مطلوب عروسه حلوه وشعنونه
> أنت بتقول أيه ؟ حلوة آه.. أنما شعنونه أزاى يا مراد ..
> أيوه شعنونه ويكون مخها طاقق كمان يا شادى فيها أيه دى
> سامعه ياتنت أبنك بيقول أيه ..عايزها شعنونه ..أبنك أجنن
> يابنى أنا غلبت معاه أجيبه يمين أجيبه شمال مفيش فايده.. قالوا جابوا للمجنون عقل على عقله ماعجبوش غير عقله ..هو يابنى مخه ضارب وعايز واحده مخها ضارب زيه نعمل له أيه.. المهم يتجوز ويحل عنى
> طب نسمع وجهة نظره يمكن نقتنع بيها ونعرف الحكمه من أختياره الغريب ده
قول ياعم مراد عايز الشعنونه تعمل بيها أيه
> أولا علشان تبقوا عارفين أن معظم البنات الحلوين بيبقوا شعانين
> كويس ومين مابيحبش يتجوز واحده حلوة ..خلاص ياتنت شوفي له بنت حلوه
> يييه فرجته على ملكات جمال يحلوا من على المشنقة.. يقعد مع الواحده منهم عشر دقايق ويقوم واقف على أشابيره وسايب البُنيه وخارج ويقولك مش هو ده الصنف أللى أنا عايزه..أشى دى هاديه وأشى دى بارده وأشى دى عاقله ودى مش عارفه عامله أزاى ..فى الأخر أنا رفعت أيدى من جوازه أنشا لله عنّه ما أتجوز عمره
> يا أمى ياحبيبتى حفهمك بدل المره ألف ..مميزات البنت الشعنونه
> قول ياخويا سمّع صاحبك الجنان أللى على أصله
> شوفوا يا جماعة حقول تانى وأمرى لله..البنت الشعنونه عمرها ما تكدب وعمرها مابتكون خبيثه ليها وجه نظر فى الحياه.. وماحدش يفهمها ألا أللى زيى
طيبه وأللى فى قلبها على لسانها تقول للأعور أنت أعور فى وشه مابتعرفش تخبى حاجه جواها ..تتشعنن وتتزربن وتهرتل بس فى الأخر بتنزل على مافيش
..الشعنونه بتخاف على جوزها وعيالها زي عنيها مش مهم عندها المظاهر والفشخره الفاضيه لها هدف وفى الأخر شعننتها هى سر جمال روحها ..ياناس أنتم مش فاهمين النوعيه دى من البشر وبتفتكروا أنهم مجانين بل بالعكس هم عاقلين جدا ورافضين لأساليب الحياة النمطيه والزيف والخداع وأنا بحب الصنف ده. . شادى: أيه رأيك بقى عندى طلبك ..ساكنه قدامنا بنت أنما أيه شعنونه بنت
شعانين طحن .. جمال أيه جنان أيه أستنجلينا على الأخر بتلبس حاجات غريبه وناكشه شعرها ويا ويله ويا سواد ليله أللى يلضم معاها فى حديث معلمه المنطقة الأدب يقدر حد يبصلها أو يعاكسها أو حتى يدوس لها على طرف ما قولكش أوعى وشك
> مراد أشوفها الأول وأحكم عليها
> خلاص ياعم أخوها صاحبى وممكن نزورهم فى بيتهم لو حبيت
> الأول أشوفها فى أى مكان مش مهم أتكلم معاها أنا بعرف الشعانين من عنيهم
> ياسيدى من عنيهم.. أستاذ ورئيس قسم ..أسيبك دلوقتى وحستناك بكره عشان تتفرج على ساميه > هى أسمها ساميه أسم جميل > أسمها ساميه الشعنونه
هههههه
الحلقة رقم (2)
ساميه الشعنونه
يلتقى مراد بشادى ويجلسان سويا فى البلكونه التى تطل على بيت ساميه وينتظران خروجها ليشاهدها مراد كطلبه قبل أن يزورها فى بيتها ..ولم يمضى وقت طويل فقد نزلت ساميه من البيت وبدأت السير فى الشارع بكل ثبات ولا تلقى بالا لأحد شعرها كنيش وترتدى جاكيت وبنطلون جينز وتحمل شنطه مصنوعة من الخيش تشبه مخلة الشحاتين .. وظلت تتهادى وهى هائمه فى ملكوتها.. حتى أقتربت من منزل شادى وأصبحت تحتهما تماما فأخرج مراد من جيبه كيس بومب ضخم
> أنت حتعمل أيه يامجنون > أدخل أنت جوه مالكش دعوه أنا حتصرف
يفرغ مراد كيس البومب من البلكونه على ساميه فتسمع دوى أنفجاره وصرخات ساميه وهى تتقافز يمينا ويسارا ولأعلى كالكتكوت الذى يقف على صفيح ساخن وهى تقول: شعرى أتحرق ياولاد الـ ...
فينطلق مراد بأقصى سرعة ويفتح باب الشقه ويجرى على السلم
> شادى على فين يامجنون > فرصة نازل أقابلها > حاسب أحسن تقطعك
مراد من الدور الأرضى > أوعى تطلع فى البلكونه خليك جوه
تقف ساميه فى وسط الشارع وهى تستند على أحد السيارات وهى فى حالة أنفعال وعصبيه ويخرج من فمها مختلف أنواع السباب والشتائم توجهها لكل من يطل من أى شباك أوبلكون ..ويقترب منها مراد ويقف بجوارها وهو يزعق لسكان العمارات ويستنكر فعلتهم الشنعاء ويعلو صوته على صوتها فتوقفت عن الزعيق وهى تنظر له بأستغراب وتنتظر حتى ينتهى فينظر لها ويقول : حقك عليا يا آنسه ناس ما عندهاش دم فيه أى حاجه صابتك > لا > مفيش جروح أو أصابات > لا
> طب بتزعقى ليه أما حاجه غريبه قوى؟( ثم يتركها ويسيرفىحال سبيله ) فيسمعها وهى تنادى عليه
> أنت ياجدع أنت سسسس > أى خدمه يا آنسه > أنت أيه أللى هببته ده وأنت مالك يا أخى يحدفوا بمب يحدفوا صواريخ يحدفوا بلا أزرق حد قالك أتحشر أما بلاوى > أنا آسف ياموذماذيل.. المره الجايه مش حَدّخَلْ أى خدمه تانى ..ناس ما بتقدرش الجمال ( وبدأت زرابين ساميه تظهر ) > أنت بتعاكس بقى حضرتك وأخدت الموضوع سلوانه فى حلوانه ..أمشى ياض من قدامى دلوقتى لفرمك
(مراد يزيد من جرعة الأستفزاز): أنا قولت غير كلمة ناس مابتقدرش الجمال أومال لو قولت أنك حلوة وأموره ولذيذه وشيك وأنك خسارة تسكنى فى الشارع الزباله ده كنت عملتى أيه ..( تجز ساميه على أسنانها يممممم وتبدأ تتشعوز على مراد الذى تركها سريعا وعاد من حيث أتى ليصعد إلى صديقه شادى وهو يضحك على كلمات ساميه وهى تنادى عليه ولايرد عليها ويرتقى السلم ليستقبله صديقه وهو ملهوف عليه
> أيه رأيك ياوحش عَجَبِتَِك
> هىّ دى .. كانت فين من زمان ..بينا على بيت أبوها
> ياعم أصبر لما نرتب الأمور مع أخوها وتقعد معاه الأول وبعدين تزورهم >ماشى ياشادى رتب براحتك وماتتأخرش عليا أستنى منك تليفون ياجميل.. باى
فى منزل شادى وفى غرفة الصالون يحضر مراد لمقابلة سامى أخو ساميه العروس فيستقبله سامى فى حفاوة بالغة وود
شادى :أقدم لك سامى صديقى وجارى ..مراد أللى كلمتك عليه
سامى وهو يضغط على يد مراد : شادى كلمنى عنك كتير وشرح لى وجه نظرك فى رغبتك بالأرتباط بساميه أختى.. أنا ماعنديش مانع بس هى توافق عليك ..لأنها ليها وجهة نظر فى الشخص أللى عايزه ترتبط بيه
> ياعم سيب أيدى هو أنا حهرب.. أكيد عايزه واحد شعنون ومخه ضارب
> صح ..عرفت أزاى ..ده سر ما فيش حد يعرفه.. ما شاء الله عليك
> يا أستاذ سامى أعتبر من النهارده أنى حرفع معاناتكم وأكون الأمير المنقذ لعائلتكم فأنا العريس المناسب أللى بتحلم بيه الأنسة ساميه بجد أنا مبروك عليكم
ينظر سامى وشادى لمراد وهم مندهشين ولا يصدقون مايسمعون
سامى : بتتكلم جد ..هو أنت تعرفها قبل كده
مراد : الشعانين أمثالنا مش من السهل حد يقدر يتعرف عليهم أو يقيموا أى علاقة مع أى أنسان ألا فى ظل الجواز الطاهر الشريف
سامى : صح ..أنا حاسس أنى أللى قدامى ساميه وهو ده كلامها.. لا مؤاخذه يا أستاذ مراد من التشبيه
> ياريت تحددوا لينا ميعاد نتقابل ونتفاهم فيه وياريت مايكونش حد من الأسرة موجود أثناء اللقاء ..يوم الأحد كويس
> طب ليه مايبقاش من بكره
> أنا مقدر مشاعرك ولهفتك علشان تخلص منها ..لكن أنا عايز أستعد لهذا اللقاء والأنسه ساميه برضه
> صح عليا النعمه صح هى بتقول كده برضه دا أحنا نفسنا ومٌنى عينا أن ساميه توافق على عريس واحد بس ونخلص.. عشان أشوف حالى أنا كمان بقى
> أطمأن يا أستاذ سامى حتتجوز وحتدعيلى ..نقدر نقول مبروك ..بلغ الأسرة بحضورى يوم الأحد الساعة ثمانيه وخمسه ومش عايز أشوف حد من أهلك لحد ما نقعد ونتفق انا وهى وأناديكم لتباركوا ..ماشى يا أبو السيم > ماشى يامراد بيه
يغادر مراد بيت شادى ويجلس سامى وشادى سويا
سامى : أنت ضامن صاحبك ده أنه حييجى فى ميعاده ..أنا مش مصدق
> لأ صدق.. صاحبى وأنا عارفه كلمته زى السيف
> مش باين عليه ضارب شويه
> من الناحية دى أطمن ده ضارب على الأخر..مش اختك عايزه واحد ضارب أهى حلة ولقت غطاها
لقاء الشعانين
الحلقة رقم (3)
أم مراد : قوم ياحبيبى غيًّر هدومك علشان تروح تقابل العروسه
> أنا جاهز ياماما من بدرى ولابس
> يانادمتى أنت حتروح تقابل العروسه بالترننج والكوتشى ..أنت أتخبلت ياواد
>ولا أتخبلت ولا حاجه عادى ..العروسه حيعجبها المنظر ده مش بقولك ياماما شعنونه ومخها ضارب > أنت حر منظرك كده ناوى على نصيبه مش كتير لو طردتك بره > اسكتى ياماما عروسه تخبل يارب تكون من بختى ونصيبى أدعيلى يا أمى > روح يامراد يا أبن بطنى يرزقك بالمخابيل والشعانين والعبط والمجانين
ويشفى الكلاب ويضرك > ياه أحلى دعوه سمعتها فى حياتى ..أنا قايم بقى أحسن أتأخرت على الميعاد ناولينى ياماما الورد من الثلاجه
ينطلق مراد بهمه ونشاط وهو يحمل باقة الورد ويصل لبيت ساميه فى الميعاد تماما ويرن جرس الباب فتفتح ساميه ويقف كل منهم مشدوها أمام الأخر..فساميه لم تكن تتوقع أن يكون العريس ذلك الشخص الذى تدخل يوم البومب ومراد يتعجب من نوعية الملابس التى ترتديها والورده التى تضعها فى شعرها الكنيش وكمية المساحيق التى تلطخ به وجهها الجميل
ساميه : أنت > أيوه أنا طبعا صدفه غريبه..يدفع لها باقة الورد وهو ينحنى أمامها ويقول : مراد عثمان ..ليسانس أداب قسم فلسفة وعلم نفس والمشرف الأجتماعى بمدرسه الكمال الثانويه بنات
تضحك ساميه ببلاهة وهى تأخذ منه الورد : هات تتك الهم.. عليا النعمة بتفكرنى بعبد السلام النابلسى فى دور سنكوح السناكحلى.. وكمان جايب ورد أهو ينفع مايضرش ..أدخل ياكابتن.. ولا أقولك أستنى أقلع الكوتشى بتاعك ده بره > ليه يا أنسه أنا داخل جامع ..( تشخط فيه وهى تقول : أقلع بقولك وسيبه هنا > سورى ما أقدرش أسيبه هنا ليتسرق
> خليه معاك فى يومك أللى مش معدى ده ..قدامى على أوضة الصالون
> لاديز فريست لو سمحتى
> كويس طلعت بتفهم فى الذوق يا أستاذ جراد > مراد ياهانم أحفظى الأسم كويس مش عايزين غلط من دلوقتى
> أقعد فى الكرسى أللى جانبى ده وشيل الزفت الكوتشى من تحت باطك أحسن ريحته بتعصبنى.. وأسمعنى كويس وترد عليا بصراحة وبدون لف أو دوران ولو حسيت أنك بتكدب بالفازه دى فى دماغك..
تعرف تغطس
> لو سمحتى يا آنسه ساميه أهدى شويه علشان نعرف نتفاهم فى عرضك نستينى الكلام أللى كنت عايز أقوله الله يخرب عقلك
> أنطق عايز تقول أيه خلصنى ياغراب
> مراد ياحَجّة ..بالعربى أنا معجب بك وعايز أتجوزك > ماهو أنا عارفه.. غيره >وحبك مكلبش فى قلبى من ساعة مافرقع البومب على راسك وحرق كوم القش أللى عامله ده
تتحسس شعرها فى أسى > ماتفكرنيش غيره > ونفسى أسمع موافقتك على طلبى .وبسرعة لأنى مستعجل عندى تمرين
> بقولك أيه بلاش شغل الموتوسيكلات ده..( فوم ..فوم ) أدينى فرصة أفكر ماتسربعنيش وتجاوب الأول على أسئلتى
> من غير بطح وضرب وتشليت ردى على سؤالى الأول موافقه أنى أكون زوج لك > يادى النهار أللى مش حيعدى بقولك جاوب على أسئلتى الأول وألا حضرب أيدى فى زورك أخرج زمارة رقبتك وأخليك عايش من غير زماره
يرد عليها فى هدوء > موافقه ولا مش موافقه < تانى...مممممممم( تقف وهى شاهرة أظافرها فى وجهه ) > خلاص خلاص أتفضلى أسئلى
> عندك شقة > أيوه > عندك عربيه > لأ ومش حجيب عربيه ألا بعد 50 سنه >أحسن ..معاك مهر وشبكه > يعنى
> جاوب عدل ياسناكحلى.. يا أبيض يا أسود معاك قد أيه
> أقدر أجيب شبكه فى حدود ألف أو ألف ونص ومستعد أشترى أوضتين وكرسى هزاز وأهلك يجيبوا الباقى > كويس أقدر أعرف شقتك فين > فى العماره بتاعتنا فوق شقة ماما > عارف أنى شعنونه وعندى ربع ضارب > عارف وأذا كان عندك ربع ضارب فأنا عندى التلات تربع > واضح (تسكت قليلا وهى تبتسم فيتشجع ويسألها) > موافقه ولا مش موافقه ياربة الصون والعفاف؟؟ تنظر على أستحياء فى الأرض فيقول : نقول مبروك >أستنى بس أنا عندى شرط أخير>أنا موافق أشرطى ..كتب الكتاب حيكون فى حمام السباحة > مكان مناسب جدا فى الشتاء موافق > بتعرف تغطس > لأ وما بعرفش أعوم كمان > مفيش مشكله حتلبس بدلة الغطس وحينزل معاك المدرب
> أنا مش فاهم حاجة تكونيش ناويه تغرقينى قبل ما نتجوز > أفهم يابنى آدم كتب الكتاب حيكون فى قاع الحمام أنت مش عارف أنى بطلة غطس
مراد وهو متردد: بس بس لو لو
> حتنونو من دلوقتى مش عاجبك قول..هيه موافق ولا مش موافق
الحلقة رقم (4)
> موافق ..موافق ( تقوم من مكانها وتسلم عليه ثم تطلق زغروطه طويله فتفتح أبواب الغرف وتخرج منها عائلة ساميه وأهلها ومعهم شادى صديق مراد ثم يندفعوا جميعا لعناق العروسين وهم يباركون لهم بحرارة بعد أن أنفكت عقدتيهما
ينفرد والد ساميه بمراد وهو يرحب به ودموع الفرح فى عينيه : أنا مش عارف أعبر عن سعادتى وفرحتى أخيرا ربنا أستجاب لدعائى وأتفك النحس على أديك يامراد يابنى ..وربنا يمد فى عمرى وأشوف ولاد ولادكم > ياه أنت حتطول قوى ياعمى> عايز أسألك سؤال محرج شويه ..بس ماتفهمنيش غلط > أسأل ياعمى
> ربنا يكملك بعقلك ..فيه حد من عيلتكم مخه ضارب غيرك
> أيه عندك عروسه تانيه < لا مش قصدى بس أحب أطمن
> بصراحة بصراحة ده لو عايز الصراحة مفيش غيرى أنا وبابى الله يرحمه
> بس < وعمتو سوكه وأونكل سيكو > بس > دول أللى عايشين غير أللى فى السرايا.. بس كلهم مراكزهم محترمه قوى حاجة تشرف
> هايل طلعت أبن أصل
مراد : طب مين فى عيلتكم ياعمى طالع زى ساميه
>هوهو..هو ..كتير قوى .. حتتعرف عليهم أن شاء الله فى الفرح
> على كده ياعمى بتعرف تغطس > طبعا أومال أنا أتجوزت أم ساميه أزاى
> أهلا ...ههههههههههههه خخخخ

البتنجان أستوى
تتم الخطوبه على نطاق ضيق بين الأهل والأصدقاء ويستأذن العروسان للخروج للسهر بأحدى الكازينوهات ..ولأول مره يتأبط مراد زراع ساميه ويمشى بها فى شارعها ويمر من أمام المعلم بنجرصاحب محل الخضر الموجود على ناصية الشارع فيغرق من الضحك على منظرهما سويا فتنظر له ساميه وهى فى قمة غضبها وتضرب بقدمها بطريقة خفيه أقفاص الفاكهة المتراصة فتنقلب على الأرض فيزداد ضحك بنجر وهو يقول : البتنجان أستوى ياجدعان
مراد : يقصد مين بالتنجان الراجل ده ياساميه
ساميه : يقصدنا أحنا طبعا يامراد ..> طب تعالى أفرجك عليه
مراد: مساء الخير يامعلم عندك تفاح أمريكانى > أيوه < بكام الكيلو > بـ 18 جنيه الكيلو > كام كيلو دول يامعلم > يطلعو بتاع 20 كيلو > أقلبيهم ياساميه
ساميه تقوم بقلبهم فى الأرض >أيه ياجدعان بتقلبوا الحاجة فى الأرض > وأنت مالك أنت عليك تاخد فلوس وبس نقلبهم نعدلهم أنشالله نولع فيهم حاجتنا وأحنا أحرار فيها..الله أنا شايف عندك منجه أقلبى ياساميه > وجب يامعلم
> أيه ده تين وبرقوق أقلبى يابنتى خلى الناس تاكل
> أوزن يامعلم كل أللى واقع فى الأرض وقولى عايز كام وحوطه فى أكياس ويكون جاهز على ما أرجع من مشوار صغير ..بسرعة يامعلم بتنجان
يقف المعلم بنجر وهو مذهول ماذا يفعل معهم بعد أن قلبوا له المحل ويتركانه ويسيران لحال سبيلهما وهو يضرب كفا بكف
ساميه وهى تتعلق بذراع مراد وهى تطير من الفرح : عجبتنى قوى خليه يتربى
> أنت لسه شوفتى حاجه عالم حَوّشْ حخليهم يشوفوا الجنان على أصله
الحلقة رقم (5)
بربش والأكسلنس
يمران بمجموعة من الشباب المتلطعين على النواصى وبعد أن يعبران من أمامهم يسمع من ينادى ( ساميه هوبااا) فيرتفع الضحك بينهم
مراد : مين ساميه هوبا.. دى يكونوش يقصدوكى أنت يا حبيبتى
ساميه وهى تهز رأسها بالموافقه : أيوه يقصدونى أنا > تحبى أرجع ليهم أأدبهم
> بلاش أنت مش قدهم عددهم كبير وحيمرمطوا بك الأرض
> مين الزعيم بتاعهم > الواد أكسلانس الطويل النطع أبو تيشرت أورنج
> يعنى مالقتيش أللى ده مفيش نائب عنه يكون أقصر شويه
> عندك الواد بربش أضعف واحد فيهم خش عليه > ماشى أقفى هنا على ماجيلك
يدخل مراد على شلة الشباب وينظر إلى عضلاتهم وأجسامهم فيتراجع ..فينادون عليه : عايز حاجه يا أخ > أيوه كنت ببص على بربش موجود معاكم ولا لأ
يخرج له شاب صخم الجثة : أنا عكوه أخو بربش عايزه فى أيه هو مش موجود دلوقتى > لا ياراجل أنت متأكد أنك أخو بربش > أيوه أنا أخو بربش > بس بربش ما قليش أن ليه أخوات بالشكل ده الله يخرب بيتك يابربش كنت حتودينا فى داهيه
عكوه ينظر له بتحدى :تقرب أيه لساميه هوبا ياض > أنا مراد خطيبها
> طب أمشى فى حالك أحسنلك قولت لى كنت عايز بربش فى أيه
> أبدأ كنت عايز أسلم عليه < أنت ماتعرفش أنه محجوز فى القسم لأنه قطع واحد رزل بالمطوه أمبارح > بعدين يا أخ عكوه لما يطلع بربش بالسلامه أبقى سلم لى عليه كتير ..يعود مراد لساميه ويتأبط ذراعها > يلا بينا مالقتش بربش
تضحك ساميه : مالقتش بربش أضرب عكوه أو الأكسلنس ..دى عيال خرعة مايغركش مناظرهم أنا معلماهم الأدب
> بلاش المره دى أنا ماليش مزاج > فرصة توريهم فتونتك وتعرفهم أنت مين
> أنا مخى طاقق صحيح بس مش للدرجه دى أن أحط نفسى تحت أدين عشر غيلان> طب أستنى لما أفرجك حعمل فيهم أيه ..تترك يده وتعود للشباب
ساميه : مين فيكم ياجعر أنت وهو أللى بيعاكس ..أنت ياض > لا مش أنا
منظرك أنت ياض تقوم بسحبه من القميص وضربه فى وجه بالبوكس فيخلصوا الشاب من يديها ويحضر مراد ويأخذها بعيدا عنهم وهو يقول : كل يوم من ده يا كلاب ياله ياساميه عالم ماتجيش ألا بالعين الحمرا

قران تحت الماء
يقوم مراد بتجهيز شقة الزوجيه وتستعد ساميه لحفل الزفاف التاريخى وتتفق مع المأذون على كتابة عقد القران فى قاع حمام السباحة فلم يوافقها على فكرتها أحد من المشايخ حتى أقنعت أحدهم بالفكره فوافق بعد جهد ورشح لها أحد صبيانه للنزول معهما لقاع الحمام على أن يجلس فى الخارج ويقرأ المراسم بميكرفون موصل لهما فىالقاع
وتبدأ مراسم الزواج ويدخل العريس والعروس حمام السباحة مع تهليل وتصفيق المعازيم ثم يتوجها لغرفة خلع الملابس ويرتديان ملابس الغطس وكذلك صبى المأذون والشهود ومصور الفيديو.. ويقف مراد وهو يرتعش من البرد: كان لازم ياسوسو الحكايه دى ماتيجى نتصور كده وخلاص
ساميه : ماتعفرتنيش وألا حغطسك ومش حخليك تقب تانى
مراد : متأكده أن الحبل ده كويس أللى مربوط حولين وسطى > كويس ماتخفش
يقفز العروس والعريس والشهود وصبى المأذون ومصور الفيديو معهم لتسجيل هذه اللحظات التاريخيه
ويبدأ المأذون فى قراءة بعض الأيات وبعض المواعظ وصورة العروسة والعريس منقوله على شاشه ضخمه وهم يسبحون فى قاع الحمام ليشاهدهم المعازيم
المأذون : يا آنسه ساميه هل تقبلين المدعو مراد عثمان بعلاًََ لكى
ساميه من تحت الماء : قبلت ياعم الشيخ ..المأذون : ياسيد مراد هل تقبل نكاح الأنسه ساميه شعبان ( لا يرد.. فيعيد المأذون مرة أخرى ..ياسيد مراد هل تسمعنى لو سامعنى شاور بأيدك وأحنا حنشوفك على الشاشه ..ياسيد مراد رد وخلصنا) يتوجه حامل الكاميرا ناحيته وينبهه ليرد على المأذون وينادى على المنقذين : شدوا الحبل مراد حيغرق ..يصعد لسطح الماء ويسحبوه ويجرى عليه مدرب الغطس وفريق الأنقاذ ..>الله يخرب بيتك مافتحتش ليه مفتاح الهواء ..يخلع عنه الماسك ليشم الهواء ويصرخ وهو يقول :قبلت والله العظيم موافق طلعونى بره
تسبح ساميه فى أتجاه مراد وتسحبه لأسفل تحت الماء بضعة ثوانى وهو يصرخ ويصعدان للسطح وهم يتعانقان وتنطلق الزغاريط ويخرجان من الحمام وساميه تحمل مراد وتضعه على أرضية الحمام لعمل الأسعافات الأوليه لأخراج ما شربه من ماء
وتعزف الموسيقى وهما يلفان الحمام وترتدى ساميه الطرحه على بدلة الغطس وهو يرتدى البابيون ويمسك فى ذراعها وهو يستند عليها ويرسلان القبلات للأهل والأصدقاء ثم يغيران ملابسهما وتنطلق بهم سيارة شادى إلى بيت الزوجيه وورائهما عربات المعازيم بيب بيب بيب حتى يصلا إلى باب الشقة فيقوما بشكرهم والدخول إلى شقتهما
الحلقة رقم (6)
ولكن المعازيم ظلوا واقفين تحت البيت وهم يرقصون ويطبلون ويطلقون الشماريخ
ساميه : عاجبك الفضيحة دى ..الناس دى بيئه ومش عايزه تمشى ليه مش الفرح خلص >أدخلى أملئ حلتين ميه وتعالى ورايا
يفتحان الشباك ويقوما بسكب الماء على الرؤس
مراد : ياله ياجدع أنت وهى من هنا مش عارفين ننام تتكم القرف..هاتى ميه تانى ياساميه
ساميه : أيوه جاى ( ولم تمضى دقائق وتفرق الجمع وعاد الهدوء للشارع مرة أخرى )
وتضاء الشموع ويرقص العروسان تنجو على موسيقى هادئه تسرح فيها ساميه فى عالم الأحلام
مراد : ساميه سوسو فوئ يابنت اللذين حتوقعينى على الأرض
ساميه وهى شبه نائمه : ياسلام عليك يامراد صحتنى من أحلاها حلم فى حياتى
> ما أعرفش أنك رومانسيه قوى للدرجه دى
> هسسس أخرس خالص وكمل رقص ..> طب نستريح شويه وبعدين نكمل
> ياسلام عليك يامراد دايما كده مزعج عشان خاطرى كمان لفه وحياتى عندك
> حاضر ياستى أدينى عمال ألف زى التور اللى رابطينه فى ساقيه
يسمع دقات خفيفه على الباب .. > أشوف مين ياساميه وأرجعلك تانى خليكى زى ما أنتى ( يذهب ليفتح الباب )
ساميه من الداخل وهى تكمل الرقص منفرده: مين الغبى أللى جاى دلوقتى
> دى ماما جايبلنا العشا ياسوسو
( تهمس أم مراد فى أذنه ): أيه الأخبار يارب تكون بيضت وشنا
مراد وهو يهمس : بقالنا ساعه بنرقص تنجو ياماما أدعيلى ربنا يسهل وننقل على المرحلة التانيه
أم مراد وهى تمصمص شفتيها : بقالك ساعة بترقص ..روح تتك وكسه
ساميه من الداخل : ياله يامراد مش وقت رغى مع الماما تعال كمل
أم مراد : أجرى يافالح كمل رقص ومتنساش تتحزم ياروح مامتك
يعود مراد لأكمال الرقص : مش كفايه كده رقص.. البرنامج مفهوش حاجة تانيه غير الرقص
> البرنامج فيه لسه فقرات كتير ومفاجآت أنت مستعجل ليه على رزقك
> ممكن يا آنسه أعرف الفقرات من فضلك
> شوف ياسيدى بعد الرقص فيه عشا وبعد العشا فيه شاى وجاتوه وبعد الشاى فيه رقص تانىعلى أغنية ماكارينا وبعد كده دور كوتشينه وأللى يكسب يشيل التانى ويلف به الشقة سبع مرات وبعد كده يكون جه ميعاد المسلسل العربى أللى متابعاه يخلص المسلسل فيه فقرة مفتوحه نقوم نغسل فيها المواعين ثم حمام ساخن ودردشه قبل النوم
> بقول أيه أعفينى من فقرات الرقص والكوتشينه والتليفزيون وتعالى نتعشى وننام> مراد ماتبوظش الترتيب بتاعى دى ليلة العمر
> عشان خاطرى المره دى ياسوسو لو بتعزينى صحيح أسمعى كلامى وتعال نتعشى وننام > أوكيه آخد الشاور بتاعى وححضرلك العشا ياحبيبى
> ربنا يهديكى لما بتبقى هاديه وبتسمعى الكلام تبقى الدنيا مش ساعيانى
> أياك تكون فاكر أنى شعنونه ومخى طاقق
> دا أنتِ ياحبيبتى ست العاقلين
الحلقة رقم ( 7)
عقاب الملايكة
تعود ساميه بعد أخذ الحمام وأرتدائها طاقم شيفون أحمر مزين بالريش وتتبختر به وهى سعيده وتسير أمامه كأنها فى عرض أزياء.. لالاه لالاه لالاه
> أيه رأيك فى الطاقم ده يامراد
> هايل ياسوسو جبتيه من الوكاله تعال كده فرجينى ( يمرر يده على الشيفون فيشعر بلسعة كهربائيه ) آى أى ..أتكهربت مش كنت تقولى أن الطقم ده للفرجه مش لللمس وحياتى عندك ماتناميش بيه أحسن السرير يولع بينا
> لا..لا ياحبيبى فيه حاجة تانيه للنوم أجمل من ده ..دقيقة واحده وأرجعلك
( تدخل غرفة النوم لتغيير ملابسها ويرن الموبايل فيقوم مراد بالرد فيجد أمه على الخط فيخرج فى البلكونه حتى لا تسمع ساميه المكالمه )
>أيه ياواد أيه الأخبار..خلصت رقص
> الحمد لله ياماما < أومال بتعمل أيه ياواد دلوقتى > ياسلام عليكى ياماما ساميه بتعمل عرض أزياء دلوقتى وبتفرجنى على قمصان النوم والبيجامات
> وقته بنت المجنونه ماتخلص يامدهول عايزه أنام وأنا مطمنه عليك بالعربى كده أنا قلبى واكلنى لأحسن البت دى تعمل فيك حاجه
> نامى يا أمى مش باين لها نهايه النهارده ربنا يصبرنى
> وريها ياواد العين الحمرا وأدبح لها القطه
> بس مفيش قطط فى الدور بتاعنا عندك قطط قدام باب الشقه
> أتنيل وتتك ستين نيله أقفل ياواد ياخايب
تدخل ساميه ومراد وهو يتحدث فى الموبايل وهى ترتدى بيجامه مخططه مثل بيجامات الرجاله < بتكلم مين يامراد على الموبايل فى الوقت ده
> دى ماما بتسأل عليا وبتمسى عليكى قبل ما تنام
> هات الموبايل ده ( تطلب أم مراد ) أيوه ياتنت أنا ساميه متشكره على العشا مادخلتيش ليه تتعشى معانا
أم مراد : مايصحش يابنتى دا أنت عروسه والنهارده دخلتك
> أما أنت عارفه أنى عروسه والنهارده.. دخلتى أيه القلق أللى أنت عملاه ده
عارفه لو أتصلتى تانى حبعتلك المحروس أبنك ينام عندك
تغلق السكة وتناول مراد التليفون بكل بساطه وهى تقول : أيه رأيك فى البيجامه دى ( مراد وهو سرحان بعد المكالمه ) : بيجامه آه... دى بتاعة الوالد ولا بتاعة سامى ..بيجامه رجالى ياسوسو من قلة البيجامات الحريمى لعلمك أنا عندى واحده أختها يعنى لو لبستها حنتلغبط فى بعض هههههه
> مش عجباك البيجامه < مش قاصدى المفروض العروسه تلبس حاجة كده تفتح النفس > تفتح النفس على أيه < أهى تفتح النفس وخلاص > مكسوف تقول ياشقى ..قدامى على أوضة النوم نكمل كلام فى السرير( يفرك مراد كفيه وهو سعيد للوصول لهذه المرحله ويفاجأ بها وهى تقول : أيدى بأيدك ننزل مرتبه على الأرض علشان تنام عليها علشان مامتك تفرح ماهى عماله بتتلكك من الصبح
مراد: لا دا كتير كده ياسوسو أللى بتعمليه ده مايصحش عريس محترم زى حالاتى ينام على الأرض من أول يوم ..أنا لا أقبل هذه الأهانه لرجولتى
> حتشيل ولا تطلع تنام على الكنبه بره ..مش كفايه أنك حتنام معايا فى أوضه واحده > ماشى ياسوسو مش حنسى لك الحركة دى ( ويقول فى سره أن ماطلعت على جتتك البلا الأزرق يابنت شعبولا ياساميه هوبااا )
تنام ساميه على السرير وينام مراد على الأرض وبعد أن ذهبت فى النوم وسمع شخيرها يتقلب تحت السرير ويرفع المله بالمرتبه وساميه بقدميه وتحس بأنها تصعد وتهبط بالسرير فتصرخ بأعلى صوتها فيعود مراد فى مكانه ويتظاهر بالنوم وتتكرر هذه العمليه مرتين وفى المرة الثالثة تقفز بجانبه على المرتبه وتختبئ به وهو يتظاهر بالنوم
> أيه فى حاجه ياساميه أنت رجعتى فى كلامك ولا أيه
> خبينى جواك أنا خايفه قوى مش عارفه السرير بيتحرك بيا
> ده الملايكه بيعاقبوكى لأنك سايبه جوزك لوحده ..لازم تصالحينى علشان تعرفى تنامى > أصالحك أزاى
> أزاى دى تبقى بتاعتى أنا ..... أمممه أممممه.> لسه زعلان هههههههه
> دا أنا زعلان قوى.. زعلان جامد..بس خلاص تمام كده.. تصبحى على خير
الحلقة رقم (8)
ساميه وهى تلعب فى شعر مراد : شهر العسل خلص يامراد مر كأنه يومين
>علشان كان كله حب وسعاده.. وأنا شايف أنك هديتى كتير بعد الجواز
> وأنت كمان < الحمد لله أحنا أتغيرنا كتير بعد ما أتجوزنا شوف أنت بقيت منظم وبتتكلم بصوت واطى وهادى أزاى وأللى يشوفك مايعرفكش
> وأنتى ماشاء الله عليكى ربطى راسك أللى كانت عامله زى الزعافه ولبستى لبس محترم وبطلتى تضربى وتشتمى فى حد
> عارف يامراد كل الناس أللى بتشوفتى فى الشغل بعد ما أتجوزت بيقولوا أنى أتغيرت كتير وخلاص ماعدتش أسمع الساخافات بتاعتهم زى ساميه أوبا
> عارفه ياسامية أنا لما أتجوزتك كنت عارف أنك مطرقعه على الأخر بس كان قلبى دليلى بأنك حتكونى أحسن زوجه
> وأنا كمان كنت حاسه أنك مخك لاسع بس لما كنت ببص فى عنيك كنت بشوف جواهم طفل صغير شقى كله برائه وأنك حتكون اظرف وأحن أنسان فى الدنيا
> هل الجواز ممكن يغير كده فى شخصية البنى آدم
> ممكن يغير للأحسن زى حالتنا وممكن يغير للأسوء فى حالات كتير لو كان الأثنين مختلفى الطباع يعنى لو واحده شعنونه أتجوزت واحد عاقل وراسى ممكن تجننه وتوصله للسرايا الصفرا
> وبرضه لو راجل مخه ضارب ممكن يضيع الست أللى معاه
> نحمد ربنا على النعمة دى فليحيا زواج المجانين
ههههههههه
تمت
وإلى لقاء جديد