الواد الروش

الواد الروش
تحقيق صحفى
الواد الروش هو موضة هذا العصر والعصور القادمه ..هو هدف كل البنات الروشه وغير الروشه يتفاخرون بمعرفته فى قعداتهن ويحسدن بعضهن البعض على مانالته صحباتهن من الروشنه
قعدت أسأل نفسى ما معنى كلمة روش فلم أجد لها معنى فى قواميس اللغه المتعارف عليها ولكن وجدتها فى المعجم الوجيز الصادر لطلبة المدارس بجمهورية مصر العربيه
روش :(روشا )بمعنى خف عقله..وهى روشاء والجمع روش
بضم الراء والشين
يعنى الولد الروش والبنت الروشاء ..عيال مخها طاقق وشبه مجانين ..فقمت بمواجهة بعض الشباب والشابات بهذا المعنى
الوارد فى القاموس فقاموا بتصحيح معلوماتى الأكاديميه ويضعونى على الطريق الصحيح للروشنه وسنعرض عليكم حديث ومناقشه روشه مع واد روش وبنت روشاء ونشوف ردودكم الروشه
الحلقة الأولى
حمــــاده الروش
أنا: مساء الخير يا أستاذ حماده
هو: مساء العندليب على زيزو العجيب
أنا: سألت فى الجامعة على أروش واحد يعرفوه..الكل أجمع على أنك أكبر روش هنا
هو بثقه: ده شيئ طبيعى
أنا : عايزك تفتح لى قلبك وتقولى بصراحه أزاى وصلت لهذه المرتبه العاليه من الروشنه
هو :أنت عايز تبقى روش
أنا : ياريت ..نجرب هو أحنا خسرانين حاجه
هو : بس الكلام ده حيكلفك شويه
أنا : وماله أنا معاك من جنيه لعشره
هو: تعالى نقعد بعيد عن الجامعه فى القهوة أللى ورا بتاعة الروشين
أنا : قشطه برضه
هو : قشطه !! أنت حتبتدى روشنه من قبل ما تتعلم .. كويس أنى عندك مبادئ ..أطلب لنا أتنين شاى وتفاحه
أنا بسذاجه : تفاحه واحده بس ..ده أنت مقامك 2كيلو تفاح
هو وهو يضحك : ههههههه ده أنت زبون سوقع ..شيشه تفاح ياعم زيزو ما ضحكش علينا الروشين مش شامم ريحة التفاح مفحفحه أزاى فى القهوة
أنا : ما علينا نرجع لموضوعنا ..أزاى بقيت الواد الروش بتاع الجامعه بدون منافس
هو : شوف ياسيدى الموضوع عايز شوية فقدنه على شوية طناش وشوية منظره يعنى تسوق الجنان ع الشيطنه
أنا : الفقدنه والطناش موجودين مش محتاجين لدروس أيه بقى المنظره
هو : شكلك ..لبسك ..عربيتك ..طريقة كلامك ..عدد البنات والولاد حوليك يعنى تبقى الواد القرن
أنا : واحده واحده ياروش وفسر لى كل واحده من دول
الشكل الروش
هو : بص كده لشكلى وأنت تعرف..شوف أولا شعرى عامل أزاى
أنا : منظرك ما حلقتش بقالك سنه وموقف شعرك بالجيل زى القنفذ
هو : دى موضه ياجاهل ..أنت مابتشوفش تليفزيون ..ده شكل الشباب المتحرر فى أوروبا وأمريكا
أنا :و دقنك مربيى حته منها تحت شفتك ..لا مؤاخذه عامله زى بتاعة الجدى أللى عندنا فى البلد
هو : دى العلامه المميزه لفريق الجديان الفرنساوى الغنائى
أنا : يعنى أنا مش غلطان ..طب وفردة الحلق الوحيده أللى فى ودنك الشمال ليه ما تبقاش فى ودنك اليمين
هو : ملحوظه ذكيه يازيزو ..فى الشمال روشنه..لو فى اليمين
بتدل على حاجه قليلة الأدب
أنا : فهمت على الله القراء يفهموها ..طب والسلسله الحديد وفى آخرها حتت صفيحه مصديه دى بتاعة أيه؟؟
هو :دى بتدل على الفقدنه والتهور ماشفتش مشاة البحريه (المارينز ) وهما معلقينها فى صدرهم
أنا: شوفت يا خويا .. داهيه تاخدهم كلهم ..نيجى بقى للبس
الحلقة رقم (2)
اللبس الروش
هو : شايف البنطلون الجينز أللى أنا لابسه ده بكام
أنا : ده بكتيره بجوز جنيهات أنا شايفه مقطع ومهلهل وجربان وكمان فيه رقعه
هو : ده أنا شاريه بـ 300 جنيه أللى مش عاجبك ده جاى من بره
أنا:جربان و برقعه والتقطيع أللى فيه ب300 جنيه أومال لوكان جديد وسليم يبقى بكام ؟؟
هو: ما أشترهوش بـ 10 جنيه ..الرقع والتقطيع والجربان أللى فيه هو ده الروشنه وبعدين ده تانى لابسه ليه يعنى لسه جديد
أنا أتعجب : يا سلااااااااام ..وأنا أللى فاكره أنك شاريه من بتاع الروبابيكيا .... والكوتشى المخروم ده أكيد بـ 500 جنبه
هو : لا ده كوتشى عادى بس أنا مبهدله مخصوص وبكعبه وأمرمطه فى التراب زى مانت شايف..البنات الأستايل بتحب الحركات دى وبتموت فيها يعنى حضرتك لابس بدله وقميص وكرافته وجزمه بتلمع وحاطط برفان وحالق دقنك ومسرح شعرك
وعاملى فيها عمر الشريف فى زمانه..... فيه حد عبرك من البنات وبصلك
أنا : فى الحقيقه لأ .. تفتكر ليه ياحماده بيه
هو: شكلك عادى مفهوش حاجه تلفت النظر وبيدل على أنك لا مؤاخذه ما تزعلش ..قفل ومعقد ودقه قديمه
أنا أتعجب للمرة الثانيه :يا سلااااام وأنا أللى فاكر أنى لابس آخر شياكه بالحته أللى على الحبل.. لو كنت أعرف كنت ألبس أوسخ لبس عندى بعد ما أقطعه ومرمط بيه الأرض فعلا الروشنه ليها ناسها..يدخل شاب حالق شعره بالموس ويمسى على الموجودين
هاى شله ..هاى طيفه
أنا : الجدع الأقرع ده برضه من طائفة الروشين تبعكم يعنى
هو :( طيفه) ده الأنتيم بتاعى بيقود الشله فى غيابى
أنا : أقرع وروش طب أزاى
هو : دى مش قرعه دى أسمها حلقة رونالدو بتاع الكوره
أنا : أنا كنت فاكر أنه فى الجيش ولا دماغه فيها قرع ولا وباء
ياه ..حتى القرعه من الروشنه بينى وبينك أحسن من الكنيش
هو : تعالى أفرجك على عربيتى أهى راكنه هناك أههه
أنا : دى فيات 128 كابورليه بس مشفتش زيها قبل كده وماسورة الشكمان بتاعتها غريبه عامله زى ما سورة الصرف الصحى
وكمان أربع ألوان دى أنتيكه يا جدع
هو : الشاب الروش لازم يركب عربيه روشه لما بمشى بيها صوتها بيرج الحيطان غير الكلاكسات والأنوار والكاسيت تتمنى أى بنت تركب جانبى وأطير بيها فى شوارع القاهره ..كان عندى موتسيكل تيجر وبيعته بعد ما عملت بيه حادثة بس كان يهبل البنت أللى كانت راكبه ورايا أتنطرت أتعلقت فى شجره محدش عرف ينزلها ألا المطافى
أنا : ولسه عايشه ..عايشه وقاعده هناك زى الجن وبتشرب شيشه ..بت ياجدع بسبع ترواح..ركبت تانى مع واحد صاحبنا نزل بيها فى الترعه تطلع هى والواد يغرق ..تحب أكلمها لك تاخدها فى عربيتك ..لا على أيه مره شجره ومره ترعه نا قص تولع فينا
وحياتك يازيزو حصلت..بتولع سيجارة لواحد صاحبنا تقوم نار الولاعة تشيل وش الواد بشنبه وحواجبه وشعره بت نصيبه
قولت لى أسمها أيه ..سوسو كوارث آداب عين شمس..دى غير سوسو كوارث تجاره أنجليش
هو : طبعا ماتعرفش قاموس الروشنه ..لا ماعنديش فكره طب خد الكتاب ده أقرأه وذاكره كويس وأبقى سمعهولى قشطه ..قشطه
أنا : ممكن ياكابتن تاخد لى ميعاد بكره مع ست سوسو كوارث آداب عين شمس
هو :بسيطه تعالى بكره هنا حتلاقيها قاعده بتشيش قولها أنا من طرف البووس ..بس وحياة أبوك يازيزو ما تجيش بالبدله دى تانى شوف لك أى حاجه من النظام بتاعنا أنت كده حيقولوا أنك شاب البرومه مادستش لك على رفرف يعنى خام
أنا :خلاص بكره حتشوفنى بأعفن لبس عندى ولو عايزنى ببنطلون بيجامه وشبشب مافيش مانع...
هو :أخلع دلوقتى.. الشخرمون طاخ في الترللى.. يعنى أيه ياكابتن
أدعك الفانوس وأختفى ميعادك خلص
أخدت قاموس الروشنه وأقعدت أتصفح فيه وأذاكره علشان أعرف أتفاهم مع سوسو كوارث ألله يحفظنا..ياه فعلا الصياعه أدب مش هز أكتاف على رأى الأستاذ (اللنبى)..ده علم بحوره واسعه قوى
الحلقة رقم (3)
قاموس الروشنه
قعدت فى البيت أقرأ فى قاموس الروشنه وأحفظ المصطلحات أستمورننج لفظ يقال في الصباح بغرض تناول الطعام أو التدخين ، أو شرب الشاى حتى يفيق الشاب من نعاسه ، مثل " هاروح اعمل أستمورننج علي القهوة وجاى " الأبلتين لدع في دهاليز الحياة عبارة تدل علي الخواء أو الفوضى في الحياة ، وغالباً ما تأتى بقصد الفلس أعمل دماغ عبارة مشهورة لدى المدخنين ويقصد بها ضبط الحاله المزاجية عند المدخن
أديها جاز عبارة تقال في مواقف المشاحنات بين الأصدقاء لزيادة حدة المشاجرة ، مثل " أدى الخناقة جاز علشان تولع أو شعللها " سواء بالكلمات أو توجية اللوم لأحد المتشاجرين لكى يثور علي الاخر أختفى شوية أى لا تجعل أحد يراك هنا أو أبعد الآن أو أمشى من هنا ، مثل " عاوزك تختفى شوية لحد ما الحياة تعدى " أى لا تظهر نفسك حتى تنتهى المشاكل . أو " أختفى من أمامى الأن .. أى أمشى وأترك المكان لأنى لا أريد رؤيتك أيه النظام عبارة بمعنى أيه الموضوع ، ولقد أستغلت الكلمة في أحد إعلانات الموبيل فى نظام كروت الشحن و العبارة تدخل في العديد من الأحداث التى يتسائل فيه الشاب عن الأحداث الجديدة ، مثل " أيه النظام .. النظام في العظام " والعبارة الاخيرة تفيد الأعتراض علي الإجابة بإسلوب فيه عبط وإستهبال أليط لفظ بمعنى المتكبر ، الذى يتعامل مع الأخرين بأسلوب فيه تعالى او ينظر الى الاخرين نظره دونية متعجرفة أتشبح مصطلح بمعنى الضرب لدرجة التعذيب ، وتقال "شبحته " أى أعتديت علية بالضرب المبرح إتم والأتامه حسب تعريف الروشنه تعنى الغلاسه والرخامه والتناحه ، وجميع الصفات السيئة التى قد يتصف بها شاب معين .. ويقولون " الإتم جه " أى استعدو لتحمل السماجه التى سوف تظهر من هذا الشاب
أزبهل لفظ يدل علي الزهول الشديد ويقال " انت مزبهل كده ليه " أى مندهش لدرجة العبط إحلق وهو لفظ لا يعنى الذهاب الى الحلاق لقص الشعر ولكنه يفيد تجاهل الغير مثل " أحلق له " أى لا تفكر فيما يقول فهو لا يستحق أتوبيس راجع بضهره عبارة يقولها الشباب علي الفتاه الغير جميلة ولها لدى الشباب اسماء اخرى ، مثل " زى الكره الكفر " أو " صب حته واحده " أعلمه وهذا مصطلح يعنى التشوية في جزء من الوجه بآله حاده ، مثلما أراد الفنان محمد سعد في فيلم الناظر مع النجم علاء ولى الدين " أعلمك بمطوه يا ابو صلاح ده ختم الصياعه " أنش لفظ مختصر لاسم " انشراح الخباثة " وهى شخصية خيالية تعنى الشخصية الساذجة الى درجه الهبل
أملئ التنكعبارة بمعنى اريد ان اكل لان معدتى خاوية والتنك هنا بمعنى المعده ، أما البنزين او السولار الذى يملأ التنك هنا فهو الطعام أمبلايز مصطلح بمعنى " في القشوش " اى ان الموضوع الذى سعيت من أجله لم يتم ، او تعبت علي الفاضى ، وتقال " الحياة في الامبلايز " اى ان الحياة خربانة وفاشلة أشاعاتى الشخص القادر علي اصدار الشائعات بمعدل 50 أشاعه / ثانية ، رغبة في التشهير بالاخرين وايهام الغير بالسوء أبجنى تجدنى عبارة تعنى " انا يمكن شرائى بالمال " او اعطنى المال لكى انفذ كل ما تطلبة ، وغالباً ما يقولها الموظفين المرتشين او الشاب الذى لا يهمه إلا مصلحته دون الأخرين أنجز بالونجز كل المشاكل التى تقابلها لها حل سريع وحاسم ما دمت تدفع المقابل ، والونجز يقولون انها كانت نوع من انواع السجائر قديماً ، لكنها تطلق هنا علي النقود لانها حلالة العقد وسريعة التأثير في انهاء المصالح المتوقفهأخلع دلوقتى عبارة تقال كأعلان لرغبتك في رحيل شخصاً ما ، أنهيت الحديث معه ، مثل " أخلع دلوقتى ورايا شغل " أى امشى الان ونتكلم مره اخرى فلدى ما اهتم به غيرك بس كفايه كده النهارده أحفظ دول وأمشى نفسى بيهم مع سوسو كوارثالحلقة رقم (4)
سوسو كوارث
فى اليوم التالى أرتديت البنطلون الجينز والكوتشى وقميص مشجر كان واحد صاحبى جايبه لى هديه من هاواى ولم أرتديه لعدم أقتناعى بلونه وشكله والأن جائت المناسبه لأرتدائه وقمت ضارب شوية جيل فى شعرى ومرجعه للخلف وفاتح فيه طريق فى المنتصف ونزلت فى الشارع لأجد بأن كل من فى الشارع ينظرون ناحيتى ويبتسمون أبتسمات غريبه فأقابلها بأبتسمات بلهاء ..فعلا الواد حماده الروش ليه حق أنا كل يوم ألبس بدله شكل وعلى الموضه ما حدش عبرنى ولا حتى أبتسم فى وشى
وركبت عربيتى وأنطلقت وأنا أفتح الكاسيت على الآخر على البرنامج الأوربى لأسمع موسيقى البوب والجاز وأنا أتمايل معها وأنا مش فاهم حاجة من كلامها ..أتوقف فى أحدى أشارات المرور فأجد كتكوته روشه بتشاور لى ..هاى ..هاى ورحمة الله وبركاته... وأقوم بعمل غرز يمين وشمال وأعدى من طوب الأرض لحد ما توقفت فى أشارة تانيه فأجد رجال المرور الأشاوس فى أنتظارى ويطلبون الرخص
الضابط : رخصك يا حبوب
أنا : أنا عملت حاجه
عندك خمس مخالفات مرة واحدة ..حزام وسرعه وأزعاج بالكاسيت وعدم مراعاة شروط الأمن والسلامه فانوس أشارتك مشروخ وشكلك مش عاجبنى
لك حق فى الباقى أيه بقى أللى مش عاجبك فى شكلى هو فيه ماده فى القانون بتقول كده.
...لأ مافيش بس ممكن تبقى التحدث بوجه غير لائق مع رجال المرور
...ياعم أنا غلطت معاك
...كد تبقى غلطت خد الوصل ووسع السكه
واصلت السير وأنا متعكنن فقد ظهرت كرامات (سوسو كوارث) من قبل ما أقابلها ولكن زادنى ذلك أصرارا على مقابلتها فى قهوة الروشين

فى قهوة الروشين
أنا : هاى سوسو ..أنا زيزو أللى كلمك عنى حماده
سوسو بلا مبالاه : أقعد يا أخ زيزو هو أنت أللى كنت متقمع أمبارح ولابس لى بدله ..أيوه أنا ..ومالك عملت فى نفسك كده ليه..
أنا : عشان يمشى مع جو القهوة
هى : عارف عاملتك بتاعة أمبارح عكننت على الشله وسابوا القهوة وأفتكروك مباحث وطيرت منى الدماغ أللى عملاها..حماده ده ما يجيش من وراه ألا النصايب..ما تقعد واقف ليه
أنا : الحقيقه ياسوسو عايز أدردش معاكى شويه
هى : دردش يا خويا حد ماسكك
أنا : أنتم معاكم كام بنت روشه فى الشله
هى:( تسرح وهى تعد على أصابعها) حوالى عشرين منتظمين و150 أنتساب
أنا : المنتسبين دول منتسبين فى الجامعه .
هى : منتسبين فى الشله والقهوة يازيزو خليك معايا أطلب لى قهوة دوبل فى كوبايه ..حاضر... المنتسبات هى بنات روشه وأروش من المنتظمات بس ما بيجوش القهوة ولو جم بييجوا طيارى
أنا : وأنا أعرفهم أزاى
سوسو: البنات دى تلاقيها لابسه طورح وبنطولنات جينز محزئه وعامله خريطه فى وشها ونص شعرها طالع بره .. وبتمشى مع طوب الأرض
ودول عاملين زى اللى رقصوا على السلم ولا طايلين يبقوا روشين ولا محجبات ..عين فى الجنه وعين فى النار.. تاخد سيجاره.. لا ما بدخنش
أحسن وفرت ههههههه
أنا : أيه سبب تسميتك بـ سوسو كوارث
هى : دى أوشاعه مطلعنها حماده والشله..وأنا ماليش دخل فيها واحد غرق وأنا مالى واحد ولع وأنا مالى واحد أتقفش ببنجو وأنا معاه ذنبى أنا أيه..واحد أتراهنت معاه أنه يقلع هدومه فى المدرج أترفد أيه دخلى
أنا : لا لا مالهمش حق..بس أنا ملاحظ أنك عامله( تاتوه) فى حته غريبه قوى أيه الحكمه؟؟
هى :علشان راسماه على رقبتى وقفايه ..فيها أيه دى.. أمال أبقى روشه أزاى... ماشفتش شنطتى شكلها أيه
أنا : هى فين الشنطه دى ..أهه ياجدع ..الخورج ده بتقولى عليه شنطه
يا خرب عقلك
هى : أنت مش حتيجى معانا الرحله يازيزو ..
أنا : حتروحوا القناطر ولا جنينة الحيوانات ولا الهرم
هى تضحك بصوت عالى وهى تضرب كفها بكفى : ما أنت بتعرف تنكت أهه..وهى دى نكته ..طبعا نكته..أحنا طالعين طريق السويس
أنا : غريبه فيه أيه طريق السويس الواحد يتفسح فيه صحراء يمين وشمال ومعسكرات وغرز وكافتريات أيه أللى عجبكم فى المشوار المهبب ده
هى: قوم بينا توصلنى لأقرب مواصلة وجدعنه منك يكون لحد البيت ونكمل كلام فى السكه ..
أنا:













أتزرع هنابمعنى أنتظر هنا ولا تتحرك مثل أى جماد أو شجره وتقال " إتزرع هنا لحد ماجى تانى " أى لا تترك مكانك أو موقعك حتى أعود إليك مهما كانت الأسباب أعلن فرارى عبارة بمعنى انوى الإنسحاب من الجلسه او الموقف الذى اعاصره ، وتقال " اسف " انا هأعلن فرارى اى انا ماشى او لن انضم اليكم في الحديث أتارى مصطلح يطلق علي السيارات الخفيفة ، لانها تشبه السيارات في العاب الفيديو جيم او الاتارى ، مثل " سياره الشرطه " ويقولوها المدمنين " اجرى يالا عربية الاتارى جاية " أيه الحياة ؟ سؤال بمعنى ماذا حدث اليوم ، ما هو الجديد في الدنيا .. ما هى اخر الاخبار وكل الاسئلة علي الوضع الحالى أحنا اللى بهيظنا الفهايص عباره يطلقها قائد شله الفساد افتخارا بنفسه ومعناها " انا اللى جعلت الجميع يغيب عن الوعى "
أبو الغضب اسم يفيد معنى الشر او ان هناك نية مبيته بالايذاء ، ويقال اسم ابو الغضب في وشه اى ناوى علي الشر ، اما " ابو الغضب " نفسه فهو شخصية كارتونية شريرة ظهرت في حلقات ( مازنجر ) وعلي غرار المعنى يقال شبية أبو لهب او شبية أبرهه الاشرم وكلها شخصيات شريره أوزى لفظ يطلق علي الفتيات الصغيرات الجميلات في المدارس الثانوية والإعدادية وشابه ذلك أدعك الفانوس عبارة بمعنى أختفى الان ، انصرف ، لقد اتممت مهمتك او قلت ما تريد .. مثال " ادعك الفانوس دلوقتى " اى احل بدون ان يراك احد أ(30) نزل من ع المسرح يا نجم عبارة تقال لشخص يتدخل فيما لا يعنية ويقصد بها " ده مش دورك " اى ليس لك دخل بالموضوع (31)منخر الشخص المتكبر المغرور الذى لا يتعامل ببساطه مع الاخرين ، بل ينظر اليهم نظره دونية(32) أهرش لفظ يفيد " طلع اللى في جيبك " او ادفع لى حتى اقوم بما تريد من خدمه وتقال ايضاً " اهرشنى " اى اعطنى نقوداً في السر او في العلانية(33) أنزل من علي ودنى عبارة بمعنى " ابتعد عنى " او انك انسان ثرثار كثير الكلام او " ارحم دماغى " صدعتنى (34)أوكشه وهى الفتاه الباهره الجمال او التى تستحق ان يطلق عليها كلمه " أنثى " (36) أشتغله اى اكله البلوظه او اكذب عليه او اخدعه او استهبل عليه وتقال " انت بتشتغلنى " أوجو مصطلح يطلق علي الفتاه التى تخضع لتأثير الشباب بسهوله ، او ذات العلاقات المتعدده مع الجنس الاخر أيحه لفظ يطلق علي شخصاً ما هو التركيبة السرية لماده البخل او الذى لا يهون عليه صرف مليم أفتكس كلمه تعنى القدرة علي الاختراع او التأليف في مجالات الحياه المتعدده التى تتسم بطابع العبط والاستظراف مثل " ايه اخر افتكاساتك يا عم ،، اى ما هى اخر اختراعاتك في الحياه أستكانيس لفظ يدل علي الراحه والرفاهيه والمتعه وتقال " انا مستكانيس كده " اى انا مرتاح جداً بهذه الطريقه بيرمى ودنه عبارة بمعنى انه يتصنت علي شئون غيره بتوجيه الردار بالأذن ، لاثنين يتحدثون سراً لكى يفسر الكلام الهامس بخ تأتى بمعنى أن شئ ما أنتهى وغالباً ما تأتى في جمله " بخ خلاص كان موجود وخلص " اى ان ما ترغب فيه لم يعد متاح الان أبعته لفظ بمعنى " اخدعة " او اكذب عليه حتى تضحك من تصرفاته مثل " روح يا شيخ .... وتعالى بسرعه " ببخظه وعرانيسة عبارة تدل علي جوده النبات ( المخدراتبشلة علامة على الوجه ، ناتجة عن المشاجرات واحياناً تدل علي ان الشخص الذى تشوه وجهه " بلطجى أرارى " اى معتاد علي اعمال البلطجه بونتى نداء يوجه لشخص ، يقصد منه " فرد العضلات " او الاستهزاء بقدراته واحياناً يقال لصديق او رفيق حديث العهد بالشلة باكس مصطلح بمعنى الخايب ... العبيط .... الذى يمكن خداعه بسهوله " يا باكس " نداء بغرض الاستهزاء بالشخص الموجه اليه النداء ويجهله الجميعباشكا مصطلح بمعنى ألعب بأوراق مكشوفه ، او بطريقه واضحه وغالباً ما يستخدم اللفظ في الكوتشينه ويقال العب باشكا اى العب ع المكشوف باترينا لفظ يطلق علي الشاب او الفتاة التى ترتدى نضاره بلبع لفظ يطلق علي الشخص الساهى والغير ثابت وموزون في تصرفاته فيقال انت مبلبع ايه ، ويقصد انه مدمن مخدرات لعدم اتزانهبتهوبص او بتهجس لفظ بمعنى " يستعبط " اى تتظاهر بالغباء وانت اعلم الناس وتقال " انت بتهوبص علينا " اى بتكذب او عامل فيها عبيط ) بتخبط في الحلل عبارة بمعنى " انك تفضح سرى وذلك يسبب لى اهانه " وتقال العباره عندما يسب شاب صديقه فيرد عليه ويقول له " لاء متلعبش معايا الدنيئة ومنخبطش في الحلل مع بعض " بنت في الزيف عبارة تطلق علي الفتاة الجميلة وفى الزيف تعنى في الجون اى ذات جمال خارق تستحق عليه كلمات الثناء والاعجاب برطعه او بروطه لفظ بمعنى " أكل ومرعى وقله صنعه " اى يسير في الحياه بدون هدف او غايه وتقال " ماشى في الحياة بيبرطع " اى بلا افكرا محددة بشكل منظم او يعيش بعشوائية او يعيش عاله علي الاخرين بؤله لفظ بمعنى الموضوع وتقال " البؤلة دي بتاعتى " اى ان هذا الموضوع اهتم به فهو شخصى ده لما تحب تخلص مصلحه بنفسك من غير حدتسالى يالوز نداء خاص ببائع اللب والسودانى في الشوارع ولكن استخدمه الشباب للدلاله علي ان العلاقه الغرامية التى تعيش فيها مجرد قضاء وقت تسليه ، وان حاله الحب التى يتظاهر بها ليس في موضعهاتعبان موله عبارة بمعنى ان الشاب " ليس له في التور او الطحين " اى لا يعرف اى شئ واحيانا ما يقولها الشاب الذى يمر بحالة من الفلاسه ، وتقال " انت تعبان مووله أي تعبان خالص وتنفعنيش او تعبان مودك" تشريد لفظ بمعنى لا تنقل الاخبار ، او لا تنشر الاخبار او " ما تسيحش" او يقال " بلاش تشريد " اى ماتفضحنيشجالى جرب في ودانى عبارة بمعنى .. لا اريد سماعك مره اخرى .. انت رغاى ... صدعتنى .. ابعد عنى ... وكلها عبارات تفيد طلب الكف عن الثرثرة من الشخص الرغاىحطيت ايدى علي البلف اى لمست جوهر الحقيقة داخل شئ ما ..خدوده أنش عبارة تطلق علي الفتاة الجميلة التى تمتاز بالرقه والنعومة والممتزجه بالخجلدايس عليها قطار عباره تطلق علي الفتاه قبيحه المنظر لدرجة مبالغ فيها وتقال .. البنت دي دايس عليها قطار ..او يقول دي بنت ماتت قبل كده تلاتمرات اى لا تظهر ملامحها .. وحشه قوى ..
دباليمو مصطلح بمعنى ان هذا الشاب او هذه الفتاه حاصله علي دبلوم صنايع او تجارى " دبلوماتك برجالاتك دبلة دهب في صياعتك ، وهذا يعنى ان الدبلوم طريق سريع للشاب ليدخل الى معترك الحياة والعمل باعتبار ان الحاصل علي الدبلوم قد يجد مهنه قبل الجامعى ، كما ان الفتاة الحاصلة علي دبلوم تتزوج قبل الجامعية ويقولون ايضاً " دبلوم العدل " دبلوم الزواجدبلج المسائل عبارة بمعنى " صلح المواضيع " حاول ان تخفف اخطائى او ظبط الامور او خفف حده التوتر الذى سببته او لما حد يقولك حوار مش مفهوم فاتقوله دبلج والنبي لحسن تيستسكح مراجيح ع الديق اى ان الحياه كلها مشاكل ومتاعب وقرفسكاموزه لفظ بمعنى .. هذه فتاتى .. صديقتى ، مثل " ايه يا سكاموزه " عايزه ايه يا صديقتى وللرجال جزانوفه وده لما يكون بيحب مصلحهسلعوه عندها بواسير عباره تطلق علي الفتاه القبيحه والتى تمتاز بالنحافه وجسدها لا يتماشى مع الجزء الاخر بمعنى متنافره الاجزاء او القوامسكامونس الرقيق .. مقبول الشكل وغالباً ما يطلق اللفظ علي الفتاه الجميلة ذات الملامح الطفولية ، مثل " بنت سكامونس خالص " اى لذيذة جداً ... جداًالشخرمون طاخ في الترللى عبارة بمعنى ان الموضوع ضاع علي الفاضى لاداعى من البحث عن شئ اختفى .. كل ما تم تخطيطه فسد ... وهكذاشاب البرومة ما دستلوش علي رفرف عباره بمعنى الشرف ، النزاهه ، الاصول ، وتأتى غالباً للدلاله علي كل الصفات الحسنه التى يمكن ان يتصف بها شاب

المرأة الحديديه

المرأة الحديديه

بعد أن سمعت ( زينات ) عن فتوى مفتى السعوديه بأن من حق المرأة الدفاع عن نفسها ضد عدوان الرجل ومن حقها أن تضربه كما يضربها
باتت تفكر فى وسيله تجعلها قادرة على رد العدوان والأيذاء الذى يمارسه معها زوجها( حموده المفش)
فمنذ أن تزوجت هذا الرجل وهو يصبحها بعلقة ويمسيها بعلقة بسبب وبدون سبب فعاشت كسيرة مذلوله فى بيته ويعايرها نساء العيله والجيران بضعفها وقلة حيلتها مع هذا الرجل الباغى الظالم........... وفى جلسه حريمى بين زينات وجارتها (فتكات) دار بينهما هذا الحديث
الحلقة الأولى
فتكات : ما ينفعش الكلام ده يازينات يا حبيبتى كل يوم تتضربى علقه وننام ونصحى على صريخك.. طب بلاش كل يوم... خليها ياختى كل شهر ده أنتى صحتك على قدك مش حمل الضرب ده كله
زينات : ما أنتى شايفه يا فتكات حموده عامل زى الوحش الخبطه من أيده بتكومنى على الأرض ..أعمل أيه ؟؟ ومعايا تلات عيال ومقطوعه من شجرة فكرت كتير أنى أطلق منه.. تصعب عليا العيال.. وحروح فين وآجى منين ولا حلتى مال ولا جمال ومأعرفش حد فى البلد دى
فتكات : مالكيش قرايب ولا أعمام ولا خلان يقفوا للراجل المفترى ده
زينات : ولو فيه.. يقدر حد على (حموده المفش) وأجرامه وطولة لسانه منه للله البعيد ربنا على المفترى قادر يهده
فتكات : آمين ..حطى الكمدات دى على عينك أللى ما بلتحقش تفش تورم تانى ..ربنا يصبرك... يقدر( أبو صابر) يبص ناحيتى أو يعمل زى حموده بتاعك ده ... ده أنا كنت أكلته بسنانى
زينات : أنتى يا فتكات صحتك مسعداكى وماشاء الله عليكى طول بعرض وجسمك مليان تقدرى تضربى عشرة من أبو صابر أنما أنا ياحسره عليا مفييش زى العصفورة حموده بيطوحنى فى أخر الشقه زى الورقه
فتكات تخمس فى وجهها : النهارده الخميس يا حبيبتى ..بس أنتى اللى خايبه الحكايه مش بالجسم يا عبيطه شوفى القطه والكلب لما بيتخانقوا القطه أصغر من الكلب بكتير أنما بتبهدله وتخليه يدلدل ودانه ويجرى
الحكايه مش بالجسم والعضلات ..عايزه شخصيه وشجاعه وأنتى شخصيتك أتمسحت مع الراجل ده وجبانه على طول وخايفه تواجهيه
زينات : أواجه ثور زى ده أزاى قوليلى..ده ممكن يموتنى
فتكات : تتك خيبه ما أنتى ميته هو أنتى فاكره نفسك عايشه..شوفى الستات وهى بتتبغد وتتشرط وتتقنعر على رجالتها ويتمنوا ليهم الرضا يرضوا
..عارفه يابت يا زينات أنا سمعت فى التليفزيون أن الشيخ بيقول أنى من حقك تضربى جوزك لو ضربك يعنى تدافعى عن نفسك بدل ماأنتى واقفه قدامه زى العبيطه يلطش فيكى فى الرايحه والجايه ..مش قادره خوفيه هدديه أتغدى بيه قبل ما يتعشى بيكى ورى له العين الحمرا زينات : طب لو ضربنى
فتكات: ماهو بيضربك من غير حاجه ..بس حسسيه أنك ممكن تأذيه زى ما بيأذيكى..وبعدين يابت كلى وأتخنى وأملى هدومك ..بدل ماهو مستهيفك كده
زينات : هى الواحده بيبقى عندها نفس تاكل بعد البهدله دى أنا نفسى بتتسد وأقعد باليومين ما حطش لقمه فى بقى
فتكات : بسيطه كلى يا حبيبتى قبل العلقه حتى تقدرى تستحملى التلطيش وقلة الحيا بتاعته وزودى فى الأكل كأنك بتاكلى فى جتته.. عيزاكى تاكلى كأنه آخر زادك و تبقى زى البطه ودراعتك ورجليكى تملا ووشك يتنفخ كده بدل الأنيميا أللى أنتى عايشه فيها وبعد كده حعلمك القهر على أصوله
زينات : طب فيه حاجه تخلينى أتخن بسرعة
فتكات : فيه يا حبيبتى عند العطار ..الكيس المحوج ومربة خرز البقر والمفتقه ..وتكترى قوى فى أكل السمك والرز والعيش وماتهديش نفسك فى البيت وريحى على الآخر ده راجل مايستهلش غير ضرب البرطوشه
زينات فى أستسلام: خلاص يا أبله فتكات
فتكات : أبله أيه يابت ده أنا أكبر منك بشهور أبقا أبلتك منين يا دلعدى
ده ليه حق حموده يروقك كل شويه ههههههههه
عايزاكى تصحى وتفوقى لنفسك وكل يوم حاجى أقعد معاكى أديكى درس حريمى معتبر وعايزه أشوف النتيجه أول بأول..فوتك بعافيه حجيلك بكره وأجيبلك كل الطلبات من عند العطار
الحلقة رقم(2)
الدرس الأول

فتكات: يعنى ما سمعناش صوتك النهارده ..قولت آجى أشوفك ليكون المخفى خلص عليكى
زينات :رجع أمبارح متأخر دخل نام زى الشوال ماحطش منطق يظهر كان مونون ومتقل فى العيار ... وخرج من بدرى من غير ما يصحينى دخل على المطبخ وفتح التلاجه وقعد يلوغ وقام رازع الباب وقام فاتحه تانى..... وجه وقف فوق راسى وأنا عامله نفسى نايمه وقال لى: حسابنا لما أرجعلك يازينات يا بنت أمبابى..أفتكر المفترى أنه ما ضربنيش أمبارح وقام خارج آلهى ما يرجعه
فتكات : خدى الحاجه أهه خبيها منه ليلغوها هى كمان ويزيد فى أفتراه
وزى ما فهمتك عيزاكى تاكلى كويس وأنا شايفه خير ربنا كتير عندك
زينات: هو ماعندوش أهم من الأكل ..همه على بطنه داخل محمل من مجاميعه لحمه وفراخ وفاكهه ..بس فين النفس أللى تاكل
فتكات : عيزاكى تاكلى فى آخر زادك لحد ماتردى.. وتربربى ..عارفه الكلبه أللى عند أورمه الجزار مابتقدرش تمشى من كتر الأكل أزاىوما بتخليش أتخنها كلب يهوب ناحية الشارع
زينات :عيزانى أبقى زى الكلبه يا فتكات
فتكات : مع الجعر جوزك ده عيزاكى تبقى زى الوحش علشان يعملك ألف مليون حساب..المهم فى الفتره دى ما تتعرضيش ليه وكل حاجه قولى حاضر لحد ما تبقى تمام التمام
زينات: هو أنا بقدر أقول لأ ..ماشى يا فتكات حعمل أللى بتقولى عليه
فتكات: شوفى بقى بعد كده لما جسمك يملا وتشدى كده حاخدك لمدام (فوزيه) أللى فى الدور الأرضى بتاعة الرياضه حتخليها تظبطك أنا كلمتها أمبارح قالت لى خلينى أشوفها المسكينه دى ..
زينات: عايزانى فى أيه مدام فوزيه
فتكات: أنا لما حكيت لها حكايتك ..نزلت الدمعه من عينها وحلفت براس أبوها لتمرنك مجانا ولوجه الله
زينات : حتمرنى على أيه دى كمان
فتكات : حتمرنك كوندوفو..ومصارعه حره..وكيك بوكس وكارتيه وكل أللى يساعدك علشان تعرفى تدافعى عن نفسك
زينات وهى تضرب بيدها على صدرها : يالهوى يا فتكات عايزانى أضرب الثور ده طب أزاى.. ينفع ؟؟
فتكات : ينفع وينفع ونص بس سيبك من الجبن أللى أنتى فيه ده أنا عايزه أعملك كرامه.... ده كل ستات الحته لما عارفوا بحكايتك نفسهم ومنى عينهم يسووه على الجنبين بالشباشب
أسمعى الكلام أللى بقولك عليه وخطوه خطوه حنعرف أزاى نربيه ونكسر مناخيره المفش الجبان أللى مستتخن نفسه ..آه لو أطول زمارة رقبته
الكابتن فوزيه
فوزيه : أطلعى على الميزان ..لسه وزنك أقل ..عايشه على المفتقه ومربة خرز البقر ما ينفعش خدى الورقه دى فيها نظام غذائى ممتاز
بياخدوه بتوع الحديد وكمال الأجسام أمشى عليه لمدة شهر وأرمى الكلام الفارغ بتاع الستات أللى غاويه كلبظه وتربى لهاليط ..وخدى العلبه الكبيره دى تاخدى منها مرتين فى اليوم معلقة على كوباية لبن أو عصير..دى هديه من عندى وأمشى على البرنامج وتعالى أشوفك كل أسبوع لحد ما توصلى للوزن المناسب حنبدأ بالحقن وبعدين التمرينات بدون الحديد ثم بالحديد و بعدين حركات القتال
زينات : بلاش والنبى ياست فوزيه
فوزيه تتعصب وتجذبها من صدرها وهى تشخط فيها : بلاش ..بلاش أيه ياوليه يامغفله مش كفايه فضحانا فى وسط الناس ..خليتى الرجاله يطمعوا فينا ..أصحى يازينات لحنزلك صف أسناك أنتى عارفه أنا ما بحبش سهوكة النسوان والدلع أللى يفور الدم حتمشى على الكلام بتاعى أحسن والله أطلع أضربك أنتى وحموده المفش بتاعك ده ..سامعه
زينات وهى خائفة : حاضر حاضر ياكابتن فوزيه حعمل أللى حتقولى عليه بالحرف
فوزيه : تابعيها كل يوم يا فتكات وبلغينى على طول ..تتك القرف ست خرعه ما عندكيش دم... مش عارفه تخبطيه خبطه تشل حركته
زينات: هو أنا بقدر أقرب جنبه
فوزيه :..بكره حعرفك أزاى تصارعى الثور ده وتكسرى قرنه... بس واحده واحده معايا وتنفذى ألى بقولك عليه
زينات : بس أنا خايفه قوى ياكابتن
فوزيه : طلعوا الست دى بره قبل ما كعورها على السلم..ست جبانه على رأى المثل يافرعون أيه فرعنك قال مالقتش أللى يلمنى ..حتنفذى ولا لأ
زينات وهى خائفه : حاضر.. حاضر بس سيبى أيدى حتكسريها
فوزيه : حنشوف..أن ماخليتك تفصصيه بسنانك وتربى له الخفيف ما بقاش أنا الكابتن فوزيه عدوة الرجاله ..

الحلقة رقم (3)
العلقة
( وبعد شهرين حموده بعد الغداء يتمطع ويمدد على الكنبه وزينات تمر من أمامه وهى تحمل كوب الشاى وتذهب فى أتجاه المطبخ وهو يتابعها بنظره وهو مستغرب
حموده : ماشاء الله ما شاء الله.. تخنا وكلبظنا أهه وبقينا علينا القيمه والجلابيه حتتفترك من عليكى ليكى حق ما أنتى بتاكلى فى قته محلوله... تكمل زينات السير دون أن تلتفت لكلامه
حموده :أنتى مابترديش عليا يا بت أمبابى..أنا سمعك بتبرطمى وأنت ماشيه بتدعى عليا يابت الـ....تعالى هنا ورينى شكلك كده ؟؟
(زينات لاترد عليه وتدخل المطبخ وتقوم بغسل الصحون دون أن تعيره أهتمام ..يدخل ورائها حموده ويهم بضربها فتسحب سكين من أمامها وتشهرها فى وجهه وهى ترتعش)
زينات :عارف لو مديت أيدك تانى مفيش غير السكينه دى حدبها فى كرشك
حموده يفاجأ بهذا الموقف الجديد من زينات: فيهجم عليها ويخطف منها السكين ويضعها على رقبتها وهو يخنقها ..أتعلمتى تمسكى سكينه ياروح أمك ..أدبحك دلوقتى ..أنطقى وألا حخلص عليكى ( تعض يده التى تقبض عليها فيصرخ حموده من ألم العضه.. آى.. آى يابنت العضاضه ويبتعدعنها بعد أن ضربها بقبضة يده فتتحامل على نفسها وتغرز أظافرها فى وجهه فيزداد عنفا معها فتهرب إلى غرفة النوم وتغلق على نفسها الباب بالمفتاح وهى تشعر لأول مره فى حياتها بأنها حققت حلم طالما تمنته.. أن تراه وهو يتألم مثلها
حموده وهو يضرب على الباب بعنف: أفتحى يازينات وألا حكسر الباب وأدخلك حشوف أنا أزاى أتجرأتى وترفعى السكينه فى وشى وتعضينى وتخربشينى كل ده علشان تخنتى شويه يابنت الـ....
زينات من الداخل بعد أن أستجمعت شجاعتها : عارف أن ما كنتش تحترم نفسك معايا حعمل فيك أيه ؟؟ ..حتعملى أيه يا بنت أمبابى
زينات من الداخل : حدبحك يا حموده وأرميك لكلاب السكك
حموده : يا نهار أسود يا نهار أسود ..اللغه دى جديدة عليكى ..أن ماوريتك ..أن ماكسرت عضمك ..حتروحى منى فين ؟؟
تنتهى الخناقه ويلبس حموده ملابسه ويخرج من البيت ليذهب إلى القهوه ليجلس مع أصحابه فيلاحظوا الجروح التى فى وجهه
فى القهوة
عبده كاجوال : أيه أللى فى وشك ده ياحموده هههههههههه حموده أتضرب يامنز أوعى تقول القطه خربشتك ياحوحو ههههههه
حموده : أتلم ياعبده ما تخليناش نخسر بعض
عبده : بكلمك جد أيه أللى عورك فى وشك كده صحيح
حموده : دخلت فى لوح أزاز فى الشغل
عبده : لوح أزاااز ..ده أنا كنت فاكرها خرابيش ياراجل
حموده : خرابيش أزاى يعنى ؟؟
عبده : سيبك من الكدب يا حموده ..قولت لك ميت مره بلاش أفترى وبطل ضرب فى مراتك وخليك بن آدم كويس ولسه ياما حتشوف
حموده وهو يتحسس وجهه : هى الخرابيش جامده ياعبده
عبده : أيوه جامده أكيد أترازلت عليها زى عوايدك ..يا جدع أتقى الله دى مراتك غلبانه ما تستهلش أللى أنت بتعمله فيها
حموده وهو يزداد غيظا ويحاول أن يغير مجرى الحديث : تشرب أيه ياعبده ..حلبه حصى وأنا قهوة مظبوطه
الجرسون : حلبه حصى وقهوة مظبوط للأسطى عبده... وحموده المخربش
حموده : مخربش.. أمشى يابن الـ....أنا قايم من هنا تعالى نقعد على قهوة تانيه
عبده : أحسن برضه لحد ماوشك يخف ...ههههههههههه

الحلقة رقم(4)
مرحلة المقاومه
فتكات: ضربك برضه الجبان ..بس ولا يهمك أصبرى وأحتسبى.. يومه قرب ومصيرنا نكسره وربنا حينصرنا عليه
زينات : أنا تعبت يا فتكات مع الراجل ده ..كل بوكس وكل كل شلوت بيهد من جوايه حاجات كتيره قوى.. ويطلع مكانها حيطه جديده من الكراهيه ..قتل مشاعرى و دمر أحساسى مسح بكرامتى الأرض
فتكات: خدى العلبه دى فيها دواء بعتاه لكى الكابتن فوزيه عايزاكى تحطى منه حبيتين بس فى أكل المفترى جوزك
زينات : أيه ده سم ..لأ يا ختى عايزانى أروح فى داهيه وعيالى يتشردوا
فتكات: حيلك حيلك سم أيه يا هبله أنتى ..ده ملين جامد جدا حيخلى صاحبنا يهر على نفسه.. بيدوه للحمير والجمال والبقر لما تكون مكتومه ياخد منه البنى آدم نص حبايه أنما فى حالة جوزك ياخد له حبيتين ثلاثة علشان يحوقوا في جتته
زينات على ضمانتك يا فتكات..ماتخفيش أنا والعيال بناخد منه ماتنسيش تحطيه فى الشوربه أو فى الملوخيه ..فوتك بعافيه

المغص
يتمطع حموده بعد الغداء : أكله جامده قوى بس طعم الملوخيه غريب شويه حاسس أن بطنى بتكركب
زينات : أنت خليت فيها ده أنت مسحت الطبق مسح
حموده وهو يتألم: عندى مغص جامد قوى... الأكل بتاعك ده فيه حاجه
زينات : ما أنا واكله أهو معاك أنا والعيال حصلنا حاجه ..يمكن من الرمرمه بره البيت ....قوللى أكلت أيه بسلامتك النهارده؟؟
حموده: أبدا زيى كل يوم... أربع سندوتشات فول وسندوتشين طعميه على بتنجان وبطاطس مهروسه
حموده وهو يتوجع يجرى إلى الحمام :آه أه..ويدخل الحمام ويغيب بالداخل فتقللق عليه زينات فتخبط على الباب..سى حموده ..سى حموددده
يرد من الداخل بصوت واهن ضعيف : عايزه أيه ياوش النصايب ..أنا مصارينى كلها نزلت
تبتسم زينات وهى تقول فى سرها أحسن أنشالله ينزل كرشك كله ..أجيب لك دكتور ..أمشى ياوليه أنتى وسيبينى فى حالى آه آه آيييييييي
يخرج حموده من الحمام ويعاود الدخول عشرات المرات حتى يهمد تماما ويتساند على الحائط بيد ويمسك بطنه بيد أخرى ويرتمى كالشوال على السرير ويغط فى نوم عميق يقطعه المغص ليجرى مرة أخرى إلى الحمام وزينات سعيدة وهى تعد على أصابعها مرات دخوله وتنتهز الفرصة وتخبط على جارتها فتكات
فتكات : أيه الأخبار يازيزى
زينات : فل يا فيفى ..دى المره ال45 أللى يدخل فيها الحمام
فنكات : قشطه ..مش قولت لك أن مفعوله أكيد دواء الحمير والبهايم
زينات: أسكتى ياختى الراجل كرشه نزل النص
فتكات : ولسه لما تكرريه معاه كل أسبوع مره ..حيخلى حموده المفش يفش وينزل النص وكده تتساوى الكفتين وتعرفى تديله على قرعته وتمشيه على العجين ما يلغبطوش
زينات بس صعبان عليا خالص وشه أصفر وصوته وطيييي خالص ومش قادر يفتح بؤه
فتكات : ما يصعبش عليكى غالى ..من بكره الصبح تنزلى التمرين عند الكابتن فوزى قصدى فوزيه
زينات : تتك أيه يا فتكات ..بس هى جايبه على فوزى خالص ههههه خخخخخخخخ
..المنيل جوزى يروح الشغل والعيال تنزل مدارسهم ..وأنا حمامه على التمرين
فتكات تمسك بيد زينات ويهتفوا سويا بنشوةالنصر : فليحيا الأتحاد النسائى..بالطول بالعرض حنجيب حموده الأرض ..يايايايعيش يعيششش

الحلقة رقم (5)
الحرب النفسيه
(فى صالة الجيم التى تعمل بها الكابتن فوزيه )
فوزيه: كفايه كده النهارده ..كل يوم حنزود ربع ساعه وحنركز على تمارين الدراعات والأرجل وبعد كده حنخش على التمرينات بالحديد لحد ما نقوى عضلاتك
زينات وهى سعيده : حاضر ياكابتن
فوزيه : حنبدأ مرحلة الحرب النفسيه من النهارده ..فتحى ودانك وأعملى أللى بقول عليه ..حاضر ياكابتن ..حتاخدى شوية الكتب دى والمجلات والجرايد أللى قدامك
زينات : أنا ما عنديش وقت أقرأهم
فوزيه : أنا مش عايزاكى تقرأيهم ..أنا عايزاكى تبعتريهم عندك فى الشقه وفى كل حته بيقعد فيها بسلامته جوزك ..ده كتاب كيف تقتلين زوجك ..وده كتاب أنواع السموم لأزالة الهموم ..وده كتاب أغرب الجرائم النسائيه للقضاء على الرجاله المفتريه ..ودى مجلة الحوادث تفتحيها على صفحه رقم4 فيها صورة الست أللى قطعت جوزها فى الهرم ..ودى شوية جرايد قديمه فيها حوادث من النوع ده
زينات : طب لو سألنى عن الكتب والمجلات دى أقوله أيه
فوزيه:تردى عليه بكل برود..لقيت نفسى فاضيه قولت أتثقف ومش عايزه نخنخه
ولا خوف خليكى بارده وأرسمى على وشك أبتسامه هادئه ...لو هلل أو قل أدبه أزغريله وبرقى وأمشى من قدامه وأقعدى أقرأى قى أى مجله أو كتاب ..فاهمه ولا أعيد تانى ؟؟
زينات : لو ضربنى أعمل أيه ؟؟
فوزيه : أقفى قدامه وماتهربيش وما تصرخيش وبصى جامد فى عينيه وأياكى دموعك تنزل أوتعيطى يبقى باظ التخطيط حتى لو تألمتى تعالى على نفسك شويه...وتجيلى بكره أعرف أيه اللى حصل وما تنسيش تشترى نص كيلو أكياس سوده... حقول لك بكره لما تجبيهم حتعملى بيهم أيه ..سلام

بداية الرعب
يعود( حموده المفش) من عمله فيفتح باب الشقه فيجد زينات تجلس فى الصاله وهى تتظاهر بأنها منهمكه فى القرايه ولا تلتفت إليه
حموده : الله الله ..أيه الثقافة أللى واخده حدها يابنت أمبابى قاعدة بتقرى ومش مجهزه الأكل مش عارفه أنى جاى دلوقتى قومى تتك داهيه تاخدك .
( تضع زينات الكتاب جانبا ولا ترد عليه وتقوم من مكانها لتعد له الغداء )
حموده: الوليه دى أتجننت ولا أيه.. أحوالك مش عجبانى اليومين دول يظهر عايزه تتلطشى عشان تفوقى (يلتقط الكتاب الذى تركته زينات ويقرأ عنوان الكتاب ..كيف تقتلين زوجك ) يانهار أبوكى أسود عايزه تقتلينى يابنت المجنونه ..لا دى زادت قوى يظهر أن حيكون النهارده آخر يوم من عمرك خدى تعالى هنا
( لا ترد عليه وتستمر فى وضع الأطباق على السفره..فيقبض عليها من قفاها ويستديرها لتكون فى مواجهته وجها لوجه
حموده :أنتى جيبتى الكتاب ده منين ..ومين أللى أدهولك ..عايزه تقتلينى يابنت الرفضى ده أنا حقطع من لحمك لو ما تكلمتيش ..ردى يابت ..أنت بتبرقى كده ليه
طب خدى ويضربها بالقلم فيألمها ولكنها تذكرت كلام الكابتن فوزيه فتتماسك ويضربها قلم آخر وهو مازال يمسك بها فتمسك يده وهى مركزه نظرها فى عينه
فيضطرب ..مالك يابت فيه أيه الله يخرب بيتك ما بتعيطيش ليه ..لالا فيه حاجه بتحصل من ورايا..أنطقى يابت وألا ح موتك. .مين أللى أداكى الكتاب ده ..أنطقى وما تبصليش بالطريقه دى ..تقوم زينات بدفع يد حموده بقوه لم يعهدها من قبل
وتتركه وهى تقول بصوت محشرج مخيف: الأكل عندك على الترابيزه
يقف حموده فى وسط الغرفه وهو يحدث نفسه ويتعجب من تصرفاتها ويقع نظره على باقى الكتب والمجلات والجرايد فيتصفحها وهو يصرخ كلما قرأ صفحه ويتخيل نفسه وهى تقطع فيه او تضع له السم فى الطعام
فيدخل عليها الغرفه ويجرها من يدها ويجلسها على السفره عنوه
حموده : كلى من الأكل ده يابت أمبابى علشان لو فيه حاجه تموتى وأخلص منك
زينات وهى تتلاعب به : أنا كلت وماليش نفس
حموده: عليا الطلاق ... حتاكلى حتاكلى وغصب عنك حتاكلى وألا حموتك
زينات تحدق فى عينه فتلاحظ أن الخوف بدأ يدخل فى قلبه : أنت خايف ياحموده
فتأكل لقمتين وتقول : آدينى آكلت أهه حصلى حاجه
حموده :لا ياروح مامتك ..دانتى حتاكلى الأكل كله وتشربى الميه أللى حطاها
زينات تنظرأليه فى برود وتستمر فى الأكل لتنهى على جميع الأطباق وتشرب
زينات : لسه خايف يا حموده
حموده : حشوف حيحصلك أيه كمان ساعة قومى من قدامى دلوقتى
تدخل زينات غرفتها وتجلس على السرير وتقوم بشغل التريكو ولا تعيره أدنى أهتمام ويظل يتابعها بعينيه وهى صامته وتحرك أبر التريكو بهدوء وهى ترسم على وجهها أبتسامة الأنتصار فقد أدخلت الرعب فى قلبه
يقوم حموده بلم الكتب والمجلات ويأخذها ويترك البيت وخرج وهو لايلوى على شيئ ليجلس على القهوة فى أنتظار مجيء صديقه عبده كجوال

الحلقة رقم( 6)
(يجلس حموده على القهوة وهو يتصفح الكتب والمجلات فى أنتظار مجيء عبده )
عبده: مش عوايدك تيجى بدرى ..وأيه الكتب والمجلات دى أنت بتتثقف من ورانا
حموده : شوفت الوليه مراتى بتقرأ أيه بنت المجنونه
عبده ينظر فى المجلات والكتب ويضحك: هههههه قول على نفسك يارحمن يارحيم القطه فتحت يا سطى وقليل لو خدنا عزاك اليومين أللى جايين
حموده : دى بت غلبانه ومخها طاقق ..بس نفسى أعرف مين أللى ورا الموضوع ده ..آه يا نارى ..لو أعرفه لكنت مسحته أسمه من الدنيا
عبده : مش هو ده المهم ياحدق ..المهم أن مراتك فتحت عنيها خلاص وقليل لو دبحتك وأنت نايم زى النسوان ما بتعمل اليومين دول ..نصحتك كتير يا صاحبى وأنت مابتسمعش الكلام ..غيرش الكلام الخايب بتاعك أكسر للست ضلع يطلع لها عشرين ضلع ..أشرب بقى يامعلم وأستلقى وعدك
حموده يتحسس رقبته وهو مرعوب من كلام عبده : تفتكر ياعبده أن زينات ممكن تعملها ..لا..لا.. ياراجل قول كلام غير ده
عبده : الست فاض بيها وممكن تعمل فيك أى حاجه ..وقولت لك بلاش تمد أيدك وتطول لسانك وخليك محترم ما فيش فايده..أنت قاعد على قنبله ممكن تنفجر فيك فى أى وقت وتعملك حوواشى
حموده : طب والعمل ياصاحبى ..أخلص عليها قبل ما تخلص عليا يعنى
عبده : مفيش فايده فيك ..خلصت عليها وبعدين حتروح من الحكومه فين ومن ربنا فين حيشنقوك أو تتسجن بقية عمرك وتتشرد عيالك ويتخرب بيتك
حموده : عايزنى أطلقها..بس أنا بحبها وما أقدرش أستغنى عنها
عبده : تطلقها أيه ياراجل ياتعبان أنت ..حتتطرد بره البيت وتقعد هى وعيالها فى الشقه..وحتاخد نفقه ومؤخر وعفشها وعليهم نفقة متعه كمان ..فووء ياحموده أنت عايش فى القرون الوسطى ..الحكومه دلوقتى واقفه فى صف النسوان ..حتاخد حقها منك حتاخده ولولا أنها ست غلبانه ومقطوعه من شجره لكانت طلقتك أو خلعتك يا خفيف
حموده : كركبت على دماغى كل البلاوى وأنا جايلك تشوف لى حل سديت السكك فى وشى ..قولى يا عبده يا خويا أعمل أيه
عبده : الأول نشوف النصيبه أللى مستنياك فى البيت أللى ممكن تخرطك زى الملوخيه ..لازم تهدى اللعب ياحموده وتسحب ناعم معاها وجرب تعاملها بحنيه وبذوق وشوف النتيجه ..لو ما أتعدلتش شوف لك أى حته أتاوى فيها لحد ما الست دى تهدأ شويه وبعدين صالحها وقول لها كلام حلو من بتاع زمان
حموده : بس أنا ما عرفش أقول كلام حلو يا عبده ..بأحس أنى روجلتى راحت
عبده : وهى رجولتك أنك تضربها وتهينها وتلعن سلسفين أبوها ..تبقى غلطان وما تعرفش أيه هى الرجوله ..الرجوله مش عافيه وفتونه وظلم الضعيف ..الرجوله أدب وأخلاق وعطف على الضعيف ومراعية أهل بيتك بالود والحنيه..فيها أيه لو قلت لمراتك كلمه حلوة ودلعتها وتشوف طلباتها وتريحها على الأخر
حموده : عايزنى أدلعها يا عبده ..النسوان لما بتتدلع بتركب على الراجل وتدلدل رجليها ..عايزنى أبقى حمار وخرونج على آخر الزمن
عبده : ييه مش عايز تفهم برضه ..الست أللى بتركب وتدلدل دى ست معذوره لأنها معاها راحل مالوش شخصيه وهى بتبقى ما عندهاش أصل ..أنما مراتك غلبانه وأصيله وأستحملتك السنين دى كلها.. وبتطبخلك وبتربى فى عيالك وصيناك ومنضفاك وواخده بالها من بيتها ..أيه بقى لزمته الضرب والأهانه وطولة اللسان..جرب أللى قولت لك عليه ومالكش دعوه وماتركبش دماغك أحسن تبقى أيه؟؟
حموده : عارف ..حوواشى ..أجرب وأشوف ..عليك نور
الحلقة رقم(7)
الأكياس السوده
فتكات : أيه الأخبار يازيزى
زينات وهى تتهلل فرحا : فل الفل يا فيفى ..كابتن فوزيه ميه/ ميه تصدقى أول مره أشوف حموده وهو مرعوب.. الجبان الندل
فتكات : كده كويس ..خلى بالك أنه حيسحب ناعم معاكى ..ما تدهوش الفرصة دى وتنامى النهارده فى أوضة العيال مش عايزاكى تحنى ويضحك عليكى حتى لوباس أديكى ورجليكى خليه يتربى شويه
زينات : دى الحكايه دى بياخدها بالعافيه وبالغصب ولو منعت نفسى ده ممكن يجنن أو يموتنى..لالالا..أنا خايفه
فتكات : يا خايبه ده السلاح السرى للمرأه.. الست الناصحه بتعرف تستخدمه صح تقدر تحقق بيه كل طلباتها بالمنع والقبول طالما معاها واحد ما عندوش دم..عارفه يابت حكاية العصايا والموزه..ما عرفش قولى..الراجل القرداتى لما ييجى يمرن القرد بتاعه يطلب منه يعمل عجين الفلاحه أو نوم العازب يقوم القرد يغلط أو يزرجن يقوم القرداتى ملسوعه بالخرزانه لحد مايعمل الحركه صح يقوم يديله الموزه فيعرف الفرق..يعنى أيه..يعنى مافيش موز لحموده لحين أشعار آخر
فهمتى ياموزه ياكلبوظه أنتى..فخمتو هههههههههه

فى صالة فوزيه للألعاب الرياضيه
فوزيه: أنتى بتتقدمى بسرعة يازينات أنا مبسوطه منك ..والنتيجه واضحه على وشك قدرتى ترعبى المفش ..جيبتى الأكياس معاكى ...أيوه أهه
شوفى ياستى خلى جوزك يشوفك وأنتى بتخبيهم فى أى حته ولما يسألك أعملى نفسك هبله وماتريحهوش وردى عليه ببرود وما يهمكيش منه هو كده أبتدى يستوى وعايزاكى تتقلى على الرز لما يتفلفل وحقولك بعد كده تعملى فيه أيه
ميعادنا بعد بكره وقتك أنتهى ياشابه
( تدخل زينات غرفة النوم وتخبئ خلفها لفة الأكياس وتقوم بوضعها فى الدولاب بين الهدوم فيتنبه حموده لهذه الحركه المريبه فيتركها تخرج ويقوم من السرير ويفتح الدولاب ويستخرج لفة الأكياس ويفتحها فيصرخ
حموده : زينات ..زينااات تعالى هنا بسرعة ..أيه الأكياس الكتير دى حطاها ليه هنا فيه أيه يابت أمبابى
زينات ببرود : كنت فى السوق النهارده لقتهم روخاص فاشترتهم
حموده : وحتعملى بيهم أيه يافالحه
زينات : أهم ينفعوا نحط فيه شندوتشات العيال نحطى فيهم لحمه جوه التلاجه الأمر مايسلمش أهم مايخسروش..ومخبياهم بعيد عن أيدين العيال فيها حاجه دى تخليك تصرخ وأنت مرعوب كده أيه أللى جرى لك يا سبعى..أنت خايف من أيه
حموده : حخاف من أيه أنا يهمنى من الحركات دى
زينات: حركات أيه هو أنا بعرف أعمل حركات ..نام نام ولا تحب أعمللك كوباية شاى تقيله تظبط بيها دماغك
حموده : مش عايز زفت ..مش عايز منك حاجه أخرجى وأقفلى الباب وراكى تتك الهم ( ثم يقوم حموده بأغلاق الباب بالمفتاح خلفها وهى تبتسم عند سماعها صوت المفتاح وهو يدور فى الكالون ..وتقول : رجاله تخاف ما تختشيش )
الحلقة رقم (8)
مرحلة الردع
يمر شهر وحموده فى حاله من الخوف والحذر ويحاول أن يتقرب من زينات ولكنها تتبع تعليمات فوزيه وفتكات وتنفذها بكل دقه مع مداومتها على التمارين فى صالة الألعاب وتأخذ الحقن التى وصفتها لها فوزيه فبدأت تظهر عليها علامات الصلابه وتتشكل العضلات وأحست بالقوة والعافية مع النظام الغذاء الصارم الذى تتبعه
فوزيه : تلات تشهر كمان يازينات وتقدرى تنافسى على بطولة كمال الأجسام الحريمى ..من النهارده نبتدى نتعلم على حركات المصارعة والأشتباك وحنبدأ بتعليمك الضربات المعجزه أللى تقدرى تشلى بيها حركة الخصم ..جاهزه ردى جوه
الحركه الأولى: الضرب بالقدم تحت الحزام ..كده بقوة يازينات..ده لو الخصم بعيد عنك بخطوات وتكون مفاجأة وبسرعة
الحركة التانيه : الضرب بالركبه تحت الحزام ..كده ..نشنى كويس ..وتتعمل فى حالة ألتحامك بالخصم
الحركة التالته تكون بالضغط على مفاصل القدم أو أحد الزراعين فى عكس أتجاه حركتهم الطبيعيه وكل ماتكون بقوة تجعل الخصم يقوم بالأستسلام كده ..برافو زينات أستمرى فى التمرين مع زميلتك وبكره نكمل حركات الرقبه والوجه والساقين
( تعود زينات يوما بعد التمرين وهى تشعر بأنها قد بدأت المشوار الصحيح لردع حموده المفش وتتحسس عضلاتها التى نمت وأستدارت وأنتفخت كعضلات الرجال وهى تمشى بقوة وخفه ورشاقه ولا أجدعها شاب..وتفتح باب الشقة فتجد حموده يجلس فى أنتظارها وهو يتطاير من عينه الشر)
حموده : كنتى فين ياهانم
زينات بتحدى: كنت بأقضى شوية مشواير وزيارات..فيها حاجه دى
حموده : ردى كويس يابنت الـ...
زينات : لم لسانك الزفر ده لأقطعهولك
حموده: أنتى بتردى عليا يابت طب تعالى بقى
زينات : خليك عندك ياحموده أحسن مش حيحصلك طيب
حموده : فرجينى كده حتعملى أيه ؟؟
زينات : طب أستنى عليا لما أقلع وأجيلك
حموده يضحك : ماتلعبيش بعداد عمرك يابنت المجنونه
زينات بعد أن خلعت ملابسها وأرتدت فانله نصف كم وبنطلون ترننج وقفت فى أمامه فى وضع الأستعداد وهى تلف يدها يمينا ويسارا أمام وجهها كلاعبى الكارتيه
حموده : يانهار أسود أيه ياوليه العضلات دى طلعت لك أمتى ..عامله فيها راجل
زينات : جاهز ياحموده ..جاهز ياروح أمك
زينات تباغت حموده بضربه بكل قوتها بالشالوت تحت الحزام فيصرخ من شدة الألم ثم تهجم عليه وتأخذ ذراعه فى حركة قيادة وتضغط على مفصل الكوع بقوة وهو يتوجع ولا يستطيع القيام من الأرض ..حتحترم نفسك ولا لأ ..أكسر دراعك
حمودة يتلوى من الألم ..ويرفع ذراعه مستسلما..خلاص خلاص حتكسرى دراعى يابنت الكـ...............لـــــــب
ثم تقوم بضربه بالبوكس فى وجهه لتطرحه أرضا وتتركه وهى تنفض يدها منه ..البوكس ده علشان طولة لسانك (طاخ ..أآى)
زينات : من هنا ورايح مش عايزه أسمع صوتك وألا حتكون نهايتك أنت وعداد عمرك على أيدى..ولو حاولت تترازل وشيطانك لعب فى مخك وتمد أيدك حخلص عليك
عايز تعيش بأحترامك أهلا وسهلا ..مش عايز فكل يوم منده ..بس دى حاجه كده على ما قسم يا مفش
حموده وهو ينظر إليها بذهول : أنتى مين ياست أنتى ..زينات راحت فين
زينات : زينات ماتت خلاص وأنت أللى موتها وأنا باخد بتارها..باخد تار سنين الذل والبهدله أللى شوفتهم على أديك لحد ماتتوب وتحترم نفسك سامع ولا تحب تشوف
حموده يجلس مذهول وهو لا يصدق ما حدث ويخبط وجهه بيده ليتأكد بانه صاحى ولا يحلم وهو يردد: زينات أتقلبت راجل . .زينات أتقلبت راجل. زينات أتقلبت راجل
يا نهار أسود يا نهار أسود أنا فى حلم ولا علم يا فضحيتك يا حموده
زينات : قوم ياراجل وبطل لطم على وشك زى الستات أغسل وشك وأدخل جوه عشان أحطلك السم الهارى ...مش عايز آكل ..أحسن وفرت
الحلقه رقم (9)
ثورة التصحيح

تستمر زينات فى متابعة التمارين والتعلم على فنون القتال على يد الكابتن فوزيه وتستطيع أن تردع حموده كلما أراد أن تسول له نفسه بمد يده عليها
فتنكسر نفسه ويتحول من وحش هائج إلى حمل وديع ينفذ ما تأمر به زينات بدون تردد
وبعد سنه من أخضاع حموده المفش ترتدى زينات ملابسها وتستعد للخروج زينات : حموده ..نعم يازينات أأمرى ياحبيبتى هو أنتى خارجه ..أنا مش قلت لك أوعى تسأل السؤال ده تأنى ..حاضر يازينات ..أنا خارجه عند ماتش كوندفو على البطوله ..عايزاك تذاكر للعيال وتراجع دروسهم وبعد كده تحميهم وتعشيهم وبعد ماتنيمهم عندك فى الحمام حتتين غسيل أتسلى فيهم
حموده : حاضر يازينات مش حتتعشى معايا
زينات: لأ..أتعشى أنت وعايزه آجى ألاقيك نايم مش عايز أشوف وشك( ثم تقوم بضربه على بطنه) ..ألعب شوية رياضه علشان تنزل القرف ده أصلك بتاكل فى قته محلوله ..ما تنساش تنزل تشترى لبن وبيض وعيش للفطار والعشا..ثم تخرج وتعود مره أخرى.. ما تنساش تغسل المواعين وتنشر الغسيل وتغسل رجليك قبل ماتنام
حموده : حاضر يازينات تروحى وتيجى بالسلامه ومعاكى الكاس ياحبيبتى
زينات : أف أف مش عايزه أسمع كلمة حبيبتى دى تانى بتجيبلى العصبى
حموده : حاضر يا حبيبتى ...أف غبى أنا مش عارفه مستحملاك أزاى.. غور من قدامى الساعه دى..صدق من سماك المفش


الذكرى الثانية لثورة التصحيح
تدعو زينات فتكات وفوزيه للأحتفال بذكرى الأنتصار على حموده المفش فيجتمعوا جميعا حول تورته بها شمعتان وهم يتسامرون ويضحكون ويخرج عليهم حموده بعد أن قام بأرتداء ملابس حريمى وعمل مكياج صارخ وباروكه وهو يحمل صنيه عليها فناجبن القهوه ويمشى يتمخطر أمامهن ويهز فى نفسه كحال النساء ويمضغ لبانه فى فمه ثم يضع الفناجين أمامهن
حموده : القهوة يابهوات
فوزيه وهى تشهق : مين دى!!
حموده : خدامتك حميده ...حموده سابقا قهوتك أيه ياكابتن( فوزى) !!
فتكات : أيه أللى عامله الراجل ده فى نفسه
حموده: عيب كده ياكابتن( فتك )..أنا راجل برضه دا أنتم الرجاله وستين رجاله قهوتك أيه يا جميل يامتختخ أنت!!
زينات : حموده أيه أللى جرى لك أنت أتجننت
حموده : أنا بعقلى أهه ياكابتن (زين )يا جوزى يا حبيبى..خد راحتك أنت وأصحابك على ما أرضع العيال وأجهز لكم العشا..والله ياجماعة منورين بس مالكمش حق تيجوا كده من غير ستاتكم .. كانوا على الأقل ألاقى حد من الحريم أرغى معاه هئ هئ هئ (ضحكه رقيعه )
زينات وهى تصرخ : أتعدل ياحموده وبطل حركات الجنان دى وألا ..
حموده : وألا أيه ؟؟ تضربنى قدام صحابك ياكابتن ..ضرب الحبيب زى أكل الزبيب
زينات يصعب عليها حال حموده فتبكى وهى تقول : أنتم السبب فى ضياع الراجل ده منى أنتوا السبب أتفضلوا من غير مطرود ..أطلعوا بره... بره
فوزيه وهى خارجه ومعها فتكات : الحق علينا أن أحنا ساعدناكى أنك تكسرى شوكته ونخليكى بنى آدمه
زينات : بره بره ياريتنى ماكنت سمعت كلامكم ياريتنى مامشيت وراكم ضيعتوا الراجل ياظلمه
زينات تحتضن حموده وهى تقول : أللى أكسر يتصلح ياحبيبى
حموده : كل حاجه يازينات ممكن تتصلح ألا الراجل لو كسرته مراته
النــهــايــه

منخار حبيبى

منخار حبيبى

المقدمه : التضحيه هى دليل الحب ..فعندما يحب الأنسان حب كبيرتكون تضحيته أكبر بحجم ومقاس هذا الحب ولا يتوانى أن يقدم أعز ما يملك
من أجل حبيبه
أنها قصة منخار حبيبى التى أبكت وأضحكت ملايين العشاق..وكانت مشروع التخرج للعبد لله من معهد السينما عام 2008..ولكنها لم ترى النور فقد رفضت اللجنه عرضها لأنها تسخر بطريقة مباشرة غير مباشرة
من بعض أعضاء اللجنه الموقره واللجنه الأولمبيه المصريه..ولكنى قررت عرضها فى رطلين مخ بقهوة كتكوت بالرغم من أنوفهم جميعا ..طفى النور ياجابر ووزع اللب والسودانى وماتنساش تسيب لى شويه
وأعمل حساب الناضورجيه
الحلقة رقم (1 )

المشهد الأول
منزل شعبى متواضع تجلس هدى على الكنبه وهى تبكى وتغطى مناخيرها بمنديل كلينكس
الأب (الحاج سيد ) يدخل من باب الشقه وهو مهموم ويجلس بجوار هدى
هدى : عملت أيه يابابا اللجنه.. وافقت؟؟
سيد: وافقت من حيث المبدأ بتعيينك مذيعة فى الأذاعة ولم توافق على تتعيينك فى التليفزيون ألا بعد ما تعملى العمليه ياهدى يابنتى
هدى : علشا ن مناخيرى برضه (الأب يهز رأسه فى أسى )
الأب وهو يطيب خاطرها : ماتزعليش يابنتى ..دى حاجة بتاعة ربنا ومالناش دخل فيها..وبعدين دى حاجة وراثيه فى العيله..وأحنا مشهورين بيها عيلة أبو منخر أكبر عيله فى الصعيد زى عيلة أبو العينين وعيلة أبو ودان وعيلة أبوشنب وعيلة شعراوى وأبو الروس والقفا وبؤوه وأبو سنه وأبو أصبع وأبو مصران وأبوكف وأبو ضهر وغيرهم كتير يابنتى
هدى : يعنى مستقبلى يضيع علشان عيلة أبو منخر وكان لازم حضرتك تتجوزلى من نفس العيله ومين من بنت عمك.. (منخر السوهاجى) مش قادر كنت تتجوز واحده مارخرها قد النبقه ولا حتى قد البلحه
الأم وهى غاضبه : أختشى ياهدى وخلى عندك دم هو كان أبوكى حترضى بيه أى واحده بمارخيره أللى قد كوز الدره ألا واحده من العيله
الأب : ماتعيبيش يا صفيه يابنت منخر السوهاجى علشان مناخيرك قد البطاطسيه يعنى.. شايفه نفسك.. وأنتى كنتى تطولى تتجوزى واحد زيى
صفيه : أسكت ما تقلبش المواجع العيال كلها طالعه شكلك ياسيد كل عيل مناخيره بتخبط فى اللى جنبه
سيد : سبونا من الكلام ده دلوقتى لازم نشوف حل (لهدى) لازم نعملها عملية تجميل عشان مستقبلها
هدى : أنا قرأت النهارده فى الجرنان أفتتاح أكبر مستشفى للتجميل فى مصر وفيها تخصص جديد لتصليح عيوب الأنف
سيد : من بكره ياهدى نروح المستشقى ونشوف الدكتور بتاع التخصص ده يمكن ربنا يكرمك على أيديه قولى يارب
*********
الدكتور نادر بؤوه
أخصائى جراحة تجميل الأنف والشفتين
المنظر الثانى
فى مستشفى التجميل وفى غرفة الكشف
دكتور نادر: أوه فانتستيك ميسز هدى مراخيرك من النوع المروحى النادر عايزه مجهود كبير لتصليحها
سيد : يعنى فيه أمل يادكتور
نادر : ربنا يسهل ..لأننا محتاجين نشيل المنخار بالكامل وتصليح عضمة الوجه لتناسب المراخير الجديده وياريت تلاقوا متبرعين بأنوفهم لوفشلت العمليه
سيد : ماتشلش هم يادكتور عيلتنا كلها مافيهاش غير منخار وكمان منخار محترم.. حضرتك ما سمعتش عن عيلة منخر فى الصعيد
نادر :فانتستيك عيله منخر ده الواحد كده يقدر ياخد دكتوراه من عندكم وعلى كل حال الأسبوع ده حناخده تحليلات للأنسجه أللى تتناسب مع أنسجة هدى
سيد : أنا مناخيرى ومناخير أمها وأخوتها تحت أمرك يادكتور ولو عايز أبعت أجيب 30 أو40 شحط من عيلتنا فى البلد أنت تأمر المهم هدى تعمل العمليه و تخش التليفزيون
نادر : حنبدأ من العيله أولا ..تيجى بكره أنت والمدام والأولاد لأخذ العينات
منكم وتتحجز هدى عندنا لعمل الرسومات اللازمه ومطابقتها مع وجهها
أنت نفسك ياحاج سيد عايز تتصلح مناخيرك
سيد : أنا خلاص يادكتور الناس خدت عليها ومش مضيقانى فى حاجه والله حسن الختام
نادر : ماتيجى أنت وولادك ومراتك أخدكم شروه واحده حعملكم تخفيض هايل حتحس بتغيير كبير فى حياتك صدقنى
سيد : خلص بس المارخير أللى قدامك ونشوف النتيجه

الأعداد والتصميم
يقوم الدكتور نادر ومساعديه بتصوير هدى ووضع صورتها على الكمبيوتر وتجربة المنخار المناسب لوجهها حتى تم الأتفاق على المنخار وبموافقة هدى بعد أن أستعرضت كتالوجات الأنوف الجميله وأختارت المنخار السمبتيك لنجمة هوليود مارلين مانرو
نادر : فين نتيجة تحاليل الأنسجه لعيلة هدى يادكتور
دكتور المعمل : للأسف الأنسجه مش مطابقه لأنها من النوع النادر..
نادر : وبعدين هاتوا أبوها يشوف لنا حل
أبوها موجود بره يادكتور
سيد : خير يادكتور
نادر : أنسجتكم مش مطابقه لأنسجة هدى ..أتصرف ياحاج( سيد) مش بتقول أنكم من عيلة منخر فى الصعيد هات لنا أكبر عدد من العيله نشوفهم ونختار المناخير المناسبه وفرصة للمتبرع نصلح له مناخيره
سيد : أدينى مهلة تلات أربع تيام أسافر البلد أجيب لك شويه من قرايبنا
نادر :ما تتأخرش ياعم سيد عن كده...ربنا يسهل
فى الصعيد
المنظر الرابع
قطار الصعيد والحاج سيد يودع عائلته ثم الأنتقال لمنزل ريفى فى دوار العمده
يسافر عم سيد إلى بلدهم فى الصعيد كفر أبو منخار ويقابل أبن عمه العمده ويشرح له الموضوع..
العمده : بسيطه ياحاج سيد أحنا علينا ننشر الخبر فى العيله ونشوف مين عايز يتبرع بجزء من مناخيره لبنتك وعلى الله التساهيل ياواد عمى
يمر يوم وأتنين ولم يتقدم أى متبرع..يقلق عم سيد
سيد : وبعدين ياعمده أنا أللى كنت فاكر أن بلديتنا كلهم حييجوا معايا
ده مفيش ولا واحد أو واحده راضى يقرب من الدوار هو فيه أيه ياعيلة منخر السوهاجى.. فرحانين بمناخيركم قوى بلا نيله
العمده : كل حى حر فى مناخيره ياسيد ياخويا..وعلى كل حال بكره الجمعة حنخلى سيدنا يكلم الناس بعد الصلاة يمكن تلاقى حد ييجى معاك مصر
يتبع

الحلقة رقم(2 )

المنظر الخامس
فى ساحة مسجد القريه
بعد أنتهاء الصلاة وقف سيدنا وطلب من المصلين بعدم مغادرة المسجد وطلب منهم الوقوف بجانب بنت عم سيد قريبهم فى محنتها والتبرع بجزء صغير من المنخار لتكتمل العمليه
الشيخ: كان الله فى عون العبد مادام العبد فى عون أخيه وأنا شايف قدامى ماشاء الله مفيش ولا أكبر ولا أضخم من مناخيركم يابنى منخر الكرام فمدوا يد العون لأخيكم سيد وأبنته جازاكم الله خيرا
يوسف المنخراوى :أيش ضمنى ياعم الشيخ أن مناخيرى حتفضل سليمه بعد العمليه مش ممكن مناخيرى تروح خالص وأعيش مشوه بقية عمرى
همهمه بين الحضور ومؤيدين لكلامه..أيوه صوح..أيش يضمنا يامولانا
صادق المنخراوى : فيها أيه يعنى بنتك لوفضلت بمناخيرها ياحاج سيد زى ماهيه..ماهو بناتنا وستتنا كل واحده مناخيرها قد فردة المداس ومبسوطين وعايشين تمام التمام ما حدش منهم أشتكى من مناخيره
صوت آخر : ده حرام ياسيدنا تغيير خلقة ربنا
الشيخ : يعنى مش موافقين ... (فى نفس واحد )..مش موافقين
يعود عم سيد من الصعيد وهو حزين بعد أن خذلوه أبناء بلده وعمومته فلم يجد متطوع واحد ولو بالفلوس ليحضر معه إلى القاهره

المنظر السادس
فى المستشفى ..فى مكتب الدكتور نادر
ويذهب عم سيد إلى المستشفى لمقابلة الدكتور نادر ويحكى له قصة فشله فى البلد
نادر : العمليه بتاعة بنتك دى مهمه جدا بالنسبه لى هى تحدى بالنسبه لى فى أجراء جراحه على هذا النوع من الأنوف ولا يوجد أمامنا غير المسابقه السنويه أللى بتنظمها جمعية الأنف أللولبى
سيد : مسابقة ؟؟ ..
نادر : مسابقة أكبر مراخير فى مصر وحتكون جوايزها 20 ألف جنيه جايزه أولى وحنعلن عن هذه المسابقة فى جميع وسائل الأعلام وسنأكد بأننا سنقوم بأجراء جراحة تجميل للفائز وبالمجان.. وفرصة نجرى فيها تحليلات لأكبر عدد من المتقدمين لنختار الشخص المناسب لأجراء عملية هدى
سيد: فكره جهنميه وأنا عليا كل مصاريف المسابقه يادكتور ..توكلنا على الله..ربنا يجعلك فى كل خطوه مارخير
يوم المسابقه
المنظر السابع
تدور الكاميرا لتصور الأعداد الحاشده من المتسابقين داخل وخارج المستشفى ويتم أخذ مناظر (كلوز أب ) على وجوه وأنوف المتسابقين
نادر : ياه أنا ماكنتش متخيل العدد الكبير ده من المتقدمين للمسابقة ستات وبنات ورجاله وشباب وشيوخ وأطفال كمان.. القاعه مش مكفياهم دول محاصرين المستشفى وفارشين فى الشوارع أللى حولينا ومعطلين المرور
د. نعمان (نائب المدير ): والعمل يادكتور نادر
نادر :أحنا نقسمهم على خمس تيام وبعدين نعمل تصفيات لنصل للفائز
نعمان :أوكي حخليهم يعلنوا الكلام ده فى الميكروفون ويمشوا الناس الزياده ونشتغل على الموجودين فى القاعه دلوقتى..شوفولى مدير الأمن

وبعد ساعه يحضر مدير أمن المستشفى ممزق الثياب ومحمول على نقاله
فوزى مدير الأمن وهو يتوجع : قطعونى يادكتور لما حاولت أمشيهم
عجنونى بين مناخيرهم.. عمرك شوفت حد يضربك بالبوكس بمارخيره فى عينك ...أتصل بالبوليس أحسن حيكسروا المستشفى
نادر : ألوه بوليس النجده لوسمحتم ألحقونا المستشفى محاصره وفيه خطر على حياتنا ..يا تلحقونا يا متلحقوناش ..أنا مين ..أنا الدكتور نادر بؤوه مدير المستشفى..بؤوه ..أيوه بؤوه ياسيدى فيها حاجه دى..حالا حنكون عندك
أستطاع البوليس تفريق الحشود الغاضبه بعد أن تم تعليق يافطه على باب المستشفى بالأحرف الأبجديه موزعه على مدار الأيام الخمسه
عملية الفرز
النظر الثامن
قاعة مسرح وعلى المنصة تجلس هيئة التحكيم والدكتور نادر فى الصدارة وأمامه الميكرفون
نادر : اللجنه جاهزه ..المحكمين فى أماكنهم..جاهزين يادكتور
لو سمحتم الأخوة مندوبى وكالات الأنباء والتليفزيون فى أماكنكم ....
بسم الله الرحمن الرحيم
سنبدأ المسابقه بصعود عشره عشره من المتسابقين الذين تم نجاحهم فى الأدوار التمهيديه والدور الستاشرعلى خشبة المسرح والمرور أولا أمام لجنة التحكيم لمراجعة مقاييس الأنف وسنبدأ بالمقاييس المتوسطه 30 سم مكعب ثم 60 ثم 100 ثم السوبر ثم الأعلى فالأعلى مع أستعراض مواهب كل منهم لمنحه درجه من ميه ..موسيقى يبدأ العرض الأن هدوء من فضلكم
يقف المتسابقين طابور خلف مقياس الأنف الألكترونى ويدخل المتسابق مناخيره فيه فتظهر قرائة العداد بالحجم والمقاسات..ويعلن المذيع الداخلى أسم ورقم المتسابق وحجم أنفه والطول والعرض ..مع تصفيق الحضور
ويدخل أحد المتسابقين أنفه فيتوقف العداد الألكترونى عن العد مع صمت تام فى القاعة مع همهمه صامته لتوقف المسابقه
نادر : شوف المشكله دى يابشمهندس حسين شوف الجهاز ماله لوسمحت صلحه بسرعه عندنا لسه ناس كتير التليفزيون بيصور أحنا على الهوا يا جماعه
حسين يلف خلف الجهاز فيجد مناخير ضخمه محشوره فى الجهاز
مين صاحب المناخير دى ..صاحبها واقف هناك عند الباب..ده يادوبك دخل أولها ولسه باقى 2متر
حسين : مناخير الراجل أتحشرت ومش عايزه تطلع يادكتور شدوا معايا يارجاله
يفشل الحاضرين فى تخليص مناخير المتسابق من الجهاز وهو يقف يضحك وكلما زاد الضحك يهتز الجهاز فوق الأرض
حسين : أنت أسمك أيه ياجدع أنت ..محسوبك( منخار شان) بطل العالم فى رفعة النطر بالمناخير والحاصل على الميداليه الذهبيه الوحيده لمصر فى دورة بكين الأوليمبيكيه
منخار شان :أبعد أنت وأللى معاك بعيد وفضوا القاعة من الناس عشان الجهاز بتاعكم ده حطيره دلوقتى حعد من واحد لعشره ماشوفش مخلوق هنا
تخلى القاعه ويتعازم (منخار شان) فيرفع الجهاز من الأرض ويلف به كام لفه ويطلقه كالطلقه فينزل على الأرض ستين حته وسط دهشة الحاضرين
نادر: الله أكبر أخيرا وجدنا الفائز بالجائزة تصفيق حاد ..ينطلق صوت جهورى ..لا أوقف المسابقه لقد وصل الأقوى والأعظم فينفتح شباك فى القاعة على مصراعيه لتدخل مناخير طويله ومعلق عليها يافطه مكتوب عليها
صاحب هذة المناخير سيصل بعد ساعة
التوقيع
المنخار الأعظم

الحلقة رقم (3 )
المنظر التاسع
فى الصاله المغلقة بأستاد القاهره
نادر :وبما أنه قد ظهر منافس جديد( لمنخار شان) فلزما ولابد من عمل تصفيه بين المتسابقين لمنح الفائز قيمة الجائزه وستكون حلبة المصارعة هى الفيصل بينهم ومن يستطيع أن يضع مناخير منافسه الأرض لمدة دقيقة يعتبر هو الفائز ...تصفيق حاد
يقف المتصارعين وجها لوجه على بساط الحلبه وبينهم الحكم ويقوما بالتصافح بالمناخير ويقف الحكم بينهم يذكرهم بشروط المسابقه بعدم أستخدام الأيدى أو الأرجل أو العض أو شد الشعر وتستخدم المناخير فقط فى الصراع والفائز هو من يستطيع تثبيت مناخير منافسه على البساط لمدة دقيقه ..والمبارة من تلات جولات كل جوله 3 دقائق مستعدين موافقين على الشروط ردى جو..الجوله الأولى
تتشابك المناخير فى قوة ويرتفع صوت المشجعين لكلا الطرفين (بالطول بالعرض حنجيب مناخيره الأرض) وتفوق المنخار الأعظم على منافسه فى الجوله الأولى والثانيه ولكن( منخار شان) كان خفيف الحركة وسريع ويقوم بحركات بهلوانيه رشيقه بمنخاره
وجائت الجوله الثالثه والأخيره فينقض( منخار شان )على (المنخار الأعظم) وبحركة بهلونيه سريعه يلف منخاره على منخار( المنخار الأعظم) ويضغط بقوة ويرفعه فى حركة نطر تتطرحه أرضا ويقوم بتثبيت المنخار لمدة دقيقة مع صيحات المشجعين (منخار شان يا أبهه.... أيه العظمه دى كلها ) ويقف حكم المبارة فى منتصف البساط ويمسك منخارهما بيديه ثم يرفع منخار ( منخار شان) عاليا ليعلن فوزه الساحق بتثبيت المنخار باللفه الفنيه ويجرى منخار شان حول التراك ليحيى الجماهير ويتلقى القبلات على منخاره الجبار
ويتقدم للمنصة للتويج وأستلام الجائزه والميداليه التذكاريه من رئيس الأتحاد المصرى للمصارعة بالمناخير التى تعلق فى منخاره تكريما له وتقوم هدى بوضع الميداليه بمنخار ( منخارشاه ) وهى تنظر إليه نظرة حب وأعجاب فيرفرف كيوبيد بينهم وتقع نظرة الحب فى قلب( منخار شان) فيهز لها منخاره تعبيرا عن أعجابه وحبه لها فيهتز منخار (هدى) طربا ردا على تحية الأعجاب
تضحية منخار شان

(عندما يجمع الحب بين منخارين تهون المصاعب فى سبيل هذا الحب)
المنظر العاشر
فى أحد الكازينوهات على ضفاف النيل ساعة مغربيه
منخار شان : أنا مستعد أضحى بمناخيرى كلها من أجل أسعادك ياهدى
هدى : لا ياحبيبى فمنخارك عزيز عليا قوى ويكفينى فخرا أنى أرتبط بمنخار عالمى مثلك... يغور الشغل فى التليفزيون يا حبى من أجلك
منخار : أنا سعيد أن أقدم لك جزء عزيز عليا عربونا لحبنا
هدى : منخارك تحتاجه مصر فى الألعاب الأولمبيه بعد الفشل فى جميع اللعبات الفرديه والجماعيه.. أنت بطل قومى أوليمبيكى فلا يجوز أن أحرمك من البطوله ومشجعينك ومعجبينك
منخار: كله يهون من أجلك يا حبيبتى
هدى : أنت أنسان رقيق المشاعر ورومانسى يامنخر ..أنا خلاص مش عايزه أعمل العمليه وكفايه أن أرتبط بأنسان عظيم زيك
منخار : أرجوكى ياهدى أقبلى تضحيتى عربونا صادقا لحبنا فقطعة صغيرة منها لم تؤثر فيه أطلاقا أنشالله ياخدوا نص متر منها.. أريد أن أترك الساحة الرياضيه وأنا فى قمة مجدى وأفتح الطريق لمناخير شابه
تكمل المشوار وسأنضم لعالم التدريب أو التعليق وسأرشح نفسى فى الأتحاد المصرى لمصارعة المناخير
هدى : يا حبيبى يامنخورى ..ياحبيبتى يامنخورتى.. وتتلاقى مناخرهما فى لحظة حب رائعه والشمس فى لحظة الغروب وهى تسقط شعاعها الأحمر القانى على صفحة النيل مع تغريد الكروان وزقزقة العصافير
المنظر الحادى عشر
فى مستشفى الدكتور نادر بوؤه
وهو يقوم بفك الشاش والضمادات من على وجه هدى وتقف عائلتها من حوله ومعهم( منخار شان) وهو يربط مناخيره بالشاش بعد أستئصال جزء كبير منها..والكل فى لحظة ترقب ليشاهد منظرها الجديد والكل يدعو لها بالشفاء والنجاح..وتترقرق الدموع على وجه منخار شان وهو يشاهد هدى بوجهها الجديد جميلة كالبدر ويحضر الدكتور نادر المرآه لترى هدى شكلها بعد العمليه ..وينسحب منخار شان بهدوء من الغرفه قبل أن تفتح هدى عينيها
نادر : فتحى عينيكى ياهدى وقولى أيه رأيك !!
تفتح هدى عينبها ببطأ ثم تغلقها مرة أخرى ثم تفتحها ثانيه وهى تصرخ صرخات الفرح والكل من حولها يبكون ويقبولونها ويباركون ويحمدون الله على نجاح العمليه ووسط هذه الفرحة والهرج والمرج تبحث هدى بعينيها عن منخار شان الذى أختفى
هدى : فين منخار شان ..فين حبيبى فين منخار ..كان موجود هنا دلوقتى
دوروا عليه هاتولى منخار شان هاتولى حبيبى ..أنا ماكنتش عايزه العمليه أنا عايزه حبيبى ..وهى تبكى بحرقة
المنظر الثانى عشر
هدى تقف بظهرها للكاميرا وهى تنظر من خلف زجاج نافذة غرفتها بالمستشفى وتتعلق بالستاره وهى تشاور بيدها لوداع منخار شان الخارج من باب المستشفى وتظل الكاميرا متابعاه حتى يتضائل ويختفى
وهى تتحامل على نفسها وتمسك منخارها الجديد وهى تبكى
.....الوداع ياحبيبى ...الوداع يامنخارى المنقذ....الوداع ياتوأم روحى
ثم تسقط مغشيا عليها
وتخرج النهايه من تحت السرير ويتبعها أسماء الكاست( العاملين والممثلين والمصورين والديكور والمكياج والملابس وكل من عدى من أمام الأستوديو أوشرب كوباية شاى )
النـــــــــهـــــــــــــايـــــــة

أسرة الفيلم تقدم الشكر والتقدير لكل من عوانها فى أتمام
هذا العمل الفنى المتواضع
وتخص بالشكر كل من مدير أمن القاهرة
وأدارة الأستاد وأتحاد مصارعة المناخير
ومستشفى الدكتور بؤوه
مدير وهيئة تمريض وعمال البوفيه
كما تخص بالشكر عائلة سيد منخر السوهاجى
فرد فرد مناخير مناخير
والمعلم عصفور صاحب المقلاه
وإلى اللقاء فى عمل فنى جديد

ملحوظه هامه جدا جدا : أنا مش خريج معهد السينما ولا المسرح ولا التليفزيون وليس لى علاقة بهما من قريب أو بعيد... اللهم سوى الجلوس فى مقاعد المتفرجين
نور النور ياجابر

أحلام سعيد وماجده

الحلقة الأولى

سعيد : آى أى فيه أيه ياماجده

ماجده : أصحى يا فالح مين( فاتن )أللى عمال تنادى عليها وأنت نايم

بتحب عليا ياسعيد ..يالهوى .. يلهوى ..بعد ده كله نايم بتحلم لى بالستات

قوم قول لى مين فاتن دى ..عارف لو ما قلتش حيجرالك أيه ..حخنقك وأكتم نفسك بالمخده وأخلص منك

سعيد : أبعدى ياوليه المخده دى عن وشى حتخنق يا بنت المجنونه

ماجده : أتعدل كده وأحكى لى مين فاتن دى أن ما سميتك وخلصت منك

ما بقاش أنا ماجده ..كل يوم عمال تحلم لى بأسم شكل أمبارح كانت سعاد وأول كانت ثناء وأول أول كانت سميره وغيرها وغيرها ..هو فيه أيه ياراجل كل الستات دى بتعرفها أمتى وفين ؟ أرر وأعترف يا فلاتى ياراجل ياهلس قول

سعيد :أبعدى أيديكى عنى وخلينى أروح الحمام الأول

ماجده : مفيش مرواح الحمام ألا لما تحكى لى مين فاتن دى

سعيد : مش قادر يا ماجده حرام عليكى أنا على آخريى حعملها على نفسى

ماجده : برضه مش حسيبك ألا لما تقول

سعيد وهو يفلفص من أيدين ماجده التى كبست بكل وزنها على صدره

حقول كل حاجه بس سيبينى

يجرى سعيد على الحمام ويغلق الباب خلفه..ووقفت ماجده على الباب فى أنتظاره

ماجده : أنت فاكرك أنك هربت أنشالله تقعد جوه لحد بالليل أنا قاعدالك ..وأحضرت كرسى وجلست أمام باب الحمام وهى تسن السكاكين

سعيد : أيه الصوت ده ياماجده

ماجده من الخارج : أنا بسن السكاكين والساطور ياحبيبى

سعيد : ليه ياماجده أحنا ماعندناش لحمه فى التلاجه

ماجده : بس عندنا لحمه فى الحمام أن ما أقطعتك كباب حلة وشويت ريشك وفرمتك

سعيد : السلاح يطول ياماجده ..حتودى نفسك فى داهيه عشان حتت حلم

ماجده : هو حلم واحد يامجرم د أنت شغال أحلام بقالك أكتر من ست أشهر وكل يوم تنادى على واحده شكل..أن ماوريتك ياسعيد بس أطلع

سعيد من الداخل : أنا مريض يا ماجده حتى أسألى الدكتور( بسيونى )

ماجده : بسيونى..آلهى يولع بجاز هو كمان ..أنا مش عارفه الدواء أللى كاتبهولك خلاك زيدت فيها بدل ماكان حلم واحد فى الليله أصبح حلمين تلاته وأنا بأتفرس جنبك ..شهل أطلع أحسن لك

سعيد : حرام عليكى ياماجده عايز أروح الشغل بقالى يومين غايب وحيخصموا من الماهيه وقليل ما كان فيها تحقيق

ماجده: أنشالله يخصموا الماهيه كلها ويحولوا أوراقك على المفتى قادر ياكريم..كفايه مستحملاك ومستحمله قرف عيالك وعماله كل يوم أغير فى شكلى وفى لبسى زى ما قالى صخام البرك دكتور الهم والغم بتاعك.. أنك فى يوم ياندل تحلم وتنادى أسم ماجده..مفيش فايده أطلع بره أحسن لك (سعيد يفتح الباب قليلا وهو يقف خلفه)

ماجده :أطلع يا سعيد ماتخلنيش أتهور وأهد الحمام على دماغك

سعيد : أهدى بس ياماجده وأنا حقول لك كل حاجه

ماجده : طب أطلع خلصنى عشان عايزه الحمام

تدخل ماجده الحمام ويسرع سعيد إلى غرفة النوم ليأخذ ملابسه( فينسى جزمته وينزل وهو لابس الشبشب) ويفر خارج الشقه ليكمل أرتدائها على السلم فيصادف خروج مدام صفاء من شقتها لتفرغ الزباله فتجد سعيد يحاول أن يلبس البنطلون وهو واقف بملابسه الداخليه مسندا ظهره على باب شقتها فتفتح فيقع سعيد أمامها

فتفزع وترقع بالصوت فيجرى سعيد على السلم ليكمل ملابسه فى الشارع

ماجده تنادى على سعيد من البلكونه : خد الجزمه ياسعيد ( طراخ بوم تسقط فردة جزمه فى الشارع والفرده التانيه فى بلكونة الأستاذ نصحى

(الذى يغار على عروسته الجديده ويشاكل دبان وشه لمن يجرأ أن ينظر لها فيكون مصيره لكمه قويه تطيح بصف أسنانه)

سعيد من تحت : يامفتريه مالقتيش ألا البلكونه دى ترمى فيه فردة الجازمه

ماجده من فوق : أحسن.. أطلع لنصحى بقا وأستلقى وعدك

سعيد يكلم نفسه: النهار باين من أوله خلصنا من ماجده نلاقى نصحى يامنجى من المهالك يارب أعمل أيه لازم أجيب فردة الجازمه عشان أروح الشغل لو ماكنتش ماجده سنه السكاكين كان الواحد طلع لبس جزمه تانيه وما يصطبحش بوش نصحى (ماجده من أمامكم ونصحى خلفكم فأين المفر) أستعنا على الشقا بالله

الحلقة الثانيه

مدام ميمى

يصعد سعيد السلم للدور الثالث حيث شقة الأستاذ نصحى ويرن الجرس ويرجع بسرعه للخلف وهو يضع يده على وجهه أتقاء لأى لكمه مفاجأة

ينفتح الباب ويسمع صوت حريمى كله دلع

ميمى : ميييين أستاذ سعيد أتفضل

سعيد: شكرا يامدام ميمى أصلى مستعجل وعايز أروح الشغل ..لا مؤأخذه فردة جزمتى وقعت عندكم فى البلكونه

ميمى : طب أدخل خودها ياروحى أحسن أيديا مش فاضيه

سعيد : لا بلاش وحياتك تجيبيها أنتى

ميمى : أنت حر تبقى تعدى فى وقت تانى يكون نصحى جه من البيت التانى يدهالك بنفسه ( وهى تشاور على أنفه بالبوكس لتذكره بالعقاب )

سعيد : هو نصحى بيه مش هنا

ميمى : لأ ياروحى لأ يا حبوب ..أخلص أدخل خد جزمتك وخلصنا ( تقوم ميمى بجذبه من ذراعه وتدخله الشقه وتغلق الباب)

:عندك تلات بلكونات فى التلات أوض أدخل دور على جزمتك وخدها وغور قبل ما نصحى ييجى يطين عشتك..حاضر ياستى ميمى

يدخل البلكونه فيجد فردة الجزمه معلقه على فرع الشجره القريبه من البلكونه يحاول أن ينط ليصل إليها ولكن هيهات فينادى على مدام ميمى

لتحضر له سلم

ميمى: أخلص نزل جزمتك دى فى يومك أللى مش معدى

سعيد :لو سمحتى ياست ميمى أمسكى لى السلم أحسن أقع فى الشارع

ميمى : بسرعه خلصنى الله يخرب بيتك الراجل ممكن ييجى فى أى وقت

سعيد وهو يتراقص فوق السلم ويقفز للوصول لفردة الجزمه فيختل توازنه وينقلب فوق ميمى ليفترشا الأرض ...يغمى على ميمى من قوة أرتطام جسم سعيد بها ولاتضع منطق ..يقف سعيد فى ذهول فقد أعتقد بأنها ماتت فيجرى فى أتجاه الباب عدة مرات ثم يعود وهو يلطم يالهوتى يالهوتى منك لله ياماجده يامفتريه أعمل أيه فى النصيبه دى أعمل أيه يارب أسترها معايه ..يقوم بسحب جسد ميمى من البلكونه ليدخلها غرفة النوم ويرفعها بصعوبه ليضعها على السرير ويغطيها ويهم بالخروج فيسمع جرس الباب فيقوم بغلق الباب من الداخل يستمر الجرس فى الرنين بعنف والخبط بقوة ثم يسمع صوت نصحى وهو ينادى أفتحى ياميمى أفتحى ياحبيبتى ..ميمى ..ميمييييييييى

يختبئ سعيد وراء ستارة فى المدخل ..بوم بوم بوم طااااخ وأنفتح الباب على مصراعيه ويجرى نصحى فى أتجاه الغرفه التى ترقد فيها ميمى ويستغل سعيد فرصة أنشغال نصحى بأفاقة زوجته ويتسلل خارجا من باب الشقه ويجرى بأقصى سرعة إلى الطابق السادس ويفتح الباب ويغلقه بالترابيس ويجلس على أقرب مقعد وهو يلتقط أنفاسه اللاهثه وهو يحمد ربنا أن نجاه من هذا الموقف وهو يتخيل نفسه ونصحى يفصص جسده ويكيل له اللكمات القاتله

وهو فى ذهوله وأعيائه يجد يد تقبض عليه بعنف من الخلف

فيقفز مذعورا ليجد ماجده واقفه أمامه وهى تضحك ..

سعيد يتنبه انه بفردة جزمه وحيده فيصرخ: .الجزمه ..الجزمه ..ميمى الجزمه ..نصحى حيموتنى ياماجده ( ويلطم على وجهه )

تضحك ماجده : ياريت عشان أخلص من أحلامك السافله ..ما تخفش فردة الجازمه رماها( نصحى) فى الشارع أنزل جبها

سعيد : مش عايزها وآدى الفرده التانيه ( يقذفها من البلكونه فتسقط هى الأخرى فى بلكونة الأستاذ نصحى )ويسمع صوته وهو يشتم ويتوعد بالويل والثبور وعظائم الأمور للجيران الحسالة الذين يقذفونه بالجزم

نصحى ينادى على البواب : عبده عبدوووه أصحى ياراجل ياتنبل ..الجزم دى بتاعة مين

عبده يبرم شاربه ويضحك ضحكه خبيثه فتظهر سنته الوحيده :الدزمه دى مجاس 42 بتاعة الأستاذ سعيد أللى فى الدور السادس كل يوم بنطلع له واحده ولا أتنين ..مفيش غيره يا نصحى بيه أطلع له

نصحى : متأكد يا عبده

عبده : ألا متأكد هى دزمة الأستاذ سعيد أنا حتوه عنها ده يامه وقعت على دماغى يابوى..أطلع له ياراجل وأنا حا تصل بالأسعاف

نصحى : بلاش أسعاف أتصل بمشرحة زينهم ياعبده

عبده : هع أهو كده الرداله..بس لوسمحت يانصحى بيه وحياة أبوك خلص عليه دوه فى شجته علشان أنا لسه ماسح السلم..هع خخخخخخخخخ

الحلقة رقم (3 )

ماجده تقابل رامبو

ماجده تلطخ يديها وملابسها والسكاكين بصلصة الطماطم وتجلس فى أنتظار وصول نصحى

يرن جرس الباب فتفتح ماجده الباب وهى تمسك سكين طويله فى يد وساطور فى اليد الأخرى وعليهم أثار الجريمه الحمراء وهى رابطه رأسها بمنديل أبيض وعليه بقع الصلصه ومنديل آخر تربطه على فمها وأنفها يشبه الكمامه

نصحى يشاهد منظرها فيخاف ويرجع للخلف

ماجده : كويس أنك جيت يانصحى تعالى أمسك معايا

نصحى : أمسك أيه يا مدام

ماجده : رجلين الراجل الميت علشان أشفيها

نصحى : راجل ميت مين يامدام ( يتكلم وهو يتراجع للخلف )

ماجده : سعيد جوزى ..تعالى قرب أنا حطه الجثه فى البانيو

نصحى يبعد أكثر ويستعد للهرب : جثه ورجلين وحتشفى وأمسك معايا ..أنتى دبحتى جوزك ياست ماجده

ماجده : أيووه.. يستاهل كل شويه يحدف جزمته من البلكونه طهقت منه قلت أخلص عليه ..ماتيجى تمسك معايا وأنت واقف زى الهلف كده أتحرك ياجدع لغزك وأنزل كرشك المدلدل ده على الأرض

أنما أنت كنت عايز أيه وبتخبط علينا ليه ؟؟

نصحى : مش عايز حاجه ..مفيش ..سعيد وحشنى جيت أشوفه

ماجده تكبس عليه أكتر وهى تضع السكينه بين عينيه..هيه عايز تشوفه

نصحى : بلاش وقت تانى متشكر متشكر أعدى فى وقت تانى

صوت سعيد وهو ينادى على ماجدة : ماجدة مااااجده مين معاكى بره

ماجده (فى سرها..الله ياخرب بيتك يا سعيد حتبوظ الشغل ) حاضر ياحبيبى أخلص من الحته الملظلظه دى وآجى أشفيك

نصحى ينظر بأستغراب : ده سعيد لسه عايش

ماجده : غريبه رغم أنى دبحاه وشاربه من دمه كبيتين من ساعه عفريته يلحق يطلع ..تعال معايا نشوف الحكايه دى وتمسك قصادى العفريت عشان ندبحه هو كمان

يضع نصحى ديله فى أسنانه وهويجرى يااااامه ألحقونى ألحقونى مجنونه مجنونه ألحقوووونى

ماجده تطل من على السلم وهى تنادى : أطلع يانصحى ياخواف ياجبان بس عاملى غضنفر على الفاضى..بتجرى ياجبان أخص عليك راجل خسع

تدخل ماجده وتغلق الباب وتكشف الغطاء عن سعيد فتجده يغط فى النوم

ماجده : ماشى يا سعيد يعنى مش حتصحى وتستدير لتخرج من الغرفه

فتسمع صوت سعيد وهو يحلم وينادى : سميره ..سميره تعالى ياحبيتى

تصرخ ماجده وتقفز فوق سعيد وتخنقه بيديها

الحلقه رقم(4)

فى عيادة الدكتور بسيونى

سعيد : نقعد نتفاهم ياماجده وبلاش الساطور والسكاكين وحياة أبوكى

ماجده : أنت خليت فيه مخ وعلى كلن نتفاهم عايز تقول أيه

سعيد وهو يتغلبن : أنا مريض يا ماجده

ماجده : أن مابطلتش حكاية أنا مريض دى مش حيحصلك طيب

سعيد : بلاش ماتتعصبيش فى عرضك..أحنا عايشين مع بعض بقالنا كام سنه ..عشر سنين..أنا كنت لما بنام كنت بقول أسامى أو كلام أوحتى يطلع لى نفس

ماجده : كنت بتشخر يا سعيد وصوت شخيرك كان بيصحى العيال والجيران وكنا بنقفل عليك الأوضه ونحط فوق راسك ثلاث مخدات وفوطه نقفل بيها بوأك

سعيد : وبعدين ودتينى لدكتور أنف وأذن وشالى اللحميه وكتب لى على دواء باخده قبل النوم وضاع الشخير وبقيت أنام طبيعى

ماجده : راح الشخير وطلعت لى بالأحلام الهلس بتاعة كل ليله أللى بتحرق دمى بيها ..الشخير كان أرحم ياسعيد

سعيد: بطلت الدواء بتاع الشخير ..

ماجده : وزادت الأحلام ..قلت لى حاله نفسيه فروحنا للدكتور بسيونى ..كتب لك على دواء ..حالتك أتنيلت أكتر بدل ماكنت تقول كلمتين تلاته وأنت نايم بقيت بتحكى الحلم كأنك صاحى وتقعد تبوس فى المخده وأنا قاعده حولع جانبك ..جننتنى معاك أنا مش عارفه أعمل فيك أيه

سعيد : نروح تانى وتالت للدكتور بسيونى أوحد تانى غيره يشوف لينا حل ونرجع سمنه على عسل أسود زى زمان

ماجده : هو ما فيش غيره دكتور المجانين أللى بوظ دماغك قوم ألبس نروح نشوفه وحدخل معاك المره دى وأشوف أيه حكايتكم أنتم الأتنين

ياعالجك كويس ياخلصت عليكم أنتم الأتنين وأرتاح وأريح الناس من خلقتكم تتكم القرف

******

يخرج كل من سعيد وماجده من باب العماره فى طريقهم لعيادة الدكتور

بسيونى فى وسط البلد فيتوقف سعيد أمام عبده البواب المدد على الدكه فى مدخل العماره وهو يضع رجل على رجل وهو آخر سلطنه ويغنى ( ما حلاها عشت الفلاح مجدوع على ظهره ومرتاح...... )

عبده : مين الأستاذ سعيد ..حمدالله ع السلامه أنت رجعت من القرافه ميته

سعيد : فز قوم ياراجل ياخرفان الله يخرب بيت الصنف أللى لحس مخك

عبده وهو يفرك فى عينيه : أومال الأستاذ نصحى بيقول أن المدام بتشفى فيك فوق فى البانيو أزاى

سعيد : نصحى ده متخلف زيك ..أن ماوريتك ياعبده يا صعيدى ما بقاش أنا سعيد بتفتن عليا وتقول أن الجزم أللى بتنزل عليه بتاعتى ياندل

عبده : عايزنى أكدب يا أستاذ سعيد ..بس جولى وحياة أبوك عايز أفهم أزاى المدام دبحتك ولسه عايش لحد دلوقتى

سعيد : ما هو أنا عفريت الأستاذ سعيد ياجاهل

عبده : صوح البيه نصحى بيقول كده برضه ... (يراجع نفسه وينظر فى وجه سعيد جيدا ) الصنف مضروب صوح... ليك حق يا بشمهندز

ماجده : حسابك معايا بعدين ياعبده أن ماخليتك ترجع بلدكم ماشى

الحلقة رقم (5 )

فى العياده

يدخل سعيد وماجده العياده فيجدوا (حسنيه ) الممرضه ناكشه شعرها وتجلس على المكتب وهى تبرد فى أظافرها و لا تعيرهم أدنى أهتمام

ماجده : الدكتور موجود يامدام

حسنيه : آنسه من فضلك ..

ماجده : بلاش يا مدام ..الدكتور موجود يا نسناسه

حسنيه : أترزعوا أقعدوا على ماديله خبر ..قرفتونا بجنانكم مفيش حد عاقل ييجى العياده ماتتحركوش من مكانكم لحد ماجى سامعين

ماجده : طب خلصى فى يومك المقندل ده

سعيد ينظر بأستغراب للشنطه التى تحملها ماجده : هى مال الشنطه بتاعتك منفوخه كده هى فيها أيه

ماجده : مالكش دعوه يا سعيد دى عدة الشغل

سعيد يتحسس الشنطه : يا نهار أسود أنت جايبه السكاكين والساطور معاكى عايزه تموتينا أنا والدكتور

ماجدة : حشرب من دمكم أنت والدكتور والنسناسه أللى جوه بعد ماسلخها

حسنيه: أتفضلوا خشوا للدكتور..عالم زباله

ماجده : ماشى رجعالك ياذوق عشان أظبطك

حسنيه : مرسي يا أبله ..

أبله يامرضعة قلائون

الدكتور بسيونى : أهلا وسهلا سعيد بيه ..أكيد دى المدام ..أهلا يا مدام ..هيه أنا شايفك كده بقيت أحسن من الأول كتييييييييير

ماجده : زفت وهباب وحالته بقت أنيل على أديك

بسيونى : أهدى شويه يامدام ريلكس ولو سمحتى أطلعى بره عشان أكشف عليه

ماجده تخرج الساطور من الشنطه : شوف شغلك وألا حقطعك جزل جزل

وعايزه أشوف النتيجه يا يخف ويبقى سليم.. ياحشيت وسطك

بسيونى وهو خائف: أوكيه بس لو سمحتى أبعدى الساطور ده

ماجده : عارف لو ماتعدلتش وقولت لى الراجل ده عنده أيه حيبقى النهارده آخر يوم من عمرك أكشف وخلصنى ورايا شغل بره مع الممرضه بتاعتك

الدكتور: بلاش وحياتك دى خطيبتى و ما صدقت لقيتها

ماجده : يعنى لقيت حاجه عدله تتك القرف فيك وفى ذوقك

الدكتور وهو يرتعش : نام يا أستاذ سعيد ..هيه أيه أخبار الأحلام دلوقتى لسه بتشوف ستات وتكلمهم ويكلموك

سعيد وهو خايف يتكلم وينظر إلى ماجده الواقفه فوق رأسه وفى يدها الساطور ويهز راسه بالموافقه دون أن يتكلم

الدكتور يحتد : ما ينفعش الكلام ده يامدام شيلى الساطور وأقعدى خلينى أعرف أكشف على المريض أحنا فى سلخانه

ماجده : أنت بتزعألى ياض حسابك بعد الكشف.. أكلم ياسعيد ما تخفش أنا شلت الساطور قول للدكتور على كل حاجه ما تخبيش أى شيئ

سعيد: أقول ياعنى ومفيش زعل ...قول وخلصنى

أنا يادكتور كنت بشوف الأحلام الأول أبيض وأسود وكانت بتاع عشر دقايق أو ربع ساعه بالكتير وبعدين تقطع دلوقتى بشوفها ألوان وبتاخد ساعه وربع ويوم الخميس تستمر ساعتين تلاته أربعه

الدكتور يصفق وهو سعيد : سهره يعنى هايل يا سعيد أنت كده سيبت المحلى ودخلت على الفضائيات ..أنما عامله أيه معاك محطة ميلودى ميوزيك

سعيد : يعنى مش واضحه قوى بس بتيجى فى الفاصل قويه جدا بين كل حلم وحلم

بسيونى : أعدل دماغك كده نام على جنبك الشمال غمض عينيك هيه أسراااح وخد نفس عميق هيه شايف أيه

سعيد : كده بقيت أبيض وأسود

بسيونى : طب أنعدل على جنبك اليمين وغمض وخد نفس عميق أسراااح هيه شايف أيه

سعيد : الله يادكتور حاجه جميله قوى وألوان وناس زى العسل

بسيونى : فتح وغمض تانى وسيبك من القمر الأوروبى بلاش فضايح وخلى يومنا يعدى وأنقل على النايل سات ..

سعيد : ييه دخلنا على الغم بتاع الجزيرة ودريم والمحور والفضائيه المصريه

ماجده : طب ما تظبطه على الأسرة والطفل وأقرأ والناس وبرامج الأطفال

مش يكون أحسن

الحلقة رقم (6)

بسيونى : هشششش أسكتى ياست أنتى.. خلينا نشوف شغلنا هو النصيبه أللى فيها جوزك دى مش شويه وأن مخه يتلغبط من تحت راسك ويستقبل الأرسال التليفزيونى..قوم يا سعيد

ماجده : أنت تفهمنى براحه كده وبشويش أيه أللى حصله لو مابتعرفش تعالجه قول وريحنى وأنا أخده على كهربائى تليفزيونات فى شارعنا ..هو بيأخر الحاجه عنده شويه وبيسرق منها قطع غيارها الأصليه بس فى الآخر بتتصلح ...أنشالله يقعد عنده شهرين تلاته ويسرق القولون بتاعه المهم فى الآخر حيبقا كويس

بسيونى : ياسلام عليكى يامدام الطب النفسى أتقدم كتير قووى ولو فشلنا فيه ممكن نسفره كوريا أو اليابان عندهم حالات كتير مشابهه لحالة سعيد غير القطع الغيار الأوريجينال أطمنى يامدام وأستريحى

ماجده : أنت لازم تفهمنى المرض ده جاله من أيه وهو معدى ولا مش معدى

بسيونى ينجعص فى مكتبه : شوفى يامدام مرض جوزك ده مرض نادر بيصيب 10 فى كل مليون وده يرجع للحرمان العاطفى والقلق النفسى

ماجده : عندك أعمل أستوب.. حرمان عاطفى أيه وقلق نفسى أيه ..(ثم توجه كلامها لسعيد المنكمش فى الكرسى) ..أنا مقصره معاك فى حاجه ياسعيد

سعيد يهز رأسه بالموافقه ويرفع الأبهام عاليا ..أنتى كده زى الفل

كمل يادكتور أما أشوف نهايتك أيه أنت والتليفزيون أللى قاعد قدامى

يكمل بسيونى : لو سمحتى يامدام ما تقاطعنيش أنا مش فاضى ورايا أجهزه قصدى عيانين قاعدين بره

ماجده : أتلهى دى العياده بتنش كمل وبلاش لاماضه وألا حطير مناخيرك والله؟؟

بسيونى يتحسس مناخيره: نتيجة هذا الحرمان حدث عنده أنبعاج شريانى فى المخيخ أدى إلى تحوصل متعدد بكومبنيشن المخ وأنحوار فى ملفات الدماغ وسكسكه متقطعه لعمود الكامات وأنزواء فى ليفة المخ المبطنه لفروة الراس أدى إلى تأخير فى الشراره وأستقبال ترددات عاليه لموجات الديش ولاسلكى الأمن المركزى

ماجده :عليا النعمه ما فاهمه حاجه أنت دكتور ولا ميكانيكى ولا سباك الله يخرب بيتك لعبكت دماغ الراجل أن ما أشتكيتك فى النقابه ودفعتك دم قلبك وطالبت بتعويض يقطم وسطك

بسيونى : تعويض ههههه ده بكتيره ياخدوه منك ويدولك مكانه رسيفر صينى أو مروحه

ماجده : قوم ياسعيد قبل ما خلص على أبن المجنونه ده

بسيونى : شرفتى يامدام ولو أحتجتى أى حاجه فى فترة الصبح أبقى عدى عليا فى المحل فى العتبه يمكن نقدر نظبطهولك ويجيب الأيه أر تى والشوتايم

ماجده تسحب بسيونى من الكرافته وترقعه بالروسيه فيقع على كرسى المكتب وهو يضحك قبل أن يغمى عليه : كده أنا شايف 16 قمر والنجوم خخخخخخخخخخ

الحلقة رقم (7)

قطيعه هانم

ماجده :شوفتى يا قطيعه ياختى حظى المقندل الراجل الدكاتره لعبو فى دماغه لحد ما بقى سته سيستم

قطيعه : والنبى زى العسل ..فين ياختى الدكتور ده أخد له( براوى) جوزى بدل ماهو قاعد لى فى البيت زى قرد قطع..على كده بيجيب مسلسل

(نور)

ماجده :بيجيب كله كله حتى ماتشات الكورة المتشفره ولو الكهربا قطعت يقعد يوش شششششش

قطيعه : طب ركبيله حجرين قلم .ههههههه

ماجده : تتك أيه ياقطيعه

قطيعه : هو المرض بتاعه قال لك الدكتور أسم أيه

ماجده : بيقول أسمه( تلى سيكوو )

قطيعه : هو سى (سيكوو )ده مرض معدى يا حبيبتى

ماجده : بيقول الدكتور ممكن يعدى لو قعدتى قدامه فتره كبيره

قطيعه: خدى بالك من روحك أحسن يوديكى المورستان ..عارفه عفيفه مرات حسنين الضبش..جوزها بعيد عن السامعين..صبحت الصبح لقته عمال يدى أمبليهات وكلاكسات وبيقول عنعنعنعنن ويلف فى الشقه وأفتكر نفسه موتسكيل وهاتك يارمح طول النهار قالوا لها سبيه فى المستشفى وهو يبقى كويس قالت أومال مين أللى يقضى الطلبات ويودى العيال المدرسه ما فاتش شهر وتشم منه وتتعدى ويجالها بسم الله الحفيظ نفس المرض ووقفت فى أول الشارع توصل الناس وعامله فيها توكتوك.. وهما الأتنين مشرفين دلوقتى فى السرايا الصفرا

ماجده : وأنا فاكره أن سعيد بيعرف ستات من ورايا ..ياعينى عليك يا سعيد آدى أللى نابك من القاعده قدام التليفزيون..بس وحياتك ياقطيعه يابنت خالتى مانا ساكته لازم أوديه لأحسن دكاتره وأعالجه وأخليه زى الفل..بيقولوا أن فيه دكتور مخ وأعصاب لسه جاى من أمريكا الكل بيتشكروا فيه وحياتك لأحجزله وأصرف عليه أللى قدامى وأللى ورايا

قطيعه : بس خلى بالك يا ماجده تتعدى منه

ماجده : الحقيقه سعيد بينام بره فى الصاله على ترابيزة التليفزيون

ولما يحب يروح الحمام يضرب موسيقى ويقول شوية أعلانات وهوماشى

ولما يخلص يقول عدنا

قطيعه: والنبى عسل أهو بيسلى مش أحسن من الموتسكل والتوكتوك

ماجده : مانتى قاعده ياقطيعة لحد ماييجى سعيد من عند الكهربائى حيظبط له لمبة الصوت وجاى على طول

قطيعه : معلش أصلى راكنه( براوى) تحت فى الممنوع بعدين الونش يشيله أو يكلبشوه..باى ياحبيبتى

ماجده : أهلا..خلى بالك أنتى من نفسك لاتبقى ميكروباس

قطيعه : عتبه عتبه عتبه..عرابى عرابى عرابى عنعنعنعن بييب

ماجده : سكتك خضراء يا أسطى قطيعه

الحلقه رقم (8)

زواوى الطبيب المداوى

تحجز ماجده عند الدكتور زواوى طبيب المخ والأعصاب المشهور القادم حديثا من أمريكا ليعالج سعيد بأحدث طرق العلاج فى العالم

د. زواوى : نام بليز مستر سعيد ..شت يور أيز

سعيد : دكتور أنا مش شايف شريط الترجمه لو سمحت أنزل بالعربى زواوى : أوكى ..أنت بتشتكى من الحاله دى بقالك قد أيه

سعيد : من سبع تمن تشهر يادكتور

زواوى : بتحس بصداع ولا ألم فى الراس

سعيد : بحس بصداع من بعض البرامج ..خاصة من معلقين الكورة

زواوى: حنشوف وبعدين نحكم..ينادى على الممرضه والمساعدين

جهزوا الأستاذ على جهاز الفوتيك

الممرضه: الفوتيك ما أتحرق منك أمبارح وأنت بتكشف على الأستاذ مرتضى منصور

زوواى : خلاص حطيه على جهاز البيانوتيك وأربطى أيديه ورجليه كوويس وشربيه أى عصير أوحاجه ساقعه على مانخلص

يجلس زواوى أمام شاشة الكمبيوتر المتصله بالجهاز ..نبتدى يابنتى

أبتدى يادكتور.. أقعدى جانبى هنا يامدام ماجده عشان عايزك تجاوبينى على بعض الأسئله والأستفسارات وأنا شغال...جاهزين ياولاد ..جاهزين يادكتور أبعدو عنه وأقفلوا الستاره عليه..بسم الله الرحمن الرحيم ربنا يصبرك على ما بالك فوووووووم

ماجده : أيه ياعم أنت بتدبح فرخه

زواوى : شت آب كرازى وومن

ماجده :بلاش شت آب ..هات لى سفن آب وسندوتش همبروجر والحساب يجمع ..

هسسسسسسس.أسكتى خالص

يسمع صوت سعيد وهو يصرخ ويضحك فى نفس واحد آى أه أههههههه يوووووووههه

ماجده : كفايه يادكتور الراجل حيفطس

زواوى : هششش أبتدى مخه يعمل up Load..كويس حيفتح أهه..مشالله..جوزك يامدام مرتب دماغه كويس قوى فى ملفات Files

And Folder…very good

ماجده : من ناحية هو منظم هو منظم بس أتعلم النظام على أيدى

زواوى : أيه الفولدر الكبير ده ..مكتوب عليه الأيام السوده..Black Days ياها ده فيه أكتر من عشرتلاف خناقه فى عشر سنين كتير قوى يامدام هو أزيد من المعدل العالمى بكتيييير ويعتبر عادى بالنسبه للمعدل المصرى حنفتح كام فايل كده عشان نقدر نعرف عقدته فين الغلبان ده يضغط عل الفايل رقم 85 فيفتح الفايل على Windows Playerليعرض الخناقه ..تظهر ماجده فى البلكونه قبل ماتتخن وهى تنادى على سعيد ( أنا أهه قبل ماخلف الواد تامر أخص عليك ياسعيد ما فرجتنيش على الشريط ده ..

زواوى يوقف العرض: هششششش أسكتى خالص ده مش فيلم دى البلاوى أللى متخزنه فى مخه وملخبطاه مش عايز أسمع صوتك خالص

حنبتدى تانى ياجماعه كلاكيت تانى مره : بسم الله الرحمن الرحيم ربنا يصبرك على ما بلاك

فووووووووووووووم

سعيد يصرخ بصوت عالى ويضحك فى نفس الوقت أأأههه خخخخخخ

ماجده: فيه أيه تانى

زواوى : بيعمل( أب لود) من تانى عشان خاطرك ..مسكين الراجل ده أستحملك كتير قوى

ماجده : بس جه فى الآخر كان بيهنج وتقل قوى ..تتكم نصيبه دكاتره فقر واحد يطلعهولى تليفزيون والتانى قلبهولى كمبيوتر بكره تعملوه كيتشن ماشين..ربنا يستر أستمر يادكتور أنا حسكت خالص أهه

زواوى : سوفاج

ماجده : أهى الكلمه دى عارفاها بتقولها مدام ريتا لما بهزأها..حسابنا بعدين يازواوى

زواوى : أكتمى خالص العرض حيبتدى

يتبع

الحلقه رقم (9 )

الفايل رقم ( 85 )من مجلد الأيام السوداء

أدخل وحمل

المنظر:ماجده تقف فى البلكونه وتنادى على سعيد

ماجده : أطلع بسرعه عايزاك فى حاجه مهمه..أجرى ..خف نفسك شويه

سعيد : خير فيه حاجه

ماجده : لما تطلع حتعرف

سعيد ياأخذ الست أدوار قزح ليصل إلى باب الشقه وهو قاطع النفس:أيه أللى حصل ياساتر أستر يارب

ماجده : تعال ورايا ..بص ماشلتش ليه الأطباق بعد ما فطرت وأيه بنطلون البيجامه ده أللى رميه فى الأرض..أنت بتستهبل يا سعيد مش شايفنى حامل وعلى آخرى حمشى ألم وراك أتفضل شيل الحاجات دى وأغسل الطبقين أللى أكلت فيهم

سعيد : أنتى بتطلعينى الست أدوار على مله وشى عشان الكلام الفارغ ده

طب مش حشيل حاجه بقا فى يومك الأسود ده يا مجنونه يابنت المجانين

ماجده : أنا مجنونه وبنت مجانين..أنت بقا ما شفتش الجنان أللى على أصله.. تحب أفرجهولك طب هه ( تقوم بقذف الأطباق والبيجامه من البلكونه )

صوت أحد الماره : ياعالم يابهايم يا ولاد الكلب

عبده البواب : الحجات دى يابيه بتاعة واحد ساكن فوق أسمه الأستاذ سعيد ساكن فى الدور السادس.. أطلع له وريله شغله بس هات البيجامه دى تنفع الواحد ينام فيها

وتستمر الخناقه بين سعيد وماجده والجيران والبواب حتى يغلق الفايل وسعيد بايت على القهوة والجرسون يصحيه ليدفع الحساب وصوت الفجر يقول الله أكبر وسعيد يرفع يده مبتهلا ليرفع عنه هذا البلاء

زواوى : دى نصيبه وبلوى من بلاويكى الراجل محتفظ بها فى الذاكره ومش عارف يعملها Delete

ماجده : أخص عليك ياسعيد ده أنت قلبك أسود قوى

زواوى : نشوف الفايل ده رقم 1720..قيسوا درجة حرارة المريض ياجماعه شغلى المراوح يانجاة المريض حيهنج كده ..3..2..1أكشن

يتبع

الحلقة رقم(10)

الفايل رقم 1720

من مجلد الأيام السوداء

عيد ميلاد ماجده

ماجده : النهارده أيه ياسعيد

سعيد : النهارده الخميس ياماجده

ماجده : قصدى كام فى الشهر ياسعيد

سعيد :28 من أغسطس يا ماجده كلها كام يوم ونقبض أحسن بقينا على الحديده

ماجده : 28 أغسطس ده مابيفكركش بحاجه يا سعيد

سعيد : لأ مش فاكر قولى أنتى

ماجده : أصحى ياسعيد مش عايزه أستهبال ..النهارده عيد ميلادى ياحبى

سعيد : كل سنه وأنتى طيبه

ماجده : مالك بتقولها من غير نفس كده وماتنفعش كده حاف

سعيد : وآدى بوسه ياستى كل سنه وأنتى طيبه ..

ماجده وهى تبعده عنها :أنت حتسوق فيها وتكمل الأستهبال ..عيد ميلاد معناه هديه يافالح أنا مش عايزه حاجه معينه حسيبك تجيب حاجه على ذوقك ياسعيد

يحضر سعيد فى المساء ومعه صحبة ورد صغيره بها خمس وردات وملفوفه فى ورقة سلوفان

ويقبل ماجده وهو يقول

سعيد : مالقتش أحسن من الورد أقدر أأقدمه ليكى ياحياتى

ماجده تأخذ منه والورد وتطوحه من البلكونه فيقع داخل سرادق العزاء المنصوب أمام البيت

ماجده : جايب لى ورد ياسعيد فاكر نفسك طالع التورب..الرجاله تجيب فستان ..جزمه ..شنطه ..حتتين دهب يحطهم فى أيد مراته جايب لى ورد ياراجل يا أيحه يا بخيل

سعيد : أنا أيحه وبخيل ياماجده ..أعملك أيه إذاكانت أمك ولداكى آخر الشهر أجيبلك منين ..عنك ماخدتيه..خساره فيكى أنت كنت عايزه كلابشين لأديكى يا مفتريه

وتتصاعد حدة الخناقه بينهم ويرن جرس الباب فيفتح سعيد فيجد الأستاذ عاشور جاره وبعض المعزيين وعبده البواب وهو يمسك باقة الورد التى طوحتها ماجده من البلكونه

عاشور : الورد ده بتاعك

عبده : أيوه بتاعه ياعاشور بيه حتى كمان مالوش ريحه خخخخخخخخ

سعيد :بس أنا ما أقصدش أحدفه عليكم ده وقع من المدام وهى بتنشر

عاشور : طب أمسك كده الورد ..وخد دى علشانك ويتلقى سعيد لكمه قويه فى فكه ترميه فى وسط الصاله وتقف ماجده فوق رأسه وهى تعد ..1234

وينتهى الفايل وسعيد يقف فى بلكونة منزله والفجر يؤذن الله أكبر وهو يبتهل إلى الله أن ربنا ياخد ماجده ويريحه منها

ماجده : أخص عليك ياسعيد بتدعى عليا يامجرم ياظالم ربنا يورينى فيك يوم ...وأنا حموت نفسى عشان تخف أنشالله تموت أنت

زواوى : ده كويس أن الراجل ده عايش..أنت ست مفتريه فيه فولدر أهه مكتوب عليه اللحظات السعيده نفتحه ونشوف فيه أيه Folder is empty يانهار أبيض مفيش ولا لحظه حلوة فى حياته لالالالا

ويظل زواوى يفتح ويغلق ملفات وسجلات سعيد ويؤنب فى ماجده

ماجده وهى تبكى : طب والعمل يادكتور حنسيبه كده

زواوى : مفيش قدامنا غير العمليه

ماجده : يالهوى عمليه..عمليه أيه يادكتور

زواوى : عمليه أسمها Formating نمسح فيها دماغه بالكامل ونخليها على الزيرو يعنى يرجع بحالة المصنع وبعدين نرجع له الملفات الضروريه أللى تخليه يعرف يكمل حياته الطبيعيه بس على الله نلاقى السوفت وير بتاعه فى السوق...يادكتور زكى شوف كده رقم السوفت وير بتاع الأستاذ سعيد موجود ولا لأ ..

د. زكى : رقم السوفت وير ده مصرى ومن النوع القديم قوى ومفيش زيه فى السوق..فيه صينى وتيوانى وأيطالى وفيه أنجليزى أصلى

ماجده : بلاش صينى يادكتور أنا مش فاضيه أعمله سوفت وير كل شويه

زواوى : الأنجليزى حراق شويه بس أيه أضمنه برقبتى وحنحاول نعربه عشان يعرف يتفاهم معاكم

ماجده : أجيبه من سوق العصر بتاع الكمبيوتر ولا أيه

زواوى : لا ياماما لا أحنا نبعت نستورده من بره أورجينال نسخه أصليه..ماتشليش هم حنحجز الأستاذ سعيد عندنا 15 يوم تيجى بعديها تستلميه

ماجده : وعليه ضمان قد أيه ؟؟

زواوى : العمليه مضمونه 10 سنين أنما السوفت وير لمدة سنه لو ماعجبكيش ممكن تغيريه بأى نوع يعجبك هيه موافقه شاورى نفسك

ماجده: موافقه ياخويا موافقه أنجليزى أنجليزى أهو ينفع يذاكر للعيال

زواوى : أوكى ماتنسيش تاخدى الوصل علشان تعرفى تستلميه بيه

ماجده وهى خارجه :مع السلامه يامستر سعيد باى باى ..my love

الحلقة رقم (11)

سعيد بعد التعديل

بعد 15 يوم تذهب ماجده لعيادة الدكتور زواوى لآستلام سعيد بعد عملية الفارمته للمخ ..وتقوم بتقديم أيصال الأستلام للموظف المختص

الموظف ينظر فى الأيصال ثم يهز رأسه : مستر سعيد حاليا على الشاحن ولما يخلص حيخش على التست يعنى قدامك ساعتين على ما يخلص لو مستعجله عدى علينا آخر النهار تقدرى تستلميه

ماجده: أنا مش عارفه دى عياده ولا دراى كلين أنا عايزه أشوف جوزى وأطمن عليه

الموظف : ممنوع يامدام

ماجده : شوف بقا ما ما تخلنيش أطلع زرابينى عليك ..حشوفه يعنى حشوفه لصورلكم قتيل هنا

الموظف: طب أهدى يامدام أنا ماليش ذنب أدخلى للدكتور زكى أللى ماسك الورشه وأتفاهمى معاه يمكن يقدر يسلمهولك

ماجده : فين الأسطى زكى ده ..

الموظف :عندك فى آخر الطرقه على اليمين

ماجده تدخل الغرفه فتجد سعيد ممدد على السرير ومتصل براسه عدة أسلاك تنتهى بجهاز الشحن والدكتور زكى منهمك فى عمله

ماجده: سعيد حبيبى عملوا فيك أيه ولاد الـ...

زكى : أنتى تانى أيه أللى دخلك هنا..ياحمير يابتوع الأمن تعالوا أرموا الست دى بره العيان جات له جومه لما شافها

ماجده : ورحمة أمى ما نا طالعه ألا لم أطمن عليه قولت أيه بقا فى يومكم المقندل ده

زكى : طيب سيبى رقبتى حتخنق وأقعدى بعيد على الكرسى أللى هناك

ماجده : وآدى قاعده

زكى : الحمد لله اللمبه الخضراء ولعت أبتدى الشحن مش عايز منك ولاكلمه مفهوم

ماجده : هو ماله عمال يبربش كده

زكى : أبتدت عملية الشحن يا جاهله كلها نص ساعة ويشتغل

بعد نصف ساعه يفوء سعيد ويجلس ويرطن باللغه الأنجليزيه

ماجده : يانهار أسود وحتفاهم معاه أزاى ده

زكى : أصبرى وياريتك تقعدى بره علشان نعرف ننزل النسخه العربى

بعد ساعتين تدخل ماجده لمشاهدة سعيد بعد التعديل الفرنكو أراب

سعيد : من هذه ( الومن ) woman

زكى : أنها يور ويف ياسعيد your wife

سعيد : أوكيه ..لكن شكلها ليس جيدا أنها تشبه ( المونكى ) monkey

زكى : حاول مرة أخرى التعرف عليها( رفرش آجين بليز ) refresh

سعيد : أنا أحاول (ريسرش)..نتيجة البحث زيرو reseash

زكى : حاول مرة أخرى فى ملفات الصور

سعيد : فضلا أنتظر ..نتيجة البحث صفر

ماجده : مسحتونى من ذاكرته ..أنا حوديكم فى داهيه ياولاد الكلب أنا عايزه الدكتور زواوى ييجى هنا حالا يشوف النصيبه السودا أللى عمالها فى الراجل..أنا ياأنتم فى القسم يا نصابين يانورر..أنا أدفع دم قلبى علشان تنظفوا مخه تقوموا شايلنى من ذاكرته ..طب آخده أعمل بيه أيه أعيش مع راجل غريب وكمان خواجه ده حتى يبقا حرام ..فين زواوى هاتوه

سعيد : بليز دكتور زكى أخرجوا هذه المرأة الشرشوحه

زكى : فرى جود ملف الشتيمه أشتغل..يارب عقبال الباقى 

ماجده : فرحان قوى أن ملف الشتيمه أشتغل يا أهبل يا أبن الهبله طب فين الملف أللى فيه صورتى الراجل مش عارفنى يادى النصيبه

زكى : لما ييجى دكتور زواوى حيفهمك على كل حاجه

سعيد : أنتى ست مقرفه لا أريد سماع صوتك من فضلك أخرجى (أوت )

أننى لا أحب الأزعاج زكى

ماجده :( I am)ماجده ياسعيد( يور ويف)

ماجده : الراجل مش عارفنى يادكتور أعيش معاه أزاى

زواوى : ده من حظك ياماجده..دماغه دلوقتى صفحه بيضاء وجميع بلاويكى أتمسحت تماما من ذاكرته أبدأى حياتك من جديد

سعيد L وت زا ميننج أوف) ماجده دكتور زكى

ماجده : يالهوى ..يالهووووى ...ياخراشى ما كنش يومك يامستر سعيد

يتبع

الحلقة رقم(12 )

حياه جديدة

زواوى : أقعدى يامدام وأهدى أتفضلى ياستى شهادات الضمان

ماجده : منظره يادكتور مش طياقنى ده كل ماكلمه مايردش عليا

زواوى : واحده واحده حياخد عليكى..بس حبيه مش تعذبيه زى الأول

لو عاملتيه بطريقتك دى قليل لو خلص عليكى أو يطفش منك هو دلوقتى نصه أنجليزى ونصه مصرى عامليه برفق وحنيه شوفى الخواجات فى المسلسات الأجنبى بيعاملوا رجالتهم أزاى ..فرصه تبتدى حياه جديده

ماجده: طب لو ماعرفتش أتعامل معاه

زواوى : فى الحاله دى لازم نعملك أنت عملية فرمته زيه عشان تعرفوا تعيشوا مع بعض..بس جربى الأول ونشوف

ماجده :هيا بنا ياسعيد

سعيد : تقدمينى يا سيدتى ليدز فيرست

زواوى : فيه أحسن من كده حتلاقى راجل مهذب فين فى الوقت ده

علشان تعرفى أن نسخه أنجليزى أصلى

سعيد : شكرا أيها الطبيب جود باى

ماجده : ياله ياخويا ندور لنا على تاكسى (سعيد يقف ولا يتحرك )

زواوى : كلميه بالفصحى يامدام وبعد كده علميه العاميه واحده واحده

ماجده :هيا بنا ياسعيد نبحث عن سياره أجره..ههههه أهه بيمشى ياحلاوه

زواوى : فرى جود سعيد ...

سعيد :سانك يوه سير باى

زواوى : ماتنسيش يامدام تكلميه بالفصحى أو بالأنجليزيه وما تقرصيش عليه هو دلوقتى فى التليين مش عايزين مشاكل وحياة أبوكى

يتقدم سعيد فيفتح باب التاكسى لماجده وينحنى أمامها ثم يركب بجوار السائق

ماجده :كوم هيير بجانبى يامستر سعيد

سعيد : لا أريد أن أرفع الكلفه بيننا سيدتى (سانك يوه)

يصل التاكسى إلى بيت سعيد وينزل سعيد مسرعا ليفتح لماجده الباب

ماجده : حسابك كام يا سطى

السواق : مية جنيه يامدام

ماجده : مية عفريت يركبوك ويركبوا أللى خلفوك أنت فاكرنا سياح خد آدى خمسه جنيه وبوس أيدك وش وظهر ..هيا ياسعيد نصعد الدرج

سعيد: تقدمينى سيدتى ليدز فيرست

ماجده : سوف تشاهد أبنائك الأعزاء الأن موجودين مع مسيز / قطيعه أبنة خالتى أسرع ياسعيد

سعيد : من هذا الرجل الذى ينظر ألينا ويطيل النظر سيدتى ماجده

ماجده :أنه عبده حارس العقار ياسعيد

سعيد يتقدم فى أتجاه عبده البواب ثم يقوم بضربه على قفاه وهو يقول : لاتنظر ألينا هكذا يارجل ..دونكى ووغد

عبده : أضرب زى ماأنت عايز أنما تقولى( دونكى) نو وألف نو

يتركه سعيد ويكمل الصعود مع ماجده لشقته

يتبع

الحلقة رقم (13)

ماجدة تفتح الباب وتدخل الشقة ومن خلفها سعيد وهو ينظربقرف ألى الشقة ويندفع أولاده (سحر وتامر )ويتعلقون برقبته

سعيد : من هؤلاء الأطفال القرود ياسيدتى

ماجده : هؤلاء أطفالك مستر سعيد وأقدم لك مسز قطيعه أبنة خالتى

سعيد يأخذ يد قطيعه ويقبلها فتسحبها منه بسرعة

قطيعة : أستغفر الله أنا ماعملتش حاجه أنا أخدم ماجده بعنيا

يتجاهلها سعيد ويجول بناظره فى الشقه وهو قرفان

مين ده ياماجده ؟؟

ماجده: ده سعيد ياقطيعه بعد التعديلات

قطيعه : ده أتغير خالص ..بس هو ماله بيبصلنا وهو مستغرب كده هو لسه تعبان

ماجده : ده من تأثير العمليه بكره يبقى كويس ..جهزتى الغداء

قطيعه : حالا حفرش السفره عمله لك شوية محشى يستهلوا بقك

يجلس : سعيد ويأكل المحشى بالشوكه وهو يرطن بالأنجليزى ليعبر عن أعجابه بالأكل

تامر : مين الراجل ده أللى شبه بابا

ماجده : ده أبوك ياحبيبى بس لسه تعبان وبعدين كل وأنت ساكت

قطيعه : يجنن ياماجده ده بقا محترم قوى.. ياحلاوه يا ولاد بيقطع المحشى بالسكينه

بعد أنتهاء الأكل يقوم سعيد ويأخذ الأطباق التى أكل فيها من سوكات ويقوم بغسلها فى المطبخ ويجففها ويضعها فى الرفوف وكل من ماجده وقطيعه والأولاد ينظرون إليه فى ذهول وهو لايعيرهم أى أهتمام

تستمر الحياة على هذا المنوال وعاش كل من ماجده وسعيد بدون خناقات

لمدة شهر وكأنهم أغراب لم تستحمل فيه ماجده هذه الحياة وقررت أن تذهب إلى دكتور زواوى ليجد لها حل فى هذه المشكله

ماجده : خلاص يادكتور ياحموته ياحموت نفسى أنا مش عارفه أتفاهم معاه برود أنجليزى وهدوأ غير عادى وأدب وأحترام ينأط رجعوا لى جوزى زى الأول أنشاالله يبقا تليفزيون أوأى حاجه أنما تلاجه لأ

زواوى : ماينفعش يامدام وأنتى ماضيه عندى أنك موافقه على العمليه

أنما عندى حل مافيش غبر أن أحنا نعملك عملية مسح مخ وننزلك سوفت وير أنجليزى زى أللى عند جوزك وكده تقدروا تعيشوا مع بعض

ماجده : أنا موافقه طب العيال حنعمل فيهم أيه

زواوى : عيالك لسه صغيرين وحيتربوا بين أم وأب أنجليز وبالتالى حيتأثروا بيكم ولو فيه أى تعديل ما نقدرش نعمله ليهم قبل سن 18 سنه

عموما قرارك أنا أحترمه وكنت عارف أنك حتيجى تطلبى هذا الطلب وأنا جاهز من بكره نعمل العمليه

ماجده : أوكى جو أون بليز آى يام ردى

الحلقة رقم( 14) والأخيره

Five Tea O 'Clock

وبعد سنه من أجراء العمليه لماجده يجلس الزوجان ف البلكونه لتناول شاى الخامسة مساء كعادة الأنجليز

ماجده : جود أفنينج مستر سعيد تفضل الشاى

سعيد : جود أفنينج مام..تفضلى بالجلوس سيدتى بجوارى على ألأريكه

ماجده : أشكرك ياعزيزى

سعيد : تفضلى سيدتى الجريده

ماجده : أوه ماى جاد هنالك أخبار مزعجه ياسيدى

سعيد : أقرئيها سيدتى

ماجده :وفاة البروفيسير زواوى عقب محاولته أجراء تجربه على نفسه لتطعيم المخ ببذور البذنجان الرومى

سعيد : مسكين هذا الرجل لو نجحت تجربته لكانت فتح كبير للبشريه

نحو أفاق أكبر للقضاء على ظاهرة الجنون المبكر عند الرجال المتزوجين

ماجده : مسكين زواوى هيا نقف دقيقة حداد على روحه

سعيد : أنتى رقيقة المشاعر سيدتى

*****

يصحو سعيد على صوت ماجده وهى تحاول خنقه

سعيد : أى آى آى حتخنوأينى يا بنت المجنونه

ماجده : مافيش فايده مين زواوى وقرداوى أللى عمال تتصعب عليه ده

أصحى جننتنى ستات وأستحملناك وكمان بتحلم برجاله

سعيد : هو أنا كنت بحلم

ماجده : بقالك ساعه تتكلم وتصرخ وتتضحك وعمال تجيب من الشرق والغرب وتتكلم أنجليزى أن ماكنتش تحكى لى كنت بتحلم بأيه لخلص عليك دلوقتى

سعيد يعتدل فى السرير ويحكى الحلم لماجده وفى النهايه يسرح قليلا وهو يقول: ياه لو الحلم ده يتحقق

ونمسح من دماغنا كل الهموم والمشاكل والعداوات أكيد حنكون أسعد زوجين فى الدنيا

أنتهت