى أنسى أنى متجوز ..طب وأيه اللى جابرك على العيشه دى ياروح أمك.. طب ياطلقنى ياتبطل تسكر..قالى ماهو أنا كل ما أسكر أنسى أنى أطلقك وتروح عليا نومه ..عاجبك كده فوقتينى ... روحى وأنتى طلقه.... وياريتنى ماكنت فوقته رجاله عايزه الحرق
بس أنا خلاص بقيت خبره ومفيش بنت تكون على وش جواز ألا وتجينى يا حبيبتى وتاخد نصايحى ..دنا أم زكى والأجر على لله بيت خبره وأستشاريه
- بعدين أكملك أحنا قربنا أهه على الموسكى ..على أيدك ياسطى نزلنا هنا
السواق: الأجرة يامودام
- حاسبيه أنتى ياقشطه أحسن معييش فكه..
- ماشى يا أم براشوت من أولها طناش ..كملى
- الخامس كان موظف درجة تانيه فى السكه الحديد شافنى وأنا مسافرة عند أختى فى الدلنجات أسم النبى حارسه وصاينه قام واقف وأتناول منى الشنطه وفضى المكان فقعد جنبى.. وكلمه منه على كلمه منى على ضحكه منه على ضحكه منى دخلت دماغه..حاكم محسوبتك لما أسوق الدلع أنزل بطقم حنيه ما فيش أخوه يخلى أجدعها شنب ينخ تحت رجليا ..صاحبنا ما أستحملش منى غلوه ..نزلنا فى بنها كتبنا الكتاب وعملنا الدخله فى الدلنجات عند أختى وهو أسبوع قعدناه وقالى ياله بينا على مصر نروح على بيتنا ركبنا القطر وكلمه منى على كلمه منه على شتمه منه على شتمه منى شبطنا فى بعض قام مطلقنى فى طنطا وقام شاحنى فى عربية نص نقل نازله على مصر وأنا دمعتى على خدى طول السكه ..الأسطى السواق كان واد حليوه ومقطقط شافنى وأنا بعيط صعبت عليه طلع منديله وقعد يمسح فى دموعى ويطيب فى خاطرى ويطبطب عليا
- أوعى تكونى أتجوزتيه دا كمان
- ياريت ماحصلش نصيب وهو مشغول بيا وعمال يطبطب عليا قمت نازله بطقم الحنيه أللى عارفاه.. الواد ياعين أمه ما أستحملش فرفر منى فزود قوى فى الطبطبه
- هاه أيه أللى حصل
- أم زكى تسكت وهى تتشنف (علامه على البكاء)
- هوب قام لابس فى تريلا كانت واقفه على جنب الطريق أتقلبنا تلات قلبات
مات هو والتباع وحمارين فى الغيط وأنا نقلونى المستشفى بين الموت والحيا وربك يسلم
-   الراجل مات بسببك يا أم زكى علشان طقم الحنيه أللى بتعمليه الله يخرب بيتك
- أنما قوليلى أنت بتعملى طقم الحنيه بتاعك ده أزاى منكم نستفيد

-       شوفى بقا ياستى دى خبرة سنين ما ينفعش تتقال فى قاعده ولا أتنين ..أنت باين عليكى غشيمه ويلزملك كورس كامل لحد ماودكك
- أول حاجة تعملى أنك خجلانه وبتتكسفى موت وتحمرى فى خدودك ودلدلى رقبتك وتتكلمى بالسوسو
-  أيه السوسو ده يا أم زكى
 - يعنى تصوصوى زى الكتاكتيت وتتنهدى زى الست ماجده الممثلة وتسبلى كل شويه فى عنيكى وياريت تكونى حاطه شوية رميل على آى لينر وعامله رموشك بالمسكره ..وأياكى يمسك أيدك ليبوظ الشغل ولو بص فى عنيكى تبصى بصه واحده بس مفيش غيرها وتغمضيهم وكلامك كله همس وبشويش وبشووويش خالص بس الكلام ده عايز تدريب وشوية حبشتكنات
- أيه بقا الحبشتكنات دى
- لبسك وذواقك وتسريحة شعرك.. ريحتك.. وريحتك دى أهم حاجة ..الرجاله بتيجى ع الريحه زى القطط مابتيجى على ريحة السمك وفيهم ناس قلبهم فى مراخيرهم مش فى معدتهم زى ما بيقولوا ..بس يوم فرحك تعاليلى وأنا أوضبك وأخليكى على سنجة عشرة بريحة الفل والعنبر وأنزل من على جتتك جلخ السنين كلها..وأخلى الواد سيد بتاعك ده زى الخاتم فى صباعك
- كفايه كده يا أم زكى تعالى نشترى الحاجه أحسن نتأخر
-   تيجى بكره الصبح تشربى عندى العناب وأرسيكى على بقية الدور

من العباسية إلى العاصمة الجديدة يا قلبى ماتحزن

كلنا يعرف حى العباسية وهو من الأحياء شديدة الزحام به معلمين تاريخيين ثكنات الجيش ومستشفى المجانين واحد سألنى تعرف العباسية أسمها العباسية ليه ..وبعد الفحص والتمحيص وقراءة كتب التاريخ أتضح الأتى أن هذا الأسم ينسب لوالى مصر عباس حلمى وهو أبن طوسون أبن محمد على .. وهذا العباس كان شخصية نكدية دائمة العبوس كاره لنفسه ولناسه لدرجة أن الأسرة العلوية طفشوا وتركوا له البلد وعاشوا فى الأستانه بعد أن لاقوه من مضايقات وغباوة عبس الذى كان لا يثق فى أحد فترك القلعة وقام ببناء عاصمة جديدة فى صحراء العباسية وقشلاقات للجند ووزارات ومحاكم ومستشفى للمجانين وعلى مسافة 50 كيلو وفى الخلاء قام ببناء قصر فخم على طريق السويس ليعيش فيه ونتيجة هذه المشاريع المزاجية لتلك الشخصية السيكوباتية أستدانت مصر بعد أن افرغ خزانة جده محمد على

ولم يمضى على وجوده فى الحكم سوى 5 سنوات ووجدوه قتيلا فى قصره ويقال بأن عمته نازلى هى التى سلطت عليه حارسين من الأرناؤط لقتله

وعندما دخل الأنجليز مصر على يد عمه توفيق أستعمروا مدينة العباسية الجديدة التى لم تعمر ويسكنها المأسوف على شبابه عباس

وهذه المدينه فتحت شهية البارون أمبان ليبنى مصر الجديده على امتدادها وبعدها بـ 3كم ويربطها بخط ترام مع العباسية

ثم جاء عبد الناصر لينشئ مدينة نصر وكانت ستسمى بالناصرية ولكن أكتفى بأسم نصر الذى أطلق على كافة المنشئات فى عهده

بعد حرب أكتوبر وحدوث ثغرة الدفيرسوار تنبه الأستراتيجيين إلى ضرورة أنشاء خط من المدن على مسافة 50-40 كم من القاهرة لحماية القاهرة ضد أى تهديد أجنبى من اتجاه سيناء وقناة السويس كخط دفاع ثانى فأنشئت مدينة العاشر من رمضان ثم العبور ثم الشروق والهاكيستب ثم مدينة بدر ومدينتى والرحاب والقاهرة الجديدة والتجمعات يحيطها غربا الطريق الدائرى

وجاء عبد الفتاح السيسى فى عام 2013 وفى اقصى ظروف الأزمة الأقتصادية للبلاد ليبنى عاصمة جديدة لحكمة الذى طال أوقصر فهو إلى زوال

 مفهوم التنمية لدى حكام مصر منذ مينا موحد القطرين وحتى الأن هو تخليد أسمائهم على الحجر وفى ستين داهية البشر فمدينة نصر لعبد الناصر ومدينة السادات بالمنوفية  ومدينة مبارك ببرج العرب  وأخيرا مدينة السيسى الجديده التى تسمى العاصمة الجديدة 

صفحات من مذكرات (عاشق الصحراء )

الحيه والثعبان

خدمتى الطويلة فى الصحراء والتنقل بين الجبال والوديان والصحراوات المصرية أكسبتنى خبرة فى التعامل مع حيوانات الصحراء كالثعالب والذئاب والضباع والغزلان عدا الثعابين والحيات فهى غادره شريرة فى كثير من الأحوال وعندما نقتل ثعبان او حية أثناء دورياتنا فى الجبال نقوم بحرقها والقاء رمادها فى مكان بعيد عن المعسكر خشية أن يأتى وليفها أو وليفته للأنتقام منا ولكن الشاويش منصور عوض الله الشهير بالحاوى الذى أنضم على وحدتى حديثا بعد أن شاهدنا نحرق أحد الثعابين غضب وهاج واستنكر مانفعله .. ياباشا أللى أنتم بتعملوه ده غلط ..المكان مليئ بالحيات والثعابين واصيب ثلاثة منا احدهم فى حالة خطيرة .. ممكن اطلب من سعادتك طلب..اتفضل

-ان تنقل الخيام شرقا لمسافة 300 متر شرقا لأن المعسكر فوق أكبر تل لمدينة الثعابين فى هذا الجبل واتركنى فى هذا المكان لمدة يوم لأعقد صلح بيننا وبينهم ويكون من الأفضل أن تكون موجود معى لأنك قائد المكان..ومن ولعى لهذه الأمور فقد وافقت على الفور فقمنا بنقل الخيام والسيارات بعيدا عن تلة الثعابين وخرجت أنا ومنصور الحاوى قبل الفجر بقليل لعقد معاهدة الصلح مع ملك الثعابين فتوضئنا ولم نأخذ معنا أى سلاح وسرنا بهدوء وحذر حتى وصلنا للمكان فطلب منى منصور أن أربع بالجلوس جواره وبدأ يقرأ آيات من القرآن بصوت خفيض ثم يرتفع عاليا وهو يقرأ آية الكرسى ثم يهب واقفا ويشير لى بعدم القيام وهو يقول :   " أقسمت عليك يا ساكن هذا المكان حية أو عقربا أو ثعبانا تجيئني طائرا بأمر الرحمن تخالف تموت بإذن الحي الذي لا يموت " . تخالف تموت بإذن الحي الذي لا يموت " . تخالف تموت بإذن الحي الذي لا يموت " .

بعد قليل أسمع فحيح الحيات والثعابين وهى تخرج من التل وقد ملئت المكان ويقف أمامنا ثعبانا لم أرى مثله فى حياتى من ضخامة وقوه فيجثو منصور على ركبتيه أمامه وهو يقول السلام عليك ياملك دبايب المكان جئنا إليك لنعقد سلاما وقد بدأناه برحيلنا بعيدا عن شعبك وأهلك وبقسم الرفاعية والسليمانية من أنس وجان نعقد صلحنا امام الله الذى لا يغفل ولا ينام فأن وافقت اطلب من أهلك وشعبك دخول الجحور والشعاب وإذا رفضت تخالف تموت بإذن الحي الذي لا يموت " .تنسحب الثعابين والحيات وهى تتراقص وتصفر صفير الفرح والزواج ...منصور يقف على قدميه وينحنى للثعبان مرتين فيرد عليه الثعبان أنحنائه بأنحناء وينسحب فى هدوء إلى التلال أفرك عيناى من الدهشه

منصور: من الأن فصاعدا ممنوع على اى فرد من المعسكرأن يقترب من هذا المكان أو يقوم بمطاردة أو قتل حية أو ثعبان سوى أن يلقى عليها السلام فستمضى فى طريقها بدون أذى أو غدران.. ونحن فى طريق عودتنا دار بيننا هذا الحديث

-أحكى لى يامنصور عن الطرق الرفاعية وكيف تستطيع ان تتحكم فى الحية والثعبان

-      أن العهد الرفاعي الذي حصلت عليه خاص باصطياد "الدبيب" وهي الثعابين والعقارب، وعلاج الأشخاص من لدغة العقرب أو عضة الثعبان  وفى بعض الأحيان أقوم بمعالجة العقيم من الستات  فى قريتنا وهى عادة متوارثة بين نساء الصعيد تعرف باسم "الطق" وهي خاصة بالسيدات اللاتى يتأخرن في الإنجاب حيث يقوم بتخطيتها على الثعبان سبع مرات ثم أأمر الثعبان بأن يرفع رأسه الى أعلى، وفي هذه الحالة تصاب السيدة بالرعب الشديد ويغمى عليها، موضحا أن هذه الطقوس "تفيد في علاج الكثير من السيدات بإذن الله" وأن الثعبان يُستخدم مرة واحدة فقط "فلا يجوز أن تخطى عليه سيدة أخرى".

-      وأنى أجمع بين العهدين وأنا حصلت على عهد الرفاعى قبل أن أبلغ الخامسة والعشرين من عمرى وأنا اعمل حاويا منذ 17 عاما. ولن أستطيع البوح بهذا العهد لأن إفشاء هذا السر يبطل مفعول العهد".

-      هل قابلت ثعابين لا تمتثل للعهد ؟؟

أحيانا يكون الثعبان غاضبا لانه لا يريد الخروج من جحره الذي الفه ، فاذا رآه الرفاعي هائجا يقرأ هذه الكلمات " اللهم اطمس بطلسم بسم الله الرحمن الرحيم سر سويداء قلوب اعدائنا واعادئك ودق اعناق الظلمة بسيوف نمشاق قهر سطوتك واحجبنا بحجبك الكثيفة عن لحظات ابصارهم الضعيفة " وما ان ينتهي الرفاعي من هذه الكلمات حتى يهدأ الثعبان ويخر فيقترب الرفاعي للامساك به 

-      هل كل الثعابين مسالمه وتلتزم بالعهد ولا تغدر
- لا يخشى على الرفاعيين من غدر الثعابين ولكن تبقى الكوبرا ذات الحلقة السوداء      حول الرقبة تشكل خطراعظيما وللامساك بها لا ينفع معها إلا عزيمة خاصة تسمى (الكفكفية)  لان هذا النوع من الكوبرا يغدر واذا امسكت بها أقوم بتخييط جزء من الفم لشدة خطورتها يجعلها تصك فكيها بشدة حتى تخرج نابها من وسط رأسها لتؤذي صاحبها .

-      كيف يمكننى أن أحصل على عهد الرفاعية

-      للدخول لطائفة الرفاعية لا بد أن تمر بعدة مراحل واختبارات تبدأ بمرحلة المحب للمعرفة وتنتهي بمرحلة المريد وهذا الانتقال يحدده شيخ الطريقة الذي يضع يده بيد الشخص الذي وصل إلى مرحلة المريد ويقرأ اجازة العهد سرا ويكون هذا هو اسلوب تلقين العهد الرفاعي للمريد لذلك يقال عن الرفاعية من اليد إلى اليد . أي انه مهما حاول الشخص تعلم الطريقة لا يصل الى مرحلة المطلوبة الا اذا احبه الشيخ وقرر نقل العهد له

-      انواع الثعابين التى يشملها العهد

-      هناك 366 نوعا من الثعابين منها ما هو طيب لا يؤذى ومنها المقاتل الشرس ومنها السام، لكن كل هذه الأنواع فى النهاية تخضع بالأمر للقسم والعهد الرفاعي، لكن هناك نوعا من الثعابين لا يخضع للعهد الرفاعى لذلك لا يمكن التعامل معه ومن رحمة ربنا بعباده أن هذا النوع من الثعابين يتم القضاء عليه من خلال أنواع من الطيور الجارحة.

-      ومن أنواع "الدبيب" التي يتم التعامل  معها الأفعى الكوبرا التي يبلغ طولها حوالى مترا ونصف والأفعى البخاخة التي ترفع رأسها عن الأرض بمسافة 60 سنتيمترا والثعبان السيار الذي يتميز بلونه الأصفر والثعبان الدسار الذي يُعرف لدى العامة "بالدفينة" لأنه يدفن نفسه في الأرض الناعمة والثعبان الصبور ذو المشية البطيئة، وبالنسبة للعقارب فأنواعها كثيرة منها العقرب الناري ويسمى بهذا الاسم لأنه إذا لسع إنسانا فإن لسعته تجعله يتصبب عرقا كأنه يقف أمام فرن أما العقارب الصبخية فهي خطيرة لأن لسعتها تقتل الأنسان فى الحال.

-      قلت له شاهدت أثناء أحدى الدوريات على درب الأربعين بالصحراء الغربية نوع من الحيات التى تطير لأرتفاع 2 متر وتقوم بلدغ الجمل او الأنسان الذى يسقط صريعا فى الحال هل تدخل ضمن العهد الرفاعى

-      يا أفندم درب الأربعين هو فى الأصل وادى للحيات وتسير فيه قوافل الجمال والعبيد منذ آلاف السنين وكان يسمى بطريق العبيد وسمى بالأربعين لأستغراق القوافل أربعين يوما من المسير للوصول إلى سوق الجمال بأمبابه ومع تقدم الحضارة لم يعد هذا الطريق يستخدم وبالتالى لم تجد الحيات غذائها الذى كان يعتمد على جثث الجمال والبشر التى تتساقط أثناء الرحلة فتوحشت وتهاجم حتى السيارات التى تجوب هذا المكان والثعبان الجائع لا يخضع للعهد قبل أن يأكل ويهدأ وينام سأحكى لك حكاية أمرأة من الخواجات جائتنى وهى تحمل ثعبان ضخم من النوع المغازى وقالت بأنها  عثرت علي ثعبان صغير جائع بردان فقررت أن تنقذه مما يعانيه فأخذته إلى بيتها و آوته و بدأت تطعمه حتى كبر  و أخذ يعتاد عليها  فينام بجانبها و يتبعها في كل مكان تذهب إليه

و في يوم ما توقف عن الأكل تماماً و حاولت معه السيدة الرحيمة أن يأكل خوفا عليه و هي تظن أنه مريض لكنه ظل على حاله أسابيع طويلة لا يأكل وهويتبعها يتدفأ بها وينام بجانبها بينما هي حزينة عليه تفكر كيف تجعله سألتها هل ما يزال يرقد بجانبك فردت السيدة الطيبة نعم هو متعلق بي يتبعني أينما ذهبت و ينام بجانبي ، أحيانا يلتف حولي طمعآ في الدفء لكنه حين أستيقظ يتبعني بعينه فأهرع الي تقديم الطعام له فلعله جائع لكنه للأسف لا يأكل شيئا و يظل مكانه. و قلت لها يا سيدتي إنه ليس مريضا بل يستعد لإلتهامك إنه فقط يحاول أن يجوع فترة طويلة حتى يمكنه أكلك و يحاول كل ليلة أن يلتف حولك ليس حبا فيكي لكن يحاول أن يقيس حجمك مقارنه مع حجمه حتي تستوعب معدته وجبة بحجمك أنه يعد العدة للهجوم عليك في الوقت المناسب فخذي حذرك و تخلصي منه بأسرع وقت.. فأحذروا من ثعابين هذا الزمان

                                                 تمت