البغبغان الذى طفش

أحد المعارضين كان يقرأ مايكتبه فى الجريدة والفيس بوك أمام البغبغان الموجود فى غرفة مكتبه وعندما يحضر أى ضيف تجده يصرخ وهو يقول : الشعب مش لاقى ياكل ..مفيش أمن ولا أمان.. البلد مديونه لشوشتها ..البطاله زادت ..الشباب فى السجون

فقال له صديقه سيكون هذا البغبغان  سبب فى أعتقالك  لو زارك ضابط أمن دوله وهو دليل أتهامك

-        تفتكر أعمل أيه أبيعه ..

-        أيه ضمنك اللى حيشتريه منك ياخده ويسلمه لحبايبنا

-        حاولت مره أطيره رجع تانى وقعد يخبط على زجاج الشباك وهو يصرخ أفتح أحسنلك وألا حبلغ عنك

-        انا عندى فكره جهنميه ..

-        قولها انا فى عارضك

-        أنت تنزل عند بائع الجرائد اللى تحت وتشترى الأهرام والآخبار والجمهورية واليوم السابع وبالمره هات كتاب الآنجازات بتاع صاحبنا وأقعد أقرأ المقالات وأختم بكتاب الآنجازات وشوف البغبغان حيعمل أيه

أخذ بنصيحة صديقه وظل يقرأ المقالات والبغبغان يصرخ ويضرب رأسه فى حديد القفص فقام بفتح باب القفص فطار ووقف على سور النافذه وهو يصرخ 17 ألف مشروع فى السنه ياولاد الكلب أنا ماليش عيشه فى البلد دى أنا راجع موزمبيق