فى أتصال تليفونى جماعى مع صديقات عفاف .. تحكى عن مواقف زوجها سمير
وعينه الزايغه
نادية : جوزك عمل فيك أيه تانى يافوفا
عفاف : عمله أسود بعيد عنك ..تصدقى الراجل اخدنى النادى يوم الجمعة
أللى فات فلبست وأتشيكت وأتوليت وبقيت زى القمر ويا أرض أتهدى ماعليكى قدى قام أيه
قاعد لى فى النادى ومدينى قفاه وعامل نفسه بيقرأ الجورنان وعينه رايحه جايه مع كل
واحده تعدى من قدامه ..أنادى عليه مابيردش ياسمير مفيش سمير أترنى البيه عينه
متابعة بنت مقروده مربربه ماشيه عماله تتمايص ولابسه لبس التنس.. بالجيبه المينى
أللى فوق الركبه بـ 20 سنتى .. الدم ضرب فى نفخوى فقمت قايمه وشده منه الجورنان
وقولتله : أن ماكنتش حتحترم نفسك أنا قايمه من هنا وراجعة البيت حالا ..أختشى الناس
تقول عليا أيه مش ماليه عينك ولا اللى قاعده جانبك دى حلة كيك ولا شوال بطاطس
ناديه : هيه وبعدين وعمل أيه
- قال أيه يحلف ويتحالف بأنه مابيبصش عليها وأنه بسلامته مشغول بحادثة
فى الجورنان عن الراجل أللى خنق مراته وقطع لسانهاعلشان عكننت مزاجه وهو بيقرأ
الجورنان..أخدت منه الجورنان أن ألاقى حادثة بتتكلم عن الحكاية دى مالقتش .. يعنى
عينه زايغه وكذاب وأرهابى
ولاء : أرهابى أزاى يعنى.. فاكر لما حيقولى أن فيه واحد خنق
مراته حخاف وأترعب وأنسى نصيبتة السوده فى البص على الستات ..أنا خلاص الراجل ده
حيجننى ..أنا عفاف أللى الناس كلها بتحلف بجمالى وحلاوتى أتقرطس على آخر الزمن
أومال لو كنت وحشه كان عمل أيه..؟؟
- ولاء : ولا حاجة أعملى نفسك مش شايفاه وأشغليه معاكى بأى حديث
عفاف : أيه أيه أيه ..عايزه دمى يتحرق وأقعد ساكته .. مش أنا
ياحبيبتى من النوع البارد ده.. ده أنا ضغطى أرتفع ودماغى سخنت وعنيه أحولت وأنا
شايفاه عنيه حتطلع على البنت أم جيبه قصيره
ناديه :ماهو أنت يا أم مخ طاقق لو بصيتى حواليكى حتلاقى معظم الرجاله
أللى قاعدين كانوا بيبصوا عليها أنت مش عارفه الرجاله أسألينى أنا.. جنس نمرود
مايملاش عينه غير التراب
عفاف : أنا ماليش دعوه بالرجاله بتهبب أيه المهم جوزى بيعمل ايه ..
ياجماعة أنتم مش عارفين أنا دمى بيتحرق أزاى ..ولاء : أنت مكبره الموضوع قوى
وأكيد نكدتى عليه وخليتى القاعده بقت غم
عفاف : أومال يعنى عايزانى أعمل أيه .. أضحك وأزقطط وأجيب له هديه
..وحياتك قوّمته على ملى وشه ومارش على البيت وكانت ليله كحلى على دماغه
ناديه : طب ده حصل وأنت معاه ..تفتكرى يعنى مش حيبص وهو لوحده ولا
حتربطى عنيه وتمشى وراه فى كل حته ..عفاف : يعمل أللى يعمله لوحده
ربنا يحاسبه أنما يبقى قدامى ده لا ممكن أنشالله
يكون آخر يوم فى عيشتى معاه
ولاء : يعنى الموضوع دخل فى كرامتك ومش موضوع زوغان عين جوزك
عفاف : طبعا كرامتى فوق كل حاجة أن ماكنتش الست مننا تبقى ليها
أحترامها وكرامتها عند جوزها يبقى يا لله السلامه...سلام سلام ياجماعة أحسن سمير جه وبيزعق بره.. باى..أيوه
جايه حالا ياحبيبى كنت بكلم مين ؟ .. كنت
بكلم ماما بسأل على صحتها ياروحى
ليست هناك تعليقات:
إرسال تعليق