zezozkaria: حلقتات مسلسل عائلة الغتت (8 حلقات)

zezozkaria: حلقتات مسلسل عائلة الغتت (8 حلقات)

حلقتات مسلسل عائلة الغتت (8 حلقات)

عائلة الغتت
الحلقة رقم ( 1)
عريس شيماء
شيماء : بابا.. بابا.. الدكتور مدكور جاى النهارده علشان يقابلك
عبد المجيد : أنا مش فاضى النهارده خليه ييجى بكره
شيماء: هو بتاع اللبن ...أنت ماوراكش حاجه يابابى النهارده
عبد المجبد : أنا ماليش مزاج أقابل حد النهارده ..كان واجب أنه يتصل بى من أسبوع علشان أحدد له ميعاد الأفندى ده
شيماء : أتصل بيك أكتر من مره وسكرتيرك يرد عليه بأنك عندك أجتماع ..الراجل زهق وقرر أنه ييجى النهارده يقابلك
عبد المجبد : أما صحيح رجل غتت ..أزاى يفرض نفسه وييجى بدون ميعاد أنا مش حقابله
عنايات تتدخل فى الحديث ..خلاص ياعبده سيبنى أنا أقابله وبعدين يبقى نحدد له ميعاد لمقابلتك
شيماء بفرح: شكرا يامامى ياحبيبتى
عنايات بحدة : بنت ..مش معنى أنى وافقت أنى أقابله يبقى الموضوع خلاص بقه هيصه ومسخره..هو حييجى الساعة كام ولوحده ولا معاه حد وجايب معاه هديه ولا لأ
شيماء : الساعة سابعه وحييجى لوحده للتعارف بس وهو مابيحبش يهدى أويتهادى علشان تبقى عارفه من أولها
عنايات : أهلا ...وعلى كده مدكور ده كويس... يعنى راجل جد ولا من بتوع الأيام دى
شيماء : ده راجل جد جدا ومحترم جدا وعنيف جدا ده بيقولو عليه أرزل دكتور فى الكليه الطلبه بيخافوا منه ومسميينه (الأشكيف المخيف )
عبد المجيد : حنشوفه وبعدين نحكم إذا كان يستحق اللقب ولآ لأ هههه
عنايات : كده طمنتى قلبى يابنتى قومى ألبسى فستانك الأسود أبو أكمام طويله وحسك عينك تحطى أحمر ولا أبيض فى وشك ..أتفضلى عشان مفيش وقت..وماتنسيش الباريه الأخضر تنظفيه وتكويه وتلبسيه ولا أقولك خدى الباريه الأحمر بتاعى حيليق مع الفستان..وقومى شهلى خلصينا خلى اليوم ده يعدى على خير
(عنايات تكلم نفسها الأشكيف يتجوز السجانه ..تبتسم وفيها أيه ماهو عبد المجيد الغتت أتجوز عفريته هانم أللى هو أنا..يعنى البنت خير ماأختارت وهى على الدرب تسير ..تضحك لأول مرة من شهرين وتسخسس من الضحك فجأة وبدون مقدمات ..قولتى أسمه أيه ياشيماء ..أسمه الأشكيف المخيف خلاص بقا ياماما
عبد المجيد : فيها أيه يضحك دى ياهانم ومن أمتى كانت الأسامى بتلزق هو كده أعداء النجاح لما يلاقوا الواحد ناجح يطلعوا عليه الأوشاعات والأسماء البايخه دى ..يعنى أيه أشكيف المخيف
شيماء : مش فاكره يابابا.. ده فيلم رعب كنت جايبه لينا وأحنا صغيرين وكل يوم تشغله وتقعدنا نتفرج عليه علشان
ننام بس أنت أللى كنت بتنام أول مايشتغل .... أيوه أفتكرته..هو الفيلم ده فين دلوقتى
شيماء : ماما واخداه معاها فى المدرسه بتفرج عليه الأطفال الرزلة من أول كا جى وان ..لحد سنه سته أبتدائى
عنايات توجه كلامها إلى حازم : وانت تقوم تلبس لك حاجه عليك علشان تقابل الراجل لحد ما أطلع أقابله بدل البيجامه السوده المقيحه أللى أنت لابسها دى
حأزم : ماليش مزاج أقابل حد..خلينى قاعد مع بابا
عنايات بحده وعصبيه : قوم حالا غير هدومك بلاش غتاته حتبقى أنت وأبوك..عارف أن ما قمتش حالا حغتت عليك لمدة شهر قدام
حازم يتراجع : حاضر ياستى شهر بحاله يانهار أحنا ما بنستحملش ساعة واحدة غتاته من بتوعك ياست الكل ..هى العيله ناقصة واحد غتت زياده وكمان الأشكيف المخيف قال ... ما أللى فينا مكفينا
عنايات تشخط فيه : قوم ياولد وما تلكش كتير أحسن لك
حاضر حاضر حاضر
عنايات أنت بتقول حاضر ولسه قاعد ..قوم فز روح غير فى أوضتك
جتكم البلاوى..خلفه عار
يتبع

الحلقة رقم (2)
الدكتور مدكور
يرن جرس الباب ..يفتح حازم ويرحب بالدكتور مدكور ترحيب بارد كعادته
يرتدى الدكتور بدله سوداء ونظاره سوداء وكرافته حمراء ومنديل من نفس اللون.. رجل فارع الطول ذوصلعة لامعه والتكشيره على وجهه لا تفارقه يلوك فى فمه مصاصه أطفال كالنجم العالمى الأقرع كوجاك مفتش المباحث المشهور فى السينما الأمريكيه
حازم : أقعد هنا يا كوجاك لحد ماتيجى ماما تقابلك ..تشرب أيه ؟؟
مدكور : ينسون فى كوبايه أزاز بس تكون كبيره ومغسوله ونظيفه
حازم : مفيش ينسون فيه شاى فى كوبايه بلاستيك ووسخه ينفع
مدكور : لا أنا ما بشربش الشاى لو فيه كركديه أو جنزبيل أو نعناع
حازم بقرف : مفيش غير الشاى ..خلص أنا مش ناقصك
مدكور : حاجه غريبه يا أخى هى كل حاجه مفيش ..هات ميه ساقعه
حازم : مفيش ميه ساقعه ..الثلاجة عطلانه ..تشرب من الحنفيه
مدكور : مش عايزحاجه ..ياريتك تستعجل الجماعة علشان ورايا مواعيد
حازم : مستعجل طب قوم ألحق معادك وريحنا.. وبعدين أنت أصلا متأخر عن ميعادك 3دقائق ونصف أنت تقبل يادكتور أن طالب يدخل متأخر المحاضرة
مدكور : وبعدين معاك ياأبنى حنفضل كده نغتت على بعض مش فاضى أنا ورايا مواعيد
حازم : خلاص ياعم المشغول حبلغهم جوه
مدكور : والدك فين أمال ..قلت لى أسمك أيه
حازم : أسمى زفت حازم عبد المجيد الغتت وبابا جوه بيقرأ الجرنان ومش حيقابلك لأنه ما بيقبلش حد من غير ميعاد
مدكور : أنا مش أى حد أنا الدكتور مدكور..ومش جاى أشحت منكم ..وأيه المقابله أللى زى الزفت ديه لو أمك قصدى والدتك لو ماطلعتش فى خلال خمس دقائق أنا سأنسحب وذنبكم على جنبكم حتندموا والله
حازم : أنت حر ..ماما الأستاذه والمربيه الفاضله حتقابلك بعد ربع ساعه من دلوقتى ..هيه قلت أيه ؟؟
تدخل عنايات على صوت مدكور وهو يزعق مع حازم فتندهش وتعتذر لمدكور على غتاتت حازم فيجلس وقد عقد حاجبيه وهو ينفخ
عنايات : خلاص يادكتور مش عايزين نضيع وقت بعض ..حضرتك كنت طالب تقابل والد شيماء ليه ..عايزه أجابه علميه أكاديميه مختصره ومفيده
مدكور : أنا ..عايز.. أتجوز.. شيماء ( يقولها كلمه كلمه ثم ينحنى )
عنايات : أوكيه ..معاك السى فى بتاعك علشان نعرضه على مجلس العيله قبل ما تقابل والدها
مدكور : السى فى جاهز يا فندم أتفضلى حضرتك
عنايات : شكرا أرقام تليفوناتك موجوده فى الأوراق
مدكور : عندك يا هانم التليفونات والأميل والبلوج بتاعى ياريتكم ما تتأخروش فى الرد لأنى عندى أرتباطات عائليه وعلميه كتيره
عنايات : أنت فاكر أن الموضوع كده بالسهل ده لسه حينعقد المجلس وتنبثق منه لجان للبحث والتدقيق ثم تعرض النتائج وتصدر القرارات الأوليه تمهيدا للقرار النهائى أيدك على عشرين جنيه رسوم الأستعلام
مدكور : آسف معييش فكه يا مدام هو أنتم حتجوزونى تلاجه ولا بوتجاز .. (فعلا ونعمه العائلات الغتته ..الجو ده ياكل معايا قوى) ولى طلب أخير لو ماكنش فيه غتاته ممكن أقابل الأنسه شيماء
عنايات : هو طلب غتت حقيقى وأحنا بنحترم هذه الطلبات قدامكم عشر دقايق ونص تقدر تقعد معاها ..شيماء ..شيماء أدخلى قابلى الدكتور الرمه ده شوفيه عايزك فى أيه ..أفكرك عشر دقايق ونص مايزيدوش ثانيه عن أذنك يادكتور
تدخل شيماء بخطى عسكريه ثابته وهى ترتدى فستانها الأسود والباريه الأحمر وهى تقول: مايصحش تأخيرك ده أنت حضرتك فاكرها سويقه
مدكور يتغزل فى شيماء : الله أنت مش عارفه أنا سعيد بعائلتكم قٌد أيه..الباريه الأحمر حياكل من راسك حته زى ماتكون حريقه قايده فيها
شيماء تبتسم وهى تعدل الباريه على رأسها : صحيح عجبك ..ندخل فى الموضوع أنا مش مفهماك أنك علشان تنال القبول لازم تغتت عليهم كويس
مدكور : وحياتك غتت حتى أسألى ماما وحازم عملت فيهم أيه..بس أوعدك المره الجايه حخليهم يطقوا من جنابهم وقليل ما ينتحروا
شيماء : فين يابنى أنت التكشيره بتاعتك والعبسه المعقوده أللى بين عنيك ..أنت ما عجبتنيش وأنت بتتراجع فى كلامك معاهم عيزاك أرزل وأغلس وأرخم من كده علشان يوافقوا عليك ويطمنوا أن بنتهم حتروح بيت راجل غتت بجد
مدكور : خلصتى كلامك تحبى أرقعك قلمين على صداغك على سبيل التجربه..أرفع فيه من شأنك قدام مامى عفريته وبابى الغتت
شيماء : بعدين الكلام ده سابق لأوانه أدعى ربنا يوفقنا ونقنعهم بأننا قادرين نبنى بيت ترفرف عليه الغتاته والرزاله وطيور الظلام
مدكور : يارب..(يرفع يده بالدعاء )..... فاضلك دقيقه عايزه.... تقولى حاجه
شيماء : روح يا مدكور ربنا يرزقك فى كل خطوة ببنى آدم أرزل وأغتت منك ينكد عليك عشتك هى أمك أسمها أيه
مدكور : مامى أسمها شماته .. أحلى دعوة سمعتها من بعد وفاة المرحومه وهى بتفرفر من غتاتى ورزالتى عليها فى آخر أيامها
شيماء : الله يرحمها خدت الشر وراحت.. أشوفك فى الكليه لتسمع آخر الأخبار..باى باى مدكورتى..باباى شم مومتى..سلمى على أونكل عبد المجيد بيه الغتت
شيماء : يوصل يا أشكو
مدكور أيه أشكو ده ..جديده
شيماء: ده أسم الدلع بتاع أشكيف يا حبيبى

الحلقة رقم ( 3)
بعد كشف الهيئه بواسطة عبد المجيد بيه الغتت على الدكتور مدكور والتأكد من غتاته أجتمع مجلس العيله وقرر قبول الأشكيف زوجا لأبنتهم وتم الأتفاق على الأتى ..عدم زيارة مدكور لشيماء طوال فترة الخطوبه قبل الحصول على أذن مسبق وموافقة مكتوبه يحدد فيها اليوم والتاريخ والميعادومدة الزياره .( وبالرغم من هذا كان يحضر مدكور بدون ميعاد وفى توقيتات عجيبه على الغداء أو العشاء كنوع من الغتاته )
تقديم الهدايا المحترمه فى كل زيارة ( معظم الوقت كان يحضر أيد ورا وأيد قدام نوع من الغتاته طبعا وإذا أجبر يقوم بشراء كيلو بسبوسه يقوم بألتهامه قبل أن يمشى )
الخروج يكون بصحبة أحد أفراد العائلة وغالبا بصحبة عنايات هانم التى تقوم بالتنكيدعليه طوال الطريق وعند العوده يقوم هو بالتنكيد على شيماء فتقوم بدورها بالتنكيد على حازم ثم يقوم عبد المجيد بالتنكيد على الجميع فى السهره ) وقد تحدد لذلك يوم الأثنين من كل أسبوع كأحتفاليه للنكد والغتاته بموافقة ورضا الكل
وجائت حفلة الخطوبه وتم الأتفاق على عمل الحفله على سطوح العمارة فى الدور التاسع وقام البواب بتعطيل المصعد كنوع من الغتاته على عيلة الغتت ومعازيمهم
قامت عنايات هانم بتنظيم دخول المعازيم للسطوح بعد أن أنقطع نفسهم وأصيبوا بكرشة نفس على السلم
فالنساء فى ثلاثة صفوف من الكراسى فى جهة اليمين والرجال مثلهم فى جهة اليسار ويفصل بينهم الأطفال الذين جلسوا مربعين أيديهم كما أمرتهم عنايات بعدم التحدث أو القيام من أماكنهم ألا بعد الأستئذان وعدم رفع الأصبع عاليا
كما نبه عبد المجيد بيه على سكرتيره عند دعوة مرؤوسيه بأن يقوموا بتقديم الهدايا التذكاريه لهذه المناسبه وكذلك عنايات فعلت مع المدرسين والمدرسات وأللى مش حييجى أو يحضر بدون هديه حتبقى وقعته زى وشه طوال العام وهذا الدور قام به مدكور مع طلبة الدراسات العليا والمعيدين الموجودين معه فى القسم
ووقف كل من عبد المجيد ومدكور فى مدخل السطوح لأستقبال المدعوين وتلقى الهدايا وكانت مهمة حازم هى رص الهدايا فى كراتين أعدت لهذا الغرض من قبل وفى زحمة الأستقبال وتقديم الهدايا فتح حازم علبه صغيرة وردت من ضمن الهدايا وغير موجود عليها أسم صاحبها فوجد بها ورقة مكتوب عليها ( طز فيك يا غتت )
حازم : بابا شوفت العلبه دى فيها أيه ..فيها ورقة !!
يقرأ الورقه وهو يكاد ينفجر من الغيظ فيلاحظ ذلك مدكور
مدكور : أيه الكلام الفارغ ده ..د قلة أدب
عبد المجيد : شوف بقا مين من معازيمك بعت لك الورقة دى
مدكور : لا مش من معازيمى ياباشا أنا مش أسمى الغتت ولو كان عايز يبعتها لى كان كتب طز فيك يا أشكيف ومعروف حضرتك مين فينا الغتت ومين فينا الأشكيف
عبد المجيد : أتلم يا أفندى بس أنا حعرف مين أللى قدم الهدية دى
يتجه ناحية الميكرفون ويمسك بعلبة أخرى قطيفه غير الموجود فيها الورقه وهو يقول : أخوانى أخواتى أشكركم جميعا على تشريفكم حفل خطوبة أبنتى الوحيده شيماء والدكتور مدكور وكنت أتمنى ألا تتعبوا أنفسكم وتقدموا الهدايا فالأهم هو رؤيتكم ومشاركتنا فى فرحنا السعيد ..وقد لاحظت أنه من ضمن الهدايا القيمه جدا والتى قام فيها صاحبها بتكلفة نفسه فوق طاقتها بشراء هذا الخاتم الألماز ولكنه نسى أن يرفق معها كارته لشكره وردها له فى الأفراح ليته يتقدم لوضع أسمه على هديته وله منا جزيل الشكر أو يملى بأسمه لأبنى الموجود فى الخلف فليتفضل
وبعد ساعة يحضر حازم ومعه كشف فيه أكتر من عشرين أسم
حازم : شوفت ياسى بابا آدى أسماء الناس أللى بتقول أنها قدمت الخاتم هديه
أيشى ناس من عند مدكور وموظفين من عندك على مدرسين من عند ماما على ناس من العماره وناس ما عرفهاش عالم واطيه ماعندهاش ضمير خد أتصرف
عبد المجيد :هات الكشف ده وبلاش لاماضه وروح أقف مكانك شايف ناس جديده داخله الفرح
وأبتدأ الفرح على كاسيت وشريط تسجيل به 3 أغانى فقط ( ماتزوقينى ياماماـــــ مبروك عليك يامعجبانى ياغالى + الواد ده حلو سابق سنه + موسيقات الفرق النحاسيه +دعاء للنقشبندى )
قامت العروسه والعريس بأفتتاح الحفلة برقصة تنجو على أنغام موسيقى
الجيش والشرطه وبدأت النقطه تنزل ترف على العروسين ويقوم حازم بتسجيل الأسماء والمبالغ المدفعومه تنفيذا لأوامر أبوه الغتت
حازم : الأخ تبع مين ..أناتبع الدكتور مدكور .. ماهو مدكور ده ما يجيش من وراه ألا العالم الزباله .. لامؤاخذه هات خمسين جنيه غير دى ..ليه بقا فيها أيه مش نمرتها باينه
نمرة أيه أللى باينه ..ده الرقم اليمين غير الرقم الشمال ..معمولها عملية زراعة أعضاء
.. أنا معنديش غيرها لو مش عايزها هاتها
عبد المجيد : خلاص ياحازم خدها وأكتب قدام أسمه عشره جنيه بس
ينتهى الفرح ويقف عبد المجيد على باب السطوح لتوديع المعازيم وهو يتفحص الوجوه جيدا لعل وعسى أن يجد ضالته بين المدعوين وقد كان أستوقفه منظر شاب صغير السن وهو يحاول أن يتدارى منه للنزول من باب السلم فيعمل عبد المجيد نفسه مش واخد باله حتى يصل إلى باب السطوح فيقبض عليه
عبدالمجيد : أنا شوفتك فين قبل كده ؟؟ قولى كده فكرنى بأسمك
(الشاب وهو يرتجف وأسنانه وركبه تخبط فى بعضها)
أنا أسمى عصام محمود عند سيادتك فى الوزاره فى قسم المتابعه..
عبد المجيد : آه أفتكرتك مش أنت ياض أللى طسيتك 15 يوم خصم ماهيه
الأسبوع أللى فات ..آه ياندل ياحقير مين ياله أللى حط العلبه دى وفيها الورقه ضمن الهدايا ..قولى بصراحة مش حعملك حاجة
عصام : حضرتك( طب أحلف) بعدماخصمت لى الماهيه الدنيا أتلخبطت معايا وأستلفت وأديانت ..لحد ما جالى يوم الريس بتاعى يطلب مشاركتى فى هدية بنت سعاتك..قلت له أنا مقدرش الشهر ده الحقيقه الراجل رأف بحالى وعفانى من الأشتراك وقال لى فرصه تروح الفرح ومعاك هدية القسم وتقدمها بنفسك علشان يشوفك عبد المجيد بيه ومنها تعتذرله يمكن قلبه يحن عليك ويشيل لك الجزاء
عبد المجيد وهو ينظر إليه فى غيظ ويضغط على يد المسكين: أكيد طمعت فى الهديه فسفتها وكتبت ورقة السفاله..أنا طز فيه ياحتت حشرة أن ما ماوريتك وخليتك تلف حولين نفسك
عصام : الله الله هو أنت رجعت فى كلامك ولا أيه
عبد المجيد : أخرس ياكلب بكرة تيجى مكتبى..أنصراف


الحلقة رقم(4)
الفرق بين سياسة الغتاته
وغتاتت السياسه
فى لفته علميه أكاديميه دعى دكتور مدكور الأهل والأصدقاء لحضور مناقشة رسالة الماجستير لزوجته شيماء الغتت فى الكليه وكان موضوع الرسالة التى أختارها لها مدكور هو مناقشة {الفرق بين سياسة الغتاته وغتاتت السياسه }وقد حضر المناقشة عائلة الغتت وأصدقائهم ولفيف من طلبة الدراسات العليا وأساتذة وعميد الكليه وعضو من لجنة السياسات بالحزب الوطنى كضيف شرف بالأضافة إلى الصحفيين والأعلاميين وقد تدربت شيماء على الرسالة وحفظت كل الأجابات عن الأسئلة الموضوعة مسبقا وموزعة على أعضاء لجنة المناقشة
تصعد شيماء على المنصة وتوجه كلمة ترحيب وشكر للحاضرين ثم تستعرض أبواب البحث والنتائج والدروس المستفاده والمراجع العلميه والبيانات والأحصائات التى شملها ثم تقرأملخص لكل باب
الباب الأول : سياسة الغتاته
هى سياسة تتبعها الدول الكبرى مع دول العالم الثالث الخارجة عن الأطر المرسومه لها فى المجتمع الدولى أو تحاول أن تخرج عن النظام العالمى لعالم القطب الواحد وتقود الولايات المتحدة الأمريكيه وحلفائها معسكر الغتاته الدوليه فتتبع أساليب متعددة لتفيذ مخططتها على سبيل المثال لا الحصر..الضغوط الأقتصاديه من حظر وحصار أقتصادى لتجويع الشعوب وأفتعال الأزمات ..ضغوط عسكريه بتوجيه الأساطيل والجيوش لحدود هذه الدولة
ضغوط سياسية بقطع العلاقات وأدراج هذه الدولة على قوائم الدول التى ترعى الأرهاب ..ضغوط داخليه بأشعال الحروب الأهليه والطائفيه داخل هذه الدول وأتباع سياسة الحمار والجزرة والعصا وكلكم عارفينها وسياسة الغتاته وضع قواعدها هنرى كسينجر من سنين عدة وتسير عليها الولايات المتحدة منذ مايقرب من 25 سنه بعد سقوط الأتحاد السوفيتى فى نهايات القرن الماضى
وسياسة الغتاته تظهر جليا فى كل من العراق وفلسطين والسودان وأفغانستان وأخيرا فى مصر وقد أفردت فصل كامل لكل حالة تناولت فيه بالتحليل مدى تأثير سياسة الغتاته الأمريكيه على قضايا هذه الشعوب
تصفيق حاد ورد على أسئلة اللجنه المعروفه ثم الأنتقال للباب الثانى
بعد أستراحه قصيرة لتناول الشاى والجاتوه

الباب الثانى
عن غتاتت السياسه أو بمعنى أشمل دور السياسه فى تفيذ برامج الغتاته وهو ما نلاحظه جليا فى حكومات العالم الثالث فقد دأبت هذه الحكومات على تنفيذ برامج الغتاته على شعوبها لتحقيق الأهداف التاليه قمع وتعذيب الشعوب ..منع الثورات ..ألهاء الشعب فى الجدل حول هذه السياسه..وهى تنفذ هذه البرامج عن طريق أصدار قوانين شبه أسبوعيه ليقع المواطن فى حيرة دائمه ..تزوير الأنتخابات ..فرض شخصيات غتته للتعامل مع مطالب الجماهير وأستخدام جهاز الأعلام الحكومى المسموع والمقروء والمرئى للترويج لهذه السياسه وأختيار شخصيات رخمه وغتته لتقديم هذه البرامج أشغال الشعب بتوافه الأمور مثل الكورة والفتاوى الدينيه وفضائح الممثلين والممثلات..ألخ
وتستمر شيماء فى عرض الرساله والمراجع وتجاوب على جميع الأسئله حتى تفاجأ بسؤال من أحدى الطالبات
الطالبه تقدم نفسها : صفيه عبد الحميد/ طالبه بالدراسات العليا بالكليه السؤال هو : كيف ألتحقتى بالدراسات العليا وأنتى ترتيبك الأخير على الدفعة وجميع تقديراتك مقبول غير السنوات التى رسبتى فيها
شيماء أربكها السؤال المباغت وبما أنها من عيلة الغتت فقد تماسكت وردت فى هدوأ : اولا الزميله لم تقرأ آخر تعديل فى لائحة الألتحاق فى قسم الدراسات وهو موجود بمكتب رئيس القسم ونشر بلوحة الأعلانات
يقوم مدكور بالتصفيق ويتبعه باقى الحاضرين وهم لا يعرفون على ماذا يصفقوا ويأخذ مدكور الكلمه بسرعه ليعلن نتيج الرسالة على الجميع بأن الطالبه شيماء قبلت رسالتها وتنشر وتقديرها أمتياز مع مرتبة الشرف وينفض الجمع ويذهب مدكور إلى الطالبه ويمسك لها ذقنه وهو يقول : أن ماوريتك ياصفيه أن ما سحبت منك البكالوريوس ورجعتك سنه أولى ما بقاش أنا الدكتور مدكور
الحلقة رقم( 5 )
الغتاته حتى آخر ساعه
كان يوما حافلا بخروج عبد المجيد الغتت على المعاش فقد كان يوم فرح وعيد فى الوزاره وتبادل الموظفين التبريكات والقبلات بأنتهاء عصر عبد المجيد الأسود وبالرغم من هذا فقد كانت قاعة الحفلة ممتلئه عن آخرها بالحضور بالمديرين والموظفين هل هى شماته فيه ؟ أو الفرجه عليه وهو يحمل عصاه ويرحل؟ أو شعور طيب لتوديعه بعد طول العشرة المهببه معهم الله أعلم بالنيات
دخل عبد المجيد القاعة وهو مرفوع الرأس ثابت الوجدان قوى الشكيمة ليسحق شماتة الشامتين وقد أعلنها صراحة أمام الجميع بقوله : أنا على قلبكم ياغجر حتى منتصف ليلة 25 أكتوبر فلا تفريط ولا تسهيل
وقد وعد فأوفى فظل على غتاته حتى آخر لحظه ..وتبدأ مراسم الحفل وبعد عدة خطب تملقيه فى الوافد الجديد الذى سيحل محله جاء الدور على عبد المجيد الغتت ليلقى كلمته
خطبة عبد المجيد
بسم الله الرحمن الرحيم
بعد المقدمه والترحيب الروتينى القصير
الساده الحضور اليوم وفى تمام الثانية عشرة مساء تنتهى مدة خدمتى الحكوميه بالوزارة مخلفا ورائى 40 سنه من العمل الجاد والدؤوب والشاق ..قابلت فيهم الكثير من الرؤساء والمرؤسين منهم من أحترمت وقدرت ومنهم من عاديت وحاربت لينصلح حاله وكثيرا ما أعطيت الجزاء للمقصر وأنا أتألم ولكن من أجل مصلحته والمصلحة العامة كنت أصر على مجازة المقصر ومكافأة المجيد
أعلم أن بينكم اليوم من حضر ليخرج لى لسانه ويلعنى فى سره ولكنه أنسان خايب لايعلم ماهو العمل
العمل ألم ياسادة ..العمل أيه (قولوا ورايا ) ألم ياباشا ..شطار
يعنى مش دلع ومرقعة ونوم على المكاتب يعنى مش تزويغ من الساعة 10 يا أستاذ محمود مش أجازات مرضيه يا عماد ولا تنظيف الخضار يامدام ناديه ولا هو قهوة أو كافتريا ياعبده أنت سوسن ولاهو نوم لحد الأنصراف ياحسن ولاهو مكان للحب والغراميات يا فؤاد أنت وعظيمه ..ولا هو سنترال لعمل جميع المكالمات على حساب الوزاره ولا ..ولا..
(وقام عبد المجيد بفضح الحاضرين أمام المدير الجديد )
أنا قلت لمديركم الجديد عن كل كبيره وصغيره وأتمنى أن يكمل المسيرة
بما يرضى الله
تصفيق حاد وأندفاع كافة الموظفين والمديرين بتقبيله وعناقه والبكاء على فراقه
هتاف :يعيش عبد المجيد بيه الغتت ..يا ...يا ..يعيش يعيش يعييييش
هتاف 2 : لاغتاته بعد اليوم
هتاف3 : غتت غتت يامغتت..برضه بنحبك يامغتت
ينتهى الحفل ويذهب عبد المجيد ليركب سيارة العمل ليعود إلى بيته فيجد المدير الجديد قد ركبها ويجلس مكانه
المدير: تعال ياعبد المجيد نوصلك لأقرب مكان فى طريقنا
يقترب عبد المجيد منه ويطلب منه النزول : أنزل من العربيه ياراجل ياقفل..فيحتج ويشيح له بيده ..أنت حتقرفنا لحد آخر يوم كفايه عليك كده يقوم عبد المجيد بجر المدير من قفاه ويرميه خارج العربه وينفض يديه ويجلس فى مكانه
وهو يقول : أنا مازلت عبدالمجيد وكيل أول الوزارة أمامك ساعتين لتحل محلى ياجاهل يا أمعه ثكلتك أمك
المدير : أنا ثكلتنى أمى ياعبد المجيد
عبد المجيد : وثكلك أبوك كمان أبقه قابلنى لو عرفت تمشى الأراجوزات
أللى معاك بكره يلعبوا بيك الكورة ياتافه
أطلع ياأسطى محمود..عالم ما بتفهمش ..يتردد السائق فى التحرك محمود: على فين يا عبدالمجيد بيه
على البيت ياحمار وبسرعة قبل الساعة أتناشر
يتبع
سهرة فى بيت الغتت
الحلقة رقم (6 )
شيماء تدخل ومعها الدكتور مدكور من باب الشقه فتجد والدها وأمها يجلسان يشاهدان التليفزيون بأهتمام وعلى الكنبه يجلس صغارها ميزو وسوسو وهم مربطين بالحبال ومكممين الأفواه
شيماء : يانهار أسود أيه أللى عاملينه فى العيال ده
عبد المجيد :هشششششششششش خلينا نعرف نتفرج
شيماء : فيه حد فى الدنيا يعمل كده فى أحفاده ياماما
عنايات: أنتى قلتى مشوارك لمدة ساعة بقالك بره ساعتين عيالك غتته وتعبونى أنا وأبوكى بهدلونا ماخلوش حاجه فى البيت ألا ما وقعهوها أو كسروها وصويت وصريخ ورموا جزمة أبوكى فى الشارع ..وغير البلاوى التانيه كرهنا نفسنا لدرجة أن أحنا طلعناهم بره الشقة وعاديكى على أللى عملوه فى الجيران ماكنش قدامنا حل غير كده
مدكور يمنع شيماء من حل وثاق أولادها : سبيهم كده أحنا ناخدهم معانا البيت وهم متربطين أحسن
شيماء : يا خراشى حتى أنت كمان يامدكور ده أنتم عيلة غتته بصحيح
مدكور: وعيالك ياشوشو أغتت ..دول مش عيال دول شياطين
عبد المجيد : ياله أنت وهى خدوا العيال دى وماتورنيش وشكم هنا تانى تتكم القرف فيكم وفى خلفتكم الزباله
مدكور : الأول عشيتوا العيال دى ياتانت
عنايات : أتسمموا وخلصوا على أكل البيت كله
شيماء : أنا واقعه من الجوع ياماما شوفى لى أى حاجه أكلها
عنايات: الأكل أللى عندى مايكفيش ألا نفر واحد البركه فى أخوكى وعيالك
مدكور: حطى يا حماتى أللى عندك وأحنا نتصرف .هو حازم هنا بيعمل أيه
عبد المجيد : مراته مغضباه وساب لها البيت ومجرش هنا زى مانت شايف وكل يوم ماسك التليفون بالساعه والأتنين قاعد يصالح فيها .
ياريتكم وأنتم ماشيين تا خدوه معاكم يقعد عندكم كام يوم يغير جو ونرتاح من قرفه
مدكور: سورى يا أونكل جحا أولى بلحم توره..أنت عارف أن نجمى مابيركبش على نجمه وما بنطقش بعض..بلاش بدل ما أبعت لك شوشو بعيالها
عبد المجيد : أنت يازفت ياللى أسمك حازم سيب التليفون ياجبان بقالك 37 دقيقة بتتكلم
حازم : عيب كده ياعوبد..خلاص قربنا نتصالح أهه
يقوم عبد المجيد ويخطف سماعة التليفون من حازم ويكلم زوجة أبنه
عبد المجيد وهو يزعق : آلو ..أنتى ياستى أنتى بطلى رغيى وتعالى خدى جوزك من هنا وألا حخلص عليه هو وأخته والدكتور ده وعياله
أيه ..بتقولى ياريت ..أنتى ست غتته بصحيح
هى : ما أنا عارفه بس أبنك أكبر غتت فى الدنيا ياريت تطلقنى منه وتريحنى
عبد المجبد : ده بعدك حسيبه كده كابس على نفسك يا تجننيه ياجننك
تتكم القرف فى غتاتكم .....طرخ ...وقام بغلق السكه بعنف
قوم ياواد أنت كفايه كده لم هدومك ياجبان وروح بيتك ومش عايز أشوف وشك هنا تانى ياتجيب خبرها ياهى تجيب خبرك ..وأنت يا أشكيف خد مراتك وعيالك المتربطين دول وورونا عرض كتافكم عالم غتته ماعندهاش دم
مدكور: طب والعشا
عبد المجيد :أبقى عدى أنت وهى على أى محل خدوا سندوتشين فول على حسابى
مدكور يحمل أبنه ميزو وهو مربط أيد ورجل وهو يقول : مش قلت لك ياميزو مالكش دعوه بجزمة جدو ..هس هس. تتك نيله فى منظرك وأنت شبهه
يطرد عبد المجيد شيماء وحازم خارج الشقه ويجلس هو وعنايات لمتابعة المسلسل العربى
عبد المجيد : ماتنسيش ياعنايات بكرة تفكرينى أبعت برقية تهنئه لراعى الغتاته فى مصر
عنايات : وأيه المناسبه يا غتوتى
عبد المجيد : بمناسبة عيد ميلاده السعيد
عنايات : هو بيلعب فى الكام دلوقتى
عبد المجيد : الحقيقة ماحدش عارف ..خمسه وسبعين ثمانين الله أعلم
عنايات وهى تضحك :هههه ههههههه أنسى

الحلقة رقم ( 7)
ياله نروح السيما
حازم : شهلى ياماما ..ما تحطش ريحة ياعوبد مش ناقصين كتمت نفس..عايزين نلحق ميعاد السيما يا جماعة
صوت كلاكس مستمر يطل حازم من الشرفه ..بيب بيب بييييييييب
حازم : أهدى شويه يا(نظيره)..خلاص أهم بيلبسوا ونازلين
(صوت أحد الجيران وهو يستنكر أزعاج الكلاكس )
الجار وهو يطل من الشباك فى العماره المقابله: أنت ياست أنتى أحترمى نفسك وبطلى كلاكسات مش عارف أنام ياعالم يابهايم
ولسه حازم حيشتم فوجد الجار شاب مفتول العضلات وتبدو الشراسه والعنف فى وجهه فيوجه كلامه لزوجته
حازم :قولت لك ياست أنتى يا أم كدش بطلى دوشه من الصبح الراجل مش عارف ينام ..(يوحه كلامه للجار) عالم ماتجيش ألا بالعين الحمرا
أنا لو منك أنزلها أوريها أزاى تحترم نفسها أنا شايفها بتبرطم وبتقولك
أدخل أتخمد ياحمار
نظيره وهى تخرج من العربيه : حازم الراجل ده بيقول أيه ؟
حازم : أبدا ياحبيبتى ده بيشتمك وبيقول أنه حينزل يكسر العربيه دى على
دماغك لو ضربتى كلاكس تانى
نظيرة تضغط على الكلاكس بعنف هذه المره : أنزل بقا فرجنى ياتور حتعمل أيه حخلى جوزى يأقطعك
الجار : أنت معاها ياض..أنا سامعك بتقولها ياحبيبتى
حازم وهو يستنكر : معرفهاش ولا عمرى شفتها قبل كده عالم بترمى بلاها..أنزل ياراجل وريها مركزها ..(ويدخل حازم مسرعا وهو سعيد وفك أديه فرحا) يامانت كريم يارب جالك أللى يكسر دماغك ياحيزبون
عنايات : فيه أيه ياواد مالك مبسوط قوى كده
حازم : الجدع أبو عضلات أللى فى العماره أللى قدامنا نزل يأدب نظيره
وقليل لما يعملها عاهه مستديمه
عنايات : على مهلك ياعوبد ألبس براحتك لحد مالخناقه تخلص
ينظر حازم من النافذة فيجد (نظيره) قاعد ه على الرصيف وبجوارها الباروكه الكنيش والشاب الشرس ممد على الأرض والناس بتفوق فيه
حازم : ياله ياجماعة الخناقه خلصت بسرعة شويه علشان نلحق نتفرج على ميكى ماوس
عبد المجيد: المهم نظيره حصلها حاجه
حازم : أهى قاعده زى القرد وماسكه الكلاكس فى أديها ياله ياجماعه قبل الراجل ما يفووء

(يركب الجميع العربيه وتنطلق نظيره بعيلة الغتت على آخر سرعه ليلحقوا ميعاد السينما وهى لاتتكلم )
عنايات : خدى يانظيره النظاره دى ألبسيها تغطى عينك الوارمه
( تأخذ نظيرة النظاره وتطوحها من نافذة العربيه )
نظيره : أن ماوريتك ياحازم بس لما نرجع البيت أن ماورمت عنيك الأتنين مابقاش أنا نظيره بنت عوض الله..ربنا يورينى فيكم يوم ياعيلة الغتت ..مافيش حد فيكم عندوه نخوه يلحقنى من الوحش ده
عبد المجيد : يا نظيرة يابنتى أحنا كنا بنلبس ومسمعناش حاجه
نظيرة : ماتقولش بنتى..وسبع البورمبه ده ماهو شايف وسامع أللى بيحصل منزلش ليه
حازم : أنزل أعمل أيه فى الوحش ده ما أنتى شايفه أن صحتى على قدى وبعدين أنتى قدها وقدود يانظنظ ..وبعدين أنتى كومتى الراجل ..
عنايات : وحياتك يانظنظ تحكى لنا عملت فيه أيه
تهدأنظيره وهى تبلع ريقها من الغيظ : الراجل نزل من فوق زى التور الهايج وقام ماسكنى من البارووكه ومن غير مايتكلم قام فاقعنى بوكس فى وشى الدنيا نورت وطفت وقام قايم بفتح كبوت العربيه وقام خالع الكلاكس وفضل يدوس عليه بجزمته لحد مادغدغه كنت أنا فوقت من البوكس والنور رجع تانى لقيته بيدينى الكلاكس فى أيدى وكانت فرصه
قمت فقعاه شلوت فى مقتل أتكوم فى الأرض
حازم: فى مقتل فين يعنى ؟؟
نظيره : تحب تجرب
حازم : أنتى حتقوللى على شلاليتك ..بابا أنا بايت عندكم النهارده
عبد المجيد : على كده بقا أنت ماشيه من غير كلاكس ..طب على مهلك شويه يابنتى أحسن حتخبطى فى أللى قدامك
نظيره : ياريت بس لو كان فيه ترعه كنت خلصت منكم مره واحده
عنايات : خساره العربيه يانظنظ ..العربيه عليها أقساط وعوبد هو أللى ضامنك..على مهلك شويه حتحكى فى أللى جانبك
نظيرة : تخرج رأسها من العربيه وتشتم : حاسب ياحمار يا أبن الـ...
يقترب سائق العربه التى شتمته نظيره ويغلق الطريق عليها وينزل لها
السائق : مين فيكم أللى شتم
نظيره : الراجل ده وأبنه
السائق : بس أنا سامع صوت حريمى أللى بيشتم
نظيره : تبقى الست القرشانه أللى قاعده جانبى ..مش عيب كده ياتانت قولت لك مية مره ما تقليش أدبك ومفيش فايده ..تشتمى راجل محترم
أيه يعنى كسر علينا ..لسانك متبرى منك آه منك مايجيش من وراكى ألا المشاكل
حازم يلاحظ الشر فى عين السائق فينزل من العربيه : طب ياجماعه أنا حسبق ع السيما علشان ألحق أحجز لكم فى مكان كويس ..باى
السائق يمسك حازم من قفاه ويضربه بوكس فى عينه فينقلب داخل العربيه مرة أخرى .!!: عاملى حدق يا خويا حتروح منى فين طب خد طب خد طب خد
ثم يعود السائق إلى عربته فى هدوء
حازم : أطلعى يانظنظ على القصر العينى ..أه ياعينى
الجميع يضحكون كلما نظروا لبعض ههههههههههه ههههههههه

الحلقة رقم(8)
الأكراميه
نحن الآن فى أخر العام وموسم أمتحانات والكل يحاول أن يحصل من الدكاتره والمعيدين على المقرر والمحذوف والمهم فى أمتحان آخر العام
ألا الدكتور مدكور الذى كان له رأى آخر فى هذا الموضوع فكان من أصحاب المبادئ والكل يعلمها جيدا فقد أمتنع تماما عن الأدلاء عن أى بيانات تساعد الطلبه فى المراحل الأربعة وأكتفى بطبع المحاضرات وكتاب الأقتصاد الذى يغير فيه كل عام فصل أو فصلين وكان على الطلبه شرائه من عم فرغلى الذى يقوم بتسجيل أسماء الطلبه الذين قاموا بالشراء والويل كل الويل لمن يحاول تصوير الكتاب أو عرضه للبيع فقد كانت تعليماته كالأتى 25% من الدرجات لشراء الكتاب والملازم 25 % للشفوى و25% لأعمال السنه و25 % للأمتحان النهائى وأللى مش عاجبه يضرب دماغه فى الحيط ولن يعدى فى مادته فى الأربع سنوات
التعليمات فى ظاهرها معقول ولكن فى باطنها جحيم لا يقدر عليه ألا من يستطيع أن يدفع ويشترى النجاح
تفتح كتاب دكتور مدكور لاتفهم منه شئ الغاز فى ألغاز ولو حفظت الكتاب عن ظهر قلب فالأسئله تأتى من خارج المقرر لأنك لم تكمل باقى ال75 % من طلبات الأشكيف
فيلتقى مناديب الطلبه بعم فرغلى أمين سره وهو لا يختلف كثيرا فى غتاته عن الدكتور لتلبية طلبات الأسياد للعبور من عفريت الأقتصاد ..لو كان على كده يعتبر سهل ويضمن الطلبه عبور مزنق د. مدكور ..ولكن فى هذه السنه أتسع الكرش أكثر بعد تكاليف الزواج والخلفه الكريمه ( ميزو وسوسو )
فقام بتقسيم الطلبات على فصول الدراسه لتكون كالأتى :
سنه أولى : طلبات منزليه وتموينيه وكسائيه وتشمل ( أدوات منزليه خلاطات بوتاجازات سخانات أطقم حلل ألخ وتموينيه زيت سكر شاى سمنه بلدى فراخ متلجه لحوم ألخ ألخ وكسائيه وتشمل بدل وكرافتات وعطور وأطقم للمدام وأحذيه ماركات ولم ينسى أن يحدد المقاسات
أما سنه تانيه :هدايا ذهبيه/ أنسيالات /ساعات/ جنيهات ذهبيه/ لعب أطفال
أما سنه تالته : فقد خصص لهم قطع الغيار لسيارته المرسيدس العتيقه
رفارف ..أكصدمات/ كلاكسات/ فرش /طاقم عمره للماتور/ باربريز أمامى وخلفى فاميه/ كاوتش /بطاريه/ ألخ
أما سنه رابعه : فكانت مفروشات وأثاث غرفة مكتب كراسى ترابيزات مرايات فرش للسرير دواليب سجاد مطابخ ألخ
والحقيقه تقال أن الرجل لايقبل أى فلوس نقديه لأنها رشوه وهو لايقبل الرشوة ولكن هذه أكراميات وتقدير من الطلبه لمجهود هيئة التدريس
وكانت تنافسه فى فرض الطلبات الدكتوره( أصلاح) أستاذ التاريخ السياسى والأزمات الدوليه وأصطدم كل من الثعبان والحيه وبدأت المعركه أصلاح : أسمع يامدكور خف من طلباتك شويه الطلبه بتشتكى
مدكور : بتشتكى من طلباتك أنتى يادكتوره فيه حد يطلب من الطلبه جهاز عروسه كامل أربع أوض خشب وفرش غير التكييفات أرحمى ياشيخه
أصلاح : عايزه أجوز البنت الأخرانيه وأخلص يامدكور
مدكور : مش كفايه مجوزه تلاته قبل كده ..مين أللى يرحم أنا ولا أنتى
أصلاح: خمسه فى عينك أنت ماكنتش تتلم وتخف شويه أنا حاخد معاك أجراء مش كويس
مدكور : مش مدكور يادكتوره أللى يتهدد وبالعند فيكى حزود الطلبات أصلاح : أنا ما ينفعش معايا العند ..طب شوف يامدكور أللى حيجرالك
مدكور : هع أما نشوف يا أنا يا نتى
وفى آخر يوم فى الأمتحانات نزل مدكور من بيته ليركب عربته المرسيدس من أمام البيت فوجدها علبه صفيح خاويه على عروشها فقد تم حل الكاوتش والبطارية والماتور حتى الكراسى والقزاز وتركها اللصوص مرفوعة على أربع حجاره
مدكور : شاهد المنظر لم يصدق أنها عربيته ألا بعد أن رأى النمر وتأكد من ذلك فأصيب بنوبه هستيريه وركب تاكسى وتوجه إلى الكليه ليشاهد النصيبه الثانيه فقد أحترق مخزن الهدايا عن آخره والمطافى تقوم بأخماد الحريق
الضابط : بيقولوا المخزن ده يخصك يادكتور مدكور تقدر تقولنا كان فيه أيه لحصر الخسائر
مدكور : ما كنش فيه حاجه مهمه شوية أورا ق وكتب قديمه
الضابط : هل تتهم أحد بأشعال الحريق فيه ...لا أتهم أحد
يعود مدكور إلى بيته وقد أمتلء وجهه بالغضب والغتاته فتستقبله شيماء
شوشو : ولايهمك يامدكورتى كله يتعوض مش فيه الدور التانى للأمتحانات وكويس أنك كنت بتنقل الحاجه أول بأول
مدكور : أللى مزعلنى الحاجات أللى كان جايبها الطالب بتاع بورسعيد
بدله وكرافته وطقم نوم ليكى لونه زهزهى يخبل كنت حقدمه ليكى فى عيد جوازنا الخامس
شوشو: ياحبيبى..يادودى يا حونين ..أنا أقطع دراعى أن الوليه أللى أسمها أصلاح لها دخل فى النصيبه دى ..ربنا يهدك يا أصلاح يابنت..هى أمها أسمها أيه
مدكور : أمها أسمها (شماته)
شوشو : هههههه دى أسمها على أسم أمك يا دودى ههههه بصره
مدكور : أيوه ياختى فرحانه قوى ..قومى فزى حطى لى لقمه أكلها
شوشو : أنا ماعملتش غداء يادودى ..أنا قلت نفسك أتسدت بعد النصيبه أللى حصلت أنا لو منك أقعد شهر ماكلش وقليل ما أتجننت ورميت نفسى من فوق مجمع التحرير
مدكور يزأر كالأسد :هعهههههههع قومى من قدامى دلوقتى يابنت الغتت

عائلة الغتت
الغتاته
مصطلح شعبى نطلقه غالبا على الناس الرزلين

فتقول على رئيسك فى العمل أللى مطلع عينين مرؤوسيه بأنه راجل غتت وعلى الست التى دائمة الشجار مع دبان وشها فى البيت وبره البيت بأنها ست غتته والشاب الغتت غالبا أنتم عارفينه وهو كييف فصولات بايخه وهزاره رخم مع أصحابه من الجنسين ما تفرقش معاه بنت ولا ولد
أما البت الغتته فحدث ولا حرج فقد أنتشرت الغتاته والرخامه بشكل كبير فى وسط البنات المقبلين على الزواج ودى طبعا نصيبه سوداء فالمعروف أن الغتاته تبدأ بعد السنه الثالثه من الزواج ولكنها فى هذ ا الجيل بدأت بدرى قوى
والأنسان الغتت شخصيه سيكوباتيه لاتحاول أن تقترب منه فهو كالسلك الكهربى العريان يمكن أن يصعقك فى أى وقت ويلبس غالبا قناع الجدية المشوبه بالعنف تجاه من هم أقل منه فى المركز أو الوظيفه أو الجسم ولا يمارس أمور الغتاته مع من هم أعلى منه فى الدرجه فتجده أنسان لطيف وخفيف ومطيع وأهم حاجه مطيع دى فهو ملتزم بتطبيق القانون بكل حذافيره وتجده حافظ بنوده صم ْهو ولائحة العقوبات والأجازات
وفى السينما المصريه أفردت له دور رئيسى فلا يخلو فيلم ناجح ألا وفيه من يمثل الشخصية الغتته وكان أشهر من قام بهذا الدور الراحل صلاح نظمى وكانت نهايته دائما معروفه بالعلقة الشهيرة التى يأخذها من بطل الفيلم..مش عايزين نشطح بعيد
هذه مقدمه سريعه للموضوع لعلها تفتح شهيتكم لمتابعة مسلسل عائلة الغتت ..تخيلوا أن عيلة بكاملها تتمتع بهذه الصفة وكيف تعيش وتتعايش فى مجتمعنا وكيف تتعامل مع الناس وكيف تتعامل مع بعضها
نسيبكم مع هذا المسلسل القصير حتى لا أغتت عليكم كفايه عليكم عائلة الغتت ومواقفها المضحكه ..توكلنا على الله
الشخصيات : الأستاذ عبد المجيد ..رب العائلة وكيل أول وزارة وصل إلى هذا المنصب لما يتمتع به من غتاته وأذيه لخلق الله فكانت ترقياته كالصاروخ وكل ترقيه يزداد غتاته على غتاته الطبيعيه حتى وصل ألى أعلى السلم الوظيفى وأصبح أشهر من نار على علم وألفت عنه حكايات وقصص وأبحاث فى علم الرزاله والغتاته تدرس حاليا فى كليه الشرطه
وعندما أراد أن يتأهل أى يتزوج أختار أغتت بنت فى عائلته وبارك الأهل هذا الزواج فقد أتلم المتعوس على خايب الرجا ليشكلا معا ثنائى متفاهم ومتناغم فلا يفل الحديد ألا بالحديد ..ويا ويل من يقع تحت أيديهم
عنايات هانم
زوجة عبد المجيد الغتت يطلق عليها الطالبات فى المدرسه التى هى ناظره لها أسم كودى هو (عفريته هانم )..أمرأة متوسطة العمر لها نظرات حاده تلبش أجدعها مدرس أومفتش... تتعامل مع الجميع بعصبيه وعنف ما عندهاش يامه أرحمينى ..تتفنن فى الغتاته على الطالبات وأولياء الأمور كمان ..لا يمنع أن تحبس المدرسه بمدرسيها وطالباتها حتى الساعة الخامسه مساء وتغلق بوابة المدرسة بالجنزير ويحضر لها الفراش المفتاح فى مكتبها ولذلك أستمرت ناظرة للمدرسه أكثر من عشر سنوات وكانت معاملاتها داخل البيت لا تختلف كثيرا عن خارجه
وبالتالى الأولاد شربوا الغتاته من منابعها الأصليه على يد عبد المجيد وعنايات فقد رزقهما الله بولد وبنت يضرب بهما المثل فى الغتاته المفرطه
(حازم)
الأبن الأكبر أنهى دراسته الجامعيه ويعمل معيد فى كليته ومقيم مع والديه غتاته منه لحين أن يتزوج
( شيماء ) فى السنه النهائيه بكلية الأقتصاد والعلوم السياسيه ومتقدم لها عريس مدرس بنفس الكليه وقد أختارها من بين جميع الطالبات لما يبدو عليها من صرامه وجديه وقد أطلقوا عليها زملائها أسم السجانه ..السجانه راحت السجانه جت ..فقد كانت ترتدى باريه أخضر على جميع ملابسها ..ماهى معذورة فقد نشأت وترعرت بين عائلة شعارها ( كن غتتا أو لاتكون )

إعمال العقل وتوهانه

إعمال العقل
بالعقل توصل الأنبياء والمؤمنين إلى وجود الله وعظمة الخالق وحقيقة الكون والوجود ..فرسول الله محمد أبن عبدالله صلى الله عليه وسلم توصل إلى حقيقة الله
بالعقل فتفتحت أمامه أبواب السماء وسطعت بنور الأسلام وجائت الرسالة ونزل على رسول الله القرآن الكريم كل آية فيه تخاطب العقل وظلت الرسالة الوحيده الخالده من 1500 سنه تخاطب عقل الأنسان
رسالة الأسلام العقلانيه يتأثر بها كل من أعمل عقله فنجد أن معظم الذين دخلوا الأسلام منذ قرن مضى هم من الأوروبيين والأمرييكين والأسيويين لأنه فى هذه البلدان يقدسون العقل ويحترموه ووجدوا فى رسالة الأسلام ضالتهم بعيدا عن الخرافات والضلالات الموجوده فى الأديان الأخرى
وقد تنبه أعداء الأسلام إلى هذه الحقيقه وتوقعوا إن الأسلام سيسود فى البلدان الأوروبيه وأمريكا فى خلال قرن أويزيد من الزمان وهذا ما أزعجهم جميعا وتكاتفت الجهود لمحاربة الأسلام بشتى الطرق والوسائل فحشدوا الجيوش لغزو أرض الأسلام فى العراق وأفغانستان والصومال تحت مسمى محاربة الأرهاب
ولم يكتفوا بذلك فقد قاموا بتشويه صورة الأسلام والمسلمين..وكانت آخر هجماتهم على سيدنا رسول الله بالرسومات المسيئه
فهل إعملنا عقولنا للرد على هذه الهجمات ..هل أستخدمنا عقولنا وعقول مفكرينا للرد على أبواق الأستعمار والصهيونيه دفاعا عن الأسلام ؟؟

أمامنا تجارب لبلاد برزت على السطح وتقدمت الصفوف فى آسيا مثل اليابان والصين وكوريا وماليزيا وغيرها من النمور الأسيويه ..هل تم أعمل العقل وأستفدنا من تجارب هذه الدول التى كانت أشد فقرا منا ؟؟

تدهور الثقافة والأداب والفنون فى بلادنا لم نسأل أنفسنا لماذا ..ولم يتم أعمال عقلنا لتدراك هذه الكبوة وأكتفينا بالنقد والطناش

تدهور الأقتصاد المصرى ولجوئنا إلى الغرب لأستيراد أكثر من70% من غذائنا بالرغم أننا كنا فى يوم من الأيام سلة الغذاء لكل دول المنطقة فهل أعملنا العقل لزيادة الرقعة الزراعيه ورفع أنتاجية الفدان ..ونسينا حقيقة هامه وهى أن كل الدول الغنيه فى الأصل هى دول زراعية وأن الزراعة هى الطريق الوحيد لتقدم الشعوب..ولكن تركنا الزراعة تتدهور على أيدى خبراء الصهيونيه الذين أستقدمهم يوسف والى

مشكلة البطالة وهروب المصريين من بلادهم بحثا عن لقمة العيش ..وموتهم على شواطئ أوروبا ومذلتهم فى دول العالم هل أعملنا عقولنا فى أسباب ذلك وبالرغم من ذلك تبيع الحكومه المصانع التى يمكنها أن تستوعب الملايين من أبنائنا

هل حكمنا عقولنا يوما وسألنا أنفسنا كيف تحكم هذه البلاد منذ 27 سنه وأستمرارها فى مسلسل الفشل والظلم دون أن يفتح مخلوق فمه ليوقف هذا التهريج المسمى بقانون الطوارىء..والقوانين المشبوهه

هل أعملنا عقولنا لنسأل أنفسنا أن تشكل الحكومه من رجال أعمال ورأس ماليين
همهم الأكبر حماية مصالحهم وممتلاكتهم متحصنين بالوزارة ومجلسى الشعب والشورى

هل أعملنا عقولنا وقام كل بالغ عاقل باستخراج بطاقه أنتخابيه لنسد الطريق على الحكومه لتزور الأنتخابات وتزور أرادتنا

أن عقولنا جميعا فى أجازه أجباريه وعشنا فى ظل الأنماليه بمعنى وأنا مالى هو أنا راح أصلح الكون لوحدى

وأخيرا ياشعب مصر فووووق وشغلوا عقولكم

يتبع
مع المكبراتيه ( ك.م ) كبر مخك

المكبراتيه وأصحاب العقول المرتاحه (2)
عايز تعرف ليه أحنا فى النازل وغيرنا متقدم علينا بمئتين سنه وأكثر.. لابد أن نستعرض مساؤنا والطناش أللى عايشين فيه وهذا سببه هو أنا وأنت وطريقة ونظام التعليم والحكم فى مصر
حتقول لى أزاى ..حقولك شوف ياسيدى طريقة حياتنا منذ عهود مضت قول كده بتاع ستين سبعين سنه أو أكثر هى أعتمدنا الكامل على الحكومه والوظيفه الميرى
وأن فاتك الميرى أتمرمطت فى ترابه ..لا تشجيع للعمل الخاص وأعتبار أن الوظيفه الميرى هى نعمه المراد من رب العباد وتحول المتعلمين فى بلدنا إلى موظفين فى الدولاب الحكومى ..وزاد الطين بله بقيام حكومة الثورة بتطبيق القوانين الأشتراكيه وتدمير المتبقى من العمل الخاص بعد أن أممت الشركات والمصانع وأصبحت أدوات الأنتاج فى يد الحكومه ..قشطه ياسيدى ..بقت مش قشطه دى بقت مهلبيه بالزبيب وأنشئت حكومة الثورة وزارة أسمها وزارة العمل كان كل مهمتها هو تعيين الخريجين فى الحكومه ولما أزداد عدد الخريجين لم تتأخر فى تعيينهم فى وظائف لا تتناسب مع شهادتهم المهم نكون دولة أشتراكيه عظمى ومنذ هذا التاريخ بدأ عصر الطناش وتكبير المخ وأصبح موظفى الحكومه جيشا جرارا من العاطلين الذين يعملون بمعدل نصف ساعة فى الأسبوع
وكان لزما ولابد أن تجد الحكومات المتتابعه حلا بعد أن أستدنا من طوب الأرض وكانت الحلول العشوائيه والغير مدروسه هى بداية الكارثه ..نتيجة طبيعيه لعدم أعمال العقل فأستمرت الكليات والمدارس تقذف بملايين الشباب والشابات كل عام
يعنى حنفيه مفتوحه وبدون جلده فكانت كليات كثيرة تقوم بتقديم آلاف الخريجين الغير مطلوبين فى سوق العمل وبدأ شبح البطاله يزحف علينا بشكل مخيف بالرغم من وجودها من عشرات السنوات تحت أسم البطاله المقنعه
ومع البطاله تدهورت الحالة الأقتصاديه للأسرة المصريه وأصبح فى كل بيت أثنين أو ثلاثه عاطلين فى أنتظار جواب التعيين من القوى العامله ولكن الحكومه أرتدت هى الأخرى رداء الطناش ثم فى النهايه أعلنتها صراحة بقفل باب التعيين وكل واحد من أبناء هذا الشعب المدلل يتصرف بمعرفته أللى عايز يسافر ألف مليون سلامه وأللى عايز يهاجر داهيه لا ترجعه وأنشغل الشعب بالبحث عن لقمة العيش وتحول الحال وأصبحت المهلبيه بالزبيب بتنجان أسود ومنيل بنيله
ثم دخلنا فى عصر الدوله المباركيه وتربع الأنفتاحيين على كراسى الحكم وعم الفساد فى الأرض وكل هذا الشعب مشغول بالبحث عن لقمة العيش ويزداد الفقير فقرا حتى ضربنا الرقم القياسى فى عدد المعدومين الذين يظللهم خط الفقر..ومازال الشعب مطنش لأنه مشغول بالبحث عن لقمة العيش ..ثار البعض وأحتجوا على ما يحدث فكانت المعتقلات مسوى لهم.. أنتشر الأرهاب والتطرف فنجحت الحكومه فى ردعه وكسر أنفه ..أنتشر الفسق والخلاعة والتفاهه شجعته الحكومه وباركته والشعب يرى ويسمع وبرضه مطنش ..زاد اللغط وكثرت الأعتصامات والأضرابات
فعالجتها الحكومه برفع جزء من غطاء القدر الذى يغلى مطبقه القول الأنجليزى فى هذا الموقف وتباهت أمام العالم بأنها منحت الشعب الحق فى الكلام والأعتراض !!
يتم التجهيز لتوريث الحكم فى بلد يقال أنه جمهورى ..الناس بتسمع هذا الكلام وكأن هذا البلد مش بتاعتهم ..وتسمع ردود عجيبه تدل على مدى الطناش الضارب بجزوره فى هذه العقليات ..كبر مخك ..دى مش بلدنا ..وماله لما يمسك أحسن ماييجى واحد يسرق البلد أهم دول شبعه وكلام يسد النفس
دعاء : يارب بحق هذه الأيام المفترجه أن ترفع مقتك وغضبك عنا ولآتؤخذنا بما فعل السفهاء منا وأرفع عن عيوننا الغشاوة والطناش
وتبقى لنا آيه من أيات الذكر الحكيم ( أن الله لا يغير ما بقوم ألا أن يغيرو ما بأنفسهم )

فى بيتنا مكبراتى
كبر مخك أصبح من المبادىء الأساسيه التى تتعايش معها الأسرة المصريه فالأب الذى يكبر مخه عندما يكتشف أن أحد أبنائه يدخن وتمر الأعوام ثم يكتشف أنه أدمن البنجوواشياء أخرى وأيضا مكبر ..ويقول فى نفسه طيش شباب ويروح لحاله .. لحد ما الواد يظبط فى قاعدة مخدر ويقول فى نفسه أحسن خليه يتأدب ..يزج بأبنه فى السجن ..يحزن قليلا ويواظب على الزياره ثم يكبر ويلعنه فى سره وهو يقول أللى ماربهوش الأهالى تربييه الأيام والليالى

والأم أللى شايفه بنتها التليفون لا يفارق يدها ليل ونهار وأذا سألت من على التليفون تقول لها : صحباتى يا مامى وبنراجع المحاضرات مع بعض فتدعو لها بالنجاح والتوفيق ولم يخطر ببالها أن مقصوفة الرقبه فتحه خط غراميات ساخن على التليفون مع طلاب جامعات عين شمس والقاهرة وحلوان

والأب ~أللى ما ببيسألش أبنه بيتأخر فى الشارع ليه كل يوم ..ويقول أهو أحسن مريح دماغنا من رزالته مع أخواته..ليفاجأ بأنه قد أتلم على شلة عيال تلفانه وأصبح زعيم هذه الشله فى النهايه سيدفع ثمن الطناش والتكبير بعد أن يجيب المحروس نصيبه لحد باب بيته ويرجع يقول ياريت أللى جرى ما كان

الطالب أللى واخد أنه يذاكر آخر عشر أيام قبل الأمتحان ومطنش ومكبر طول السنه
لا محاضرات بيحضر ولا سكاشين.. معتمد على ذكائه الفطرى أنه يستطيع أن يلم المواضيع والحوارات والمسائل فى مده قليله ..يفاجأ فى النهايه بأعادة السنه والرسوب المدوى ..ما يتعلمش من التجربه ويستمر فى الطناش والتكبير لأعتماده على سابق معرفته بالمواد التى رسب فيها ليسقط للمره الثانيه ويصل إلى قمة الفشل

الزوجه الأسبور أللى تدخل بيتها سيدات مش قد كده وهى عارفه بسوء سلوكهم وتجعلهم أصدقاء لها ولزوجها لتفاجأ بحبيب القلب يتزوج بصديقتها ..هو نوع من الطناش والتكبير القاتل تحت مسمى الثقة العمياء وخليك كووول

الطبيب الذى ينسى داخل بطن المريض فوطه أومقص وأحيان علبة سجائرة..وتساعده النقابه فى أعتبار أن هذا خطأ طبى وارد..يتسبب بطناشه وتكبيره بالأضرار بالمرضى وسمعة الطب المصرى والأطباء

المهندس الذى يضع توقيعه على رسم أنشائى لعمارة ولآيحضر رمى الأساسات ولا أعمال الخرسانه ليتصدع المبنى بعد عدة سنوات ويصبح آيل للسقوط فهذا نوع من الطناش والتكبير المهنى الذى يفتح الطريق إلى أبو زعبل

صاحب العربيه أللى حالف ما يصلحهاش فلا تجد بها أنوار ولا كلاكس ولا فرامل وكاوتش ممسوح وماتور بيدخن..... نتيجة هذا الطناش والتكبير يتسبب فى أصابة نفسه والأضرار بممتلكات وأرواح الغير ..خد من هذا النوع كثير ..ولم يفلح معهم قانون مرور جديد أو قديم أو حتى قانون الجنايات

معظم الحيوانات الثدييه تستشعر الخطر وتهرب من أمامه ألا نوع واحد من هذه الحيوانات أنه المعيز فلن تستطيع أن تحرك معزة من مكانها طالما هى تأكل وسعيده بالأكل..دوس عليها بالعربيه أو حتى باللورى لن تنظر أليك وستستمر تمضغ وتلوك ما فى فمها حتى الموت
وأطلق أسم الطناش المعيزى على كل من هو ضليع فى الطناش وأستاذ فى علم التكبير ويتدرج فى السلم الطناشى المعيزى ليكون تلميذ ثم معيد ....ألخ ألى أن يصبح أستاذ ورئيس قسم..ويفكرون حاليا بأنشاء جامعة للطناش المعيزى على طريق الأوتوستراد وسيكون الرئيس الشرفى فيها الدكتور أحمد معيز (نظيف سابقا)

الحلقة رقم 30 زواج فى أشارة المرور

زواج فى أشارة المرور
يرن جرس الباب ..يفتح متولى ليجد أمامه (حامد ) ابن أخته المصاب بشلل أطفال بقدمه اليسرى شاب مهندس فى الأربعين من عمره كله حيوية وشباب بالرغم من الأعاقه ولكنه أعزب لم يجد الأنسانه التى تشاركه رحلة الحياة بأعاقته الظاهره
يرحب به متولى ويعانقه ويدخل به إلى الصالون وهو يلقى بكلمات الترحيب بحرارة فقد مضت فتره طويله لم يتقابلا
تفيده من الداخل: مين يا متولى ؟؟
متولى : تعالى ياتفيده ده حامد بنت أختى
تفيده : يا أهلا وسهلا منور يا بنى أزيك وأزى أحوالك فينك من زمان يابنى
حامد : فى الدنيا يا حجه ومشاغل
تفيده : ما يمنعش يابنى أنك تسأل على خالك وولاد خالك ..أنت ما تعرفش معزتك عندنا قد أيه ..يا أهلا وسهلا ..أستنى لما أجيب لك حاجه حلوه أنا عملاها
حامد : كتر خيرك يا حاجه أنا مستعحل شويه علشان عندى كذا مشوار عايز أخلصهم الليله دى ..وأنا جاى مخصوص علشان أدعيكى أنت وخالى وصفاء ومحمود لحفل زفافى فى ثانى أيام عيد الفطر
متولى : الف ألف مبروك( ويقوم بأحتضانه بحب وود ) أخيرا يا حامد لقيت أللى بتدور عليها ..مين بقى سعيدة الحظ
حامد : والله يا خالى دى حكاية ..حصلت كده ولا كان على البال والخاطر ..زى مايكون ربنا مرتبها من عنده أنى أقابل( أبتسام)
متولى : أسمها أبتسام أسم جميل ..كمل يا حامد..أخيرا فرحتنى يابنى
حامد : أتقابلنا فى أشارة المرور فى ميدان العباسيه ..كانت راكبه عربيتها وماشيه بيها وفردة الكاوتش الخلفيه نايمه وبالرغم من كده مستمره فى القياده وبدون أن تدرى ..أقتربت منها بعربيتى وأشرت لها بأن العجله نايمه ..بصيت نا حيتى بغيظ ظنا منها بأنى أعاكسها ..أشاور لها بأن تتوقف حتى لا تتلف الأطار وهى تنظر ناحيتى بقرف وعدوانيه حتى توقفنا سويا فى الأشارة ..فقلت البنت دى مجنونه دى فاكره أنى بعاكسها فنزلت من عربيتى وأشرت لها على الأطار المعطوب ..فنزلت من العربه ونظرت أليه ووقفت فى حيره ماذا تفعل فى هذا المأزق
فقلت لها :ما تشليش هم أركنى على جنب وأنا أغير لك الأستبن فنظرت ناحيتى وعلى قدمى ورفضت أن أقوم بهذا العمل
فقلت لها ما تقلقيش أنا باعرف أغيره ..وافقت وهى متضرره من أقوم بهذا العمل لوحدى وطلبت مشاركتها معى فى تغيير الأستبن ولكنى رفضت ..فوقفت تتفرج عليا وأنا أغيره وهى تناولنى مفتاح العجل ومسامير التثبيت حتى أنتهيت تماما من هذا العمل ظلت تشكرنى وتشاور لى أن أتبعها وهى لآتتحدث بكلمه واحده ..كانت جميله ورقيقه وقد دخلت قلبى من أول نظره ..قلت فى نفسى لربما تكون أجنبيه ولا تفهم اللغه العربيه ..فتحدثت معها باللغة الأنجليزيه وهى تشاور لى بعدم الكلام ..قلت أكلمها فرنساوى برضه مش فاهمه ..فقلت لها بالعربى طب أنتى عايزه أيه.
ولكنها أشارت لى بأن أتبعها من غير كلام..
تفيده : حاجه غريبه قوى تكونش يابنى خرساء وأنت مش فاهم
حامد : هى طلعت فعلا خرساء ..فهمت فى الأخر من لغة الأشارات ...ولكنها كانت تقرأ لغة الشفايف بمهارة لدرجة أنى أعتقدت أنها خجوله ولاتريد التحدث معى
متولى : وبعدين يا حامد
حامد : فضلت ماشى وراها لحد مادخلت مدينة نصر وتوقفت فى أحد الشوارع الهادئه وأشارت لى بالنزول ..وافهمتنى بأنها بكماء وصماء وسألتنى هل أنا متزوج أو مرتبط ..فقلت لها بأ نى أعزب وعمرى أربعين سنه وأعمل مهندس فى هيئة النقل العام فأبتسمت أبتسامه رائعة وأفهمتنى بعد جهد بأن هذه الأبتسامه تعنى أسمها بعد أن أخرجت بطاقتها الشخصيه فأجد أسمها هو أبتسام وأنها تعمل فى مدرسة للصم والبك وأنها لم تتزوج بعد ..ثم سألتنى بالأشاره بأنها تريد أن تتزوجنى هكذا بكل بساطه وأنها معجبه بى وتريد أن تقدمنى لأهلها ..وأذا وافقت
فعلى أن أحضر معها الأن لمقابلة أبيها وأذا لم أوافق فأنها تعتذر عن تعطيلى وتتمنى لى حياة سعيده
تفيده : يا حبيبتى يا بنتى ..دى ماتفرطش فيها أبدا ياحامد
حامد : لم أتردد فى مصاحبتها لأقابل أبيها وأصعد معها إلى منزلها فأجد نفسى أمام أسرة طيبه متدينه ويرحبوا بى وتختلى بوالدها وتشرح له الموضوع
يرحب بى الرجل وهو سعيد بى وحاولت أن أشرح له سبب أعاقتى وعدم تأثيرها
فى حياتى وعلاقتى مع الناس ..يضع الرجل يده على فمى ليمنعنى من الأستمرار فى الحديث ..ويقول يكفى أنك أختيار أبتسام..وأنا أعلم أن أبتسام أختيارها سليم
فقد رفضت الكثير من العرسان الذين تقدموا لها
وبعد التعارف أصر أهل العروس على دعوتى إلى مائدة الأفطار
وبعد أن صلينا جميعا صلاة العشاء أتفقنا على كافة تفاصيل الزفاف وقامت أبتسام لتصلى صلاة الشكر لله
متولى : نصيبك يابنى جالك لحد عندك ...ألف مليون مبروك
حامد : بالمناسبه دى صورة أبتسام أهيه
متولى : الله زى القمر وباين عليها الصلاح ربنا يبارك لك فيها
تفيده : ورينى كده يا متولى ( تنظر إلى الصورة وتقبلها ) عروستك حلوة يا حامد
دى عطيه من ربنا فحافظ عليها وحطها جو عنيك أصلك طيب وأبن حلال
حامد : ونعمه بالله .. عارفه لما تشفيها يا حاجه حتحبيها على طول
متولى : ربنا يوفقك يا حامد أنت تستاهل كل خير
حامد : خلاص ياجماعة أستناكم تانى يوم العيد وآدى العنوان
تفيده : خطوبه ولا كتاب
حامد: زفاف ياحاجه ..شقتى جاهزه من مجاميعه
متولى : خير البر عاجله .. فالطيبون للطيبات

تمت وكل عام وأنتم بخير

الحلقة رقم 29 خمسه حلو ويوم واحد مر

خمسه حلو ويوم واحد مر

تفيده : ألحقى خلصى شغل المطبخ يا (نبويه) علشان عمك متولى زمانه جايه

كملى حكايتك وأنتى بتشتغلى وأنا سمعاكى

نبويه :بس ياحاجه لقيت رفاعى بيكلم أبويه علشان يتجوزنى

أبويه قالوه :يارفاعى يابنى أنت متجوز بنت عمك وبسمع أنها حلوه جوى

بلاش يابنى مش عايز مشاكل مع عيلتك

- ومين قالك ياخال أن( زبيده) مراتى مش راضيه دى هى أللى بعتانى علشان

أتجوز نبويه..أبويا قاله : غريبه قوى الحكاية دى لازم فيه أنه يارفاعى ..قول بصراحه أنت عايز تتجوز نبويه ليه؟؟

الحقيقه ياخال أنا واخد عمارة كبيره قوى فى مصر وعندى مطرح واسع يسطوح يرمح فيه الخيل وخير ربنا كتير وبجيب ناس نشغلهم فى الشقق .. زبيده قالت الخير ده أولى بيه بنت بلدنا وجارتى وحبيبتى نبويه..قلتلها بس دى مفيش ليها مكان فى مصر تعيش فيه قالت لى تعيش معانا هنا ..قلتلها ماينفعش يازبيده تعيش فى بيت راجل غريب قالت خلاص أتجوزها وفك بوارها وتعيش معنا..وفضلت تتحايل عليا لحد ما جيت لك أهه وحياتك ياخال ما ترد لى طلب

نبويه: أول ما أبويا قالى على رفاعى وافقت على طول وقلت تغور البلد بنموسها وترابها وجلتها مصر أم الدنيا ... وفى ليلتها كتبنا الكتاب ودخلنا فى دارهم والصبح كان شاحنى فى القطار على مصر..فى الأول زبيده كانت بتعاملنى كويس وبعدين قلبت عليا ومنعت رفاعى أنه يهوب ناحية أوضتى ألا مره واحده فى الأسبوع ولمدة ساعة..ورمت عليا شغل العماره والشقق وهى قعدت ست هانم تتعايق بجمالها ..فى مره أتجرأت وقولت يارفاعى ماتخلى زبيده تيجى معايا فيلاة أباظه بيه ..قالى : أنتى أتجننتى يابت تتك خابط أنتى مش عارفه أن البيت ده مليان شبان مايصين قولت له : يعنى خايف على زبيده ومش خايف عليا ..قال لى مش النظريه بس أنا واثق أنك مش حيحصلك حاجه..قلت له علشان مش حلوة مش كده فهمت من ساعتها رفاعى متجوزنى ليه ..تفيده :ده راجل ندل صحيح

نبويه : مش كده وبس ده واخد فلوسى أول بأول وبيصرفها على زبيده الغندو

فى مره من المرات قولت له يارفاعى نفسى أشوف لى خلف ..يقولى عايزه تخلفى طب ما تخلفى ..قولت له الخلف حييجى أزاى ياراجل.. باللاسلكى!!

ماسكتش راح قال لمراته ..فضلت تعايرنى بالكلمه دى فى الرايحه والجايه

وحياتك ياحاجه خلى الحاج متولى يكلم رفاعى يعدل ما بينا ..أنا مش عا يزاه غير مره واحده فى الأسبوع وخليه ليها طول الأسبوع أنما كده حرام ياناس ده بقاله ثلاث أشهر ما هوبش ناحيتى

تفيده : حاضر يا نبويه حخلى عمك متولى يكلمه ويهزأه كمان

وفى المساء تفيده ومتولى فى قاعدة صفا تفتح الموضوع  

تفيده : شوفت يا متولى الراجل أللى أسمه رفاعى الخسع بيعمل أيه مع مراته التانيه.. متولى: ( نبويه) عمل أيه

تفيده : الراجل أتجوزها علشان تخدم فى البيوت ويريح مراته الأولانيه قال أيه خايف عليها لتتعاكس علشان حلاوتها

متولى : من ناحية هى حلوة البت مفيهاش غلطه و أحلى من سعاد حسنى الله يرحمها بياض أيه وجمل أيه عامله زى لهطة القشطه

تنفعل تفيده:متولى فووق ياراجل شوف بتقول أيه

متولى يصحح كلامه : بس حتيجى أيه جنب جمالك أيام شبابك هييه الزمن ما بيسبش حاجه على حالها

تفيده تنفعل أكثر: متولى أتعدل خلى بالك أن دبلت الورده ريحتها فيها

متولى : من ناحية الريحه موجوده والحمد لله.. تفيده وقد ظهرت عليها علامات الغضب : أنت أيه أللى جرى لك النهارده ياراجل الملافظ سعد يا متولى وأنت من ساعة ما جيبت سيرة البت زبيده وأنت ما بطلتش غزل فيها رجاله ما يملاش عنيها ألا التراب.. متولى : أنا قولت حاجه يا تفيده أنا كل أللى قولته أن البنت حلوة ..تفيده : تانى يامتولى بتقولها فى وشى ..عاجبك فيها أيه دى حتى جمالها فلاحى ..متولى يحاول أن يلم الدور : أيش قولتك جمالها فلاحى وبلدى كمان هو فيه أحلى وأجمل منك ياتفتف يا قمر أنت

حسابنا بعدين ..المهم أنك تكلم الراجل أللى أسمه رفاعى الحيوان ده يخلى باله من نبويه ويراعى ربنا ويعدل بين ستاته الأتنين..... تصدق الراجل مادخلش أوضتها من 3 شهور

متولى : عايزه الصراحه عنده حق ..ماهى نبويه تعلم العفه تيجى أيه جنب زبيده وحلاوتها.. تفيده : تانى يامتولى ..قوم أحسن أنا أتفرست منك..جرى لك أيه النهارده.. متولى يضحك : هههههه أنا بس بعاكسك ياتفتف أنا ألاقى أعز منك ياملكة جمال شبرا والسبتيه يا طعم

متولى يقابل رفاعى هو قاعد مجدوع أمام العماره وهو يدخن سجاير أجنبى ولا البرنسات بجلبابه المكوى وبلغته اللميع وهو يتحدث فى الموبايل أبو كاميرا

متولى : أزيك يارفاعى ..عايزك كده فى كلمتين

رفاعى : خير يامتولى بيه أنا تحت أمرك

متولى : خير ..نبويه كانت عند الحاجه من قيمة يومين

رفاعى : خير عملت حاجه بنت الفرطوس

متولى :لأ ما عملتش حاجه بس بتشتكى للحاجه من سوء معاملتك معاها وأنك بتفرق بينها وبين مراتك الأولانيه فى حقوقها الشرعيه

رفاعى : كيف ياعنى

متولى : مش عارف كيف..ياراجل فيه واحد ما يقربش من مراته لمدة 3 أشهر

يامفترى حتروح من ربنا فين..هى دى مش مراتك برضه زى التانيه مش هى مراتك ولا أنت جايبها علشان تخدم فى البيوت وتاخد فلوسها

رفاعى : هى قالت كده للست هانم.. متولى : وقالت أكثر من كده أنك لوماكنتش حتعاملها بما يرضى الله حترجع البلد.. رفاعى : هى قالت كده

متولى : وكمان حترفع عليك قضية نفقه وتجرجرك للمحاكم وتفضحك قدام القاضى

وشوف بقى القاضى حيعمل فيك أيه قليل لو حبسك

رفاعى : بنت الجزمه ..القطه المغمضه فتحت

متولى : من عمايلك السوداء فيها أنت ومراتك

رفاعى : ماهو أنا معذور يا أستاذ متولى لما أبص لدى وأبص للتانيه..نفسى مش جايبانى ناحيتها خالص

متولى : أما أنت راجل غريب صحيح ..يعنى نفسك جايباك لما بتاخد شقاها وفلوسها ..أبقى طلقها أحسن لك عشان كده يبقى حرام عليك ..وخلى بالك أن الناس كلها أللى بتخدم عندهم حيقفوا جنبها وقليل أن أتحاد الملاك يمشيك من العماره.. رفاعى : يانهار طين

متولى : شوف بقه أيه أللى حيحصلك وترجع بلدكم قفاك يقمر عيش

رفاعى : أنا فى عرضك أنا مش حمل النصايب دى..قولى أعمل أيه

متولى : تعالى على نفسك شويه ..أعطيها أنشاءالله يوم فى الأسبوع وعاملها كويس بدل الفرخه أللى بتبيض لك بيضه دهب تفط منك وخليهم ياسيدى خمسه

حلو ويوم واحد مر والسابع خده أجازه

رفاعى : كتر خيرك يا أستاذ متولى حعمل بالنصيحه

متولى : حتعمل أيه؟؟

رفاعى : خمسه حلو ويوم واحد مر

الكلاب الرومى والكلاب البلدى

ويعمل رفاعى بنصيحة عم متولى ويهتم بنبويه على قدر الأمكان ويرزقها الله

بثلاثة توا ئم يعوضوها كثيرا عن سنين الحرمان وتشتعل نار الغيرة بين الزوجتين

فتترك زبيده رفاعى وتغضب عند أهلها فى البلد وتترك أولادها الثلاثه لضرتها نكاية لها ولزوجها وتطلب الطلاق ونحصل عليه لتتزوج مرة أخرى

وتعيش نبويه مع رفاعى تربى أولادها وأولاد زبيده ولا يستغنى الأمر أن تقوم بالخدمه فى البيوت لتساعد رفاعى على المعيشه

تفيده : أخبارك أيه يا نبويه عامل أيه رفاعى معاكى

نبويه : من يوم ما كلمه الأستاذ متولى وهو أتعدل وأتعدل أكتر.. ياحجه من ساعة ما سبيته زبيده وطلعت قليلة الأصل

تفيده : وعامله أيه فى تربية العيال السته

نبويه : هدين حيلى بس ربنا مسهل لى الأمور وبأعتبر ولاد زبيده ولادى وحياتك ياحاجه بأهتم بيهم أكتر من ولادى ..فيه عندنا فى العمارة واحدة خواجيه بتعطف علينا فى الرايحه والجايه وبتقول على ولادى أنهم عاملين زى الكلاب البلدى وعيال زبيده كلاب رومى لولو..علشان عيالى طالعين شكلى وعيال زبيده بيض وحلوين وكل يوم تقولى : أزيك نبويه ..أخبار اللولو والبلدى عامل أيه معاك ؟؟

تفيده : تتك أيه يا نبويه ..هههههههه

تمت

الحلقة رقم 28 تابع تفيده ومتولى فى الدويقه

الحلقه رقم (28)
تفيده : لازم تقولى أيه أللى حصل يا متولى أنا فاكره أنى كنت معاك فى الدويقه وكنت با وزع الندر على الناس وبعد كده مش فاكره غير طشاش
متولى : أللى حصل ياستى أن الناس هجمت علينا ووقعنا فى الأرض وأغمى علينا أحن الأثنين وأعتبرونا من سكان الدويقه أللى وقعت عليه الصخرة وخدونا على المستشفى أحاول أنى أفهم الجماعة بتوع الداخليه مفيش فايده وأعتبرونا فى مهمه قوميه لجمع التبرعات والتخفيف عن ديون مصر
تفيده : وأنا كنت فين من الهم ده
متولى :أنتى كنتى موجوده بس كنتى فاقده النطق وبعدين جاء رئيس الوزراء والأعلام والصحافة علشان يسلموا علينا ويسلمونا شقة تمليك
تفيده : يعنى أتصورنا وطلعت صورنا فى التليفزيون وفى الجرايد..يالهوى يالهوى يافضحتك يا تفيده
متولى : أيوه ياتفيده وأعتبرونا أبطال قوميين ونزلت التبرعات ترف علينا من كل الدنيا وأتعلقت صورنا فى الشوارع والمحلات والصحف وأتعملنا حساب فى البنك لتلقى التبرعات
تفيده :يا نصيبتى ..با نصيبتى بقانا زى بتوع 57357
متولى : عندك أهه الجرايد والمجلات أللى كنت مخبيها عنك
تفيده تقوم بتصفح الجرايد والمجلات وكلما قرأت خبر تضرب يدها على صدرها
وهى تقول : أنا شغاله فى البيوت ..أنت كناس فى البلديه..أنا عندى سبع عيال ماتوا تحت الأنقاض..أنا أتجننت والناس بتلم ليه فلوس علشان أتعالج بره
دى فضيحه يامتولى يبهدلونا ويهزؤنا كده علشان يلموا علينا فلوس ..العالم الدون والله مانا ساكته لازم أفضحهم وأرفع عليهم قضيه لرد أعتبارى
متولى : قضية أيه يا تفيده وعلى مين على الحكومه..أنتى فاكره أن البلد دى فيها قانون..ده قليل أن يودونا السرايا الصفراء أو يحطونا فى المعتقل..أحمدى ربنا أنهم سابونا ومعملوش فينا زى ما بيقول عضو مجلس الشعب ويسفرونا بره للعرض فى دول العالم لجمع التبرعات
تفبده : ليه كانوا فاكرنا توت عنخ آمون ..منهم للله الظلمه حسبى الله ونعم الوكيل ..حسبى الله ونعم الوكيل
(متولى يهدأ من تفيده وهى تستمر فى الحسبنه والدعاء على الظلمه والمفتريين)
ولكنها تصر على أن تسترد أعتبارها بعد هذه الفضيحه
تفيده : أنا مش حسكت يامتولى أنا لازم أصحح الوضع ده
متولى : حتعملى أيه يعنى
تفيده : حا عمل أللى ما قدرتش أنت تعمله
متولى : مالكيش دعوه بالحكومه يا تفيده كفايه بهدله
تفيده : هو فيه أكتر من كده بهدله
متولى : أيوه فيه ..هو فيه حد قادر عليهم
تفيده : أللى معاه ربنا ما يخافش من حد أبدا
يتبع

تفيده : بنت يا صفاء ساعدينى علشان أعرف نمرة برنامج العاشره مساء بتاع
الست الأموره دى ..منى الشاذلى...أوحتى نمرة الجدع أبن الست كريمه
صفاء : قصدك معتز الدمرداش بتاع 90 دقيقة
تفيده : أيوه هو ده ..الولاد دول عاجبنى قوى وما بيهمش حد
صفاء : أجيب لك نمرة البيت بيتك بتاع الفضائيه المصريه
تفيده : أنتى عبيطه يابت ..ده مش أسمه البيت بيتك ده أسمه البيت بيتهم مش دى محطة الحكومه أللى ما حدش بيتفرج عليها ..شوفى أللى قولت لك عليه
يا أنا ياهمه ولاد الـ....
تستطيع تفيده تحقيق الأتصال مع برنامج العاشرة مساء وتحكى لهم المشكله ويعدوها بأرسال مندوب من المحطه ومعه مصور لعمل حديث أولى معها قبل المقابله التليفزيونيه ..يحضر المندوب فى الميعاد المحدد ومعه طاقم التصوير والأخراج وتقوم تفيده ومتولى بسرد الأحداث الحقيقيه وأن سمعتهم وكرامتهم ديست بالأقدام وهم على أستعداد لتقديم المستندات التى تثبت صحة كلامهم
ويقوم المصورين بتصوير شقة تفيده وأولادها وأحفادها وهم أثناء التسجيل يحضر ضابط بوليس ومعه قوة من الشرطه لوقف التصوير والتحفظ على الشرايط وأصطحاب متولى وتفيده إلى مكان مجهول فيجدوا فى أستقبالهم العقيد طلعت وآخرين
طلعت : هو ده أللى أتفقنا عليه ..أنتم أحرار عايزين تروحوا فى داهيه ماشى
تفيده : أنا ما أتفقتش مع حد وأنا لازم يترد أعتبارى وكرامتى
طلعت : كرامتك متصانه ومفيش حاجة حصلت بس أهدى أنتى شويه وشوفى أللى عايزاه أحنا نعمله
تفيده : تطلعونا فى التليفزيون وتكدبوا كل أللى حصل
طلعت : مش ممكن أللى بتقوليه ده ..عايزه تطلعى رئيس الوزاره كداب ووزير الأعلام ووزير الداخليه والدفاع المدنى ووزير الصحة ما ينفعش ياحاجه الله يهديكى..وبعدين أحنا بنتفاهم لحد دلوقتى بالذوق ..ماتخليناش نعمل حاجات تزعلكم
تفيده : أنت حضرتك بتهددنا ..حمشى فى الشارع وأفضحكم
طلعت : تبقى ناويه تخشى مستشفى المجانين وجوزك مش حتشوفيه تانى غير اللى يحصل لعيالك ..بعنى حتضيعى نفسك
تفيده تنظر لمتولى بغضب : قول يامتولى حاجه
متولى : ماهو أنا قلت لك من الأول ..مفيش غير حسبنا الله ونعم الوكيل
تفيده : حسبى الله ونعم الوكبل وربنا على المفترى والظالم وأبن الحرام
طلعت : من غير لخبطه وطولة لسان ..توقعوا على الأقرارات دى علشان تروحوا بيتكم لو ماوقعتوش أديكم مشرفنا لحد ما تعقلوا
ينظر متولى لتفيده فى أسى وحزن فيجد الدموع قد ملئت عيونها ...وقاما بالتوقيع على الأقرارت دون أن يقرؤها ليخرجا من هذا المكان البغيض
وفى الطريق إلى البيت
تفيده : متولى عايزه أقول لك حاجه
متولى : هو لسه فيه قواله..قولى فضفضى عن نفسك
تفيده : أنا عمرى ما حسيت بالقهر زى ما حسيت به النهارده.. أنا حاسه زى مايكون حجر كبير فوق صدرى أكبر من صخرة الدويقه
متولى يخفف الصدمه عن تفيده : أنتى لسه عايزه تطلعى ندر تانى
تفيده تبتسم قى مراره : تتهم القرف سدوا نفسى ده أنا كنت عايزه أندر لأهالى غزه وشعب فلسطين
متولى : أيه .... المره دى مش حترجعى تانى وتعملى أزمه دوليه ..أرحمينى ياتفيده الله ما يسيئك عندك فى مصر غلابه أكثر من شعب فلسطين عشرين مره
فالأقربون أولى بالمعروف ولا أيه
تفيده : عندك حق ..أحنا فعلا غلابه وغلابه قوى