كلمة فى سرك ألحق رشح نفسك فى أنتخابات الرئاسة القادمة قبل ما يقفلوا الباب
عموما أمامك وقت كافى للتفكير فباقى من الزمن 77 أسابيع .. سترفع حاجب وتنزل حاجب وتفتح فمك الجميل متعجبا وتخبط بيدك على صدرك وتعمل زى عادل أمام وأنت تقول : أنا
أقولك أيوه أنت يا جدع هو أنت أقل من العالم إلى سحبت ورق الترشيح ..عندك مثلا مرتضى منصور حتقول لى العالم دى بتهرج.. فأقول لك : عليا النعمة الناس دى بتفكر صح الصح حتقول لى أزاى يعنى .. حقولك يا أبنى ألم تسمع عن الحكمة المصرية الأصيلة التى تقول : الصيت ولا الغنى ..وأشهر نفسك ولو (....) عيب .. آديك شايف أهه واحد من المرشحين بيقولك أنه حيعفو عن حسنى مبارك لأنه فى منزلة أمير المؤمنين وخذ منده كتير .. مش مهم تنجح أو حتى ماعزة أو بقره حلوب تديك صوتها المهم أنك عندما يفتح باب الدعاية سيتم أستضافتك فى التليفزيون لتعلن عن برنامجك الأنتخابى
حتقولى أنا ما عنديش برنامج أنتخابى .. حقولك أنا تقول أيه لتهرب من هذا المطب
ستقول أن برنامجى يتلخص فى كلمة واحدة فقط وهى الستر فالمشاكل الأقتصادية والأجتماعية وأزمة المواصلات وأزمة الأسكان والكهرباء وسد النهضة وعدم جواز البنات وكافة مشاكل البلد لن يحلها غير الستر وعلى ماتفرج.. المهم فى يوم ظهورك فى التليفزيون أنشر هذا الخبر فى كل حته تعرفها بين قرايبك وزملاؤك فى الشغل ..جيرانك وأصحابك على القهوة وفى النادى وشوف بعدها الشهرة أللى حتحط عليك والخير أللى حيدخلك من حيث لا تدرى ولا تحتسب
فلو عندك بنت أو أخت فاتها قطار الجواز حتتجوز.. حتتجوز حتى لو محجرة تحجيرة الأخوان والعرسان حيقفوا بالطوابير على بابك .. ولو كانت لك تجارة أو محل تجارى السلك ضاربه ومفيش زبون بيعتبه .. أتفرج بقى حيشتغل أزاى كفاية الزباين حييجوا يتفرجوا عليك ويتكلموا معك بصفتك المرشح المحتمل لرئاسة الجمهورية ولو قعدت أعد لك الفوايد أللى حتعود عليك من ترشحك للرئاسة عايزه نهار بطوله ..ياعم زيزو معروف أن السيسى هو أللى حيكسب الأنتخابات بالذوق أو بالعافية.. يبقى أيه لزمته قلة العقل دى .. شهره ياجدع هو فيه حد يكره الشهرة ..يعنى مرتضى ملطوش قصدى منصور ده ناقص شهره .. لأ لأ.. مرتضى ده له هدف تانى والسيسى مشغله لحسابه.. كداب زفه يعنى .. ممكن تقول كده ودى أقل حاجه ؟؟
شوفت الحانوتى أللى مرشح نفسه أتفرج عليه بعد كده قليل لو ما عملش منتجعات لدفن الموتى .. فرصة يا صاحبى وجائت لحد عندك فيه حد يرفس النعمة برجليه .. حتقولى طب أيه المطلوب علشان أترشح حقولك حاجة بسيطة قوى أن يكون سنك عدى الأربعين ومعاك بطاقة رقم قومى ونظارة نظر.. حتقولى أنا نظرى كويس أيه بقى لزمته النظاره .. حقولك لزوم القيافة وبتدل على أنك أنسان مثقف ومطلع ولعلمك كل المرشحين للرئاسة ضاربين نظارات نظر.. شوفت مرتضى وهولابس نظارة النظر الجديده فى ماتش أمبارح المهم أنك تقول أنا متبرأ من الأخوان دنيا وأخره.. عارف الوليه أم تهانى أللى بتشتغل فى اللندرى المغسلة أللى جنبينا رشحت نفسها أمبارح وسحبت الملف وعملت ليلة قدام بيتها وهاتك يا رقص وطبل للصبح هى ونسانسها الثلاثة قصدى بناتها الثلاثة وكل ماحد يتكلم معاها تضرب أيدها فى صدرها تطلع النظارة وتعوج فى لسانها .. ناس فاهمة أصول اللعبة ولعلمك الثلاث بنات أللى دايس عليهم المترو حيتخطبوا يوم الخميس الجاى.. طيب أجيب الـ 15 ألف توكيل أزاى ..ياسلام هى جات على دى تاهت ولقيناها .. كام حديث تليفزيونى على كام مقال فى الجرايد أياها حتلم التوكيلات المطلوبه وأكثر وأنا حوصى صحابى على الفيس بوك يعملوا لك توكيلات
صحيح طب بينا يا صحابى نسحب لنا ملفين ونعمل كشف نظاره .. حتى لو ما ترشحناش يبقى للذكرى من ريحة أنقلاب 30/6.. وكل سيسى وأنت طيب
ليست هناك تعليقات:
إرسال تعليق