27- حياتنا أفلام

تحتوى حياتنا على كم هائل من الافلام ..منها الكوميدى والتراجيدى والمأساوى مثل مانشاهده فى السينما ونكون نحن ابطاله ومخرجيه ومشاهديه و ما الدنيــــا الا مســــرح كبيــــر !! كما قال عبقرى الزمن الجميل " يوسف بك وهبى " لكن اساس هذه الجملة جائت فى رواية لشكسبير اسمها " كمــــا  تُحــب"

ونبدأنا يومنا بفيلم وتنتهى حياتنا بفيلم وخذ عبره من افلام السينما

عندما تصحو من النوم وتجد زوجتك  فى وشك مثل (عفريت عم عبده ) وأتقاءً لشرها يجب أن تنحنى وتقول ( صباح الخير يازوجتى العزيزه) وإذا بدأت خناقة الصباح فتشاغل عنها بالموبايل فهو ( حبيبى دائما) اما لو طلبت منك مصروف للبيت فأعمل ( غبى منه فيه)

واحفظ جيدا حركات ( زهايمر) فسيفيدك فى بيتك ومع الدائنين
الحكومه فى جميع قرارتها الأقتصادية تعتبر المواطن هو ( المنسى ) وأصبحت الأسعار

( امرأة بلا قيد) والمواطن يتقمص دور ( الأخرس )ولو تظاهر أو أحتج سيذهب

 ( وراء الشمس ) ولو كنت من جماعة (الأرهاب والكباب )سينفذ فيك (أعدام ميت ) وإذا كتبت لك النجاة فهذه ( حلاوة روح ) وتخرج مرفوع الرأس وتعمل فيها ( سالم أبو أخته)

لو كنت يا أبنى فاكر نفسك (المانى ) وعايز تعمل ( المصلحة) لازم تشوف ( الباشا) اولا ولا تستهبل وتعمل فيها( واحد صعيدى ) وتعيش فيه دور ( الحرامى والعبيط ) ومن غير ( لف ودوران) أدفع بدل ماتقضى (ليله بكى فيها القمر)

لما تكون حماتك عزماك على محشى كرنب (بخلطة فوزية ) خد فى أيدك هدية وأنت داخل  عليها وماتعملش فيها ( لامؤاخذه ) ( كلب بلدى )

يوم الخميس قبل ما ترجع البيت عدى على (الباطنية ) ولا تتحجج ( بظرف صحى ) فأن هذا من ( غش الزوجيه ) والست (بوبوس ) لن ترحمك وستسمع كلمة ( اللى أختشوا ماتوا) لأنها أصبحت ( أمرأه آيلة للسقوط ) وقليل ما رمتك من البلكونه لتصبح ( دماء على الأسفلت )

الست اللى بتلبس جيبه سوداء وجاكيت اورنج فهى تشبه ( تاكسى أسكندرية) وخاصة لو كانت (اكس لارج )ولازم تاخد منها ( موقف) ولو لبست فستان ازرق  ستنافس  (الفيل الأزرق )

ولا تكن مثل الرجل ( الخلبوص )وتضيع عمرك فى ( كباريه ) و تصبح (سفير جهنم)  فى  (شارع الهرم) وخليك محترم( فلست شيطانا ولا ملاكاً) خد بالك من( جدو حبيبى) و(تيته رهيبه) واطلب منهما الدعاء

(نحن لا نزرع الشوك ) بل نزرع (زهرة الصبار) ولا تصرخ من الظلم فلن يسمع أحد ( صرخة نمله) والحياة ماهى ألا ( شروق وغروب) ولا تبكى على ( الأطلال)  وتجرى وراء (السراب ) ولن تكون حياتك (عسل أبيض) أو( عسل أسود) على الدوام بل ستذوق طعم (العنب المر)

                                        *******************************