صفيه فى الخلاط

قالتها وهى تمد يدها لتأخذ أجرتها : أصل أنت ما جربتش الفقر يابيه

-        فقر أيه أللى بتتكلمى عنه ماهو أنت زى الفل أهه لابسه ومتشيكه وبتقبضى الفين جنيه مابيخدهمش خريج جامعة

-        خريج الجامعة ماعندوش خمس عيال بيتعلموا ولا بيدفع أجرة بيت ولا ميه ولا كهرباء ولا دروس خصوصية ومابيشتغلش 12 ساعه زيى

-        جوزك فين من الكلام ده أنا أعرف أنه بيشتغل هو كمان

-        جوزى أرزقى ياباشا يوم يشتغل وعشره لأ ماخلاش شغلانه ألا لما أشتغلها تلاقيه مره بياع ذره وشويه عامل تراحيل وفواعلى وسواعى يكسح بكبورتات وعتال وأهى ماشيه لكن أللى زاد وغطى هو الغلاء أللى مابيرحمش .. تصدق وتأمن بأيه أن صنف اللحمة والفراخ مادخلتش بيتى من 3 شهور وبعد الغلاء ده مش حتخش أبدا .. الحكومه ممكن تزود موظفيها لكم أحنا فى الشغل الخاص ما بنزدش  ولو طلبنا زياده صاحب الشغل يستغنى عننا ولا لينا عقود ولا تأمينات ووقعنا فى أيدينا من لا يرحم الحكومة عماله تزود فى الأسعار وأصحاب العمل المصاريف لما بتتقل عليهم بتغلق مصانعها ومحلاتها وشركاتها وتشرد عمالها وموظفينها

-        يلزمك كام علشان تقدرى تعيشى أنت وعيالك وجوزك

-        على الأقل 10 آلاف جنيه فى الشهر فى الظروف المهببة أللى أحنا عايشينها

-        وأنت بيدخلك كام فى الشهر

-        حوالى 4آلاف جنيه أنا وجوزى وبنستلف أربعه زيهم علشان نكمل الشهر.. أحنا يابيه مش عايشين.. أحنا بناكل فى بعض زى السمك حسألك سؤال جربت تاكل طقه واحده فى اليوم .. جربت تلبس جزمه مستعمله من بتوع الروبابيكيا ويجيلك جرب زى الواد ميزو أبنى جربت تقف فى طابور الجمعية علشان تصرف نصف التموين جربت تمشى كل يوم عشره كيلو علشان تروح شغلك لأن ما معكش أجرة المواصلات جربت تسكن تحت بير السلم فى أوضه مافيهاش شباك ..جربت تاكل أرجل وأجنحة الفراخ جربت تاكل فول 3 طقات لحد مايجيلك أمساك مزمن  .. لو ماتعرفش ده تبقى مش دريان بالفقر ولا بالفقراء

-        تحبى تقولى أيه للحكومه

-        أنا شوفته وهو بيتكلم فى التليفزيون وعمال بيمسح فى دموعه صرخت وولولت  وكنت عايزه أشق هدومى عارف ليه .. الراجل ده مش حاسس بينا ولسه بيمثل علينا فاكرنا هبل ولا بهايم .. أحنا مش عايزين دموع ياريس وفر دموعك .. أحنا عايزين مم لينا ولعيالنا .. أرحمونا ربنا يرحمكم