الكثير منا تعجب من قيام استاذة الجامعة (منى البرنس ) بنشر فيديوهات وهى ترقص ولكنى لم أتعجب بعد أن عايشت وشاهدت قصة الهام شكرى التى لا تستطيع أن تتحكم فى نفسها عند سماعها صوت الطبله .. تعالوا نقرأ الحكاية
جلست أمام الطبيب وهى تبكى بحرقه وهو لا يعطيها أى أهتمام فقد أعتاد على هذه المواقف بعيادته النفسيه وبعد أن هدأت قليلا سألها ليسجل بياناتها : أسمك وسنك ؟؟ - أنا أسمى ألهام شكرى عمرى 44 سنه متزوجه وعندى أربعة أولاد ولدين وبنتين وجوزى ناظر مدرسه ثانوى وهو منتظر بره- بتشتكى من أيه ياست ألهام
- بصراحة بصراحة أنا بأحب الرقص- تحبى يعنى تتفرجى على الراقصات وهن بيرقصوا مافيهاش حاجة دى ياست ألهام- لأ مش زى ماحضرتك فاهم .. أنا بحب أرقص
وماله ياستى ماترقصى هو حد بيكره الفرفشه ده الرقص أحد وسائل العلاج النفسى
- برضه مش فاهمنى يادكتور أنا بالعربى ما أقدرش أمسك نفسى لما أسمع الموسيقى وخاصة دقة الطبله فألاقى نفسى سيبت كل حاجة وهاتك يارقص فى أى وقت وأى مكان سواء كنت فى البيت أو بره البيت وممكن يكون فى الشارع لو عديت من أمام محل عصير قصب أو محل بيبيع شرايط الكاسيت أو من الراديو أو التليفزيون ولا يفوتنى فرح دون أن أرقص فيه سواء دعونى أو لا ولما أرقص يعتقد البعض بأنى أجامل العروسه أو العريس أو أقاربهما ومش عارفين بأن دى هوايتى المفضله
الدكتور وهو مندهش : ترقصى فى الشارع يا مدام ألهام- مش بقولك غصب عنى ..المهم بعد أن أرقص وأتمايل أشعر براحة غريبه فتهدأ أعصابى ويعتدل مزاجى وأبقى مش عايزه أكلم حد وأرجع البيت لأنام بعمق وأصحى وأنا آخر فوقان .. أما بقى لو مارقصتش أكون فى منتهى العكننه والعصبيه عاديك على أللى بيحصل أكسر أى حاجه قدامى وينصب غضبى على زوجى وأولادى ..بأموت فى الزار والرقص السودانى قالت لى كودية الزار أنى عليا عفريت تركى أمه سودانيه ماخدتش فى بالى ..المهم عندى أن أرقص لحد ما أتعب وأتهد وبعدها أرتااااح أقربها أمبارح كنت واقفه فى البلكونه بأنشر الغسيل وعيال الشارع شافونى وهاتك ياطبل .. طوحت الغسيل فى الشارع ونزلت رقص لدرجة أن الشارع أتقفل من كتر الزحمه- الله يكون فى عون جوزك وأولادك - أهو عندك بره أسأله .. طب اتفضلى أنتى فى الأوضه أللى جنبى ينادى على التمرجى خد المدام وشغلها موسيقى رقص بلدى وخلي جوزها يتفضل
الأستاذ / محفوظ عبد الكريم ناظر المدرسه رجل يبدو عليه الوقار والأحتشام ويقدم نفسه للدكتور عدلى ويدردشان سويا- المدام قالت لى على كل حاجة لكنى أفضل أن أسمع منك مايحدث بالفعل لعلى أجد حل لمشكلتها- يادكتور هل قالت لك عما تسببه لنا من أحراج مع الأهل والجيران- الحقيقة قالت ونصف العلاج هو رغبة المريض فى العلاج- قالت لحضرتك عن عدد بدل الرقص أللى أشترتها وبتلبسها لما بتجلها الحاله
لأ ماقلتش- قالت لحضرتك بأنها تقوم بعمل حركات بأصابعها ووسطها زى عوالم محمد على ..لأ ماقلتش- قالت لحضرتك بأنها تجبرنا بأن نقوم برمى الفلوس عليها وهى بترقص- لأ ماقلتش .. قالت لحضرتك بأنها أخدت مصروف البيت وفكته جنيهات وعملته أعقاد تلبسها وهى بترقص ..لأ ماقلتش- قالت لحضرتك أن هى أشترت طبله ورق وعلمت عليهم العيال عشان ترقص على واحده ونص .. لأ ماقلتش
الحقيقة يادكتور أنا متفهم لحالتها وأعتبرتها مريضه وعرضتها على دكاتره وأعطوها بعض المهدآت فلم تغير من الأمر شيئا فأشارت علينا حماتى انى اخدها للمشايخ .. فمنهم أللى عملها رقيه شرعيه وأللى عملها حجاب وأللى قعد يضحك ويطبلها وقام يرقص ويزغرط وأللى قال أن عليها عفريت سفلى وأللى قال معمول لها عمل على وسط رقاصة فى المكسيك ..الدكتور وهو متأثر : فعلا هى حالتها تقارب مرض الفصام العقلى وهذا المرض درجات يتفاقم لو تم أهماله ليصل لدرجة يصعب فيها العلاج .. سأقوم بعمل تحليل نفسى لها مع جلسات تنويم وجلسات كهرباء خفيفه وحنشوف أيه النتيجه أحضرها باكر المستشفى وسأحجزها لحد ماتشفى - الجلسات دى حتطول- على حسب النتيجه ممكن 6 أشهر أو سنه بالكتير- سنه يادكتور مش كتير !! مش ممكن قبل كده- أنت مستعجل ليه يامحفوظ بيه
أصل الحقيقة أحنا قبضنا عرابين أفراح ومرتبطين بمواعيد وعقود مع بعض المحلات وأنت عارف الصيف طالع وموسم كل سنه وأنت طيب والدنيا غاليه نار والعيال محتاجه مصاريف ينظر الدكتور عدلى لمحفوظ وهو يفتح فمه ويسلك أذنيه ليتأكد من سماع هذا الكلام ثم يمسك فى رقبة محفوظ وهو يصرخ : حتجننونى ياولاد المجنونه .. أطلع بره وخد الوليه أللى جوه دى معاك- مش حترضى تمشى يادكتور
ليه بقى ياخويا- لازم تدفع أجرتها أو تدخل تنقطها
يضحك الدكتور عدلى بهستريا ويقتحم غرفة الكشف التى ترقص فيها ألهام وهى مندمجة فى الرقص ويغلق الكاسيت : ياله ياحجه شطبنا مش عايزين النهارده
ألهام تتوقف عن الرقص ويبدو عليها الغضب وتزووم بصوت مرتفع كالوحش المفترس وتتجه للدكتور عدلى وتقبض على رقبته
أنت أزاى تقفل الكاسيت قبل ما أخلص الوصله بتاعتى ياض أنت قد الحركة دى
سيبى رقبتى بقولك .. قولنا خلاص شطبنا وحنقفل المحل
طب أيدك ياحدق على الأبيج ..مش ألهام أللى يتاكل عرقها ده أنا أشرحك برقبة أزازه- يانهار أسود مجنونه ومجرمه كمان- طلع أللى فى جيبك وألا حخلص عليك
خدى كل أللى معايا وأيراد العياده بس سيبى فلوس أركب بيها المواصلات
تترك ألهام رقبة الدكتور عدلى بعد أن أخذت مامعه وترمى له ربع جنيه وتتأبط زراع محفوظ وهى تخرج من باب العياده فيصرخ الدكتور وهو يقول : يامجنونه يابنت المجانين .. أنت ناظر أنت راجل هزوء.. يضحك محفوظ وهو يتأبط زراع ألهام وهو يقول : أكلها المغفل ...ههههههههه
ليست هناك تعليقات:
إرسال تعليق