قلعنى قلع

قلعنى قلع

هل أحد منكم تم تثبيته فى طريق عام أو فى شارع ضلمه ؟؟

البعض لا يعرف معنى كلمة تثبيت وهى تعنى قيام شخص أو عدة أشخاص بسرقتك وتقليبك تحت تهديد السلاح وهو مايسمى فى القانون السرقة بالأكراه وهذا ماحدث معى بالضبط ولكن بطريقة مضحكة .. فأثناء سيرى فى منطقة الكوربه بمصر الجديده بعد صلاة التراويح لأهضم ماتم ألتهامه على مائدة الأفطار

أذ أفاجأ بشاب لا يتعدى عمره 16- 17 سنه يضع نصل المطواه القرن الغزال فى جنبى وهو يهمس لى بكلمات لم أتبينها فزعقت فيه : عليى صوتك ياض مش سامعك عايز أيه .. يضغط نصل المطوه أكثر وهو يقول : طلع أللى معاك بهدوء بدل ما أغزك ( فهمت على طول أن البيه حرامى) فقلت له مبتسما: ممكن نتفاهم بس أبعد المطوه دى يا أبنى

فنظر إليى الشاب الصغير فوجدنى أبتسم فضحك هو الأخر وهو يقول : أول مره أقابل واحد مش خايف من المطوه أنت أيه ياعم

- أنا بالعربى مفلس لأنك حرامى عبيط شايف أنى طالع من الجامع ولابس جلابيه وشبشب .. تفتكر واحد على الهيئة دى يكون شايل فلوس قد أيه بكتيره عشرة جنيه وممكن لايوجد معه ولا مليم

- يعنى أيه حضرتك ما معكش فلوس طب هات الساعة

- للأسف يا أبنى مابحبش ألبس الساعة وأن بأصلى التروايح

- أنت لابس عباية حرير لما شوفتها قولت يا ما هنا ياما هناك

- وحياتك يا أبنى دى هدية من واحد صاحبى طلع عمره السنه أللى فاتت عجباك أقلعها ( وهممت برفع ذيل العباية وهو يرفض أن أخلعها ) خلاص يا عم مش عايز العباية غطى نفسك مايصحش ( سوقت فيها وأنا أحاول أن أخلع له العباية) يا عم خلاص غطى نفسك مايصحش وأنا أهلل بأعلى صوتى : سيبنى أقلع العباية حلال عليك ياعم .. عليا النعمة تأخذها .. ورحمة أمى حقلعها .. قلعنى قلع .. قلعنى قلع

(بدأ الماره فى التجمهر والوقوف للفرجه) يتبه صاحبنا من خطورة الموقف فيسلم ساقيه للريح ويافكيك وأنا مازلت أهلل : قلعنى قلع يا خويا

ههههههههه