الله حى المخبر جاى

الضابط : أسمك أيه

- فى الشغل حسن أبوعلى وفى بطاقة الرقم القومى القمص فانوس دانيال وفى البيت الحاج سونه وقدام حضرتك أسمى نعيمه اللئيمه

-بتشتغل أيه يانعيمه قصدى ياسونه

- مخزنجى  الصبح فى الحكومه وبعد الظهر قومسينجى وبالليل مخبر وأحيانا  لما تزنق معايا بأشتغل محلل أستراتيجى فى التليفزيون  

- انت شارب حاجه .. – ايوه شارب سفن أب على سيبرتو

- كنت فين لما شباب المنطقه خرجوا بالليل وعملوا مظاهره لفوا بيها الحى

-كنت نايم ياباشا

- عندك مايثبت

- المخده والبطانيه وأزازة السفن موجودين مع داهيه مراتى بره

- نادى على الست اللى قاعده بره ياعسكرى

-أسمك وسنك وعنوانك وبتشتغلى أيه

- أسمى فى الحاره نصيبه.. وجوزى سى الأستاذ حسن بينادينى ياداهيه وفى البطاقه نعيمه على أبو الشخاليل عندى 40 سنه بأشتغل مديرة منزل فى بيت المستشار حمروش أبو طاقيه وساكنه مع جوزى فى حارة الفطسانين

-المظاهرة عديت من تحت بيتك فلماذا لم تقومى بأيقاظ سونه قصدى حسن ليقوم بعمله

- ما أقدرش ياباشا أصحيه هو أنا مستغنيه عنه لو فرضا أتقبض عليه حنعيش أنا والعيال منين .. – ياوليه ده مخبر

- لا يوجد معاه ورقه أو كارنيه تثبت أنه مخبر .. ولو أتمسك ممكن يروح فى الكازوزه مش انا ياباشا كنت مرشده معاكم أيام الهوجه ولما وقعت فى مشكله ماحدش نفعنى

- لو كنا سيبناكى زى ما بتقولى كان زمانك واخده تأبيده أفكرك أتمسكتى بأيه

- كان للتعاطى ياباشا ..

- تتعاطى 10 كيلو حشيش يا مفتريه لولا أن أحنا نسفنا الحرز كنتى زمانك فى خبر كان

- وبما أنكم اللى نسفتم الحرز فين ثمن الحشيش أللى نسفتوه ؟؟

- أمشى أطلعى بره ياوليه وخدى الرجل المسطول ده معاكى.. وأعتبر نفسك مرفوت من شغلانة المرشد يا سونه

يخرج كل من سونه ونعيمه من القسم وهم يهتفون : يحيا العدل .. يحيا العدل المخبر جاى