مهاجر من الفيس بوك

-أيه يابنى اللى أنت بتقوله ده .. 
عايز تقفل حسابك على الفيس وكمان تويتر

-       تعبت قوى يا عم زيزو من الجماعة أللى بيلطعوا صور وفيديوهات بتوع الصباح المشرق والغد الجميل  من عينة صباحكم أبيض وليلتكم حمرا وفيها كتكوت أو سوده مثل قرن الخروب وأحنا بنمسى 100مسا على الناس الكويسه

-        وألا الجماعة بتوع الجمعه المباركة تلاقى خمس ست بوستات شغاله عليك من ليلة الخميس لحد الصبح جمعة مباركه جمعه مباركة والرد جمعه مباركة علينا ياحبيبتييى وعقبالك يا أم فاروق وحركات من دى غير بقى المناسبات وأعياد الميلاد والذكرى السنويه للوفاه  من نوعية الله يرحمك ياباه أنا جزمه قديمه من غيرك ومن كثرة الترحمات اللى نشرها المرحوم زهق ولغى الفيسبوك والمغرمين والمغرمات والمصدومين والمصدومات وكلمات الحب والهيام ولاعنى سلسفين أم الحكومه بالألفاظ القبيحة والصداقات الوهمية والليكات الهبله

-        ودولت كوم والناس المتخصصه فى عمل بوستات تطلب فى نهايتها ثلاث طلبات لا رابع لهم تطالبك بقول سبحان الله أو الحمد لله أو الصلاة على رسول الله غير أعلانات النصب العقارى والتجارى قرفت يا عم زيزو قرفت

-       وألا الجدع اللى شغال تغيير صورة البورفيل لشخصه المعجبانى كل ساعه والتانيه مره لابس شورت ومره بجلابيه  ومره وهو بياكل كشرى  وفى الأخر حط صورة كلب مكان صورته الشخصية وياخد ردود من أمثال زينة الشباب وأيه الحلاوه دى يانجم ..ألخ-     كلب .. ايوه كلب ياعم زيزو .. وألا الأسامى الكوديه لفرافير وخناشير الفيس بوك من عينة.. سامحنى النهارده .. ياقاتل يامقتول .. وعاشقة البامبرز .. أخييه ويع ( دولت حسابين لواحده أسمها أخييه والأنتيم بتاعها واد أسمه يع)

-       المهم فيه حد من العالم دى تعرفهم ..

-       معرفش غير أصحابى وأخواتى وقرايبى وهم للأسف موجودين على الفيس بوك وما بيشتركوش خالص من أساسه

-       فيه ناس بتقول أن الفيس بوك ده عامل زى اللب والسودانى لب وسودانى أيه ياعم زيزو ده فيه ناس بتروح فى حديد وبيتمسح بكرامتها الأرض لو خرج عن الخطوط الحمراء اللى حطاها الداخليه لو مش عارفها أقولك أنا عليها علشان تاخد بالك .. أول حاجةأوعى تطلب من الناس الخروج فى مظاهرة وأياك تطلب بعمل تمرد أو أضراب وأياك تشتم حكام السعودية ودول الخليج .. يعنى لو شتمت حكامنا مفيش مشكله فهم عارفين أنهم بيتشتموا من غير حاجه  مصيرك ترجع تانى.. فيه ناس كثير زيك قرفت وقفلت حسابها ورجعت تانى وعايشين معانا زى الفل .. مفيش حاجه.. ده أدمان يا أدمن  admn

-     

-