فينيش وولده خشبه للسعادة الأبديه (مسلسل كوميدى )

عبده فينش وولده خشبه
فينش للسعاده الأبديه
عبده فينش : أنت ياواد من ساعة ماجيت المحل وأنت ناحسه ..وشك فقرى زى أللى خلِفّتك
خشبه : يابه دى أرزاق وربك يبعت
> لأ ..بقى دى أقدام
> ما هو لو أنت يابه تسمع كلامى وتسيبنى أعملك دعايه حلوة للمحل ونعمل شوية ديكورات ..الزباين حتهل والعملية تبشبش وأحنا كمان داخلين على شهر رمضان والشغل بيكتر فيه قوى ..أأقولك ياحاج تعال نعملوا أوكازيون ونقدم هدايا على كل عمليه
> هدايا زى أيه يافالح
> فانوس رمضان ..لفة قمر الدين ..كيلو مكسرات..مجموعة سديهات كيف تتخلص من حياتك.. حاجة زى كده
>ياواد أنت أتخبلت فى دماغك فيه حد يبقى عنده نفس ياخد فانوس أو ياميش أو قمر الدين.. وحياخدوا من مين.. من حانوتى يا أبن الفقريه
> أنا بقولك أفكارى.. وبعدين أيه اليافطه أللى أنت معلقها دى فوق الدكان
( حانوتى العائلات ) يعنى مفيش حد بيموت ألا من العائلات ..حتى أى زبون ييجى يشوفها يفتكر أن أحنا أسعارنا غاليه قوى ..أنا من رأىِ نختار أسم مودرن يمشى مع الناس كلها.. نسميه حانوتى الليل الطويل أو الشمس الذهبيه ولا أقولك نسميه حانوتى السعاده الأبديه
> حلوة السعاده الأبديه طلعت فيها واد فقيق.. موافق عليها
> ونلغى كمان كلمة حانوتى دى ونخليها فينش للسعاده الأبديه بس عايزينها يافطه أيه تلعلط وتولع وتطفى توماتيكى ..ونغير فى مدخل المحل نشيل الخشب والعده فى المخزن مانخلهاش ظاهرة قدام الناس والعربية بتاعة نقل الموتى السوداء مانخلهاش تقف قدام المحل عايزين نحسن سمعتنا يابه وياريت نرشها دوكو أخضر.. أصفر.. فوشيا وبلاش لونها المقبض ده الناس لما بتشوفنى أو بتشوفك بتبعد وشها بعيد عننا
> عادى عمركش شوفت ياواد ياخشبه أن حد أخد حانوتى بالحضن
> نفسى يابه تسيبنى أنفذ أللى فى دماغى وأتفرج بقى على الزباين حتهل علينا أزاى العايشين قبل الميتين ..عايز أعمل ورق دعاية مكتوب فيه الأسعار والتخفيضات والخدمات ونمر تليفونات المحل والموبايل بتاعى وبتاعك يبقى فى كل بيت وفى جيب كل الناس ..قاعد لى بس على باب المحل وفاتح أغنية الموت علينا حق وأيها الراقدون تحت الثرى وكل شويه تجعر وتقول : وحدوووه ..ياعم الحاجات دى راحت من أيام القصرى وزينات صدقى أحنا دلوقتى فى زمن هيفاء ونانسى
> مين ياواد هيفاء ونانسى دول
> ياعم فينش دى جتت بيضا زى القشطه بتنور فى الضلمه وارد لبنان مافيش زيها فى مصر وما دفناش زيها قبل كده
> وأيه يعنى كله عارف طريقه.. مصيرهم يشرفوا حيروحوا فين يعنى
.. سيبك ياواد ياخشبه أنا فى دماغى برضه أن أروق المحل قبل رمضان بس أنا حاطط عينى على حتتين هنا فى الشارع أنما ولاد الأيه كل مانقول حنشيل ونخلص
يقوموا ولاد الأبالسه زى العفاريت وصحتهم تبقى أحسن من الأول
> قصدك يابه على عوض أفندى والوليه فطومه أم الواد سيد الخرمان
> طب ما أنت ناصح أهه وعندك نظر وبتعرف فى الحتت المستويه
> أنسى يابه ..عوض أفندى فرحه النهارده حيتجوز بنت من دور أحفاده
> حلو يبقى كده قررب يشرف والجواز حيكّمل عليه
> يابه فيه ناس صحتها بتيجى على الجواز ..أما الوليه فطومه أم سيد الخرمان لسه راجعه من أمريكا من أسبوع كانت عند بنتها بتزورها قعدت عندها 6 أشهر ماتعرفش الأمريكان عملوا فيها أيه ؟ تعال أتفرج عليها بعد ماكانوا بيسندوها وهى ماشيه دلوقتى بتقزح السلالم قزح ولا أجدعها بنت فى عز شبابها
> قوم ياض سديت نفسى بأخبارك أللى زى وشك مش بقولك أنت فقرى
> حيلك يا عم الفينش أنا بقى مجهزلك مفاجأة حتخلصك من النحس أللى ماسك فى المحل ده ..سمعت عن واحد أسمه شحيبر الفالق
> الله يخرب بيتك وبيته فى يوم واحد أيه أللى عرفك بيه ده عينه تفلق الحجر
> أهو ده أللى عايزينه ..نقعده هنا على الكرسى ده وتشاور له على أنت عايزه
وماعليه غير أنه يخبطه العين أللى هيه يجيبهولك الأرض وأشتغل ياعم فينش ولاحق بقى على الزباين
> فكره كويسه أتفقت معاه ياض
> أومال يابا أتفقت معاه بس حراق شويه عايز 100 جنيه على الحته أللى تقع
> ده راجل مستغل وجشع صحيح
> معلش يابه الغالى ثمنه فيه ..بس ده مش حنجيبه ألا لما نعمل الدعاية والديكورات للمحل ونرش العربيه ونلمع المسائل أيه رأيك يا أبو التفانيش
> ماشى نفذ بس ماتتوسعش قوى عشان الضرايب
> ولا يهمك ياوالدى طالما هنا أبيض ومعاك عزرائيل وشحيبرالفالق ولا يهمك من أيتها ضرايب أو نصايب ..أشطه ياعم
> أشطه يا فقرى ..وحدووووه
الحلقة رقم 2
الأعداد للأفتتاح
يقوم خشبه بأحضارالعمال والمبيضيين والمبلطين والنجارين للمحل ويبدأ فى عمل الديكورات اللازمه وقام بتعليق يافطه مغلق للتحسينات وترقبوا الأفتتاح
وتمر عشرة أيام والعمل على قدم وساق وينتهى من جميع الأعمال ويحضر المعلم فينش لمعاينة الشغل قبل الأفتتاح الكبير الذى أعده خشبه مع مجموعة من أصدقائه
> أيه رأيك يابه فى النظام ده ..مكتبك هناك فى الأخر وعليه الكتالوجات والعروض ووراك مكتبه مالكش دعوه بيها ..دى منظر بس عشان نعملك برستيج ويقولوا عليك حانوتى مثقف.. وعندك حمام أهه وسكرتاريه ومكان أستقبال وجهازين تكييف مخليين المكان جنه أيه رأيك بقى
> ياواد ده مبقاش محل حانوتى ده بقى سوبر ماركت ده الميت لو دخل هنا يصحى ..عموما عفارم عليك أول مرة تطلع بتفهم
> الأفتتاح حيكون بعد بكره وأنا عزمت ناس كتير قوى غير الفرقه والدى جى أللى حييجى نقوط من الواد على جعوره
> الواد ده عليه بقية فلوس الكفن بتاع أمه ولسه ماجبهاش
> خلاص يابا حييجى يعمل بيها شغل ليلة الأفتتاح
يدخل حموده المقص المطبعجى ومعه مطبوعات الدعايه
خشبه : هات الألبومات والعروض حطها هنا على مكتب الحاج وخد ورق الدعاية نزل بيه العيال توزعه بكره بعد صلاة الجمعة
حموده :أيدك على بقية الحساب ياخشبه
> أصبر عليا شويه وبعدين ياسيدى نخدمك بيهم فى خرجة حد من قرايبك
> الله يخرب بيتك أنا لسه حستنى حد يموت علشان آخد فلوسى
> أيش ضمنك يمكن تخرج من باب المحل تطب ساكت ونعمل خرجتك مجانا
فينيش يصرخ فى قفا حموده وهو يقول : وحدووه.. ( فينتفض الشاب ويخرج مسرعا وهو يشتم ويدعوا على فينيش وولده خشبه )
خشبه: خلاص يابه روحت قست البدله الجديده ..عايزك يوم الأفتتاح تبقى قاعد زى العريس ..بس ليه طلب والنبى يابه ياريتك تروح لبسيونى الحلاق يشوف حل فى حواجبك
> مالهم حواجبى ياواد..> يابه عايز يتشال منهم بتاع عشرة سنتى من فوق وعشرة سنتى من تحت وياريت يشيلهم خالص ويرسملك حواجب
> ههههه أنا برضه بقول كده حتى على الأقل الواحد يعرف يشوف الشغل كويس
الحلقة رقم (3 )
أعلان شركة فينيش للسعادة الأبدية
:شوفت يا أستاذ عوض الجدع الحانوتى وأبنه خشبه بيوزعوا ورق الدعايه على المصلين ما خدتش ورقه
عوض : أخدت يا مسعود يا خويا > قرأتها > معييش النظاره أقرئها لى ينوبك ثواب
مسعود يقرأ الأعلان :
يتشرف المعلم عبده فينيش وولده خشبه بدعوة أهالى المنطقة بقرب أفتتاح مقر شركة ( فينيش للسعادة الأبديه ) فى ثوبها الجديد وتعلن عن تخفيضات هائلة فى الخدمات ومستلزمات الوفاه
الأن تستطيع أن تنتقل إلى الرفيق الأعلى وأنت مرتاح البال معززا مكرما مع أضخم أحتفال يتحاكى به الأهل والأحفاد والأجيال القادمه
أنت مع فينيش فى أيد أمينه ويسعدها أن تقدم أشيك الأكفان الحريريه والقطنيه المصنوعة من أفضل الخامات التى تقاوم الدوده والتحلل.. المحلى منها والمستورد ولدينا أفضل الموضات والقصات التى تناسب أذواقكم
كما تزف إليكم بشرى بوجود جميع المستويات حسب الأمكانيات
كفن شعبى (صينى ) 50 جنيه .. أقتصادى 100 جنيه .. لوكس 200 جنيه وأخيرا سوبر لوكس 400 جنيه ومعه شهادة ضمان لمدة 5 سنوات
أسعار المدافن
مدفن جماعى 300 جنيه ..مدفن مشترك 400 جنيه مدفن مفروش 700 جنيه
مدفن أيجار جديد 800 جنيه
كما تعلن بأنها لديها ومطلوب مدافن تمليك نصف تشطيب وتشطيب سوبر سوبر لوكس مزروعة بالصبار وشجر الزيتون والبلح الأبريمى والجوافه.. وجهات بحريه وناصيه وسكيورتى
كما تعلن عن وجود جميع لوازم الفراشة اللازمه لأقامة السرادقات وأسعارها فى متناول الجميع
كما تزف لكم بشرى بأن شركة الفينش قد فتحت باب الحجز لعمل ليلة نهاية العمر
بالتقسيط وهذا لأول مره ( أدفع من الأن بدل ماتتهان )
وتتعهد الشركة بتقديم كافة الخدمات الملحقة من مقرأين ومشايخ ووعاظ على أعلى مستوى وسيارات نقل جماعيه مكيفة الهواء للمعزيين
كما يوجد لدينا فرقة موسيقيه تعزف أرقى الألحان الجنائزيه ومعها جوقة من المعدداتيه والنائحات بقيادة الست أم دجدج الندابه الشهيرة
نتمنى لكم جميعا نهاية سعيده وممتعة تليق بكم من شركة فينيش وولده خشبه
للسعادة الأبديه ..تليفونات / موبايل / خدمة 24 ساعة
وكل نفس ذائقة الموت.... وحدوووووووووه
عوض : كفاية يامسعود ياخويا ده راجل فقرى هو وأبنه أنا بطلت أمر من أمام دكانه ..مسعود: يعنى مش حتروح ليلة الأفتتاح بيقولوا فى الأعلان أن فيه مفاجآت وهدايا حيوزعوها وحيعمل سحب على تذاكر الحضور والفائز الأول حياخد مدفن تمليك والثانى مدفن أيجار جديد والثالث كفن سوبر لوكس ماتيجى نروح نتفرج يمكن نكسب ياعم عوض
> فال الله ولا فالك روح أنت ..أنت مش عارف أن فرحى النهارده ياراجل ياعجوز
> ألف مبروك يا عريس ومين العروسه ياعم عوض
> بنت غلبانه من عندنا فى العزبه
> بنت بنت ولا أتجوزت قبل كده وعندها سوابق زوجيه
> بنت بنوت يا مسعود على الزيرو فيها حاجة دى وعندها 25 سنه كمان
> ياعم عوض فيك صحة للكلام ده > أومال ..الدهن فى العتاقى أجرى أجرى روح ألحق حفلة فينيش يمكن تكسب مدفن ولا كفن سوبر لوكس هههههههه
الحلقة رقم (4)
الأفتتاح الكبير
تنصب خشبه للمسرح أمام المحل وترفع الزينات والأعلام ويحضر على جاعورة بأجهزة الدى جى وتنطلق أصوات السماعات الضخمه بالموسيقى الصاخبه وأغانى الأفراح وكل من يمر أمام المحل يعتقد أن الواد خشبه تزوج فمنهم من يدخل ليبارك ولكن يفاجأ الجميع بوجود شريط أسود على باب المحل وحامل للمقص على مخدة مبطنه بالستان الأسود ويجلس كبار المعازيم فى صفين أمام الباب ويقوم خشبه بنفسه بتوزيع الشربات والشوكلاته عليهم وعلى المارين فى الشارع وفى يده ميك متصل لاسلكيا بالسماعات وهو يرحب بالضيوف فيخفض جاعورة صوت الموسيقى وهو يشيد بالمعازيم فى كل لحظه
خشبه وهو يمسك بالمايك وهو يرحب بالدكتور كمال الفَيّاص : سلام على طول السلام بحبيبنا وأبن حتتنا الدكتور كمال الفيااااص صاحب مستشفى فييااااص الدولى وصحبته وسمعنى أغنية فيصنا يادكتور فيصنا ( ينطلق صوت على جاعوره وهو يغنى ..فيصنا ..فيصنا ..بوم )
خشبه : بااااس هصص.. وسلام وتحيه للشيخ زعبُله الأعرج وصحبته المهلباتيه أكبر مُلقن للأموات وأغنية الموووت علينا حق ..أرفع صوت السماعات ياجعورااااه
بااااسس هسس..وتحية وسلام كبير قوى للست أم دجدج الندابه وفرقتها..صوتى ياوليه سمعى صوتك للخلق أفتحى السوبرانو على الأخر.... وأغنية بلاش تسافر لشاديه
يحضر المعلم عبده الفينيش فى زفة موتوسيكلات تحيط بعربية دفن الموتى التى تحول لونها إلى اللون الفوشيا وهى مزينه بالورود ..ويصرخ خشبه بأعلى صوته ..باااسسس المعلم عبده الفينيش ..أللى بيفنش الناس على حق ..أكبر فينيش فى البلد أللى شال على أكتافه الكبير قبل الصغير .. وعمره مازعل من حد ميت أوحى..أبو قلب كبير ..الحنين ..ياحانيييااان سلام للمعلم.. ياجعوراااه.. وسمعنى حته أرابيسك وركز لى على مقطع.. أهلك ياتهلك والزمان يفرمك
..بمجرد نزول المعلم فينيش من عربية نقل الموتى وهو يرتدى البدله الزيتى الجديده والتعديلات التى تمت على حواجبه تنطلق زغاريد نساء فرقة أم دجدج الندابه باشاره من خشبه.. ويدخل المعلم فينيش على المعازيم وهو يبتسم لأول مره فتظهر أسنانه المصفرة.. وطاقم الأسنان الفضة وهو يقول مُرَحِباً
>عقبال ليلتك يادكتور ..ممنون ياعم الشيخ نخدمك فى حماتك .. متشكرين يازقلط
شد حيلك نص عيلتكم فى الحميات وماحدش شرف عندنا لحد دلوقتى !!
وتبدأ فقرات الحفل ويتجمع سكان المنطقة على صوت المَغنَىَ والزغاريط ويتسابقون للحصول على رقم ليجرى عليه السحب فى نهاية الحفل
يقف (خشبه) على المسرح ليعلن عن كلمة المعلم فينيش لسكان الحى التى كتبها له وحفظها المعلم عن ظهر قلب وتدق الموسيقى وتنطلق الشماريخ لتنير سماء الحارة وتفتح بواعث الدخان على الطريق الذى يسير فيه المعلم فينيش للوصول للمسرح بين المشاعل والسيوف وعلى مارش الزفاف الكبير ويقفز خشبه لأعلى لعدة مرات على طريقة المغنيين الشباب وهو منفعل من التشجيع وهو يقول : وساااع يا جداااع أبو التفانيش وصاااال..أدخل ياكبييير برجلك اليمين وقص شريط الأفتتاح ..ربنا يُرزُّاُاق ..ربنا يُرزُااُق(يسمع صويت من آخر الشارع)
ُرَزقت يابه.. ياحنييّااان..ُرَزقّتّ يابو ضحكة جنان ..رزقت ياصديق الضحايا والشهداء ..ياللى القرافه كلها تشهدلك يالعّييّب
يأخذ فينيش الميك من خشبه ليلقى كلمته وسط تصفيق الحضور وهو يرد عليهم التحيه ويرسل لهم القبلات فى الهواء مع صريخ وصوات فرقة أم دجدج الندابة
يا لهوتى ياخراشى.. يا لهوتى ياخراشى... يا لهوتى ياخراشى

الحلقة رقم (5)
كلمة المعلم فينيش
بسم الله الرحمن الرحيم
..وكل نفس ذائقة الموت ..وكل من عليها فان ..دنياااا
والبنى آدم مننا ياسادة ياكرام غير جته ولسان على الفاضى لو عرف نهايته يعمل لآخرته بدل من دنياه الفانيه ( يصيح المعلم فينيش وهو يشير ناحية الجماهير المحتشده لسماع خطابه ويقول : ردوا ورايا..الدنيا أيه ؟؟ فيرددون ورائه فانيه
والبنى أدم مننا عباره عن أيه ..نفس داخل (ويردون ورائه ) ونفس طالع ..ممكن يدخل ولا يطلعش وممكن يطلع ولا يدخلش ..صح قولوا صح ولا غلط ..صح يامعلم.. ويعتدل فى وقفته وينفعل : أومال لما هو صح مش عاملين حساب اليوم ده ليه وسايبين نفسيكم لأخر وقت ليه.. يدوخوا بكم أهاليكم وعيالكم مش عارفين يدفنوكم فين .. هو من قلة الأراضى والمدافن.. ليه مايكنش عندك مدفن خصوصى محترم تتلم فيه أنت وعيلتك يقدر ولادك من بعدك يزوروك ويترحموا عليك..هو ده الأستثمار الحقيقى أللى يحفظ لك كرامتك بين الأموات وزى مابتشقى وتجرى فى حياتك لتعيش مستور فى الدنيا لازمن ولابد أن تكون مستور فى الأخره
أحنا بقى فى شركة فينيش للسعادة الأبديه حلينا جميع مشاكلكم المحرجة وشعارنا هو مدفن محترم لكل مواطن حتقولى أحنا لاقيين سكن محترم فى الدنيا لما ندور على مدفن أقولك: ياميت يا أبن الميت حتعيش فى الدنيا قد أيه عشرة.. عشرين أو مية سنه وفى الأخر حيكون مصيرك للأرض حتى يوم القيامه يعنى أقامتك فى المدفن حتكون مئات وآلاف السنين حتى يرث الله الأرض ومن عليها ..يبقى أنهى أفضل سكن لعشرات السنين أو مدفن لآلاف السنين
مفيش بعد النهارده حد حيعانى من مشاكل فى الدفن والتجهيز بفضل مشروع فينيش أمن على مماتك.. بدلا ما تأمن على حياتك أللى فيه الورثه يقبضوا التأمين ويتمتعوا بأموالك ويرموك فى أى حته ..ثم يستطرد قائلا: زمان كان أجدادنا بيحوشوا ثمن كفنهم ومصاريف خرجتهم ناس كانت فاهمه الدنيا صح ..أحنا هنا بقى بنقولك تعال حوش عندنا وأضمن أنه يتعملك خارجة محترمه وليلة نهاية العمر تليق بيك فى مدفن شيك يرد الروح ويخليك سعيد فى مقرك الأخير ..مش بهدلة دنيا وآخرة (يميل المعلم فينيش على ولده خشبه) : أيه الكلمة دى ياواد < دى بنود وثيقة التأمين على الممات ياحاج > يعنى أيه وثيقة > وقته يابه قولها كده وأللى يفهم يفهم > حاضر ياوش الفقر) ودى وثيقة التأمين على الممات لمدة عشر سنين فيها كل المميزات
أدفع مائة جنيه كل شهر وأحجز مكانك فى مدينة فينيش للأموات المحترمين
مكتبنا مفتوح 24 ساعة ومندوبينا تطلبهم فى أى وقت حيوصلوا لحد البيت وأخيرا تذكر يا أخى ويا أختى أن هذا هو مشروع المستقبل الحقيقى وأن الدنيا دار فراق والأخره هى المعاش لاتجعل أللى راكب راكب ولا أللى ماشى ماشى
والسلام عليكم ورحمة الله وبركاته
وحدووووووووه..دنيااا
تصفيق حاد وموسيقى
خشبه :والأن نبدأ السحب على التذاكر..أتفضل يادكتور فييّص أسحب أول تذكرة لسعيد الحظ الذى سيحصل على أول مدفن تمليك بمدينة فينيش أقرأ الأسم لو سمحت يادكتور> الفائز الأول الأسطى سعيد رمضان الشهير بسعيد الفقرى أتفضل هنا على المسرح أستلم عقد التمليك من الحاج
تنطلق الموسيقى ومعها ولولات جوفة أم دجج الندابه : يا لهوتى ياخراشى ..
يا لهوتى ياخراشى.. يا لهوتى ياخراشى... يا لهوتى ياخراشى
بعد أن يستلم سعيد الفقرى عقد التمليك يميل على أذن الحاج فينيش : ممكن ياحاج آخد ثمنه أحسن علشان أكمل المهر.. يعنى أخد حقى ناشف
فينيش : لا ماينفعش يافقرى > طب ممكن أحوله سكن ومدفن فى نفس الوقت
> بعدين نبقى نشوف الحكاية دى فى الخطه الجديده
خشبه: الفائز الثانى يحصل على مدفن نصف تشطيب ويصلح لجميع الأغراض هو للست/ فرحانه الكئيبه
موسيقى وولوله الجوقة .. يا لهوتى ياخراشى.. يا لهوتى ياخراشى.. يا لهوتى ياخراشى
> الفائز الثالث وجائزته كفن سوبر لوكس وارد الخارج .. المعلم ..ويسكت
فينيش : المعلم مين ياض أنطق > ما أقدرش يابه أحسن نتقطع ( يهمس فى أذنه بأسم المعلم مصران الجزار )
فينيش : وقد حجبنا الجائزة الثالثه حتى تعدى الليله على خير وستسلم لصاحبها شخصيا..تصفيق حاد ..موسيقى ..ولوله يا لهوتى ياخراشى.. يا لهوتى ياخراشى
الحلقة رقم (6 )
شحيبر الفالق يستلم مهام منصبه

تمر ثلاثة أيام بعد ليلة الأفتتاح وعبده فيينيش وولده خشبه يجلسون أمام المحل
وهم ينشون بالمنشات فلم يتم وصول خبر أحد من أهل الحارة
فينيش: عزرائيل معاند معانا قوووى ياض
خشبه: يظهر كده يابه أيه النحس ده.. شهر دلوقتى مفيش مخلوق رن تليفون
> مش قولت لك أنت وشك فقرى ..مفيش غير أنك تتصل بشحيبر الفالق ييجى يشوف شغله مع العالم اللى متشعلقة فى الدنيا دى
> يابه ما أنا قولت لك نجيبه من يوم الأفتتاح وأنت مارضيتش
> يا أبو مخ تخين لو كان شحيبر ده ظهر فى الأفتتاح كان ممكن المحل يولع أو حد فينا جراله حاجه..وبعدين مشهور فى المنطقة وحيبقى دعاية سيئة للمحل وأحنا داخلين على شغل فى العيليوى..ماشى قوم كلمه ونبه عليه لما يوصل يدخل المحل بظهره > حاضر يابه..مش عايز حاجة تانى > قول له يجيب معاه أوراقه والبطاقه وأى شهادات وماينساش شهادة الخبرة > حاضر.. تقولش حيتعين فى الخارجيه ياخى ..ألو أزيك ياعم شحيبر > مين خشبه عاش من سمع صوتك أنا قولت أنك صرفت نظر عن الأتفاق> لا ياعم شحيبر المعلم طالب يشوفك جهز أوراقك حتعمل الأنترفيو دلوقتى > أنترفيو أيه وورق أيه ياض ياخشبه أنت حتشتغلنى أنت وابوك > ياعم ولا حنشتغلك ولا حاجة ده طلب المعلم ..كبرر ياعم شحيبر وهات أى ورق وتعال > حاضر ياخويا مسافة السكة.. آل ورق آل
يظهر شحيبر على أول الشارع فينبه المعلم فينيش خشبه
> قوم ياواد وزى ما فهمتك دخله المحل بضهره > حاضر يابه
يقوم خشبه يجرى ويسلم على شحيبر ويدير وجهه من ناحية المحل ويقف معه يتحدث ليلهيه ويتراجع به خطوه خطوه للخلف ليدخل به المحل فيتنبه شحيبر لهذه الحركة > أبوك ده حانوتى قرارى بتدخلنى بظهرى ماشى مفيش مشكله أهو برضه علشان نصون لقمة العيش
يجلس شحيبر أمام المعلم وهو يلقنه بأسلوب الشغل وهو يتفحص أوراقه ويبدأ شحيبر فى الرد عليه : شوف يامعلم زى أتفاقنا أنا حاجى فترتين فترة الصبح والناس خارجة وفترة بعد الضهر والناس راجعة وأى وقت غير كده آخد أوفر تايم
وبعدين علشان ماتخفش منى أتفضل ياسيدى > أيه حتت القماش دى > دى حته من جلابيتى ما قرى عليها تحطها فى جيبك أنت والواد خشبه مفيش حاجة حتجرالكم بعون الله مكانى فين يامعلم > مكانك هنا ورا الأزاز الفاميه بتاع الباترينه علشان ماحدش يشوفك وشوف شغلك ياأسطى
يجلس شحيبر خلف زجاج الباترينه وينتظر تعليمات فينيش وولده ويمر فى ذلك الوقت الأستاذ عوض وهو يمسك بذراع خدوجة عروسته الجديده فينادى فينيش
على شحيبر: شوف شغلك يا أسطى > أوكيه أشطه العروسه دى مكلبظه وحلوه
خشبه : الله يخرب بيتك عايزين الراجل مش البت
شحيبر : أبقوا حددوا ياجدعان أنا نشينت على البت خلاص
يسمع صوت صريخ وصويت عوض أفندى وهو يستغيث بالماره لنجدته فقد وقعت خدوجة فى البالوعة وأختفت ولم يقدر أحد على اللحاق بها
شحيبر: أيدكم على 100 جنيه > الله يخرب بيتك مش تستنى لما نعرف البنت حتطلع ولا لأ > شحيبر عينه ما تنزلش الأرض وحياتك يامعلم ما هى طالعه ألا فى شبرا ..> طب أستنى لما ناخد المقاوله من عوض أفندى
شحيبر : تحبوا أخد لكم عوض أفندى بالمره ونعمل تخفيض يبقى الجوز بـ150
فينيش: ماينفعش يا فالح حناخد فلوسنا من مين سيبه دلوقتى
شحيبر: لما تخلصوا على الحته دى أبقوا أبعتولى ..باى على موبيلات بقى يا كباتن > غور تتك القرف ضيعت البنت وهى لسه عروسه مابتعرفش تنشن
> لا بقى ده أنا نشانى بيصيب 100% مفيش غير كده كام نيشان جم غلط وأعتبرناهم نيران صديقه
> نيران صديقه أزاى يعنى > أقولك ياسيدى آخرهم البنت بنتى وأمها ولع بيهم البيت الشهر أللى فات ..كنت قاعد على القهوة أللى قدام بيتى بعد ما طلبت منى المدام أنى أطرأ وأقعد على القهوة لأن واحده صاحبتها عزيزه عليها قوى جايه تزورها وكنت سامع أن صاحبتها جميله وشايفه نفسها حبتين قولت أشوفها وأنظرها برضه مايخسرش وأستنيت لحد ماطلعت فى البلكونه ومعاها أم العيال والبنت بنتى و صاحبتها ..قمت منشن على صاحبتها وأنا بنشن الواد سيد القهوجى الله يوقف حاله .. أتكعبل ماعرفش أزاى وهو شايل صنية الطلبات فوقع عليا فدماغى أنحرفت وجسمى أختل ووقعت فى الوقت أللى كانت النظره خارجه فيه من عينى فقامت لابسه فى مراتى والبنت وتفلت صاحبتها بنت اللئيمه شوفت الحظ يقوم البيت يولع بأللى فيه وتنجو صاحبتها وتطلع زى الشعرة من العجينه ..حظ ..أهى دى النيران الصديقة يابهوات
> ياه ده أنت نصيبه قوم يا فقرى قبل ماتصيبنا بنيران صديقة خلينا نشوف شغلنا
> طول ما معاكم حتت القماش بتاعة جلابيتى ما تخافوش ده المعلم والمحل وخشبه فى عنيا الأتنين > أستر يارب
ههههههههه
الحلقة رقم ( 7 )
دليفرى
شحيبرالفالق يجلس أمام المعلم فينيش وهو يطالب بأتعابه فى خمس عمليات والأخير يماطل فيه ويرفض تسليمه باقى أتعابه
شحيبر : يامعلم كان أتفاقنا أن 100 جنيه على الجته أللى تقع
فينيش : أيوه يافالح أنت تاخد 100 جنيه على الجته أللى تقع وأنا أشيلها أنما الشغل الفشنك ده ماينفعش ..تخبطلى البنت خدوجه عين تقلبها فى المجارى أهو لحد دلوقتى ولا أخدنا أبيض ولا أسود والبنت ماطلعتش لحد دلوقتى
شحيبر: بلاش دى راحت لحالها ..طب الحاج عبد الحميد المفش
فينيش : أنا طلبت منك الحاج عبد الحميد يا ضلالى..أنا قولت لك مراته وفضلت أأكد عليك أكثر من مره ..أهو أتقلب وكان سايب وصيه يدفن ويكفن فى بلده
> أعمل أيه بس يامعلم الشارع كان زحمه والوليه ما بتثبت على حال رايحة يمين وشمال زى فرقع لوز لحد مالعين جت فى الراجل مش ذنبى
> نيران صديقة برضه هه.. دى نيران منيله بنيله مالكش عندى غير حق جتتين أيه رأيك بقى يافالق
> كده أنا أزعل يامعلم والزعل مش كويس عشانى بيأثر فيه قوى وبيسد نفسى
> أزعل ولا أتفلق ..أترزع فى مكانك خلينا نشوف شغلنا ..أيه الدوشه أللى بره دى ياواد ياخشبه > يابه النهارده ماتش الأهلى والزمالك والواد تامر جنزير العجلاتى طالع بزفة الزملكاويه ورايح الأستاد وقصاده الواد حسونه القفل طالع بزفة الأهلى وعمالين بيغيظوا فى بعض
> تتهم نيله العيال دى مش لاقية تاكل وعمالين يشجعوا الكوره على خيبتهم
شحيبر: الواد حموده القفل واد مفترى قوى مبهدل الزملكاويه وعمال يحرق دمهم
وبيفكرهم بهزميتهم الأخرانية من الفلاحين.. أسف يامعلم العمليه دى لحسابى المره دى
خشبه : حتعمل أيه يامجنون
> سيبنى أتفش فى الأهلاويه ياسى خشبه هو دورى وكاس وسوبر وأفريقيا واليابان غير مامبهدل الزمالك رايح جاى والله العظيم حرام أللى بيحصل ده عن أذنكم ياجماعة( يقوم يجرى ليلحق بركب المشجعين )
فينيش: هو الجدع ده قام رايح فين > سيبه يابه يشوف شغله
> هو أنت ياواد عشان زملكاوى سايبه طب عليا النعمه لو حصل حاجة للأهلاويه لأعلقه هنا فى المحل وأجلده
أصوات أستغاثه وصويت فيصرخ المعلم : عاملها شحيبر الجزمه وضيع الواد حموده القفل ..والله ما أنا معدهاله الزملكاوى الندل لما أشوفه
خشبه : شحيبر خاف منك ومشى أحسن تعلقه يابه زى ماقولت
> غار فى داهيه ..قوللى هو الواد حموده خلص ولا لسه فيه الروح
> يابه ده أتقلب من فوق أكتاف العيال أللى شيلينه وهو بيهتف ( تيت تيت أهلى) وقع على الأرض ماحطش منطق وهى القلبه..بيقولوا سكته قلبيه رغم أن الواد ده زى البغل وأيده زى المرزبه > هيييه دنيااا ..مايعزش على أللى خلقه ..جهز كفن صينى للواد غلبان ماحلتوش حاجة تبرعا منى .. وماتنساش العلم الكبير بتاع الأهلى علشان نلفه بيه ..عندك جوه مع بقية أعلام الأنديه والمنتخب فى الدولاب من فوق
> جدع يابه وأهلاوى أصيل ..أشمعنى ماطلعتش علم الزمالك ولفيت بيه الأستاذ عنبر لما جت له سكته قلبيه فى بيته وهو بيتفرج على ماتش الزمالك أللى فات
> الماتش كان ودى يامغفل ولا هو دورى ولا كأس وأنفعل على كوره خايبه المدافع الزملكاوى حطها فى نفسه ..بالذمه ده يستاهل يتلف بعلم ..ده عايز يتلف فى شوال ويتولع فيه > قول كده علشان أنت أهلاوى يامعلم > أما أنت حمار صحيح..
(صوت التليفون يرن فيفرك فينيش يديه من السعاده وهو : أبعت ياللى بتبعت
يرد خشبه على التليفون : حاضر يادكتور أحنا جاهزين وحاجى بنفسى المستشفى
فينيش : مين ياض أللى حتروح له المستشفى > ده الدكتور كمال الفياص بيقول أننا نستعد عشان الناس أللى حتسقط بعد الماتش
>والله فيه الخير الراجل ده ..أجهز يافقرى الزملكاويه النهارده يومهم
> طب ماتقولش ليه يكون يوم الأهلاويه > تف من بؤك يالوح الأهلى حديد وأنا كفنى جديد تيت تيت > لما نشوف
> أنا عندى فكره يابه ما تخلى شحيبر بدل ماهو قاعد يلوش ويصيب ناس أحنا مش عايزينها ..يشتغل دليفرى
> أيه دليفرى دى يافالح > يعنى يشتغل من الباب للباب أن دور يعنى نبعته على بيوت الزباين أللى عايزينهم ..يخبط على الباب يفتح له الزبون يقوم نشه العين أللى هيه وجايب بعضه وجاى بدل من النيران الصديقة ووجع القلب أللى مانوش فايده
> هى فكره وجيهه بس الواد ده فقرى ما نعرفش حينجح فى الشغلانه دى ولا حيعمل لنا مشاكل..أنا أبتديت أتشائم منه الجدع ده
> يابه قول يارب الأعمار بيد الله وكل واحد ونصيبه
> ونعم بالله ...هييه دنيااا...وحدووووه

الحلقة رقم (8)
حطام المستقبل
دكتور كمال الفياص صاحب ومدير مستشفى فيص الدولى فى مكتبه وهو يناقش المعلم فينيش وولده خشبه فى شروط عقدهما الجديد
فياص: أنت يامعلم أمك دعيالك أنك حتستلم الشغل عندنا ولينا طبعا النسبه بتاعتنا
150 جنيه عن كل حالة تنزل عندك هيه قولت أيه
فينيش : كتير قوى يادكتور ..خليها ورقه بميه صحيحة
> ما ينفعش حتى أسأل المعلمين أللى قبل منك أبو زبعبع وأبو موته والضرس والمعفن كلهم كانوا بيدفعوا المبلغ ده
> الناس دى فيهم أساتذتى وما أفتكرش المعلم أبو زبعبع أو أبو موته يوافق على الكلام ده أصدقك ممكن المعفن يعملها لأنه مش حانوتى لامؤاخذه ده أصله مبيض محارة مفيش أكثر من ميه يادكتور قولت أيه
> خلا ص يامعلم خليها 120 > سيبنى أفكر وأرد عليك > براحتك شاور نفسك على ما أقوم أخلص عمليه جراحية بأشتغل فيها من أمبارح وأرجع لكم
خشبه : وافق يابه فيه حد يطول يمسك توكيل مستشفى فيص
> ما هو أستغلال ياواد ياخد 120 جنيه على أيه
> يابه كفايه أنه بيجيب لك الزبون لحد عندك وبعدين المستشفى دى مشهوره أللى داخلها مفقود وخارجها مولود ..طب أنا سألت الجدع بتاع التلاجه قالى بس أنتم تلاحقوا على زباين الدكتور كمال لوحده كل يوم يفيص على أيديه 3-4 أنفار
> هو ماسك أنهى قسم > الجراحة يابه > وبتقول أنه بيفيص على أيديه كل يوم من3-4 بنى أدمين .. أتكل على الله.. فعلا أستاذ يستاهل 120 جنيه
> الشغل النهارده على ودنه عربيات الأسعاف ما بطلتش نقل ضحايا الماتش ..الدكتور كمال ده من شطارته فاتح عنبرين واحد للزملكاويه وواحد للأهلاويه
تعال يابه لما نطلع نتفرج عليهم ومنها نعاين البضاعة
> ده بقى عنبر الزملكاويه ..مين ده الدكتور حطام المستقبل الغالى أبن الغالية
بالحضن يابنى ( يهمس خشيه فى أذنه مين يابه حطام المستقبل وأيه يابنى دى يظهر يافينيش كان عندك ماضى خطير ) بعدين أبقى قولك ...أيه الأخبار ياحطام طمنى يابنى أزيك وأزيك أمك
> الحمد لله ياعمى بتسلم عليك
> أيه أخبارها لسه بتمارس هوايتها فى الجواز والطلاق
>لا خلاص بقى والله حسن الختام تصدق موصيانى أن أللى يعمل ليلتها مفيش حد غيرك > فيها الخير ..
>أستنى ياعمى لما أرد على تليفون دكتور كمال : أيوه يادكتور البيان أهه قدامى
الزملكاويه لحد دلوقتى أتنقل 50 حاله معظمهم مخ وأعصاب مابين شلل على جلطه على فقدان النطق والباقى قلب فى الأنعاش وفيه 3 حالات حول محتارين فيهم بين العيون والأعصاب..
فينيش وهو مستغرب: حول يعنى عنيهم مخاصمة بعضيتهم ياحول الله وكل ده من ماتش كوره والعجيبة أن فيهم أتنين ستات
> أيوه ياسيدى الأتنين ستات دول أجوازهم الرجاله أهلاويه ..كل مايجيب الأهلى جون فى الزمالك ..طرااخ يقوم لزقها على قفاها لحد ماتحولوا زى ماأنت شايف > بس والله أحسن يستاهلوا فيه واحده تشجع نادى غير نادى جوزها ههه
حطام يصطحب فينيش معه وهما يتحدثان فى الذكريات القديمه أيام زواجه من والدته ..تعال أفرجك يا عم فينيش على عنبر الأهلاويه حتشوف العجب ..بس أرحم شويه من الزملكاويه.. أتنقل 30 أهلاوى لحد دلوقتى منهم 20 قلب ومخ وأعصاب من الفرحة والتشجيع منهم أتنين ماتوا
> حلو عقبال الزملكاويه
> وعندنا 10 حالا ت أهلاويه مش عارفين فيهم أيه كل واحد بطنه منفوخة على الأخر وكاتمه على نفسه ومش قادر يتكلم والدكتور كمال بيقوللى أعملهم حقن شيح وبيقول أنهم أتنفخوا نتيجة متابعتهم المركزه للماتش وكانوا بيكتموا فى نفسيهم
خشبه : حقن شيح يادكتور أللى بتتاخد ..فى الـ
د.حطام : مظبوط فى المكان أللى ورا .. ده عليك نور > صعب قوى ههههههه
الحلقة رقم( 9 )
غراميات فينيش
خشبه : أيه حكاية حطام المستقبل وسلم لى على أمك أنت كنت متجوز أُمُه يابه
فينيش يتنهد : هيه كانت أيام ..كنت بأشتغل مع أبويا أللى هو جدك فى القرافه وفى يوم جت ست زى القمر وحامل على أخرها ولابسه أسود وقعدت قدام توربة واحد أسمه مستقبل كنا لسه دفنينه من أسبوع ولقيتها وقعت وأغمى عليها جريت عليها وسندتها وشربتها شوية ميه وقعدتها فى الظل ولما فاقت بصيت لى والدموع فى عنيها وقالت لى : أنت مين ؟؟
قولت لها أنا عبده التوربى ..قالت لى هو أنت متأكد أنك دفنت مستقبل فى التوربه دى قولت لها : ألا متأكد تحبى أفتح لك التوربه عشان تتأكدى > أومال كل يوم بشوفه فى منامى ويظهر قدامى كأنه مامتش
> يظهر أنك كنتى بتحبيه قوى علشان كده معلق فى دماغك
> بحبه ..أنت لو سألتنى مين أكثر واحد بأكرهه فى الدنيا حقولك الراجل ده الله يجحمه ماطرح ماراح > خلاص ياستى أهو مات وأرتحتى منه أيه بقى أللى جايبك القرافه وراه > جايه علشان أدعى عليه أن ربنا يعذبه زى ماعذبنى وبهدلنى فى حياته
> ياستى المسامح كريم أهو بين أدين ربه يحاسبه على أللى عمله فيكى
وظلت تتردد على الأرافه كل فتره وتقف أمام مقبرة زوجها وهى تدعو عليه
وضربنا صحبيه وأتفقنا على الجواز بعد ماتولد ..وأتجوزتها وسمت الواد أبن مستقبل حطام لأنه حطم حياتها وآدى الحكاية
> أمى تعرف الحكاية دى > أيوه طبعا تعرف.. ده كان جواز يا مغفل مش قلة حيا
> المهم سيبتها ليه > عشت معاها خمس سنين ويظهر أن المرحوم كان طير الشويه أللى باقيين فى مخها من كثر الضرب والتعذيب أللى شافته على أديه
فما أقدرتش أكمل معاها وكل حى راح لحاله بس كانت كل فتره أسأل عليها وهى تسأل عليا رغم أنها أتجوزت بعدى كتير قوى وماكنش عندها غير حطام أللى أعمامه خدوه منها لكثرة جوازتها وربوه لحد مابقى دكتور بس أيه يطلع من ظهر الفاسد عالم ..حنية أيه وطيبة أيه على أمه وفى الأخر أخدها تعيش معاه بعد ما كبرت وكحكحت وآدى الحكاية من طقطق لسلامو عليكو
> قوم يا خويا أحنا حنقضيها حكايات أحنا ورانا النهارده جنازه جماعيه لضحايا ماتش الأهلى والزمالك حيطلعوا النهارده لندفنهم فى مقابر رابطة مشجعى الزمالك فى 6 أكتوبر وقبلها حنلف بيهم تراك الملعب فى ميت عقبه التليفزيون حيصور والدنيا حتبقى مقلوبه
> ماتخافش يابه كل حاجة جاهزه وفى الميعاد ماتشلش هم
> قولى ياض هو الفقرى أللى أسمه شحيبر الفالق بيعمل أيه دلوقتى
> الحقيقة يابه من ساعة ما قلب الواد حموده القفل بتاع الأهلى وهو خايف يعتب ناحية المحل لتعمل فيه حاجة ..أنا بشغله من منازلهم بأبعت له الكشف بالأسامى والعنواين ويطلع يلف عليهم
> أنت بتشتغل من ورايا ياض بتعمل بس نس أنت والفقرى شحيبر
> يابه أنا برضه محتاج مصاريف علشان الجواز
> عامله أيه البت بتاعتك معاك دلوقتى
> أهى ماشيه.. مش نقاوتك ياسيدى..قعدت تزن على دماغى .. خد أنشراح خد أنشراح البت مقطوعة من شجرة ..أدينى أخدت أنشراح أهى كل ما أروح أزورها
لازم تقومنى أغسل أديا قدامها عشرين مره ..البت راكبها الوسواس خايفه على نفسها يامعلم
> معلش أستحملها ياخشبة الستات قلبها خفيف وبعد كده حتتعود عليك
> منظرها البنت دى مش حتعشش يابه ..ضرباها فى العليوى قال أيه مش عايزه تسكن جنب القرافه ..وبتزن عليا أن أسيب الكار وأشوف لى شغلانه تانيه ..هو فيه أحسن من دى شغلانه مكسبها مضمون مليون الميه أفهمها كده تقولى أكولها بدوقة أرحم من أن تعيش مع حانوتى
> المهم البنت بتحبها وهى بتحبك ياواد
> أيوه يابه بنحب بعض > هو ده أهم حاجة ..أنا ياخشبه يابنى كان نفسى ومنى عينى أنك تطلع أى حاجة تانيه غير حانوتى .. أنما مخك الضلم ماخلكش تسلك فى التعليم وكأنه مكتوب علينا أن أحنا نفضل طول عمرنا حانوتيه ..يمكن ربنا بعتلك البنت دى علشان تغير حياتك ..أصبر عليها وفكر حتلاقى كلامها صح
الحلقة رقم (10)
سعدون المضايق
خشبه : شوفت يابه النصيبه أللى حصلت لشحيبر الفالق ..أخد الكشف أللى كتبتهوله وراح على العناوين كان فيهم عنوان ما عرفش يوصل لصاحبه مش يسكت ويرجع وبارك الله فيما رزق .. أبدا فضل يلف على عنوان الراجل ماهو أنا واخد العنواين والأسامى من كشف الأنتظار أللى معلقه أنت فى المحل
فينيش: راجل مين أللى مش عارفين عنوانه ومش عارفين توصلوا ليه ده
> راجل أسمه سعدون المضايق
> يانهار أسود وعمل أيه الفقرى شحيبر أحكيلى
> كبرت فى دماغه أن يدور عليه وفى الأخر لقاه ساكن فى حارة فى العباسيه
> هيه وبعدين طمنى أيه أللى حصل
> وصل لحد شقة الراجل وخبط عليه فتح له سأله أنت سعدون المضايق ..الراجل قاله أنا هو بشحمه ولحمه عايز أيه ياشحيبر يافالق أنت أللى باعتك فينيش الحانوتى وأبنه خشبه قاله أيوه ..قاله طب خش أنا عايزك ..شحيبر بيقول مايعرفش أيه أللى جرا له دخل الشقه ومش فاكر غير أنه كان بيتشال لفوق ويترزع فى الأرض ومش شايف أيه أللى بيشيله وأيه أللى بينكته لحد مالقى نفسه مرمى فى الشارع والناس ملمومه عليه فضل يدعك فى عنيه علشان يشوف أللى حوليه..وفضل يصرخ ويقول أنا أتعميت ياناس سعدون عمانى ..المهم الناس صعب عليهم وخدوه روحوه بيته
> وبعدين هو فين دلوقتى > روحت بيته أسأل عليه مراته فتحت لى وقامت ماسكه فى خناقى قال أيه أحنا السبب فى عمى جوزها لأننا بعتناه لأكبر سحار ومخاوى الجن فأذوه وضيعوا نظره وده رأس ماله أللى بياكل بيه عيش وبتطالب بتعويض وألا حتبلغ عننا النيابه وتتهمنا بأننا عمينا جوزها
> مش عارف أقولك أيه ياخشبه هو الراجل سعدون ده فعلا مخاوى الجن والعفاريت وبيشتغل فى السحر السفلى وكان دايما بييجى عندنا القرافه لدرجة أنى تمنيت من ربنا ياخده ويريح الناس منه عشان كده كتبت أسمه فى كشف الأنتظار ..بس شحيبر بتاعك ده راح لقضاه وأهو ربنا بيسلط أبدان على أبدان ..لا حول ولا قوة ألا بالله المهم نخلى بالنا من نفسينا لأن سعدون مش حيسكت بعد ما عرف أننا وراء الواد شحيبر
> طب حيعمل فينا أيه يابه خوفتنى
> أنا من رأيى نقفل المحل ونسافر كام يوم بعيد عن سعدون لحد مانشوف حل للنصيبه دى > حل أيه يابه > الساحر والمخاوى ماينفعش معاه غير المعفرت أللى زيه فلازم نشوف واحد مخاوى زيه يوقف شره > كلامك صح يابه
أللحق أقفل المحل وقوم بينا نفلسع من المنطقة دى دلوقتى > بينا يابه
(يجرى فينيش وولده خشبه فى الشارع بعد أن أغلقوا المحل ليفروا من أنتقام سعدون ويسمع نداء خلفهما بالتوقف )
> ياعم فينيش ياخشبه أستنوا قطعتوا نفسى وراكم أقفوا الله يخرب بيوتكم
> أستنى ياواد ياخشبه نشوف الجدع ده عايز أيه
> يابه أجرى مالكش دعوه بيه
> أستنى ياواد أنا حشوفه وأحصلك ..عايز أيه ياسيدى بتجرى ورانا ليه
> مش أنت المعلم فينيش الحانوتى > أيوه أنا المعلم زفت عايز أيه
> عايزينك فيه ميت عندنا > آسف أنا مش فاضى شوف لك حانوتى تانى
> ياعم فينيش أللى أنت عايزه حدهولك > ياعم أنا خلاص بطلت الشغلانه دى
> ياعم فينيش أنا فى عارضك حدفع ألف جنيه بس تعال معايا
> بتقول ألف ..ماينفعش تخليهم ألف ونص > ماشى أللى أنت عايزه بس تعال معايا ( ينادى فينيش على خشبه ليتوقف ويحضر معه لأنهاء الشغلانه )
> تعال معايا ياخشبه نخلص الشغلانه دى فيها ألف ونص ياوله
> يابه سيبك من حركات الحانوتيه وتعال ننفد بجلدنا
> بس تعال وقوام قوام نخلص ونفلسع > أبدا مش جاى معاك روح أنت ياعم أنا مش مستغنى عن عمرى > روح تتك القرف وأنت فقرى حخلص وأحصلك تكون جهزت شنطة السفر > ما تتأخرش يابه وألا حطفش لوحدى وأسيبك
> أه ياندل يا أبن الندل > ياعم سيبك من دى شغلانه
> أنا خلاص أتفقت ومأ أقدرش أرجع فى كلامى ده ألف ونص ياعبيط
> أنت حر مفيش فايده فيك ..سلام
الحلقة رقم ( 11 )
حزئيل المحزء
نداء من الشارع أما بيت فينيش > ياسى خشبه ..ياسى خشبه يا خشباااه
يطل خشبه من شباك منزله وهو منزعج فقد أحس بنصيبه قد حدثت.. فيجد الواد ليفه الذى يعمل عندهم فى المحل ومعه والده المعلم فينيش وهو يجلس على الرصيف ويهرتل بكلام غير مفهوم
> فيه أيه ياليفه أيه أللى حصل الله يخرب بيتك
> أنزل ياسى خشبه ألحق أبوك شوف أيه أللى جراله
يجرى خشبه وينزل إلى الشارع فيجد أبوه وهو يحاول أن يخلع ملابسه
> أبويا ..أبويا ياحبيبى يابه .. مالك فيك أيه
ينظر إليه فينيش بأستغراب ويقول : مش شايف يا أبن الكلب الكراكيب
> كراكيب أيه يابه ألف سلامه عليك مش قولت لك بلاها الشغلانه دى
> أخرس ياحمار خلينى أعرف ألم الكراكيب أللى حواليا
> مفيش كراكيب ولاحاجة يابه تعال معايا نطلع فوق وبلاش فضايح ماتقلعش هدومك الناس حتقول عليك أتجننت
> كراكيب.. راسى مليانه كراكيب.. وأنت وهو وهى كلكم كراكيب ياغجر
> يابه كفايه بقى كركبت بطنى وحياتى عندك أطلع معايا نشوف الكراكيب أللى عندنا فوق فى الشقة بلاش الشارع لميت علينا الناس
يصرخ فينيش وهو يخلع جلابيته ويقذفها فى الأرض : كراكيب كراكيب كراكيب يابهايم مش شايفين الكراكيب ياغجر
> خلاص يابه أنا فى عرضك تعال نطلع فوق > عندكم كراكيب > يووه عندنا كراكيب بالهبل حتعجبك قوى.. ياله ياعم بلاش فضايح
> قدامى ياحمار ورينى الكراكيب أللى عندكم > حاضر يامعلم فينيش
> ماتقولش فينيش ياغبى ..أنا أسمى حزئيل المحزء
> ماشى ياعم حزئيل يامحزء أتفضل شوف الكراكيب أللى عندنا (يقول فى نفسه يعنى كنت شوفتلك أسم غير الأسم المسخره ده هيه محزء ملزق عليه العوض )
يتجمع أهل الحارة وهم يتصعبون على فينيش: الراجل أتجنن ربنا يلطف بيه..ألف سلامه على أبوك ياخشبه ..ناس أخرى تتهامس : يظهر أن عفريت ميت مسك فيه يستاهل طول عمره مفترى طالع واكل نازل واكل)
ليفه : ياله ياجدعان مايصحش كده المعلم فينيش بعافيه شويه كل واحد يروح لحاله ..أحد المتجمهرين : فينيش مين ياض يا ليفه ماخلاص بقى حزئيل المحزء ههههههههههههههه
خشبة : أيه أللى حصل ياواد ياليفه
ليفه : المعلم أتصل بيه وأدانى العنوان أللى الشغلانه فيه ماكدبتش خبر قمت واخد العدة وطالع زى ما قالى المعلم ..دخلت البيت أللى فيه الميت لقيت المعلم واقف قدام الحيطة وعمال يتكلم كأن فيه واحد بيكلمه ..أن جيت للحق أنا أترعبت ياسى خشبه وأول مره شعرى يقف لما شوفت المعلم عمال يتحايل ويعتذر..وعمال يقول حقك عليا ياسى سعدون.. الواد شحيبر جالك... غلط ما أقصدش أزعلك ..خلاص ياسى سعدون أللى تشوفه ..وماله حزئيل المحزء يشرف على عينا وراسنا من فوق ..كراكيب ..كراكيب أيه
وألا وسمعت الأقلام نازله ترف على وش المعلم وهو يتطوح ويقول كراكيب كراكيب ..وخرج من البيت وهو يتطوح على دى الحاله ..أنا عمرى ماشوفت كده
ياسى خشبه ..وأيه جاب سيرة سعدون ..أه يكونش سعدون المضايق أذى المعلم
خشبه : أيدى بأيدك وبلاش لماضه تعال ننيم المعلم على السرير وأطلع شوف عند أمى حبل حالا
أم خشبه : حبل ليه ياخشبة يابنى > عشان أربط المعلم يامه لأنه لو فاق حيقوم يكسر الدنيا وقليل لو موتك > أبوك من زمان مابيشربش لا خمره ولا مخدرات أيه أللى جراله
> يامه فوئ الله يخليكى ..بالعربى كده أبويا لابسه عفريت
> أنت أهبل ياوله عفريت أيه أللى يلبس فى حانوتى محترم زيى أبوك طول النهار والليل مع العفاريت والميتين تلاقيه متقل العيار حبتين ولما يصحى حيبقى كويس > ياااههمممممم أوعى من سكتى لما أنزل أشوف له حل قبل مايضيع مننا ..
(خشبه يخرج وهو يكلم نفسه ):أقوله مابلاش الشغلانه دى يابه ..تقول أيه شغل حانوتيه هو أللى جابه لنفسه..يابن المجرمه ياسعدون ..النوع ده ماينفعش معاه غير السياسه والفلوس ..ربنا يستر لما نروح نشوفه
الحلقة رقم (12)
السماح يا أهل السماح
يدخل خشبه على سعدون وهو يقدم فروض الطاعة والولاء وهو يستسمحه فى أن يعفوا عنه وعن أبيه
خشبه : السماح يا أهل السماح ..عيل وغلط وجاى أصلح غلطتى ماتردونيش ياشيخ سعدون أنت الكبير وأحنا كلاب ولاد كلاب
سعدون وكأن صوته يخرج من مكان سحيق كفحيح الأفعى : أللى غلط لازم يدفع ثمن غلطته يابابا أحنا مش فاتحنها أسكولا
> أدفع أللى تقول عليه بس يرجع أبويا زى الأول
> صنف نمرود أنت وأبوك ..أنا كنت ناوى أأذيك لولا مجيتك وطلبك السماح..يضحك..هيه حزئيل المحزء عامل أيه معاكم > مين حزئيل ده يامولانا
> ده العفريت أللى على أبوك > شوف عايز أيه ياعم سعدون وأصرفه عنه ربنا مايغلب لك عفريت يارب.. يضحك سعدون ضحكة مجلجلة وهو يفرد أصابع كفه فى وجهه ويقول : عايز خمسة مقدم وخمسه مؤخر > خمسه جنيه ( يقوم سعدون ويدير له ظهره )
> طب متضايقش يبقى خمس مائة جنيه ماشى
> حبتدى أضايق وأنت ماتعرفش سعدون المتضايق لما يتضايق بيعمل أيه
> لا وحياة أبوك بلاش تضايق قصدك 10 ألاف جنيه
يلف سعدون وهو يبتسم أبتسامه مخيفة : صح ..معاك أهلا وسهلا ما معكش
سيب أبوك كده ..يقاطعه خشبه وهو يقول : مسافة السكة ياسى سعدون أروح أجيب الفلوس وأجى
سعدون : أستنى هات معاك فوقيهم 500 أو700جنيه لزوم الدمغات > حاضر ومتنساش تجيب معاك طابع مهن سفليه > منين ده > مش حتعرف تجيبه هات معاك 2000 جنيه علشان حنبعت لك عفريت مخصوص يجيبه من بوستة العتبه الموجوده فى سابع أرض وكمان ألف جنيه بدل سفر وكمان ..و...
خشبه : شوف ياعم سعدون أنا كل أللى حلتى أول عن آخر عشرة تلاف جنيه خدهم وأتصرف أنت بمعرفتك
> أرجع بيتكم دلوقتى ياخشبه حتلاقى أبوك بقى كويس وفلوسك تكون هنا بعديها بساعة ..أوكازيون هههه أوكازيون هههههه
> بمناسبة الأوكازيون ماتاخد الواد شحيبر بالمرة أللى أتعمى ده وقاعد يشحت
> وكمان شحيبر ههههههههههه يشوف ولا ينظرش ولو نظر مايصيبش ولو عايز يتنشط ويرجع زى الأول أدفع ياخشبه
> أدفع أيه ياعم.. ماعنه شاف ولا نظر كفايه عليه يشوف تحت رجليه حينهب
كثر خيرك يا عم سعدون ياراجل ياأميرياحتة سكرة تصدق أنا حبيتك أكتر من أبويا
> قوم ياخشبه من هنا يانصاب ياضلالى أنا مابكلش من الكلام ده فلوسك يالوشك
> حمامه ..مسافة السكة
ويمر شهر على هذه الواقعة ويتماثل عبده فنيش على الشفاء ويرجع شحيبر الفالق يرى مرة أخرى ولكن بدون تأثير وحمدوا الله كلهم جميعا وجلسوا يتباحثون هل يعودوا إلى مهنة الحانوتى مرة أخرى أو يبتعدوا عن هذه المهنة الكريهه
فينيش: بقول أحنا نقلب المحل سوبر ماركت
شحيبر: مايمشيش يامعلم أنت جنبيك أربعة سوبر ماركت وكفاية سمعة المحل وصاحبه كان حانوتى سابقا شوفوا حاجة تانيه
خشبه : أنا بقى عندى فكرة 100% ..أقرب مطعم فين من هنا
شحيبر : أنت جوعت ياسى خشبه أعمل حسابى معاكم أنا جعان
خشبه : أفهم يابنى آدم أنت همك على بطنك المسافة قد أيه من هنا لأقرب محل فول وطعميه
شحيبر : ده مشوار
فينيش : فكرة حلوة ياض ياخشبه وخاصة أن حوالينا مدارس وورش فكره ميه ميه ينصر دينك ياواد
> خلاص يابه أشتغل على كده مش حنرجع فى كلامنا ونحِنّ ونشتاق لشغل الحانوتيه من تانى > توكل على الله بس حتعمل أيه فى عربية نقل الموتى
> خلاص يابه حنرخصها نقل ونشغلها تجيب طلباتنا ..تخيل كده يابه اليافطه الفقريه دى شلناها وحطينا مكانها يافطة( مطعم وكافتيريا فينيش وولده خشبه)
ياسيدى.. وتقعد أنت يامعلم على الكيس ونعمل فى أخر المحل ركن للعائلات والشيشه ..ياعينى ..قدامك يابه 15 يوم وأسلمك المحل بالدعاية وحفلة أفتتاح
> شد حيلك وأوعدك أن لو المشروع ده نجح لتكون دخلتك على أنشراح بعدها بأسبوع > ياحبيبى يابه ياجميل يامحزأ > قوم تتك البلا فيك وفى ملافظك
الحلقة رقم 13
الأفتتاح الكبير
سلسلة مطاعم فينيش
فينيش: أيه الأخبار ياخشبه عملت أيه لحد دلوقتى
> هانت يابه كله فى السليم الديكور والعدة والعمال والشيفات وبكره الأفتتاح وعازمين كل حبايبنا وأول يوم عاملين خصم على الوجبات 50% علشان نعمل زبون > مش كتير كده يابنى > ماتخافش يابه ما هو أحنا حنقدم 50% من الوجبه برضه وشعارنا متعلق فى المحل وعلى الترابيزات ( أطلب بزياده ليكون ده آخر زادك) غير ما عملنا أسامى للوجبات ماشيه على نفس الكار
> يعنى أيه > الناس كلها مش عارفه أن أنا وأنت حانوتيه حتقدر تنكر
> لا > يبقى مش حنخسر حاجه لو أحنا قدمنا لهم وجبات جديده باسماء فقع ولعلمك الكل حيدخل يجرب الناس بتحب الجديد يابه فعندك أطباق بأسماء حتعجبك أوى.. مثلا زى طبق الصاحى والبيض المدفون وطبق فينيش للسعاده الأبديه وطبق أم دجدج زى طبق أم على كده.. غير بقى طبق سعيكم مشكور وطبق سفير جهنم غير سلطه الحفار والدفان والنعش الطائر وشوربه موتنى ياحبيبى وسندوتشات الديناميت والنابلم و11 سبتمبر وطعميه بالسم..سم الهارى وعجة أن مت يا مه ماتبكيش غير المشروبات زى مشروب جوتو هيل وشاى فى الأربعينه بدل الخمسينه
> خمره الهيل ده ياواد > خمرة أيه يابه يعنى معناها روح بالسلامه على جهنم عبارة عن كوكتيل عرقسوس على كركاديه على جنزبيل على مية نار على بلا أزرق..وأسماء تانيه كتير غير ماعينت الواد ليفه وشحيبر مشرفين على طاقم السرفيس الحريمى ..أطمئن يابه حنبقى أول مطعم فى مصر يقدم وجبات جاهزه للقرافه ..أنا مش عايزك تحس أن أحنا فارقنا المهنه أبدا ..حيقولوا مطعم حانوتيه ..خليهم يقولوا ده أحسن دعاية للمحل ولعلمك يابه شوف الناس حتيجى من آخر الدنيا أزاى ومش حنلاحق على الطلبات
> من بوئك لباب السما > أسيبك دلوقتى علشان أعدى على الواد على جاعورة وفرقة الجوع كافر الشعبيه والبت سندس العالمه تعملها وصلتين رقص عشان تطرى القاعده.. وحياتك يابه حتبقى ليله من ليالى ألف ليله
> عارف ياض لو المطعم ده ما مشيش بعد ده كله حعمل فيك أيه حدفنك بالحيا وأخلص منك > ياعم فينيش طول ما معاك خشبه وشحيبر وليفه مش حتغلب أبدا وحدووووه... بالمناسبه أنا عزمت سعدون المتضايق أهو على الأقل نتقى شره
> خير ما فعلت ..عايز منى حاجه > وحياتك يابه أبقى أتليف كويس وظبط حواجبك بالجيل أحسن بقت صعبة قوى خلى الناس تاكل وهى نفسها مفتوحه وبلاش وعشان خاطرى أبوس أيدك ما تحطش كولونيا من بتاعة الميتين > أومال أحط أيه بس ياخشبه > حط بيرسول أحسن يابه .... هههههههه
الليله الكبيره
يستعرض المعلم فينيش طاقم العمل من شيفات يرتدين لبس الحانوتيه بالكوفيه الشهيره والشال المربوط على الوسط والجرسونات من الجنس الناعم وهم يتشحن بالسواد وكل من شحيبر وليفه وخشبه بالبدل الحمرا كالمحكوم عليهم بالأعدام وينبه عليهم بضرورة أن يقولوا عند تقديم الطلبات للزبائن النداء المعتاد
وحدوووه ..وعندما يفرغ من تناول الطعام لابد من التسليم عليه بكل أدب ويتم توصيله لباب المحل وهم يودعونه ويقولون سعيكم مشكور
وتبدأ حفلة الأفتتاح بفاصل راقص لسندس العالمه وفرقتها الموسيقيه برقصة
حسرة عليها وحسرة عليها ثم تليها رقصة المقتوله ثم تابلوه غنائى يشترك فيه المغنى الشعبى رجبوله وهو المنافس الوحيد لشعبوله وهو يغنى أغنيته الوحيده
التى يقول مطلعها (حبيبى شرانى ليه ..وأنا ساكت عليه ..أدانى بالبوكس فى عينى علشان لمست أديه ...هييه هييه هييه ..حبيبى راكب كاديلاك وأنا راكب شيفروليه شدينا مع بعض فى مطلع سبقته ودوست عليه ..هيييه هييه هيييه
أنا عمرى ماحنسى أبدا صوابع أيديه.. فقفايا لسه مولع من الضرب عليه
هييه ..هييه.. هييه )
ينفعل جمهور المشاهدين مع رقصة سندس وأغنية رجبوله وتطوع الكثيرين بالرقص والتهليل وفى قمة هذا الأنفعال يقفز خشبه فوق المسرح ويصرخ بأعلى صوته : سمع هسسسسسسس
الحلقة رقم (14) والأخيرة
أوكازيون المعلم
خشبه : مسا الخير على حبايبنا وعلى ستات ورجالة حتتنا الكرام ..مطعم المعلم فينيش بيحييكم ويتمنى قضاء سهرة ممتعة مع برنامج حفل الأفتتاح وقبل ما نبدأ
احب أقول لكم بأن النهارد ه أوكازيووون 50% على جميع الأطباق والأصناف
قررررب قرررب مين قال ياخشبه دوقنى الطعميه ولا طعم الحمام الصاحى ولا الشوارمه المفتكسه..الكميه محدوده أدخل أتعشى وخد لعيالك ولجيرانك كشرى وفتة المعلم فينيش تعااال عيش وكُل اللى عمرك ماأكلته ..قالك أيه قالك أه
حيقولك ده أكل حانوتيه أوعى تصدق مفيش أحلى ولا أطعم من أكل الحانوتيه ..أدخل وكل وأتمتع بأكلنا وخدمتنا ولو ماعجبكش أكلنا ما تجيش عندنا حقول تانى وتالت ولو ماعجبكش أكلنا ما تجيش عندنا
فينيش يلاحظ عدم دخول أحد المطعم فيحزن ويفجر المفاجأة ويأخذ المايك من أبنه خشبه
فينيش :من حبى ليكم ولولاد حتتنا الكرام النهارده الأكل مجانا ..مجانا ياخلق ..مجانا ياناس ..مجانا ياولاد الكلب
تندفع الجماهير الحاشده لداخل المحل وهى تأكل ماهو موجود أمامها من الأخضر والأحمر والطرى واليابس ولم تمضى عشر دقايق ألا وعلت الصرخات والوقوع فى الأرض والأغمائات
خشبه : الناس جالها تسمم يابه أيه لزمته موجة الجدعنه أللى حطت عليك دى مجانا مجانا أديهم دخلوا أكلوا كل حاجة حتى الزباله
> أتصل ياواد بالأسعاف ده كل ماده والعد بيزيد ..ياد النصيبه لحد يموت من الناس دى يبقى شرفنا فى السجن يابن التيت..يافقرى يا أبن الفقرى
تحضر عربات الأسعاف وتنقل المصابين إلى المستشفيات للعلاج ويتم القبض على فينيش وخشبه وشحيبر وليفه ويتم أيداعهم بالحجز لحين العرض على النيابة ووصول تقارير المستشفى عن المصابين...
فى الحجز
فينيش:يطلع كام واحد أتسمموا ياض ياخشبه
خشبه : ماتعدش يامعلم ..الناس دخلت زى التتار ومسحوا الأكل الموجود فى الحلل والتلاجات..الناس كانت جعانه قوى وما صدقت أن هى سمعت أن الأكل بالمجان
> أهى شورتك المهببه أعمل مطعم يابه ..العالم المعفنه دى تنفع تقدم طلبات أو تحط أيديها فى أكل تتكم القرف فى مناظركم شوف بقى الغرامه وتشميع المحل وقضيه وربنا يستر ومانروحش فيها فى حديد
> ماتخفش يامعلم أنا بعت للأستاذ حنكوره المحامى زمانه حيتصرف وكلها بكرة بالكتير نخرج من هنا
يجلس فينيش صامتا وهو يضع يده على خده وهو يفكر ..
خشبه : بتفكر فى أيه يابه > بفكر بعد مانطلع من هنا حنعمل أيه
> نفس أللى كنت بفكر فيه بس ماتشلش هم أنا فى دماغى ليك كام مشروع أنما أللى همه ..حيعوضوا كل أللى فات وأللى جاى
> الله يخرب بيتك أنت ياواد مابتحرمش مش كفايه أن أحنا محبوسين .. مش عايز أسمعك تجيب سيرة المشاريع تانى ..
> خلاص يابه ماتزعلش ..شايف الراجل الدرويش أللى قاعد هناك فى الركن وعمال كل شويه يقول : حى ..مدااااد ..تعال نسأله المحل بتاعنا نفتحه أيه بعد مانخرج من هنا
يقتربان منه ويسلمان عليه بكل وقار وأدب .ويحكيان له ماحدث ويأخذان رأيه فى المستقبل
الشيخ وهو يرتعش ويستغفر ويتمايل > حى ..هو الناس جرالها أيه مفيش رحمه ماحدش بيبص لأخرته ليه الأنسان فاكر أنه مخلد على الأرض مايعرفش أنه نفس داخل ونفس خارج ممكن يدخل ومايطلعش ويطلع ولا يدخلش وبرضه مش هامهم
عارفين تفتحوا المحل ده أيه
خشبه وفينيش فى نفس واحد :أيه !!
> تفتحوه > هه > تفتحوه > هه > حانوتى ..أيوه والله العظيم حانوتى ورحمة أمى حانوتى هى دى الشغلانه أللى تناسبكم أنتم الأتنين
يستغرب كل من فينيش وخشبه من كلام الدرويش ويتركانه وهم فى ذهول ولكن المعلم فينيش يهرش دماغه ويعود له مره أخرى ليسأله: هو مولانا محجوز هنا بتهمة أيه > ظلم يابنى فى ظلم وحياتك ..كلهم 2كيلو بودرة بس
يضحك فينيش حتى يقع فى الأرض وهو يقول : بس .. وحدوووه
الدرويش وهو يرد عليه : حييييى

تمت