13- الرجل الذى مات مرتين

وحدوه ..لا اله الا هووو..كلنا لها يارجاله هاتووه هنا على المغسله براحه.. مفيش ميه سخنه ياسمير بيه ينفع نغسله بميه صاقعة .. ياعم ينفع خلصنا .. هو حاسس بحاجة ..

الحانوتى يوجه كلامه لأهل الميت : ماجبتوش لا شامبو ولا بلسم..لأ .. ولا ليفه ..لأ .. ولا  كولونيا  لأ ولا حتى سفنجه لا حول الله يارب.

سمير :.ياعم أنت حانوتى ولا كوافير ناقص تقولى نعمله مانيكير وباديكر .. خلص ياعم الحاج .. الميت حيضرب منك وانت قاعد تتشرط

- ماينفعش ..يانشتغل صح يابلاش.. الميت بيطلع من تحت أيدى كأنه رايح يوم فرحه  هات ياواد ياخشبه الشامبو والبلسم والليفه والسفنجه والمشط وفورشة الشعر  ومقص الضوافر  والكولنيا وكله حنضيفه على الحساب موافقين .. موافقين خلصنا .. هو المرحوم كان بيشتغل أيه لا مؤاخذه ..

( يهمس أحدهم فى أذنه بوظيفة الميت ) فيتراجع للخلف ويقول : انا أتخدعت لو كنت أعرف من الأول بيشتغل أيه ماكنتش وافقت على المقاوله دى اللى أتفق معايا قالى ده راجل غلبان وأرزقى وعلى باب الله ويطلع فى الأخر فى المركز الجامد ده وجايبينه قورديحى بكفن من بتوع الصدقه اخصصص

-       تصدق أنك حانوتى معفن وأستغلالى

-       أنا برضه أللى أستغلالى أبوك اللى مش عايز تدفع فيه ولا مليم كان واكل البلد فى كرشه وعلى قلبكم فلوس قد كده

-       اتنيل فى يومك الأغبر ده وخلصنا خلينا ندفنه ونخلص

( الحانوتى يتركه ويخرج من عنبر الغسيل ويغلق الباب خلفه) أنت ياراجل أنت رايح فين

-       مش شغال الا لما يطلع الجدع ده بره ونتفق على مقاوله صح .. فين أخت المرحوم فين مراته

-       أيه فيه أيه .. بتزعق ليه

-       يرضيكم ان فلان  باشا على سن ورمح يتكلفت كده زى الناس الغلابه .. البيه أبنه جايب له أرخص كفن وعايز يحاسبنى بتسعيرة الناس العاديين شوفوا لكم حانوتى تانى

-       خلاص شوف اللى أنت عايزه كام وأعمل أنضف شغل معاه .. أطلع بره ياسمير خلى الأسطى يشوف شغله والتكلفه حنخصمها من الميراث.. أهو كده كلام الهوانم الصح الصح

يدخل الحانوتى ليبدأ عمله ويفتح حنفيات الماء البارد على الجثمان فينتفض الباشا ويقعد على طرف الطاوله وهو يتشهد : اشهد ان لا اله الا الله وان محمد رسول الله.. أنا فين

يصرخ الحانوتى ويكبر ويجرى ليبشر أهله .. الباشا صحى الباشا صحى ..

سمير وهو يجرى هربا  ومعه باقى أفراد عائلته : غور وشك فقرى الميت يصحى على أيدك أستلقى وعدك من الباشا .. يقف الحانوتى مزهولا وهو يشاهد اهل الباشا وهم يهربون عندما علموا بعودته للحياه ..كان عندكم حق بأستعجالكم بدفنه ..

 ياه ياباشا الميتين مارضيوش بك واقرب الناس

 هربوا منك ماعملتش حساب اليوم ده .. 

خشبه : يا معلم يامعلم الميت مات تانى يامعلم 

- مش مهم هات عدة الشغل خلينا نكفنه قبل مايرجع فى كلامه