أحلام سعيد وماجده

الحلقة الأولى

سعيد : آى أى فيه أيه ياماجده

ماجده : أصحى يا فالح مين( فاتن )أللى عمال تنادى عليها وأنت نايم

بتحب عليا ياسعيد ..يالهوى .. يلهوى ..بعد ده كله نايم بتحلم لى بالستات

قوم قول لى مين فاتن دى ..عارف لو ما قلتش حيجرالك أيه ..حخنقك وأكتم نفسك بالمخده وأخلص منك

سعيد : أبعدى ياوليه المخده دى عن وشى حتخنق يا بنت المجنونه

ماجده : أتعدل كده وأحكى لى مين فاتن دى أن ما سميتك وخلصت منك

ما بقاش أنا ماجده ..كل يوم عمال تحلم لى بأسم شكل أمبارح كانت سعاد وأول كانت ثناء وأول أول كانت سميره وغيرها وغيرها ..هو فيه أيه ياراجل كل الستات دى بتعرفها أمتى وفين ؟ أرر وأعترف يا فلاتى ياراجل ياهلس قول

سعيد :أبعدى أيديكى عنى وخلينى أروح الحمام الأول

ماجده : مفيش مرواح الحمام ألا لما تحكى لى مين فاتن دى

سعيد : مش قادر يا ماجده حرام عليكى أنا على آخريى حعملها على نفسى

ماجده : برضه مش حسيبك ألا لما تقول

سعيد وهو يفلفص من أيدين ماجده التى كبست بكل وزنها على صدره

حقول كل حاجه بس سيبينى

يجرى سعيد على الحمام ويغلق الباب خلفه..ووقفت ماجده على الباب فى أنتظاره

ماجده : أنت فاكرك أنك هربت أنشالله تقعد جوه لحد بالليل أنا قاعدالك ..وأحضرت كرسى وجلست أمام باب الحمام وهى تسن السكاكين

سعيد : أيه الصوت ده ياماجده

ماجده من الخارج : أنا بسن السكاكين والساطور ياحبيبى

سعيد : ليه ياماجده أحنا ماعندناش لحمه فى التلاجه

ماجده : بس عندنا لحمه فى الحمام أن ما أقطعتك كباب حلة وشويت ريشك وفرمتك

سعيد : السلاح يطول ياماجده ..حتودى نفسك فى داهيه عشان حتت حلم

ماجده : هو حلم واحد يامجرم د أنت شغال أحلام بقالك أكتر من ست أشهر وكل يوم تنادى على واحده شكل..أن ماوريتك ياسعيد بس أطلع

سعيد من الداخل : أنا مريض يا ماجده حتى أسألى الدكتور( بسيونى )

ماجده : بسيونى..آلهى يولع بجاز هو كمان ..أنا مش عارفه الدواء أللى كاتبهولك خلاك زيدت فيها بدل ماكان حلم واحد فى الليله أصبح حلمين تلاته وأنا بأتفرس جنبك ..شهل أطلع أحسن لك

سعيد : حرام عليكى ياماجده عايز أروح الشغل بقالى يومين غايب وحيخصموا من الماهيه وقليل ما كان فيها تحقيق

ماجده: أنشالله يخصموا الماهيه كلها ويحولوا أوراقك على المفتى قادر ياكريم..كفايه مستحملاك ومستحمله قرف عيالك وعماله كل يوم أغير فى شكلى وفى لبسى زى ما قالى صخام البرك دكتور الهم والغم بتاعك.. أنك فى يوم ياندل تحلم وتنادى أسم ماجده..مفيش فايده أطلع بره أحسن لك (سعيد يفتح الباب قليلا وهو يقف خلفه)

ماجده :أطلع يا سعيد ماتخلنيش أتهور وأهد الحمام على دماغك

سعيد : أهدى بس ياماجده وأنا حقول لك كل حاجه

ماجده : طب أطلع خلصنى عشان عايزه الحمام

تدخل ماجده الحمام ويسرع سعيد إلى غرفة النوم ليأخذ ملابسه( فينسى جزمته وينزل وهو لابس الشبشب) ويفر خارج الشقه ليكمل أرتدائها على السلم فيصادف خروج مدام صفاء من شقتها لتفرغ الزباله فتجد سعيد يحاول أن يلبس البنطلون وهو واقف بملابسه الداخليه مسندا ظهره على باب شقتها فتفتح فيقع سعيد أمامها

فتفزع وترقع بالصوت فيجرى سعيد على السلم ليكمل ملابسه فى الشارع

ماجده تنادى على سعيد من البلكونه : خد الجزمه ياسعيد ( طراخ بوم تسقط فردة جزمه فى الشارع والفرده التانيه فى بلكونة الأستاذ نصحى

(الذى يغار على عروسته الجديده ويشاكل دبان وشه لمن يجرأ أن ينظر لها فيكون مصيره لكمه قويه تطيح بصف أسنانه)

سعيد من تحت : يامفتريه مالقتيش ألا البلكونه دى ترمى فيه فردة الجازمه

ماجده من فوق : أحسن.. أطلع لنصحى بقا وأستلقى وعدك

سعيد يكلم نفسه: النهار باين من أوله خلصنا من ماجده نلاقى نصحى يامنجى من المهالك يارب أعمل أيه لازم أجيب فردة الجازمه عشان أروح الشغل لو ماكنتش ماجده سنه السكاكين كان الواحد طلع لبس جزمه تانيه وما يصطبحش بوش نصحى (ماجده من أمامكم ونصحى خلفكم فأين المفر) أستعنا على الشقا بالله

الحلقة الثانيه

مدام ميمى

يصعد سعيد السلم للدور الثالث حيث شقة الأستاذ نصحى ويرن الجرس ويرجع بسرعه للخلف وهو يضع يده على وجهه أتقاء لأى لكمه مفاجأة

ينفتح الباب ويسمع صوت حريمى كله دلع

ميمى : ميييين أستاذ سعيد أتفضل

سعيد: شكرا يامدام ميمى أصلى مستعجل وعايز أروح الشغل ..لا مؤأخذه فردة جزمتى وقعت عندكم فى البلكونه

ميمى : طب أدخل خودها ياروحى أحسن أيديا مش فاضيه

سعيد : لا بلاش وحياتك تجيبيها أنتى

ميمى : أنت حر تبقى تعدى فى وقت تانى يكون نصحى جه من البيت التانى يدهالك بنفسه ( وهى تشاور على أنفه بالبوكس لتذكره بالعقاب )

سعيد : هو نصحى بيه مش هنا

ميمى : لأ ياروحى لأ يا حبوب ..أخلص أدخل خد جزمتك وخلصنا ( تقوم ميمى بجذبه من ذراعه وتدخله الشقه وتغلق الباب)

:عندك تلات بلكونات فى التلات أوض أدخل دور على جزمتك وخدها وغور قبل ما نصحى ييجى يطين عشتك..حاضر ياستى ميمى

يدخل البلكونه فيجد فردة الجزمه معلقه على فرع الشجره القريبه من البلكونه يحاول أن ينط ليصل إليها ولكن هيهات فينادى على مدام ميمى

لتحضر له سلم

ميمى: أخلص نزل جزمتك دى فى يومك أللى مش معدى

سعيد :لو سمحتى ياست ميمى أمسكى لى السلم أحسن أقع فى الشارع

ميمى : بسرعه خلصنى الله يخرب بيتك الراجل ممكن ييجى فى أى وقت

سعيد وهو يتراقص فوق السلم ويقفز للوصول لفردة الجزمه فيختل توازنه وينقلب فوق ميمى ليفترشا الأرض ...يغمى على ميمى من قوة أرتطام جسم سعيد بها ولاتضع منطق ..يقف سعيد فى ذهول فقد أعتقد بأنها ماتت فيجرى فى أتجاه الباب عدة مرات ثم يعود وهو يلطم يالهوتى يالهوتى منك لله ياماجده يامفتريه أعمل أيه فى النصيبه دى أعمل أيه يارب أسترها معايه ..يقوم بسحب جسد ميمى من البلكونه ليدخلها غرفة النوم ويرفعها بصعوبه ليضعها على السرير ويغطيها ويهم بالخروج فيسمع جرس الباب فيقوم بغلق الباب من الداخل يستمر الجرس فى الرنين بعنف والخبط بقوة ثم يسمع صوت نصحى وهو ينادى أفتحى ياميمى أفتحى ياحبيبتى ..ميمى ..ميمييييييييى

يختبئ سعيد وراء ستارة فى المدخل ..بوم بوم بوم طااااخ وأنفتح الباب على مصراعيه ويجرى نصحى فى أتجاه الغرفه التى ترقد فيها ميمى ويستغل سعيد فرصة أنشغال نصحى بأفاقة زوجته ويتسلل خارجا من باب الشقه ويجرى بأقصى سرعة إلى الطابق السادس ويفتح الباب ويغلقه بالترابيس ويجلس على أقرب مقعد وهو يلتقط أنفاسه اللاهثه وهو يحمد ربنا أن نجاه من هذا الموقف وهو يتخيل نفسه ونصحى يفصص جسده ويكيل له اللكمات القاتله

وهو فى ذهوله وأعيائه يجد يد تقبض عليه بعنف من الخلف

فيقفز مذعورا ليجد ماجده واقفه أمامه وهى تضحك ..

سعيد يتنبه انه بفردة جزمه وحيده فيصرخ: .الجزمه ..الجزمه ..ميمى الجزمه ..نصحى حيموتنى ياماجده ( ويلطم على وجهه )

تضحك ماجده : ياريت عشان أخلص من أحلامك السافله ..ما تخفش فردة الجازمه رماها( نصحى) فى الشارع أنزل جبها

سعيد : مش عايزها وآدى الفرده التانيه ( يقذفها من البلكونه فتسقط هى الأخرى فى بلكونة الأستاذ نصحى )ويسمع صوته وهو يشتم ويتوعد بالويل والثبور وعظائم الأمور للجيران الحسالة الذين يقذفونه بالجزم

نصحى ينادى على البواب : عبده عبدوووه أصحى ياراجل ياتنبل ..الجزم دى بتاعة مين

عبده يبرم شاربه ويضحك ضحكه خبيثه فتظهر سنته الوحيده :الدزمه دى مجاس 42 بتاعة الأستاذ سعيد أللى فى الدور السادس كل يوم بنطلع له واحده ولا أتنين ..مفيش غيره يا نصحى بيه أطلع له

نصحى : متأكد يا عبده

عبده : ألا متأكد هى دزمة الأستاذ سعيد أنا حتوه عنها ده يامه وقعت على دماغى يابوى..أطلع له ياراجل وأنا حا تصل بالأسعاف

نصحى : بلاش أسعاف أتصل بمشرحة زينهم ياعبده

عبده : هع أهو كده الرداله..بس لوسمحت يانصحى بيه وحياة أبوك خلص عليه دوه فى شجته علشان أنا لسه ماسح السلم..هع خخخخخخخخخ

الحلقة رقم (3 )

ماجده تقابل رامبو

ماجده تلطخ يديها وملابسها والسكاكين بصلصة الطماطم وتجلس فى أنتظار وصول نصحى

يرن جرس الباب فتفتح ماجده الباب وهى تمسك سكين طويله فى يد وساطور فى اليد الأخرى وعليهم أثار الجريمه الحمراء وهى رابطه رأسها بمنديل أبيض وعليه بقع الصلصه ومنديل آخر تربطه على فمها وأنفها يشبه الكمامه

نصحى يشاهد منظرها فيخاف ويرجع للخلف

ماجده : كويس أنك جيت يانصحى تعالى أمسك معايا

نصحى : أمسك أيه يا مدام

ماجده : رجلين الراجل الميت علشان أشفيها

نصحى : راجل ميت مين يامدام ( يتكلم وهو يتراجع للخلف )

ماجده : سعيد جوزى ..تعالى قرب أنا حطه الجثه فى البانيو

نصحى يبعد أكثر ويستعد للهرب : جثه ورجلين وحتشفى وأمسك معايا ..أنتى دبحتى جوزك ياست ماجده

ماجده : أيووه.. يستاهل كل شويه يحدف جزمته من البلكونه طهقت منه قلت أخلص عليه ..ماتيجى تمسك معايا وأنت واقف زى الهلف كده أتحرك ياجدع لغزك وأنزل كرشك المدلدل ده على الأرض

أنما أنت كنت عايز أيه وبتخبط علينا ليه ؟؟

نصحى : مش عايز حاجه ..مفيش ..سعيد وحشنى جيت أشوفه

ماجده تكبس عليه أكتر وهى تضع السكينه بين عينيه..هيه عايز تشوفه

نصحى : بلاش وقت تانى متشكر متشكر أعدى فى وقت تانى

صوت سعيد وهو ينادى على ماجدة : ماجدة مااااجده مين معاكى بره

ماجده (فى سرها..الله ياخرب بيتك يا سعيد حتبوظ الشغل ) حاضر ياحبيبى أخلص من الحته الملظلظه دى وآجى أشفيك

نصحى ينظر بأستغراب : ده سعيد لسه عايش

ماجده : غريبه رغم أنى دبحاه وشاربه من دمه كبيتين من ساعه عفريته يلحق يطلع ..تعال معايا نشوف الحكايه دى وتمسك قصادى العفريت عشان ندبحه هو كمان

يضع نصحى ديله فى أسنانه وهويجرى يااااامه ألحقونى ألحقونى مجنونه مجنونه ألحقوووونى

ماجده تطل من على السلم وهى تنادى : أطلع يانصحى ياخواف ياجبان بس عاملى غضنفر على الفاضى..بتجرى ياجبان أخص عليك راجل خسع

تدخل ماجده وتغلق الباب وتكشف الغطاء عن سعيد فتجده يغط فى النوم

ماجده : ماشى يا سعيد يعنى مش حتصحى وتستدير لتخرج من الغرفه

فتسمع صوت سعيد وهو يحلم وينادى : سميره ..سميره تعالى ياحبيتى

تصرخ ماجده وتقفز فوق سعيد وتخنقه بيديها

الحلقه رقم(4)

فى عيادة الدكتور بسيونى

سعيد : نقعد نتفاهم ياماجده وبلاش الساطور والسكاكين وحياة أبوكى

ماجده : أنت خليت فيه مخ وعلى كلن نتفاهم عايز تقول أيه

سعيد وهو يتغلبن : أنا مريض يا ماجده

ماجده : أن مابطلتش حكاية أنا مريض دى مش حيحصلك طيب

سعيد : بلاش ماتتعصبيش فى عرضك..أحنا عايشين مع بعض بقالنا كام سنه ..عشر سنين..أنا كنت لما بنام كنت بقول أسامى أو كلام أوحتى يطلع لى نفس

ماجده : كنت بتشخر يا سعيد وصوت شخيرك كان بيصحى العيال والجيران وكنا بنقفل عليك الأوضه ونحط فوق راسك ثلاث مخدات وفوطه نقفل بيها بوأك

سعيد : وبعدين ودتينى لدكتور أنف وأذن وشالى اللحميه وكتب لى على دواء باخده قبل النوم وضاع الشخير وبقيت أنام طبيعى

ماجده : راح الشخير وطلعت لى بالأحلام الهلس بتاعة كل ليله أللى بتحرق دمى بيها ..الشخير كان أرحم ياسعيد

سعيد: بطلت الدواء بتاع الشخير ..

ماجده : وزادت الأحلام ..قلت لى حاله نفسيه فروحنا للدكتور بسيونى ..كتب لك على دواء ..حالتك أتنيلت أكتر بدل ماكنت تقول كلمتين تلاته وأنت نايم بقيت بتحكى الحلم كأنك صاحى وتقعد تبوس فى المخده وأنا قاعده حولع جانبك ..جننتنى معاك أنا مش عارفه أعمل فيك أيه

سعيد : نروح تانى وتالت للدكتور بسيونى أوحد تانى غيره يشوف لينا حل ونرجع سمنه على عسل أسود زى زمان

ماجده : هو ما فيش غيره دكتور المجانين أللى بوظ دماغك قوم ألبس نروح نشوفه وحدخل معاك المره دى وأشوف أيه حكايتكم أنتم الأتنين

ياعالجك كويس ياخلصت عليكم أنتم الأتنين وأرتاح وأريح الناس من خلقتكم تتكم القرف

******

يخرج كل من سعيد وماجده من باب العماره فى طريقهم لعيادة الدكتور

بسيونى فى وسط البلد فيتوقف سعيد أمام عبده البواب المدد على الدكه فى مدخل العماره وهو يضع رجل على رجل وهو آخر سلطنه ويغنى ( ما حلاها عشت الفلاح مجدوع على ظهره ومرتاح...... )

عبده : مين الأستاذ سعيد ..حمدالله ع السلامه أنت رجعت من القرافه ميته

سعيد : فز قوم ياراجل ياخرفان الله يخرب بيت الصنف أللى لحس مخك

عبده وهو يفرك فى عينيه : أومال الأستاذ نصحى بيقول أن المدام بتشفى فيك فوق فى البانيو أزاى

سعيد : نصحى ده متخلف زيك ..أن ماوريتك ياعبده يا صعيدى ما بقاش أنا سعيد بتفتن عليا وتقول أن الجزم أللى بتنزل عليه بتاعتى ياندل

عبده : عايزنى أكدب يا أستاذ سعيد ..بس جولى وحياة أبوك عايز أفهم أزاى المدام دبحتك ولسه عايش لحد دلوقتى

سعيد : ما هو أنا عفريت الأستاذ سعيد ياجاهل

عبده : صوح البيه نصحى بيقول كده برضه ... (يراجع نفسه وينظر فى وجه سعيد جيدا ) الصنف مضروب صوح... ليك حق يا بشمهندز

ماجده : حسابك معايا بعدين ياعبده أن ماخليتك ترجع بلدكم ماشى

الحلقة رقم (5 )

فى العياده

يدخل سعيد وماجده العياده فيجدوا (حسنيه ) الممرضه ناكشه شعرها وتجلس على المكتب وهى تبرد فى أظافرها و لا تعيرهم أدنى أهتمام

ماجده : الدكتور موجود يامدام

حسنيه : آنسه من فضلك ..

ماجده : بلاش يا مدام ..الدكتور موجود يا نسناسه

حسنيه : أترزعوا أقعدوا على ماديله خبر ..قرفتونا بجنانكم مفيش حد عاقل ييجى العياده ماتتحركوش من مكانكم لحد ماجى سامعين

ماجده : طب خلصى فى يومك المقندل ده

سعيد ينظر بأستغراب للشنطه التى تحملها ماجده : هى مال الشنطه بتاعتك منفوخه كده هى فيها أيه

ماجده : مالكش دعوه يا سعيد دى عدة الشغل

سعيد يتحسس الشنطه : يا نهار أسود أنت جايبه السكاكين والساطور معاكى عايزه تموتينا أنا والدكتور

ماجدة : حشرب من دمكم أنت والدكتور والنسناسه أللى جوه بعد ماسلخها

حسنيه: أتفضلوا خشوا للدكتور..عالم زباله

ماجده : ماشى رجعالك ياذوق عشان أظبطك

حسنيه : مرسي يا أبله ..

أبله يامرضعة قلائون

الدكتور بسيونى : أهلا وسهلا سعيد بيه ..أكيد دى المدام ..أهلا يا مدام ..هيه أنا شايفك كده بقيت أحسن من الأول كتييييييييير

ماجده : زفت وهباب وحالته بقت أنيل على أديك

بسيونى : أهدى شويه يامدام ريلكس ولو سمحتى أطلعى بره عشان أكشف عليه

ماجده تخرج الساطور من الشنطه : شوف شغلك وألا حقطعك جزل جزل

وعايزه أشوف النتيجه يا يخف ويبقى سليم.. ياحشيت وسطك

بسيونى وهو خائف: أوكيه بس لو سمحتى أبعدى الساطور ده

ماجده : عارف لو ماتعدلتش وقولت لى الراجل ده عنده أيه حيبقى النهارده آخر يوم من عمرك أكشف وخلصنى ورايا شغل بره مع الممرضه بتاعتك

الدكتور: بلاش وحياتك دى خطيبتى و ما صدقت لقيتها

ماجده : يعنى لقيت حاجه عدله تتك القرف فيك وفى ذوقك

الدكتور وهو يرتعش : نام يا أستاذ سعيد ..هيه أيه أخبار الأحلام دلوقتى لسه بتشوف ستات وتكلمهم ويكلموك

سعيد وهو خايف يتكلم وينظر إلى ماجده الواقفه فوق رأسه وفى يدها الساطور ويهز راسه بالموافقه دون أن يتكلم

الدكتور يحتد : ما ينفعش الكلام ده يامدام شيلى الساطور وأقعدى خلينى أعرف أكشف على المريض أحنا فى سلخانه

ماجده : أنت بتزعألى ياض حسابك بعد الكشف.. أكلم ياسعيد ما تخفش أنا شلت الساطور قول للدكتور على كل حاجه ما تخبيش أى شيئ

سعيد: أقول ياعنى ومفيش زعل ...قول وخلصنى

أنا يادكتور كنت بشوف الأحلام الأول أبيض وأسود وكانت بتاع عشر دقايق أو ربع ساعه بالكتير وبعدين تقطع دلوقتى بشوفها ألوان وبتاخد ساعه وربع ويوم الخميس تستمر ساعتين تلاته أربعه

الدكتور يصفق وهو سعيد : سهره يعنى هايل يا سعيد أنت كده سيبت المحلى ودخلت على الفضائيات ..أنما عامله أيه معاك محطة ميلودى ميوزيك

سعيد : يعنى مش واضحه قوى بس بتيجى فى الفاصل قويه جدا بين كل حلم وحلم

بسيونى : أعدل دماغك كده نام على جنبك الشمال غمض عينيك هيه أسراااح وخد نفس عميق هيه شايف أيه

سعيد : كده بقيت أبيض وأسود

بسيونى : طب أنعدل على جنبك اليمين وغمض وخد نفس عميق أسراااح هيه شايف أيه

سعيد : الله يادكتور حاجه جميله قوى وألوان وناس زى العسل

بسيونى : فتح وغمض تانى وسيبك من القمر الأوروبى بلاش فضايح وخلى يومنا يعدى وأنقل على النايل سات ..

سعيد : ييه دخلنا على الغم بتاع الجزيرة ودريم والمحور والفضائيه المصريه

ماجده : طب ما تظبطه على الأسرة والطفل وأقرأ والناس وبرامج الأطفال

مش يكون أحسن

الحلقة رقم (6)

بسيونى : هشششش أسكتى ياست أنتى.. خلينا نشوف شغلنا هو النصيبه أللى فيها جوزك دى مش شويه وأن مخه يتلغبط من تحت راسك ويستقبل الأرسال التليفزيونى..قوم يا سعيد

ماجده : أنت تفهمنى براحه كده وبشويش أيه أللى حصله لو مابتعرفش تعالجه قول وريحنى وأنا أخده على كهربائى تليفزيونات فى شارعنا ..هو بيأخر الحاجه عنده شويه وبيسرق منها قطع غيارها الأصليه بس فى الآخر بتتصلح ...أنشالله يقعد عنده شهرين تلاته ويسرق القولون بتاعه المهم فى الآخر حيبقا كويس

بسيونى : ياسلام عليكى يامدام الطب النفسى أتقدم كتير قووى ولو فشلنا فيه ممكن نسفره كوريا أو اليابان عندهم حالات كتير مشابهه لحالة سعيد غير القطع الغيار الأوريجينال أطمنى يامدام وأستريحى

ماجده : أنت لازم تفهمنى المرض ده جاله من أيه وهو معدى ولا مش معدى

بسيونى ينجعص فى مكتبه : شوفى يامدام مرض جوزك ده مرض نادر بيصيب 10 فى كل مليون وده يرجع للحرمان العاطفى والقلق النفسى

ماجده : عندك أعمل أستوب.. حرمان عاطفى أيه وقلق نفسى أيه ..(ثم توجه كلامها لسعيد المنكمش فى الكرسى) ..أنا مقصره معاك فى حاجه ياسعيد

سعيد يهز رأسه بالموافقه ويرفع الأبهام عاليا ..أنتى كده زى الفل

كمل يادكتور أما أشوف نهايتك أيه أنت والتليفزيون أللى قاعد قدامى

يكمل بسيونى : لو سمحتى يامدام ما تقاطعنيش أنا مش فاضى ورايا أجهزه قصدى عيانين قاعدين بره

ماجده : أتلهى دى العياده بتنش كمل وبلاش لاماضه وألا حطير مناخيرك والله؟؟

بسيونى يتحسس مناخيره: نتيجة هذا الحرمان حدث عنده أنبعاج شريانى فى المخيخ أدى إلى تحوصل متعدد بكومبنيشن المخ وأنحوار فى ملفات الدماغ وسكسكه متقطعه لعمود الكامات وأنزواء فى ليفة المخ المبطنه لفروة الراس أدى إلى تأخير فى الشراره وأستقبال ترددات عاليه لموجات الديش ولاسلكى الأمن المركزى

ماجده :عليا النعمه ما فاهمه حاجه أنت دكتور ولا ميكانيكى ولا سباك الله يخرب بيتك لعبكت دماغ الراجل أن ما أشتكيتك فى النقابه ودفعتك دم قلبك وطالبت بتعويض يقطم وسطك

بسيونى : تعويض ههههه ده بكتيره ياخدوه منك ويدولك مكانه رسيفر صينى أو مروحه

ماجده : قوم ياسعيد قبل ما خلص على أبن المجنونه ده

بسيونى : شرفتى يامدام ولو أحتجتى أى حاجه فى فترة الصبح أبقى عدى عليا فى المحل فى العتبه يمكن نقدر نظبطهولك ويجيب الأيه أر تى والشوتايم

ماجده تسحب بسيونى من الكرافته وترقعه بالروسيه فيقع على كرسى المكتب وهو يضحك قبل أن يغمى عليه : كده أنا شايف 16 قمر والنجوم خخخخخخخخخخ

الحلقة رقم (7)

قطيعه هانم

ماجده :شوفتى يا قطيعه ياختى حظى المقندل الراجل الدكاتره لعبو فى دماغه لحد ما بقى سته سيستم

قطيعه : والنبى زى العسل ..فين ياختى الدكتور ده أخد له( براوى) جوزى بدل ماهو قاعد لى فى البيت زى قرد قطع..على كده بيجيب مسلسل

(نور)

ماجده :بيجيب كله كله حتى ماتشات الكورة المتشفره ولو الكهربا قطعت يقعد يوش شششششش

قطيعه : طب ركبيله حجرين قلم .ههههههه

ماجده : تتك أيه ياقطيعه

قطيعه : هو المرض بتاعه قال لك الدكتور أسم أيه

ماجده : بيقول أسمه( تلى سيكوو )

قطيعه : هو سى (سيكوو )ده مرض معدى يا حبيبتى

ماجده : بيقول الدكتور ممكن يعدى لو قعدتى قدامه فتره كبيره

قطيعه: خدى بالك من روحك أحسن يوديكى المورستان ..عارفه عفيفه مرات حسنين الضبش..جوزها بعيد عن السامعين..صبحت الصبح لقته عمال يدى أمبليهات وكلاكسات وبيقول عنعنعنعنن ويلف فى الشقه وأفتكر نفسه موتسكيل وهاتك يارمح طول النهار قالوا لها سبيه فى المستشفى وهو يبقى كويس قالت أومال مين أللى يقضى الطلبات ويودى العيال المدرسه ما فاتش شهر وتشم منه وتتعدى ويجالها بسم الله الحفيظ نفس المرض ووقفت فى أول الشارع توصل الناس وعامله فيها توكتوك.. وهما الأتنين مشرفين دلوقتى فى السرايا الصفرا

ماجده : وأنا فاكره أن سعيد بيعرف ستات من ورايا ..ياعينى عليك يا سعيد آدى أللى نابك من القاعده قدام التليفزيون..بس وحياتك ياقطيعه يابنت خالتى مانا ساكته لازم أوديه لأحسن دكاتره وأعالجه وأخليه زى الفل..بيقولوا أن فيه دكتور مخ وأعصاب لسه جاى من أمريكا الكل بيتشكروا فيه وحياتك لأحجزله وأصرف عليه أللى قدامى وأللى ورايا

قطيعه : بس خلى بالك يا ماجده تتعدى منه

ماجده : الحقيقه سعيد بينام بره فى الصاله على ترابيزة التليفزيون

ولما يحب يروح الحمام يضرب موسيقى ويقول شوية أعلانات وهوماشى

ولما يخلص يقول عدنا

قطيعه: والنبى عسل أهو بيسلى مش أحسن من الموتسكل والتوكتوك

ماجده : مانتى قاعده ياقطيعة لحد ماييجى سعيد من عند الكهربائى حيظبط له لمبة الصوت وجاى على طول

قطيعه : معلش أصلى راكنه( براوى) تحت فى الممنوع بعدين الونش يشيله أو يكلبشوه..باى ياحبيبتى

ماجده : أهلا..خلى بالك أنتى من نفسك لاتبقى ميكروباس

قطيعه : عتبه عتبه عتبه..عرابى عرابى عرابى عنعنعنعن بييب

ماجده : سكتك خضراء يا أسطى قطيعه

الحلقه رقم (8)

زواوى الطبيب المداوى

تحجز ماجده عند الدكتور زواوى طبيب المخ والأعصاب المشهور القادم حديثا من أمريكا ليعالج سعيد بأحدث طرق العلاج فى العالم

د. زواوى : نام بليز مستر سعيد ..شت يور أيز

سعيد : دكتور أنا مش شايف شريط الترجمه لو سمحت أنزل بالعربى زواوى : أوكى ..أنت بتشتكى من الحاله دى بقالك قد أيه

سعيد : من سبع تمن تشهر يادكتور

زواوى : بتحس بصداع ولا ألم فى الراس

سعيد : بحس بصداع من بعض البرامج ..خاصة من معلقين الكورة

زواوى: حنشوف وبعدين نحكم..ينادى على الممرضه والمساعدين

جهزوا الأستاذ على جهاز الفوتيك

الممرضه: الفوتيك ما أتحرق منك أمبارح وأنت بتكشف على الأستاذ مرتضى منصور

زوواى : خلاص حطيه على جهاز البيانوتيك وأربطى أيديه ورجليه كوويس وشربيه أى عصير أوحاجه ساقعه على مانخلص

يجلس زواوى أمام شاشة الكمبيوتر المتصله بالجهاز ..نبتدى يابنتى

أبتدى يادكتور.. أقعدى جانبى هنا يامدام ماجده عشان عايزك تجاوبينى على بعض الأسئله والأستفسارات وأنا شغال...جاهزين ياولاد ..جاهزين يادكتور أبعدو عنه وأقفلوا الستاره عليه..بسم الله الرحمن الرحيم ربنا يصبرك على ما بالك فوووووووم

ماجده : أيه ياعم أنت بتدبح فرخه

زواوى : شت آب كرازى وومن

ماجده :بلاش شت آب ..هات لى سفن آب وسندوتش همبروجر والحساب يجمع ..

هسسسسسسس.أسكتى خالص

يسمع صوت سعيد وهو يصرخ ويضحك فى نفس واحد آى أه أههههههه يوووووووههه

ماجده : كفايه يادكتور الراجل حيفطس

زواوى : هششش أبتدى مخه يعمل up Load..كويس حيفتح أهه..مشالله..جوزك يامدام مرتب دماغه كويس قوى فى ملفات Files

And Folder…very good

ماجده : من ناحية هو منظم هو منظم بس أتعلم النظام على أيدى

زواوى : أيه الفولدر الكبير ده ..مكتوب عليه الأيام السوده..Black Days ياها ده فيه أكتر من عشرتلاف خناقه فى عشر سنين كتير قوى يامدام هو أزيد من المعدل العالمى بكتيييير ويعتبر عادى بالنسبه للمعدل المصرى حنفتح كام فايل كده عشان نقدر نعرف عقدته فين الغلبان ده يضغط عل الفايل رقم 85 فيفتح الفايل على Windows Playerليعرض الخناقه ..تظهر ماجده فى البلكونه قبل ماتتخن وهى تنادى على سعيد ( أنا أهه قبل ماخلف الواد تامر أخص عليك ياسعيد ما فرجتنيش على الشريط ده ..

زواوى يوقف العرض: هششششش أسكتى خالص ده مش فيلم دى البلاوى أللى متخزنه فى مخه وملخبطاه مش عايز أسمع صوتك خالص

حنبتدى تانى ياجماعه كلاكيت تانى مره : بسم الله الرحمن الرحيم ربنا يصبرك على ما بلاك

فووووووووووووووم

سعيد يصرخ بصوت عالى ويضحك فى نفس الوقت أأأههه خخخخخخ

ماجده: فيه أيه تانى

زواوى : بيعمل( أب لود) من تانى عشان خاطرك ..مسكين الراجل ده أستحملك كتير قوى

ماجده : بس جه فى الآخر كان بيهنج وتقل قوى ..تتكم نصيبه دكاتره فقر واحد يطلعهولى تليفزيون والتانى قلبهولى كمبيوتر بكره تعملوه كيتشن ماشين..ربنا يستر أستمر يادكتور أنا حسكت خالص أهه

زواوى : سوفاج

ماجده : أهى الكلمه دى عارفاها بتقولها مدام ريتا لما بهزأها..حسابنا بعدين يازواوى

زواوى : أكتمى خالص العرض حيبتدى

يتبع

الحلقه رقم (9 )

الفايل رقم ( 85 )من مجلد الأيام السوداء

أدخل وحمل

المنظر:ماجده تقف فى البلكونه وتنادى على سعيد

ماجده : أطلع بسرعه عايزاك فى حاجه مهمه..أجرى ..خف نفسك شويه

سعيد : خير فيه حاجه

ماجده : لما تطلع حتعرف

سعيد ياأخذ الست أدوار قزح ليصل إلى باب الشقه وهو قاطع النفس:أيه أللى حصل ياساتر أستر يارب

ماجده : تعال ورايا ..بص ماشلتش ليه الأطباق بعد ما فطرت وأيه بنطلون البيجامه ده أللى رميه فى الأرض..أنت بتستهبل يا سعيد مش شايفنى حامل وعلى آخرى حمشى ألم وراك أتفضل شيل الحاجات دى وأغسل الطبقين أللى أكلت فيهم

سعيد : أنتى بتطلعينى الست أدوار على مله وشى عشان الكلام الفارغ ده

طب مش حشيل حاجه بقا فى يومك الأسود ده يا مجنونه يابنت المجانين

ماجده : أنا مجنونه وبنت مجانين..أنت بقا ما شفتش الجنان أللى على أصله.. تحب أفرجهولك طب هه ( تقوم بقذف الأطباق والبيجامه من البلكونه )

صوت أحد الماره : ياعالم يابهايم يا ولاد الكلب

عبده البواب : الحجات دى يابيه بتاعة واحد ساكن فوق أسمه الأستاذ سعيد ساكن فى الدور السادس.. أطلع له وريله شغله بس هات البيجامه دى تنفع الواحد ينام فيها

وتستمر الخناقه بين سعيد وماجده والجيران والبواب حتى يغلق الفايل وسعيد بايت على القهوة والجرسون يصحيه ليدفع الحساب وصوت الفجر يقول الله أكبر وسعيد يرفع يده مبتهلا ليرفع عنه هذا البلاء

زواوى : دى نصيبه وبلوى من بلاويكى الراجل محتفظ بها فى الذاكره ومش عارف يعملها Delete

ماجده : أخص عليك ياسعيد ده أنت قلبك أسود قوى

زواوى : نشوف الفايل ده رقم 1720..قيسوا درجة حرارة المريض ياجماعه شغلى المراوح يانجاة المريض حيهنج كده ..3..2..1أكشن

يتبع

الحلقة رقم(10)

الفايل رقم 1720

من مجلد الأيام السوداء

عيد ميلاد ماجده

ماجده : النهارده أيه ياسعيد

سعيد : النهارده الخميس ياماجده

ماجده : قصدى كام فى الشهر ياسعيد

سعيد :28 من أغسطس يا ماجده كلها كام يوم ونقبض أحسن بقينا على الحديده

ماجده : 28 أغسطس ده مابيفكركش بحاجه يا سعيد

سعيد : لأ مش فاكر قولى أنتى

ماجده : أصحى ياسعيد مش عايزه أستهبال ..النهارده عيد ميلادى ياحبى

سعيد : كل سنه وأنتى طيبه

ماجده : مالك بتقولها من غير نفس كده وماتنفعش كده حاف

سعيد : وآدى بوسه ياستى كل سنه وأنتى طيبه ..

ماجده وهى تبعده عنها :أنت حتسوق فيها وتكمل الأستهبال ..عيد ميلاد معناه هديه يافالح أنا مش عايزه حاجه معينه حسيبك تجيب حاجه على ذوقك ياسعيد

يحضر سعيد فى المساء ومعه صحبة ورد صغيره بها خمس وردات وملفوفه فى ورقة سلوفان

ويقبل ماجده وهو يقول

سعيد : مالقتش أحسن من الورد أقدر أأقدمه ليكى ياحياتى

ماجده تأخذ منه والورد وتطوحه من البلكونه فيقع داخل سرادق العزاء المنصوب أمام البيت

ماجده : جايب لى ورد ياسعيد فاكر نفسك طالع التورب..الرجاله تجيب فستان ..جزمه ..شنطه ..حتتين دهب يحطهم فى أيد مراته جايب لى ورد ياراجل يا أيحه يا بخيل

سعيد : أنا أيحه وبخيل ياماجده ..أعملك أيه إذاكانت أمك ولداكى آخر الشهر أجيبلك منين ..عنك ماخدتيه..خساره فيكى أنت كنت عايزه كلابشين لأديكى يا مفتريه

وتتصاعد حدة الخناقه بينهم ويرن جرس الباب فيفتح سعيد فيجد الأستاذ عاشور جاره وبعض المعزيين وعبده البواب وهو يمسك باقة الورد التى طوحتها ماجده من البلكونه

عاشور : الورد ده بتاعك

عبده : أيوه بتاعه ياعاشور بيه حتى كمان مالوش ريحه خخخخخخخخ

سعيد :بس أنا ما أقصدش أحدفه عليكم ده وقع من المدام وهى بتنشر

عاشور : طب أمسك كده الورد ..وخد دى علشانك ويتلقى سعيد لكمه قويه فى فكه ترميه فى وسط الصاله وتقف ماجده فوق رأسه وهى تعد ..1234

وينتهى الفايل وسعيد يقف فى بلكونة منزله والفجر يؤذن الله أكبر وهو يبتهل إلى الله أن ربنا ياخد ماجده ويريحه منها

ماجده : أخص عليك ياسعيد بتدعى عليا يامجرم ياظالم ربنا يورينى فيك يوم ...وأنا حموت نفسى عشان تخف أنشالله تموت أنت

زواوى : ده كويس أن الراجل ده عايش..أنت ست مفتريه فيه فولدر أهه مكتوب عليه اللحظات السعيده نفتحه ونشوف فيه أيه Folder is empty يانهار أبيض مفيش ولا لحظه حلوة فى حياته لالالالا

ويظل زواوى يفتح ويغلق ملفات وسجلات سعيد ويؤنب فى ماجده

ماجده وهى تبكى : طب والعمل يادكتور حنسيبه كده

زواوى : مفيش قدامنا غير العمليه

ماجده : يالهوى عمليه..عمليه أيه يادكتور

زواوى : عمليه أسمها Formating نمسح فيها دماغه بالكامل ونخليها على الزيرو يعنى يرجع بحالة المصنع وبعدين نرجع له الملفات الضروريه أللى تخليه يعرف يكمل حياته الطبيعيه بس على الله نلاقى السوفت وير بتاعه فى السوق...يادكتور زكى شوف كده رقم السوفت وير بتاع الأستاذ سعيد موجود ولا لأ ..

د. زكى : رقم السوفت وير ده مصرى ومن النوع القديم قوى ومفيش زيه فى السوق..فيه صينى وتيوانى وأيطالى وفيه أنجليزى أصلى

ماجده : بلاش صينى يادكتور أنا مش فاضيه أعمله سوفت وير كل شويه

زواوى : الأنجليزى حراق شويه بس أيه أضمنه برقبتى وحنحاول نعربه عشان يعرف يتفاهم معاكم

ماجده : أجيبه من سوق العصر بتاع الكمبيوتر ولا أيه

زواوى : لا ياماما لا أحنا نبعت نستورده من بره أورجينال نسخه أصليه..ماتشليش هم حنحجز الأستاذ سعيد عندنا 15 يوم تيجى بعديها تستلميه

ماجده : وعليه ضمان قد أيه ؟؟

زواوى : العمليه مضمونه 10 سنين أنما السوفت وير لمدة سنه لو ماعجبكيش ممكن تغيريه بأى نوع يعجبك هيه موافقه شاورى نفسك

ماجده: موافقه ياخويا موافقه أنجليزى أنجليزى أهو ينفع يذاكر للعيال

زواوى : أوكى ماتنسيش تاخدى الوصل علشان تعرفى تستلميه بيه

ماجده وهى خارجه :مع السلامه يامستر سعيد باى باى ..my love

الحلقة رقم (11)

سعيد بعد التعديل

بعد 15 يوم تذهب ماجده لعيادة الدكتور زواوى لآستلام سعيد بعد عملية الفارمته للمخ ..وتقوم بتقديم أيصال الأستلام للموظف المختص

الموظف ينظر فى الأيصال ثم يهز رأسه : مستر سعيد حاليا على الشاحن ولما يخلص حيخش على التست يعنى قدامك ساعتين على ما يخلص لو مستعجله عدى علينا آخر النهار تقدرى تستلميه

ماجده: أنا مش عارفه دى عياده ولا دراى كلين أنا عايزه أشوف جوزى وأطمن عليه

الموظف : ممنوع يامدام

ماجده : شوف بقا ما ما تخلنيش أطلع زرابينى عليك ..حشوفه يعنى حشوفه لصورلكم قتيل هنا

الموظف: طب أهدى يامدام أنا ماليش ذنب أدخلى للدكتور زكى أللى ماسك الورشه وأتفاهمى معاه يمكن يقدر يسلمهولك

ماجده : فين الأسطى زكى ده ..

الموظف :عندك فى آخر الطرقه على اليمين

ماجده تدخل الغرفه فتجد سعيد ممدد على السرير ومتصل براسه عدة أسلاك تنتهى بجهاز الشحن والدكتور زكى منهمك فى عمله

ماجده: سعيد حبيبى عملوا فيك أيه ولاد الـ...

زكى : أنتى تانى أيه أللى دخلك هنا..ياحمير يابتوع الأمن تعالوا أرموا الست دى بره العيان جات له جومه لما شافها

ماجده : ورحمة أمى ما نا طالعه ألا لم أطمن عليه قولت أيه بقا فى يومكم المقندل ده

زكى : طيب سيبى رقبتى حتخنق وأقعدى بعيد على الكرسى أللى هناك

ماجده : وآدى قاعده

زكى : الحمد لله اللمبه الخضراء ولعت أبتدى الشحن مش عايز منك ولاكلمه مفهوم

ماجده : هو ماله عمال يبربش كده

زكى : أبتدت عملية الشحن يا جاهله كلها نص ساعة ويشتغل

بعد نصف ساعه يفوء سعيد ويجلس ويرطن باللغه الأنجليزيه

ماجده : يانهار أسود وحتفاهم معاه أزاى ده

زكى : أصبرى وياريتك تقعدى بره علشان نعرف ننزل النسخه العربى

بعد ساعتين تدخل ماجده لمشاهدة سعيد بعد التعديل الفرنكو أراب

سعيد : من هذه ( الومن ) woman

زكى : أنها يور ويف ياسعيد your wife

سعيد : أوكيه ..لكن شكلها ليس جيدا أنها تشبه ( المونكى ) monkey

زكى : حاول مرة أخرى التعرف عليها( رفرش آجين بليز ) refresh

سعيد : أنا أحاول (ريسرش)..نتيجة البحث زيرو reseash

زكى : حاول مرة أخرى فى ملفات الصور

سعيد : فضلا أنتظر ..نتيجة البحث صفر

ماجده : مسحتونى من ذاكرته ..أنا حوديكم فى داهيه ياولاد الكلب أنا عايزه الدكتور زواوى ييجى هنا حالا يشوف النصيبه السودا أللى عمالها فى الراجل..أنا ياأنتم فى القسم يا نصابين يانورر..أنا أدفع دم قلبى علشان تنظفوا مخه تقوموا شايلنى من ذاكرته ..طب آخده أعمل بيه أيه أعيش مع راجل غريب وكمان خواجه ده حتى يبقا حرام ..فين زواوى هاتوه

سعيد : بليز دكتور زكى أخرجوا هذه المرأة الشرشوحه

زكى : فرى جود ملف الشتيمه أشتغل..يارب عقبال الباقى 

ماجده : فرحان قوى أن ملف الشتيمه أشتغل يا أهبل يا أبن الهبله طب فين الملف أللى فيه صورتى الراجل مش عارفنى يادى النصيبه

زكى : لما ييجى دكتور زواوى حيفهمك على كل حاجه

سعيد : أنتى ست مقرفه لا أريد سماع صوتك من فضلك أخرجى (أوت )

أننى لا أحب الأزعاج زكى

ماجده :( I am)ماجده ياسعيد( يور ويف)

ماجده : الراجل مش عارفنى يادكتور أعيش معاه أزاى

زواوى : ده من حظك ياماجده..دماغه دلوقتى صفحه بيضاء وجميع بلاويكى أتمسحت تماما من ذاكرته أبدأى حياتك من جديد

سعيد L وت زا ميننج أوف) ماجده دكتور زكى

ماجده : يالهوى ..يالهووووى ...ياخراشى ما كنش يومك يامستر سعيد

يتبع

الحلقة رقم(12 )

حياه جديدة

زواوى : أقعدى يامدام وأهدى أتفضلى ياستى شهادات الضمان

ماجده : منظره يادكتور مش طياقنى ده كل ماكلمه مايردش عليا

زواوى : واحده واحده حياخد عليكى..بس حبيه مش تعذبيه زى الأول

لو عاملتيه بطريقتك دى قليل لو خلص عليكى أو يطفش منك هو دلوقتى نصه أنجليزى ونصه مصرى عامليه برفق وحنيه شوفى الخواجات فى المسلسات الأجنبى بيعاملوا رجالتهم أزاى ..فرصه تبتدى حياه جديده

ماجده: طب لو ماعرفتش أتعامل معاه

زواوى : فى الحاله دى لازم نعملك أنت عملية فرمته زيه عشان تعرفوا تعيشوا مع بعض..بس جربى الأول ونشوف

ماجده :هيا بنا ياسعيد

سعيد : تقدمينى يا سيدتى ليدز فيرست

زواوى : فيه أحسن من كده حتلاقى راجل مهذب فين فى الوقت ده

علشان تعرفى أن نسخه أنجليزى أصلى

سعيد : شكرا أيها الطبيب جود باى

ماجده : ياله ياخويا ندور لنا على تاكسى (سعيد يقف ولا يتحرك )

زواوى : كلميه بالفصحى يامدام وبعد كده علميه العاميه واحده واحده

ماجده :هيا بنا ياسعيد نبحث عن سياره أجره..ههههه أهه بيمشى ياحلاوه

زواوى : فرى جود سعيد ...

سعيد :سانك يوه سير باى

زواوى : ماتنسيش يامدام تكلميه بالفصحى أو بالأنجليزيه وما تقرصيش عليه هو دلوقتى فى التليين مش عايزين مشاكل وحياة أبوكى

يتقدم سعيد فيفتح باب التاكسى لماجده وينحنى أمامها ثم يركب بجوار السائق

ماجده :كوم هيير بجانبى يامستر سعيد

سعيد : لا أريد أن أرفع الكلفه بيننا سيدتى (سانك يوه)

يصل التاكسى إلى بيت سعيد وينزل سعيد مسرعا ليفتح لماجده الباب

ماجده : حسابك كام يا سطى

السواق : مية جنيه يامدام

ماجده : مية عفريت يركبوك ويركبوا أللى خلفوك أنت فاكرنا سياح خد آدى خمسه جنيه وبوس أيدك وش وظهر ..هيا ياسعيد نصعد الدرج

سعيد: تقدمينى سيدتى ليدز فيرست

ماجده : سوف تشاهد أبنائك الأعزاء الأن موجودين مع مسيز / قطيعه أبنة خالتى أسرع ياسعيد

سعيد : من هذا الرجل الذى ينظر ألينا ويطيل النظر سيدتى ماجده

ماجده :أنه عبده حارس العقار ياسعيد

سعيد يتقدم فى أتجاه عبده البواب ثم يقوم بضربه على قفاه وهو يقول : لاتنظر ألينا هكذا يارجل ..دونكى ووغد

عبده : أضرب زى ماأنت عايز أنما تقولى( دونكى) نو وألف نو

يتركه سعيد ويكمل الصعود مع ماجده لشقته

يتبع

الحلقة رقم (13)

ماجدة تفتح الباب وتدخل الشقة ومن خلفها سعيد وهو ينظربقرف ألى الشقة ويندفع أولاده (سحر وتامر )ويتعلقون برقبته

سعيد : من هؤلاء الأطفال القرود ياسيدتى

ماجده : هؤلاء أطفالك مستر سعيد وأقدم لك مسز قطيعه أبنة خالتى

سعيد يأخذ يد قطيعه ويقبلها فتسحبها منه بسرعة

قطيعة : أستغفر الله أنا ماعملتش حاجه أنا أخدم ماجده بعنيا

يتجاهلها سعيد ويجول بناظره فى الشقه وهو قرفان

مين ده ياماجده ؟؟

ماجده: ده سعيد ياقطيعه بعد التعديلات

قطيعه : ده أتغير خالص ..بس هو ماله بيبصلنا وهو مستغرب كده هو لسه تعبان

ماجده : ده من تأثير العمليه بكره يبقى كويس ..جهزتى الغداء

قطيعه : حالا حفرش السفره عمله لك شوية محشى يستهلوا بقك

يجلس : سعيد ويأكل المحشى بالشوكه وهو يرطن بالأنجليزى ليعبر عن أعجابه بالأكل

تامر : مين الراجل ده أللى شبه بابا

ماجده : ده أبوك ياحبيبى بس لسه تعبان وبعدين كل وأنت ساكت

قطيعه : يجنن ياماجده ده بقا محترم قوى.. ياحلاوه يا ولاد بيقطع المحشى بالسكينه

بعد أنتهاء الأكل يقوم سعيد ويأخذ الأطباق التى أكل فيها من سوكات ويقوم بغسلها فى المطبخ ويجففها ويضعها فى الرفوف وكل من ماجده وقطيعه والأولاد ينظرون إليه فى ذهول وهو لايعيرهم أى أهتمام

تستمر الحياة على هذا المنوال وعاش كل من ماجده وسعيد بدون خناقات

لمدة شهر وكأنهم أغراب لم تستحمل فيه ماجده هذه الحياة وقررت أن تذهب إلى دكتور زواوى ليجد لها حل فى هذه المشكله

ماجده : خلاص يادكتور ياحموته ياحموت نفسى أنا مش عارفه أتفاهم معاه برود أنجليزى وهدوأ غير عادى وأدب وأحترام ينأط رجعوا لى جوزى زى الأول أنشاالله يبقا تليفزيون أوأى حاجه أنما تلاجه لأ

زواوى : ماينفعش يامدام وأنتى ماضيه عندى أنك موافقه على العمليه

أنما عندى حل مافيش غبر أن أحنا نعملك عملية مسح مخ وننزلك سوفت وير أنجليزى زى أللى عند جوزك وكده تقدروا تعيشوا مع بعض

ماجده : أنا موافقه طب العيال حنعمل فيهم أيه

زواوى : عيالك لسه صغيرين وحيتربوا بين أم وأب أنجليز وبالتالى حيتأثروا بيكم ولو فيه أى تعديل ما نقدرش نعمله ليهم قبل سن 18 سنه

عموما قرارك أنا أحترمه وكنت عارف أنك حتيجى تطلبى هذا الطلب وأنا جاهز من بكره نعمل العمليه

ماجده : أوكى جو أون بليز آى يام ردى

الحلقة رقم( 14) والأخيره

Five Tea O 'Clock

وبعد سنه من أجراء العمليه لماجده يجلس الزوجان ف البلكونه لتناول شاى الخامسة مساء كعادة الأنجليز

ماجده : جود أفنينج مستر سعيد تفضل الشاى

سعيد : جود أفنينج مام..تفضلى بالجلوس سيدتى بجوارى على ألأريكه

ماجده : أشكرك ياعزيزى

سعيد : تفضلى سيدتى الجريده

ماجده : أوه ماى جاد هنالك أخبار مزعجه ياسيدى

سعيد : أقرئيها سيدتى

ماجده :وفاة البروفيسير زواوى عقب محاولته أجراء تجربه على نفسه لتطعيم المخ ببذور البذنجان الرومى

سعيد : مسكين هذا الرجل لو نجحت تجربته لكانت فتح كبير للبشريه

نحو أفاق أكبر للقضاء على ظاهرة الجنون المبكر عند الرجال المتزوجين

ماجده : مسكين زواوى هيا نقف دقيقة حداد على روحه

سعيد : أنتى رقيقة المشاعر سيدتى

*****

يصحو سعيد على صوت ماجده وهى تحاول خنقه

سعيد : أى آى آى حتخنوأينى يا بنت المجنونه

ماجده : مافيش فايده مين زواوى وقرداوى أللى عمال تتصعب عليه ده

أصحى جننتنى ستات وأستحملناك وكمان بتحلم برجاله

سعيد : هو أنا كنت بحلم

ماجده : بقالك ساعه تتكلم وتصرخ وتتضحك وعمال تجيب من الشرق والغرب وتتكلم أنجليزى أن ماكنتش تحكى لى كنت بتحلم بأيه لخلص عليك دلوقتى

سعيد يعتدل فى السرير ويحكى الحلم لماجده وفى النهايه يسرح قليلا وهو يقول: ياه لو الحلم ده يتحقق

ونمسح من دماغنا كل الهموم والمشاكل والعداوات أكيد حنكون أسعد زوجين فى الدنيا

أنتهت