أى حاجة فديمه للبيع ..روبابيكيا

أى حاجة قديمة للبيع ...روبابيكيا البشر



الحلقة رقم (1)


عتريس بيه وزغلوله هانم


- بيكيا .. أى حاجة قديمة للبيع أخلاق قديمة للبيع ذمم خربانه للبيع ستات تعبانه للبيع رجاله خرفانه للبيع عيال مقرفة للبيع شركات خسرانه للبيع بيكياااا
- أنت ياريس يابتاع الروبابكيا لوسمحت أطلع فوق أنا عايزك..
حاضر يا أستاذ
- ياله ياحماتى ياله ياعمى ألبسوا بسرعة الراجل طالع على السلم
- يابنى على مهلك علينا شويه أحنا مالحقناش ده رابع واحد بتاع روبابيكيا يشوفنا النهارده يا كمال يابنى
كمال : ألبسى ياحماتى البلطو الفرو والبرنيطة القش وأمسكى فى أيدك المروحة وأنت ياعمى ألبس الطربوش وأعدل البابيون وأمسك المنشه .. بسرعة شويه ياجماعة مش كده ..الراجل بيخبط على الباب خلينا نجيب فيكم سعر كويس.. حلو قوى كده أقعدوا جنب بعض فى الصالون ..ييه بلاش ياعمى تحط رجل على رجل وماتزودهاش مش ناقصة قنعرة
- وبعدين معاك ياكمال .. أنا مرتاح كده ودى قاعدتى من 90 سنة .. روح أنت أفتح الباب يارب يكون فى وشك القبول وتبيعنا ونخلص منك
يقوم كمال بفتح الباب ليدخل بائع الروبابيكيا : ياساتر عندك أيه يا أستاذ تبيعه
- أدخل بس وسمى .. حتتين تحفه يارب يكونوا من بختك ومن نصيبك
( يدخل به الصالون ) أقدم لك عتريس بيه وحرمه زغلوله هانم موديل 1938وما قبلها أتفرج براحتك وقولى أيه رأيك.. تربية سرايات خلفة برنسيسات
يقوم بائع الروبابيكيا بتفحص عتريس بيه ويرفع عن رأسه الطربوش ويفتح فمه وينظر فيه ويخبط على ظهره وكتفه ويطلب منه الوقوف فيقف مستندا على عصاته الأبنوس ويديره يمينا ويسارا
- حتة معتقة بصحيح مش بطال أهو ينفع .. لو سمحت ياهانم أقلعى البلطو الدنيا حر .. أفتحى بؤك أقفلى هى سنانك فين ياحجة
كمال : مالبستيش الطقم ليه ياحماتى
- نسيته ياخويا نسيته ..هاته من عندك يابنى
- ماشى يا أستاذ طالب فيهم كام
- كولك نظر يامعلم.. حاجة متربيه على الغالى بيه أبن باشا ..وهانم كانت ست الهوانم حتى شوف صورهم أيام العز والفخفخة
- أنا حخدهم منك كده شروه على بعض ببرازتين كبار يعنى ميتين جنيه مقفولين
- لالا يامعلم ماينفعش ده كان جايلى فيهم 400 جنية ومارضتش أبيعهم.. معقول ياراجل هانم وبيه بـ 200 جنيه بس
- يادوبك على قد توبهم وكمان أنا كارمك فيهم .. أنا معايا على العربيه تحت عيلة
بحالها راجل ومراته وأربع عيال زى البُغَال الواحد فيهم يدور ساقيه دافع فيهم 150 جنيه بس
- أش جاب لجاب يامعلم ده باشا بطربوش ودى هانم ببلطو زود شويه..ده البدلة والبالطو أللى عليهم يسوا أكثر من 200 جنيه
- وحياتك أنا واخدهم عشانهم سيبك بلا بيه بلا هانم كويس ان حخلصك منهم شوف بقى أنا حأكل بكام وأشرب بكام وأدى فى أدويه على ما أظبطهم.. أنا أمبارح أشتريت وزير سابق بمكتبه بكشك الحراسة أللى قدام بيته بالعسكرى أللى فيه بـ 180 جنيه .. وعلى كولن حنزود 20 جنيه عشان خاطرك قولت أيه
- قولت حلال عليك يامعلم شيل وأمرى لله
- أستنى لما أنادى على الصبيان بتوعى ييجوا يشلوهم .. زقلط ..شنكل أطلعوا فوق عايزكم بسرعة
( يصعد صبيان المعلم ويقوما برفع عتريس بيه بعد أن شبكا أيديهما وجلس بينهما بكل ألاطه وأنطلقا به على السلم
المعلم :على مهلك ياض أنت وهو أوعى يتخبط أو يتجرح منكم عايزه سليم ..
الحلقة رقم (2)


الكتالوج
بائع الروبابيكيا : وأنت ياهانم عايزه العيال يشلوكى زى عتريس بيه ولا تنزلى معايا على السلم واحده واحده لأنى شايف أن وزنك تقيل حبتين ويمكن العيال يقعوا بيكى
زغلوله وهى منفعلة : راجل صحيح ماعندكش دم ولا نظر ..يشلونى طبعا
- ماشى ربنا يطول لنا فى عمرك لحد ما ماينزلوكى
يخرج المعلم محفظته ويبدأ فى عد الفلوس : بقولك أيه يا أستاذ تحب تاخد نقديه ولا تشوف حاجة على العربيه بدل منهم وتدفع الفرق
- عندك أيه على العربيه يامعلم
- عندى من كله.. بهوات ووزراء وشعراء وفلاسفة ومفكرين وزعماء وستات رؤساء وملوك وبرنسيسات.. أنزل أتفرج ونقى ومش حنختلف أصلى أنا حبيتك لله فى لله ونفسى أخدمك .. البيه متجوز كام واحده
- هى واحده مفيش غيرها بنت عتريس بيه وزغلوله هانم أللى أشتريتهم
- وعلى كده مريحاك وشايفه طلباتك ولا ناوى تبيعها هى كمان
- يعنى.. أهى شويه كده وشويه كده وأدينى مستحمل
- شايفك مش مبسوط ..بقى ياراجل الشرع أداك رخصة تتجوز أربعة تقوم أنت مضيقها على نفسك وتتجوز واحده ساعة تروح وساعة تيجى .. أنزل معايا وأتفرج وأنت تغير رأيك وشوف النهارده وأشترى بكره ...وحعمل لك ديسكاونت ياعم.. وخد لك حتتين والثالثة هدية
كمال بحده :عايزنى آخد واحده روبابيكيا
- يعنى الست أللى معاك فابريكه ياخى وعلى الزيرو وما أضربش فيها مفك ماهو أكيد روبابيكيا برضو وضاربها السلك ومغيره كبالن ههههههههههه
ينزل كمال مع بائع الروبابيكيا لينتقى له شيئا مناسبا فلم يجد مبتغاه
المعلم : ولا يهمك يا أستاذ كمال.. تعال معانا الوكاله حتلاقى طلبك هناك هات الكتالوجات الحريمى ياواد يازقلط..حاضر يامعلمى
( يأخذ أول كتالوج فيقرأ المكتوب عليه .. نساء جميلات جدا..فيفرح والكتالوج الثانى .. نساء متوسطات الجمال ..فيشمأز والكتالوج الثالث .. نساء اللهم أحفظنا فيركنه بعيدا ويستعيذ بالله
يفتح كتالوج النساء الجميلات فيجد فى أول الصفحة ( جميلات ولكن شريرات )
فقال فى نفسه أبعد عن الشر وغنى له.. أكيد ستات من بتوع الأكياس السوده ويستمر فى تصفح الكتالوج حتى يصل إلى الجزأ الثانى بعنوان ( جميلات ولكن غبيات ) فأستعاذ بالله من الغباء وأصحابه ويظل يتصفح حتى يصل للجزأ الثالث بعنوان ( جميلات ولكن مُرّستان )
يضع كمال كتالوج الجميلات جانبا وهو ضجرا : أيه يامعلم كل الجميلات أللى عندك يا أما شريره أو غبيه أو مرستان.. مفيش واحده جميلة ورخيصة وعاقلة وبنت ناس كله روبابيكيا ماعندكش حاجة عِدله
- يا أستاذ كمال لو كانوا فيهم الخير ماكان رماهم الطير وبعدين ياسيدى الكمال لله وحده هو حد فينا سليم مش لازم ياسيدى تاخد حاجة حلوه قوى شوف الكتالوج التانى والتالت وخد حاجة نص نص حتلاقى فيهم الحنينة والطيبه والساذجة وأللى على نياتها والمخلصة والوفيه والمدهوله
- طب أشمعنى الصفات الكويسه موجوده فى الستات الوحشين والنص نص ماتبقاش ليه موجوده فى الجميلات
- يا استاذ ماينفعش تاخد كل حاجة جمال وأدب وعقل ودين وأخلاق .. دى ماتبقاش ست دى تبقى ملاك ..ربنا وزع كل حاجة بالعدل على البنى آدمين
- أيش قولتك يامعلم (يتناول الكتالوج الثانى – ستات نص نص- ويتصفحه وتقع عينه على صورة سيده متوسطة الجمال وهى ترسم على وجهها أبتسامة هادئة رزينه كالموناليزا ..والذى أستوقفه هو البيانات المكتوبه تحت الصوره ..الأسم صفاء عبدالله الشهيرة بصفاء الرايقة العمر 35 سنه سبق لها الزواج أكثر من مره ليس لديها أولاد ست بيت من الدرجة الأولى .. غير معلوم سبب لطلاقها.. طيبه وهادئة ورايقه ..ألخ
كمال : أنا عايز أشوف صفاء الرايقة دى يامعلم
الحلقة رقم(3)
صفاء الرايقه
- صفاء غاليه شويه ياكمال بيه .. يعنى بكام يعنى .. بـ 300 جنيه بس تدفع 80 جنيه وتستلمها ونبقى خالصين
- مش حنختلف أشوفها الأول يامعلم
- واد يازقلط أدخل المخزن هات الست صفاء الرايقة خليها تقابل البيه خد معاك فوطة صفراء والرياشه علشان تنفضها من التراب.. حاضر يامعلمى
( تخرج صفاء وهو يبدو عليها الطيبة والهدوء وعلى وجهها أبتسامتها الغامضة وتجلس أمام كمال وهو ينظر إليها ويتفحصها جيدا)
كمال: أنت الست صفاء الرايقة
- أيوه أنا الرايقه أى خدمه ..- أصلى أنا حبيت أتعرف قبل ما أشتريكى وأسألك شوية أسئله ..- أتفضل أسأل – حضرتك أتجوزتى كام مره
تبتسم أبتسامتها الهادئة وتقول بكل هدوء ورومانسيه ودلال وهى تعد على أصابعها: ست مرات بس ..كمال يتاخد ويرجع للخلف ويحدق فيها جيدا : عدم المؤاخذه أيه السبب فى طلاقك من السته
تمصمص شفتيها : مفيش نصيب ..كمال: أنا عارف أنه مفيش نصيب بس عايز أعرف سبب طلاقك من كل واحد من أزواجك السابقين
- قبل ما أقولك لازم تعرف أنك هنا فى محل روبابيكيا وكل الموجودين فيه روبابيكيا ولما تشترى روبابيكيا مادورش على العيب فين وعلى كلن حقولك علشان ترتاح .. أول واحد كان بخيل جلده والتانى كان مجنون والثالث كان لا مؤاخذه رزل ومعفن زى حضرتك والرابع كان مسطول ومات فى حادثة أتوبيس والخامس ماكانش فاضيلى دايما مشغول بتجارته وسفرياته أما السادس فكان فقرى وبيلعب قمار وباعنى لبتاع الروبابيكيا علشان يفك زنقته
- ياه يبقى كده العيب كان فيهم مش فيكى ياست صفاء
- قولى ياصافى أحسن ..ومين خالى من العيوب يا أستاذ قولت لى أسمك أيه
- كمال الحايس .. طب أنت عارفه العيب أللى فيكى
- مفيش حد بيعترف ويقول أن فيه عيب كل واحد فينا فاكر أنه أحسن واحد فى الدنيا .. حسيبك أنت تعرفه لوحدك لو كان فيه نصيب ..
صفاء: عايزه أسألك زى ماسألتنى ياكيمو .. - مفيش مانع أسألى ياصافى
- أنت متجوز ؟..- أيوه ..عندك أولاد؟ .. لا ..بتحب مراتك؟ .. كنت بحبها زمان ..ودلوقتى ما بتحبهاش ؟.. يعنى ..طب عايش معاها ليه مابعتهاش لبتاع الروبابيكيا وريحت دماغك؟ .. الحقيقة هى دة الخطوة الجاية .. طب مستنى أيه .. حتفضل قاعد معاها لما تعجز وتبيعك هى؟ .. لا طبعا لكن عايز واحده تانيه تحل محلها .. حتى لو كانت روبابيكيا ؟ .. حتى لو كانت روبابيكيا!!.. تبقى عملت أيه..
على الأقل أبقى غيرت .. الناس تغير الوحش بالكويس مش تغير الوحش بأوحش منه .. أيش عرفك أنك حتكونى أوحش من مراتى أنت تعرفيها؟ .. لا ما أعرفهاش
بس أعرف طبع الستات !!..من رأيى أن مراتك مهما كانت وحاشتها أحسن من أى ست تانيه روبابيكيا
-عجبتنى صراحتك ودخلتى قلبى ..
- أنت راجل كداب ومنافق وما بتفهمش ..
- الله الله أحنا حنغلط أما أنت لسانك طويل وست روبابيكيا بصحيح ..
- عرفت أنا ليه أتجوزت ست مرات لأنى لم أقابل راجل صادق لحد دلوقتى
- هى الست عايزه أيه غير راجل يفتح لها بيت تعيش فيه معززه مكرمه مش بتقولوا ضل راجل ولاضل حيطه
- أيوه بس لما تكون حيطة سليمه مش حيطه مايله
- أفهم من كده أن الراجل الكداب حيطه مايله
- يامآمنه للرجال يامآمنه للميه فى الغربال .. وأللى يكدب مره يكدب ألف مره
- يعنى أنت عمرك ما كدبتى ؟
– أنت باين عليك راجل طيب هو فيه ست مابتكدبش
- خلاص يبقى خالصين والحال من بعضه – لأ.. تفرق ياكيمو كدب الستات غير كدب الرجاله – أزاى يعنى ماهو كله كدب فى الأخر – الست كدبها برىء وعبيط
أماالرجاله فكدبها فظيع ومدمر ويخرب البيوت
- ما غلطش صحيح أللى سماكى الرايقه
يتدخل بائع الروبابيكيا : خلصونا بقى مش حنفتحها محدته.. قولت أيه يا استاذ كيمو .. نويتى على أيه يارايقه
صفاء : عايز الصراحة ياكيمو البيعه دى خسرانه وفر فلوسك
كمال : وأخسر ليه .. مفيش ضمان يامعلم على البيعة دى
المعلم : ضمان لمدة 3 أيام ولو مش عجباك تاخد فلوسك ناقصة الربع ولو قعدت معاك أسبوع يبقى النص ..بعد أسبوع بيوم مالكش عندى حاجة
كمال : أنا أشتريت يامعلم .. صفاء : حتندم ياكيمو
المعلم : هات فلوسك وخدها وخلصنى منها ..مع السلامه يارايقة
الحلقة رقم (4)
أمبيسبول
يصطحب كمال صفاء الرايقة ويرجع بها للبيت وفى الطريق
صفاء: الدنيا حر قوى أوففف أقف هنا هات لى عصير مانجه (تشرب العصير وتمر أمام باترينة ملابس) شوفت الفستان ده لو سمحت أدخل أقيسه ( تدخل تقيس أكثر من فستان وقمصان نوم وتجمعها وتضعها أمام البائعة لتستخرج فاتورة الدفع) أدفع ياكيمو ( يدفع كيمو وهو ينفخ من الغيظ ) تدخل محل للأحذية وتقيس أكثر من جزمه وتنقى شنطه وتضعهم أمام البائع وتنادى على كمال : أدفع ياكيمو ..يدفع كمال الحساب وهو يكاد ينفجر
صفاء : أنا جعانه قوى ياكيمو شوف أى محل تيك أواى وهات لى منه شاورمه
كمال : لسه بدرى على الغداء يارايقه
صفاء : أنت بتسمى الشاورمه غداء .. دى مسح زور ياكيمو
كمال فى سره : الله يخرب بيتك ده أنت نصيبه سودا .. الصبر يارب
بعد أن تأكل صفاء سندوتشات الشاورمة وتشرب المياه الغازيه وتتجشأ :بقولك أيه ياكيمو .. أيه تانى يا صافى .. ولا بلاش أحسن تزعل وتقول عليا فجعانه أو طمعانه ..قولى فى يومك أللى مش معدى .. لا يا كيمو مش حقول أنت باين عليك زعلان عشان شوية الحاجات التافهه أللى أشتريتها واللقمة أللى مسحتى بيها زورى مثتكترهم عليا .. قولى وخلصينى .. أشترى لى كارت شحن موبينيل من أبو خمسين للموبايل بتاعى ..
- أنت كمان معاكى موبايل وبتعملى بيه أيه ده أن شاء الله
- بكلم بيه صحاباتى الروبابيكيات
- شوفى ماعدش معايا فلوس غير 8 جنيه أهم..
- هاتهم وأنا أكمل من معايا 2 جنيه
صفاء : أنا لحد دلوقتى ما عرفتش أنت واخدنى معاك على جواز ولا أساعد المدام فى البيت قول الصراحة وماتكدبش زى ما أتفقنا ممنوع الكدب
كمال:عايزه الحقيقة أنا حجربك لمدة 3 أيام تساعدى فيهم المدام فى البيت .. لو عجبتينى نخليها جواز يارايقة أما ..لو.. لا قدر الله فشلتى أرجعك تانى لبتاع الروبابيكيا
- تعجبنى يبقى الشغل كده على ميه بيضا.. عندك أوضه ليه مخصوص
- أهى موجوده أوضة عتريس بيه وزغلوله هانم تقعدى فيها
- أوكيه علشان تبقى عارف نظامى .. تحط لى تليفزيون فى الأوضه وميعاد نومى من الساعة تمانيه مساءً وبأصحى الساعة 11 الصبح وفطارى خفيف 3 بضات مقليين بالزبده وتوست وجبنه رومى وفول بالزيت الحار وطعمية بالسمسم علشان الرجيم ..
- أومال لو ماكنتيش عامله رجيم كنت حتكلى أيه !!
- وكمان قبل ما أنسى أنا ماليش فى التنضيف ولا الغسيل ولا المسح لكن مستعده أشرف على الشغاله لما تنضف الشقة .. هيه وأيه كمان يارايقه
- أنا لازم أخرج يوميا لمدة ساعتين على الأقل .. حتروحى فين بقى أن شاء الله
- أروح ماطرح ماروح هو أنت جوزى.. أتفسح أقعد فى كوفى شوب أتفرج على المحلات أتمشى أومال أنت فاكر أيه حقعد فى البيت أستناك أنت والمدام زى قرد قطع.. وبالمره ماتنساش تعمل حسابك لمصروفى شهرى
- حتعملى أيه بالمصروف وأنت واكله شاربه نايمه على حسابى
- أومال أصرف منين وأتفسح وأخرج أزاى أنا يلزمنى على الأقل 500 جنيه فى الشهر .. خلاص أتسدى أحنا قربنا على البيت .. طب خد شيل الأكياس دى خلينى أطلع بيتك بأحترامى علشان برستيجى ما يتهزش قدام الجيران
يفتح كمال باب الشقة ويدخل ومعه صفاء : أتفضلى ياست صافى أدخلى برجلك اليمين ( تجيل صفاء عينيها فى الشقة وتفتح البلكونات ) شقة مش بطاله فين أوضتى فرجنى عليها.. يفتح لها غرفة عتريس بيه : أتفضلى ياست صفاء
- فين التليفزيون .. حاضر حجيب لك التليفزيون أللى فى أوضتى
- بالمره فرجنى على أوضتك أنت والمدام .. أتفضلى ياستى
- أيه القرف ده أنتم بتناموا هنا أزاى وبيجلكوا نوم أزاى.. دى أسطبل مش أوضة - الله يكرم أصلك أهو بنام ياستى وبنشخر وبعدين أنت مالك بأوضتى أنا والمدام
- أزاى ياكيمو مش أنا لو عجبتك حتغير رأيك وتتجوزنى زى ما أتفقنا
- أيوه قولت .. - ودى حتبقى أوضتى لما تبيع المدام لبتاع الروبابيكيا
- أيوه الكلام ده لو عجبتينى وللأسف لحد دلوقتى مش شايف حاجة عجبانى فيك
- أصبر أنت لسه شوفت حاجة ولعلمك أنا مش حقبل أتجوزك ألا لما تغير الأوضة الروبابيكيا دى.. أنا صافى الرايقة أنام على سرير مراتك الأولانيه أمبيسبول
بالمناسبة أنت ماقولتليش هى مراتك أسمها أيه
- أسمها عايده وبندلعها ونقولها ياديدى بس ده كان زمان
- ممكن تفرجنى صورتها لو سمحت .. ماعنديش ليها صورة حديثة هنا دلوقتى ومستعجله على أيه كلها ساعة وحتشرف .. أسيبك أنا دلوقتى أنا داخل أقلع هدومى وأريح شويه على ماتيجى المدام


الحلقة رقم (5)


لقاء ديدى والرايقة والزوج السابع


يدخل كمال ويغلق غرفته وينام ويترك صفاء الرايقة فى غرفة عتريس بيه فتقوم بتغيير ملابسها وترتدى قميص نوم جديد الذى قامت بشرائه وتخرج طلاء الأظافر من شنطتها وتقوم بدهانها وتضع مكياج صارخ على وجهها وهى تغنى وتسمع صوت باب الشقة وهو يفتح وتدخل عايده زوجة كمال (أمرأة فى الخمسينات من عمرها شديدة السمار على وجهها بودرة بكثافة لتفتح لونها متوسطة الحجم ولكنها على درجة عالية من النشاط والحيويه وتفاجأ بصفاء العايقة وهى تجلس


تغنى أغنية ليلى مراد [ ريداك والنبى ريداك ]وتسرح فى شعرها فترمى شنطتها وتدخل عليها كالوحش الكاسر)


عايده :هو مين يابت أللى ريداه وأنت مين وبتعملى أيه هنا


صفاء ببرود : زى ما أنتى شايفة ياحبيبتى بصلح مكياجى وبسرح شعرى أكيد أنت ديدى مراة كيمو حبيبى صح


تنفجر عايدة وتقبض على رقبة صفاء بعنف : حبك برص مش حسيبك ألا ما تقولى مين أللى جابك وألا حخلص عليك


تتخلص صفاء منها وتدفعها بعيدا عنها : جرى ايه ياوليه مالك داخله من بره زى القضى المستعجل أسألى براحة وأنا أجاوبك أنما لو سقتى الجنان والفتونه أنا مفيش زى فى الخناق وحتندمى أستهدى بالله وأقعدى بلاش هطل


تهدأ عايده قليلا وهى تكاد لا تصدق عينيها : أتجوزك خايب الرجا عليا


عايده : الحقيقة لسه أنا تحت الأختبار لمدة 3 أيام يا أتجوزنى يارجعنى


- يرجعك فين ياوليه وأيه تحت الأختبار ده


صفاء وهى تهز خصرها يمينا ويسار مع كل جمله: فى محل الروبابيكيا .. شافنى عجبته.. دفع الفرق ...وجابنى معاه.. وجابلى عصير منجه


وشوارمه وأشترىلى شوية الحاجات دى وقالى أقعدى فى أوضة حماتى ودخل نام


- يانهارك مطين هو أنت روبابيكيا


صفاء وقد أستفزتها الكلمة : مالهم الروبابيكيا ياحبيبتى .. لو أتجوزنى حبقى هانم وتبقى أنت روبابيكيا


- أقفلى بؤك ده مش عايزه أسمع منك ولا كلمة لما أشوف شغلى معاه الندل الجبان اللى نايم جوه وأنت لمى هدومك يابت أنتى ومش عايزه أشوفك هنا وألا والله لأكلك بأديا وسنانى


- هشش والله أنت ست بؤ على الفاضى ماتقدريش تعملى حاجة ومالكيش كلام معايا لما يصحى صاحب الشأن يبقى هو يتصرف


- عجبه فيكى أيه ولا أنت حلوة ولا جسم ولا رسم غير كمان لسانك الطويل أللى عايز قطعه ..مجرمه


- أنا مجرمه مع المجرم لكن هادية ونادية ورايقة قوى مع المحترمين وبعدين أنا عجباه ياستى على الأقل صغيرة وفيه صحة وعفيه تقدرى تقولى ليه هو حيستغنى عنك ويبيعك لبتاع الروبايكيا


- أنا ح يبعنى لبتاع الروبابيكيا


- إذا كان باع أللى خلفوكى مش حيبيعك أنت


- هو باع بابا وماما لبتاع الروبابيكيا كمان


- أيون بالذمه ياشيخه فى حد يفرض أبوه وأمه على جوزه أكيد زهقوه فى حياته


- هو قالك كده .. – مش بالظبط بس ايه أللى يخلى واحد يبيع حماه وحماته ألا إذا كانوا مزهقينه فى عيشته


- الندل الجبان أنا كنت حاسه بغدره.. ياحبيبى يابابا ياحبيبتى ياماما ياترى عاملين أيه دلوقتى .. أن ماخلصت عليه مابقاش أنا عايده


- هبله وعبيطه لو قتلتيه حتروحى السجن ويفضل أبوكى وأمك عند بتاع الروبابيكيا وقليل لو شنقوكى عايزه نصيحتى ولا لسه غيرانه منى


- أسمعى ياوليه يافراسه بطلى تستفزينى وألا والله حولع البيت بأللى فيه


- مش بقولك هبله وعبيطه وعامله زى الدبه العاميه ومش عايزه تشغلى مخك


- طب قولى يافايقه يارايقه لو أنت مكانى حتعملى أيه


- أيوه كده تعجبينى .. أنا بالعربى ولا عجبنى جوزك ولا ليه أى نيه أن أتجوزه أنا ياحبيبتى أتجوزت ست مرات وشوفت الويل على أدين الرجاله وحالفة على مصحف أن جوزى السابع لأطلع على عنيه البلاء الأزرق أنتقاما من كل صنف الرجاله.ووقع فى أيدى جوزك وعرفت من كلامه وحركاته أنه ندل ويستاهل الحرق وجه لأقضاه .. أنا مش عارفه أنت معاشره الراجل ده أزاى أنت بقالك قد أيه متجوزاه .. بتاع 30 سنه كده .. شوفتى بقى أن الرجاله مالهاش أمان بعد 30 سنه عشتيهم معاه وراحت صحتك وأتشرفطت جمالك وبقيتى مكعبره وعامله زى الزكيبه راح يدور على واحده أحلى منك وشباب عنك زى حالاتى


- اتلمى يابت أنت وخلى عندك دم .. آه صحيح الزمن عمل عمايله معايا أنما دى سنة الحياة كنتى تشوفينى أيام شبابى ومجدى ماكنتش أستعنى واحده زيك تشتغل عندى شغاله ..


– شوفى حنفضل نشتم فى بعض ونطول لسنتنا على بعض وسايبين الراجل الندل ده نايم بيشخر جوه ولا على باله


- طب نعمل ايه يارايقة .. – هاتى ودنك وأنا اقولك ياديدى سابقا


هئ هئ هئ


الحلقة رقم (6)


القرار والندم


تفتح عايده باب غرفة النوم التى ينام فيها كمال بهدوء وتقترب من السرير وتطبع قبلة مصطنعة على جبينه وهو شبه نائم فيفتح عينيه


- مين عايده أنت جيتى أمتى .. ومش عادتك تبوسينى وأنا نايم خير ياوش السعد


- ياحبيبى ياكيمو أنا مش عارفه أعمل لك أيه من المفاجأة الجميله أللى جايبها


- قصدك على صفاء الرايقة .. عجبتك


- دى هايله ياكيمو ونعمه ما أخترت ونقيت ياروحى


- يعنى مش زعلانه ولا غيرانه منها ولا حاجة


- بوتاتا.. دى ست كومل ومحترمه كان نفسى أجيب لك واحده زيها من زمان


- أنا جايبها علشان تساعدك فى البيت مش أكتر


- وماله ياحبيبى حتى لو عجبتك وأتجوزتها مافيهاش حاجة الشرع يسمح لك بأربعة وكتر خيرك أنك قعدت المده الطويله دى كلها خايف على مشاعرى وأنا بقى ياكيمو خلاص حسن الختام بقيت روبابيكيا


يدعك كمال فى عينيه ويسلك أذنيه : معقول الكلام أللى بتقوليه ده ياديدى


- كلمة ديدى كان زمان ياكيمو أيام ماكانت البوسه فى أيدى رطل ..دلوقتى ماتلاقيش كمال بدهشه أكثر : غريبه ..


عايده : ما غريب ألا الشيطان قوم بس كده من السرير وألبس هدومك وتعال نقعد سوى نشوفك ناوى على أيه وبعدها تنزل تجيب المأذون – أنا بقول نستنى شويه أدرس طباعها وأخلاقها قبل ما أتدبس فيها ولا أيه رأيك


- خير البر عاجله ياراجل قوم


- ياعنى أنت مش زعلانه ياديدى


- بوتيتا وأيه اللى يزعلنى طالما حبيب قلبى مبسوط أبقى أنا كمان مبسوطه


- لالا انت مش عايده أللى أنا عارفها .. أنا حاسس أن الكلام ده من وراء قلبك وبتمثلى عليا – ماتبقاش شكاك ياكيمو وسيبك من الأوهام دى


- أنا لو حتى أتجوزتها أنا مش حفرط فيكى حتفضلى على ذمتى وما الحب الا للحبيب الأولى – لالا ماتجيش على نفسك علشان ترضينى عايز تبعنى لبتاع الروبابيكيا مفيش مانع البته أنا من أيدك دى لأيدك دى هو أحنا حناخد زماننا وزمن غيرنا ..ألا بالمناسبه بابا وماما فين


- أقولك ياعايده وماتزعليش .. لا مش حزعل .. الحقيقة أنا بعتهم لبتاع الروبابيكيا ولعلمك برضاهم وهما مبسوطين آخر أنبساط


- أكبر غلطة عملتها ياكيمو مش كنت تقولى قبل ماتبيعهم كنا على الاقل خلناهم أتنازلوا لينا عن الفلوس أللى فى البنك ووثيقة التأمين


- هو أبوكى وأمك عندهم فلوس فى البنك ووثيقة تأمين وأنا ما أعرفش


- وكمان كاتبين لك مبلغ محترم أعترافا منهم بجميلك عليهم وأستضافتهم فى بيتك


- يانهار أسود وأنا بعتهم بغبائى


- ولا يهمك ياكيمو حلال عليك صفاء الرايقة ..قوم بقى وماتلوكش كتير نقعد سوا نشوف حنعمل أيه وننظم حياتنا ونشوف حتتجوزها ولا حتبعنى أنا كمان لبتاع الروبابيكيا ونبعت نجيب المأذون علشان نخلص


تتركه عايده وتخرج ويجلس كمال فوق السرير وهو يلطم على وجهه ويلوم نفسه


- ياغبائى يا حمريتى ..عتريس بيه وزغلوله هانم عندهم فلوس فى البنوك وأنا مش عارف وسبت الثروة دى تطير من أديا .. ياغلبى ياخيبتى


يرتدى ملابسه ويخرج للصالون فيجد عايده وصفاء الرايقة تجلسان متجاورتان وهما يتهامسان ويضحكان وكأنهما أصدقاء من زمان وليستا ضرائر فيتعجب ويدخل فى قلبه الخوف والريبه والشك وهو يقول فى نفسه ترى ماذا تتآمران هؤلاء النسوة وأى مصير يدبرانه لى


عايده تقوم من مكانها وتأخذ بيد كمال الواقف مشدوها وهو متردد فى الجلوس : أيه مالك ياكيمو ياحبيبى تعالى هات أيدك أقعد هنا جنب عروستك


يترك يده فتسحبه وهو مشدوه لتجلسه بجوار صفاء العايقه التى ترحب به وتفسح له ليجلس بجوارها : أقعد ياكيمو .. مالك مستغرب ليه .. ( كمال لا يتكلم وهو زائغ البصر بينهما وفى النهاية يجهش بالبكاء


صفاء : انت بتعيطى يا بيضا ( فيزداد فى البكاء ) أكيد دى دموع الفرح (يزداد بكائه أكثر ) تربت على كتفه : طب سد سد فيه حد يعيط يوم فرحه بالطريقة دى


لو سمحتى ياست عايده تجيبى له كوباية ميه ومناديل علشان كمال بيه


- سبيه ياست صفاء يفك عن نفسه وهو حيروق دلوقتى


يهدأ كمال بعد قليل ويمسح دموعة ويهب واقفا : فيه حاجة مش تمام بتدبروها ياست أنت وهى .. عايزين منى أيه بالظبط من غير لف ولا دوران والحركات القرعة بتاعتكم أللى أنا فاهمها


عايده بكل هدوء : احنا مش عايزين حاجة أحنا مستنيينك تقرر أن كنت ناوى تتجوز ست صفاء ولا لأ وناوى بعد ماتتجوزها حتقعد هنا ولا حتتكل على الله بيها


ماهى الشقة دى بأسمى شاريها لى بابا بفلوسه ولا ناوى ترجع عن فكرة الجواز وتقعد ست صفاء هنا تساعدنى فى البيت


كمال يجلس وهو يضع يده فوق رأسه : طب أدونى فرصة أفكر وأرد عليكم


عايده : قدامك خمس دقايق لو مقررتش حقرر أنا


صفاء وهى تضحك : خلص بقى ياكيمو فى ليلتك أللى مش عايزه تعدى خلينا نفرح... كمال : أنا قررت ( ويصمت) ..عايده وصفاء : هييه قووول


يرجع كمال ليضع يده مرة أخرى فوق رأسه مرة أخرى:صعب صعب قوى ياجماعة .. أقولكم قررى أنت ياعايده


الحلقة رقم (7 ) والأخيرة


سيد عضل


عايده : وبما أنك مش عارف تقرر ياكيمو أقرر أنا ( تخرج الموبايل من شنطتها وتتصل ).. أيوه بامعلم أنتم فين دلوقتى .. وجبت الطلب أللى قولت لك عليه .. كويس.. يعنى أنتم دلوقتى تحت البيت .. طب على مهلكم وأنتم طالعين السلم


كمال : معلم مين وطلب أيه أنت ناويه على أيه ياديدى


- أصبر على رزقك ياكيمو دايما مستعجل كده وبتضيع منك الفرص بأستعجالك


يدق جرس الباب فتقوم عايده بفتح الباب على مصراعية ليدخل بائع الروبابيكيا وصبيانه وهم يحملون عتريس بيه وزغلوله هانم


بائع الروبابيكيا : ننزلهم فين ياهانم.. نزلهم عندك فى اوضتهم أللى على اليمين وأنت داخل وبراحة عليهم يامعلم..هاى مامى أتبسطتى .. حفضى وأجيلك


يرجع المعلم وينادى من البلكونه : زقلط .. طلع لى سيد عضل بسرعة


- طلبك جاهز ياست هانم نتحاسب بقى (يخرج ألة حاسبه من جيبه ويجرى عليها


حساباته )طرحنا ثمن عتريس بيه وزغلوله هانم من ثمن كمال بيه وصفاء الرايقة وضيفنا عليهم ثمن الزبون الجديد سيد عضل يبقى تدفعى ياستى 300 جنيه قولتى أيه ياهانم


- بس على الله يكون سيد عضل بجد مش أى كلام


- أغشك ياست هانم ده معاه ست ميداليات فى المصارعة الحرة والجودو والكايك بوكس حتشوفيه دلوقتى وحتحكمى بنفسك.. أدخل ياسيد


( يدخل سيد عضل شاب ضخم الجثة فارع الطول مفتول العضلات تبدو عليه مظاهر الرجولة المتفجرة ويتقدم نحو عايده وهو يستعرض عضلاته كأبطال كمال الأجسام فتسعد به عايده )


عايده : خير مانقيت يامعلم وآدى حسابك وعندك كمال بيه والرايقه حلال عليك


أتفضل ياكابتن أستريح هنا


يرد عليها سيد بصوت أنثوى ناعم : يزيد فضلك ياحبيبتى


تتعجب عايده وهى لا تصدق ماتسمعه ويقع كمال من كثرة الضحك وهى تقول : هو صوته عامل كده ليه أنت جايب لى واحده ست يامعلم


يرد سيد عضل وهو يتقصع كالحريم : ست أيه يامدام ده أنا راجل بس الله يخرب بيته الدكتور أللى كان بيعالجنى فى المنتخب كان بيدينى هرمونات أنوثه غلط لحد مابقيت كده قوطعوا الدكاتره ياحبيبتى


المعلم : مش عاجبك يامدام نغيره بس أنا بأعتبر سيد أحسن واحد فى الروبابيكيا أللى عندى قولت أيه


- لا لابلاش سيد بتاعك ده بعدين أبقى أعدى عليك أختار حاجة بنفسى وأتفضل خلى صبيانك ياخدو كيمو وصافى من هنا


المعلم : قدامى ياست صافى .. مفيش بيعة تخلصنى منك .. وأنتوا يارجاله شيلوا كمال بيه على تحت


كمال يجرى للداخل وهو يرفض أن يذهب مع بائع الروبابيكيا ويغلق باب غرفته بالمفتاح وهو يهددبقتل من يقترب منه


عايده : وبعدين يامعلم أتصرف


المعلم : عادى ياست عايده بنقابل من ده كتير ( ينظر إلى سيد عضل ويأمره بأحضار كمال .. يقوم سيد وينحى كل الرجال بعيدا ويتقدم نحو باب غرفة النوم المختبئ خلفه كمال ويطرق عليه بعنف وهو ينادى عليه بصوته الأنثوى : أفتح ياكيمووو ماتخلنيش أدخلك وأطلعك غصب عنك


كمال من الداخل : ياعم أتلهى روح طلع الحرمة أللى جواك ياراجل روبابيكيا


سيد :كده أنت الجانى على نفسك


يقتحم سيد الباب ويكسره بعد أن ضربه ضربه واحد بقدمه ويقبض على كمال ويرفعه عاليا ويرميه فوق الأرض أكثر من مره وهو يصرخ من شدة الألم حتى تظلم الغرفة ويغمى عليه


يفتح كمال عينيه فيجد نفسه فوق أرضية غرفة النوم ويسيل من رأسه الدم ويلتف حوله كل من عايده وعتريس بيه وزغلوله هانم وهم يضمدون جراحه ويعملون على أفاقته وحمله فوق السرير


كمال بعد أن يفوق ويتنبه لمن حوله: ياه ده كان كابوس وحش بشكل .. اللهم أجعله خير ..يسمع صوت بائع الروبابيكيا وهو ينادى فى الشارع : بيكيا بيكيا


فيشير لعايده أن تغلق النافذه وتتركه ليكمل نومه وهو يقول : بيكيا بيكيا


حقا أنها دنيا روبابيكيا


هههههههههه


تمت

دلع سياسى (نكشة مخ )

الدلع السياسى

قالوا زمان ..يبقى غلطان أللى يلاقى دلع ومايدلعش..فكثير منا يحب الدلع وخاصة الجنس اللطيف والأطفال وكل من كتب عليهم الشقى والبعض يرفض الدلع بأى صورة من الصور حتى لو كان من أقرب الناس لهم

ولكن أن يكون الدلع جماعى من أسكندرية حتى أسوان فهذا نهج جديد لم يشهده شعب فى الدنيا غير شعب مصر فى هذه الحقبة الفلته من التاريخ المعاصر.. نعم مرت بنا فترات أدلعنا فيها على يد المستعمرين والمستبدين ولكن لا تقارن بما ينعم به الشعب الأن من دلع وطنى على يد الحزب الوطنى الذى دلعنا على مدى 30 عاما مضت متصلة بعرض مستمر لاينقطع ولو حتى بفاصل أعلانى

وكان نتيجة هذا الدلع أن تجرأ الشعب وخرج فى مظاهرات وأعتصامات ووقفات أحتجاجية وأضرابات وأنبثقت من داخل الجماهير حركات مشاغبة مثل كفاية والجمعية العامة من أجل التغيير ناكرين فضل سادتنا الذين حرصوا على تدلعينا ليلا ونهارا وهذا يرجع لزيادة جرعة الدلع فى الأونة الأخيرة مما أفسد هذا الشعب الذى يجب أن يكون معه وقفة جاده ومنع الدلع من هنا ورايح .. وأصاب هذا التجرأ نفسية وزراء الحكومة مما جعلهم محبطين ويقول لسان حالهم فى السر والعلن : ده كله نتيجة الدلع

سألوا يوسف بطرس غالى وزير الماليه أن يجد حلا لموظفى الضرائب العقارية

المعتصمين أمام مصلحة الضرائب منذ شهر مضى أن يلبى مطالبهم فأجاب بكل ثقة : دى عالم بتدلع..وعندما سألوا الوزيرة عائشة عبد الهادى أن تحضر لمناقشة مطالب عمال المحلة رفضت الحضور وقالت دى ناس بتدلع حتى الوزير الجديد أحمد زكى بدر (بدر الجمالى ) أعلنها صريحة أنه سيوقف الدلع فى المدارس والعوده للعصى لمن عصى وباقى الوزراء من صحة وزراعة وثقافة وغيرهم يشجبون بشده أثار الدلع التى ظهرت مؤخرا على الشعب المصرى

وعندما أعتصم سكان حى الدويقة أمام ديوان عام محافظة القاهرة للحصول على مساكن بدلا من التى هدمتها المحاقظة نظر إليهم المحافظ وهو يتحداهم وهو يقول :والله لو قعدتم هنا 100 سنه .. أنتم عالم بتدلع

وتأتى حبيبتنا أمريكا من خلف المحيط وتطالب بكل ثقة وجبروت الدوله العظمى وعمدة الكرة الأرضيه أن تتوقف الحكومة عن ممارسة الدلع مع شعبها وكأننا ولاية من ولايتها ولكن حكومتنا الهمامة الشجاعة الوطنيه أسما وفعلا رفضت بكل أباء وشمم أى تدخل فى شأنها الداخلى فهى حرة تدلع شعبها بمعرفتها ولا دخل لأحد (شعبى أنا حره فيه أفرده وأكويه )

فعندما تنتشر البطاله ويجلس العاطلين على القهاوى فهذا دلع حكومى للشباب لأراحته من عناء العمل .. وعندما تختفى معظم المواد الغذائية أو ترتفع أسعارها ولا يقدر الفقير على شرائها فهذا دلع حكومى مدبر حفاظا على صحة الشعب من أمراض المعدة والكليسترول عملا بمبدأ جوعوا تصحوا ..فيه بعد كده دلع بالذمة

وعندما تمتلء صناديق الأنتخابات ببطاقات مزوره للموتى والأحياء فهى تقوم بتدليع الناخبين وتوفر عليهم عناء الوقوف فى طوابير اللجان

وعندما تعين وزرائها من رجال المال والأعمال فهى تدلعهم بدلا من الجرى وراء المسؤلين ودفع الرشاوى لتسهيل الأعمال فما عليه غير التوقيع والختم فى الدرج

وعندما تفتعل الأزمات مثل الخبز والبوتاجاز والسولار فهو دلع من نوع آخر للحفاظ على الليقة البدنيه لشعبها الحبيب وتريبه على الجرى والمصارعة وحمل الأثقال فيه بعد كده دلع

وعندما ترفع الأسعار لجميع الخدمات والمرافق ووسائل المواصلات فهى تنمى داخل الشعب الواعظ الدينى باللجوء إلى الأضرحة والمساجد والكنائس للدعاء والتقرب لله وتبث فيه فضيلة الصبر على المكاره التى تفتح لصاحبها أبواب جنة عرضها السموات والأرض أعدت للصابرين

ولو قعدنا نعد فضائل الحكومة فى شتى المجالات لعرفنا بأننا أدلعنا مافيه الكفاية

ولم يتبقى فى حياتنا شيئا لم تدلعه الحكومة وبالرغم من هذا كرهنا هذا الدلع الماسخ الذى عافته الأنفس

كفاية كده أحسن منظرنا حندلع آخر دلع عند حبايبنا

سلاموز بطعم الموز

العسكرى والشمامه (نكشة مخ )

العسكرى والشمامه

الأمهات زمان كانت لهن أساليب عجيبة فى تربية الأطفال وقد توارثن هذه الأساليب من أمهات أمهاتهن وهى أساليب تتراوح بين الترغيب والترهيب

يدخل معظمها تحت بند الخرافة المقبوله والتى تتناسب مع عقلية الطفل

صحيح أن معظمها يأتى بمفعوله فى التو واللحظة ولكن مع مرور الزمن تصبح

نكته نضحك عليها ونسخر منها

ومن وسائل الترهيب

- أبو رجل مسلوخة..والعوو .. والعفريت..وأمنا الغوله ..وأبو شوال ..والعسكرى

أشياء كلها خرافية كنا نرهبها ونتخلى عن عنادنا الطفولى عندما نسمعها ولم يتبقى منها شيئ فى اللاوعى غير العسكرى وهو شيئ حقيقى وليس وهمى ونشاهده ليلا ونهارا مرتبط  بمخيلتنا بالقسوة والصرامة وبالتالى تولدت لدينا كراهية لكل ماهو بوليسى وأعرف أناس تفتخر بأنها لم تخطو إلى قسم البوليس طوال حياتها إلا مرة أو مرتين ..مرة عند أستخراج البطاقة ومرة ثانية للشباب عند طلبهم للتجنيد..وهذا الخوف الطفولى أمتد طوال حياتنا وتعاملنا مع أفراد الشرطة مازال يفتقد للثقة وعدم الأمان

ولم يصلح شعار الشرطة فى خدمة الشعب ما أفسده الدهر وما رسخ وتوطن فى عقولنا الصغيرة ونحن أطفال فعندما يبكى الطفل فى الطريق أو يعاند ماكان على الأم أن تقول: ياعسكرى تعال خد ميزو أو خد سوسو

 وكبر ميزو وكبرت سوسو وهما يعتقدان بأن العسكرى أنسان شرير يسحب الأنسان من قفاه ليضعه فى زنزانه مظلمه مع الفئران.. وللأسف العسكرى لم يحاول أن يغير هذه الصوره بل عجبته هو الأخر وتمادى فيها لأنه كان يخاف هو الأخر من العسكرى

 وتلجأ بعض الأمهات لوسيلة أخرى للترغيب مثل : أسمع الكلام علشان ربنا يحبك وأعمل الخير عشان تروح الجنة أو لا تفعل كذا حتى لا ربنا يسخطك وتكون قرد أو أغسل أديك ورجليك وبؤك قبل ماتنام حتى لاتشمك الشمامه.... فإذا شمتك

ووجدتك رائحتك جميله طبعت على جبينك قبله رائعة وتجعلك تحلم أحلام جميله تنعم فيها بمأكولات شهيه مثل البسبوسه والحلويات والشيكولاته  أما إذا وجدتك ذو رائحة كريهه ستتورم عيناك وتظهر الدمامل والفسافيس على وجهك الجميل .. حاضر يامامى ويسألها الصغير : هى الشمامه دى شكلها أيه ..فترد الأم : شكلها شمامه ويسأل مرة أخرى : يعنى شكل الشمامه أللى بناكلها ..الأم : تقريبا.. ويسأل ببرائة : هى الشمامه دى طيبه ولا وحشه ..الأم : طيبه مع الأولاد النضاف بس ووحشه قوى مع الأولاد أللى مابيغسلوش أديهم ولا بؤهم ولا رجليهم

شيئان متضدان الأول للترهيب وهو العسكرى والثانى للترغيب وهو الشمامة وهو ماجعل الصغير يسأل أمه مرة أخرى : هو ليه الشمامه ما بتشمش العسكرى

سكتت الأم ووقعت فى حيرة فكيف ترد على هذا السؤال المباغت وحاولت أن تصيغ كدبه وهميه جديده لترد بها على تساؤلات طفلها ولم تجد غير أن تتخلص من هذه المعضله غير أن تحكى له حدوتة الشاطر حسن وست الحسن والجمال ولكن بقى السؤال يدور فى عقلها : هو ليه الشمامه مابتشمش العسكرى؟؟

آه صحيح ليه فتضحك فى سرها وتطبع قبلة حانية على جبينه بعد أن أستغرق فى النوم ولكنها لم تنام فتسأل زوجها بطريقة عفويه قبل أن تنام : هو ليه الشمامة مابتشمش العسكرى .. يضحك الأب ويضع يده على جبينها ليتأكد بأنها غير مريضة ولا تكتنفها الهلاوس ويقول : نامى يا أم العيال وألا أجيب لك العسكرى أو أخلى الشمامه تيجى تشمك...

هههههه

صباح الخير ياكوره (صور ضاحكة)

صباح الخير يا الكوره

شعراوى  سمسار ووكيل لاعبين

ستوو وجدو وصراع الأنديه

أبو البغال فى مأزق

عيد ميلاد الكابتن بالو

ظيظى وفيفى وقرار الأعتزال

لقاء شفاتيرو مع زيتونه بقال الكرة المصرية

معركة شفاتيرو ومستشاريكوعلى الهواء مباشرة

الطوبه هى الحل وأحيانا فردة الجزمه

الحلقة رقم (1)

شعراوى سمسار ووكيل لاعبين

فى مكتبه بالدور 14 بالبرج المطل على نيل القاهرة وفى صالة الأستقبال ينتظر

عشرات من اللاعبين والأداريين وبعض من رجال الأعمال وأعضاء من مجالس

إدارات أندية القمة فى أنتظار السماح لهم بالدخول لمقابلة مستر شعراوى الوكيل الدولى للاعبى كورة القدم والكل يمنّى نفسه بالحصول على مبتغاه وتنادى السكرتيره على أسماء المنتظرين لأجراء المقابلة يدخل الكابتن سمير ملوخيه يحيط به أتنين من البودى جاردات فتتصدى له السكرتيره شاديه شقلاباظ

(التى يبدو عليها أنها كانت لاعبة أكروبات مخضرمة)

- آسفه ياكابتن.. مستر شعراوى عنده ضيوف وسيادتك نمره 35 فى الكشف لو سمحت أتفضل فى الصالون لحد ماييجى دورك حنده عليك

- بالذمه ده كلام ياشادية أنا الكابتن سمير ملوخيه أللى خيرى مغرقك من ساسك لراسك وعضو مجلس أدارة أكبر نادى فى مصر أقعد فى الصالون أنتظر مستر شعراوى أصحى يابنتى شوفى بتكلمى مين

- هو ده نظامنا يا أبو الكباتن عايز تدخل دلوقتى أقطع مستعجل وأنا تحت أمرك - عجبت لك يا زمن.. الله يرحم .. أقطعى مستعجل يا مدام وأمرى لله.. لوكان لك عند البوبى حاجة أقطع مستعجل

-أوكيه أتفضل سيادتك فى الصالون لحد ما أنادى عليك قدامك أتنين مستعجل قبل منك ياكابتن

- فيه عندك حجز أسرع من المستعجل

- أيوه يافندم عندنا فورى- أقطعى تذكرة فورى .. أتفضل يافندم فى الأوضه دى ثوانى ومستر شعراوى حيشرف عند حضرتك ..أوكيه لوسمحت ممنوع دخول البودى جاردات-أركن يابنى أنت وهو على جنب لما نشوف أخرتها معاهم

يدخل مستر شعراوى وهو يرحب بالكابتن ملوخيه ترحيب شديد ويعانقه ويطلب منه الجلوس . – خير ياكابتن أيه الزيارة المفاجأة دى

- شوف لى دلوقتى حالا 2 مهاجمين و2 باكات ولو فيه واحد فى خط النص مفيش مانع عايزين نجدد الفرقة قبل الموسم الجديد

- حضرتك عايزهم أجنبى ولا محلى رديف أنديه ماهو ده أسبوع الفضل ههههه

- أنا عايز المهاجمين أجنبى والباقى محلى صاحى وبيلعب مش رديف أو مستهلك

- الأجنبى عايزهم أفارقة ولا أوروبى ولا برازيلى ولا أرجنتينى ولا فنزويلى

- ياريت يكونوا برازيلى .. بس برازيلى أصلى مش مضروبين

- مش حضيع وقتك أتفضل آدى السديهات بتاعة اللعيبه أتفرج عليهم براحتك وأللى يعجبك فيهم أتصل بى علشان نتفق على السعر والعموله

- بقولك أيه يا شعراوى يا خويا أنا عايز الواد الطويل الهلف أللى فى خط ظهر نادى المقاولين أللى أسمه على بطاطس 

- كان على عينى ياملوخية يا خويا سبقك الكابتن طربئها وحجزه من خمس دقايق

- المهم هو خلص ولا لسه فيه كلام

- لحد دلوقتى كلام بس أنت عارف كلمتى عقد.. لكن علشان خاطرك لو عايزه زود شويه فى قيمته وربنا يسهل نخلص لك عليه

- كان حيدفع فيه كام طربئها .. مبلغ تافه مش كتير 7 مليون جنيه بس

- مستعد أدفع 200 ألف زياده وأحليلك بؤك كمان

- أوكيه نقدر نقول مبروك عليكم على بطاطس لو كتبت الشيك دلوقتى تقدر تاخد الواد فى أيدك وأنت خارج أهو قاعد بره

- ماشى وآدى الشيك بنص المبلغ والباقى بعد الكشف عليه

- كشف أيه ياكابتن مكتبنا مابيتعاملش فى اللعيبه الكسر وأنت عارف وشهادته الصحية أهى قدامى الولد صاغ سليم بياكل نجيلة الملعب أكل.. أدفع المبلغ كله وشيل بدل ماتندم الواد قدامه عقد سعودى بالدولار غير مابيطلع فى الأعلانات بتاعة سمنة البقرة الحلوب يعنى حيجيب دخل كويس للنادى.. لو ما عاجبكش بعد كده تقدر تبيعه وأنا حجيب لك فيه سعر كويس

- ماشى وأدى شيك تانى ببقية المبلغ .. بالمناسبه عندى ثلاثة لاعيبه للبيع

- عارفهم ماتقولش.. مش الواد شيكو شماعه وسيد المبروم والطرشجى ..دولت كبروا ياكابتن ماينفعش حتى يلعبوا طاوله أعملهم ماتش أعتزال وريح دماغك

- ماينفعش تبيعهم لأندية الأقاليم أو الشركات أهو أى حاجة تدخل خزينة النادى بدل ما يعفنوا على دكة الأحتياط

- أهو أنتم كده يا كباتن تسيبوا الواد قاعد على الدكه لحد مايعفن وبعدين تفكروا تبعوه أنت فاكر من ثلاث سنين جيبت لكم فيهم سعر كويس وأنتم أللى أدلعتم أشربوهم بقى ولا أقولك حنطوهم وحطوهم على باب النادى ححاول بس أبعت لى بطاقتهم وموافقتهم على البيع وعلى الله التساهيل .. شرفتنا ياكابتن

- بقول أيه يا مستر شعراوى أنت عارف أن المدام بتاعتى ماسكه فى النادى المدير الفنى لفريق الكوره النسائى وكان نفسها فى بت تكون ناشئه جديده بس تكون عفيه ومستعفيه تلعب فى خط الضهر

- قول للمدام طلبك موجود..زوزو مشرحة تيجى بكره تشوفها

-أيه ..مش البت دى بتاعة المصارعة ورفع الأثقال.. بتلعب كوره دلوقتى

- بنت أنما أيه حيطه أللى يتخبط فيها يطلع بعيد عنك على المشرحة أو يبطل كوره لدرجة أن فيه واحد من رؤساء الأنديه كان عايز ياخدها تلعب فى فرقة الرجاله لكن أتحاد الكوره رفض وأهى رافعة قضية فى الدستوريه العليا وأكيد حتكسبها وبكره أفكرك

- زوزو مشرحة بتلعب كوره !! والطرشجى يبطل ..عجبت لك يازمن.. خلى على بطاطس يحصلنى على النادى ياشعراوى .. سلام

الحلقة رقم (2)

ستوو وجدو وصراع الأندية

يخرج الكابتن سمير ملوخيه من مكتب شعراوى ويجد جميع المنتظرين ينظرون إليه فى حقد وكراهية ويرد على نظراتهم بضحكة ساخره ويجرى فى أتجاهه شاب قروى وهو ينادى عليه بعد أن قام بحجزه البودى جاردات من الأقتراب ..

الشاب : ياكابتن ياكابتن ملوخيه لو سمحت

سمير يأمر الحرس بتركه : أيوه يابنى عايز أيه

- أنا ستوو بتاع البدرشين ما سمعتش عنى ولا أيه أنا المنافس الجديد لجدو بتاع البحيره عايزك تجربنى ياكابتن نفسى ألعب للنادى بتاعكم

- أنت بقى ستوو أللى بيقولوا عليه طب تعال بكرة التمرين الساعة عشره يشوفك الكابتن أبو البغال .. خد الكارت ده

- ماهو أنا قابلت أبو البغال ومارضيش يمتحنى ياكابتن

- تعال بكره وربنا يسهل حشوفك أنا بنفسى

يخرج سمير ملوخيه من المكتب ويتهامس الحضور ..

- شايف ياكابتن زغلول أللى أنا شايفه

زغلول : قوم ياشلضم هات الواد ده وحصلنى بيه على تحت فى العربيه لسه بدرى على دورنا أما نشوف أيه حكايته

يهمس شلضم فى أذن ستوو وهو يشاور له على الكابتن زغلول  ثم يصطحبه جهة الأسانسير لينزل ليقابله بعيدا عن مكتب السمسره

زغلول : أنت ستوو بقى بتاع البدرشين أنت فينك يا أبنى أحنا بعتنالك على الساحة الشعبيه أللى أنت فيها ماعرفناش نوصلك.. كويس أن أحنا أتقابلنا أنت يا أبنى أتفحتلك طاقة القدر لو لعبت فى النادى بتاعنا جنب جدو

- معقول ياكابتن ألعب جنب جدو

- أنت مش عارف أن جدو بتاع البحيرة  حيتنقل عندنا الموسم ده ومعاه أونكل بتاع الزقازيق  وبالو بتاع نادى الألومنيوم وفرصة تنضم لبقية الفرقة

- معقول ياكابتن حلعب جنب جدو وكمان الكباتن أونكل وبالو أنا مش مصدق نفسى.. يابركة دعاكى يامه

- المهم قطع الكارت أللى معاك ده بتاع سمير ملوخيه وخده ياشلضم وأطلع بيه على عمارة النادى أللى فى أبو أتاته لحد مانعمله عقد

- لا مؤاخذه ياكابتن أنا ماعنديش لبس كوره أو حتى هدمه أنام فيه

- شوفه ياشلضم أصرف له لبس وأشترى له كل طلباته قميص وبنطلون غير المزيتين دول وأصرف له مية جنيه لحد ماييجى بكره النادى يشوفه مستشاريكو مدير النادى عايز حاجة تانى ياستوو

يهمس فى أذنه : وهات له 6 غيارات داخليه وليفة وحجر جلخ حاجة تانيه

- وماكينة حلاقة وبرطمان جيل لو سمحت ياكابتن وجزمه مقاس 46

- هات له كل أللى عايزه ياشلضم وبسرعة أخفى من هنا قبل ما حد يشوفنا

شلضم : حاضر ياكابتن أبعت لك زعزوعة وأبو قرطاس والقشاش عشان تخلصنا منهم النهارده وتشوف لهم بيعة خليهم يفضوا الشقق أللى قاعدين فيها

- لا ياغبى ماحدش فيهم ييجى هنا دلوقتى لحد ما نشوف شعراوى حيعمل فيهم أيه.. يصعد الكابتن زغلول لمكتب وكيل اللاعبين فيجد شاديه شقلباظ وهى تجرى ناحيته : كنت فين ياكابتن دورك كان حيفوت أتفضل أدخل بعد أللى جوه

يدخل زغلول مكتب شعراوى :أهلا يا أبو الكباتن منور أتفضل أستريح طلباتك

زغلول : أبدا عايزين تشوف لنا بيعة لزعزوعة وأبو قرطاس والقشاش

- معقول فيه حد يبيع زعزوعة ده مابقالوش غير موسم واحد عندكم أيه مش عجابكم ولا أيه – الحقيقة يا شعراوى الواد ده خدنا فيه مقلب كبير قوى أتغرينا فى طوله أتنين متر وعشره وقلنا حينفع فى منطقة الـ 18 علشان نستغل طوله ويلعب بدماغه لكن للأسف طلع ولا بيعرف يلعب بدماغه ولا برجله مش قادر ينسى أنه كان لعيب سله كل ماتش يمسك الكوره بأيده ويحطها فى الجون فينطرد ونشيل أحنا الطين

- ماشى بس كنتم صبرتم عليه شويه ولا يهمك حجيب لكم فيه سعر كويس أما أبو قرطاس والقشاش على حد علمى أنهم مكسورين وماينفعش يلعبوا كوره تانى

- ياكابتن العيال علاجنها على نفقة الدوله فى القصر العينى وبقت جاهزه وفورمه

- لما أنتم عالجتوهم طب مابيلعبوش ليه

- النادى عايز يبيعهم ويستثمرهم  دلوقتى قبل ما يتكسروا تانى يعنى متلصمين

- مبروك عليك ستوو بقى دى حركات تعملها يازغلول تخطف الواد من المكتب

الناس شافوك وكلمونى ..تؤ تؤ تؤ عيب قوى

- الولد مش مرتبط بنادى ولا بمكتبك رزق وربنا بعته وعلى كل حال حنجربه لو مانفعش حبعتهولك بدون مقابل

- طب لو نفع ياكابتن ماتنساش عمولة المكتب

- ولا يهمك فليس بين الخيرين حساب وبعدين يا أخى أنت طالع واكل نازل واكل

- هو أنا فاتحها سبيل ياكابتن ولا مؤسسة خيرية

- طب ماتزعلش نفسك ..بيع العيال دى الأول وآدى ورقهم وبعدين نتحاسب سلام

الحلقة رقم (3)

أبو البغال فى مأزق

كابتن سمير ملوخيه يجتمع بالجهاز الفنى للكوره وعلى رأسهم الكابتن أبو البغال

سمير : عاجبك كده يا أبو البغال أهو الولد أللى أسمه ستو راح الزمالك شوفت آخر مبارياتهم الواد زى الفل أحسن من الخمس مهاجمين أللى مرقدهم جانبك

أبو البغال : فل أيه وورد أيه يا كابتن سمير .. أنت ماشفتش الواد لما قلع ولبس الشورت كانت رجليه مقوسه .. مكسح يا كابتن وعنده فلات فول

- المكسح أللى مش عاجبك ده أخده الزمالك ببلاش وبيلعب جنب جدو وبالو وأونكل.. مر ثلاثة أسابيع من الدورى جاب فيهم عشر أجوان وحتعرف قيمته لما يحط فى فرقتك جونين ثلاثه ..

- أنت بتاخد بالمنظر  يا ابو البغال ولا باللعب ياكابتن

- اللعيب ياكابتن لازم يكون منظره محترم وشكله يفتح النفس مش مكسح ولا شكله تسول أو رد سجون أو جلنف

- أسمع يا أبو البغال الكلام ده ماينفعش أنا عايز اللعيب أللى يكسبنى وينعل أبو منظره أنشالله يكون قرد فاهم ودلوقتى شوف لك حل تقب تغطس تخطف لنا الواد ستو من الزمالك أزاى أنا ماعرفش وألا ورحمة أمى ما حيعدى عليك الموسم ومجلس الأدارة يكون قلبك على جنبك زى الصرصار الأعرج فاهم ولا أقول تانى..أشحال أحنا مشغلينك معانا بأسمك الفضيحة ده

- ماله أسمى يا كابتن أسم بيدل على القوة والصلابه مش بطاطس ولا مشمش ولا ملوخيه ..أنت بتتريأ على أسمى طب أتفضل ما أنتش داخل النادى ألا وفى أيدك

ياجدو ياستو يا أبو الحمير .. تتكم القرف فيكم وفى أللى مشغالينكم

الأجتماع أنتهى والفرقة من دلوقتى تحت أشراف الكابتن حبظلم من النهارده

فرجنى بقى يا ابو البغال حتعمل أيه

يجلس أبو البغال فى كافتيريا النادى وهو يضع يده على رأسه وهو يفكر كيف سيخطف ستو أو جدو من نادى الزمالك وتهديد سمير ملوخيه بأستبعاده من الجهاز الفنى وهو فى سرحانه يشعر بيد تهزه فيرفع رأسه وهو يقول : مين كابتن زنكلونى بالحضن ياراجل أنت فين مش باين ياكابتن

زنكلونى : يعنى بتسأل ما هو أنت عارف أنا كنت بدرب فى ليبيا بقالى سنتين وأستغنوا عن خدماتى وشحنونى على مصر من غير ما أخد بقية حسابى

أبو البغال وهو مستاء : توء توء ياخسارة ومشوك ليه ياكابتن

- أنا أتعاقدت معاهم من سنتين علشان أنشأ لهم فرقة جديده أسمها الشماريخ الخضر دى تبع الحزب الحاكم وأبتديت أدور على لعيبه ودوخت على ماكونت الفرقة ولعبت فى الدورى الليبى وكانت ماشيه زى الفل لحد ما أبتدى الحزب يتدخل فى شغلى ويعينوا قرايبهم فى الفرقة أقول لهم ياجماعة ماينفعش الشمروخ ده يقول لى ده أبن عم الزعيم المهم كل يوم يجيبوا ناس أشكال وألوان ده أبن خالته وده أبن خاله وده نسيبه المهم الفرقة الأصليه قعدت على الدكة وأصبح الفريق بالكامل من عيلة الزعيم ونزلت الهزايم ترف بالخمسة والسته وجيت فى ماتش قمت راكن فرقة الزعيم ومنزل الفرقة القديمة وكسبنا تمام التمام وبعد الماتش ركبنا الأتوبيس وبدل مانروح على النادى طلع بينا على السجن وهاتك سين وجيم وأتهام مباشر بأنى متعمد الأسائة لعائلة الزعيم وأننى شخص غير مرغوب فيه ويتم ترحيلى فورا عن طريق الحدود وحياتك يا كابتن مالحقت ألم هدومى وسلمونى بالترننج والشبشب الزنوبه ورجعت يامولاى ياما خلقتنى

- حاجة تزعل بجد يا زنكلونى من خرج من داره أتقل مقداره

- ألا صحيح يا أبو البغال الكلام ألا بيتقال أن حيشلوك من الفرقة لو ما جبتش ستو وجدو النادى .. أيوه صحيح وأدينى قاعد مش عارف أعمل أيه

- طب وأللى يجيبهملك تعمل معاه أيه .. ده أنا أبوس رجله قبل أيده

- سيبك من البوس والكلام أللى مايجبش همه

- أأمر يازنكلونى وأنا أنفذ رقبتى سداده

- حعمل بيها أيه رقبتك وأنا خالى شغل .. تشوف لى سكة  وسبوبه فى النادى أدرب ناشئين أشتغل مدرب أو أدارى أو حتى مدلك أى حاجة ما أنت عارف البير وغطاه - أتفقنا .. أسيبك بقى علشان أنفذ الخطة وكلها يومين العيال دى حتدخل بيهم على سمير ملوخيه وانت رافع راسك .. بس أيدك على باكوين (2000جنيه)

- قولى حتعمل أيه علشان أبقى معاك فى الصوره

- ده شغلى بقى يا أبو البغال مالكش دعوه أنت ليك أن يجيلك عقدين ممضيين من جدو وستو ليلعبوا فى النادى الموسم الجاى عايز ايه أكتر من كده 

الحلقة رقم (4)

عيد ميلاد بالو

يدخل شلضم مدرب الزمالك مكتب الكابتن زغلول المدير الفنى وفى يده جرائد الصباح وهو يلطم على وجهه ويضعها أمامه

- قرأت الخبر المكتوب فى الجرايد .. عملوها فينا تانى ولاد الـ

- خبر أيه..ياخبر أسود ومنيل ( يفتح الجرايد ويقرأ  ستو وجدو يوقعان  للنادى الأهلى  فيغشى عليه وبعد أن يتم أفاقته )

- فوء ياكابتن.. العيال موجوده هنا وبيقولوا أنهم لم يوقعوا على أى عقود للأهلى

- أومال الخبر أللى نشراه الجرايد جابوه منين .. قوم أجرى بسرعة هات لى العيال دى هنا لما نشوف أيه الحكاية يدخل جدو وستو مكتب زغلول بصحبة شلضم ...زغلول : أقدر أفهم أيه أللى مكتوب فى الجرايد ده يابنى أنت وهو

جدو : ده كلام جرايد وماحصلش دليل على كده أننا واقفين قدامك أهه

ستو : وحياتك ياباشا أنا مامضتش على حاجة ..ولا أنا

شلضم : الجرايد فيها صور العقود وتوقيعاتكم عليها وبصمة الأبهام تحت كل توقيع والنادى الأهلى بيتحدى أن يتم التشكيك فى صحة هذا التوقيع ..نصدقكم ولا نصدق الجرايد.. ستو : صدقونا أحنا ياكباتن .. ده كلام جرايد

زغلول : بقولك أيه ياشلضم بسرعة ألحق أتصل بالجرايد أللى نشره الخبر ونزل فيها تكذيب وأعلن عن مؤتمر صحفى حنعمله النهارده وبلغ الصحف والتليفزيون ووكلات الأنباء .. أتفضل أنت وسيب لى الأتنين المغفلين دول

يخرج شلضم ويترك جدو وستو فى مكتب زغلول الذى يقوم من مكتبه ويضع يده خلف ظهره وهو يلف ويدور حول اللاعبين وهو يحدق فيهم كالمفتش كولومبو

زغلول بعد صمت : كنت فين ياواد أنت وهو أمبارح

جدو : كنا فى حفلة عيد ميلاد الكابتن بالو فى البيت عنده

- يعنى مارحتوش النادى الأهلى

ستو : ورحمة أبويا ما هوبنا ناحيته

زغلول يلف زراعه فوق كتف ستو ويبتعد به صوب المكتب وهو يحدثه بصوت منخفض : أحكى لى يابنى بالتفصيل الممل أيه أللى حصل فى الحفله ومين أللى كان موجود معاكم وكلتم أيه وشربتم أيه

ستو بطيبة قلب القرويين يحكى بالتفصيل ماحدث : أحنا ياباشا أتصل بينا الكابتن بالو أمبارح الصبح وقال أنه عامل حفلة صغيرة فى البيت عنده بمناسبة عيد ميلاده وعازم لعيبة الفريق أللى بيحبهم بس .. فأخدت بعضى أنا وجدو وروحنا بعد ما أشترى كل واحد منا هديه وطلعنا على شقته فى مصر الجديده الساعة ثمانية زى ماقال لنا على العنوان .. دخلنا الشقة وسألنا عن الكابتن بالو فقالوا لنا زمانه جاى نزل فى مشوار صغير وحيرجع على طول .. الحقيقة يا كابتن ماكنش فيه معازيم كتير.. زغلول : هيه كمل والمعازيم دول كانوا رجاله ولا ستات

ستو :الحقيقة ياباشا كان معظمهم ستات

- ستات من أنهى نوع ياستو يابتاع البدرشين

- ستات ياباشا مش زى أى ستات ..كانوا حلوين قوى ومنفتحين على الأخر

- منفتحين أزاى ..- منفتحين فى اللبس والكلام والتهريج والهزار.. ستات مسخره

الحقيقة ما أدوناش فرصة نفكر فدخلوا علينا وكأنهم ماشفوش رجاله قبل كده ..بس ياكابتن نسوان زى القمر وريحتهم حلوة وطلبوا يرقصوا معانا رقصت مع بنت أسمها ظيظى وجدو رقص مع فيفى

- رقصتوا بقى عشرة بلدى ولا أفرنجى

- فى الأول كان بلدى وكنا قاعدين بأحترامنا بنسقف وبس وبعد كده قلبت بأفرنجى

دانس ياباشا وأللى أسمه أيه ده تنجو .. الحقيقة مارضيناش نكسفهم لما قالوا لنا أنهم زملكاويه وبيموتموا فى الفانله البيضا أم خطيين حمر وبس عايز تعرف أيه تانى ياباشا- هو أنت قولت حاجة .. كمل ماتتكسفش أعتبرنى زى والدك وبعد مارقصتوا ماشربتوش حاجة تطرى على قلبكم طبعا شربتوا أيه ياستو ياحبيبى

- الكدب خيبه ياسعاة البيه شربنا بتاع كده أسمه جونى ووكر قالوا لنا عليه أن ده المشروب الرسمى لكأس العالم وبيشربوه اللعيبه الأجانب والفيفا معترفه بيه

- شربتوا خمره قول ياوقعة أمى السودا قول أشجينى

- أحنا ماعرفناش أنها خمره أللى وأحنا مروحين بنتسند على بعض

- وعلى كده قابلتو بالو

- الحقيقة لأ وكل مانسأل عليه يقولوا لنا زمانه جاى

- مين أللى كانوا بيقولوا لكم .. ظيظى وفيفى ياكابتن .. وبعدين كمل

- طلبوا مننا نوقع على أتوجرافات للذكرى .. وقعنا وأتصورنا معاهم .. بس حصلت حاجة مش تمام .. بعد مافوقنا لقينا  نفسنا قاعدين فى الشقة لوحدنا بالأندر وير لا مؤاخذه

زغلول : يانهار أسود يانهارأسود هو أنتم كمان فقدتوا الوعى .. أسمع ياواد أنت وهو تعرفوا تقولوا الكلام ده قدام النيابه

- نقوله ياباشا ..طب قدامى ياكويرك أنت وهو.. آدى آخرة لعب الفلاحين لما يتمدن يجيب لأهله نصيبه ..دى مش نصيبه دى كارثة ..الله يخرب بيوتكم والبيوت أللى جنب بيوتكم.. أنتم عارفين أنكم ممكن تبطلوا كوره خالص غير الغرامات أللى حتدفعوها .. أسبقونى على العربية على ما أجيب المستشار القانونى للنادى

الحلقة رقم (5)

ظيظى وفيفى وقرار الأعتزال

يصل الكابتن زغلول إلى سرايا النيابه ومعه محضر بواقعة أغتصاب جدو

وستو على يد سيدات مجهولات.. ويتركهم فى الخارج ليقابل النائب العام ويشرح له الموضوع وهو منفعل..

ينظر النائب العام فى المحضر ويضحك أكثر عندما يقرأ تقرير المباحث

النائب العام: المباحث فى تقريرها بتقول أن الشقة دى مشبوهه وبيتردد عليها طلاب المتعة الحرام ولم يستدل على كلن من المدعوة زيزى وفيفى أللى جائت أوصافهم على لسان اللعيبه وقالوا أنهم أغتصبوهم وحصلوا على توقيعهم على عقود الأنضمام للنادى الأهلى .. هل تتهم أحد بتدبير هذه المؤامرة

زغلول : مفيش غيره سمير ملوخيه وأبو البغال فى النادى الأهلى أللى عملوا كده

- أتهامك ليهم لو مش صحيح وغير مبنى على شهود ووقائع حيضعك تحت طائلة القانون وممكن يرفعوا عليك قضية رد شرف وتعويض كبير

- يعملوها ياباشا ماهم فوجررر.. ودى مش أول ولا آخر حركة عملوها فينا

- ماهو ماتنساش ياكابتن أن الزمالك عمل حركات زى كده وأكثر فى السنين أللى فاتوا.. ناسى لما مضيتوا لعيبه من عندهم على وصولات أمانه ودخلتم واحد فيهم السجن ..عايز تستمر ونكمل التحقيق ونخليها قضيه أنا ماعنديش مانع

- ضربتين فى الراس توجع ياسيادة المشتشار أخدو الأتنين فراوده بتوعى

- القانون لا يحمى المغفلين يا كابتن

- أنا حرفع قضية أمام الفيفا والمحكمه الرياضية

- طب مش لما تعرف تكسب القضية أمام القضاء المصرى الأول

- حكسبها أن شاء الله والعين بالعين والبادى أظلم

- براحتك أتفضل كمل التحقيق فى النيابه ومش حنخلص من مسلسل التهريج بتاع الأهلى والزمالك فى أيامكم أللى مش ولابد وياريت بتلعبوا كوره

ينتقل زغلول إلى وكيل النيابه الذى يتولى القضيه ويقف المستشار القانونى للنادى أمام وكيل النيابه وهو يقدم حافظة مستندات وشهود أثبات بأن الواقعة ملفقة للحصول على توقيع اللاعبين بطريقة أجرامية مشبوهة وفى المساء يتم عمل مؤتمر صحفى للاعبين جدو وستو ومعهم زغلول والمستشار القانونى ويذاع على الهواء مباشرة ليعلن فيه زغلول بأن اللاعبين لم يوقعوا أى عقود للنادى الأهلى

صحفى1 :أحنا سمعنا ياكابتن أن جدو وستو أتمسكوا فى شقة مشبوهه ولهم صور آخر مسخرة منشوره فى مجلة الفضايح

زغلول : كدب وتزوير وتزييف .. وكلكم عارفين أن جدو وستو من الريف حيث أخلاق ومثل أهل القرية والولاد ما بيسبوش فرض ولسه جايين من عمره

صحفية سؤال للكابتن ستو : ورد بتقرير الطب الشرعى بأن البصمة والتوقيع بتوعكم أنت وجدو تقدر تقول أزاى ده حصل

- أنضحك علينا يا أبله وشربونا حاجة أصفرة بيقولوا عليها المشروب الرسمى لكأس العالم ( الصالة تضج بالضحك )

زغلول : بتضحكوا على أيه زى ما أنتم شايفين أن المؤامرة  دى وراها أيدى تلعب فى الخفاء من مصلحتها الأستيلاء على اللاعبين وتشويه سمعتهم

صحفى 2: قصدك مين أللى ليه مصلحة فى العملية دى.. هل تقصد النادى الأهلى أللى وقعوا له العقود ولا حد تانى

زغلول :أقصد أللى أقصده وبينا وبينه ساحات القضاء وأحب أن أعلنها أمامكم  صريحة مدويه بأننا كزملكاويه شرفاء أستطعنا بوسائلنا الخاصة الوصول للمتهمين والمشاركين فى هذه المؤامرة !!

صحفى 3 : تقول أيه للناس أللى عملوا فيكم كده ياكابتن

زغلول يرفع يديه للسماء وهو يقول : حسبى الله ونعمه الوكيل

ينتهى المؤتمر الصحفى وتتداول القضية داخل أروقة المحاكم وتنتهى بعدم صحة التوقيع ولكن يتبقى أثر خطير فى أداء ولعب جدو وستو

زغلول : أيه يابنى أنت وهو ..ده مش لعبكم ..أيه أللى جرالكم

جدو : الحقيقة ياكابتن كل ما أستلم كوره أسمع الجمهور فى المدرجات وهو بيقول يييه فيفى فيفى فيفى فأتبرجل وأشوط الكوره بره

ستو : وأنا ياكابتن بيقولوا لى ظيظى ظيظى .. أنا بطلت أروح الكفر .. حتى الناس

فى البلد بينادوا عليا ظيظى ظيظى .. أبويا وأمى وأخواتى قالوا لى ماتجيش البلد تانى يا ظيظى كفيانا فضايح.. يرضيك أبقى ظيظى على أخر الزمن أنا حبطل كوره ياكابتن ...زغلول : يكون أحسن ياظيظى.. أقعد ياخويا أنت وهو على الدكة لحد مانشوف لكم بيعة أو ماتش أعتزال .. آدى آخرة لعب الفلاحين

   الحلقة رقم (6)

لقاء  الكابتن شفاتيرو مع

زيتونه بقال الكوره المصرية

 يبدأ برنامج شفاتيرو فى الملعب بالأعلان عن مفاجأة الليله وهى أستضافة

بقال الكره المصرية.. الكابتن زتونه لاعب النادى المصرى ويبدأ فى قراءة التقديم

- كلنا نعلم بأن معلقين كرة القدم يطلقون أسماء عجيبه على نجوم كرة القدم

وبدأت هذه الحكاية من أيام الكاتب الراحل نجيب المستكاوى فأطلق أسم المعلم على حسن شحاته وملك النص على فاروق جعفر والمجرى والخطير وماردونا النيل وفاكهة الكرة المصريه وغيرها من الأسماء وسار على هذا الدرب أجيال من الصحفيين والمعلقين فأطلقوا اسماء جديده وشعارات ترددها الجماهير وهى سعيدة كنوع من التشجيع الجنونى لأبطال هذه اللعبه واليوم معنا أحد الكباتن الكبار الذى له بصمة فى الكرة المصرية الحديثة ..الكابتن زتونه المشهور بأسم بقال الكرة المصرية ومعكم اليوم سنستعرض حياته الكروية بالصوت والصوره وبمشاركة جمهور المشاهدين على التليفونات

شفاتيرو : من هو الذى أطلق عليك ياكابتن أسم بقال الكرة المصرية ولماذا هذه التسمية

الكابتن زتونه بلهجته البورسعيدية : الحقيقة ياكابتن أن أول من سمانى بهذا الأسم الأستاذ/ أبو زعروره فى عموده اليومى  بجريده الشخشيخه ومعايا المقاله أللى كتبها (يخرج من جيبه قصاصات كثيرة من ورق الجرايد ويظهرها المذيع على الشاشه ويقرأ مضمونها )

- يقول الأستاذ أبو زعروره فى مقاله  بأننا نهنئ أنفسنا بظهور الكابتن زتونه بهذا المستوى الجبار ويستحق عن جداره لقب بقال الكره االمصرية ليلحق بركب العظماء مما سبقوه مثل فاكهة الكرة المصريه وخضرى الكرة المصريه وجناينى الكرة المصريه وطعمجى الكرة المصريه  وفسخانى الكرة المصريه وبسبوسة ورز بلبن الكرة المصريه

وبالتالى لم يتبقى لدينا من الأسماءغير أن نطلق عليه بقال الكوره.. للعبه المتنوع الذى له طعم المورتديلا والزيتون الكلامطه والجبنه الدمياطى  فى العيش الفينو الحقيقة حاجة تفتح النفس وتجعلنا نشعر بالشبع الكروى ونحن نشاهده فى الملاعب يقسم ويقرطس المنافسين والحكام وهو الوحيد الذى أحرز العديد من الأهداف بصدره وبطنه ومؤخرته .. أنتهى مقال أبو زعروره ونحن من جانبنا نحيه على هذا الأنجاز الغير مسبوق فى تاريخه الكروى

- تقدر ياكابتن تحكى لنا قصة حياتك لتكون مرشد لأولادنا الناشئين فى كرة القدم

زيتونه : الحقيقة ياكابتن أنا لم أحصل على أى شهادة دراسيه لأنى كنت بهرب من المدرسه حبا فى الكوره الشراب التى كنت ألعبها فى حوارى بورسعيد حافى القدمين حتى أكتشفنى الكابتن برهومه الأشول البورسعيدى وأخدنى لنادى الترماى لألعب فيه وينج لفت وكنت سعيد بوجبة الغداء والأبونيه والثلاثة جنيهات التى كنت أقبضها فى أول كل شهر ثم أنتقلت لنادى السكه الحديد بعد ألغاء الترماى من الدورى ومنه إلى الترسانه التى ظهرت فيه نجوميتى وأنتقلت بعدها لصفوف النادى المصرى وأصبحت كابتن للفريق... - أحكى لنا ياكابتن عن أشهر أهدافك فى مسيرتك الكرويه

- كان أشهر أهدافى فى نادى الزمالك عندما أرسلت لى الكوره على خط النص أخدتها على راسى ومشيت بيها فى وسط المدافعين وهى فوق راسى لحد مادخلت بها الـ18 وهى فوق راسى برضه تكتل عليا المدافعين فدخلت بيها السكس يارد وقمت مزحلقها على صدرى فدخل عليا الجون فلفيت بيه فأصبحت الكوره على ظهرى وهوب قمت شياطها بمؤخرتى لا مؤاخذه فى الجون لتسكن الشباك ..الحقيقة الجون ده مانساهوش أتشال فيه مجلس أدارة الزمالك وحارس المرمى وخط الدفاع والحكم ..والجمهور الزملكاوى يومها ولع فى الأستاد وراح فيها ناس كثير والجون ده هو سبب شهرتى وفتح لى باب الأحتراف فى أوروبا وأدينى أهه قدامك رجعت لناديه الحبيب وأنا أحرزت حتى الأن 160 هدف دولى ومحلى وأصبحت عقيد الكرة المصريه وعلى وش عميد أن شاء الله

- كلمنا عن حياتك الخاصة يا كابتن

- أنا تزوجت 9 مرات أثناء مشوارى الكروى وعندى 11 عيل من زيجاتى السابقة يعنى فريق كوره بدون أحتياط هههههه

شفاتيرو مقاطعا : ومعانا أتصال خارجى من أم سعيد من حى المناخ ألوو

أم سعيد : ألوو ياكابتن شفاتيرو قول للكابتن زتونه يدفع أيجار الأوضه أللى متأخر عليه والفلوس أللى أستلفها من السكان وقوله كمان عيب قوى لما يبقى معاه الملايين ومايعملش أى خير فى بلده يبنى جامع أو مستوصف للغلابه

- معاكى حق .. الكابتن زتونه معاكى.. رد عليها ياكابتن

- أم سعيد مين ومناخ أيه أللى بتتكلم عليها أنا أعرفك ياست أنتى مين أللى حدفك عليا أنا ما أعرفش الكلام ده جابته منين ده أحنا دفاعين حق بالصلاة على النبى

يمكن قصدك على زيتونه تانى أو لمونه العنوان غلط يا أم سعيد

أم سعيد : بتستهبل ياكابتن ياكبير مفيش داعى أفضحك أكثر من كده وأحكى على حركاتك الناقصة ...(تووت توووت أنقطع الأتصال )

شفاتيرو : يا أم سعيد يا ام سعيد أتقطع الأتصال فاصل ونعود مع بقال الكره المصريه الكابتن زتونه ليكمل لنا مسيرة حياته الكرويه ماطرحوش بعيد سنعود

زتونه : الله يخرب بيتك ياشفاتيرو أنا مش قيالك مفيش داعى للتليفونات عاجبك الفضايح دى .. ايه رأيك بقى ورحمة أمى ما مكمل البرنامج

- ياعم زيتونه أحنا قطعنا الأتصال ولو كنا عايزين نفضحك كنا سبناها تتكلم

يترك زتونه الأستوديو وفشل الجميع بأستمراره فى التسجيل ويظهر شفاتيرو على الشاشة وهو يضحك ويعتذر لجمهور المشاهدين عن عدم أستكمال الحديث لعطل فنى أثناء التسجيل والأنتقال لفقره تاليه

الحلقة رقم (7) والأخيرة

معركة شفاتيرو ومستشاريكوعلى الهواء مباشرة

الطوبه هى الحل وأحيانا فردة الجزمه

فى واقعة هى الأولى والغريبه فى نوعها أثناء مبارة الأهلى والزمالك وفى المقصورة الرئيسية حيث يتواجد مجلسى أدارة كلا الناديين العريقين يحدث هرج ومرج بعد أن قام الأهلى بتسجيل الهدف الرابع فى مرمى الزمالك وتسلط الكاميرا على المقصورة ويشاهد ملايين المشاهدين رئيس نادى الزمالك الكابتن مستشاريكو وهو يرفع حذائه وهو يهدد به أعضاء مجلس أدارة النادى الأهلى

وفى برنامج شفاتيرو فى الملعب الذى يذاع يوميا على القناة الفضائية .. يعرض شفاتيرو شريط فيديو قام بتسجيله أحد الهواة وفيه تعدى مستشاريكو باللفظ والفعل وهو يلوح بفردة حذائة التى لم تظهر واضحة فى النقل الرئيسى للمبارة

بالأضافة على العديد من الصور الفوتوغرافيه التى تدين رئيس الزمالك ويقوم بتلقى الأتصالات التليفونيه من جميع أنحاء الجمهورية وأصحابها يسبون ويشتمون مستشاريكو ويصفوه بأفظع الألفاظ وكل هذا وشفاتيرو يصدق ويوافق على كل مايقال لأنه فى الأصل أهلاوى وفرصة لا تعوض جائت على طبق من ذهب ليرد له جزأ ولو يسير من تجاوزاته وطولة لسانه

بعد أنتهاء المكالامات يعلن شفاتيرو عن أتاحة الفرصة للكابتن مستشاريكو للرد

مستشاريكو : تصدق وتآمن بالله أنك مذيع رمة وزباله وأبن تيت وتيت

شفاتيرو : عيب ياكابتن وخلى عند أهلك دم وبلاش طولة لسان قدامك الشريط بيتكلم أهه عن تطاولك على مجلس الأدارة ورفعك للجزمه على الناس بالذمه دى أخلاق رياضيه

- الجزمه دى مش جزمتى دى فردة جزمه حدفها مشجع أهلاوى أبن تيت .. وأنا رافعها علشان أوريها لكباتن النادى الأهلى

- ياكابتن شوف الصوره دى وقولنا أيه رأيك ( يعرض شفاتيرو صوره لمستشاريكو وهو يقف بدون فردة الجزمه التى يلوحها للجميع )

- تصدقنى ولا تصدق المصوراتى النتن أللى مصور الصوره وأنا عارف قصدك أيه من أللى أنت بتعمله ده ومش حرد عليك ألا فى المحكمه أنت والأندال أمثالك

ينقطع الأتصال ويعود شفاتيرو للظهور وهويبدو عليه الأستياء ويقول : نأسف لجمهور المشاهدين لسماعهم الألفاظ الخارجة والبذيئة من رئيس نادى الزمالك وهذا الأسلوب ليس بجديد عليه والمعروف عنه بالتجاوزات الأخلاقيه قاصل ونعود لتقديم الفقرة التاليه

CD وتسجيلات الصوتيه لفضائح نسائية لشفاتيرو

  وبعد شهر من أحداث جزمة رئيس النادى الزمالك تقع فضيحة مدويه بتدبير وتأليف مستشاريكو وهو يقدم للنائب العام سى دى فاضح وتسجيلات تليفونية لشفاتيرو مع بعض النساء الساقطات يتبعها بسبعة عشرة أتهام من أخطرها قيام شفاتيرو بتجارة المخدرات والرشوة والتربح من وظيفته كونه نائب فى مجلس الشعب وتبدأ المناظرات المخجلة بينهما على شاشات التلفاز وعبر جميع وسائل الأعلام .. وبما أن مستشاريكو ضليع فى قواعد القانون فقد أستطاع أن يتحصل على حكم من المحكمة بمنع برنامج شفاتيرو فى الملعب ولم يجد صاحب القناة الفضائية أحسن من هذه فرصة ليقيل شفاتيرو من منصبه ويقوم بتعيين مستشاريكو بلسانه الزالف ليقدم برنامج رياضى جديد بأسم

مستشاريكو كاشف بلاويكو..

وصباح الخير ياكوره

ههههههههههه

تمت

شوفت حبيبى وفرحت معاه (نكشة مخ )

شوفت حبيبى وفرحت معاه

 على صوت عبد المطلب وهو يغنى رائعته المغناه ( شوفت حبيبى وفرحت معاه

كان وصل جميل حلو يامحلاه )بدأت مناقشات الأمس واليوم والغد وكل واحد فيهم يفتخر بما قدمه لى من أفضال وبدأ الأمس بالكلام

الأمس : أنا مخزن ذكرياتك الجميله وأحلامك التى تحققت تلجأ إليا عندما يخونك اليوم وتخاف من الغد أنا تاريخك ومن لم يكن له تاريخ لا يكون له حاضر أو مستقبل .. أنا مستودع تجاربك ومهاراتك .. بداخلى كل ماتعلمته من الحياه ..أنا الماضى بحلوه ومره سجلتنى فى صورك وأحاديثك وكتابتك .. أنا الذى تلجأ إليه

لتجترنى عندما تشعر بمرارة الأيام .. وتستحضرنى فى منامك وأحلامك لتقابل أحبابك وأصدقائك الذين غادروا الحياة .. أنا أحتوى جميع أحلام الطفولة والشباب

واللحظات الجميله من حبك ونزواتك وطيشك عندما تتذكرها تطفو على وجهك أبتسامة السعادة والفرحة أنا جزأ من شخصيتك وتكوينك الفكرى لا تستطيع أن

تمحوه أنا سجلك الوافى الأمين

أنا : ولكنك أيها الأمس ماضى والكثير منا يرفض النظر للخلف ويحاول أن ينساه لأحتوائه أيضا على ذكريات تعيسه ومعاناة ودموع فأنت خطواتى التى تركتها خلفى على درب الحياة لا أستطيع أن أعود على أثرها مرة أخرى بعد أن محيت أثارها بفعل رياح التغيير التى ردمتها.. أنت صورة فى برواز قديم قليل ما أنظر إليها وعندما أشاهدها وأنظر للمرآة أقول ليت الشباب يعود يوما لأغير هذه المسيرة التى فرضت علينا يا أيها الأمس أتركنى ولا تقلب عليا المواجع

الأمس : إذا تخليت عنى وتركتنى وتبرأت منى فسوف تتوه فى دروب الحياة وعندما تتوه لايصبح لك حاضر ولا غد أتركك ليومك علك تفيق !!

اليوم : أنا حاضرك أنا الحقيقة أنا الواقع الذى تلمسه بيدك وتستنشقه بأنفك وتذوقه بلسانك .. أنا قاعدة الأنطلاق نحو المستقبل وبدونى لن ترى الغد الذى تحلم به .. بالله عليك أستغل كل دقيقة منى ولا تضيعنى فيما هو تافه لا يفيد

وأسأل نفسك فى نهايتى قبل أن أرحل لأدخل خزانة الأمس ماذا أضفت من جديد

لتستقبل الغد القريب

أنا : أنت يايوم تأتى مع شروق كل شمس أما جميلا مشرقا أو كئيبا مرهقا وقد تمر سريعا شارخا أو بطيئا مملاً ليس لك صوره واحده كنت تجرى بسرعة الصاروخ فى الماضى والأن تمشى متخاذلا رتيبا كأنك رجل عجوز

- بيدك أن تجعلنى فتيا نشطا وأن تقتلنى وتجعلنى عجوزا هرما بألا تجعلنى أفلت من بين أصابعك بأهمالك وكسلك .. لاتجعلنى أذهب إلى مغارة الأمس دون أن تحملنى بأجمل الذكريات وأجل الأعمال .. أنا غدك الذى تبحث عنه والأن أنا بين يديك فلا تضيعنى فتندم فى وقت لايفيد فيه الندم

الغد : دعك ياعزيزى من الأمس واليوم بما لهم وما عليهم وتعال معى أحلم بالغد

الذى ستحقق فيه كل مافشلت فى تحقيقه بالأمس واليوم .. أنا المستقبل .. أنا الفجر الجديد الذى تنتظره .. أنا السعادة .. أنا أحلامك الورديه .. أنا الذى سيخلصك من أوهام الماضى وآلام الحاضر

أنا: ولكنك أيها الغد فى ظهر الغيب لربما تأتى أو لا تأتى نعم أنى أحلم بك وماجدوى الأحلام مالم تترجم لحقائق على أرض الواقع .. أنت سراب حتى لو أتيت ستكون يوما أو عاما أو عامين ثم ترحل لعالم الأمس

- هذه يا صديقى سنة الحياة فماضيك كان فى يوم من الأيام هو أمسك وحاضرك

وإذا أردت غد جميل مشرق أمسك بخناق يومك ولا تجعله يمر دون أن تضع فيه ولو طوبه فى بناء الغد

- أنتهت أغنية عبد المطلب ياخسارة

أسمعها على هذا الرابط وعش فى الزمن الجميل أشوفكم أمس

URL="http://www.sm3na.com/song32925.html