20- قصة غرام زيزى

قصة غرام زيزى من اقوى قصص الحب والأخلاص والتفانى ..احبا بعضهما بجنون وتقابلا بعيدا عن اهلهما ولم يقف تكوينهما البيولجى حائل بينهما فقد آمنا بأن الحب يسكن فى القلب وليس فى المعده فهى نباتية لاتأكل اللحم وهو العكس يعشقه بعظمه او مشفى فقالت له: چيمى ياحبيبى حكايتنا اصبحت على كل لسان  وانا فى آخر شهور الحمل وأخشى أن الد قبل ان نتزوج  ..- سنقطع الألسن وأتقدم لأهلك وأطلب ايدك

-      اهلى سيرفضون لأن شكلك وهيئتك تختلف عن بنى جلدتى

-                - لا تحملى هما فقد صنعت باروكة تجعلنى مثلكم تماما

-                 عندنا عادات وتقاليد فى الزواج ان تقاتل اشرس شبان العائلة وانى اخاف عليك

-      - انى تعلمت الكاراتيه والكونغ فو وحصلت على الحزام الزهزهى

-      لن تكون مبارتك فى المصارعة الحرة بل فى اختبار ايكم انشف وأصلب رأس عن طريق ضرب الروسيات او كسر الحجارة بالدماغ

-                                              دماغ × دماغ  مفيش انشف من دماغى يازيزى

-                 ماذا ستفعل بزوجاتك واولادك الأربعة عشرة

-                   زوجاتى لا يتدخلن فى حياتى الشخصية فنحن نؤمن بتعدد الزوجات والأزواج           حتى لو بلغن الثلاثين..

 اذن احضر باكر وقابل اهلى واستعد للمعركة مع اشرس شباب العيله

فى اليوم التالى ارتدى چيمى الباروكه وسار فى طريقه لمقابلة اهل زيزى ومر على قهوة (ابسك عليه) فضحك عليه اصدقائه وأقاربه وحاول البعض ان يخطف من على رأسه الباروكة كنوع من المزاح ولكنه زمجر مكشراً عن انيابه فخافوا وأبتعدوا عنه فقد كان ضخم الجثة عديم العقل .. المعلم شلضم صاحب القهوة جمع شبان المنطقة بعد ان علم من مصادره السرية بأن چيمى طالما لبس الباروكه فهو فى طريقه لمقابلة عائلة زيزى ومن العار ان يتركوا ابن حتتهم يواجه اشرس واحد من عائلة زيزى دون اهل او نصير

تقابل چيمى مع اهل زيزى فالتفوا حوله بنات العيله وهم يضحكون من منظره ومن باروكته العجيبه فهمست احدى صديقات زيزى فى اذنه : يعنى ماكنتش قادر تحط شوية برفان تضيع  بها ريحتك  المنيله دى ..شبان العيله مستحلفينلك ليرقعوك علقة موت نصيحة اهرب وانفد بجلدك ..

تختلى أم زيزى بچيمى: زيزى حكيت لى على كل حاجه وأحنا حنعمل لها عملية أجهاض وكل واحد يروح لحاله هى تتجوز من ناسها وأنت تتجوز من ناسك ويادار مادخلك شر

چيمى : مش ممكن ياحماتى زيزى كل شيئ فى حياتى أدفع عمرى وحياتى فى سبيلها ..أم زيزى تفتح الباب فيدخل أقارب زيزى ويسحبوا چيمى للخارج وتبدأ معركة غير متكافئة فى العدد والقوة ولولا وصول المعلم شلضم ومعه شباب المنطكة وأقارب جيمى لكان من الهالكين .. يهرب أهل زيزى ويطاردوهم ويرقد جيمى على الأرض وجسده  كل جروح ..زيزى ترتمى فى حضن جيمى : ماتسبنيش يا چيمى لو سبتنى حيدبحونى ويقتلوا ولادنا قوم يابطل والبس باروكتك وياله بينا نهرب ونعيش بعيد بعيد وحدينا ونخلف معيز ولاد كلب

              عرفتم ليه المعيز ولاد كلب ودى كانت نهاية غرام زيزى    

  

19- الهروب الفظيع

قفز فوق سور الحديقة العامة هرباً من المخبرين .. أختار شجرة ضخمه وتسلقها وتوارى بين أغصانها  حتى أختفى المطاردين فسمع صوت رجل ينادى عليه من أعلى الشجرة : سسس أمان يا أخ اللى بيجروا ورائك مشيوا أطلع فوق نتعرف

 يكمل صعوده فيجد رجلان وسيده فسألهم لماذا أنتم مختبأين هل بسبب الديون مثلى

فقال الرجل الملتحى : أنا هربان بسبب بلاغ كيدى من حماتى بأنى من جماعة الأخوان بالرغم أنى عمرى ماقابلت الأخوان أو أتعاملت معهم اما السكسوكه نوع من الروشنه وعلى ما أثبت أنى مش أخوان يكون أتحكم عليا بالأعدام

الرجل الثانى قال : أما أنا بيقولوا عليا من 6 أبريل لأنى نزلت بوست على حسابى على الفيس بوك بأنى مواليد 6 أبريل وطلبت من مواليد هذا اليوم مشاركتى عيد ميلادى لقيت جميع أعضاء الجماعة بيهنونى ويتمنوا لى الصمود تانى يوم لقيت بتوع الأمن الوطنى بيبحثوا عنى فى الشغل هربت وأختبأت هنا وموت ياحمار على ماتثبت أنك مش تبع 6 براميل

السيده : انا رئيسة جمعية أهلية لمساعدة المشردين وأطفال الشوارع .. أنا مصريه ابا عن جد ولكن معى الجنسية الأمريكية .. الأمن أغلق الجمعية وأتهمنى بتجارة البشر وبيع الأعضاء مكايده للحكومة الأمريكية .. مجموع الأحكام لهذه التهم تصل إل 50 سنه وأرسلت للحكومة الأمريكية لتنقذنى كان ردهم خليكى فوق الشجرة على ما نتفاوض مع الحكومة المصرية

-حكايتى بأختصار بأنى تاجر فى البضائع الصينى .. أستلفت فلوس من البنك لشراء بضاعة بـ100  الف جنيه.. البضاعة وهى فى طريقها لمصر الحكومة عومت الجنيه فأصبحت قيمتها 2 مليون جنية ورفض الوكيل الصينى التسليم وراحت عليا الـ 100 الف والبنك عايز فلوسه غير التجار والديانه ومالقتش حل غير الهرب

 - ياجماعة انا شايف حمار واقف تحت الشجره ..

- الحمار ده تبع حد فيكم ابدا ده زى حالتنا هربان من الجزارين

- انا سمعت امبارح الضابط بتاع تنفيذ الأحكام بيقول لزميله ان الداخلية ستأخذ أذن من رئيس الوزراء بحرق الجنينة كقضاء وقدر بعد ان وصل عدد المختبأين فى الشجر لأكثر من 2000 متهم ومطلوب امنيا.. والعمل ياجماعة ..

- دى اشاعة بتتردد من اربع سنين لأن السجون الجديده لسه ماخلصتش والحكومه عارفه احنا فين بالأسم وبالشجرة فوجودنا هنا بيوفر اكل وشرب وحراسة ان لم يكن ستقوم بأنشاء غابات جديدة لتستوعب الأعداد المتزايده

18- شاعر فى زمن الغثيان

صوته المجلجل يهز اركان القهوة وهو يلقى بقصائده الناريه على مسمع محبيه من شباب الحى المتحمس فيحمل على الأعناق ويطوفوا به الحوارى والأزقة المظلمة بعيدا عن الشوارع الرئيسية والميادين التى يحتلها جنود الأمن المركزى التى تفتك بالمتظاهرين لو مروا بها وكأنه اتفاق بين الطرفين باللاسلم واللاحرب ولكن كانت هناك حرب من نوع آخر لزوار الفجر للقبض عليهم.. وتقلص عدد الشباب المتحمس ولم يعد يظهر فى القهوة ألا القليل منهم وحلت مكانهم وجوه غبية وكئيبه من السريين والجميع متوقع ان يتم القبض على شاعر القصائد النارية فى اى وقت ويختفى مثل باقى المختفين ولكنه كان يظهر ويختفى على فترات  حتى ظهر فى برنامج تليفزيونى وهو يلقى قصيدة عصماء انتهت ببكائية فى مدح الزعيم .. كانت دموعه حقيقية تجعلك تبكى عليه واختفى من القهوة ولم يحضر الا لماماً مرتدياً اشيك الملابس ويركب احدث السيارات وأصبح دائم الظهور فى المؤتمرات والمسيرات المؤيده والسهرات الشعرية فى التلفاز قابلته بالمصادفة وهو يستعد لركوب سيارته فى جراج متعدد الطوابق فتجاهلته ولكنه جرى ناحيتى واحتضننى فى شوق ولهفه فوقفت متخشبا حائرا كيف اتصرف معه وأنا من داخلى يغلى من خيانته فقلت له : بعت نفسك ياشاعر ..قال مستنكرا : لا بل دمرونى .. ولماذا استسلمت

قال بصوت منكسر : اسمع حكايتى اولا لتعرف هل بعت او دمرت.. أعتقلونى لعدة أيام شاهدت نوع واحد فقط من انواع التعذيب تشيب له الولدان فى عنبر1 وأنتظرت دورى لأعذب ولكنهم أطلقوا سراحى فالصدمة ألجمت لسانى عدة أيام عدت بعدها لألقى قصائد مشوشه وفى الفجر أخذونى وأدخلونى عنبر التعذيب رقم 2 فأهتزت جميع فرائضى وبكيت وأنتظرت دورى لأعذب ولكنهم أطلقوا سراحى فتاهت من رأسى القوافى والجمل وأصبح شعرى كله آهات وبكاء وفى فجر اليوم الثالث أخذونى وأدخلونى عنبر التعذيب رقم 3 فسقطت مغشيا عليا من هول ماشاهدت  ومكثت فى بيتى مريضا وكأن السياط التى رأيتها كانت فوق جسدى واظافرى وشعرى وأسنانى  ..عذبونى معنويا وسحقوا فى داخلى الأنسان وقتلوا الشاعر الثائر بدم بارد وبعدها اخذونى فى زيارة لمقابر الضحايا وقالوا لى بأن قصائدى هى التى أسكنتهم القبور فأزداد بكائى وأنكسارى وخيرونى بين العذاب حتى الموت والحياة  المنعمه المرفهة واصبحت  كما ترى ورقة بيضاء يكتب فيها الظالم ما يشاء لأقرأ منها اشعار الذل والعار  ..

شددت على يده وودعته قائلا : لا تيأس ياولدى وأصبر وأحتسب ..دولة الظلم ساعة ودولة الحق إلى يوم الساعة 

17- بطيخ مولانا

 










انقلبت سيارة نقل بمقطوره على الطريق
الدائرى فوق منطقة دار السلام وكانت محمله بـ شحنة بطيخ من نوع غريب لا يعرفه المصريين ولم يشاهدوه من قبل فالبطيخة فى حجم السيارة السيات اوتزيد لتكون فى حجم التوكتوك ويصل وزنها من 300 إلى 400 كيلو  سقطت خمسة بطيخات من أعلى الكوبرى فوق السيارات والمارة نتج عنها وفاة ثلاثة مواطنين وتدمير عدد من الأكشاك والعشش وقد خرجت منطقة دار السلام (المسماه بالصين الشعبية لأزدحامها بالسكان) عن بكرة ابيها لأنقاذ المصابين بتقطيع البطيخات الخمسة بالمناشير الكهربائية والفؤوس والبلط وعام الناس فى مية البطيخ الذى وصل للأعناق وقام البعض بتعبئة الصفائح والأوانى والحلل  بماء البطيخ وأنطلقوا به إلى منازلهم ولم يتركوا فتفوته من البطيخات الخمسة وعاشت دار السلام اسعد لياليها وهى تحتسى وتأكل البطيخ وبعد أن استطعموها وعجبتهم طعامته وحلاوته خرجت المظاهرات فى اليوم التالى بعد أن أنتشرت الأشاعات  بأن هذا النوع يسمى ببطيخ مولانا وهو لأصحاب المقامات الرفيعة من علية القوم وقشطة المجتمع مخصص للنوادى والتجمعات البشرية مثل الشرطه والجيش فالبطيخة الواحده تكفى كتيبة امن مركزى وترددت فى العاصمة أشاعة بطيخ مولانا وحلاوته فخرجت المظاهرات من كل صوب وقطعت الطرق  والدعوه لمليونية فى ميدان التحرير تطالب الحكومه بتوفيربطيخ مولانا للشعب وعرضه بالمجمعات الأستهلاكية. وفى المساء يستضيف التليفزيون وزير التموين ومعه وزير الزراعة ووزير الأوقاف وعدد من نواب مجلس الشعب لتهدأة الشعب ومناقشة المشكلة يفاجأ الجميع بقطع الأرسال ويخرج المتحدث بأسم رئاسة الجمهورية ليلقى البيان التالى

ايها المواطنون الشرفاء علمت رئاسة الجمهورية بالحادث الأليم الذى تسبب فى خسائر الأرواح والممتلكات نتيجة تزحلق خمسة بطيخات وسقوطها فى منطقة دار السلام مما جعل الفئة المندسة من جماعة الأخوان الأرهابية تنشر الأشاعات المغرضه بأن هذا البطيخ يخص الدوله وتحجبه عن مواطنيها الأبرياء الأحرار وبعرض الموضوع على مجلس الوزراء فى جلسته العاجلة اليوم قرر الأتى

1-   صرف بطيخة سوبر والمعروفة ببطيخة مولانا لكل 100 بطاقة تموينية

2-   حظر التصدير لهذا النوع

3-   ستقوم وزارة الزراعة وبمساعدة مركز البحوث الزراعية بطرح 90 مليون بطيخة عصافيرى بحجم كرة البنج بونج خارج البطاقة تكفى لفرد واحد يعصرها على الفول أو الجبنه القديمة ليحصل على وجبة غذائية كاملة من جبنة وبطيخ أو فول بالبطيخ والله الموفق أنتهى البيان مارشات عسكرية ثم يليها أغنية أخترناه أخترناه

يوم ما زرعها وقلوبنا معاه.... اخترناه اخترناه من اول قشره سمعناه

اخترناه اخترناه من اول لبه فهمناه ..وعلى بطيخنا استئمناه... بطيخ مولانا ده الدنيا كلها عارفاه

اخترناه اخترناه خدلك شقه وأمك شقه رايح تشبع لمشاءالله

بطيخ مولانا اللى كسانا وعمل لينا قيمه علشان كده احنا اخترناه

اخترناه اخترناه من غير لجنه ولا ولا اه... وده تكليف مش تشريف ولا فخفخه ولا ملك وجاه

يعيش بطيخ مولانا واللى معااااه

8- روحيه تخنت شويه

حامد وهو مستاء : أنا خلاص يا أمى مش قادر أستحمل مفيش فايده غلبت فيها أنا بفكر أطلقها وأخلص من الغلب اللى أنا فيه ده

الأم وهى منزعجه : أيه الكلام الخايب ده.. أنت أتجننت ياحامد وعيالك مين يربيهم .. أللى كان يشوفك وأنت رايح تخطبها مايشوفكش دلوقتى.. خلاص حبك طار فى الهواء .. أيه يعنى وزنها زاد حبتين .. الدنيا خربت ماهو أنت كمان طلع لك كرش أهه وشعرك أبتدى يصلع أنت مابتشوفش نفسك ياواد

- عماله تدافعى عنها علشان قريبتك ويولع أبنك .. يا أمى حرام عليكى أنا ما بعرفش أنام فى سريرى مش سايبه غير 30 سم يادوبك بحط جنبى عليهم وغير مزيكه القرب أللى طالعه من صدرها وصوت شخيرها أللى يصحى الأموات وكله كوم ولسانها أللى متبرى منها لو حاولت أكلمها فى الحكاية دى

- الحق عليك أنت ..- تانى بتقولى الحق عليا أعمل أيه أكثر من أللى عملته .. الجيم وودتها مشى ومشيتها أشتراك مع دكتورة رجيم وبأدفع .. الثلاجة عملت لها قفل علشان تبطل أكل ومفيش فايده عملت طفاشه وفتحتها ..ومش عليها هى وبس الواد والبنت ضربوا كمان وكل واحد فيهم بقى عامل زى العجل الأسترالى

- يابنى مراتك دى أول ماتجوزتها كان شكلها كده

- لأ طبعا هى لو كانت شكلها كده كنت أتجوزتها  ماتفكرنيش يا أمى وسط أيه وقوام أيه  كانت زى المانيكان .. كل ده ضاع وأنفجر من التخن مش عارف أيه أللى حصل  نفشت من كل حته.. أخدتها لدكتور متخصص فى الغدد الصماء وبعد الكشف والتحليلات قال لى الله يكون فى عونك غدد مراتك خرجت من تحت السيطره .. لو شربت شوية ميه برضه حتتخن .. قولت له والعمل يادكتور .. قال لى سلم أمرك لله والمهم أنك تحافظ على الأولاد من هذا المرض وألا حيبقوا أفظع من أمهم .. وكتب لها دواء يثبت الحاله

الأم : يا أبنى أرضى بنصيبك وزى ما قال لك الدكتور أنه مرض وربنا يشفيها وما تطلعش قليل الأصل وتسيبها دى برضه من لحمنا ومن دمنا .. أستهدى بالله وأستعيذ بالله من الشيطان أللى راكبك .

- حاضر يا أمى ..أستغفرك وأتوب إليك يارب .. بس أنا لو فطست وطقيت من جنابى  وحصلى حاجة حتكون الست دى هى السبب وذنبى فى رقبتكم أنتم الأتنين .

- أستهدى بالله وأنا ليه قاعده معها .. خلى عندك طولة بال ياحامد .. وبعدين يا أبنى مش مراتك أول ولا آخر واحده تخينه فيه رجاله كثير عايشين ومراتتهم أتخن من مراتك وما بيعملوش أللى أنت عامله ده

- أهى عندك يا أمى أتصرفى معاها وألا حسيب لكم البيت وأطفش

- طب أسكت خالص مراتك جايه ومش عايزه مشاكل الشويه أللى قعداهم معاكم

( تدخل زوجة حامد وهى ضاربه بوز ومكشره عن أنيابها  ويترك حامد المكان وهو يحدث نفسه)

الأم : تعالى يا روحيه أقعدى جانبى هنا عايزاكى فى كلمتين

روحيه تجلس بجوار حماتها وهى تجهش بالبكاء : أنا سمعت كل حاجة يانانتى .. دلوقتى بقيت كخه علشان وزنى زاد وسببه الحمل والولاده وده شيئ طبيعى بيحصل لأى ست أكيد البيه شايف له شوفه ومش طايقنا وبيطلع فينا القطط الفاطسه .. دى آخرتها لأنى شايفه كل طلباته هو وعياله ده  مش لاقى حاجة يتخانق عليها وأللى فى بوءه أنت تخينه أنت بتشخرى أنا ما بعرفش أنام وعلى كده فى الرايحه والجايه بذمتك أنا تخينه

تنظر حماتها لجسمها وهى تجاملها : لا يابنتى أنت زى الفل ..

- أومال أبنك شغال عليا رزاله ليه وسايق عليا  العوج ليه

- ده حب ياعبيطه ومناغشه هو حيلاقى أعز منك

الحلقة رقم (2)

أخبط راسك فى الحيط

- دافعى عنه ما هو أبنك لازم تقولى كده .. رجيم وعملت ونزلت 15 كيلو ..الدكتور ورحت .. بطلت آكل غير واجبه واحده بس وأفضل جعانه طول النهار وأتفرج عليه هو وولاده نازلين لغ كأنهم بياكلوا فى آخر زادهم .. أعمل أيه أكثر من كده

( يخرج حامد مندفعا من الداخل وهو ثائر : ما قولتيش وزنك بقى كام ياهانم

- ماله وزنى  ياخويا مناسب مع طولى غيرش 20 كيلو زياده

- عشرين أيه قولى 40 ولا خمسين الست وزنها وصل 150 كيلو ياماما

روحيه بغيظ : ميه وخمسين  ميه وخمسين.. لو كان عاجبك أنا كده وحفضل كده وأخبط راسك فى الحيط

- شايفه ياماما طولة لسانها علشان مستتخنه نفسها

روحيه تهب واقفه وتشمر زراعيها : لأ بقى مش حسكت لك ما تفتكرش أن بتتحامى فى أمك .. أتلم ياحامد وخلى يومك يعدى

الأم وهى تقف بينهما : صلوا على النبى ياولاد .. أدخل جوه يا حامد وأقصر الشر

- حاضر ياماما علشان تعرفى أنه مش تخن وبس ده أستقوى  وطولة لسان ..والتخين عليه ربنا يا مفتريه .. متجوز وحش أنا ( يدخل وهو ذليل لغرفة نومه )

- أقعدى يا روحيه فيه كلمتين عايزه أقولهم لك فتحى ودانك وسيبك من شغل الفتونه ده مابينفعش مع الرجاله

- حاضر يانانتى أما نشوف نهايتكم أيه.. صبرنى يارب

تبدأ أم حامد الكلام بهدوء وهى تربت على كتف روحيه لتهدأ من ثورتها : أنت مش عايزه جوزك يشوفك فى أحسن منظر .. أنت مش عايزاه يحبك زى الأول .. ولا أنت غاويه النكد أللى عايشه فيه ليل ونهار ده ..

- فيه حد بيحب النكد يا حماتى أنما تقولى أيه فى عمايل أبنك .. ماهو ليه حق ياروحيه يابنتى .. فيه حد يسيب نفسه لما جسمه يبوظ كده ويضرب من كل ناحيه .. اعمل أيه يانانتى بعد ماخلفت الواد المقروص أستخدمت حبوب منع الحمل وهى أللى ملئت جسمى ميه ..بطلتها لكن الميه فضلت فى جسمى اخدت أدويه كتير علشان تنزل الميه مفيش فايده

- مفيش حاجة أسمها مفيش فايده .. أنت ياروحيه أنا عارفاكى بتكسلى ومش حطه الموضوع ده فى دماغك .. ترضى أن جوزك يسيب البيت ويتجوز واحده تانيه .. طب

يعملها يبقى ده آخر يوم فى عمره !!

- الله ده أحنا لا بنرحم ولا نسيب رحمة ربنا تنزل.. يابنتى يا حبيبتى سيبك من العند والكسل وأنتبهى لجوزك وكمان تنتبهى لصحتك يعنى تفتكرى التخن ده حاجة كويسه ده بيجيب الأمراض الله ما أحفظنا القلب والضغط والسكر غير أمراض المفاصل عارفه البت بنت عمك بسطويسى أيه أللى جرى لها نتيجة التخنت قعدت على عجلة وولادها بيزقوها ماعدتش تقدر تمشى على رجليها..عايزه يوصل بيك الحال كده وتخسرى صحتك أولا وجوزك وبيتك .. الموضوع ده حطيه قدام عنيكى وفكرى وحاولى وصممى على أنك تخسى وسيبك من كلام الدكتور الخايب أللى بيقولك الغدد بتاعتك ضربت ده هو أللى مخه أللى ضرب

- طب العمل يا نانتى

- تبدأى من بكره الرجوع لدكتورة الرجيم وأمشى معاها صح وطبقى أللى بتقول عليه

- آخر مره قالت لى أنت ما ينفعش معاك الرجيم أنت لازم تعملى عمليه لشفط الدهون وتدبيس للمعده

- وماله ياروحيه نعمل العمليه ونظبط نفسينا وجوزك معاه وربنا فاتح عليه من وسع

- هو موافق بس أنا خايفه ومابحبش المستشفيات وأللى شوفته فيها أيام الولاده

- نستحمل فى سبيل أن أحنا نحافظ على صحتك ويبقى حامد ماعندوش حجه

- أللى تشوفيه يا نانتى

- هو ده عين العقل .. قومى صالحى جوزك وقولى له أنك حتعملى العمليه وربنا يبعد عنكم العين ويهدى لك راجلك

الحلقة رقم (3)

روحيه فى مركز التجميل

فى عيادة مركز التجميل يجلس حامد وروحيه للأستماع بكل أهتمام لتوجيهات الدكتور طاهر وهو يتحدث عن حالة روحيه

الدكتور طاهر : زى ماقولت قبل كده أن حالة المدام سهله ولكنها ستظل معنا هنا فى المستشفى لمدة شهر على الأقل

حامد : شهر مش كتير يادكتور

- لأ مش كتير ويمكن أكثر لأنه حيتعمل للمدام ست عمليات شفط وتدبيس وأربع عمليات تحسين قوام وتجميل بعدها أتفرج على المدام حتبقى زى نجمات هوليود

لو موافق أتفضل أنت وهى أمضوا على الأقرارات دى وتقوم بدفع نصف الأتعاب دلوقتى لو عايز تدفعها كلها مفيش مانع

ينظر حامد لروحيه : قولتى أيه ياروحيه موافقه ولا حترجعى فى كلامك

تتذكر كلام حامتها وترد عليه وهى حائرة : أنت شايف أيه ياحامد العمليات دى مفيهاش خطر عليا

- مش حقولك أنا يرد عليكى الدكتور .. العمليات دى فيها خطر عليها يادكتور

- الخطر الحقيقى أللى أنت فيه دلوقتى يامدام لأن جسمك فى زياده مستمره حييجى عليكى وقت مش حتقدرى تقومى من السرير والعمليات دى أنقاذ لك من المأساة أللى حتحصل بعد كده .. هيه لسه متردده

- ردى ياروحيه .. أنا من ناحيتى موافق فاضل موافقتك ردى على الدكتور

- موافقه وأمرى لله أنما وصيتك العيال ياحامد ولو حصلى حاجه حتكون أنت السبب

- أتكلى على الله وتقومى لنا بالسلامه

يدفع حامد المصاريف وتحجز روحيه بالمستشفى الخاص وتبدا على الفور أجراء كافة التحاليل والأشاعات اللازمه وهى مستسلمه تماما لأوامر الفريق الطبى .. وتدخل روحيه غرفة العمليات عدة مرات والجراحين يقوموا بأزالة كيلوجرامات من الشحم المتراكم فى كافة أجزاء جسمها وتبدا فى التعافى لتبدأ عمليات التجميل فى الوجه لأزالة الأنتفاخات الموجوده فى الخدود والرقبه وغيرها من أجزاء الجسم

ويمر شهر وتبدأ روحيه فى التحرك داخل المستشفى وتبدأ تمرينات العلاج الطبيعى وحمامات البخار وغيرها من الأجهزة حتى تبدوا كأنها عادت لسابق عهدها وأكثر وعندما تقف أمام المرآة تصاب بذعر فقد شاهدت صوره مختلفه تماما عن شكلها المعتاد وتبدأ جلسات العلاج النفسى لتتوافق مع شكلها الجديد وتكتسب الثقة بنفسها

كل هذا وحامد يزورها ويشجعها على الأستمرار فى مراحل العلاج

ويغيب عنها أسبوع بأومر الأطباء ليعود بعدها ليصحبها للبيت.. وهنا تقع المفاجأة فيدخل خامد غرفة روحيه بالمستشفى فيجد أمرأة أخرى ممشوقة القوام وهى ترتدى بنطلون وبلوزه ضيقه وشعر أصفر وعيون زرقاء ولكنها تشبه إلى حد ما زوجته يوم خطبها ولكن هذه أحلى وأشيك ورشيقه عنها .. يقف مترددا وهو لا يصدق عينيه ومن خلفه الدكتور طاهر والمساعدين لمشاهدة أنطباعات حامد عند رؤيه روحيه بعد التعديلات وهو واقف مبلم ولا يستطيع أن يتقدم خطوه واحده داخل الغرفه

الدكتور طاهر : أدخل ياحامد بارك لمدام روحيه مالك واقف كده ليه

- متأكد يادكتور أن دى روحيه مراتى .. أيوه ياسيدى

يدخل حامد وهو متهيب ويدور حول روحيه وهو غير مصدق نفسه وهى تنظر له بكبرياء وخيلاء بعد ان عادت لها الثقة بنفسها .. أنت روحيه .. مش ممكن ده أعجاز

لالا أنا مش مصدق أنك روحيه .. أنت بقيتى حلوه قوى أكثر من الأول هم عملوا فيكى أيه .. روحيه وهى غاضبة :أخلص ياحامد خلينى اروح أشوف العيال وبطل أستهبال

- أستهبال .. أيوه ده صوت مراتى روحيه أللى لسانها المتبرى منها .. حمد لله على السلامه..( يأخذ زوجته بالأحضان ويبكيان سويا )

تهمس روحيه فى أذن حامد : فرصة يا حامد تتفق مع الدكتور طاهر يزرع لك قرعتك ويشيل كرشك أللى دلدل ده .. بقى شكلك فظييع أنا مش عارفه ساكت على نفسك ليه

- أنا ياستى عاجبنى شكلى كده

- حامد .. أسمع الكلام وألا حخلعك

يضحك حامد بهستيريا ويتركها ويخرج وهو يضرب كف بكف فبعد أن كان يهددها بالطلاق أصبحت تهدده هى بالخلع .. وعجبت لك يازمن

ههههههههه

تمت

أجسادنا باترينات نستعرض بها جمال الخالق العظيم فلا تهملها حتى لا تكون مصدر أزعاج لك وللآخرين.. فكن باترينه منسقه ورشيقه لتبعث البهجة والثقة والجمال قبل أن يزيلها بلدوزر الحياة لخروجها عن التنظيم

من أقوال واحد بيلف على البترينات

هههههههههه

4- الغناء العشوائى فى دنيا الطرب

مصر طول عمرها  بلد الفن والفنانين وكانت القاهرة تسمى بهوليود الشرق والغناء المصرى باللهجة المصرية التى يفهمها كل العرب كان سفيرنا فى كل العالم العربى مرتبطا بأسماء فطاحل المطربين والمطربات والملحنين العظام ومؤلفى الأغانى .. ولكن لكل جواد كبوه فأن فن الغناء والتأليف الغنائى تعرض لكبوات عده على مدار الـ 200 سنه وهى الفترة التى أمكن تسجيلها على أسطوانات أو وردت بأفلام سينمائية

ومؤشرات الغناء العشوائي كانت تصعد على استحياء بين الحين والآخر منذ بداية القرن العشرين وتحديداً في عشرينيات القرن الماضي عندما اصابت اذن المستمع المصري كلمات غريبة عليه من نوعية "ارخي الستارة اللي في ريحنا..
"لحسن جيرانا تجرحنا" وهي أغنية بها تورية جنسية غنتها "منيرة المهدية" في الفترة نفسها ظهرت ايضا اغنية "هات الازازة واقعد لاعبني.. دي المزة طازة والحال عاجبني" لـ "نعيمة المصري". وإذا كانت عشوائية أغنية "منيرة المهدية" في المغنى، فان عشوائية اغنية "نعيمة المصري" في المعنى واللفظ وقد تكون المرة الأولى التي تظهر فيها الفاظ غنائية بهذه الفجاجة والتي صدمت جمهور المستمعين. وهي تقريبا نفس الصدمة التي صدمتهم بها اغنية "عبد العزيز محمود". "يا شبشب الهنا.. يا ريتني كنت انا" في مطلع الخمسينيات ضمن فيلم "منديل الحلو" مع "تحية كاريوكا"، الا ان ما يشفع لهذه الأغنية في فجاجة الفاظها انها جاءت لضرورة درامية ضمن سياق احداث الفيلم.

ومن مغنيات هذا العصر نعيمه المصرية رغم شهرتها التي ومضت كالبرق الا انها سرعان ماغابت وغيبت لكنها ورغم عمرها الفني القصير بين ظهورها على الساحة الفنية عام 1938 ولمدة 6 سنوات فقط واختفائها الغامض ووفاتها اوائل 1970، استطاعت ان تحظى بمكانة مميزة بين مطربات زمانها الكبار كمنيرة المهدية و أسما الكمسارية وبهية المصرية و سمحة البغدادية و اللاوندية و رتيبة أحمد و ودودة المنيلاوية و حياة صبري و فاطمة سرى وغيرهن وهذا جانب من كلمات الأغانى العشوائية التى أنتشرت فى القرن الماضى

                               يانا يامك (رتيبه أحمد)
واحده عجوزة وشابة صبية.... جاز وسبرتو مايتفقوش
وانت عارفني أنا عصبية ........لما اتخلق حلق حوش
أبقى رزيلة وهي سئيلة .........واحده فينا هتبقى قتيلة
                   لالالالا .. يانا يا امك

                           ******

 يا لموني وأنا أحب البيرة … يا لموني وشرب البيرة

يا لموني دا حبيبي الحيلة .....يا لموني والعدا ظلموني

اتسطلت من أول كوبايه خلتنى قلعت هدومى

والنبي لآيس وياك ياغزال... ومش حنام مشغول البال

فى كل مره تبعد وتخاصم..... وأقعد أنا مشغول البال

والنبى لأيس وأتقدم ...........ولا عمرى يوم انا حتندم

أما أغاني هذه الأيام والتي طفحت علينا في غفلة من الزمن فأصبحت تتغزل في الحشيش والبانجو والبيرة والنساء مثل "أنا شارب سيجارة بني حاسس دماغي بتاكلني.. قاعد في الحارة باسقط والغسيل عمال بينقط والشارع اللي ورايا قدامى.. والكلام على طرف لساني.. باجي اتكلم باتلخبط.. يا عم ولع.. يا سيدي ولع" ل"محمود الحسيني"، ويبدو ان الشرب وقع عقداً مع "الحسيني" فبعد ان غنى لشرب الحشيش غنى لشرب البيرة "أنا شارب ثلاثة ستلا. انا رجل قوي مش قلة".

بدأها "سعد الصغير" واعتمدت عليها افلامه اعتماداً كبيراً والأكثر من ذلك انه زاد عليها حركاته الخليعة، وهي الصورة التي رأيناها في "على الطرب بالتلاتة" في أغنيته "بحبك يا حمار" التي ضرب بها كل القواعد الغنائية والفنية والأخلاقية اغنية "هاتي اطة" في "شارع الهرم". ويقول فيها "ابوسها عشرة على عشرة.. هزيها يا بت كمان هزة. طريها ويا بخت الأرض اللي بتمشي عليها". وفي فيلم "لا تراجع ولا استسلام" استعان "احمد مكي" بأغنية الدنيا زي المرجيحة يوم تحت وفوق".

        الفقر الفنى على كافة الأصعدة وتردى الأخلاق هو البداية لسقوط الأمم 

16- السفلـــــة

لماذا لا تكون سافل ستقول لأننى متربى ومحترم ومثقف وأبن ناس فالسفله ايضا  متربيين ومحترمين ومثقفين وولاد ناس فهل السفالة اسلوب حياة واللسان الزفر والرغبة فى التشاجر وبهدلة البشر طريقتهم لتحقيق مآربهم

لو لاحظت بأن السفلة يحصلون على كل حقوقهم المشروعة وغير المشروعة ويخشى كثير من الناس التعرض لهؤلاء السفلة رغم انهم اضعف التاس منطقا وعقلا ومن السهل توريطهم فى مشاكل يعاقب عليها القانون ويقال فى المثل الشعبى بأن المرأة الشلق ست جيرانها والرجل السباب قوى الجانب مهاب فالمدير طويل اللسان يخافه ويخشاه الجميع بعكس المدير المهذب المحترم  فلا يخشاه مرؤسيه بل يحبونه ويبشون فى وجهة

بالقطع قابلت فى حياتك هذه النوعية من البشر التى تشاكس دبان وشها هذا النوع يحل مشاكله بالعنف والقسوة ولا يتأثر بضعف أو قلة حيلة ضحاياه والسافل أكثر الناس ظلما وجبروتا ولا يحن قلبه لفقير أوضعيف فهم ضحاياه ليخشاه الأقوياء بمبدأ أضرب المربوط يخاف السايب

سمعت أحد المديرين السفله وهو يوصى نائبه بفرض القسوة وعدم الرحمه ويقول له اتغدى بهم قبل أن يتعشوا بيك .. السفله هم أكثر الناس فسادا وقسوتهم يستغلوها كستار لتغطية سرقاتهم وفضائحهم

ومن غرائب تصرفات السفله بأن سفالتهم تقع على من هم اقل منهم فى الدرجة او الوظيفة أما من هم اعلى منهم فحدث ولا حرج فهم كلاب وديعة تلعق أحذية رؤسائها فكل دكتاتور يلتف حوله عدد من السفله يطلقهم كالكلاب على معارضيه