الحلقة رقم (17)
عمرة رمضان
متولى : ينفع الواحد يطلع عمره وعليه ديون ؟؟ ينفع يعمل عمره ويسيب أهل بيته عايشين على الكفاف ؟؟ ينفع الواحد يستلف علشان يطلع عمره كل سنه؟؟
ينفع الواحد يعمل أكثر من 20 عمرةولم يقوم بحجه واحدة ؟؟
الشيخ : ما ينفعش ياحاج متولى..مين الشخص ده أعرفه
متولى :لأ ما تعرفوش بس أنا عارفه كويس ..يبقى جوز بنتى يا مولانا
الشيخ: هل نصحته ؟؟
متولى : نصحته كتير مفيش فايده ..قال أن زيارته كل سنه ربنا بيشيل عنه فيها كتير ويرزقه من حيث لا يحتسب
الشيخ : ونعمه بالله ..يجوز والله أعلم وكل أنسان و حسب ما يعتقد
متولى : عن أذنك ياعم الشيخ أجيب شوية طلبات للجيش المبلط عندى لمدة عشرة أيام
الشيخ : مع سلامة الله ..والله يكون فى عونك
*******
متولى يفتح باب الشقة ويدخل الأكياس والشنط فيقابل بعاصفة من التهليل من أولاد بنته المرابطه لحين عودة أبيهم من عمرة رمضان :جدو ..جدو ..جدو
فيخرج من جيوبه الحلوى والشكولاته ويأخذ من كل طفل قبله على جبينه مقابل الحلوى
صفاء : بس تاعب نفسك ليه يابابا ياحبيبى ..تعالى أقعد أستريح أنا عايزاك
متولى فى سره ربنا يستر من طلباتها : حاضر .. قعدت ..خير يا صفاء ..أكلمى وخلصينا
صفاء وهى تبدو مرتبكه ومحرجة : فيه شوية فواتير كده مطلوب سدادها وأنت عارف (هشام) سافر وا..وا..وكان مستعجل ومعهوش فكة فما سددش الفواتير
متولى يأخذ من صفاء الفواتير وينظر فيها وهو يهز رأسه ويتعجب :ماكنش معاه فكه يا صفاء الورقه أم ألف جنيه لسه ماطلعتش أيه ده كهرباء وغاز وقسط الغساله وحضانه و..و....
صفاء : وأجرة البيت ..
متولى :كمان ..وعلى كده بسلامته أللى راح يعمل عمره ده ساب لك كام قبل ما يسافر؟؟
صفاء : كل الفلوس أللى سابها أعطيتها لماما
متولى : كام يعنى ؟؟
صفاء ما خلاص يابابا ..ساب 100 جنيه
متولى : 100 جنيه حتكفيكى أكل وشرب أنتى والثلاث عيال لمدة عشرة أيام
وسايب عليه فواتير وأجرة بيت بـ 600 جنيه الجدع ده بيستهبل وأنتى أللى مشجعاه
صفاء : البركه فيك ياحاج
متولى : خلاص البركه خلصتى عليها أنتى وأخواتك
صفاء : أشمعنى سعاد ومحمود الواحد فيهم يطلب الطلب من هنا يكون متنفذ
أنا بنتكم ولا مش بنتكم أنا حاسه أنك بتفرق بينا فى المعامله
متولى : أنتى وجوزك ما وردش عليا زيكم ..أستهبال فى أستهبال حرام عليكم ياعالم ده كل سنه يعمل فيه العامله دى
صفاء تبكى وتقوم منفوضه وهى تقول : مش عايزه حاجه ياله يا عيال ياله بينا على بيتنا ولا الحوجه لحد.. لينا ربنا
متولى : هوه نفس الشريط بتاع كل سنه وهوه نفس البوء ..وهى نفس الخناقه
( تخرج تفيده على بكاء صفاء وهى تمثل بأنها تجمع ملابسها )
تفيده: فيه أيه يامتولى حصل أيه يعنى حتروح فين..بيت أبوها دايما مفتوح
هوه عزوة وسند الواحده فينا فى الدنيا ..عيب كده ياصفاء أقعدى أبوكى بيضحك معاكى ....صفاء : لأ ما بيضحكش المرة دى منظره بيتكلم جد
تفيده : صالحها يامتولى وطيب بخاطرها وأن ماشلهاش الأرض نشلها جوه عنينه ..صفاء :يا حبيبتى ياماما يا أغلى أم
*****
بعد أسبوع جرس الموبايل هشام يتكلم من السعوديه يطمأن على زوجته وأولاده
صفاء : حتيجى أمتى يا حبيبى ؟ هشام : بعد بكره فى طيارة 10 بالليل
صفاء : بابا دفع كل الفواتير والأيجار المتأخر ومش مخلينا عايزين حاجه
هشام : قولى لبابا أننى بأدعيله فى كل صلاة..وجايب له هديه محترمه من الحرم والمدينه يارب تعجبه ..أقل واجب ..سلمى على الجميع
********
فى اليوم السابق لوصول هشام تعكف تفيده على عمل مأكولات وطبيخ يكفى أسبوع لتأخذها صفاء عند العودة لبيتها بعد الفطار
صفاء: مين حيوصلنى بيتى ؟
تفيده : أنتى عارفه أبوكى ما بيسوقش بالليل ..شوفى أخوكى يوصلك
محمود : أنا حا فطر النهارده عند خطيبتى ومش فاضى خدى تاكسى ياستى
ومستعد أدفع لك أجرته
صفاء: مش قصدى حنشيل الحلل والصوانى بتاعة ماما أزاى فى التاكسى
متولى : أمرى للله أوصلك أنا
*********
يمر يومان على وصول هشام من العمرة وقبل المدفع بخمسة دقائق تحضر صفاء وجوزها وأولادها..وبعد أن يفطر الجميع يقوم هشام بفتح شنطه بلاستيك ويقدم هديه عم متولى
هشام : دى هديه بسيطه ياحاج أتمنى أن تعجبك وتيجى على مقاسك
متولى يفتح الهديه فيجد جلباب أبيض وطاقيه ومسبحه فيبتسم وهو يقول :
ليه يا بنى مكلف نفسك كنت وفرت ثمنهم وجيبت حاجة لمراتك وعيالك
جلابية السنه إللى فاتت وأللى قبلها وقبلها لم ألبسهم حتى الأن
متولى : يا سيدى تعيش وتجيب ..
هشام : والله دى من النوع الغالى ياحاج
متولى : هى فعلا غاليه ويتمتم فى سره (كلفتنى 1200 جنيه)
هشام : بتقول حاجه ياعمى
متولى : أبدا بقول لا إله إلا الله
ليست هناك تعليقات:
إرسال تعليق