تعالوا بينا نستهبل
المقدمه
بما أن الحكومات فى أوقات كثيرة بتستهبل وساعات تسوق الهبل على الشيطنه وأحيانا أخرى تلوك المستهبله (حاجة زى اللبان كده ) فهذه دعوة للجميع للأستهبال أيضا بالرغم أن فئات معينه فى المجتمع سايقه الأستهبال من زمان وماشى معاها زى الحلاوه فنحن أيضا سوف نوجه لهم الدعوة للأستفاده من خبرتهم القيمه فى عالم الأستهبال لدرجة أنه أصبح هوايه ومزاج وجزء مكمل للشخصيه وسمه من سماتها
أولا بدأ ذى بدأ لابد من التفرقه بين الأستهبال والطناش
فالأستهبال عمل أيجابى أما الطناش فعمل سلبى ويجوز الجمع بينهم فى امور كثيره فى حياتنا العامه والشخصيه وللأسف الأستهبال والطناش يفيدان فى أمور خطيره يلزم فيها تكبير المخ
وبعد هذه المقدمه أيه الموضوع بالظبط ..هذا ما سنرد عليه فى هذه المواقف
الضاحكه من واقع حياتنا فى مصر المحروسه تعالوا بينا نشوف الأستهبال والطناش المصرى الأصيل
الحلقة رقم ( 1 )
عمرو.. بينشن
عمرو طالب جامعى بكلية التجارة ماشى على مبدأ عجيب فى المذاكرة والأمتحانات مبدأ.. نشن ليصيب نشانك.. وجرب حظك
المقرارات طويله والمواد كثيرة والمحاضرات ممله والسكاشن زحمه والمقرر والمحذوف والملازم والمذكرات زى الهم على القلب محطوطه بالكوم على المكتب حيقرأ أيه ولا أيه ..طب والعمل الحكاية دى مش نافعه خالص
نانسى : هاى عموره عامل أيه فى المذاكرة يا مان
عمرو : هاى ننوس ..أنا مش عارف أنت كل سنه تنجحى وبتقدير ومبهدله نفسك وعامله زى الدوده مش مخليه لا كتاب ولا مذكرة ألا لما تأكليهم أكل
> خمسه وخميسه فى وشك وأنت عمال تقور ع الصبح ..يا خرب بيت قرك السنه اللى فاتت طلعت بجيد جدا من تحت بوزك الفقرى..يا باى عليك
> ماشى يا عبقرينو.. طب قوليلى آخرة المذاكرة بتاعتك دى أيه ..نجحتى وخدتى الشهاده وبتقدير كمان ..مصيرك برضه حتقعدى فى البيت مفيش شغل.. وقليل لما أبن الحلال كمان يقعدك تربى العيال ..كَبِرى كبرِى أنت فاهمه الدنيا غلط ياننوسه
> انت أنسان غريب ..عاجبك حالك ده ..زمايلك أتخرجوا بقالهم 3 سنين وأنت مبلط وعمال تاخد السنه فى سنتين بالذمه ده كلام ناس عاقلين
> أيوه ده يبقى عين العقل ..حقولك ليه ..زمايلى أللى بتقولى عليهم دول عملوا أيه بعد التخرج ..ناس قاعده فى البيوت مستنيين الفرج وفيه ناس رجليها حفيت على شغل وبيرجعوا يقعدوا فى البيت برضه أما الباقى فراحوا الجيش وخلصوا وبرضه بيضوروا على شغل مش لاقيين ..وأللى ربنا كرمهم ولقوا شغل تلاقيهم بيشتغلوا فى أعمال لا تمت لبكالوريوس التجارة بأى صلة يعنى من الأخر بنضحك على نفسنا
> عايز تفهمنى أنك انت على حق والناس دى كلها غلط
> مش قصدى بس أنا ببص للمواضيع بنظرة تانيه ..زى واحد ماشى فى طريق وعارف أنه آخرته حيطه سد ..يمشى ويكمل ولا يشوف له سكه سالكه يمشى فيها ويريح نفسه ويريح أهله ولآ هى المقصود الحصول على شهاده والسلام
>يبقى بأه مالوش لازمه التعليم من أساسه ونقعد جهله فى بيوتنا طالما مافيش شغل ..مفيش مستقبل..مفيش جواز ونحط أيدينا على خدنا ونقول دا قضى الرحمن فووء ياجدع أنت من الطناش أللى أنت عايش فيه ده ..النهارده لقيت أللى بيصرف عليك وموفرلك الأكل والشرب والمسكن تقدر تقولى أهلك دول حيستحملوك لحد أمته ولو أستحملوك حيفضلوا عايشين لك على طول..أصحى ياعموره وبلاش أستهبال
> الأستهبال فى الزمن ده هو أللى ماشى
الحلقة رقم 2
شحاته وشحتوت
شحاته وشحتوت يجلسان على قهوة كتكوت وهما يشربان الشاى والقرفة مع حجرين معسل ويتحاوران فى كافة الأمور العائليه والسياسية والأجتماعيه كحال رواد القهاوى لكسر الوقت والأجتماع مع الأصدقاء بعيدا عن أجواء البيوت ومشاكلها ..وقال شحاته بعد أن أنجعص وشد نفس طويل من الشيشه وأخرجه من أنفه وفمه وهو يطلق آهات الهم والعجب ليفتح موضوع جديد مع رفيق عمره وجاره شحتوت
شحاته: هيه ..اللى بقولك أيه ياشحتوت يا خويا ..تفتكر الزياده أللى منزلها الحكومه على المرتبات دى حتكفى.. قصد الأسعار أللى رفعتها دى
شحتوت: ياشحاته يا خويا ده لعب شياطين أللى بيدهولك باليمين ياخدوه بالشمال.. الضعف ضعفين يعنى بيشتغلونا ..حكومه بتشتغل شعبها تخيل
> هى أول ولا آخر أشتغاله الحكومه بتعملها فينا ..عارف حكاية المصاصة
> مصاصة أيه لا مؤاخذه !!
> عارف حرامية العيال لما يضحكوا عليهم بمصاصة أو حتة شوكولاته ..هو ده أللى بتعملوا فينا الحكومه ..يطلع الجدع ده بتاع الحكومه بعد مايرفع الأسعار فى 1/5 يقولك حنزود المرتبات فى 1/8 ..طب يا مفترى يا ظالم نعيش أزاى الشهرين دول ..مش بالذمه ده أستهبال يا شحتوت يا خويا
> وأى أستهبال ..ده بقى أسمه أستنطاع وأستكراد وضرب على القفا ..لما يقولك أن الزياده حتكلف خزينة الدوله 10 مليار جنيه ..طب ماتقول كام مليار حتلمهم من البنزين والكهربا والميه والمواصلات والضرائب الجديده ..طبعا أضعاف المبلغ أللى حيزودوا بيه المرتبات
> يعنى الحكومه بتتفن تلم الفلوس من الشعب وسايبه الأغنياء ..تخيل نفسك ياشحاته أنك مسكوك الحكم راح تعمل أيه
> ياه ..ده أنا حعمل كتير قوى ..أول هام رايح أقبض على كل الحراميه وأحطهم فى السجون وأرد كل الأموال أللى نهبوها طوال فترة حكمهم للبلد
> عارف ياشحاته أنك لو رجعت الفلوس أللى سرقوها تخلى مصر أغنى دوله فى المنطقه بيقولك أن المنهوب بالمليارات وأتهرب بره وأتهرب جوه ..هيه كمل.. أنت كده ماشى كويس
> تانى هام حجيب ناس تخاف ربنا تمسك قناة السويس والبترول والسياحة والمواصلات والكهربا والطاقه وأطلق لجان لبحث وتحقيق لكل المواضيع القديمه والنصايب السوداء أللى عملتها الحكومه السابقه
> ياه ده أنت حتقضى عمرك وفترة رئاستك ومش حتحقق غير القليل ..بمناسبة فترة الرئاسه حتخليها كام سنه
> بالنسبه لى أول فتره حخليها 10 سنين وبعد كده كل فتره4سنين
> ينهارك أبيض ياشحاته أنت ناوى تاخد كام فتره
> يعنى الرؤساء أللى قبل منى كان بيحددوا عدد فترات الرئاسة الدستور بتاعنا مافهوش الكلام ده سايبها مفتوحة
> وأنت مش حتغير الدستور
> وحغيره ليه أشمعنى يا عنى تيجى عندى وأغيره طب ما غيرهوش ليه أللى قبل منى وأللى قبل قبله
> أنت أكيد بتستهبل ياشحاته
> وفيها أيه لما أستهبل ماكله مشغلها أستهبال.. طب قولى أنت يا شحتوت لو مسكوك الرئاسه حتعمل أيه ؟؟
> أول هام أنا متفق معاك على تطهير البلد من الفساد وأسترجاع أموال وممتلكات الشعب وألغاء سياسة التخصيص وأسترجاع الشركات والمصانع أللى أتباعت بتراب الفلوس ..تانى هام حعمل جيش من الشباب والشابات أسميه جيش التعمير أغزو به الصحراء وأبنى به المدن الجديدة ويبقى ضربت عصفورين بحجر عمرت الصحراء وقضيت على أزمة الأسكان وقضيت على البطاله وحليت أزمة الجواز لأولادنا بعد كده أفضى القاهرة من الزحام والخنقة وأبنى عاصمه جديده فى الساحل الشمالى
> الساحل الشمالى ياشحتوت ..وسعت قوى منك
> وحياتك ولا وسعت ولا حاجه ده عين العقل ..أنت عارف ياشحاته الحكومه الفقريه الحاليه عملت أيه.. وجهت مدخرات البلد كلها فى المكان ده.. أتبنى فيه أكتر من 400 قريه ومنتجع أتكلفوا المليارات والناس بتروحهم شهر أو أتنين بالكثير فى السنه ..عارف بقى لو عملنا العاصمه فى المنطقة دى العالم أللى قاعدة متكدسه فى القاهرة حتزحف على هناك وراء لقمة العيش وحتتحول القرى الشيك دى لمدن جديده ونظيفه ونعمر جنوبها الصحراء بالكامل
> لحد كده كويس..حتعمل أيه فى القوانين المشبوهه والدستور
> أولا حلغى كل القوانين سيئة السمعة وأطهر القضاء والشرطه وباقى المؤسسات وأعطى الحريه الكامله للأحزاب وأنشر العدل والمساواة
>وهل تعدل الدستور لتحديد فترة الرئاسه وعدد مرات الحكم
> طب بذمتك بعد أللى عملته ده كله تفتكر أن أسيب الحكم عشان واحد ياخدها مقشرة وعلى الجاهز يا خى ده أهده
> يعنى مش حتعدل دستور الرئاسه
> لأ حغيره بس حينص على أن تكون فترة حكمى مدى الحياه
> ونعمه الأستهبال..ونعمه الأخوه
ههههههههههههه
الحلفة رقم (3)
صباحه أستهبال
مرسى أفندى قام مبكرا على غير العاده فى الصباح أرتدى ملابسه على عجل وإتّسحَبْ على أطراف أصابعة وخرج وقفل ورائه باب الشقة فتصحو زوجته نبويه على صوت أغلاق الباب فتهب فزعة من السرير وهى تنادى عليه
> مرسى ..مرسى (خرج من باب البيت دون أن يرد عليهافتلاحقه من البلكونه وهى تنادى ) مرسى.. مرسى
ينظر فوقه وهو يصرخ : ايه فيه مش شيفانى مستعجل عايز ألحق الشغل
> ماسيبتش مصروف للبيت
> أتصرفى يانبويه أنا مستعجل
> أتصرف أزاى ياراجل أنت.. هو كل يوم أتصرف
> هشششش خش جوه وبلاش فضايح ..ست بيئه بصحيح
> لعلمك بقى مفيش لك غداء النهارده فرجنى حتتصرف أنت أزاى
> خشى تتك البلا أنت مابتشبعيش فلوس
ينطلق مرسى ليلحق بالأتوبيس فيركب أى أتوبيس محطتين وعندما يسأله الكمسارى تذاكر يرد عليه
> هو الأتوبيس ده مش رايح الهرم
> لا مش رايح الهرم > أومال أتوبيس الهرم نمره كام > أتوبيس 412
> طب محطته فين لو سمحت (ينشغل الكمسارى عنه بقطع تذاكر للركاب الكمسارى : أنت ياعم لسه مانزلتش > أنا بس بسأل هو الأتوبيس ده مش بيروح الهرم ..يخرج الكمسارى عن شعوره وهو يصرخ عليا الطلاق مابيروحش الهرم أنشا لله أطس فى نظرى والهيئة كلها تولع مابيروحش الهرم > أومال بيروح فين > بيروح العتبه > ياعم طب ماتقول كده من الصبح > طب ممكن آخد أتوبيس من العتبه يروح الهرم > ممكن > طب نمره كام ( ويستمر الحوار على هذا المنوال ومرسى يقف على سلم الأتوبيس حتى مرت ثلاثة محطات فينزل ليكمل السير إلى المصلحة وهو سعيد بأنه لم يقطع تذكره ..يدخل على عم عبده صاحب عربة الفول التى وراء المصلحة والمجتمع حولها العشرات من الموظفين وينادى عليه: عم عبده أجهز بالطلب وكتر الشطه ..يأكل مرسى ويمسح الأطباق ويبوس أيده وش وظهر ويضع يده فى جيبه لدفع الحساب
> الحساب كام ياعم عبده > ثلاثة جنيه يا أستاذ مرسى
يخرج محفظته لدفع الحساب ثم فجأة يصرخ من الألم والمغص المصطنع
> آه ياباطنى مصارينى بتتقطع أنت حاطط أيه فى الفول ده ياراجل أى أى هاتوا لى الأسعاف يضطرب عم عبده : فيه يا أستاذ الناس بتاكل من الصبح وماحدش أشتكى > الفول ده الأول من آخر القدره ولا من فوق الوش > ولا من أخرها ولا من وشها ده من وسط القدره > آى يابطنى وبتقول من وسط القدره أى أى يزداد عم عبده أضطرابا ويخشى من هروب الزباين وتضيع سمعته فيأخذ مرسى على جنب ويجعله يجلس على الكرسى حتى يهدأ وهو يقول : تحب أجيب لك حاجة من الأجزاخانه توقف المغص ده > لالا هات لى الأول حاجة صاقعة وأنا حروح بنفسى الأجزخانه الله يسامحك ياعم عبده تغرمنى حق أدويه وكشف وعلاج على الصبح > الحساب عندى أنا مايهمكش قوم بس من هنا الله يخليك خلينى أعرف أشتغل > حاضر لما أشرب الحاجة الصاقعة وحبعتلك صبى الأجزخانه تبقى تحاسبه أه يابطنى
يدخل مرسى أجزخانة الدكتور وديع : صباح الخير يادكتور أنت عايز منى كام ؟ > 15 جنيه ياسى مرسى > طب فين شوقى > أهو عندك أهه
> أسمع ياشوقى روح لعمك عبده بتاع الفول أللى على الناصيه وقوله مرسى بيقولك هات 30 جنيه بتوع الدوا > دوا أيه لا مؤاخذه > مالكش دعوه أنت ده سين بنا وبين بعض وماتقلوش قدام حد وياريتك تقوله فى ودنه > حاضر ياسى مرسى
يميل شوقى ويهمس فى أذن عم عبده > مرسى بيقولك هات 30 جنيه حق الدوا ..عم عبده وهو يخرج الفلوس : وايه أخباره هو كويس
> أيوه ياسيدى وقاعد عن الدكتور هات بقى خلصنا
يأخذ مرسى 15 جنيه من شوقى ويقبلهما ويضعهما فى جيبه ويصعد سلم المصلحة ويجلس على مكتبه ويخرج ورقة بيضاء ويقوم بالكتابه على الألة الكاتبه وفى منتصف الصفحة كلمة أعلان عن قيام رحلة قرية الياسمين بالأسماعليه بالأتوبيسات المكيفه ووجبة غداء وشاليهات فاخره وقضاء يوم ممتع بين الخضرة والشواطئ الفيروزيه تخفيض خاص للموظفين وتحت أشراف النقابه التكلفه الفعليه 50 جنيه للفرد و 25 جنيه بعد التخفيض هلموا للحجز طرف الأستاذ مرسى زيدان بقسم الميزانيه الأماكن محدوده وبأسبقية الحجز ويقوم بطبع نسخ لتوزيعها على جميع الأقسام
هههههههه
يتبع
الحلقة رقم (4)
ينتشرخبر الرحلة فى المصلحة ويتوافد الموظفين والموظفات على الأشتراك حتى بلغ عدد المشتركين 70 مشترك ويكتفى مرسى أفندى بهذا العدد ويبدأ فى الأعداد للرحلة بعد الأتفاق مع مهلباتية النقابه فيتقدم بكشف الأسماء للمعاونه فى المصاريف ولا تمانع فى دفع 40 % من التكلفه ويقوم بأستأجار أتوبيس واحد حمولة 56 راكب والأتفاق مع أحد الكازينوهات فى أسماعليه على الأستضافة بعد أن تقدم بجواب توصية للمحافظة ليحصل على تخفيض وفى اليوم المحدد لقيام الرحلة حضر الأتوبيس وتم التحميل حتى أكتظ عن آخره بين جلوس ووقوف وأنطلق إلى الأسماعليه ليفاجأ العاملين بسو الخدمة والمأكولات والذهاب والعوده وعندما واجهه زملاؤه أدعى المرض وهرب من الرحلة بعد أن حقق ألف جنيه من الهواء الطاير وأهو كله أستهبال
عم طناشى وزغلوله
عم طناشى تاجر صغير فى الأرياف عنده محل بقاله فى قريته كوم العسل ولكن فجأة ظهرت عليه علامات الثراء فطلق رتيبه أم العيال ( كنوع من الأستهبال البغيض الذى يمارسه من يغتنوا فجأة ) وتزوج زغلوله وهى أمرأة شديدة الجمال وهى قريبه لزوجته من بعيد.. وكانت قد تزوجت عدة مرات وكان هو آخرهم فتقدم إليها بقلب واثق يدعمه المال وطلب يدها فلم تمانع رغم فارق السن بينهم ولكن بالمال تستطيع التغلب على أى فارق ونسى عم طناشى زوجته القديمه (رتيبه) وأولادههما الخمسه ولم يقم بالصرف عليهم وعاش يسبح فى عسل زوجته الجديده زغلوله فما كان من رتيبه أن عقدت العزم فى أن تحصل على حقوقها من طناشى بمختلف الوسائل حتى لو قامت بهدم المعبد على من فيه ..فهى تعلم أسرار طناشى وكيف تحصل على هذه الثروة الطائله..وتذهب لطناشى فى المحل
رتيبه : عايزاك تيجى البيت النهارده يا طناشى فى أمر ضرورى
طناشى : أنا مش طلقتك ياوليه ونفقتك بتوصلك عايزه منى أيه
رتيبه : يا طناشى أنا مش عيزاك أتملى فى منظرك ولا بتحايل عليك عشان ترجعنى ..أنا بقولك أهه لو ما جيتش النهارده بكره حتكون فى النيابه وقد أعذر من أنذر
طناشى يرتبك ويغير من لهجة كلامه معها : يهون عليكى يارتيبه أن أدخل السجن ..عايزه تحبسى أبو عيالك
> كان هان عليك يا عديم الأصل أنك ترمينى أنا والعيال وتبعت لى ملاليم
> يعنى حتعملى أيه يا فالحة
> أنت ناسى أن كل دفاتر التموين الأصليه والمزورة لسه عندى فى البيت
> يانهارد أسود أنت عايزه تضيعينى
> وماله أضيعك زى ما ضيعتنا وأهو كله أستهبال أزيك بجى ؟؟
>طب طلباتك يارتيبه
> أنا ماليش طلبات شوف طلبات عيالك وبيتك
> يعنى عايزه كام كل شهر
> عايزه ألف جنيه صافيين غير خزين البيت وتدفع أجرة البيت والميه والكهربا ومصاريف المدارس قولت أيه يا طناشى
> طب أيه رأيك فى أللى يردك وترجعى لعصمتى
> قديمه يا أبن بهانه ألعب غيرها ..أنا خلاص نفسى أتسدت من ناحيتك
> أيه رأيك تدينى الدفاتر وتاخدى مبلغ كويس وتحلى عن سمايه
>المبلغ ده تدفعه ثمن سكاتى ومفيش دفاتر
> خلاص أنت حره حديكى فرصة تفكرى ونتقابل كمان يومين وخدى الفلوس دى عشان العيال
> يومين بس مفيش غيرهم ياطناشى وألا ؟؟سلام ماتنساش تسلم على زغلوله وتبوسها من هنا ومن هنا
يعود طناشى وهو مهموم فتنزعج زغلوله ويحكى لها ماحدث بينه وبين طليقته رتيبه أم العيال
زغلوله : حقولك تعمل أيه ..خد رتيبه على الحنين وقولها أن زغلوله عزماكى تقضى يوم معاها أنت والعيال
طناشى: وبعدين ..< مالكش دعوة سيب الباقى عليا حبعت لها الواد شلضم الحرامى يقلب البيت لحد مايلاقى الدفاتر ويدار مادخلك شر وخليها تضرب راسها فى الحيط
> فعلا كيد النساء غلب كيد الرجال
تقبل رتيبه عزومة زغلولة وتصطحب معها أولادها لينعموا بخير أبوهم الذين أنحرموا منه وفى أخر النهار تعود رتيبه إلى بيتها فتجده مقلوب رأسا على عقب فترقع بالصوت بعد أكتشافها أختفاء الدفاتر فتفهم الملعوب الذى فعله كل من زغلوله وطناشى
وفى لحظة أنسجام يسأل طناشى زغلوله عن الدفاتر
زغلوله : فى الحفظ والصون ياطنوشه ياحبيبى
> طب قومى هاتيهم نولع فيهم
> بعدين ياطناشى أنت مستعجل ليه
> طبعا مستعجل لأن فيها سجنى وضياعى
> شوف ياطناشى علشان تاخد الدفاتر تكتب لى المحلات والبيت وتدفع 50 ألف جنيه
> عملتيها يازغلوله آه يا عديمة الأصل ياخاينه ده ذنبى لأنى ظلمت رتيبه وعيالها بس مش حخليكى تتهنى بمليم من ثروتى
ويهجم عليها ويخنقها حتى الموت ويقوم بتسليم نفسه لقسم البوليس معترفا بجريمته..ويحكم عليه بالأشغال الشاقة المؤبده ويقوم عم طناشى برد رتيبه لعصمته قبل أن يتوفى فى السجن وبعدها آلت ثروته لزوجته وأولاده
هناك تعليق واحد:
بسم الله ماشلء الله الحمد لله انك اتجوزت..
والمغامرات دي جابت لك الفايدة الأدبية العظيمة دي
إرسال تعليق