حكاية وش الفقر ..وبوز الأخص

يحكى أن فى قديم الزمان وسالف العصر والأوان أن فى بلاد العدس والآفوال عندما تلد المرأة لا تقوم بتسمية المولود بل تذهب به إلى المعبد بعد 40 يوما ليتوسمه الكاهن الذى يطلع على النجوم ويختار له الأسم المخطوط فى كتب الطالع والأسحار

وفى ليلة رعداء من ليالى السنين العجاف ولدت  كل من السيده نحس بنت أشمون وجارتها دواهى بنت زعلوك طفلين جميلين فذهبا بهما إلى المعبد بعد الأربعين ليختار لهما الكاهن أسماء تتوافق مع طالع الكواكب والنجوم فأطلق على الأول أسم وش الفقر لأبن نحس ..وبوز الأخص لأبن دواهى  فبكت نحس ودواهى وأستعطفتا الكاهن أن يغير أسماء ولديهما بأسماء آخرى جميلة

نحس : أرجوك ياقداسة الكاهن غير لى أسم ولدى مش كفاية أن أسمى نحس ليصبح أسم أبنى وش الفقر أبن نحس

الكاهن : لا تعترضى يا أمرأة.. النجوم تقول بأن ولدك سيعلو علواً عظيماً وسيكون له شأن فى ذل العباد ولو غيرت الأسم سيفنى ويموت فأرضى به وأنصرفى فى الحال

نحس تنظر لأبنها بعين دامعة : وهى تقول كيف تكون وش فقر وأنت شكلك جميل وذو سن ضاحك  .. أما دواهى فترضى بالأسم وتقول : اللهم لا أعتراض بوز أخص بوز أخص

وبحكم الجيره والدراسة يصبح بوز الأخص بن دواهى  من أعز أصدقاء وش الفقر بن نحس ويتدرجا فى التعليم حتى يتخرجا من المدرسة الثانوية فيلتحق وش الفقر بجيش السلطان ويدخل بوز الأخص مدرسة المهندسخانة وكانت كرامتهما تظهر فى كل مكان يحلون فيه فلو كان أخضر بجف ويذيل ولو كان عمران يحل به الخراب و تكثر الكوارث والنصائب التى تصيب البلاد فيصرخ الناس ويستغيثون ويلجأون لكهنة المعبد لينقذوهم فيشيروا عليهم بطرد كل من وش الفقر وبوز الأخص خارج المدينه

يخرج وش الفقر وبوز الأخص خارج أسوار المدينة  تشيعهما اللعنات وهم يحملان متاعهما وينطلقان فى أرض الله الواسعة عسى أن يجدا مكان يلمهما وبعد مسيرة شهرين دخلا مدينة يقف على أسوارها الناس بالمئات وبمجرد وصولهما لباب المدينة يتدافعون مهللين مكبرين ويحملونهم على الأعناق حتى وصلا لمجلس المدينة وهم فى دهشة من أمرهم  فيستقبلهما كبير الحكماء ويمشى بهما على البساط الأحمر ليعتلى بهما المنصة ويأمرهما بالجلوس ويسألهما عن أسمائهما فكذبا وغيرا أسمائهما.. أنا أسمى وش الخير وهذا صديقى بوز الهنا

كبير الحكماء يقوم مخاطباً الجموع الغفيرة : أيها الناس ياشعب النفاق وبعد طول أنتظار لأول القادمين لمدينتنا ليحكم بيننا ويتولى أمرنا أرسل الله لنا أثنين من الغرباء فأرضوا بهما وبحكمهما بدلا أن تقوم بيننا حرب أهلية لا تبقى ولاتذر على من يتولى الحكم  فهذا هو رئيسكم وش الخير و ونائبه بوز الهنا  .. حيييوهم ههييييه..... وش ياوش يا أجمل وش

ويتقلد وش الفقر زمام حكم بلاد النفاق ويصبح بوز الأخص نائبه الأول للمشروعات والفنكوشات وكبير الحكماء نائبه الثانى فى النصب والأحتيال  فقد كان ذو نفس طماعة يعشش بها المكر والخسة والدهاء ولتصبح ثروات أرض النفاق نهبا لهم وعندما يسأله العامة وأهل البلاد أن يراعى الفقراء من غول الغلاء

يصرخ فيهم منددأ : مفيش ..ماعنديش خزائنكم خاوية على عروشها .. أنتم فقراء يا أهل النفاق  وليس أمامنا غير أن نستلف من الجيران أو تتبرعوا بما تسمح به أنفسكم وألا سنضطر لرفع الأسعار وزيادة المكوث والضرائب على الغنى والفقران

وأشتد الظلم فمات من مات وراح فى السجون آلاف من الشباب وأصبح أهلها يأكلون طقة واحده فى اليوم والباقى ماء فأجتمع الجوعى من أهل النفاق فى الميدان العام يتباكون على ما أصابهم من جدب وفقر ومرض منذ أن حكمهم وش الفقر وتابعه بوز الأخص فتسلحوا بالعصى والفؤس وأنطلقوا يحاصرون قصر وش الفقر فهرب عسكره وعسسه وبصاصيه خشية الفتك بهم ويبحث الثوار فى القصرعن عصبة الأجرام ليحاسبوهم على فعلتهم الشنعاء فلم يجدوهم وكأنهم فص ملح وداب    

تيران وصنافير مصرية رغم أنف الخونة والمطبلاتية

حسبة برما ( 1 )

فلاحة حلوة تفاحة  ماشية ع الزراعية وشايلة سبت فيه بيض فوق دماغها قوم اييييه ؟ عدى جنبها راجل بحماره والظاهر فرامل الحمار كانت مفوتة والراجل معرفش يتفاداها راح خابط فيها وقع سبت البيض منها وانكسر
 قعدت تعيط طبعا الراجل اتكسف على دمه وقال يعوضها فسألها : معاكى كام -لامؤاخذة- بيضة يا بنتى واديكى حقهم قالتله معرفشى ! قالها ازاى ..؟ 
يعنى رايحة تبيعيهم من غير ما تعرفى عددهم ؟؟ 
قالتله انا كل ما أعدهم اتنين اتنين تفضل بيضة 
وكل ما اعدهم تلاتة تلاتة تفضل بيضة
وكل ما اعدهم اربعة اربعة تفضل بيضة
وكل ما أعدهم خمسة خمسة تفضل بيضة
وكل ما اعدهم ستة تسة تفضل بيضة .. !
لكن لما بعدهم سبعة سبعة مبيفضلش حاجة ...!
وسكتت البنت والراجل بهت ومردش ووقف متحير
ف معدية راجل بسيط عليهم .. مالكوا يا جماعة ؟؟ حكوله القصة قالهم بسيطة خالص
دول كانوا 301 بيضة ولا مؤاخذة والحكاية سهلة خالص
ومن يومها أتعرفت (حسبة برما) على أى حاجة الناس عاملاها مشكلة وعقدة وهيا بسيطة

أم الدنانير ( 2 )

قصة من الخليج.. فنتازيا
الأمير يوسف له من الزوجات أربعة وعنده ما ملكت يداه 200 جارية من أجمل جميلات العالم وكان رجل حقانى يطبق الشرع فلكل زوجة لها يوم تبيت فى مخدعه والثلاثة أيام كانت من نصيب الجوارى الحسان فأشتكت زوجته ام الدنانير وكانت من أجمل زوجاته بأنه عندما يأتى دورها فى اليوم الرابع .. يكبس عليه النوم حتى الصبح لتجد نفسها فى سريرها فتتذكر ماحدث لها فتسب وتلعن حظها وقالت ربما يكون الأمير قد شابه العجز والمرض وكانت تخجل أن تسأل عن السبب ولكنها سمعت باقى الزوجات وهن يحكين سويا عما يفعله الأمير فسألت الزوجات الثلاث هل يحدث لهن ما حدث لها فيجيبنها بالنفى فالأمير يظل مصهلل وآخر فوقان لحد الصبح فقررت أن تسأله ما السبب وفى يوم لقائها سألته
 - ياسمو الأمير هل بى عيب يجعلك تبتعد عنى وتنام عندما أقترب منك فأنا أجمل زوجاتك بشهادة الجميع وفمى مسك وعرقى عنبر وبياضى مرمر وصوتى قيثارة عشق بالله عليك أرح قلبى ربنا يريح قلبى هل هو عيب فّييه ولا فيك
 - خسئتى يا أمرأة أنك مثل القطط تأكلى وتنكرى .. فأنتى التى تنامين وأنا صبرت عليك كثير ولن يحل هذا اللغز سوى كبير الأطباء
وبعد الفحص والتمحيص والأشوعات والتحاليل والذى منه
-أعلن كبير الأطباء بأن أم الدنانير ليس بها عله بالجسد أو العقل بل هى سيده صحتها زى الفل  وبقوة 70 حصان ومايحث بينكما يا مولاى هو سحر ألكترونى حديث وارد الخارج تديره أجهزة أمنية من دوله شقيقة للتفريق بين الأزواج وهذا من أختصاص كبير السحرة فأستدعيه يامولاى
يدخل كبير السحرة وهو يحمل 22 قارورة بهما سائل ملون ويطلب من الأمير ثلاثة طلبات لفك هذا السحر
1- أن ترفع جميع شاشات التلفاز من غرف الجوارى والحريم
2- أن يقطع علاقته بدولة منبوذيا ويطرد جميع رعاياها من مملكته
3- أن يستحم هو وأم الدنانير بهذه القاروره السحرية الأولى وسينتظر خارج الحمام ليعرف النتيجة
ينادى كبير السحره على الأمير من خارج الحمام :أتجد كتابه على جسدك وجسد أم الدنانير
الأمير نعم : مكتوب على جسد أم الدنانير DMC DMC DMC DMC
كبير السحره: وأنت يامولاى مكتوب على جسمك برضه DMC DMC DMC
الأمير : نعم ..
 .كبير السحره : البسوا هدومكم.. بسيطه حنغير التردد وحتبقوا زى الفل

حكاية القمر التايه

 قبل أن تقروا القانون وتقصوا شريط اللوحة التذكارية لوكالة الفضاء المصرية الجديدة تعالوا نذكركم بحكاية القمر الصناعى المصرى سات 1 الذى فقد فى الفضاء والمشروع الذى تكبدنا فيه ملايين الدولارات مع الشركة الأوكرانية المشاركة معنا منذ 20 سنه والتى ستحل مكانها شركات أخرى غير معروف جنسيتها حتى الأن.. كانت البدايات رائعة والنهايات مروعه بعد أن تحول المشروع لسبوبه لمافيا البزنس فى مصر فهل سنلقى نفس المصير فى عام 2017 
في عام 97 أقتنعت الدولة ببرنامج تصنيع الأقمار الصناعية وكلفت الدكتور محمد بهي الدين عرجون "الاب الروحي لبرنامج الفضاء المصري رسميا بتولي مسئولية برنامج الفضاء المصري وفى 16 مايو عام 98 انشئ مجلس بحوث الفضاء داخل اكاديمية البحث العلمي برئاسة علي صادق وتقدم عرجون ورفاقه ببرنامج الفضاء المصري الذي قام علي فكرة تصنيع اقمار صغيرة مخصصة للاستشعار عن بعد بشكل متدرج انتبه هنا لفكر تصنيع وليس شراء. وانتبه إلي باقي الكلام جيدآً حيث أكد عرجون أن عدد التخصصات التي احتاجوها لتصنيع هذه الاقمار الصغيرة هي 300 تخصص مختلف وأكد أن الشباب المصري تدرب عليها واتقنها وتفوق فيها بعد واصبح علي اعلي مستوي "نفرض ان لدينا ثلاثة في كل تخصص أي 900 شاب مدربين علي أعلي مستوي للبرنامج لا أحد يعرف مصيرهم الآن". عرجون قال ان هدف البرنامج ان تصبح صناعة الاقمار مصرية 100% وبالفعل تم التعاقد مع شركة أوكرانية رائدة في المجال وكانت الخطة حسب بعض المصادر تقض بان يشارك شباب العلماء المصريين بنسبة 15% من التصنيع في القمر الأول إيجبت1 ويتم تدريبهم باقتدار ليصبحوا قادرين علي انجاز 85% من القمر الثاني إيجيبت سات 2 وان يكون الجانب الاواكرني شارك بنسبة 15% أما القمر الثالث فيكون مصري 100%.. شئ جميل ورائع.. كانت الخطة ان يطلق القمر الأول في عام 2007 وينهي مهمته في عام 2010 وكان المفروض ان يتم اطلاق القمر الثاني في عام 2012 بالنسبة المذكورة.. ولكن في شهر أكتوبر عام 2010 بدأت تمثيلية اختفاء القمر..ولكنها أنتهت بكارثة ضياع القمر الأول فى الفضاء ولغز كبير يجب حله ولعبة مثل لعبة الثلاث ورقات.. ومحاولة للضحك علي الناس وسبوبة كبيرة بملايين الدولارات ذهبت للبشوات
* والجهات الحكومية  تؤكد أن عملية البحث جارية وان هناك اتصالات بالجانب الاوكراني المسئول وان الحكومة المصرية لن تترك حقها وانها مستقاضي الجانب الاوكراني أن لم تستعيد القمر الضائع وان اوكرانيا يجب ان ندفع عشرين مليون دولار ثمن القمر وفي النهاية لم يحدث إي شئ فهل سنكرر نفس المهزلة بشخوص وشركات جديده

آه لو لعبت يازهر

عندما حل بها التعب والهم جلست على الرصيف ووضعت يدها على خدها حزنا على حالها وحال أولادها بعد أن هرب الزوج من المسؤلية وتركها وحيدة تواجه عواصف الحياة منفرده فأنسابت دموعها كحبيبات اللؤلؤ على وجهها الفلاحى الجميل ..جلس قريباً منها رجل كهل ومد يده يسأل الناس أن يعطوه مما رزقهم: لله يامحسنين لله .. فأبتعدت عنه قليلا فبادرها بالحديث قائلاً

-       ما تخافيش يابنتى أصل الحته دى بتاعتى بشحت فيها من شهرين وبدفع أجرتها 20 جنيه فى اليوم والواد (حُكشه بلطجى السوق ) ماقليش أن نزل عليها حد جديد.. خليكى قاعده زى ما أنتى ورزقى ورزقك على الله وآخر النهار نقسم بالنص

-       بس ياعم أنا مش شحاته.. طب بتعيطى ليه ؟. الدنيا ملطشه معايا معييش فلوس تكفى أشترى بيها أكل للعيال .. هو : مش بدل ماتعيطى ببلاش مش الأفضل تعيطى بفلوس.. هى : أعمل أيه يعنى

-       خليكى زى ماأنتى بتعيطى ومدى أيدك وقولى لله

-       ما أعرفش ولا عمرى مديت أيدى  أحلف لك بأيه ياعم أنا مش شحاته

 هو : حتأكلى عيالك كرامه وعفه ..مد أيدك.. وما تقوليش حاجه وكلها ساعتين زمن رزقك حييجى لحد عندك وتعجبك الشغلانه

ومضت ساعتان وأمتلء جيب الرجل العجوز بالجنيهات وهى الأخرى نالها من الحب جانب فأرتسم على وجهها الملائكى الحزين أبتسامة رضا وتوقفت عن البكاء فنهرها العجوز .. شغلنتنا مافيهاش سعادة وأنبساط بل كآبة وبكاء فلن يعطيكى أحد مليما وأنت يبدو عليك الهدوء والسعادة أستمرى يا أبنتى فى بكائك فقد نلنا منه الكثير اليوم فلا داعى لوقف الحال

< ولكن ليست عندى رغبة فى البكاء فماذا أفعل.. أنت نسيت أتفقنا أن نقسم الغلة بالنصف

 هو : وأنا عند وعدى ..لكن بشرط أن تحضرى باكر لنعمل سويا سأضع نظارة سوداء على عيناى مثل العميان وأنتى ترتدى ملابس قديمه وتسحبينى وأنا أنادى وأنت تردى عليا ونوسع دائرة نشاطنا.. خدى نصيبك النهارده خمسين جنيه وجهك الحلو حنن قلوب الناس ميعادنا بكره هنا الساعة سابعة.. أنت أسمك أيه ياعم .. أسمى صبحى وانتى أسمك أيه : أسمى سعدية وبينادونى بأم سماح .. أنت متجوزه ياسعديه .هة : مطلقه .. الرجل من قلة الفلوس طفش ورمى لى 4 عيال وأنا كل يوم فى شغلانه شكل لحد آخرها أشتغلت مع توربى لتغسيل الميتين .. أعصابى تعبت فتركته لأن الميتين كانوا بيطلعوا بالليل وأنا نايمه

-       شغلنتنا دى مافيهاش ميتين ولا مدبوحين وتعتمد على التمثيل وكل ما تعيشى الدور كل ما رزقك يكتر .. ميعادنا بكره ياسعدية

فى اليوم التالى تسحب الرجل العجوز وهو يوجهها إلى أماكن البنوك ومحطات المترو ومداخل المحاكم حتى أنتصف النهار فدلفا إلى مبنى خرب ليحصيا غلة الظهيرة التى بلغت 300 جنيهاً فتأخذ نصيبها وتهم بأن تتركه وتعود لبيتها

-       قبل ماتمشى حتيجى بكره فى نفس الميعاد أما أنا فسأسرح فترة العصارى والمغربية دى غلتها ضعف غلة الصبح عايزه تيجى تعالى فى نفس المكان الساعة 3 العصر

-       تعود لبيتها وتحمل فاكهة وكفته وطرب ولحمة رأس.. لتطعم البطون الخاوية

-       سماح خدى بالك من أخواتك أنا عندى أوفر تايم النهارده حاجى بعد العشاء وخدى خمسه جنيه أشترى بها حلويات لأخواتك .. العيال تهلل فرحاً هيييه

آه لو لعبت يازهر (2)

تمر الأيام والشهور وتحسنت حالة سعدية المادية والمعنوية وصارت أستاذه فى فن الشحاته .. وبعد أن أقتسما غلة اليوم جلسا سويا فى ظل سور أحدى الفيلات فى الزمالك ليستريحا

صبحى : أنا نفسى أقولك على حاجة ياسعدية ده مجرد أقتراح وأنت حره توافقى أو متوافقيش .. خير ياعم صبحى

-       بما أنك أصبحتى مطلقة رسمى ماتيجى نتجوز يابت ويبقى زيتنا فى دقيقنا وأنا بالعربى عندى خميره حلوه من الشحاته غير معاش الحكومة لو وافقتى صار المال مالك وتورثى معاشى غير ماعندى أرض وبيت فى البلد و شهادات أستثمار وأسهم وسندات وفلوس فكه ماتعديش فأنت المستفيده أنتى وعيالك وبعدين أنا مش كبير قوى يعنى ..ده الدهن فى العتاقى يابت..

( تسكت سعديه وهى تفكر ) – أدينى فرصه أفكر ياعم صبحى

( تسمع من خلفها صوت بواب الفيلا النوبى وهو ينادى عليها ) : أنتى ياست ياشحات أنت تعالى كلم الهانم فوق ..لفى وأدخل من البوابه

صبحى : قومى ياسعدية رزقك فى رجليكى زى القطط 

تدخل سعدية وهى منبهرة بفخامة القصر وهى تتلفت حولها فى جميع الأتجاهات فينهرها البواب : قفى مكانك هنا لحد ما الست هانم تطلع  تشوفك .. وتظهر الهانم وهى تجلس على كرسى متحرك سيده فى العقد الخامس يبدو عليها العز والثراء ذات شخصية حازمة وهى تقول : سيبها ياعثمان .. تعالى هنا يابنتى .. أسمك أيه

-       خدامتك سعدية يا هانم ..- انتى بتشتغلى ايه ياسعديه ..انا على باب الله عايشه على صدقات المحسنين أنا وأبويا المريض.- بتشتغلى شحاته يعنى ( تهز رأسها دون ان تنطق ) 

-       ايه رأيك تشتغلى هنا وتاخدى مرتب 3000 جنيه فى الشهر غير أكلك وكسوتك

-       لكن أنا عندى أربع عيال لازم أكون معاهم كل يوم ما أنفعش فى الشغلانه دى ياهانم

-       الراجل العجوز اللى بره ده يبقى أبوكى .. أيوه يا هانم

-       عموما فكرى وأبقى ردى عليا .. شغلك هنا أحسن لك طالما معاكى عيال .. يعملوا أيه العيال دى لو أتمسكتى تسول وأتحبستى أكيد مشغلاهم شحاتين

-       لأ ياهانم أنا عيالى فى المدارس وبيتعلموا

-       أنا لما شوفتك حسيت أنك ست كويسه وكفايه أنك وشك بشوش وجميل  ومش وش شحاته ولا بهدله عموما فيه أوضتين فى البدروم ممكن تعيشى فيهم أنت وعيالك وأبوكى وقدامك يومين تردى عليا.... كتر خيرك ويزيد فضلك ويتمم شفاكى

-       خدى ياسعدية القرشين دولت لعيالك ( تظل سعدية تدعوا لها بجميع الدعوات التى تعلمتها على يد عم صبحى حتى تخرج )

تخرج سعدية وتجلس بجوار صبحى وهى لا تتكلم .. الست كانت عايزه منك ايه ياسعديه

ردى يابت ايه اللى جرالك .. مفيش.. ياله بينا انا عايزه اروح .. احنا لسه ماكملناش اللفه بتاعتنا .. لفها انت انا عايزه اروح .. ماشى ياسعديه محطة الأتوبيس عندك اهه حعدى عليكى بالليل اطمئن

تظل سعدية تفكر فى العرضين .. عرض عم صبحى فى الجواز وتعيش معاه على أمل ان ترث أمواله ومعاشه أو تعمل عند الهانم وتضمن مرتب ثابت ومأوى لها ولأولادها أمرين الموت فيهما يغير حالها من حال إلى حال .. ومن يعلم متى يحين الأجل للهانم أو عم صبحى فالهانم إذا ماتت فلن تتحصل على شيئ وياعالم ..الورثة ماذا يفعلون يها من الممكن ان يطردوها هى وأولادها للشارع وترجع للشحاتة مرة أخرى أما عم صبحى الله أعلم متى سيموت من الممكن أن أموت وهو يظل عايش ولو تزوجته سأظل أشحت إلى ماشاء الله .. يارب دلنى على الطريق الصحيح .. وتدخل بيتها وهذه الأفكار تكاد أن تعصف بها وتقع فى حيرة فى أى الأمرين تختار وتنام فى مكانها ولا تعرف كم من الوقت مر على نومتها وتصحى على صوت أبنتها وهى توقظها : أصحى ياماما عم صبحى قاعد بره

صبحى : مالك ياسعدية حالك أتلغبط بعد مادخلتى الفيلا قولى أيه اللى حصل

سعدية : الست عيزانى أشتغل عندها وتدينى 3000 حنيه فى الشهر وتدينى أوضتين فى بدروم الفيلا أعيش فيهم أنا والعيال وأسيب كار الشحاته وفهمتها أنك أبويا

صبحى : أنتى بيطلع لك من الشحاته كل شهر  مايقلش عن 10 آلاف جنيه تسبيهم مقابل 3000 جنيه .. بالذمه ده كلام ناس عاقلين

>على الأقل حترحم من اللف فى الشوارع ومد الأيد وذل النفس أنا بأكره شغلانة الشحاته

-       لو أفترضنا أن الست دى ماتت حتروحى فين بعيالك .. حترجعى للشارع تانى تشحتى  فكرى فى جوازك منى واللى حتخديه من ورايا لما أموت

-       مش عارفه ياعم صبحى عين فى الجنه وعين فى النار وكمان الأعمار بيد الله

-       أقولك أنا تعملى أيه.. أمسكى العصايا من النص أشتغلى عند الست وأتجوزينى

وآجى أعيش معاكى والست عارفه أنى أبوكى .. أنا بحبك ياسعدية ومش عايز أسيبك قولت أيه .. تنظر فى خجل للأرض .. موافقه .. طب قومى بينا ع المأذون

عريس الغفلة

تنتقل سعدية وعم صبحى والأولاد إلى فيلا كوثر هانم لتصبح مسؤله عن أكلها وشوربها وحمومها وتغيير ملابسها .. وكانت لا تبخل عليها بمال أو كساء وأصبحت ترافقها فى جميع المشواير الخاصة وهى ترتدى أشيك الملابس وأغلاها فأزدادت جمال على جمالها الفطرى ومن يشاهدها يعتقد بأنها هانم وليست خدامة الهانم .. أما عم صبحى لم يتخلى عن مهنة الشحاته فيخرج صباحا ليشحت ويعود مساءً ليبيت فى غرفة سعدية

بهجت بيه أخو كوثر هانم لواء سابق فى الشرطة أرمل وعلى المعاش وهو الوريث الوحيد لكوثر هانم يزور أخته بين حين وآخر ولكن أصبحت زيارته شبه يوميه بعد ماظهرت سعدية

-       تصب سعدية القهوة لكل من كوثر هانم وبهجت بيه ساعة العصارى فى حديقة الفيلا وترتسم على وجه بهجت أبتسامة شوق وأعجاب : شكرا ياسعدية يسلم أيدك

سعدية : العفو ياباشا يارب تكون قهوتى عجبتك

بهجت : أى حاجة من أيدك تعجبنى

-       الله يخليك ياباشا ويجبر خاطرك.. تأمرنى بأى حاجة تانية .. شكرا ياسعدية

(تدارى كوثر هانم ضحكتها وهى تشاهد هيام بهجت بسعدية )

بهجت : الست دى كويسه قوى أنت جبتيها منين ياكوثر

كوثر : جماعة صحابى جابوهالى أيه رأيك عجبتك

يهجت : ياريت أتجوزها ..

- حيلك حيلك دى أيدى ورجلى ما أقدرش أستغنى عنها وبعدين دى عندها أربع عيال ماينفعش يقعدوا فى شقتك

- خلاص أعيش معاكى هنا فى الفيلا

- ده أنا ريقى نشف أنك تيجى تقعد معايا .. الظاهر أن الحب غيرك قوى

- كلميها ياكوثر وشوفى رأيها أيه

- ما تكلمها أنت يكون أفضل ..حدخل جوه وأبعتهالك وورينى ياسيادة اللواء حتعرف تقنعها أزاى ولا حتكسفنا يا دون جوان عصرك وأوانك

(تدفع كوثر عجلتها وتدخل الفيلا وتطلب من سعدية أن تشوف بهجت بيه عايز أيه ) 

آه لو لعبت يازهر (3)

بهجت يرسم على وجهه أبتسامه عريضه يستقبل بها سعدية : أقعدى هنا ياسعدية عايزك فى موضوع ..- خير ياباشا ..مابلاش الرسميات دى وقولى يابهجت بس .. العين ماتعلاش على الحاجب ياباشا .. وبعدين معاكى ..أيه هو الموضوع .. أنا ما بعرفش ألف وأدور أنا من ساعة ما شوفتك دخلتى قلبى ياسعدية وعايز أتجوزك .. أنا رجل وحيد أرمل وعايزك تعيشى معايا السنين الباقية من عمرى قولتى أيه

أسقط فى يد سعدية وألجمت لسانها المفاجأة فهل تقول له أن عم صبحى هو زوجها وليس أباها أو تعطى لنفسها فرصة لحل هذه المشكلة فبهجت بيه رجل محترم وعليه القيمة وتتمناه أى ست.. فقالت ياباشا أنا ست جاهله وتعليمى على قدى وعندى 4عيال وأب مريض أعطينى فرصه أفكر وأرد على حضرتك وأحضر شهادة طلاقى من زوجى المختفى من فتره.. خدى وقتك ياسعدية وأنا قابلك بكل مشاكلك بعيالك وأبوكى كمان ( تظل سعدية تضرب أخماس فى أسداس فكيف تنفصل بالطلاق من عم صبحى لتتزوج بهجت بيه فقد راقت لها العيشه الراقية والحياة العصرية النظيفة وندمت على تسرعها فى قبول الزواج من صبحى ولكن لابد من المواجهة ولكن كيف ستقنعه بالأنفصال هذه هى المشكلة وبدأت خطتها على الفور فعندما عاد صبحى فى المساء أختلقت معه مشاجرة وتركت له الغرفة وقامت بالنوم مع أولادها وأستمرت لمدة 3 أيام فى هجر غرفتها وهو يحاول أن يصالحها ولكنها أبت فأستأذنها بالغياب يومين فى البلد لقضاء بعض المصالح وسيعود.. ومر يومان وعاد عم صبحى وهو يحمل شنطه كبيره وضعها بين يدى سعدية التى تتظاهر بالغضب منه فيقبل رأسها ويطلب منها أن تحضر قليلا لغرفتهما لأمر هام فتقبل على مضض ..قال وهو يستعطفها : الشنطه دى فيها أكثر من مليون جنيه حصيلة بيع الأرض والبيت فى البلد وشهادات الأستثمار والأسهم والسندات فأنا وما أملك تحت أمرك ياسعدية

سعدية بأصرار : أنا مش عايزه الفلوس دى .. كل قرش فيها جاء من غش وخداع الناس .. أنا ما بنكرش أن فى وقت من الأوقات قمت بالشحاته وخرجت من أزمتى ولكن كنت من جوايا رافضه أن أكون شحاته لكن أنت ياعم صبحى جواك شحات عمره عشرات السنين عاش وتغلغ فى كل حته من جسمك وعقلك ومش حتقدر تتحررمنه لكن أنا خلاص أتحررت وعايزه الطلاق وكل حى يروح لحاله

-       عايزه تطلقى يا سعدية  .. أيوه عايزه أتطلق

-       عايزه تتجوزى بهجت بيه ياسعديه

-       عرفت منين ؟

-       بهجت بيه طلب أيدك منى يا سعدية  قبل ما أسافر على أساس أنى أبوكى راجل بيفهم فى الأصول ..قولت له أنك لسه على ذمة راجل تانى أنا حطيت كل ما أملك تحت رجليكى وأنت مصره على الطلاق

-       قولت لك أنا مش عايزه الفلوس دى لأنى عارفه أنها فلوس حرام

رفع عم صبحى الشنطة على كتفه قبل أن يقفل باب الغرفة نظر لها والدموع فى عينيه : أنا مش حطلقك يا سعدية فرجينى حتتجوزى بهجت بيه بتاعك أزاى .. وأنطلق يحمل حقيبته ويهرول من باب الفيلا وهى تتابعه حتى أختفى فى  ظلام الشارع

آه لو لعبت يازهر (4)

تمر الأيام وهى تبحث عنه فى جميع الأماكن التى كان يشحت فيها وتسأل عنه الشحاتين الموجودين فى المنطقة منهم من قال لها بأنه مات ومنهم من قال بأنه تم ضبطه فى حملة للشرطة للقبض على المتسولين فسألت عنه فى أقسام البوليس فلم تعثر له على أثر فلم تتوانى حتى قدمت بلاغ أختفاء لعل وعسى ان تجده وتحصل على وثيقة طلاقها لتتزوج بهجت بيه الذى لم يكف عن ملاحقتها بطلبه بالزواج منها وتتحجج بعدم حصولها على وثيقة الطلاق وهى تبحث يوميا عنه

بهجت : مر أكثر من 6 أشهر على بحثك عن جوزك وأنت ترفضين أعطائى بياناته لأبحث عنه وأجيبهولك من تحت طقاطيق الأرض

سعدية : شوف يابهجت بيه أنا ححكى لك حكايتى بكل صراحة .. وسردت حكايتها مع زوجها الأول أبو عيالها وكيف طلقها وهرب من تحمل المسؤلية وقصتها مع عم صبحى وكيف تعرفت على كوثر هانم وكيف تزوجته لتأمن حياتها وحياة أبنائها وطلبها منه الطلاق حتى تستطيع أن تتزوجه

بهجت : يعنى عم صبحى يبقى جوزك مش أبوكى وأنا روحت أطلب أيدك منه ياه ياه

سعدية وهى تبكى  : لما عرف أنك عابز تتجوزنى راح باع أللى وراه واللى قدامه وحطه بين أيديا علشان ماتجوزكش ولكنى رفضت أن أأخذ مال حرام جاء بالغش والخداع .. ومن يومها طفش ومش عارف له طريق سكه

بهجت : أمسحى دموعك وربنا يفعل مافيه الخير بس أدينى قسيمة جوازك ففيها كل بياناته وأنا عندى ناس حتعرف تجيبه لو كان عايش أو ميت .. سؤال أخير أختى كوثر تعرف أن صبحى يبقى جوزك مش أبوكى .. – لأ ماتعرفش .. خلاص خليه ده سر مابينا

( ويمر أسبوع وبهجت بيه يجرى أتصالاته بالجهات الأمنية والبحث الجنائى ويتصل به مدير الأمن : مبروك يا بهجت باشا الراجل أللى بتدور عليه مش أسمه صبحى أسماعيل  ده المجرم الهارب حموده أبو شنب وهارب من حكم بالأعدام لقتله زوجته وحماته من 12 سنه وعرفناه من بصماته الموجوده على قسيمة جوازه على سعدية وأحب أفرحك بأنه أتمسك بالصدفه بجريمة التسول وجارى ترحيله من المنيا

يحكى بهجت لسعدية ماتم التوصل إليه ووصول نتيجة البحث الجنائى عن حقيقة عم صبحى الهارب من الأعدام .. تبكى سعدية وتحاول أن تقبل يد بهجت فيسحب يده ويطبع هو على جبينها قبله

بهجت : دلوقتى أصبح من السهل تطليقك منه بحكم المحكمه فى خلال 3 شهور ستصبحين حره ياسعدية

سعدية : جميلك حشيله جوه عنيا.. ربنا يخليك ليا ياغالى

 بعد شهر من القبض على حموده أبوشنب .. (صبحى سابقا) يطلب بهجت من سعدية أن تقابل محامى حموده الذى يريد أن يبلغها رساله هامة

المحامى : مدام سعديه حموده له طلب قبل ما يعدموه أنك تروحى تزوريه فى السجن وبعدها سيرمى عليك يمين الطلاق

سعديه : أيه رأيك يابهجت بيه

بهجت : طالما حيطلقها أمام مأمور السجن أنا موافق نروح نزوره

( يحضر المحامى تصريح الزيارة ويصطحب كل من سعدية وبهجت بيه لسجن الأستئناف لمقابلة حموده )

يطلب حموده أن يجلس منفردا مع سعدية بعيدا عن المحامى وبهجت بيه

حموده : ماتقاطعنيش ياسعديه  كلها 6 أشهر أو سنه ليصدر حكم الأستئناف وسنتان على حكم النقض وأنا عارف بأن سيتم أعدامى .. أنا سايب لك كل أموالى ودى ورقه فيها المكان أللى دافن فيه الفلوس .. عايزه تاخديهم كلهم خوديهم ..عايزه تبنى به مسجد صدقه على روحى ماشى عايزه تسلميهم للحكومة أنت حره بس تحطى لى مبلغ 20 ألف جنيه هى فلوسى الحلال  فى خزينة السجن كمصاريف .. حتنفذى أللى قولت لك عليه

سعديه تأخذ منه الورقة : حاضر يا صبحى .. أنا معرفش حموده ده .. سأبنى لك جامع زى ماقولت ولو تبقت فلوس سأتذكى بها على روحك .. عايز حاجة تانى

حموده : أيوه .. روحى وأنت طالق حبعت لك ورقتك من السجن .. وربنا يوفقك وسلمى لى على الولاد

سعديه : الله يسلمك

وتمر السنين بحلوها ومرها على سعدية فى فيلا كوثر هانم ويكبر أولادها ويتخرجون من الجامعات ويتوفى بهجت بيه بعد خمسة سنوات ويشتد المرض على  كوثر هانم فتتنازل عن الفيلا لسعدية وبعض الممتلكات الأخرى بيع وشراء وتقابل ربها وهى راضية مرضية

وذات مساء وهى تجلس فى بلكونة غرفتها تلمح سيده شابه تجلس فى نفس المكان الذى كانت تجلس فيه هى وعم صبحى منذ خمس عشرة عاما فترسل لها الخدم ليحضروها وتتصدق عليها وتطلب منها أن تمر عليها بأستمرار ولو أرادت الأقامه فغرفتا البدروم موجودتان غير شاغرتان وأعتبرتها تذكرة بنعمة الله وفضله وأصبحت فيلتها قيلة الجائع والمسكين كوصية صاحبتها كوثر هانم

                                        تمت                              

شوبيك لوبيك

سحر تدعك المواعين بسلك الألومنيوم وهى تحدث نفسها معقول مرتبى ومرتب الراجل  أللى كان بيكفينا لآخر الشهر بالعافيه يخلص يوم 10 وندور نستلف من اللى يسوى واللى مايسواش .. الواحده مننا حتعمل أيه أستغفر الله العظيم ...الله يخرب بيته أللى كان السبب.. تضع همها فى كنكة القهوة وهى تدعكها بعزم مافيها فيخرج منها دخان كثيف أسود يملء المطبخ ويقف أمامها مارد أحمر بقرنين وهو يضحك بصوت عالى ههههه هههههه
ويقول : شوبيك لوبيكى أمرى بين أيديكى يامصرية
سحر : لأ لأ أيه أللى بيحصل ده .. مارد يطلع من كنكة القهوة مش من الفانوس أو المصباح أو الخاتم بجد أنت بتهرج ياعم العفريت
المارد : أنا معرفش أهرج ياسحر .. فيكى مين يكتم السر
سحر : سرك فى بير ياعم العفريت
 المارد : الحقيقة أنا كنت معدى من جنب شباك مطبخك سمعتك وأنت بتشتكى من الهم وأرتفاع الأسعار والعيشة القطران.. والحوسه المنيله بستين نيله صعبتى عليا قولت أساعدك لوجه الله وعملت نفسى كأنى خارج من الكنكة
 سحر : كتر خيرك فى قلبك رحمة عن البشر حتساعدنى أزاى حتجيب لى ذهب وياقوت ومرجان وتبنى لى قصر فى التجمع الخامس وأخلع من العشوائيات وأقب على وش الدنيا
 المارد : ذهب أيه وياقوت أيه وقصر فى التجمع مفيش الكلام ده كان زمان أيام جدى عفركوش .. دلوقتى أحنا عفاريت أسبور مالناش فى القصة دى
سحر : ماهو أنا عارفه حظى المقندل  على رأى المثل قليل الحظ يلاقى العضم فى الكرشه .. أيه أمكانياتك ياعم الأسبور
 المارد : أنتى حتتريقى عليا ياست سحر حسيبك وأمشى .. أشهلى شوفى طلباتك أيه علشان تكملى الشهر من لحمه ورز وزيت وسمن وشاى وفراخ وكافة طلبات البقاله
سحر : انت تخصص جمعيات تعاونية ولا أيه .. يعنى ماجبتش سيرة السكر
المارد : الحقيقة ياسحر يابنتى ده طلب صعب قوى
سحر : ياسلام صعب عليك أنك تجيب سكر..أومال عفريت أزاى
المارد :الحقيقة أن كل عفريت ليه 100 كيلو سكر فى الشهر وكل ماطلع لحد يقولى عايز سكر أتكسف وأديله وماتبقاش غير كيلو واحد بس لعفركوشه أم العيال .. يس فيه شرط علشان تاخدى اللوكشه كلها ومعاها كيس السكر أنك تحلى الفزوره دى
سحر : منظرك كده بتشتغلنى ولا حناخد منك أبيض ولا أسود قول ياكابتن
المارد : أيه هو الشيئ أللى عام ولاأقبش واللى خان ومنجحشى وكداب ماصدقشى
سحر : هات ودنك وأنا أقولك وسوسوسوسوس.... صح
المارد : مبروك تكسبى  اللوكشه وكيس السكر هههههه هههههه ههههههه

إفلاس الدول:

أسباب الإفلاس:
هناك ثلاث أسباب رئيسية:
 الأول: عدم قدرة الدولة على دفع ديونها كليا أو جزئيا (أي تدفع الديون اللازمة لتشغيل الدولة ولا تدفع فوائد الديون مثلا).
وتحدث في نهاية سنوات طويلة من الإستدانة والعجز في الميزانية.
 والأسباب: تعاظم الديون أو أنخفاض الضرائب بسبب البطالة أو قوانين جديدة تخيف الأسواق المالية فتنسحب رؤوس الأموال من البلد.
 الثاني: تغيير الحكومة: وذلك في حالات الثورات مثلا ورفض الحكومة الجديدة الإلتزام بالديون السبقة للنظام "الفاسد". مثال الثورة الفرنسية.
الثالث: إنهيار الدولة: بسبب خسارتها لحرب أو إنقسامها الى عدة دول مثلا.
 وهنا ينتقل الدين الى النظام الجديد أو الدول الجديدة التي حلت مكانها جغرافيا (فلوس هالرأسماليين ما تضيع !!!
تبعات الإفلاس
أولا: التبعات على الدائنين:
إختفاء أو خسارة كل أو جزء من الأموال التي أقرضوها لتلك الدولة أو الفوائد على تلك الديون.
وفي العادة يكون هناك مفاوضات يستردون بموجبها بعض تلك الأموال. وقد تصل الخسارة الى 755% من أموالهم كما حدث مع الأرجنتين
(كم نسبة الخسارة المتوقعة فيما لو أفلست أمريكا !!!).
 وقد يتم تقسيم الديون هل هي داخلية أو خارجية، وهل هي بالعملة المحلية أو عملة عالمية، وهل الدائن حكومة أو قطاع خاص !!!
ثانيا: التبعات على الدولة:
الإيجابي: إنخفاض مصروفات الدولة تجاه الدائنين حيث تتوقف عن دفع مستحقاتهم.
السلبي: تدمير الثقة في البلد ما يعني عدم إمكانية الحصول على قروض جديدة من سوق المال.
ثالثا: التبعات على المواطنين:
 الإنخفاض الكبير في قيمة الثروة النقدية للمواطن بعدة طرق. والسبب أن المواطن هو دائن لدولته بطرق مختلفة،
كأن يكون حاملا لسندات الدولة أو مشتركا في صندوق تقاعد يحمل تلك السندات.
وهناك تبعات أكثر تأثيرا على الإقتصاد الوطني:
حيث تفقد البنوك جزءا من رأس مالها لأنها فقدت ديونها على الدولة.
وتحدث أزمة إقتصادية لإنخفاض الطلب الداخلي على البضائع وإنسحاب رؤوس الأموال الأجنبية،
وتحدث أزمة عملة، حيث يتفادى المستثمرون العالميون هذا البلد.
أمثلة لإفلاس الدول:
- أسبانيا في عام القرن السادس عشر أفلست 4 مرات بسبب الإنفاق العسكري لحماية تجارتها مع أمريكا.
- إفلاس عدة دول من أمركا اللاتينية عام 18200 بسبب دخولها في سوق السندات في لندن (يعني ضحكوا عليهم الإنجليز !!!).
- إفلاس العديد من الدول في في العشرينات والثلاثينات من القرن العشرين ...
بسبب إنتشار الحماية التجارية، ما دفع الدول التي تعتمد على التجارة الخارجية للإفلاس !!!
- إفلاس روسيا عام 19988 بسبب الأزمة الإقتصادية الناتجة عن تحولها من دولة شيوعية الى رأسمالية ...
- إفلاس الأرجنتين عام 2001 بسبب الأزمة المالية وتعاظم الديون ...
- وغيرها كثير ...
أما الولايات المتحدة ... فأفلست مرتين:
الأولى في عام 1933 عندما صدر أمر تنفيذي بمصادرة الذهب من أيدي المواطنين لصالح الدولة.
وكان سعره 20 دولارا للأونصة ثم رفع سعره الى 35 دولارا للأونصة.
أما الثانية فكانت في عام 1971 م، عندما أوقفت تغطية الدولار بالذهب، ما يعد إفلاسا فعليا.
إنتهى المقال ..
 منقول بتصرف من ويكيبيديا الموسوعة الحرة

الرجل الأصفر

 صحيت على جرس الباب فوجدت امامى راجل يرتدى زى غريب أصفر × أصفر وعلى وجهه أبتسامة صفراء ويحمل كرتونه لونها أصفر × أصفر وقال لى : حضرتك زيزو بيه – أيوه أنا حضرتى زيزو بيه أى خدمه قال : أمضى هنا وأستلم الكرتونه دى فيها كيلو سكر وكيلو أرز وكيلو فول وباكو شاى 100 جرام وصابونه بريحه هديه من جمعية (محاربة الغلاء) سعرهم فى السوبر ماركت 40 جنيه ادفع 20 جنيه وخلى الباقى علينا 
 المفاجأة جعلتنى ألهج بالشكرأتمتم بكلمات غير مفهومه فقال لى : عايز تقول حاجة يا غلبان يامحترم .. قلت مسموح أنى أقول
قال : أتفضل
قلت : أنا أول مره أسمع عن الجمعية دى وهل الكرم الزائد ده حيكون كل شهر..
قال : قول يارب ..ده مشروع أعانة البيه الغلبان وماعلى الدليفرى ألا التوصيل من الباب للباب
 عشر دقائق لأجد التليفون بيرن أسمع صوت حريمى يتحدث بكل ثورية وجديه : الرجل الأصفر وصل لحضرتك .. أيوه وصل ..- لوسمحت أقرأ الرقم الموجود على الكرتونه .. الرقم 777..- أحنا آسفين يافندم .. الكرتونه جائت لحضرتك بطريق الخطأ .... كرتونة حضرتك رقمها 778 وأيه تفرق دى عن دى .. – قطعا هناك فرق .. كرتونة سعادتك فيها 2كيلو لحمه وفرختين و4 كيس مكرونه و3 زجاجات زيت بخلاف السكر والأرز والفول والصابونه أم ريحه الهدية لكن سعرها 200 جنيه فقط وسعرها فى السوبر ماركت عامل حوالى 398 جنيه حضرتك أدفع الفرق وأستلم كرتونتك مع تحيات جمعية محاربة الغلاء .. ياله باى
 دقائق ويدق جرس الباب فأجد الرجل الأصفر أمامى وهو ينحنى بكل أدب ويقدم شديد الأعتذار وفى يده أيصال بباقى القيمه 178 فقام بتسليمى الأيصال وهو يعتذر وأعطيته 200 جنيه ووعدنى بأنه سيقوم بأحضار الباقى مع الكرتونه الجديده فوراً( وأنا فى نيتى أن أترك الباقى كبقشيش للرجل الأصفر )
 - أستأذن حضرتك أنزل أحضر الكرتونه من اللورى الذى وصل الأن وصوت كلاكسه حضرتك سامعه ..أيوه سامعه .. دقيقة واحده بس ( وهو يشير بعقلة أصبعه ) وأنطلق كالريح ومازلت أنتظره حتى الأن.. لو حد فيكم ياجماعة قابل الرجل الأصفر يبقى يقوله يبعث الكرتونه رقم 778

أنتحار القاضى

مات المستشار وسره مدفون فى قبره قبل أن يعترف على من معه .. والذى ضبطت معه الفلوس كان هو الأولى أن ينتحر (اللبان مدير المشتريات) وهذا يدل على أنه كان مجرد وسيط ومخزنجى المغاره .. وبموت المستشار ضاعت حلقة الوصل التى تربط المخزنجى بباقى العصابة .. جاء أعلان موته على طريقة آل كابونى بالتخلص من شهود الأثبات قيل الوصول للمحكمة 
 حادثة الأنتحار بالكوفيه فى محبسه غير مستساغة وفين وفى داخل محبسه بالرقابة الأدارية .. الكثيرين يقولون بأن المستشار قتل ولم ينتحر وتم قتله بطريقة أحترافية وهو ماجعل لجنة من مجلس الدولة تحضر التشريح .. المبلغ الذى تم ضبطه يجعلنا فى حيرة وهو بالجنيه وبالدولار واليورو بما يعادل 160 مليون جنيه ونسأل متى تم تكوين هذا المبلغ .. هل هى حصيلة رشاوى أو هو أختلاس أموال عامة أو هى نتيجة التزوير فى محررات رسمية بالصرف أو هى غسيل أموال عن طريق تجارة العملة .. هذه القضية بها مرشد قريب الصلة بالمستشار واللبان وهو الذى ارشد عن مغارة اللبان وهو مفتاح السر .. بالرغم أن القضية أموال عامه وهى تخص عموم الشعب فقد أصدر النائب العام حظر بنشر أى شيئ عن التحقيقات .. الفساد فى بلدى ما العنك

حدث فى ليلة رأس السنه

 جائتنى دعوة لحضور حفلة رأس السنة التى أقامتها قنوات النيل المتخصصة والمذاعة تليفزيونيا .. أرتديت بدلة المناسبات السينيه الكحلى والبابيون ورشيت نفسى برائحة القرنفل ودلكت وجهى بكريم اساس لتغطية اثار الزمن ونظرت لنفسى فى المرآه وقلت مشجعا : مش معقول حلاوتك دى وفى تمام الحادية عشرة ذهبت إلى الحفل لأجد أعداد غفيرة من الأمن المركزى والمدرعات فأطمئن قلبى بأننا لن ننفجر فى هذا الحفل فوجدت فى مدخل القاعة رئيس التليفزيون ووزير الثقافة وكبار المذيعين والمذيعات وهم يستقبلونى فى حفاوة بالغة فأسقط فى يدى وأنا أقول كل الناس دى عرفانى أزاى !!
 دخلت الصالة ورسمت على وجهى أبتسامة الواثق من نفسه وهجم عليا عدد من الممثلين المبتدأين وهاتك يابوس ويا ترحيب وكأنهم يعرفوننى حق المعرفة وقصوا شريط المبّوسه وأتهريت بوس وأحضان دافئة ونظرات حالمة من قدامى وعواجيز الفنانات ونادت بوسى على أحدى المدعوات .. تعالى سلمى على الباشا ياسوزى ده أكبر منتج فى مصر .. ثم قالت مداعبة أنت شكلك أتغير كثير ياباشا .. للأحسن ولا للأسوء.. للأجمل ياباشا ..قمر يا أخواتى ..لعلمك رقصة رأس السنه تكون من نصيبى .. أصوات نسائية من حولى أنا أنا أنا .. خلاص خليكوا حواليا وأول ماينطفئ النور هى ونصيبها أللى حترقص معايا .. وطوال الحفل سلمت على طوب الأرض وبوست جميع الممثلات والكومبارس والمخرجات والكوافيرات والبودى جاردات ومنظمين الحفلة .. ماخلتش حد ألا لما بوسته ..البوس هناك كان للروكب
مذيعة الحفل بدأت فى العد التنازلى ..3..2..1..00 هوبا وأنطفأ النور وضعت بين فساتين السهرة وأقدام النساء وظل النور مغلقا فترة طويله والنساء تصرخ ولعوا النور فيه حاجات مش تمام وأنا أقاوم بكل ما أوتيت من قوة لأتخلص من هذا الكم الهائل من الأحضان والقبلات وكأنى غريق أصارع من أجل الحياة وكنت أأن بأنين خافت وظل يرتفع ويرتفع حتى صرخت بأهلى صوتى .. أرحمونى ياولاد الكلب
يد تربت عليا : زيزو هم مين ولاد الكلب أللى عايزهم يرحموك ياحبيبى
- مين..أمتى ..و فين.. أشهد الا اله الا الله .. ياساتر اللهم ما أجعله خير وتكون سنه جميلة كلها حب وبوس
هى : بوس؟؟ ..
- أنا قلت بوس ..
– أيوه قلت .بوس
- يظهر أنا بخرف
 – طب قوم أشرب الينسون وكل الزبادى لما أشوف أيه حكايتك الصبح خخخخخخخخ

حوارات بائسة (4)

مع مذيع الغبراء
 - أنا مع السيسى قلباً وقالبا فى كل أللى بيعمله.. كفاية أنه وفر لنا الأمن الأستقرار وحمانا من الجماعة الأرهابية مش أحسن ما نبقى زى سوريا والعراق
- ماشى مش حرد عليك وأنت عارف ليه ..وأيه رأيك بقى فى الغلاء 
 - شعبنا بيدلع والوقت ده مش وقت دلع ماهى الناس أهه ماشيه قدامك وماليين القهاوى والكافيهات والأسواق شغاله والبيع والشراء على ودنه .. غلاء أيه أللى بيقولوا عليه.. قصدك على سعر اللحمة بلاها لحمة.. الجيش مالى الجمعيات باللحمة عايز تاكل لحمة بلدى أدفع.. مش قد ثمنها عندك اللحمه البرازيلى والسودانى والهندى والصومالى .. حتقولى فراخ مش لازم تجيب فرخة حية وتدبحها أشترى نصف فرخة مثلجة كفاية .. شعبنا مش واخد على أقتصاد الحرب.. أوروبا فى الحرب العالمية الثانية كان نصيب الفرد بيضه واحده فى الأسبوع
- ماشى مش حرد عليك وأنت عارف ليه ..وأيه رأيك بقى فى أزمة السكر
-لأزمة دى مفتعله ورائها الأخوان والتجار الجشعين والحكومه وراهم بتقبض عليهم
- لكن بالرغم من كده السكر الحر مش موجود فى السوق ياحمؤه
 - ياراجل ماتقولش كده عربيات التموين والجيش فى الشوارع والميادين بتوزع السكر ..عايز سكر حر أيدك على 100 جنيه وحيوصلك منى بكره 5 كيلو
 - ماشى مش حرد عليك وأنت عارف ليه ..لماذا لم يتم القضاء على الأرهاب حتى الأن شوفت حادثة تفجير البطرسية
 - أسألك أنا لماذا لم يتم القضاء على الأرهاب فى سوريا والعراق وليبيا وأوروبا وأمريكا وروسيا الأرهاب أصبح ظاهرة عالمية
 - لا تجاوب على سؤالى بسؤال فكل دوله لها ظروفها ونوعية الأرهاب فيها فلا تتحاور وتهرب من السؤال
- وماتعرفش أن الأرهاب هو من أهم الأسباب التى أدت لأرتفاع الأسعار
- أخيرا يا أستاذ أحمد أنت بتقبض مرتبك بالدولار ولا بالجنيه
- شويه بالدولار والباقى بالجنيه
- هل صحيح أنك بتقبض 300 ألف جنيه فى الشهر
- أيوه صحيح وده أقل مرتب لو قارناه بمرتبات المذيعين فى أمريكا وأوروبا
- أستاذ أحمد روح منك لله الشتيمه خساره فيك من أخذ من ذهب المعز ضرب بسيفه
 - زيزو أنا عارف طريقة ردك لوسمحت أبعد عن قفايه لأنه ملتهب أضرب فى أى حته تانيه لوسمحت

السيمون فاميه

- كل حاجة غليت الشيكولاه والكفيار والسيمون فميه
-  ألا قوليلى يا شيرى أنا بأسمع عن السيمون فميه ولا عمرى شوفته ولا عمرى دوقته ده صتف حلو ولا حادق ولا دهان للركبه ولا علاج للكحة 
 السيمون فيميه ياعمو هى شرائح السلمون الفرنساوى المدخنه طعمها اكثر من رائع تستخدم بشكل عام لفتح النفس على الأكل وممكن تدخل فى بعض الاطباق كالمكرونه بالسيمون فيميه ..فيه سلطه فظيعة انا شخصيا بأموت فيها تتكون من شرائح السيمون فيميه و الخس الافرنجى و حلقات البصل مع التوابل الهندى ..ياياى.. لعلمك السيمون فميه مفيد قوى لكبار السن.. جميع عواجيز أوروبا بيأكلوه فى الثلاث وجبات
- ألاقيه السيمون ده فى أنهى أجزاخانة ياشيرى
 - ياسلام عليك ياعم زيزو لعلمك لو روحت أي هايبر كبير ... هاتلاقي السيمون فيمية موجود ناحية التلاجة اللي فيها الكافيار والأجبان الغريبة اللي بتسمع عنها بس وماتعرفش تنطق أسمائها ... ودايماً بتلاقيه مُغلف في عبوات بلاستيكية شفافة لونها مغري ... وهو مميز بلونه وتعرفه من بين مليون سمكه .. السيمون فيميه علشان ماتهش لونه برتقالي ... بس بعيد عنك ممكن تضرب لك بتاع 5 كيلو منه وما تشبعش
- وده الكيلو منه بكام ياشيرى ولا بيتباع بالجرام
- الفرنساوى الفرنساوى قبل ما الدولار مايشد كانت العبوه الكيلو بـ 300 جنيه دلوقتى بقت بـ  540 جنيه شوفت الأفترى يا أونكل
- فعلا أفتراء ياشيرى
- بس في سيمون فميه مصرى الكيلو بـ 3100 موجود فى كارفور ومترو بس مش حييجى حاجة جنب المستورد..حعزمك على كيكه بالسيمون فميه حتحبها قوى
- وأنا حرد العزومة بأكلة رنجة وبصل أخضر وتشوفى مين يكسب سيمون فماهيك ولا رنجتنا...
- للى عايز يجرب.. الاسم الفرنسى Saumon fumé بـ 540 جنيه
نداء أنسانى
 مش لاقيين السيمون فميه ياسيسى ولا المحلى ولا المستورد أبنتنا شيرى مصابه بأكتائب شديد بعد أختفائه

حوارات بائسة (2)
بيع نفسك شوف الشارى مين؟
- أنتى مابترديش على التليفون ليه يابت
- أنا حره أرد ما ردش 
- أحنا مش مخطوبين ولا مش مخطوبين
- أيوه متزفتين .. سألت نفسك أحنا مخطوبين بقالنا كام سنه .. بقالنا 77 سنين ياسيد وأنت محلك سر مفيش خطوه لقدام
 - ماهو أنتى شايفه الظروف الهباب أللى بتمر بيها البلد حالها واقف ومفيش شغل طيب أعمل أيه أنا لو ينفع أبيع نفسى كنت بعت نفسى أقولك أيه أكثر من كده
 - الكلام بتاع السيسى مايمشيش معايا ياسيد تبيع نفسك ترهن كليتك وتسبلى فى عنيك وتقولى أنتى نور عنيا خلاص الكلام مابقاش يأكل معايا .. أنا بالعربى أتقدم لى عريس أمبارح وجاهز من مجاميعه وعنده شقه فى مساكن الزلزال هواها يرد الروح ومش حيخلى أبويا يدفع أبيض ولا أسود
- (يقبض على رقبتها حتى كادت أن تختنق) سيب رقبتى ياسيد وبلاش غباوه
- مين يابت الواد بتاع مساكن الزلزال ده قولى ولا أخلص عليكى
- سعيد حمامات
- السباك مالقتيش غير الحمار ده .. متجوز قبلك 33 نسوان بعتينى برخص التراب يابنت القرندلى علشان شقه فى المساكن بكره يشد عليكى السفون.. عقابا ليكى روحى أتجوزيه ياكلبه وأنا جاى النهارده أقابل أبوكى ياريت تجهزى حجاتى وفلوس الجمعية والعباية الفستقى أللى جبتها لأمك
 - جاهزين ياخويا فلوسك ودباديبك وعبايتك ..بس والنبى ماتزعل نفسك مصيرك تلاقى بنت الحلال أللى أحسن منى .. أنا كبرت ياسيد وعايزه أخلف لى عيلين وحالك حيطول ياحبيبى
- ماتقوليش الكلمه دى لوكنت حبيبك صحيح  ماكنتيش عملتى كده.. خطوبه وجواز تانى من غيرك أستحاله.. أنا حسيب البلد كلها وأسافر على مراكب المهاجرين لأيطاليا
- بلاش ياسيد..السكه خطره
 - قال أيه رماك على المر قال أللى أمر منه .. ورضينا بالغلب والغلب مارضاش يابلد .. ميعادى مع أبوكى الساعه خامسه سلام

حوارات بائسة (1)
طعميتك سكر
- هى الطعمية غليت ولا أيه ..أمبارح كنت واخد 4 طعميات بجنيه وأكبر من دى النهارده مفيش ألا 33 بس وصغيرين ومكعبرين وكلها عيش ومفيهاش ريحة الخضرة
- أيوه ياسيدى غليت شوف الدولار كان أمبارح بكام والنهارده بكام .. الدولار بـ 20 جنيه ياحاج
- الله ..يعنى لما الدولار يبقى بـ 30 جنيه تقف الطعميايه بكام يا أسطى 
- أقولك ( يفتح الأله الحاسبه ويكتب عليها عدة أرقام ) تبقى بالصلاة على النبى بحوالى 4.999 جنيه يعنى 5 جنيه لأن القروش أتلغت
 - ألا قولى يا أخ مال الطعميه ومال الدولار يطلع ولا ينزل هو أنت بتستوردها لا مؤاخذه الفول مصرى والزيت مصرى والخضره مصريه
- أنت فاهم غلط يا أستاذ.. الزيت اللى بنستورده زاد أمبارح بس 44 جنيه مره واحده فى الكيلو يعنى الطن زاد 4000 آلاف جنيه والفول البلدى زاد 3جنيه فى الكيلو وحزمة الشبت والبقدونس والكُرات أصبحت بجنيه والكهرباء والميه زادت النص وأسطوانات البوتجاز زادت 3 أضعاف وبنشتريها من السوق السوداء وأهى أيام سوداء علينا وعلى الجميع
- وأيه ياعم اليافطه دى كاتب فيها علبة عدس أصفر ورغيف عيش وبصلايه خضراء بـ 99 جنيه العلبه دى شكلها أيه
- أهه قدامك أهه
- دى ..بجد حرام العلبه أللى قد علبة الزبادى بـ 9 جنيه دى ما تأكلش عيل صغير
- آه فيه أللى أكبر بـ 12 جنيه وتاخد بصلتين .. شوف كيلو العدس وصل 300 جنيه حنعمل أيه يعنى حنقطع من جتتنا ونأكل الشعب .. روحوا للى عوم الجنيه ورفع أسعار الميه والكهرباء والغاز وزود الضرائب على كل حاجة .. من قيمة شهرين كنا بنبيع بنصف الأسعار دى أو أقل والناس كانت راضيه بعيشتها مش عارف أيه أللى طق فى دماغ أم الحكومه تستلف من البنك الدولى وتخرب بيوت 70 مليون فقير : الخشب قال للمسمار فلقتنى ..قاله ماشوفتش الدق أللى على دماغى .. ياباشا روحوا للى ماسك شاكوش الأسعار وقولوا له يبطل دق علشان الناس تعيش ومايجيش اليوم ألا تبقى فيه الطعميايه بـ 5 جنيه