سلامتها أم حسن

 أتخرس فجأة تليفون أم حسن فأتصلت بالأعطال لأصلاحه وبمجرد الأصلاح يعود العطل مرة أخرى لدرجة أن عمال الأصلاح يأسوا ولم يهتموا وبعد يومين سمعت جرس التليفون
- ألو معاك مصلحة التليفونات أحنا صلحنا العطل يا مودام
- متشكرين يا خويا كتر خيرك
تغلق السكة وتذهب للمطبخ وبعد 55 دقائق تسمع جرس التليفون فتسعد بصوته وهى تقول أيوه كده أملء البيت رن يا حبيبى .. ترفع السماعة
- ألو ده رقم 34555678 بأسم الحاجة أم حسن
- أيوه مظبوط .. العطل أتصلح والحرارة رجعت
- متشكرين مين حضرتك .. أنا رئيس مصلحة التليفونات وبنتأكد من الأصلاح ..
- مدير مصلحة التليفونات بنفسه ما شاء الله- أومال أحنا حيجلنا أعز منك يا أم حسن
- متشكرين ياباشا ربنا مايحرمنا منكم
تغلق السماعة وبعد 5 دقائق تسمع رنين التليفون مرة أخرى فترفع السماعة وهى سعيدة
- ألو ده رقم 34555678 - أيوه مظبوط .. العطل أتصلح والحرارة رجعت
- متشكرين مين حضرتك.. أنا وزير المواصلات يا ام حسن وبنتأكد من الأصلاح
- وزير المواصلات بنفسه لا ده كتير قوى  .. أومال أحنا حيجلنا أعز منك يا أم حسن.. متشكرين ياباشا ربنا مايحرمنا منكم
تغلق السماعة وبعد 5 دقائق تسمع رنين التليفون مرة أخرى فترفع السماعة وهى قلقة وهى تقول أيه اللى جرى هو التليفون جاله أسهال ولا أيه
- ألو ده رقم 34555678 بأسم الحاجة أم زفت
- أيوه مظبوط .. العطل أتصلح والحرارة رجعت يا أم زفت
- متشكرين مين حضرتك..أناالمهندس شريف أسماعيل يا أم حسن وبنتأكد من الأصلاح
-سيادة رئيس الوزراء بنفسه لا ده كتير قوى قوى أنا كده حعيط من الفرحة
 - لا تعيطى ولا حاجة .. أحنا حيجلنا أعز منك يا أم حسن .. متشكرين ياباشا ربنا مايحرمنا منكم أم حسن وهى تحدث نفسها .. معقول رئيس مصلحة التليفونات ووزير المواصلات ورئيس مجلس الوزراء بيتأكدوا من أصلاح الخط بتاعى هو جرى أيه
فى الدنيا يا خواتى .. تمر ساعة أخرى وتسمع رنين التليفون فترفع السماعة
وتسمع صوت محترم به وقار وأدب جم : - ألو ده رقم 345556788 بأسم الحاجة أم حسن- أيوه يا خويا أنا أم حسن خير حضرتك مين
 - أنا اللواء عباس كامل سكرتير الرئيس لو سمحتى خليك على الخط حيكلمك فخامة رئيس الجمهورية حالا تسمع صوت موسيقى وهى مرعوبه وتتوقف الموسيقى وتسمع صوت :أزيك يا أم حسن أنا عبد الفتاح السيسى رئيس الجمهورية .. أخبارك ايه وعامله أيه مبسوطه الحرارة رجعت والخط أشتغل أيوه أشتغل ..-عندك سكر وزيت .. أيوه ياباشا صرفت التموين- بس أيه أللى الأهتمام الزياده ده ياباشا..
 - أنتى ماتعرفيش أنك نور عنيننا ولا أيه
تسقط أم حسن مغشيا عليها بعد أن قذفت بسماعة التليفون
(وتظل تقلب الكلام فى رأسها وهى تتحدث بصوت مرتفع فى دخلة أبو حسن فيشاهدها على هذا الحال ) - مالك ياوليه أنت بتكلمى نفسك فيه أيه ..أيه أللى حصل
( تحكى له أم حسن من أول ما التليفون انقطعت حرارته وحتى آخر مكالمه من السيد الرئيس ) يضحك ويضرب كف بكف :أنت عايزانى أصدق التخاريف أللى بتقوليها دى .. ياه ده أنت حالتك صعبه خالص..قومى جهزى العشا وبلاش الهطل ده .. آل رئيس الجمهورية بيطمن على رجوع الحرارة أل .. ده أنت أتلعب بك جامد قوى- ورئيس الوزراء ووزير المواصلات ورئيس مصلحة التليفونات
- قومى ياوليه وبلاش عبط أنت عايزه تجننينى
 ولم تمضى لحظات ألا والتليفون يرن مرة أخرى فيأخذ أبو حسن السماعة فيسمع صوت يتكلم باللغة الأنجليزية فلم يفهم ما يقال .. ويسكت الصوت ليتكلم صوت آخر باللغة العربية الفصحى : ألو هل هذا الرقم 34555678 بأسم الحاجة أم حسن من فضلك
- أيوه مين حضرتك
 - معك المتحدث الرسمى للبيت الأبيض الأمريكى وموجود على الخط الأن فخامة الرئيس الأمريكى دونالد ترامب ويريد أن يتحدث إلى أم حسن شخصيا هل هى موجوده وهل تستطيع أن تتحدث باللغة الأنجليزية
- أيوه موجوده بس هى ما بتعرفش ولا كلمة أنجليزى دقيقة واحده أخليها ترد عليك
- لا بأس من فضلك بسرعة لأن فخامة الرئيس ورائه مشاغل كثيرة
ينادى على زوجته : تعالى كلمى ترامب  بيتصل بك من أمريكا شوفيه عايز أيه ده كمان .. التليفون بقى دولى- مش وقته دلوقتى حا أبقى أفهمك بعدين-: ألو معاك أم حسن
 المترجم :ستستمعين إلى سيادة الرئيس باللغة الأنجيلزيه وسأقوم بالترجمة فلا تردى ألا عندما أطلب منك ذلك- تسمع أم حسن صوت باللغة الأنجيلزية وهو يقول : Hallo lady your telphone is OK now
المترجم: فخامة رئيس الولايات المتحدة الأمريكية يسألك : العطل أتصلح والحرارة رجعت
- أيوه يا خويا وقله( ثانك يو) ربنا يخلى أمريكا ورئيس أمريكا
ترامب بلغة الخواجات (عربى مكسر ) : أخنا هيجيلنا أأز منك يا أم هسن يا آزيمه
 - متشكرين يا خواجة ( تضع السماعة وتعقد زراعيها وهى تقف بتحدى أمام أبو حسن : صدقت وسمعت بودنك أهُم الخواجات بتوع أمريكا بيسألوا عن التليفون بتاعنا علشان تصدق أللى بقوله- أنت صدقتى الكلام ده كله يا أم حسن- أصدقه ما صدقوش ليه
- ربنا مايحرمك من العبط هاتى التليفون علشان أكلم واحد صاحبى
يرفع سماعة التليفون فلم يسمع صوت الحرارة وأصبح التليفون جثة هامده
- الحرارة راحت من التليفون يا أم حسن
- أتصرف بقى يافالح- هاتى الكشاف لما أشوف الخط ده فيه أيه
 يتتبع ابو حسن السلك الموصل للتليفون وينزل إلى المنور حيث البوكس فيجد السلك متصل به سلك آخر..يقوم بتتبع السلك الدخيل فيجده يدخل فى شباك أم هلال جارتهم فيطرق الباب عليهم فيفتح أبو هلال
أبوحسن : مساء الخير يا أبو هلال ماتآخذنيش أن خبطت عليكم فى الوقت ده
أبو هلال : لا ابدا أحنا جيران والبيت واحد أتفضل أدخل
- عدم المؤاخذه يا أبو هلال هى الأوضه أللى شباكها بيطل على المنور مين أللى قاعد فيها
- دى أوضة هلال قاعد فيها ومعاه صحابه جوه بيذاكروا
- أن كان فيها أساءة أدب ممكن أدخل الأوضة دى لو سمحت
- هو فيه أيه يا أبو حسن - حتعرف دلوقتى
يدخل أبو حسن وأبو هلال غرفة هلال فيجده هو وأصدقائه غارقين فى الضحك
هلال : شوفتنى ياض وأنا بكلمها بالأنجليزى وعامل فيها ترامب
وآخر جملة قولتها زى الخواجة بيجو الست صدقت هى وجوزها ههههههه
 يدخل أبو حسن ويمسك هلال من قفاه : يرضيك اللى بيحصل ده يا ابو هلال فى الحركات أللى بيعملها أبنك .. سارق خط التليفون بتاعنا هو وأصحابه وقاعدين يشتغلوا أم حسن من الصبح مره يعملها وزير ومره رئيس وزراء ومره رئيس الجمهورية وأخيرا عمل فيها ترامب..أبو هلال يؤنب ابنه بعنف ويكاد يضربه هو وأصحابه ويجذبه من أذنه : ترامب يا نتن ياعديم الضمير يا معفن أنت أتجننت ياواد .. رئيس أمريكا حته واحده أنت عايز تروح فى داهية .. طب خليها بشار أو البشير أهم جيراننا ومش حيقولوا حاجة
أبو حسن يضرب كف بكف وهو ينسحب : الحق مش عليك يا هلال
أبو هلال : أومال على مين يا ابو حسن
 - عايز تعرف الحق على ميين يا أبو هلال .. الحق على الأمم المتحده أللى مش عارفه تأدب قراصنة التليفونات فى الصومال

تمت

حكاية خليل عسران

 خليل عسران شاب طول وعرض وقيمه وسيما ومركز ومن عيلة ولكنه غير أجتماعى ويطلق عليه أصدقائه خليل القفل وبما أنه يملك كل مؤهلات العريس اللقطه طق فى دماغه أن يتأهل فكلف الأهل والأصدقاء للبحث له عن عروس جميله ومثقفه ومبوسطه وبنت ناس فتبارى الجميع فى ترشيح بنات العائلات الجميلات المتعلمات الشرباتات فقام بمعاينة وزيارة أكثر من 50 عروسه وكن جميعا لاينلن القبول . فهذه وحشة وتلك تخينة وأخرى ناشفة ومعصعصة وتلك بيئة وتلك كارته وأخرى خانفه وخد عندك لم يترك واحدة ألا أوجد فيها القطط الفاطسه بالرغم أن الكثيرات مما عرضن عليه بنات زى الفل ما يتعيبوش !!
وأستمر على هذا الحال يخطب ويسيب ويتعلل بحجج فارغة كثيرة
قول قعد على الحال ده كتير بتاع 15- 17 سنة حتى يأس منه الأهل والأصدقاء بما سببه لهم من أحراج فتخلى الجميع عنه وما عاد أحد يتصدر له فى خطوبه أو جواز
كبر فى السن ودخل على 46 سنه ولم يتزوج وعنده شقه بها كافة الأثاث
 وعربية ومبلغ كبير فى البنك حتى صادف فى عمله أحد زملائه فى الدراسه وعرف مشكلته فى الزواج بعد أن هبطت أسهمه فى الحصول على المواصفات التى رسمها فى دماغه وأصبح يقابل بالرفض من الكثيرات لفارق السن وتاريخه الأسود فى الفك والأرتباط عندما يسأل عليه أهل العروسة وأصبح يقدم التنازلات تلو التنازلات مش مهم حلوة ممكن تكون مقبوله مش مهم من عيلة فكلنا فى الأصل ولاد حواء وآدم ومش لازم تكون جامعية ممكن تكون معها أعدادية أو حتى شهادة محو الأمية فقال له زميله سمير : طلبك عندى..هى صحيح مش حلوه قوى لكن مقبوله
قال : مش كل حاجه الحلاوة
 - هى أتخطبت بتاع خمس ست سبع مرات طبعا دول مايجوش حاجة جنب أللى أنت خطبتهم بعدد شعر رأسك
قال : مش مهم... الجواز قسمة ونصيب
 - هى يتيمة الأب والأم وترضى بقليله ومؤدبه ومتدينه ومستعدة للمشاركة معك فى تكاليف الزواج.. قال : عال( لايمنى) بها الله يكرمك
- أنتظر لتسمع بقية المواصفات ..قال : مفيش أحسن من كده أحنا حننهب
سمير: علشان أبقى خلصت ضمير هى عندها 35- 37-39 قول 40 سنة مش عارف بالظبط..وكمان علشان تبقى عارف هى أخت المدام ..فكر ورد عليا
قال : طالما هى أخت مراتك يبقى مافيش تفكير على خيرة الله.. أقدر أشوفها أمتى
قال زميله : بكرة لو حبيت !!
 قال : هذا الجميل فى رقبتى لن أنساه لك طول العمر- ثم أحتضنه وباسه على موعد اللقاء بالعروسة بعد المغرب فى بيت زميله
 وفى مساء اليوم التالى أرتدى خليل بدلة المناسبات وذهب لبيت صديقه فوجد الأنوار وكراسى حمراء من الفراشة وصوت الكاسيت يعلو بأغانى الأفراح (مبروك عليك يامعجبانى ياغالى عروستك الحلوة قمر بيلالى )
 وبعد السلامات والقبلات همس فى أذن صديقه: أهو فرصة نشوف العروسه بدون أحراج .. هو فرح مين ده
صديقة : أحراج أيه ياراجل الفرح فرحك والليله ليلتك يا أبو خليل
- بس أنا ماشوفتش العروسه ولا أتفاهمنا على حاجة
 أنا لما حكيت للعروسه عنك البنت بكت وقالت أنا موافقه عليه أنشالله ياخدنى بالهدمة أللى عليا .. معقول ياسميرفيه بنات لسه بالأخلاق دى ده أنت شوقتنى قوى أن أشوفها ..الجلسة طولت فى الصالون وهم يتناولون الجاتوه ووالسخن والصاقع فى أنتظار وصول العروس من عند الكوافير الكلام خلص وتحول إلى ترحيب منور ياعريس ..لأ ده نوركم ياجماعة مر مايقرب من ساعتين ولم تصل العروس ..أحس صديقه بعلامات الملل التى ظهرت على العريس فقام يتحدث مع أختها لتطلبها بالتليفون فى محل الكوافير ..ومرت نصف ساعة أخرى لتدخل العروس وهى تحمل صنية وعليها الشربات
أنعقد لسان خليل عند رؤيتها .. وتوقف الكلام فى حلقه  وأصبح يصدر أصوات وهمهمات غير مفهومه مثل نعيق الضفادع فقد نزل عليه سهم الله من منظر العروس ..سمير :تعالى يا (دوسه ) أعرفك بالباشمهندس (خليل )
 دوسة فى خجل مصطنع:أهلا وسهلا ..وجلست بجسمها الضخم على طرف الكرسى المجاور لخليل الذى يبلع ريقه من هول المفاجأة العروسة مافيهاش حاجة حلوه بالمرة بالرغم أن الكوافير عمل المستحيل فالبدرة والكريمات لم تفلح فى أن تغطى بشرتها المجنزرة وشعرها الأكرت(خلقتك شريفه يارب)
 دار الحديث بطيئا مرتبكا فى البداية ولكن عم خليل أصبح يتجاوب معها بعد أن سمع صوتها الحنون وهى تقول له : أنا فى منتهى السعادة أنى عرفتك ياأستاذ خليل ..قالتها بنبرات حانية كلها دلع وخليل ينظر لها فى ولع من هذا الصوت الملائكى الذى يصدر من هذا الوحش
 عند ذلك أنسحب صديقه وزوجته من الصالون لأعطائهم فرصة للتعارف.. سمير يهمس فى أذن زوجته : قومى ياساميه السناره غمزت
دوسة ( وهى تسبل وتبربش عينيها )..كلمنى عن نفسك ياأستاذ خليل
 خليل أنفكت عقدة لسانه وظل يحكى قصة حياته ومايملكه من أمكانيات وسبب تأخر زواجه ومايأمله فى الزوجة من مواصفات وهى تنظر أليه بشغف وهى تشجعه على الأستمرار فى الحديث الله كلامك حلو ..ياعينى أنت أتعذبت كتير أووى ياروحى عليك ..خليل : أنا قلت أللى عندى ..أحب أسمع رأيك
دوسة: مفيش بعد رأيك رأى يأستاذ خلو..قالتها وهى تنسحب للخلف فى خجل
 خليل : عايز أسمع طلباتك ( هذا هو السؤال التقليدى الذى يلقيةعلى كل عروسه يقابلها..ليجد المبررالكافى للهربان )
 دوسه : أنا ماليش أى طلبات ..أنت تأمر وأنا عليا التنفيذ..المهم أنك تكون راضى وشوف أى حاجة ناقصاك فى الشقة من العين دى قبل العين دى
 خليل : ( أول مرة فى سجل تجاربه السابقة يسمع هذا الرد الجميل ) : على خيرة الله تنطلق الزغاريد وخليل فى حالة ذهول
 صديقه : مبروك ياخليل ..ألف مبروك يادوسة عايز نكتب الكتاب مفيش مانع من بكرة ..دوسة : ماتستعجلش الأستاذ خليل ..أنا كمان عايزة وقت أجهز فيه نفسى
وأشوف أللى ناقص فى الشقة لأشتريه أعطينى 15 يوم على الأقل
أختها : لأ ..كتير قوى يادوسه كفاية أسبوع دوسة : أللى تشوفيه يا أبله
 خليل : أنا مع رأى المدام كفايه قوى أسبوع ..دوسة فى خجل سينمائى وهى تسلم على خليل..وهى تقول :عايزه أشوفك بكرة من بدرى.. خليل وقد أرتسمت الفرحة على وجهه وهو يردد فى نفسه مثل قالته له أمه قبل ماتموت خذ يا حبيبى أللى بتحبك ..قرد مطاوع ولا غزال شارد صدقتى يا أمى ..من ناحية القرد فهى قرد

زفة خليل

دعانا خليل لحفلة الزفاف التى أقامها فى نادى على النيل ..لم نصدق بأنه جاد فى دعواه ألابعد أن حلف برحمة أمه

أنا : خطوبه ولآ كتب كتاب ياخليل

خليل : بقول لك دخله..ورحمة أمى دخله يازيزو أنت مش مصدق ليه ؟؟

- ألف مبروك يا خلوو ..يارب تكون الأخيرة

وفى المساء تجمع الأهل والأصدقاء أمام النادى الفخم فى أنتظار وصول العروسان

لم ننتظر طويلا وأقبلت مجموعة من السيارات على رأسهم عربة الخليل المزينة بالورود نزل خليل ودوسه من العربة على صوت النفير وطبول الزفة وصلى صلى

والكل يتلهف لرؤية عروسة خليل النساء قبل الرجال ..وينسحب عدد منهم إلى آخر الزفة ليقعوا من الضحك على العروس الهرقلية ذات الثوب الأبيض الذى كاد يتمزق من كمية الشحم واللحم التى حشرت فيه

وهى تمشى وهى متأبطة ذراع خليل بكل ثقة وأتزان وعلى وجهها أبتسامة باهتة تلقيها يمينا ويسا على نساء المدعوين

أما خليل فقد كان يرتدى البدلة الأسموكن التى شاهدناها فى جولاته الخاسرة كان يبدو زى القمر بجانب دوسة التى قفشت فى ذراعه وبدأت التعليقات الشامته وأرتفعت الضحكات وكما هو حال هذه الأيام أن يقوم العريس والعروسة بأفتتاح الحفل برقصة تنجو فأختارت موسيقى فيلم تيتنك المناسبه لحجم العروس

وبدأ الرقص يتخلله ضحكات حريمى من النوع البلدى المجلجل (مش عارف أوصفه هو الحقيقة يسمع ولايوصف بغير كلمة واحدة (مســخرة) الذى تسبب فى أرباك دوسه فتعثرت قدمها بحفرة فى أرضية الحديقة وكانت الكارثة فقد أنقلبت دوسة بكامل حمولتها بالمقطوره فوق خليل على الأرض

وتحول الفرح إلى فاصل ضاحك باكى وأنتهى الفرح وقمنا يتوصيل خليل ودوسة إلى عش العصافير فى مدينة نصر على أصوات الكلاكسات( تيت ..تيت ..تييت ..أهلى )

ليلة الدخلة

دخل خليل إلى شقته وأغلق الباب بعد أن شكر جموع المشيعين

وأصبح وجها لوجه أمام دوسه

خليل : نورت بيتك ياعروسة

دوسة ( وهى تقترب أكثر من خليل وهى مده بوزها للأمام فى أنتظارقبلة خليل الأولى) : البيت منور بأصحابه يا حبيبى !!

خليل يشب على أطرافه ليصل إلى بوزها المدود

تحيطه بزراعيها وهو يحاول أن تتشابك يده فيفشل فى الوصول لنهاية محيط الظهر فتضع خدها على خده فى لحظه حالمه وهو يسمع دقات قلبها كالطبول

ينتفض خليل مذعورا بعد أن أحس بخشونة خد دوسه على وجهه

بعد ثلاثة أيام من دخلة خليل الدرامتيكيه رن جرس التليفون فى البيت

مين ؟ انا فوزى جار خليل أللى ساكن تحته

أنا : أزيك يافوزى أنت ماجاتش الفرح ليه ياراجل فاتك نص عمرك ؟

فوزى : هو كان خليل عزمنى ..أنسان غريب من يومه

أنا : وأيه الأخبار عندك ؟ بتشوف خليل

فوزى : شوفته النهارده الصبح بيركب عربية الشغل..ناديت عليه ماردش عليا منظره كده أن مانمش كويس وماشى ومش مركز

أنا : شغل من ثالث يوم أنا عارف أن واخد 20 يوم أجازة

فوزى : كله كوم وأللى بيحصل عندنا كل ليله كوم

أنا : خير يافوزى .. قلقتنى

فوزى : كل يوم الساعة تسعة بالليل ..نسمع صوت خبط ورزع فى الأبواب وصريخ وتكسير ورجلين بتجرى زى ماتقول وابور سكه حديد ماشى على السقف الحال ده يستمر بتاع نص ساعة ثم هدوء لقرب الفجر ويتكرر نفس اللىحصل فى العشاء بجد أنا خايف على نفسى وعلى العيال للسقف يقع علينا ..أستنى يازيزو

أهم أشتغلوا أقفل وحاكلمك تانى من البلكونه ؟؟

ياترى أيه أللى بيحصلك ياخليل أموت وأعرف!!

جرى ورزع وخبط ده الواد خليل طلع نمره جامده قوى..أمال كان مضرب عن الجواز ليه؟؟ حتى قابلت خليل بالصدفة بعد شهر العسل يتمشى هو ودوسه فى النادى

نظرية أللى يحصلنى يكثرنى

قالت المدام : أللى ماشى هناك ده مش خليل ودوسه تعالى يازيزو نسلم عليهم

اهلا ياخليل الجواز خدك مننا ..ولاحس ولاخبر من يوم الفرح ..أنت فين ياراجل

خليل كمن وجد لقيه ونزل فين سلامات وترحيب ودوسه كانت فى ذهول

مما يحدث فقد سلمت علينا بفتور وعنطزه

تعالى ياخليل نقعد على الترابيزه دى ..أنت وحشنى كتير..أخيرا ربنا رضى عنك وأتأهلت خليل : من ناحية رضى هورضى قوى قوى.. دوسه : (وهى تزغر لخليل ) قم هات لى آيس كريم : تانى يادوسه ده خامس آيس كريم دوسة : ( وهى تزوم ) قوم وبلاش بخل خليل : ( ينكمش فى مقعده وهو محرج ) أصل دوسه حامل ويظهر بتتوحم هههه ألف مبروك يادوسه..أيه الأخبار الجميله دى خدنى معاك يا خليل وسيب الستات يرغوا براحتهم ماصدقت أنى أختليت بخليل لأطمأن عليه وأعلم سر معركة التاسعه مساء التى نشرها فوزى بين الأهل والأصدقاء

أنا :ألا  قول لى ياخليل أنت مبسوط ولآ مش مبسوط

خليل : مبسوط ومش مبسوط أنا : فزوره دى

خليل : مبسوط لأن دوسه حامل وربنا أراد لى أن أشوف لى عيل وأنا فى هذا السن..ومش مبسوط لأن دوسه أتغيرت 180 درجة

أول ما أتجوزنا كانت تقف تخدم عليا وأنا بأكل ..ماسكه فى أيديها كباية الميه والفوطة وتأكلنى بأديها فى بقى وتقوم الصبح تفطرنى وتلبسنى وتلمع جزمتى وتوصلنى لحد باب الشقه وهى بتدعيلى زى أمينة و سى السيد فى بين الصورين ولكن الفيلم ماأستمرش ..أكثر من 15 يوم وأبتديت أحوالها تتغير شويه تعبانه وشويه تصطنع المرض لحد ماراحت حللت وبلغها الدكتور بأنها حامل ومن ساعتها بدأ فيلم جبروت أمرأة وصرت أنا أللى بهنن وأطبطب وأحضر لها الأكل فى السرير وتركت لى المواعين والطبيخ والغسيل

وعدت عازب مرة أخرى لأتكفل بها وبنفسى وأديك شايف

أنا : ياه أنت باين عليك تعبان خالص

خليل : ده أنا تعبان بشكل ..أسكت يازيزو ياخويا..هو أنا مجوز واحده ست عادية أنا متجوز وحش آدمى فى صورة واحدة ست

أنا : فكرتنى يا خليل.. فوزى جارك بيشتكى من الهبد والرزع والصريخ كل يوم الساعة تسعة بالليل خليل : فيك مين يكتم السر.. أنا : فى بير

خليل : أنا لما أخد ت خطوة الجواز شلت هم كيف سأتعامل مع هذه الكتلة الهلامية الضخمة دى..فسألت أصحاب الخبرة  من المتزوجين من النوعيه دى من الستات فمنهم من أشار أن أسقيها مخدر أومسكر ومنهم من أشاربأن أخبطها شومه على راسها على سهوه وآخرين قالوا لى هد حيلها بلعبة الأستغماية وكيكه على العالى وأخيرا أللى يحصلنى يكثرنى فبدأت بالمسكر فى أول يوم وعينك ماتشوف ألا النور قامت طايحه فى البيت تكسر أى حاجه فى سكتها وأنا مش قادر أقرب ناحيتها لحد مادخلت برأسها فى مراية التسريحة دشدشتها فوقعت على الأرض فتركتها فى مكانها للصبح ... خفت بجد أقرب منها لتقوم تدغدغنى أستبعدت الفكره دى بعد أللى شوفته كانت حتموتنى يازيزو أما حكاية الشومه أستبعدتها هى الأخرى لأن ممكن تستحمل الشومه وترد بعشرين شومه أما الألعاب الأخرى كانت أهون ولكن أن هى تتهد أبدا.. ومن ساعة ماعرفت أن هى حامل بطلت كل الألعاب وصارت تأمر وأنا أطيع أنا : ياه ياخليل يوصل بك الحال لكده

 خليل : ده ذنب خديجه وسعاد وجمالات ونحمده وسوسو وتوتو وميمى والباقى مش فاكرهم

كنت فين يا لأ لما قلت أنا آه أه أه.. أصوم أصوم وأفطرعلى حوسه

تمت

تحويطه نوفل

الأستاذ نوفل السرياقوسى ربنا فتح عليه وأشترى عربية 1288 بتحويشة العمروكانت فى نظره أغلى من المرسيدس والفولفو و يدوخ السبع دوخات كل يوم ليركنها فى الشارع فيضطر أن يبحث لها عن مكان فى الشوارع المجاوره و هو غير مطمئن لوجودها بعيدا عنه فقرر أن يدق ماسورتين حديد ويمد بينهما جنزير بقفل ليحجز مكان تحت البيت على طريقة أهل أسكندرية الكرام لتبيت فيه مبروكه الأسم الذى أطلقه على عربيته المصونه .. وحدث ان أنتشرت على غير العادة سرقة السيارات فى الشارع من جميع الماركات فنصبح كل يوم على صراخ وولولات الأهالى على أختفاء سيارة بالرغم من وقوفها خلف القفل والجنزير والماسورتين الحديد ألا سيارة الأستاذ نوفل لم تمس بسوء فتعجب جيرانه فسأله الحاج حمدان المصوراتى: عربيتى أخت عربيتك وبالرغم أن عربيتى حالتها زفت ومافيهاش حاجة سليمه.. تتسرق ومعاها الماسورتين والقفل وعربيتك أنت زى العروسه يسيبها الحرامى وياخد صفيحة الزباله بتاعتى ليه؟؟ 

نوفل : يخمس فى وجهه ويكبر ويحوقل ..كل أعوذ برب الفلق 

حمدان : بجد يانوفل قولى بصراحة أنا بشوفك من الشباك كل يوم وأنت بتلف حول عربيتك  وترش ميه عايز أعرف أنت بتعمل أيه

 نوفل : حقولك على سر يمكن ينفعك .. أنا بالعربى بأعمل رقيه شرعية للعربية لتقيها من السرقة والحسد والحوادث والأعطال ومخالفات الركن فى الممنوع ورخامة عساكر المرور. وحياتك ياحمدان يا خويا أنا بروح أجدد الرخصة ما بدفعش ألا الضريبه وبس

 انتشرت حكاية الرقية الشرعية للأستاذ نوفل فى المنطقة.. فأقبل عليه أصحاب السيارات ليبارك لهم سيارتهم ويقيهم من العين ومخالفات المرور..و لا يقوم بالرقية ألا بعد أن يتبرع صاحب السيارة بما تجود به نفسه ويتناسب مع موديل وماركة عربيته لجمعية البر والأحسان التى يحمل دفترها المختوم بختم الأوقاف ومع مرور الوقت أنتشر صيته على مستوى المحافظه وباقى المحافظات فمنهم من قال هى تحويطه سحرية يستخدم فيها الجان لحراسة المكان ولم يعلق نوفل وأكتفى بالأبتسام ليظهر عدم الأهتمام وأمتلء الشارع بالسيارات فى أنتظار تحويطة عم نوفل السحرية .. السيارات الجديده يشترط على أصحابها أن تكون من مال حلال وأن يحضروا معهم فدوى خروف مقرن ولا تقبل الجديان أو أرانب للتكاكت والموتسيكلات لتغمس فى دمها الكفوف ويلطخون رفرفها وكبوتها بالدم المراق وحلال نصف اللحم لنوفل وأهل الله ومن الغريب أن تجد من ضمن هذه السيارات سيارات تخص شخصيات قضائية ودبلوماسية والأغرب كان لسيارات ولوارى الشرطة التى كانت تصطف لتأخذ دورها بعد أن كثرت حوادث الأنقلاب والأشتعال بدون أسباب.. حتى سمعنا بهرج ومرج قبل الفجر وأمتلاء الشارع عن آخره بالبوليس والمخبرين وساحبين عم نوفل من قفاه بالشبشب والجلباب .. وأختفى عم نوفل قول شهر شهرين ولا حس ولاخبر وطلعت أشاعات أنه موجود فى سيناء وناس قالت شوفناه فى المعبر وآخرين قالوا بأنه متواجد بأمن الدوله لأنه قام بتحويط عربات للأخوان ولم تخمد الأشاعات حتى ظهر عم نوفل كسير الخاطر مهموم كسيف البال يكلم نفسه وكأن عقله قد طار وأنتشرت الأشاعات لتفسر ما حدث لعم نوفل فمنهم من قال بأن الجن الذى كان يستخدمه آذاه ..ومنهم من قال بأن سيارة أحد القضاة بعد أن تم رقيتها أنقلبت به فى القناه وأخرين قالوا بأن الحكومه عذبته بعد أن أحترق وأنقلب العشرات من العربات الفاخرات وهو فى كل مره يعلن بأن تم شرائها من دم الغلابه والفقراء وقبل أن يموت عم نوفل كشف سر التحويطه لأبنائه وهى تتلخص فى كلمتين 

ان الحلال يذهب، والحرام يذهب، ولكنه يذهب بأهله معاه ؟! وان كل لحم نبت من سحت فالنار هى منتهاه

فكرة من الصين

فكرة من الصين لحل أزمة البطالة
صديق تاك أواى 
فى الصين مواقع التواصل الأجتماعى التى تسمى ويبو "Weibo"  تعلن بالصوت والصوره عن خدمات الشباب من الجنسين للعمل معك كصديق لمدة يوم يرافقك فى الحفلات والرحلات ويحكى لك القفشات والنكات ويزغزك ويعمل لك المساج لو أردت ويمكن أستخدام هذا الصديق فى غسل الصحون ونشر الغسيل وتنفيض السجاد والطهى المتميز ويبدو أن الرجال والفتيات لا يخجلون من إعلان تقديم خدماتهم عبر الشبكة الاجتماعية الأكثر شعبية ويصل سعر الإيجار ليوم واحد فى موسم الذروة الأعياد وماشابه إلى ما يقارب 1000 يوان أي ما يعادل 145 دولارا أمريكيا أما فى الأيام العادية فيصل عادة إلى 600 يوان أي إلى نحو 87 دولارا وهو سعر يفوق متوسط الدخل الشهري للأسرة الصينية
ولو حولناهم بالمصرى يصبح اليوم واقف بـ 15000 جنيه غير أكلك وشربك عليهم فيمكن للمعلن أن ينشر صور توضح مدى قدرته الجثمانية وعضلاته القوية فى حمل الأشياء الثقيلة وعرض الأكلات التى يجيدها من الأطباق الشهيرة كذلك تعرض خبرتك فى خدمة العجائز ورعاية الأطفال وعمل المساج
 وتحرص المواقع التي تدعم هذه الخدمات أو حتى المعلنين بشكل فردي على عدم وجود أي قلة أدب بمعنى ييجى الشاب أو الشابه محترم ويمشى محترم .. لو كانت هذه الخدمات عندنا فى مصر كان سيحترم آخر أحترام
مثل هذه الأنواع من الخدمات متوفراً منذ وقت طويل في اليابان وكانت تعرف باسم ""Rentaru Kareshi" فيما كان سعر الإيجار يحدد بالساعة وهي تتراوح ما بين 43 دولاراً و60 دولاراً طبعاً الصينى أرحم بكثير

زغرطى ياللى أنت مش غرمانه

 
وبما أنى غير مشترك فى قنوات bein sportt المحتكرة لمباريات كأس الأمم الأفريقية ومعنديش وصله مسروقه وعندى رغبة مجنونه فى مشاهدة مباريات مصر وفوق كده وده الدنيا صاقعة ومش طالبه الواحد يروح يقعد على القهوة ويدفع 25 جنيه فى كوباية شاى قلت مابدهاش غير أنى أتفرج على المباريات على النت وحمارتك العارجة 
المهم ماطولش عليكم  قول طول ..قعدت أدور على الماتش فى المواقع الألكترونية فوجدت معظمها مقفول والباقى بيقطع حتى عثرت فى النهاية على محطة زى الفل ولكن المذيع فيها للأسف مغربى قولت مش مهم أهو الواحد يتفرج والسلام .. عم المذيع ماكانش بيذيع كان يصرخ على كل شوطه مصريه وكأن عقربه قرصته وهو نازل قرر على المصريين ويدعو الله ان يلازم النحس محمد صلاح ويقع الحضرى على جدور رقبته وأن تنقطع الكهرباء عن محمود سليمان كهرباء وتحترق سلوكه حتى وصل إلى دعائه الشهير وهو يقول : يارب أعطينى حظ المصريين وأرمينى البحر ..حظ المصريين يارب ..حظ المصريين يارب .. حتى دخل جون كهرباء فأصيب بلوثة عقلية جعلته يهرتل ويقول كلام بالمغربى غير مفهوم ( تقريبا شتيمه ..الحقيقة الرجل معذور لعب مش نافع ودعاء مش نافع ..ينعل أبو دى شغلانه )

 نحن لا نتمنى أن تنال المغرب حظ المصريين فيحدث لها مانحن فيه ولكننا نتمنى أن ننال حظ المغرب حتى لو خسرنا المبارة .. زغرطى ياللى أنت مش غرمانه

عريسك يابهية

عريسك يابهية هو رئيسك وأنتِ تاج راسه
عريسك يابهية غير أى عريس.. كفاية أللى نابنا من شلة المتاعيس
أللى غاوى زعامة ومنظره وتنطيط ...وأللى أنفتح على الغرب للتقليد
وأللى نهب خيرك بالغش والتدليس
لازمنً يكون راجل من ظهر راجل ..راضع من صدر أمه الرحمة والشفقة
وتربى على الشهامة والعزه ..أيده نظيفه وعينه شبعانه
وراضى بأللى قسم به ربه
قومى يابهية أستحمى وسرحى شعرك.. وجففى دمعك على ولدِك
أللى قتلهم رصاص الغدر والأجرام أللى عشش وراء المتاريس.
عريسك مش حنختاره من العسكر صحاب النجوم والنسور والمقصات
كفانا قهر ومنظره وأوامر وعند ومعتقلات
..شوفنا على أديهم الظلم والأستبداد
على كل حر شريف يخالف أوامرهم
داسوه بجزمهم السوداء والبيادات
عريسك مش عايزينه أتربى بره... أكل السوسيز والزبده والمربى
عايزينه أبن بلد شعبى متمرمط فى تراب أرضك أكل الطعمية والبصاره والكشرى
وأتشعلق فى الأتوبيس وكمل عشاه نوم
وحمد ربه على ما عطاه
عريسك يابهية راجل حصيف ومتعلم
لا صاحب أجنده أو دقن مدروش
ولا معلق صليب وحسابها حسبة دين
عايزينه يعرف ربه من غير مغالاة وتعصب
عريسك أن شاء الله حيكون شاب جدع من رجال ثورتك
يعرف قيمة خطوتك ومستعد يشيل تراب جزمتك فوق الدماغ
أصيل مش خسيس عمره ما حيجرى وراء الملايين
ويهرب ملياراتك للندن أو لباريس
 عريسك يا أم الثوب الأخضر حيختاره ولادك وبناتك وعواجيزك وشبابك مش حييجى فوق ظهر دبابه زى جمال .. أو بالصدفة او بالأغتيال
وحندقق وحنحاسب وحنتأنى.. مش أى حد حنرضى بيه ليكى
ويوم ما نختاره وتكمل فرحتك حنقعد نراقب ونحاسب على كل همسه أو لفته
تهين من حقك .. لأننا خلاص فتحت عينا وماعدش فيه شيئ فى الدنيا يرهبنا
عريسك حيحلف قدامك وقدام أهلك على الحب والأخلاص والتقوى
ويقطع رغيف العيش على عينه.. ما يطغى ولايظلم ويراعى أولادك
 وأحنا كمان مش عايزين أكثر من التقوى يراعى فيكى وفينا ربنا ويحفظ لنا عهدك .. مايكدب ولا يكابر ولا يستكبر يخاف عليكى من نسمة الهواء الطايره ..عاشق لنيلك وشمسك وشعبك .. يرجع نور حضارتك للدنيا من تانى
يزرع أراضيك بقمحك وفومك وبصلك
ويبنى مبانيك ويهد قصور الظلم والطغيان
آه يابهية أكلوا من خيرك وأنكروا فضلك
وأهانوا ولادك وأنت عظيمه وصابره
فحقك عليا ياغالية وكفاية أن أبنى وبنتى
رجعوا فجرك فى ميدان التحرير
آه يابهية لو عريسك جه أللى فى بالى
حموت وأنا مرتاح البال مطمن
 فعريسك يابهية هو رئيسك وأنتِ تاج راسه

حكاية وش الفقر ..وبوز الأخص

يحكى أن فى قديم الزمان وسالف العصر والأوان أن فى بلاد العدس والآفوال عندما تلد المرأة لا تقوم بتسمية المولود بل تذهب به إلى المعبد بعد 40 يوما ليتوسمه الكاهن الذى يطلع على النجوم ويختار له الأسم المخطوط فى كتب الطالع والأسحار

وفى ليلة رعداء من ليالى السنين العجاف ولدت  كل من السيده نحس بنت أشمون وجارتها دواهى بنت زعلوك طفلين جميلين فذهبا بهما إلى المعبد بعد الأربعين ليختار لهما الكاهن أسماء تتوافق مع طالع الكواكب والنجوم فأطلق على الأول أسم وش الفقر لأبن نحس ..وبوز الأخص لأبن دواهى  فبكت نحس ودواهى وأستعطفتا الكاهن أن يغير أسماء ولديهما بأسماء آخرى جميلة

نحس : أرجوك ياقداسة الكاهن غير لى أسم ولدى مش كفاية أن أسمى نحس ليصبح أسم أبنى وش الفقر أبن نحس

الكاهن : لا تعترضى يا أمرأة.. النجوم تقول بأن ولدك سيعلو علواً عظيماً وسيكون له شأن فى ذل العباد ولو غيرت الأسم سيفنى ويموت فأرضى به وأنصرفى فى الحال

نحس تنظر لأبنها بعين دامعة : وهى تقول كيف تكون وش فقر وأنت شكلك جميل وذو سن ضاحك  .. أما دواهى فترضى بالأسم وتقول : اللهم لا أعتراض بوز أخص بوز أخص

وبحكم الجيره والدراسة يصبح بوز الأخص بن دواهى  من أعز أصدقاء وش الفقر بن نحس ويتدرجا فى التعليم حتى يتخرجا من المدرسة الثانوية فيلتحق وش الفقر بجيش السلطان ويدخل بوز الأخص مدرسة المهندسخانة وكانت كرامتهما تظهر فى كل مكان يحلون فيه فلو كان أخضر بجف ويذيل ولو كان عمران يحل به الخراب و تكثر الكوارث والنصائب التى تصيب البلاد فيصرخ الناس ويستغيثون ويلجأون لكهنة المعبد لينقذوهم فيشيروا عليهم بطرد كل من وش الفقر وبوز الأخص خارج المدينه

يخرج وش الفقر وبوز الأخص خارج أسوار المدينة  تشيعهما اللعنات وهم يحملان متاعهما وينطلقان فى أرض الله الواسعة عسى أن يجدا مكان يلمهما وبعد مسيرة شهرين دخلا مدينة يقف على أسوارها الناس بالمئات وبمجرد وصولهما لباب المدينة يتدافعون مهللين مكبرين ويحملونهم على الأعناق حتى وصلا لمجلس المدينة وهم فى دهشة من أمرهم  فيستقبلهما كبير الحكماء ويمشى بهما على البساط الأحمر ليعتلى بهما المنصة ويأمرهما بالجلوس ويسألهما عن أسمائهما فكذبا وغيرا أسمائهما.. أنا أسمى وش الخير وهذا صديقى بوز الهنا

كبير الحكماء يقوم مخاطباً الجموع الغفيرة : أيها الناس ياشعب النفاق وبعد طول أنتظار لأول القادمين لمدينتنا ليحكم بيننا ويتولى أمرنا أرسل الله لنا أثنين من الغرباء فأرضوا بهما وبحكمهما بدلا أن تقوم بيننا حرب أهلية لا تبقى ولاتذر على من يتولى الحكم  فهذا هو رئيسكم وش الخير و ونائبه بوز الهنا  .. حيييوهم ههييييه..... وش ياوش يا أجمل وش

ويتقلد وش الفقر زمام حكم بلاد النفاق ويصبح بوز الأخص نائبه الأول للمشروعات والفنكوشات وكبير الحكماء نائبه الثانى فى النصب والأحتيال  فقد كان ذو نفس طماعة يعشش بها المكر والخسة والدهاء ولتصبح ثروات أرض النفاق نهبا لهم وعندما يسأله العامة وأهل البلاد أن يراعى الفقراء من غول الغلاء

يصرخ فيهم منددأ : مفيش ..ماعنديش خزائنكم خاوية على عروشها .. أنتم فقراء يا أهل النفاق  وليس أمامنا غير أن نستلف من الجيران أو تتبرعوا بما تسمح به أنفسكم وألا سنضطر لرفع الأسعار وزيادة المكوث والضرائب على الغنى والفقران

وأشتد الظلم فمات من مات وراح فى السجون آلاف من الشباب وأصبح أهلها يأكلون طقة واحده فى اليوم والباقى ماء فأجتمع الجوعى من أهل النفاق فى الميدان العام يتباكون على ما أصابهم من جدب وفقر ومرض منذ أن حكمهم وش الفقر وتابعه بوز الأخص فتسلحوا بالعصى والفؤس وأنطلقوا يحاصرون قصر وش الفقر فهرب عسكره وعسسه وبصاصيه خشية الفتك بهم ويبحث الثوار فى القصرعن عصبة الأجرام ليحاسبوهم على فعلتهم الشنعاء فلم يجدوهم وكأنهم فص ملح وداب