لسه فاكر !!
- أيوه فاكر مش ناسى ..أسألى عن أى حاجة وأنا أقولك
- فاكر لما أتقابلنا أول مره
- أيوه فاكر كان يوم الأحد 20 نوفمبر سنة 1990 أمام حديقة الأسماك
- فاكر كنت لابسه أيه
- كنت لا بسة جيبه بنى وبلوزه بيج وشنطة وجزمه كعب عالى وبالأمارة كانت ضيقه على رجلك لأنك كنت شرياها جديده وكنت ماشيه بتزكى وأخدنا تاكسى يوميها لأنك ما أقدرتيش تمشى
- فاكر لما جيت تحاسب سواق التاكسى ودورت فى جيبك مالقتش ألا ربع جنيه مقطوع ووقفت مرتبك وحيران مش عارف تعمل أيه
- فاكره لما دورتى فى شنطتك مالقتيش غير خمسين قرش .. والراجل كان عايز أتنين جنيه وأضطريت أننى أكمل بالتاكسى لحد البيت وطلعت جيبت فلوس من أمى الله يرحمها
- فاكر أول هدية قدمتها لى
- دبدوب أبيض وفى رقبته شريطه حمراء
- فاكر لما جيبت أختك معاك عشان تتعرف عليا قبل ماتتقدم لى
- طبعا هو يوم حيتنسى أول ماشافتك وقعت من كثر الضحك وطلعتوا أنكم كنت زمايل فى فصل واحد ومدرسه واحده يوميها قعدت أنتم الأتنين تفتكروا ذكريات المدرسة ونسيتونى وحرمت أجيبها معايا تانى
- فاكر لما جيت أول مره تقابل بابا عشان تطلبنى منه
- فاكر ياستى لما أبوكى قعد يقسم عليا هو وأخوكى الرزل أللى كان قاعد يبص لى من فوق لتحت أكنى جاى أشحت منه وأستحملته عشان خاطرك
- فاكر لما نزلنا نشترى الشبكة وأمك عملت لنا مشكله آل أيه ثمنها غالى وكانت أول خناقة بين أمى وأمك وكان الموضوع حيفشل وكل واحد يروح لحاله
- الله يرحمهم جميعا.. بس فى الأخر وافقوا وبقوا اصحاب ومنساش يوم الفرح لما قاموا يرقصوا سوا هما الأتنين وفى الأخر حضنوا بعض وقعدوا يعيطوا
- هيه.. كانت أيام حلوة وكانت الناس حلوة والعيشة كانت حلوة
- فاكرة أول عيد حب مر بينا قدمت لك أيه
- هو فيه عندك غير الورده الحمراء بتاعة كل مره
- وآدى ورده السنة دى ياستى ..كل حب وأنت طيبه
- وأنت طيب يا حبيبى ..
- المهم حتفضل فاكره ولا مشاغل الدنيا حتخليك تنسى
- أنا عمرى ما حنسى
- ياريت كل يوم يبقى عيد للحب علشان نفتكر ذكرياتنا
- كفاية كده النهارده نخلى شويه لبكرة
- الحب عمره مايخلص ألا من القلوب الخربانه
- تفتكر حييجى علينا يوم مانحبش بعض
- ربنا يجعل أيامنا كلها حب فى حب..نعيش فى حب وناكل حب ونشرب حب ونموت على حب
- تصبحى على خير
- وأنت من أهل الخير .. مش ناسى حاجة
- يييه كنت حنسى ...أممم... أممم.... أممممه
هههههههههه
ليست هناك تعليقات:
إرسال تعليق