وليد مشاريع

وليد مشاريع

وليد وهو يهرش رأسه ويشد نفس طويل من الشيشه ويكلم حسام بجدية مفرطة

- عارف يا أستاذ يا حسام عندى ليك حتة مشروع أوعى .. حيخلينا ناكل بسبوسه

بس أنت أسمعنى وطرطأ لى ودانك

حسام وهو يتثائب : قول ياوليد أنا بقالى ساعتين بسمع أهه ولا مشروع من أللى أنت قولتهم لبس فى دماغى لحد دلوقتى أطلب لى سحلب بالبندق

-  وعندك واحد سحلب وصلحه ..ماهو أنت يا باشا أللى مطخن دماغك ومرعوب وخايف على القرشين أللى معاك .. ودى فلوس يا جدع

- لا مش فلوس دى ورق تواليت .. ياعم قول لى كلام يدخل المخ .. أيه مشروع تربية الثعالب فى بوكسات بالذمه ده مشروع

- معترض على أيه على الثعالب ولا البوكسات

- ياعم بلا ثعالب بلا بوكسات أنت شايف الناس مش لاقية تلبس النايلون الصناعى لما أحنا نتاجر فى فرو الثعالب وحياة أبوك قول كلام غير ده

- ياعم البرنس ده مشروع يكسب ذهب وليه زبونه من الناس الهاى لايف

- طب ماعملتوش أنت ليه يافالح بدل رميتك على القهوة من صباحية ربنا وصدعتنى بمشاريعك

- كان على عينى يا حسام يا خويا.. لولا الحوجة مره وماعنديش الخميره أللى أبتدى بيها

- يعنى لو كنت وافقتك على أى مشروع من دول مش حتشارك فيه

- أزاى بقى طبعا حشارك ياجدع.. بالخبرة والأدارة وأنت برأس المال والتسويق

- ههههه خبرة أيه يا أبو خبرة أيش عرفك بالثعالب وتربية الثعالب

- أنوى أنت وحتعرف خبرتى وأدارتى للمشروع حتكون شكلها أيه.. أيدك بس على 10 ألاف جنيه فى الأول ننزل نشترى الثعالب عمر شهر من الشرقية والبوكسات السلك .. 3 شهور والعشر بكاوى بتوعك يرجعوا وفوقيهم 10 زيهم

- سيبك من مشروع الثعالب أنا بتشائم منهم وما بحبش أدخل فى مشاريع التربية

آخر مرة دخلت فى مشروع الفراخ البداره.. جائت أنفلونزا الطيور ضيعتهم

- بلاش من التربية أيه رأيك فى مشاريع الملابس الجاهزة

- أنت بتستعبط يا جدع المبلغ أللى معايا ما يكفيش 5 ماكينات خياطة وفين المكان وغير الخامات والعماله

- تؤء توء ومين قالك أن أحنا حنصنع ملابس .. أحنا حنخطف رجلينا لبورسعيد أو القنطرة ونشترى باله ملابس قديمه ونجيبها على هنا ونفرزها ونطلع منها الحتت الكويسه ونغسلها بالبخار ونكويها ونغلفها ونعرضها للبيع فى دكان أبوك

- عموما هى فكرة مش بطاله بس أيه يضمنى أن الباله دى يطلع فيها حتت تستاهل البيع مايكنش كلها ملابس عايزه الرمى

- دى أرزاق بقى باله تصيب وباله تخيب وأللى ماتنفعش نقلبها ونبيعها لتجار الوكاله ..هيه شايفك سكت .. أتكلم قول أيه رأيك

-  أطلب لى نسكافيه

- وعندك واحد نسكافيه يا عطوة للباشا .. هيه شايفك متردد

- لا يعم شوف لنا مشروع أسهل من كده .. لسه حنسافر ونحمل ونقعد نغسل ونكوى ونغلف ويا عالم يا أتباعت لشربناها .. أفتح الله

- خلاص يا عم شوف المشروع ده بقى وأدعيلى .. مشروع الخضار والفاكهه

- خضار أيه وفاكهة أيه ياسى وليد

- حنطلع على سوق العبور نشترى الخضار بالجمله وناخد لنا أوضه فوق السطوح ونجيب كام عيل على كام بت يقعدوا ينظفوا فيه نغلف جزأ وننزل بيه على سوق الحضار ونخلل جزأ ونجمد جزأ فى الديب فريزى نبيعه فى السوبر ماركت والعملية مش محتاجة شطارة ولا فهلوة وأنا برضه حشارك معاك بخبرتى

والأدارة وأنت برأس المال والتسويق

- يا حلاوة أشمعنى يعنى أنا التسويق .. أنا ماليش فى التسويق أمسك أنا الأدارة وأنت التسويق

- ماينفعش يا حسام بيه لأن أللى صاحب رأس المال هو أللى بيقوم بالتسويق بنفسه علشان يضمن يلم فلوسه من السوق

- طب أيه رأيك بقى أنت ولا حتمسك الأدارة ولا التسويق

- أومال حمسك أيه يا حسام باشا

- نادى على الواد عطوة يغير حجر الشيشه .. حجر تفاح هنا يا عطوه

يشد نفس طويل من الشيشة ويسرح قليلا: أنت تمسك الدعاية كفاية قوى عليك

- ماشى يا معلم أنا موافق أمسك الدعاية طب أيدك بقى على مبلغ تحت الحساب علشان نعمل شوية يفط على أعلانات مطبوعة من دلوقتى

- يكفيك كام يعنى

وليد يفرك أيده وهو سعيد : خمس تلاف ماشى

يصرخ حسام وهو معترض:أيه  ..أيه

– طب تلات تلاف ..أيه - طب خمسمياية

- يوووه ده أنت تعبت معاك أنا قايم .. أدفع حساب المشاريب

حسام يهب واقفا ويمسك وليد وهو يستعطفة: ورحمة أمى مافى جيبى ولا مليم

- أيه.. وواجع قلبى من الصبح وعمال أقولك ياباشا ويابيه ونازل طفح فى مشاريب ..سحلب على حلبه على نسكافيه على شاى وقهوة على سم هارى معسل وبتحلف برحمة أمك  أنك مفلس وأللى يشوفك يقول ياما هنا ياما هناك.. غوور الله يخرب بيتك ده أنت واد معفن

ههههههههه

الحلقة الثانية

 مشروع وليد لجمالات العايقة

جمالات أنت متأكده يا أصيله أن الجدع أللى أسمه وليد عنده مشاريع بتكسب دهب

- الحقيقة يا خالتى أنا سمعتهم فى الحارة بينادولوه وليد مشاريع .. قولت أنه حيقدر يساعدك ويفكر لك فى مشروع حلو ومحندق على قدك بفلوس التعويض بتاعة المرحوم جوزك

- ياريت يابت يكون الواد ده شاطر زى مابتقوللى يبقى ححليلك بؤك ..هو أيه أللى أخره لحد دلوقتى

- والله ياخالتى سايب له خبر على القهوة ماتقلقيش زمانه جاى

يدخل وليد وتستقبله جمالات وأصيله بالترحاب وهو يحمل معه شنطه سمسنايت

ويجلس أمامها ويفتح الشنطه

- خير يا خالتى جمالات أأمرى

- قبل ما نتكلم يا خويا تحب تشرب أيه ولا أحط لك لقمه تتغدى

- نخلى المشاريب بعد الغداء ياخاله

( تقوم جمالات لتحضير الغداء وتجلس أصيله بنت أختها مع وليد يتهامسان )

- تفتكرى يا أصيله أن خالتك حتوافق على المشاريع بتاعتى

- طبعا حتوافق ..- مش قصدى ما قولتليش هى معاه خميرة كويسه ولا تعبانه

- معاه قرشين التعويض على الورث على الصيغة على دفتر توفير مش عارفه فيه كام .. بس بقولك أيه أوعى تاكل عمولتى

- عمولتك محفوظه ياجميل وممكن أدخلك معاها شريكه لو معاكى قرشين

- لو عجبنى المشروع أدخل ما أدخلش ليه

- طالما كده عندك أستعداد ماتيجى أعملك مشروع محندق على قدك أدخل معاكى فيه بالأدارة والخبرة

- شوف خالتى الأول ويبقى لينا كلام بعدين مع بعض

يتغدى وليد ويشرب الشاى ويجلس مع جمالات وأصيله ويقوم بعرض مشاريعه

وليد : ليك فى التجارة ولا فى الصناعة ولا فى الزراعة

تضحك جمالات : تتك أيه ياسى وليد صناعة أيه وزراعة أيه قولى ليكى فى الطبيخ ليك فى التنفيض .. طول عمرى قاعده فى البيت متستته

- كويس يبقى مالكيش غير التجارة وأنت قاعده برضه فى البيت متستته

- براوه عليك كمل

- عند لك مشروع يمشى مع أمكانياتك ولا حتروحى كده ولا حتيجى كده وفلوسك حتيجى فى رجلين الحمام

- أزاى يعنى وضح يا بنى أنا مش فاهمه

- شوفى ياستى حنبنى غية حمام فوق بيتك .. مش البيت ملكك برضه

- أيوه يا خويا ملكى .. وبعدين

- حنشترى 100 جوز حمام زاجل على يمنى على مالطى على هزاز على شقلباظ

ونربيهم فى الغية لحد مايكبروا وياخدوا على المكان ونطلع كل يوم نطيرهم

- طيرناهم وبعدين

- بس.. أتفرجى بقى الحمام لما يرجع وعديه حتلاقى الميتين حمامه بقوا 250 ..نحجز الخمسين ونقصقص ريشهم أخدهم منك وأنزل على سوق الحمام نبيعهم وآخد عمولتى وأقبضك الباقى

- وعمولتك دى كام ياسى وليد

- مش حنختلف يا خاله 20 % كويس غير مصاريف النقل والموصلات

- لكن قولى ياسى وليد الخامسين حمامه الزياده حييجوا منين

- شوفى ياستى أحنا حنجيب ال100 جوز كلهم دكره وهما بقى يصطادوا النتى أللى طيارين فى الهواء ويجيبوهم على الغيه

- هم الخمسين نتايه دول مش بتوع ناس برضه

- فيه وفيه فى نتى بتاعة ناس وفى نتى طايره على حل شعرها وأصحاب غيات الحمام عارفين كده وماحدش بيزعل .. قولتى أيه يا خالتى

- أنا موافقه .. نقرأ الفاتحة ونمضى الأتفاق ومن بكره أجيب النجار يبنى العشة وبعد ماتخلص أنزل أشترى لك الحمام ..أتفقنا

وبعد أسبوع من الأتفاق تكون غية الحمام جاهزة للطيران ويقف وليد فوقها ويطلق أول دفعة ثم تانى دفعة وهو يصفر لها ويشاور لها بالبيرق الأحمر وخالتى جمالات وأصيلة واقفين يراقبوا مايحدث وطار الحمام بالكامل ودار حول الغية ثلاث دورات وأختفى فى السماء ولم يظهر له أثر ووليد يشاور بالبيرق ويصفر ولا تظهر أى حمامه فى السماء تصرخ جمالات الحمام راح فين يا منيل

- أصبرى يا خاله زمانه راجع ومعاه النتى

- نتى ده أنت يومك مش فايت

يتبع

الحلقة رقم (3)

وليد يقف مذهولا فوق عشة الحمام وهو يحملق فى السماء ويدعو من كل قلبه أن يمر هذا اليوم على خير وخاصة الست جمالا ت ماشاء الله ..صحتها مساعداها وهى تنادى عليه أن ينزل وألا ستصعد له وتحبسة فى العشة لحد مايبان له صحاب ويسمع أصيله وهى تصرخ وتهلل فقد شاهدت الحمام يحلق من بعيد فيسترد أنفاسه ويظل يشاور بالراية ويصفر لها ونزل من فوق العشة فيبدأ الحمام يقترب رويدا رويدا حتى يحط بأعدا كبيرة فوق العشة فيتقدم نحو جمالات وهو نافش ريشه وهو يقول : مين ده ياست جمالات أللى حتحبسيه فى العشة أنا عملت نفسى مش سامع .. أى كلمة تانى حقدم أستقالتى

- والنبى ياخويا بلا أنعرة فارغة تقولش حتستقيل من الوزاره ياخيى

- وبعدين معاك ياست جمالات مش عايزين تريقة خلينا نشوف شغلنا .. هاتى يا أصيله القفص أللى عندك ده خلينا نشوف الدوكره جابت أيه معاها

يصعد وليد للعشة ويفرز الحمام الجديد من حمامه القديم الذى قام بتعليمه من أرجله بدبله خضراء ويملء القفص وينادى على أصيله أن تناوله القفص الثانى ويملئه بالحمام.

- شيلى يا ست جمالات أنت وأصيله الأقفاص وأنزلوا بيهم على الشقة تحت

وأتسلوا أنتم الأتنين فيهم قصقصوا ريشهم لحد بعد بكرة الجمعة أطلع بيهم على سوق الحمام

جمالات : ماشى ياسبع البرمبه لك حق ياوله عفارم عليك

يتركهم وليد وهو مزهو بنفسه وينزل على السلم فتجرى أصيله خلفه وهى تنادى عليه: أستاذ وليد أنت رايح فين .. أستى أنا عايزاك فى كلمتين

- هه قولى خلصينى عشان ورايا شغل مش فاضيلك معايا زبون مهم لطعة على القهوة ..

- بقول أيه ماتشوفلى مشروع محندق على قدى آكل منه عيش لحد ماربنا يرزقنى بأبن الحلال بالقرشين أللى شيلاهم للجواز وهو نشتغل والأيد البطاله نجسه

- هه معاك كام .. – معايا 8آلاف جنيه أول عن آخر نشغل خمسة ونشيل الباقى

- دى مش فلوس ياماما تنفع لمشاريع وعلى كلن حشوفلك مشروع على قدك حقولك عليه لما أجى بعد بكره آخد الحمام .. سلام ..ماتنساش ياسى وليد

يصل وليد إلى القهوة وهو معنوياته فى السماء بعد نجاحة فى مشروع الحمام ليقابل المعلم حسنين صاحب كافيتريا من بعد الأشواق

- أتأخرت عليك يامعلم معلش أصل كنت بعاين مشروع لجماعة حبايبنا ..خير

- ناس الحقيقة دلونى عليك وشكروا فيك قوى ومالقتش غيرك أستشيرك.. الكافتيريا بتاعتى بتطل على الشارع العمومى ماأنت عارفها مش جايبه همها أنا بدفع من جيبى الكهرباء والمياه وأجرة العمال وعايز أقلبها مشروع تانى يكسب

- كويس معاك كام علشان تغير النشاط

- ماعييش غير خمستاشر ألف جنيه قوللى بقى يا أبو التفانين حتعمل فيها أيه

فيه ناس قالوا أقلبها سوبر ماركو وناس قالت لى أقلبها محل جزم وناس قالت أقلبها ملابس جاهزه وأنا ولا بفهم فى البقاله ولا فى الجزم ولا الملابس لا مؤاخذه

- عارف تعملها أيه يامعلم ..- قول ياوش السعد ياأبو مخ نوير

- تقلبها كافتيريا ..- أيه ماهى كافتيريا ولا أنت مالكش مزاج تشورنى .. ياعم حندفع لك عرقك ولا قالوا لك المعلم حسنين بياكل عرق الناس

- يا عم حسنين أنا عاينت الكافتيريا وشوفتها ومكانها زى الفل وما ينفعش غير يكون كافيتريا بلدى

- يعنى أيه كافيتريا بلدى ياسى وليد

- ياعم حسنين أحنا فى منطقة شعبيه الناس بتحب تقعد على القهوة منها للشارع مابيكلش معاهم جو الكافتريات

- طب والعمل .. أيدك الأول وأنا أقولك تعمل أيه  أهرش الكلام ده كلام متكلف مش حتسمعه فى أى حته

- خمسناية كويسه ..كويسة بس لي 10 % من التكاليف ومشاريب بالمجان لمدة سنه موافق يامعلم ..

- موافق ياسيدى قول بقى خلصنى  

يتبع

الحلقة رقم (4)

يبدأ وليد فى شرح خطوات تطوير كافتيريا المعلم حسنين بعد أن أنتقلا لموقع الكافتيريا .. وليد : أولا يامعلم حتشيل يافطة كافتيريا وتشيل الأزاز أللى فى مدخل المحل وتفتح الواجهة وتهد الحيطة دى وتلزق مرايات هنا من الأخر كده حنحولها لقهوة بلدى عادية والنصبة حتكون فى الأخر أما الدور التانى حنحوله لقاعدة للفيديو ومشاهدة المباريات يعنى تلحق تجيب أشتراك لمحطات الرياضة قبل مباريات كأس العالم غير الأشتراك فى باقة الأفلام أما الجزأ ده حنعمله بلاى أستيشن وأنترنت وده حيبقى ليه نظام لوحده

- على النعمة ما فاهم حاجة

- مش مهم تفهم يا معلم المهم تقبض وتدعيلى

- طب حنبدأ أمتى ياسى وليد .. نبدأ من بكرة لو حبيت تقفل الكافتريا وتعلق يافطة مغلق للتحسينات وقريبا أفتتاح المقهى الثقافى للشباب

- أنت تمسك الشغلانه دى يا أستاذ لحد ما أستلمها فى الأخر بس ماتزودش عن ال15 ألف أللى معايا

- يعنى لوزادت أو نقصت مش مهم وماتنساش أتفاقنا

فى اليوم التالى يبدأ وليد فى تحويل المحل لقهوة بلدى وبدأ العمل على قدم وساق وتعاقد على الأجهزة والمعدات الجديده والمعلم حسنين غير مصدق بأن هذا المشروع سينجح ..وفى يوم الجمعة يذهب لبيت جمالات ليستلم الحمام لبيعه فى سوق الحمام فتطلب أصيله أن تذهب معه للسوق ويركبا سويا عربة نصف نقل لتقلهما إلى هناك وتجلس أصيله بجوار وليد فى السيارة

أصيله : فكرت فى المشروع بتاعى ياسى وليد

وليد : عندى لك مشروع أنما كده.. بس عايز شطارة فى الطبيخ

أصيله : أيه حشتغل طباخة ياسى وليد

وليد : أنت بتعرفى تعملى كشرى ومكرونه

- ده أنا أكلك طبق كشرى من أيديا أحسن من أجدعها محل فيك يامصر

- وفرتى عليا نص المشوار .. عارفه يابت المدرسه الأعدادى أللى وراكم .. آه عرفاها .. أحنا حنبدأ من هناك حنعملك عربية كشرى تقفى بيها قدام المدرسة وممكن تتحركى بيها جوه سوق الخضار .. أيه رأيك فى الفكره دى أهى على قد فلوسك مش حتتكلفى غير ثمن العربية والحلل والعدة والأطباق والكوبيات وشوال رز على شوالين مكرونه على عدس والباقى أنت عرفاه أيه رأيك

- ينصر دينك يا أستاذ

- ولو ربنا كرمك تفتحى محل صغير فى الحته وأضمن لك انك حتبقى المعلمة أصيله ملكة الكشرى وماحدش حيعرف يكلمك يابت بعد كده.. بس لعلمك الشغلانه دى عايزة بنت جدعة مفيش مياصة وأنا شايف أنك حتفلحى فى الشغلانه دى

- طب نبدأ من أمتى

- مالكيش دعوة سبينى أتفق مع النجار يعملك العربية وكل حاجة حنجبها وقت مايكون النجار شغال وأنزلى السوق وأتفرجى على بتوع الكشرى بيشتغلوا أزاى

وأتعلمى وأنت وشاطرتك يامعلمه

- حق لو المشروع ده نجح يا أستاذ وليد ليكون لك كل يوم صحن كشرى مجانا هههههه

يصلا إلى السوق ويبيعا الحمام ويقفلا راجعين إلى بيت جمالات

وليد : أفتحى أيدك يا خاله جمالات أقبضى آدى أول 400 جنيه بعد المصاريف وعمولتى وأديكى عرفت أصول الشغلانه شوفى بقى حد من عندك بقى يشغل الغية لأنى مش فاضى اليومين دول عندى شغل فى الكافيتريا

- ربنا يخليك ويخلى مشاريعك ياوليد يا أبن .. هى أمك أسمها أيه

- مالكيش دعوة بأمى .. وياريتك تربى جنب شغلانة الحمام شوية فراخ على بط وعلى وز والسطوح واسع وأن شاء الله حتبقى فل الفل

- حاضر يا خويا ربنا يكرمك ويوفقك ويرزقك ببنت الحلال .. بقولك ايه ما تتجوز البت أصيله دى بت جدعة وطيبه ومش حتكلفك لا ابيض ولا أسود

- أحقق بس المشروع أللى بحلم بيه الأول وبعدين أفكر  فى الجواز ياخالتى

الحلقة رقم (5)

ملكة الكشرى

تبدأ أصيله مشروع الكشرى بعربية يد أمام مدارس الحى وسوق الخضار ثم تستقر فى السوق بعد أن عرفها الزبائن من البياعين ومرتادى السوق وتستعين بأولاد أختها فى توصيل الطلبات وأعداد الكشرى وتجهيزه وتظهر عليها أثار النعمة وتبدأ فى البحث عن محل صغير ليكون البداية لعالم الكشرى والمكرونه فترسل فى طلب وليد مشاريع ليعاونها فى البحث عن محل مناسب ويحضر ليقابلها

أصيله وهى تستقبله بحرارة : أزيك ياسى وليد عاش من شافك مختفى بقالك مده

- مشاغل يا أصيله خير كنتى عيزانى فى أيه

- عايزاك تشوف لى محل هنا فى السوق بدل واقفة الشارع والبلدية والصحة والعيال الشبيحة أللى بترمى جتتها علينا .. الجدع أللى أسمه كازنوفا عامل عليا فرده بياخد منى كل يوم 20 جنيه ومش عارفه أتصرف معاه

- أستحملى يا أصيله لحد ما تكبر الشغلانة وتثبتى أقدامك هنا وبعدين يبقى لينا صرفه معاه

- ماجاتش من الفرده أهو كلب وبنرمى له عضمه وبنشترى نفسينا أنما رزالته وكلامه أللى زى السم هو أللى مخلينى مش طايقة وعايزه يبقى ليه محل

- بيترازل عليكى أزاى الواد ده

- داخلى فى دور حب وجواز وفى الرايحة والجاية بيعاكسنى بكلام أبيح ياجميل يا أص أص يا مهلبية يا أص أص ولولا السبوبه وأكل العيش لكنت نسلت الشبشب على دماغة

- بيقولك يا أص أص ده واد رخم قوى بس أستحملى يا أصيله ماحدش بياكلها بالساهل

- أنت حتعملى فيها دور ريه وسكينه أنا عيزاك تشوف لى حل وتقف جنبى يا أستاذ على الأقل لما يشوف أن واقف جنبيه راجل يخاف ويتلم

- قصدك أيه أسيب مشاريعى وآجى أقف معاكى على عربية الكشرى

- والنبى سيبك من مشاريعك أللى مش جايبه همها وتعال نكبر المشروع ده

- ما ينفعش يا أصيله الناس تقول أيه وأنا واقف معاكى

- يقولوا أللى يقولوه وأنا حقول أنك خطيبى أيه رأيك بقى

- بس ده يوقف حالك ومايخليش حد يتقدم لك

- مش مهم على الأقل ألاقى راجل يحمينى من غيلان السوق قولت أيه ولا أنا ما أشبهش(تقولها بدلال ) ده أنا لو قولت ياجواز ألف مين يتقدم لى من معلمين السوق ولا أنت نظرك ضعيف  يا أستاذ

- أنت صحيح حلوة ومبقلظه وبنت بلد وجدعة وكل حاجة بس أنا مش فاضى للحكاية دى لأنا عندى مشاريعى وأفكارى وأحلامى أللى عايز أحققها بس تيجى الفرصة

- لو على الفرصة أهى قدامك أبدأ من هنا من على عربية الكشرى وأنا معاك وبدل ما تفكر لغيرك وتبيع دماغك وفرها وركز فى شغلانتنا دى يمكن تضرب معانا

( يهرش وليد رأسه أمام هذا العرض الكوحيتى ويسرح قليلا ثم يقول : مستعد بس على شرط أن ننسى موضوع الجواز ده لحد ما نقف على رجلينا

تضحك أصيله وتمد يدها لوليد بطبق كشرى كماله : أتفقنا يامعلم وليد شيك هاند

- عموما طلبك موجود بس ده عايز فلوس جامده لو عايزه تاخديه تمليك.. وأنا من رأيى نشوفلك محل قانون جديد ولما العملية تبشبش أبقى أشترى محل ياستى

- أنا برضه بقول كده شد حيلك معايا وماتنساش أتفقنا

- ماشى يا أصيله بكرة تيجى معايا تتفرجى على المحل بس صاحبه طالب ألف جنيه فى الشهر وشهرمقدم وشهر تأمين .. حتقدرى يا أصيله على الأيجار

- أقدر ياخويا وربك يسهل والرزق من عنده

- أفهم من كده أن العملية ماشية كويس

- أقولك أيه ماهو أنت ما بقتش غريب الحمد لله مستوره وفل الفل حستناك بكره نروح نشوف المحل

يدخل كازنوفا على أصيله وهى تسلم على وليد بحراره ويبدو فى وجهه الشر وبعد أن يبتعد وليد يقف أمامها وهو عاقد ذراعيه

- نعم .. أفندم .. أى خدمه .. ماتقفش قدامى كده خلينى أشوف شغلى

كازنوفا :يبتسم أبتسامه صفراء : توء توء توء أيه اللون الجديد ده يا أص أص

يتبع

الحلقة رقم (6)

مشاريع وليد السيد

أصيله وهى تكاد تفتك بكازنوفا : أص أص فى عينك أنت بتستهبل ياجدع أنت

كازنوفا :  توء توء توء.. القطة المغمضه طلع لها ضوافر يارجاله  وأبتدت تخربش .. فوئ يابت شوفى بتتكلمى مين أنا كازنوفا ملك السوق بأشارة واحده من صباعى الصغير مش حتلاقى نفسك ولا عربية الكشرى هنا ..مين يابت الواد أللى كنت واقفه بتتكلمى وبتضحكى معاه ده

- بت لما تبتك ده خطيبى  ياصايع ياضايع أنت بتتهجم عليا ياض طب خود ( تضربه بطبق الكشرى فى وجهة ) وخد دى كمان ( تضربه بمغرفة الصلصة وهى مملوئه على دماغه وترقع بالصوت ) يالهوتى يالهوتى ألحقونى ياناس حوشوا عنى الواد الحرامى ده يالهوتى ( لم تعطه فرصة للتفكير فنشبت أظافرها فى وجهه – يتجمع الناس على صراخ أصيله ويسمع وليد صوتها من بعيد فيعود جريا إلى أصيله فيجدها تمسك فى عراك كازنوفا والناس ملتفه حولهم وهو يمسك بيده مطوه يهدد بها من يقترب.. يندفع وليد بكل جرأة ويقبض على يد كازنوفا بقوة ويدخلا فى صراع رهيب يستخدما فيه كل مايطولاه من بضاعة وخضروات وعصى وأسفرت المعركة عن أصابة وليد بطعنة فى يده وهروب كازنوفا بعد أن حضر البوليس وتخلع أصيله طرحتها وتربطها على يد وليد المصابة فينسدل شعرها الأسود الجميل على كتفيها فيبدو جمالها الوحشى كنمرة متوثبه كلها حيوية وعنفوان .. يتم نقلهما لعربة الأسعاف ويرقد وليد وهو ينظر لأصيله وهى تضمد جراحة وتحنو عليه والدموع فى عينيها

أصيله : حقك عليا ياسيد الناس والله ما كنت أعرف ان الواد شايل مطوه فداك أنا

وأللى خلفونى فداك الدنيا دى كولتها

وليد وهو يبتسم : صدق مين سماكى أصيله .. يعنى عايزانى أشوف الواد فاتح عليكى المطواة وأسكت .. أنما أنت يابت بهدلتيه مظبوط كل مايقع على الأرض الاقيكى واقف فوقيه وبتضربيه بالشبشب ماكنتيش خايفه ليقوم يشرحك بالمطوة

- أنا حيجيلى أعز منك ومن جدعنتك ياسى وليد ده مفيش ولا راجل أو شاب قدر يهوب ناحيته لولا أن ربنا بعتك ليا كان زمانى فى خبر كان .. يخليك لشبابك دخلت عليه زى الأسد خلتنى أتجرأت أكتر وجاتنى عافية بقوة 100 راجل  

- سيبك أنت شكلك حلو قوى من غير الأيشارب

تضحك وهى مكسوفه : مش وقته الكلام ده

وليد : لأ بقى وقته تتجوزينى يا أصيله

أصيله : ومشاريعك ياسى وليد

وليد : أنت حتكونى مشروعى الأول والأخير أنت بجمالك وأصالتك وأنا بالأدارة

أصيله : وأنا موافقه نمضى العقد أمتى

- النهارده لو حبيتى ..

- ده أنت مستعجل قوى ماكنش يشوفك من ساعتين وأنت عمال تتشرط ..

- كنت أعمى وفتحت

- يعنى ماتفتحش ألا بضربة مطوه لوكنت أعرف كنت شرحتك

وليد وهو يضحك : أول عيل حتسميه أيه .. لو ولد حتسميه عدس ولو بنت حتسميها رزه علشان تبقى حياتنا كلها كشرى × كشرى

تضحك أصيله وهى تضغط على يد وليد :  ربنا يحقق لنا أحلامنا ونتجوز وأخلف لك عدس ورزه ومكرونه وشطه ... ومشاريع وتفانين وأفكار

- ههههههههههههه أيه ده كله مشاريع وتفانين وأفكار وأحلام كمان

- علشان ينادوا عليك أبو مشاريع راح أبو مشاريع جيى  والواد لما يكبر ينادوا عليه فى المدرسة مشاريع وليد السيد

تمت

لووولى.. لووولى.. لووولى