النيولوك
تمهيد
هل فكرت أن تغير فى شكلك لتظهر بنيولوك جديد ..البعض منا راضى تماما عن شكله ولا يفكر فى التغيير ويستبعد تماما هذه الفكره من رأسه والبعض يعشق التغيير من باب التجديد.. والنسبة الأكثر عشقا للنيولوك هى من النساء
التغيير شيئ جميل ومطلوب فى حياتنا فهو حدث كالحجر الذى يسقط فى البحيرة فيغير من سكون مائها الآثن الراكد ولكن لا تلبث ان تعود لسكونها
- التغيير فى الشكل شيئ جميل ولذيذ وهو من طبيعة الأشياء والأجمل منه هو التغيير فى الجوهر والتخلص من العادات القبيحة
- النساء لا يتوقفن عن عادة النيولوك فهو مرتبط بطبيعة المرأة بالرغبة الدائمة فى التجديد ومن أجل عيون حواء وأرضاءً لمزاجها المتغير أنشئت محلات الكوافير ومراكز التجميل وبيوت الأزياء ومحلات الأكسسوار والمكياج التى تكسب من ورائها المليارات بتقديم الخطوط الجديده للموضه والنيولوك ..ودخل آدم مجال النيولوك متأخراً جدا بعد أن أصبح من ضروريات الحياة الحديثة
- والنيولوك له مجالات محدده ومعروفة مثل لون وملمس البشرة ولون عدسات العينين وقصة وتسريحة الشعر والأكسسورات وموضة الملابس
ولكن ظهرت فكرة أشد وأقوى من النيولوك يطلق عليها ديفرانت لوك (different look ) وهذا الديفرانت يقوم بتغيير شكل الأنسان تماما لدرجة أنك لا تعرفه فيغير شكل الأنف وحجم ولون العينين وشكل الذقن والحواجب ونوعية الشعر وحجم الجسم وأستدارة الوجه عن طريق عمليات النفخ والشفط والحقن والزرع وهذه العمليات أصبحت الأن فى متناول الجمهور العادى بعد أن كانت حكرا على الأثرياء والفنانين وكانت تجرى هذه العمليات فى لبنان أما الأن فهى تجرى فى مصر نظرا للمكاسب الخرافيه التى تجنيها ويمكن لأى شخص سواء رجل أو سيده أن يحصل على شكل مختلف حسب رغبته ويستطيع أن يكون حسين فهمى أو أحمد عز الممثل أو تكون هيفاء وهبى أو أليسا أو هند رستم .. ومن عجائب الديفرانت لوك أنه يقوم بتغيير نغمة الصوت فالذى يعانى من صوت حاد مسرسع يمكنه أن يحول صوته إلى صوت رجولى قوى ويمتلك جعوره محترمه ومن تعانى من صوت أخنف أو خشن يقارب من صوت الرجال يمكنها أن تحول صوتها إلى صوت حالم دافىء كصوت القيثارة ويمكنها أن تكون مطربه مشهوره أيضا أو مغنية أوبراليه
وبعد هذه المقدمة للنيو والدفرنت لوك قصدت أن أمهد بها لهذا المسلسل الضاحك فى حلقات منفصلة كحواديت سريعة عن النيو والديفرانت لوك
القصة رقم (1)
تات توه أم قورقور
هذه قصة حقيقية وقعت أحداثها بأحدى مراكز التجميل الخاصة بالزمالك
بالعياده الخارجية للمركز تدخل سيده فى الثلاثينات مليئة الجسم لاتعرف لها وش من ظهر كتله مكعبة من اللحوم والدهون وهى ترتدى كمية من المصاغ غيرعادية بالذراعين والصدر تدل على وسطها الشعبى وثرائها الفاحش لمقابلة أخصائى التجميل الدكتور محسن الذى قام بالترحيب بها كعادة المستشفيات والمراكز الخاصة عند أستقبالهم للزبائن الجدد وخاصة من كانوا فى حجم ووزن هذه الزبونه
محسن : يا أهلا وسهلا مدام ..أنت أول مره تشرفينا فى المركز نحب نتعرف وناخد شوية بيانات أولاً ..الأسم والسن والمهنة والعنوان
- رئيفه أبو السعود 35 سنه.. ست بيت.. ساكنه فى مصر عتيقة 8 حارة المعيز فوق قهوة صبحى.. روح بس مصر عتيقة وأسأل فين قهوة صبحى ألف مين يدلك
- الحالة الأجتماعية .. أنسة ولا متجوزه ولا أرمله
- متجوزه يا خويا ومعايا قورقور حلو كده بتاع خمس سنين سيباه عند حماتى
- الزوج أسمه ومهنته وعنده كام سنه
- جوزى سى أبراهيم الساكت بيشتغل عقبال أمالتك مقاول فى الكويت عنده كده بتاع أربعين سنه
- طلباتك يا أم قورقور قصدى يامدام رئيفه أأمرينى
- كلك نظر يادكتور أديك شايف قدامك التخن والدهوله أللى أنا فيهاعايزاك تشوف لى حل.. ولا رجيم نافع ولا دواء نافع
- فيه حاجة تانية غير مشكلة السمنه
- أيوه فيه .. عايزاك تصغر لى مراخيرى وتشيل النفخة أللى فى وشى والكور أللى فى خدودى وتظبط لى حواجبى وتحليلى منظرى زى ما الأعلانات أللى أنتم منزلينها فى التليفزيون عايزه أخرج من عندكم قمر بيلعلط علشان لما ييجى سى إبراهيم جوزى من الكويت يفرح ويتبسط
- يعنى عايزه تغيير كامل جسم وشكل .. بس ده حيكلفك كتير يارئيفه هانم
- كام يعنى ..حاجة كده بتاع 120 أو 150 ألف على الأقل
- وماله ياخويا ماتشلش للفلوس هم
- مطلوب تدفعى دلوقتى مبلغ تحت الحساب
- أنا ماعييش فلوس دلوقتى خدوا الدهب بتاعى عندكم رهن لحد مايوصل سى ابراهيم جوزى بالسلامه ويدفع لكم الحساب على داير مليم
- طب أتفضلى مع الممرضة أدخلى وراء الستارة ونامى على سرير الكشف
يتصل الأخصائى بمدير المستشفى : أيوه ياباشا معهاش فلوس بسه لابسه بتاع 2كيلو ذهب فى أديها وصدرها وبتقول أن جوزها بيشتغل فى الكويت وحييجى كمان كام يوم .. خلاص حندخلها ونحط الذهب فى الأمانات وحنعملها بتاع أربع عمليات وربنايسهل ويمكن أكثر .. أيوه محتاجة شغل جامد .. الوليه ملخبطه خالص ..شكرا ياباشا لما تيجى حتشوفها ..سلام
وتنزل رئيفه فى أفخر جناح لتجهيزها لدخول غرفة العمليات بأجراء الفحوصات والتحاليل اللازمه
ويمر أسبوعين وهى مقيمة بالمستشفى بعد أجراء كافة عمليات التجميل وشفط الدهون وتدبيس المعدة وتغيير فى حجم الأنف والجبهة والشعر والأذنين وكل يوم تنظر إلى المرآة وتطلب تعديل جديد والمستشفى والأخصائى لا يأخرون لها طلبا والحساب يزداد وأعتبروها زبون VIP حتى آخر يوم طلبت كوافير مخصوص لعمل شعرها وعمل تاتو على كتفها وذراعيها.. وعندما أخبر المدير بذلك طلب من الحسابات فواتير تكلفة العمليات والأقامة لرئيفة فوجدها قد وصلت لمبلغ 220 ألف جنيه فقام فزعا من مكتبه وتوجه بنفسه لجناح رئيف التى وجدها تجلس أمام المرآه وهى تعمل حركات غريبه بعينيها ووجهها وهى سعيده وتغنى يستأذن ويدخل - هيه أزى الحال يامدام مبسوطه
- مبسوطه وألا مبسوطه ده أنا حطير من الفرح .. تسلم أديكم
- فيه طلب صغير يامدام .. الفاتوره بتاعتك لازم تندفع فورا
- وماله ياخويا ماتدفع .. أتصلو بسى إبراهيم جوزى وهو ييجى يدفع لكم الحساب كله على داير مليم (تستمر فى الغناء والأستعراض أمام المرآة)
- أستنى شوية يامدام بطلى غنى وأسمعينى .. انت بتقولى أن جوزك مسافر الكويت وبعد يومين ثلاثه هييحى أديك بقالك 15 يوم ولا شوفنا ولا إبراهيم ولا اسماعيل ولا حتى زياره جات لك
- أنت مش مصدقنى خد النمره دى كلمهم فى البيت وأسألهم أن كان سى ابراهيم جوزى جه بالسلامه ولا لأ
يتصل المدير بمنزل رئيفه فيرد عليه إبراهيم :أيوه أنا إبراهيم الساكت جوز رئيفة أبو السعود .. بتقول أيه موجوده عندكم يامانت كريم يارب.. أنا جاى حالا
يحضر أبراهيم ومعه حماته وأخوات رئيفه للمستشفى : هى فين
يأخذه المدير لجناح رئيفة ويدعك فى عينيه وهو غير مصدق مايرى : دى مش رئيفه يادكتور أنتم عملتم فيها أيه
- هوه هوه.. ده أحنا عملنا معاها شغل جامد قوى وآدى النتيجه قدامك زى ما أنت شايف والله ماليك عليا حلفان ياسى إبراهيم العمليات دى لو أتعملت فى الخارج مش حتكون بالنظافة دى ولا بالسعر ده
- أتكلفت كام يادكتور .. 225 الف جنيه وأحنا كرمنها من عندنا وعملنا لها شغل بالليزر مجانا فوق البيعة
- بتقول 225 ألف وحجيب لك منين المبلغ ده أن شاء الله
- أيه انت مش بتشتغل فى الكويت
- كويت ايه يادكتور أللى بتتكلم عليها أنا راجل على قد حالى بشتغل مبلط سيراميك والست أللى قدامك دى مريضه نفسياً وآدى روشتات العلاج وبندور عليها بقالنا 15 يوم وأللى أنتم عملتوه ده جريمة ونصب وأحتيال وأنا حقدم فيكم بلاغ للنائب العام
- ده أنا أللى حبلغ النيابه فيكم وأخرب بيوتكم وحنحجزها هنا ونصادر الذهب بتاعها وآخد حق المستشفى
- أحجزها على الأقل ريحتنا من جنانها.. ودهب ايه اللى تبيعة ..ده قشرة يابشمهندز تعيش وتاخد غيرها..سلام
القصة رقم (2)
مدام HANSh
يعود فاضل من عمله ولم يجد زوجته سماح بالبيت ووجد ورقة معلقة تشير فيها بأنها بمركز التجميل وستتأخر ولا ينتظرها والغداء بالثلاجة .. يمزق الورقة وهو ساخط من تصرفاتها ويخلع ملابسه ويقوم بتسخين الأكل ويتغدى ويدخل السرير ليرتاح لحين عودتها من الخارج .. ويصحو على صوت سماح وهى توقظه - أصحى يا فضولتى أتفرج على النيولوك الجديد
يتثائب وينظر إليها وهو يهز رأسه : تانى ياسماح نيولوك تانى ياستى أنت عجبانى كده من غير نيو زفت حتخلصى على القرشين أللى ورثاهم من أبوكى فى الكلام الفارغ ده ..أللى معاه لحلوح محيره عند الكوافير يطيره
سماح وهى غاضبه : أنت كده دايما مكسر مقاديفى وأنا بعمل كل ده لمين .. مش عشانك ياحبيبى ..
- ياستى مين قالك أنا متضايق من شكلك أنا راضى .. بس حرام أللى بتعمليه ده مفيش كل عشره أو خمستاشر يوم إلا وتكونى مغيره حاجة فى شكلك.. شويه مراخيرك وشويه لون عينيكى وشوية ودانك غير الحاجات الغريبه والكلاكيع أللى بتطلعلك كل شويه فى جسمك لدرجة أنى حاسس انى متجوز عروسه كاوتش
- ماتبقاش بايخ بقى وقول بالذمه أيه رأيك فى النيولوك الجديد
يرد عليها وهو زهقان : عملوا لك أيه تانى المره دى
- مش حقولك حسيبك أنت تكتشفه بنفسك
يجلس وهو يدقق فيها وهى تدور وتلف أمامه : غيرتى تسريحة شعرك
- لا شعرى زى ماهو دقق يافضولتى
- مناخيرك صغرت حبتين ..لا ركز شويه .. خدودك أتنفخوا شويه .. لا
- خلاص غلب حمارى قولى أنت
- مش حقولك برضه وعلشان أسهل عليك المسألة ..هى حاجة كان نفسك فيها وكل الرجاله بتحبها وبتخاف منها
- فزوره دى ياست سماح لسه رمضان ماجاش .. قولى صحيح غلب حمارى
- فكر وشغل مخك وبص لى شويه وأنت تعرف
- حاجة بتحبها الرجاله وبتخاف منها .. أنا عارف أن معظم الرجاله بتحب الجزأ أللى يبدأ من تحت الرقبه .. هى الحاجة دى باينه ولا مستخبيه
- يوووه عليك يا فاضل .. حسهل أكثر .. هى حاجة فوق مش تحت وفى الوش بتبان لما الواحد بيضحك أو يتكلم
- أكيد يا سنانك يالسانك يانهارك أغبر عملتى فيهم أيه دول كمان
- شوف سنانى بقى شكلها أيه والضب راح والسنان أللى كانت راكبه فوق بعضها أختفت زى بتوع أنغام المطربه أيه رأيك بقى
- أكيد كلفتك العمليه دى مبلغ وقدره
-مش مهم أنت بتدفع حاجة من جيبك
- أللى أنت بتعمليه ده أسمه عته وهطل وجنان
- أومال لوعرفت الخطوه الجايه هتعمل ايه ..حتعملى ايه أن شاء الله قولى وفرحينى .. لا خليها مفاجأة .. كفيانى مفاجآت ياسماح وقولى ناويه تعملى أيه
- طب حسألك سؤال وتجاوبنى عليه بصراحة لأن أجابته ضروريه للمرحلة الجاية
تفتكر مين أحلى نانسى عجرم ولا هيفاء وهبى ولا شكيره
- عايزه الحقيقة أنا بحب نانسى فى رقتها وهيفاء فى شقاوتها وشكيره فى رقصتها ولو خيرونى لضربتهم فى الخلاط لأعمل كوكتيل جديد أسميه هنش
- هنش !! أشمعنى يعنى الأسم الوحش ده
- دماغك ماتودكيش بعيد ياسموحة فكل حرف من الأسم بيدل على صاحبته فالهاء هيفاء والنون نانسى والشين شكيره
- أفتكرت يالئيم .. عموما هى فكره تجنن حقول للدكتور عليها ..حلوه هنش دى
- قوم ياوليه من قدامى هنش ينهشك
هههههه
الحلقة رقم (3)
بروفيل عثمان
عثمان السمنودى يبلغ من العمر 35 عاما ولم يتزوج ليس لعدم الرغبة فى الزواج ولكن لرفض البنات قبوله كعريس لما يمتلكه من شكل كاريكاتورى عجيب عندما تراه لا تملك نفسك من الضحك بصلعته اللامعة المميزه وكرشه الممتد أمامه وقصر قامته وأنفه ذات التقويسه الغريبه وفمه وشلاضيمه وأسنانه والنظارة الطبيه السميكة قعر الكوباية التى يلبسها بصفة مستمرة ولكنه لم ييأس بالمره وأعاد المحاوله مئات المرات لما يمتلكه من روح مثابره وقلب محب ولهان للجمال الأنثوى وفى النهاية أخذ بنصيحة صديقه عزمى الذى أشار عليه بعمل نيو وديفرانت لوك لرفع أسهمه وقبوله لدى الحريم
عثمان : تفتكر ياعزمى ياخويا أن عمليات التجميل دى حتفك بوارى وأقدر أتجوز
عزمى: أضمنها مليون فى الميه أن ماكنتش بعدها تتجوز أربعة وتحط أتنين على يمينك وأتنين على شمالك ما بقاش أنا عزمى .. الطب أتقدم ياعثمان أنت مش عايش فى الدنيا ولا أيه .. وبعدين أنت ربنا فاتح عليك من وسع حتقدر تصرف على العمليات من غير ما تتزنق
- تفتكر أنهو أحسن دكاترة مصر ولا دكاترة بره
- بره طبعا راح تضمن الشغل هناك ميه ميه
-أنا خايف ياعزمى تكون عمليات نصب وأضيع القرشين على الفاضى وأرجع أيد ورا وأيد قدام وكأنك يا ابو زيد ماغزيت
- حتخاف من أيه أنوى أنت وأتكل على الله وأنا حطلع لك من على الأنترنت أسماء وعنواين مراكز التجميل العالمية ونتصل بهم ونشوف أسعارهم وأمكانيتهم
- يبقى كتر خيرك ..- بالمره هات لى صوره حديثة كامله من اول راسك لحد رجليك وتكون بالمايوه
- مابلاش بالمايوه بلاش فضايح أنهى مصوراتى حيرضى يصورنى بالمايوه
- عندك حق بسيطه أصورك أنا بالموبايل وأنقل صورتك على الكمبيوتر ونبعتها على الأميل أيه رأيك ياعم
- أنا مش عارف أودى جميلك ده فين ياعزمى ونعمة الصداقة
- قوم ياله أصورك .. بس أنا معنديش مايوه أصلا لأنى مالقتش مقاسى ماينفعش
بالشورت الداخلى
- ينفع طبعا وأوقع ..قوم ماتضيعش وقت نروح عندى البيت أصورك هناك
يدخل عثمان غرفة عزمى ويغلقان عليهما الباب ويخلع عثمان ملابسه ويقف ليلتقط له عزمى مجموعة من البوظات الكامله بالوجه والجنب والخلف وفجأة تفتح أم عزمى الباب بعد أن قامت بأحضار الشاى فتفاجأ بعثمان وهو واقف عارى بالشورت الداخلى فترقع بالصوت وترمى صنية الشاى فى الأرض .. يجرى عثمان ليتوارى خلف الستار وهو فى منتهى الخجل ويخرج عزمى خلف والدته ليفهمها مايحدث ولكنها كانت تنظر إليه بعين الشك والريبه وفى النهاية تقتنع
- يعنى يابنى أيه لزمته الفضايح دى تنزل صورته على الكمبيوتر علشان يتفرج عليها الأجانب .. ماياخد بعضه ويسافر أحسن بلا قلة قيمه .. بس ياواد ياعزمى صاحبك ده حالته صعبه قوى والا بطنه أللى تفطس من الضحك عامل زى الست الحامل فى التاسع .. يارب يكون بفايده
- خلاص يا امى ما تفضحناش وماتجبيش سيره أنا عارف أنك مابيتبلش فى بؤك فوله .. أسكت ياواد ودى حاجة تتقال ..
يقوم عزمى بالأتصال بمراكز التجميل حول العالم ويرسل لهم صور عثمان على الأميل وجاء الرد بأسرع مايتخيل ويجلس هو وعثمان يستعرضان كافة العروض والمميزات حتى أرسلت له شركة فرنسيه عرض عجيب ومرفق معه صورة لعثمان بعد التعديل وتتعهد بأنها ستقوم بعمل هذه التغيرات مقابل 30 ألف دولار
بخلاف مصاريف الأقامة ويمكن أن تدفع مصاريف الأقامة لو وافق على أستخدام صوره قبل وبعد العمليات للدعاية
ينظر عثمان مليا للصوره المعدله وهو لا يصدق أن يتحول لهذا الشكل الجميل
عزمى : أيه رأيك يا عثمان فى العرض ده شايفك كده راضى عنه
- أبعت لهم يا عزمى أنى موافق على جميع شروطهم وخليهم يحددوا ميعاد السفر
-ينصر دينك يا عثمان ويقوم يقبله ( تدخل أم عزمى وهمان يحتضنان بعض فترمى صنية الشاى وترقع بالصوت وتخرج مهروله من الغرفة وورائها عزمى)
- أجرى ياعم شوف أمك أحسن دى حتفضحنا تانى الست دى ماورهاش حاجة غيرنا هههههه
الحلقة رقم (4)
أنا مش أنا
- عيب يامه ماتقوليش الكلام ده .. أبنك راجل مالوش فى المسخره وقلة الأدب
- تقدر تفهمنى معنته أيه المنظر أللى شوفته
- يا امى ياحبيبتى أحنا خلاص لقينا حل لمشكلة عثمان على النت والراجل من فرحته قام باسنى فيه ايه دى وكلها اسبوع يسافر فرنسا يعمل العمليه ويرجع زى الفل- عملية أيه ياواد أوعى تكون عمليه من العمليات بتاعة سالى وحفيظه أللى كانوا رجاله وأتقلبوا ستات
- ياسلام عليكى يامه أعمل أيه عشان تقتنعى وتطلعى الأفكار الوحشة من مخك
- أنا مش عارفه شاغل نفسك بيه قوى كده ليه
- مش صاحبى يامه أسيبه فى زنقته ده أنت لو تعرفى بيتعذب قد أيه حيصعب عليك .. الراجل مفيش واحده راضيه بيه كل مايتقدم لواحده ترفضه
- جيل معفن آخر زمن ..الراجل مايعبوش ألا جيبه ايه الدلع الفاضى ده .. كنت قولى وأنا كنت شوفت له عروسه زى الفل .. البنات الغلابه كثير وفيه ناس بدور على الستر .. يسافر يابنى وييجى بالسلامه
وفى المطار يودع عزمى صديقه عثمان وهو يطلب منه أن يدعو له أن ربنا يوفقه فى هذا المشاور الذى سيحدد مستقبله
يغيب عثمان لمدة شهر وتنقطع أخباره فيقوم عزمى بالأتصال بمركز التجميل فى فرنسا للأستفسار عن صديقه فيرد عليه المركز بأن مستر عثمان أجريت له كافة العمليات وغادر المركز منذ أسبوع يحزن عزمى ويقول فى نفسه أخص عليك ياعثمان بعد أللى عملته معاك مش عايز تورينى وشك .. أموت وأشوفك .. يقوم من فوره وياصل ببيت عثمان فترد عليه والدته
- أيوه يا تانت أنا عزمى ..عثمان وصل بالسلامه
- أزيك ياعزمى يابنى ياريتك تيجى تشوفه ماله من ساعة مارجع من السفر وهو قاعد فى أوضته ومابيكلمش حد مش عارفه أيه أللى جرى له .. أنا جاى حالا
يرتدى ملابسه وينزل على الفور للأطمئنان على صديقه..تفتح له أم عثمان
- هو فين ياتانت ..أهو عندك أهه فى أوضته
يستأذن ويدخل فيجد عثمان يجلس أمام المرآة وهو صامت وقد تغيرت ملامحه تماما وظهر شعر كثيف مكان صلعته وتغير شكل جسمه وأختفى الكرش فلم يعرفه
- أنت عثمان يا عثمان مش ممكن ألف حمدلله على السلامه
- ينظر أليه عثمان وعلى وجهه علامات الحزن الدفين : الله يسلمك ياعزمى أتفضل أقعد معلش ماتزعلش من مقابلتى لو عرفت حتعذرنى
- خير أيه اللى حصل أنا شايف أنك أتغيرت تماما بقى شكلك حلو قوى ياصاحبى
- صاحبك ده كان زمان قبل ماسافر..دلوقتى مابقتش صاحب حد
- أنا زعلتك فى حاجة ياعثمان ..- لا بس انا مابقتش عثمان أنا بقيت واحد تانى معرفوش .. عثمان أللى تعرفه مات وأدفن فى فرنسا
- الله أومال أنت مين ..- أنا نفسى ما أعرفش أنا مين .. أنت عمرك جربت الشعور بالضياع ومحو للشخصيه .. أنا مش عارف ياعزمى أصالح نفسى ..كل ما أبص فى المرايه بكره نفسى والشكل أللى بشوفه قدامى
- معلش ياصاحبى واحده واحده حتاخد على شكلك ومنظرك الجديد
- أنا بقالى عشرة أيام وأنا بحاول مش قادرحاسس أنى أنا مش أنا تخيل نفسك صبحت الصبح لقيت كل حاجة أتغيرت فيك شعرك مراخيرك لون عينيك كرشك وزنك وتقلك على الأرض أللى عشت بيهم 35 سنه تفاجأ بأنهم أختفوا وتبخروا
- بس أنت روحك زى ماهى وعقلك وفكرك ماتغيروش
- روحى وعقلى وفكرى كانوا راكبين فى قالب ربنا خلقنى بيه.. مش قادرين يتكيفوا مع القالب الجديد أللى غيره الجراح
- تؤ تؤ .. أنت محتاج فترة نقاهه على ما تتعود على الوضع ده
- أنا قولت لهم الكلام ده فى فرنسا .. قالوا لى أنى محتاج لفترة 6 أشهر على الأقل تحت أشراف طبيب نفسى
- وماله ماتروح لدكتور نفسانى يساعدك علشان تمر من المرحلة دى بس انت بقى شكلك أحسن كثير قوى من الأول
- ماتجيبش سيرة شكلى ينعل أبو شكلك .. أنت السبب فى النصيبه دى وأنا صدقتك ومشيت وراك ..لعنة الله على الجواز وأللى عايز يتجوز بالطريقة دى قوم من قدامى وسيبنى أنا عايز أستريح
وتمر أيام بعد زيارة عزمى لصديقه عثمان ليسمع خبر أنتحاره بعد أن شنق نفسه فى غرفته وترك رساله بها بضع كلمات
رحلت لأبحث عن جسدى الذى ضاع
تمت
