العمل حياه

سأله وهو يقول : شوفت المنشور الجديد

-        قصدك على منشور المعاش المبكر .. ايوه .. ايه رأيك أصل أنا عايز أقدم وأطلع وأستريح وأحط القرشين فى البنك ونشوف جنب المعاش سبوبه فى القطاع الخاص

-        اوعى انت صاحبى وبـأ نصحك فكل أللى خرجوا معاش مبكر نصهم ماتوا فجأة والنصف الثانى أتجنن ..بتتكلم جد

-        عمتى وجوزها كانوا بيشتغلوا فى شركة البسكويت المصريه وجوزها ماشاء الله زى البغل فى جسم حضرتك كده .. وعمتى كانت لما تمشى حيطان الشقة والأرضيه تتهز من شدة خطوتها .ويا أرض أتهدى ما عليكى قدى . اتهفوا فى دماغهم هما الأتنين وقدموا على معاش مبكر وخرجوا وحطوا القرشين فى البنك وقعدوا قصاد بعض ناقر ونقير خناق ليل ونهار .. مفيش حاجة شغلاهم وعندهم طاقه جباره .. كنت فى زيارة لهم من قيمه كام سنه لقيت جوز عمتى نازل تكسير فى الدولاب لحد ماخلاه فتافيت وعمتى واقفه بتضحك فى المطبخ وعماله تكسر فى الصينى ولم يهدأ الأتنين ألا بعد أن دمروا الشقه تخيل بعدها بسنتين ماتا فى ظروف غامضه وجدوهم قاعدين على البلاط وفى يد كل منهم كوباية شاى والتليفزيون مفتوح وصوته على أخره وهو الذى جعل جيرانهم يكتشفوا جثتهما عندما طرقوا عليهما الباب

-        أنت خوفتنى بجد بحكاية جوز عمتك

-        ياعم خليك فى شغلك حتى لو متعب فالعمل ألم .. في اليابان الحكومه بتتحايل على الشعب انهم ياخدوا 3 ايام اجازه فى الأسبوع رفضوا وخرجت المظاهرات لجعل يوم واحد فقط اجازه أسبوعيه .. تخيل بقى لو طلبوا منهم الخروج على المعاش فى سن مبكر حيعملوا أيه .. الدوله الفاشله التى لا تعرف أدارة القوى البشريه لديها هى التى تبيع مصانعها وتسرح عمالها وموظفيها بالمعاش المبكر أنها جريمه من جرائم حقوق الأنسان لم يتنبه لها احد .. العمل حياة .. العمل شرف.. العمل قيمه والبطالة خزى وانكسار والطاحونه الدائرة دوما لا تبرد ابدا ولا تصدأ والنحله العاملة ليس لديها وقت للحزن وكما قال الآديب الأنجليزى جورج برناردشو  كلما عملت أكثر ، عشت أكثر .